ނަފްސީ (ބަޔާޅީސްވަނަ ބައި)

“ޖެނުއަރީ 1 ގެ ފަހަށް މަޑު ނުކުރެވޭނެތަ؟ ޖެނުއަރީ 1 ގަ ހިލްޔާގެ ކައިވެނި އެބައޮތް ޔޫކޭގަ. އެހެންވެ އެ ތާރީޚަށް ފުރަން ނަހީދުބެ މިއުޅެނީ. ދާނިޝް މިކޮޅުގަ ހުރިއްޔާ ހިތްހަމަޖައްސައިގެން ބޭބެއަށް ފުރޭނެ.” ނަހީދުބެ އެދުނެވެ.

 

އެހިނދު ދާނިޝް ހިމޭންވާ ގޮތްވިއެވެ. އަނެއްކާވެސް ހިލްޔާގެ ކައިވެނީގެ ވާހަކައިން ހިތުގައި ރަނގަޅުވާން ފަށާފައިވި ޒަޚަމަށް އަނެއްކާވެސް ތަދުވިއެވެ.

 

“ދާނިޝް؟”

 

ދާނިޝް އެއްޗެކޭ ނުބުނެ ގިނައިރުވާން ފެށުމުން ނަހީދުބެ ގޮވާލި އަޑު އިވުނެވެ. އެއާއިއެކު ދާނިޝްއަށް ހަމަހޭވެރިކަމެއް ލިބުނެވެ.

 

“އޮ…އޯކޭ ބޭބޭ.” ދާނިޝްއަށް އަވަސްއަވަހަށް މާ ބޮޑު ވިސްނުމެއް ނެތި ބުނެވުނެވެ. އެހިނދު ބުނެވުނު ބަސްތަކާއިމެދު ހިތާމަ ކުރެވުނެވެ. އޭނައަށް ހިލްޔާ މަތިން ހަނދާން ނައްތާލަން ފަސޭހަވާނީ ރާއްޖެއިން ވީހާވެސް އަވަހަކަށް ދިޔުމުންހެން ހީވީތީވެއެވެ.

 

“އޯކޭ ދާނިޝް. ތޭންކްސް އަ ލޮޓް. ބޭބެ މާ ގިނަ ދުވަސް ނުކޮށް އަންނާނަން އިން ޝާ ﷲ!”

 

ނަހީދުބެ ބުންޏެވެ. އެއާއިއެކު ދާނިޝް އޯކޭ ދިނުމުން ނަހީދުބެ ކޯލު ނިންމިއެ

 

ދާނިޝް ފޯނު ތިރިކޮށްލަމުން ފުން ނޭވައެއް ދޫކޮށްލި ހިނދު، އޭނަ ނުހަނު ދަންނަ ރިހުމެއް މޭގައިވިއެވެ. އެއީ މީގެ މަސްތަކެއް ކުރިން ވެސް މޭގައި އުފެދުނު ރިހުމެވެ. ހިލްޔާއާއި ރާފިލްގެ ކައިވެނީގެ ވާހަކަ އެންމެ ފުރަތަމަ ނަހީދުބެ ގެ ދުލުން އިވުނު ދުވަހު މޭގައި އުފެދުނު ރިހުމެވެ. އެރޭ ގެއަށް ގޮސް އެކަނިމާއެކަނި ނަމާދު ކުރަމުން ދިޔައިރު ރޮއްވާލި ރިހުމެވެ. ހިލްޔާއާއި އިނުމަށް އޭނަ ކުރި އުއްމީދުތައް ވިއްސިވިހާލިވި ކަން ޔަޤީންވި ހިނދު ހިތުގައި އުފެދުނު ރިހުމެވެ. އޭގެ ދުވަސްކޮޅެއް ފަހުން ނޫސްތަކުން ފެނުނު ހިލްޔާއާއި ރާފިލްގެ ފޮޓޯތައް ފެނިފައި ހިތުގައި އުފެދުނު ރިހުމެވެ.

 

އެ ހުރިހާ ކަމެއް އަނެއްކާވެސް ހަނދާންވެގެން ދިޔަދިޔަހެން ދާނިޝްގެ ހިތް މޭތެރޭގައި އޮވެ ގެނބުނެވެ. ލޮލުން ދިލަ ނަގަން ފެށިހެން ހީވި ހިނދު އަވަސްއަވަހަށް އެސްފިޔަ ޖަހާލަމުން ބެލްކަނިން ނިކުންނަން ހިނގައިގަނެވުނެވެ.

 

ބެލްކަނިން ނިކުތް ގޮތަށް ދާނިޝް މަޑު ނުކޮށް ފަޔާޒްގެ އެޕާޓްމެންޓުން ވެސް ނިކުމެގެން ދާން އުޅުނެވެ.

 

“އޭ ދާނިޝް ކޮން ތަނަކަށް؟” ސިޓިންގް ރޫމުގެ ސޯފާގައި އިން ފަޔާޒް އެހިއެވެ.

 

“މިސްކިތަށް.” ދާނިޝް ފަޔާޒަށް ލުއި ނަޒަރެއް ދިނުމަށްފަހު ކުރު ޖަވާބެއް ދިނެވެ. އަދި އެވަގުތު ހިފަހައްޓައިގެން ހުރެވުނު އެޕާޓްމެންޓް ދޮރުގެ ތަޅު އަނބުރާލަމުން ނިކުތީ، ފަޔާޒަށް އިތުރު އެއްޗެކޭ ބުނެވުމުގެ ކުރިންނެވެ.

 

ދާނިޝް ލޯ މައްޗަށް ގެއްލުމުން ފަޔާޒަށް ޙައިރާންކަމެއްގެ ތެރޭގައި އިނދެވުނެވެ. މީގެ އިރުކޮޅެއްކުރިން ދެމީހުން އެކީގައި މިސްކިތަށް ދާ ވާހަކަ ދާނިޝް ބުނެފައިވާތީވެއެވެ. ކޮންމެވެސް ގޯހެއް ވެއްޖެކަން ފަޔާޒަށް ޔަޤީންވީ އެވަގުތެވެ.

 

**

 

ދާނިޝް ފަޔާޒް ގާތު ބުނި ފަދައިން އެ ދިޔަ ގޮތަށް ދިޔައީ މިސްކިތަށެވެ. މާޒީގައި ހިތަށް އުދަގޫވާ ކަމެއް ދިމާވާއިރަށް އަމިއްލަ އެޕާޓްމެންޓަށް ދެވުނަސް، މިހާރު ދާނިޝްއަށް އަބަދުވެސް ދެވެނީ މިސްކިތަށެވެ. އެއީ އޭނަގެ ހިތުގެ ޙާލަތު މޮޅަށް ދެނެވޮޑިގެންވާ ފަރާތުގެ ގެ ކޮޅުކަން ހަނދާން ހުންނާތީވެއެވެ.

 

މިސްކިތަށް ގޮސް ވުޟޫކުރަމުން ދިޔަ ވަގުތު ވެސް ދާނިޝްގެ މޭގައިވި ރިހުން ނުފިލައެވެ. ލޯމަތިން ސިފަވަމުން ދިޔަ މަންޒަރުތަކުން އެ ރިހުން އިތުރަށް ގޯސްވުން ނޫންކަމެއް ނުވިއެވެ. ވުޟޫ ކުރުމުގެ ތެރެއިން ލޮލުން ކަރުނަ ފޭބިއެއްކަމަކު މޫނު ދޮވެލަމުން ދާނިޝް އެ ކަރުނަތައް ފޮރުވިއެވެ.

 

އެހެނަސް އާދައިގެ މަތިން ދާނިޝްއަށް އެ ކަރުނަތައް ނުފޮރުވުނީ މިސްކިތަށް އަރައި، ދެ ރަކުޢަތުގެ ނަމާދެއް ކުރަން ފެށުމުންނެވެ. އާދައިގެ މަތިން ދާނިޝްއަށް އެ ހިތުގެ އުދާސްތައް ބަންޑުން ކޮށްލެވުނީ ސަޖިދައިގައެވެ. ސަޖިދައިގައި ދިވެހި ބަހުން ވެސް ﷲ އަށް ދުޢާ ދެންނެވިދާނެކަން އެނގިފައިވާތީ މިފަހަރު ދާނިޝްގެ ބަސްތައް ދުލުން ނިކުތެވެ.

 

“ޔާ ﷲ! ހިލްޔާ އުޅެނީ ރާފިލްއާއި ކައިވެނި ކުރަން. އެ ވާހަކަ އަހަންނަށް އިވުނީ ދެންމެ. އެކަމާ އަހަރެން…..ވަރަށް ދެރަވެއްޖެ. ހީނުކުރަން މިހާ ދެރަވެދާނެ ކަމަށް. މި ހުރިހާ ދުވަސްވީއިރު ވެސް ހިލްޔާ އަހަރެންގެ ގާތަށް އަނބުރާ އަންނާނެ ކަމަށް އުއްމީދު ކުރެވިފައިވީ. އެކަން އެނގުނީވެސް ހަމަ މިއަދު. ޔާ ﷲ! މި އަޅާގެ ހިތުގައި ހިލްޔާއަށްޓަކައި މިވާ އިޙްސާސްތަކުން އަރައިގަތުމަށް މި އަޅާއަށް އެހީވެދެއްވާ. އަދި….ހިލްޔާއަށް އުފާވެރި ދިރިއުޅުމެއް މިންވަރު ކޮށްދެއްވާ.”

 

އެތައް ދުވަހެއް ފަހުން އަނެއްކާވެސް ސީދާ ހިލްޔާއަށްޓަކައި ދުޢާ ކުރެވުމުން ދާނިޝްއަށް ގިސްލެވިފައި ރޮވުނެވެ. ހިތުތެރޭގައި ހިލްޔާއަށްޓަކައިވި އިޙްސާސްތައް އުތުރި އަރައިގެން ދިޔަ ހިނދު ހިލްޔާއާއިމެދު ކަންބޮޑުވެސް ވިއެވެ. ރާފިލް ހިލްޔާ ރަނގަޅަށް ބަލަހައްޓައިދޭނެތޯ މީހެއްތޯ ހިތަށްއެރިއެވެ. އޭނަ މި ލޯބިވާ ފަދައިން ރާފިލް ހިލްޔާދެކެ ލޯބިވާނެތޯ ހިތަށްއެރިއެވެ. އެކަމާއިމެދު ހިތުގައި ޝައްކު އުފެދުނެވެ. ރާފިލްގެ ބަހުރުވަ ހުންނަ ގޮތާއި އަޚްލާޤް މަތިން ހަނދާންވުމުންނެވެ. ތަކުރާރުކޮށް ނަމާދު ތެރެއިން ހިލްޔާގެ ރައްކާތެރިކަމަށްޓަކައި ދުޢާ ކުރެވުނީ އެހެންވެއެވެ.

 

ދެ ރަކުޢާތުގެ ސުންނަތް ނަމާދުކޮށް ނިމުނުއިރު، ދާނިޝްގެ ލޮލުން ކަރުނަ ހުސްވެފައިވި ފަދައެވެ. ސަލާމް ދިނުމަށްފަހު ދާނިޝް އިސްޖެހިފައި އިންތާ އިށީނދެގެން އިނެވެ. އެހިނދު އެ މޫނަށް ގާތުން ބަލައިފި މީހަކަށް އެ މޫނުމަތީގައިވި މާޔޫސްކަމާއި، ތެމިފައިވި އެސްފިޔަތައް ފާހަގަވާނެއެވެ.

 

ދާނިޝް އެހެން އިންދާ އެންމެ ފުރަތަމަ މިސްކިތަށް ވަދެގެން އައީ ފަޔާޒެވެ.

 

“ބަލާބަލަ އަހަރެން ޑިޗްކޮށްލާފަ އައިސް އިން ގޮތް.” ފަޔާޒް ގޮސް ދާނިޝްގެ ކައިރީގައި ހުއްޓިލަމުން ބުންޏެވެ.

 

ފަޔާޒް ހީކުރީ އޭނަ ބުނި އެއްޗެއްގެ ރައްދުގައި ދާނިޝް އެއްޗެކޭ ބުނާނެ ކަމަށެވެ. އެހެނަސް ދާނިޝް ކުޑަ ޙަރަކާތެއްވެސް ނުގެނައުމުން، ނަމާދު ފެށުމުގެ ކުރިން ދާނިޝްގެ ޙާލު ބަލާލަން ބޭނުންވިއެވެ.

 

“ބްރޯ އާރ ޔޫ އޯކޭ؟ ރޮވިފަތަ ތިހިރީ؟” ފަޔާޒަށް ދާނިޝްގެ ހިތާމަވެރި މޫނު ފާހަގަވުމުން ކުރުފައިމައްޗަށް ތިރިވެލެވުނެވެ. ދާނިޝްގެ މަޑުމޮޅިކަމުގެ ސީރިއަސްކަން އެނގުންވީ، އޭނަ ސުވާލުތައް ކުރުމުން ވެސް ދާނިޝް ހިމޭންވެފައި އިނުމުންނެވެ. އޭނައަށް ބަލާވެސް ނުލުމުންނެވެ.

 

އެ ހިމޭންކަމުގެ ތެރެއިން ފަޔާޒް އެއްޗެކޭ ބުނަން އުޅުނު ވަގުތު ދާނިޝް ވާހަކަ ދެއްކިއެވެ.

 

“ހިލްޔާ އުޅެނީ މެރީ ކުރަން. 1 ޖެނުއަރީ ގަ.” ދާނިޝް ބުންޏެވެ. އެހިނދު ފަޔާޒްގެ ދެބުމަ ކައިރިވިއެވެ.

 

“ހިލްޔާ…އޭ ތިބުނީ؟ އެއްކަލަ ކުއްޖާ؟!” ފަޔާޒް ކުއްލި ގޮތަކަށް އެހެން ބުނެލީ ދާނިޝް އެކި ދުވަސްމަތިން ކިޔައިދީފައިވާ ވާހަކަތައް ހަނދާން ކުރަމުންނެވެ. އެހިނދު ދާނިޝް ބޯޖަހާލިއެވެ.

 

“ފަޔާޒް….އަހަންނަށް އެނގޭ ފަޔާޒް ބުނިކަން ހިލްޔާއަށްޓަކައި ދުޢާ ކުރުމުގެ ބަދަލުގަ ފިއުޗާރ ވައިފްއަށްޓަކައި ދުޢާ ކުރާށޭ. އެއީ ރަނގަޅު ނަސޭޙަތެއް. އެކަމަކު….1 ޖެނުއަރީ އާއި ޖެހެންދެން އަހަންނަށް ހިލްޔާއަށްޓަކައި ދުޢާ ކުރެވިދާނެތަ؟ 1 ހަފްތާ ދެން އޮތީ. މި 1 ހަފްތާ ވަންދެން އަހަންނަށް ހިތާމަ ކުރެވިދާނެތަ؟ އެއަށްފަހު އަހަރެން ދެން ހަނދާން ނުކުރާނަން ހިލްޔާ މަތިން އިން ޝާ ﷲ.” ދާނިޝް މަޑު އަޑަކުން ދައްކަމުން ދިޔަ އެ ވާހަކަ ނިމުނީ ރޫރޫ އަޅާ އަޑަކުންނެވެ. އެހިނދު އެ ލޮލުން ކަރުނަތައް ފައިބައިގެން އައެވެ.

 

ދާނިޝްގެ ވާހަކަތަކުންނާއި އެ ކަރުނަތަކުން ދާނިޝް ދެރަވެފައިވާ މިންވަރު އެނގުމުން ފަޔާޒް ވެސް ދެރަވާ ގޮތްވިއެވެ. އޭނައަށް ވައި އަޑުން ދާނިޝްގެ ނަމުން ގޮވާލަމުން ދާނިޝްގެ ބުރަކަށީގައި ފިރުމާލެވުނެވެ. އެހިނދު ދާނިޝްއަށް އަނެއްކާވެސް ގިސްލެވެން ފެށިއެވެ. އެހެން އެއްވެސް ކަމަކަށްވުރެ ބޮޑަށް މޭގައި ރިއްސަމުން ދިޔައީ، ހިލްޔާ އިންނަން އުޅެނީ ހިލްޔާ އެންމެ އުފަލުގައި ގެންގުޅޭނެ މީހަކާއި ނޫންހެން ހީވަމުން ދިޔައީތީވެއެވެ.

 

**

 

އެއީ ހަމައެކަނި ދާނިޝްގެ ކަންބޮޑުވުމެއް ނޫނެވެ. ލަންޑަނަށް ދިޔުމަށްޓަކައި ދަތުރު ހަދައިގެން ފްލައިޓަށް އެރި ނަހީދުގެ ހިތު ތެރޭގައި ވެސްވީ ހަމަ އެ ކަންބޮޑުވުމެވެ. ހިލްޔާ ރޮވިފައިވާ އަޑަކުން އާދޭސްކޮށްފައި އޭނަ ގާތު އައިސްދިނުމަށް އެދުމުން އުފާވިއެއްކަމަކު އޭގެއިން ލިބެންޖެހޭ ހިތްހަމަޖެހުމެއް ނުލިބުނެވެ. ކައިވެނި ކުރަން އުޅޭ އަންހެން ކުއްޖެއްގެ ފަރާތުން ފެންނަން ޖެހޭ އުފާވެރިކަމެއް ހިލްޔާގެ ވާހަކަތަކުން އެންމެ ފަހަރަކު ވެސް ނަހީދަށް އިވިފައެއް ނުވެއެވެ. ނަހީދު އުއްމީދު ކުރަމުން ދިޔައީ އެކޮޅަށް ގޮސް ހިލްޔާ ފެނުމުން އޭނަގެ މި ޚިޔާލު ބަދަލުވާނެ ކަމަށެވެ. ހިލްޔާގެ މޫނުމަތިން އުފާވެރިކަން ފެނި، އޭނަގެ ހިތަށް ހަމަޖެހުމެއް ލިބޭނެ ކަމަށެވެ.

 

އެހެނަސް ރޭގަނޑުގެ ވަގުތެއްގައި، ހީތްރޯ އެއާރޕޯޓަށް ނަހީދު ބަލާ އައިސް ހުރި ހިލްޔާ ފެނުމުން ނަހީދުގެ ހިތް ކުދިކުދިވިއެވެ. ރާފިލްގެ ކައިރީގައި ހުއްޓިލައިގެން ހުރީ އޭނަ މާލެއިން ލަންޑަނަށް ފޮނުވި ހިލްޔާއެއް ނޫނެވެ. އެ މޫނުމަތި ވަނީ މިލާފައެވެ. ކުޑަވެސް އުޖާލާކަމެއް ނެތެވެ. އޭނަ ފެނިފައި ހިލްޔާ ހިނިތުންވިއެއްކަމަކު އެ ހިނިތުންވުން ލޮލާއި ހަމައަށް ނުފޯރައެވެ. ލޯމަތިން ހީވަނީ ދެންމެދެންމެ ރޮވިދާނެ ހެންނެވެ. ހިލްޔާ ލައިގެން ހުރި ކަޅުކުލައިގެ އަބާޔާއިން އެ ހަށިގަނޑު ފާހަގަ ނުވިޔަސް، ފާއިތުވި މަސްތަކުގެ ތެރޭ ހިލްޔާ ހިކިފައިވާ ވަރު އެ މޫނުމަތިން ވެސް އެނގެއެވެ.

 

އެއާރޕޯޓު ތެރެއިންނާއި، އެއާރޕޯޓުން އެޕާޓްމެންޓަށް ދިޔަ މަގުމަތީގައި ވެސް ގިނައިން ވާހަކަ ދެއްކީ ރާފިލްއެވެ. ރާފިލް އުފަލާއެކީ ކައިވެނީގެ ތައްޔާރީތަކުގެ ވާހަކަ ދައްކަމުން ދިޔައިރު ވެސް، ހިލްޔާގެ މޫނުމަތިން އުފާވެރިކަމެއް ފާހަގައެއް ނުވެއެވެ. ހިލްޔާއާއި ކުރެވެމުން ދިޔަ ސުވާލުތަކަށް ކުރު ޖަވާބެއް ދިނުން ނޫން ގޮތަކަށް ހިލްޔާ އެއްވެސް ވާހަކައެއް ވެސް ނުދައްކައެވެ. މި ކަންތަކުން ނަހީދުގެ ކަންބޮޑުވުން އިތުރުވުން ނޫންކަމެއް ނުވިއެވެ. އަދި އަމުދުން ހިލްޔާގެ ޙާލަތު ރާފިލްއަށް ނުވިސްނޭހެން ހީވުމުން ރާފިލްއަށް ނުރުހުންވާ ގޮތްވިއެވެ.

 

އެރެއިން އެރެއަށް ވެސް ނަހީދު ހިލްޔާ ގާތު ރާފިލްއާއި ވަކިވުމަށް ބުނަން ބޭނުންވިއެވެ. ހިލްޔާ ކޮންމެހެން ހިލްޔާ ބޭނުންނުވާ ކައިވެންޏެއް ކުރަން ނުޖެހޭނެކަމަށް ބުނަން ބޭނުންވިއެވެ. އެހެނަސް އެ އިޙްސާސްތަކުން ހަނދާނަށް އައީ އޭނައާއި ހިލްޔާއާއި ދެމެދު ހޫނު ބަހުސްތައް ހިނގި ދުވަސްވަރެވެ. އެ ދުވަސްތައް އަނބުރާ ގެންނާކަށް ނަހީދު ބޭނުމެއް ނުވެއެވެ. އަދި އަމުދުން މިއަދު ހިލްޔާ ހުރީ އެފަދަ ޖަދަލެއް ކުރެވޭނެ ފަދަ ޙާލަތެއްގައި ހެނެއް ހިއެއް ނުވެއެވެ. އެފަދަ ވާހަކައެއް ފަށައިފިނަމަ ހިލްޔާ ބަލިކަށިވެ ރޮވުން ވެސް ގާތެވެ. އޭނައަށް ބުނެވިދާނެ ބަސްތަކުން ހިލްޔާއަށް ރޮވޭކަށް ނަހީދު އެއްގޮތަކަށް ވެސް ބޭނުމެއް ނުވިއެވެ. އެހެންކަމުން އަރާމު ކުރުމަށްފަހު އޭގެ އަނެއްދުވަހު ހިލްޔާއާއި ވާހަކަ ދައްކަން ނަހީދު ނިންމިއެވެ.

 

އޭގެ އަނެއްދުވަހު ހިލްޔާ ޑިއުޓީއަށް ދާން އޮތީ ހަވީރެވެ. އެހެނަސް ހިލްޔާ މިހާރުގެ އާދައިގެ މަތިން ފަތިސް ނަމާދަށްފަހު ނުނިދައެވެ. ނުވެސް ނިދޭތީވެއެވެ. ނުނިދާ ހުއްޓަސް ހިލްޔާ އެންމެ ހިނދުކޮޅަކަށް ވެސް ހުހަށް ނުހުރެއެވެ. ގޭތެރޭގެ ކަމެއް ނުކުރަންޏާ އިންނަނީ ކޮންމެވެސް މެޑިކަލް ރިސާޗެއް ކިޔާށެވެ. ކުޑަ ހިނދުކޮޅަކަށް ވެސް އޭނަ ކަމެއް ނުކޮށް ހުއްޓިލައިފިނަމަ، ސިކުނޑިއަށާއި ހިތަށް ބުނެދޭން ނޭނގޭ ބުރަކަމެއް ވެރިވެގެން ދާތީވެއެވެ.

 

އެދުވަހު ވެސް ފަތިސް ނަމާދަށްފަހު ކޮފީ ތަށްޓަކާއެކީ ހިލްޔާ އިށީނީ އޭނަގެ ކިޔަވާ މޭޒުދޮށުގައެވެ. އަދި ލެޕްޓޮޕުން ކޮންމެވެސް ދިރާސީ ކަރުދާހެއް ކިޔަން ފެށިއެވެ. އެ އަހަރު ތެރޭގައި ނެރެފައިވާ އެ ކަރުދާހުގައި ވަނީ ޖަޕާނުގެ ޞަރަޙައްދެއްގައި ހެއްދޭ މޭބިސްކަދުރު ކެއުމަށްފަހު އެތައް ބައެއްގެ ބަނޑުގައި ފާރު ހެދުނު މައްސަލައެއްގެ ވާހަކައެވެ. އެ ކަރުދާސް ލިޔެފައިވާ ޑޮކްޓަރު ވަނީ މޭބިސްކަދުރާއި، ބަނޑުގައި ހެދޭ ފާރާއި ދެމެދު ގުޅުމެއްވޭތޯ ނުވޭތޯ ހޯދަން މަސައްކަތް ކޮށްފައެވެ.

 

ހިލްޔާ އެ ކަރުދާސް ކިޔަމުން ދިޔައީ ނުހަނު ޝައުޤުވެރިކަމާއި އެކީގައެވެ. ރާއްޖޭގައި ހުރިއިރު އޭނައަށް އާފަލާއިމެދު ހީކުރެވުނު ހީކުރެވުމެއްގެ މަތިން ވެސް ހަނދާން ކުރަމުންނެވެ.

 

އެހެނަސް މިކަމާއިމެދު ވިސްނަން ހިލްޔާއަށް މާ ގިނައިރު ވަންދެން ނީނދެވުނެވެ. 7 ޖެހިއިރަށް އޭނަގެ ފޯނު އެލާމްވާން ފެށުމުންނެވެ. ބައްޕަ ޢާއްމު ގޮތެއްގައި 8 ޖަހާއިރު ހޭލާކަން އެނގޭތީ ހިލްޔާ އެވަގުތު ތެދުވެލީ، ނާސްތާ ތައްޔާރު ކުރުމަށެވެ.

 

ހިލްޔާ ގޭގައި ހުރި އެއްޗެއްސަށް ބަލާފައި އެވަގުތަށް ތައްޔާރުކޮށްލީ ކުޅި މަހެވެ. އެއަށްފަހު ރޮށިވެސް ފިހުމަށްފަހު ބައްޕައަށް ދޭން ބިސްގަނޑެއް އެޅިއެވެ. ހިލްޔާ ހީކޮށްގެން ހުރި ފަދައިން ކާ މޭޒުމައްޗަށް ހުރިހާ އެއްޗެއް އަރުވައި ނިމުނުއިރު ބައްޕަ ކޮޓަރިން ނިކުތީއެވެ.

 

“ހާދަ ވަރަކަށް ތި ތައްޔާރު ކޮށްލީ ދަރިފުޅު….” ނަހީދު ގޮސް ކާ މޭޒުދޮށުގައި އިށީންނަމުން ބުންޏެވެ.

 

“ހެހެ….އެހާ ވަރެއް ނޫން ބައްޕާ…ޓޯސްޓް ބޭނުން؟” ހިލްޔާ ބައްޕަގެ ކުރިމައްޗަށްވާ ގޮތަށް ހުރި ގޮނޑީގައި އަތް އަޅުވައިގެން ހުރެ އެހިއެވެ. އެހިނދު ބައްޕަ ކޮފީއެކޭ ބުނުމުން ހިލްޔާ ކޮފީ ހަދަން ދިޔައެވެ.

 

ހިލްޔާ އަނބުރާ އައީ ބައްޕައަށާއި އޭނައަށް ވެސް ކޮފީއެއް ހަދައިގެންނެވެ. އެއަށްފަހު އޭނައަށް ކާ ތަށްޓެއް ވެސް ނުނަގާ ނުހަނު ހަމަޖެހިލައިގެން ބައްޕަގެ ކުރިމަތީގައި އިށީނެވެ.

 

“ދަރިފުޅު ނުކަނީތަ؟” ނަހީދު އެހިއެވެ.

 

“މިވަގުތަށް ކޮފީއެއް ބޯލަން ބޭނުމީ.” ހިލްޔާ އެހެން ބުނެލަމުން ކޮފީ ތަށިން ކޯވަރެއް ދަމާލީ، އޭނަގެ މޫނުމައްޗަށް ވެރިވި އަސަރު ބައްޕައަށް ފޮރުވިދާނެ ކަމުގެ އުއްމީދުގައެވެ. މިފަހުން އައިސް އޭނަ ހުންނަނީ މުޅިން ވެސް ކާ ހިތް ކެނޑިފައެވެ. ކާން އުޅުނަސް އޯކަތް ދަމާތީ ނުކައި ހުންނަން ހިލްޔާއަށް ފަސޭހަވެފައިވެއެވެ.

 

“އެކަމަކު ތިހެން އުޅޭކަށް ނުވާނެއެއްނު ދަރިފުޅު؟ ދަރިފުޅު ޑޮކްޓަރަކަށްވީމަ އަދި މާ ރަނގަޅަށް އެނގޭނެއެއްނު ނުކެއިމަ ހަށިގަނޑަށް ލިބޭނެ ގެއްލުން؟” ނަހީދު ކަންބޮޑުވުމަކާއި އެކީ ބުންޏެވެ. އެހިނދު ހިލްޔާއަށް ބޭއިޚްތިޔާރުގައި ހީލެވުނެވެ. ބައްޕަގެ މިފަދަ ވާހަކަތައް އަޑުއަހަން އޭނަ ބޭނުންވެފައިވި މިންވަރު އެނގުންވީ އެވަގުތެވެ.

 

“ހެހެ….އޮފްކޯސް ބައްޕާ ތި ކަންތައް ކިޔެވުމުގައެއްނު ޢުމުރު މި ހުސްވަނީ؟ އެކަމަކު ދެން ކާ ހިތްވީމަ ކާންވާނީ ވެސް. ކޮބައިތަ ދޮންތައާއި އެލީއާއި މާމަ؟ ދޮންތަގެ ވޯކް ލައިފް ކިހިނެއް؟” ހިލްޔާ އެންމެން މަތިން ހަނދާންވުމުން އަހާލިއެވެ.

 

“ދޮންތަ ހަމަ ބަރާބަރު. ވަރަށް ބޭނުންވެގެން ސްކޫލަކަށް ޖޮއިން ކުރީ. އެސިސްޓެންޓް ޓީޗަރަކަށް ޖޮއިން ވިޔަސް މިހާރު ކޮންމެވެސް ޓީޗަރަކު ލީވްއަށް ދިޔައިމަ އިސްލާމް ކިޔަވައިދެނީ.” ނަހީދު ކިޔައިދިނެވެ.

 

“ސޯ ހެޕީ ފޯރ ހާރ. ދޮންތަގެ އަބަދުވެސް ޑްރީމް އެއީ. އަދި ކިރިޔާ އެ ފުރިހަމަ ވަނީ.” ހިލްޔާއަށް ހިނިތުންވުމެއްގައި އިނދެ ބުނެވުނީ ދޮންތައާއި މެދު ފަޚުރުވެރިވާ ޙާލުގައެވެ.

 

“އަސްލުވެސް. އެލީ ވެސް އެބައުޅޭ. ޖެނުއަރީގަ އޮތް އެގްޒާމަކަށް ދަސްކުރަނީ. އެ ނޫންނަމަ ތުއްތަ ވެޑިންގްއަށް ވަރަށް އަންނަން ވެގެން ހުރީ. މާމަ މި ދުވަސްކޮޅު ބަލިވެ އުޅޭތީ އަސްލު ބޮޑަށް ދޮންތަ ނައީ. އެއްކަލަ ގޮތަށް ރޯގާ ޖެހިގެން އުޅެނީ. ދަރިފުޅު ބުނި ގޮތަށް އިނގުރު ފެން ބުއީމަ ރަނގަޅު ވަމުން ދާ ވާހަކަ ބުނި. ބައްޕަ ފުރި ދުވަހު.” ނަހީދު ކިޔައިދިނެވެ.

 

“އެހެން ހެދީމަ ކުރީ ފަހަރުވެސް މާމަ ރަނގަޅުވީ. އިން ޝާ ﷲ ރަނގަޅުވާނެ. ހުރިހާ އެންމެން މަތިން ވެސް ވަރަށް ހަނދާންވޭ. މާޒިން ކޮއްކޮ މިހާރު ކުޑަކުޑަކޮށް ވާހަކަ ވެސް ދައްކާ ދޯ؟” ހިލްޔާ ހިނިތުންވުމެއްގައި އިނދެ އެހިއެވެ.

 

“އާނ….މަޖާ ސޮރެއް އެއީ ވެސް. ހިލްޔާ ދެން….ރަށަށް ދާނީ ކޮން ދުވަހަކު؟ ރަށަށް ދާން އޮތް ދުވަސްކޮޅު ތި މެރީ ކުރަނީދޯ؟ އެހެންވީމަ މި އަހާލެވުނީ.” ނަހީދު އެހިއެވެ.

 

އެއާއިއެކު ހިލްޔާގެ ހިނިތުންވުން ފޭދުނެވެ. ނުހަނު އަވަހަށް ރަށަށް ދާނަމޭ ބުނަން ބޭނުންވިއެއްކަމަކު ރާފިލް މަތިން ހަނދާންވިއެވެ. ރާފިލް އޭނައަށް ރަށަށް ދިޔަ ދޭނެ ކަމެއް ޔަޤީން ނުކުރެވުމުންނެވެ.

 

“ރާފިލް….ކައިރިން އެހީމަ އެނގޭނީ.” ހިލްޔާ އިސްއުފުލަން ބޭނުންނުވެފައި އިނދެ ބުންޏެވެ. ރާފިލްގެ ނަން ގަންނަންވުމުން ވެސް ހިތަށް އުދަގޫވެފައިވިއެވެ.

 

ހިލްޔާއަށް އައި ބަދަލު ނަހީދަށް މާ ރަނގަޅަށް ވެސް ފާހަގަވިއެވެ. ހިލްޔާގެ ހިނިތުންވުން ފޭދުމުން ނަހީދުގެ ވެސް މޫނުމަތި މިލައިގެން ދިޔައެވެ. ހިލްޔާގެ ޙަޔާތަށް އެޅިގެން އުޅޭ ނުބައި ހިޔަންޏަކީ ހަމައެކަނި ރާފިލްކަން އެވަގުތު ޔަޤީން ކުރެވުނެވެ.

 

“ދަރިފުޅު….ދަރިފުޅު ބައްޕަ ގާތު ވަރަށް ތެދުތެދަށް ބުނެބަލަ. ދަރިފުޅު ބޭނުންވޭތަ ރާފިލްއާއި އިންނަން؟” ނަހީދު އެހިއެވެ. އެހިނދު ހިލްޔާއަށް އިސްއުފުލައި ބައްޕައަށް ބަލާލެވުނެވެ.

 

“އިންނަން….ޖެހޭތީ ކަންނޭނގެދޯ ހުރިހާ ކަމެއް މިހާ ހިސާބަށް އަންނާނީ. ވަރަށް ޕަބްލިކްލީ އަހަރުމެން އެންގޭޖް ވެއްޖެ. އިންވިޓޭޝަންސް އަދި ނުފޮނުވުނަސް ރާފިލް އަހަރުމެންގެ ސާކަލްގެ ވަރަށް ގިނަ މީހުން ކައިރި އަހަންނާ މެރީ ކުރަން އުޅޭ ވާހަކަ ބުނެފި. ވެޑިންގްއަށް ބޭނުންވާ ހޯލްވެސް ބުކް ކުރި ވާހަކަ ރާފިލް ބުނި. މިއަދު މިއުޅެނީ ވެޑިންގް ޑްރެސް ގަންނަން ދާން. މިހާ ހިސާބަށް އައިސް ދެން އިންނަން ބޭނުންނުވެއޭ ބުނާކަށް ނުވެސް ވާނެ ކަންނޭނގެ ދޯ؟ ހެހެ…..” ހިލްޔާ ވިސްނުމަކަށް ގެއްލިފައި އިނދެ ވާހަކަ ދެއްކިއެވެ.

 

އެއީ ޙަޤީޤަތުގައި ވެސް ހިލްޔާއަށް ކުރެވެމުން ދިޔަ އިޙްސާސްތަކެވެ. އޭނަ ހުރީ އިސްތިޚާރާ ކުރުމަށްފަހު ހުރިހާ ކަމެއް ވާން އޮތް ގޮތަށް ވުމަށް ދޫކޮށްލާފައެވެ. ހިލްޔާއަށް ނޭނގުނު ކަމަކީ، ހިލްޔާގެ އީމާންތެރިކަން ވަރުގަދަވިނަމަ، ރާފިލްއާއި އެކީ ހިނދުކޮޅަކަށް ވެސް ހުރުމަށް އެ ހިތް ނުރުހުނީސް ކަމެވެ.

 

ހިލްޔާއަށް ހިމޭނުން ބަލަން އިނދެފައި ނަހީދު ވާހަކަ ދެއްކިއެވެ.

 

“ނޫން ދަރިފުޅު. ކައިވެނީގެ ތައްޔާރީތައް ކިތަންމެ ދުރަށް ދިޔަޔަސް ދަރިފުޅަށް އިންކާރު ކުރެވިދާނެ ކައިވެނި ކުރަން. އެއީ ދަރިފުޅަށް ލިބިގެންވާ ޙައްޤެއް. ކައިވެނީގެ ހޯލް ބުކް ކުރެވުނޭ ކިޔާފަ ދަރިފުޅު ނުޖެހޭ ބޭނުންނުވާ މީހަކާ އިންނާކަށް.” ނަހީދު ނުހަނު ސީރިއަސްކަމާއި އެކީ ބުންޏެވެ. ހިލްޔާ ރަނގަޅު ނިންމުމެއް ނިންމާނެ ކަމުގެ އުއްމީދުގައެވެ.

 

“ބައްޕާ އާރ ޔޫ ސޭއިންގް ދިސް؟ ބައްޕަ ވަނީ ރާފިލްގެ ބައްޕައާއި ބިޒްނަސް ޑީލްއެއް ވެސް ހަދާފައެއް ނޫންތަ؟ ބައްޕަގެ ބިޒްނަސްގެ 30 ޕާރސެންޓް ޝެއާރސް ހިމެނޭދޯ އޭގަ؟ ރާފިލްއާއި އަހަރެން އިންނަން ދެކޮޅު ހަދައިފިއްޔާ ބައްޕައަށް ގެއްލުން ވެސް ވާނެއެއް ނޫންތަ؟” ހިލްޔާ ކަންބޮޑުވުމަކާއިއެކީ އެހިއެވެ.

 

“30 ޕާރސެންޓެއް ނޫން. 40 ޕާރސެންޓް. އެ ހުރިހާ އެއްޗެއް ގެއްލުނަސް ބައްޕައަށް ހެޔޮ. ފައިސާ އަނބުރާ ލިބިދާނެ. އެކަމަކު ދަރިފުޅުގެ ޙަޔާތް އަނބުރާ ނުލިބިދާނެ. މިއީ ދަރިފުޅު އެއްގޮތަކަށް ވެސް ފިކުރު ކުރަންވީ ކަމެއް ނޫން. ދަރިފުޅު ވިސްނަންވީ ދަރިފުޅުގެ އުފާވެރިކަމާއިމެދު. ދަރިފުޅުގެ އިޙްސާސްތަކާއިމެދު. ދަރިފުޅު އުފަލުގަ ނޫޅެންޏާ ބައްޕަ އެ ހުރިހާ ފައިސާއަކުން ކުރާނީ ވަކި ކީއްތަ؟” ނަހީދު ސުވާލުކުރިއެވެ.

 

ބައްޕަގެ ވާހަކަތައް އަޑުއަހަމުން ދިޔަދިޔަހެން ހިލްޔާގެ ލޮލުން ކަރުނަ ހިލުނެވެ. މި ހުރިހާ ދުވަހު ރާފިލް އޭނައަށް ވިސްނައިދޭން މަސައްކަތް ކޮށްފައިވީ އޭނަގެ ބައްޕައަކީ އޭނައަށް ގޯސް މީހެއް ކަމަށެވެ. ރާފިލް އޭނައަށް ހޯދައިދޭ ފަދަ ދިރިއުޅުމެއް ބައްޕަ އޭނައަށް ހޯދައި ނުދެނީ ދަހިވެތިކަމުގެ ސަބަބުން ކަމަށެވެ. މިހާ ހިސާބަށް އައިއިރު ނޭނގުމެއްގެ ތެރެއިން ވެސް ހިލްޔާއަށް އެ ވާހަކަތައް ޤަބޫލު ވެސް ކުރެވިފައިވިއެވެ.

 

އެހެނަސް ބައްޕަ ދެންމެ ދެއްކި ވާހަކަތަކުން އެ ހުރިހާ ޚިޔާލެއް ވިއްސިވިހާލިވެގެން ދިޔައެވެ. ކުރިމަތީގައި އެ އިނީ އޭނަ ބަލާ ބޮޑު ކުރި އޭނަދެކެ އިންތިހާއަށް ލޯބިވާ ބައްޕަކަން އެވަގުތު އެނގުންވިއެވެ. އެކަމާއިމެދު ޝައްކު ކުރެވުނީތީ ވެސް އަމިއްލަ ނަފްސު ކުށްވެރި ކުރެވުނެވެ.

 

“އައިމް ސޮރީ ބައްޕާ…” ވައި އަޑަކުން ހިލްޔާއަށް އެހެން ބުނެވުނު ހިނދު ހިލްޔާގެ ލޮލުން ކަރުނަތައް ފައިބައިގެން އައެވެ. އެ ބަސްތައް ބުނެލެވުނީ އޭނަ ބައްޕައާއި ޖަދަލު ކުރި ދުވަސްތަކުގެ މަތިން ވެސް ހަނދާން ކުރަމުންނެވެ. އަދި ހަމަ އެހެންމެ ރާފިލްއާއި ވެގެން ބައްޕައަށް މަލާމާތް ކުރި ދުވަސްތައް ވެސް ހަނދާން ކުރަމުންނެވެ.

 

ހިލްޔާގެ ކަރުނަތައް ފެނިފައި ނަހީދު އެއްޗެކޭ ބުނަން އުޅުނު ތަނާހެން ހިލްޔާ ތެދުވެގެން ދާން ހިނގައިގަތެވެ. ބައްޕަގެ ކުރިމަތީގައި އެއްގޮތަކަށް ވެސް ރޯން ބޭނުމެއް ނުވުމުންނެވެ.

 

 އެދުވަހު މެންދުރު މިހާރުގެ އާދައިގެ މަތިން ހިލްޔާ ގޮވައިގެން ބޭރަށް ދިޔައެވެ. ކައިވެނީގެ ތައްޔާރީތައް ވުމަށެވެ. ރާފިލް ބޭރުފުށުން ރަނގަޅުވުމަށްޓަކައި ނަހީދު ވެސް ގޮވައިގެން ދާން އުޅުނެވެ. ނަހީދު އެކަމާއިމެދު ސުވާލު ކުރީ ހިލްޔާއާއި އެވެ. ހިލްޔާ ނަހީދު ގޮވައިގެން ދިޔުމަށް އިންކާރު ކުރިއެވެ. އިންކާރު ކުރީ ރާފިލް ހީކުރި ގޮތާއި ޚިލާފަށް ބައްޕައަށް ނަފްރަތު ކުރާތީވެއެއް ނޫނެވެ. އެހެނެއްކަމަކު ރާފިލްއާއި އެކީ އުޅޭއިރު އޭނަގެ މަޑުމޮޅިކަން ބައްޕައަށް މާ ބޮޑަށް ފާހަގަވެދާނެތީވެއެވެ. އެކަމާއިމެދު ބައްޕަ ސުވާލުކޮށްފިނަމަ ދޭނެ ޖަވާބެއް އޭނައަށް ނުވިސްނޭތީވެއެވެ.

 

ރާފިލްއާއި އިނުމާއިމެދު ހިލްޔާގެ ހިތުގައި ވަނީ ނުތަނަވަސް އިޙްސާސްތަކެއް ކަން ހިލްޔާއަށް މިހާތަނަށް އައިއިރު ޔަޤީންވެފައިވެއެވެ. އެހެނަސް ކައިވެންޏަށް ނޫނެކޭ ނުބުނެވިގެން އުޅެނީ ރާފިލްގެ ޒާތުންނެވެ. ރާފިލް އޭނަގެ ބަސް ގަދަކޮށް އަނެއްކާވެސް އޭނަގެ ޚިޔާލު ބަދަލުކޮށްލާނެކަން ހިލްޔާއަށް ޔަޤީނާއި ގާތްވެއެވެ. އެހެންނޫންނަމަ އެއަށްވުރެ ނުރައްކާތެރި ގޮތެއް ވުން ވެސް ގާތެވެ. އަދި އަމުދުން ކައިވެނީގެ ތައްޔާރީތައް މިހާ ހިސާބަށް އައިސްފައި ވަނިކޮށް، އޭނަ ކައިވެންޏަށް ފަސްދީފިނަމަ، މީހުން ވެސް ބުނާނީ ކީކޭ ހެއްޔެވެ؟

 

މި ޚިޔާލުތަކުގައި ހުރެ ހިލްޔާ ރާފިލްގެ ފަސްފަހަތުން ހިނގައި، ރާފިލް ގަންނަމުން ދިޔަ ކޮންމެ އެއްޗަކަށް އާނއެކޭ ބުނަމުން ދިޔައެވެ. ހުދުކުލައިގެ ކައިވެނީގެ ހެދުމަކީ ވެސް ރާފިލް ޚިޔާރު ކުރި އަގުބޮޑު ހެދުމެކެވެ. އެ ހެދުމާއިއެކީ ހިލްޔާ އަޅާނެ ބުރުގާގެ މަތިން ހިލްޔާ ރާފިލްއަށް ހަނދާންކޮށްދޭން ޖެހުނެވެ. ފިހާރަ ތެރެއިން ވެސް އެ ހެދުން ލުމަށް ރާފިލް ހިލްޔާގާތު އެދުނެވެ.

 

“ނޯ ރާފިލް. އޭތި ވަރަށް ޓައިޓް. މި މީހުން ލޫޒް ކޮށްދިނީމަ އަހަރެން ޓްރައި ވެސް ކުރަން ބޭނުމީ.” ހިލްޔާއަށް ބުނެވުނެވެ. އެހެން ބުނަމުން ދިޔައިރު ވެސް ރާފިލް ނުރުހުންވަމުން ދިޔަ ގޮތް ހިލްޔާއަށް އެނގުންވިއެވެ.

 

“މައި ގޯޑް ހިލްޔާ!!! އައި ޑޯންޓް އަންޑަސްޓޭންޑް ދިސް! މެރީ ކުރީމަ ވެސް ލޫޒް ހެދުން ލައިގެނެއްނު ތި ވަރުން ހިލްޔާ އުޅޭނީ. #@!*” ރާފިލް ވާހަކަ ދައްކަމުން ގޮސް ނުބައި ބަހެއް ކިޔާލުމުން ހިލްޔާއަށް ނުރުހުމުގެ ނަޒަރަކުން ރާފިލްއަށް ބަލާލެވުނެވެ. މިއީ ރާފިލް އޭނަގެ ކުރިމަތީގައި ނުބައި ބަހެއް ކިޔާލި ފުރަތަމަ ފަހަރެވެ. އޭތި އަމާޒުވީ ހަމަ އޭނައަށްކަން ޔަޤީން ނުވެފައި ހިލްޔާއަށް ބަލަހައްޓައިގެން ހުރެވުނެވެ.

 

ހިލްޔާގެ މޫނުމަތިން ނުރުހުންތެރިކަން ފެނިފައި ރާފިލްއަށް ވަގުތުން ވާހަކަ ދެކެވުނެވެ.

 

“ސޮރީ! ހިލްޔާއަށް ބުނި އެއްޗެއް ނޫން. ފްރަސްޓްރޭޓްވީމަ ބުނެވުނު ބަހެއް. ހިނގާބަލަ ދެން އެހެން ޝޮޕްއަކަށް އެހެންވީމަ. އައި ވޯންޓް ޓު ބާއި އަ ލޮޓް އޮފް ތިންގްސް ފޯ ޔޫ!” ރާފިލް ނުހަނު ޖޯޝާއި އެކީ ބުންޏެވެ. އެއާއިއެކު ހިލްޔާ އަނެއްކާވެސް ދެންމެ ފެނުނު ރާފިލްގެ ނޭދެވޭ ސިފައިގެ މަތިން ހަނދާން ނައްތައި ރާފިލްގެ ފަހަތުން ދާން ޖެހުނެވެ.

 

ރާފިލް އެދުވަހު ހިލްޔާއަށް ގަނެދެމުން ދިޔައީ މުޅިން ވެސް ކައިވެންޏަށް ބޭނުންވާނެ ތަކެއްޗެވެ. ހިލްޔާ ކައިވެންޏަށްފަހު ބޭނުންކުރާނެ މޭކަޕް ސެޓްތަކާއި، އަޅާނެ ގަހަނާއާއި، ލާނެ ކުރު ހެދުންތަކަށް ދާންދެނެވެ. ހިލްޔާއަށް އެންމެ ބޮޑު ޝޮކެއް ލިބުނީ ރާފިލް ހިލްޔާ ގޮވައިގެން ކާރު ވިއްކާ ފިހާރައަކަށް ވެސް ދިޔުމުންނެވެ.

 

“ދިސް ވިލް ބީ ޔުއާރ ކާރ އިނގޭ؟ އެދުވަހު އަހަރެންގެ ކާރުން އަހަރެން އަންނާނީ. ދެން ހިލްޔާ ބައްޕައާއިއެކީ އަންނާނީ ވަކިން ކާރެއްގަ. ޑްރައިވާރއެއް ހުންނާނެ. އެކަމަކު މެރީ ކުރުމަށްފަހު ހިލްޔާއަށް މި ކާރު ދުއްވޭނެ. މިއީ އަހަރެންގެ ފަރާތުން ހިލްޔާއަށް ދޭ ކައިވެނީގެ ހަދިޔާއެއް ކަމަށް ބަލާ…”

 

ރާފިލް އެހެން ބުނެލީ، މާރސެޑީޒް ބެންޒް ފިހާރައިގައި އޮތް ހުދުކުލައިގެ ކާރެއްގެ ކައިރީގައި ހުރެއެވެ. ހިލްޔާ އަޖާއިބުވެ ހުރެ އެއްފަހަރު ރާފިލްއަށް އަނެއްފަހަރު އެ ކާރަށް ބަލަމުން ދިޔައެވެ. ރާފިލްގެ އަތުގައި ހުންނަ ފައިސާ ހަމަ ހުސް ނުވަނީތޯ ހިތަށްއެރިއެވެ.

 

ރާފިލް އެހާ ހިސާބުން ނިންމާލީއެއް ވެސް ނޫނެވެ. ކާރު ގަނެދިނުމުގެ އިތުރުން އެއީ ހަމަ ހިލްޔާގެ ކާރެއްކަން ޔަޤީން ކޮށްދިނުމަށްޓަކައި ކާރުގައި ފިންގާރޕްރިންޓް އޮތެންޓިކޭޝަން ސިސްޓަމް އިންސްޓޯލް ކުރިއެވެ. އަދި އެއަށް ހިލްޔާގެ އިނގިލީގެ ނިޝާން އެޅުވިއެވެ. މީގެ ނަތީޖާއެއްގެ ގޮތުން ހިލްޔާއަށް ތަޅުދަނޑިއަކާއި ނުލައި ވެސް ކާރު ހުޅުވޭނެއެވެ. އަދި ސްޓާޓް ވެސް ކުރެވޭނެއެވެ.

 

ކައިވެނީގެ ދުވަހާއި ޖެހެންދެން ދެން ބާކީ ހުރި ހުރިހާ ދުވަސްތަކެއްގައި ވެސް ރާފިލް ހިލްޔާއަށް ދައްކަމުން ދިޔައީ ދުނިޔޭގެ ރީތިކަމެވެ. ރާފިލްއާއި އެކީ އުޅެފިނަމަ ހިލްޔާއަށް ދުނިޔެ ލިބޭނެ މިންވަރެވެ. އަދި އެ ހުރިހާ ކަމެއް ކޮށްދެމުން ރާފިލް ތަކުރާރުކޮށް ދައްކަމުން ދިޔައީ އެއްޒާތެއްގެ ވާހަކަތަކެވެ.

 

“އައި ސްވެއާރ ހިލްޔާ! ހިލްޔާއަށް ޑިޒާވް ވަނީ އަހަރެން ކަހަލަ މީހަކު. ހިލްޔާ އަހަރެން ދޫކޮށްފަ އެހެން މީހެއް ކައިރިއަށް ދިޔައިއްޔާ އެމީހަކަށް ހިލްޔާ ބޭނުންވާނެހާ އެއްޗެއް ގަނެދެވޭނެތަ؟”

 

“ހިލްޔާއާ ނުގުޅޭނެ މިޑްލް ކްލާސް ފިރިހެނަކާ. ހިލްޔާ ޖެހޭނީ ފިހާރައަކަށް ކާއެއްޗެއް ގަންނަން ގޮއްސަ ވެސް އަގު ބަލާފަ އެންމެ އަގުހެޔޮ އެއްޗެއް ގަންނަން. ދެޓް ވުޑް ބީ އަ ސޭޑް ލައިފް، ނޫންތަ؟”

 

“ހިލްޔާގެ ބައްޕަ ވެސް ދޯ؟ އެހާ ސްޓޭބަލް ބިޒްނަސްއެއް ނޫން އެ ހިންގަނީ. އަހަންނަށް ހީވަނީ މުޅި އޯސިސް ކޮމްޕެނީ ވެސް 2 އަހަރު ތެރޭ ބަނގުރޫޓު ވެދާނެހެން. ނޯ އޮފެންސް ޓު ޔުއާރ ޑޭޑް. ހަމަ ބިޒްނަސް އެކްސްޕީރިއެންސް ހުރީމަ ސްޓޭޓިންގް ދަ ފެކްޓްސް.”

 

“ލައިފެއް ފަށާއިރު މަނީ އިޒް ވެރީ އިމްޕޯޓެންޓް ހަމަ. އިމޭޖިން ހިލްޔާ ބަލިވެއްޖެއްޔާ ރަނގަޅު ބޭހެއްވެސް އަދި ފަރުވާއެއް ވެސް ނުހޯދޭނެ ގިނަ ލާރި ނެތިއްޔާ. ދެން ކިހިނެއް އުޅޭނީ؟”

 

ރާފިލް ހިލްޔާއަށް ސާބިތުކޮށްދޭން ބޭނުންވީ ހިލްޔާއަށް ރާފިލްއާއި ނުލާ އުފާވެރި ދިރިއުޅުމެއް ނުއުޅެވޭނެ ކަމަށެވެ. އަދި އެ އުފާވެރިކަމަށްޓަކައި މުހިއްމީ ރާފިލްގެ އަތުގައި ހުރިވަރަށް ފައިސާ ކަމެވެ. ހިލްޔާ ރާފިލްގެ އެ ވާހަކަތަކުން ރާފިލްއަށް ފަސްދޭން ޖެހިލުންވާ ގޮތްވިއެވެ. ރާފިލް ދޫކޮށްފިނަމަ އޭނަ ދުނިޔޭގެ ހުރިހާ ދަތިތަކުގެ ތެރެއަށް ވެއްޓިދާނެ ކަމަށް ޤަބޫލު ކުރެވެން ފެށިއެވެ.

 

ދިރިއުޅުމަށްޓަކައި ބޭނުންވަނީ ފައިސާއަށްވުރެ ބޮޑަށް ބަރަކާތް ކަން ހިލްޔާ ހަނދާން ނެތިފައިވެއެވެ. މީހެއްގެ އަތުގައި ކިތަންމެ މަދު ލާރި ހުއްޓަސް، އަދި ކިތަންމެ މަދު މުދަލެއް ހުއްޓަސް، އޭގައިވާ ބަރަކާތުގެ ސަބަބުން މީހެއްގެ ދިރިއުޅުން ބާއްޖަވެރިވެގެން ދެއެވެ. އަދި ކިތަންމެ ގިނަ ފައިސާ މީހެއްގެ އަތުގައި ހުއްޓަސް، އެ ފައިސާގައި ﷲ ބަރަކާތް ނުލައްވައިފިނަމަ އެއިން ލިބޭނެ އެއްވެސް ހިތްހަމަޖެހުމެއް ނޯންނާނެއެވެ. ބަރަކާތް ލިބެނީ ﷲ ރުހިވޮޑިގެންވާ ފަދަ ދިރިއުޅުމެއް ބިނާ ކުރުމުންނެވެ. އެފަދަ ދިރިއުޅުމެއް ބިނާ ކޮށްގެން ނޫނީ ފައިސާއަކުން އިންސާނަކަށް ދުނިޔެއާއި އާޚިރަތުގައި ވެސް ލިބޭނެ މަންފާއެއް ނެތެވެ.

 

ކައިވެނީގެ ކުރިން ރާފިލް ހިލްޔާއާއި އެކީ ހޭދަ ކުރާ ވަގުތުތައް ނިންމާލީ 2023 ވަނަ އަހަރަށްޓަކައި ހަވާ އަރުވާ މަންޒަރުންނެވެ. ހަވާ އެރުވުމުގެ ތެރެއިން ވެސް އުޑުމަތިން ‘އައި ލަވް ޔޫ، ހިލްޔާ’ އޭ އެރި މަންޒަރު ހިލްޔާއަށް ފެނިފައި، އެތާ ތިބި އެހެން މީހުން ފަދައިން ހިލްޔާއަށް ވެސް ޤަބޫލު ކުރަން ވެސް ދަތިވިއެވެ. އެ މަންޒަރު ފެނިފައި ރާފިލްއަށް ބަލާލުމުން ރާފިލް އެއްލޯ މަރާލިއެވެ.

 

އާ އަހަރުގެ ހަވާ އެރުވުމުގެ ތެރެއިން ލަންޑަންގައި ދިވެހި އަންހެން ކުއްޖަކަށް ލޯބި ހުށަހެޅިގެން ދިޔަ ވާހަކަ ދިވެހި ނޫސްތަކުގެ ޖެހިގެން ދިޔައެވެ. އެ ޚަބަރުތައް ހިލްޔާއަށް ފެނިގެން ދިޔައީ އޭގެ އަނެއްދުވަހުގެ ހެނދުނެވެ. އެނދުމަތީގައި އޮވެ ފޯނު ހުޅުވާލިއިރު، އޭނަގެ ދިވެހި ބައެއް އެކުވެރިން ވައިބާރ އިން މެސެޖުތައް ފޮނުވާފައިވިއެވެ. ކޮންމެ އެކުވެރިޔަކު ވެސް އާރޓިކަލް ޝެއާރ ކޮށްފައި ހުރިތަން ފެނި، ހިލްޔާއަށް އޭގެއިން އެއް އާރޓިކަލް ހުޅުވާލުމަށްފަހު ކިޔާލެވުނެވެ.

 

ދިވެހި އާރޓިކަލް އިން ރޭ އޭނައަށް ލޯބި ހުށަހެޅުނު ވާހަކަ ސިފަކުރެވިފައިވިއެވެ. އެކަން މަޝްހޫރުވެގެން ދިޔަ ގޮތާއިމެދު ވީ އަޖާއިބުން އަރައި ނުގަނެވެނީސް، އިތުރަށް އަޖާއިބުވީ އާރޓިކަލްގެ ތެރެއިން ރާފިލްގެ ބަސްތައް ފެނުމުންނެވެ.

 

“އެއީ އަހަރެންގެ ވާން އުޅޭ ވައިފް. މިއަދު މެރީކުރަން މިއުޅެނީ. ލޯބިވާވަރު އަންގަން ބޭނުންވި ވަރުން ކުރި ކަމެއް. އައި ލަވް ހާރ މޯ އެވްރީ ސިންގަލް ޑޭ.”

 

ރާފިލްގެ އެ ބަސްތައް ކިޔާފައި ހިލްޔާގެ ހިތަށް ގޮތެއްވިއެވެ. މިއީ ހަމަ އޭނައަށްޓަކައި ﷲ ލިޔުއްވާފައިވާ ފިރިމީހާތޯ ހިތަށްއެރިއެވެ. އެކަމާއިމެދު ޝައްކު އުފެދުމުން ހިލްޔާއަށް ތިރިއަށް ސްކްރޯލް ކޮށްލެވުނީ ކޮމެންޓްތައް ކިޔުމަށެވެ. ކޮމެންޓްތަކުގައި ޢާއްމުން ވެސް ލިޔެފައިވަނީ ހިލްޔާ ހާދަ ނަސީބު ގަދަ ކަމަށެވެ. ބައެއް އަންހެން ކުދިން ޙަސަދަވެރިވެގެން ރާފިލްއަކީ ތިމަންނަގެ މީހަކަށްވިނަމަ ކޮންފަދަ ހޭ ބުނަމުން ދިޔައެވެ. މުޅިންހެން ވެސް ކޮމެންޓްތަކުގައި އަލި އެޅުވިފައިވީ ހިލްޔާ އުފާވާނެ މިންވަރާއި މެދުގައެވެ.

 

އެ ކޮމެންޓްތައް ކިޔާފައި އޭނަ ރާފިލްއާއިމެދު ހިތްހަމަޖައްސާލަންވީތޯ ހިލްޔާއަށް އަމިއްލަ ނަފްސާއި ސުވާލު ކުރެވުނެވެ. އަނެއްކާވެސް ރާފިލްއާއި އޭނަގެ ގުޅުމުގެ ‘ރީތިކަން’ އޭނައަށް އިޙްސާސް މި ކުރެވެނީ އިސްތިޚާރާގެ ނިޝާނެއްގެ ގޮތުގައިތޯ ހިތަށްއެރިއެވެ.

 

އެހެނަސް ކީއްވެކަމެއް ނޭނގެއެވެ. ދެންވެސް ހިލްޔާގެ ހިތެއް ހަމަނުޖެހެއެވެ. އެ ހިތްހަމަނުޖެހުން އިތުރުވަނީ ނަމާދު ކުރާ ވަގުތުތަކުގައެވެ. ރާފިލް ޤަވާޢިދުން ނަމާދު ކުރާނެ ކަމާއިމެދު އަދިވެސް ޝައްކު ކުރެވިފައިވެއެވެ. އެފަދަ މީހަކާއެކީ އޭނައަށް އުޅެވިދާނެކަމެއް ހިލްޔާއަށް ޔަޤީނެއް ނުކުރެވުނެވެ.

 

ކޮންމެ ގޮތެއްވިޔަސް ޔަޤީން ނުވާ އިޙްސާސްތަކާއި އެކު ހިލްޔާ އެދުވަހު ހަވީރު އޮތް އޭނަގެ ކައިވެނީގެ ޙަފްލާއަށް ތައްޔާރުވުމަށް، ރާފިލް ބުކްކުރި ސެލޫންއަށް ދިޔައެވެ. މިއީ ވަގުތު ނަގާނެ ކަމަކަށްވީތީ ހިލްޔާ އެތަނަށް ދިޔައީ މެންދުރު ނަމާދާއި ޢަޞްރު ނަމާދު ޖަމްޢުކޮށްފައެވެ. މެންދުރު 2 ޖެހި ވަގުތު ހިލްޔާ ސެލޫންއަށް ދިޔައީ ބައްޕައާއި އެކީގައެވެ. ރާފިލް އޭނައަށް ގަނެދީފައިވާ ކާރުގައެވެ. ރާފިލް ބުނި ގޮތުގައި ރާފިލް ދަނީ އެހެން ސެލޫންއަކަށެވެ. ދެމީހުން އެކަކު އަނެކަކަށް އެންމެ ފުރަތަމަ ފެނުމަށް ރާފިލް އެދުނީ ކައިވެނީގެ ޙަފްލާއިން ކަމަށްވުމުންނެވެ.

 

އާދައިގެ މަތިން ސެލޫންއިން ހިލްޔާއަށް ލިބެން ފެށީ 5 ތަރީގެ ޚިދުމަތްތަކެވެ. ސެލޫންގައި ހިނިތުންވެގެން ތިބި އަންހެން ކުދިން ހިލްޔާގެ އިސްތަށިގަނޑު ދޮވެދީ، ކޮންޑިޝަންކޮށް ހިލްޔާ އެދުނު ސްޓައިލަކަށް ކޮށައި ދިނެވެ. އެއަށްފަހު މޫނު ވެސް ދޮވެދީ، މޫނު ވިދާނެ ފަދަ ޓްރީޓްމެންޓް ދެވުނެވެ. މެނިކިއުއާރ އާއި ޕެޑިކިއުއާރ ގެ ބޭނުމަކީ ކޮބައިކަން އެދުވަހު ހިލްޔާއަށް ދަސްވާވަރު ވެގެން ދިޔައެވެ. އެ ކަންތަކުގެ ތެރެއިން ނިޔަފަތީގައި ކުލަ ނުޖެއްސުމަށް ހިލްޔާ އެ ކުދިން ކައިރި ބުނަން ޖެހުނެވެ.

 

ހިލްޔާ އޭނަގެ ހުދުކުލައިގެ ކައިވެނީގެ ހެދުން ލީ އެދުވަހު 3 ޖެހި ވަގުތެވެ. އެ ހެދުން ލައިގެން ބުރުގާ އެޅުމުގެ ކުރިން ހިލްޔާއަށް އަމިއްލަ ނަފްސަށް ބަލަން ހުރެވުނެވެ. އަތްދިގު ކައިވެނީގެ އެ ހެދުމުގެ ކޮނޑުން ފެށިގެން އުނަގަނޑާއި ހަމައަށް ބޯ ފޮތިން ފެހިފައިވިއެވެ. މާ ގަނޑުތަކުގެ ރޭނދާތަކުން އެ ބައި ޖަރީ ކުރެވިފައިވީއިރު، ދިގު އަތް ވެސް ވީ އެފަދަ ޑިޒައިނަކަށެވެ. އުނަގަނޑުން ތިރީގައި އޮތް ފަސްބައިގައި މުޅިންވެސް ވީ ލޭސް ފޮއްޗެވެ. ފަހަތުން އެ ލޭސް ފޮތީގެ ބައި ދުރުދުރަށް ދެމިގެން ދިޔައެވެ. ހިލްޔާ ބޭނުން ނުވިޔަސް އެ ހެދުން ލުމުގައި ވެސް ހިލްޔާ ސެލޫންގައި ތިބި ކުދިންގެ އެހީ ހޯދަން ޖެހުނީ އެހެންވެއެވެ. ބޭރުފުށުން ބަލާއިރު އެއީ ކިތަންމެ ރީތި ހެދުމަކަށް ވިޔަސް، އެއީ ހުރިހާ ގޮތަކުން ވެސް ހިލްޔާއަށް އުދަގޫ ހެދުމަކަށްވިއެވެ. އަދި އަމުދުން އޭގެ ކަރުވަޅު ފުދޭ ވަރަކަށް ބޮޑުވުމުން ހިލްޔާ އަޅަން ޖެހުނީ، ބޮލިކޮށް އޮތް ހުދުކުލައިގެ ޝޯލްކެވެ. ތުނި ޝޯލްއެއް އަޅައިފިނަމަ މޭމަތި ޝޯލްގެ ތެރެއިން ފެންނާނެކަން ޔަޤީން ކުރެވުނީތީވެއެވެ.

 

ކައިވެނީގެ ހެދުން ލައިގެން ގޮސް ހިލްޔާ އަނެއްކާވެސް ސެލޫންގެ ގޮނޑިއެއްގައި އިށީންނަން ޖެހުނީ މޭކަޕް ކުރުމަށެވެ. ހިލްޔާ އެކަމަށް އިންކާރު ކުރުމުން މިފަހަރު ސެލޫންގައި ތިބި ކުދިން އެއްބަހެއް ނުވިއެވެ. އެއީ ‘ރާފިލް ސާރ’ ކޮންމެހެން ކުރަންޖެހޭނެ ކަމަށް ބުނި ކަމެއްކަމަށް އެކުދިން ބުންޏެވެ. އެހެންކަމުން ހިލްޔާ ޖެހުނީ ހަތިޔާރު ބަހައްޓާށެވެ.

 

އެއާއިއެކު ހިލްޔާ ދުވަހަކުވެސް މޭކަޕް ނުކުރާ ވަރަށް މޭކަޕް ކުރެވިގެން ދިޔައެވެ. ފައުންޑޭޝަނަކީ ހިލްޔާ ލާ ހިތްވާ އެއްޗަކަށް ނުވިޔަސް ފައުންޑޭޝަނުން ހިލްޔާގެ ހަމުގެ ޙަޤީޤީ ކުލަ ފޮރުވި، އިތުރަށް ދޮން ކުރެވިގެން ދިޔައެވެ. ތުންފަތުގައި ގަދަ ފިޔާތޮށި ކުލައެއް ޖެއްސި، މަޑު ފިޔާތޮށި ކުލައިގެ ބްލަޝްއެއް ކޯތާފަތުގައި ޖެއްސިގެން ދިޔައެވެ. މަސްކާރާއާއި އަނދުނުން، ބުމައާއި އެސްފިޔަތަކުގެ ކުލަ ގަދަ ކުރެވިގެން ދިޔައެވެ. އެ ހުރިހާ ކަމަކަށްފަހު ހިލްޔާގެ އަތަށް ރަތް ކުލައިގެ ފިނިފެންމާ ބޮނޑިއެއް ލެވި، ބުރުގާގެ މަތިން، ބޯ މަތީގައި ހުދުކުލައިގެ ދިގު ލޭސް ފޮތިގަނޑެއް އެޅިގެން ދިޔައެވެ. އަދި ފަހަތަށް ވެއްޓިފައި އޮތް ލޭސް ފޮތިތަކުގެ ތެރެއިން ކުރު ލޭސްފޮތިކޮޅެއް ހިލްޔާގެ މޫނުމައްޗަށް ވައްޓާލެވުނެވެ. އެއާއިއެކު ސެލޫންގައި ތިބި ކުދިން، އެވަގުތު ކޮޅަށް ހުރި ހިލްޔާއަށް ތަޢުރީފުގެ ބަސްތައް އޮއްސަން ފެށިއެވެ. އެހެނަސް ހިލްޔާއަށް އެ ތަޢުރީފުތަކަށް ސަމާލުކަމެއް ނުދިނެވެ. ވިސްނެމުން ދިޔައީ، އޭނަ އެދުމުން ވެސް ރާފިލް ކައިވެނީގެ މިބައި ބަދަލު ނުކުރަނީތާއޭ ހިތަށްއެރިއެވެ. މިއީ ހަމަ ނަޞާރާއިންގެ ގޮތޭ ހިތަށްއެރި ހިނދު، އެ ހިތަށް އިންތިހާއަށް އުދަގޫވިއެވެ. އެ ވީ އުދަގުލުގެ ސަބަބުން މޫނުމަތިން ފޮތިކޮޅު ނަގައި ބޯމަތިން ވައްޓާލެވުނެވެ. އެއާއިއެކު ހިލްޔާގެ ނުރުހުންތެރިކަން ސެލޫންގެ ކުދިންނަށް ފާހަގަވެ، އެމީހުން ހިމޭންވާ ގޮތްވިއެވެ.

 

ހަމަ އެހިނދު، ކަޅުކުލައިގެ ކޯޓު ފަޓުލޫނުގައި ހުރި ނަހީދު އެތަނަށް އައެވެ.

 

“ދަރިފުޅު އަވަހަށް އާދޭ. ޓެކްސީ ޑްރައިވަރު އައިއްސި އަހަރުމެން ގެންދަން.”

 

ބައްޕަ އެހެން ބުނި އަޑަށް ހިލްޔާއަށް ފަސްއެނބުރި ބަލާލެވުނެވެ. ބައްޕަ ކޯޓު ފަޓުލޫނުގައި ހުރި މަންޒަރު ފެނިފައި، މިއީ ހަމަ އޭނަގެ ކައިވެނީގެ ދުވަސްތޯ ހިތަށްއެރިއެވެ. އެކަން ޤަބޫލުކުރަން ދަތިވިއެވެ. އެހެންނޫނީ ޤަބޫލުކުރަން ބޭނުމެއް ނުވީއެވެ. ކައިވެންޏެއް ކުރަން އުޅޭ އަންހެން ކުއްޖެއްގެ ހިތުގައި ވާނީ އޭނަގެ ހިތުގައި މިވާ ފަދަ ނުތަނަވަސްކަން ތޯ ހިތަށްއެރިއެވެ.

 

ހިލްޔާ މި އިޙްސާސްތަކުގައި ހުރެ، ނުހަނު އުދަގުލާއިއެކީ އެ ބޮޑު ހެދުމުގައި ބައްޕައާއި ދިމާލަށް އެނބުރި، ބައްޕައާއި ދިމާލަށް ދާންފެށިއެވެ. އެހިނދު ސެލޫންގައި ތިބި ކުދިން ހިލްޔާގެ ހެދުމުގެ ފަސްބައި ރަނގަޅު ކޮށްދެމުން ދިޔައެވެ.

 

ނަހީދާއި ދިމާލަށް އަންނަމުން ދިޔަ ހިލްޔާގެ މޫނުމަތީގައިވި ހިތްހަމަޖެހުން ނަހީދަށް ވަންހަނާއެއް ނުވިއެވެ. ހިލްޔާ އައިސް އޭނައާއި އަރާ ހަމަވުމާއިއެކު ނަހީދަށް ވާހަކަ ދެކެވުނީ އެހެންވެއެވެ.

 

“އަދިވެސް ލަހެއްނުވޭ ދަރިފުޅު. އަދިވެސް ލަހެއްނުވޭ. ދަރިފުޅު ބޭނުމިއްޔާ ބައްޕަ މިހާރު ވެސް މިހިރީ ދަރިފުޅު ގޮވައިގެން ރަށަށްދާން.”

 

ބައްޕަ ސިއްރުން އެ ބުނެލި ބަސްތަކުން ހިލްޔާއަށް ބައްޕައާއި ދިމާލަށް ބަލާލެވުނެވެ. ބައްޕަގެ އެ އޯގާތެރިކަން އިޙްސާސްވުމުން ރާފިލްއަށް ފަސްދޭ ޚިޔާލު ހިލްޔާއަށް ކަމުދިޔައެވެ. އެހެނަސް ދެން ހަނދާންވީ ރާފިލް ދެއްކި ވާހަކަތަކެވެ. ރާފިލް ދޫކޮށްފިނަމަ އޭނައަށް އެއްވެސް އުފަލެއް ނުލިބޭނެކަމަށް ބުނެ ދެއްކި ވާހަކަތަކެވެ. އަދި އަމުދުން އޭނަ މިހިރީ ރާފިލްއާއި ކައިވެނި ކުރަން ބޭރުފުށުން ވާންވީ ހުރިހާ ތައްޔާރީއެއް ވެގެންނެވެ. ބައްޕަ ބުންޏަސް މިހާ ހިސާބަށް އައިސް ކައިވެންޏަކަށް ފަސްދޭން ވާނެ ހެއްޔެވެ؟

 

މި ޚިޔާލުތަކުގައި ހުރެ ހިލްޔާ ބައްޕަ ބުނި ވާހަކައަށް ވަކި އެއްޗެކޭ ނުބުންޏެވެ. އަދި ބައްޕައާއިއެކީ ކާރަށް އަރަން ދިޔައެވެ. މިއަދު ހަމަ އޭނަގެ ކައިވެނިވެގެން ދާނެ ކަމަށް ހިލްޔާގެ ހިތް ބުނި ހިނދު، އެ ހިތް އުފާވުމުގެ ބަދަލުގައި މޭތެރޭގައި އޮވެ ގެނބުނެވެ.

 

ހިލްޔާއަށް އެ ހީވުން ހީވިޔަސް ދެން ކަންތައްވާން ފެށީ ހިލްޔާ ހީވެސް ނުކުރާ ފަދަ ގޮތަކަށެވެ.

 

ހިލްޔާ ހީކުރީ ޑްރައިވަރު ކާރު ދުއްވަމުން ގޮސް މަޑުކުރާނީ 5 ތަރީގެ ޢިމާރާތެއްގެ ކައިރިއަށް ކަމަށެވެ. އެހެނަސް ހިލްޔާއާއި ނަހީދުގެ ވެސް ޝޮކަކަށް ކާރު ގޮސް މަޑުކޮށްލީ، ނަޞާރާއިންގެ ފައްޅިއެއްގެ ކުރިމައްޗަށެވެ. ފުރަތަމަ ހިލްޔާ ހީކުރީ ކާރު މަޑުކުރީ ޓްރެފިކް ލައިޓަކަށް ކަމަށެވެ. އެހެނަސް ތާރު މަގުގެ ދެ ފަރާތުގައި ފެހި ވިނަ ހުރި އެ މަގުގައި ޓްރެފިކް ލައިޓެއް ނެތެވެ.

 

“މިއީތޯ އަހަރުމެން ދާންޖެހޭ ތަނަކީ؟” ހިލްޔާ އިނގިރޭސި ބަހުން، ކާރު ދުއްވަން އިން މެދު ޢުމުރުގެ ފިރިހެން މީހާ ކުރެން އެހިއެވެ.

 

“އާނ. މިތަނަށޯ މިސްޓަރ ރާފިލް ބުނީ.” ޑްރައިވަރުގެ ޖަވާބު އިވިފައި ހިލްޔާއާއި ނަހީދަށް އެކަކު އަނެކަކަށް ބަލާލެވުނެވެ.

 

ނަހީދަށް އެއްޗެކޭ ބުނެވުމުގެ ކުރިން ހިލްޔާ އެ ކާރުގެ ސީޓުގައި އޮތް އޭނަގެ އަތް ދަބަހުން ފޯނު ނެގިއެވެ. އަދި އަވަސްއަވަހަށް ރާފިލްއަށް ގުޅާލިއެވެ. ދެ ތިން ރިންގަކަށްފަހު ރާފިލް އެކޮޅުން ފޯނު ނެގިއެވެ.

 

“ހައި ލަވް. އާދެވިއްޖެތަ ވެޑިންގް ވެނިއުއަށް؟” ރާފިލް ‘ލޯތްބާއެކީ’ އެކޮޅުން އެހިއެވެ.

 

“އެބައުޓް ދެޓް. ރާފިލް ބުނީ ކްރޮސްރޯޑްސްއޭ ނޫންތަ؟ އިންވިޓޭޝަންގަ އޮތީ އެހެންދޯ؟ އެކަމަކު ޑްރައިވަރު އަހަރުމެން މިގެނައީ ކޮންމެވެސް ޗާޗްއަކަށް.” ހިލްޔާ ކަންބޮޑުވުމަކާއެކީ ވާހަކަ ދެއްކިއެވެ. ހިތް ބާރަށް ތެޅެމުންދާ ޙާލުގައެވެ.

 

“ޔެސް ކްރޮސްރޯޑްސް ޗާޗްއޭ. ރަނގަޅޭ. ބުނީމެއްނު އަހަރުމެން ހަދާނީ ކްރިސްޓިއަން ވެޑިންގްއެކޭ؟” ރާފިލް އެ ބުނި ބުނުމާއިއެކު ހިލްޔާގެ ދެބުމަ ކައިރިވިއެވެ. ރާފިލްގެ ވަރު ހިތައި އެއްޗެކޭ ނުބުނެވިފައި އިންދާ ރާފިލް އިތުރަށް ވާހަކަ ދެއްކިއެވެ.

 

“ލުކް ހިލްޔާ އައި ނޯ ހިލްޔާ ޗާޗެއްގަ އަންކޮމްފޮޓެބަލް ވާނެކަން. ބަޓް ދިސް އިޒް މައި ޑްރީމް ވެޑިންގް އޭ. ކާންޓް ޔޫ ރެސްޕެކްޓް އިޓް؟ ކުރީ ދުވަހު ވެސް ބުނިހެން މިގޮތަށް އަދި މެރީ ކުރިޔަސް އަހަރުމެން ކްރިސްޓިއަނުންނަކަށް ނުވާނެއޭ. ހިލްޔާއަށް އިސްލާމް ދީން އެނގެއެއްނު އަހަންނަށްވުރެ ބޮޑަށް؟ އަޅެ މިކަހަލަ ތަނަކަށް އަޔަސް އަހަރުމެން އިސްލާމް ދީނުން ބޭރުވާނެތަ؟ ނުވާނެ! އިން ފެކްޓް ހިލްޔާ ކަހަލަ އަހަރެން ކަހަލަ އީމާންތެރިކަން ވަރުގަދަ މީހުން މިކަހަލަ ތަންތަނަށް އަންނަންވީ. ބިކޯޒް ވީ އާރ ނޮޓް އެފެކްޓެޑް ބާއި އިޓް. ނޫންތަ ހިލްޔާ؟” ރާފިލް އެ ދެއްކި ވާހަކަތަކުން ހިލްޔާގެ ހިތަށް އިތުރު އުދަގޫތަކެއް ވުން ނޫންކަމެއް ނުވިއެވެ. ކާރުގެ ކުޑަ ދޮރުން ބޭރުން ފެންނަމުން ދިޔަ ފައްޅި ފެނިފައިވެސް ހިލްޔާ އެތަނަށް ވަންނަން ވެސް ބޭނުމެއް ނުވިއެވެ.

 

“ބަޓް ރާފިލް އަހަރެން ބޭނުމެއްނޫން ތިތަނަށް ވަންނާކަށް. ބޭނުމެއްނު-“

 

“އޯކޭ. އޯކޭ އެހެންވެއްޖެއްޔާ. ޔޫ ގޯ އަހެޑް އެންޑް ބްރޭކް މައި ހާޓް. އެނގޭތަ މި ވެޑިންގް މިހިރީ ހުރިހާ ސޯޝަލް މީޑިއާއެއްގަ ލައިވް ވެސް ކޮށްފަ. ބިކޯޒް އައި އޭމް ސޯ ޝުއާރ ޔޫ އާރ ދަ ވަން. އެކަމަކު ހިލްޔާ އަދިވެސް އަހަންނާއި މެދު ޝައްކު ތި ކުރަނީ.”

 

ހިލްޔާ ވާހަކަ ދައްކަން އުޅުމާއިއެކު ރާފިލްގެ ޖަޒުބާތީ އަޑު އިވުނެވެ. އެ އަޑުން ރާފިލް ރޮއިގަންނާނެހެން ހީވަމުން ދިޔައެވެ. ރާފިލްއާއިމެދު ކިތަންމެ ހިތްހަމަނުޖެހުނަސް، ހިލްޔާ ރާފިލް ދެރަކުރާކަށް ބޭނުމެއް ނުވިއެވެ. އެއީ ހިލްޔާގެ ތަބީޢަތުގައިވާ ކަމެއް ނޫނެވެ. އަދި އަމުދުން ސޯޝަލް މީޑިއާގައި ކައިވެނި ލައިވް ކުރެވިފައިވަނިކޮށް އޭނަ ނުގޮއްސި ނަމަ އެއީ ރާފިލްއާއިއެކީ އޭނައަށް ވެސް ލިބޭނެ ބަދުނާމެއް ނޫން ހެއްޔެވެ؟

 

“ސޯ…..ހިލްޔާ އަހަރެން ރިޖެކްޓް ކުރާނީތަ؟ އާފްޓާރ ވަޓް އައި ޑިޑް ފޯ ޔޫ. އޭގެއިން އެއްވެސް ކަމެއްގެ އަގެއް ނެތްދޯ ހަމަ؟” ރާފިލް މިފަހަރު ޖަޒުބާތީ ވާހަކަ ދެއްކުމުން ހިލްޔާއަށް ވާހަކަ ދެކެވުނެވެ.

 

“ނޫނޭ…މި އަންނަނީ.”

 

ހިލްޔާއަށް އެ ބަސްތައް ބުނެވުނީ ހިތާއި ދެކޮޅަށެވެ. އެއާއިއެކު ރާފިލް ފޯނުގެ އަނެއްކޮޅުން ‘އައި ނިއު އިޓް’ އޭ ބުނެ އެބަ އިންތިޒާރު ކުރަމޭ ބުނެލިއެވެ. އެއާއިއެކު ހިލްޔާ ފޯނު ތިރިކޮށްލަމުން ފޯނު ކަނޑާލިއެވެ.

 

“ކީކޯ ބުނީ؟” ހިލްޔާއަށް އަދި ނޭވައެއް ވެސް ނުލެވެނީސް ބައްޕަ އެހިއެވެ.

 

“ހިނގާ ވަދެގެން ދާން، ބައްޕާ.” ހިލްޔާ އެއްދިމާލަކަށް ނަޒަރު ހުއްޓައިގެން އިނދެ އެހެން ބުންޏެވެ.

 

“ހިލްޔާ ހިތްހަމަޖެހޭތަ މިކަމާއިމެދު؟ ބައްޕައަށް ދީނުގެ ކަންތައް މާ ބޮޑަށް ނޭނގޭ އެކަމަކު މިކަހަލަ ތަނަކަށް ވަނުމަކީ ކޮންކަހަލަ ކަމެއްތަ؟” ބައްޕަ އެހިއެވެ.

 

“މާ ބޮޑު ކަމަކަށް ނުވާނެ ބައްޕާ. ހިނގާ.” ހިލްޔާ ބުންޏެވެ. އަދި ގަދަކަމުން އެތެރެއަށް ނޭވައެއް ލައި ބޭރު ކުރިއެވެ.

 

ހިލްޔާއަށް ނޭނގުނުކަމަކީ، ހިލްޔާގެ ދެންމެ އެ ދިން ޖަވާބުގެ ގޯސްކަން އޭނައަށް ސާބިތުކޮށްދޭނީ ޚުދު އޭނަގެ ހިތް ކަމެވެ.

 

ފައްޅީގެ ހުޅުވިފައިވާ ބޮޑު ދޮރުން ހިލްޔާ ފައްޅިއަށް ވަދެގެން ދާން ފެށީ ބައްޕައާއި އެކީގައެވެ. އެތާ ދޮރު މަތީގައި ހުރި ހިލްޔާއާއެކީ ހޮސްޕިޓަލުގައި މަސައްކަތް ކުރާ އަންހެން ކުއްޖަކު، ބައްޕަގެ އަތުގައި ހިފުމަށް އެދުމުން ހިލްޔާ ބައްޕަގެ އަތުގައި ހިފިއެވެ. އެ ވެގެން ދިޔައީ ކޮންމެހެން އެ ކުއްޖާ ބުނީތީ ކުރިކަމަކަށްވުރެ ބޮޑަށް، ހިލްޔާ ވެއްޓިދާނެހެން ހީވާތީ ކުރި ކަމަކަށެވެ.

 

ފައްޅިއަށް ވަދެގެން ދިޔައިރު އެއީ ހުވަފެނީ މަންޒަރެއްހެން ހީވާ ފަދައަކުން ނަޞާރާއިންގެ ރާގެއްޖެހި، ހިލްޔާމެންގެ ދެ ފަރާތުން ހުދުކުލައިގެ މަލުގެ ފިޔަތައް އުކެމުން ދިޔައެވެ. ހަމަ ސީދާ ފިލްމެއްގެ މަންޒަރެއްހެން ހީވާ ފަދަ މަންޒަރެކެވެ. އެހެނަސް ފައްޅިއަށް ވަދެގެން ދިޔަދިޔަހެން ހިލްޔާގެ ހިތް މޭތެރޭގައި އޮވެ ޖެހި ފިތި ބާރުވަމުން ދިޔަ ކަހަލަ އިޙްސާސެއް ކުރެވުނެވެ. ފައްޅީގެ ދެ ފަރާތުން ފެންނަމުން ދިޔައީ ޢީސާ ޢަލައިހިއްސަލާމް އާއި މަރިޔަމް ސަލާމުން ޢަލައިހާ އަށް ނިސްބަތް ކޮށްފައިވާ ބުދުތަކެވެ. އަދި ކުރިމަތިން ފެންނަމުން ދިޔައީ ބޮޑު ސަލީބެކެވެ.

 

އެ މަންޒަރުތައް ފެންނަމުން ދިޔަ ވަރަކަށް ހިލްޔާ ހަނދާން ވަމުން ދިޔައީ ޤުރުއާނުގެ އާޔަތްތަކެވެ. ދުވަހަކުވެސް ހިތުދަސްކުރަން މަސައްކަތް ވެސް ކޮށްފައިނުވާ އާޔަތްތައް ސިކުނޑިއަށް އަންނަމުން ދިޔައެވެ.

 

ޢީސާ ޢަލައިހިއްސަލާމް ޤަތުލު ނުކުރެވޭ ކަމާއި ޞަލީބަށް ވެސް ނޭރުވޭ ކަމަށް ﷲ ވަޙީ ކުރައްވާފައިވާ އާޔަތްތަކެވެ. އެހެނެއްކަމަކު އެމީހުންނަށް ހީވީ އެމީހުންނަށް އެކަން ކުރެވުނު ކަމަށްހެން ސިފަ ކުރެވިފައިވާ އާޔަތެވެ. ﷲ ވަނީ ޢީސާ ޢަލައިހިއްސަލާމް އެކަލާނގެ ޙަޟްރަތަށް ގެންނަވާފައިވާ ކަމަށް ވަޙީ ކުރެވޭ އާޔަތެވެ.

 

އެ އާޔަތްތަކުގެ ތަންތަންކޮޅު ހަނދާންވުމަށްފަހު ނުހަނު ސާފުކޮށް ހަނދާންވާން ފެށީ މަރިޔަމް ސޫރަތުގެ ބައެއް އާޔަތްތަކެވެ. އެއީ ނަޞާރާއިންނާއި ބެހޭގޮތުން ޤުރުއާނުގައި އައިސްފައިވާ ހިލްޔާގެ ހިތަށް އެންމެ އަސަރު ކުރުވަނިވި އާޔަތްތަކެވެ. މި ސޫރަތަކީ ވެސް ހިލްޔާ ހިތުދަސްކުރަން ޚިޔާލުވެސް ނުކުރާ ސޫރަތަކަށް ވިޔަސް، އެވަގުތު ނުހަނު ސާފުކޮށް އާޔަތްތައް ހަނދާންވިއެވެ.

 

وَقَالُوا۟ ٱتَّخَذَ ٱلرَّحْمَٰنُ وَلَدًا

رحمن ވަންތަ ރަސްކަލާނގެ، ދަރިކަލަކު ހިއްޕެވިކަމަށް އެ ކާފިރުވި މީހުން ބުނެފިއެވެ.

 

لَّقَدْ جِئْتُمْ شَيْـًٔا إِدًّا

 

ހަމަކަށަވަރުން، ތިޔަބައިމީހުން ތިޔަ ގެނައީ، ވަރަށްވެސް ނުބައިވެގެންވާ ބަހެކެވެ.

 

تَكَادُ ٱلسَّمَٰوَٰتُ يَتَفَطَّرْنَ مِنْهُ وَتَنشَقُّ ٱلْأَرْضُ وَتَخِرُّ ٱلْجِبَالُ هَدًّا

 

އެކަމުގެ ސަބަބުން، އުޑުތައް ފަޅަފަޅައިގެންގޮސް، ބިންގަނޑު އިރައިރައިގެންގޮސް، ފަރުބަދަތައް ކުދިކުދިވެ، ވެއްޓިގެން ދިއުން ކައިރިވެގެންވެއެވެ.

 

أَن دَعَوْا۟ لِلرَّحْمَٰنِ وَلَدًا

 

އެއީ رحمن ވަންތަ ރަސްކަލާނގެއަށް ދަރިކަލަކުވާކަމަށް އެއުރެން ގޮވުމުގެ ސަބަބުންނެވެ.

 

وَمَا يَنۢبَغِى لِلرَّحْمَٰنِ أَن يَتَّخِذَ وَلَدًا

 

ފަހެ، ދަރިކަލަކު ހިއްޕެވުން رحمن ވަންތަ ރަސްކަލާނގެއަށް އެކަށީގެނެއް ނުވެއެވެ

 

އެ އާޔަތްތައް ހަނދާންވެގެން ދިޔަދިޔަހެން ހިލްޔާގެ ލޯ ކަރުނުން ފުސްވިއެވެ. ބައްޕަ އަތުގައި ހިފައިގެން ނެތް ނަމަ ދެވޭ ނުދެވޭ ދިމާލެއް ނޭނގުނީހެވެ. އެ އާޔަތްތައް ހަނދާންވެގެން ދިޔަދިޔަހެން ހުރެވުނު ތަން އެނގުންވުމުން ހިތް ރޫރޫ އެޅިއެވެ. އެ އާޔަތްތަކުގެ ޖަވާބެއްގެ ގޮތުން ހިތާހިތުން ހަމަ ޔަޤީނުންވެސް އޭ ބުނެވުނެވެ. ރަޙްމާންވަންތަ ރަސްކަލާނގެއަށް ދަރިކަލަކު ނުވެއެވެ. އަދި އެކަލާނގެއާއި އެއްފަދަ ވެގެންވާ އެއްޗެއް ވެސް ނުވެއެވެ. އެކަލާނގެ އިރާދަކުރެއްވައިފިނަމަ އެކަލާނގެއާއި އެހެން ފަރާތެއް އެއްފަދަ ކުރާ މީހުންނަށް އުޤޫބާތެއްގެ ގޮތުން މުޅި މި ކާއިނާތް ވެސް ފުނޑުފުނޑު ކުރެއްވުމަށް އެކަލާނގެ ކުޅަދުންވަންތަވެ ވޮޑިގެންވެއެވެ. އެހެނަސް އެކަލާނގެ އެ ޢުޤޫބާތް ވަގުތުން ނުދެއްވައެވެ. އެކަލާނގެއީ ރަޙްމާންވަންތަ ރަސްކަލާނގެއަށްވީތީ ވެއެވެ. އެކަލާނގެ ގެ އަޅުންނަށް ތައުބާވުމަށް ފުރުސަތެއް ދެއްވާ ރަސްކަލާނގެއަށްވީތީވެއެވެ.

 

މި ޚިޔާލުތަކަށް ގެއްލުނު ހިލްޔާ، އޭނައަށް މި ހުރެވުނީ އޭނަގެ އަމިއްލަ ކައިވެނީގެ ޙަފްލާގައިކަން ވެސް ހަނދާން ނެތޭ ގޮތްވިއެވެ. އެކަން ހަނދާންވާ ގޮތްވީ، ބައްޕަ އޭނަގެ އަތުން ދޫކޮށްލުމުންނެވެ. އަދި އިސްއުފުލާލި ވަގުތު ކޯތާފަތަށް ކަރުނަތައް ފައިބައިގެން ދިޔުމުން ކުރިމަތީގައި ހުރި ރާފިލް ސާފުކޮށް ފެނުމުންނެވެ. ރާފިލް ހިސާބެއްގެ ކަންބޮޑުވުމަކާއެކީ އޭނަގެ ކަރުނަ ފޮހެދޭން އަތް ހިއްލި ތަނާހެން ހިލްޔާ އަވަސްއަވަހަށް އޭނަގެ ކަރުނަތައް އަމިއްލައަށް ފޮހެލިއެވެ. އެއާއިއެކު ރާފިލް އަތްތިރި ކޮށްލަންޖެހުނެވެ.

 

ދެމީހުންގެ ކައިރީގައި ހުއްޓިހުރި ފައްޅީގެ ބޮޑު މީހަކު ހިލްޔާއަށް ފެނުނީ އެވަގުތެވެ. ސަލީބެއް އެޅުވިފައިވާ ފަށެއް ކަރުގައި އަޅުވައިގެން އެހެރަ ފިރިހެން މީހާއަކީ ރާފިލްއާއި އޭނަގެ ކައިވެނި ކުރުވާ މީހާކަން ހިލްޔާއަށް އެނގުނީ، އެމީހަކު ކައިވެނީގެ ‘ޚުތުބާ’ ކިޔަން ފެށުމުންނެވެ. އެ ހިނދު ހިލްޔާއަށް ޤަބޫލު ކުރަން ދަތިވެފައި އެއްފަހަރު އެމީހާއަށް އަނެއްފަހަރު ރާފިލްއަށް ބެލެމުން ދިޔައެވެ. ރާފިލް އޭނައަށް ދައްކާލީ އެއްމިޔަކަނުގެ ހިނިތުންވުމެކެވެ.

 

އެ ހިނިތުންވުމުން ހިލްޔާގެ ހިތަށް ހަމަޖެހުމެއް ލިބޭ ގޮތެއް ނުވިއެވެ. ކަންތައް މިދަނީ ގޯހުން ގޯހަށްކަމަށް ބުނެ އޭނަގެ ހިތް ހަޅޭއްލެވިއެވެ. އޭނަ މިފަދައިން ކައިވެނި ކުރާނީ ކިހިނެއް ހެއްޔެވެ؟ ނަޞާރާއިންގެ ފައްޅިއެއްގައި ނަޞާރާއިންގެ ގޮތަށް ކައިވެނި ކުރުމުން އޭނަ ވާނީ ކޮންކަހަލަ މީހަކަށް ހެއްޔެވެ؟ ﷲ އޭނައާއިމެދު ރުހިވޮޑިގެންވާނެ ހެއްޔެވެ؟ މިއީ އޭނައަށް ސުވަރުގޭގެ ބަދަލުގައި ނަރަކައަށް ގެންދާނެ ޢަމަލެއް ހެއްޔެވެ؟ ނަރަކައިގެ އަލިފާނަށް އޭނައަށް ކެތް ކުރެވޭނެ ހެއްޔެވެ؟

 

އެހެނަސް އޭނަ ރާފިލް ދޫކޮށްލާނީ ހެއްޔެވެ؟ ދޫކޮށްލައިފިނަމަ އޭނަ އުޅެން ޖެހޭނީ ނިކަމެތި ދިރިއުޅުމެއް ހެއްޔެވެ؟ އެ ނިކަމެތި ދިރިއުޅުމަށް އޭނައަށް ކެތް ކުރެވޭނެ ހެއްޔެވެ؟ ރާފިލް އޭނައަށް މި ހޯދައިދޭ ހުރިހާ އަރާމަކަށް އޭނަ ފަސްދޭނީ ހެއްޔެވެ؟ ރާފިލްގެ ސަބަބުން އޭނައަށް ލިބިފައިވާ މަޝްހޫރު ކަމަށް އޭނަ ފަސްދޭނީ ހެއްޔެވެ؟ ޢާއްމު މީހުންގެ ދުލުން އޭނަ ސަލާމަތް ނުވާނެ ފަދައަކުން އެންމެންގެ ކުރިމަތީގައި އޭނަ ރާފިލްއަށް ފަސްދޭނީ ހެއްޔެވެ؟

 

ރާފިލް އޭނަގެ ނުޤަބޫލުގައި އޭނަ ލައްވާ ނަޞާރާއިންގެ ކައިވެންޏެއް ކުރުވަމުން ދާނަމަ، ކުރިއަށް އޮތް ތާނގައި ރާފިލް އޭނަ ލައްވާ އިސްލާމް ދީން ދޫކުރުވުމަށް ވެސް ވިސްނައިދީފާނެ ހެއްޔެވެ؟ އޭނަ އެ ބަސްތަކަށް ހެއްލިގެން ގޮސްފާނެ ހެއްޔެވެ؟ އޭނަ ހަމަ އެހާ ބޮޑުތަނުން ﷲ އަށް ނުކިޔަމަންތެރިވާންވީ ހެއްޔެވެ؟ އިސްލާމް ދީނުން މުޅިން ވަކިވާނީ ހެއްޔެވެ؟ ﷲ އާއި އޭނައާއި ދެމެދު ހުރި ހުރިހާ ދޮރެއް ބަންދު ކުރާނީ ހެއްޔެވެ؟ އެގޮތަށް އެ ދޮރުތައް ބަންދުކޮށްގެން ވެސް އޭނަ ދުނިޔޭގެ މުއްސަނދިކަމާއި ޝަރަފު ބޭނުންވޭ ހެއްޔެވެ؟

 

ހުއްޓުމެއްނެތި ހިލްޔާގެ ސިކުނޑިއަށް ވެރިވަމުން ދިޔަ ސުވާލުތަކުގެ ސަބަބުން އިވެމުން ދިޔަ ބަސްތަކަށް ވެސް ހިލްޔާއަށް ސަމާލުކަމެއް ނުދެވުނެވެ. އެއްދިމާލަކަށް ނަޒަރު ހުއްޓައިގެން ހުރިގޮތަށް ހުރެވުނީއެވެ. ކިރިޔާ ވެސް ހަމަހޭވެރިކަމެއްވީ، ކައިވެނި ކޮށްދެމުން ދިޔަ މީހާ ކައިވެނީގެ ތެރެއިން ހިލްޔާ ގާތު ކައިވެންޏަށް ޤަބޫލުތޯ ސުވާލު ކުރުމުންނެވެ.

 

“ހިލްޔާ…” ރާފިލް ވައި އަޑުން ހިލްޔާއަށް ގޮވާލުމުން ހިލްޔާއަށް އިސްއުފުލައި ރާފިލްއަށް ބަލާލެވުނެވެ. ރާފިލް އެއްފަހަރު ހިލްޔާއަށް އަނެއްފަހަރު ކައިވެނި ކޮށްދެމުން ދިޔަ ފިރިހެން މީހާއަށް ބަލާލުމުން، އޭނައާއި ދެންމެ ސުވާލެއް ކުރެވުނުކަން އެނގުންވިއެވެ.

 

ހިލްޔާއަށް އަނެއްކާވެސް އެސްފިޔަތައް ތިރިކޮށްލެވުނެވެ. އެއަށްފަހު ހިމޭންކަމުގެ ވަގުތުކޮޅަކަށްފަހު ހިލްޔާގެ ދޫ ޙަރަކާތް ކުރިއެވެ.

 

“އައި ކާންޓް ޑޫ ދިސް.” އެ ބަސްތައް ހިލްޔާގެ ދުލުން ބޭރުވީ އެއްވެސް އިޚްތިޔާރަކާއި ނުލައޭ ބުންޏަސް ދޮގަކަށް ނުވާނެއެވެ.

 

ހިލްޔާގެ ބަސްތައް އިވުމާއިއެކު ރާފިލްގެ ދެލޯ ބޮޑުވެގެން ދިޔަ ހިނދު އެތާ ތިބި އެންމެންގެ ސިއްރުވެރި ވާހަކަތައް މުޅި ތަނުގައި ފެތުރިގެން ދިޔައެވެ.

 

އެހެނަސް އެ ކަންތަކުން ހިލްޔާ ނޭނގޭ ސަބަބަކާހުރެ އެވަގުތު ޖެހިލުންވާ ގޮތެއް ނުވިއެވެ. އެނގުނުހާ ވެސް ކަމަކީ އޭނަ ރާފިލްއާއި އިންނަން ބޭނުންނުވާ ކަމެވެ. އެހެންކަމުން ބޯމަތީގައި އެޅިފައިވާ ލޭސް ފޮތިގަނޑު ނަގައި ބިންމައްޗަށް ވައްޓާލުމަށްފަހު ކަނާތު ކަށިއިނގިލީގައި އޮތް ޑައިމަންޑް ރިންގް ނަގައި އަތުގެ ކޮޅަށް ހޫރާލީ، އެވަގުތު ހިތުގައި ރާފިލްއަށްޓަކައިވީ ނުރުހުންތެރިކަމާއި ވެސް އެކީގައެވެ. ހިލްޔާ އަނގޮޓި އުކި ގޮތް ބާރުވުމުން އަނގޮޓި ގޮސް ޓައިލްސް މަތީގައި ޖެހުނުއިރު ބައެއް ޑައިމަންޑްތައް ވަކިވެގެން ވެސް ދިޔައެވެ.

 

ރާފިލް ޤަބޫލު ކުރަން ވެސް ދަތިވެފައި ހިލްޔާއަށް ބަލަހައްޓައިގެން ހުއްޓާ ހިލްޔާ އިތުރު އެއްޗެކޭ ނުބުނެ ރާފިލްއަށް ފަސްދީފައި ދާން ހިނގައިގަތެވެ. އުދަގުލާއިއެކީ ވެސް ހިލްޔާ ދިގު ފިޔަވަޅުތައް އަޅަން ފެށީ އެތަނުން ނިކުތުމުގެ އެދުން ހިތުގައި ބޮޑުވެފައިވި ވަރުންނެވެ. ހިލްޔާއަށް ފައްޅިން ނިކުންނަން އޮތް ރާސްތާގެ މެދާއި ހަމައަށް ދެވުނު ވަގުތު ފަހަތުން ރާފިލްގެ އަޑު އިވުނެވެ.

 

“ޔޫ #$*&@ %$@*@!!!”

 

ރާފިލް ހަރުއަޑުން ކިޔުނު ދިގު ނުބައި ބަހަކީ ހިލްޔާއަށް އަމާޒުވި ބަސްތަކެއްކަން ހިލްޔާއަށް އެވަގުތު ޔަޤީންވިއެވެ. އެއިން ލިބުނު ޝޮކުގައި ހިނދުކޮޅަކަށް ހިލްޔާގެ ފިޔަވަޅުތައް މަޑުޖެހުނެވެ. އެހެނަސް ފަސްއެނބުރި ބަލާނުލާ ކުރިއަށް ހިނގަން ފެށީ އެވަގުތު އޭނަގެ ނިންމުން ޔަޤީންވުމުންނެވެ. އެހެންކަމުން ހިލްޔާ މަޑުކުރުމެއްނެތި ގޮސް ފައްޅިން ނިކުމެގެން ދިޔައެވެ. ނިކުތް ވަގުތު ބައްޕަ އޭނައަށް ގޮވާލި އަޑު އިވުނެއްކަމަކު ހިލްޔާ ދެންވެސް މަޑެއް ނުކުރިއެވެ.

 

ހިލްޔާ ނިކުމެގެން ދިޔަ ގޮތަށް ދިޔައީ ރާފިލް އޭނައަށް ގަނެދިން ކާރު ކައިރިއަށެވެ. ދެންވެސް ރާފިލް އައިސް އޭނަގެ ޚިޔާލު ބަދަލު ކޮށްފާނެކަމުގެ ބިރު ހީވީތީ އެތަނާއި ވީހާވެސް ދުރަށް ދާން ބޭނުންވުމުން ހިލްޔާ އެ ކާރަށް އަރައި ސްޓާޓް ކޮށްލިއެވެ. އަދި ދާންވީ ވަކި މިޞްރާބެއް ނޭނގުނެއްކަމަކު މަގު ހުރަސްކޮށް ކާރު މުޅިން އަނެއްފަރާތަށް އަނބުރާލިއެވެ. މުޅި ދިރިއުޅުން ވެސް ނުބައި މިޞްރާބަކަށް ދަމުން ދާތީ އަނެއްފަރާތަށް އަނބުރާލަން ބޭނުންވީ ފަދައަކުންނެވެ.

 

ހިލްޔާއަށް ބީރައްޓެހި އެ މަގުން ހިލްޔާ ދާން އުޅެނީ ކޮންތަނަކަށް ކަމެއް ޚުދު ހިލްޔާއަށް ވެސް ނޭނގެއެވެ. ދާންވީ ވަކި މަންޒިލެއް ނެތެއްކަމަކު ޙަޔާތުގައި ފުރަތަމަ ފަހަރަށް މިދެވެނީ ރަނގަޅު މިޞްރާބަކަށްކަން ހިތުގެ ފުން މިނުން އެނގުނެވެ. އެހެންކަމުން ހިލްޔާ ބާރުވަމުން ދިޔަ ސްޕީޑަކާއިއެކީ އެ ހައިވޭ އިން ދުއްވަމުން ދިޔައެވެ.

 

އެހެނަސް ވަކި ހިސާބަކުން އަނެއްކާވެސް ހިލްޔާގެ ހިތް ނުތަނަވަސް ޚިޔާލުތަކުން ފުރިގެން ދިޔައެވެ. އޭނައަށް މި ނިންމުނީ އެންމެ ރަނގަޅު ނިންމުންތޯ ހިތަށްއެރިއެވެ. މިފަހަރު އޭނަ ރާފިލްއަށް މި ފަސްދިނީ އަނބުރާ ރާފިލްގެ ގާތަށް ދެވޭ ގޮތަކަށް ނޫންކަން ޔަޤީންވިއެވެ. އޭނަ ހަމަ މުއްސަނދިކަމަށް ފަސްދިނީތޯ ހިތަށްއެރިއެވެ. އޭނަގެ ޙަޔާތަށް އަންނަން އުޅޭ ‘ފުރިހަމަ’ ބައިވެރިޔާއަށް ފަސްދިނީ ހެއްޔެވެ؟ އޭނަގެ ރީތި ލޯބި ވާހަކައަށް އަންނަން އުޅުނު ‘އުފާވެރި’ ނިމުމަށް އޭނަ ފަސް ދިނީ ހެއްޔެވެ؟

 

އެ ސުވާލު ހިލްޔާގެ ހިތަށް ވެރިވި ވަގުތަކީ ހިލްޔާ ދުއްވަމުން ދިޔަ ކާރު، ފަރުބަދައެއްގެ ކޮޅާއި ހަމައަށް ދިޔަ ވަގުތެވެ. އެކަން ފާހަގަވުމުން ހިލްޔާއަށް ބުރަކި ޖައްސާލެވުނީ ކުއްލި ގޮތަކަށެވެ. އެ ހިނދު ހިލްޔާގެ ހިތް ބާރަށް ތެޅެމުން ދިޔައެވެ. އެހިނދު ދެންމެ އޭނައަށް ކަންތައް ކުރެވުނު ގޮތް ލޮލަށް ސިފަވެގެން ދިޔުމުން އިޙްސާސް ކުރަންވީ ގޮތެއް ނޭނގުނެވެ. ނޭނގޭ ސަބަބަކާހުރެ ލޮލަށް ކަރުނަތައް ޖަމާވެ، ރޮވެން ފެށިއެވެ. އޭނަ ހާދަ މޮޔައޭ އެވަގުތު ހިތަށްއެރިއެވެ. ނުހަނު ‘ރަނގަޅު’ މުއްސަނދި ފިރިހެނަކާއި އިނުމަށް، 5 ތަރީގެ ސެލޫންއަކުން ތައްޔާރުވެގެން އައިސް ކައިވެންޏަކަށް ފަސް ދޭނީ ފަހެ ކޮން އަންހެން ކުއްޖެއް ހެއްޔެވެ؟ އޭނަގެ މުޅި މުސްތަޤްބަލުގެ ‘އުފާވެރިކަން’ ޔަޤީންވެފައި ވަނިކޮށް އެއަށް ފަސްދޭނީ ކޮން އަންހެން ކުއްޖެއް ހެއްޔެވެ؟

 

“ޔާ ﷲ!”

 

ރުއިމުގެ ތެރެއިން ހިލްޔާއަށް ގޮވާލެވުނެވެ. އޭނައަށް ﷲ ގެ ނަންފުޅު އެފަދައިން ނަންގަނެވުނީ ކިތައް ދުވަސް ފަހުން ކަމެއް ހިލްޔާއަށް ނޭނގެއެވެ. ހިލްޔާ އެ ބަސްތައް ކިޔާލުމާއެކު ވާރޭ ވެހެން ފެށިއެވެ. އެހެނަސް އެ ވާރެއަކުން ހިލްޔާގެ ރުއިމަށް ބަދަލެއް ނައެވެ.

 

ހިލްޔާއަށް އެވަގުތު ނޭނގުނު ޙަޤީޤަތަކީ، ދެންމެ ހިލްޔާއަށް ނިންމުނީ މުޅި ޙަޔާތުގައި ވެސް ނިންމުނު އެންމެ ފުރިހަމަ ނިންމުން ކަމެވެ. އެއީ ހިތުގައި އޮތް ހުރިހާ ދުނިޔަވީ އެދުމަކަށްވުރެ ބޮޑަށް ﷲ ގެ ރުހިވޮޑިގަތުން އިސްކޮށް ނިންމި ނިންމުމެކެވެ. އަމިއްލަ ދީން ރައްކާތެރިކުރުމަށް އެ އެޅި ފިޔަވަޅުން، ހިލްޔާއަށް އެ ރައްކާތެރި ކުރެވުނީ އަމިއްލަ ނަފްސު ކަން ހިލްޔާއަށް އެނގޭނެ ނަމައެވެ.

 

ނުނިމޭ