ދާރިސް (އެއްވަނަ ބައި)

“ހަމްނާ 15 ވަރަކަށް މިނެޓް ކުރިން މިއަދު ތައްޔާރުވައްޗޭ! މިއަދު ތަންކޮޅެއް އަވަހަށް ދޮންތަ ދާން ބޭނުން.” ހިބާ އެހެން ބުނެ ގޮވައިލީ ހެނދުނު ބަދިގެ ތެރޭގައި ހޭލަމޭލައަށް އުޅެމުންނެވެ.

“އާނ ދޮންތާ!” އެ ކުޑަ ބަދިގެއާއި ކައިރި ގޮތަކަށް ހުރި ކޮޓަރިއެއްގެ ތެރެއިން އަޑު އައެވެ.

ހިބާ ހެނދުނު ސަޔަށްޓަކައި ޕާން ޓޯސްޓުކޮށް ބިސްގަނޑު އަޅައި ނިމުނުއިރު ވެސް ހަމްނާގެ ޚަބަރެއް ނުވުމުން ހިބާ ބަދިގެއިން ނިކުމެ ހަމްނާގެ ކޮޓަރިއާއި ހަމައަށް ދިޔައެވެ. ކޮޓަރީގެ ދޮރު ހުޅުވައި ހަމްނާއަށް ގޮވަން އުޅުނު ވަގުތު ފެނުނު މަންޒަރުން ހިބާގެ އަނގަ ބަންދުވިއެވެ. ސްކޫލަށްދާ ގަޑި ޖެހެމުން ދިޔަ އެ ވަގުތު، އޭނަގެ 17 އަހަރުގެ ކޮއްކޮ ދެފައި ވަށްކޮށްގެން އެނދުމަތީގައި އިނދެ ލެޕްޓޮޕުން ޑްރާމާއެއް އަޅުވައިގެން އިން މަންޒަރު ފެނުމުންނެވެ.

ހިބާ ވީ ނުރުހުމުގައި ދެއަތް މެއާއި ދިމާލުން ހުރަސްކޮށްލަމުން ކޮޓަރިއަށް ވަދެ އެނދުގެ އެއްފަރާތެއްގައި މަޑުކޮށްލީ ހަމްނާއަށް ފެންނާނެ ކަމަށް އުއްމީދު ކުރަމުންނެވެ. އެހެނަސް އެއިން ކުރި އަސަރެއް ނެތެވެ. ލެޕްޓޮޕް ސްކްރީނުން ފެންނަމުން ދިޔަ އަންހެން މީހާއާއި ފިރިހެން މީހާ އެންމެ ފަހުގެ އަލްވަދާޢު ކިޔަމުން ދިޔަ މަންޒަރު ބަލަން އިން ހަމްނާގެ ލޮލުން ވެސް ކަރުނަތައް ފައިބަމުން ދިޔައެވެ.

ހިބާ އެއްފަހަރު ސްކްރީނަށް އަނެއްފަހަރު ހަމްނާއަށް ބަލަމުން ފުން ނޭވައެއް ދޫކޮށްލީ ރުޅިގަނޑު ހިންދުމަށެވެ. އެހިނދު އެއްފަރާތަކަށް ބަލައިލެވުނު އިރު އަރިމަތީ މޭޒުމަތީގައި ހުސްވާން ކައިރިވެފައި ހުރި ކުޑަ ފެންފުޅިއެއް ފެނުނެވެ. ހިބާ ދެވަނަ ވިސްނުމެއްވެސް ނެތި ފުޅި ނަގައި މަތި ހުޅުވައިލުމަށްފަހު ހަމްނާގެ ބޮލަށް އެ ފުޅި ހުސްކޮށްލިއެވެ.

“ދޮންތާ!!!” ކުރެވުނު އިހްސާސާއެކީ ކުއްލިއަކަށް އެތެރެއަށް ކުރު ނޭވައެއް ދަމާލެވުނު ހަމްނާ ނުރުހުންތެރިކަމާއެކީ ގޮވައިލީ ޑްރާމާ ޕޯޒްކޮށްލަމުންނެވެ.

“ނަސީބެއްނު ހޭއެރިކަން. އެނޫންނަމަ ސައިކޯސެންޓަރަކަށް ގުޅަންވެގެން ކަމަށް މި ވިސްނީ! ތިއީތަ ފަތިސް ނަމާދާއި ސްކޫލަށް ދިޔުމާ ދޭތެރޭ ކުރާ ކަންތަކަކީ؟” ހިބާ އެހެން ބުނެލިއިރު ހަމްނާ ތުންއޫކޮށްލައިގެން އިނދެ އޭނަގެ އިސްތަށިގަނޑު މަތިން އަތް ހިންގަމުން ދިޔައެވެ.

“ނޫނޭ ދޮންތާ! އެހެން ދުވަހު އަހަރެން އޮންނަނީ ނިދާފައެއްނު؟ ރޭގަ ވަރަށް ދަން ގަޑިއެއްގަ މީގެ ސީޒަން ފިނާލޭ ރިލީޒްވީމަ ހަމަ ނުހުރެވުނީ ނުބަލާ….އަޅޭ ހާދަ ރީއްޗޭ. މިއީ އަހަރެން އެއްކަލަ ދުވަހު ދޮންތައަށް ކިޔައިދިން ޑްރާމާއޭ. ފެމިލީ ސިޗުއޭޝަންއާ ހެދި ނުގުޅޭ ދެމީހުންގެ ވާހަކަ….އަޅޭ ދެންމެ ހަމަ އެ އަންހެން ކުއްޖާ އެބުނީ ދެމީހުން ދުވަހަކު ނުގުޅުނަސް އަބަދުވެސް ހަނދާންކުރާނަމޭ. އަބަދުވެސް ލޯބިވާނަމޭ….ދެޓްސް ޓްރޫ ލަވް!” ހަމްނާ ހުވަފެނީ ގޮތަކަށް މޭމަތީގައި ދެއަތް އަޅައިލަމުން ބުނެލި ވާހަކައިން ހިބާއަށް ކަޅި މައްޗަށް ހިނގާލެވުނެވެ.

“މީހާގެ ބޯ ގޯސް ތިވަނީ ތި އެއްޗެހި ބަލަމުން ގޮސް….ދެންވެސް އަވަހަށް ތައްޔާރުވާން ދޭބަލަ!” ހިބާ އެހެން ބުނަމުން ހަމްނާގެ އުނގުމަތީގައި ހުރި ލެޕްޓޮޕް ލައްޕައި ލެޕްޓޮޕް ނަގައިގެން ހިނގައިގަތީ، ހަމްނާއަށް އެއްޗެކޭ ބުނުމުގެ ފުރުޞަތެއް ނުދީއެވެ. ހިބާ ކޮޓަރީގެ ދޮރު ލެއްޕުމަށްފަހު ނިކުތްއިރު ހަމްނާ އިރުކޮޅެއް ވަންދެން މޫޑު ޚަރާބުވެފައި އިނދެފައި އެނދުން ތެދުވިއެވެ.

ހަމްނާގެ ކޮޓަރިން ނިކުތް ގޮތަށް ހިބާ އަވަސްއަވަހަށް ސައިބޮއިގެން އޭނަގެ ކޮޓަރިއަށް ދިޔައީ ތައްޔާރުވުމަށެވެ. ފެންވަރައި ރީތިވެ ނިމުނުއިރު ހިބާ ހުރީ އޭނަ އާއްމު ގޮތެއްގައި ބޭރު ތަންތަނަށް ދާއިރު ލައި އުޅޭ ކަހަލަ ދިގު ހެދުމަކާއިއެކީ ޝޯލްއެއް އަޅައިގެންނެވެ.

ރީތިވާ މޭޒު ކައިރީގައި ހުއްޓި ހުރެގެން ޝޯލް އަޅަމުން ދިޔަ ވަގުތު ހިބާ ފަސްދީގެން ހުރީ އާދައިގެ ކުޑަ ކޮޓަރިއަކަށެވެ. ކޮޓަރި ކުޑަވިއެއްކަމަކު އެތާ ކޮންމެ ދިމާލަކުން ފެންނަމުން ދިޔަ ތަރުތީބުކަމާއި ސާފުކަމުން ތަނަވަސްކަމަށް ދައްކަމުން ދިޔައެވެ. ކޮޓަރީގެ އެއްފަރާތެއްގައި ހުރި ސިންގަލް އެނދުގެ ބެޑްޝީޓާއި އޭގެ މަތީގައި އޮތް ރަޖާގައި އެއްވެސް ރުލެއް ނެތްއިރު އެނދުގެ ކައިރީގައި ހުރި އަރިމަތީ މޭޒުމަތީގައި އޮތީ ހިބާ ކިޔަން ފަށާފައިވާ ފޮތެއް އެކަންޏެވެ. އެނދުގެ ކުރިމައްޗަށްވާ ގޮތަށް ހުރި ކިޔަވާ މޭޒުމަތިން ވެސް ގަލަންތައް އަޅާފައި ހުރި ދަޅަކާއި، ތަރުތީބުން ބެހެއްޓިފައި ހުރި ދެތިން ފޮތާއި ފައިލެއްގެ އިތުރުން އޭރު ހިބާ ހަމްނާގެ އަތުން ހޯދި އަޅިކުލައިގެ ލެޕްޓޮޕް ފެންނަމުން ދިޔައެވެ.

ހަމަ އެހާމެ ތަރުތީބުން އެއްޗެހިތައް ރޭވިފައިހުރި ރީތިވާ މޭޒު ކައިރީގައި ހުރުމަށްފަހު، ހިބާ ދިޔައީ ހެދުން އަލަމާރި ކައިރީގައި ހުރި ދިގު ކަބަޑު ކައިރިއަށެވެ. ކަބަޑު ތިން ބަޔަކަށް ބެހިފައިވީއިރު އޭގެ މަތިން ފެންނަމުން ދިޔައީ ބިއްލޫރި ދޮރެއް ލެވިފައި ހުރި ބައެކެވެ. އޭގެ ތެރެއިން ފެންނަމުން ދިޔައީ ހިބާއަށް އެކި ދުވަސްމަތިން ލިބިފައި ހުރި ސަނަދުތަކާއި، ހިބާ ބައިވެރިވި އެކިއެކި ސެޝަންތަކާއި ކޮންފަރެންސްތަކުން ލިބިފައިހުރި ހަނދާނީ ފިލާތަކެވެ. އެންމެ ފަހުން ލިބިފައިވި ދެ މަތީ ސަނަދު ފްރޭމް ކުރެވިފައިވީއިރު ކޮންމެ ފްރޭމެއްގެ ކަނެއްގައި ދަސްވެނިވީއިރު ލިބުނު ތޮފި އެޅުވިފައިވިއެވެ.

ކަބަޑު ކައިރިއަށް ގޮސް ހިބާ ހުޅުވައިލީ އޭގެ މެދުބައެވެ. އެ ބައިގެ ތެރެއިން ހުހަށް އޮތް ލެޕްޓޮޕް ދަބަހެއް ނަގައިގެން ކިޔަވާ މޭޒު ކައިރިއަށް ދިޔައެވެ. އަދި އެއަށް ލެޕްޓޮޕް އަޅައި މޭޒުމަތީގައި ހުރި ފޮތްތަކާއި ފައިލްވެސް އެޅިއެވެ. އަދި ދަޅުގެ ތެރޭގައި ހުރި މާކަރުތަކާއި ކުލަ ގަލަންތައް ވެސް ނަގައި ދަބަހުގެ ކުޑަ ބަޔަށް އެޅިއެވެ.

ހިބާ ނިކުތްއިރު ޔުނިފޯމް ލައިގެން ކާގޭގައި ހުރި ހަމްނާ ކޮޅަށް ހުރެ އަވަސްއަވަހަށް ސައިތަށި ބޮމުން ދިޔައެވެ. ހިބާ ފެނުމާއެކު ހަމްނާ ސައިތަށި ބަހައްޓައި އައިސްއަލަމާރިން ނެގި ފެންފުޅިއަކުން ފެންފޮދެއް ބޯލުމަށްފަހު ދުވެފައި އައެވެ. ހިބާ އަނެއްކާވެސް ދާން ހިނގައިގަތީ ހަމްނާގެ އުޅުމަށް ކުދި ކިޔަމުންނެވެ. ހަމްނާ އާދައިގެ މަތިން އެއަށް ވަކި ފަރުވާލެއް ނެތި ދިގުކޮށް ‘އޯކޭ ދޮންތާ’ އޭ ކިޔަމުން ހިބާގެ ފަހަތުން ދިޔައެވެ.

އޭގެ މިނެޓްތަކެއް ފަހުން އެ ދެމީހުންވެސް ވީ ސައިކަލު މަތީގައެވެ. ދެމީހުންގެ ދާން އުޅޭ ދެ މަންޒިލުގެ ތެރެއިން އެންމެ ކުރިން ޖެހެނީ ހަމްނާގެ ސްކޫލް ކަމަށްވުމުން ހިބާގެ މިޞްރާބު ހުރީ އެ ދިމާލަށެވެ. ދަތުރުމަތީގައި ވާހަކަ ނުދެއްކުމަކީ ދެމީހުންގެ އާދައަށް ވިޔަސް އެދުވަހު ވިސްނުމެއްގައި އިނދެފައި ހަމްނާއަށް ވާހަކަ ދެކެވުނެވެ.

“ދޮންތާ! ދޮންތަ ހަމަ އަސްލުވެސް ޤަބޫލު ނުކުރަނީތަ ޓްރޫ ލަވް އެގްޒިސްޓް ވާ ކަމަށް؟” ހަމްނާ ދޮންތައަށް އިވޭނެ ވަރަށް އަޑުހަރު ކުރަން މަސައްކަތް ކުރަމުން އެހިއެވެ.

“ޓްރޫ ލަވްއަކީ ވާ އެއްޗެއްކަން ޤަބޫލުކުރަން. ބޭކާރު އިމޯޝަނަލް އިންވެސްޓްމެންޓްތައް ކުރުމާމެދު ޤަބޫލުނުވަނީ.” ހިބާ އެހެން ބުނެލީ ވަކި މާ ބޮޑު ވިސްނުމެއްވެސް ނެތިއެވެ.

“ވަޓް؟!” އެ ބުނި އެއްޗެއްގެ މާނަ ނޭނގުމުން ހަމްނާއަށް ބުނެވުނެވެ. ހަމަ އެ ވަގުތު ސައިކަލު ނުހަނު ބާރަށް ގޮސް ވަޅަކަށް ޖެހުމުން އެހާ ހިސާބުން ވާހަކަ ނިމުމަކަށް އައެވެ.

އޭގެ މިނިޓެއްހާއިރު ފަހުން ހިބާ ގޮސް ސައިކަލު މަޑުކޮށްލީ ހަމްނާމެންގެ ސްކޫލް ކުރިމައްޗަށެވެ. އެއާއެކު ހަމްނާ ސައިކަލުން ފޭބިއެވެ. އެހެނަސް ސްކޫލަށް ދިޔުމުގެ ކުރިން ހަމްނާ އޭނަގެ ދޮންތައަށް ބަލައިލިއެވެ.

“ޔޫ ބެޓަރ އެކްސްޕްލެއިން އިނގޭ ތި އިންވެސްޓްމެންޓަކީ ކޯޗެއްކަން….ކާޑު ނާޅާތަ މިއަދު ތިއައީ؟” ހަމްނާ ވާހަކަ ދައްކަން އުޅެފައި ވެސް ކަމެއް ފާހަގަވުމުން އަހައިލިއެވެ. ސުވާލު އިވުމާއެކު ހިބާއަށް މޭމަތީގައި އެއްއަތް ޖައްސާލެވުނެވެ.

“އޭތި ނުގެނެސްބާ މި އާދެވުނީ. އޮހް! މިއޮތީ….” ހިބާ ވާހަކަ ދައްކަމުން ގޮސް ކޮނޑުގައި އެޅުވިފައިވި ދަބަހުގެ އަރިމަތީ ޖީބުން އޭނަގެ ކާޑު ނެގިއެވެ. އަދި ކާޑުގެ ފަށް ނިއުޅާލުމަށްފަހު އޭނަގެ ކަރުގައި އަޅުވައިލިއެވެ. އެ ކާޑުގައި ހިބާގެ ފޮޓޯއާއި ފުރިހަމަ ނަން ވީއިރު ނަމުގެ ދަށުގައި އޮތީ ‘ޓީޗާރ’ އެވެ.

“އަގް ދޮންތާ….ކީއްވެ ދޮންތަ ތި ފީލްޑަކުން ކުރިއަށް ދާންޖެހުނީ؟ ތި ކާޑު ފެންނަ ކޮންމެ ފަހަރަކު ހިތަށްއަރާ ދޮންތަ ކަހަލަ ސްމާޓް މީހަކު ޑޮކްޓަރަކަށް ނޫނީ ލޯޔަރަކަށް ވި ނަމައޭ….” ހަމްނާ ޝަކުވާގެ ރާގަކަށް ބުންޏެވެ.

“ރަނގަޅު ޓީޗަރުންނަށް ވެސް ވެވޭނީ ސްމާޓް މީހުންނަށޭ….ބައްޕަ ގޮތަށް.” ހިބާ އެ ފަހު ދެ ބަސް ބުނެލީ ހަމްނާއަށް ބަލައިލަމުންނެވެ. އެއާއެކު ހަމްނާ އެއްޗެކޭ ބުނަން އުޅެފައިވެސް މަޑުކޮށްލަމުން ތުންފިއްތައިލިއެވެ.

އެ މީހުން ކުޑައިރު ނިޔާވެފައިވާ ބައްޕަމަތިން ހަނދާންވުމުން ދެމީހުން ވެސް ހިމޭންވާ ގޮތްވިއެވެ. އެ ހިމޭންކަން ނެތިދިޔައީ ހިބާ ދެން ދަނީކަމަށް ބުނުމުންނެވެ. އެ ވާހަކައަށް ހަމްނާ ބޯޖަހައިލުމުން ހިބާ ސައިކަލު ދުއްވައިލިއެވެ.

ބައްޕަގެ ނަންގަނެވިގެން ދިޔުމުން ދެން ދެން އެ ދަތުރު މަތީގައި ހިބާއަށް ވިސްނެމުން ދިޔައީ ވޭތުވެފައިވި އެމީހުންގެ ހިތްދަތި މާޒީއެވެ. ކުރީކޮޅު އެމީހުން އުޅެމުން އައީ ނުހަނު އުފާވެރި ކުޑަކުޑަ ޢާއިލާއެއްގެ ގޮތުގައެވެ. ހިބާމެންގެ ބައްޕަ ޝަހީދު މުދައްރިސެއްގެ ގޮތުގައި މަސައްކަތް ކުރަމުން ދިޔައިރު މަންމައަށް ވެސް ހެދިކާ ހަދައިގެން ކުޑަ އާމްދަނީއެއް ލިބެމުން ދިޔައެވެ. ހިމޭންކަމާއެކީ މިފަދަ ސާދާ ދިރިއުޅުމެއް އެމީހުން އުޅެމުން ދަނިކޮށް ކަންތައް އެ ފުށްމިފުށަށް ޖެހިގެން ދިޔައީ ސްކޫލްގެ ތެރެއިން ބައްޕަގެ ބޮލުގައި އެޅުނު އިލްޒާމެއްގެ ސަބަބުންނެވެ. އެ އިލްޒާމުގެ ސަބަބުން އެންމެންގެ ނަފްރަތު ބައްޕައަށް އަމާޒުވެ ބައްޕަ އެންމެފަހުން ވަޒީފާއިން ވެސް ވަކިވާން ޖެހުނެވެ. އޭގެ ސަބަބުން ޢާއިލާގެ އަތްމަތި ދަތިވެގެން ދިޔަދިޔަހެން މަންމައާއި ބައްޕަގެ މެދުގައި މައްސަލަތައް ގިނަވެގެން ދިޔައެވެ. ސްކޫލްގައި ޖެހުނު މައްސަލައިގެ ވާހަކަ އިވިފައި މަންމަވެސް ކުށްވެރިކުރީ ބައްޕައެވެ. ބައްޕަގެ ބަސްތަކަށް މަންމަ އިތުބާރެއް ނުކުރިއެވެ. ނަތީޖާއެއްގެ ގޮތުން އޭގެ މާ ގިނަ ދުވަހެއްނުވެ މަންމަ، ބައްޕަ ކައިރިން ވަރިވެގެން ގެއިން ނިކުމެގެން ދިޔައީ ހިބާމެން ވެސް ދޫކޮށްލާފައެވެ. އޭރު ހިބާއަށް އެންމެ 14 އަހަރެއްކަމަކު ހިބާ ބައްޕައަށް ފުރިހަމަ އިތުބާރު ކުރީތީވެއެވެ. ބައްޕަ ކައިރީގައި ހުންނަން ހިބާ ނިންމުމުން ހަމްނާވެސް އެގޮތް ނިންމީއެވެ. ހަމްނާ މަންމައަށް ވުރެ ބޮޑަށް ލޯބިވަނީ އޭނަގެ ދޮންތަދެކެ ކަމަށްވާތީވެއެވެ.

ބައްޕައާއި މަންމަ ވަރިވިތާ މާ ގިނަ ދުވަހެއްނުވެ ބައްޕަ ލޭ މަތިވެ ވަރަށް ބޮޑަށް ބަލިވާ ގޮތްވިއެވެ. ބަލިވިއެއްކަމަކު ބައްޕަ ސިއްހަތަށްވުރެ ބޮޑަށް އިސްކަން ދިނީ ހިބާމެންގެ ބޭނުންތައް ފުއްދުމަށެވެ. މިގޮތުން ޑޮކްޓަރުން ބުރަ މަސައްކަތްތައް ނުކުރަން އަންގާފައި ވަނިކޮށް ވެސް ގެއެއްގެ ފާރެއް ރޭނުމުގެ މަސައްކަތުގައި އުޅެމުން ދަނިކޮށް ހާޓް އެޓޭކެއް ޖެހި ނިޔާވެގެން ދިޔައެވެ.

ބައްޕަ ނިޔާވި ދުވަހަކީ ހިބާމެންގެ ހަޔާތަށް އައި އެންމެ އަނދިރި ދުވަހޭ ބުންޏަސް ދޮގަކަށް ނުވާނެއެވެ. ހިބާއަށް އެދުވަހު ދުވަހަކުވެސް ނުރޯވަރަށް ރޮވުނެވެ. އެހެނަސް ހިތްވަރު ކުރީ ބައްޕަ އޭނައަށް ދީފައިވި އެތައް ނަސޭހަތެއްގެ މަތިން ހަނދާން ކުރަމުންނެވެ. ދިރިއުޅުމުގައި ދިމާވާ ކޮންމެ ގޮންޖެހުމަކީ އެއިން ކޮންމެވެސް ފިލާވަޅެއް ދަސްވާނެކަމެއް ކަމަށް ބައްޕަ ބުނި ބަސްތައް ހަނދާންކުރަމުންނެވެ.

މާ ގިނަދުވަހެއްނުވެ އެ ބަސްތަކުގެ ހަގީގަތް ހިބާއަށް އެނގުންވިއެވެ. އެންމެ 16 އަހަރުގައި ބައްޕަ ނިޔާވެގެން ދިޔުމުން ވެސް އެމީހުން އެކަނިމާއެކަނި ބައްޕަގެ ގޭގައި އުޅެން ޖެހުމުން އަމިއްލަ ފައިމައްޗަށް ކޮޅަށް ތެދުވަން ހިބާއަށް ދަސްވިއެވެ. ބައްޕަ ނިޔާވުމަށްފަހު ވެސް މަންމަގެ ޚަބަރެއް ނުވީ ތާނގައި ބައްޕަ ފަރާތު ހުރި ހަމައެކަނި ބޮޑުދައިތަ އެމީހުންނަށް ދިންހާ ވެސް އެހީއަކީ ދެ އިރުގެ ކެއުން ކަމަށް ވުމުންނެވެ. އެ ކެއުން ވެސް އެމީހުންނާއި ހަމައަށް އަންނަނީ އެތައް ކުދިކިޔުންތަކާއި އެކީގައި ކަމަށްވުމުންނެވެ.

ހިބާގެ ވަރުގަދަ ޢަޒުމާއި އެކީ އެމީހުން އެގޮތުގައި އުޅެން ޖެހުނީ މަދު ދުވަހަކަށެވެ. 18 އަހަރުވުމާއެކު ސްކޫލްގައި ކިޔަވަމުން ވެސް ހިބާ ފޮތް ފިހާރައެއްގެ ވަޒީފާއަކަށް ދާން ފެށިއެވެ. އަމިއްލަ އާމްދަނީއެއް ލިބެން ފެށުމުން ހިބާމެން އިތުރަށް ބޮޑުދައިތައަށް ބަރޯސާވާކަށް ނުޖެހުނެވެ. ސްކޫލްގެ ކިޔެވުން ނުހަނު ރަނގަޅު ނަތީޖާތަކާއެކީ ނިންމުމަށްފަހު ހިބާ ޚިޔާރު ކުރީ އޭނަގެ ގިނަ އެކުވެރިން ހީވެސް ނުކުރާ ފަދަ ދާއިރާއަކުން ކުރިއަށް ދިޔުމަށެވެ.

އާނއެކެވެ. ހިބާ މުދައްރިސަކަށްވީތީ ހައިރާންވަނީ ހަމައެކަނި އޭނަގެ ކޮއްކޮއެއް ނޫނެވެ. އެހެނެއްކަމަކު ހިބާ ދަންނަ ގިނަ މީހުން އެކަމާއިމެދު ސުވާލު އުފައްދައެވެ. ގިނަ މީހުން ބުނާ ގޮތުގައި ހިބާ މުދައްރިސަކަށްވީ އޭނަގެ ބައްޕަގެ އެދުމަށެވެ. އެހެނަސް އެއީ ޙަޤީޤަތެއް ނޫނެވެ. ހިބާ މި ދާއިރާއަށް ޝައުޤުވެރިވާން މެދުވެރިވީ ބައްޕަވެސް ދުނިޔޭގައި ވަނިކޮށް ދިމާވި ޝަހްސިއްޔަތެއްގެ ސަބަބުންނެވެ. އެ ޝަހްސިއްޔަތާއިއެކީ ކުރެވުނު ތަޖުރިބާތަކެއްގެ ސަބަބުންނެވެ. އެހެނަސް އަދާއި ޖެހެންދެން ހިބާ އެއްވެސް މީހަކަށް މި ސަބަބުތައް ކިޔައިދީފައެއް ނުވެއެވެ. ގިނަ ބަޔަކު އަމިއްލަ އަމިއްލަށް ނިންމުންތައް ނިންމައި ހިބާ ކައިރިން އެ ސަބަބުތަކާއިމެދު ސުވާލުވެސް ކޮށްފައި ނުވާތީވެއެވެ.

ހަމްނާ ސްކޫލަށް ލުމަށްފަހު ހިބާއަށް އޭނަގެ ސްކޫލާއި ހަމައަށް ދެވުނީ ފަސް ވަރަކަށް މިނެޓް ވަންދެން ދުއްވުމަށްފަހުގައެވެ. އާދައިގެ މަތިން ސައިކަލުން އެ ދިޔަ ގޮތަށް ގޮސް އޭނަ މަސައްކަތް ކުރާ ސްކޫލްގެ ގޭޓުން ވަދެގެން ދިޔައެވެ. ހަމަ އެހިނދު އެ ގޭޓު ކައިރީގައި ޕާކްކުރެވިފައި އޮތް ކަޅުކުލައިގެ އޮފުއަރާ ކާރެއް ހިބާގެ ލޮލުގައި އެޅިއެވެ. އެއީ ޢާއްމު ގޮތެއްގައި އެ ކުޑަ ރަށުން ނުފެންނަ ޒާތުގެ ކާރަކަށްވުމުން ސައިކަލު ދުއްވާފައި ދިޔަ ވަގުތު ވެސް ހިބާއަށް ބޭއިޚްތިޔާރުގައި މޫނު އެ ދިމާލަށް އަނބުރައިލެވުނެވެ. އަމިއްލަ ޚިޔާލަކަށް ގެއްލެމުން ވެސް ހިބާ އަވަސްއަވަހަށް ހަމައަކަށް އެޅެމުން ސްކޫލްގެ ގޯތިތެރޭގައި ޕާކުކުރެވިފައިވި ސައިކަލުތަކުގެ ތެރޭގައި އޭނަގެ ސައިކަލު ޕާކުކުރިއެވެ. އަދި އަވަސްއަވަހަށް ސައިކަލުން ފޭބުމަށްފަހު ސްކޫލްގެ އޮފީހާއި ދިމާލަށް ދާން މިޞްރާބު ޖެހިއެވެ.

ސްކޫލް އޮފީހަށް ވަދެގެން ގޮސް ހިބާ ޗެކްއިން ކުރި ވަގުތު ދަބަހުގެ އަރިމަތީ ޖީބުގައި އޮތް ފޯނު ރިންގުވާން ފެށިއެވެ. ފޯނު ނަގައި ބަލައިލިއިރު ސްކްރީނުން ޕްރިންސިޕަލްގެ ނަން ފެނުމާއެކު އަވަސްއަވަހަށް ފޯނު ނަގައި ކަންފަތުގައި ޖެއްސިއެވެ.

“ސަލާމް ސާރ….އަޅުގަނޑަށް ހަމަ ދެންމެ މި އާދެވުނީ. މި އަންނަނީ އިނގޭތޯ؟” ހިބާއަށް އެހެން ބުނެވުނީ އޮފީހުގެ ފާރުގައި ހުރި ގަޑިއަށް ބަލައިލަމުންނެވެ.

“އާނ ހިބާ. ދާދި ދެންމެއަކުއޭ އެ ޕޭރެންޓް މި ދުރުވީވެސް. އަވަހަށް އާދޭ ސާރގެ އޮފީހަށް.” ސްކޫލްގެ ޕްރިންސިޕަލް ކަމަށްވާ ނަޒީރު ދެންނެވިއެވެ. އެއާއެކު ހިބާ އާދެއޭ ބުނަމުން ފޯނު ކަނޑައިލިއެވެ. އަދި މަޑުކުރުމެއްނެތި ކުރިއަށް ހިނގައިގަތީ އޮފީހުގެ އެތެރެ ބައިގައި ހުރި ޕްރިންސިޕަލް އޮފީހަށް ދިޔުމަށެވެ. މިއަދު އޭނަ އަވަހަށް އަންނަން ޖެހުނީ މިކަމަށްޓަކައެވެ.

ނުނިމޭ