ދާރިސް (ބާރަވަނަ ބައި)

ކޮންމެ ދުވަހެކޭ އެއްފަދައިން އޭނަ ސްކޫލުން ގެއަށް އަންނަމުން ދިޔައީ އެކަނިހެން ހީވަމުން ދިޔައެވެ. ބޫޓު ބޭލުމަށްފަހު ގެއަށް ވަންނަމުން ދިޔަ ވަގުތު މުޅިންވެސް ހީވީ އެހެންނެވެ. އެހެނަސް ހިބާ ގެއަށް ވަދެގެން ގޮސް ކޮޓަރިއާއި ހަމައަށް ނުދެވެނީސް ފަހަތުން އިވުނު އަޑުން ހިބާގެ ފިޔަވަޅުތަކުގައި ތަޅު އެޅުވުނެވެ.

 

“ތެން…ކިއު ހިބާ…” ދުވަހަކުވެސް އަޑު އިވިފައިނުވާ އެ ފިރިހެންވަންތަ ފުން އަޑެއް އިވިފައި ހިބާގެ ގައިން ހީބިހިވެސް ނެގިއެވެ. އެއީ ކާކުތޯ ހިތަށްއެރި ވަގުތު ފަސްއެނބުރި ބަލައިލެވުނެވެ. އެހިނދު ގޭގެ ދޮރުމަތީގައި ހުއްޓިހުރީ ދާރިސް ނޫން ދެވަނަ މީހެއް ނޫނެވެ.

 

ހިބާއަށް މިފަހަރު އޭނަގެ ޚިޔާލުތަކުން ނިކުމެވުނީ، ކުލާހަށް ވަދެގެން އައި ނަޝާ އޭނައަށް ގޮވައިލުމުންނެވެ. އަދި އިންޓަވަލް ގަޑި ނިމެން ކައިރި ވަނީ ނޫންތޯ ބުނުމުންނެވެ. ހިބާ އާނއެކޭ ބުނެ ނަޝާގާތު ކުދިން ދެން އޮތް ގަޑިއަށް ތައްޔާރު ކުރުވުމަށް ބުންޏެވެ. އެއާއިއެކު ނަޝާ ހުރިހާ ކުދިންނާއި މުޚާތަބުކޮށް ހިބާ ބުނިގޮތަށް ކަންތައް ކުރަން ފެށިއެވެ. ހިބާ ފުން ނޭވައެއް ދޫކޮށްލުމަށްފަހު މާޒިން އޭނައަށް ދިން ކާޑު މޭޒުމަތީގައި ބޭއްވުމަށްފަހު މާޒިންގެ ފޮތް މާކްކުރަން ފެށިއެވެ.

 

**

 

އޮފީސް މަސައްކަތުގެ ތެރެއިން މެންދުރު ނަމާދު ވަގުތު ޖެހުމުން އީތަން އާދައިގެ މަތިން ވަގުތުން ނަމާދު އަދާކުރިއެވެ. ކެބިންގައި އޭނަ ނަމާދުކޮށް ނިމުނުތާ މިނެޓްތަކެއްފަހުން ފޯނު ރިންގުވާން ފެށުމުން އީތަން ގޮސް ކޯލު ރިސީވްކޮށް ސްޕީކަރަށްލިއެވެ. އެކޮޅުން އިވުނީ ޖޯޖްގެ އަޑެވެ. ޖޯޖް އެހައިލީ އިރުކޮޅަކަށް އޭނަގެ ކެބިންއަށް ވަދެވިދާނެތޯއެވެ. ޖޯޖް ދައްކަން އެއުޅެނީ ކޮން ވާހަކައެއްކަން އެނގިހުރެ އީތަން އިޒުނަ ދިނެވެ.

 

އީތަން އޭނަގެ ގޮނޑީގައި އިށީން ވަގުތު ޖޯޖް ކެބިންއަށް ވަދެގެން އަންނަނީއެވެ. ޖޯޖް އައިސް އީތަންގެ މޭޒު ކުރިމަތީގައި ހުއްޓިލަމުން ވާހަކަ ދެއްކިއެވެ.

 

“ސާރ އެދިލެއްވި ފަދައިން މިހާރު ހުންނާނީ މޯލްޑިވްސް ޓީޗާރސް ކޮންފަރެންސްގައި އޮންލައިންކޮށް ސާރއަށް ބައިވެރިވެވޭނެ އިންތިޒާމްތައް ހަމަޖެއްސިފަކަމަށް ދަންނަވަން. ކޮންފަރެންސްގެ ޝެޑިއުލް އަދި ދެ ދުވަސްފަހުން ފޮނުވާނެ ވާހަކަ މޯލްޑިވްސް ނޭޝަނަލް އިންސްޓިޓިއުޓްއިން ދެންނެވީ.” ޖޯޖް ބުންޏެވެ.

 

“ހުމް…ވަރަށް ބޮޑަށް ޝުކުރިއްޔާ.” އީތަން ހިނިތުންވެލަމުން ބުނެލިއެވެ. ބަދަލުގައި ޖޯޖްވެސް ހިނިތުންވެލުމަށްފަހު ދާން އުޅުނެވެ. އެހެނަސް އޭގެ ކުރިން އީތަންއަށް ބަލައިލިއެވެ.

 

“ސާރއަށް ވެސް ވަރަށް ބޮޑަށް ޝުކުރިއްޔާ….އަޅުގަނޑު މި ވޭތުވެ ދިޔަ ދެތިން ދުވަހު ބުނުމެއްނެތި އޮފީހަށް ނައުމުން ވެސް އަޅުގަނޑަށް އިތުބާރު ކުރީތީ. އަދި….އަޅުގަނޑުގެ ޢާއިލާއަށް އެހީވީތީ.” ޖޯޖް އިސްޖެހިފައިހުރެ ބުންޏެވެ.

 

“އިތުބާރު ކުރެވޭނެއެއްނު؟ ޖޯޖްއާއެކީ މަސައްކަތް ކުރާތާ ތިންވަނަ އަހަރުވިއްޔާ މިއީ. ސަބަބެއް ނެތި ޖޯޖް ނައިސް ނުހުންނާނެކަން އެނގޭ. މިހާރު ދަރިފުޅު ކިހިނެއްތަ؟ ސާޖަރީއަށްފަހު ޑޮކްޓަރުން ބުނީ ކީކޭ؟” އީތަން އެހިއެވެ. މީގެ 3 ދުވަސްކުރިން ޖޯޖް އޮފީހަށް ނައިސް ހުންނަން ޖެހުނީ ހިތުގެ މައްސަލަ ހުންނަ ޖޯޖްގެ ދަރިފުޅު ނޭވާ ހާސްވެ އެމަޖެންސީ ޙާލަތަކަށް ދިޔުމުންނެވެ. އީތަންއަށް ޖޯޖްއަށް ގުޅައިލެވޭ ގޮތްވީ އެއްދުވަސް ފަހުންނެވެ. ޖޯޖް ރޮވިފައިހުރެ ދަރިފުޅުގެ އޮޕަރޭޝަންތަކަށް ލާރި ނެތް ވާހަކަ ބުނުމުން އީތަން އެހީވީ ދެވަނަ ވިސްނުމެއްވެސް ނެތިއެވެ.

 

“ބުނީ ޤަވާޢިދުން ޑޮކްޓަރުންނަށް ދައްކާށޯ. މިހާރު ދަރިފުޅުގެ ޙާލަތު ވަރަށް ރަނގަޅުކަމަށް ބުނީ. ސާރ ވެ ދެއްވި އެހީއަށްޓަކައި އަދިވެސް އެއްފަހަރު ޝުކުރު ދަންނަވަން. އަޅުގަނޑަށް ވީހާވެސް އަވަހަކަށް ސާރ ހޭދަކުރެއްވި ޢަދަދު އަނބުރައި ދެވޭތޯ ބަލާނަން.” ޖޯޖް ބުންޏެވެ.

 

“އޭގެ ބޭނުމެއްނެތޭ ޖޯޖް. ސާރ ޤަބޫލުކުރާ ގޮތުގަ އެހެން މީހަކަށް އެހީއެއްވުމަށް ހޭދަކުރާ ފައިސާއަކީ ގެއްލޭ އެއްޗެއް ނޫން. ﷲ އަބަދުވެސް އޭގެ ބަދަލު ދެއްވަވާނެ.” ޖޯޖްއަށް ނަސޭޙަތެއް ދިނުމަށް އީތަން އެ ފުރުސަތުގެ ބޭނުން ހިފިއެވެ.

 

“އެކަމަކު ސާރ-“

 

“ޖޯޖް އެއްވެސް އެއްޗެއް ފޮނުވިޔަސް ސާރ އެ ޢަދަދު އަނބުރާ ޖޯޖްގެ އެކައުންޓަށް ފޮނުވާނަން. ސާރއަށް އެނގޭ ލޯންގެ ކަންތަކާ ހެދި ކިހާ ދަތިކޮށްކަން ތިއުޅެނީ…ސާރ ނުއުޅެން ސާރގެ އެހީ ޖޯޖްއަށް ލިބުނު ވާހަކަ އެހެން މީހުން ކައިރި ދައްކާކަށް. ސާރ މިކަހަލަ ކަމެއްކޮށްފަ ކަންތައް ފޮރުވާ ގޮތް ޖޯޖްއަށް ވެސް ދެތިން ފަހަރަކު ފެނިފަ ކަންނޭނގެ ހުންނާނީ…”

 

“އާދެ ސާރ…”

 

“އެހެންވީމަ ދެން ސާރއަށް ރަނގަޅީ ޖޯޖްވެސް އެ ވާހަކަ ނުދެއްކިއްޔާ. ސާރ ވެދިން އެހީގެ ބަދަލުގަ ޖޯޖް ލައްވާ އިތުރު ކަމެއް ކުރުވަން ވެސް ސާރ ނަހަދާނަން. ޖޯޖްއަށް ކުށެއް ކުރެވުނަސް އެ އެހީވެދިން ދުވަހުގެ މަތިން ހަނދާންކޮށްދީ ދެރަކޮށްނުލާނަން. ތިއީ ސާރގެ ނަޒަރުގަ ސާރ ވެސް އިޙްތިރާމް ކުރަންޖެހޭ ޤަދަރުވެރި އިންސާނެއް…”

 

“އެންމެ ރަނގަޅު ސާރ. އެހެންވެއްޖެއްޔާ ސާރ އަޅުގަނޑަށް ވެދެއްވި އެހީގެ ބަދަލުގަ އަޅުގަނޑު އިހުނަށްވުރެ ރަނގަޅަށް ސާރއަށްޓަކައި މަސައްކަތް ކޮށްދޭނަން…މި ކަމަށް މަނާ ނުކުރައްވައްޗޭ!” ޖޯޖް ހިނިތުންވުމަކާއެކީ ބުންޏެވެ. އީތަން ވެސް ހިނިތުންވުމަކާއެކީ ބޯޖަހައިލަމުން އެންމެ ރަނގަޅޭ ބުނެލިއެވެ. އެއާއިއެކު ޖޯޖް ދެން ދިޔައީ ކަމަށް ބުނުމަށްފަހު ކެބިންއިން ނިކުމެގެން ދިޔައެވެ.

 

ޖޯޖް ލޯމައްޗަށް ގެއްލެންދެން ބަލަން އިނުމަށްފަހު އީތަން ފުން ނޭވައެއް ދޫކޮށްލިއެވެ. މީހަކު ކަމެއް ކޮށްދިނުމުން ކޮންމެވެސް އެއްގޮތަކަށް އޭގެ ބަދަލު ދިނުމަކީ އިންސާނާގެ ފިތުރަތުގައިވާ ސިފައެއްތާއޭ ހިތަށްއެރިއެވެ. އެ ހިނދު އޭނަގެ ހަނދާނަށް އަންނަން ފެށީ އޭނައަށްޓަކައި ކަންތައް ކޮށްދިންހާ މީހުންނެވެ. އޭނަގެ ގާތުގައި މިއަދު ހުރި ދޮންބެ އިން ފެށިގެން އެތައް ދަތިތަކާއެކީ ވެސް އަމިއްލަ ރަށަށް ގެންގޮސް އަމިއްލަ ގޭގައި އޭނަ ބެހެއްޓި ޝަހީދުބެ އާއި ހަމައަށެވެ. ޝަހީދުބެ ގެ ނަން ހަނދާންވުމާއިއެކު ހިތަށް ވެރިވެގެން ދިޔައީ ހިބާގެ ނަމެވެ. އެހިނދު އީތަންއަށް ހީލެވުނީ ބޭއިޚްތިޔާރުގައެވެ. ހިބާއަކީ ވެސް އޭނައަށް އެހީވި ފަރާތަކަށްވީތީވެއެވެ.

 

އެ ޚިޔާލު ހިތަށް ވެރިވުމުން އީތަންގެ ހަނދާނަށް އަންނަން ފެށީ އޭނަގެ ސިކުނޑީގައި ބިންވަޅު ނެގިފައިވާ ހިބާގެ ހަނދާނެވެ. އެއީ ޝަހީދުބެގެ ރަށަށް ގޮސް އެންމެ ފުރަތަމަ އޭނަ ސްކޫލަށް ދިޔަ ދުވަހެވެ. އެ ދުވަސްމަތިން އޭނަ ހަނދާން ނައްތައިލާނީވެސް ކިހިނެއް ހެއްޔެވެ؟ އެއީ އޭނައާއި އެއް ޢުމުރެއްގެ ކުއްޖަކު ފުރަތަމަ ފަހަރަށް ސްކޫލްގައި އޭނަ ދިފާޢުކުރި ދުވަހެވެ. އަދި އެއީ ވެސް އަންހެން ކުއްޖެކެވެ.

 

އެދުވަހު ކުލާސް ކުރިމަތީގައި މަޑުކޮށްގެން ހުއްޓާ ކުދިންގެ މަލާމާތުގެ ބަސްތަކާއެކީ އެހެނިހެން ޙަމަލާތައް އަމާޒުވާން ފެށުމުން އޭނައަށް ހުރެވުނީ ގެންނަންވީ ޙަރަކާތެއްވެސް ނޭނގިފައެވެ. ކުދިންގެ ހުނުމުގެ އަޑުތަކުން އޭނައަށް މަލާމާތް އަމާޒުވަމުން ދިޔަކަން އެނގި ލަދުގަތް ހިނދު އެހެނިހެން އުދަގޫތަކެއް ވެސް ވަމުން ދިޔައެވެ. ކުދިންގެ އަޑުތަކާއި ބިންމަތީގައި ޖެހެމުން ދިޔަ ކަރުދާސް ގުޅަތަކުގެ އަޑުތައް އޭނަގެ ކަންފަތުގައި ގުގުމަމުން ދިޔަގޮތުން އެތަނުން ދާން ބޭނުންވިއެވެ. އެހެނަސް ސިކުނޑިއަށް ވަމުން ދިޔަ އުދަގުލުގެ ސަބަބުން އެވަގުތު އަތާއި ފައިން އެއްވެސް ޙަރަކާތެއް ނުގެނެވުނެވެ. ބައެއް ކުދިން އޭނައަށް މަންމަނޭ ކިޔައި ގޮވަމުން ދިޔައީތީ އޭނައަށް ވާހަކަ ދެއްކޭކަމަށް ވެސް ބުނަން އިންތިހާއަށް ބޭނުންވިއެވެ. އެހެނަސް އެވަގުތު ދޫވެސް ޙަރަކާތް ނުކުރިއެވެ.

 

މިފަދަ ޙާލެއްގައި ވަނިކޮށް އޭނަ ސިއްސައިގެން ދިޔައީ އެއްފަރާތުން އިވިގެން ދިޔަ ބާރު އަޑުންނެވެ. އެ އަޑާއެކީ މުޅި ކުލާސް ހިމޭންވެގެން ދިޔަ ހިނދު އޭނައަށް އެދިމާލަށް ބަލައިލެވުނެވެ. އެ ހިނދު އަންހެން ކުއްޖަކު ތެދުވެގެން އޭނަގެ ކައިރިއަށް އަންނަމުން ދިޔަތަން ފެނުނެވެ. ނަޒަރު ހަމައަކަށް އަޅުވަން ވަގުތު ނެގީތީ އެއީ ހިބާކަން އޭނައަށް ނަގައިގަނެވުނީވެސް ހިބާ އައިސް އޭނަގެ ކައިރީގައި ހުއްޓި ވާހަކަ ދައްކަން ފެށުމުންނެވެ. ހިބާ ވާހަކަ ދައްކަނީ އޭނައަށްޓަކައިކަން ދޭހަކުރަން ވަގުތުކޮޅެއް ނެގިއެވެ. އެކަން އެނގުންވުމުން އެކަން ޤަބޫލުކުރަން ވެސް ދަތިވިއެވެ. އެހެނީ މުދައްރިސަކު ނޫނީ އޭނަގެ މަންމަ ފިޔަވައި އެއްވެސް މީހަކު އެހާތަނަށް އައިއިރު އޭނަ ދިފާޢުކޮށްފައެއް ނުވެއެވެ. ދޭތެރެދޭތެރެއިން އިސްޖެހެމުން ދިޔައެއްކަމަކު އެހެން ދިމާލަކަށް ނަޒަރު ބަދަލު ނުކޮށް ހިބާއަށް ބަލަން ހުރެވުނީ އެހެންވެއެވެ.

 

ހިބާ ދެއްކި ވާހަކައިގެ ތެރެއިން ކުލާހުގައި ހުރި ކުއްޖަކު ‘ރައުފް ބުނާނީ ކީކޭބާ’އޭ ބުނުމުން އޭނައަށް އެކަމާއިމެދު ވިސްނުނެވެ. އަދި އަމުދުން ކުލާހަށް މުދައްރިސް ވަދެގެން އައިސް ހިބާގެ ބެލެނިވެރިޔާގާތު ކުލާހުގައި އަޑުގަދަ ކުރި ވާހަކަ ބުނެވޭނެ ކަމަށް ބުނުމުން އެކަމާއިމެދު ކަންބޮޑުވިއެވެ. އޭނައަށްޓަކައި ހިބާ ކުރި ކަމެއްގެ ސަބަބުން ހިބާއަށް ދެރައެއް ލިބޭން އުޅުނުހެން ހީވުމުންނެވެ. އެހާ ހިސާބުން ފެށިގެން ސެޝަން ނިމެންދެން ވެސް އޭނައަށް އެކަންތަކާއިމެދު ވިސްނެމުން ދިޔައެވެ. އަދި އަމުދުން ހިބާއަށް ލިބުނު އިންޒާރުތަކަށްފަހު ވެސް ހިބާ އޭނައަށް އެހީވި ގޮތުން ހިތުގައި ޝުކުރުވެރިކަމެއް އުފެދުނެވެ. ހިބާއާއި ފުރަތަމަ ދިމާވި ދުވަސްކޮޅު ހިބާގެ ފަރާތުން ފެނުނު ރުޅިވެރިކަމުގެ މަތިން މުޅިން ހަނދާން ނެތޭ ގޮތްވިއެވެ. ހިބާގެ ބައްޕަ ބުނި ފަދައިން ހިބާއަކީ ރުޅިގަދަ ވިޔަސް ރަނގަޅު ކުއްޖެއްކަމަށް ޤަބޫލު ކުރެވުނެވެ.

 

ހިބާގެ ފަހަތުން ގެއަށް ހިނގާފައި ދިޔަ މަގުމަތީގައި އޭނަގެ ސިކުނޑީގައި ދައުރުވަމުން ދިޔައީ އެ ޚިޔާލުތަކެވެ. ހިބާ ބޫޓު ބޭލުމަށްފަހު ގެއަށް ވަންނަންދެން ގޭގެ ފާރު ކައިރީގައި މަޑުކޮށްގެން ހުރީ ހިބާ ބޭނުންވާނީ އެގޮތްހެން ހީވުމުންނެވެ. ހިބާ ގެއަށް ވަދެގެން ދާން ފެށުމުން އޭނަ އަވަސް ފިޔަވަޅުތަކެއްގައި ދޮރު ކައިރިއަށް ދިޔައީ ކޮންމެހެން ވެސް ހިބާއަށް ޝުކުރު އަދާކޮށްދިނުމަށެވެ. ހިބާ އޭނައަށް އެހާ ބޮޑުކަމެއް ކޮށްދިނުމުން ބަދަލުގައި އޭނައަށް ކޮށްދެވިދާނެ އެންމެ ކުޑަ ކަމަކީ އެއީ ކަމަށްވީތީވެއެވެ. އޭނަ ގޮސް ދޮރުމަތީގައި މަޑުކޮށްލި ހިނދު ހިބާ ގޭގެ ތެރެއަށް ވަންނަމުން ދިޔަ މަންޒަރު ފެނިފައި އަވަސްވެގެން ދިޔަ ހިތަކާއެކީ އޭނައަށް ވާހަކަ ދެކެވުނެވެ.

 

“ތެން…ކިއު ހިބާ…” ދާރިސްއަށް އެހެން ބުނެލެވުނީ ޖެހިލުންވުމަކާއި އެކީގައެވެ. އެއާއިއެކު ފުރަތަމަ ފަހަރަށް ހިބާއާއި ވާހަކަ ދެކެވިއްޖެކަން އެނގުންވި ހިނދު ހިތް މޭތެރޭގައި އޮވެ ބާރަށް ތެޅެން ފެށިއެވެ. އޭނަ ވާހަކަ ދެއްކުމުން ހިބާ ކަންތައް ކޮށްފާނެ ގޮތަކާއިމެދު ހިތް ނުތަނަވަސްވިއެވެ. ހިބާ ފިޔަވަޅުތައް މަޑުޖައްސައި އޭނައާއި ދިމާލަށް އެނބުރިލީ ވަގުތު އެ މޫނުމަތިން ފެނުނު ކުލަވަރު ދޭހަކުރަން ނޭނގުނީތީ އެ ނުތަނަވަސްކަން ދެގުނަވިއެވެ. ނަތީޖާއެއްގެ ގޮތުން ހިބާއަށް ބަލަހައްޓައިގެން ހުންނަން ދާރިސްއަށް އިހުނަށްވުރެ އުދަގޫވިއެވެ.

 

“ވޯޒް ދެޓް ޔޫ؟” ހިބާ އަހައިލި އަޑު އިވުނެވެ. އެ ސުވާލު ކުރެވުނު ރާގުން ހިބާ އެހެން އެހީ ޙައިރާންވުމުން ކަމެއް، ނޫނީ ރުޅި އައިސްގެން ކަމެއް ނޫނީ މަލާމާތަކަށް ކަމެއް ދާރިސްއަށް ދޭހައެއް ނުކުރެވުނެވެ. އޭގެ ޖަވާބުގައި އެއްޗެކޭ ބުނަން ނޭނގިފައި ހުރެވުނީ އެހެންވެއެވެ. އެހެނަސް މާ ގިނައިރެއް ނުވެ ހިބާގެ ލުއި ހީލުމެއްގެ އަޑު އިވިފައި ދާރިސްއަށް ހިބާއާއި ދިމާލަށް ބަލައިލެވުނީ ބޭއިޚްތިޔާރުގައެވެ.

 

“ޔޫ އާރ ވެލްކަމް….” ހިބާ އެހެން ބުނެލި ވަގުތު ދެވުނު ނަޒަރުން ހިބާގެ ހިނިތުންވުން ފެނިފައި ދާރިސްއަށް އުފަލެއް ލިބުނެވެ. ހިބާ އޭނައަށް ރުޅިއެއް ނޫންކަން ޔަޤީން ކުރެވުމުންނެވެ. އެހިނދު އޭނައަށް ވެސް ހިނިތުންވެވެން އުޅުނެވެ. ހިބާ އޭނައަށް ބަލަން ހުރެފައި ދާން ހިނގައިގަތުމުން ނޭނގޭ ސަބަބަކާހުރެ އޭނަގެ ހިތުގައި ޝަކުވާވެސް އުފެދުނެވެ. އެހެނަސް އޭނަ ދެންވެސް ގެއަށް ވަންނަން ދިޔައީ، އޭނައަށް މި ބީރައްޓެހި ރަށުން އާ އެކުވެރިއަކު ލިބިއްޖެކަމުގެ ޔަޤީންކަމާއެކީ ހިތްހަމަޖައްސަމުންނެވެ.

 

ސްކޫލުން އައިސް ދެން ވީ ފެންވަރައި ތާޒާވެލަން ކަމަށް ދާރިސް ނިންމީ، މާލޭގައި ހުރިއިރު ސްކޫލުން ގެއަށް އައިސް ކަންތައް ކުރަނީ އެހެންކަމަށް ހަނދާން ކުރަމުންނެވެ. ތާޒާވެލުމަށްފަހު ދުވަހުގެ ފިލާވަޅުތައް ނިންމަން އުޅެފައިވެސް ސިޓިންގް ރޫމަށް ދާން ނިންމީ، ޝަހީދުބެ ގެއަށް އަންނަންވާއިރަށް ދިމާކުރުމަށެވެ. ޝަހީދުބެ ގެ ގޮތް އޭނައަށް ވެސް އެނގޭތީ، މުދައްރިސެއްގެ ފަރާތުން ހިބާގެ ޝަކުވާ އައިސްފިނަމަ، ހިބާއާއި ކުރިމަތިލާނެކަން ޔަޤީންކުރެވުނެވެ. ޝަހީދުބެ ހަރުކަށިކަން އިސްނުކުރާނެކަން އެނގުނަސް، ދާރިސް ހިބާ ދިފާޢުކޮށްދޭން ބޭނުންވިއެވެ. ހިބާވެސް އޭނަ ދިފާޢުކޮށްދިން ފަދައިންނެވެ.

 

އެ ނިންމި ނިންމުމުގެ މުހިއްމުކަން ދާރިސްއަށް އެނގުންވީ، އޭނަ ސިޓިންގް ރޫމުގެ ގޮނޑިއެއްގައި އިންދާ، ހިބާ އެތަނަށް އައިސް ކުޅޭ އެއްޗެހި އަތުރައިގެން އިން ހަމްނާއަށް ގޮވައިލުމުންނެވެ.

 

“ދޮންތަގެ ހަމްކޮ…..ބައްޕަ މިހާރު އަންނާނެ އިރުކޮޅަކުން އިނގޭ. ބައްޕަ ދޮންތައާއި ބެހޭގޮތުން ސުވާލުކުރިއްޔާ ބުނައްޗޭ ދޮންތަ އޮތީ ނިދާފައޭ…” ހިބާ ކުރުފައިމައްޗަށް ތިރިވެ ހަމްނާގެ ދެކޮނޑުގައި ހިފަހައްޓައިގެން ހުރެ ބުނި މަންޒަރު ދާރިސްއަށް ފެނުނެވެ. ހަމްނާ އެ ވާހަކައަށް ބޯޖަހައިލި ވަގުތަކީ ޝަހީދުބެގެ ސައިކަލުގެ އަޑު ބޭރުން އިވުނު ވަގުތެވެ. ހިބާ އަދިވެސް އެއްފަހަރު ހަމްނާ ގާތު އެނގިއްޖެދޯއޭ ބުނުމަށްފަހު ދުވެފައި އެތެރެއަށް ދިޔައެވެ.

 

ހިބާގެ ކޮޓަރީގެ ދޮރު ލެއްޕުނުތަނާހެން ގޭގެ ދޮރު ހުޅުވިގެން ދިޔައެވެ. ދާރިސް އެދިމާލަށް ބަލައިލި ވަގުތު ޝަހީދުބެ ގެއަށް ވަނީއެވެ. ޝަހީދުބެ ފެނުމާއެކު ހަމްނާ ‘ބައްޕަ’އޭ ކިޔައި އުފަލުން ޝަހީދުބެ ގާތަށް ދިޔުމާއެކު ބޭބެ ހަމްނާ އުރައިލިއެވެ. އަދި ހަމްކޮ ކިހިނެއްތޯ އަހައިލުމަށްފަހު ދޮންތަ ކޮބައިތޯ އެހިއެވެ.

 

“ދޮންތަ ދެންމެއަކު އައިސް ހަމްކޮ ކައިރި ބުނީ ބައްޕަ ކައިރި ބުނާށޯ ދޮންތަ އޮތީ ނިދާފައޯ.” ހަމްނާ ބުނެލި ވާހަކައިން ދާރިސްއަށް ކަންބޮޑުވުމަކާއެކީ ކޮޅަށް ތެދުވެލެވުނެވެ.

 

“އަސްލުވެސްތަ؟ ދެންމެއަކު ވެއްޖެއްޔާ އަދި ނުނިދޭނެ ކަންނޭނގެދޯ؟ ހަމްކޮ މަޑުކޮށްލައްޗޭ މިތާ ޝަހީދުބެ ދޮންތައާއި ވާހަކަ ދައްކާލާފަ އަންނަންދެން…” ޝަހީދުބެ އެހެން ބުނަމުން ހަމްނާ ތިރީގައި ބެހެއްޓުމަށްފަހު އެތެރެއަށް ދާން ހިނގައިގަތުމުން ދާރިސްއަށް ތެޅިގަނެވުނެވެ.

 

“ޝަހީދުބެ!” ދާރިސް ޝަހީދުބެގެ ފަހަތުން ދަމުން ގޮވިއެވެ.

 

“ލައްބަ ދާރިސް….ދާރިސްއާ ވާހަކަ ދައްކަން ބޭބެ އެބަ އަންނަން އިރުކޮޅަކުން. މިވަގުތު ހިބާއާއި ދައްކަންޖެހޭ މުހިއްމު ވާހަކައެއް އެބައޮތް…” ޝަހީދުބެ ވާހަކަ ދައްކަމުން ކުރިއަށް ދިޔައެވެ.

 

“ހިބާ އޮތީ ނިދާފައޭ ބޭބެ. ހިބާ އެހެން ބުނިއިރު އަޅުގަނޑުވެސް ހުރިން. ވަރަށް ބަލިވެ ކަންނޭނގެ ހިބާ އުޅެނީ.” ދާރިސްއަށް ދޮގު ހަދައިލެވުނު ގޮތުން ޚުދު އޭނަ ވެސް ޙައިރާންވާ ގޮތްވިއެވެ.

 

“ދާރިސްއަށް ވެސް ދޮގު ހަދަން ދަސްކޮށްދީފިދޯ އެ އަންހެން ކުއްޖާ؟ މިއަދު ރަނގަޅު ފިލާވަޅެއް ދޭނަން…” ޝަހީދުބެ އެހެން ބުނެލީ ހިބާގެ ކޮޓަރިއާއި ކައިރިވީ ވަގުތެވެ.

 

“ޝަހީދުބެ އެހެން ނަހަދައްޗޭ! ހިބާ ވަރަށް ރަނގަޅު….ހިބާ އެހެން ހެދީ އަޅުގަނޑަށްޓަކައި.” ދާރިސް ބުންޏެވެ. އެއާއިއެކު ކޮޓަރީގެ ދޮރުގެ ތަޅުގައި ހިފަން އުޅުނު ޝަހީދު ގެ ޙަރަކާތްތަކަށް ހުއްޓުމެއް އައެވެ.

 

“ކީކޭ؟” ޝަހީދު އެހިއެވެ.

 

“ލައްބަ ބޭބޭ….އެ ކުލާސް ކުދިން އަޅުގަނޑަށް މަލާމާތްކުރީ. އަޅުގަނޑާއި ދިމާލަށް މަންމަނޭ ކިޔައި ހީހީފަ އެއްޗެހި އުކީ. ހިބާ ތެދުވެފަ އެމީހުންނަށް ރައްދު ނުދިންނަމަ އެކުދިން އަޅުގަނޑަށް އިތުރު އަނިޔާތަކެއް ކުރީސް….” ދާރިސް އެހެން ބުނުމާއެކު ޝަހީދުގެ މޫނުމަތިން ކަންބޮޑުވުން ފާޅުވިއެވެ.

 

“ސުބުޙާނަ ﷲ! ތިއީ ތެދެއްތަ؟ ތިކުދިންގެ ސާރ ބުނީ ހަމައެކަނި ހިބާ އެ ކުލާސް ފިރިހެން ކުދިންނާ ތޮޅުނު ވާހަކަ. ބޭބެ ހީކުރީ އަނެއްކާވެސް ކޮންމެވެސް ކުޑަ ކަމަކު ހިބާ ރުޅި އިސްކުރީ ކަމަށް….” ޝަހީދު ބުންޏެވެ.

 

“ނޫން ބޭބޭ. ސާރ ނެތް ގަޑީގަ އެކުދިން އެހެން ހެދީ…ހިބާ ބުނަން ވެސް ބުނި އެކުދިން އަޅުގަނޑަށް މަލާމާތް ކުރި ވާހަކަ. ސާރއަށް ނުއިވުނީ ކަންނޭނގެ.” ދާރިސް ކިޔައިދިނެވެ. އެއާއިއެކު ޝަހީދު ފުން ނޭވައެއް ދޫކޮށްލިއެވެ.

 

“ދެން…ދެން ދަރިފުޅު ރަނގަޅުތަ؟ އެއްވެސް ތަނަކަށް ތަދުވޭތަ؟ ބޭބެއަށް މަޢާފުކޮށްދެއްޗޭ ސްކޫލްގަ އެގޮތަށް ކަންތައް ވީ ކަމަށްޓަކައި. ބޭބެ މި މައްސަލަ ޕްރިންސިޕަލާއި ހަމައަށް ގެންގޮސް އެކުދިންނަށް އަދަބު ދެވޭތޯ ބަލާނަން. މާ ބޮޑަށް ދެރަ ނުވައްޗޭ އެކުދިން ބުނި ބަސްތަކާއި ކުރި ކަންތަކާހެދި…” ޝަހީދު ބުނެލިއެވެ.

 

“ދެރައެއް ނުވޭ ބޭބޭ. ދެރަ ނުވަނީ މިއަދު ހިބާ އަޅުގަނޑަށްޓަކައި ވާހަކަ ދެއްކި ގޮތުން. ވަރަށް ބޮޑު ހިތްވަރެއް ލިބުނު ހިބާގެ ސަބަބުން.” ދާރިސް އެ ވާހަކަ ބުނެލީ ތެދުތެދަށެވެ. އެ ހިނދު ހިތުތެރޭގައިވީ އާދަޔާ ޚިލާފު އުފާވެރިކަމެކެވެ.

 

“އެންމެ ރަނގަޅު….އެހެންވީމަ ބޭބެ ދެން ހިބާއާއި ވާހަކަ ދައްކާނީ ފަހުން…ދާރިސް މިއަދު ދެވުނު ފިލާވަޅުތައް ނިންމައްޗޭ. އެއްވެސް ޝައްކެއް އޮތިއްޔާ ބޭބެ ކައިރިން އަހާތި. އެހެންނޫނީ ބޭބެ ހުންނަ ގަޑިއެއްގަ ހިބާ ކައިރިން އަހައިލިޔަސް ހެޔޮ. ބޭބެ މިދަނީ ކޮޓަރިއަށް…” ޝަހީދު ބުންޏެވެ. ދާރިސް އެ ވާހަކައަށް ބޯޖަހައިލުމުން ޝަހީދު އޭނަގެ ކޮޓަރިއާއި ދިމާލަށް ދިޔައެވެ.

 

ޝަހީދުބެ ކޮޓަރިއަށް ވަން މަންޒަރު ބަލަން ހުރެފައި ދާރިސް ވެސް އެތެރެއަށް ދާން އުޅުނީ، ހިބާއަށް އެހީވެވުނީތީ ހިތާހިތުން އުފާކުރަމުންނެވެ. އެހެނަސް ދެ ފިޔަވަޅެއްހާވަރު ކުރިއަށް އެޅުނުތަނާހެން ކުލާހުގައި ހުރި ފިރިހެން ކުއްޖަކު ހިބާއާއި ދިމާލަށް ބުނެލި ވާހަކަ ހަނދާންވިއެވެ. ‘ރައުފް’އަށް މިކަން އެނގޭބާއޭ އެހުމުން ހިބާ ހިމޭންވިގޮތް ހަނދާންވިއެވެ. ރައުފްއަކީ ކާކުތޯ ހިތަށްއެރި ވަގުތު ހިބާ ކައިރިން އަހައިލަން ހިތް ބުންޏެވެ. އެއާއިއެކު ދާރިސް ހިބާގެ ކޮޓަރީގެ ދޮރާއި ދިމާލަށް ބަލައިލިއެވެ. ހަމަ އެވަގުތު ޝަހީދުބެ އޭނަގާތު ބުނެފައިވާ ވާހަކައެއް ވެސް ހަނދާންވިއެވެ. މި ގޭގެ ތެރޭގައި ދާރިސް އުޅުނަސް ހިބާއާއި ދުރުމިނެއް ގެންގުޅުމަށް ބުނެލި ވާހަކައެވެ.

 

އެ ވާހަކަ ހަނދާންވެފައި ދާރިސް ޚިޔާލު ބަދަލުކުރަން އުޅުނެވެ. އެހެނަސް އޭނަ މިކަން ފަސްކޮށްފިނަމަ ހިބާއަށް ގެއްލުމެއްވެސް ލިބިދާނެނޫންތޯ ހިތަށްއެރިއެވެ. މިއަދު ހިނގި ކަންތައް ރައުފްއަށް އެނގިއްޖެނަމަ ރައުފް ހަދާފާނެ ގޮތެއް އެނގެނީއެއް ވެސް ނޫނެވެ. އެންމެ ނުބައިކޮށް ވިސްނެން ފެށުމުން ދާރިސް އެންމެ ފަހުން ހިބާގެ ކޮޓަރީގައި ދެ ފަހަރަކު ޓަކިދިނެވެ. ދޮރު ހުޅުވާނެ އިރެއްގެ އިންތިޒާރުގައި މަޑުކޮށްގެން ހުރިއިރު ހަމަ އެތާހުރެ ރައުފްގެ ވާހަކަ ހިބާއާއި ދައްކައި އެ ވާހަކަ ސާފުކޮށްލުމަށް ދާރިސް ނިންމިއެވެ. އެއަށްފަހު އެ ރައުފްގެ ކިބައިން ވެސް ހިބާ ދިފާޢުކޮށްދޭން ވަރުގަދަ ރޭވުމެއް ސިކުނޑީގައި ރާވައިލިއެވެ.

 

ދޮރު ހުޅުވިގެން ދިޔައީ ދާރިސް އަމިއްލަ ޚިޔާލުތަކުގެ ތެރެއިން ރައުފްއާއި ދެކޮޅަށް މޮޅުވަމުން ދަނިކޮށެވެ. އެހެނަސް ދޮރުމަތިން ހިބާ ފެނުމާއެކު ދާރިސްއަށް ވާހަކަ ދެކެވުނެވެ.

 

“ރައުފްއަކީ ކާކު؟” ދާރިސް އަހައިލިއެވެ. އެއާއިއެކު ހިބާގެ ދެލޯ ބޮޑުވެގެން ދިޔަގޮތުން އެއީ އެހާވެސް ނުރައްކާތެރި މީހަކީތޯ ހިތަށްއެރިއެވެ. ހިބާ ހާސްވެފައި ކަހަލަ ގޮތަކަށް ކޮޓަރިން ބޭރަށް ބޯދިއްކޮށް ދެފަރާތަށް ނަޒަރު ދިންގޮތުން ހިބާ ބިރުން އުޅޭހެން ދާރިސްއަށް ހީވިއެވެ. ބިރުގަންނާނެ ކަމެއް ނެތްކަމަށް ބުނަން އުޅުނު ވަގުތު ހިބާ ކުއްލިއަކަށް އޭނަގެ އަތުގައި ހިފައި ކޮޓަރީގެ ތެރެއަށް ގެނައެވެ. ހިބާ އޭނައަށް އެއްޗެކޭ ބުނުމުގެ ފުރުސަތެއް ނުދީ ކޮޓަރީގެ ދޮރު ލައްޕައިލި ވަގުތު ހިތުގެ ތެޅުން އަވަސްވެފައިވިއެވެ.

 

ދާރިސް ބަލަބަލާ ހުއްޓާ ހިބާ އޭނަގެ ކައިރިއަށް އައިސް ވާހަކަ ދެއްކިއެވެ.

 

“ރައުފް އިޒް މައި ބޯއިފްރެންޑް! ބޭރު ތަންތާނގަ ނުދައްކައްޗޭ މި ވާހަކަ. ބައްޕަގާތު އަދި އަމުދުން ބުނެގެން ނުވާނެ. އިޓްސް އަ ޓޮޕް ސީކްރެޓް އިނގޭ؟” ހިބާ މަޑުކުރެވިފައިވި އަޑަކުން ވާހަކަ ދެއްކިއެވެ.

 

“ބޯއި…ފްރެންޑް؟” ދާރިސްއަށް އެހެން އަހައިލެވުނީ ބޭއިޚްތިޔާރުގައެވެ. ހިބާ ދެއްކި ހުރިހާ ވާހަކައެއްގެ ތެރެއިން އޭނަގެ ސިކުނޑީގައި ގުގުމަމުން ދިޔައީ އެ ބަހެވެ. އެއީ ހިބާއާއި އެކުވެރި ފިރިހެން ކުއްޖެއްކަމަށް ފުރަތަމަ ހިތަށްއެރިއެވެ. އެހެނަސް މާ ގިނައިރެއްނުވެ ހަނދާނަށް އައީ އޭނަ މީގެ މަސްތަކެއް ކުރިން ކިޔާފައިވާ ވާހަކަ ފޮތަކުން އެ ބަސް ފެނުނު ހަނދާނެވެ. އެއާއެކު ހިބާގެ ‘ބޯއިފްރެންޑް’ ގެ މާނައަކީ ހިބާ ލޯބިވާ ފިރިހެން ކުއްޖާކަން އެނގުންވިއެވެ. އަދި އެ ފިރިހެން ކުއްޖާވެސް ހިބާދެކެ ލޯބިވާނެ ކަމާއި، އެ ފިރިހެން ކުއްޖާއަކީ ހިބާ ރައްކާތެރިކޮށްދޭނެ ކުއްޖާކަން އެނގުންވިއެވެ. އެ ހިނދު ދާރިސްގެ ހިތް މޭތެރޭގައި އޮވެ ގެނބުނު ކަހަލަ އިޙްސާސެއް ކުރެވުނެވެ. އެއީ ކީއްވެކަމެއް ޚުދު އޭނައަށް ވެސް ނޭނގުނެވެ.

 

މޭޒުމަތީގައި އޮތް ފޯނު ވައިބްރޭޓްވުމުން އީތަންއަށް ލިބުނު ލުއި ސިހުމާއެކު އެ ވަގުތުކޮޅަށް އަނބުރައި އާދެވުނެވެ. އެއާއިއެކު އީތަން ވަގުތުން ފޯނު ނަގައި ބަލައިލިއެވެ. އެއީ މީގެ 10 މިނިޓް ތެރޭ ފެށެން އުޅޭ ބޯޑް މީޓިންގްގެ ވާހަކައެވެ. މީޓިންގް މުހިއްމުކަން ހަނދާންވެފައި އީތަން ވަގުތުން މޮނީޓަރު ހުޅުވައި މީޓިންގްއަށްޓަކައި އޭނަ ތައްޔާރުކޮށްފައި ހުރި އެއްޗެއްސަށް ބަލަން ފެށީ ދެންމެ ކުރެވެން ފެށި ޚިޔާލު މަތިން ހަނދާން ނައްތައިލަމުންނެވެ. އެއީ އެ ޚިޔާލު ހުއްޓުނު ހިސާބުން އެވަގުތުވެސް އޭނަގެ ހިތަށްވީ އުދަގުލެއްގެ ސަބަބުން ކަންނޭނގެއެވެ.

 

**

 

ސްކޫލް ފުރަތަމަ ޓާރމްގެ ފަހު ހަފްތާ ނިމެމުން ދިޔައީ ހިބާ ހީކުރިވަރަށްވުރެ އަވަހަށެވެ. ހަފްތާ ތެރޭގައި އެކި ދުވަސްތަކަށް ބަހައިގެން ކޮންފަރެންސަށްޓަކައި ހިބާ ޕްރެޒެންޓޭޝަނެއް ތައްޔާރު ކުރިއެވެ. ޕްރެޒެންޓޭޝަން ހެދުމަށްފަހު އެ ހުށަހަޅާނެ ގޮތްވެސް ހިބާ ވަގުތު ލިބެމުން ދިޔަ ވަރަކުން ފަރިތަކުރަމުން ދިޔައެވެ. ހަފްތާ ނިމިގެން ދިޔައިރު ހުށަހެޅެމުން ދިޔަ ގޮތާއިމެދު ހިތްހަމަޖެހުނެވެ. އެ ހިތްހަމަޖެހުމާއެކީ ހިބާ އެ ޓާރމްގެ ހުރިހާ މަސައްކަތެއް ނިންމައި، ކުދިންނަށް ރިޕޯޓްދީ، އެކުދިންނާއެކީ ފޮޓޯ ނަގައިލީ އުފާވެރި ހިނިތުންވުންތަކާއި އެކީގައެވެ.

 

ރިޕޯޓް ދިން ދުވަހު ހިބާ ދެރަވާ ގޮތްވީ އެދުވަހު އޭނަގެ ކުލާހުން ކުއްޖަކު މަދުވުމުންނެވެ. މާޒިން ހާޒިރުނުވަނީ ހަމައެކަނި ރިޕޯޓް ދިން ދުވަހުއެއް ނޫނެވެ. އޭގެ ކުރީ ދުވަހު ބެލެނިވެރިންގެ ބައްދަލުވުން އޮތް ދުވަހު މާޒިންއާއި، މާޒިންގެ މަންމަގެ ޚަބަރެއް ވެސް ނުވެއެވެ. ހިބާ މާޒިންގެ މަންމައަށް ގުޅަން މަސައްކަތް ކުރިއެއްކަމަކު އެކަން ކާމިޔާބެއް ނުވެއެވެ. އެ ވާހަކަ އެހެން މުދައްރިސުން ގާތު ބުންޏެއްކަމަކު އެ މުދައްރިސުންނަށް އޭގެ ފަހަތުގައިވި ސަބަބެއް ނޭނގުނެވެ. މާޒިންއަކީ ފުދޭވަރަކަށް އާ ކުއްޖަކަށްވެފައި އެކުއްޖާ އުޅެނީވެސް ސްކޫލް ހުންނަ އަވަށާއި ދުރު އަވަށެއްގައި ކަމަށްވުމުންނެވެ.

 

ހިބާ މާޒިންއާއި ބެހޭ ގޮތުން އިތުރަށް ހޯދަން ބޭނުންވިއެއްކަމަކު ފުރުމުގެ ކަންތަކަށް ސަމާލުކަން ދޭންޖެހުނެވެ. ހުކުރު ދުވަހުގެ ހެނދުނު ފުރުން އޮތީތީ ބުރާސްފަތި ދުވަހު ހޭލަމޭލައަށް އުޅެމުން ހިބާ ޕެކްކުރަމުން ދިޔައިރު ހަމްނާ ވެސް ފަރީދުބެގެ ގެއަށް ބަދަލުވުމަށް ޕެކްކުރަމުން ދިޔައެވެ. އެ މަސައްކަތުގެ ތެރެއިން ވެސް ހަމްނާ ދޭތެރެދޭތެރެއިން ހިބާގެ ކައިރިއަށް އައިސް ނައުފަލްގެ ޓިކްޓޮކްތައް ދައްކަމުން ދިޔައެވެ. އެ ކިބުރުވެރި ކުއްޖާ އެކިއެކި ފިލްމްތަކުގެ ޑައިލޮގްތައް ނަކަލުކޮށްފައި ހުންނަ ވީޑިޔޯތައް ފެނިފައި ހިބާއަށް ކަޅި މައްޗަށް ހިންގައިލުން ނޫންކަމެއް ނުކުރެވެއެވެ. ހަމްނާ އޭނައަށް އެފަދަ ޓިކްޓޮކެއް ދައްކާ ކޮންމެ ފަހަރަކު ހަމްނާގެ މުސްތަޤްބަލުގެ ފިރިމީހާއަކީ މިއީތޯ ހިބާ ސުވާލުކުރަނީ ހަމްނާއަށް އެއްޗެއް ވިސްނޭތޯއެވެ. ހަމްނާ ކުރީކޮޅު އެއްޗެކޭ ނުބުންޏެއްކަމަކު ފަހުންފަހުން އައިސް މަޖަލަކަށް ހަދައި އާނއެކޭ ބުނަންފެށިއެވެ.

 

ހިބާ އިތުރަށް އެ ވާހަކަ ދައްކަން ނެހެދީ ހަމްނާ އޭނައަށް އެ ޓިކްޓޮކްތައް ދެއްކުން ހުއްޓާލަފާނެތީވެއެވެ. އެ އިތުބާރު ގެއްލުވައިލަން ބޭނުމެއް ނުވުމުން ހިބާ އޭނަގެ ނުރުހުންތެރިކަމުގެ ބޮޑުބައެއް ފޮރުވިއެވެ. އަދި މާލެއަށް ފުރަން ދިޔައީ، ދޮންތަ ދުރުގައި ހުއްޓަސް ހަމްނާއަށް ދިމާވާ ހުރިހާ ކަމެއްގައި ދޮންތަ ހަމްނާއާއެކީ ވާނެ ކަމަށް ބުނަމުންނެވެ. ހަމްނާ އާދައިގެ މަތިން ‘އައި ނޯ’އޭ ބުނެ ދޮންތަގެ ގައިގައި ބައްދައިލިއެވެ. ހިބާ ދެންވެސް ހަމްނާއާއިމެދު ކަންބޮޑުވީތީ ހަމްނާގެ އަތުން ދޫކޮށް ދިޔަ ވަގުތުވެސް އޭނަގެ ކޮއްކޮއަށް ހިދާޔަތް އިތުރުކޮށްދެއްވައި ރައްކާތެރިކޮށްދެއްވުމަށް އެދި ދުޢާ ކުރެވުނެވެ. އެ ދުޢާއިން ހިބާގެ ހިތަށް ހަމަޖެހުމެއް ލިބުނެވެ. ކިތަންމެ ފުން އަނދިރިގަނޑެއްގެ ތެރޭގައިވާ މީހަކަށް ވެސް ހިދާޔަތުގެ އަލިކަން ދެއްކެވުމަށް ﷲ ކުޅަދުންވަންތަވެ ވޮޑިގެންވާކަން ޔަޤީންކުރެވޭތީވެއެވެ.

 

އޭގެ އެއްދުވަސް ފަހުން ހިބާ ހުރީ މާލޭގައެވެ. މާލެއަށް އައި ދަތުރުމަތީގައި ފަރީދުބެ އޭނައާއި ބައްދަލުކުރަން އުޅޭ ކުއްޖާގެ ވާހަކަ ދެއްކިއެވެ.

 

“އާސިފްއަށް ޝުކުރު އަދާ ނުކުރާނަންތަ؟ ޓިކެޓް ގަނެދިން ކަމަށްޓަކައި؟” ފަރީދުބެ ފްލައިޓް މަތިން ސުވާލުކުރިއެވެ.

 

“ބައްދަލުވީމަ ޝުކުރު އަދާކުރާނަން އިން ޝާ ﷲ.” ހިބާ ގަދަކަމުން ހިނިތުންވަމުން ބުންޏެވެ. އޭނަ ވަނީ ފަރީދުބެ އެ ބުނާ މީހަކާއި އިނުމަށް އިސްތިޚާރާ ނަމާދުކޮށްފައެވެ. ނަމާދު ކުރީއްސުރެ ފަރީދުބެ އެ މީހެއްގެ ވާހަކަ ދައްކާ ކޮންމެ ފަހަރަކު ހިބާގެ ހިތަށް ވެރިވަނީ ހިތްހަމަނުޖެހުމެކެވެ. މިއީ އަދި އޭނަ އިންނަން ޖެހޭ މީހެއް ނޫންހެން ހީވަމުން ދިޔައެވެ.

 

އާސިފްއާއި ބައްދަލުކުރުން ލަސް ކުރެވިދާނެތޯ ފްލައިޓްމަތިން ހިބާއަށް އެދެވުނީ އެ ހިތްހަމަނުޖެހުމުގެ ސަބަބުންނެވެ. ކޮންފަރެންސަށް ފަހު ބައްދަލުވުމެއް ހަމަޖެއްސުމަށް އެދުމުން ފަރީދުބެ ވަކި ދެކޮޅު ހެދުމެއްނެތި އެއްބަސްވިއެވެ. ހިބާގެ ސިކުނޑި ހަމައަކަށް އެޅިފައި ހުންނާނީ އޭރުންދޯއޭ ބުނަމުންނެވެ. ހިބާ އެ ވާހަކައަށް ވެސް ހިނިތުންވެލީ ހިތާއި ދެކޮޅަށެވެ.

 

**

 

ހޮނިހިރު ދުވަހުގެ ހެނދުނު އީތަން އޮފީހުގެ ހުރިހާ މަސައްކަތެއް ނިންމައިލީ، ރާއްޖޭގެ ގަޑިން ހަވީރު 4 ޖަހާއިރު ފެށެން އުޅޭ ޓީޗާރސް ކޮންފަރެންސަށް ހުސްވުމަށެވެ. އެ ކޮންފަރެންސްއިން ހޮވޭ އެންމެ މޮޅު ހުށަހެޅުންތެރިންނަށް ވިންޓޭޖް ޓެކްނޮލޮޖީސްއާއެކީ މަސައްކަތް ކުރުމުގެ ފުރުސަތު ހުޅުވައިލީ އީތަންއެވެ. ތަޢުލީމީ ދާއިރާއާއި ގުޅޭ ދިވެހި އެޕްލިކޭޝަނެއް ތައްޔާރު ކުރާތީ އެކަމަށް ދިވެހި މުދައްރިސުންގެ އެހީ ހޯދުން ރަނގަޅުވާނެކަމަށް އޭނައަށް ޤަބޫލުކުރެވުމުންނެވެ. އެ އަހަރުގެ ކޮންފަރެންސްގެ ތީމަކީ ވެސް ޓެކްނޮލޮޖީކަމަށްވުމުން އެ ނިންމުން ނިންމަން އިތުރު ހިތްވަރެއް ލިބުނެވެ. އަދި އަމުދުން ހިބާ ޝަހީދުގެ ފަރާތުން އެދުވަހު އައި ޕްރޮޕޯޒަލް ފެނިފައި އޭނަވެސް އެ ކޮންފަރެންސަށް ޝައުޤުވެރިވާ ގޮތްވިއެވެ.

 

ކޮންފަރެންސްގެ މޮޅު ހުށަހެޅުންތެރިން ހޮވާ ފަނޑިޔާރުންގެ ތެރޭގައި އީތަން ވެސް ހިމެނުނީ، އެ ހުށަހެޅުންތެރިން މިކޮޅަށް ގެނައުމުގެ ޚަރަދުގެ ބައެއް ކުންފުނިންވެސް އުފުލާތީވެއެވެ. ކުންފުނީގެ އެހެން މީހަކު ފަނޑިޔާރަކަށް ނުހޮވީ، ބައެއް ހުށަހެޅުންތައް ދިވެހިންވެސް ހުންނާތީވެއެވެ. އެހެންކަމުން އެދުވަހު ސްވިޓްޒަލޭންޑްގެ ގަޑިން މެންދުރު 1 ޖެހިއިރު އީތަން އިނީ އޮފީހުގެ ހުސްކުރެވިފައިވާ ކޮންފަރެންސް ހޯލުގެ މޭޒުގެ އެންމެ ކޮޅުގައި އިށީނދެގެން ދިޔައެވެ. ކުރިމަތީގައި ހުރި ފާރުގައި ހަރުކުރެވިފައިވި ބޮޑު ސްކްރީން ޓީވީއިން ހުޅުވައިލެވިފައިވީ ޓީޗާރސް ކޮންފަރެންސް ދައްކަމުން ދިޔަ ދިވެހި ޗެނަލެކެވެ.

 

ޤުރުއާނުގެ ބަރަކާތުން ފެށި، ޢިއްޒަތްތެރި މެހުމާނުންނަށްފަހު ބައިވެރިންގެ ހުށަހެޅުންތައް ފެށިގެން ދިޔުމުން އީތަން ކަނުލައި އަޑުއަހައި އެ ބައިވެރިންނަށް ޕޮއިންޓްތައް ދެމުން ދިޔައީ ކުރިމަތީގައި ބޭއްވިފައި އޮތް އައިޕެޑުން ހުޅުވައިލެވިފައިވި އެޕްލިކޭޝަނަކުންނެވެ. ކޮންފަރެންސްގެ ޝެޑިއުލްއަށް ބަލައިގެން ޖޯޖްވަނީ އޭނައަށްޓަކައި ކޮންފަރެންސްގެ ހުރިހާ ބައިވެރިންގެ ނަންތައް އެ އެޕްލިކޭޝަނަށް އަޅައިފައެވެ. ކޮންމެ ބައިވެރިއެއް ނިމުމުން އީތަން އިނގިލި ހިންގައިލުމާއެކު ދެން އޮތް ބައިވެރިޔާގެ ނަން ޕޮއިންޓް ދޭ ތާވަލަކާއިއެކީ ފެންނަމުން ދިޔައެވެ.

 

ގަޑިއިރެއްހާއިރު ވަންދެން ކޮންފަރެންސް ކުރިއަށް ގޮސް 15 ވަރަކަށް މިނެޓްގެ ބްރޭކެއް ދެވުނެވެ. އެވަގުތުކޮޅުގައި އީތަން ވެސް ބޭރަށް ގޮސް ކޮފީއެއް ބޯލުމަށްފަހު ކުޑަގޮތަކަށް ތާޒާ ވެލިއެވެ. އަނބުރާ ކޮންފަރެންސް ހޯލަށް އައިސް ގޮނޑީގައި އިށީނުމުގެ ބަދަލުގައި އީތަން ޚިޔާރުކުރީ އައިޕެޑް ހިފައިގެން ޓީވީ ސްކްރީނާއި ކައިރިވާ ގޮތަށް އެ ހޯލުގައި ހުރި ދިގު މޭޒުގެ ކޮޅަށް ލެނގިގެން ހުރުމަށެވެ. އައިޕެޑް ހުޅުވުމަށް ކޯޑު ޖަހަމުން ދިޔަ ވަގުތު އަނެއްކާވެސް އެކޮޅުން އެ ކޮންފަރެންސް ހޮސްޓްކުރަން ތިބި ދެމީހުން ފެނިގެން ދިޔައެވެ.

 

“އާދެ…..ދެން މި ކޮންފަރެންސްގައި ހުށަހަޅަން އުޅޭ ބައިވެރިޔާގެ ނަމަކީ….އައިޝަތު ހިބާ ޝަހީދު.” އީތަންއަށް އެ ނަން އިވުނު ވަގުތަކީ އައިޕެޑް ހުޅުވި އެއްކަލަ އެޕްލިކޭޝަނުން ވެސް އެ ނަން ފެނުނު ވަގުތެވެ. ޓީވީއިން ހިބާ ޝަހީދުގެ ސްކޫލްގެ ނަމާއި ހުށަހެޅުމުގެ ނަން ކިޔައިލި ވަގުތު އެ ދެ ނަން ވެސް އީތަންއަށް އެޕްލިކޭޝަނުން ފެނުނެވެ. އެ ސްކޫލަކީ އޭނަ ވެސް ގޮސްފައިވާ ސްކޫލެއްކަން އެނގުންވީ ހިނދު އީތަން ހުއްޓުން އެރިއެވެ. އީތަން ކުއްލި ގޮތަކަށް ސްކްރީނަށް ބަލައިލި ވަގުތު ހިތުގެ ތެޅުން އަވަސްވެފައިވިއެވެ. ލަސް ހިނގުމެއްގައި ސްޓޭޖްގެ ސިޑިމަތިން އަރައިގެން ދިޔަ ދިގު ހެދުމެއްގައި ހުރި އަންހެން ކުއްޖާއަށް ބަލަން ހުރެވުނީ އެހެން ދިމާލަކަށް ނަޒަރު ނުހިންގަން ހުވާކޮށްގެން ފަދައެވެ. އެކަމާމެދު ހިސާބަކަށް އަމިއްލަ ނަފްސު ކުށްވެރި ކުރެވުނެއްކަމަކު އެސްފިޔަ ޖަހާލުމެއްނެތި ބަލަހައްޓައިގެން ހުރެވުނެވެ. ގަދަ ނޫކުލައިގެ ދިގު ހެދުމަކާއި އާދައިގެ ކަޅުކުލައިގެ ޝޯލްއެއް އަޅައިގެން ހުރި އަންހެން ކުއްޖާ ގޮސް ޕޯޑިއަމް ކައިރީގައި މަޑުކޮށްލި ވަގުތު ކައިރިން އެ ކުއްޖާ ދައްކައިލެވުނެވެ.

 

ހަމަ އެހިނދު މީގެ އަހަރުތަކެއް ކުރިއަށް ދަތުރުކުރެވުނު ކަހަލަ އިޙްސާސެއް އީތަންއަށް ކުރެވުނެވެ. އެތައް އަހަރެއް ފަހުން ފެނުނެއްކަމަކު އީތަންއަށް ވަގުތުން އެ ސޫރަ ނަގައިގަނެވުނެވެ. އެއީ ހަމަ އެ ވަށްމޫނެވެ. އެ ހިތިފަތު ބުމައެވެ. އެ ދިގު އެސްފިޔަތަކެވެ. އަދި އެ ލޯބި ހިނިތުންވުމެވެ.

 

ހިބާ ޕޯޑިއަމަށް އަރައި ދައްކައިލި އެ ހިނިތުންވުމާއެކު ކުޑަކޮށް މޫނު އަނބުރައިލުމުން އީތަންއަށް ހީވީ ހިބާ ސީދާ އޭނައަށް ބެލި ހެންނެވެ. އެ ހިނދު އަތުން ހިފަހައްޓައިގެން ހުރި އައިޕެޑް ދޫވާން އުޅުނުހެން ހީވުމުން އޭގައި ބާރަށް ހިފަހައްޓައިލެވުނެވެ.

 

“ހިބާ…” ވައި އަޑުން އީތަންއަށް އެ ނަން ކިޔައިލެވުނީ ބޭއިޚްތިޔާރުގައެވެ.

 

ނުނިމޭ