ނަފްސީ (ނަވަތިރީސްވަނަ ބައި)

ނަފްސީ (ނަވަތިރީސްވަނަ ބައި)

“އަހަރެން ޒިވްއާއެކީ ދާކަށް ބޭނުމެއް ނޫން. އަހަރެން ލޯބިވާ އަންހެން ކުއްޖަކު ހުރޭ.” މޫނު ކަޝްފުވި އެ ވަގުތުކޮޅު ހިތުގެ ތެޅުން އަވަސް ވީ ހިނދު ދާނިޝްއަށް އެ ބަސްތައް ބުނެވުނީ ހަމަ އެއްވެސް އިޚްތިޔާރަކާ ނުލައެވެ.

ދާނިޝް އެ ބަސްތައް ބުނިތާ މާ ގިނައިރެއް ނުވެ ފިހާރައިގެ އެވަގުތު ތިބި އެންމެންގެ ވެސް ނަޒަރު އެ ދިމާލަށް އަމާޒުވިއެވެ. ދާނިޝްގެ ސޫރަ ފެނުނު ޒުވާން ބައެއް އަންހެން ކުދިންގެ ތެރެއިން ބައެއް ކުދިން އަނގަމަތީގައި އަތްއެޅިއިރު އަނެއްބައި ކުދިން ދާނިޝްގެ ފޮޓޯ ނަގަން ފެށިއެވެ. މުޅި ފިހާރަ ތެރެއިން ވެސް އެންމެން އެކަކު އަނެކަކާ ދައްކަން ފެށި ވާހަކަތައް އެއްވެގެން އިވެން ފެށިއެވެ.

ހުއްޓުން އަރާފައި ހުރި ޒިވްއަށް ބަލަން ހުރެފައި ދާނިޝް ވަށައި ނަޒަރެއް ދިނެވެ. އެހިނދު އޭނައަށް އަމާޒުވެފައި ހުރި ފޯނުތަކުގެ ކެމެރާތައް ފެނިފައި ފޫހިވިއެވެ. މި ހުރިހާ ދުވަހު މޫނު ނިވާކޮށްގެން ހުރެ އެހާ ގިނަ އަންހެން ކުދިން އޭނައަށް ބަލަން ތިބުމުން ހިސާބަކަށް ލަދުވެސް ގަތެވެ. އެހެނަސް އެ ހުރިހާ ކަމެއްގެ މައްޗަށް އިސްކުރެވުނީ ނުރުހުންތެރިކަމެވެ. އެމީހުންނާއި އެއްވަރަށް އަމިއްލަ ނަފްސަށް ވެސް ނުރުހުންވިއެވެ. މިއީ އޭނަ އަމިއްލައަށް އޭނަގެ އަމިއްލަ ނަފްސު ގެނައި މަޤާމެއް ކަމަށް ހިތާހިތުން ބުނެވުނެވެ.

ވަށައި ނަޒަރެއް ދިނުމަށްފަހު ދާނިޝް އެތާ މަޑު ކުރުމެއްނެތި ފިހާރައިން ނިކުންނަން ދިޔައެވެ. މައިދޮރުން ނިކުތް ވަގުތު އޭނައަށް އަމާޒުވެފައިވި ގިނަ ފޯނު ކެމެރާތަކުގެ އަލި ވެސް އޭނަގެ ގަޔަށް އެރިއެވެ. އެތާހުރި އޭނަ ދަންނަ ނޫސްވެރިޔާ އޭނައަށް ގޮވަން ވެސް އުޅުނެވެ. އެހެނަސް ދާނިޝް މަޑު ކުރުމެއްނެތި ނިކުމެގެން ދިޔަ ގޮތަށް ގޮސް ސައިކަލަށް އެރިއެވެ.

ސައިކަލު ދުއްވާފައި ދިޔައިރު އޭނަގެ ފަޓުލޫނުގެ ޖީބުގައި އޮތް ފޯނު ވަރަށް ގިނައިން ރިންގުވިއެވެ. އެއް ރިންގު ކެނޑޭއިރަށް އަނެއް ރިންގު ފެށިގެން ދިޔައެވެ. އެހެނަސް ދާނިޝްއަށް އެއަކަށް ފަރުވާލެއް ނުދެވުނެވެ. އެވަގުތު ވެސް ހިތް ބާރަށް ތެޅެމުން ދިޔައެވެ. ލޮލަށް ސިފަވަމުން ދިޔައީ އޭނައަށް ފިހާރައިގައި ކުރެވުނު ކަންތަކެވެ. އަދި ބުނެވުނު ބަސްތަކެވެ. އެ ބަސްތަކުގެ ތެރެއިން ކަންފަތުގައި ގުގުމަމުން ދިޔައީ އެންމެ ފަހުން ބުނެވުނު ބަސްތަކެވެ.

“ލޯބިވާ ކުއްޖެއް…ލޯބިވާ ކުއްޖެއް…ލޯބި…ވާ ކުއްޖެއް.”

ދާނިޝްގެ ހިތު ތެރޭގައި އެ ބަސްތައް ތަކުރާރުވަމުން ދިޔަދިޔަހެން ހިލްޔާގެ ނަން ވެސް ހިތަށް ވެރިވަމުން ދިޔައެވެ. ދާނިޝް ދަތުރު މަތިން އެކަމާއިމެދު ނުވިސްނޭތޯ ބެލިއެވެ. ވިސްނަން ފަށައިފިނަމަ ސައިކަލުން އޭނަގެ އަތް ދޫވެދާނެހެން ހީވީތީވެއެވެ.

އިރުކޮޅެއްގެ ތެރޭގައި ގޮސް ގެއާއި ހަމައަށް ދެވި އެޕާޓްމެންޓުގެ ދޮރުން ވަދެވުމުން ދާނިޝްއަށް ފުން ނޭވައެއް ދޫކޮށްލެވުނެވެ. އެއަށްފަހު ފުރަތަމަ ކަމަކަށް ޖީބުގައި އޮތް ފޯނު ނެގުނީ ގުޅި މީހުން ބަލާލުމަށެވެ. 10 މިސް ކޯލު އައިސްފައިވީއިރު، ނޭނގޭ ނަންބަރުތަކާއި، އޭނައާއި އެކީ މަސައްކަތް ކުރި ލަތީފް ނޫން އެހެން ޑައިރެކްޓަރަކާއި، ކުރިން އޭނައަށް ނުގުޅާ އެހެނިހެން އެކްޓަރުންނާއި، ނޫސްވެރިންނާއި، ނަހީދުބެއާއި ފަޔާޒް ގެ ކޯލުތައް ހުއްޓެވެ. މެސެޖުތައް ވެސް އައިސްފައި ހުއްޓެއް ކަމަކު ދާނިޝް ހުރީ އެ މެސެޖުތައް ބަލާ ވަރަށްވުރެ ވަރުބަލި ވެފައެވެ. އެހެނަސް ހަމަ އެވަގުތު ‘އިޚްވާން’ ގްރޫޕަށް އައި މެސެޖެއްގެ ނޮޓިފިކޭޝަން ފެނިފައި އެ މެސެޖަށް ފިތާލެވުނެވެ. އެއާއިއެކު އޭނަގެ އާ އެކުވެރިންގެ ވަޓްސް އެޕް ގްރޫޕް ހުޅުވިގެން ދިޔައެވެ.

އެންމެ ފަހުން ހަސަން ފޮނުވި މެސެޖު ދޭހަ ނުކުރެވުމުން މެސެޖުތައް ކުރީކޮޅުން ކިޔާލަން ދާނިޝްއަށް މައްޗަށް ސްކްރޯލް ކޮށްލެވުނެވެ. އޭނަ ފިހާރައިގައި މާސްކް ނަގާލާފައި ހުރި ވީޑިއޯގެ ފޭސްބުކް ލިންކެއް ފެނުމާއިއެކު ދާނިޝްއަށް މަޑުކޮށްލެވުނެވެ. ލިންކް ޙިއްސާ ކޮށްފައި ހުރީ ނަޖާހެވެ. އެއަށްފަހު އެކުވެރިންގެ ފޯރިގަދަ މެސެޖުތައް ފެށުނެވެ.

“ފައިނަލީ!!!”

“އަވާރ ހޭންޑްސަމް ބްރޯ!”

“އޯ ވެއިޓް…ލޯބިވާ ކުއްޖެއް ހުރެއޭ؟؟!!”

“ކޮން ކުއްޖެއް އެއީ؟ ނުވެސް ބުނޭ. ޕްރޮޕޯޒް ކޮށްފިންތަ @ދާނިޝް؟”

“ބުނި ގޮތުން ހީވަނީ ކޮށްފަހެން ހުރީ. އަހަރުމެންނަށް ކެއުމެއް ލިބެން އުޅެނީ.”

“ނިކަން އަވަހަށް ކަލާރ ކޯޑް ފޮނުވާ ދާނިޝް!”

އެންމެ ފަހުން ހަސަން ފޮނުވާފައި އޮތް އެ މެސެޖު ފެނިފައި ދާނިޝްއަށް ފުން ނޭވައެއް ދޫކޮށްލެވުނެވެ. އެކުވެރިންގެ އެ ސަމާސާތަކަށް އުފާކޮށް ހިނިތުންވާން ބޭނުންވިޔަސް އެކަމެއް ނުކުރެވުނެވެ. އެ ސަމާސާތަކުގައި ބައިވެރިވާން ނޫންކަމަށް ހަދާފައި ވެސް އެއްޗެކޭ ބުނަން އުޅުނެއްކަމަކު އެކަން ކާމިޔާބެއް ނުވިއެވެ.

“މި ކަމާ ބެހޭގޮތުން ވާހަކަ ދައްކަން އަދި ބޭނުމެއް ނޫން.”

ދާނިޝްއަށް ޓައިޕްކޮށްފައި ފޮނުވާލެވުނީ އެ މެސެޖެވެ. އެއަށްފަހު ދާނިޝްއަށް ފޯނު ނިވާލެވުނީ ހިތުގެ ހަމަޖެހުން ގެއްލިފައިވާ ޙާލުގައެވެ. ވާނީވެސް އެހެންތާއެވެ. އޭނަގެ ލޯބީގެ ވާހަކަ އެހެން މީހުންނަށް ކިޔައިދޭން ކިތަންމެ ބޭނުންވިޔަސް، އެ ވާހަކައަކީ ނުކުތާއެއް އައިސްފައިވާ ވާހަކައެކެވެ. އިތުރަށް ކުރިއަށް ދާނެކަމުގެ އެއްވެސް އުއްމީދެއް އޮތް ވާހަކައެއް ނޫނެވެ. ވީއިރު ކިޔައިދިނުމުގެ ބޭނުމަކީ ކޮބައިހެއްޔެވެ؟

އަދި އަމުދުން ޚުދު ދާނިޝް އެ އެންމެންގެ ކުރިމަތީގައި އެ ވާހަކަ ދެއްކުމުގެ ބޭނުމަކީ ކޮބައި ހެއްޔެވެ؟ އޭނަ ހިލްޔާ ދެކެ ވަނީ ހަމަ ލޯބި ހެއްޔެވެ؟ ލޯތްބަކީ އެހާ ކުޑަ ދުވަސްކޮޅެއްގެ ތެރޭ އެހާ ދުރުދުރުން އުޅުނު އަންހެން ކުއްޖަކާ ވެވޭނެ އެއްޗެއް ހެއްޔެވެ؟ އޭނައަށް ހިލްޔާ ކަމުދިޔައެވެ. ހިލްޔާ ރީތިވިއެވެ. އެހެނަސް ލޯތްބަކީ ހާދަ ބޮޑު ބަހެކެވެ. އޭނަ އެންމެންގެ ކުރިމަތީގައި އެހެން ބުނެވުނީ އޭނައަކީ އެމީހުން ސިފަކުރާ ފަދަ މީހެއް ނޫންކަން ސާބިތުކޮށްދޭން ހެއްޔެވެ؟ ވަކިން ޚާއްޞަކޮށް ހިލްޔާއަށް ސާބިތުކޮށްދޭން ހެއްޔެވެ؟ އެހެންނޫނީ ނޭނގުމެއްގެ ތެރެއިން ވެސް ހިތުގައިވި އިޙްސާސްތައް ބޭރުކޮށްލެވުނީ ހިލްޔާއާއި ހަމައަށް އެ އިޙްސާސްތައް ރައްދު ކޮށްދިނުމަށް ހެއްޔެވެ؟ އޮންލައިންކޮށް ވިޔަސް ހިލްޔާއަށް އޭނަގެ ސޫރަ ފެންނާނެ ކަމުގެ އުއްމީދުގައި ހެއްޔެވެ؟ އަދި އެ ސޫރަ ފެނި، އޭނަ ބުނި ބަސްތައް އިވި ހިލްޔާ އޭނަގެ ގާތަށް އަންނާނެ ކަމުގެ އުއްމީދުގައި ހެއްޔެވެ؟

“ޔޫ އާރ ހޯޕްލެސް ދާނިޝް! ހޯޯޯޯޯޕްލެސް!”

ނިދަން ތައްޔާރު ވެގެން އަލަމާރީގެ ލޯގަނޑު ކުރިމަތީގައި ހުއްޓުނު ހިނދު ދާނިޝްއަށް އަމިއްލަ ނަފްސާއި ކަހަލަ ގޮތަކަށް ބުނެލެވުނެވެ. އެ ފަހު ބަސް ދިގުކޮށް ކިޔުމަށްފަހު، ދެލޯ މަރައި ތަގުޅިކޮށްލަމުން އެއް އަތުން އަވަސް ޙަރަކާތަކުން އިސްތަށިގަނޑު ހާވާލީ، އަމިއްލަ މޮޔަ ހީވެފައެވެ. ހިލްޔާ އުޅެނީ އޮންލައިންކޮށް އޭނަ ފެނިފައި އޭނަގެ ގާތަށް އަންނަން ހެއްޔެވެ؟ ހިލްޔާ އެހެން މީހަކާއި އިންނަން ރާވައިގެން ގޮސްފައި ހުއްޓާއެވެ. މުޅި ކިޔެވުމެއް ކިޔަވަން ގޮސްފައި ހުއްޓާއެވެ. ކޮންމެ ގޮތަކަށް އޭނަ ލޯބި ހުށަހެޅިޔަސް ހިލްޔާ އަނބުރާ އައުމުގެ ފުރުސަތު ކުޑައޭ ހިތަށްއެރިއެވެ.

މި ޚިޔާލުތަކުގެ ސަބަބުން ދާނިޝްއަށް އެރޭ ނިދަން ވެސް އުދަގޫވިއެވެ. އެ ވީޑިއޯ ހިލްޔާއަށް ފެންނާނެއޭ ހިތަށްއެރިއެވެ. އޭނައާއިމެދު ހިލްޔާ ހީކުރާނީ ކީކޭތޯ އަމިއްލަ ހިތާއި ސުވާލު ކުރެވެމުން ދިޔައެވެ. ހިލްޔާއަށް އޭނަ ރީތިވާނެތޯ އަމިއްލަ ޒަމީރާއި ސުވާލު ކުރެވެމުން ދިޔައެވެ. އެއިން ކޮންމެ ފަހަރަކު އަމިއްލަ ނަފްސަށް ކުދި ކިޔައި ދެ ފަރާތުން ދެ ފަރާތަށް ފުރޮޅެމުން ދިޔައެވެ.

**

ދާނިޝް ހީކުރަމުން ދިޔަ ގޮތާއި ޚިލާފަށް ހިލްޔާ އުޅެމުން ދިޔައީ އެއްވެސް ސޯޝަލް މީޑިއާއަކަށް ވަދެވޭ ވަރަށްވުރެ ބުރަ ދިރިއުޅުމެކެވެ. އަދި އަމުދުން ރާއްޖޭގައި ހޫނުވެގެން އުޅޭ ޚަބަރެއް އިވޭނެ ފަދައަކުން އޭނަގެ ދިވެހި އެކުވެރިއެއް ކައިރީގައެއް ނުއުޅެއެވެ. އާދައިގެ މަތިން ރާފިލް އޭނައަށް ފެންނަނީ ހަފްތާއަކު ދެ ތިން ފަހަރެވެ. އެ ފެންނަ ކޮންމެ ފަހަރަކު ރާފިލް އޭނައަށް ސަމާލުކަން ދީ، އޭނައަށް އަގުބޮޑު ހަދިޔާތައް ދީ، ޑިއުޓީގެ ސަބަބުން ދިމާނުވާތީ ދެރަ ވާ ވާހަކަ ބުނެ ހަދާތީ ހިލްޔާ ދެންވެސް ރާފިލްގެ އަވައިގައި ޖެހިފައިވިއެވެ. ދުވަސްތައް ފާއިތުވާ ވަރަކަށް އެ ދެމެދުގައިވާ ‘ލޯބި’ އިތުރުވާ ކަމަށް ޤަބޫލު ކުރެވެއެވެ. ރާފިލް ނުހަނު އަސަރާއިއެކީ އެހެން ބުނެ އުޅޭތީވެއެވެ.

އެރޭ ޔޫކޭ ގަޑިން 7 ޖަހަން ގާތްވަމުން ދިޔަ ވަގުތު ހިލްޔާ އޯޕީޑީގައި އިންދާ، ވައިބާރ އިން އެލީގެ ކޯލެއް އަންނަން ފެށިއެވެ. އެވަގުތު ބަލިމީހަކު ހިލްޔާގެ ކުރިމަތީގައި އިންނާތީ ހިލްޔާ އަވަސްއަވަހަށް ފޯނުގެ އަޑު ކަނޑުވާލެވުނެވެ. އެ ބަލިމީހާ ކޮންސަލްޓޭޝަން ރޫމުން ނިކުމެގެން ދިޔުމުން، ޑިއުޓީ ނިމުނީކަން އެނގުންވެ، ހިލްޔާ އެލީއަށް ގުޅާލިއެވެ. އެލީ ޢާއްމު ގޮތެއްގައި އޭނައަށް ގުޅާވެސް ނަހަދާތީވެއެވެ.

“ކިހިނެއްވީ މާ ދަންގަޑިއެއްގަ ތި ގުޅަނީ؟ 11 ޖަހާނީ ދޯ މިހާރު ތިކޮޅަށް؟” ހިލްޔާ އޭނަގެ ކޮންސަލްޓޭޝަން ރޫމުން ނިކުންނަމުން އެތާ ހުރި ގަޑިއަށް ނަޒަރެއް ދެމުން ފޯނުން އެލީއާއި ވާހަކަ ދެއްކިއެވެ.

“މައި ގޯޑް ތުއްތާ އެކްސައިޓްމެންޓް ހޯލްޑް ނުކުރެވިގެން މި ގުޅާލީ. ދޮންތަ ވެސް މި ވާހަކަ ބުނީމަ އެހާ އެކްސައިޓެއް ނުވޭ. ބައްޕައާ ދެން ދައްކާ ކަހަލަ ވާހަކައެއް ނޫން މިއީ. އެކަމަކު ތުއްތަ މިއަށް އިންޓްރެސްޓް ވެދާނެހެން ހީވާތީ މި ގުޅީ.” އެލީ ނުހަނު ޖޯޝާއިއެކީ ވާހަކަ ދެއްކިއެވެ.

“އައި ހައިލީ ޑައުޓް އިޓް. އެކަމަކު ބުނޭ.” ހިލްޔާ ހޮސްޕިޓަލްގެ ކޮރިޑޯއިން ހިނގަމުން މިޞްރާބުޖެހީ ސާރޖަރީ ޑިޕާޓްމެންޓަށެވެ. ގެއަށް ދިޔުމުގެ ކުރިން ސާރޖަރީއެއް ބަލާލަން ބޭނުންވުމުންނެވެ.

“ޔޫ ނޯ ޑޭން ރާއްޖޭގަ އެބައުޅޭ!!! އެންޑް ހީ ވޯޒް ވެއަރިންގް އަ މާސްކް މި ހުރިހާ ދުވަހު. އެންޑް މިރޭ ޑޭން އެ މާސްކް ނަގާލީ. ސޯ ޑްރެމެޓިކަލީ!!!” އެލީ ފޯރި ގަދަވަމުން ގޮސް އެލީގެ އަޑު ވެސް ހަރުވުމުން ހިލްޔާ އޭނަގެ ކަންފަތުން ފޯނު ދުރުކޮށްލަން ވެސް ޖެހުނެވެ. އެ ހިނދު ވަރުބަލިވެފައިވުމުން އެވަގުތުން ވަގުތަށް ވެސް ފޯނު ކަނޑާލަން ބޭނުންވެފައިވިއެވެ. އެލީ ދެއްކި ވާހަކައަކާއިމެދު ވިސްނޭ ވަރަށް ވުރެ ސިކުނޑި ބަލިވެފައިވިއެވެ. އަދި އަމުދުން ދިވެހި ފިލްމީ ތަރިއަކާ ބެހޭގޮތުން ވާހަކަ ދެއްކުމަކީ އޭނަ ކުރާ ހިތްވާ ކަމެއްވެސް ނޫނެވެ. އެހެނަސް އެލީ ދުރު ކުރާކަށް ބޭނުމެއް ނުވިއެވެ.

“އައި ސީ އެލީ. އެހެންވީމަ ވަރަށް ހެޕީވެފަދޯ ތިހިރީ؟” ހިލްޔާ އެތާ ހުރި ލިފްޓަކަށް އަރަން ފިތަކަށް ފިތަމުން ބުނެލިއެވެ.

“ޔެސް! އެންޑް ޔޫ ނޯ ތުއްތާ ޔޫ ނޯ ހިމް. ބައްޕައާ ވެސް ވަރަށް ކްލޯޒް މީހެއް އެއީ. އޯސިސް-“

“އައިމް ޝުއާރ އެލީ. ބައްޕައަކީ އެހެންނޫނަސް ވަރަށް ގިނަ މީހުން ދަންނަ މީހެއް. ދެން ދިޔައީ އިނގޭ. ތިއޭޓާރއަށް ދާން ލިފްޓަކަށް އަރަން މި އުޅެނީ.” ހިލްޔާ އަވަސްއަވަހަށް ބުނެ ހުޅުވުނު ލިފްޓް ގެ ތެރެއަށް ވަނެވެ. އެއާއިއެކު އެލީ އޯކޭ ދިނުމުން ހިލްޔާ ފޯނު ކަނޑާލަމުން ފުން ނޭވައެއް ދޫކޮށްލިއެވެ.

އެ ފަހުން ވެސް އެލީ ހިލްޔާއަށް މެސެޖުތަކެއް ކޮށްފައިވިއެވެ. ހިލްޔާއަށް އެ މެސެޖުތައް ފެނުނީ، ސާރޖަރީއެއް ބެލުމަށް ތިއޭޓަރު މަތީގައި ބިއްލޫރިން ހަދާފައި ހުންނަ ބައިގައި އިންދާއެވެ. އެވަގުތު ހިލްޔާ ފޯނު ހުޅުވީ އިންޓަނެޓުން އެއްޗެއް ސާޗްކޮށްލުމަށެވެ. އެލީގެ މެސެޖު ނޮޓިފިކޭޝަން ލިބުމުން މެސެޖު އެވަގުތު ހުޅުވާލެވުނެވެ. މެސެޖުގައި ފޭސްބުކް ވީޑިއޯ ލިންކެއް ހުރިތަން ފެނުމުން ހިލްޔާއަށް ބެކަށް ޖަހާލެވުނެވެ. އެވަގުތަކީ ވީޑިއޯއެއް ބަލާލަން އެންމެ މުނާސަބު ވަގުތުކަމަށް ނުވެފައި އެއީ އޭނަ ޝައުޤުވެރިވާނެ ފަދަ ވީޑިއޯއަކަށް ވެދާނެ ކަމަށް ޤަބޫލު ނުކުރެވުމުންނެވެ. އެހެންކަމުން ހިލްޔާ އޭނަ އެވަގުތު ކުރަން ޖެހޭ މަސައްކަތާއިގެން ކުރިއަށް ދިޔައެވެ.

**

3:30 ވީ ވަގުތު ދާނިޝްގެ ފޯނު އެލާމް ރިންގުވާން ފެށީ އެންމެ ބައިގަޑިއިރަށް ދާނިޝްއަށް ނިދާލެވުނު ވަގުތެވެ. ކިތަންމެ ވަރުބަލިވެފައިވިއެއްކަމަކު ލުއްކެއްޖަހައި ތެދުވެލަމުން އެލާމް ނިވާލުމަށްފަހު ދާނިޝް ލޯ އުނގުޅާލިއެވެ. އަދި އެނދުން ތެދުވެގެން ގޮސް ފާޚާނާއަށް ވަނީ މިސްކިތަށް ދާން ތައްޔާރުވުމަށެވެ.

ރޭގަނޑު ކުރުން އެންމެ މޮޅު އިތުރުވެގެންވަނީ ރޭގަނޑުގެ އެންމެ ފަހު ތިން ބައި ކުޅަ އެއްބައިގައި ކަން އެނގުނުފަހުން ދާނިޝް މިހާރު ނަމާދު ކުރަނީ އެގަޑީގައެވެ. ފަޔާޒާއި ޔައިޝް ވެސް ޢާއްމު ގޮތެއްގައި އެ މިސްކިތަށް ދަނީ މި ގަޑީގައި ކަން އެނގުނު ފަހުން އެކަން އެގޮތަށް ކުރަން ހިތްވަރެއް ލިބިފައިވެއެވެ. ރަނގަޅު އެކުވެރިންނާއި އެކީ އުޅުމުގެ ހުރިހާ ފައިދާއެއް ދާނިޝްއަށް ލިބެމުން ދިޔައެވެ.

ހުދު ގަމީހަކާއި ކަޅުކުލައިގެ ފަޓުލޫނެއް ލައި މިސްކިތަށް ދާން ތައްޔާރުވުމަށްފަހު ދާނިޝްއަށް މާސްކް ވެސް އެޅެން އުޅުނެވެ. އެހެނަސް ރޭ ހިނގި ކަންތައް ހަނދާންވެފައި މާސްކް އަލަމާރި ތެރޭގައި ބޭއްވުނެވެ. ދެން އޭނަ އެއަށް ބޭނުމެއް ނުވާނެއޭ ހިތަށްއެރިއެވެ. މީހުން އޭނައަށް ނަޒަރުތައް ދިނަސް އޭނައަށް ހެވެއެވެ. އެ ނަޒަރުތަކަކީ އޭނަގެ ބަލިކަށި ކަމަށް ހަދައިފިނަމަ އޭގެ ފައިދާ ނަގާނެ މީހުން އެބަ ތިބިކަން ރޭ އެނގިގެން ދިޔައީތީވެއެވެ.

3:45 ހިނގި ވަގުތު ގެއިން ނިކުމެގެން މިސްކިތަށް ދިޔަ މަގުމަތީގައި ދާނިޝް މާ ގިނަ މީހުންނާއި ދިމަލެއް ނުވެއެވެ. އެވަގުތު މަގުމަތި އޮތީ ހިމޭންވެފައެވެ. މިސްކިތަށް ދިޔައިރު އާދައިގެ މަތިން ފަޔާޒް ފުރަތަމަ ސަފުގައި ނަމާދަށް ހުއްޓާ ފެނުނެވެ. ދާނިޝް ގޮސް ފަޔާޒްގެ ކައިރީގައި ހުއްޓުނު ވަގުތު ފަޔާޒް ސަލާމް ދިނީއެވެ. އާދައިގެ މަތިން ދާނިޝް ފެނުމާއިއެކު ފަޔާޒް ހިނިތުންވެލިއެވެ.

“ޔައިޝް ނެތީތަ މިރޭ؟ ހޭނުލެވެނީ ކަންނޭނގެ ދޯ؟” ފަޔާޒް ކޮޅަށް ތެދުވުނު ވަގުތު ދާނިޝް އެހިއެވެ.

“ނޫނޭ ޔައިޝް ދެންމެ މެސެޖެއް ކުރި އަހަންނަށް. ބުނީ ވައިފް ގޮވައިގެން ހޮސްޕިޓަލަށް ގޮއްސައޭ މިހިރީ. ޑިއު ކައިރިވެފަ ހުރި ވާހަކަ ކުރީ ދުވަހު ބުންޏެއްނު؟” ފަޔާޒް ހަނދާން ކޮށްދިނެވެ.

“އޯ ޔާ….ބޭބީ ލިބެނީ ދޯ އެހެންވީމަ؟ ސޯ ހެޕީ ފޯ ހިމް.” ދާނިޝް ފުރިހަމަ ހިނިތުންވުމަކާއެކީ އެހެން ބުނެލީ، ހަމަ ޙަޤީޤަތުގައި ވެސް ހިތުގެ އަޑިން އެކުވެރިޔާއަށްޓަކައި އުފާވެފައިވާ ޙާލުގައެވެ. ޙަސަދަވެރިކަމަކީ މިހާރު ދާނިޝްގެ ހިތަށް ބީރައްޓެހި އިޙްސާސެކެވެ. ކޮންމެ މީހަކަށް ވެސް ނިޢުމަތްތައް ދެއްވަނީ ﷲ ކަން ހިތަށް ޔަޤީން ކުރެވިފައިވާތީވެއެވެ. އެހެން މީހުންނަށް ލިބޭ ނިޢުމަތްތަކަކީ އެކަލާނގެ ގެ ރަޙްމަތުގެ ނިޝާނެކެވެ. ހަމަ އެފަދަ ރަޙްމަތެއް އޭނައަށް ދެއްވަން ވެސް ﷲ ސުބްޙާނަހޫ ވަތަޢާލާ ކުޅަދުންވަންތަވެ ވޮޑިގެންވެއެވެ. ވީއިރު ޙަސަދަވެރިވުމުގެ ބޭނުމެއް ދާނިޝްއަށް ނުވިސްނެއެވެ.

“ހެޕީ ފޯ ޔޫ ޓޫ ބްރޯ! ފައިނަލީ ތިހިރީ އަންމާސްކް ވެފަ. މިހާ ހިސާބުން އަދި ކިރިޔާ ލައިފް ތި ފެށުނީ!” ފަޔާޒް ދާނިޝްގެ ކޮނޑުގައި ޖަހާލަމުން ބުންޏެވެ. އެއާއިއެކު ދާނިޝްއަށް ލުއި ގޮތަކަށް ހީލެވުނެވެ. އެއަށްފަހު ފަޔާޒް ރޭގެ ޙާދިސާއާއިމެދު އިތުރު ސުވާލެއް ނުކޮށް ނަމާދަށް ހިނގާށޭ ބުންޏެވެ. އެކަމާއިމެދު ދާނިޝް ޙައިރާނެއް ނުވެއެވެ. އޭނަ ދައްކަން ބޭނުންނުވާ ވާހަކައެއް ދައްކުވަން އޭނަގެ އާ އެކުވެރިން އެއްގޮތަކަށް ވެސް ނުއުޅޭނެއެވެ. ނުބެހޭ ކަންކަމާ ނުބެހުމާއި، ސުވާލު ގިނަ ނުކުރުމަކީ އެ އެކުވެރިންގެ ހުންނަ ނުހަނު ރީތި ސިފައެކެވެ.

ދާނިޝް އަމިއްލަ ޚިޔާލުތަކާއިގެން އަނެއްކާވެސް އެކަނިވީ ނަމާދު ތެރެއިންނެވެ. އޭނަގެ ލޯބިވާ ކުއްޖެއް ހުރެއޭ ބުނެވުނު ގޮތެވެ. އަދިވެސް ޖަވާބު ނުލިބޭ މުހިއްމު ސުވާލެއް އޭނަގެ ހިތުގައި އޮތްކަން އެނގުންވީ އެވަގުތެވެ. އޭނަ ޙަޤީޤަތުގައި ވެސް ހިލްޔާ ދެކެ ލޯބިވީތޯ ދަނެގަންނަން ބޭނުންވިއެވެ. އެހެނީ ވަކި ހިސާބަކުން އޭނަ ވަނީ ހިލްޔާއަށް ނުރުހުންވެސް ވެފައެވެ.

ދާނިޝް ފަޔާޒް އާއި އެ މަޝްވަރާ ކޮށްލަން ބޭނުންވިއެވެ. ދާނިޝްއަށް އެ ފުރުސަތު ލިބުނީ ފަތިސް ނަމާދު ޖަމާޢާތުގައި ކުރުމަށްފަހުއެވެ. ފަތިސް ނަމާދަށްފަހު ފަޔާޒް ޒިކުރުތައް ކިޔައި ނިމުމަށްފަހު ޚަތިމް ނަގަން ތެދުވަން އުޅެނިކޮށް ދާނިޝް ވާހަކަ ދެއްކިއެވެ.

“ފަޔާޒް އަހަރެން ސުވާލެއް ކޮށްލަންތަ؟” ދާނިޝް އެހިއެވެ. އެއާއިއެކު ފަޔާޒް ނުތެދުވެ، ދާނިޝްއަށް ބަލާލަމުން އިށީނެވެ.

“ޝުއާރ…” ފަޔާޒް ބުންޏެވެ. އެއާއިއެކު ދާނިޝް ހިސާބެއްގެ ޖެހިލުންވުމަކާއިއެކީ ވާހަކަ ދެއްކިއެވެ.

“އަމް….ލޯބިވީކަން އެނގޭނީ ކިހިނެއް؟ މި ބުނީ….އަންހެން ކުއްޖެއް ދެކެ. ލޯބިވުމަކީ ގޯސްކަމެއް ދޯ؟ ދީނުގަ؟” ދާނިޝް ފުރަތަމަ ދެ ޖުމްލަ ބުނުމަށްފަހު ފަހު ވާހަކަތައް ގެނައީ، އޭނަ ކޮށްލި ސުވާލުން ފަޔާޒް ނުރުހުންވެދާނެއޭ ހިތާއެވެ.

“ނޫނޭ ދާނިޝް. ލޯބިވުމަކީ އެއްގޮތަކަށް ވެސް ގޯސްކަމެއް ނޫން. ރަޙްމަތެއްގެ ގޮތުގައި ފޮނުވުނު މި ދީނުގަ ލޯބި ގޯސްވާނީ ކިހިނެއް؟” ފަޔާޒް އެހިއެވެ. އެއާއިއެކު ދާނިޝްއަށް ޙައިރާންކަމާއިއެކީ ފަޔާޒަށް ބަލާލެވުނެވެ.

“އަސްލުވެސްތަ؟” ދާނިޝްއަށް ޤަބޫލުކުރަން ދަތިވެފައި އިނދެ އަހާލެވުނެވެ. މި ހުރިހާ ދުވަހު އޭނަގެ ކުރިން ގެންގުޅުނު އެކުވެރިންގެ ސަބަބުން އޭނައަށް ވިސްނިފައިވީ، ދީންވެރިވެއްޖެނަމަ ކައިވެނި ކުރަނީ ކޮންމެހެން ލޯބިން ނޫން ކަމަށެވެ. އެހެނަސް ފަޔާޒް މި ބުނެލި ވާހަކައިން އެއީ ގޯސް ހީކުރުމެއްހެން ހީވެއްޖެއެވެ.

“ހުމް…އަސްލުވެސް. އަސްލު ވާ ގޮތަކީ ގިނަފަހަރު އަހަރުމެންނަށް ނޭނގެނީ ލޯތްބަކީ ކޯޗެއްކަން. ގިނަ ޒުވާން ކުދިންނަށް ހީވެފައިވަނީ އަންހެން ކުއްޖަކު ރީތިވާއިރަށް އެއީ ލޯބި ވެވުނީއޭ. އެކަމަކު އެއީ ލޯތްބެއް ނޫން. އެއީ ޝަހުވަތް. ވަރަށް ގިނަ މީހުން އަންހެން ކުއްޖަކަށް ލިބިފައިވާ ޤަދަރަކާއި މުއްސަނދިކަމެއްގެ ސަބަބުން ވެސް ލޯބިވެއޭ ކިޔާފަ ކައިވެނި ކުރޭ. އެކަމަކު މީގެއިން އެއްވެސް ކަމަކީ ދެމި ހުންނަ ކަންތަކެއް ނޫން. ރީތިކަން ގެއްލޭނެ. މުއްސަނދިކަމާއި ޤަދަރަކީ ވެސް ގެއްލިދާނެ ކަންތައް. ލޯބިވިއްޔާ ވާންވާނީ ނިމުމެއް ނުވާ ސަބަބަކަށްޓަކައި. ﷲ އަށްޓަކައި.” ފަޔާޒް ކިޔައިދިނެވެ.

ފަޔާޒް ދެއްކި ވާހަކަތަކުން ދާނިޝް ވިސްނުމަކަށް ގެއްލުމުން ހިމޭންވިއެވެ. ހިމޭންކަމުގެ ވަގުތުކޮޅަކަށްފަހު ދާނިޝް ވާހަކަ ދެއްކިއެވެ.

“ﷲ އަށްޓަކައި ލޯބިވެވޭނީ ކިހިނެއް؟” ދާނިޝް އެހިއެވެ.

“ޙަޤީޤަތުގަ އެފަދައިން ލޯތްބެއް ވެވޭނީ މީހަކު އެހެން ހުރިހާ ކަމަކަށް ވުރެ ވެސް ބޮޑަށް ﷲ ދެކެ ލޯބިވީމަ. ﷲ އަކީ ދާނިޝް އެންމެ ލޯބިވާ ފަރާތަށް ވެއްޖެއްޔާ، ﷲ މަތިން ހަނދުމަކޮށްދޭ މީހުން ދެކެ ދާނިޝް ލޯބިވާނެ. ﷲ ގެ އަމުރުފުޅުތަކަށް ބޯލަނބާ މީހުން ދެކެ ލޯބިވާނެ. ﷲ ގެ ދީނަށް ނަޞްރުދޭ މީހުން ދެކެ ދާނިޝް ލޯބިވާނެ. މި ޒަމާނުގެ ގޮތުން ފަހަރެއްގަ މިހެން ބުނީމަ މިއީ ގޯސް ވާހަކައެއްހެން ހީވެދާނެ. ބަޓް އައި ލަވް ޔޫ ފޯ ދަ ސޭކް އޮފް ﷲ. ދާނިޝް އެ މާޒީގެ ދިރިއުޅުމަށް ފަސްދީފައި، އެ މަޝްހޫރުކަމަށް ފަސްދީފައި ﷲ ގެ މަގަށް ރުޖޫޢަވީތީ ވަރަށް ލޯބިވޭ ޙަޤީޤަތުގަ ވެސް. ދާނިޝްއަށް ނޭނގިދާނެ ފަހަރެއްގަ އެކަމަކު ދާނިޝް ތައުބާވި ގޮތް ހިތަށް އިޙްސާސް ކުރެވުނީމަ އިތުރު ހެޔޮ ޢަމަލުތައް ކުރުމަށް އަހަންނަށް ހިތްވަރު ވެސް ލިބޭ.” ފަޔާޒް ކިޔައިދިނެވެ.

އެ ވާހަކަތައް އިވިގެން ދިޔަދިޔަހެން ދާނިޝްގެ ހަނދާނަށް އައީ ފަޔާޒާއި ދިމާވި ފުރަތަމަ ރެއެވެ. ފަޔާޒް އޭނައަށް ﷲ މަތިން ހަނދުމަކޮށްދީ އޭނައަށް ނަސޭޙަތްތެރިވުމުން ހިތުގައި ފަޔާޒަށްޓަކައި އުފެދުނު ކުލުނެވެ. އަދި ހަމަ އެހެންމެ އޭނަގެ ގާތުގައި މިހާރު އުޅޭ ހުރިހާ އެކުވެރިންނަށްޓަކައި ވެސް ހިތުގައި އޮންނަ ލޯތްބެވެ. މި އިޙްސާސްތަކުގެ ޙަޤީޤަތް މި އެނގުނީ އަދި ކިރިޔާއެވެ. އެމީހުންދެކެ ލޯބިވެވެނީ ހިތުގައި ﷲ އަށްޓަކައި އޮތް ލޯތްބެއްގެ ސަބަބުންނެވެ. އެކަލާނގެ ގެ ދީނަށްޓަކައި އޮތް ލޯތްބެއްގެ ސަބަބުންނެވެ.

ދާނިޝް އެއްޗެކޭ ނުބުނެ އިންދާ ފަޔާޒް އިތުރަށް ވާހަކަ ދެއްކިއެވެ.

“ބުނަން މިއުޅެނީ….އަންހެން ކުއްޖެއްދެކެ ވެސް ލޯބިވިއްޔާ ލޯބިވުން އެންމެ ރަނގަޅީ ﷲ އަށްޓަކައޭ. ހަރުދަނާ ކައިވެންޏެއް ބިނާ ކުރެވޭނީ އޭރުން. ރަނގަޅު ޞާލިޙު ކުދިން ލިބުމުގެ ފުރުސަތު ބޮޑުވާނީ އޭރުން. މި ދުނިޔެއާއި އާޚިރަތުގައި ވެސް އުފަލުން އެކުގައި އުޅޭނެ ބައިވެރިއެއް ލިބޭނީ އޭރުން.” ފަޔާޒް ބުންޏެވެ.

“އަސްލު…..ކުރީ ކޮޅު އެކުއްޖާ ވަރަށް ރަނގަޅު. ބޮޑަށް ކަމުދިޔައީ އެކުއްޖާއަކީ މޮޑެސްޓް ކުއްޖަކަށްވީމަ. އެކުއްޖާއަކީ އަޚްލާޤް ރަނގަޅު ކުއްޖަކަށްވީމަ. އަހަރެންގެ މަންމަ ވެސް އެ ކުއްޖާދެކެ ލޯބިވޭ. މަންމަ ދީން އުނގަންނައިދިން ކުއްޖެއް އެއީ. އެކަމަކު….” ދާނިޝްއަށް އޭނަގެ ހިތުގެ އިޙްސާސްތައް ބޭރު ކުރެވެން ފެށީ އެއްވެސް އިޚްތިޔާރަކާއި ނުލައެވެ.

“އެކަމަކު؟” ފަޔާޒް އެހިއެވެ.

“އެކަމަކު ފަހުން އެ ކުއްޖާ ވަރަށް ބޮޑަށް ބަދަލުވީ. ކޮންމެވެސް މީހަކާ ރައްޓެހިވެގެން އުޅެން ފެށީ. އެމީހެއްގެ ސަބަބުންނޭ އަހަރެން ބުނާނީ އެ ކުއްޖާ ގޯސްވީ. ދެން މިހާރު….އެ ދެމީހުން ކައިވެނި ކުރަން ރާވައިގެން ބޭރަށް ގޮސްފަވީ.”

“ދާނިޝް ޕްރޮޕޯޒް ކުރިންތަ ތި ކުއްޖާއަށް؟”

“ނުކުރަން. ނުކުރެވެނީސް އެކުއްޖާ މި ބުނާ މީހަކާ ރައްޓެހިވީ.”

“އެހެންތަ؟ ތި ކުއްޖާގެ ސަބަބުންތަ އަހަރެން ކައިވެނި ކުރަން ކުއްޖަކު ހޯދައިދެންހޭ އެހީމަ ދާނިޝް ނޫނެކޭ ބުނީ؟”

“ހުމް…..ހިތަށްއެރީ، މޫވް އޮން ނުވަނީސް އެހެން ކުއްޖަކާ ކައިވެންޏެއް ކުރުން ރަނގަޅެއް ނުވާނެއޭ. އަސްލު ވަރަށް ހަނދާންވޭ އަދިވެސް އެކުއްޖާ މަތިން. ދެރަވެސް ވޭ އެ ކުއްޖާ ނުފެންނާތީ. ހިތް އެދެނީ އެ ކުއްޖާ އަހަރެންގެ ގާތަށް އަނބުރާ އަންނަން. އެކުއްޖާއަށްޓަކައި ކޮންމެ ދުވަހަކު ދުޢާ ވެސް ކުރެވޭ.”

ދާނިޝް އެއްދިމާލަކަށް ނަޒަރު ހުއްޓައިގެން އިނދެ މާޔޫސް ކަމާއިއެކީ ވާހަކަ ދެއްކިއެވެ. އެ ހުރިހާ ވާހަކައެއް އަޑު އަހަން އިނދެފައި ފަޔާޒް ފުން ނޭވައެއް ދޫކޮށްލިއެވެ. އެއަށްފަހު ވާހަކަ ދެއްކިއެވެ.

“ހެޔޮއެދޭ އެކުވެރިއެއްގެ ގޮތުގަ ނަސޭޙަތެއް ދީފާނަން. ތި ކުއްޖާ މަތިން ހަނދާން ނައްތާލާ. ތި ބުނީ ބޭރުގައޭ ދޯ އެ ކުއްޖާ ހުރީ؟ އެހެންވެއްޖެއްޔާ ހަނދާން ނައްތާލުން ފަސޭހަވެސް ވާނެދޯ؟ އަހަންނަށް ވިސްނޭ ގޮތުގަ އެ ކުއްޖާއާ ވަރަށް އެޓޭޗްވެފަ ދާނިޝް ތިހިރީ. ތި ކުރެވޭ އިޙްސާސްތަކާއިމެދު ދާނިޝްއަށް މިވަގުތު ކުރެވޭނެ އެއްވެސް ކަމެއް ނެތް. އެހެންވީމަ ތި އިޙްސާސްތައް ދޫކޮށްލުން އެންމެ ރަނގަޅުވާނީ. އެހެންނޫނީ ޝައިޠާނާ ތި ބަލިކަށިކަމުގެ ބޭނުން ހިފައި ދާނިޝް ލައްވާ ގޯސްކަމެއް ވެސް ކުރުވަފާނެ. ތި އިޙްސާސްތަކަކީ ފާފަވެރިވާނެ ކަމެކޭ ނުބުނަން. ﷲ ސުބްޙާނަހޫ ވަތަޢާލާގެ ރަޙްމަތުން އެކަލާނގެ އަހަރުމެންގެ އިޙްސާސްތައް ނުބައި ޢަމަލެއްގެ ގޮތުގައި ނުލިޔުއްވާ. އެކަމަކު ދާނިޝްއަށް ދިރިއުޅުމުގައި ކުރިއަށް ދެވޭނީ ތި އިޙްސާސްތަކުން އަރައިގަތީމަ. އެހެންވެ މިހެން މި ބުނަނީ.” ފަޔާޒް ނަސޭޙަތްތެރިވިއެވެ.

ފަޔާޒް ދެއްކި ވާހަކަތަކުން މޭގައި ހިނގާލި ރިހުމާއިއެކީ ދާނިޝްއަށް ވާހަކަ ދެކެވުނެވެ.

“އެކަމަކު…އަހަންނަށް ހިއެއްނުވޭ އަހަންނަށް ހަނދާން ނައްތާލެވޭނެހެން. ކޮންމެ ދުވަހަކު އާދައެއްހެން އެ ކުއްޖާ މަތިން ހަނދާންވޭ. އެކުއްޖާއަށްޓަކައި ދުޢާ ކުރެވޭ.” ދާނިޝްއަށް ބުނެވުނެވެ.

“އެ ކުއްޖާގެ ބަދަލުގަ ފިއުޗާރ ވައިފްއަށްޓަކައި ދުޢާ ކުރޭ. އެ ފިއުޗާރ ވައިފް އަކީ ތި ކުއްޖާއަށް ވެސް ވެދާނެ. އެހެން ކުއްޖަކަށް ވެސް ވެދާނެ. ވީ ޑޯންޓް ނޯ. ކޮންމެ ގޮތެއްވިޔަސް ﷲ ދާނިޝްއަށް ދެއްވާނީ ދާނިޝްއަށް އެންމެ ރަނގަޅުވާނެ ކުއްޖާކަން ޔަޤީން ކުރޭ. ޔަޤީންކޮށްފަ އެ ކުއްޖާއަށްޓަކައި ދުޢާ ކުރޭ.” ފަޔާޒް ބުންޏެވެ.

ދާނިޝްއަށް ފަޔާޒްގެ އެ ވާހަކައާއިމެދު ވިސްނާލެވުނެވެ. ކިރިޔާ ވެސް ހަމަޖެހުމެއް ލިބުނީ އޭނަގެ މުސްތަޤްބަލުގެ އަނބިމީހާއަކީ ހިލްޔާއަށް ވެދާނެ ކަމަށް ފަޔާޒް ބުނެލި ބުނެލުމުންނެވެ. އެހެނަސް އެހެން ނުވެވެސް ހިނގައިދާނެކަން ދާނިޝްއަށް ޤަބޫލު ކުރެވުނެވެ. އެހެންކަމުން ފަޔާޒް އެ ބުނި ގޮތަށް ޢަމަލު ކުރަން ނިންމުނެވެ. މުހިއްމީ މުސްތަޤްބަލުގައި އޭނައަށް ލިބޭނެ އަނބިމީހާއަށްޓަކައި ދުޢާ ކުރުމެވެ. ﷲ ގެ ތަޤްދީރާއިމެދު ރުހުމެވެ.

އެހެންކަމުން ދާނިޝް އެވަގުތުން ވަގުތަށް ވެސް ދުޢާއެއް ކޮށްލަން ބޭނުންވިއެވެ. ފަޔާޒް ޚަތިމް ނަގަން ތެދުވުނު ވަގުތު ދާނިޝްއަށް ދެއަތް އުފުލާލެވުނެވެ.

“ޔާ ﷲ! ހިލްޔް….މިއަޅާއަށްޓަކައި އިބަރަސްކަލާނގެ ލިޔުއްވާފައިވާ ވައިފްއަށް ހިދާޔަތް އިތުރުކޮށްދެއްވާނދޭވެ. އަދި އެކުއްޖާގެ ފާފަތައް ފުއްސަވައި އެ ކުއްޖާއަށް ހެޔޮ ރަޙްމަތް ލައްވާފާނދޭވޭ. އެކުއްޖާ އެއްވެސް ދަތިކަމެއްގެ ތެރޭގައި އުޅެމުންދާނަމަ އެ ކުއްޖާއަށް ފަސޭހަކަން މިންވަރު ކޮށްދެއްވާނދޭވެ. މި ދުނިޔެއާއި އާޚިރަތުގެ ހުރިހާ ނުބަޔަކުން އެ ކުއްޖާ ރައްކާތެރި ކޮށްދެއްވާނދޭވެ.”

ދާނިޝް އެ ދުޢާ ކުރުމަށްފަހު މޫނުގައި އަތް އެޅިއެވެ. އެހިނދު އެ ހިތަށް ބަޔާން ކުރަން ދަތި ހަމަޖެހުމެއް ލިބުނީ ކީއްވެކަމެއް ޚުދު އޭނައަށް ވެސް ނޭނގެއެވެ.

**

“ތިބާ އާއި ﷲ އާއި ދެމެދު ވާ ހުރިހާ ދޮރެއް ބަންދު ނުކުރޭ….”

ދަންވަރު ވަގުތު ޓެކްސީ ތެރޭގައި ނިދިފައި އޮތް ހިލްޔާއަށް ހޭލެވުނީ، އިނގިރޭސި ބަހުން އެ ބަސްތައް އިވުނު އަޑަށެވެ. ހޭލެވިގެން ރަނގަޅަށް ބަލާލިއިރު ޓެކްސީ ދުއްވަން އިން މުސްކުޅި ބޭބެ ދަރުހެއް ޕްލޭ ކުރަނީއެވެ. އަޑުން އެއީ ޝެއިޚް ޢުމަރު ސުލެއިމާންގެ ދަރުހެއްކަން އެނގުނެވެ. ޢާއްމު ގޮތެއްގައި މިފަހުން އައިސް ދަރުހެއް އިވުނަސް ހިލްޔާ އެއަށް ސަމާލުކަން ނުދެއެވެ. އެހެނަސް އެވަގުތު ނޭނގޭ ސަބަބަކާހުރެ ސަމާލުކަން ދެވުނެވެ.

ދަރުހުން އިވެން ފެށީ ވާހަކައެކެވެ. ނުހަނު މަޝްހޫރު ޢިލްމުވެރިޔަކު އެހެން ޢިލްމުވެރިންނާއި އެކީ ދަތުރު ކުރަމުން ދަނިކޮށް ފޭރޭ މީހުންގެ އަތް ދަށުވީ ވާހަކައެވެ. އެ ފޭރޭ މީހުން ޢިލްމުވެރިން ހައްޔަރުކޮށް، ޢިލްމުވެރިންގެ ހުރިހާ ކާ އެއްޗަކާއި މުދަލެއް ވަގަށް ނަގައިގެން އުޅުނެވެ. ވައްކަން ކުރި މީހުން ކައިބޮއި ހެދިއިރު ވެސް، އެ މީހުންގެ އެންމެ ބޮޑު މީހާ ހުރީ ނުކައިކަން މި ވާހަކަ ކިޔައިދިން ޢިލްމުވެރިޔާއަށް ފާހަގަވިއެވެ. އެހެންކަމުން އެ މީހާ ނުކައި ހުރީ ކީއްވެތޯ ޢިލްމުވެރިޔާ ސުވާލު ކުރިއެވެ. އެމީހާ ޖަވާބުގައި ބުންޏެވެ. ތިމަންނާ މިހިރީ ރޯދައަށެވެ. ޢިލްމުވެރިޔާ ނުހަނު ޙައިރާންވިއެވެ. ވައްކަންކޮށް ފޭރެމުންދާ މީހަކު ރޯދައަށް ހުރީތީވެއެވެ. އެހެންކަމުން ޢިލްމުވެރިޔާ ސުވާލު ކުރިއެވެ. ތިބާގެ ރޯދައިގައި ހުރީ ކޮން ފައިދާއެއް ހެއްޔެވެ؟ ޖަވާބުގައި އެމީހާ ބުންޏެވެ. އަހަރެން ވަނީ އަހަންނާއި ﷲ އާއި ދެމެދު ވަރަށް ގިނަ ދޮރުތައް ބަންދުކޮށްފައެވެ. އެހެނަސް އަހަރެން މި ދޮރު ހުޅުވާފައި މި ބަހައްޓަނީ ﷲ ސުބްޙާނަހޫ ވަތަޢާލާ އަހަރެން މި ދޮރުން އަނބުރާ ގެންނަވާނެ ކަމުގެ އުއްމީދުގައެވެ. ޖެހިގެން އައި އަހަރު ޙައްޖުގައި މި މީހާ ޙައްޖުގެ އަޅުކަން އަދާ ކުރުމުގައި އެންމެ ކުރީ ސަފުގައި ހުރި މަންޒަރު ފެނުނު ވާހަކަ ޢިލްމުވެރިޔާ ކިޔައިދިނެވެ. އެމީހާ ރޮއިރޮއިފައި ދުޢާކޮށް ހެދި މަންޒަރު ފެނުނެވެ. އެހެންކަމުން ޢިލްމުވެރިޔާ އެމީހާގެ ގާތަށް ގޮސް ކިހިނެއްވީތޯ ސުވާލުކުރިއެވެ. އެމީހާ ޖަވާބުގައި ބުންޏެވެ. އެ ދޮރުން ﷲ ސުބްޙާނަހޫ ވަތަޢާލާ އަހަރެން އަނބުރާ ގެންނެވީއެވެ.

އެ ވާހަކަ އިވިގެން ދިޔަދިޔަހެން ހިލްޔާގެ ހިތަށް އަސަރު ކުރިއެވެ. މިއީ މި އަހަރު ތެރޭގައި ވެސް ދީނީ ވާހަކައަކުން އޭނައަށް އަސަރު ކުރި ފުރަތަމަ ފަހަރޭ ބުންޏަސް ދޮގަކަށް ނުވާނެއެވެ. އޭނައާއި ﷲ އާއި ދެމެދު ބަންދު ނުކޮށް ހުރީ ކޮން ދޮރެއްތޯ އެވަގުތު ހިތަށްއެރިއެވެ. އެއީ ނަމާދުތޯ އަމިއްލަ ޒަމީރާއި ސުވާލު ކުރެވުނެވެ. ހަމަ އެހިނދު އޭނަ ޤަޟާ ކުރަންޖެހޭ ރޯދަތަކުގެ މަތިން ވެސް ހަނދާންވިއެވެ. ރޯދަ މަސް ޖެހެން ދެން ބާކީ އޮތީ 3 މަހެވެ. ދޮންތަ ރޯދައިގެ ވާހަކަ ދައްކާ ކޮންމެ ފަހަރަކު ރޯދަ ޤަޟާ ކުރަން ނިންމާފައިވެސް ފަސް ކުރެވެމުން ދެއެވެ. އުޅެވޭ ބުރަ ދިރިއުޅުމުގެ ސަބަބުންނެވެ.

އެހެނަސް އެވަގުތު އެ ރޯދަތައް ހިފުމަށް ހިތުގައި ވަރުގަދަ ޢަޒުމެއް ކަނޑައެޅުނެވެ. މާދަމާ އޭނަ ހުންނާނީ ރޯދައަށޭ ހިތަށްއެރިއެވެ. ހަމަ އެވަގުތު ކާރު ޓްރެފިކް ލައިޓަކަށް މަޑު ކުރުމުން ހިލްޔާއަށް ބޭރަށް ނަޒަރެއް ދެވުނެވެ. އެހިނދު ކަނާތް ފަރާތުން މަގު ހުރަސްކޮށްފައި ދެވެން ހުރި ކާއެއްޗެހި ވިއްކާ ބޮޑު ފިހާރައެއް ފެނުނެވެ. އެއީ ފިހާރަ ތެރޭގައި އިނދެވެސް ކެވޭނެ ފަދަ ފިހާރައެއްކަން އެނގުންވުމުން ހިލްޔާ އެތަނަށް ދާން ޚިޔާލު ކުރިއެވެ. ފަތިސް ނަމާދު ވަގުތު ވާން ދެން މާ ގިނައިރެއް ނެތެވެ. އެހެންކަމުން ގެއަށް ގޮސް ރޯދަ ހިފުމަށް ކެވޭނެހެން ހިއެއްނުވެއެވެ. ނުކެވިއްޖެނަމަ މާދަމާ ރޯދައަށް ނުހުރެވިދާނެހެން ހީވިއެވެ. އެރޭ އެހެން ނޫނަސް އޭނަ ކާން ހަނދާން ނެތިފައިވީތީވެއެވެ. އެހެންކަމުން އެ ވަގުތު ޓެކްސީ ޑްރައިވަރާއި ވާހަކަ ދެކެވުނެވެ.

“އަހަރެން މި ތަނަށް ފައިބަނީ އިނގޭ.” ހިލްޔާ އަތް ދަބަހުން ނެގި ލާރި ޑްރައިވަރާއި ޙަވާލުކޮށްލަމުން ކާރުން ފޭބިއެވެ.

އޭގެ އިރުކޮޅެއްގެ ތެރޭގައި ހިލްޔާ އިނީ އޭނަ ގަތް ބައެއް ކާ އެއްޗެހި ތަބަކަށް ލައިގެން ގޮސް މޭޒު ދޮށުގައެވެ. މޭޒު ހުރީ މަގާއިވީ ފަރާތަށް ކަމަށްވުމުން ހިލްޔާއަށް އެ ސާފު ބިއްލޫރިގަނޑުގެ އަނެއްފަރާތުން މަގުގެ ޕޭވްމެންޓާއި، ދުއްވާ އެއްޗެހި ފެންނަމުން ދިޔައެވެ.

ހިލްޔާ އެތާ އިށީންތާ މާ ގިނައިރެއް ނުވެ ޒުވާން އިނގިރޭސި ފިރިހެނަކު ހިލްޔާގެ ކައިރިއަށް އައެވެ.

“އަހަންނަށް މިތާ އިށީނދެވިދާނެތަ؟” ހިލްޔާގެ ކައިރީގައި ހުރި ގޮނޑިއަށް ޢިޝާރާތް ކުރަމުން ހިނިތުންވުމަކާއެކީ އިނގިރޭސި ބަހުން އެހިއެވެ. އެއީ ރީތި ޒުވާނެކެވެ. ކޮންމެ އަންހެން ކުއްޖަކު ވެސް ކައިރީގައި އިށީންނަން އެދޭނެ ފަދަ ޒުވާނެކެވެ. ގޯސް ނިޔަތެއްގައި އައި ހެނެއް ވެސް ހިއެއް ނުވެއެވެ. އެހެނަސް….

“ނޫން.” ހިލްޔާއަށް ރާފިލް މަތިން ހަނދާން ކޮށްލަމުން ޖަވާބު ދެވުނެވެ. އެއާއިއެކު އެ ޒުވާނާ ފަނޑުވެގެން ދިޔަ ހިނިތުންވުމަކާއިއެކީ އޯކޭ އޭ ބުނަމުން ދުރަށް ދާން ހިނގައިގަތެވެ. އެހިނދު ހިލްޔާއަށް ފުން ނޭވައެއް ދޫކޮށްލެވުނެވެ.

ކުރިން ހިލްޔާ ފިރިހެނުންނާއި ދުރުދުރުން އުޅުނީ ދީނުގައި އެކަން އެގޮތަށް އަންގަވާފައިވާތީވެއެވެ. އެހެނަސް މިއަދު އެކަން އެގޮތަށް ކުރުމުގެ ނިޔަތް ބަދަލުވެފައިވެއެވެ. މިހާރު އޭނަ ފިރިހެނުންނާއި ދުރުން އުޅެނީ ރާފިލްއަށް ވަފާތެރިވުމަށެވެ. އޭނަ އަމިއްލަ ނަފްސު ރައްކާތެރި ކުރަނީ ހަމައެކަނި ރާފިލްއަށްޓަކައި ކަމަށް ހިލްޔާ މީގެއިން ކޮންމެ ވަގުތެއްގައި އަމިއްލަ ނަފްސަށް ހަނދާން ކޮށްދެއެވެ. ރީތި ގުޅުމެއްގެ އެންމެ މުހިއްމު އަސާސަކީ ވަފާތެރިކަން ކަމަށް ޑްރާމާތަކުން އިވިފައިވާތީވެއެވެ. ވަފާތެރިކަން ނެތިއްޖެނަމަ ގުޅުމެއްގެ ބޭނުމެއް ނެތްކަމަށް ހުޅަނގުގެ އާރޓިކަލްތަކުން ފެނިފައިވާތީވެއެވެ.

މި ޚިޔާލުތަކުގެ ސަބަބުން ވެސް ހިލްޔާއަށް އިތުރު ހިތްދަތިކަމެއް ނޫނީ ނުލިބެއެވެ. އޭނަ ފިރިހެނުންނާއި ކިތަންމެ ދުރުން އުޅުނަސް ރާފިލް އަންހެން އެކުވެރިން ގެންގުޅޭކަން ހިލްޔާއަށް އެނގެއެވެ. ރާފިލް ހިލްޔާއާއި އެކީގައި ހުންނަ ވަގުތު އެމީހުންނާއި ޗެޓްކޮށް އެމީހުންގެ ވާހަކަ ހިލްޔާ ގާތު ދައްކައި ވެސް ހަދައެވެ. ހިލްޔާ ރާފިލްގެ ނޭދެވޭ ވާހަކައެއް ދައްކަން ބޭނުން ނުވާތީ އެ ވާހަކަ ނުބުނެ ހުރެވޭތޯ ވަރަށް މަސައްކަތް ކުރިއެވެ. އެހެނަސް އެއްދުވަހު ސަމާސާއެއްގެ ގޮތުން ރާފިލް އޭގެއިން ކުއްޖެއް ދެކެ ލޯބިވަނީތޯ ހިލްޔާ އަހާލިއެވެ.

“ނޯ މައި ލަވް! ހައު ކުޑް އައި؟ ޔޫ އާރ ދި އޮންލީ ލަވް އޮފް މައި ލައިފް. މި ލައިފަށް ފަހު އަދި އެހެން ލައިފެއް އޮތިއްޔާ އެ ލައިފްގަ ވެސް ހަމައެކަނި ހިލްޔާއާ އެކީ އުޅެން ބޭނުމީ.”

ރާފިލްގެ އެ ޖަވާބުން އާދައިގެ މަތިން ރާފިލް ހަމަ އެންމެ ލޯބިވަނީ އޭނަ ދެކެ ކަން ޔަޤީން ކުރެވުނެވެ. އޭނަ އުޅޭހާ ‘ވަފާތެރި’ ކޮށް ރާފިލް ނުއުޅުނަސް ރާފިލް ފަހުން ބަދަލުވާނެކަމަށް ނިންމުނެވެ. ‘ސޯލްމޭޓް’ އަށް ވިޔަސް ދެމީހުންގެ ދެމެދުގައި ތަފާތުތަކެއް ވާނެ ނޫން ހެއްޔެވެ؟ ޖެހޭނީ އެ ތަފާތުތަކާއި އެކީ އުޅެން ދަސްކުރަން ކަމަށް ހިލްޔާގެ ހިތް ބުންޏެވެ.

ކޮންމެ ގޮތެއްވިޔަސް ރާފިލްގެ ފަހު ޖުމްލައާއިމެދު ހިލްޔާއަށް އެދުވަހު ވިސްނުނެވެ. ރާފިލް އާޚިރަތާއިމެދު ޝައްކު ކުރަނީތޯ ހިތަށްއެރިއެވެ. ހިލްޔާ ކިތަންމެ ދީނާއި ދުރުވިޔަސް ޣައިބުގެ އެއްވެސް ކަމަކާމެދު ހިލްޔާއަށް ޝައްކެއް ނުކުރެވެއެވެ. އެހުރިހާ ކަމަކީ ވެސް ޙަޤީޤަތް ކަން އަދި ވެސް ޤަބޫލު ކުރެވެއެވެ. އެކަންތައް އޭނަ ޤަބޫލު ކުރާ ވަރަށް ޤަބޫލު ނުކުރާ މީހަކާއެކީ އުޅެވޭނެހެން ހިއެއް ނުވެއެވެ. އެހެނަސް ދެންވެސް އަމިއްލަ ޚިޔާލުތަކުގެ ތެރެއިން ރާފިލް ދިފާޢު ކުރެވުނެވެ. އޭނަ ރާފިލްއަށް ދީން އުނގަންނައި ދިނުމުން ރާފިލް ބަދަލުވެދާނެއޭ ހިތަށްއެރިއެވެ.

ހިލްޔާ އަމިއްލަ ޚިޔާލުތަކުގައި އިނދެ ކުރިމަތީގައި ހުރި ކަޕް ނޫޑުލްސް ތަށިން ކަމުން ދަނިކޮށް ވާރޭ ވެހެން ފެށިއެވެ. ވާރޭ ތިކިތަށް އޭނަގެ ކުރިމަތީގައި ހުރި ބިއްލޫރިގަނޑުގައި ޖެހި ފައިބަން ފެށި މަންޒަރު ފެނި، އާދައިގެ މަތިން ހިލްޔާގެ ދޫ ޙަރަކާތް ކުރިއެވެ.

“اللّهُمَّ صَّيِّبًا نَافِعًا….يَا مُقَلِّبَ الْقُلُوْب, ثَبِّتْ قَلْبِي عَلَى دِيْنِكَ.”

އާދައިގެ މަތިން ދުޢާ ކުރެވިއްޖެކަން ވެސް ހިލްޔާއަށް އެނގުނީ ދުޢާ ކިޔައި ނިމުނު ފަހުންނެވެ. ހަމަ އެހިނދު ދުޢާ ކުރެވުނީ ކީއްވެކަން ހަނދާންވިއެވެ. ވާރޭ ވެހޭ ވަގުތަކީ ދުޢާ އިޖާބަ ކުރެވޭ ވަގުތުކަން ހަނދާންވި ހިނދު އެހެން ދުޢާއެއް ވެސް ކުރެވުނެވެ.

“رَبَّنَا هَبْلَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِيْنَ إِمَامًا”

“އަޅަމެންގެ ވެރިރަސްކަލާކޮ! އަޅަމެންގެ ޙަޔާތުގެ ބައިވެރިންނާއި، އަޅަމެންގެ ދަރިންގެ ކިބައިން ލޮލުގެ ފިނިކަމެއް އަޅަމެންނަށް ދެއްވާނދޭވެ! އަދި އަޅަމެންނީ ތަޤްވާވެރިންގެ މައްޗަށް އިމާމުން ކަމުގައި ލައްވާނދޭވެ!”

ހިލްޔާ އެ ދުޢާ ކިޔާލި ހިނދު ޢަރަބި އެނގުނެއްކަމަކު އޭގެ މާނައާއިމެދު މާ ބޮޑަށް ނުވިސްނައެވެ. ހަނދާން ހުރިހާ ވެސް ކަމަކީ އެ ދުޢާ ކުރުމުން ނުހަނު ރީތި ޒަވާޖީ ޙަޔާތެއް ލިބޭނެކަން އޭނައަށް ފުރާވަރުގައި ދަސްވި ކަމެވެ. އެ ދުޢާ ކުރި ހިނދު ހިލްޔާ އުއްމީދު ކުރަމުން ދިޔައީ ރާފިލްއާއިއެކީ އެ ރީތި ޒަވާޖީ ޙަޔާތް ލިބިގެން ދިޔުމަށެވެ. އެހެނަސް އެ ދުޢާގެ ފުންކަން ހިލްޔާއަށް އެވަގުތު އިޙްސާސެއް ނުކުރެވެއެވެ.

ކައިވެންޏަކީ ﷲ ބާވައިލެއްވި ގުޅުމެކެވެ. އެ ދުޢާއަކީ ﷲ ތަޢާލާ ޤުރުއާނުގައި ދަސްކޮށްދެއްވާފައިވާ ދުޢާއެކެވެ. ﷲ އެންގެވި ގޮތް ނޫން ގޮތްގޮތަށް އުޅެގެން ކައިވެންޏަކުން ލޮލުގެ ފިނިކަން ލިބޭނީ ފަހެ ކިހިނެއް ހެއްޔެވެ؟ ތަޤްވާވެރިންގެ ޢާއިލާއެއް ބިނާ ކުރުމަށްޓަކައި އަމިއްލައަށް ވެސް ތަޤްވާވެރިވާން ޖެހެއެވެ. އަދި އިންނަން އުޅޭ މީހަކީ ވެސް ތަޤްވާވެރިއެއްކަމަށް ހަދަން ޖެހެއެވެ. ވީއިރު ހިލްޔާ ދެންމެ އެ ކުރި އުއްމީދު ފުރިހަމަ ވާނީ ކިހިނެއް ހެއްޔެވެ؟

ކޮންމެ ގޮތެއްވިޔަސް ﷲ އަކީ އެންމެ ފަޟްލަވަންތަ އެންމެ ރަޙީމްވަންތަ ރަސްކަލާނގެއެވެ. އެކަލާނގެއަށް އަޅުން ކުރާ ކޮންމެ ދުޢާއެއް އެކަލާނގެ އިޖާބަ ކުރައްވައެވެ. ދުޢާ އިޖާބަ ކުރެވިގެން ދަނީ ކޮންމެހެން އިންސާނާ އެންމެ ބޭނުންވާ ގޮތަކަށް ނޫނެވެ. ދުޢާ އިޖާބަވެގެން ދަނީ އިންސާނާއަށް އެންމެ ރަނގަޅުވާނެ ގޮތަށެވެ. އެހެނީ ﷲ މޮޅަށް ދެނެވޮޑިގެންވެއެވެ. އިންސާނާއަށް ނޭނގޭނެއެވެ.

އެ ކުރި ދުޢާއަށްފަހު ހިލްޔާ ރާފިލްއާއި އޭނަގެ ގުޅުން ބަދަހި ކުރުމަށްޓަކައި ކޮންމެވެސް ކަމެއް ކުރަން ބޭނުންވިއެވެ. އެހެންކަމުން އެރޭ އެ ފިހާރައިން ނިކުމެގެން ދިޔައީ، ރާފިލްއަށް މީރު ބްލޫބެރީ ޗީޒް ކޭކްކޮޅެއް ގަނެގެންނެވެ. ޕެކްކޮށްފައިވާ ކޭކްކޮޅު އެޅިފައިވާ ހުދު ކުލައިގެ ކޮތަޅު ހިފައިގެން ވާރޭ ތެރެއިން ގޮސް ހިލްޔާ ޓެކްސީއަކަށް އަރީ އެމީހުން އުޅޭ އެޕާޓްމެންޓް ބިލްޑިންގްއަށް ދިޔުމަށެވެ.

ޢިމާރާތުގެ ލިފްޓަށް އަރައި އަމިއްލަ ފްލޯ ނަންބަރުގެ ބަދަލުގައި ހިލްޔާ ފިތާލީ ރާފިލްގެ ފްލޯ ނަންބަރަށެވެ. އެހިނދު ހިނިތުންވެލެވުނެވެ. މިއީ އޭނަ އަމިއްލައަށް އިސްނަގައިގެން ރާފިލްގެ ފްލޯއަށް ދާ ފުރަތަމަ ފަހަރެވެ. އޭނަ މި ހަދިޔާ ދިނުމުން ރާފިލް އުފާވާނެ ގޮތް ހިލްޔާއަށް ސިފަ ކުރެވެމުން ދިޔައެވެ. ހަމަ އެހިނދު ފޯނުގެ ނޮޓިފިކޭޝަނަކުން ފަތިސް ނަމާދު ވަގުތުވީ ކަން އެނގުންވުމުން އިތުރު އުފަލެއް ލިބުނެވެ. ފަތިސް ނަމާދުގެ ކުރިން އޭނައަށް ރޯދައަށް ނިޔަތް ގަނެވިފައިވާކަން ހަނދާންވުމުންނެވެ. އަދި ކުރިއަށް އޮތް ދުވަހަކީ އޭނަގެ އޮފް ދުވަހެވެ. މިއީ ހުރިހާ ގޮތަކުން ވެސް ރަނގަޅު ދުވަހެއްތާއޭ ހިތަށްއެރިއެވެ.

އެ އުފަލާއިއެކީ ހިލްޔާ ރާފިލްގެ ފްލޯއަށް ގޮސް ލިފްޓުން ނިކުތެވެ. އަދި ކޮޓަރިތަކުގެ ނަންބަރުތަކަށް ބަލަމުން ގޮސް 806 ވަނަ ދޮރާއި ހަމަވުމުން ހިލްޔާ އެ ދޮރު ކުރިމަތީގައި މަޑުކޮށްލިއެވެ. ނަންބަރަށް ބަލައިގެން ހުރެ ހިނިތުންވެފައި ހިލްޔާ ދޮރު ކައިރީގައި ހުރި ބެލް ސްވިޗަށް ފިތާލިއެވެ. ކުޑަ އިރުކޮޅެއްގެ ތެރޭގައި ރާފިލް އައިސް ހުޅުވާނެ ކަމަށް އުއްމީދު ކުރެވުނެވެ.

އެހެނަސް މިނެޓަކަށްވުރެ ގިނައިރު ވީއިރު ވެސް ރާފިލް ނުހުޅުވުމުން ރާފިލް މިވަގުތު އޮންނާނީ ނިދިފައިތާއޭ ހިތަށްއެރިއެވެ. ދާން ޚިޔާލުކޮށްފައި ވެސް އަނެއްކާވެސް ބެލް އަޅުވާލެވުނީ ރާފިލް ދެކެން ބޭނުންވެފައިވި ވަރުންނެވެ. ރާފިލް އޭނައަށް އެއްގޮތަކަށް ވެސް ނުފެންނަތާ މިހާރު 3 ދުވަސް ވެއްޖެއެވެ. ރާފިލް ވެސް އޭނަ ދެކެން ބޭނުންވެފައިވާނެ ކަމަށް ޤަބޫލުކުރެވުނެވެ. ދެމީހުންގެ ޑިއުޓީ ތަފާތު ވާ ދުވަސްދުވަހު ވެސް ފަތިހު ދެމީހުން ގޭގައި ތިބޭނެތިވެއެވެ. ފަތިހު ހިލްޔާއާއި ދިމާނުކުރަނީ ހިލްޔާއަށް އުދަގޫވެދާނެތީ ކަމަށް ރާފިލް ބުނެފައިވާތީވެއެވެ.

މި ޚިޔާލުތަކުގައި ހުރެ ހިލްޔާއަށް ދޭތެރެ ދޭތެރެއިން ތަކުރާރުކޮށް ބެލް އެޅުވުނެވެ. ފަސްވަނަ ފަހަރު ބެލް އަޅުވަން އުޅުނު ވަގުތު އެ ދޮރު ހުޅުވެން ފެށިއެވެ. ހިލްޔާ ފުރިހަމައަށް ހިނިތުންވިއެއްކަމަކު، އެ ހިނިތުންވުން ފޭދިގެން ދިޔައީ، ބާތް ރޯބެއް ލައިގެން ނިދި އައިސްފައި ހުރި އިނގިރޭސި އަންހެން ކުއްޖަކު ފެނުމުންނެވެ. އޭނައަށް މި އާދެވުނީ ނުބައި ކޮޓަރިއަކަށްބާއޭ ހިތަށް އެރި ހިނދު އަންހެން ކުއްޖާގެ ފަހަތުން ރާފިލްގެ އަޑު އިވުނެވެ.

“ހޫ އިޒް އިޓް؟” އެ ސުވާލު ކުރަމުން އައިސް އެ އަންހެން ކުއްޖާގެ ފަހަތުގައި ހުއްޓިލީ، ގަދަކަމުން ލޯ ހުޅުވައިގެން، ހަމައެކަނި ސޯޓެއްގައި ހުރި ރާފިލްއެވެ.

ހިލްޔާއަށް އެ ފެނުނު މަންޒަރު ޤަބޫލުކުރަން ދަތިވިއެވެ. އެ މަންޒަރު ދޭހަކުރަން ވެސް ވަގުތުކޮޅެއް ނެގިއެވެ. ރާފިލްއާއި އޭނަގެ ހަތަރުކަޅި ހަމަވީ ވަގުތު ރާފިލްގެ ލޯ ކުއްލިއަކަށް ބޮޑުވެގެން ދިޔުމުން ހީކުރެވުނު ހީކުރުން ޔަޤީން ކުރެވުނެވެ. އެހިނދު ހިލްޔާ ހިފަހައްޓައިގެން ހުރި ކޮތަޅު އަތުން ދޫވެގެން ގޮސް ބިންމަތީގައި ޖެހުނެވެ.

ނުނިމޭ