ދާރިސް (ސަޔާޅީސްވަނަ ބައި)
“ހެހެ….ބަލަމާ ދެން ރަނގަޅުވަމުން ދާނެކަމަށް އިން ޝާ ﷲ! ހަމަ ޙަޤީޤަތުގަ ވެސް ހިބާއާއި ދިމާވި ފަހުން މާޒިން ހުންނަނީ ވަރަށް އުފާވެފަ. ވަރަށް އެންމެންނާއި އެކުވެރިވާ ހިތްވެފަ…ހިތަށްއަރަނީ…..”
މުނީރާއަށް ވާހަކަ ދައްކަމުން ގޮސް އެހާ ހިސާބަށް ހުއްޓައިލެވުނީ، ދާރިސްގެ ނަން ގަނެވެން އުޅުމުން ކުރެވުނު އިޙްސާސްތަކެއްގެ ސަބަބުންނެވެ. އޭނަ ބުނަން ޤަޞްދުކުރީ، މާޒިން ހިބާއާއި އެކީ އުޅޭއިރު އުފަލުން ހުންނަ ކަމަށް ވާނަމަ، ދާރިސް ވެސް ކުޑައިރު ހިބާއާއި އެކީ އުޅެފައިވާނީ އުފަލުގައިތޯއެވެ.
އެ މަންޒަރު ލޮލަށް ސިފަވުމުން ވެސް އުފާވިއެއްކަމަކު ދާރިސްގެ ނަން ދުލާއި ހަމައަށް ގެންނަން މުނީރާއަށް ދަތިވިއެވެ. އޭނައާއިހެދި އެ ކުއްޖާ ތަޙައްމަލުކޮށްފައިވާ ދަތިތަށް ހިތަށް ގެނެވުމުން އެ ހިތް މޭތެރޭގައި އޮވެ ޖެހި ފިތި ބާރު ވަމުން ދިޔަ ކަހަލަ އިޙްސާސެއް ކުރެވެމުން ދިޔައެވެ. އޭގެ ސަބަބުން ދާރިސްއާއި ބެހޭ ސުވާލެއް ކޮށްލުމުގެ ޙައްޤުވެސް އޭނައަށް ލިބިގެންނުވާކަމަށް ހިތާހިތުން ބުނެވުނެވެ. ހިބާއާއި ބައްދަލުވީއްސުރެ ދާރިސްގެ ވާހަކަ ދައްކަން ކެތްމަދުވެފައިވިއެއްކަމަކު، އެކަމަށް ނުކުޅެދުނީ އެހެންވެއެވެ.
“ހިތަށްއަރަނީ؟” މުނީރާއަށް އޭނަގެ ޚިޔާލުތަކުން ނިކުމެވުނީ ހިބާ އެ ސުވާލުކޮށްލުމުންނެވެ. އޭގެ ޖަވާބަކަށް އަނެއްކާވެސް ދާރިސްގެ ނަން ކިޔަން ޖެހޭކަން އެނގުންވުމުން މުނީރާ ވާހަކަ އޮޅުވައިލަން ބޭނުންވިއެވެ.
“ހް…ހެހެ…އެއީ މާ ބޮޑު ވާހަކައެއް ނޫން…ހިބާ ބުނެބަލަ. ދެން މާޒިންއާއި ބެހޭގޮތުން ހިބާ ބުނަން ބޭނުންވާ އެހެން ވާހަކައެއް އެބައޮތްތަ؟” މުނީރާ އެހެން އަހައިލީ، މި ބައްދަލުވުމުގައި ދާރިސްގެ ވާހަކަ ދެއްކުމުގެ ޚިޔާލު ބަދަލުކުރަމުންނެވެ. އެކަމަށްޓަކައި އަދި އޭނަ އިތުރު ހިތްވަރެއް އެއްކުރަން ޖެހޭކަން ދަނެގެންނެވެ.
އޭނަގެ އެ ސުވާލަށްފަހު ވެސް ހިބާ ދެއްކި އިތުރު ވާހަކަތަކުގެ ތެރެއިން ދާރިސްގެ ވާހަކަ ނައުމުން މުނީރާގެ ހިތަށް ހަމަޖެހުމެއް ލިބުނީ އެހެންވެއެވެ. ހިބާ ސުވާލެއް ކޮށްލަންތޯ އެހުމަށްފަހު ވެސް ދާރިސްގެ ބަދަލުގައި ހިބާގެ ބައްޕައާއިމެދު ސުވާލުކުރުމުން މުނީރާއަށް ފަސޭހަކަމާއިއެކީ ޖަވާބު ދެވުނީ އެހެންވެއެވެ. އެހެނަސް ވަކި ހިސާބަކުން ހިބާ ދައްކަން ފެށި ވާހަކައިން އަނެއްކާވެސް މުނީރާގެ ހިތަށް އުދަގޫވާން ފެށިއެވެ.
“ހަމަ އަސްލުވެސް…..ބައްޕަ ނޭނގޭ މީހުންނަށް ވެސް އެތައް ބައިވަރު އެހީއެއް ވެދޭނެ. އަހަރެން ކުޑައިރު ކޮންމެވެސް ފިރިހެން ކުއްޖަކު ވެސް ގެއަށް ގެނެސް އަހަރެންގެ ކޮޓަރި ދީގެން ގެންގުޅުނު….” ހިބާ ދެއްކި އެ ވާހަކައާއިއެކީ މުނީރާގެ ލޯ ބޮޑުވެ ހިތް ކެތްމަދުވެގެން ދިޔައެވެ.
“ރަނގަޅަށް އުޅުނުތަ އެ ކުއްޖާ ތި ގޭގަ؟ ވަރަށް އުދަގޫ ކުރިތަ ހިބާއަށާއި ހިބާގެ ބައްޕައަށް؟” މުނީރާއަށް އެ ސުވާލުތައް ކޮށްލެވުނީ ހަމަ އެއްވެސް އިޚްތިޔާރަކާއި ނުލައެވެ. ދާރިސްގެ ވާހަކަ ނުދައްކަން އޭނަ ނިންމި ނިންމުން ވެސް ކުއްލިއަކަށް ބަދަލުކުރެއްވިއްޖެކަން އެނގުންވީ ސުވާލުތައްކޮށް ނިމުނު ފަހުންނެވެ. އެ ސުވާލުތައް ކުރެވުނީ އޭނައަށް ދާރިސް މާ ރަނގަޅަށް ވެސް އެނގޭތީވެއެވެ. މާޙައުލު ބަދަލުވުމުން ދާރިސްގެ އުޅުމަށް އަންނަ ބަދަލުތައް ފެނިފައިވާތީވެއެވެ. ދާރިސްގެ އެ އުޅުން ފެނި ދާރިސް ދާ ކޮންމެ އާ މާޙައުލެއްގައި އުޅޭ މީހުންގެ ފަރާތުން ދާރިސްއާއި ކުރިމަތިވާ ގޯނާތައް ވެސް ފެނިފައިވާތީވެއެވެ. ޝަހީދަކީ އޭނަ ކިތަންމެ އިތުބާރުކުރާ މީހަކަށް ވިޔަސް މުނީރާއަށް އޭނަގެ ދަރިފުޅާއިމެދު ކަންބޮޑުވުން ނޫންކަމެއް ނުކުރެވެއެވެ.
“ނޫން އުދަގުލެއް ނުކުރޭ….ހަމަ ވަރަށް ބަސްއަހާ، ރަނގަޅު ކުއްޖެއް އެއީ. މާޒިން ގޮތަށް….މާޒިން މަންމައަށް ދާރިސް އެނގެނީތަ؟”
ހިބާ އޭނަގެ ސުވާލުތަކަށް ދިން ޖަވާބުތަކާއިއެކީ މުނީރާގެ ތުންފަތްމައްޗަށް ހިނިތުންވުމެއް ވެރިވިއެއްކަމަކު، ހިބާ ކޮށްލި އިތުރު ސުވާލުން އެ ހިނިތުންވުން ފިލައިދިޔައެވެ. ހިބާ ނުހަނު ސީރިއަސްކަމާއިއެކީ އޭނައާއި ދިމާލަށް ބަލަހައްޓައިގެން އިންނަން ފެށުމުން މުނީރާ ނުތަނަވަސްވާ ގޮތްވިއެވެ. ހިބާގާތު ޙަޤީޤަތް ކިޔައިދޭންވީތޯ ހިތަށްއެރިއެވެ. އެހެނަސް ދާރިސްއަކީ އޭނަގެ ދަރިފުޅު ކަމަށް ބުނެފިނަމަ ހިބާ ދާރިސްގެ ޢާއިލާއާއިމެދު ސުވާލުކުރާނެތާއޭ ހިތް ބުންޏެވެ. އޭނަގެ އެ ލޯބިވާ ދަރިފުޅާއިމެދު ހާމަ ގޮތެއްގައި އޭނައަށް ވާހަކަ ނުދެއްކޭ އެއް ސަބަބަކީ އެއީކަން، އެތައް ދުވަހެއްފަހުން އަނެއްކާވެސް އެނގުންވި ހިނދު، މުނީރާގެ މޭގައި ރިހުމެއް ހިނގައިލިއެވެ.
“ޖަވާބުދޭން އުދަގޫ ސުވާލެއް ކުރެވުނިއްޔާ ވަރަށް ބޮޑަށް މަޢާފަށް އެދެން…” ހިބާ އެހެން ބުނެލީ، މުނީރާގެ ލޮލުން ކަރުނަ ހިލެމުން ދިޔަހެން ހީވުމުންނެވެ.
ހިބާ އެހެން ބުނުމާއިއެކު އަމިއްލަ ޚިޔާލުތަކުގެ ތެރެއިން ނިކުމެވުނު މުނީރާ ބޯހޫރުވައިލިއެވެ.
“ނޫނޭ…..ދާރިސްއަކީ މާޒިން މަންމަ ވަރަށް ގާތުން ދަންނަ ކުއްޖެއް. އެކުއްޖާ ބަލާނެ މީހަކު ނެތިގެން އެ ދުވަސްވަރު ހިބާގެ ބައްޕަ މިރަށަށް ދާރިސް ގެނައީ….ހިބާ ހަނދާން ހުރިއްޔާ…ދާރިސް މި ރަށުގަ އުޅުނުއިރު ހިނގި ބައެއް ކަންތައް ކިޔައިދެވިދާނެތަ؟” މުނީރާ ލުއި ހިނިތުންވުމަކާއިއެކީ ސުވާލުކުރިއެވެ. ހިތާއި ދެކޮޅަށް ވެސް އެންމެ ފަހުން ދާރިސްގެ ވާހަކަ ދެކެވުމުން، އެ ވާހަކަތައް ކުރިއަށް ގެންދިޔުމަށް މުނީރާގެ ހިތް އެދުނެވެ.
“ހަނދާން އެބަހުރި ވަރަށް ރަނގަޅަށް. ދާރިސްއަކީ މީހަކަށް އެހާ ފަސޭހައިން ހަނދާން ނައްތައިލެވޭ ޒާތެއްގެ ކުއްޖެއް ނޫނެއްނު؟” ހިބާ އިތުރު ސުވާލެއް ނުކޮށް ރާގަކަށް އެހެން ބުނެލުމުން މުނީރާ ލުއި ގޮތަކަށް ހީލިއެވެ.
ކުރިމަތިން ފެންނަމުން ދިޔަ އަންހެން މީހާއަކީ ދާރިސްގެ މަންމަކަން ޔަޤީނާއި ގާތްވެފައިވާ ޙާލު، ހިބާ ދާރިސްގެ ވާހަކަތައް މުނީރާއަށް ކިޔައިދޭން ފެށިއެވެ. އެ ވާހަކަތައް އަޑުއަހަމުން ދިޔައިރު މުނީރާގެ މޫނުމައްޗަށް އަރާ ފައިބަމުން ދިޔަ ކުލަވަރުތައް، ހިބާއަށް ހީވި ހީވުން އިތުރަށް ޔަޤީންކޮށްދިނުން ނޫންކަމެއް ނުކުރިއެވެ. ހިތުގައި އޮތް ސުވާލު ދުލާއި ހަމައަށް ގެންނަން ބޭނުންވިއެއްކަމަކު ހިބާ އެހެން ނެހެދީ، މުނީރާއަށް ވަގުތު ދިނުމަށެވެ. ދާރިސްއަށް ވެސް ވަގުތުދޭން ނިންމި ފަދައިންނެވެ.
މުނީރާއާއި ބައްދަލު ކުރުމަށްފަހު ހިބާ ގެއަށް ދިޔައިރު ދާރިސް ހުރީ ޢާއްމު ގޮތެއްގައި ގެއިން ބޭރަށް ދާއިރު ލައި އުޅޭ ކަހަލަ ގަމީހަކާއި ޖިންސެއްގައެވެ.
“ހާދަ ރީތިވެލައިގެން؟ ތަނަކަށް ދާންތަ؟” ހިބާ ގެއަށް ވަންނަމުން ސުވާލުކުރިއެވެ. އެހިނދު ދާރިސް ހިނިތުންވުމަކާއިއެކީ ތެދުވެގެން ގޮސް ހިބާގެ ކުރިމަތީގައި ހުއްޓިލިއެވެ.
“ހިބާ ތިކަން ނިންމާނީ….އަހަރެން މިހިރީ މިއަދު ވަރަށް ޑޭޓަކަށް ދާން ބޭނުންވެފަ…އަދި މަޣްރިބް ނަމާދު ޖެހެން ވަގުތު އެބައޮތް. ކުޑަ ވޯކެއް ޖައްސާލަން ހިނގާދޯ؟ ހިބާ މާ ބޮޑަށް ބަލިވެފަ ނޫނިއްޔާ އިނގޭ…” ދާރިސް ހިބާގެ ކޮނޑުގައި ހިފަހައްޓައިލަމުން ހިނިތުންވުމުގައި ހުރެ ބުންޏެވެ.
“ނޫން ބައްޔެއްނޫން….ތިއީ ހަމަ ރަނގަޅު ޚިޔާލެއް. ލެޓްސް ގޯ!” ހިބާ ވެސް ހިނިތުންވުމަކާއިއެކީ ބުންޏެވެ.
“ހުމް…..ގައިމު އަހަރެން ހިބާ ސްވިސްގަ އުޅުނުއިރު ގެންދިޔައިން ސްވިސްގެ ޓުއާރއަކަށް….ހިބާ އަހަރެން ނުގެންދަމެއްނު މި ރަށުގެ ޓުއާރއަކަށް؟ ސޯ އިޓްސް އޮންލީ ފެއާރ…” ދާރިސް ޝަކުވާކުރާ ކަމަށް ހެދެމުން ބުންޏެވެ.
“ހެހެ….މި ރަށުގަ ޓުއާރއަކަށް ގޮއްސަ ބަލާނެ މާ ގިނަ ތަންތަނެއް ނެތް….އެކަމަކު އަހަރެންގެ އޯސަމް ހަޒްބެންޑްއާއި އެކީގަ ދިޔައިމަ ކޮންމެ ތަނެއްވެސް އެންމެ ބެސްޓްވާނެތާ! ހިނގާ! އެބަ އަންނަން ކުޑަކޮށް ފްރެޝްވެލައިގެން…” ހިބާ ބުންޏެވެ. ދާރިސް ހިބާގެ އެ ވާހަކައަށް ބޯޖަހައިލި ހިނދު، ހިބާއަށް ނޭނގުނު ކަމަކީ ދާރިސްގެ އެ ހިނިތުންވުމުގެ ފަހަތުގައިވި ރިހުމެވެ.
ހިބާ އެދުވަހު ދިޔައީ ‘މުނީރާ’ ނަމަކަށް ކިޔާ އަންހެނަކާއި ބައްދަލުކުރަން ކަމަށް ބުނީއްސުރެ ދާރިސްގެ ހިތުގެ ހަމަޖެހުން ގެއްލިފައިވިއެވެ. ސިކުނޑި ފުރިފައިވީ މާޒީގެ ހިތި ހަނދާންތަކުންނެވެ. އެ ހަނދާންތައް އާވެ ލޮލުން ކަރުނަ އޮހޮރުނު ވަގުތުކޮޅުތައް ވެސް ދިޔައެވެ.
އެހެނަސް ދާރިސް އެ ކަރުނަތައް ހިބާއަށް ދައްކާކަށް ބޭނުމެއް ނުވިއެވެ. ދެމީހުންގެ ގުޅުމުގެ އެހާ ރީތި ދުވަސްތަކުގައި އޭނައާއި ހެދި ހިބާ ނުތަނަވަސް ކުރުވާކަށް ދާރިސް ބޭނުމެއް ނުވީއެވެ. އަދި އަމުދުން އޭނަގެ ހިތަށް އުދަގޫކުރަމުން ދާ އިޙްސާސްތަކަކީ ކިޔައިދޭން ވެސް ފަސޭހަ އިޙްސާސްތަކަކަށް ނުވީތީވެއެވެ.
ނަތީޖާއެއްގެ ގޮތުން ދާރިސްގެ އެ އިޙްސާސްތަކާއިމެދު ހިބާއަށް ރޭކާވެސް ނުލައެވެ. އެދުވަހުގެ މެންދުރު އޭނަ މާޒިންގެ މަންމައާއި ބައްދަލުކުރަން އުޅޭ ވާހަކަ ބުނި ހިނދު ދާރިސްގެ މޫނުމަތިން ފެނުނު އަސަރު ހަނދާންވެފައި، އެ ބައްދަލުވުމުގެ ވާހަކަ ދާރިސްއަށް ކިޔައިދޭންވީތޯ ހިތަށްއެރިއެވެ. ހިބާ ހީކޮށްގެން ހުރީ ވެސް އޭނަ ގެއަށް އައުމާއިއެކު ދާރިސް އެފަދަ ސުވާލުތައް ކުރާނެ ކަމަށެވެ. އެހެނަސް ދާރިސް އެ ވާހަކަ ނުދެއްކުމުން ހިބާވެސް އެ ވާހަކަ ނުދައްކަން ނިންމިއެވެ. އެހެނަސް ދާރިސްއާއި މުނީރާ ކޮންމެވެސް އެއްގޮތަކަށް ބައްދަލު ކުރުވުމުގެ އެދުމެއް ހިބާގެ ހިތުގައިވިއެވެ.
ދާރިސްއާއި ހިބާ އެ ޚިޔާލުތައް އަމިއްލަ ހިތްތަކުގެ ތެރޭގައި ފޮރުވައިގެން ހަވީރު ހިނގައިލުމަށް ގެއިން ނިކުތީ ހިނިތުންވުންތަކާއި އެކީގައެވެ. އެ މަންޒަރު ހަމަ އެވަގުތު ކޮޓަރިން ނިކުތް ހަމްނާއަށް ފެނުނެވެ. ދޮންތައާއި ދޮންތަބެ ނުހަނު އުފަލާއިއެކީ އަތު ގުޅާލައިގެން ނިކުތްތަން ފެނި، އުފާވުމުގެ ބަދަލުގައި ހިތުގައި ނަފްރަތުގެ އިޙްސާސްތައް ވި ގޮތުން ޚުދު ހަމްނާ ވެސް އަމިއްލަ ނަފްސަށް ނުރުހުންވާ ގޮތްވިއެވެ. އެހެނަސް އެތައް ދުވަހެއް ވީއިރު ވެސް އޭނަ އެ އިޙްސާސްތައް ބަދަލުކުރުމުގައި ނާކާމިޔާބުވެފައިވެއެވެ.
ދޮންތަމެން ގެއިން ނިކުތްތަން ބަލަން ހުރެފައި ހަމްނާ ކޮޓަރިއަށް ވަދެ ދޮރު ލައްޕައިލުމަށްފަހު ފުން ނޭވައެއް ދޫކޮށްލިއެވެ. އެ ހިނދު އޭނައަށް އިޙްސާސް ކުރެވެމުން ދިޔައީ އާދަޔާ ޚިލާފު އެކަނިވެރިކަމެކެވެ. ފަހަކަށް އައިސް އެ އެކަނިވެރިކަން އެއްފަހަރު ވެސް އޭނަ ދޫކޮށްނުލާ ފަދައެވެ. ސްކޫލްގައި އެކުވެރިންނާއި އެކީ އުޅޭއިރު ވެސް އަދި ގޭގައި ދޮންތަމެންނާއި އެކީ އުޅޭއިރު ވެސް އެ އިޙްސާސް އެ ގޮތުގައި ހުރެއެވެ. އޭގެ ފަހަތުގައިވާ ސަބަބުތަކާއިމެދު ވިސްނުމުން ހަމްނާއަށް ރުޅި އާދެވޭ ގޮތްވަނީ ދޮންތައަށެވެ.
ދޮންތަ މި ހުރިހާ ދުވަހު އޭނައާއި އެކީ އުޅެއުޅެފައި މީހަކާއި އިނުމަށްފަހު އޭނައަށް ވަގުތު ނުދޭކަމަށް ބުނެ އޭނަގެ ޝަކުވާ ކުރެއެވެ. އަދި އަމުދުން އެ ވެސް އޭނަގެ އެކަނިވެރިކަން ފިލުވުމަށް ރައްޓެހިވާން އުޅުނު ކުއްޖާއަށް ނުރުހުންތެރިކަން ފާޅުކުރުމަށްފަހުއެވެ. ނައުފަލަށް ފާޑުކިޔަން ދޮންތައަކީ ކާކުތޯ ހަމްނާގެ ހިތް ބުނަމުން ދެއެވެ. ފާޑު ކިޔަންޏާ ކިޔަންޖެހެނީ ދޮންތަ އެ އިނދެގެން އުޅޭ ފިރިހެން މީހާއަށް ކަމަށް ބުނެ ހަމްނާގެ ހިތް ހަޅޭއްލަވައެވެ. އޭނަގެ ޚިޔާލުތައް މިފަދަ ގޮތަކަށް ބައްޓަން ވެފައިވަނީ އެއްދުވަހު އޭނައާއި ނައުފަލާއި ދެމެދު ދެކެވުނު ވާހަކައަކުންނެވެ.
“ކޮބާ ހަމް އެއްކަލަ ދުވަހު ބުނީމެއްނު ދާރިސްއާއި ގުޅޭ ގޮތުން ކޮންމެވެސް ކަމެއް އެނގެއޭ؟” ނައުފަލް އެއްދުވަހަކު އޭނައަށް ގުޅާފައި އޭނަގެ ޙާލުވެސް ބެލުމެއްނެތި އެހިއެވެ. ނައުފަލް އެ ސުވާލުކޮށްލީ، ހަމްނާ ދެ ޚިޔާލެއްގެ މަތީގައި އިނދެ އެދުވަހު ނައުފަލް އޭނަގެ މެސެޖުތަކަށް ރިޕްލައި ނުކޮށްގެން ކޮށްލި މެސެޖާއި މެދުގައެވެ.
“އަ…އާނ…އެނގޭ.” ހަމްނާ ފޯނު ކަންފަތުގައި ޖައްސައިގެން ކިޔަވާ މޭޒުދޮށުގައި އިނދެ އެހެން ބުނެލީ ނުތަނަވަސްކަން ވެރިވެގެން ދިޔަ ހިތަކާއި އެކީގައެވެ.
“އެ މީހަކު ހުރި ތަނެއް އެނގޭތަ؟” ނައުފަލް އެހިއެވެ.
“އެނގ….ނައުފް ކީއްކުރަންތަ ދާރިސް ހޯދަން ބޭނުންވަނީ؟” ޖަވާބު ދިނުމުގެ ކުރިން ހަމްނާއަށް އަހައިލެވުނެވެ.
“ކޮންމެހެން ހަމްނާއަށް އެކަން އެނގޭކަށް ނުޖެހޭދޯ؟” ނައުފަލް ހިސާބެއްގެ ނުރުހުންތެރިކަމާއިއެކީ އެ ސުވާލުކޮށްލި އަޑަށް ހަމްނާގެ ދެބުމަ ކައިރިވިއެވެ. އެހިނދު ނައުފަލްއަށް ނުރުހުންވާ ގޮތްވިއެވެ. އެހެނަސް އެއްޗެކޭ ބުނަން ބޭނުމެއް ނުވީ ނައުފަލް އިތުރަށް ނުރުހުންވާން ނޭދުނީތީވެއެވެ.
“ޔާ އައިމް ޖަސްޓް….ކިއުރިއަސް. އަނެއްހެން….މާ ބޮޑަކަށް ނުއެއް އެނގޭ…” ހަމްނާ ކިތަންމެ ވަރަކަށް ނައުފަލް އުފާކޮށްދޭން ބޭނުންވިއެއްކަމަކު ދޮންތަމެން ސިއްރުކުރަން ބުނި ކަމެއް ހާމަ ކުރާކަށް ވެސް ބޭނުމެއްނުވިއެވެ.
“ދެންމެ އެނގެއޭ ހަމް ބުނަން އުޅުނުހެން ހީވި….ލޯބި ދޮގު ހަދަނީތަ އަހަންނަށް؟”
“ން….ނޫނޭ. ހަމަ އަސްލުވެސް މާ ބޮޑަކަށް ނޭނގޭ…”
“ހަމް ހާދަ ފޮރުވަން އުޅޭހެން އެބަ ހީވޭ….ބަޔަކު ބުނީތަ އޭނަގެ ކަންތައް ފޮރުވައިގެން އުޅޭށޭ؟ ވާއި ޑޫ ޔޫ ތިންކް ދޭއި އާރ ސޭއިންގް ދެޓް؟ ބިކޯޒް ހީ އިޒް އަ ކްރިމިނަލް!”
ނައުފަލް ބުނެލި ފަހު ބަސްތަކާއިއެކީ ހަމްނާގެ ލޯ ބޮޑުވެ، ހިތުގެ ތެޅުން އަވަސްވިއެވެ. ނައުފަލް އެ ބުނި ބަސްތަކާއިމެދު ސުވާލު އުފައްދަން ހިތަށް ވެސް ނައީ، ނައުފަލްއަށްޓަކައި އެ ހިތުގައިވި އިޙްސާސްތަކުގެ ވަރުގަދަކަމުންނެވެ.
“އޭނަ މަރުވި ޚަބަރުތައް ވެސް ފަތުރާފަ ހުރީ އޭނަ އަމިއްލައަށް. ހީ އިޒް އަ ޑޭންޖަރަސް މޭން އައިމް ޓެލިންގް ޔޫ….ހަމް އާއި މެދު ކަންބޮޑުވާތީ މި ބުނަނީ. އޭނައާއި މެދު އިތުރަށް ހޯދާފަ އަހަންނަށް ކިޔައިދިނީމަ އަހަންނަށް ވެސް އެނގޭނީ ދެން ހަދަންވީ ގޮތެއް….ހަމް އަދިވެސް ހޯދާލަބަލަ އޭނަ ކަމަށް ތި ޝައްކު ކުރެވޭ މީހަކާއިމެދު. އަހާބަލަ އޭނަގެ މަންމަ އުޅުނުހޭ ހަމްނާގެ ބައްޕަގެ ވިޔަފާރީގެ ތެރޭގަ….” ނައުފަލް ދެއްކި ވާހަކަތަކުން ހަމްނާއަށް ޤަބޫލުކުރަން ވެސް ދަތިވެފައި އިނދެވުނެވެ. ވާހަކައިގެ ފަހުކޮޅުން ނައުފަލް ކަމަކަށް އެދުމާއިއެކު އެއަށް އާނބަސް ދެވުނީ، ފުރަތަމަ ފަހަރަށް ފިރިހެން ކުއްޖެއްގެ ފަރާތުން ‘ރައްކާތެރިކަމެއް’ އިޙްސާސް ކުރެވުމުންނެވެ.
އެދުވަހުން ފެށިގެން ނައުފަލް އެދެމުން ދިޔަހާ މަޢުލޫމާތެއް ހަމްނާ ނައުފަލްއަށް ދެމުން ދިޔައެވެ. އެހެނަސް ދާރިސްބެ ހުރިތަން އަންގަން އެއްގޮތަކަށް ވެސް ނުކެރުނެވެ. ވެފައިވާ ވަޢުދަކާއި ޚިލާފުވުމަކީ ހަމްނާއަށް ނުހަނު ދަތިކަމަކަށްވާތީވެއެވެ. އެކަމާއިމެދު ވެސް ހަމްނާ އަމިއްލަ ނަފްސަށް ނުރުހުންވާން ފަށާފައިވެއެވެ. އޭނަގެ ދިރިއުޅުން އުޅެން ޖެހޭނީ ނައުފަލް ރުހޭ ގޮތަކަށް ކަމަށް އޭނަގެ ހިތަށް ވިސްނިފައިވުމުންނެވެ. އޭނަގެ ހުރިހާ އުފަލެއް ގުޅިފައިވަނީ ނައުފަލްއާއި ކަމަށް ޤަބޫލުކުރެވިފައިވުމުންނެވެ.
ހިތުގައި ނޭދެވޭ އިޙްސާސެއް އުފެދޭއިރަށް ހަމްނާ ނައުފަލް މަތިން ހަނދާންވަނީ އެހެންވެއެވެ. ނައުފަލްއަށް އޭނަ އެ ނޭދެވޭ އިޙްސާސްތަކުން ރައްކާތެރިކޮށްދެވިދާނެހެން ހީވާތީވެއެވެ. އެ ވަގުތުވެސް ނައުފަލްއަށް ގުޅައިލަން ހިތަށް އެރުމާއިއެކު ޖިންސްގެ ޖީބުގައި އޮތް ފޯނު ނެގުނެވެ. އަދި އަވަސްއަވަހަށް ނައުފަލްގެ ނަންބަރު ޑައިލްކޮށްލަމުން އެ ނަންބަރަށް ގުޅައިލެވުނެވެ. އެ ކޮޅުން ރިންގުގެ އަޑު ދެ ތިން ފަހަރު އިވުމަށްފަހު އެ ނަންބަރު ބިޒީކަމަށް އިވެން ފެށިއެވެ.
މިއީ އެއްގޮތަކަށް ވެސް އާ ކަމެއް ނޫނެވެ. ނައުފަލްއާއި ރައްޓެހިވި ފަހުން އެތައް ފަހަރެއްގެ މަތިން ނައުފަލް އޭނަގެ ކޯލުތައް މިފަދައިން ބިޒީކޮށްފައިވެއެވެ. އެހެނަސް އެގޮތަށް ކަންތައްވާ ކޮންމެ ފަހަރަކުހެން އެ ފަހަރު ވެސް ހަމްނާގެ ހިތް ހަލާކުވެގެން ދިޔައެވެ. ތިމާގެ ހުރިހާ ލޯތްބަކާއި އުފަލެއް ގުޅިފައިވާ ފަރާތް ތިމާއަށް ފަސް ދިނުމުން އިޙްސާސް ކުރެވޭނީ އެފަދައިން ނޫން ހެއްޔެވެ؟
ނައުފަލް އޭނައަށް ފަސްދިނުމާއިއެކު ސިކުނޑިއަށް ވެރިވެގެންދާ ނާއުއްމީދާއި އެކީ ހަމްނާ އޭނަގެ ޙަޔާތުގައި ހިނގަމުންދާ ހުރިހާ ނޭދެވޭ ކަންތައްތަކެއްގެ މަތިން ހަނދާންވިއެވެ. ދޮންތަ ‘ނުލަފާ’ މީހަކާއި އިނދެގެން އުޅުމެވެ. އެމީހަކު އޭނައާއި އެއްގެއެއްގައި އުޅޭ އުޅުމެވެ. ނައުފަލް ކުޅެއުޅޭ ލަދުކުޑަ ޓިކްޓޮކްތަކާއިމެދު އޭނަ ހިތްހަމަނުޖެހުމެވެ. މި ހުރިހާ ކަންތައްތަކާއިމެދު ފިކުރު ކުރުމުގެ ސަބަބުން އޭނަގެ ކިޔެވުން ވެސް ދަށްވެ އޭނަގެ މުދައްރިސުން އެކަމަށް އަލި އަޅުވާ ގޮތެވެ. ދޮންތައަށް އެކަން ވެސް ފޮރުވައިގެން އުޅެންޖެހޭ ޖެހުމެވެ.
މި ހުރިހާ ކަމެއް އެކުއެކީގައި ސިކުނޑީގައި އެނބުރެން ފެށުމުން ބޮލުގައި އުފެދުނު ރިހުމާއި، މެއާއި ދިމާލުން އިޙްސާސް ކުރެވުނު ވަރުބަލިކަމުން ހަމްނާއަށް ހުރި ތަނަށް ތިރިވެ، ބިންމަތީގައި އިށީނދެވުނެވެ. އެހިނދު ކީއްވެ ކަމެއް ނޭނގެއެވެ. ހަމްނާގެ ހަނދާނަށް އައީ އެއްދުވަހު ނަބީހް އޭނަގެ އެކުވެރިއެއް ކައިރީގައި ދައްކާތީ އިވުނު ވާހަކައެކެވެ.
“ޑިޕްރެޝަނޭތަ ޑޫޑް؟ އައި ފީލް ބޭޑް ފޯ ހިމް! ދެން ކިހިނެއް ހަދާށޭ ޑޮކްޓަރު ބުނީ؟” ނަބީހް އެހެން ބުނެލީ އެއްދުވަހެއްގެ އިންޓަވަލް ގަޑީގައި އެކުވެރިއަކާއި އެކީ ބެންޗެއްގައި އިނދެއެވެ. ހަމްނާއަށް އެ އަޑު އިވިފައި ފިޔަވަޅުތައް މަޑުޖައްސައިލަމުން އެ ބެންޗުގެ ފަހަތުގައި އެމީހުންނަށް ބަލަން ހުރެވުނެވެ.
“ޑޮކްޓަރު ދިނީ ބޭސް. ދެން ބުނީ ރެގިއުލާރކޮށް ކައުންސެލިންގް ސެޝަންތަކަށް ދާށޭ….އައިމް ސޯ ވޮރީޑް މޭން! މި ވާހަކަ އެހެން އެއްވެސް މީހެއްކައިރި ނުބުނަން އެކަމަކު….ބްރޯ އެ އަންހެން ކުއްޖަކު ނުލިބިގެން އަމިއްލައަށް މަރުވާންވެސް މަސައްކަތް ކުރި…” ނަބީހްގެ އެކުވެރިޔާ މާޔޫސީ ގޮތަކަށް ބުންޏެވެ.
“ހުރިހާ ކަމެއްވެސް ރަނގަޅުވާނެ އިން ޝާ ﷲ! ޤަވާއިދުން ބޭސްކައިގެން އެ ސެޝަންތަކަށް ދާން ބޭބެއަށް ހިތްވަރުދީ! އަދި ބުނަން، މިހެން ދޭތެރެއަކުން ރޭންޑަމްކޮށް ޚަތިމް ހުޅުވާފަ ބޭބެއަށް އާޔަތެއް ކިޔައިދީ އެ އާޔަތުގެ މާނަވެސް ކިޔައިދީ….އޭރުން ﷲ ސުބުޙާނަހޫ ވަތަޢާލާގެ ބަސްފުޅު އިވިފަ ވެސް ހިތަށް ހަމަޖެހުމެއް ލިބޭނެ އިން ޝާ ﷲ!”
ނަބީހް އެދުވަހު އެ ބުނެލި ބަސްތަކާއިއެކީ ހަމްނާއަށް އަސަރެއް ނެތް ގޮތަކަށް ހީލަމުން ކަޅި މައްޗަށް ހިންގައިލެވުނެވެ. ނަބީހް ކަހަލަ މާ ދީންވެރިވެގެން އުޅޭ މީހުންނަށް ނަފްސާނީ ބަލިތަކުގެ ޙަޤީޤަތް ނޭނގެނީތާއޭ ހިތާހިތުން ކިޔައިލެވުނެވެ. ދީންވެރި މީހުންނަށް ކިރިޔާ ކިޔެވޭނީ ޤުރުއާނާއި ސުންނަތްހެން ހަމްނާއަށް ހީވެފައިވާތީވެއެވެ. ދުނިޔޭގެ އެހެން އެއްވެސް ޢިލްމެއްގެ ޙަޤީޤަތް އޭގެއިން މީހަކަށް ނޭނގޭނެކަމަށް ޔަޤީން ކުރެވިފައިވާތީވެއެވެ.
އެވަގުތުވެސް ނަބީހްގެ އެ ހަނދާން އާވެގެން ދިޔުމުން ހަމްނާގެ ސިކުނޑިއަށް ވެރިވީ އެފަދަ ޚިޔާލުތަކެވެ. އެހެނަސް އެވަގުތު ހިތަށްވެރިވެފައިވި މާޔޫސްކަމެއް ބޮޑުކަމުން ކަންނޭނގެއެވެ. ސަމާސާއެއްގެ ގޮތުގައި ވިޔަސް ނަބީހް އެ ބުނި ބަސްތަކާއި އެއްގޮތަށް ޢަމަލުކުރަން ބޭނުންވިއެވެ. އެކަމަށްޓަކައި ކޮޅަށް ތެދުވެ އެނދުގެ ކައިރީގައި ހުރި އަރިމަތީ މޭޒާއި ދިމާލަށް ދާން ފެށި ހިނދު، އެ ބަސްތަކުގައި ކޮންމެވެސް ވަރެއްގެ ޙަޤީޤަތެއް ވެދާނެކަމަށް ހިތް ބުންޏެވެ. އެހެނީ ނަބީހަކީ ވެސް އޭނަ ލޯބިވާ ކުއްޖާ ނުލިބިގެން ފުދޭވަރަކަށް ދުވަސްވަންދެން އުޅެފައި ހުރި ކުއްޖެކެވެ. އެހެނަސް ނަބީހް އުފަލުން ނޫން ގޮތަކަށް އުޅޭތަން ހަމްނާއަށް އެއްފަހަރު ވެސް ފެނިފައެއް ނުވެއެވެ. ނަބީހްގެ މޫނުމަތިން އަބަދުހެން ހިނިތުންވުމެއް ފެންނަން ހުރެއެވެ. ނަބީހްގެ އެކުވެރިން އެހާ ގިނައީ އެމީހުން ހިތްވަރު ލިބިގަންނަން ދަނީ ނަބީހްގެ ކައިރިން ކަމަށްވުމުންނެވެ. މި ހުރިހާ ކަމެއްގެ ފަހަތުގައިވަނީ ނަބީހް އެ ބުނާ ޤުރުއާނުގެ އާޔަތްތައްތޯ ހިތަށްއެރިއެވެ.
އެ ޚިޔާލާއިއެކީ ހަމްނާގެ ހިތަށް އާދަޔާ ޚިލާފު އިޙްސާސްތަކެއް ކުރެވުނެވެ. ނަތީޖާއެއްގެ ގޮތުން އެނދުގައި އިށީނދެ، އެތައް ދުވަހެއް ފަހުން އަރިމަތީ މޭޒުމަތީގައި ބޭއްވިފައި އޮތް ޤުރުއާނުގެ ތަފްސީރު ފޮތް ނެގުނީ ޖެހިލުންވުމަކާއިއެކީގައެވެ.
ފޮތް ނަގައި އޭނަ އެންމެ ފަހުން ހުއްޓި ހިސާބުން ކިޔަން ޚިޔާލުކޮށްފައިވެސް، ނަބީހްގެ ބަސްތައް ހަނދާންކުރަމުން ހަމްނާ ވަކި މާ ބޮޑު ޚިޔާލެއް ނެތި މެދުން ޒާތަކަށް އިނގިލި އަޅައި އެ ފޮތް ހުޅުވައިލިއެވެ. އެއަށްފަހު އެ ޞަފްޙާއިން ފެނުނު ފުރަތަމަ އާޔަތަށް ބަލައިލިއެވެ. އެ ޞަފްޙާގައި އާޔަތްތައް ހުރީ އަންބިޔާ ސޫރަތުގެ 87 ވަނަ އާޔަތުން ފެށިގެންނެވެ.
އެ އާޔަތުގެ މާނަ ކިޔަން ފެށުމާއިއެކު ހަމްނާގެ ނޭވާ ހުއްޓުނެވެ. އެ އާޔަތް ނިމި ކުރިއަށް ހުރި އާޔަތްތަކުގެ މާނަ ކިޔުނު ކިޔުނުހެން އެ ލޮލަށް ކަރުނަތައް ޖަމާވެގެން ދިޔައީ، އޭނަގެ އިޙްސާސްތައް އޭނައަށްވުރެ ވެސް މޮޅަށް ދެނެވޮޑިގެންވާ ފަރާތެއް ވާކަން އިޙްސާސް ކުރެވުމުންނެވެ.
“މައި ލޯޑް، ޑު ނޮޓް ލީވް މީ އެލޯން….މައި ލޯޑް، ޑު ނޮޓް ލީވް މީ އެލޯން.” ހަމްނާއަށް ހިތާހިތުން އެ ބަސްތައް ތަކުރާރުކޮށް ކިޔެން ފެށިހެން އެ ލޮލުން ކަރުނަތައް ފައިބަން ފެށިއެވެ. ދާދި ދެންމެއަކު އޭނަގެ ހިތް ވަށާލެވިފައިވި އެކަނިވެރިކަން ކުއްލިއަކަށް ނެތިދިޔަ ކަހަލަ އިޙްސާސެއް ކުރެވުނު ގޮތުން ޚުދު އޭނަ ވެސް ޙައިރާންވާހާވިއެވެ.
ނުނިމޭ
December 19, 2021 @ 3:44 pm
Salaam readers! Brace yourselves because there are going to be very heavy yet beautiful messages ahead In Sha Allah. I pray that Allah allows me to present it in an effective way. Ameen!
Next part on Thursday night In Sha Allah. Much love! <3 <3 <3
December 20, 2021 @ 8:33 am
Assalaamu alaikum 😊 janaa dhahtha haalu kihineii?? Ehen hurihaa part thakekey eh gothah mi part ves varah varah reethi.. Masha Allah 😍 😍 Alhey hamana kairee bune Bala janaa dhahthaa goas fiya valheii naalhahchey..hamna naufal kairee dhaaris huri than bunefiyyaa???? dhen vaane goii hithah ves aruvaalan dhathi..dhaaris huri than ingihjiyyaa anekkaa ves Aasif bappa men try kuraane dho dhaaris maraalan.. Alhey..😭😭😭😭 I am waiting..dhen kuri ahh oii Bai kiyaalan..The story is getting more and more interesting….
Janaa dhahthaa..I have a question to ask….meehun bunaa gothun adhi kiyey foii thakuga hunna gothun insaanaa kuraa amaluthah binaa vegen vanee niyathuge mahchah..kithanme rangalhu kameii ves goas niyatheii ga kohfiyyaa evanee goas kamakah..alhugandu ge suvaalakee dhogu hedhumakee dhulu ge aafaathakah vaa iru heyo Niyathegga meeheku dhogeii hadhai fiyyaa e vaanee ves Hama goas kamakah hey..ekamun azaabu libeyne baaey??🤔🤔
Janaa dhahtha ge Thi masaii kathakee dhuniye aa aakhirathugai ves Jana dhahtha ahh faidhaa kuranivi masaii katheii kamugai lavvaashi..Aameen😊
December 22, 2021 @ 3:35 pm
Wa’alaikumussalaam wa rahmatullaahi Dhonthi! 😀 Jana ge haalu rangalhu Alhamdhulillah! Dhonthi kihineh?
Alhamdhulillah! 🙂 Dhonthi ge thaureefuge basthakun hiyvareh libijje. hehe….balamaa dho? Hamna mihaaru ves e vaahaka nubune hureema engeny Hamna ge hithugai vaa heyokan dho? e heyo kamuge sababun kanneynge hidhaayathaai gaaiyvegen e dhany. Quran aky taqwaa verinnah hidhaayathakah veema. ^_^
Labba Dhonthi. Rasool (SAW) ge hadhith egga vaa gothun amaluthah binaavegen vany niyathuge mahchah. (thireegaivaa reference ballavaa). Dhonthi koffa thi oiy suvaalah rangalhah javaabu dheveynee thi haalaiy rangalhah engigen. Generally bunanya dhogu hedhumaky rangalhu kameh noon dho? Jana ah adhi ehaa bodah research hedhifa neh subject eh veema seedha bunaakah neyngey ingey. Ilmuverieh kairin ahaalun rangalhu.
^_^
Dhonthi jana ahttakai dua kohdhin kamattakai Dhonthi ah heyo rahmaiy lavvaashi. Maaiy Allah alhamen kuraa komme heyo amaleggai barakaaiy lavvai e amaluthah qaboolu kuravvaashi. Ameen! <3
https://40hadithnawawi.com/hadith/1-actions-are-by-intentions/
December 21, 2021 @ 2:20 pm
Masha Allah. This story is getting interesting day by day. Waiting for the next part. Hope youre doing well sis. Love you dear. Take Care ❤
December 22, 2021 @ 3:35 pm
And just as I thought I wasn’t maintaining interest. hehe….Alhamdhulillah! Hope you are doing well too <3 Love you too sis. Take care! <3
December 22, 2021 @ 9:27 am
Oh my!! Pls let hamna know the rights nd wrongs! Naufal & dhaaris aa dhemedhu onna gulhun neyngeythy vrh curious..
Took some time to comment 😅 my bad 🙁
Will be waitin patiently for next.. ✨
Tgc siss! <33
December 22, 2021 @ 3:38 pm
It seems like she’s on her way to guidance dho? Because she chose to keep the secret despite wanting to reveal it. Subhaanallah even a tiny bit of goodness will allow us to increase in guidance by the Will of Allah.
Naufal aa Dhaaris ge oiy gulhumeh balamaa. Naufal dheythere dheytherein Dhaaris ge vaahaka ahaany kamakuthaa dho? hehe…its completely fine even your comments are delayed. I always feel loved and supported from by readers.
Next part FRIDAY NIGHT ga ingey In Sha Allah. Thursday ga genesdheveynehen heenuvaathy.
December 23, 2021 @ 5:36 am
sissssssss
I missed youu <3
mish ge comment eh nukureveythaa varah dhuvas vejje dhw
sorryy sis
mish ge test veema
in sha allah meege fahun comment kureveytho balaanan
December 24, 2021 @ 3:12 pm
I missed you too mish! :’) engey kudhin kudhinge exam dhuvasvaru veema kan comment nukurevuny. mihaaru thi kudhin ves adhi Jana sis ves free koh miulheny. Time to celebrate! 🥳