ނަފްސީ (އަށާޅީސްވަނަ ބައި)

“ހިލްޔާ….ވާއި ޑިޑް ޔޫ ޑޫ ދިސް ޓު މީ؟ އަހަރެންގެ ލޯބީގަ އެއްވެސް އުނިކަމެއްވީތަ؟ ޑިޑް ޔޫ ނޮޓް ލަވް މީ ލައިކް އައި ލަވްޑް ޔޫ؟ ޑޮކްޓަރ މެތިއު….އިނގިރޭސި މީހަކަށްވީމަތަ އަހަންނަށްވުރެ ބޮޑަށް ޑޮކްޓަރ މެތިއު ކަމުދިޔައީ؟ އަހަރެން އުއްމީދެއް ވެސް ނުކުރަން. އެއީ ހިލްޔާއަށްވުރެ ޢުމުރުން މާ ދޮށީ ވެސް މީހެކޭ! އަހަންނަށް ހިލްޔާއަށް ފުރިހަމަ ކޮށްނުދެވުނު ކަމެއް އޭނައަށް ފުރިހަމަ ކޮށްދެވުނީތަ؟ އަހަރުމެން އެކުގައި ހޭދަ ކުރި ރޭތައް ހަނދާން ނައްތާލާފަތަ ޑޮކްޓަރ މެތިއުއާއި އެކީ ރޭތައް ހޭދަ ކުރީ؟ ހާދަ…ހިތަށް ތަދުވިއޭ އެ މަންޒަރު ފެނުނު ރޭ. ހައު ކުޑް ޔޫ ޑޫ ދިސް ޓު މީ؟”

ބައްޕަގެ ފޯނުން ފެންނަމުން ދިޔަ ރާފިލް ދައްކަމުން ދިޔަ ވާހަކަތައް އިވެމުން ދިޔަދިޔަހެން ހިލްޔާގެ ދެބުމަ ކައިރިވިއެވެ. ރާފިލް ދެއްކި ވާހަކައިގެ މާނަ ދަނެގަންނަން ވެސް ހިލްޔާއަށް އިރުކޮޅެއް ނެގިއެވެ. އެ މާނަ ރަނގަޅަށް ދޭހަ ކުރެވިގެން ދިޔައީ ރާފިލްގެ އެ ވާހަކަ ނިމި، ރާފިލްގެ ލޮލުން ކަރުނަތައް ފޭބި ހިނދެވެ. އެއަށްފަހު ރާފިލް ދެލޯ މައްޗަށް ވާ ގޮތަށް އެއްއަތް އަޅައި ރޯން ފެށި ހިނދު ހިލްޔާއަށް ކުރު ނޭވައެއް ދޫކޮށްލެވުނެވެ.

“ކިހިނެއްވެގެންތަ މި ލަދުނުގަންނަ އިންސާނާ އުޅެނީ؟ އަމިއްލައަށް ކުރާ ކަންތަކުގެ އިލްޒާމް އެހެން މީހުންގެ ބޮލުގަ އެ އަޅުވަނީ!!” ބައްޕަ އިންތިހާ ދަރަޖައިގެ ރުޅިވެރިކަމާއިއެކީ ބުނެލި އެ ބަސްތަކުން ހިލްޔާގެ ހިތް ރޫރޫ އެޅިއެވެ. އެހިނދު ލަސްލަހުން އިށީނދެގެން އިން ގޮނޑިއަށް ލެނގިލެވުނީ ދެންވެސް އޮޅުމެއްގެ ތެރޭގައި އިނދެއެވެ.

އެންމެ ފުރަތަމަ ވެސް ހިތަށްއެރީ، ރާފިލް އެ ބުނި ކަމެއް އޭނައަށް ކުރެވިފައިވޭތޯއެވެ. އެއްވެސް މީހަކީ ދޮގެއް ހަދާފާނެ މީހެއްކަމަށް ޤަބޫލު ކުރުމަކީ ހިލްޔާއަށް ދަތި ކަމަކަށްވާތީވެއެވެ. ހިތަށް ވެރިވި އެ ސުވާލަށް ސިކުނޑި ނޫނެކޭ ބުނުމުން ރާފިލް ހަމަ ދޮގެއް ހެދީތޯ ހިތަށްއެރިއެވެ. ބައްޕަ ބުނި ފަދައިން އޭނަގެ ބޮލުގައި އިލްޒާމެއް އެޅުވުނީ ހެއްޔެވެ؟ އެއީ ވެސް ކޮން ކަމަކަށްޓަކައި ހެއްޔެވެ؟ ޒިނޭ ހެއްޔެވެ؟ އޭނަގެ ބޮލުގައި އެޅުވުނީ ޒިނޭގެ ތުޚުމަތު ހެއްޔެވެ؟ އެއީ ވެސް މުޅި ދުނިޔެއަށް އިވޭނެ ފަދައިން ހެއްޔެވެ؟

މިހެން ކަމަށްވާނަމަ މިވަގުތު ދުނިޔޭގެ އެންމެންނަށް ހީވެފައިވަނީ އޭނައަކީ ޒިނޭ ކުރާ މީހެއް ކަމަށް ހެއްޔެވެ؟ އޭނަ މި ހުރިހާ ދުވަހު ބޮޑުބޭބެއެއްގެ ގޮތުގައި ދުށް ޑޮކްޓަރ މެތިއުއާއި އެކީ އެފަދަ ގުޅުމެއް ހިންގާފައިވާ އަންހެނެއް ކަމަށް ހެއްޔެވެ؟ އަދި އޭނަ އެކަން ކުރީ ރާފިލްއަށް ބޭވަފާތެރިވާން ކަމަށް ހެއްޔެވެ؟ އަދި ހަމަ އެހެންމެ އޭގެ ކުރިން އޭނަ ރާފިލް އާއި ވެސް އެފަދަ ގުޅުމެއް ހިންގާފައިވާ ކަމަށް ހެއްޔެވެ؟

އެ ހުރިހާ ކަމެއް އެނގުންވެގެން ދިޔަދިޔަހެން ހިލްޔާގެ ލޮލަށް ކަރުނަތައް ޖަމާވިއެވެ. މުޅި ދުނިޔެ ވަށައި އެނބުރެން ފެށުމުން ބޮލަށް އެނބުރުން އެރިހެން ވެސް ހީވިއެވެ. އެވަގުތު ބައްޕަ ރުޅިވެރިކަމާއިއެކީ އެއްޗެއް ބުނަމުން ދިޔައެއްކަމަކު ސާފެއް ނުވިއެވެ. ކަންފަތް ބައްވެފައިވިހެން ހީވިއެވެ. ދެންމެ އެ ދެއްކި ވާހަކައެއް ދެއްކީ ހަމަ ރާފިލް ތޯ ހިތާހިތުން ސުވާލު ކުރެވުނެވެ.

އެއީ މި ހުރިހާ ދުވަހު އޭނައާއި އެކީ ލޯބިން އުޅުނު ރާފިލް ހެއްޔެވެ؟ އޭނައަށް ހަދިޔާ ގަނެދީ، އޭނަ އުފާވާނެހާ ކަންތައް ކޮށްދިން ރާފިލް ހެއްޔެވެ؟ އޭނައާއި އެކީ އެތައް ހިނިތުންވުމަކާއި ހުނުމެއް ޙިއްސާ ކުރި ރާފިލް ހެއްޔެވެ؟ އެ ރާފިލްއަށްޓަކައި އޭނަ އެހެން ފިރިހެނެއްގެ ކައިރީގައި އިށީންނަން ވެސް އިންކާރު ކުރި ރާފިލް ހެއްޔެވެ؟ އެ ރާފިލް އާއިއެކީ ވީހާވެސް ޤަދަރުވެރި ގުޅުމެއް ފެށުމަށް ކައިވެނީގެ ކުރިން ބޭނުންވެ ހުރެވެސް ގާތް ނުވި ރާފިލް ހެއްޔެވެ؟

ހިތަށް ވެރިވި އެ ހުރިހާ ސުވާލުތަކާއިއެކު ހިލްޔާގެ މޭގައި އުފެދުނު ރިހުމާއިއެކު ރޮވެން ކައިރިވިއެވެ. ހިތަށް އިޙްސާސް ކުރެވުނު ކެހިވެރިކަމެއްގެ ބޮޑުކަމުންނެވެ. އިސާހިތަކު ހިލްޔާގެ ލޮލުން ކަރުނަތައް ފައިބައިގެން ދިޔަ ހިނދު، ގިސްލެވެން ފެށިއެވެ. އޭނަގެ ގިސްލުމުގެ އަޑާއިއެކު ބައްޕަ އޭނައަށް ގޮވާލަމުން ކޮނޑުގައި ހިފާލިކަން އެނގުނެވެ. އެހެނަސް ބައްޕަގެ އެ ޙަރަކާތުން ހިލްޔާގެ ރުއިން ގަދަވެގެން ދިޔުން ނޫންކަމެއް ނުވިއެވެ.

އެވަގުތުކޮޅުން ފެށިގެން ޑިޕާރޗާރގައި ހުރިހާ ވަގުތަކު ހިލްޔާއަށް ރޮވުނޭ ބުންޏަސް ދޮގަކަށް ނުވާނެއެވެ. އޭނަގެ ރުއިން ހުއްޓޭތޯ ބައްޕަ އެތައް ވާހަކައެއް ދައްކައި އޭނަ އެއާރޕޯޓުގެ އެކި ތަންތަނަށް ގެންދިޔަކަން ހިލްޔާއަށް އެނގުނެވެ. ދޭތެރެއަކުން ބައްޕަ މީހަކަށް ގުޅައި ރާފިލްގެ އެ ޕޯސްޓް ޑިލީޓް ކުރުވަން މަސައްކަތް ކުރުވަމުން ދިޔަކަން ވެސް ހިލްޔާއަށް އެނގުނެވެ. އެކަމާއިމެދު ހިތަށް ހަމަޖެހުމެއް ލިބުނެއްކަމަކު، ރާފިލްގެ އެ ވިހަގަދަ ބަސްތައް މިހާރު ޢާއްމު މީހުންނަށް ނުފެތުރި ހުންނާނެ ކަމާއިމެދު ހިލްޔާއަށް ޝައްކު ކުރެވުނެވެ. އޭނަ ކައިވެނީގެ ޙަފްލާއަށް ފަސް ދިން ވަގުތަށް މާ ގިނައިރެއް ނުވީސް މުޅި ސޯޝަލް މީޑިއާގައި އެ ވާހަކަ ފެތުރިގެން ދިޔަ ގޮތެވެ. ވީއިރު މިފަދަ ވާހަކައެއް މިހާރު ނުފެތުރި ހުންނާނެ ހެއްޔެވެ؟ ރާއްޖެއަށް ދިޔުމުން އޭނައަށް ނަފްރަތުގެ ނަޒަރަކުން ނޫނީ ނުބަލާނެ މީހެއް ނުހުންނާނެ ހެއްޔެވެ؟

މި ޚިޔާލުތަކާއި އެކީ ގިސްލަގިސްލާފައި ހުއްޓާލަން މަސައްކަތް ކޮށްފައި އަނެއްކާވެސް ރޮއިރޮއިފައި ހިލްޔާއަށް އުޅެވެމުން ދިޔައެވެ. ބައްޕަ ހުއްޓާލާށޭ ބުނަމުން ދިޔައެއްކަމަކު ހުއްޓޭ ގޮތެއް ނުވިއެވެ. ކިރިޔާ ވެސް ހަމައަކަށް އެޅޭ ގޮތްވީ ފްލައިޓަށް އަރައި ހަމަޖެހިލުމުންނެވެ. އެވަގުތު ރޮމުން ރޮމުން ގޮސް ވަރުބަލިވެފައި ވުމުންނެވެ. ފްލައިޓުގެ އިކޮނޮމީ ކްލާސް ސީޓެއްގައި އިށީންނަންވުމުން ހިލްޔާގެ ހަނދާނަށް އައީ އޭނަ ދަތުރު ކުރި ފަސްޓް ކްލާހުގެ ސީޓެވެ. އިސާހިތަކު ޝައިޠާނީ ވަސްވާސްތަކުން އޭނަގެ ހިތާމަތައް އިތުރުވާން އުޅުނެވެ. އޭނައަށް ލިބެން މިއުޅެނީ ހުރިހާ ޤަދަރާއި ޢިއްޒަތް ގެއްލުމުގެ އިތުރުން ‘ފަޤީރު’ އަދި ނިކަމެތި ދިރިއުޅުމެކޭ ހިތަށްއެރިއެވެ. މިއީ ދީންވެރިވުމުން ވާ ގޮތްކަމަށް ޝައިޠާނާ ބުނެދިނެވެ. ދީނުގެ ސަބަބުން އޭނައަށް ޖެހުނު ޙާލަތް ކަމަށް ހިތުގެ ކަނަކުން ގޮވިއެވެ. ދީނަށް ފަސްދީފައި އޭނަ ރާފިލްއާއި ކައިވެނި ކޮށްގެން ދިޔަނަމަ އޭނަ އުޅުނީހީ ޤަދަރުވެރި، މުއްސަނދި އަދި އުފާވެރި ދިރިއުޅުމެއްކަމަށް ބުނެ ނަފްސު ގޮވިއެވެ.

އެ ޚިޔާލު ސިކުނޑިއަށް ވެރިވި ވަގުތު ގައިން ނެގި ހީބިހިއާއިއެކު ހިލްޔާއަށް ދެލޯ މަރައި ތަގުޅިކޮށްލަމުން ބޯހޫރުވާލެވުނެވެ. އަނެއްކާވެސް ދުނިޔެ އޭނަގެ ހިތުގައި ޒީނަތްތެރިވަނީތޯ އަމިއްލަ ނަފްސާއި ސުވާލު ކުރެވުނެވެ. އެ ނަފްސު އެ ބުނަނީ ތެދު ވާހަކައެއްތޯ އަމިއްލަ ހިތާއި ސުވާލު ކުރެވުނެވެ. އޭނަ ރާފިލްއާއި ކައިވެނި ކުރިނަމަ ހުރިހާ ކަމެއް ރަނގަޅުވީސް ހެއްޔެވެ؟

ހަމަ އެއާއިއެކު އީމާންތެރިކަމުގެ ފޮނިކަން އިޙްސާސް ކުރެވިފައިވާ އެ ހިތް ނޫނެކޭ ބުންޏެވެ. އާނއެކެވެ. ރާފިލްއާއި ގުޅުނުނަމަ އޭނައަށް މި ދުނިޔޭގެ ހުރިހާ އުފަލެއް ލިބުނީހެވެ. އެހެނަސް އޭރުން ހިލްޔާއަށް އުޅެވުނީހީ އާޚިރަތް މަތިން މުޅިން ހަނދާން ނައްތާލާފައެވެ. ރާފިލްއަކީ އާޚިރަތުގެ މަތިން އޭނައަށް ހަނދާން ކޮށްދޭނެ ފަދަ ބައިވެރިޔަކަށް ނުވީހެވެ. އޭގެ ބަދަލުގައި ފާފަތަކަށް މަގު ފަހި ކުރުވީހެވެ. ނަތީޖާއެއްގެ ގޮތުން އާޚިރަތުގައި ހިލްޔާ ވީހީ މުޅިން ނާކާމިޔާބުވާ މީހުންގެ ތެރެއިންނެވެ.

އެ ޚިޔާލުން ހިލްޔާއަށް ފްލައިޓުގެ ސީޓުގައި އިނދެ ފުން ނޭވައެއް ދޫކޮށްލެވުނެވެ. އެހެންނޫނަސް ރާފިލް މި ދުނިޔޭގައި ވެސް އޭނައާއިމެދު ކަންކޮށްފައިވަނީ އެންމެ ރަނގަޅަކަށް ނޫންކަން އެވަގުތު ހިލްޔާގެ ހަނދާނަށް އައެވެ. ރާފިލްއަކީ އޭނައަށް ރަނގަޅު ބައިވެރިޔަކަށް ވާނެ ނަމަ އެހެން އަންހެނުންނާއި މާ އެކުވެރިވެ ގައިގޯޅިވެގެން ނުއުޅުނީހެވެ. އެއީ އޭނަ ހިތްހަމަޖެހޭ ކަމެއް ނޫންކަން އެނގުމުން އެކަންތައް ހުއްޓާލީހެވެ. އެހެނަސް އޭގެ ބަދަލުގައި ރާފިލް އޭގެއިން އަންހެން ކުއްޖަކު އަމިއްލަ ކޮޓަރިއަށް ވެސް ވެއްދީއެވެ. އެއަށްފަހު ހިލްޔާގެ އިޙްސާސްތަކަށް އިޙްތިރާމް ކުރުމެއް ނެތި އޭނައާއި ކައިވެނި ކުރަން ރާވާލީއެވެ.

އެކަންތައް ހަނދާންވެގެން ދިޔުމުން ހިލްޔާގެ ހިތަށް ހިސާބެއްގެ ތަސައްލީއެއް ލިބުނެވެ. ރާފިލް ކަހަލަ މީހަކާއި ދުރުވެވުމުންނެވެ. އެހެނަސް ދެންވެސް އެ ހިތުގައި ހިތާމަވިއެވެ. މިއަދުން ފެށިގެން އޭނަގެ ޢިއްފަތްތެރިކަމާއިމެދު އެންމެން ސުވާލު އުފައްދާނެކަން ޔަޤީންވުމުންނެވެ. ރާއްޖެއަށް ގޮސް އޭނައަށް އެކަންތައް ބަރުދާސްތު ކުރެވޭނެ ކަމެއް ނޭނގެއެވެ. އެ ނަޒަރުތަކާއި ބަސްތަކުން އޭނަ ސަލާމަތްވާނީ ކިހިނެއް ހެއްޔެވެ؟ އޭނަގެ އެއްވެސް ކުށެއް ނެތްކަން އޭނަ ސާބިތުކޮށްދޭނީ ކިހިނެއް ހެއްޔެވެ؟

ހާސްކަމުން ހިލްޔާގެ ސިކުނޑި ފުރިގެން ދިޔަ ވަގުތަކީ ފްލައިޓް ރަންވޭއަށް ދިޔުމަށްޓަކައި ޓެކްސީ ކުރަން ފެށި ވަގުތެވެ. ހަމަ އެއާއިއެކު ޤުރުއާނުގެ މަތިން ހަނދާންވިއެވެ. މިފަދަ ދިގު ދަތުރުތަކުގައި ހިލްޔާ ފޯނުން ޤުރުއާން އެޕްލިކޭޝަން ހުޅުވާލަނީ ފްލައިޓް ޓެކްސީ ކުރާ ވަގުތެވެ. އެހެންކަމުން އެވަގުތު އޭނަގެ ފޯނު ނަގައި އެ އެޕްލިކޭޝަން ހުޅުވާލެވުނެވެ. އަދި ވަގުތުން ކިޔެވެން ފެށިއެވެ.

ސިކުނޑީގައި ހުއްޓުމެއްނެތި އެނބުރެމުން ދިޔަ ޚިޔާލުތަކުގެ ސަބަބުން އެވަގުތު ޤުރުއާން ކިޔަވަމުން ދިޔައިރު އާޔަތްތަކަށް ސަމާލުކަން ދެވޭ ގޮތެއް ނުވިއެވެ. އެހެނަސް ކީއްވެކަމެއް ނޭނގެއެވެ. އެ ކިޔެވުމުގެ ސަބަބުން ހިލްޔާގެ ހިތަށް ބަދަލެއް އައިކަން ހިލްޔާއަށް އިޙްސާސް ކުރެވުނެވެ. އެންމެ މޮޅު ޑޮކްޓަރަށް ވެސް މޭ ފަޅާލުމަށްފަހު، ހިތް ދެފަޅިކޮށްފައި އެ ހިތު ތެރޭގައި ހިތާމަވެރިކަމެއް ނަގައި، އެ ހިތާމައިގެ އަސަރު ނުފިލުވޭނެއެވެ. އެހެނަސް ހަމައެކަނި ޤުރުއާނުގެ ތިލާވަތުން ވެސް ހިތަށް ލިބިގެން ދިޔައީ އެފަދަ ފަރުވާއެއްހެން ހިލްޔާއަށް ހީވިއެވެ. އެ އާޔަތްތަކުގެ މާނައާއި މެދު ވިސްނޭނެނަމަ ހިތަށް ލިބުނީހީ އަދި ކިހާ ބޮޑު ހަމަޖެހުމެއްތޯ އެވަގުތު ހިތަށްއެރިއެވެ.

ޤުރުއާނަކީ އިންސާނާގެ ވެރި ރައްބުގެ ބަސްފުޅެވެ. އެ ބަސްފުޅަކީ އިންސާނާ މޭ ތެރޭގައިވާ ހުރިހާ ރޫޙާނީ ބައްޔެއްގެ ޝިފާއެވެ. އެހެނަސް މި ޝިފާ ލިބިގަނެވޭނީ އިޚްލާޞްތެރިކަމާއިއެކީ އެ ޤުރުއާނުން ޝިފާ ލިބިގަންނަން ބޭނުންވާ ހިތަކަށެވެ. އެހެންކަމަކަށް ބަރޯސާނުވެ ހަމައެކަނި ﷲ އަށް ވަކީލުކޮށް ޤުރުއާނުން އެހީ ހޯދަން މަސައްކަތް ކުރާ މީހަކަށެވެ.

**

ފޯނުން ރާފިލްގެ ވީޑިއޯ ފެނުނު ފަހުން ދާނިޝްގެ ހިތަށް ވެރިވެފައިވި ރުޅިވެރިކަން ފިލުވައިލަން ދާނިޝްއަށް އުދަގޫވެފައިވިއެވެ. އެ ރުޅިވެރިކަން މައިތިރި ކުރަން އުޅުނެއްކަމަކު އެކަން ދަތިކަމަކަށް ވެފައިވިއެވެ. އެވަގުތު ވެސް ފޯނު ބިމަށް ޖަހާލުމަށްފަހު ހަމަހޭވެރިކަމެއް ވުމުން ދާނިޝް ފޯނު ނެގިއެވެ. އަދި ވަގުތުން ފޭސްބުކަށްވަދެ ރާފިލްގެ ޕްރޮފައިލް ރިޕޯޓް ކުރިއެވެ. އަދި އެ ވީޑިއޯ ފެނުނު އެހެން ހުރިހާ ޕޭޖެއް ވެސް ރިޕޯޓް ކުރިއެވެ. އެއަށްފަހު ނަހީދުބެއަށް ގުޅިއެވެ. އެހެނަސް ނަހީދުބެއަށް ގުޅާ ކޮންމެ ފަހަރަކު ކޯލު ބިޒީވެގެން ދެއެވެ. ނަހީދުބެއަށް މެސެޖެއް ކޮށްލިއެއްކަމަކު މެސެޖަށް ޖަވާބެއް ނާދެއެވެ. އޭގެ ސަބަބުން ހިތުގެ ހަމަޖެހުން ގެއްލިފައިވިއެވެ. ހިލްޔާގެ ޙާލު ބަލަން ބޭނުންވެފައިވިއެވެ.

ހިތްހަމަނުޖެހިފައިވި ވަރުން ދާނިޝްއަށް ފަޔާޒް ގުޅުމުން ވެސް އެދުވަހު ފޯނެއް ނުނެގުނެވެ. އެކުވެރިންގެ ގްރޫޕެއް ވެސް އެދުވަހު ދާނިޝް ނުބަލައެވެ. އެމީހުންނަކީ ރާފިލް ދެއްކި ޒާތުގެ ވާހަކައެއް ދައްކާނެ ބަޔަކު ނޫންކަން ޔަޤީން ވިޔަސްމެއެވެ. އެއްވެސް މީހަކާއި ވާހަކަ ދައްކަން ދާނިޝް ބޭނުމެއް ނުވެފައިވިއެވެ. ދޭތެރެ ދޭތެރެއިން ރާފިލްގެ ދެއްކި ވާހަކަތަކާއި ރާފިލްގެ ސޫރަ ވެސް ހަނދާންވުމުން، ހިތުގައި ރުޅީގެ އަލިފާނެއް ރޯވެގެން ދާ ގޮތުން، ދާނިޝްއަށް ބޭއިޚްތިޔާރުގައި ދަތްކުނޑި ވިކެމުން ދިޔައެވެ. ރާފިލް ރާއްޖޭގައި ނެތީ ރާފިލްއާއި ދާނިޝްގެ ވެސް ނަސީބަށެވެ. އެ ނޫންނަމަ ދާނިޝްއަށް އަތުން ފައިން ގޯހެއް ހެދުނީސްކަން ޔަޤީނެވެ.

އެރޭ މަޣްރިބް ނަމާދަށް މިސްކިތަށް ދިޔުމުން ފަޔާޒް ފެނުމުން ފަޔާޒާއި ވެސް ހިނިތުންވެ ނުލެވުނެވެ. ފަޔާޒް އެކަމާއިމެދު އެއްޗެކޭ ނުބުންޏެވެ. އެހެނަސް މަޣްރިބް ނަމާދަށްފަހު އަމިއްލައަށް ސުންނަތް ކޮށް ނިންމުމަށްފަހު، އޭނައާއި އެކުއެކީހެން ސުންނަތްކޮށް ނިމުނު ދާނިޝްއަށް ބަލާލަމުން ވާހަކަ ދެއްކިއެވެ.

“ވީޑިއޯ ފެނިއްޖެދޯ؟ ރާ…..ފިލްގެ؟” ފަޔާޒްގެ ފުރަތަމަ ސުވާލާއި އެކު ވެސް ދާނިޝް އޭނައަށް ދިން ރުޅިވެރި ނަޒަރުން ފަޔާޒަށް ބޭއިޚްތިޔާރުގެ އޭނަގެ ދެވަނަ ސުވާލު ކުރުކޮށްލެވުނެވެ.

“ދުށިން! ބުހުތާން ދޮގު ހަދާ މީހާގެ ވީޑިއޯ ދުށިން!” ދުވަހަކުވެސް ރުޅި ނާންނަ ވަރަށް ރުޅި އައިސްފައި އިނދެ ދާނިޝްއަށް ބުނެވުނެވެ. އެކަމާއިމެދު އަމިއްލަ ނަފްސާއިމެދު ހިތްހަމަނުޖެހުނެވެ. ނަމާދުކޮށް ނިމި، މިސްކިތް ތެރޭގައި އިނދެ އެހާވަރަށް ރުޅި އިސްކުރެވުމުންނެވެ. ފަޔާޒް ހިމޭންކަމުގެ ވަގުތުކޮޅަކަށް ދާނިޝްއަށް ބަލަން އިނދެފައި ފުން ނޭވައެއް ދޫކޮށްލިއެވެ.

“ވަރަށް ގޯސްކަމެއް ދޯ އެ ކުރީ؟ އެއީ ޙަޤީޤަތަކަށް ވިޔަސް އެކަހަލަ ވާހަކައެއް އެގޮތަށް ދައްކައިގެން ނުވާނެ. ހިލްޔާއަށް އަނެއްކާ ފެނިފަތަ ހުންނާނީ؟” ފަޔާޒް އެހިއެވެ.

“ނުފެނި ނުހުންނާނެހެން ހީވަނީ. ޚިޔާލެއް ވެސް ނުކުރެވޭ ހިލްޔާއަށް ވާނެ ގޮތެއް. ނަހީދުބެ ވެސް ފޯނެއް ނުނަގާ. މި ބުނީ ރާފިލް އަހަންނަށް ފެނުނިއްޔާ އަހަރެންގެ ހުރި ވަރެއް ދައްކާލާނަން. ތިމާ ވަރުގެ މީހެއް ނެތްކަމަށް ހެދިގެން އުޅޭ މީހެއް!” އެ ވާހަކަ ދެއްކި ދެއްކިހެން ދާނިޝްގެ ރުޅިވެރިކަން އިތުރުވިއެވެ.

“ކާމް ޑައުން ދާނިޝް….އެނގޭ މިވަގުތު ދާނިޝް ވަރަށް ރުޅި އަންނާނެކަން. ރުޅި ޙައްޤު ވެސްމެ. އެކަމަކު ރުޅިވެރިކަމަކީ އިސްކޮށްފިނަމަ ޝައިޠާނާއަށް އަމިއްލަ ނަފްސުގެ ބާރު ޙަވާލުކޮށްލެވޭ ކަމެއް. އެހެންވީމަ ރުޅި މަޑުކޮށްފަ މި ޙާލަތާއި ކުރިމަތިލާންވީ. ހިލްޔާ މާދަމާ އަންނަ ވާހަކައެއްނު ދާނިޝް ބުނީ؟ ދާނިޝް ހިލްޔާއާއި ގުޅެން އަދިވެސް ބޭނުންވަންޏާ މިވަގުތު ހިލްޔާއަށް ވަރަށް ސަޕޯޓިވް ވާންވާނެ. ރުޅި އިސްކޮށްގެން ހިލްޔާއަށް އެ ބޭނުންވާ ސަޕޯޓް ދާނިޝްއަށް ނުދެވިދާނެ. އެހެންވީމަ ވެސް ރުޅި ކޮންޓްރޯލް ކުރުން މުހިއްމު….ރާފިލް ކުރިކަމެއް އޭނަ ކޮށްފި. އޭނަގެ ނުފޫޒު ދާނިޝްއާއި ހިލްޔާގެ ގުޅުމަށް ކޮށްގެން ނުވާނެ. ދާނިޝް ވިސްނަންވީ ދާނިޝްއާއި ހިލްޔާގެ ފިއުޗާރ އާއިމެދު. މިއީ މި ހުރިހާ ދުވަސް ވަންދެން ދާނިޝް އެކަމަށްޓަކައި ދުޢާ ކުރި ފިއުޗާރއެއް ނޫންތަ؟” ފަޔާޒް ވާހަކަ ދެއްކިއެވެ.

ފަޔާޒް ގެ ވާހަކަތައް އިވެމުން ދިޔަދިޔަހެން ދާނިޝް ހިމޭންވާ ގޮތްވިއެވެ. އެ ވާހަކަތައް ވިސްނިގެން ދިޔަހެން އެއީ ތެދެކޭ ހިތަށްއެރިއެވެ. ރާފިލްގެ ސަބަބުން އޭނައާއި ހިލްޔާގެ ގުޅުމަށް އަސަރެއް ކޮށްގެން ނުވާނެއެވެ. އޭނަ ޖެހޭނީ މި ދަނޑިވަޅުގައި ހިލްޔާއަށް ހިތްވަރު ދޭށެވެ. ރާފިލް އެ ކުރިކަމެއްގެ އަސަރުން ހިލްޔާ ރައްކާތެރި ކޮށްދޭށެވެ. އެކަމަށްޓަކައި ޚުދު އޭނަ ވެސް ރާފިލްގެ އެ ވިހަގަދަ ބަސްތަކުގެ ޚިޔާލުތަކުން ދުރުވުން މުހިއްމެވެ.

“ތޭންކްސް ފަޔާޒް. ރަނގަޅު ނަސޭޙަތެއް ތި ދިނީ. ލައިކް އޯލްވޭސް. اللّهُمَّ بَارِك!” ދާނިޝް ލުއި ހިނިތުންވުމަކާއިއެކީ ފަޔާޒަށް ބަލާލަމުން ބުންޏެވެ. އެއާއިއެކު ފަޔާޒް ވެސް ބަދަލުގައި ފުރިހަމަ ހިނިތުންވުމެއް ހަދިޔާ ކޮށްލަމުން ބޯޖަހާލިއެވެ.

**

11 ގަޑިއިރުގެ ދަތުރަކަށްފަހު ހިލްޔާއާއި ނަހީދު ދަތުރު ކުރަމުން ދިޔަ ފްލައިޓް ވެލާނާ އިންޓަނޭޝަނަލް އެއާރޕޯޓަށް ތިރި ކުރަން ފެށީ، މާލެ ގަޑިން ހަވީރު 4 ޖަހަން ގާތްވަމުން ދިޔަ ވަގުތެވެ. ފްލައިޓް ތިރިކުރަން ފެށި ވަގުތު ހިލްޔާ އިނީ ފްލައިޓުން ދިން ކޮފީއެއް ބޮމުން ޤުރުއާން ކިޔަވާށެވެ. އެ ދިގު ފްލައިޓް މަތިން ހިލްޔާ ކުރިހާ ވެސް ކަމަކީ ޤުރުއާން ކިޔެވުމޭ ބުންޏަސް ދޮގަކަށް ނުވާނެއެވެ. ކިޔެވުން ކިރިޔާ ވެސް މެދުކަނޑާލާފައި ވަނީ ނަމާދު ކުރުމާށާއި ކެއުމަށާއި، ނިދުމަށާއި، ބައްޕަ ދެއްކި ވާހަކައަށް ޖަވާބު ދިނުމަށެވެ. ނަތީޖާއެއްގެ ގޮތުން އެ ދިގު ފްލައިޓް މަތިން ހިލްޔާއަށް 4 ފޮތަށް ވުރެ ގިނައިން ކިޔެވިފައިވެއެވެ.

ހުރިހާ ސަމާލުކަމެއް އެހާ ގިނައިރު ވަންދެން ޤުރުއާނަށް ދެވުމުން ހިލްޔާގެ ހިތުގައިވި އިޙްސާސްތަކާއި ސިކުނޑީގައިވި ފިކުރުތައް ވެސް ހަމައަކަށް އެޅިފައިވެއެވެ. ހުރިހާ އާޔަތަކަށް ސަމާލުކަން ނުދެވުނަސް ޤުރުއާނުގައިވާ ﷲ ގެ ވަޢުދުފުޅުތަކަށް ސަމާލުކަން ދެވުމުން ކަންނޭނގެއެވެ. އޭނަގެ ބޮލުގައި އެޅުވުނު ތުޚުމަތަކުން އާޚިރަތުގައި އޭނައަށް ލިބޭނެ ގެއްލުމެއް ނެތެއްނޫންތޯ އެވަގުތު ހިތް ބުނަން ފަށާފައިވެއެވެ. މީހުން ކޮންމެ އެއްޗެކޭ ބުންޏަސް، މީހަކު އޭނައަށް ކޮންމެ ފަދަ ނަޒަރެއް ދިނަސް، އެއިން ޙަޤީޤަތުގައި އޭނައަށް ލިބޭނެ ގެއްލުމަކީ ކޮބައިތޯ ހިތާހިތުން ސުވާލު ކުރެވުނެވެ. މި ދުނިޔޭގައި މީހުން އޭނައާއި މެދު ދަށްކޮށް ދެކެފާނެއެވެ. އެހެނަސް އެ ހުރިހާ ކަމަކަށް އޭނަ ކެތްކޮށްފިނަމަ އޭނައަށް އާޚިރަތުގައި ލިބޭނެ އަޖުރުވެސް ބޮޑުވާނެ ނޫން ހެއްޔެވެ؟

ހިލްޔާގެ ހިތް އެ ވާހަކައާއި އެއްބަސްވިއެއްކަމަކު ދެންވެސް އެ ހިތުގައި ބިރުވެރިކަމެއްވިއެވެ. މިއީ އޭނައަށް ކެތްކުރެވިދާނެ އިމްތިޙާނެއްތޯ އަމިއްލަ ނަފްސާއި ސުވާލު ކުރެވުނެވެ. މުޅި ދަތުރުމަތިން ދޭތެރެދޭތެރެއިން ހިލްޔާއަށް އަމިއްލަ އަމިއްލައަށް އެ ސުވާލު ކުރެވެމުން ދިޔައެވެ. އޭގެއިން ކޮންމެ ފަހަރަކު ހިލްޔާގެ ހިތަށް ވެރިވަނީ ތަފާތު ޖަޒުބާތެކެވެ. ބައެއްފަހަރު އޭނައަށް ކެތް ނުކުރެވޭނެއޭ ހިތައި ދެރަވެ، ރޮވިދެއެވެ. އަނެއްބައި ފަހަރު އޭނަގެ މައުސޫމްކަން ސާބިތު ނުކުރެވިދާނެތީ ނާއުއްމީދު ވެދެއެވެ. އަނެއްބައި ފަހަރު އޭނަ މި ޙާލަތަށް ގެނައި ރާފިލް މަތިން ހަނދާންވުމުން ހިތުގައި ސާފު ނަފްރަތެއް އުފެދެމުން ދިޔައެވެ. އެހެނަސް އެ ހުރިހާ އިޙްސާސްތައް ހަމައަކަށް އެޅެމުން ދިޔައީ ﷲ މަތިން ހަނދުމަ ކުރުމުންނެވެ. ﷲ އޭނަގެ ކަންތައް އެންމެ ފުރިހަމައަށް ހަމަޖައްސަވާނެކަން ހަނދާން ކުރުމުންނެވެ.

**

“މާމާ އަވަހަށް އާދޭ. މިހާރު ފްލައިޓް ޖައްސަން އުޅޭނީ. ކޮބާ ދެން ތިބި މީހުން؟” އެ ސުވާލު ކޮށްލީ، ނަހީދު ގެ އެޕާޓްމެންޓްގެ ސިޓިންގް ރޫމުގައި ކޮޅަށް ހުރި ދާނިޝްއެވެ. ދާނިޝް އެވަގުތު އެ ގެއަށް އައިސްފައި ހުރީ، އިއްޔެ ނަހީދުބެ އެދުނު އެދުމެއްގެ މަތިންނެވެ. ކާރުގައި އެންމެން ހިލްޔާ ބަލާ އެއާރޕޯޓަށް ގެނައުމަށް ނަހީދުބެ އޭނަ ކައިރިން އެދުނެވެ. ދާނިޝް ވަނީ ނުހަނު އެދިގެން އެކަމަށް އެއްބަސްވިއެވެ. ނަހީދުބެ މާލޭގައި ނެތް ދުވަސްކޮޅު ނަހީދުބެ ގެ އެދުމުގެ މަތިން ދާނިޝް ވަނީ ގެއަށް ބޭނުންވާނެ އެއްޗެހި ގެނެސްދިނުން ފަދަ ކަންތައް ކޮށްދީފައެވެ. އެހެންކަމުން މިހާތަނަށް އައިއިރު އެ ގޭގެ މީހުން ދާނިޝް ދެކެ ފަރިތަވެފައިވެއެވެ.

“މާމަ ތައްޔާރޭ. އެއޮތް ނިކުތީ ހަމްރާ ވެސް މާޒިން ކޮއްކޮއާއިއެކީ.” ހާފިޒާ ކޮޓަރިން ނިކުމެގެން އައިސް ދާނިޝް ހުރި ހިސާބަށް އަންނަމުން ބުންޏެވެ. އެހިނދު ހަމްރާ ވެސް މާޒިން އުރާލައިގެން އަނެއްފަރާތުގައި ހުރި ކޮޓަރިން ނިކުތީއެވެ.

“ކޮބައިތަ އެލީ؟ ގަޑި ކައިރިވަނީއޭ. ޓްރެފިކް ވެސް ވަރަށް އެބައޮތް މިއަދު.” ދާނިޝް އަތު ކުރީގައި އޮތް ގަޑިއަށް ނަޒަރެއް ދެމުން ބުންޏެވެ.

“ކަމިންގް ކަމިންގް!!!” ހަމަ އެވަގުތު އެލީ އަވަސްއަވަހަށް ދުވެފައި ސިޑިން ފައިބަމުން ދިޔައެވެ.

“އޯލްރައިޓް! އާދޭ އަވަހަށް. މި ދަނީ ކާރު ނެރެން.” ދާނިޝް އެންމެންނަށް ލުއި ނަޒަރެއް ދެމުން އެޕާޓްމެންޓުން ނިކުންނަން ހިނގައިގަތެވެ.

އޭގެ އިރުކޮޅެއްގެ ތެރޭގައި އެންމެން ތިބީ ކާރު ތެރޭގައެވެ. ދާނިޝް ދުއްވަން އިންއިރު ހާފިޒާ އެރީ ކުރީ ސީޓަށެވެ. ހަމްރާއާއި އެލީ ފަހަތު ސީޓަށް އެރިއިރު އެލީއަށް އިނދެވުނީ އެއްފަރާތުން ދާނިޝް ފެންނާނެ ފަދަ ދިމާލެއްގައެވެ. އެދިމާލުން ދާނިޝް ފެނުމާއިއެކު އެލީގެ މޫނުމައްޗަށް ވެރިވީ ލަދުރަކި ހިނިތުންވުމެކެވެ. ހަމަ އެވަގުތު އެލީގެ ފޯނަށް ނޮޓިފިކޭޝަނެއް އައުމުން ފޯނަށް ނަޒަރެއް ދެވުނެވެ.

މެސެޖެއް އައިސްފައިވީ ‘ޑޭން’ސް ޑައި ހާޑް ފޭންސް ގެ ޓެލެގްރާމް ގްރޫޕުންނެވެ. އެއީ ‘ޑޭން’ ފިލްމު ކުޅުން ހުއްޓާލުމުން އެލީ އިސްނަގައިގެން ފެށި ގްރޫޕެކެވެ. ފުރާވަރުގެ ދިވެހި ކުދިން ހިމެނޭ އެ ގްރޫޕްގެ ބޭނުމަކީ ‘ޑޭން’ ގެ ހަނދާންތައް އާ ކުރުމެވެ.

އެލީ ފުރަތަމަ އެ ގްރޫޕް ފަށާފައިވަނީ ހަމައެކަނި އޭނަގެ 5 އެކުވެރިންނާއި އެކީގައެވެ. އެހެނަސް ‘ޑޭން’ އަކީ ކާކުކަން އެނގުނު ހިސާބުން އެލީއަށް ‘ޑޭން’ ގެ ފޮޓޯތައް ކޮންމެ ދުވަހަކުހެން އަޕްލޯޑް ކުރެވެން ފެށިއެވެ. ނަތީޖާއެއްގެ ގޮތުން އެ ގްރޫޕަށް ވަންނަން ބޭނުންވި ފުރާވަރުގެ ކުދިން ގިނަވިއެވެ. އެހެންކަމުން މިއަދާއި ހަމައަށް އައިއިރު 50 ވަރަކަށް މެމްބަރުން އެ ގްރޫޕްގައި ހިމެނެއެވެ.

އެލީ އެވަގުތު ވެސް ކާރު ތެރޭގައި އިނދެފައި ދާނިޝްގެ ފޮޓޯއެއް ނަގައި ގްރޫޕަށް ލިއެވެ. ވަގުތުން އެލީގެ އެ މެސެޖަށް ލައިކް ލިބެން ފެށުމުން އެލީއަށް އުފަލެއް ލިބުނެވެ. އެހެނަސް ހިތު ތެރޭގައި ހިސާބެއްގެ ޖެހިލުމެއް ވެސްވިއެވެ. އެއީ މިހާރު އެލީއަށް ‘ޑޭން’ ފެންނަނީ ފިލްމީ ތަރިއެއްގެ ބަދަލުގައި ބޭބެއެއްގެ ގޮތުގައި ކަމަށްވާތީވެއެވެ. ‘ޑޭން’ އެގެއަށް އައި ފުރަތަމަ ދުވަހު އެލީއަށް ތަޢާރަފު ވެލީ ‘ދާނިޝްބެ’ ގެ ގޮތުގައި ކަމަށްވުމުންނެވެ. އަދި އަމުދުން އެއްދުވަހު އޭނައަށް ޑޭންއާއި މެދު ކުރެވޭ އިޙްސާސްތައް ދޮންތައަށް ކިޔައިދެމުން ދަނިކޮށް މާމައާއި ޑޭންއަށް އެކީގައި އެ ވާހަކަތައް އިވުނެވެ. އެމީހުންނަށް އެ ވާހަކަތައް އިވުނުކަން އެލީއަށް އެނގުނީ ކާމޭޒުދޮށުގައި އޭނައާއި އެކީ އިން ދޮންތަ ފަހަތް ބަލާލުމަށް އެންގުމުންނެވެ. އެއާއިއެކު އެލީ ދުވަހަކުވެސް ލަދު ނުގަންނަވަރަށް ލަދުގަންނަ ގޮތްވިއެވެ.

އެ އިޙްސާސްތަކުން އެލީއަށް އަރައިގަނެވުނީ އޭގެ އަނެއްދުވަހުގެ ހަވީރު، ޑޭން ގެއަށް އައިސް އޭނައާއި ދެއްކި ވާހަކައަކުންނެވެ. އެދުވަހު ޑޭން ގެއަށް ކޮންމެވެސް އެއްޗެއް ގެނެސްދީފައި ދިޔުމުގެ ކުރިން ސިޓިންގް ރޫމުގައި ވަކިން ހުރި ސޯފާއެއްގައި އިށީނެވެ. އެވަގުތު އެލީ އިނީ ދިގު ސޯފާގައި ނެޓްފްލިކްސް އިން އެނިމޭޓެޑް ފިލްމެއް ބަލާށެވެ. އެލީ ވަކި ފަރުވާލެއްނެތި ފިލްމު ބެލުމާއިގެން ކުރިއަށް ދިޔައެވެ.

“ސޯ…..ޑޭން ގެ ފޭނެއްތަ އެލީއަކީ؟” ޑޭން އެހިއެވެ. އެއާއިއެކު އެލީގެ މޫނު ރަތްވިއެވެ.

“މިހާރު ދެން ފިލްމު ނުކުޅޭ މީހެއްގެ ފޭނުންނެއް ނުތިބޭނެ ދޯ؟” އެލީ ޑޭންއަށް ބަލަން ވެސް ނުކެރިފައި އިނދެ ބުންޏެވެ. އެއާއިއެކު ޑޭން ހީލުމުން އިތުރަށް ލަދުގަންނަ ގޮތްވިއެވެ. އެލީ އެކަން ނުދެއްކޭތޯ ބެލިއެވެ.

ހިމޭންކަމުގެ ވަގުތުކޮޅަކަށްފަހު ޑޭން ވާހަކަ ދެއްކިއެވެ.

“ފިލްމު ނުކުޅުނަސް ޑޭން ގެ ގޮތުގަ އެއްޗެކޭ ބުނެފާނަން. ޔޫ ޑިޒާވް ބެޓާރ އެލީ. އެލީއަށް ސޫޓްވާނީ އެލީއާއި އޭޖް ކައިރި، އެލީ އާއި ކޮމްޕެޓިބަލް ވާނެ ކުއްޖަކު. ނޮޓް އޭން އޯލްޑް މޭން ލައިކް މީ.” ޑޭން އެހެން ބުނި އަޑު އިވިފައި އެލީއަށް ޑޭން އާއި ދިމާލަށް ބަލާލެވުނީ އެ ވާހަކައާއިމެދު ވިސްނަމުންނެވެ. އެލީ ބަލާލުމުން ޑޭން ބޯޖަހާލިއެވެ.

“އިޓްސް ދަ ޓްރުތް. ފިލްމުތަކުން ކިތަންމެ ޔަންގް ކަމަށް ދެއްކިޔަސް އައިމް 31 މިހާރު. އޯލްޑް އިނަފް ޓު ބީ ޔުއާރ އަންކަލް. ފިލްމަކީ ޒުވާން ކުދިންގެ ބްރައިންވޮޝް ކުރާ އެއްޗެއް. ޕާޓް އޮފް ދަ ރީޒަން އައި ސްޓޮޕްޑް. އެލީއަކީ ޑޭން ގެ ފޭންއަކަށް ވަންޏާ، މިއީ މިހާރު ޑޭން ދެކޭ ގޮތަކީ. އެހާ ގިނަ ވަގުތު ފިލްމު ބެލުމުގަ ހޭދަ ނުކޮށް ޑޫ ސަމްތިންގް ބިގް ވިތް ޔުއާރ ލައިފް. ﷲ އަހަރުމެން މި ދުނިޔެއަށް ފޮނުއްވީ ޕާރޕަސްއަކަށް. ރިމެމްބާރ ދެޓް.”

ޑޭން ބުންޏެވެ. އެ ވާހަކަތަކަށް ބުނާނެ ވަކި އެއްޗެއް ނޭނގިފައި އެވަގުތު އެލީ އިންދާ ޑޭން ދިޔައީއެވެ.

އެހެނަސް ޑޭން ގެ އެ ވާހަކައިން ލަސްލަހުން އެލީގެ ވިސްނުން ބަދަލުވާން ފެށިއެވެ. ލަސްލަހުން ވިޔަސް ޑޭން ގެ މަޤާމުގައި ދާނިޝްބެ ފެންނަން ފެށިއެވެ. އޭނައަށް އެއްޗެހި ގަނެދީ، ބައްޕަ ނެތް ތާނގައި ބައްޕަގެ ޒިންމާތައް ފުރިހަމައަށް އަދާ ކޮށްދޭ ބޭބެއެއް ފެންނަން ފެށިއެވެ. ބޮޑު މީހެއްގެ ގޮތުގައި އޭނައަށް އިޙްތިރާމް ކުރެވޭ ބޭބެއެއް ފެންނަން ފެށިއެވެ.

ކޮންމެ ގޮތެއްވިޔަސް މި ބަދަލުވީ ވިސްނުން އޭނަގެ ޗެޓް ގްރޫޕްގައި ހިމެނޭ 50 މެމްބަރުންނާއި ޙިއްސާ ކުރާކަށް ބޭނުމެއް ނުވިއެވެ. ދެންވެސް ދާނިޝްބެ ގެ ފޮޓޯތައް ޙިއްސާ ކުރަމުން ދިޔައީ އެ ލައިކްތައް ހޯދުމުގެ ބޭނުމުގައެވެ. ދެންވެސް ‘ޑޭން’ ގެ ރީތިކަމާއިމެދު އާޝޯޚުވުމުގެ ބައެއް ހިތުގައި އޮތީ އެ ގްރޫޕްގައި ދެކެވޭ ވާހަކަތަކުގެ ސަބަބުންނެވެ.

ދާނިޝްއަށް އެދުވަހު އެލީ އޭނަގެ ފޮޓޯއެއް ނެގިކަމެއް ވެސް ނޭނގުނެވެ. އެއަށްވުރެ ބޮޑަށް އެދުވަހު ހިތް އަވަސްވެފައިވިއެވެ. އެދުވަހު ކާރު ދުއްވެމުން ދިޔައީ ވެސް އާދައަށްވުރެ ބާރު ސްޕީޑެއްގައެވެ. ހިތުގައި އެއްވެފައިވާ ޖަޒުބާތުތަކެއްވިއެވެ. އެތައް ދުވަހެއް ފަހުން ހިލްޔާ ފެންނަން އުޅޭތީ ކެތްމަދުވަމުން ދިޔައިރު އެކަމާއިމެދު އުފާވެސް ކުރެވެމުން ދިޔައެވެ. ހަމަ އެއާއިއެކު ހިލްޔާ ފެންނައިރު ހިލްޔާ ހުންނާނެ ޙާލަތާއިމެދު ވެސް ކަންބޮޑުވަމުން ދިޔައެވެ. ރާފިލްގެ އެ ނުލަފާ ރޭވުމުގެ ސަބަބުން ހިލްޔާ ދެރަވެފައިވާނެ މިންވަރު ހިތަށް ގެނެވުމުން ދެރަވެސް ވަމުން ދިޔައެވެ. ހިލްޔާ އޭނަގެ އަތު ތެރެއަށް ގެނެސް ހިލްޔާގެ ހުރިހާ ހިތާމައެއް ފިލުވައިދޭން ބޭނުންވެފައިވިއެވެ. އޭނައަށް އެފަދައިން ކަން ކޮށްދެވޭނެ ފަދަ މަޤާމަކަށް ހިލްޔާ ގެންނަން ބޭނުންވެފައިވިއެވެ

**

ހިލްޔާމެން ފްލައިޓް ޖެއްސިތާ އިރުކޮޅެއްގެ ތެރޭގައި ހިލްޔާ ބައްޕައާއި އެކީ ގޮސް އެއާރޕޯޓަށް ވަނެވެ. އެހިނދު ހިލްޔާއާއި ނަހީދުގެ މޫނުމަތިން ވެސް ފާޅުވަމުން ދިޔައީ ވަރުބަލި ކަމެވެ. ރުއިމުގެ ސަބަބުން ހިލްޔާގެ ލޮލުން ދުޅަކަމެއް ފާޅުވަމުން ދިޔައެވެ. އެހެނަސް އެއާރޕޯޓް ތެރެއަށް ވަދެވުނުއިރު ހިލްޔާ އޭނަ ފިކުރު ކުރަމުން ދިޔަ ކަންތަކުގެ މަތިން ހިސާބަކަށް ހަނދާން ނެތުނޭ ބުންޏަސް ދޮގަކަށް ނުވާނެއެވެ.

އެހެނަސް އެކަން ބަދަލުވާން ނެގީ ކުޑަ ހިނދުކޮޅެކެވެ. ލަގެޖް ނަގައިގެން ހިލްޔާ ބައްޕައާއިއެކީ ހިނގާފައި ދިޔައިރު ބައެއް ދިވެހިންގެ ނަޒަރުތައް އޭނައަށް އަމާޒުވާން ފެށިކަން ހިލްޔާއަށް ފާހަގަވިއެވެ. އެ ފަދައިން އޭނައަށް ބަލާ ކޮންމެ ބަޔަކު ސިއްރު ވާހަކައެއް ދައްކާ މަންޒަރު ވެސް ހިލްޔާއަށް ފެންނަމުން ދިޔައެވެ. ފުރަތަމަ އެފަދަ މަންޒަރެއް ފެނުމާއިއެކު ހިލްޔާގެ ހިތް އަވަސްވެ، އިސްޖަހާލެވުނެވެ. އަނެއްކާވެސް އިސްއުފުލާލެވުނީ، އެއީ އޭނައަށް ހީވި ހީވުމެކޭ ހިތާއެވެ. ނޫނީ އޭނަގެ ވާހަކަ ދައްކާނީ އެންމެ ދެ ތިން މީހެކޭ ހިތާއެވެ. އެހެނަސް އިސް އުފުލާލި ވަގުތު ހިނގަމުން ދިޔަ މީހުންނާއި އިށީނދެގެން ތިބި ބައެއް މީހުން ވެސް އޭނައަށް ބަލައި ވާހަކަ ދައްކަން ފެށި މަންޒަރު ފެނި، ހިލްޔާގެ ނިތުން ދާހިއްލަން ފެށިއެވެ. އެހިނދު ރާފިލް އޭނައާއިމެދު ބުނި ބަސްތައް ކަންފަތުގައި ގުގުމަން ފެށިއެވެ.

“ޑޮކްޓަރ މެތިއު….އިނގިރޭސި މީހަކަށްވީމަތަ އަހަންނަށްވުރެ ބޮޑަށް ޑޮކްޓަރ މެތިއު ކަމުދިޔައީ؟”

“އަހަރުމެން އެކުގައި ހޭދަ ކުރި ރޭތައް ހަނދާން ނައްތާލާފަތަ ޑޮކްޓަރ މެތިއުއާއި އެކީ ރޭތައް ހޭދަ ކުރީ؟”

“ހާދަ…ހިތަށް ތަދުވިއޭ އެ މަންޒަރު ފެނުނު ރޭ. ހައު ކުޑް ޔޫ ޑޫ ދިސް ޓު މީ؟”

ރާފިލްގެ ބަސްތައް ކަންފަތުގައި ހަރު އަޑުން ގުގުމަން ފެށިހެން ހިލްޔާއަށް ފެންނަމުން ދިޔަ މަންޒަރުތައް ވެސް ނުސާފުވިއެވެ. ނަތީޖާއެއްގެ ގޮތުން ފިޔަވަޅުތައް ވެސް ރަނގަޅަށް ނޭޅެއެވެ. ކިރިޔާވެސް ހަމަހޭވެރިކަމެއްވީ ބައްޕަ ވާހަކަ ދެއްކުމުންނެވެ.

“ދަރިފުޅު ކިހިނެއްވީ؟ އަރި އަޅާލީތަ؟”

އަރި އެޅިކަން ވެސް ހިލްޔާއަށް އެނގުނީ ބައްޕަ އެ ސުވާލު ކުރުމުންނެވެ. ބައްޕަ ގެ އެ ސުވާލަށް ޖަވާބު ދިނުމުގެ ހިލްޔާއަށް ލޯ ބޮޑުވެ، ދެބުމަ ކައިރިވެފައިވާ ޙާލު ބޯ ހޫރުވާލެވުނެވެ. އެއަށްފަހު އަނެއްކާވެސް ހިނގެން ފެށީ އޭނަގެ ކަންފަތުގައި ގުގުމަމުން ދިޔަ އަޑުތައް ހުއްޓޭތޯ މަސައްކަތް ކުރަމުންނެވެ.

ހިލްޔާ ބޯހޫރުވާލުމަށްފަހު އޭނައަށްވުރެ ކުރިން ހިނގަން ފެށި މަންޒަރު ފެނި، ނަހީދުގެ ލޮލުން ކަރުނަ ހިލުނެވެ. ހިލްޔާއަށް އެ ވަނީ ކީއްކަން ނަހީދަށް މާ ރަނގަޅަށް ވެސް އެނގުނެވެ. ވަށައިގެން އެމީހުންނާއި ދިމާލަށް ބަލަން ތިބި މީހުންނާއި ދިމާލަށް ނަހީދު ކަޅި އަޅާލީ އައިސްފައިވި ރުޅިއެއްގެ ބޮޑުކަމުންނެވެ. އެހެން މީހުންގެ ވާހަކަ ދެއްކުން ނޫންކަމެއް އެމީހުންނަށް ލިބިފައި ނުވަނީތޯ ބުނެ ހިތާހިތުން ހަޅޭއްލެވުނެވެ.

**

ދާނިޝް ކާރު ދުއްވަމުން ގޮސް ޓާރމިނަލާއި ހަމައަށް ގޮސް މަޑުކޮށްލީ، އެންމެންނަށް ފައިބަން ފުރުސަތު ދިނުމަށެވެ. އެއަށްފަހު ކާރު އަނބުރާލުމަށްފަހު އިހުނަށްވުރެ ބާރު ސްޕީޑެއްގައި ގޮސް ޓެކްސީ ހުންނަ ޞަރަޙައްދުގައި ޕާކް ކުރިއެވެ. އެއަށްފަހު ކާރުން ފޭބުމަށްފަހު އަނެއްކާވެސް އެއާރޕޯޓާއި ދިމާލަށް ދިޔައީ ދުވެފައެވެ. އެއާރޕޯޓަށް ވަދެ ލަގެޖް ނެގި ވާހަކަ ނަހީދުބެ މެސެޖަކުން އަންގާފައިވުމުންނެވެ. ހިލްޔާ ނިކުންނައިރު ދާނިޝް ކޮންމެހެން ވެސް ފެންނަ ހިސާބުގައި ހުންނަން ބޭނުންވިއެވެ.

ދާނިޝް ގޮސް ހަމްރާމެން ތިބި ހިސާބަށް މަޑުކޮށްލި ވަގުތަކީ، ސީދާ އޭނައާއި ކުރިމައްޗަށް ވާ ގޮތަށް ހުރި ދޮރުން، ނަހީދުބެ އާއި ހިލްޔާ ނިކުމެގެން އަންނަން ފެށި ވަގުތެވެ. ދާނިޝްއަށް ފުރަތަމަ ފެނުނީ ޓްރޯލީ ކޮއްޕަމުން އައި ނަހީދުބެއެވެ. ނަހީދުބެ ކައިރީގައި ކަޅުކުލައިގެ ބުރުގާއަކާއިއެކީ ކަޅުކުލައިގެ އަބާޔާއެއް ލައިގެން ހުރި ހިލްޔާ ފެނުނު ހިނދު، ދާނިޝްގެ ނޭވާ މެދުކެނޑުނެވެ.

ކުރިއަށް ހިނގަމުން އައި ހިލްޔާ އިސްޖެހިފައިވީއިރު ވެސް އެ މޫނުމަތި މިލާފައިވި މިންވަރު ދާނިޝްއަށް ފާހަގަވިއެވެ. އެވަގުތު ހަނދާނަށް އައީ އޭނަ ހިލްޔާ ފުރުވަން އައި ދުވަހެވެ. އެދުވަހު ހިލްޔާ އިސްނަގައި އޭނައާއި ވާހަކަ ދެއްކި ގޮތެވެ. ދެމީހުން ސަމާސާކޮށް އެކުގައި ޙިއްސާކޮށްލި ހީލުމެވެ.

އެހެނަސް މިއަދު ދާނިޝްގެ ކުރިމަތިން ފެންނަމުން ދިޔައީ އެ ހިލްޔާއެއް ނޫނެވެ. މި ހިލްޔާ ވަނީ ރޫޙު މަރުވެފައެވެ. ކުރިމަތިލާންޖެހުނު ޠޫފާންތަކެއްގެ ސަބަބުން ވަރުބަލިވެފައެވެ. ހަތަރު އުދަރެސް ފެނުޖެހިފައިވާ ޙާލުގައެވެ. ހިލްޔާ މި ޙާލަށް ގެނައީ ކާކުކަން އެނގުންވުމުން ދާނިޝްއަށް ގޮށްމުއްކަވާލެވުނެވެ.

ހަމަ އެހިނދު ހިނގަމުން ދިޔަ ހިލްޔާ ފިޔަވަޅުތައް މަޑުޖައްސާލަމުން އިސްއުފުލާލިއެވެ. އެހިނދު ދާނިޝްއާއި ހިލްޔާގެ ހަތަރުކަޅި ބައްދަލުވީ ހިނދު، ދާނިޝްގެ ހިތުގެ ތެޅުން ވެސް މަޑުޖެހިލިއެވެ.

ނުނިމޭ