ނަފްސީ (ފަސްދޮޅަސްއެއްވަނަ ބައި)

“ހަނދާންވެއްޖެ ނަހީކް. ނަހީކް….ކޮބައިތަ މިހާރު؟” ހިލްޔާއަށް ޖެހިލުންވުމަކާއެކީ އަހާލެވުނެވެ.

 

“ނަހީކް….ނިޔާވިތާ މިއީ 4 ވަނަ މަސް.” ހިނިތުންވުން އެއްކޮށް ފިލައި ދިޔަ އެ މަންމަގެ ދުލުން އިވުނު ބަސްތަކުން ހިލްޔާގެ ދެލޯ ބޮޑުވީ ހިނދު މުޅި މީހާ ގަނޑުވިއެވެ.

 

ހިލްޔާއަށް އެއްޗެކޭ ނުބުނެވިފައި އިންގޮތަށް އިނދެވުނީ، ނަހީކްގެ ހަށިގަނޑު ތެރެއިން ހިނގާފައިވާނެ ކަންތައް ލޮލަށް ސިފަ ކުރެވޭ ޙާލުގައެވެ. އެންމެ ފަހުން ނަހީކް ނިޔާވެފައިވާނެ ގޮތް ސިފަ ކުރެވުމުން ހިލްޔާގެ އަނގައިން ލުއި އާހެއްގެ އަޑު ނިކުތެވެ.

 

“ދެން…ނިމުނީ ދޯ ޑޮކްޓަރ؟” ނަހީކް ގެ މަންމަ މިފަހަރު ގަދަކަމުން ހިނިތުންވެލީއިރު އެ ލޮލުން ކަރުނަތައް ފައިބައިގެން އައެވެ.

 

“އް…އާނ…” އަމިއްލަ މީހާއަށް ލިބިފައިވާ ޝޮކުގެ ސަބަބުން ހިލްޔާއަށް އެވަގުތު ބޭސް ސިޓީ ޙަވާލުކުރުން ނޫންކަމެއް ނުކުރެވުނެވެ. ނަހީކްގެ މަންމަ ބޭސް ސިޓީއާއި އެކީ ތެދުވެލަމުން އަވަސް އަވަހަށް ނިކުންނަން ދިޔައީ ކަރުނަތައް ފޮހެމުންނެވެ.

 

އެ ވަގުތުކޮޅަށްފަހު ހިލްޔާގެ ބޯ މަތީގައި ބޮޑު ބުރައެއް ބޭއްވިފައިވާ ކަހަލަ އިޙްސާސެއް ހިލްޔާއަށް ކުރެވުނެވެ. އެހެނަސް ނަހީކް ގެ މަންމައަށް ފަހު ހުއްޓުމެއްނެތި ބަލިމީހުން ބަލަން ޖެހުނީތީ އެ އިޙްސާސްތަކާއިމެދު ވިސްނާނެ ފުރުސަތެއް ހިލްޔާއަށް ނުލިބުނެވެ. އެންމެ ފަހުން އެ އިޙްސާސްތަކާއި އެކީ އެކަނި ވެވުނީ ހެނދުނު ގެ ޑިއުޓީ ނިންމާލުމަށްފަހު ކާރަށް އެރި ވަގުތެވެ. އެއާއިއެކު ހިލްޔާއަށް ކާރު ސްޓާޓް ކުރުމުގެ ކުރިން ވެސް ވިސްނެން ފެށިއެވެ.

 

ނަހީކް ހަމަ ނިޔާވީ ހެއްޔެވެ؟ ނިޔާވެފައިވާނީ އޭނަ މި ހީކުރާ ކަމެއްގެ ސަބަބުން ހެއްޔެވެ؟ ނިޔާވީ އެ ސަބަބާއި ހެދި ކަމަށްވާނަމަ އެކަން އެހެންވީ އޭނަގެ ފަރުވާ ކުޑަ ކަމުގެ ސަބަބުން ހެއްޔެވެ؟ އޭނަ އެ މައްސަލައިގެ މަތިން އެ ދުވަސްކޮޅު އެއްކޮށް ހަނދާން ނައްތާލީ ރާފިލްގެ އަވައިގައި ޖެހުމުންނެވެ. ނޫނެކެވެ. ދުނިޔޭގެ އަވައިގައި ޖެހުމުންނެވެ. އަމިއްލަ އެދުމުން ހިތް ފުރިފައިވުމުގެ ސަބަބުން ބަޔަކަށް ވަމުން ދާ ގެއްލުމަކާއި މެދު ވިސްނަން ވެސް ބޭނުމެއް ނުވެފައިވީއެވެ.

 

އެކަން ހަނދާންވުމުން ހިލްޔާއަށް ދެލޯ މަރައި ތަގުޅި ކޮށްލެވުނެވެ. ޢާއްމުންގެ ނަޒަރުގައި މިއީ އޭނަގެ ކުށަކަށް ނުވެދާނެއެވެ. އެހެނަސް ހިލްޔާއަށް އެވަގުތު އަމިއްލަ ނަފްސު ވަރަށް ބޮޑަށް ކުށްވެރި ކުރެވުނެވެ. އޭނަގެ ފަރުވާ ކުޑަކަން ﷲ ސުބްޙާނަހޫ ވަތަޢާލާ ދެކެ ދެނެވޮޑިގެންވީތީވެއެވެ. އޭނަ އެދުވަސްވަރު ޤުރުއާނަށާއި ﷲ ގެ ހަނދުމައިން ދުރު ނުވިނަމަ، ހަމަ ގައިމުވެސް މި މައްސަލަ އިތުރަށް ތަޙުޤީޤު ކުރާނެހާ ‘ދިރުމެއް’ އޭނަގެ ހިތުގައިވީހެވެ. އެހެނަސް އެ ޤުރުއާނާއި އެ ހަނދުމައިން އޭނަ ދުރުވީ ޤަޞްދުގައެވެ. އެނގިގެން ހުރެ ކުރި ފާފަތަކުގެ ސަބަބުން އެ ހަނދުމައިން އިތުރަށް ދުރުވެ، ހިތުގައި ހުރި ހިދާޔަތުގެ އަލިކަން ފާފަތަކުގެ އަނދިރިކަމުގެ ތެރެއަށް ގެއްލިގެން ދިޔައީއެވެ.

 

އެކަން އެނގުންވެގެން ދިޔުމުން ފާފަ ފުއްސެވުމަށް އެދި ހިލްޔާއަށް އެ ވަގުތު ދުޢާ ކުރެވުނެވެ. އަދި ނަހީކްއަށް ހެޔޮ ރަޙްމަތް ލެއްވުމަށާއި، ނަހީކް ގެ މަންމައަށާއި ޢާއިލާއަށް ޢާފިޔަތް ދެއްވުމަށް އެދިއެވެ. އެ ދުޢާ ކުރުމުގެ ކުރިން އޭނައަށް އެފަދަ ޝައްކެއް ކުރެވުނު އެހެން ދެކުދިން މަތިން ވެސް ހަނދާންވިއެވެ. ހަނދާންވުމާއި އެކުހެން ހިލްޔާއަށް ފޯނު ނަގައި މެއިލް ހުޅުވާލެވުނެވެ. އަދި މެއިލް އިން ބާސިމް ގެ ނަން ސާޗްކޮށްލީ، އެ ކުދިންގެ ޓެސްޓްތައް އޭނަ މެއިލް ކޮށްފައިވާ ކަން ހަނދާން ކުރަމުންނެވެ. މާ ގިނައިރެއް ނުވެ އެ ޓެސްޓްތައް ހިލްޔާއަށް ފެނުނެވެ. އެ ޓެސްޓްތަކުގެ މަތިން ކުދިންގެ ނަމާއި އެޑްރެސް ފެނިގެން ދިޔުމުން ހިލްޔާގެ މޫނުމައްޗަށް ވެރިވީ، ވަރުގަދަ ޢަޒުމެއް ކަނޑަ އެޅި ފަދަ އަސަރެކެވެ. އިސާހިތަކު ހިލްޔާ ކާރު ސްޓާޓް ކޮށްލަމުން ސީޓް ބެލްޓް އެޅުވިއެވެ.

 

ހިލްޔާ ގެއަށް ދިޔުމުގެ ކުރިން މުޅި ހުޅުމާލޭގައި ހުރި ހުރިހާ ބޮޑެތި ފިހާރައަކަށް ދިޔައެވެ. އަދި އެ ފިހާރަތަކުގައި ހުރި އާފަލު ބްރޭންޑްތަކަށް ރަނގަޅަށް ބެލިއެވެ. ހުރިހާ ފިހާރަކުން ހެން ފެނުނީ މައިގަނޑު ތިން ބްރޭންޑެއްގެ އާފަލެވެ. މައްސަލަ އުޅެނީ ކޮން ބްރޭންޑެއްގެ ކޮން ކުލައެއްގެ އާފަލެއްގައިތޯ ބަލަން ހިލްޔާ ބޭނުންވިއެވެ. އެކަމަށްޓަކައި އިތުރަށް ދިރާސާ ކުރުމަށް ސިކުނޑީގައި ރޭވެމުން ދިޔައެވެ. އާފަލުގައި ހުރި ގެއްލުންތައް ގޭގައި ޓެސްޓް ކުރެވޭނެ ގޮތްތައް ދިރާސާ ކުރުމަށް ހިލްޔާ ރޭވިއެވެ. އަދި ހަމަ މިއާއިއެކު އޭނައާއި އެއްކޮށް މެލޭޝިޔާގައި ކިޔެވި މެޑިކަލް ސްޓޫޑެންޓުންނާއި އެއްކޮށް މަސައްކަތް ކުރި ރެޒިޑެންޓުންނަށް ގުޅައި މި މައްސަލައާއި މެދު މަޝްވަރާ ކުރަން ނިންމުނެވެ.

 

މެދުމިނުގެ އާފަލު ކޮތަޅެއް ހިފައިގެން ހިލްޔާ ގޮސް ގެއަށް ވަގުތަކީ ސިޓިންގް ރޫމުގެ ސޯފާގައި އިނދެ ފޮތެއް ކިޔަމުން ފެހި ކުލައިގެ އާފަލެއް ކަމުން ދިޔަ އެލީ ފެނުނެވެ. އެ މަންޒަރު ފެނިފައި ހިލްޔާގެ ހިތަށް ވަން ބިރުވެރިކަމާއި އެކީ ވާހަކަ ދެކެވުނެވެ.

 

“އެލީ ކޯޗެއް ތި ކަނީ؟” އަވަސް ފިޔަވަޅުތަކެއްގައި އެލީ ކައިރިއަށް ގޮސް ހިލްޔާއަށް އަހާލެވުނެވެ.

 

“އެޕްލް…” އެލީ ނުހަނު ސީދާ ސާދަލަށް ބުންޏެވެ.

 

“ކޮން ބްރޭންޑެއްގެ އެޕްލްއެއް؟” ހިލްޔާ އެހިއެވެ.

 

“ނޭނގެ. ލޭބަލް ނުކިޔަން. ބައްޕަ އޯސިސް އިން ގެނެއްސަ ހުރި އެޕްލް. ކިހިނެއްވީ؟ އެހެން ފިހާރައަކުން ގަނެގެންތަ ތިއައީ؟” އެލީ އެހިއެވެ.

 

ހިލްޔާއަށް އެއަށް ޖަވާބެއް ނުދީ ބަދިގެއާއި ދިމާލަށް ދާން ހިނގައިގަނެވުނެވެ. އެލީ އޮޅުން އަރާފައި ހިލްޔާއަށް ބަލަން އިނދެފައި އަނެއްކާވެސް ފޮތް ކިޔަން ފެށިއެވެ.

 

ހިލްޔާ ބަދިގެއަށް ގޮސް އައިސްއަލަމާރި ހުޅުވާލަމުން އަލަމާރީގެ މެދު ބައިގައި ހުރި މޭވާ ޓްރޭ ދަމާލިއެވެ. އަދި އޭގައި ހުރި ފެހި ކުލައިގެ އާފަލުގެ ލޭބަލް ބެލިއެވެ. ‘ފްރެޝް އޯރޗާޑް’ ބްރޭންޑް ގެ ނޫކުލައިގެ ލޭބަލް ފެނިފައި ހިލްޔާގެ ދެބުމަ ކައިރިވިއެވެ. މިއީ ގިނަ ފިހާރަތަކުން އެންމެ ގިނައިން ފެނުނު ލޭބަލެވެ. އޯސިސްއަށް ޢާއްމު ގޮތެއްގައި ކޮންމެ ބާވަތެއްގެ އެއްޗެއް ގެންނަނީ އެއް ކުންފުންޏަކުންނެވެ. އެހެންކަމަށް ވާނަމަ ވޭތުވެ ދިޔަ ދުވަސްތަކުގައި ގޭގެ މީހުން ވެސް ބޭނުންކުރީ މި ބްރޭންޑް ގެ މޭވާތަކެވެ. އެހެނަސް މި ވީހާ ތަނަށް ގޭގެ އެއްވެސް މީހަކަށް ކަމެއް ދިމާވެފައެއް ނެތެވެ. ވީއިރު މި ބްރޭންޑްގައި މައްސަލައެއް ނެތީތާއޭ ހިތަށްއެރިއެވެ.

 

ހިލްޔާއަށް މުޅި ދުވަހުހެން މި ފިކުރުގައި އުޅެވުނެވެ. އެ ކުދިން ބަލި ޖެއްސި ބްރޭންޑަކީ އެހާ މަޝްހޫރު ބްރޭންޑަކަށް ނުވެ ހިނގައިދާނެއޭ ހިތަށްއެރިއެވެ. އެހެންނޫނީ އޭނަ ޔޫކޭގައި ހުރިއިރު ދިވެހި ސަރުކާރަށް މިކަން ފާހަގަވެ، އެ ބްރޭންޑް ރާއްޖެއިން ބޭރު ކުރެވިފައިވީތޯ ހިތަށްއެރިއެވެ. އެކަން ޔަޤީން ކުރުމަށް ވޭތުވެ ދިޔަ މަސްތަކުގައި ރާއްޖޭގެ ނޫސްތަކުގައި ޖެހިފައިވާ ޚަބަރުތައް ކިޔާލެވުނެވެ. އެހެނަސް އެކަހަލަ އެއްވެސް ޚަބަރެއް ނެތެވެ. އެ އާފަލުން އަސަރު ކުރަނީ ވަކި ޙާލަތެއް ހުންނަ ކުދިންނަށް ހެއްޔެވެ؟ ހިލްޔާ ޔަޤީން ކުރަން ބޭނުންވިއެވެ.

 

ޔަޤީން ކުރުމަށްޓަކައި ހިލްޔާ އެންމެ ފުރަތަމަ ކަމަކަށް އޭނަގެ މެއިލްގައި ހުރި ޓެސްޓް ރިޕޯޓްތަކުން ފެނުނު އެޑްރެސްތައް ބައްޕައަށް ދެއްކިއެވެ. ބައްޕައަށް މާލޭގެ ވަރަށް ގިނަ ގެތައް އެނގޭތީ މަގު ހޯދަން ފަސޭހަ ކުރުމަށެވެ. ސުވާލު ކުރުމުން ވަގުތުން ބައްޕަ ކިޔައިދިނެވެ.

 

“އެއީ ކީއްކުރަން ދަރިފުޅު މި ގެތައް ހޯދަނީ؟” މެންދުރު ނަމާދުން އައިސް ކެއި ގަޑީގައި ބައްޕަ އާއި ދެއްކި ވާހަކައިގެ ތެރެއިން ބައްޕަ އެހިއެވެ.

 

“އެއީ…އަހަރެން ތަންކޮޅެއް ކުރިން ބެލި ދެ ކުދިން ގެ އެޑްރެސް. އެ ކުދިންނާ ބައްދަލުކޮށްލާ ހިތްވީ. ސޯޓް އޮފް ރިސާޗް.” ހިލްޔާ މާ ގިނަ ތަފްޞީލު ދިނުމެއް ނެތި ތެދުތެދަށް ބުންޏެވެ. އޭނައަށް ހީވާ ހީވުން ޔަޤީން ނުވަނީސް އޭނަ އެއްވެސް މީހަކާ ޙިއްސާ ކުރަން ބޭނުމެއް ނުވިއެވެ. ހިލްޔާގެ ނަސީބު ރަނގަޅުކަމުން ބައްޕަ ވެސް ވަކި އިތުރު ސުވާލެއް ނުކުރިއެވެ.

 

އެދުވަހު ހަވީރު ޑިއުޓީ ނިންމުމަށްފަހު ހިލްޔާ އަނެއްކާވެސް ގެއަށް ނު ގޮސް ދިޔައީ މާލެއަށެވެ. އޭނަ ދާން ބޭނުންވާ ދެ ގެއަކީ ވެސް މާލޭގެ ދެ ގެއަށް ވީތީވެއެވެ. ދަތުރު މަތީގައި ވެސް އެ ދެކުދިންގެ ޙާލު ރަނގަޅު ކަމުގައި ލެއްވުމަށް ހިލްޔާއަށް ހިތާހިތުން ދުޢާ ކުރެވުނެވެ. އެ ގެތަކަށް ދިޔުމުގެ ކުރިން ދެ ކުދިންނަށް ދޭން ފިހާރައަކަށް ވަދެ ހަދިޔާ ގަތީ، ބައްދަލު ކުރަން ދިޔުމަށް އެ ކުދިންނަށާއި ޢާއިލާއަށް ވެސް ރަނގަޅު ސަބަބެއް ހޯދުމަށެވެ.

 

މާލެއަށް ގޮސް 20 ވަރަކަށް މިނެޓްގެ ދަތުރަކަށްފަހު ހިލްޔާއަށް 8 އަހަރުގެ ޔޫކް ގެ ގެއަށް ދެވުނެވެ. ގޭގެ ބެލް އެޅުވުމުން ޔޫކްގެ މަންމަ ދޮރު ހުޅުވުމުން ހިލްޔާ އަމިއްލަ ނަފްސު ތަޢާރަފު ކުރިއެވެ. އަދި އޭނަ މި ދަނީ އޭނަ ބަލާފައިވާ ބައެއް ކުޑަ ކުދިންނަށް ހަދިޔާ ދެމުން ކަމަށް ބުނެ ޔޫކްއަށް ގޮވާލެވިދާނެތޯ އެހިއެވެ. ޔޫކްގެ މަންމަ ވަކި ދެކޮޅު ހެދުމެއްނެތި ޔޫކް ގެނައެވެ. ޔޫކް ހިލްޔާއާއި ބައްދަލު ކުރަން އައީ ވެސް ދުވެފައެވެ. އެ މަންޒަރު ފެނިފައި ހިލްޔާގެ ހިތަށް ފިނިކަމެއް ލިބުނެވެ.

 

ޔޫކްއާއި އެއްވަރުވުމަށް ކުޑަ ފައި މައްޗަށް ތިރިވެލަމުން ހިލްޔާ ޔޫކް އާއި ވާހަކަ ދެއްކިއެވެ. ޔޫކްގެ ޙާލު ކިހިނެއްތޯ އެހިއެވެ. އުފަލާއިއެކީ ޔޫކް ރަނގަޅޭ ބުނުމުން ޔޫކް ގެ މަންމަ ވާހަކަ ދެއްކިއެވެ.

 

“މިއަދު ދެން މިއީ ރަނގަޅު ދުވަހެއް. އެކަމަކު ވަރަށް ގިނައިން ބަނޑަށް ތަދުވެގެން އުޅޭ މި ފަހުން އައިސް.” ޔޫކް ގެ މަންމަ ބުންޏެވެ.

 

“އޮހް….ޑޮކްޓަރަށް ދެއްކިންތަ؟” ހިލްޔާ އެ މަންމައާއި ޔޫކްއަށް ވާ ގޮތަށް ސުވާލު ކުރިއެވެ.

 

“ދެއްކިން. ބުނީ ގޭސް ވަނީ އޭ. ގޭސް ވާތީ ބޭސް ދީ ކާންވީ ވަކި އެއްޗެހި ވެސް އަންގާފަ ހުރީ.” ޔޫކްގެ މަންމަ ކިޔައިދިނެވެ.

 

“ޓެސްޓްތައް ހެދިތަ މިފަހުން؟” ހިލްޔާ އެހިއެވެ.

 

“އާނ….މިފަހުން ހަދާފަ ހުރި ޓެސްޓްތައް ރަނގަޅު. ތަންކޮޅެއް ކުރިން ވަރަށް ގަދައަށް ބަނޑަށް ތަދުވެގެން އުޅޭތީ އިންޑިއާއަށް ގޮސް ޓެސްޓްތައް ހެއްދިއިރު އެމީހުން ބުނި ބަނޑު އެތެރެއިން ފާރުވެފަ ހުރި ވާހަކަ. ދެން އެމީހުން ބޭސް ކުރީމަ ފަހުން ހެދި ޓެސްޓްތައް ރަނގަޅުވީމަ އެމީހުން ފޮނުވާލީ.” ޔޫކްގެ މަންމަ ވާހަކަ ދެއްކިއެވެ.

 

އެ ވާހަކަ އަޑު އަހާފައި ހިލްޔާ ދެ ފައިމައްޗަށް ތެދުވުނެވެ. އެއަށްފަހު އޭނަގެ އަތްދަބަސް ތެރެއިން އޯސިސް އިން އޭނައަށް ދީފައި އޮންނަ ކޮންޓެކްޓް ކާޑެއް ޔޫކް ގެ މަންމަ އަތަށް ލައިދިނެވެ.

 

“ޔޫކްގެ ޙާލަތާއިމެދު އެއްވެސް ސުވާލެއް އޮތިއްޔާ އަޅުގަނޑާއި ކޮއްލައްޗޭ. ފަރުވާއެއް ހޯދަން ބޭނުން ވިޔަސް އަޅުގަނޑުގެ ކައިރިއަށް އައިސް ދިނުން އެދެން. ހިލޭ ފަރުވާ ފޯރު ކޮށްދޭނަން ޔޫކްއަށް.” ހިލްޔާ ބުންޏެވެ. ޔޫކް ގެ މަންމަ އުފަލާއެކީ އެ ކާޑު ހޯދަމުން ޝުކުރު އަދާ ކުރިއެވެ.

 

ހިލްޔާ ދެން ދިޔައީ 8 އަހަރުގެ އައިރާގެ ގެއަށެވެ. އައިރާގެ މަންމަ ވެސް ކިޔައިދިނީ ޔޫކް ގެ މަންމަ ކިޔައިދިން ކަހަލަ ވާހަކައެކެވެ. އެހެނަސް އައިރާގެ ބަނޑުގައިވާ ފާރު އެހާ ބޮޑު ފަރުވާއެއް ނެތި ރަނގަޅުވީ ވާހަކަ އެ މަންމަ ބުންޏެވެ.

 

ހިލްޔާ އައިރާއަށް ވެސް ހަދިޔާ ދިނުމަށްފަހު އައިރާގެ މަންމައަށް ކާޑު ދިނެވެ. އެ ގެއިން ނިކުމެގެން ގޮސް ކާރަށް އަރައި އަނެއްކާވެސް ހުޅުމާލެއަށް ދާން ދަތުރު ފެށިއިރު ހިލްޔާ އޮޅުން އަރާފައިވިއެވެ. ބަނޑުގައި ފާރު ހެދުމާއި އާފަލާއި ދެމެދު ގުޅުމެއް ވާކަމަށް ހިލްޔާއަށް ޤަބޫލު ކުރެވެން ފެށިއެވެ. އެކަމާއިމެދު ވިސްނެމުން ދިޔަހެން އޭނަ ޔޫކޭގައި ހުއްޓާ ކިޔުނު ދިރާސީ ކަރުދާހެއް ވެސް ހަނދާންވިއެވެ. ޖަޕާން ގެ ސަރަޙައްދެއްގައި ހެއްދޭ މޭބިސްކަދުރުގެ ސަބަބުން މީހުންގެ ބަނޑުގައި ފާރު ހެދޭ ކަމަށް ބެލެވޭ ޑޮކްޓަރީ ދިރާސާއެވެ.

 

ރާއްޖެއަށް ގެނެވުނު އެ އާފަލަކީ ޖަޕާނުގެ އެ ޞަރަޙައްދުން ގެނެވުނު އާފަލަކަށް ވެދާނެތޯ ހިލްޔާގެ ހިތަށްއެރިއެވެ. އެކަން އެގޮތަށް ވެއްޖެނަމަ އަދިވެސް އެފަދަ އާފަލުތައް އެތެރެ ކުރެވެމުން ދާނެ ހެއްޔެވެ؟ އެއީ ފުޅާ ދާއިރާއެއްގައި ރާއްޖޭގައި ވިއްކޭ އާފަލެއް ނަމަ މިހާތަނަށް އައިއިރު އޭނައަށް އެފަދަ އެހެން ބަލި މީހުން ފެނިފައި ނުވަނީ ކީއްވެ ހެއްޔެވެ؟ އެ އާފަލުން ޖެހޭ ބައްޔަކީ އެހާ ބޮޑު ބައްޔަކަށް ނުވެ ހިނގައިދާނެ ހެއްޔެވެ؟ ނަހީކް ނިޔާވީ އެހެން ސަބަބަކާއި ހެދި ކަމަށް ވެދާނެ ހެއްޔެވެ؟ ނަހީކް ގެ މަންމަގެ ޙާލަތު ހުރި ގޮތުން އެ މަންމައަށް ގުޅައި ސުވާލު ކުރާކަށް ވެސް ނުކެރޭނެއެވެ.

 

ކޮންމެ ގޮތެއްވިޔަސް އެންމެ ދެ ކުދިން ގެ ރިޕޯޓްތަކަށް ބަލާފައި ގޮތެއް ނުނިންމޭނެއެވެ. މީގެ މަސްތަކެއް ކުރިން ބާސިމް އެހެން ބުނުމުގެ ކުރިން ވެސް ހިލްޔާއަށް އެކަން މާ ރަނގަޅަށް ވެސް އެނގެއެވެ. ނިންމުމެއް ނިންމުނީހީ އެ އާފަލުގެ ޝިކާރައަކަށް ވެގެން ޑޮކްޓަރަށް ދައްކަން އައި ކުދިން ގިނަވެފައިވި އެ ދުވަސް ކޮޅު ދިރާސާއެއް ހެދުނު ނަމައެވެ. މިފަހުން ކަރަށް ތަދުވެގެން އޭނައަށް ދައްކަން އައި ކުދިންގެ ލޭގެ ޓެސްޓްތަކުން އެހާ ބިރުވެރި ނަތީޖާއެއް ފެނިފައެއް ނުވެއެވެ. އެ މައްސަލައާއިމެދު ހިލްޔާ މުޅިން އެއްކޮށް ހަނދާން ނެތިފައިވީ ވެސް އެހެންވެއެވެ.

 

އެ ކަހަލަ އާފަލެއް މިހާރު ރާއްޖެއަށް އެތެރެ ނުކުރަނީތޯ ހިލްޔާ ގެ ހިތަށްއެރިއެވެ. އެރޭ ހިލްޔާއާއި އެކީ މެލޭޝިޔާގައި ޑޮކްޓަރުކަން ކިޔެވި ކުދިންނާއި، އެކީގައި މަސައްކަތް ކުރި ބައެއް ސީނިއާރ ޑޮކްޓަރުންނާއި މި ވާހަކަ ޙިއްސާ ކުރުމުން، އެމީހުން ވެސް ބުނީ އެފަދަ ބަސްތަކެވެ. އެހެންކަމަށްވާނަމަ އެއީ ދެން ހިލްޔާ ކަންބޮޑުވާން ޖެހޭ ކަމެއް ނޫންކަމަށް އޭގެ ތެރެއިން ބައެއް ޑޮކްޓަރުން ވެސް ބުންޏެވެ.

 

އެ ފޯނު ކޯލުތައް ނިމުމުން ހިލްޔާއަށް ފުން ނޭވައެއް ދޫކޮށްލަމުން ކިޔަވާ މޭޒުމައްޗަށް ފޯނު ދޫކޮށްލެވުނެވެ. ނިންމުނު ބައެއް ނިންމުންތަކުން ހިތަށް ހަމަޖެހުމެއް ލިބުނަސް ދެންވެސް ނޭނގޭ ނުތަނަވަސްކަމެއް ހިތުގައިވިއެވެ. އެ މައްސަލައާއި މެދު މުޅި ދުވަހު ވިސްނުމުގެ ސަބަބުން ކަންނޭނގެއެވެ.

 

ހިލްޔާ އެހެން އިންދާ ފޯނު ރިންގުވާން ފެށުމުން ހިލްޔާ ފޯނު ނަގައި ބެލިއެވެ. ގުޅަނީ ބައްޕަކަން އެނގުމުން ހިލްޔާ ކޯލު ރިސީވް ކުރިއެވެ.

 

“ހިލްޔާ މިރޭ ކާން ވެސް ނާންނަ ރެއަކީތަ؟ ތިރިއަށް އާދެބަލަ ވަރަށް ޚާއްސަ މެހުމާނެއް ވެސް އައިސް އެބަ އިނޭ މިރޭ.” ބައްޕަ ބުންޏެވެ. ބައްޕަ ބުނެލި ރާގުން ވެސް އެއީ ދާނިޝް ކަން އެނގި، ހިލްޔާގެ ތުންފަތްމައްޗަށް ލުއި ހިނިތުންވުމެއް ވެރިވިއެވެ.

 

“އެބަ އަންނަން…” ހިލްޔާ އެ ހިނިތުންވުމުގައި އިނދެ ބުނެލިއެވެ. އެއަށްފަހު ފޯނު ބޭއްވުމަށްފަހު އޭނަގެ ކުރުތާގެ މަތިން އަބާޔާއެއް ލާން އަވަސްވެގަތެވެ.

 

ކަޅުކުލައިގެ އާބާޔާއަކާއިއެކީ ކަޅުކުލައިގެ ޝޯލްއެއް އަޅައިގެން ހިލްޔާ ތިރިއަށް ދިޔައިރު ކާގެއިން ބައްޕަގެ އަޑާއެކީ ގޭގެ އެހެން މީހުންގެ އަޑު ވެސް އެއްވެގެން އިވެމުން ދިޔައެވެ. ރޭގަނޑުގެ ކެއުން ތައްޔާރު ކުރުމަށް މިރޭ ދޮންތައަށް އެހީވާން ތިރިއަށް ނާދެވުނީތީ ހިތް ދެރަވިއެވެ. އެ އިޙްސާސުގައި ހުރެ ގޮސް ކާގޭ ދޮރު މައްޗަށް އެރިއިރު ބައްޕައާއި ދާނިޝް މޭޒުދޮށުގައި ތިބި މަންޒަރު ފެނުނެވެ. މޭޒުގެ އެންމެ ކޮޅުގައި ހުރި ބައްޕަ ކައިރީގައި ދާނިޝް އިނެވެ. ދޮންތައާއި އެލީ މޭޒުމައްޗަށް ތަށިތައް އަރުވަމުން ދިޔައެވެ. އެހެން އަރުވަމުން ދިޔުމުގެ ތެރެއިން ދޮންތަ އައިސް ބައްޕަގެ ކުރިމަތީގައި ބިއްލޫރި ޖޫސް ޖަގެއް ބެހެއްޓިއެވެ. ޖޫހުގެ ކުލަ ހުރި ގޮތުން އެއީ އާފަލު ޖޫސް ހެން ހީވިއެވެ. އެކަން އެނގުންވުމުން ވެސް ހިލްޔާގެ މެއަށް ގޮތެއްވިއެވެ. ބައްޕަ އެ ޖަގު ނަގައި ދާނިޝްގެ ތަށްޓަށް އަޅައި ދޭން އުޅުނު ވަގުތު ހިލްޔާއަށް ވާހަކަ ދެކެވުނެވެ.

 

“ބައްޕާ ވެއިޓް!” ހިލްޔާއަށް ބޭއިޚްތިޔާރުގައި ތަންކޮޅެއް ހަރު އަޑުން ގޮވާލެވުނެވެ. އެހިނދު ޖަގު ހިފަހައްޓައިގެން ހުރި ބައްޕަގެ ޙަރަކާތް މަޑުވިއިރު، ބަދިގޭގައި ތިބި އެންމެންގެ ނަޒަރު އޭނައަށް އަމާޒުވިއެވެ.

 

“ކިހިނެއްވީ ދަރިފުޅު؟” ބައްޕަ އަތުގައި ހުރި ޖަގު މޭޒުމަތީގައި ބަހައްޓަމުން އެހިއެވެ.

 

“ދާނިޝް….އަށް ކަމުދަނީ އޮރެންޖް ޖޫސް ދޯ؟” ހިލްޔާއަށް މާ ބޮޑު ވިސްނުމެއް ނެތި ބުނެވުނެވެ. އެ އާފަލު ޖޫހުގައި ގެއްލުމެއް ހުރި ކަން ހީވި ހީވުމާއިއެކު ދާނިޝް އެ ޖޫހާއި ދުރު ކުރަން ބޭނުންވީއެވެ. ގޭގައި ހުރި އާފަލުގައި މައްސަލައެއް ހުރުމަކީ ދުރު ކަމެއް ކަން ހަނދާންވީ އެހެން ބުނެވުނު ފަހުންނެވެ.

 

ހިލްޔާ ބުނެލި އެ ވާހަކައިން ބައްޕައާއި ދޮންތަ ގެ މޫނުމައްޗަށް ލާނެތް ހިނިތުންވުންތަކެއް ވެރިވިކަން ހިލްޔާއަށް އެނގުނެވެ. ދާނިޝް ހުރީ ނުހަނު ވިސްނުންތެރިކަމާއެކީ އޭނައަށް ބަލަހައްޓައިގެންނެވެ.

 

“އޮފްކޯސް…ދާނިޝްއަށް މީރު އެއްޗެއް އެނގޭނީ ހިލްޔާއަށް.” ބައްޕަ ބުންޏެވެ.

 

“އަހަރެން ހަދާނަން އޮރެންޖް ޖޫސް. އެހެން ކުއްޖަކު އޮރެންޖް ޖޫސް ބޭނުންވަންޏާ ބުނެލައްޗޭ.” ހިލްޔާ އެ ވާހަކަ ބުނަމުން ކާގެއަށް ވަދެގެން އަންނަން ފެށިއެވެ. އެހިނދު އެލީ ‘މީ’ އޭ ކިޔައި ގޮވިއެވެ.

 

ހިލްޔާ ވަދެގެން އައިއިރު އެ މޫނުމައްޗަށް ވެރިވެފައިވި ކަންބޮޑުވުން ދާނިޝްއަށް ސިއްރެއް ނުވިއެވެ. ހިލްޔާ ވަދެގެން އައިސް އޭނައަށް ފަސްދީފައި ބަދިގޭގެ ކެބިނެޓާއި ދިމާލަށް ދާން ފެށުމުން ދާނިޝްއަށް ފަސްއެނބުރި ވެސް ބެލުނެވެ. ހިލްޔާ ފިކުރު ބޮޑުވެފައިވާ ސަބަބެއް އެނގެން ބޭނުންވުމުންނެވެ. އޭނަ އެހެން އިންދާ ނަހީދުބެ، ބޭބެއަށް ވެސް ބަލާބަލާށޭ ބުނެ ސަމާސާ ކުރިއެވެ. އެއާއިއެކު ދާނިޝް އެ ދިމާލަށް އެނބުރިލަމުން ގަދަކަމުން ހީލިއެވެ. ހިލްޔާ ބުނި ބަސްތައް އެންމެންނަށް ސަމާސާއަކަށް ވިޔަސް ދާނިޝްއަށް ސަމާސާއަކަށް ނުވިއެވެ. ވިސްނުމަކަށް ގެއްލުނު ފަދައިން ދާނިޝްއަށް ވެސް އެ އާފަލު ޖޫސް ޖަގަށް ބަލަހައްޓައިގެން އިނދެވުނެވެ.

 

ދާނިޝް އެރޭގެ ކެއުމަށްފަހު ގޭގެ މައިދޮރުން ނިކުންނަން ދިޔަ ވަގުތަކީ ހިލްޔާ ވެސް ސިޓީންގް ރޫމުން ލާފައި އޭނަގެ ކޮޓަރިއަށް ދިޔުމަށް ސިޑިއަށް އަރަން ދިޔަ ވަގުތެވެ. ނަހީދުބެއަށް ކެއުމުގެ ތެރެއިން މުހިއްމު ކޯލެއް އައީތީ ނަހީދުބެ އޭނައަށް އަލްވަދާޢު ކިޔަން ނާދެއެވެ. ދާނިޝް އަވަހަށް ދަނީ އޭނަ ބޭސް ކާ ގަޑިޖެހިފައިވުމާއިއެކު ބޭސް ހުރީ ގޭގައި ކަމަށްވާތީވެއެވެ.

 

ފަހަތުން ހިލްޔާގެ ފިޔަވަޅުތަކުގެ އަޑު އިވިފައި ދާނިޝް މައިދޮރާއި ހަމައަށް ގޮސްފައި ވެސް ފަސްއެނބުރި ބަލާލިއެވެ.

 

“ހިލްޔާ!” ސިޑިން އަރަން އުޅުނު ހިލްޔާއަށް ދާނިޝްގެ އަޑު އިވިފައި ފިޔަވަޅުތައް މަޑު ޖައްސާލެވުނެވެ. އަދި އެ ދިމާލަށް ބަލާލެވުނެވެ.

 

“ޔެސް؟” ހިލްޔާއަށް އަހާލެވުނެވެ.

 

“ހިލްޔާ ކަމަކާ ކަންބޮޑުވެގެންތަ؟” ދާނިޝް ސީދާސީދަލަށް އެހިއެވެ.

 

“ނޫން…” ހިލްޔާއަށް ބުނެވުނެވެ. އޭނައަށް ޔަޤީން ނުވާ ހީވާ ހީވުމެއްގެ ވާހަކައިން ދާނިޝް ފިކުރު ކުރުވަން ބޭނުމެއް ނުވިއެވެ.

 

“ޔޫ ޝުއާރ؟” ދާނިޝްއަށް އަހާލެވުނެވެ. އެވަގުތު ވެސް ހިލްޔާގެ މޫނުމަތިން ކަންބޮޑުވުން ފެނުނީތީވެއެވެ.

 

“ޔާ އިޓްސް…ނަތިންގް ޓު ވޮރީ އަސްލު. މިއަދު ކަމަކާ ސްޓްރެސްވީ. ބަޓް އިޓް ވިލް ބީ އޯކޭ. އިން ޝާ ﷲ.” ހިލްޔާ ބުންޏެވެ.

 

ހިލްޔާ އެ ވާހަކަ ނިންމިއިރު ހިނިތުންވިއެއްކަމަކު ދެންވެސް ފިކުރު ބޮޑުވެފައިވި ކަން ދާނިޝްއަށް އެނގުނެވެ. އިތުރަށް ސުވާލު ކުރަން ދާނިޝް ބޭނުންވިއެއްކަމަކު ޚިޔާލު ބަދަލު ކޮށްލެވުނީ، ހިލްޔާއާއި އޭނަ އަދި އެހާ ގާތް ނޫންކަން ދަނެގެންނެވެ. އެހެންކަމުން ބޯޖަހާލަމުން ހިނިތުންވުމަކާއެކީ ‘އޯކޭ’ އޭ ބުނެ ދާން ހިނގައިގަތެވެ.

 

ދާނިޝް މައިދޮރުން ނިކުތުމުން ވެސް ހިލްޔާއަށް އެދިމާލަށް ބަލަހައްޓައިގެން ހުރެވުނެވެ. އެހިނދު ތުންފަތްމައްޗަށް ލުއި ހިނިތުންވުމެއް ވެރިވިއެވެ. ބައްޕައަށް ވެސް އޭނަގެ ކިބައިން ފާހަގަ ނުވި ކަމެއް ދާނިޝްއަށް ފާހަގަވުމުންނެވެ. މިއީ އޭނައާއި ދާނިޝް ގުޅޭ ކަމުގެ އިތުރު ނިޝާނެއްތާއޭ ހިތަށްއެރިއެވެ.

 

އާފަލުން ޖެހޭ ބައްޔާއިމެދު އިތުރަށް ނުވިސްނަން ހިލްޔާ އެރޭ ނިންމިއެވެ. އެ ދުވަހު ކުރެވުނު ނަމާދުތަކުގެ ތެރެއިން ވެސް މުޅިން އެކަމާއިމެދު ވިސްނިފައިވާތީ ހިލްޔާ ހިތްހަމަނުޖެހިފައިވިއެވެ. އަދި އަމުދުން މި މައްސަލައަކީ އޭނަ ކިތަންމެ ވަރަކަށް ވިސްނިޔަސް މިވަގުތަށް ޙައްލެއް ނުފެންނާނެ މައްސަލައެކެވެ. އެހެންކަމުން ޔޫކް ނޫނީ އައިރާ ގެ މަންމަ އޭނައަށް ގުޅުމުން، އެހެންނޫނީ އޭނަ ބަލާ ބަލި މީހުންގެ ތެރެއިން މިފަދަ ކަމެއް ފެނިގެން ނޫނީ މި މައްސަލައާއިމެދު އިތުރަށް ނުވިސްނަން ހިލްޔާ ނިންމިއެވެ. އެކަމާއިމެދު އިތުރަށް ނުވިސްނުމަށް އޭނައަށް އެހީވެދެއްވުމަށް އެދި އެރޭ ދަމުނަމާދުގެ ތެރެއިން ﷲ ގެ ޙަޟްރަތުގައި ހިލްޔާއަށް ދެންނެވުނެވެ.

 

އެ ދުޢާގެ ސަބަބުން ކަންނޭނގެއެވެ. އޭގެ އަނެއްދުވަހު ފަތިސް ނަމާދުކޮށް ނިމި، ޤުރުއާން ކިޔަވައި ޟުޙާ ނަމާދު ކޮށް ނިމުނުއިރު ހިލްޔާގެ ހިތަށް ލުޔެއް ލިބިފައިވިއެވެ. އެ ބައްޔާއިމެދު އޭނަ އިތުރަށް ކުރަންޖެހޭ ކަމެއް އޮތްނަމަ ﷲ އޭނައަށް ޢިޝާރާތެއް ދައްކަވާނެ ކަމަށް ހިތުގެ އަޑިން ޤަބޫލު ކުރެވިފައިވިއެވެ. އަދި އަމުދުން އެ ޚިޔާލުތަކާއި ދުރުވެވުނީ، އެދުވަހު ހެނދުނު ވައިބާރ ހުޅުވިއިރު ‘ދާނިޝް ސާރ ފެއާރވެލް’ ގްރޫޕުން ފެނުނު މެސެޖުތަކުންނެވެ. އެ ފެއާރވެލް ޕާޓީ ބާއްވަން އޮފީހުން އިސްނެގި ރަފީ އުޅެނީ ބަލިވެއެވެ. އެހެންކަމުން އެ ޕާޓީގެ ކަންތައް ދެން އިންތިޒާމް ކުރާނީ ކާކުކަމާއިމެދު ގްރޫޕުގައި މަޝްވަރާ ކުރެވެމުން ދިޔައެވެ.

 

“އައި ކޭން، އިން ޝާ ﷲ.”

 

ހިލްޔާ އެ މެސެޖު ލިޔެފައި ފޮނުވާލީ ކީކޭ ހިތަށް އަރައިގެން ކަމެއް ޚުދު ހިލްޔާއަށް ވެސް ނޭނގެއެވެ. އެއީ ދާނިޝް ގެ ޕާޓީއަށް ވުމުންތޯ ހިތަށްއެރިއެވެ. އޭގެ އިތުރުން އޭނަ ބޭނުންވީ އެ މުވައްޒަފުންނަށް ލުޔެއް ދޭން ކަން ވެސް އެވަގުތު ހިލްޔާއަށް އެނގުންވިއެވެ. އެހެން މީހުންނަށް ކަމެއް ފަސޭހަ ކޮށްދިނުމަކީ ﷲ ލޯބިވެވޮޑިގެންވާ ސިފައެކެވެ.

 

ހިލްޔާ އެ މެސެޖު ފޮނުވުމާއިއެކު އެންމެން އެ މެސެޖު ލައިކް ކުރަން ފެށިއެވެ. އަދި ހިލްޔާ އިސްނެގީތީ އުފާ ކުރަން ފެށިއެވެ. ހިލްޔާ އެ މެސެޖުތައް ކިޔާފައި ހިނިތުންވެލަމުން ޙަމްދު ކުރިއެވެ.

 

އެ ޕާޓީއަށް އިސްނެގުމާއިއެކު ހުކުރު ދުވަހު ދޮންތަގެ ކައިވެނި ޕާޓީ ވެސް އޮތީތީ ކުރިއަށް އައި ދުވަސްތައް ހިލްޔާއަށް ފުދޭވަރަކަށް ބުރަވެގެން ދިޔައެވެ. އެހެންކަމުން ހުރިހާ ނުތަނަވަސް ޚިޔާލުތަކުން ހިލްޔާއަށް އަނެއްކާވެސް ދުރުވެވޭ ގޮތްވިއެވެ. ދާނިޝް ގެ ޕާޓީގެ ކުރިން އޮތީ ދޮންތަގެ ޕާޓީ ކަމަށްވުމުން ހިލްޔާ ފުރަތަމަ ސަމާލުކަން ދިނީ އެކަމަށެވެ. މިގޮތުން ދޮންތަގެ ކައިވެނި ހެދުން ރަނގަޅުތޯ ބަލައި ޕާޓީގެ ތީމް ހަމަޖައްސައި ހެދިއެވެ. ދޮންތައަށް އެއްވެސް ކަމެއް ނުޖައްސައި ވޭތޯ ބެލީ ދޮންތަ މާޒިން ވެސް ބަލަމުން ދާތީވެއެވެ. ކައިވެނީގެ ތައްޔާރީތަކަށްޓަކައި މަމްނޫން ވެސް އިސްނަގާކަން ދޮންތަގެ ފަރާތުން އެނގުމުން ހިލްޔާއަށް ދޮންތައަށްޓަކައި އުފާކުރެވުނެވެ. މިގޮތުން ޕާޓީގެ ދަޢުވަތު ތައްޔާރު ކޮށް، ދަޢުވަތު ފޮނުވައި ޕާޓީ ބާއްވާ ތަނާއި ކެއުން ހަމަޖެއްސީ މަމްނޫންއެވެ.

 

ހަމްރާއާއި މަމްނޫން ގެ ކައިވެނި ކުރެވިގެން ދިޔައީ ހުކުރު ދުވަހުގެ ހަވީރު، ހެންވޭރުގައި ހުރި ރެސްޓޯރެންޓެއްގެ ޓެރެސްގައެވެ. ކައިވެނި ކުރެވުނު ވަގުތު ތިބީ ދެ ފަރާތުގެ ޢާއިލާ މީހުން އެކަންޏެވެ. ދާނިޝް އަކީ ޢާއިލާ މީހަކަށް ނުވާއިރު ބައްޕަ ދާނިޝްއަށް އެ ގަޑީގައި އައުމަށް ދަޢުވަތު ދީފައިވީ ކީއްވެކަމެއް ހިލްޔާއަށް އެއްގޮތަކަށް ވެސް ނުވިސްނުނެވެ. އެދުވަހު ދޮންތަގެ ކައިވެންޏަށް ވީތީ ހިލްޔާއަށް ލައިގެން ހުރެވުނީ ވެސް ތަންކޮޅެއް ލޮލުގައި އަޅާ ކަހަލަ ރަތްކުލައިގެ އަބާޔާއަކާއި ޝޯލްއެކެވެ. ދާނިޝް ވަރަށް ގިނައިން އޭނައަށް ބަލާނެކަމަށް ހިލްޔާއަށް ހީކުރެވުނެވެ. އެހެނަސް އޭނައަށް ދާނިޝްއާއި ދިމާލަށް ބަލާލެވުނު އެއްވެސް ފަހަރަކު ދާނިޝް އޭނައަށް ބަލަހައްޓައިގެނެއް ނެތެވެ. ދާނިޝް އޭނައަށް ބަލަން ހިތް ނޭދުނެއްކަމަކު ނުބަލާތީ ވެސް ހިލްޔާގެ ހިތުގައި ޝަކުވާ ވެސް އުފެދުނެވެ. އޭނައަށް ބައެއްފަހަރު ހީކުރެވޭހެން ދާނިޝް އޭނައަށް ޝައުޤުވެރި ނުވަނީތޯ ހިތަށްއެރިއެވެ.

 

ހިލްޔާއަށް ހީވީ ރަނގަޅަކަށް ނޫނެވެ. ދާނިޝް އެދުވަހު ހަވީރު އެ ޓެރެސްއަށް ގޮސް ވަން ވަގުތު ވެސް އެންމެ ފުރަތަމަ ލޮލުގައި އެޅީ ހިލްޔާއެވެ. ހިލްޔާގެ ލައިގެން ހުރި ހެދުމުން އެ ރީތިކަން ދެގުނަ ވެފައިވުމުން ދާނިޝްއަށް އެހެން ދިމާލަކަށް ބަލަން ވެސް ދަތިވެފައިވިއެވެ. ހިލްޔާ މިހާތަނަށް އައިއިރު އޭނައާއި އިންނަން އެއްބަސްވެފައި ނުވާތީ ހިތުގައި ޝަކުވާ ވެސް އުފެދުނެވެ. އެހެނަސް މި ޙާލަތުގައި އެންމެ ރީތިވާނީ ކެތްތެރިކަން ކަން ދަނެގެން ދާނިޝް ބެލުން ތިރި ކުރިއެވެ. ކޮންމެ ސިކުންތެއްގައި ހެން ހިލްޔާއަށް ބަލަން ހިތް އެދެމުން ދިޔައެއްކަމަކު ދާނިޝް ކެތްކުރިއެވެ. ﷲ ގެ ރުހިވޮޑިގަތުމުގެ މައްޗަށް ބިނާވާ ގުޅުމަކުން ނޫނީ އޭނައަށް އުފަލެއް ނުލިބޭނެކަމަށް އޭނަ ތަކުރާރުކޮށް އަޑުއަހާފައިވާތީވެއެވެ. އެއީ ތެދެއްކަން އަމިއްލަ ތަޖުރިބާއިން ނޭނގުނަސް އޭނަގެ އީމާންތެރިކަމުގެ ސަބަބުން ޔަޤީން ކުރެވޭތީވެއެވެ.

 

އެހެނަސް ނުހަނު ކަނުލާ އަޑުއަހައިގެން ހުރި ކައިވެނީގެ ޚުތުބާ ނިމި، މަމްނޫން އަނބި ޤަބޫލު ކުރި ވަގުތު ދާނިޝްއަށް ތަންކޮޅެއް ދުރު ހިސާބެއްގައި ހުރި ހިލްޔާއަށް ބަލާލެވުނީ، ހަމަ އެއްވެސް އިޚްތިޔާރަކާއި ނުލައެވެ. އެހިނދު ހިލްޔާ ވެސް އޭނައަށް ބަލަހައްޓައިގެން ހުރިތަން ފެނިފައި ދާނިޝްއަށް ލިބުނީ ހިސާބެއްގެ ޝޮކެކެވެ. އޭނައާއި ހަތަރުކަޅި ހަމަވުމާއިއެކު ދެލޯ ބޮޑުވި ހިލްޔާގެ ކޯތާފަތް ރަތްވިއެވެ. އިސާހިތަކު ހިލްޔާ ދުރު ހޯދައި ފައިތަޅުވަން ފެށި ގޮތުން ދާނިޝްއަށް ބޭއިޚްތިޔާރުގައި ހީލަމުން އިސްޖަހާލެވުނެވެ.

 

އެދުވަހަށްފަހު ހިލްޔާއާއި ދާނިޝްއަށް އެކަކު އަނެކަކު ފެނުނީ ހަމައެކަނި ކްލިނިކް ތެރެއިން ދޭތެރެއަކުންނެވެ. އެހެނަސް އަނެއްކާވެސް ދާނިޝްއަށް ނަހީދުބެ ގެ ފަރާތުން ‘މެސެޖުތަކެއް’ ގެ ސިފައިގައި ހިލްޔާގެ ސުވާލުތައް އަންނަން ފެށިއެވެ.

 

“ކްލިނިކް ގެ ސްޓާފަކު…އޯ ވެއިޓް މިފަހަރު ނުބުނޭ ނުބުނާށޭ. ހިލްޔާ އެހީ ދާނިޝްއަށް އެންމެ ރީތި ކުލައަކީ ކޮން ކުލައެއްހޭ.”

 

“ދާނިޝްއަށް މިހާތަނަށް އައިއިރު މާލެއިން އެންމެ ކަމުދިޔައީ ކޮން ރެސްޓޯރެންޓެއް ހޭ.”

 

“ދާނިޝްއަށް ކަމުދަނީ ކެޝުއަލް ނޫނީ ފައިން ޑައިނިންގް އެމްބިއާންސްއެއް ހޭ. މީގެ މާނަ އެއްގޮތަކަށް ވެސް ބޭބެއަށް ނޭނގޭ.”

 

“ދާނިޝްއަށް މާ ކަމުދޭ ހެއްޔޭ. ކޮންކަހަލަ މަލެއްހޭ އެންމެ ކަމުދަނީ.”

 

ދާނިޝް އޭގެއިން ކޮންމެ ސުވާލަކަށް ޖަވާބު ދިނީ ހެވިފައި ހުރެއެވެ. މިއީ ހިލްޔާ ކޮންކަމަކަށްޓަކައި އެއްކުރާ މަޢުލޫމާތުތަކެއްތޯ ނަހީދުބެ ކުރެން އަހާލެވުނެވެ. ތީގެ ޖަވާބު ދެވޭކަށް ނެތްކަމަށް ނަހީދުބެ ބުނުމުން ދާނިޝްގެ ދެބުމަ ކައިރިވިއެވެ. ހިލްޔާ އޭނައަށްޓަކައި މި ރާވަނީ ކޮން ކަމެއްތޯ ހިތަށްއެރިއެވެ.

 

15 ފެބްރުއަރީ ވީ ދުވަހުގެ ހަވީރު ހިލްޔާ މާ ފިހާރައަކަށް ދިޔައީ، ދާނިޝްއަށް ހުރިހާ މުވައްޒަފުންގެ ފަރާތުން ދޭ ހަދިޔާ ގެ އިތުރުން، ދާނިޝްއަށް ދޭނެ މާ ބޮނޑިއެއް ތައްޔާރު ކުރުމަށެވެ. މިހާތަނަށް އައިއިރު ދާނިޝްގެ ޕާޓީއަށްޓަކައި ބައްޕަ ދީފައިވާ ފައިސާގެ އިތުރުން މުވައްޒަފުން ގެ ފަރާތުން އެއްކުރި ހުރިހާ ލާރި ވެސް ހަދިޔާތަކާއި ޕާޓީގެ ތައްޔާރީތަކަށް ބޭނުން ކުރެވިފައިވެއެވެ. މި މާ ބޮނޑިއަކީ އެންމެންނާއި މަޝްވަރާ ކުރިއިރު އެއްކުރި ޚިޔާލަކަށް ނުވާތީވެއެވެ. މިއީ ހިލްޔާއަށް މާ ފަހުން ލިބުނު ޚިޔާލެކެވެ. ހިލްޔާ ބޭނުންވިނަމަ އެކަމަށްޓަކައި ބަޖެޓް ނެތީތީ އެ ޚިޔާލު ދޫކޮށްލެވުނީހެވެ. އެހެނަސް އެހެން ހަދާކަށް ހިލްޔާގެ ހިތް ނޭދުނެވެ. ކޮންމެހެން ވެސް އޭނަގެ ފަރާތުން ދާނިޝްއަށް މާ ބޮނޑިއެއް ދޭން ބޭނުންވިއެވެ. އެކަން ކޮންމެހެން ދާނިޝްއަށް ނޭނގުނަސްމެއެވެ.

 

މާ ބޮނޑި ތައްޔާރު ކުރުވުމަށް ހިލްޔާ ކޮންމެ މަލެއް ޚިޔާރު ކުރީ ނުހަނު ލޯބިންނެވެ. ދާނިޝްއަށްޓަކައި މާތައް ޚިޔާރު ކުރެވެމުން ދިޔައީތީ ހިލްޔާއަށް ނޭނގޭ އުފަލެއް ލިބުނެވެ. ފިރިހެނަކަށް މަލެއް ދޭން އޭނަ ދުވަހެއްގެ ކޮޅުން ވެސް ބޭނުން ވެދާނެ ކަމަށް ހިލްޔާ ހިއެއް ނުކުރެއެވެ. އެހެނަސް މި ދުވަސް ވެސް މި އޮތީ ތަޖުރިބާ ކުރެވިފައެވެ.

 

އެދުވަހު ހަވީރު ނަހީދުބެ ދާނިޝްއަށް ގުޅައި އެރޭ 8 ޖަހާއިރު ނަހީދުބެއާއި އެކީ ރެސްޓޯރެންޓަކަށް އައުމަށް ދަޢުވަތު އެރުވިއެވެ.

 

“ވަރަށް ސްމާޓްކޮށް ޑްރެސް ކޮށްގެން އަންނައްޗޭ. މަޑު ނޫކުލައިގެ ގަމީހަކާއި ކަޅުކުލައިގެ ފަޓުލޫނެއް އޮންނާނެ ދޯ؟” ނަހީދުބެ އެ ސުވާލު ކުރުމުން ދާނިޝް ޙައިރާންވިއެވެ.

 

“އަ…އާނ އޮންނާނެ. މިއީ ކޮންކަމެއްތަ ބޭބޭ؟” ދާނިޝްއަށް އަހާލެވުނެވެ. މަޑު ނޫ ކުލައަކީ މީގެ ދުވަސްކޮޅެއް ކުރިން އޭނައަށް ރީތިކަމަށް ބުނެ ނަހީދުބެ ގާތު ބުނި ކުލަ ކަމަށްވާތީވެއެވެ. އަދި ނަހީދުބެ އޭނަ ގެންނަން އެ އުޅެނީ ވެސް އޭނައަށް މާލެއިން އެންމެ ކަމުދާ ރެސްޓޯރެންޓަށް ކަމަށްވާތީވެއެވެ.

 

“ދެން އައިމަ އެނގޭނެއެއްނު.” ނަހީދުބެ ބުންޏެވެ. ހަމަހިލާ ދާނިޝްއަށް ކިޔައެއް ނުދިނެވެ.

 

އެހެންކަމުން ދާނިޝް އެރޭ ޢިޝާ ނަމާދަށްފަހު ތައްޔާރު ވެލައިގެން ނަހީދުބެ އާއިއެކީ ދަތުރު ފެށިއެވެ. ކާރަށް އަރައި ހިލްޔާ ކޮބައިތޯ އަހާލެވުނީ ހަމަ އެއްވެސް އިޚްތިޔާރަކާއި ނުލައެވެ. ނަހީދުބެ އޭނައަށް މި ދަޢުވަތު ދޭ ކަމެއްގައި ހިލްޔާގެ އަތެއް ވާކަން ޔަޤީނާއި ގާތް ކުރެވުނެވެ.

 

“ބުނިންތަ ހިލްޔާ އަންނާނެއޭ؟” ނަހީދުބެ ނޫން ކަމަށް ހަދާފައި ކަހަލަ ގޮތަކަށް އެހެން ބުނީ ސަމާސާއަކަށް ކަން ދާނިޝްއަށް ޔަޤީނާއި ގާތް ކުރެވުނެވެ.

 

“ނޫން. ހެހެ…” ސަމާސާއެއްކަން އެނގުނަސް ދާނިޝްއަށް އެހެން ބުނެވުނީ ވަރު ދޫވެފައިވާ ޙާލުގައެވެ. ހިލްޔާއާއި ބައްދަލުކޮށް، ވާހަކަ ދައްކާލަން ދާނިޝް ބޭނުންވެފައިވިއެވެ. ފާއިތުވި ހަފްތާއަކީ އޭނަގެ ފަހު ހަފްތާއަށް ވެފައި އޭނަ ހިލްޔާއާއި އެއްގޮތަކަށް ވެސް ވާހަކަ ނުދެއްކެއޭ ބުންޏަސް ދޮގަކަށް ނުވާނެއެވެ. ދެމީހުންގެ ގުޅުން އޮތް ގޮތަށް އޮތްވާ ފުރާ ދުވަސް ގާތްވަމުން ދާތީ ދާނިޝްގެ ހިތް ދެރަވެފައިވިއެވެ.

 

ދާނިޝް ދެރަވެފައި ހުރި މިންވަރު ނަހީދުބެއަށް ފާހަގަވުމުން ކަންނޭނގެއެވެ. ހިމޭންކަމުގެ ވަގުތުކޮޅަކަށްފަހު ނަހީދުބެ ވާހަކަ ދެއްކިއެވެ.

 

“މިއީ ކޮން ކަމެއް ކަމެއް ބޭބެ ނުބުނާނަން. އެކަމަކު މި ދާން އުޅޭ ތަނުގަ އޮންނާނެ ވަރަށް ޚާއްސަ ކުއްޖަކު ދާނިޝްއަށް ދޭން ގެނައި މާ ބޮނޑިއެއް. އެ ކުއްޖާ އަމިއްލައަށް އިސްނަގައިގެން އަމިއްލައަށް ގޮސް މާތައް ޚިޔާރު ކޮށްގެން ހެއްދި މާ ބޮނޑިއެއް.” ނަހީދުބެ އެހެން ބުނުމުން ދާނިޝްއަށް ބޭބެއާއި ދިމާލަށް ބަލާލެވުނެވެ.

 

“އަސްލުވެސްތަ؟ ހިލްޔާ…” ދާނިޝްއަށް ޖުމްލަ ފުރިހަމަ ވެސް ނުކުރެވުނެވެ. ހިތު ތެރޭގައި އުތުރި އެރި ޖަޒުބާތުތަކުގެ ސަބަބުންނެވެ. އޭނައަށް ޖުމްލަ ފުރިހަމަ ނުކުރެވުނަސް ނަހީދުބެ ބޯޖަހާލި ހިނދު ދާނިޝް ގެ އަނގައިން ނިކުތް ލުއި އާހުގެ އަޑާއިއެކީ ހިނިތުންވެލެވުނެވެ.

 

ނަހީދުބެ ދާނިޝް ގޮވައިގެން ދިޔައީ ސަމާރ ކްލައުޑް ރެސްޓޯރެންޓުގެ މަތީ ބަޔަށެވެ. އެ ބަޔަށް ގޮސް ވަން އިރު މުޅިން އަނދިރިކޮށް އޮތުމުން ދާނިޝް ޙައިރާންވިއެވެ. ނަހީދުބެއާއިއެކީ އެތަނަށް ވަންނަމުން އެ ސުވާލު ކުރަން އުޅުނުތަނާހެން ކުއްލިއަކަށް ބޮކިތައް ދިއްލިގެން ދިޔައެވެ. އަދި އެއްވެގެން ދިޔަ އަޑުތައް ‘ސަޕްރައިޒް’ އޭ ކިޔާލި އަޑު އިވުނެވެ.

 

ދާނިޝްއަށް ރަނގަޅަށް ބަލާލެވުނުއިރު އޭނަގެ ކުރިމަތީގައި ރޮނގަކަށް ހުއްޓި ތިބީ އޯސިސް ކްލިނިކްގެ ސްޓާފުންނެވެ. ހަމަ އެހިނދު އެއްފަރާތެއްގައި ހުރި ކަޅުކުލައިގެ ބޯޑެއް ވެސް ދާނިޝްއަށް ފާހަގަވިއެވެ. އޭގައި ރަންކުލައިގެ ގަނޑުން ކަފާފައިވާ އަކުރުތަކުން ލިޔެވިފައިވީ ‘ވީ ވިލް މިސް ޔޫ ދާނިޝް ސާރ – އޯސިސް ވެލްނެސް ސެންޓާރ ޓީމް’ އެވެ. އެ އަކުރުތަކުގެ ވަށައިގެން ޕޯސްޓް އިޓް ނޯޓްތަކުގައި ވެސް ލިޔެވިފައިވިއެއްކަމަކު އެ ލިޔުންތައް އެހާ ހިސާބުން ދާނިޝްއަށް ސާފެއްނުވިއެވެ. މިއީ ކޮންކަމެއް ކަން ނަގައިގަނެވުމާއިއެކު ދާނިޝްއަށް އަނެއްކާވެސް އެންމެންނަށް ބަލާލަމުން ހީލެވުނެވެ. އެހިނދު އެ ރޮނގުގެ އެންމެ ކަނާތް ފަރާތުގައި ހުއްޓި ހުރި ހިލްޔާ ވެސް ފުރިހަމައަށް ހިނިތުންވެލީ މަންޒަރު ދާނިޝްއަށް ފާހަގަވިއެވެ.

 

ޕާޓީ ފެށުމަށްޓަކައި އެންމެ ފުރަތަމަ އެތާ މެދަށް ގެނެވުނު ކުޑަ މޭޒެއްގައި ހުރި ޗޮކްލެޓް ކޭކެއް ދާނިޝް ފެޅިއެވެ. އޭރު ހުރިހާ މުވައްޒަފުން ވަށް ބުރަކަށް އޭނަގެ ވަށައިގެން ތިއްބެވެ. ކޭކު ފެޅުމަށްފަހު މުވައްޒަފުންގެ ތެރެއިން ދާނިޝް ގާތު ފަހު ބަހެއް ބުނަން ބޭނުންވި މުވައްޒަފުން ވަކިވަކިން އެ ބަސްތައް ބުނަމުން ދިޔައެވެ. އެމީހުންގެ ތެރެއިން ހިލްޔާ އެކަކަށް ނުވުމުން ދާނިޝް ދެރަވިއެވެ.

 

އެއަށްފަހު އެރޭގެ ކެއުން ފެށިގެން ދިޔައެވެ. އަންހެނުންނާއި ފިރިހެނުންނަށް ވަކިން ދިގު ދެ މޭޒު ރޭވިފައިވުމުން ދާނިޝްއަށް ކެއުމުގެ ތެރެއިން ވެސް ހިލްޔާ އިތުރަށް ފެންނަ ގޮތެއް ނުވިއެވެ. އެހެނަސް އެ ކެއުމުގެ ތެރެއިން ފިރިހެން މުވައްޒަފުން ދެއްކި ވާހަކަތަކުން ދާނިޝް ގެ ހިތަށް އުފަލެއް ލިބުނެވެ.

 

“ޑޮކްޓަރ ހިލްޔާގެ ޕްލޭނިންގް ވަރަށް ސަޅި ދޯ؟”

 

“ޑޮކްޓަރ ހިލްޔާ މި ޕާޓީގެ އިން ޗާޖަކަށްވެ ހުރިހާ ކަމެއް ހަމަޖެއްސީ.”

 

“އަހަރުމެން ފުރަތަމަ އުޅުނީ ކްލިނިކްގެ އޮފީސް ތެރޭ ބާއްވާ ކުޑަ ޕާޓީއަކުން ނިންމާލަން. އެކަމަކު ޑޮކްޓަރ ހިލްޔާ ބުނީ ދާނިޝް ސާރ ކްލިނިކަށްޓަކައި އެހާ ބުރަ މަސައްކަތް ކޮށްދީފަ ހުއްޓާ އެހެން ހަދާކަށް ނުވާނެއޭ.”

 

“އެހެންވެ ޑޮކްޓަރ ހިލްޔާ ބޭނުންވީ ދާނިޝް ސާރއަށް އެންމެ ކަމުދާނެ ގޮތަކަށް މި ޕާޓީ ބާއްވަން.”

 

ނަހީދުބެ އެންމެ ފަހުން އެ ބަސްތައް ބުނެލުމުން ހުރިހާ މުވައްޒަފުން ހިމޭންވާ ގޮތްވިއެވެ. ނަހީދުބެ ގެ މަޤާމުގެ ގޮތުންނެވެ. ނަހީދުބެ އެހެން ބުނުމުން ދާނިޝްގެ ހަނދާނަށް އައީ ނަހީދުބެ މެދުވެރިވެގެން ހިލްޔާ ކުރިހާ ސުވާލުތަކެވެ. މިފަދަ ޕާޓީއެއް ބާއްވަން ކޮންމެހެން އޭނައަށް ކަމުދާ ހުރިހާ ގޮތަކަށް ހަދާކަށް ނުޖެހެއެވެ. ހިލްޔާ އެކަންތަކަށް ރިޢާޔަތް ކުރީ ހިލްޔާއަށް އޭނަ ޚާއްސަވީތީތޯ ހިތަށްއެރިއެވެ.

 

ކެއުމަށްފަހު ދާނިޝް ހިލްޔާއާއި ދިމާ ކުރެވޭތޯ އުޅުނެވެ. މި ޕާޓީއަށްޓަކައި ހިލްޔާއަށް ޝުކުރު އަދާ ކުރުމަށެވެ. އެހެނަސް ހިލްޔާ ފެންނަ ކޮންމެ ފަހަރަކުހެން ހިލްޔާ ހުންނަނީ ކޮންމެވެސް އަންހެން މުވައްޒަފަކާއި ވާހަކަ ދައްކާށެވެ. މިރޭ ޤަޞްދުގައި އޭނައަށް ނުބަލަން ހިލްޔާ މަސައްކަތް ކުރަމުން ދިޔަހެން ވެސް ހީވިއެވެ. އެއީ ކީއްވެކަމެއް ނޭނގުނެވެ.

 

އެހެންކަމުން ދާނިޝް ދެން މިޞްރާބު ޖެހީ އެތާ ފާރު ކައިރީގައި ހަދިޔާ ބަހައްޓާފައި ހުރި މޭޒާއި ދިމާލަށެވެ. އެ މޭޒުމަތިން މާ ބޮނޑިއެއް ފެނުމުން ވެސް ދާނިޝްގެ ހިތަށް ޖޯޝެއް ވެރިވިއެވެ. ދިގު ފިޔަވަޅުތަކެއްގައި ގޮސް މޭޒުކައިރީގައި މަޑު ކޮށްލެވުނެވެ. ހުދުކުލައިގެ އޮމާން ގަނޑެއްގެ ތެރޭގައި ތިބި ލިލީ މާތަކާއި އޯކިޑް މަލުގެ އިތުރުން ‘ބޭބީސް ބްރެތް’ މާތައް ހުރި ގޮތުން އެ މާ ބޮނޑި ފެންނަމުން ދިޔައީ ހުވަފެނީ ގޮތަކަށެވެ. އެއަށް ބަލަހައްޓައިގެން ހުރިހެން ހިލްޔާ ފިހާރައަށް ގޮސް އޭނައަށްޓަކައި ކޮންމެ މަލެއް ނަގަމުން ދާ މަންޒަރު ސިފަ ކުރެވުމުން ހިތަށް އުފަލެއް ލިބުނެވެ.

 

ދާނިޝް އެ މާ ބޮނޑި އަތަށް ނެގީ، އެ އުފަލާއި އެކީގައެވެ. މި ނޫނަސް އޭނައަށް މާ ބޮނޑި ހަދިޔާގެ ގޮތުގައި ލިބިފައިވެއެވެ. ފިލްމީ ތަރިއެއްގެ ގޮތުގައި އެ ލިބުނު ޢަދަދެއް ވެސް ނޭނގެއެވެ. އެހެނަސް ނޭނގޭ ސަބަބަކާ ހުރެ މިއީ އަންހެން ކުއްޖެއްގެ ފަރާތުން އޭނައަށް މާ ބޮނޑިއެއް ލިބުނު ފުރަތަމަ ފަހަރުހެން ހީވިއެވެ. އެ ޚިޔާލުން ދާނިޝްއަށް ހިނިތުންވެލެވުނެވެ. ލޯތްބެއް ވެވުނީ އޭނައަށްތޯ ނޫނީ ހިލްޔާއަށްތޯ ހިތަށްއެރިއެވެ. މިހާ ހިސާބަށް އައިއިރު އޭނަ އޮޅުން އަރައިފިއެވެ.

 

ދާނިޝް އެ މާ ބޮނޑިއާއިގެން ހިނގައިގަންނަން އުޅުނު ވަގުތު ލިލީ މަލަކާއި އޯކިޑް މަލެއްގެ ދެމެދުން ހުދުކުލައިގެ ކާޑެއް ފެނުނެވެ. ކާޑު ފެނިފައި ދާނިޝްގެ ދެބުމަ ކައިރިވިއެވެ. ޙައިރާންކަމެއްގެ ތެރޭ ހުރެ ދާނިޝްއަށް އެ ކާޑު ނަގައި ހުޅުވާލެވުނެވެ.

 

ނުނިމޭ