ނަފްސީ (އެއްތިރީސްވަނަ ބައި)

“ބައްޕަ ވަރަށް ވިސްނައިފިން ހިލްޔާ. ވިސްނަމުން ގޮއްސަ އެންމެ ފަހުން މިއަދު ހިތަށްއެރީ…..ޙަޔާތަކީ ވަރަށް ކުރު އެއްޗެކޭ. ހިލްޔާ ވެސް އަދި ބައްޕަ ވެސް ދުނިޔެ ދޫކުރާނެ ދުވަހެއް ނޭނގޭ. ބައްޕަ ބޭނުމެއް ނޫން ބައްޕަ ހިލްޔާއާއި ވަކިވާ ވަގުތަކީ ހިލްޔާއަށް ނުރުހުންވެ، ރުޅިވެގެން ހުންނަ ވަގުތަކަށް ވާކަށް. މިހާތަނަށް އައިއިރު ޔަޤީންވެއްޖެ ހިލްޔާ ތި ބައިވެރިއެއް ދޫ ނުކުރާނެ ކަން ވެސް. އެހެންވީމަ ދެން އެންމެ ރަނގަޅު ގޮތަކީ މިއީ ކަމަށް ބައްޕަ މި ވިސްނަނީ. ބައްޕަ ރާފިލްއަށް ރުހުން ދީފިން.”

 

ބައްޕަ އެ ބުނި ޖުމްލައިން ހިލްޔާގެ ދެލޯ ބޮޑުވީ ހިނދު، ކަންފަތަށް ވެސް އިތުބާރު ކުރަން ދަތިވިއެވެ.

 

“އާރ ޔޫ ފޯ ރިއަލް ބައްޕާ؟ ހަމަ ތެދެއްތަ ތިބުނީ؟!” ހިލްޔާއަށް އުޖާލާވި ހިނިތުންވުންތަކާއި އެކީ އެ ސުވާލު ކުރެވުނެވެ.

 

“ބައްޕަ ދުވަހަކުވެސް ހިލްޔާ ގާތު ދޮގެއް ހެދިންތަ؟” ނަހީދު ހިނިތުންވުމެއްނެތި، ވަރުދޫވެފައިވާ ފަދައަކުން އެހިއެވެ.

 

“ނޯ ބަޓް އައި ވޯންޓް ޓު ހިއާރ އިޓް. ހަމަ އަސްލުވެސް ބައްޕައަށް މިހާރު ރާފިލް އޯކޭތަ؟” ހިލްޔާ އެހިއެވެ.

 

“ދޮގެއް ނަހަދާނަން. ކޮންމެހެން އޯކޭއެއް ނޫން. އެކަމަކު ތިއީ ހިލްޔާއަށް އުފާވެރިކަން ލިބޭނެ ކަމަކަށް ވެއްޖެއްޔާ ބައްޕަ ނެތިން ތިކަމަށް ހުރަސް އަޅާކަށް. ބައްޕަ އަބަދުވެސް އެދެނީ ހިލްޔާގެ އުފާވެރިކަމަށް.” ނަހީދު އެ ފަހު ބަސްތައް ބުނެލީ ތެދުތެދަށެވެ. ޙަޤީޤަތުގައި ވެސް ރާފިލްއަކީ ހިލްޔާގެ އުފާވެރިކަމަށް އޮތް މަގެއް ކަމަށް ވާނަމަ އޭނަ އެ ގުޅުމަށް ނުރުހުން ނުވީހެވެ. ދެރައީ އެކަން އެހެން ނުވާނެކަން ޔަޤީނާއި ގާތް ކުރެވޭތީވެއެވެ.

 

“އޮހް ބައްޕާ ޔޫ އާރ ދަ ބެސްޓް! އަބަދުވެސް އެނގޭ ބައްޕަ އަހަންނަށް ހެޔޮ އެދޭކަން. އައިމް ސޯ ގްލޭޑް ޔޫ އާރ ބެކް، ބައްޕާ.” ހިލްޔާ ހިތަށް ލިބުނު ހަމަޖެހުމާއިއެކީ ހިނިތުންވެފައި އިނދެ ބުންޏެވެ.

 

އެހިނދު ނަހީދުގެ މޫނުމައްޗަށް ވެރިވީ ފަނޑު ހިނިތުންވުމެކެވެ. މަންމަ ބުނީ ތެދެއްތާއޭ ހިތަށްއެރިއެވެ. ހިލްޔާއަށް ރުޅިވެގެން ހުރުމަށްވުރެ ހަމަ ޔަޤީނުން ވެސް ރަނގަޅުވާނީ ހިލްޔާ ގާތްކޮށްގެން އުޅުންކަން އެވަގުތު ހިތަށް ޔަޤީންވެގެން ދިޔައެވެ. އެތައް ދުވަހެއް ފަހުން ހިލްޔާ އޭނައާއި ހިނިތުންވާ މަންޒަރު ފެނި، ހިތުގައިވި ޒަޚަމްތަކުގައި މަލަނެއް އެޅިގެން ދިޔަ ފަދައެވެ.

 

**

 

ބައްޕައާއި ދެކެވުނު ވާހަކަތަކަށްފަހު ހިލްޔާ ކޮޓަރިއަށް ގޮސް ވަދެވުމާއިއެކު އަތްދަބަހުން ފޯނު ނެގިއެވެ. އަދި ކެތްތެރިކަން ކުޑަވެފައިވާ ޒާތަކަށް އިށީނުމެއްވެސް ނެތި ރާފިލްއަށް ގުޅާލިއެވެ. އެކޮޅުން ރިންގުވާން ފެށުމާއިއެކުހެން ބިޒީވެގެން ދިޔުމުން ހިލްޔާއަށް ތުންއޫކޮށްލެވުނެވެ. ރާފިލް މިހެން ހަދާނީ ބަލިމީހަކު ބަލަން ހުރީމަކަން އެނގުންވިއެވެ. އެހެނަސް އެކަމާއިމެދު ފަރުވާލެއްނެތި ތަކުރާރުކޮށް ގުޅުނެވެ. ހިތުން އޭނަ ދައްކަން އުޅޭ ވާހަކައިގެ މުހިއްމުކަން ރާފިލްއަށް އެންގުމަށެވެ. އަދި ސަމާސާވެރި ގޮތެއްގައި ރާފިލް ރުޅި އަރުވާލުމަށް ވެސްމެއެވެ.

 

4 ވަނަ ފަހަރަށް ހިލްޔާ ގުޅަން ފެށުމާއި އެކު ރާފިލް ފޯނު ނެގިއެވެ.

 

“ސާބަސް ހަމަ ސާބަސް! މަގޭ އޮބްސެސިވް ގާރލްފްރެންޑަށް ކިހިނެއްވެގެން އުޅޭ ދުވަހެއް މިއަދު؟” ރާފިލް އެކޮޅުން އެ ސުވާލު ކޮށްލި ރާގުން ހިލްޔާއަށް ހީލެވުނެވެ.

 

“ދޭންއުޅޭ ޚަބަރެއްގެ ބޮޑުކަމުން ހަމަ ނުހުރެވިގެން. ޑިއުޓީގަ ދޯ؟ ދެން ހުރި ބަލިމީހާ ނުވައްދާ އަހަރެން މި ދައްކާ ވާހަކަ އަޑު އެހިދާނެތަ؟” ހިލްޔާއަށް ކޮޓަރި ތެރޭގައި ދެކޮޅުން ދެކޮޅަށް ހިނގަމުން ބުނެވުނެވެ.

 

“ހުމް ނުވައްދާ މިހިރީ. ކޮބާ ޚަބަރަކީ؟” ރާފިލް އެހިއެވެ.

 

“ބައްޕާ އެގްރީޑް ޓު އަވާރ ރިލޭޝަންޝިޕް!” ހިލްޔާ މަޑުން ވެސް ހުންނަން ދަތިވެފައިވާ ޙާލު، ފުރިހަމަ ހިނިތުންވުމަކާއިއެކީ ބުންޏެވެ.

 

“ކީކޭ؟!” ރާފިލް އެކޮޅުން އެހިއެވެ.

 

“ޔެސް ޔޫ ހާޑް އިޓް ރައިޓް. މިއަދު އަހަރެން ގެއަށް އައިމަ ބައްޕަ އަހަރެން ގާތު ބުނީ ކުޑަ އިރުކޮޅަކަށް ވާހަކަ ދައްކާލަން އަންނާށޭ. އަހަރެން ދިޔައިމަ ބުނީ ތިމަންނަ ބޭނުމެއް ނޫނޭ ހިލްޔާއަށް ރުޅިވެގެން ހުންނާކަށް. އެހެންވީމަ ތިމަންނަ ހިލްޔާގެ ބައިވެރިޔާއާއިމެދު ރުހެމޭ. އިޒިންޓް ދިސް އަމޭޒިންގް؟ މިއީ ހަމަ ޕަވާރ އޮފް އަވާރ ލަވް. ރާފިލް ބުނި ގޮތަށް. އަހަރުމެންގެ ލޯބި ކާމިޔާބުވާނެ. އެބަވް އޯލް.” ހިލްޔާ ނުހަނު އާޝޯޚުވެފައި ވާހަކަ ދެއްކިއެވެ. އޭނައަށް މި އުޅެވެނީ ހަމަ ފިލްމެއްގައި ކަމަށް ސިފަ ކުރެވުނެވެ. ޙަޔާތުގެ މަޤްޞަދަކީ ފިލްމަކުން ފެންނަ ފަދަ ލޯބީގެ ވާހަކައެއް އުޅުން ކަމަށްވުމުން އެވަގުތު ހިތް ވަރަށް އުފާވެފައިވިއެވެ.

 

“ޔާ…” ރާފިލް ހަމައެކަނި އެހާ ވަރަށް ބުނުމުން ހިލްޔާގެ ހިނިތުންވުން ފޭދުނެވެ. އެހެނަސް އަނެއްކާވެސް ހިނިތުންވެލެވުނީ ރާފިލް ހަމައެކަނި އެހެން ބުނީ ޖަޒުބާތުގައި ޖެހިފައިވުމުން ކަމަށް ހީކުރެވުނެވެ.

 

“އެހެންވީމަ ނައު އަހަރުމެން ނުޖެހޭނެ ހައިޑް ކޮށްގެން މީޓް ކުރާކަށް. ރާފިލް އަންނަންވީ މިގެއަށް އަހަރެން ބަލާވެސް. އޭރުން އަހަރެން ދާނަން.” ހިލްޔާ ދެންވެސް އުފަލާއެކީ ބުންޏެވެ.

 

“ޝުއާރ. އޯކޭ ލަވް. ދެން ދިޔައީ އިނގޭ ޑިއުޓީއަށް. ނޫނީ ހިލްޔާގެ ބައްޕަ އަހަރެން ވަޒީފާއިން ވަކިކޮށްފާނެ.” ރާފިލް ސަމާސާ ރާގަކަށް އެހެން ބުނެލުމުން ހިލްޔާއަށް އަނެއްކާވެސް ހީލެވުނެވެ. އެއަށްފަހު ހިލްޔާ ވެސް އޯކޭ ދިނުމުން އެ ކޯލު ނިމުމަކަށް އައެވެ.

 

ހިލްޔާ އެދުވަހުގެ ޢަޞްރު ނަމާދު މަތިން ހަނދާންވީ އެ ކޯލަށްފަހު އިރުކޮޅެއް ވަންދެން ޚިޔާލީ ފޮލާ ކައްކަން ހުރުމަށްފަހުއެވެ.

 

**

 

ކްލިނިކްގެ މޭޒުދޮށުގައި އިނދެ ފޯނު މޭޒުމަތީގައި ބޭއްވި ރާފިލްގެ މޫނުމަތިން ފެންނަމުން ދިޔައީ ހިތްހަމަނުޖެހުމެވެ. ހިލްޔާ ހީކުރި ގޮތާއި ޚިލާފަށް ދެންމެ ހިލްޔާ ދިން ޚަބަރުން ރާފިލް އުފަލެއް ނުވެއެވެ.

 

ރާފިލް ރާވައިގެން ހުރީ ހިލްޔާއާއި އޭނަގެ ބައްޕަ ދުރު ކުރުވާށެވެ. އެ އުކުޅުން ވެސް ހިލްޔާ އިތުރަށް ބަލިކަށި ކުރުވުމަށެވެ. ބައްޕަގެ ވެސް މާލީ އެހީތެރިކަން ހިލްޔާއަށް ނުލިބޭނެ ހިސާބަށް ގެންގޮސް، ހަމައެކަނި އޭނަގެ ދަށުން ހިލްޔާ އުޅޭނެ ގޮތެއް ހަދަން އޭނަ ބޭނުންވެފައިވިއެވެ. އެއަށްފަހު ހިލްޔާއަށް ޖައްސާނެ ޙާލަކާއިމެދު ބިރުދައްކައި އެ ބައްޕަގެ މުދާ އޭނަގެ ބައްޕައަށް ލިބޭނެ ގޮތް ހެދުމަކީ އޭނަގެ ރޭވުމެވެ.

 

އެހެނަސް މިވީ ގޮތުން އެ ރޭވުން ބަދަލުކުރަން ޖެހިއްޖެއެވެ. އޭނަ ބޭނުންވިހެން ހިލްޔާގެ މައްޗަށް ބާރު ނުހިންގޭނެކަން އެނގުންވުމުން ހިސާބަކަށް ފޫހިވިއެވެ. އެހެނަސް މިގޮތްވެސް ރަނގަޅުތާއޭ ހިތަށްއެރިއެވެ. ހިލްޔާގެ ބައްޕައާއި ރަނގަޅު ގުޅުމެއް ބޭއްވުމުން ޚުދު އޭނަގެ ބައްޕަ ވެސް ބޭނުންވާ ކަންތައް އަވަހަށް ފުރިހަމަ ވެދާނެތާއޭ ހިތާހިތުން ކިޔާލެވުނެވެ.

 

**

 

ދެން ފެށިގެން ދިޔައީ ހިލްޔާގެ ޙަޔާތުގެ އާ ބާބެކެވެ. ޚުދު ބައްޕަވެސް އޭނައާއި ރާފިލްގެ ގުޅުމަށް އެއްބަސްވުމުން އޭނައާއި ރާފިލްގެ ކައިވެންޏަކީ އޭނައަށް އެންމެ ރަނގަޅު ގޮތް ކަމަށް ނިންމުނެވެ. އެހެންކަމުން އިތުރަށް އިސްތިޚާރާ ކުރަންވީ ސަބަބެއް ނެތްކަމަށް ޤަބޫލު ކުރެވުނެވެ. ކުރިން ދުވަހު އިސްތިޚާރާ ކުރިނަމަ އޭގެ ޖަވާބުގައި އޭނައަށް ފެނުނީހީ ބައްޕަ ރުހުންދޭ މަންޒަރު ވިއްޔާއެވެ.

 

ހިލްޔާއަށް ނޭނގުނު ކަމަކީ، އޭނަގެ އަނދިރިވެފައިވާ ހިތަށް އިސްތިޚާރާގެ ޖަވާބު ވެސް ސާފުކޮށް ނުފެންނަ ކަމެވެ. އެ ހިތަށް ހެވާއި ނުބައި ފެންނަ ނަމަ، އެ ގުޅުމާއިމެދު ބައްޕަގެ ހިތުގައި އޮތް ކެކުޅުން ވެސް ފެނުނީހެވެ. އެ ކެކުޅުމާއިމެދު ހިތްހަމަނުޖެހުނީހެވެ. ބައްޕަގެ ނުރުހުމުގައި އެ ގުޅުމާއިގެން ކުރިއަށް ދާން ބޭނުންނުވީހެވެ.

 

އެހެނަސް އަނދިރިކަމުގައި މިހާ ހިސާބަށް އާދެވިފައިވުމުން، ހިލްޔާ ދުނިޔޭގެ ވަގުތީ އުފާވެރިކަމުގައި ޣަރަޤުވާން ފެށިއެވެ. އަދި އެ އުފަލުގައި އޭނަގެ ދޮންތައާއި އެލީ ވެސް ބައިވެރިކުރަން ފެށިއެވެ. ބައްޕަ ރާފިލްއާއި ރުހުމުން، ހިލްޔާ ނުހަނު ހާމަކޮށް ދޮންތައާއި އެލީއާއި ވެސް ރާފިލް ގެ ވާހަކަ ދައްކަން ފެށިއެވެ. އެދެމީހުން ރާފިލްއަށް ހިސާބަކަށް ނުރުހުންވާކަން އެނގުނަސްމެއެވެ. މިވޭތުވެ ދިޔަ ދުވަސްތަކުގައި އޭނަ ދޮންތައާއި އެލީއާއި ދުރުވެފައިވާ މިންވަރު ހިލްޔާއަށް އެނގުނީ، ދޮންތަ ވަރިވީ ވާހަކަ އެނގުމުންނެވެ.

 

“ވަޓް؟! ކޮން ދުވަހަކު؟ ކީއްވެ އަހަރެން ގާތު ނުބުނީ؟!” އެއްދުވަހު ހިލްޔާގެ ޚިޔާލުގެ މަތިން 3 ބެއިން ކެފޭއެއްގައި ތިއްބާ ދޮންތަ އެ ވާހަކަ ބުނުމުން ހިލްޔާއަށް ބުނެވުނެވެ. ދޮންތައާއި އެލީ ގޮވައިގެން ތަންތަނަށް ދާން ހިލްޔާ ޚިޔާލު ކުރީ ރާފިލްގެ ސަޅިބައިސާ އެމީހުންނަށް ކެނޑުމަށެވެ. އަދި ހަމަ އެހެންމެ އޭނަގެ ކައިވެނީގެ ކުރިން އެމީހުންނަށް ދެވެން އޮތް ވަގުތެއް ދިނުމަށް ވެސްމެއެވެ.

 

“ދެ ހަފްތާ ކުރިން. ހިލްޔާއާ އެ ވާހަކަ ދައްކަން އުޅުނިން. ބަޓް ޔޫ ސީމްޑް….ބިޒީ.” ހަމްރާ އޭނަގެ އައިސް ލާޓޭ ހޮޅިއަކުން ބޮމުން ބުންޏެވެ. އެއާއިއެކު ހިލްޔާއަށް އެއްޗެކޭ ބުނެވުމުގެ ކުރިން އެލީ ވާހަކަ ދެއްކިއެވެ.

 

“ޓްރޫ ތުއްތާ. މިހާރު ތުއްތަ އަހަރުމެންނަށް ޓައިމްއެއް ނުދޭ. އެއްކަލަ ޑްރާމާ ވެސް އެކީގަ ބަލަން ފަށާފަ ހުއްޓާލައިފި. ތި ބޯއިފްރެންޑާ މީޓްކުރަން އަދި ގުޅަން ހަދައިގެން. އިޓްސް އޭން އަންހެލްދީ ރިލޭޝަންޝިޕް.” އެލީ ނުރުހުންތެރިކަމާއެކު ބުންޏެވެ.

 

“ވަޓް؟ ނޯ؟! އަސްލު މި ދޭތެރޭގަ ތުއްތައަށް ޓައިމް ނުދެވުނީ ބައްޕައާ އެވަރަށް ފައިޓްކުރަން ޖެހުނީމަ. އިޓް ވޯޒް ސްޓްރެސްފުލް.” ހިލްޔާ ބުންޏެވެ.

 

“ބައްޕައާ ފައިޓްކުރާ ވަރަށް ވޯރތްތަ ތި ރިލޭޝަންޝިޕް؟” ހަމްރާ ސީރިއަސްކަމާއެކު ސުވާލުކުރިއެވެ.

 

“ޔެސް ދޮންތާ. ހީ ރިއަލީ ޓޭކްސް ކެއާރ އޮފް މީ. ބޭނުންވާ ހުރިހާ އެއްޗެއް ހޯދައިދޭ. އެކަހަލަ މީހަކާ އެކީ ލައިފެއް ފަށަން ބޭނުމީ. ފައިނޭޝަލީ ސްޓޭބަލް، ހަރުދަނާ މީހަކާ ދޯ މެރީ ކުރަންވާނީ؟” ހިލްޔާ އެހެން ބުނެލީ، އޭނައަށް ދޮންތައަށް ވުރެ ރަނގަޅަށް ވިސްނެއޭ ހިތާހިތުން ކިޔަމުންނެވެ. އަދި އެ މެސެޖު ދޮންތައަށް ލިބޭނެ ކަމަށް ހީކުރަމުންނެވެ. އެހެނަސް…..

 

“އޯކޭ….އެހެންވީއިރު ހިލްޔާ ވިސްނާލަބަލަ. ރާފިލްގެ އެ މުއްސަނދިކަން ގެއްލުނަސް ހިލްޔާ ރާފިލްދެކެ ލޯބިވާނެތަ؟” ހަމްރާ ސުވާލު ކުރިއެވެ.

 

ދޮންތަ އެ ކުރި ސުވާލަށް ވަގުތުން ޖަވާބެއް ދޭން އުޅެފައިވެސް ހިލްޔާ ހުއްޓުން އެރިއެވެ. ރާފިލް ފަޤީރު މީހެއްގެ ގޮތުގައި ސިފަ ކުރެވުމާއެކު ހިލްޔާގެ ނަޒަރުގައި ރާފިލްގެ އަގު ދަށްވެގެން ދިޔައެވެ. ހިތަށް އެ ކުރެވިގެން ދިޔަ އިޙްސާސުން ދޮންތަ ދައްކަން އެއުޅެނީ ރަނގަޅު ވާހަކައެއްކަން އެނގުނެވެ. އެހެނަސް އެ ވާހަކައާއި އެއްބަސްވާން ބޭނުމެއްނުވުމުން ރައްދެއް ދެވުނެވެ.

 

“ޔެސް ދޮންތާ އައި ވިލް ލަވް ހިމް. ލޯތްބަކީ އެހާ ފަސޭހައިން ބަދަލުވާ އެއްޗެއް ނޫންދޯ؟ އެންޑް ދިސް އިޒް މައި ފަސްޓް ލަވް. ސޯ ޔެސް. އައި ވިލް ލަވް ހިމް ފޮރެވާ.” ހިލްޔާ އަނެއްކާވެސް ފިލްމެއްގެ ޑައިލޮގްތައް އަމުނާލިއެވެ. އަދި ހަމައެއާއިއެކު އެއިން އަމިއްލަ ނަފްސު ވެސް މޮޔަ ހައްދާލެވުނެވެ. ދާދި ދެންމެއަކު ހިތަށްވެރިވި އިޙްސާސްތަކުގެ މަތިން ހަނދާން ނައްތައި، ހަމަ ޙަޤީޤަތުގައި ވެސް ހުރިހާ ޙާލެއްގައި އޭނައަށް ރާފިލްއާއެކީ އުޅެވޭނެ ކަމަށް ހިތާހިތުން ކިޔާލެވުނެވެ.

 

“އިފް ޔޫ ސޭ ސޯ.” ހަމްރާ ޤަބޫލުކުރަން ބޭނުންނުވާ ޒާތަކަށް އެހެން ބުނެ އަނެއްކާވެސް ކުރިމަތީގައި ހުރި ތަށިން ބޯން ފެށުމުން ހިލްޔާ ހިސާބަކަށް ނުރުހުންވިއެވެ.

 

“ރިގާޑްލެސް، ތުއްތަ އަހަރުމެންނާއިއެކީ ޓައިމް ސްޕެންޑް ކުރަން އެބަޖެހޭ. ޔޫ ފޮގޮޓްތަ އަހަރުމެން ހެދި ޕްލޭން ވެސް. ތިން މީހުން އެއްކޮށް ޓްރިޕްތަކުގެ ގޮސް ޝޮޕިންގްއަށް ދާން. ކޭން ވީ ޑޫ ދެޓް ޕްލީީީީޒް؟!” އެލީ އެ ފަހު ބަސް ދިގުކޮށް ބުނަމުން އެދުނެވެ.

 

“އޯކޭ ހިނގާ ހުރިހާ ކަމެއް ކުރަމާ.” ހިލްޔާ ބުންޏެވެ. އެހިނދު އެ ހިތުގައި ޢަޒުމެއް އުފެދުނެވެ. އޭނަ އުޅެނީ ރަނގަޅު ގުޅުމެއްގައިކަން އެލީއާއި ދޮންތައަށް ސާބިތުކޮށްދިނުމެވެ. އޭނަ ރާފިލްދެކެ ވަނީ ޙަޤީޤީ ލޯތްބެއްކަން ދޮންތައަށް ދައްކަން ބޭނުންވިއެވެ. އަދި އޭނައަކީ އެފަދަ ގުޅުމެއްގައި އުޅެމުން ވެސް ޢާއިލާއަށް ވަގުތު ދޭ މީހެއްކަން އެލީއަށް ސާބިތުކޮށްދޭން ބޭނުންވިއެވެ.

 

ރާފިލްއާއިއެކީ އުޅެއުޅެ ރާފިލްގެ ސިފަތައް ހިލްޔާއަށް ލިބިފައިވި ފަދައެވެ. މުޅި ދިރިއުޅުން މިހާރު ބިނާވެފައިވަނީ އެހެން މީހުންގެ ނަޒަރިއްޔާތުގެ މައްޗަށެވެ.

 

އެހެންކަމުން އޭގެ ޖެހިގެން އައި ދުވަހުން ފަށައިގެން ވެސް ހިލްޔާ އެލީއާއި ހަމްރާ ގޮވައިގެން ފިހާރައަށް ދިޔައެވެ. ފިހާރައަށް ގޮސްފައި މިހާރު ހިލްޔާ ގަންނަން ބޭނުންވަނީ އަގުބޮޑު ސާމާންކަން ޚުދު ހިލްޔާއަށް ވެސް އެނގުންވީ އެދުވަހެވެ. ބައްޕަ ކިތަންމެ މުއްސަނދި ވިޔަސް މިހާތަނަށް އައިއިރު ހިލްޔާގެ ތިން ބެއިން ވެސް އެހާ އަގުބޮޑު އެއްޗެއް ބޭނުންކޮށް ނަހަދައެވެ. ދެއްކުންތެރިކަމަކީ ބައްޕަ ރުހޭ ސިފައަކަށް ނުވާތީވެއެވެ.

 

އެހެނަސް އެދުވަހު ހިލްޔާއަށް ބްރޭންޑެޑް އެއްޗެއް ނޫނީ ނުގަނެވެއެވެ. އަމިއްލައަށް ބޭނުންކުރާ ސާމާން ބާ ނުވެ، ހުސްނުވެ ހުއްޓަސް ހުރިހާ އެއްޗެއް ގަނެވުނެވެ. ހިތް ބުނަމުން ދިޔަ ފަދައެވެ. މިހާރު މުއްސަނދީ ހަމައެކަނި އޭނަގެ ބައްޕައެއް ނޫނެވެ. އޭނަ އިންނަން އުޅޭ ބައިވެރިޔާ ވެސް އެހާ މުއްސަންޖެވެ. ވީއިރު ދުނިޔެ ހޯދުމުގައި އޭނަ ފަސްޖެހެންވީ ސަބަބެއް ނެތޭ ހިތަށްއެރިއެވެ.

 

ޢިޝާ ނަމާދަށްފަހު ނުކުތް ތިން ބެއިންނަށް އެރޭ ގެއަށް އާދެވުނީ 11 ޖަހަން ގާތްވަމުން ދިޔަ ވަގުތެވެ. އެހާ ގިނަ ވަގުތު ނެގީ ހިލްޔާ ދާން ބޭނުންވި ފިހާރަތަކާއި ގަންނަން ބޭނުންވި އެއްޗެހި ގިނަވުމުންނެވެ. މާ ލަސްވާތީ ދޮންތަ ދަރިފުޅު ގާތަށް ނުދެވިގެން ޝަކުވާ ކުރިއެއްކަމަކު ހިލްޔާ އެއަށް މާ ބޮޑު ފަރުވާލެއް ނުދެއެވެ. ހިލްޔާ ހިތުން ގެއަށް އާދެވުނީ ދޮންތަ އެހެން އެދުނުތާ އިރުކޮޅެއް ފަހުންނެވެ.

 

އޭގެ އަނެއްދުވަހު ހިލްޔާ ކްލިނިކަށް ދާން ތައްޔާރު ވުމުގައި ކުރީ ރޭ ގަތް ހުރިހާ އެއްޗެއް ބޭނުންކުރިއެވެ. ލަކްޝަރީ އަބަޔާ ފިހާރައަކުން ގަތް ގަދަ ރަތް ކުލައިގެ އަބާޔާއެކެވެ. އަބާޔާގެ އަތުކުރީގައި ރިހި ކުލައިގެ އެސްތަކުން މާ ގަނޑެއް އެޅިފައިވި ގޮތުން އެ އަބާޔާގެ ފެންވަރު ފެނެއެވެ. ބުރުގާ އެޅުމުގެ ކުރިން ޝަނެލް ބްރޭންޑްގެ ކުނޑިން މޫނު އިތުރަށް ދޮންކޮށްލުމަށްފަހު ސެފޯރާ އައިލައިނާއިން އަނދުން އެޅިއެވެ. ޓޮމް ފޯޑް ލިޕްސްޓިކަކުން ހިލްޔާގެ ޤުދުރަތީ ގޮތުން ވެސް މަޑު ފިޔާތޮށި ކުލައިގެ ތުންފަތުގެ ކުލަ ގަދަ ކުރިއެވެ. އެއަށްފަހު އަބަޔާއާއިއެކު ލިބުނު އަބާޔާ ކުލައިގެ ޝިފޯން ޝޯލްއެއް އެޅިއެވެ. އަދި މޭޒުމަތީގައި ބެހެއްޓިފައިވި ‘ސްކޭންޑަލް’ ސެންޓުފުޅި، ގަޔަށް ބުރުއްސާލީ ކްލިނިކަށް ދާ ފަހުން ވެސް ދުރަށް ފޯރާނެކަން ޔަޤީންވާހާ މިންވަރަށެވެ. އަތުކުރީގައި ކްލެވެންޓީ ރޯޒްގޯލްޑް ކުލައިގެ ގަޑިއެއް އެޅުމަށްފަހު، ރަންކުލައިގެ ފަށެއްލެވިފައިވާ ކަޅުކުލައިގެ ޗާރލްސް އެންޑް ކީތް ދަބަހެއް ކޮނޑުގައި އެޅުވިއެވެ.

 

ހުރެވުނު ގޮތް މޫނުބަލާ ލޯގަނޑުން ފެނުނު ހިނދު ހިލްޔާގެ މޫނުމައްޗަށް ވެރިވީ ފަޚުރުވެރި ހިނިތުންވުމެކެވެ. އެ ހުރިހާ އަގުބޮޑު އެއްޗެހި ބޭނުން ކުރުމުން އޭނަގެ އަގު އުފުލިގެން ދިޔަހެން ހިލްޔާއަށް ހީވިއެވެ. މޫނުބަލާ ލޯގަނޑުން އެވަގުތު ހިލްޔާއަށް ފެނުނީ ހުރިހާ ގޮތަކުން ވެސް މޮޅު، ރީތި އަދި ނަސީބުވެރި ކުއްޖެކެވެ. އޭނަގެ ނޭފަތާއިމެދު އެއްޗެކޭ ބުނި ބަޔަކަށްވުރެ ވެސް އޭނަ މިއަދު މާ އުފާވެރިވާނެކަން ގައިމޭ ހިތަށްއެރިއެވެ. ހަމަ އެއާއިއެކު އެ ހުރިހާ މީހުންނަކީ އޭނައަށްވުރެ ދަށް މީހުންގެ ގޮތުގައި ސިފަ ކުރެވުނެވެ. އޭގެ ތެރެއިން ބައެއް މީހުންނަކީ މިއަދާއި ހަމައަށް އައިއިރު ވެސް އޭނަގެ އެކުވެރިން ކަމަށްވިޔަސްމެއެވެ. ނޭފަތާއި ބެހޭގޮތުން ބުނި އެއްޗެއް ބުނީ ކޮންމެހެން މަލާމާތް ކުރަން ނޫންކަމަށް ވިޔަސްމެއެވެ. އެ އެކުވެރިން އެނާ ހެތަވޭ އާއި ހިލްޔާ ވައްތަރު ކުރީ ހިލްޔާގެ ރީތިކަން ހާމަކުރަން ކަމަށްވިޔަސްމެއެވެ.

 

ހިލްޔާ ޑިއުޓީއަށް ދިޔުމަށްޓަކައި ގޮސް ކާރަށް އެރީ ވެސް އަމިއްލަ ނަފްސަށް ތަޢުރީފު ކުރަމުންނެވެ. ކާރަށް އަރައި ސްޓާޓްކޮށްލަމުން ދުއްވާލަން އުޅުނު ވަގުތު ފޯނު ރިންގުވާން ފެށި އަޑު އިވުނެވެ. ފޯނު ބްލޫޓޫތުން ކާރާއި ގުޅިފައިވުމުން ގުޅަނީ ކާކުތޯ ބަލަން ޑޭޝްބޯޑަށް ނަޒަރެއް ދެވުނެވެ. ސްކްރީނުން ރާފިލްގެ ނަން ފެނުމާއިއެކު ހިލްޔާއަށް ފޯނު ނެގުނެވެ.

 

“ގުޑް މޯނިންގް! މޯނިންގް ޑިއުޓީ ނެތް ދުވަހެއްގަ ހާދަ އަވަހަކަށް ތި ތެދުވީ؟” ހިލްޔާއަށް ބުނެވުނެވެ.

 

“އާނ…. ޑިއުޓީއަށް ދާން ތި ނިކުތީދޯ؟” ރާފިލް ނިދި އަޑުން އެހުމުން ހިލްޔާއަށް ލަދުރަކި ގޮތަކަށް ހިނިތުންވެލެވުނެވެ.

 

“ހުމް….މިސްވެގެންތަ ތިގުޅީ މިގަޑީގަ؟” ހިލްޔާއަށް އަހާލެވުނެވެ.

 

“މިސްވާނެ ދޯ އަބަދުވެސް. ހެހެ…..އަސްލު މިގުޅާލީ ހަނދާން ހުރިއިރު އިމްޕޯޓެންޓް ވާހަކައެއް ދައްކާލަން ވެގެން. މިއަދު އަހަރެން ފޮނުވާނަން އިނގޭ ޔޫކޭގަ ރެޒިޑެންސީއަށް އެޕްލައި ކުރާ ލިންކެއް. އައިމް އޯލްސޯ އެޕްލާއިންގް ދެއާރ. ދެމީހުންގެ އެކްސްޕީރިއެންސް މަދުވީމަ ފަހަރެއްގަ އެކްސެޕްޓް ނުކޮށްފާނެ. އެކަމަކު އަހަރެންގެ ޑޭޑް ބުނީ ހަމަޖައްސައިދޭނަމޭ.” ރާފިލް ވާހަކަ ދައްކަމުން ދިޔަދިޔަހެން ހިލްޔާގެ ހިތަށް އުފާވެރިކަމުގެ ރާޅުބާނީތައް ޖަހައި ފައިބަމުން ދިޔައެވެ.

 

“ދެޓްސް ސަޗް ގްރޭޓް ނިއުސް ރާފިލް! ހަމަ މިހާރު ވެސް އެޕްލައި ކުރަން ބޭނުން. ސޯ އެކްސައިޓެޑް!!!” ހިލްޔާ އޭނަގެ ޖަޒުބާތުތައް ބަންޑުން ކުރިއެވެ.

 

“ދޯ؟ މީ ޓޫ…” ރާފިލް އެހެން ބުނިއިރު ލުއި ހިނިތުންވުމެއްގައި ހުރިކަން އެ އަޑުން ހިލްޔާއަށް އެނގުނެވެ.

 

“އޯކޭ ދެން މިގަޑީގަ ވާހަކަ ފަށައިފިއްޔާ އަހަރެން ގަޑިޖެހިދާނެ. ދިޔައީ. ބާއި.” ހިލްޔާ ބުންޏެވެ.

 

“ބާއި ލަވް.” ރާފިލް ބުނެލިއެވެ. އެއާއިއެކު ހިލްޔާ ހިތާއި ދެކޮޅަށް އެ ކޯލު ނިންމިއެވެ.

 

**

 

ރާފިލް އެދުނު ފަދައިން ހަމަ އެދުވަހު ހިލްޔާ ޔޫކޭގެ ހޮސްޕިޓަލަކަށް ރެޒިޑެންސީއަށް އެޕްލައި ކުރިއެވެ. ޖެހިގެން އައި ހަފްތާތަކުގައި އެމީހުންގެ ބައެއް އިމްތިޙާންތަކާއި އިންޓަވިއުތައް އޮންލައިންކޮށް ނަގަން ޖެހުނެވެ. ރާފިލް ބުނި ގޮތުގައި އެމީހުންނަކީ ހަމައެކަނި އޮންލައިންކޮށް އިންޓަވިއު ކޮށްގެން ބައިވެރިން ނަގާ ބައެއް ވެސް ނޫނެވެ. އެހެނަސް އެހުރިހާ ކަމެއް ހިނގަމުން ދިޔައީ ރާފިލްގެ ބައްޕަގެ ނުފޫޒުންނެވެ.

 

އެއީ ކިހާ ނާއިންސާފުން ހިނގާ ކަމެއްކަން ހިލްޔާގެ ހިތަށް އިޙްސާސް ކުރެވުނެވެ. އެހެނަސް އެ ވާހަކަ ފެންމަތި ކުރަން ބޭނުމެއް ނުވިއެވެ. އޭނަގެ އުފާވެރި ޙަޔާތުގައި ކޫރުމެއް އަޅަން ބޭނުމެއް ނުވުމުންނެވެ.

 

ނަތީޖާއެއްގެ ގޮތުން އޭގެ މައްސަރެއްހާ ދުވަސް ތެރޭގައި ހިލްޔާއާއި ރާފިލްއަށް ވެސް ޔޫކޭގެ ލަންޑަން ގައިވާ ހޮސްޕިޓަލެއްގައި ރެޒިޑެންސީ ހެދުމުގެ ފުރުސަތު ހިލްޔާއާއި ރާފިލްއަށް ވެސް ލިބުނެވެ. އެކަމުގެ އުފަލުގައި ރާފިލް ހިލްޔާއާއެކީ ޚާއްސަ ޑޭޓަކަށް ގޮސް ކޭކެއް ވެސް ފެޅިއެވެ. ކޭކުގެ ބާކީ ހުރި ބައި ހިލްޔާ ގެއަށް ގެންނަން ޖެހުނީ އަމިއްލައަށެވެ. އެކަމާއިމެދު ހިލްޔާ ހިސާބަކަށް ދެރަވިއެވެ. މިހާތަނަށް އައިއިރު ވެސް ރާފިލް އޭނަގެ ޢާއިލާއާއި ދުރުދުރުން އުޅެމުން ދާ ގޮތުންނެވެ. އެހެނަސް ހިލްޔާ އެކަމާއިމެދު ޝަކުވާ ނުކުރީ، ހިލްޔާގެ ބައްޕަ ރާފިލްއާއިމެދު ދައްކާފައިވާ ވާހަކަތައް ހަނދާން ކުރަމުންނެވެ. ރާފިލް ބައްޕައާއި ވާހަކަ ދައްކަން ބޭނުންނުވާ ސަބަބަކީ އެއީ ކަމަށް ވެސް ވެދާނެކަމަށް ހިތް ބުނުމުންނެވެ.

 

ހިލްޔާ ގޭގެ މީހުންނަށް ވެސް ރެޒިޑެންސީގެ ޚަބަރު ދިނުމުން އެންމެންގެ މޫނުމަތިންހެން ފެނުނީ ބަނަކަމެވެ. އޭނަ ދާންއުޅެނީ ޔޫކޭއަށް ކަން އެނގުނު ދުވަހުއްސުރެ އެންމެން އެކަމާއި ނުރުހުން ފާޅުކުރިއެވެ. މެލޭޝިޔާގައި ތިމާގެ މީހުން ތިބެފައި އެތަނުން ވެސް ރެޒިޑެންސީ ހެދޭއިރު ހިލްޔާ މާ ދުރު ހިސާބަކަށް ދާން އުޅޭތީވެއެވެ. އެ މައްސަލަ އެންމެ ގިނައިން ޖެއްސީ ހަމްރާއެވެ. ރެޒިޑެންސީގެ ފުރުސަތު ލިބުނު ދުވަހު ވެސް ހަމްރާ އެ ޖަދަލު ކުރިއެވެ. އެހެނަސް ހިލްޔާ ހަމްރާ ދެއްކި އެއްވެސް ވާހަކައެއް ޤަބޫލެއް ނުކުރިއެވެ. ނަހީދާއި ހާފިޒާ އެއްޗެކޭ ނުބުނެ ތިބީ އެކަން ރަނގަޅަށް ދަނެގެންނެވެ. ވަކިން ޚާއްސަކޮށް ނަހީދު ހުރީ ހިލްޔާއާއި ޒުވާބު ކުރާ ވަރަށްވުރެ ވަރުބަލިވެފައެވެ. ސިޓިންގް ރޫމުގައި ތިބެ ހަމްރާއާއި ވާހަކަ ދައްކަމުން ގޮސް ހިލްޔާ އޭނައަށް ބަލާލަމުން ސުވާލު ކުރަން ފެށުމުން މެއަށް އުދަގޫވިއެވެ.

 

“ނޫންތަ ބައްޕާ؟ އަހަރެން މި ދަނީ އެކަންޏެއް ނޫން. ރާފިލްއާއެކީ. ވީ ވިލް ބީ މެރީޑް އެކޮޅަށް ގޮއްސަ. ރާފިލް އަހަރެން ނުލާހިކު ރަނގަޅަށް ބަލާނެ. އެހެންވީމަ މައްސަލައެއް ނެތެއްނު؟” ހިލްޔާ އެހިއެވެ.

 

އެހިނދު އެތައް ދަރަޖައިގެ ބިރުވެރިކަމެއް ނަހީދުގެ ހިތަށް ވެރިވިއެވެ. ހިލްޔާ އެހާ ދުރަށް ދާން އުޅޭއިރު ރާފިލް ކަހަލަ މީހަކާއެކީ ދާން އުޅޭ ގޮތުންނެވެ. އެބުނާ ކައިވެންޏެއް ފުރުމުގެ ކުރިން ކުރާނެއޭ ކިޔަކިޔާފައި ކައިވެނި ކުރެވޭނީ ފުރުމުގެ ފަހުން ކަމަށް މިފަހުން ކިޔަން ފެށި ގޮތުންނެވެ. އަދި އަމުދުން އޭނަ މިކަމާއިމެދު އެއްޗެކޭ ބުންޏަސް ހިލްޔާ ޤަބޫލެއް ނުކުރާނެކަން ޔަޤީނާއި ގާތްވެފައިވި ގޮތުންނެވެ.

 

“ހުމް….” އެއްދިމާލަކަށް ނަޒަރު ހުއްޓައިގެން ހުރެ ނަހީދު އެހެން ބުނެލީ، ގޮތް ހުސްވެފައިވާ ޙާލުގައެވެ. އަމިއްލަ ހިތް މޭތެރޭގައި އޮވެ ގެނބެމުންދާ ޙާލުގައެވެ. އެހެން ބުނުމުން ހިލްޔާ ހަމްރާއަށް ރައްދުދޭން ފެށުމުން ނަހީދު އެތަނުން ތެދުވެގެން ދާން ފެށީ، އިތުރަށް އެ ވާހަކަތައް އަޑުއަހަން ހިތަށް ކެތް ނުކުރެވުމުންނެވެ.

 

**

 

އެރޭގެ ވަގުތެއްގައި ދާނިޝް ހުރީ ކްލިނިކްގެ އެޑްމިނިސްޓްރޭޓިވް އޮފީހުގެ ހަރުގަނޑުގައި ފައިލްތައް ތަރުތީބުން ޖަހާށެވެ. ވޭތުވެ ދިޔަ މައްސަރުގައި ދާނިޝް ކުރި ހިތްވަރުން އެ އޮފީސް ސާފުވެ، އޮފީހުގެ ހުރިހާ ލިޔެކިޔުންތައް އަދާ ހަމަވެއްޖެއެވެ. އެ މަސައްކަތާއިމެދު ދާނިޝް ހިތްހަމަޖެހުނެވެ.

 

މަސައްކަތުގެ ތެރެއިން ދާނިޝްއަށް ހިލްޔާއާއިމެދު ވިސްނުނެވެ. މިއަދު ހިލްޔާ ޑިއުޓީއަށް ނާންނާތީވެއެވެ. ނާންނަނީ ކީއްވެ ކަމެއް ވެސް ބުނެފައެއްނެތެވެ. ހިލްޔާއަށް ބޮޑުކަމެއް ދިމާވީއޭ ހިތާ ނަހީދުބެއަށް ގުޅައި އަހަން ވެސް ބޭނުންވިއެވެ. އެހެނަސް އެކަމާއިމެދު ނަހީދުބެ ގެ ހިތުގައި ސުވާލު އުފެދިދާނެތީ އެހެން ހަދާކަށް ނުކެރުނެވެ.

 

ދާނިޝްއަށް މަސައްކަތުގައި ހުރެވެސް އޭނަގެ ހިތުގައި އަދިވެސް ހިލްޔާއާއި ނަހީދުބެއަށްޓަކައި އޮތް ޖެހިލުންވުން އެނގުންވިއެވެ. މީގެ މާނައަކީ އޭނައަށް އަދިވެސް ހިލްޔާ ކަމުދިޔުންތޯ ހިތަށްއެރިއެވެ.

 

ދާނިޝްއަށް އެކަން ސާފެއް ނޫނެވެ. މިފަހުން ހިލްޔާ އުޅެން ފަށާފައިވާ ގޮތުން ދާނިޝް ގިނަފަހަރު މަތިން ހިލްޔާއަށް ނުރުހުންވެއެވެ. މިފަހުން އައިސް ހިލްޔާގެ ހުންނަ ދެއްކުންތެރިކަމުން ދާނިޝްއަށް ފެނުނީ ރާފިލްއާއި އެއްގޮތް ސިފައެކެވެ. އަދި އަމުދުން ރާފިލްއާއި ހިލްޔާ ނުހަނު ހާމަކޮށް އެކީގައި ތަންތަނަށް ދާގޮތުން ހިތްހަމަނުޖެހެއެވެ. ނަހީދުބެ އޭނަ ގާތު ސީދާސީދަލަށް އެ ވާހަކަ ނުބުންޏަސް އެއީ ނަހީދުބެ ނުރުހުންވާ ކަމެއްކަން ދާނިޝްއަށް ސާފުވެފައިވެއެވެ. ބައްޕަގެ ނުރުހުމުގައި ހިލޭ ފިރިހެނަކާއި ގުޅުމެއް އެ ބާއްވަނީ ބައްޕަގެ މަޤާމު ނޭނގޭތީތޯ ދާނިޝްއަށް ހިތާހިތުން ހިލްޔާގާތު ބުނެވެއެވެ. ހިލްޔާގެ ސަބަބުން ނަހީދުބެ ގެ ވެސް ޙާލަތު ގޯސްވެފައިވި މިންވަރު ފާހަގަވުމުން ދާނިޝް އެ ވާހަކަތަކުން ހިލްޔާގެ ކަންފަތް ފުރާލަން ބޭނުންވެއެވެ. އެހެނަސް އޭނަ އެކަން ކުރާނީ ކޮން ހައިސިއްޔަތަކުން ކަން ނޭނގޭތީ ފިޔަވަޅެއް އަޅަން ނޭނގިފައި ދާނިޝްއަށް ހުރެވެއެވެ.

 

އަތުގައި އޮތް ފަހު ބޮކްސް ފައިލް ހަރުގަނޑުގައި ޖަހާލަމުން ދާނިޝްއަށް ފުން ނޭވައެއް ދޫކޮށްލެވުނީ އެ ޚިޔާލުތަކުގެ ސަބަބުންނެވެ. އޭނައަށް އަދިވެސް ހިލްޔާ ކަމުދޭ ހެއްޔެވެ؟ ދާނިޝްއަށް ތަކުރާރުކޮށް އަމިއްލަ ނަފްސާއި ސުވާލު ކުރެވުނެވެ.

 

އެކަމާއިމެދު އިތުރަށް ވިސްނާނުލެވެނީސް އެ އޮފީހުގެ ދޮރު ހުޅުވުނު އަޑު އިވުނެވެ. އެއާއިއެކު ދާނިޝްއަށް ޖިންސްގެ ޖީބުގައި އޮތް މާސްކް ނަގައި އަޅަމުން އެދިމާލަށް ބަލާލެވުނެވެ.

 

“އަނހަ! ނަހީދުބެ؟ ހާދަ ނުގަޑިއެއްގަ؟” ދާނިޝް ހިނިތުންވުމަކާއިއެކީ ނަހީދުބެއާއި ދިމާލަށް އެނބުރިލަމުން ވާހަކަ ދެއްކީ، އަޅަން އުޅުނު މާސްކް ތިރިކޮށް، ޖީބަށް އަޅާލަމުންނެވެ. ދާނިޝްއަށް އެހެން އަހާލެވުނީ ނަހީދުބެ ރޭގަނޑުގެ ވަގުތު ކްލިނިކަށް އައިސް ނޫޅޭތީވެއެވެ.

 

“އާނ….ކުޑަކޮށް ދުއްވާލަން ނިކުމެފަ ކްލިނިކަށް ވަދެލާނީއޭ ހިތަށްއެރީ. ކިހިނެއް ހުރިހާ ކަމެއް؟” ނަހީދުބެ ހިނިތުންވުމަކާއެކީ ވަދެގެން އައިސް އޮފީސް ވަށައި ނަޒަރެއް ދެމުން ބުންޏެވެ. އެހިނދު އެ މޫނުމަތި މިލާފައިވާ މިންވަރާއި، އެ ފަނޑު ހިނިތުންވުން ފާހަގަވެ، ދާނިޝްގެ ހިތް ދެރަވިއެވެ.

 

“ހުރިހާ ކަމެއް ރަނގަޅު ބޭބޭ. މިހާރު ދެން މި ނިމުނީ މި އޮފީހުގެ ހުރިހާ ކަމެއް. ދެން ސްޓާފުން ހޯދުން އޮތީ.” ދާނިޝް ބުންޏެވެ.

 

“ހުމް….ސްޓާފުންނޭ ބުނީމަ މި ހަނދާންވީ. ދެ މެޑިކަލް އޮފިސާރސް ހޯދަން ވެސް އިޢުލާން ކުރައްޗޭ.” ނަހީދު އެދުނެވެ.

 

“އެއީ ކީއްވެ؟ އިތުރު މެޑިކަލް އޮފިސާރސް ހޯދާ ވަރަށް އަދި ޕޭޝަންޓްސް ގިނަ ނުވާހެން ހީވަނީ.” ދާނިޝް ބުންޏެވެ.

 

“މެޑިކަލް އޮފިސާރސް އިތުރު ކުރާކަށް ނޫނޭ. ހިލްޔާއާއި ރާފިލް އުޅެނީ ރިޒައިން ކުރަން.” ނަހީދު ބުނެލި ބަސްތަކުން ދާނިޝްއަށް ލިބުނީ ޝޮކެކެވެ.

 

“ވަޓް؟! އެއީ ކީއްވެ؟” ދާނިޝްއަށް އަހާލެވުނެވެ.

 

“ދެމީހުން މެޑިކަލް ރެޒިޑެންސީއަށް އެޕްލައި ކޮށްގެން ފުރަން އުޅެނީ. ޔޫކޭއަށް.” ނަހީދު އަސަރެއްނެތި ކިޔައިދިނެވެ.

 

“ދެމީހުން….އެއްކޮށްތަ ދަނީ؟” ދާނިޝްއަށް އެހެން އަހާލެވުނީ ހަމަ އެއްވެސް އިޚްތިޔާރަކާއި ނުލައެވެ.

 

“އާނ….ރެޒިޑެންސީއަށް ގޮއްސަ ދެމީހުން ކައިވެނި ކުރަން ރާވައިގެން ދަނީ.”

 

ނަހީދު އެ ބުނި ބަސްތަކާއިއެކީ، ދާނިޝްގެ މޫނުމައްޗަށް ހިތާމަވެރިކަން ވެރިވެގެން ދިޔައީ ޚުދު އޭނައަށް ވެސް ނޭނގިއެވެ.

 

ނުނިމޭ