ނަމާދުގެ ޙަޤީޤީ ލައްޒަތު ލިބިގަންނާނީ ކިހިނެއް؟ (ސަތާރަވަނަ ބައި)

އަލްވަދާޢުގެ މަންޒަރު

ތިބާ ނަމާދުގެ ފުރަތަމަ ރަކުޢަތްކޮށް ނިމިއްޖެނަމަ، ތިބާ ދެވަނަ ރަކުޢަތަށްޓަކައި ތެދުވާނަމުއެވެ. ނަމާދަށް އިތުރު ސަމާލުކަމެއް ދިނުމަށް ލިބޭ ފުރުސަތެއްގެ ގޮތުގައެވެ. މިފަހަރު ތިބާގެ ހިތާއި ސިކުނޑި، ނަމާދަށް ޙައްޤުވާފަދަ ޚުޝޫޢަތްތެރިކަމުން ފުރުވާފައި ބެހެއްޓުމަށް ޔަޤީން ކުރާށެވެ.

މިއީ ތިބާގެ ފަހު ރަކުޢަތް ކަމަށްވާނަމަ އަޅުގަނޑުމެން ދެން މި އައީ އަލްވަދާޢުގެ މަންޒަރަށެވެ. ރަޙްމާންވަންތަ ރަސްކަލާނގެއާއި އެކަލާނގެ އަޅާގެ މި ރީތިވެގެންވާ ބައްދަލުވުމަށް އަންނަ ފޮނި ނިމުމެކެވެ. އަޅުގަނޑުމެން މިހާރު މި އައީ އައްތަޙިއްޔާތާއި ހަމައަށެވެ.

އަޅުގަނޑުމެންގެ އަތް ބޭއްވިފައި އޮންނަންވާނީ ކަކޫ މަތީގައެވެ. އެހެންނޫނީ އެއަށްވުރެ ކުޑަ ތަންކޮޅެއް މަތިން ތިރީ ފަލަ މަސްގަނޑު މަތީގައެވެ. ﷲ ސުބުޙާނަހޫ ވަތަޢާލާއާއި ވާހަކަ ދެއްކުން ޙައްޤުވެގެންވާ ފަދައިން މި މަޤާމުގައި ވެސް އަޅުގަނޑުމެން ފަށާނީ އެކަލާނގެއަށް ޙަމްދު ޘަނާ ކިޔަމުންނެވެ. އެކަލާނގެ ގެ ނިމުމެއްނުވާ ވޮޑިގެންވުމަށާއި، އެކަލާނގެ ގެ ފުރިހަމަ ކަމަށާއި، އެކަލާނގެ ގެ މިލްކުވެރި ކަމަށެވެ. މި ރީތިވެގެންވާ ބަސްތަކުން ސީދާ އެކަލާނގެއާއި ވާހަކަ ދައްކަން ފަށާށެވެ.

التَّحِيَّاتُ لِلّهِ (ހުރިހާ އައްތަޙިއްޔާތެއް {ހުރިހާ ތަޢުރީފަކާއި ޘަނާއެއް} ޙައްޤުވެގެންވަނީ ހަމައެކަނި ﷲ އަށެވެ.)

وَالصَّلَوَاتُ (އަޅަމެންގެ ހުރިހާ ދުޢާއަކާއި ނަމާދެއް ވަނީ އެކަލާނގެއަށްޓަކައެވެ.) وَالطَّيِّبَاتُ (އަދި ހުރިހާ ހެޔޮ ޢަމަލަކާއި ހެޔޮ ބަސްތައް ވަނީ އެކަލާނގެއަށްޓަކައެވެ.) އެހެނީ ﷲ ސުބުޙާނަހޫ ވަތަޢާލާ ޤަބޫލު ކުރައްވަނީ ހެޔޮ، ޠާހިރުވެގެންވާ އަދި އިޚްލާޞްތެރި ޢަމަލުތަކެވެ.)

ތިބާ ދެން ކިޔަން އުޅޭ ބަސްތައް ދަތުރުކުރާނީ މުޅިން އެހެން ބިމަކަށެވެ. އެތައް ހާސް ކިލޯމީޓަރެއް ދުރުގައިވާ މަދީނާއަށެވެ. މި ދުނިޔޭގައި އުޅުއްވި އެންމެ މާތް އިންސާނާ ކަމަށްވާ އަޅުގަނޑުމެންގެ މާތް ނަބިއްޔާގެ ބަރަކާތްތެރި ހަށިކޮޅު ވާ ބިމަށެވެ. السَّلاَمُ عَلَيْكَ أَيُّهَا النَّبِيُّ وَرَحْمَةُ اللّهِ وَبَرَكَاتُهُ (ސަލާމާއި، ﷲ ގެ ރަޙްމަތާއި އެކަލާނގެ ގެ ބަރަކާތް ތިޔާ ނަބިއްޔާއަށް ލައްވާނދޭވެ!) ކޮންމެ ދުވަހަކު ތިބާ މި ސަލާމް އެކަލޭގެފާނަށް ފޮނުވަމުއެވެ. އަދި އެ ސަލާމުގެ ޖަވާބު އެކަލޭގެފާނު ދެއްވައެވެ. މި ޙަދީޘް ނިކަން އަޑުއަހާށެވެ.

ރަސޫލާ ﷺ ޙަދީޘް ކުރެއްވިއެވެ. “މީހަކު ތިމަންކަލޭގެފާނަށް ސަލާމާއި ޞަލަވާތް ފޮނުއްވާ ކޮންމެ ފަހަރަކު، ﷲ ތިމަންކަލޭގެފާނުގެ ރޫޙު ތިމަންކަލޭގެފާނަށް ފޮނުއްވައި، ތިމަންކަލޭގެފާނު އެމީހަކަށް ތިމަންކަލޭގެފާނުގެ ސަލާމާއި ޞަލަވާތް ނުފޮނުއްވާ ފަހަރެއް ނުވެއެވެ.”

ތިބާގެ އެންމެ ކައިރީގައިވާ ދޮރުފަތާއި ދިމާލަށް ނަޒަރެއް ހިންގާށެވެ. ރަސޫލާ ﷺ އެ ދޮރުން ވަދެވަޑައިގަންނަވާ މަންޒަރު ޚިޔާލަށް ގެންނާށެވެ. ފިނިފެންމަލެއްގެ ލުއި ރަތްކަމެއް ލިބިގެންވާ އެކަލޭގެފާނުގެ ރީތިވެގެންވާ އަލި މޫނާއި، ނުހަނު ރީއްޗަށް ބަނދެވިފައިވާ ‘އަމާމާ’ އާއި (ބޮލުގައި އަޅުވާ ފޮތިކޮޅާއި) އެކީގައެވެ. އެކަލޭގެފާނުގެ ސާފު ހުދު އަދި ފޮނި މީރު ވަހެއް ދުވާ ހެދުންކޮޅާއި އެކީގައެވެ. އަދި ތިބާގެ ހިތް ވިރުވާލާނެފަދަ އޯގާތެރި ހިނިތުންވުމަކާއި އެކީގައެވެ. އެކަލޭގެފާނު މިއަދު ޚިޔާރު ކުރެއްވީ ހަމައެކަނި އެންމެ މީހަކަށް ސަލާމާތް ޞަލަވާތް ފޮނުއްވުމަށެވެ. އެއީ ތިބާއެވެ! ތިބާއަށް އިޙްސާސް ކުރެވޭނީ ކިހިނެއް ހެއްޔެވެ؟ ތިބާ ބުނާނީ ކީކޭ ހެއްޔެވެ؟ މަތީގައިވާ ލޯބިން ފުރިގެންވާ ބަސްތަކާއިއެކީ ތިބާ މިހާރު ސީދާ ތި ވާހަކަ ދައްކަނީ ތިބާގެ ނަބިއްޔާއާއެވެ. ނިކަން ވިސްނާށެވެ. މި ޝަރަފު ކޮންމެ ދުވަހަކު މަދުވެގެން 5 ފަހަރު ތިބާއަށް ލިބެއެވެ!

އެކަލޭގެފާނުގެ ދުވަސްވަރުގައި އުޅެ، އެކަލޭގެފާނު ފެނި، އެކަލޭގެފާނާއި އެކީ އުޅުމަށް އަޅުގަނޑުމެންގެ ތެރެއިން އެދުނީ ކިތައް މީހުން ހެއްޔެވެ؟ މަތީގައިވާ ބަސްތަކާއިއެކީ އަޅުގަނޑުމެން ވަނީ އެކަލޭގެފާނާއި އެކީގައެވެ. އެހެންކަމުން އަސަރާއި، އުފާވެރިކަމާއި ޝުކުރުވެރިކަމުން ފުރިފައިވާ ހިތަކާއިއެކީ އެކަލޭގެފާނަށް ސަލާމް ދަންނަވާ ހިނގާށެވެ. އެކަލޭގެފާނު އަޅުގަނޑުމެންނަށް ދެއްކެވި ފުރިހަމަ މިސާލަށްޓަކައާއި، އެކަލޭގެފާނު އަޅުގަނޑުމެންނަށް ގެނެސްދެއްވި ދީނަށްޓަކައެވެ. އަދި އަޅުގަނޑުމެންގެ ހިތްތަކުގައި އެކަލޭގެފާނަށްޓަކައިވާ ލޯތްބާއި ޤަދަރުގެ މަތިން ހަނދާން ކުރަމުން ދާއިރު މިކަމާއިމެދު ވެސް ވިސްނަމާ ހިނގާށެވެ. އަޅުގަނޑުމެން މިހާރު އިށީނދެގެން މިތިބީ އަޅުގަނޑުމެންގެ ނަބިއްޔާ ހެއްދެވި ފަރާތުގެ ޙަޟްރަތުގައެވެ. އަދި އަޅުގަނޑުމެންގެ ހިތްތަކުގައި ﷲ އަށްޓަކައި ވެސް ލޯތްބެއްވެއެވެ. އެކަލާނގެ ގެ ނަބިއްޔާގެ މައްޗަށް ފޮނުއްވާ ސަލާމާއި ޞަލަވާތުގެ ސަބަބުން، އެކަލާނގެ ތިބާއަށް އޭގެ 10 ގުނަ ސަލާމާއި ޞަލަވާތް ފޮނުއްވައެވެ!

ﷲ އަށް ތަޢުރީފާއި ޘަނާ ފޮނުއްވުމަށްފަހު، އެކަލާނގެ ގެ ނަބިއްޔާއަށް ވެސް ސަލާމާއި ޞަލަވާތް ފޮނުއްވުމަށްފަހު، އަޅުގަނޑުމެން ދެން ސަލާމް ފޮނުވަނީ އަޅުގަނޑުމެންގެ މައްޗަށާއި ޞާލިޙު އަޅުންގެ މައްޗަށެވެ. السَّلاَمُ عَلَيْنَا وَعَلى عِبَادِ اللّهِ الصَّالِحِيْنَ (އަޅަމެންގެ މައްޗަށް ވެސް ސަލާމް ލައްވާނދޭވެ! އަދި ޞާލިޙު އެންމެހާ އަޅުންގެ މައްޗަށް ސަލާމް ލައްވާނދޭވެ!) އަޅުގަނޑުމެން ސަލާމް ފޮނުވަނީ އުޑާއި ބިމުގައި ވާހާ ޞާލިޙު އަޅުންނަށެވެ. އިންސާނަކަށް ވިޔަސް އަދި މަލާއިކަތަކަށް ވިޔަސްމެއެވެ.

ދެން އަޅުގަނޑުމެން ކިޔާނީ ތައުޙީދުގެ ބާރުގަދަ ބަސްތަކެވެ. އެ ބަސްތައް ކިޔުމުން އަޅުގަނޑުމެންގެ އީމާންތެރިކަމާއި އިޚްލާޞްތެރިކަން އާވެ، ޘާބިތުވެގެންދާ ބަސްތަކެވެ. أَشْهَدُ أَنَّ لاَ إِلَهَ إِلاَّ اللّه وَ أَشْهَدُ أَنَّ مُحَمَّدًا عَبْدُهُ وَرَسُوْلُهُ  (ﷲ ފިޔަވައި ޙައްޤުވެގެން އަޅުކަން ވެވޭ އިލާހެއް ނުވާކަމަށް އަޅު ހެކިވަމެވެ. އަދި މުޙައްމަދުގެފާނަކީ އެކަލާނގެ ގެ އަޅެއްކަމާއި ރަސޫލެއްކަމަށް އަޅު ހެކިވަމެވެ.) މަރު އަޅުގަނޑުމެންގެ ތެރެއިން މީހަކާއި ހަމައަށް އަންނަ ވަގުތެއް ވެގެންދާނީ ކޮންމެވެސް ދެ ނަމާދެއްގެ ދޭތެރެއަށް އަންނަ ވަގުތަކަށެވެ. އެއީ ފަތިސް ނަމާދާއި މެންދުރު ނަމާދާއި ދެމެދު ކަމަށްވެދާނެއެވެ. އެހެންނޫނީ މެންދުރު ނަމާދާއި ޢަޞްރު ނަމާދެވެ. އެހެންނޫނީ ޢަޞްރު ނަމާދާއި މަޣްރިބް ނަމާދެވެ….ރަސޫލާ ﷺ ޙަދީޘް ކުރައްވާފައިވެއެވެ. “އެމީހެއްގެ ފަހު ބަސްތަކަކީ لاَ إِلَهَ إِلاَّ اللّه އަށް ވެއްޖެ މީހާ ސުވަރުގެ ވަންނާނެއެވެ.” މިއީ އެހެނިހެން ޚިޔާލުތަކަށް ދާންވީ ވަގުތެއް ނޫނެވެ! މަތީގައިވާ ސާބިތު ކުރުވަނިވި ބަސްތަކަކީ ސުވަރުގެއަށް ދެވޭ ތަޅުދަނޑިއެވެ!

މި ރީތިވެގެންވާ ބައްދަލުވުން ނިމުމަކާއި ގާތްވަމުންދާ ވަގުތު، ﷲ ސުބުޙާނަހޫ ވަތަޢާލާ ވަނީ އެކަލާނގެއާއިއެކީ ހޭދަކުރެވޭ މި ފަހު އަގުހުރި ވަގުތުކޮޅުގައި ވެވޭ ދުޢާތައް އެކަލާނގެ އިޖާބަކުރައްވާނެ ކަމުގެ ޔަޤީންކަން ދެއްވާފައެވެ! އެހެންކަމުން އަޅުގަނޑުމެންގެ ލޮބުވެތި ނަބިއްޔާއަށާއި އެކަލޭގެފާނުގެ ޢާއިލާއަށް ޞަލަވާތާއި ސަލާމް ލެއްވުމަށް އެދި ﷲ ގެ ޙަޟްރަތުގައި ދަންނަވާށެވެ. ތިބާއާއި ތިބާގެ މައިންބަފައިންގެ ފާފަތައް ފުއްސެވުމަށް އެދި ގިނަގުނަ ދުޢާ ކުރާށެވެ. ރަޙްމާންވަންތަ ރަޙީމްވަންތަ ﷲ ގެ ޙަޟްރަތުން މި ދުނިޔެއާއި އާޚިރަތުގެ ވެސް ހެޔޮކަމަށް އެދި ދުޢާ ދަންނަވާށެވެ. ރަސޫލާ ﷺ ނަމާދުގެ މި ވަގުތުކޮޅުގައި ކުރެއްވި ދުޢާތައް ދަސްކުރަން މަސައްކަތް ކުރާށެވެ. އެހެނީ އެ ދުޢާތަކުން އަޅުގަނޑުމެން ބޭނުންވާނެހާ ކަންތަކަށް އަލި އެޅުވިގެންދެއެވެ.

ނަމާދު ނިންމާ ވަގުތު ތިބާގެ ބޯ ކަނާތް ފަރާތަށް އަނބުރައި ތިބާގެ ކައިރީގައިވާ މީހުންނަށް ސަލާމް ދޭށެވެ. ތިބާއަށް މިވަގުތު އިޙްސާސް ކުރެވެންވާނީ ފުން އަރަމާކާއި، އަމާންކަމަކާއި، ހިތްހަމަޖެހުމެކެވެ. އެ އިޙްސާސް ނުކުރެވޭނަމަ އޭގެ ފަހަތުގައިވަނީ ތިބާގެ ޢަމަލުތަކެވެ. ނުބައި ޢަމަލުތަކުން ތިބާގެ ނަފްސަށް ބަރުވެ، ހިތް ‘އައްސި’ ވާނެތީވެއެވެ. އަދި ތިބާގެ ވެރި ރައްބާއި ތިބާ ދުރު ކުރުވާނެތީވެއެވެ. ތިބާ ކުރި ނަމާދުގައި އެންމެ ފުރިހަމައަށް ނުކުރެވުނު ހުރިހާ ކަމަކަށްޓަކައި، ނަމާދު ނިންމުމަށްފަހު މަދުވެގެން 3 ފަހަރު ފާފަ ފުއްސެވުމަށް އެދި ދުޢާ ކުރާށެވެ. އަދި ސުންނަތް ނަމާދު ކުރަން ތެދުވާށެވެ. ހަމައެކަނި ﷲ އަށް ދެވޭނެ ހަމަޖެހުން ހޯދުމުގެ ދެވަނަ ފުރުސަތަކަށްޓަކައެވެ. އަދި އަބަދުވެސް ހަނދާނުގައި ބަހައްޓާށެވެ. ތިބާގެ ހިތުގައި ﷲ އަށްޓަކައިވާ ލޯބި އިތުރުވަމުން ދާ ވަރަކަށާއި، ތިބާ އެކަލާނގެއާއި ގާތްވަމުން ދާ ވަރަކަށް، ﷲ އަށްޓަކައިވާ ޚުޝޫޢަތްތެރިކަމުގެ ސަބަބުން ތިބާގެ ހިތަށް ދިރުން ލިބެން ފަށާނެއެވެ. އަދި އެންމެ ފަހުން ތިބާއަށް ނަމާދުގެ ޙަޤީޤީ ލައްޒަތު ލިބެން ފަށާނެއެވެ!

ނުނިމޭ