ދާނިޝް ދެކެ ލޯބިވެވެނީ ﷲ ރުހިވޮޑިގެންވާ ޢަމަލުތައް ދާނިޝްގެ ފަރާތުން ފެންނާތީވެއެވެ. ދާނިޝް ކޮންމެ ޙާލެއްގައި ހުންނަ މަންޒަރު ސިފަ ކުރެވުނަސް ދާނިޝް ދެކެ ލޯބިވެވޭނެ ކަމަށް ޤަބޫލު ކުރެވެނީ އެހެންވެއެވެ. ދާނިޝްއާއި ކައިވެނި ކުރުމުގެ ޚިޔާލު ކަމުދަނީ ދާނިޝްއަކީ އޭނަ ﷲ އާއި ގާތް ކޮށްދޭނެ ފަދަ ބައިވެރިޔަކަށް ވާނެކަން ޔަޤީން ކުރެވޭތީވެއެވެ. ދާނިޝް އޭނައާއި ކިހާ ގުޅޭކަން އެނގުންވުމުން މިއީ ﷲ އޭނައަށްޓަކައި ލެއްވި ބައިވެރިއެއްކަން ހަނދާންވާނެތީވެއެވެ. މި ބައިވެރިޔަކީ ﷲ އޭނައަށް ލެއްވި ރަޙްމަތެއްކަން ހަނދާންވާނެތީވެއެވެ.
އެހުރިހާ ކަމެއް އެނގުންވެގެން ދިޔަ ހިނދު ބޭއިޚްތިޔާރުގައި ހިލްޔާއަށް ހީލެވުނެވެ. އެހިނދު އެ ލޮލުން އުފާވެރިކަމުގެ ކަރުނަތައް ހިލުނެވެ.
މީހުން ބުނެ އުޅެއެވެ. ލޯތްބަކީ ވޭނެކެވެ. ލޯތްބަކީ އަނދިރި ކުރުވާ އިޙްސާސެކެވެ. ލޯތްބަކީ ހިތަށް ލިބޭ ޒަޚަމެކެވެ. މަޝްހޫރު ފިލްމުތަކާއި ލަވަތަކުން ވެސް ސިފަކުރެވޭ ލޯބީގެ ޚިޔާލުތަކަކީ މިއީއެވެ. ލޯބީގެ ސަބަބުން ބައެއް މީހުން ދުނިޔެއިން މޮޔަވެފައިވެއެވެ. އަނެއްބައި މީހުން އަމިއްލައަށް މަރުވެސް ވެފައިވެއެވެ. އެހެނަސް އިންސާނާ އެންމެ ބޮޑަށް ބޭނުންވާ އިޙްސާސަކީ ވެސް ލޯތްބެވެ. އިންސާނީ ޙަޔާތުގެ އެންމެ ބޮޑު އެއް ހިތާމައަކީ މިއީއެވެ. ލޯތްބަކީ އެހާ ބޮޑަށް ބޭނުންވާ އިޙްސާސަކަށް ވެފައި ލޯބި ނުލިބުމެވެ.
ވާނީވެސް އެހެންތާއެވެ. އިންސާނާ އުއްމީދު ކުރަނީ ފުރިހަމަ ލޯތްބަކަށެވެ. އައިބުތަކުން ރައްކާތެރިވެފައިވާ ލޯތްބަކަށެވެ. ކުށެއް ކުރެވުމުން އެއްވެސް ނުރުހުންތެރިކަމެއް ނެތި ވަގުތުން މަޢާފު ކޮށްދޭ ލޯތްބަކަށެވެ. ފާއިތުވާ ދުވަސްތަކާއެކީ ބަލިކަށިވުމުގެ ބަދަލުގައި ވަރުގަދަވަމުންދާ ލޯތްބަކަށެވެ. ދުވަހަކުވެސް އެ ލޯތްބާއިމެދު ޝައްކު ކުރަން ނުޖެހޭ ފަދަ ލޯތްބަކަށެވެ. ޙަޤީޤަތަކީ މިފަދަ ލޯތްބެއް އިންސާނާއަށް އެހެން އިންސާނެއްގެ ފަރާތުން ލިބުމަކީ ނާދިރު ކަމެއް ކަމެވެ. ޚުދު އިންސާނާއަކީ ވެސް އައިބުތަކެއްވާ މީހަކަށް ވީ ހިނދު، އިންސާނާގެ ލޯބި ފުރިހަމަވާނީ ކިހިނެއް ހެއްޔެވެ؟
އިންސާނާގެ ހިތް އުއްމީދު ކުރާ ފަދަ ލޯތްބެއް އިންސާނާގެ ހިތަށް އިޙްސާސް ކޮށްދިނުމަށް ކުޅަދުންވަންތަ ވެ ވޮޑިގެންވަނީ ހަމައެކަނި ﷲ ސުބްޙާނަހޫ ވަތަޢާލާއެވެ. ފުރިހަމަ ވެގެންވާ ހަމައެކަނި ލޯތްބަކީ އެކަލާނގެ ގެ ލޯބިފުޅެވެ. ތައުބާވުމާއެކު ހުރިހާ ފާފައެއް ފުއްސަވައި އެކަލާނގެ ލޯބިފުޅުން އިންސާނާ ވަށާލައްވަނީ އެކަލާނގެއެވެ. އިންސާނާ އެކަލާނގެއާއި ކުއްތަންވާން މަސައްކަތް ކުރާހާ ހިނދަކު އެކަލާނގެ ގެ ލޯބިފުޅު އެ އިންސާނާއަށް އިޙްސާސް ކުރެވޭނެއެވެ. އެ ލޯބިފުޅު ލިބޭނެފަދަ އުޅުމެއް އުޅޭ އިންސާނަކަށް ދުވަހަކުވެސް އެ ލޯބިފުޅާއިމެދު ޝައްކެއް ނުކުރެވޭނެއެވެ. ޙަޔާތުގައި ކޮންމެ ކަމެއް ހިނގިޔަސް ﷲ ގެ ލޯބިފުޅު އެމީހަކަށް އެކަމުގެ ތެރެއިން ފެންނާނެއެވެ.
މިހާ ހިސާބަށް އާދެވުމުން އެ ލޯބިފުޅުން އިންސާނާގެ ހިތް ފުރިގެންދެއެވެ. އެހެން އެއްވެސް ލޯތްބަކަށް އެ ހިތް ބޭނުންނުވާ ދަރަޖައަށެވެ. އެފަދަ އަޅަކަށް ﷲ ފުދިގެންވާނެއެވެ. މީގެ ނަތީޖާއެއްގެ ގޮތުން ދެން އިންސާނާގެ ހިތުގައި އުފެދޭ އެހެން ލޯބިތައް ބިނާވެގެން ދަނީ އެ ހިތަށް އިޙްސާސް ކުރެވުނު ފުރިހަމަ ލޯބިފުޅުގެ މައްޗަށެވެ. މީހެއް ދެކެ ލޯބިވިޔަސް ލޯބިވެވޭނީ ﷲ އަށް ޓަކައެވެ. އިންސާނުންގެ މެދުގައި ވެވޭ ލޯބީގެ ތެރެއިން އެންމެ މަތިވެރި ލޯތްބަކީ މިއީއެވެ. އަދި ޙަޤީޤީ ލޯތްބާއި އެންމެ ގާތް ކުރާ ލޯތްބަކީ ވެސް މިއީއެވެ. އެހެނީ މި ލޯބި އުފެދުނީ އެންމެ ފުރިހަމަވެގެންވާ ލޯބިފުޅުގެ ޒާތް ފަހުމް ވެފައިވާ ހިތެއްގައެވެ. އެހެންކަމުން މި ލޯބީގައި ސަމާލުކަން ދެވެނީ ލޯބި ލިބިގަތުމަށްވުރެ ބޮޑަށް ލޯބި ދިނުމަށެވެ. ﷲ ގެ ލޯބިފުޅުން ފުރިފައިވާ ހިތެއްގެ އެންމެ ބޮޑު އެއް އެދުމަކީ، ﷲ ގެ ލޯބިފުޅާއި ރަޙްމަތް އެހެން ޚަލްޤުތަކުންނަށް އިޙްސާސް ކޮށްދިނުން ކަމަށްވާތީވެއެވެ. މިއީ ދީލަތި ލޯތްބެކެވެ. މީހަކު ދެ ދުނިޔޭގެ ބާއްޖަވެރިކަމާއި ހަމައަށް ވާސިލުކޮށްދޭނެ ފަދަ ލޯތްބެކެވެ.
ހިލްޔާއަށް އެ ހިތުގައި ދާނިޝްއަށްޓަކައި އުފެދިފައިވާ ލޯބީގެ ތަފާތު އިޙްސާސް ކުރެވެމުން ދިޔައީ އެހެންވެއެވެ. މިއީ ދުވަހަކުވެސް އޭނައަށް ތަޖުރިބާ ކުރެވުނު ޒާތެއްގެ ލޯތްބެއް ނޫންކަން ޔަޤީން ކުރެވުނީ އެހެންވެއެވެ. އެނގުނުހާ ވެސް ކަމަކީ އެ ލޯބީގެ ސަބަބުން އޭނަގެ ހިތް އުފާވެރިކަމުން ފުރިފައިވި ކަމެވެ. ވަކިން ޚާއްސަކޮށް މި ލޯތްބަކީ އޭނަ ﷲ އާއި ދުރު ކުރުވުމުގެ ބަދަލުގައި ﷲ އާއި ގާތް ކޮށްދޭނެ ލޯތްބެއްކަން ހިތަށް އެނގުންވެފައިވާތީވެއެވެ.
އެރޭ ހިލްޔާ އެންމެ ގަޑިއިރެއްގެ ނިންޖަށްފަހު ހޭލެވުނީ ދަމު ނަމާދަށް ޙަރަމުން ބަންގި ގޮވާ އަޑަށެވެ. ހިލްޔާއަށް ހޭލެވުނުއިރު އެލީ އޭރުވެސް ނިދިފައި އޮތެވެ. އެހެނަސް މާމައަށް ވެސް ބަންގީގެ އަޑަށް ހޭލެވުނެވެ. ހިލްޔާ ދަމުނަމާދަށް ޙަރަމަށް ދާން ބޭނުންވުމުން މާމައާއި އެ ޚިޔާލު ޙިއްސާ ކުރިއެވެ. އެހެނަސް މާމަ ފައިގައި ރިއްސައިގެން އުޅޭތީ ނުދެވޭނެ ވާހަކަ ބުނުމުން ހިލްޔާ ވެސް ޚިޔާލު ބަދަލު ކުރިއެވެ. ޙަރަމަށް ދާން ކިތަންމެ ބޭނުންވިޔަސް މާމަ އެކަނި ކޮށްލާފައި ދިޔުމުން މާމަ ދެރަވެދާނެތީވެއެވެ. އެހެންކަމުން ހިލްޔާ ދަމުނަމާދު ކުރީ މާމައާއެކީ ހޮޓެލް ރޫމުގައެވެ.
ދަމުނަމާދުގެ ފުރަތަމަ ދެ ރަކުޢަތް ނިމުނު ވަގުތު ހިލްޔާއަށް ބައްޕަ ގުޅިއެވެ. މަރު ނިންޖެއްގައި އޮތް އެލީއަށް ހޭލެވުނީ ދެނެވެ. ބައްޕަ ގުޅީ ފަތިސް ނަމާދަށް ޙަރަމަށް ދާނަންތޯ އަހާލުމަށެވެ. އަނެއްކާވެސް މާމަ އެކަނި ކޮށްފައި ދާން ބޭނުން ނޫން ވާހަކަ ހިލްޔާއަށް ބުނި ވާހަކަ އިވިފައި މި ފަހަރު އެކަމަށް އިންކާރު ކުރީ މާމައެވެ. އެހެންކަމުން ބައްޕައާއެކީ ފަތިސް ނަމާދަށް ޙަރަމަށް ދާން ހިލްޔާ އެއްބަސްވިއެވެ. އެލީ ވެސް އެވަގުތު ހޭލާފައިވުމުންނެވެ. އަދި އެލީ ނަމާދު ކުރާނީ ރޫމުގައި ކަމަށް އެލީ ބުނުމުންނެވެ.
އެހެންކަމުން ހިލްޔާ އެދުވަހު ބައްޕައާއެކީ ޙަރަމަށް ނަމާދު ކުރަން ދިޔައެވެ. ޙަރަމަށް ދިޔަ މަގުމަތީގައި ދާނިޝް މެން މާ ކުރިން ދަމު ނަމާދަށް ޙަރަމަށް ގޮސްފައިވާ ވާހަކަ ބައްޕަ ބުންޏެވެ. ބައްޕައަށް ވެސް ގޮވި ވާހަކައާއި ބައްޕައަށް އެވަގުތު ނުތެދުވެ އޮވެވުނީ ކަމަށް ބުންޏެވެ. މިފަހަރު ދާނިޝްގެ ހެޔޮ ވާހަކައެއް އިވިފައި ހިތުގައި އުފެދުނު އިޙްސާސާއިމެދު ހިލްޔާ ޙައިރާނެއް ނުވެއެވެ. އަދި އެ އިޙްސާސާއި މެދު ސުވާލެއް އުފައްދަން ވެސް ބޭނުމެއް ނުވިއެވެ. އޭގެ ބަދަލުގައި އެ އިޙްސާސާއިމެދު އުފާކޮށް، ހިނިތުންވެލެވުނެވެ.
ޙަރަމަށް ގޮސް ހިލްޔާ ބައްޕައާއި ވަކިވާން ޖެހުނީ، އަންހެނުން ނަމާދު ކުރަނީ ވަކި ޖާގައެއްގައި ކަމަށްވުމުންނެވެ. ވަކިވުމުގެ ކުރިން ހިލްޔާ އަނބުރާ ހޮޓެލަށް ދާން ބޭނުންވަނީ ޟުޙާ ނަމާދު ކޮށްގެން ކަމަށް ބައްޕައަށް ހިލްޔާ އެންގިއެވެ. އޭގެ ނަތީޖާއެއްގެ ގޮތުން ބައްޕަ ވެސް ދާން ބޭނުންވަނީ ވީހާވެސް ގިނައިރު ޙަރަމުގައި ހޭދަކޮށްފައި ކަމަށް ބައްޕަ ބުނުމުން ހިލްޔާގެ ހިތަށް އިތުރު އުފަލެއް ލިބުނެވެ.
އެތައް ޒަމާނެއް ފަހުން ޖަމާޢަތުގައި ނަމާދު ކުރެވުމުން ހިލްޔާގެ ހިތަށް ލިބުނީ އާދަޔާ ޚިލާފު ހިތްހަމަޖެހުމެކެވެ. އެދުވަހު ފަތިސް ނަމާދުގެ އިމާމަކަށް ހުންނެވި ޝެއިޚް ޢަބްދުއްރަޙްމާން އައްސުދެއިސް ގެ އަޑުން އިވުނު ފުއްޞިލަތް ސޫރަތުގެ އާޔަތްތަކުން ހިލްޔާގެ ލޮލުން ކަރުނަތައް ފައިބައިގެން އައެވެ. އެ ސޫރަތަކީ ހިލްޔާ އެ ސޫރަތުގެ ތަފްސީރު އަޑުއަހައި ހިތުދަސްކޮށްފައިވާ ސޫރަތަކަށްވުމުން އެ އާޔަތްތަކުން ހިތަށް އަސަރު ކުރީ މާ ބޮޑަށެވެ. އެ އާޔަތްތަކަކީ، ތިމަންމެންގެ ވެރި ރަސްކަލާނގެއީ ﷲ ކަމަށް ބުނެ ސީދާ މަގުގައި ދެމިތިބޭ މީހުންނަށް ލިބޭ ނިޢުމަތްތަކުގެ ވާހަކަ ސިފަ ކުރެވިފައިވާ އާޔަތްތަކެވެ.
ފަތިސް ނަމާދަށްފަހު ގޭގައި ވެސް ހަދާހެން ހިލްޔާ އެންމެ ފުރަތަމަ ހެނދުނުގެ ޒިކުރުތައް ކިޔުނެވެ. އެއަށްފަހު އެ ދުވަސްކޮޅު ހިތުދަސްކުރަމުންދާ ޝުޢަރާ ސޫރަތުގެ ޞަފްޙާއެއް ދަސްކުރަން ފެށިއެވެ. އެ ޞަފްޙާ ދަސްކޮށް ދަސްކޮށްފައިވާ ފޮތެއް މުރާޖަޢާ ކުރެވުނު ހިނދު، އިރު އަރައި ޟުޙާ ނަމާދު ވަގުތު ޖެހިފައިވިއެވެ. އެހެންކަމުން ޟުޙާ ނަމާދު ކުރުމަށްފަހު ޒަމްޒަމް ފެން ބޮއިގެން ހިލްޔާ ޙަރަމުން ނިކުންނަން ދިޔައެވެ.
ޙަރަމުން ނިކުމެގެން ހިލްޔާ އައީ ބައްޕައަށް ގުޅައިގެން އޭނަ ހުރި ދިމާ ސިފަ ކުރަމުން ކަމަށްވުމުން މާ ގިނައިރެއް ނުވެ ބައްޕައާއި ދިމާވާ ގޮތްވިއެވެ. ބައްޕައާއި އެކީ ޙަރަމުން ނިކުމެ މަގަށް ނިކުމެވުނު ވަގުތު ކުރިމައްޗަށް ޢިޝާރާތްކޮށް އެ އޮތް ދަނީ ދާނިޝް ކަމަށް ބައްޕަ ބުންޏެވެ. ހިލްޔާ ކަނާތް ފަރާތުން ކަހަލަ ގޮތަކަށް ކުރިމައްޗަށް ނަޒަރެއް ދިން ހިނދު އެކީގައި ހިނގާފައި ދިޔަ އިސްތަށިގަނޑު ތުނި ކުރެވިފައިވާ 3 ޒުވާނުން ފެނުނެވެ.
އޭގެ ތެރެއިން ހިލްޔާ މެންނާއި ގާތް ވާ ގޮތަށް ހުރީ ދާނިޝްކަން ހިލްޔާއަށް ވަގުތުން އެނގުނީ ދާނިޝްގެ އަތަށް ލައްވާފައިވާ އާރމް ސްލިންގް ފެނިފައެވެ. އަދި ދާނިޝް ލައިގެން ހުރި މުށިކުލައިގެ ގަމީހާއި ކަޅުކުލައިގެ ފަޓުލޫނާއި އެ ހިނގުމުން ވެސް ދާނިޝް ކަން ހިލްޔާއަށް އެނގުނެވެ. ޔައިޝްމެންނާއި ވާހަކަ ދައްކަމުން ދިޔައިރު ހިލްޔާއަށް ދާނިޝްގެ މޫނު ފެނުނީ އެއްފަރާތަކުންނެވެ. އިސްތަށިގަނޑު ތުނި ކުރެވިފައިވުމުން ދާނިޝް ފެންނަމުން ދިޔައީ ތަފާތު ގޮތަކަށެވެ. އެހެނަސް ހާދަ ރީއްޗޭ ހިލްޔާގެ ހިތަށްއެރިއެވެ. ދާނިޝް ކޮންމެ ގޮތަކަށް ހުއްޓަސް އެހާ ރީތީ ކީއްވެ ހެއްޔެވެ؟ އެއްޒަމާނެއްގައި ފިލްމީ ތަރިއަކަށް ވުމުގެ ‘ޖާދޫ’ ހެއްޔެވެ؟ ހިތަށް ވެރިވި އެ ޚިޔާލުން ހިލްޔާއަށް ހީލެވުނެވެ.
އެއީ ފިލްމީ ތަރިއަކަށްވުމުގެ ޖާދުލެއް ނޫންކަން ހިލްޔާއަށް އެނގުނީ އެ ވަގުތު ހޮޓެލަށް އަނބުރާ އާދެވުނު ފަހުންނެވެ. ހިލްޔާ އަނބުރާ ރޫމަށް ދިޔައިރު އެލީ އަނެއްކާވެސް ނިދާފައިވިއެވެ. މާމަ ވެސް ނިދިފައިވުމުން ހިލްޔާ އެވަގުތު އެމީހުންނަށް އުދަގޫ ނުކުރަން ނިންމިއެވެ. ނާސްތާއަށް ތައްޔާރު ކުރެވިފައިވާ ބުފޭ 8:30 ވާއިރަށް ހުޅުވިފައި ހުންނާނެތީ 7:45 ކަށް ހާއިރު އެމީހުންނަށް ގޮވާލަން ހިލްޔާ ނިންމިއެވެ. އަދި އެމީހުން ސައިބޯން ދާނީ އެހާކަށްހާއިރު ކަމަށް ބުނެ ބައްޕައާއި ދޮންތައަށް ވެސް ގުޅައި އެންގިއެވެ. ދޮންތަމެން އެވަގުތު ވެސް ސައިބޯން ހޮޓެލްގެ ރެސްޓޯރެންޓަށް ގޮސްފައިވިއެވެ.
7:45 ވަންދެން ހިލްޔާ އިނީ އޭނަ ގެނައި ދީނީ ފޮތެއް ކިޔާށެވެ. އެއަށްފަހު އެވަގުތު ޖެހުމުން މާމައަށް ގޮވުމުން މާމަ ތާޒާ ވެލުމަށް ފާޚާނާއަށް ވަނެވެ. މާމަ ވަތްތާ 10 މިނެޓް ފަހުން ހިލްޔާ އެލީއަށް ގޮވަން ފެށިއެވެ.
“މިއަދު ސައިބޯން ބޭނުމިއްޔާ ތެދުވަން އުޅޭ އެލީ…” ހިލްޔާ 5 ވަނަ އެހެން ބުނެލީ، ރޫމުގައި ހުރި ދިގު ލޯގަނޑު ކުރިމަތީގައި ހުރެ ބޮލުގައި ފުނާ އަޅަމުންނެވެ. ބޭރަށް ދާން ޝޯލް އެޅުމުގެ ކުރިން އަނެއްކާވެސް އިސްތަށިގަނޑު ރީތިކުރަން ބޭނުންވީއެވެ.
ހިލްޔާ އެހެން ބުނެލުމުން އެލީ އެންމެ ފަހުން ލޯ އުނގުޅަމުން ހޭލިއެވެ. އެއަށްފަހު އެންމެ ފުރަތަމަ ކަމަކަށް އަރިމަތީ މޭޒުމަތީގައި އޮތް ފޯނު ނެގިއެވެ. ފޯނު ނަގައި ފޯނާއި ކުޅެން ފެށިތާ މާ ގިނައިރެއް ނުވެ އެލީ ލުއްކެއްޖަހައި އެނދުން ތެދުވުނެވެ.
“އެ ކިހިނެއް އެ ވީ؟” މޫނުބަލާ ލޯގަނޑުން ސީދާ އޭނަގެ ފަހަތަށް ވާ ގޮތަށް ހުރި އެނދުގައި އޮތް އެލީއަށް ވީ ގޮތުން ހިލްޔާއަށް އަހާލެވުނެވެ.
“ނޯ…ނޯ…ޓެލް މީ ދިސް އިޒް ފޭކް…” އެލީ ދެންވެސް ފޯނުން ނަޒަރު ވަކި ނުކޮށް އެހެން ބުނެލީ ބިރެއް ފެނިގެން އުޅޭ ފަދައަކުންނެވެ. ހިލްޔާ ދެންމެ ކުރި ސުވާލެއް އެލީއަށް ނުވެސް އިވޭ ފަދައެވެ.
“ކިހިނެއްހޭ ވީ؟” ހިލްޔާ ބޮލުގައި ހުޅިއެއްޖަހާލަމުން އެލީއާއި ދިމާލަށް އެނބުރިލިއެވެ.
“ބަލާބަލަ ޑޭންއަށް ވެފަ ހުރި ގޮތް!!!” އެލީ ހިތާމަވެރިކަމާއި ޝޮކު އެކުލެވިފައިވާ އަޑަކުން އެހެން ބުނެ ހިލްޔާއަށް ފޯނު ދިއްކޮށްލިއެވެ. ދާނިޝްއާއި ބެހޭގޮތުން އެފަދަ ބަސްތަކެއް އިވުމުން ހިލްޔާ ހިސާބަކަށް ބިރުވެސް ގަތެވެ. އެހިނދު އެލީގެ ފޯނުގައި ހުރި ފޮޓޯއަށް ނަޒަރެއް ދެވުނެވެ.
ފޮޓޯއިން ހިލްޔާއަށް ފެނުނީ މިއަދު ހެނދުނު ހެނދުނާ ހިލްޔާއަށް ފެނުނު ދާނިޝްގެ ސޫރައެވެ. އެހެނަސް ފޮޓޯއިން ދާނިޝް އިނީ ހޮޓެލްގެ ލޮބީގައި ހުރި ސޯފާއެއްގައެވެ. އެއްފަރާތަށް ނަޒަރު ހުއްޓައިގެން ދާނިޝް އިން ފޮޓޯ ފެނިފައި ވެސް ދާނިޝްގެ ރީތިކަން އިޙްސާސްވެ، ހިލްޔާއަށް ހިނިތުންވެލެވުނެވެ.
“ސޯ ހޭންޑްސަމް ދޯ؟ اللّهُمَّ بَارِك.” ހިލްޔާއަށް އެ ތަޢުރީފު ކުރެވުނީ ހަމަ އެއްވެސް އިޚްތިޔާރަކާއި ނުލައެވެ. އެހިނދު ހިލޭ ފިރިހެނަކަށް އެފަދަ ނަޒަރަކުން ބަލާލެވުނީތީ ހިތާހިތުން އިސްތިޣްފާރު ކުރެވެން އުޅުނެވެ. އެ ބަސް ހިތަށް ރަނގަޅަށް ނާންނަނީސް އެލީގެ އަޑު އިވުނެވެ.
“ވަޓް ޑޫ ޔޫ މީން؟!! ހީ ލޮސްޓް ހިޒް ލުކް! އެންޓަޔާރލީ! ޑޭން ގެ އެ ހެއާރސްޓައިލަކީ ޑޭން ގެ ޗާމް. ނައު ހީ ލުކްސް….އޯލްޑް…ވިތް ދެޓް ބޯލްޑް ހެޑް!!!” އެލީ ބުންޏެވެ. އޭގެ ދެވަނަ ސިކުންތުގައި އެލީ އެނދުގައި އޮށޯންނަމުން ރޯ ކަމަށް ހެދެން ފެށިއެވެ.
“އައި ޑޯންޓް އަންޑަސްޓޭންޑް.” ހިލްޔާއަށް އޮޅުމެއްގައި ހުރެ ބުނެވުނެވެ. ދާނިޝް ގެ އިސްތަށިގަނޑު ތުނިވުމުން ދާނިޝް ހުތުރުވާންވީ އެއްވެސް ސަބަބެއް ހިލްޔާއަށް ނުވިސްނުނެވެ. ދެވަނަ ފަހަރަށް ދެންމެ ފެނުނު ފޮޓޯއާއި މެދު ވިސްނާލުމުން ވެސް ދާނިޝް ހަމަ ރީއްޗޭ ހިތަށްއެރިއެވެ.
“އޮހް ލުކް! ބަލާބަލަ ޑޭން ގެ ޑައި ހާޑް ފޭނުން ބުނާ ވާހަކަ. އިއޫ…ދިސް އިޒް ނޮޓް ޑޭން…ޑޭން ލޮސްޓް ހިޒް ޔޫތް. ނޯ….” އެލީ ދެންވެސް އެނދުގައި ފުރޮޅެމުން ރޯ ކަމަށް ހެދުނެވެ.
“ތިއީ ކޮންތާކު އުޅޭ ޑައި ހާޑް ފޭނުންނެއް؟” ހިލްޔާއަށް އަހާލެވުނެވެ.
“މިއީ….މީގެ ދުވަސްކޮޅެއް ކުރިން އަހަރެން ހެދި ގްރޫޕެއް. ޑޭންގެ ހުރިހާ ޑައި ހާޑް ފޭނުން އެއްކޮށްގެން. ވީ ޝެއާރ ޑޭން ގެ ފޮޓޯތައް ގްރޫޕުގަ. މި ދުވަސްކޮޅު ޢުމްރާއަށް އައިސް އެބައުޅޭ މި ގްރޫޕްގަ އުޅޭ ކުއްޖެއްގެ ބައްޕައެއް. އެ ބައްޕަ އެ ކުއްޖާއަށް ފޮނުވި ފޮޓޯއެއް ދެންމެ މި ދެއްކީ.” އެލީއަށް އަނެއްކާވެސް ތެދުވެ އިށީންނަމުން ހުރިހާ ވާހަކައެއް ކިޔައިދެވުނީ ޖަޒުބާތުގައި ޖެހިފައިވި ވަރުން ކަންނޭނގެއެވެ.
“ދާނިޝް ގެ ފޮޓޯ ދާނިޝްގެ ހުއްދައާ ނުލާ ނަގައިގެން ތި ޝެއާރ ކުރަނީ؟” ހިލްޔާއަށް ހިސާބެއްގެ ނުރުހުންތެރިކަމާއެކީ އަހާލެވުނެވެ. އެއާއިއެކު އެލީއަށް ސީދާ ވެލެވުނެވެ.
“ޔެސް….އައި މީން ހީ މަސްޓް ބީ ޔޫޒްޑް ޓު އިޓް. ހީ އިޒް އަ ސެލެބްރިޓީ. އެކަމަކު ނޮޓް އެނީމޯ. ބަލާބަލަ ބައެއް ކުދިން ގްރޫޕް އެއޮތް ލީވް ކުރަނީ!!!” އެލީ ޝަކުވާގެ ރާގަކަށް ބުންޏެވެ.
“ޑައި ހާޑް ދޯ އެ ވަނީ؟” ހިލްޔާ ލާނެތް ރާގަކަށް އެހެން ބުނަމުން އެލީއަށް ފަސްދިނެވެ. އެއަށްފަހު އެތާ ހުރި އަލަމާރި ތެރެއިން އޭނަގެ ހެޑް ކެޕް ނެގީ، ދާނިޝް ގެ ފޮޓޯ ޙިއްސާ އެ ކުރާ ގްރޫޕް ނިމުމަކަށް އަންނާތީ ހިތާހިތުން އުފާ ކުރަމުންނެވެ.
“ޔޫ ޑޯންޓް އަންޑަސްޓޭންޑް ތުއްތާ! ދީޒް އާރ ޑައި ހާޑް ފޭންސް. މާނައަކީ ހުރިހާ ފޭނުން ގެއްލުނަސް މި ފޭނުންގެ ލޯތްބަށް ނިމުމެއް ނާންނާނެއޭ. ޑޭން ފިލްމު ކުޅުން ހުއްޓާލީމަ ވެސް ވީ ވާރ ހިޒް ފޭންސް. އެކަމަކު ބަލާބަލަ މި ވާ ގޮތް. ނޯ ނޯ! 10 މީހުން އޯލްރެޑީ ގޮއްސި!” އެލީ ގޮތް ހުސްވަމުން ދިޔައެވެ.
“ތިއީ ހާދަ ފޭކް ލޯތްބެކޭ.” ހިލްޔާއަށް ހެޑް ކެޕް އަޅަމުން ހިނިތުންވުމަކާއެކީ ބުނެވުނެވެ. ޙަޤީޤީ ލޯބީގެ އިޙްސާސެއް އޭނައަށް މިހާރު ކުރެވިފައިވާކަން އެނގުންވުމުންނެވެ. އެ ލޯބީގެ ފުންކަން އެވަގުތު އިޙްސާސް ކުރެވުމުންނެވެ.
ދާނިޝް ތުނި އިސްތަށިގަނޑާއެކީ ހުރި ފޮޓޯތައް ރާއްޖޭގައި ވައިރަލް ވީ ކަން ދާނިޝްއަށް އެނގުނީ އެދުވަހު ޢަޞްރު ނަމާދަށްފަހު ހޮޓެލަށް އައި ފަހުންނެވެ. ނަހީދުބެ ކޮޓަރިން ބޭރުގައި ހުރި ގަޑިއެއްގައި ފަޔާޒް ޔައިޝްއާއި ދާނިޝްއަށް އެކަމާ ގުޅޭ އާރޓިކަލްއެއް ދައްކަން އެމީހުންގެ ކޮޓަރިއަށް އައެވެ. ދާނިޝް އަވީގައި ހުރި ފޮޓޯއެއް ލެވިފައިވާ އެ އާރޓިކަލްގެ ޞުރުޚީގައި އޮތީ މަޝްހޫރު ތަރި ޑޭން ތަލަވީ ވާހަކައެވެ. އެ އާރޓިކަލްއާއި އާރޓިކަލްގެ ދަށުގައިވާ ކޮމެންޓްތައް ކިޔަމުން ދިޔަދިޔަހެން ތިން މީހުން ހީހީ ހަލާކުވަމުން ދިޔައެވެ.
“އޭ ނަޖާ ވެސް ކޮމެންޓެއް ކޮށްފި އަހަރުމެން ގްރޫޕްގަ. ކިޔަނީ….އައި ކޭން ސީ މައި ބްރައިޓް ފިއުޗާރ އޮން ޑޭންސް ހެޑް. ހަހަހަހަ….” ފަޔާޒް ކޮޓަރީގެ އެނދެއްގައި އިށީނދެ އިނދެ ބުނެލި ވާހަކައިން ފަޔާޒްގެ ކުރިމައްޗަށް ވާ ގޮތަށް އިން ޔައިޝް އާއި، ޔައިޝް އިން އެނދުގައި އޮށޯވެ އޮތް ދާނިޝް ވެސް އެއްވަރަކަށް ހޭން ފެށިއެވެ.
“ހަސަން ވެސް އެބަ ޓައިޕް ކުރޭ އެއްޗެއް. އައިއްސި…ބުނަނީ، އަހަރުމެންގެ ދާނިޝް ވެޑިންގް ގަ ދާނިޝް ހީވަނީ ޕްރިންސް ވިލިއަމްހެން ދޯ އޭ؟ ހެހެހެ….” ޔައިޝް އެހެން ބުނެފައި ހީލުމުން މިފަހަރު ދާނިޝްއަށް ނުހެވުނެވެ. އޭގެ ބަދަލުގައި ކުއްލިއަކަށް ތެދުވެލެވުނެވެ.
“ކިހިނެއްވީ ބްރޯ؟” ދާނިޝްއަށް ވީ ގޮތް ފެނިފައި ފަޔާޒް ހުނުން މަޑުކޮށްލަމުން އެހިއެވެ. އެހިނދު ޔައިޝް ވެސް ދާނިޝްއަށް ބަލާލިއެއްކަމަކު ދާނިޝްއަށް ވަކި އެއްޗެކޭ ނުބުނެވުނެވެ. އެހިނދު އެނދުން ފައިބައިގެން ގޮސް ކޮޓަރީގައި ދިގުކޮށް ހުރި މޫނު ބަލާ ލޯގަނޑާއި ދިމާލަށް ދެވުނީ ފިކުރަކާއި އެކީގައެވެ. އިސްތަށިގަނޑު ތުނިވެފައިވާ އޭނަގެ ބޮލުގައި އަތް ޖައްސާލަމުން އޭނަ ޙަޤީޤަތުގައި ވެސް މިހާރު ހުތުރީތޯ ހިތަށްއެރި ހިނދު ލޮލަށް ސިފަވަމުން ދިޔައީ ހިލްޔާގެ ސޫރައެވެ.
“އޭ ދާނިޝް ކިހިނެއްވީ؟” މިފަހަރު ޔައިޝް އެހިއެވެ.
“ބްރޯ އައި ޑޯންޓް ކެއާރ ދުނިޔޭގެ އެހެން އަންހެން ކުދިން ބުނާ އެއްޗެއް. އެކަމަކު އަހަރެން އިމްޕްރެސް ކުރަން ބޭނުންވާ ކުއްޖާއަށް ވެސް އަހަރެން މިހާރު ހުތުރުވާނެތަ؟” ދާނިޝްއަށް އޭނަގެ ކަންބޮޑުވުން ފާޅު ކުރެވުނީ ދެންވެސް ލޯގަނޑުން އޭނަގެ ސޫރައަށް ބަލަން ހުރެއެވެ. އެއާއިއެކު ޔައިޝް އެނދުން ތެދުވިއެވެ.
“އެއީ ދާނިޝް ޑިޒާވް ވާ ކުއްޖާއަށް ވިއްޔާ އެކުއްޖާ ދާނިޝް ޤަބޫލުކުރާނެ.” ޔައިޝް ބުންޏެވެ. އެހިނދު ފަޔާޒް ވެސް ތެދުވެލިއެވެ.
“ތެދެއް. އެހެންނޫނަސް ކަމުނުދިޔަޔަސް އަލުން އިސްތަށި ފަޅާނެއެއްނު؟ ނޯ ވޮރީސް.” ފަޔާޒް ދާނިޝްގެ ކައިރިއަށް އައިސް ކޮނޑުގައި ދެ ފަހަރަކު މަޑުމަޑުން ޖެހިއެވެ. އެ ބަސްތަކުން ދާނިޝްއަށް ހަމަޖެހުމެއް ލިބުނީ ވަކި ވަރަކަށެވެ. ހިލްޔާއަށް އޭނަ ރީތިވުން ދާނިޝްއަށް މުހިއްމުވިއެވެ. މި ހުރިހާ ދުވަސް ވަންދެން ދާނިޝްއަށް އޭނަގެ ބޭރުފުށުގެ ރީތިކަމާއިމެދު ޔަޤީންކަން ލިބިފައިވީ، ނޭނގުމެއްގެ ތެރެއިން ވެސް އޭނަގެ ފޭނުން އޭނައަށް އޮއްސާ ތަޢުރީފުތަކުގެ ސަބަބުންނެވެ. އެހެނަސް މިއަދު އެ ހުރިހާ ފޭނުން އޭނައަށް ފަސް ދިނުމުން އޭނަގެ ރީތިކަމާއިމެދު ޝައްކު އުފެދިއްޖެއެވެ. ހިލްޔާ ވެސް ދެކޭނީ އެމީހުން ދެކޭ ފަދައިންހެން ހީވާން ފަށައިފިއެވެ.
އެ ވަގުތުކޮޅުން ފެށިގެން ދާނިޝް ހިލްޔާގެ ކުރިމައްޗަށް ދިޔުމާއިމެދު ވެސް ނުތަނަވަސްވެފައިވީ އެހެންވެއެވެ. ހިލްޔާ އޭނައަށް ބަލާފައި ޝައްކުގެ ނަޒަރެއް ދޭ މަންޒަރު ފެނިއްޖެނަމަ އޭނައަށް ކުރެވޭނެ އިޙްސާސް އަންދާޒާ ނުކުރެވުނީތީވެއެވެ. ރަށަށް ގޮސް އޭނަގެ އިސްތަށިގަނޑު ދިގު ނުވަނީސް ހިލްޔާއަށް އޭނަ ނުފެންނާނެ ގޮތެއްވުމަށް ވެސް ހިތާހިތުން ދުޢާ ކުރެވުނެވެ. އެހެނަސް އެއީ ވުމަށް ވުރެ ނުވުން ގާތްކަމެއްކަން ދާނިޝްއަށް އެނގުނެވެ.
އެރޭ ޢިޝާ ނަމާދަށްފަހު ހޮޓެލަށް ވަދެގެން ދިޔަ ހިނދު ލޮބީ އޭރިއާއިން ދާނިޝްއަށް ހިލްޔާ ފެނުނެވެ. ލިފްޓު ހުޅުވެންދެން ނަހީދުބެއާއިއެކީ ލިފްޓު ކައިރީގައި މަޑުކޮށްގެން ހުރި ހިލްޔާ ފެނިފައި ދާނިޝްއަށް ދުރުގައި މަޑުކޮށްލެވުނެވެ. އެވަގުތުކޮޅު ވެސް ހިލްޔާއަށް ނުފެނި އަނެއް ފަރާތަށް އެނބުރެން އުޅުނެވެ. އެހެނަސް އޭނައަށް ޙަރަކާތެއް ނުގެނެވެނީސް ހިލްޔާ އޭނައަށް ބަލައިފިއެވެ. އެހިނދު ދާނިޝް ގަނޑުވާ ގޮތްވިއެވެ. ދާނިޝް ހީކުރީ އޭނަ ފެނިފައި ހިލްޔާގެ ދެބުމަ ކައިރިވެ، އޭނަގެ ސޫރައިގެ އައިބުކަން ފާހަގަވީ ފަދަ އަސަރެއް ހިލްޔާގެ މޫނުމަތިން ފެންނާނެ ކަމަށެވެ.
އެހެނަސް އެވަގުތު ހިލްޔާ ދާނިޝްއަށް ހަދިޔާ ކުރީ ފުރިހަމަ ހިނިތުންވުމެކެވެ. އެ ހިނިތުންވުމުގެ ރީތިކަމާއި އުފާވެރިކަން ފާހަގަވުމުން ދާނިޝް އެހެން ހުރިހާ ކަމެއްގެ މަތިން ހަނދާން ނެތޭ ގޮތްވިއެވެ. މިއީ ކުރިން އެއްވެސް ދުވަހަކު ހިލްޔާ އޭނައަށް ނުދޭ ޒާތެއްގެ ހިނިތުންވުމެއްހެން ހީވުމުންނެވެ. އޭނަ ފެނުނީތީ ހިލްޔާ އުފާވިކަން އެ ހިނިތުންވުމުން ސާފުކޮށް އަންގައިދިނެވެ. އުޖާލާކަން ވެރިވެފައިވި އެ ދެލޯ ބަބުޅަމުން ދިޔަހެން ހީވިއެވެ. އެކަން ފާހަގަވުމުން ދާނިޝްއަށް ހިނިތުންވެލެވުނީ ޙައިރާންކަމެއްގައި ހުރެއެވެ. ހިލްޔާއަށް މި އައީ ކޮން ބަދަލެއްތޯ ހިތަށްއެރިއެވެ.
އެ ދުވަސްފަހުން ދާނިޝްއަށް ހިލްޔާ ފެންނަ ކޮންމެ ފަހަރަކު ހިލްޔާ އޭނައާއި ދިމާލަށް ބަލައިފިނަމަ އޭނައަށް ލިބެނީ ހަމަ އެފަދަ ހިނިތުންވުމެކެވެ. އެ ހިނިތުންވުމަށްފަހު ހިލްޔާ ރަތްވެގެންދާ ކޯތާފަތާއި އެކީ އިސްޖަހާލާ ގޮތުން ހިލްޔާއަށް އޭނަ ކަމުދާކަން ދާނިޝްއަށް ފަހުމްވެއެވެ. އޭނަ ތަލަވެފައިވާއިރު ވެސް ހިލްޔާއަށް އޭނަ ކަމުދަނީތޯ ހިތަށްއަރަމުން ދިޔައެވެ. އެއީ ކީއްވެކަން ފަހުމްވާން ދާނިޝްއަށް މާ ގިނަ ދުވަހެއް ނުނެގިއެވެ. ޚުދު އޭނައަށް ވެސް ހިލްޔާ ކަމުދަނީ ހަމައެކަނި ބޭރުފުށުގެ ރީތިކަމުގެ ސަބަބުން ކަމަށްނުވާތީވެއެވެ. ހިލްޔާގެ ވެސް ބޭރުފުށުގެ ސޫރައަށް ބަދަލެއް އައިއްސިނަމަ ދެންވެސް އޭނައަށް ހިލްޔާ ދެކެ ލޯބިވެވޭނެއެވެ. ބޭރުފުށުގެ ރީތިކަމަށްވުރެ ބޮޑަށް ދާނިޝް ހިލްޔާ ދެކެ ލޯބިވަނީ އެ ދީންވެރި ކަމާއި އަޚްލާޤަށްޓަކައި ކަމަށްވާތީވެއެވެ. ހިލްޔާ ފެންނައިރު ހިތަށް ފެންނަނީ އެ އަސްލު ކަމަށްވާތީވެއެވެ. އެހެން ހުރިހާ ކަމެއް އޭގެ ސަބަބުން ރީތިކަމުގައި ފެންނާތީވެއެވެ.
ޢުމްރާ ދަތުރު މިފަދަ ގޮތަކަށް ކުރިއަށް ދިޔައެވެ. މައްކާއަށް އާދެވުނުތާ ދެވަނަ ދުވަހު ޠާއިފަށް ދަތުރު ކުރެވުނެވެ. ޠާއިފުން އަނބުރާ އައިސް ދެވަނަ ޢުމްރާ ކުރެވުނެވެ. އެއަށްފަހު ވެސް އެއްދުވަސް ފަހުން އެހެން މީޤާތަކަށް ދިޔުމަށްފަހު އަނބުރާ އައިސް ތިންވަނަ ޢުމްރާ ކުރެވުނެވެ. އެއަށްފަހު ޖިއްދާ ބަލާލުމަށް ޖިއްދާ ދަތުރުގައި ވެސް އެންމެން ދިޔައެވެ. މި ހުރިހާ ދަތުރުތަކުގެ ތެރެއިން ބައްޕަ މެދުވެރިވެގެން ދާނިޝްގެ ފަރާތުން ހިލްޔާއަށް ކުދިކުދި ހަދިޔާތައް ލިބެމުން ދިޔައެވެ. ހަދިޔާ ލިބިގަތުމުގައި ޚުދު އޭނައަށް އައިސްފައިވާ ބަދަލު ހިލްޔާއަށް ފާހަގަވީ، ދާނިޝް އެފަދައިން އޭނައަށް ދިން ފުރަތަމަ ހަދިޔާއިންނެވެ.
“މިއީ ދާނިޝް ދިން އެއްޗެއް…”
އެއްދުވަހު މެންދުރު ނަމާދަށް ޙަރަމަށް ގޮސްފައި އަނބުރާ ހޮޓެލަށް އައި މަގުމަތީގައި ބައްޕަ އޭނަގެ އަތަށް ޗޮކްލެޓް އައިސްކްރީމް ތަށްޓެއް ލައިދެމުން ބުންޏެވެ. އެހިނދު އައިސްކްރީމް ފެނުމުން ވެސް ހިލްޔާގެ ހިތްހަމަޖެހުނެވެ. ހޫނުގައި ހިނގަމުން ދާތާ އިރުކޮޅެއް ވެފައިވުމުން އެންމެ ބޭނުންވެފައިވީ ފިނި ބުއިމެކެވެ.
“ދާނިޝް…” އެ ކުޑަ ޕްލާސްޓިކް ތަށީގައި ހިފަމުން އެ ނަން ކިޔައި ހިލްޔާއަށް ކުރިމައްޗަށް ނަޒަރެއް ދެވުނެވެ. އެހިނދު ދާނިޝް ހަމަ އެފަދަ އައިސްކްރީމް ތަށްޓެއް މައިސޫންއަށް ދޭ މަންޒަރު ފެނުނެވެ. ހިލްޔާ ހިނިތުންވުމަކާއެކީ އޭނަގެ އައިސްކްރީމް ތަށްޓަށް ބަލާލަމުން އޭގައި އޮތް ކުޑަ ސަމުސަލުން އައިސްކްރީމް ބޯން ފެށިއެވެ. އެއީ 5 ތަރީގެ އައިސްކްރީމެއް ނޫނެވެ. އެހެނަސް ހިލްޔާއަށް އެ އައިސްކްރީމް މީރުވިއެވެ.
ހަދިޔާއެއް ކަމުދަނީ އަގުބޮޑުވުމުން ނޫންކަން ދާނިޝް ގެ އެ ހަދިޔާތަކުން ހިލްޔާގެ ހިތަށް ފަހުމްވިއެވެ. ހަދިޔާއެއް ކަމުދަނީ އެ ހަދިޔާ ދިން މީހަކު އޭނައާއި މެދު ވިސްނި ވިސްނުމާއި އަޅާލީ ކަމުގެ އިޙްސާސުންނެވެ.
އެންމެން މަދީނާއަށް ފުރަން ދަތުރު ފެށީ ރަށަށް އަނބުރާ ދިޔުމަށް 6 ދުވަސް ބާކީ އޮތްވާއެވެ. މަދީނާއަށް ބަހުގައި ދަތުރު ކުރަމުން ދިޔައިރު، ރަސޫލާ ﷺ މަދީނާއަށް ހިޖުރަ ކުރެއްވި ގޮތާއި ހިޖުރަ ކުރެއްވުމަށްފަހު ކަންތައް ވީ ގޮތް ބަސް ތެރެއިން ޝެއިޚް ކިޔައިދެއްވިއެވެ. އެ ވާހަކަތައް އަލުން ހަނދާންވެގެން ދިޔުމުން ހިލްޔާގެ ހިތަށް މިއަދު އަސަރު ކުރީ އެހެން ދަރަޖައަކަށެވެ. އީމާންތެރިކަން ވަރުގަދަވުމުން ރަސޫލާ ﷺ އަށްޓަކައި ހިތުގައި އޮތް ލޯބިވެސް އިތުރުވި ފަދައެވެ.
މަދީނާއަށް ދިޔަ މަގުމަތީގައި ވަކި ހިސާބަކުން ރެސްޓް ސްޓޮޕަކަށް މަޑުކުރިއެވެ. މެންދުރުގެ ކެއުމަށްޓަކައި އެންމެން ބަހުން ފައިބައިގެން ގޮސް ރެސްޓޯރެންޓަކަށް ދިޔައެވެ. ހިލްޔާއާއި އެލީ ފުދޭ ވަރަކަށް އަވަހަށް ކައި ނިމުމުން، އެލީ ފޫހިވާތީ ހިލްޔާ އެލީ ގޮވައިގެން ރެސްޓޯރެންޓުން ބޭރަށް ނިކުތީ ބައްޕައަށް އެންގުމަށްފަހުއެވެ. އޭގެ މާ ގިނައިރެއްނުވެ ބަހަށް އަރަން އެލީ ބޭނުންވީ ހޫނުވާތީވެއެވެ. އެލީގެ ހިތް ބަދަލުވާ ގޮތް އަވަސްކަމާއިމެދު ބޯހޫރުވަމުން ހިލްޔާ އެލީއާއިއެކީ ސްޓާޓުގައި އޮތް ބަހަށް އަރަން ދިޔައެވެ.
އެލީއާއި ހިލްޔާ ގޮސް ބަހަށް އެރިއިރު ބަހުގެ ޑްރައިވަރު ފިޔަވައި އެކަކު ވެސް ނެތެވެ. އެހެންކަމުން ބަހަށް ވެރިވެފައި އޮތީ މަރު ހިމޭންކަމެކެވެ. އެ ހިމޭންކަމުގެ ތެރެއިން އެލީ ވާހަކަ ދެއްކިއެވެ.
“ތުއްތާ….ކޭން އައި އާސްކް ސަމްތިންގް؟” އެލީ ސުވާލު ކުރިއެވެ. ހަމަ އެހިނދު ބަހުގެ ފަހަތުގައި ހުރި ދޮރުން ދާނިޝް ބަހަށް އެރިއެވެ. ހިލްޔާމެން ތިބީ ފުދޭވަރަކަށް ކުރީގައި ކަމަށްވުމުން އެމީހުންނަށް އެކަން ފާހަގައެއް ނުވެއެވެ.
“ޝުއާރ…” ހިލްޔާ ބުންޏެވެ. ހިލްޔާ އެހެން ބުނި އަޑު، ހިލްޔާމެންނާއި ދެ ސީޓު ބަރި ފަހަތުގައި ގޮސް އިށީންނަން އުޅުނު ދާނިޝްއަށް އިވުނެވެ.
“ޔޫ ރިއަލީ ލައިކް ޑޭން ދޯ؟” އެލީ ކޮށްލި ސުވާލުން، ހިލްޔާއާއިއެކީ ސީޓުގައި އިށީންނަން އުޅުނު ދާނިޝް ވެސް ހުއްޓުން އަރާ ގޮތްވިއެވެ.
“ކީއްވެ….ތިހެން ތި އެހީ؟” ހިލްޔާއަށް ޖެހިލުންވުމަކާއެކީ އަހާލެވުނެވެ. އެ ޖެހިލުންވުން އަޑުން ވެސް ފާހަގަވި ދާނިޝްގެ ތުންފަތުގައި ހިނިތުންވުމެއް ކުރެހުނެވެ. ކުޑަދޮރު ކައިރީގައި ހުރި އޭނަގެ ސީޓުގައި އިށީނީ އެ ހިނިތުންވުމާއި އެކީގައެވެ.
“ކަމޯން ތުއްތާ އައިމް ނޮޓް ސްޓުޕިޑް. ތުއްތަ ޑޭންއަށް ވަރަށް ގިނަގިނައިން ބަލާކަން ނޯޓިސް ވޭ. އެންޑް ބައްޕަ ކައިރިން ވެސް ވަރަށް ގިނައިން ޑޭން ގެ ވާހަކަ ތުއްތަ އަހައި އުޅެމެއްނު؟ އިޓްސް ޓޫ އޮބްވިއަސް.” އެލީ ބުންޏެވެ. އެ ވާހަކައިން ދާނިޝްގެ ހިނިތުންވުން ފުންވިއެވެ.
“ކުޑް ބީ….” ހިލްޔާއަށް ބުނެވުނެވެ. އެ ބަސްތައް ދުލާއި ހަމައަށް ގެންނަން އުދަގޫވިއެވެ. އެ އިޙްސާސްތަކުގެ ފުންކަމުން ކަންނޭނގެއެވެ.
“ކުޑް ބީ ނުކިޔަބަލަ ތުއްތާ. ބީ ޝުއާރ. ކޮންފެސް ކުރަންވީއެއްނު ޑޭންއަށް؟” އެލީ ބުންޏެވެ.
“އެލީ ބުނަނީ ސްޓޯރީ ރީތި ވާނީ މޭލް ލީޑް ފުރަތަމަ ކޮންފެސް ކުރީމައޭ ނޫންތަ؟” ހިލްޔާ އެހިއެވެ.
“ޔާ ބަޓް….ޚަދީޖަތުގެފާނު ޕްރޮޕޯޒްޑް.”
“އާޗާ…އަޑުއަހައިގެން ދޯ އިނީ ޝެއިޚް ދެއްކެވި ވާހަކަ؟”
“ނޮޓް ދަ ޕޮއިންޓް! ޚަދީޖަތުގެފާނު ޕްރޮޕޯޒްޑް. ސޯ ޔޫ ކޭން ޓޫ!”
“ވެލް އައިމް ނޮޓް ޚަދީޖާ ރަޟިޔަ ﷲ ޢަންހާ. އިން އެނީ ވޭ.”
“އެންޑް….ހީ އިޒް ނޮޓް އަ ޕްރޮފެޓް.”
އެލީ އެ ބުނެލި ވާހަކައިން އެ ދެމެދަށް މަރު ހިމޭންކަމެއް ވެރިވީ ހިލްޔާ އެލީއަށް ދިން ނަޒަރުންނެވެ. އިސާހިތަކު ހިލްޔާ ވާހަކަ ދެއްކިއެވެ.
“މަދީނާއަށް ދާ މަގުމަތީގަ ތި ކަހަލަ ވާހަކައެއް ދައްކަން ކެރުނީ ވެސް ކިހިނެއް؟” ހިލްޔާ ނުރުހުންތެރިކަމާއެކީ އެހިއެވެ.
“އައި ސެއިޑް ޑޭން އިޒް ނޮޓް އަ ޕްރޮފެޓް.”
“މުޙައްމަދު ﷺ އަކީ ފައިނަލް ޕްރޮފެޓް އެންޑް މެސެންޖާރ. އެހެން ކަހަލަ ޚިޔާލެއް އަންނަ ކަހަލަ ވާހަކައެއް ވެސް ދައްކައިގެން ނުވާނެ!!!”
ހިލްޔާއާއި އެލީއާއި ދެމެދު އެ ކޯޅުން ފެށިގެން ދިޔަ ގޮތުން ދާނިޝްއަށް ނުއިވޭ ގޮތަކަށް ހެވެން ފެށިއެވެ. އެހިނދު ހިތަށް އުފާވެރިކަމެއް ވެރިވިއެވެ. ހިލްޔާއަށް އޭނަ ކަމުދާކަން ޚުދު ހިލްޔާގެ ދުލުން އިވިގެން ދިޔުމުންނެވެ.
އެ ދަތުރުމަތީގައި ރަސޫލާ ﷺ އަށްޓަކައި ހިތުގައި އުފެދިފައިވި ލޯބި އިތުރަށް ފުން ވެދާނެ ކަމަށް ހިލްޔާ ހިއެއް ނުކުރެއެވެ. އެހެނަސް މަދީނާއަށް ވަދެވުމުން ވެސް ހިތަށް ކުރީ އާދަޔާ ޚިލާފު އަސަރެކެވެ. އެކަލޭގެފާނާއި ގާތްކަމެއް އިޙްސާސެއް ކުރެވުނެވެ. މި ރަށަކީ ރަސޫލާ ﷺ އަށް މަރުޙަބާ ކިޔުނު ރަށްކަން ހަނދާންވުމުންނެވެ. އަދި މި ރަށް މިހާ ތަރައްޤީވެފައި ރީތިވުމުގެ އެއް ސަބަބަކީ އެކަލޭގެފާނު އެ ރަށަށްޓަކައި ކުރެއްވި ދުޢާއެއް ކަން އެނގިފައިވުމުންނެވެ.
މަދީނާގައި ހިލްޔާމެން ގިނަ ވަގުތު ހޭދަކުރީ މަސްޖިދުއްނަބަވީގައެވެ. މަދީނާއަށް އައި ފަހުން އެލީގެ އުޅުމުން ވެސް ހިލްޔާއަށް ތަފާތެއް ފާހަގަވިއެވެ. އެލީ ވެސް އަމިއްލައަށް އިސްނަގައިގެން މިސްކިތަށް ދާނީ ކޮން އިރަކުތޯ އަހަން ފެށިއެވެ. އަދި މިސްކިތަށް ގޮސް އަމިއްލައަށް މިސްކިތުގައި ހުރި މުޞްޙަފްތަކުން މުޞްޙަފެއް ނަގައިގެން ކިޔަވަން ފެށިއެވެ. މިއީ މަދީނާއަށް އައުމުން ކުރި އަސަރެއް ކަމެއް ނޫނީ އޭނަ ޢުމްރާތަކުގައި އެލީއަށްޓަކައި ކުރި ދުޢާތަކުގެ ސަބަބުން އައި ބަދަލެއް ކަމެއް ހިލްޔާއަށް ޔަޤީނެއް ނުކުރެވުނެވެ. ކޮންމެ ގޮތެއްވިޔަސް އެ ބަދަލާއިމެދު އުފާކޮށް، ޙަމްދު ކުރެވުނެވެ.
މަދީނާ ދަތުރުގައި ހިލްޔާއަށް ދެން އުފަލެއް ލިބުނީ، އެތައް ދުވަހެއް ފަހުން ދާނިޝް ދަގަނޑު ބޭސްގަނޑު ނަގާލާފައި ހުރި މަންޒަރު ފެނުމުންނެވެ. އެންމެ ފުރަތަމަ ދާނިޝް ފެނުނީ މަދީނާގެ މަގުމަތިން މައިސޫން އާއެކީ ހިނގާފައި ދަމުން ދެއަތް ހިއްލައި އުދުހޭ ކަމަށް ހެދެމުން ދިޔަ މަންޒަރެވެ. އެ ތަން ފެނިފައި ހިލްޔާއަށް އެކަމާއިމެދު ބައްޕައާއި ސުވާލު ކުރެވުނެވެ.
“ފަޔާޒް ގެ އެހެން އެކުވެރިއެއް އުޅޭޔޯ މަދީނާގަ. އެ ފްރެންޑް ދާނިޝް ގޮވައިގެން މިކޮޅު ކްލިނިކަކަށް ގޮއްސަ ބޭސްގަނޑު ނެގީ.” ބައްޕަ އޭނައާއި އެކީ ހިނގަމުން ކިޔައިދިނެވެ.
“އެކަމަކު….އަދި ކިރިޔާ 4 ހަފްތާ ކަންނޭނގެ ވާނީ. ރަނގަޅުތަ ދާނިޝް؟” ހިލްޔާއަށް ހިސާބެއްގެ ކަންބޮޑުވުމަކާއެކީ އަހާލެވުނެވެ.
“ރަނގަޅުވީމަތާ އެހެން އުޅެވޭނީ. ނުބުނޭ ރަނގަޅެއް ނޫނޭ.” ބައްޕަ ބުންޏެވެ.
“އޮހް…” ހިލްޔާއަށް ބުނެވުނެވެ. ދާނިޝް މައިސޫން އާއި ސަމާސާ ކުރަމުން ހެމުން ދިޔަ މަންޒަރު ފެނިފައި ހިލްޔާގެ ނިތުން ރޫތައް ފިލައި ތުންފަތްމައްޗަށް ހިނިތުންވުމެއް ވެރިވިއެވެ. ދާނިޝް އުފަލުގައި ހުންނަ މަންޒަރު ފެނިފައި ހުރިހާ ކަންބޮޑުވުމެއް ފިލައިދާ ފަދައެވެ.
ހިލްޔާމެން ފަހު ޢުމްރާ ކުރީ މަދީނާއިން އަނބުރާ މައްކާއަށް އާދެވުނު ރެއެވެ. އެ ޢުމްރާގެ ތެރެއިން ޠަވާފް ކުރަމުން ދިޔައިރު ހިލްޔާ އޭނަގެ އަތުގައި އޮތް ދުޢާ ފޮތް އެލީއަށް ދޭން ޖެހުނީ، އެލީ އެކަމަށް އެދުނު ވަރުންނެވެ. އެހެންޏާ އަބަދު ފޯނާއިގެން އުޅޭ އެލީ ފޯނު މަތިން ހަނދާން ނައްތާލާފައި ޠަވާފް ކުރަމުން ދިޔައިރު އެ ފޮތަށް ގެއްލިފައިވި ގޮތުން ހިލްޔާގެ ހިތް އުފަލުން ބަންޑުން ވަމުން ދިޔައެވެ. ﷲ އީ އޭނަ ކިތަންމެ ޝައްކު ކުރިޔަސް ހުރިހާ ކަމެއްގެ މައްޗަށް ކުޅަދުންވަންތަ ވެވޮޑިގެންވާ އިލާހުކަން އެވަގުތު އެނގުންވިއެވެ.
އެ ޚިޔާލާއި އެކީ ހިލްޔާ ހިތަށް އަންނަމުން ދިޔަ ކޮންމެ ދުޢާއެއް ކުރަމުން ދަނިކޮށް، މީހުން މަދު ހިސާބަކަށް އާދެވުނެވެ. އެހިނދު އޭނައާއި ނުހަނު ދާދި ގާތުން ދާނިޝްގެ އަޑު އިވުނު ހެން ހީވުމުން ހިލްޔާއަށް ކަނާތް ފަރާތަށް ނަޒަރެއް ދެވުނެވެ. އެހިނދު މައިސޫން އުރާލައިގެން، މައިސޫން ލައްވާ އަޑު ދަށުން ޢަރަބި ދުޢާއެއް ކިޔުއްވަމުން ދާނިޝް ހިނގަމުން ދިޔަ މަންޒަރު ފެނުނެވެ.
އެ މަންޒަރު ފެނިފައި ހިލްޔާގެ ފިޔަވަޅުތައް ލަސްވެގެން ދިޔުމުން ދާނިޝް އޭނައަށް ވުރެ ކުރިއަށް އަރައިގެން ދިޔައެވެ. އެހިނދު ހިލްޔާއަށް ދުޢާ ކުރުން ވެސް ހުއްޓިފައި ކުރިމަތިން ފެނުނު މަންޒަރަށް ބަލަހައްޓައިގެން ހުރެވުނެވެ. އިޙްރާމުގައި ހުރި ދާނިޝް، އިޙްރާމުގައި ހުރި ކުޑަ ކުއްޖަކު އުރާލައިގެން ހުރި މަންޒަރުން ހިލްޔާގެ ހިތް ލޯބިން ފުރިގެން އައެވެ. އެހިނދު ދުޢާއެއް ކުރަން ދޫ ޙަރަކާތް ކުރިއެވެ.
“ޔާ ﷲ….” ހިލްޔާއަށް ވައިއަޑުން ކިޔާލެވުނީ ހަމައެކަނި އެހާވަރަށެވެ. ހިތް އެދުނީ ކުރިމަތިން އެ ފެނުނު މަންޒަރު އޭނަގެ ޙަޔާތުގައި ޙަޤީޤަތަކަށް ހައްދަވައި ދެއްވުމަށެވެ. އެ ޒުވާނާއަކީ އޭނަގެ ފިރިމީހާއަށް ހައްދަވައި ދެއްވުމަށެވެ. އަދި އެއްދުވަހު އެ ފިރިމީހާގެ އަތުތެރޭގައި އެމީހުންގެ ދަރިފުޅު ލެއްވުމަށެވެ.
އެހެނަސް ދުޢާގައި އެ ބަސްތައް އަތުރަން ހިލްޔާ ނުކުޅެދުނެވެ. ހިތުގައި ޝައްކުތަކެއް އުފެދެން ފެށީ ޝައިޠާނީ ވަސްވާސްތަކުގެ ސަބަބުން ކަންނޭނގެއެވެ. ދާނިޝް އޭނައަށް ޙައްޤުވާނެތޯ އަމިއްލަ ޒަމީރާއި ސުވާލު ކުރެވުނެވެ. އޭނަ ވަނީ ދާނިޝްއާއި ކައިވެނި ކުރުމުގެ ފުރުސަތު ލިބުމުން ވެސް އެއަށް ފަސްދީފައެވެ. ދާނިޝްއަށް އެކަން އެނގިއްޖެނަމަ ދާނިޝް ހާދަ ދެރަވާނެއެވެ. ބޭނުންވާއިރަށް ދާނިޝްއަށް ފަސްދީފައި ބޭނުންވާއިރަށް ދާނިޝް އަމިއްލަ ކުރުމުގެ ޙައްޤެއް އޭނައަށް ލިބިގެންވޭ ހެއްޔެވެ؟
އެ ސުވާލުގެ ސަބަބުން ހިލްޔާއަށް އެ ދުޢާއެއް ނުކުރެވުނެވެ. އޭގެ ބަދަލުގައި ކުރެވުނީ، ކައިވެންޏާއި ގުޅޭ ގޮތުން އޭނަ އަބަދު ކުރާ ދުޢާއެވެ. ޙަޔާތުގެ ބައިވެރިޔާއާއި ދަރިންގެ ކިބައިން ލޮލުގެ ފިނިކަމެއް ދެއްވުމަށް އެދި ކުރާ ދުޢާއެވެ. އެ ދުޢާ ކުރުމުން އެވަގުތު ހިލްޔާގެ ހިތަށް ލިބުނީ އާދަޔާ ޚިލާފު ހިތްހަމަޖެހުމެކެވެ. މިއީ އިޖާބަވެއްޖެ ދުޢާއެއް ކަމަށް އެވަގުތު ހިތުގެ ފުން މިނަށް އިޙްސާސް ކުރެވުނީ ކީއްވެކަމެއް ނޭނގުނެވެ.
ހިލްޔާމެން ރާއްޖެއަށް ފުރަން އޮތީ އޭގެ އަނެއްދުވަހުގެ ހަވީރެވެ. ފުރުމުގެ ކުރިން އެލީ ދެންވެސް ބާޒާރު ކުރަން ބޭނުންވުމުން އަނެއްކާވެސް އެންމެން ފަހު ފަހަރަށް ޙަރަމްގެ ކައިރީގައިވާ ކްލޮކް ޓަވާރއަށް ދިޔައެވެ. ކްލޮކް ޓަވާރއަށް ވަދެގެން ދިޔަ ވަގުތު ދާނިޝް ވެސް ޔައިޝް އާއިއެކު އެތަނަށް ވަން މަންޒަރު ހިލްޔާއަށް ފެނުނެވެ. އެހެނަސް އޭގެ މާ ގިނައިރެއް ނުވެ ހިލްޔާގެ ލޯމައްޗަށް ދާނިޝް ގެއްލުނީ، ދާނިޝް އެމީހުން ދިޔަ މިޞްރާބު ނޫން އެހެން ދިމާލަކަށް ދިޔުމުންނެވެ.
ހިލްޔާ މާ ބޮޑަށް ދާނިޝް އާއިމެދު ވިސްނުމެއް ނެތި އެލީމެންނާއި އެކު އުޅެމުން ދިޔައެވެ. މިފަހުގެ އާދައިގެ މަތިން ހިލްޔާ މާ ގިނަ އެއްޗެއް ގަންނަ ހިތެއް ނުވިއެވެ. އެއްޗެއް ގަތިއްޔާ ގަތީ ކްލިނިކްގައި އުޅޭ ކުދިންނަށާއި އޭނަގެ އެކުވެރިންނަށް ދޭށެވެ. އަމިއްލަ ނަފްސަށްޓަކައި ގަންނަން ބޭނުންވި އެއްޗަކަށް ހިލްޔާއަށް ފެނުނީ، އަބާޔާ ފިހާރައަކުން ފެނުނު ކަޅުކުލައިގެ އެހުން ޒީނަތްތެރި ކުރެވިފައިވާ ކަޅުކުލައިގެ އަބާޔާއެކެވެ. އަބާޔާގެ މެދުން ރޮގަކަށް އެސް ޖެހިފައިވީއިރު، ފުޅާ އަތުގެ ކޮޅުގައި މާ ކޯޅިއެއްހެން އެސްޖެހިފައިވިއެވެ. ހިލްޔާ އެއަށް ބަލަން އިރުކޮޅަކަށް ހުރެފައި އޭގެ އަގު ބެލިއެވެ. ޢާއްމު ގޮތެއްގައި އަބާޔާ ލިބޭ އަގަށްވުރެ ވަރަށް ބޮޑު އަގެކެވެ. ބޮޑު އަގަކަށް ވިޔަސް ހިލްޔާގެ އަތުގައި އަބާޔާ ގަނެވޭނެ ވަރަށް ލާރި ހުއްޓެވެ. އެހެނަސް އޭތި ގަތުމުގެ ޚިޔާލު ދޫކޮށްލެވުނީ، އިސްރާފު ކުރަން ބޭނުމެއް ނުވުމުންނެވެ. ހަމަ މި ޒާތުގެ އަބާޔާއެއް މިއަށްވުރެ ހެޔޮ އަގެއްގައި ލިބިދާނެކަން ޔަޤީނާއި ގާތްވީތީވެއެވެ.
ހިލްޔާއަށް ނޭނގުނު ކަމަކީ، ހިލްޔާ އެ އަބާޔާއަށް ފަސްދީފައި ދާން ހިނގައިގަތުމުން، އެ މަންޒަރު ބަލަން ހުރި މީހަކު އެ އަބާޔާ ނެގި ކަމެވެ.
ހަވީރު ފުރަން ތައްޔާރުވެގެން ގޮސް ބަހަށް އެރި ވަގުތު ހިލްޔާ ދާނިޝްއާއި ބައްދަލު ކުރަން ބޭނުންވެފައިވިއެވެ. ދާނިޝް ފަހަރެއްގައި މި ދަތުރު ނިންމާފައި ފުރައިގެން ދާނީ ޗައިނާއަށް ކަމަށް ބައްޕަ ފަރާތުން މި ދަތުރު މަތީގައި ވެސް އިވިފައިވުމުންނެވެ. އެއާރޕޯޓަށް ދާން ދާނިޝް ބަހަށް އެރުމުން ވެސް ހިލްޔާގެ ހިތް ޝައްކެއްގެ މަތީގައިވިއެވެ. އެއާރޕޯޓަށް ގޮސްފައިވެސް ދާނިޝް އެހެން ފްލައިޓަކަށް އަރާފާނެ ނޫންތޯ ހިތަށްއެރިއެވެ.
ދާނިޝް އަރަނީ ރާއްޖެއަށް ދާ ފްލައިޓަށް ކަން ހިލްޔާއަށް ޔަޤީންވީ، ޗެކިން ވީ ވަގުތު ދާނިޝް އޭނައާއި އެއް ކިއު ލައިނެއްގައި ޖެހުމުންނެވެ. އެކަން އެނގުންވުމުން ހިލްޔާއަށް ހިނިތުންވެލެވުނީ އެއްވެސް އިޚްތިޔާރަކާއި ނުލައެވެ. ގްރޫޕްގެ ޢުމްރާވެރިން އެކި ކިއު ލައިނަށް ބެހިގެން ދިޔަދިޔަހެން ހިލްޔާ ސީދާ ދާނިޝްގެ ކުރިމައްޗަށް ވާ ގޮތަށް ހުއްޓެން ޖެހުނެވެ. ފަހަތް ބަލާލި ދާނިޝްއަށް ހިލްޔާ ފެނުމާއިއެކު ހިނިތުންވުމަކާއެކީ ހިލްޔާއާއި ދިމާލަށް އެނބުރިލިއެވެ. އެއާއިއެކު ހިލްޔާއަށް ވެސް ހިނިތުންވެލެވުނެވެ.
“މާލެއަށްތަ ދާން ތި އުޅެނީ؟” ހިލްޔާ އެހިއެވެ.
“އާނ….ކިހިނެއްވީ ނުބައި ލައިނެއްގަތަ މިހިރީ؟” ދާނިޝް ސަމާސާވެރި ގޮތަކަށް އެ ސުވާލު ކުރަމުން ކުރިމަތީގައި ހުރި ސްކްރީނަށް ބެލި ގޮތުން ހިލްޔާއަށް ހީލެވުނެވެ.
“ހެހެ….ނޫނޭ. ޗައިނާއަށް ދާ ވާހަކަ އިވިފަ އޮތީމަ.” ހިލްޔާ ބުންޏެވެ.
“ހިލްޔާ ބޭނުންވަނީ އަހަރެން ޗައިނާއަށް ދާންތަ؟” ދާނިޝް މާނަވީ ހިނިތުންވުމަކާއެކީ ރާގަކަށް އެހިއެވެ.
“ނޫން! އައި މީން….” ހިލްޔާއަށް ވަގުތުން ދެވުނު ޖަވާބުގެ ސަބަބުން ލަދު ގަންނަ ގޮތްވިއެވެ. ދޮގެއް ނަހަދާ އެ ޖަވާބު ބަދަލު ކުރާނެ ގޮތެއް ނުވިސްނުމުން ކޯތާފަތް ރަތްވެފައި ހުރި ގޮތަށް ހުރެވުނެވެ.
ހިލްޔާއަށް ވީ ގޮތް ފެނިފައި ދާނިޝްއަށް ހީލެވުނެވެ.
“ހިލްޔާ ގާތު އެއްޗެކޭ ބުނަންވެފަ އެބައޮތް މާލެއަށް ގޮއްސަ. އެހެންވީމަ މާލެއަށް މި ދަނީ.” ފޮރުވަން ޚިޔާލެއް ވެސް ނުކޮށް ދާނިޝް ސީދާސީދަލަށް ބުންޏެވެ. ދާނިޝް ބުނެލި ވާހަކައިން ފިނިވެގެން ދިޔަ ހިލްޔާއަށް ދާނިޝްއަށް ބަލާލެވުނެވެ. އެހިނދު ދާނިޝްގެ ކުރީގައި ހުރި މީހާ ކުރިއަށް ދިޔުމުން ދާނިޝް ޓްރޯލީ ކޮއްޕަން އަނެއްފަރާތަށް އެނބުރިލިއެވެ. ހިލްޔާ ދެން ވެސް ހުރިގޮތަށް ހުރެފައި ކުރިއަށް ޖެހިލިއެވެ.
ދާނިޝް އެހެން ބުނީއްސުރެ ދާނިޝް ހިލްޔާ ގާތު ބުނާނެ ވާހަކައަކަށް ހިލްޔާ ކެތްމަދުވެފައިވިއެވެ. އެހެނަސް އާދައިގެ މަތިން ދަތުރުމަތީގެ ގިނަ ވަގުތު ހިލްޔާ ހޭދަ ކުރީ ޤުރުއާން ކިޔެވުމާއި ދުޢާ ކުރުމުގައެވެ. ދާނިޝް ކޮންމެ ވާހަކައެއް އޭނަ ގާތު ބުންޏަސް އޭގެ ސަބަބުން އޭނަ ﷲ އާއި ގާތް ކޮށްދެއްވުމަށް އެދި ތަކުރާރުކޮށް ދުޢާ ކުރެވުނެވެ.
ދިގު ދަތުރަކަށްފަހު ހިލްޔާމެން ދަތުރު ކުރަމުން ދިޔަ ފްލައިޓް ވެލާނާ އިންޓަނޭޝަނަލް އެއާރޕޯޓުގައި ޖެއްސީ ރާއްޖެ ގަޑިން ހެނދުނު 8 ޖެހި ވަގުތެވެ. އެއާރޕޯޓުން ނިކުތް އިރު ނަހީދުގެ މުވައްޒަފަކު ނަހީދުގެ ކާރު ގެނެސްފައި އޮތެވެ. މަމްނޫންގެ ބައްޕަ އެގޭގެ ކާރު ގެނެސްފައި އޮތެވެ. ދާނިޝް ދާން އުޅުނީ ޔައިޝް ގެ ކާރުގައި ކަމަށްވިޔަސް ފަޔާޒްއާއި ޢާއިލާ ވެސް އެ ކާރަށް އެރުމުގެ އިތުރުން ލަގެޖް ގިނަވުމުން ދާނިޝްއަށް ޖާގައެއް ނުލިބުނެވެ. ދާނިޝް ވަކިން ޓެކްސީއަކުން ދާން އުޅުމުން ނަހީދުބެ އޭނަ ގޮވައިގެން ގޮސް އެމީހުންގެ ކާރަށް އެރުވިއެވެ.
ދާނިޝްއާއި އެއް ކާރެއްގައި އިންނަން ވުމުން ވެސް ނޭނގޭ ސަބަބަކާ ހުރެ ހިލްޔާ ފިނިވެފައިވިއެވެ. ހިތުގެ ތެޅުން އަވަސްވެފައިވިއެވެ. ދާނިޝް ބުނަން ބޭނުންވަނީ ކީކޭތޯ އަހައި އެ ވާހަކަ އަޑުއަހައި މި އިޙްސާސަށް ނިމުމެއް ގެންނަން ހިލްޔާ ބޭނުންވެފައިވިއެވެ.
ހިލްޔާއަށް އެ ފުރުސަތު ލިބުނީ އެޕާޓްމެންޓްގެ ދޮރުމަތިންނެވެ. ބައެއް ލަގެޖް ފޮށިތައް އެތެރެއަށް ވެއްދުމަށް ދާނިޝް އެހީވަމުން ދިޔައީތީ ދާނިޝް ވެސް އެޕާޓްމެންޓާއި ހަމައަށް އައެވެ. ނަހީދު ރާއްޖެއަށް އައިސް ރާއްޖޭގެ ސިމް ލެއްވި ތަނާހެން ފެނުނު މެސެޖުތަކުން ފިހާރައެއްގެ ކަމަކާ އުޅެން ޖެހުނެވެ. ކާރު ތެރެއިން އައި ކޯލު ގެއަށް ދިޔައިރު ވެސް ދިގު ދެމިގެން ދިޔައެވެ. ދެ ފޮށި ނަހީދު ގޭގެ ތެރެއަށް ވެއްދުމަށްފަހު ގެއަށް ވަދެގެން ދިޔައީ ދެން ހުރި އެއްޗެހި ވައްދައިދިނުމަށް ދާނިޝްއަށް ޢިޝާރާތެއް ކުރަމުންނެވެ.
ބައްޕަ ވަދެގެން ދިޔުމުން ދާނިޝްއަށް ހުރިހާ ފޮށިތައް ދޫކޮށްލަން ހިލްޔާގެ ހިތް ނޭދުނެވެ. މާމަ ގާތު ވަދެލުމަށް ހިލްޔާ އެންގީ މާމަ ބަލިވެފައި ހުރި ވަރު އެނގުންވުމުންނެވެ. އެހެންކަމުން ފޮށިތައް ވައްދަން އެންމެ ފަހުން ތިބީ ހިލްޔާއާއި ދާނިޝްއާއި އެލީއެވެ. އެންމެ ފަހަށް ހުރި ފަސްވަނަ ފޮށި ދާނިޝް ވެއްދި ވަގުތު ހިލްޔާއަށް ހުރެވުނީ ދާނިޝް ގެ ކުރިމައްޗަށް ވާ ގޮތަށް ހުއްޓިލައިގެންނެވެ. އެ ފޮށި ބެހެއްޓުމަށްފަހު ދާނިޝް އޭނައަށް ބަލާލި ވަގުތު ހިލްޔާ އެއްޗެކޭ ބުނަން އުޅުނެވެ. އެހެނަސް ހަމަ އެވަގުތު އެދެމީހުންގެ ދެމެދުން، ކުޑަ ސޫޓް ކޭހެއް ދަމަމުން ވަދެގެން އައި އެލީ ވާހަކަ ދެއްކިއެވެ.
“ވެއިޓް އައި ހޭވް ޓު ސޭއި ދިސް. ދެމީހުން ވެސް މިތާ ތިބީމަ ކޮޒް އައި ކާންޓް ޓޭކް ދިސް އެނީމޯ.” އެލީ އެމީހުން ފަހަނަޅައި ދާން އުޅެފައި ވެސް ފަސްއެނބުރި އެ ދެމީހުންނަށް ވަކިވަކިން ނަޒަރެއް ދިނެވެ. އެހިނދު ހިލްޔާއާއި ދާނިޝްގެ ދެބުމަ ކައިރިވިއެވެ.
“ސޯ ޑޭން..އައި މީން ދާނިޝްބެ…އައި މީން ޑޭން! ފަހު ފަހަރަށް ޑޭން އޭ ކިޔައި އެއްޗެކޭ ބުނެވިދާނެތަ؟” އެލީ ދާނިޝްއަށް ބަލަން ހުރެ އެހިއެވެ.
“ޝުއާރ…” ދާނިޝް ޙައިރާންކަމެއްގައި ހުރެ ބުނެލިއެވެ.
“ސޯ ލުކް…ވީ ހޭޑް އަ ގްރޫޕް. ޑޭން ގެ ޑައި ހާޑް ފޭންސް ގެ ގްރޫޕް. ވީ ވާރ ޔުއާރ ފޭންސް ފެށުނީއްސުރެ ވެސް އަދި ޑޭން ފިލްމު ކުޅުން ހުއްޓާލީމަ ވެސް. އަންޓިލް….އޭޒް ޔޫ މައިޓް ނޯ، ތި ބޯލްޑް ލުކް ގެ ސަބަބުން ބައިވަރު ފޭނުން ގެ ވިއު ބަދަލުވެއްޖެ. ދޭއި ޑޯންޓް ލައިކް ޔޫ އެނީމޯ. ތެދުތެދަށް ބުނަންޏާ، އިވެން އައި ޑޯންޓް އެނީ މޯ. މި ޑައި ހާޑް ގްރޫޕްގެ ފޭނުން 12 ކުދިންނަށް މަދުވީމަ އަހަރެން އެ ގްރޫޕް ޑިލީޓް ކޮށްލައިފިން. ބަޓް ގެސް ހޫ ސްޓިލް ލައިކްސް ޔޫ؟ ތުއްތާ!” އެލީ އެ ފަހު ބަސް ހިލްޔާއަށް ދެއަތުން ޢިޝާރާތް ކުރަމުން ބުނެލި ގޮތުން ހިލްޔާ ދެލޯ ބޮޑުވެ، އެނބުރުން އަރަން އުޅުނުހެން ހީވިއެވެ. ހީވެސް ނުކުރާ ވާހަކައެއް އެލީގެ ދުލުން ބޭރުވުމުން ހިލްޔާއަށް ކުއްލި ގޮތަކަށް ދާނިޝްއަށް ބަލާލެވުނެވެ. އެހިނދު ދާނިޝް ވެސް ހުރީ އޭނައަށް ބަލަހައްޓައިގެންނެވެ.
“އެންޑް ގެސް ވަޓް؟ ޑޭން ގެ ބޯލްޑް ފޮޓޯ ދެއްކީމަ ތުއްތަ ބުނީ ކީކޭކަން އެނގޭތަ؟ ހީޒް ސޯ ހޭންޑްސަމް ދޯ އޭ! ސޯ ޝީ ރިއަލީ ލައިކްސް ޔޫ!” އެލީ އިތުރު ކުރިއެވެ. އެހިނދު ހިލްޔާ ގަތް ލަދާއި އެކީ ކޯތާފަތް ރަތްވީ ހިނދު ދާނިޝް ތުންފަތްމައްޗަށް ހިނިތުންވުމެއް ވެރިވިއެވެ. ދެވަނަ ފަހަރަށް ހިލްޔާއަށް ބަލާލެވުނީ އެ ހިނިތުންވުމާއި އެކީގައެވެ.
“ވެލް….އައި ސެއިޑް ވަޓް އައި ސެއިޑް. ޑޫ ވަޓް ޔޫ ލައިކް ވިތް ދިސް އިންފޯ.” އެލީ ބުންޏެވެ. އެއަށްފަހު އަނެއްކާވެސް އޭނަގެ ސޫޓް ކޭހާއި އެކީ ގޭގެ ތެރެއަށް ވަންނަން ހިނގައިގަތެވެ.
ދާނިޝް ހިލްޔާއަށް ބަލަހައްޓައިގެން ހުންނަން ފެށުމުން އިސް އުފުލަން ވެސް ނުކެރިފައި ހިލްޔާއަށް ހުރެވުނެވެ. ދާނިޝްއަށް ފަސް ދީފައި ދިޔުމަށް ސިކުނޑި އަންގަމުން ދިޔައެވެ. އެހެނަސް އެކަމަށްޓަކައި ފައި ޙަރަކާތް ނުކުރެވުނެވެ.
އެލީ ކޮޓަރިއަށް ގޮސް ދޮރު ލެއްޕި އަޑު އިވުމަށްފަހު ވޭތުވި ހިމޭންކަމުގެ ވަގުތުކޮޅަކަށްފަހު ދާނިޝް ވާހަކަ ދެއްކިއެވެ.
“އެއީ ތެދެއްތަ، ހިލްޔާ؟” ދާނިޝް ނުހަނު މަޑުމައިތިރި އަޑަކުން އެހިއެވެ. އެހިނދު ހިލްޔާއަށް އިސްއުފުލާލެވުނެވެ.
“ނޫނެކޭ….ބުނިއްޔާ ވާނީ ދޮގަކަށް. ސޯ ޔެސް.” އެހެން ބުނެވުނު ހިނދު ހިލްޔާއަށް އަނެއްކާވެސް އިސްޖަހާލެވުނެވެ. ހިލްޔާ އެ ވާހަކަ ބުނިގޮތުން ދާނިޝްއަށް ލުއި ގޮތަކަށް ހީލެވުނެވެ. އެ ހުނުން މަޑުވުމުން ދާނިޝް ވާހަކަ ދެއްކިއެވެ.
“އައި ލައިކް ޔޫ ޓޫ…ހިލްޔާ.” ދާނިޝް ބުންޏެވެ.
ދާނިޝްގެ އެ ބަސްތައް އިވިފައި ހިލްޔާއަށް އިސްއުފުލާލެވުނެވެ. އެހިނދު ދާނިޝް އޭނައަށް ހިނިތުންވުމަކާއެކީ ބަލަހައްޓައިގެން ހުރުމުން ބޭއިޚްތިޔާރުގައި ހިނިތުންވެލެވުނެވެ. އޭނަގެ އިޙްސާސްތައް އެންމެ ފަހުން ދާނިޝްއަށް އެނގިގެން މި ދިޔަ ގޮތް ހިތަށް ގެނެވުމުން ހީލެވުނެވެ. ހިލްޔާގެ އެ ހީލުމުގައި ދާނިޝް ވެސް ބައިވެރިވުމުން އިސާހިތަކު ހުރިހާ ނުތަނަވަސްކަމެއް ހިލްޔާގެ ހިތުން ފިލައިދިޔައެވެ.
ނުނިމޭ
