ދާނިޝް އޭނަގެ އުލާއި ވަޅި ތަށްޓަށް ދޫކޮށްލީ، ޒިވް އޭނަ މިތަނަށް ގެނައި ޙަޤީޤީ ސަބަބު ހަނދާންވުމުންނެވެ.
“ޒިވް…އަސްލު އެއްޗެކޭ ބުނަން ޒިވް މިތަނަށް މި ގެނައީ. އައި ރިއަލީ ލައިކް ޔޫ ޒިވް. އެހެންވީމަ އަސްލު….މިހެން އަހަން ބޭނުންވަނީ. ވިލް ޔޫ….މެރީ މީ؟” ދާނިޝްއަށް ބުނެވުނެވެ. އެއާއިއެކު އެފަދަ ބޮޑު ވާހަކައެއް ބުނެވުނު ގޮތުގެ ދޯދިޔާކަން ވެސް އެނގުންވިއެވެ. ފިލްމުތަކުން ފެންނަހާ ރީތި ގޮތަކަށް އެ ބަސްތައް ބުނެވުނު ނަމައޭ ހިތަށްއެރިއެވެ. ޒިވް އުއްމީދު ކުރާނީ އެފަދަ ގޮތަކަށްކަމަށް ހިތް ބުންޏެވެ.
ދާނިޝްގެ އެ ސުވާލަށްފަހު ހިމޭންކަމުގެ ވަގުތުކޮޅެއް ވޭތުވިއެވެ. އެއާއިއެކު ޒިވް ކުއްލިއަކަށް ހޭންފެށުމުން ދާނިޝްއަށް ލުއި ގޮތަކަށް ހިނިތުންވެލެވުނެވެ. ޒިވް އެ ހެނީ އޭނަ އެ ވާހަކަ ބުނި ގޮތުގެ ސާދާކަމުން ކަމަށް ހީކުރެވުނެވެ. އެހެނަސް…
“ޔޫ މަސްޓް ބީ ކިޑިންގް މީ ޑޭން! ރޮމް ފިލްމެއް ކުޅެން ޕްރެކްޓިސްއެއް ދޯ ތިއީ؟ ވަރަށް މަޖާ ހަމަ ތި ޖޯކު! ހަހަހަ!” ޒިވް ގަދައަށް ހެމުން ދެއްކި ވާހަކައިން ދާނިޝްގެ ހިނިތުންވުން އެއްކޮށް ފޭދިގެން ދިޔައެވެ.
“ނޫނޭ ޒިވް. އެއީ ޖޯކެއް ނޫން. އައި މެންޓް އިޓް. އައި ވޯންޓް ޓު މެރީ ޔޫ!” ދާނިޝް ސީރިއަސްކަމާއި ސާބިތުކަމާއި އެކީ އޭނަ ބޭނުންވާ ގޮތް އެންގިއެވެ. އެއާއިއެކު ޒިވްގެ ހުނުން ހުއްޓި، ޒިވްގެ ހިނިތުންވުން ފިލައިދިޔައެވެ. އިސާހިތަކު އެ ދެބުމަ ކައިރިވިއެވެ.
“ކީއްކުރަން؟” ޒިވް އެހިއެވެ.
“ވަޓް؟” ޒިވް ބުނި އެއްޗެއް ސާފު ނުވުމުން ދާނިޝްއަށް އަހާލެވުނެވެ.
“ކީއްކުރަން މެރީ ކުރަނީ؟”
“ލައިކް އައި ސެއިޑް އައި ލައިކް ޔޫ. ދެމީހުން އެކަކު އަނެކެއްދެކެ ލައިކްވީމަ މެރީ ކުރާނީދޯ؟”
“ހަހް! އައި ޑޯންޓް ބިލީވް ދެޓް! މެރީ ނުކުރިޔަސް ޑޭން ތި ކުރަން ބޭނުންވެގެން އުޅޭ ކަމެއް ކުރެވޭނެ. އެނީވޭސް މެރިއޭޖް އަކީ އަންހެން ކުއްޖެއްގެ ޢުމުރު ކުރު ކުރުވާ ކަމެއް. ޑޭންއަށް މެރީ ކުރުމަށްފަހު މިނިވަންކަމާއިއެކީ ތިގޮތަށް ކޫލްކޮށް އުޅެވިދާނެ. އަހަރެންގެ ޙާލަތު ގޯސްވެ ދުވަހުން ދުވަހަށް މުސްކުޅި ވާނީ. ފިލްމް އިންޑަސްޓްރީ ގަ އަހަރެންގެ ވެލިއު ދަށްވާނެ އޭރުން. އައި ޑޯންޓް ވޯންޓް ދެޓް!”
ޒިވް ދެއްކި ވާހަކަތަކުން ދާނިޝް އެއްޗެކޭ ބުނަން ހުޅުވި އަނގަ ލައްޕާލެވުނެވެ. ޒިވް ގެ ވިސްނުން ހުރި ގޮތުން ދެރަވިއެވެ. ކައިވެންޏަށް ފަހު އަންހެން ކުއްޖެއްގެ ޙަޔާތް ބަރުބާދުވަނީ އެ އަންހެން ކުއްޖަކާއި ޙަވާލުވާ ފިރިހެނެއްގެ ޒާތުންނެވެ. ފިރިއެއްގެ ޒިންމާ ރަނގަޅަށް އަދާ ނުކުރެވުމުގެ ސަބަބުންނެވެ. އެހެންނޫނީ ކައިވެނި ކުރާ ދެމީހުންނަށް ވެސް އެމީހުންގެ ޙައްޤުތަކާއި ޒިންމާތައް ނޭނގުމުގެ ސަބަބުން ކުރިމަތިވާ މައްސަލަތަކުންނެވެ. މިއީ ވެސް މަންމަ ދީފައިވާ ނަސޭޙަތްތަކުން ދާނިޝްއަށް އެނގޭ ޙަޤީޤަތްތަކެވެ. އެ ކަންތައް އެނގުނު ފަހުން އޭނައަކީ ރަނގަޅު ފިރިއަކަށްވުމަށް ދާނިޝް ޢަޒުމް ކަނޑަ އަޅާފައިވެއެވެ. ޒިވްއަށް އެކަން ނޭނގެނީތާއޭ ހިތައި ދާނިޝްއަށް ވާހަކަ ދެކެވުނެވެ.
“އެކަހަލަ ކަމެއް ނުވާނެ ޒިވް. އައި ވިލް ޓޭކް ކެއާރ އޮފް ޔޫ އައި ޕްރޯމިސް. އަހަންނާ އިނުމަށްފަހު ޒިވްގެ ދިރިއުޅުން މިއަށްވުރެ އުފާވެރި ނުވެއްޖެއްޔާ އެއީ އަހަންނަށް ލިބޭނެ ލަދުވެތިކަމެއް. ސޯ ޑޯންޓް ވޮރީ. ޒިވް ތި ހީކުރާ ކަހަލަ އެއްވެސް ކަމެއް ނުވާނެ.” ދާނިޝް ހިތުގެ ފުން މިނުން ރީތިވެގެންވާ ވަޢުދެއް ވިއެވެ. އެހެނަސް އެ ވަޢުދުގައި ވި ރީތިކަން ޒިވްއަށް ނުފެނުނު ފަދައެވެ.
“ޕްލީޒް ޑޭން. އަހަރެން ދެން ތި ވާހަކަ އަޑު އަހާކަށް ބޭނުމެއް ނޫން! ވީ އާރ ބޯތް ސޯ ޔަންގް. އެހާ ޒުވާން އިރު މެރީ ކުރާކަށް ނުވާނެ. މިއީ އެންޖޯއި ކުރަންވީ ދުވަސްތައް! ތި ހުރިހާ ވާހަކައެއް ނުދައްކާ…. ހިނގާބަލަ ދެމީހުން ކޮޓަރިއެއް ހިފަން.” ޒިވް ވާހަކައިގެ ރާގު ބަދަލުކޮށްލަމުން މޭޒުމަތީގައި ބޭއްވިފައި އޮތް ދާނިޝްގެ އަތް މަތީގައި އަތް އަޅައި މަޑުމަޑުން ފިރުމާލިއެވެ. ޒިވްއަށް ޒީނަތްތެރިވެފައިވީ އެ ވަގުތުކޮޅެވެ. ވަގުތީ އުފާވެރިކަމެއް ހޯދުމުގެ ޚިޔާލެވެ. ޝަހުވަތުން ފުރިގެންވާ ހިތަކަށް ޙަލާލު ކަންތަކުގެ ރީތިކަން ފެންނާނީ ކިހިނެއް ހެއްޔެވެ؟
ޒިވްގެ އެ ޖަޒުބާތުތަކުގެ އަސަރު ދާނިޝްއަށް ވެސް ކުރިއެވެ. ޒިވް އޭނަގެ އަތުގައި އަތް އެޅި ތަނާހެން އަތް ދަމައިގަންނަން ޤަޞްދު ކުރެވުނެވެ. އެހެނަސް އެ ބީހުންތަކުގެ އަވައިގައި ޖެހި، އެއްވެސް ޙަރަކާތެއް ނުގެނެވުނެވެ. އަދި އަމުދުން މޭޒު ދަށުން ޒިވްގެ ފައި އޭނަގެ ފައިގައި ޖެހެމުން ދިޔަ އިޙްސާސް ކުރެވުމުން ރަނގަޅަށް ވިސްނަން ނުކުޅެދުނެވެ.
“ވާއި ޑޯންޓް ޔޫ ޖަސްޓް ގިވް އިން ޑޭން؟ ޑޭން މިރޭ އަހަންނާއި އެކު ހޭދަ ކުރިޔަސް ޑޭން ގޯސް މީހަކަށް ނުވާނެއޭ. ޑޭން ގެ ތި ފީލިންގްސް އަކީ ވަރަށް ނެޗުރަލް ކަންތަކޭ. ނެޗުރަލް ކަންތަކާ ދެކޮޅު ހަދާކަށް ނުވާނެ. މުޅި މީހާ ހަލާކުވާނީ އެހެން ކަންތައް ކޮށްގެން. އޯލްސޯ އިވެން އައި ޑޯންޓް މައިންޑް. ހަމަ ހިތުން ރުހުމުން މިހިރީ ޑޭންއަށް މި ހަށިގަނޑު ދޭން. އަދި މިހިރީ އެކަމަށް ބޭނުންވެސް ވެގެން. މިއީ ޑޭން އަހަންނަށް ކޮށްދޭ ހެޔޮ ކަމަކަށް ވާނީ.” ނުހަނު ޖަޒުބާތުން ފުރިގެންވި އަޑަކުން ޒިވް އެ ވަގުތުކޮޅު ޒީނަތްތެރި ކުރިއެވެ.
ޒިވްގެ އެ ވާހަކަތަކުން ދާނިޝްގެ ހިތަށް އިންތިހާއަށް އުދަގޫވިއެވެ. ބޮލުގައި ލުއި ރިހުމެއް ވެސް ހިނގާލިއެވެ. އެހެނަސް އެ ހުރިހާ ކަމެއްގެ މައްޗަށް އެވަގުތު ކާމިޔާބު ހޯދީ ނަފްސުގެ އެދުންތަކެވެ.
“ޒިވް…ރޫމެއް ބޭނުމިއްޔާ ރޫމަކަށް ގެންގޮސްދޭނަން.” ދާނިޝް ދެންވެސް ޤަޞްދު ކުރީ ޒިވް ކޮޓަރިއަކާއި ހަމައަށް ގެންގޮސް އަމިއްލައަށް އެތަނުން ދާށެވެ. އެހެނަސް މި ދެވެނީ ކޮން މިޞްރާބަކަށްކަން އޭނައަށް ސާފުކޮށް އެނގުނެވެ. އެވަގުތު ހިތް މޭ ފަޅާލާފައި ނިކުމެދާނެހާ ވަރަށް ތެޅެމުން ދިޔައެވެ. އާ ތަޖުރިބާއަކަށް އޮތް ޖޯޝަކާއި ކުރެވެން އުޅެވޭ ފާފައިގެ ނުތަނަވަސްކަން އެއްވެގެންނެވެ.
“ދެޓްސް މޯ ލައިކް އިޓް، މައި ލަވް!” ޒިވް ހިނިތުންވެލަމުން އެހެން ބުނެލި ހިނދު ދާނިޝް ހިނިތުންވާން ޖެހުނީ ގަދަކަމުންނެވެ.
އޭގެ އިރުކޮޅެއްފަހުން ޒިވް ގޮވައިގެން ގޮސް ދާނިޝް ހުރީ ހޮޓެލްގެ ރިސެޕްޝަނުގައެވެ. އިސްނަގައިގެން ކޮޓަރިއެއް ހިފީ ދާނިޝްއެވެ. އެއަށްފަހު އެ ކޮޓަރިއަށް ދިޔުމަށް ދެމީހުން އެކީގައި ލިފްޓަކަށް އެރިއެވެ. ލިފްޓުގައި މީހުން ތިބި ކަމީ ދާނިޝް ގެ ނަސީބެވެ. އެ ނޫންނަމަ ލިފްޓު ތެރެއިން ވެސް ޒިވް އޭނައަށް ހުރިހާ ހެވާއި ނުބައެއް އޮޅުވާލީހެވެ. މީހުން ތިބުމުން ޒިވްއަށް އޭނަގެ އަތުގައި އޮޅުލައިގެން ހުރުން ނޫންކަމެއް ނުކުރެވުނެވެ.
ލިފްޓުން ފޭބުމަށްފަހު ވެސް ޒިވް ދާނިޝްގެ އަތުން ދޫ ނުކުރެއެވެ. އެހާ ހިސާބަށް އައިއިރު ދާނިޝްގެ ހިތް ވެސް ވީ ޝަހުވަތުން ފުރިފައެވެ. އެހެނަސް ދެންވެސް ބިރުވެރިކަމެއްވިއެވެ. އޭނަ މި ޢަމަލަށް އަރައިގަންނަނީތޯ ތަކުރާރުކޮށް އޭނަގެ ޒަމީރު އޭނައާއި ސުވާލު ކުރަމުން ދިޔައެވެ.
ޒިވް ކިރިޔާ ވެސް ދާނިޝްގެ އަތުން ދޫކޮށްލީ އެމީހުން ހިފި ކޮޓަރީގެ ދޮރާއި ހަމަވުމުންނެވެ. ދާނިޝްއަށް އެ ދޮރު ހުޅުވުމުގެ ފުރުޞަތު ދިނުމަށެވެ. ދާނިޝް އަތުގައި އޮތް ކީ ކާޑު ދޮރުގައި ޖެއްސި ވަގުތަކީ ކޮޓަރި ތަކުގެ އެ ކޮރިޑޯ ތެރެއިން ޤުރުއާނުގެ އާޔަތެއް އިވެން ފެށި ވަގުތެވެ.
“أَرَءَيْتَ مَنِ ٱتَّخَذَ إِلَٰهَهُۥ هَوَىٰهُ أَفَأَنتَ تَكُونُ عَلَيْهِ وَكِيلًا…”
މިޝަރީ އަލް އަފަސީ ގެ އަޑުން އިވުނު އެ އާޔަތުގެ މާނަ ނޭނގުނެއްކަމަކު، އެ ބަސްތައް އިވިފައި މެއަށް ގޮތެއްވިއެވެ. އިސާހިތަކު ދާނިޝްއަށް ފަސްއެނބުރި ބަލާލެވުނީ އަޑު އައީ ކޮން ދިމާލަކުންތޯ ބެލުމަށެވެ. އެވަގުތު އެ ކޮރިޑޯ ތެރެއިން ހިނގާފައި ދިޔައީ ކަޅުކުލައިގެ އަބާޔާއަކާއި ބުރުގާއެއް އަޅައިގެން ހިނގަމުން ދިޔަ ކުއްޖެކެވެ. ދުވަސްވަރަކީ ކޮވިޑްގެ އިންޒާރު އޭރުވެސް ކޮންމެވެސް ވަރަކަށް އޮތް ދުވަސްވަރަކަށް ވުމުން އެ ކުއްޖަކު ހުރީ ކަޅުކުލައިގެ މާސްކެއް އަޅައިގެންނެވެ. ބުރުގާގެ ތެރެއިން އެ ކުއްޖާ ކަންފަތުގައި ހަރުކޮށްގެން ހުރި އިއާރފޯނުގެ ވައިރު، އަތުގައި އޮތް ފޯނާއި ގުޅުވާލި ގޮތުން ޤުރުއާނުގެ އަޑު ކެނޑުނީ ކީއްވެކަން އެނގުންވިއެވެ.
ދާނިޝް ބަލަބަލާ ހުއްޓާ އެކުއްޖަކު އެމީހުންނަށް ބަލާލުމެއް ވެސް ނެތި އެ މަގުން ހިނގާލާފައި ދިޔައީއެވެ. އޭރުވެސް ޤުރުއާނުގެ އާޔަތުން ކުރި އަސަރު ދާނިޝްގެ ހިތުގައިވިއެވެ. އެ އާޔަތުން އޭނައަށް މެސެޖެއް ލިބުނު ކަހަލަ އިޙްސާސެއް ކުރެވުނެވެ. މިއީ މި ޢަމަލަށް އަރައި ނުގަތުމަށް އޭނައަށް ލިބުނު ޢިޝާރާތެއްތޯ ހިތަށްއެރިއެވެ. ހަމަ އެ ވަގުތު ޒިވް ވާހަކަ ދެއްކިއެވެ.
“ހިނގާބަލަ އެތެރެއަށް ޑާރލިންގް.” ޒިވް ދާނިޝްގެ އަތުގެ ފަލަމަސްގަނޑުގައި މަޑުމަޑުން ހިފާލަމުން ކޮޓަރީގެ ދޮރު ހުޅުވިއެވެ. އެއަށްފަހު ލަސްލަހުން އަތް ތިރިއަށް ގެންގޮސް ދާނިޝްގެ އަތްތިލައިގައި ހިފައިގެން ދާނިޝް ދަމައިގެން ކަހަލަ ގޮތަކަށް ކޮޓަރިއަށް އުޅުނެވެ. އެހެނަސް އެވަގުތު ދާނިޝް ހުއްޓިފައި ހުރުމުން އެކަން ކާމިޔާބެއް ނުވިއެވެ.
ދާނިޝްގެ ޚިޔާލުތައް އެވަގުތުކޮޅަށް ގެންނަން ނަފްސު ބޭނުންވިޔަސް ހިތް އެކަމާއި ދެކޮޅު ހެދިއެވެ. ދެންމެ އިވުނު އާޔަތް ކަންފަތުގައި ގުގުމަމުން ދިޔައެވެ. ހަމަ އެއާއިއެކު ޤިޔާމަތް ދުވަހު ވާނެ ކަންތަކުގެ ވާހަކަ ހަނދާނަށް އަންނަން ފެށިއެވެ. މަރުވުމަށްފަހު ކަށްވަޅުގައި ކަންތައް ވާނެ ގޮތް ހަނދާންވާން ފެށިއެވެ. އަދި މިވަގުތު ވެސް އޭނަ މަރުވެދާނެ ކަމުގެ އިންޒާރު ސިކުނޑި ދިނެވެ. އިޙްސާސް ކުރެވެމުން ދިޔަ ލައްޒަތުގެ ސަބަބުން އެ ހުރިހާ ކަމެއްގެ މަތިން ހަނދާން ނައްތާލަން ދާނިޝް އުޅުނެވެ. އެހެނަސް ދެން ހަނދާންވީ މަންމަ މަތިންނެވެ. މިރޭ ބޮޑު ފާފައަކަށް އަރައިގެންފައި އޭނަ މަންމައާއި ކުރިމަތިލާނީ ކިހިނެއްތޯ ހިތަށްއެރިއެވެ. އޭނައަކީ މަންމައަށް އެއްވެސް ކަމެއް ފޮރުވި މީހެއް ނޫނެވެ. އަދި ފޮރުވޭނެ މީހެއް ނޫނެވެ. އޭނަ މިފަދަ ކަމެއް ކޮށްފި ކަން އެނގިއްޖެނަމަ މަންމައަށް ވާނީ ކިހިނެއް ހެއްޔެވެ؟
ހިތަށް ވެރިވި އެ ޚިޔާލުތަކަށް ކުރި ލިބުމުން ދާނިޝްއަށް ކުއްލި ގޮތަކަށް ޒިވްގެ އަތް ފޮޅުވާލެވުނެވެ.
“އައި ކާންޓް ޑޫ ދިސް….” ދާނިޝް ހިސާބަކަށް ވައި އަޑަކަށް ބަދަލުވާ އަޑަކުން ބުންޏެވެ.
“ވަޓް؟” ޒިވް އޮޅުން އަރާ ގޮތްވިއެވެ.
އެހިނދު ދާނިޝް ވަކި އެއްޗެކޭ ނުބުނެ، ފަހަތަށް ފިޔަވަޅެއް އަޅާލީ އެ ކޮޓަރީގެ ހުޅުވިފައިވާ ދޮރަށް ވެސް ބިރުން ފަދައިންނެވެ. އެ ދޮރުން އެތެރެ ވެއްޖެނަމަ އޭނައަށް އަމިއްލަ ނަފްސުގެ މައްޗަށް ބާރު ނުހިންގޭނެހެން ހީވުމުންނެވެ.
“ޑޭން ޑޯންޓް ބީ ސްކެއާރޑް. އަހަރެން މިހިރީއެއްނު ޑޭން ގެ ގާތުގަ. އަހަންނަށް އެނގޭ ޑޭން އަހަރެން ދެކެ ވަރަށް ލޯބި ވާކަން. މިއީ ދެ ލޯބިވެރިން އެކަކު އަނެއްދެކެ ލޯބިވާކަން ދެއްކޭނެ އެންމެ ރަނގަޅު ގޮތް. ޑޯންޓް ވޮރީ. ޑޭން ގެ މަންމައަށް ނޭނގޭނެ އެއްވެސް ކަމެއް. މަންމަ ނެތެއްނު ރާއްޖޭގަ ވެސް؟ ފޮގެޓް އޯލް ދިސް އެންޑް-“
“އައި ސެއިޑް އައި ކާންޓް ޑޫ ދިސް!!!” ދާނިޝް ރުޅިވެރިކަމާއިއެކީ ހަރު އަޑުން އަންގާލިއެވެ. ރުޅި އައީ ޒިވް އޭނައަށް ބާރުފޯރުވަން ވެސް އުޅޭހެން އެވަގުތު ހީވުމުންނެވެ. އެކަން އެނގުންވުމުން ޒިވް އާއި ދުރުވުމަށް އިތުރު ހިތްވަރެއް ލިބުނެވެ.
ދާނިޝްގެ އަޑުގެ ސަބަބުން ޒިވް ހުއްޓުން އަރައިގެން ހުރި ގޮތުން ދާނިޝް ދެރަވެސް ވިއެވެ. އަންހެން ކުއްޖަކަށް އަޑު އުފުލުމަކީ އޭނަގެ ތަބީޢަތާއި ޚިލާފު ކަމެކެވެ. އެހެނަސް އެވަގުތަށް އެންމެ ރަނގަޅުވާނީ އިތުރު އެއްޗެކޭ ނުބުނުން ކަން ދަނެގެން ދާނިޝް ޒިވްއަށް ފަސްދީފައި ދާން ހިނގައިގަތެވެ.
**
އެ ދުވަހުގެ ހަނދާންތައް އިއްޔެ ވީ ކަމެއް ފަދައިން ލޯ މަތިން ނިއުޅިގެން ދިޔުމުން ދާނިޝް ގެ އަނގައިން ލުއި އާހެއްގެ އަޑު ނިކުތެވެ. އެ ދުވަހަށްފަހު އޭނައާއި ޒިވް އާއި ދެމެދު މާ ބޮޑު ގުޅުމެއް ނޯވެއެވެ. ޝޫޓިންގްއަށް އައިސްފައި ވެސް އެ ދެމެދުގައި އޮންނަނީ ނުތަނަވަސްކަމެވެ. ޒިވް އޭނައާއި މެދު ނުރުހުންވީ ވަރުން އޭނައާއި ބެހޭ ގޮތުން ފެތުރެން އުޅުނު ދޮގު ޚަބަރު މީޑިއާއެއް ލައްވާ ފަތުރުވަން ޒިވް އުޅުނެވެ. އެހެނަސް އޭގެ ކުރިން ޑައިރެކްޓަރަށް އެކަމުގެ ހިލަމެއް ވުމުން އެކަން ހުއްޓުވިއެވެ. ދާނިޝް ގެ ނަމަށް ހުތުރެއް އައުމުން ފިލްމުގެ އަގު ވެސް ދަށްވެދާނެތީވެއެވެ.
އެއީ މާޒީއެވެ. އެ މާޒީގެ ޞަފްޙާތަކުގެ ހަނދާންތައް މިރޭ އާވެގެން ގޮސްފައި މިވަނީ، މިއަދު ޒިވް އަނެއްކާވެސް އޭނައާއި ގާތްވާން މަސައްކަތް ކުރުމުންނެވެ. މާޒީއެކޭ އެއްފަދައިން މިއަދު ވެސް އޭނަ ޒިވް ދުރު ކޮށްލީ ގޮތުންނެވެ. އޭނައާއިމެދު އަބަދު އެއް މަންޒަރެއް ތަކުރާރު ކުރެވެނީ ކީއްވެތޯ ހިތާހިތުން ސުވާލު ކޮށްލެވުނެވެ.
މާޒީގައި އެ ފާފައިން ދުރުވި ފަހުން، އެފަދަ ފާފައަކުން ދުރުވުމުގެ ޘަވާބާއި ދަރުމައާއި މެދު އޭނަ ޚުތުބާއަކުން އަޑު އަހާފައިވެއެވެ. ޒިނޭ ފަދަ ނުބައި ފާފައަކުން ދުރުވުމުން ﷲ ތަޢާލާ ދުނިޔެއާއި އާޚިރަތުގައި ވެސް ބާއްޖަވެރިކަން ދެއްވާނެ ވާހަކަ ދާނިޝް އަޑު އަހާފައިވެއެވެ. އެހެންކަމުން އޭގެ މާ ގިނަ ދުވަހެއް ނުވެ އޭނަގެ ކައިވެނި ކުރެވިގެން ދާނެ ކަމަށް އޭނަ ހީކުރިއެވެ. އެހެނަސް ޒިވް އަނބުރާ އޭނަގެ ޙަޔާތަށް އިމްތިޙާނެއްގެ ގޮތުގައި އައިއިރު ވެސް، އޭނަ އަދިވެސް މިހިރީ ހުހަށެވެ. އެ ޙާލަތުގައި އޭނައަށް އަނެއްކާވެސް ތަޖުރިބާ ކުރެވުނީ ނާޒުކު ކަމެވެ. ކައިވެނި ކޮށްގެން ހުރިނަމަ އެ ނާޒުކުކަން އިޙްސާސް ނުކުރެވުނީސް ނޫން ހެއްޔެވެ؟
ދާނިޝްއަށް ނޭނގުނު ކަމަކީ، ކޮންމެ އިންސާނަކަށް ވެސް އެންމެ ރަނގަޅުވެގެންވާ ގޮތް މޮޅަށް ދެނެވޮޑިގެންވަނީ ﷲ ސުބްޙާނަހޫ ވަތަޢާލާ ކަމެވެ. އެކަލާނގެ ގެ ޢިލްމުފުޅުގައި މީހެއްގެ ކައިވެނި ވުމަކީ އެ ވަގުތަށް އެމީހަކަށް އެންމެ ރަނގަޅު ގޮތް ކަމަށްވާނަމަ، ލަހެއް ފަހެއް ނެތި އެކަލާނގެ އެމީހަކަށްޓަކައި ކައިވެންޏެއް މިންވަރު ކުރައްވާނެއެވެ. އެހެނީ އެކަލާނގެއީ އެއްވެސް ޚަލްޤަކަށް އަނިޔާވެރިވެ ވޮޑިގެންވާ ރަސްކަލާނގެއެއް ނޫނެވެ. ﷲ ގެ ރޭވުންތެރިކަމުގެ ފުރިހަމަކަން އިންސާނާއަށް ނުފެންނަނީ އިންސާނާއަށް ޢިލްމު ލިބިފައިވާ މިންވަރު ކުޑަވުމުންނެވެ.
މާޒީގައި ކުރިމަތިވެގެން ދިޔަ އިމްތިޙާނުގެ ސަބަބުން ދާނިޝް ގެ ހިދާޔަތަށް މަގުފަހި ވެގެން ދިޔަކަން ދާނިޝްއަށް އެނގޭނެ ނަމައެވެ. އެހެނީ ހިދާޔަތުގެ އަލި ވަންނާނީ ފާފަތަކުން ސާފުވެފައިވާ ހިތަކަށެވެ. ކައިވެންޏަކާއި ނުލައި ވެސް އެ ފާފައިން ދުރުވުމުން ދާނިޝްގެ ދަރަޖަ އާޚިރަތުގައި ކިހާ މަތިވެރި ވާނެކަން ދާނިޝްއަށް ފަހުމް ވާނެ ނަމައެވެ. އަދި ނާޒުކު ޙާލަތެއްގައި ހިތްވަރެއް ހޯދަން ޖެހެނީ ޙަޔާތުގެ ބައިވެރިއެއްގެ ކުރިން ﷲ ގެ ޙަޟްރަތުން ކަން ވެސް ދާނިޝްއަށް އެނގޭނެ ނަމައެވެ.
އެރޭ ދާނިޝް ބައިގަޑިއިރެއްހާ އިރު ވަންދެން ސޯފާގައި އިނދެފައި ތެދުވެލީ، ނިދުމުގެ ކުރިން އޭނަ ކުރާ ނަމާދުތަކުގެ މަތިން ހަނދާންވުމުންނެވެ. ނޭނގޭ ސަބަބަކާހުރެ އެރޭ ނަމާދު ކުރަން ޖެހުނީ ގަދަކަމުންނެވެ. ވާނީވެސް އެހެންތާއެވެ. އެރޭ ހިތުތެރޭގައި އޭނަގެ ޙަޔާތާއި މެދު ޝަކުވާއެއްވިއެވެ. ޒިވް ބުނި ފަދައިން 30 އަހަރު ވެފައިވީއިރު އޭނަ ކައިވެންޏެއް ނުކޮށް މިހެން އުޅޭނީ ކިހާ ދުވަހެއް ވަންދެން ހެއްޔެވެ؟ އެ ޝަކުވާ ﷲ އަށް ދެންނެވުމުގެ ބަދަލުގައި ހިތުގައި ޝަކުވާ އޮތީ ﷲ އާއި މެދުގައެވެ. އެއީ ވެސް އީމާންތެރިކަން ބަލިކަށި ކުރުވާ ކަމެކެވެ. ޤަޟާ ޤަދަރަށް އީމާންވުމަކީ އީމާންކަމުގެ ރުކުނެކެވެ. ވީއިރު ﷲ ގެ ނިންމެވުމަކާއި މެދު ހިތުގައި ޝަކުވާ އޮވެގެން އީމާންތެރިކަމުގެ ފޮނިކަން އިޙްސާސް ކުރެވޭނީ ކިހިނެއް ހެއްޔެވެ؟
ކޮންމެއަކަސް އެރޭ ދާނިޝް ނިދީ، ގަދަކަމުން ވެސް އޭނަ ނަމާދު ކުރާ މިންވަރަށް ނަމާދު ކުރުމަށްފަހުއެވެ.
**
އޭގެ އަނެއްދުވަހު މެންދުރު ޑިއުޓީއަށް ދާން ތައްޔާރުވަމުން ދިޔައިރު ހިލްޔާއަށް ވިސްނެމުން ދިޔައީ ރޭ ކްލިނިކް ގައި ހިނގި ކަންތަކާއި މެދުގައެވެ. ރިސެޕްޝަން ކައިރީގައި ހުރި އަންހެން ކުއްޖާއެވެ. އެ ކުއްޖާއާއި މެދު ދާނިޝް ނުރުހުންވެގެން އުޅޭހެން ހީވި ގޮތެވެ. އޭނަ އެ ކުއްޖާ ދާނިޝް އާއި ދުރު ކުރަން އުޅުމުން ވެސް އެ ކުއްޖާ ބަހަނާއެއް ދެއްކި ގޮތެވެ. ފަހުން ހިލްޔާ އަމިއްލަ ރޫމުގައި ހުރެފައި، ކޮންމެވެސް ކަމެއް ހަނދާންވެފައި އަނެއްކާ ވޯޑަށް ދާން އުޅުނު ވަގުތު، އެޑްމިން ރޫމުން ބަޔަކު ވާހަކަ ދައްކާ އަޑު އިވުނު ގޮތެވެ. ހިލްޔާއަށް ލިބުނު ޙައިރާންކަމުގައި އެ ދޮރާއި ދިމާލަށް ދެވުނު ގޮތެވެ. އެހިނދު ދާނިޝްގެ ރުޅިވެރި ހަރު އަޑު ފުރަތަމަ ފަހަރަށް އިވުނު ގޮތެވެ. ނުސާފުކޮށް އިވުނު އެ އަޑާއި އެއްވެގެން އަންހެން ކުއްޖެއްގެ އަޑު ވެސް އިވުނު ގޮތެވެ. އެއާއިއެކު ވީ ނުރުހުމުގައި ހިލްޔާއަށް އެ ދޮރު ހުޅުވާލެވުނު ވަގުތެވެ.
ރޭއްސުރެ 10 ވަނަ ފަހަރަށް އެ މަންޒަރު ލޯ މަތިން ނިއުޅިގެން ދިޔައިރު، ހިލްޔާ މޫނު ބަލާ ލޯގަނޑަށް ބަލަން ހުރެ، އޭނަގެ ޝޯލްގައި ފަހު ޕިން ހަރުކޮށްލީއެވެ. އެހިނދު ވެސް ވިސްނުމަކަށް ގެއްލިފައިވިއެވެ. ރޭ ކްލިނިކަށް އައީ ކޮން ކުއްޖެއްކަމާއި އެ ކުއްޖާއާއި ދާނިޝް އާއިމެދު އޮތީ ކޮން ގުޅުމެއްތޯ އެނގެން ބޭނުންވެފައިވިއެވެ. ނޭނގޭ ސަބަބަކާ ހުރެ ރޭއްސުރެ މޫޑުވެސް ޚަރާބުވެފައިވިއެވެ. ރާފިލްއަށް ގުޅައިގެން ވާހަކަ ދެއްކިއިރު ވެސް ފޯރިއެއް އެއްގޮތަކަށް ވެސް ނުނެގުނެވެ. މުޅިން ވެސް ސިފަ ކުރެވެމުން ދިޔައީ އެންމެ ފަހުން ފެނުނު ދާނިޝްގެ ހިތާމަވެރި މޫނެވެ.
ހިލްޔާ އެދުވަހު މެންދުރު ޑިއުޓީއަށް ދިޔައީ ވެސް އެ އުދަގޫ ކުރުވަނިވި ޚިޔާލުތަކާއި އެކީގައެވެ. އެދުވަހު މެންދުރު ވެސް ރިސެޕްޝަންގައި އޮތީ ދާނިޝްގެ ޑިއުޓީއެއް ނޫނެވެ. ދާނިޝް ނުފެނުމުން ސިކުނޑީގައި ފުނިޖެހެމުން ދިޔަ ޚިޔާލުތަކަށް ކެތް ނުވުމުން ހިލްޔާ އެންމެ ފަހުން އެ ވާހަކަ ބައްޕައާއި ދައްކަން ނިންމިއެވެ. ދާނިޝް ގެ ޙާލަތާއި ގުޅޭ ގޮތުން އިތުރު މަޢުލޫމާތެއް އެނގެންޏާ އެނގޭނީ ބައްޕައަށް ކަން ވިސްނުނީތީވެއެވެ.
“ބައްޕާ ރޭ ފާޑެއްގެ ކަމެއް ހިނގި ކްލިނިކް ތެރެއިން.” ހިލްޔާ އެ ވާހަކަ ބުނެލީ މެންދުރު ޑިއުޓީ ނިންމާފައި އައިސް ހަވީރު ސިޓިންގް ރޫމުގެ ސޯފާގައި އިނދެއެވެ.
“ކޮން ކަމެއް؟” ބައްޕަ ޓީވީއިން ޚަބަރު ޗެނަލްތައް ބަދަލު ކުރަމުން އެހިއެވެ.
“ކޮންމެވެސް އަންހެން ކުއްޖެއް އައީ. ވަރަށް މި ޒަމާނުގެ ސްޓައިލަށް ޑްރެސް ކޮށްގެން ހުރި. ރިސެޕްޝަން ގަ އެތައް އިރެއް ވަންދެން ދާނިޝްއާ ވާހަކަ ދައްކަން ހުރީ. ފަހުން ފެނުނީ އެ ދެމީހުން އެޑްމިން ރޫމުގަ ތިއްބާ. ދެމީހުން ވަރަށް ގަދައަށް ފައިޓް ކުރާ އަޑު އިވިގެން އަހަރެން އެ ދޮރު ހުޅުވީ. އަހަރެން ފުރަތަމަ ހީކުރީ އެއީ ސްޓާފެއް ކަމަށް. އެކަމަކު ދާނިޝް ބުނީ އެއީ ސްޓާފެއް ނޫނޭ. އެއަށްފަހު ދާނިޝް ޑިއުޓީ ގަޑި ނުނިންމާ ކްލިނިކުން ދިޔައީ.” ހިލްޔާ ކިޔައިދިނެވެ. އެހިނދު ނަހީދު ޓީވީގެ އަޑު މަޑުކޮށް ހިލްޔާއަށް ބަލާލަމުން ސީރިއަސްކޮށް އެ ވާހަކަ އަޑު އެހިއެވެ.
“އެހެންތަ؟ ދާނިޝް ދަންނަ ކުއްޖެއް ކަންނޭނގެ ތިއީ.” ނަހީދު ނުހަނު އާދައިގެ ގޮތަކަށް ބުނަމުން ވިސްނުމެއްގެ އިނދެ އަނެއްކާވެސް ޓީވީއަށް ސަމާލުކަން ދިނެވެ. ބައްޕަގެ ފަރާތުން ހިލްޔާ އުއްމީދު ކުރި ފަދަ އަސަރެއް ނުފެނުމުން ހިލްޔާ އަޖާއިބުވިއެވެ. ހިލްޔާ ހީކުރީ ބައްޕަ އިތުރު ސުވާލުތައް ވެސް ކޮށް ވާހަކަ ކުރިއަށް ދާނެ ކަމަށެވެ.
“އައި ތިންކް ވީ ޝުޑް ޑޫ ސަމްތިންގް އެބައުޓް އިޓް ބައްޕާ. އެ ކުއްޖާ އަނބުރާ އައިއްސިއްޔާޔޯ؟ ކްލިނިކް ގެ ވޯކް ޑިސްރަޕްޓް ވާނެ ދޯ؟” ހިލްޔާ ކަންބޮޑުވުން ފާޅުކުރިއެވެ.
“ޑިސްރަޕްޓެއް ނުވާނެ އިރާދަކުރެއްވިއްޔާ. ދާނިޝް ތިކަން މެނޭޖް ކުރާނެ ތިއީ ކޮންމެ ކުއްޖަކަށް ވިޔަސް.” ބައްޕަ ދެންވެސް ހަމަޖެހުން ދެއްކުމުން ހިލްޔާއަށް ވާހަކަ ދެކެވުނެވެ.
“ވަޓް އިފް ހީ ކާންޓް؟! ދާނިޝް ރޭ ހުރީ ވަރަށް ދެރަވެފަ. ދާނިޝް މިއަދު ވެސް އެއްވެސް ވާހަކައެއް ނުދައްކާތަ ބައްޕައާ؟ މިރޭ ޑިއުޓީއަށް އަންނާނެތަ ދާނިޝް؟” ހިލްޔާއަށް ބޭއިޚްތިޔާރުގައި ސުވާލު ކުރެވުނެވެ.
“ކީއްވެ ތިކަން އެނގެން ހިލްޔާ ޝައުޤުވެރި ތިވަނީ. ޔޫ އާރ ނޮޓް އިންޓްރެސްޓެޑް އިން ހިމް. އެހެންވީމަ ކީއްކުރަން ދާނިޝް އާއިމެދު ތި ކަންބޮޑުވަނީ؟” ބައްޕަ އެ ކޮށްލި ސުވާލާއިއެކީ ހިލްޔާގެ އަނގަ ބަންދުވިއެވެ.
ނުނިމޭ