ނަމާދުގެ ޙަޤީޤީ ލައްޒަތު ލިބިގަންނާނީ ކިހިނެއް؟ (އެގާރަވަނަ ބައި)

ތިބާގެ ހިތުގެ ފުންމިނުން ކިޔަވާށެވެ!

އަޅުގަނޑުމެން މިހާރު ސޫރަތުލް ފާތިޙާ ނިންމައިފީމުއެވެ. އެއަށްފަހު ދެން އަޅުގަނޑުމެން ދާނީ އެއަށްފަހު ޤުރުއާނުން ބައެއް ކިޔެވުމަށެވެ.

ނަމާދުގައި ޤުރުއާނުން އެއްވެސް ބައެއް ކިޔެވޭ ހިނދު އަޅުގަނޑުމެން އަބަދުވެސް ތިބެނީ ކޮޅަށްކަން ތިބާއަށް ފާހަގަ ނުކުރެވޭ ހެއްޔެވެ؟ ސޫރަތުލް ފާތިޙާއަށް ވިޔަސް އަދި އެހެން ސޫރަތަކަށް ވިޔަސް އަޅުގަނޑުމެން އިށީނދެ ތިބެ، ނޫނީ ރުކޫޢުގައި ނޫނީ ސަޖިދައިގައި ނުކިޔަވަމުއެވެ. އެއީ ކީއްވެ ހެއްޔެވެ؟

ކޮޅަށް ހުރުމުގެ މަޤާމަކީ އިންސާނާގެ އެންމެ ޝަރަފުވެރި، ޤަދަރު ހުރި އަދި އިޙްތިރާމް ލިބިގެންވާ މަޤާމެވެ. އަދި ޤުރުއާނަކީ އެހާ ޝަރަފުވެރި އަދި މާތްވެގެންވާ ކަލާމްފުޅެއް ކަމުގައިވުމުން، އެ ކިޔެވުން އެންމެ އައުލާކަން ބޮޑުވެގެންވަނީ އެންމެ ޝަރަފުވެރި އަދި އިޙްތިރާމް ލިބިގެންވާ މަޤާމެއްގައެވެ. ރަސޫލާ ﷺ ވަނީ ރުކޫޢުގައާއި ސަޖިދައިގައި ޤުރުއާން ކިޔެވުން މަނާ ކުރައްވާފައެވެ.

ޤުރުއާނަކީ އެންމެ މަތިވެރިވެ ވޮޑިގެންވާ ﷲ ގެ ބަސްފުޅެވެ. އެހެންކަމުން އަޅުގަނޑުމެންގެ އެންމެ މަތިވެރިވެގެންވާ އިޙްތިރާމް އެ ބަސްފުޅަށް ޙައްޤުވެގެންވެއެވެ. އެހެނަސް އެ ޤުރުއާން ކިޔަވާ ހިނދު އެއަށް ސަމާލުކަން ނުދީ، އެއްވެސް އިޙްސާސެއް ނުކޮށް، އެ ބާރުގަދަ ބަސްތަކާއިމެދު ވިސްނައިލުމެއްނެތި އަޅުގަނޑުމެން ކިޔަވައިލީ ކިތައް ފަހަރު ހެއްޔެވެ؟ އެ ކިޔަވައިލެވުނީ ﷲ ސުބުޙާނަހޫ ވަތަޢާލާ ނަހީކުރެއްވި ކިތައް ވާހަކައެއްތޯ ސުވާލުކޮށްފިނަމަ، އަޅުގަނޑުމެންގެ ތެރެއިން ގިނަ ބަޔަކަށް ނޭނގޭނެއެވެ. އެ ކިޔަވައިލެވުނީ ﷲ ގެ ކިތައް އަމުރުފުޅުތައް ހެއްޔެވެ؟ އަޅުގަނޑުމެން ހަނދާނެއް ނުހުންނާނެއެވެ! އިމާމުގެ ފަހަތުގައި މީހުން ނަމާދަށް ކޮޅަށް ތިބެއެވެ. އިމާމު މީހާ ނަރަކައާއި ސުވަރުގޭގެ ވާހަކަތައް އިއްވަމުންދާ ވަގުތު، މީހުންގެ ޚިޔާލުތައް ވަނީ ކެއުމާއި ބުއިމުގައެވެ.

އަޅުގަނޑުމެންނަށް ނުހަނު ބާރުގަދަ ރަސްގެފާނަކާއި އިންޓަވިއުއެއް ކުރަން ފުރުސަތު ލިބިއްޖެނަމަ، އަޅުގަނޑުމެން ކިހާ ބޮޑު ސަމާލުކަމެއް ދޭނަން ހެއްޔެވެ؟ އަޅުގަނޑުމެން އެ ރަސްގެފާނުގެ ބަސްތަކަށް ދޭނީ ހަމައެކަނި އަޅުގަނޑުމެންގެ ކަންފަތެއް ނޫނެވެ. އެއާއިއެކު އަޅުގަނޑުމެންގެ ހިތްތަކުގެ ސަމާލުކަން ވެސް އެ ރަސްގެފާނަށް ދެވިފައިވާނެކަން ޔަޤީނެވެ. އެ ބަސްތަކަށް ދެވޭ ސަމާލުކަމެއްގެ ބޮޑުކަމުން، ރަސްގެފާނުގެ ބަސްތައް އިވެމުން ދާހެން އަޅުގަނޑުމެންނަށް އެ ބަސްތައް ހިތުދަސް ވެސްވުން އެކަށީގެންވެއެވެ! މިހެން ކަމަށްވާނަމަ، ނަމާދުގައި އަޅުގަނޑުމެން ކިޔަވާ ބަސްތަކަށް އަޅުގަނޑުމެން ސަމާލުކަން ނުދޭނީ ކިހިނެއް ހެއްޔެވެ؟ ނަމާދުގެ ބައްދަލުވުމުގައި އަޅުގަނޑުމެންނާއި މުޚާތަބު ކުރަނީ ޚުދު ﷲ ސުބުޙާނަހޫ ވަތަޢާލާއަށް ވީ ހިނދެވެ!

“ފަހެ، قرآن އާމެދު އެބައިމީހުން ވިސްނައި ފިކުރު ނުކުރަނީހެއްޔެވެ؟ ނުވަތަ (އެބައިމީހުންގެ) ހިތްތަކުގައި ތަޅުތަކެއް ލެވިފައިވަނީ ހެއްޔެވެ؟” سورة محمد، 24

ބުނެވޭ ގޮތުގައި އަޅުގަނޑުމެންގެ ހިތްތައް ޠާހިރުނަމަ، ﷲ ގެ ބަސްފުޅު ކިތަންމެ ގިނައިން އިވުނަސް އަޅުގަނޑުމެންގެ ހިތްތައް ނުފުރޭނެއެވެ!

ހަނދާންކުރާށެވެ. މުހިއްމީ ޤުރުއާން ކިޔެވޭ ޢަދަދެއް ނޫނެވެ. މުހިއްމީ އެ ޤުރުއާން އަޅުގަނޑުމެން ކިޔަވަނީ ކިހިނެއްކަމުގެ ފެންވަރާއި، އެއިން އަޅުގަނޑުމެންނަށް ކުރާ އަސަރެވެ. ރަސޫލާ ﷺ މުޅި އެއްރެއެއް ވަންދެން ކީރިތި ކުރައްވަމުން ނަމާދެއް ކުރެއްވިއެވެ. އެއީ އެންމެ އާޔަތެއް ތަކުރާރުކޮށް ކިޔަވަމުންނެވެ.

“އެބައިމީހުންނަށް، އިބަރަސްކަލާނގެ عذاب ދެއްވާނަމަ، ފަހެ، ހަމަކަށަވަރުން، އެބައިމީހުންނީ، އިބަރަސްކަލާނގެ އަޅުންނެވެ. އަދި އެބައިމީހުންނަށް އިބަރަސްކަލާނގެ ފާފަފުއްސަވާނަމަ، ފަހެ، ހަމަކަށަވަރުން، އިބަރަސްކަލާނގެއީ، عزيز ވަންތަ حكيم ވަންތަ ރަސްކަލާނގެއެވެ.” سورة المائدَة ، 118

އެހެންކަމުން އަޅުގަނޑުމެން ކިޔަވަންވީ ޖަޒުބާތާއި އެކީގައެވެ. އަޅުގަނޑުމެން މި ވާހަކަ ދައްކަނީ ﷲ ސުބުޙާނަހޫ ވަތަޢާލާއާއި ކަމާއި، އަދި އަޅުގަނޑުމެންނާއި ވާހަކަ ދައްކަވަނީ އެކަލާނގެކަން ހަނދާން ބަހައްޓައިގެންނެވެ. އެހެނަސް ކޮންމެ އާޔަތަކާއި އެކީ އިޙްސާސް ކުރަންވީ ކޯޗެއްކަން އަޅުގަނޑުމެންނަށް އެނގޭނީ ކިހިނެއް ހެއްޔެވެ؟ ތަފްސީރުގެ ޢިލްމު އަޅުގަނޑުމެންނަށް އެހާ ބޮޑަށް ލިބިފައި ނުވިޔަސް، އިބްނު އަލް ޤައްޔިމް ރަޙިމަހު ﷲ އަޅުގަނޑުމެންނަށް މިހާވަރަށް އެ އިޙްސާސްތައް އުނގަންނައި ދެއްވާފައިވެއެވެ.

އާޔަތަކުން ދެކެވެނީ ﷲ ގެ ނިޢުމަތްތަކުގެ ވާހަކަ ކަމަށްވާނަމަ، އަދި އެކަލާނގެ ނަންފުޅުތަކާއި ސިފަފުޅުތަކުގެ ވާހަކަ ކަމަށްވާނަމަ، ތިބާގެ ހިތް ލޯބިން ފުރިގެންދާންވާނެއެވެ.

އާޔަތަކުން ދެކެވެނީ ﷲ ގެ ރަޙްމަތާއި، ފުއްސެވުމާއި، ސުވަރުގޭގެ އަހުލުވެރިންގެ ވާހަކަ ކަމަށްވާނަމަ، ތިބާގެ ހިތް ފުރެންވާނީ އުފާވެރިކަމާއި، ހިތްހަމަޖެހުމާއި އުއްމީދުންނެވެ.

އާޔަތަކުގެ ދެކެވެނީ ﷲ ގެ ކޯފާއާއި، ޢަޒާބާއި، ހަލާކުވެގެންދިޔަ ޤައުމުތަކުގެ ވާހަކަ ކަމަށްވާނަމަ، ތިބާގެ ހިތް ފުރެން ވާނީ ބިރުވެރިކަމާއި ކަންބޮޑުވުމުންނެވެ.

އެހެންކަމުން ﷲ ގެ ބަސްފުޅުތައް ކިޔެވޭ ހިނދު އަޅުގަނޑުމެން އަބަދުވެސް ވާންވާނީ ލޯތްބާއި، އުއްމީދާއި، ބިރުވެރިވެރިކަމާއި ދެމެދުގައެވެ.

އަޅުގަނޑުމެންނަށް ފަހުމްކުރެވޭ ވަރަށްވުރެ ޤުރުއާނުގެ މާތްކަން ބޮޑުވެގެންވެއެވެ.

“ތިމަންރަސްކަލާނގެ ފަރުބަދައެއްގެ މައްޗަށް މި قرآن ބާވައިލެއްވިނަމަ، ހަމަކަށަވަރުން، އެ ފަރުބަދައެއް اللَّه އަށް ބިރުވެތިވުމުގެ ސަބަބުން ކުނޑިކުނޑިވެގެން ތިރިވާތީ ތިބާއަށް ފެނުނީހެވެ. އަދި އެ މިސާލުތައް މީސްތަކުންނަށް ތިމަންރަސްކަލާނގެ ޖައްސަވަނީ، އެބައިމީހުން ފިކުރު ކުރުމަށްޓަކައެވެ.” سورة الحشر، 21

ނުނިމޭ