ނަފްސީ (ފަސްދޮޅޮސްވަނަ ބައި)

ނަފްސީ (ފަސްދޮޅަސްވަނަ ބައި)

އެދުވަހު މެންދުރު ނަމާދަށް ވެސް ދާނިޝް ދިޔައީ ފަޔާޒް މެންނާއި އެކީ ކާރުގައެވެ. ނަމާދުން ގެއަށް އައިސް މެންދުރު ކެއުމަށް އޯޑަރެއް ދޭން އުޅެފައި ވެސް މިއަދު ހެނދުނު ނަހީދުބެ ގުޅާފައި ބުނި ވާހަކައެއް ހަނދާންވިއެވެ.

“ދާނިޝް މެންދުރު ކާނީ ކޯޗެއް؟” ހެނދުނު 10 ޖެހިއިރު ނަހީދުބެ ގުޅާފައި ކުއްލި ގޮތަކަށް ކޮށްލި ސުވާލުން ދާނިޝްއަށް ޙައިރާންކަމެއް ލިބުނެވެ.

“ޗިކެން ރެޕެއް ކަހަލަ އެއްޗެއް އޯޑާރ ކުރާނީއޭ ހިތަށް އަރަނީ. ކިހިނެއްވީ؟ ނަހީދުބެ އަހަންނާ ޖޮއިން ކުރަންތަ؟” ދާނިޝްއަށް އަހާލެވުނެވެ. ބައެއްފަހަރު ނަހީދުބެ ވިޔަފާރީގެ ވާހަކަ ދައްކަން އެގޮތަށް އޭނަގެ ގެއަށް ވެސް އައިސް އުޅޭތީވެއެވެ.

“ނޫނޭ. އޯޑަރު ނުކުރާތި. މެންދުރަށްފަހު ބޭބެ އަންނާނަން ތި ގެއަށް. ދާނިޝް ތި ބޭނުންވާ އެއްޗެއް ލިބޭނެ. އިން ޝާ ﷲ.” ނަހީދުބެ ބުނެލި ވާހަކައިން ދާނިޝްގެ ދެބުމަ ކައިރިވިއެވެ.

މެންދުރު ނަމާދުން ގެއަށް އައިސް ދާނިޝް އިނީ ސިޓިންގް ރޫމުގެ ސޯފާގައި ޓީވީއިން ދައްކަމުން ދިޔަ ޑޮކިއުމެންޓްރީއެއް ބަލާށެވެ. އެހެން އިންދާ އެޕާޓްމެންޓްގެ ބެލް އަޅުވާލެވުނު އަޑަށް އެއީ ނަހީދުބެ ކަން އެނގިގެން ދާނިޝްއަށް ދޮރު ހުޅުވަން ދެވުނެވެ. ތަދު ކަނޑުވާ ބޭސް ކައިގެން ހުރުމުން ފައިގެ ރިހުން ވެސް ލުއިވެފައި ވުމުން ތަންކޮޅެއް ރަނގަޅަށް ހިނގުނެވެ. އެޕާޓްމެންޓްގެ މައިދޮރު ހުޅުވާލިއިރު ދާނިޝް އުއްމީދު ކުރި ފަދައިން ނަހީދުބެ ހުއްޓެވެ.

“މާ ލަސްވެއްޖެ ދޯ ނުކައި؟” ނަހީދުބެ އެހިއެވެ.

“ނޫނޭ އަދި ބަނޑުހައި ނުވޭ އަސްލު. ތިއީ…ކޯޗެއް؟” ނަހީދުބެ ގެ އަތުގައި އޮތް ނޫކުލައިގެ ޒިބު އެޅުވިފައިވާ ދަބަސް ފެނިފައި ދާނިޝް ގެ މެއަށް ގޮތެއްވިއެވެ. ހަނދާނަށް އައީ މަންމަ ވަޅުލުމަށްފަހު ގެއަށް އައި ދުވަހު ނަހީދުބެ ހަމަ އެ ދަބަސް ގެނައި ދުވަހެވެ.

“މިއީ….ނަން ނުބުނަން ބުނި ކުއްޖަކު ދާނިޝްއަށް ދޭން ތައްޔާރު ކުރި ލަންޗެއް.” ނަހީދުބެ ނޫންކަމަށް ހަދައި އެހެން ބުނަމުން ދާނިޝްއަށް ދަބަސް ދިއްކޮށްލިއެވެ.

“ނަން ނުބުނަން ބުނި ކުއްޖެކޭ؟” ޙައިރާންކަން އެކުލެވިފައިވި ހިނިތުންވުމަކާއެކީ ދާނިޝްއަށް އެ ދަބަސް ހޯދުނެވެ. އެހިނދު ހިލްޔާގެ ސޫރަ ލޮލަށް ސިފަވިއެވެ.

“އާނ….ނަން ނުބުނަން ބުނި ކުއްޖާ ކިޔުނު ވަރުން ބޭބެ މިއަދު ދާނިޝްއަށް ގުޅާފަ ލަންޗަށް ބޭނުންވަނީ ކޯޗެއްތޯ އެހީ. އެކުއްޖާ މީތި ތައްޔާރުކޮށްފަ ދާނިޝްއަށް ގެންގޮސް ދޭށޭ ބުނީ. ދާނިޝް ބޭސް ނުކާ ވާހަކަ ބުނީމަ ވަރަށް ނުރުހުންވެފަ ހުރީ. އެއީ ހަނދާން ނައްތަންޖެހޭ ކަމެއް ނޫނެއް ނޫންހޭ ބުނީ…” ނަހީދުބެ ހިނިތުންވުމަކާއެކީ ވާހަކަ ދެއްކި ދެއްކިހެން އެއީ ހިލްޔާ ނޫން ދެވަނަ ކުއްޖެއް ނޫންކަން ދާނިޝްއަށް ޔަޤިންވިއެވެ. އެއާއިއެކު ހިތް އުފާވެރިކަމުން ފުރިގެން ދިޔުމުން ހީލެވުނެވެ. އަދި ނުހަނު ލޯތްބާއިއެކީ އަތުގައި އޮތް ދަބަހަށް ނަޒަރެއް ދެވުނެވެ. ދާނިޝް ވަކި އެއްޗެކޭ ނުބުނެ ހުއްޓާ ނަހީދުބެ އިތުރަށް ވާހަކަ ދެއްކިއެވެ.

“އަދި އެހި ދާނިޝް ފައިގަ އައިސް އެޅިހޭ. ބޭބެ ބުނިން އެޅިހެނެއް ހިއެއް ނުވެއޭ. އެޅިންތަ؟ މިހާރު ގެއަށް ދިޔައިމަ އަނެއްކާ އަހާނެހެން ހީވަނީ.” ނަހީދުބެ އެހިއެވެ.

“ނޫނޭ އަދި އައިސް ނާޅަން. މި ގޭގަ އައިސް ޕެކެއް ނެތް. ގަނޑުފެން ހަދަން ޖެހޭނީ. ނޫނީ އައިސް ޕެކެއް ގަންނާނީ.. ބުނޭ އެ ކުއްޖާ ކައިރި މާ ބޮޑަށް މި ކަންތަކާ މެދު ނުވިސްނާށޭ. އައި ވިލް ޓޭކް ކެއާރ އޮފް މައިސެލްފް އިން ޝާ ﷲ.” ދާނިޝްއަށް ދެންވެސް ހެވިފައި ހުރެ ބުންޏެވެ. އެއާއިއެކު ނަހީދުބެ ހީލަމުން އޯކޭއޭ ބުންޏެވެ.

ނަހީދުބެ އެ ގަޑީގައި އޯސިސް ފިހާރައިގެ އޮފީހަށް ދާންޖެހޭތީ މަޑު ނުކޮށް ދިޔައީއެވެ. އެހެންކަމުން ދާނިޝް ގެއަށް ވަދެ ނުފިލާ ހިނިތުންވުމަކާއެކީ އެ ދަބަސް ހިފައިގެން ގޮސް ސިޓިންގް ރޫމުގެ ސޯފާގައި އިށީނެވެ. އަދި ދަބަސް ސިޓިންގް ރޫމުގައި ހުރި ވަކަރު މޭޒުމަތީގައި ބަހައްޓަމުން ދަބަސް ހުޅުވިއެވެ. އަދި އޭގެ ތެރޭގައި ބަންދުކޮށްފައި ހުރި ހުދުކުލައިގެ ތަށިގަނޑު ނެގިއެވެ. މަތިގަނޑު ހުޅުވައި ބަލާލިއިރު ތަށިގަނޑުގައި އެއްބައިގައި ޗިކެން ރެޕެއް ދެ ފަޅިކޮށްފައިވީއިރު އަނެއްބައިގައި ރޯސްކޮށްފައިވި ތަރުކާރީ ކޮޅެއްވިއެވެ.

އޭގެ ފެނުމާއިއެކު ވަސް ވެސް ޖެހުމުން ދާނިޝް ގެ ކުޅު ދިޔާވިއެވެ. ވަގުތުން ޗިކެން ރެޕެއް ނަގައި ބިސްމި ކިޔާލަމުން ކެވެން ފެށިއެވެ. ދާނިޝް ދުނިޔޭގެ އެކި ކަންކޮޅުތަކުން އެކި ޒާތްޒާތުގެ ރެސްޓޯރެންޓްތަކުން ޗިކެން ރެޕް ކެއެވެ. އެހެނަސް އެވަގުތު ކެވެމުން ދިޔަ ޗިކެން ރެޕަކީ މުޅި ޢުމުރު ދުވަހު ވެސް ކެވުނު ޗިކެން ރެޕްކަމަށް ހިތް ބުންޏެވެ. ވާނީ ވެސް އެހެންތާއެވެ. މިއީ ނުހަނު ލޯބިން އޭނައަށް ދެވުނު ހަދިޔާއެއް ކަމަށް ދާނިޝްއަށް ހިތުގެ އަޑިން ޤަބޫލު ކުރެވުނެވެ. އެއީ ހަމައެކަނި ކެއުމަކަށް ނުވިއެވެ. އެއީ އޭނަގެ އެކަނިވެރިކަމަށް ނިމުމެއް އަންނަން އުޅޭ ކަމުގެ ނިޝާނެއްގެ ގޮތުގައި ފެނުނެވެ. އޭނަގެ ދުޢާތައް އިޖާބަވުމުގެ މަލަމައްޗެއްގެ ގޮތުގައި ސިފަ ކުރެވުނެވެ.

ދާނިޝްއަށް އޭނަ ފޮނުވި ދަބަސް ހިލްޔާއަށް ދެން ފެނުނީ މެންދުރު ޑިއުޓީ ނިންމާލާފަ އައިސް ގެއަށް އައި ވަގުތެވެ. ފެން ފޮދެއް ބޯލުމަށް ކާގެއަށް ގޮސް ވަން ވަގުތު ކާ މޭޒުމަތީގައި އެ ދަބަސް ހުރި ތަން ފެނިފައި ހިލްޔާއަށް އެ ދަބަހާއި ދިމާލަށް ދެވުނެވެ. ހިލްޔާ އެ ދަބަސް ހުޅުވާލީ ދާނިޝްއަށް ރަނގަޅަށް ކެވުނުތޯ ބަލަން ބޭނުންވި ވަރުންނެވެ.

ދަބަސް ހުޅުވާލިއިރު ހިލްޔާއަށް ޙައިރާންކަމެއް ލިބުނީ، ތަށިގަނޑުގެ މަތިން ފެނުނު ހުދުކުލައިގެ ގަނޑުކޮޅުންނެވެ. އުދަގޫ ގޮތަކަށް ވީދާފައި އޮތް އެ ގަނޑުކޮޅުގައި ރަތްކުލައިގެ ގަލަމަކުން ‘ތެންކިއު’ އޭ އިނގިރޭސިން ލިޔެވިފައިވިއެވެ. އޭތި ފެނިފައި ހިނިތުންވުމަކާއެކީ ހިލްޔާއަށް ގަނޑުކޮޅު ނަގައި ބަލަހައްޓައިގެން ހުރެވުނެވެ. ކުޑަކުއްޖެއްގެ ލިޔުންހެން ހީވާ އެ ލިޔުމަކީ ދާނިޝް ވާތް އަތުން ލިޔެފައިވާ ލިޔުން ކަން ހިލްޔާއަށް އަންދާޒާ ކުރެވުނެވެ. އެއާއިއެކު ހިލްޔާއަށް އިޚްތިޔާރަކާ ނުލައި ހީލެވުނެވެ.

އެރޭ ވެސް ދާނިޝްއަށް ރޭގަނޑުގެ ކެއުމެއް ލިބުނެވެ. ހަމަ އެއާއިއެކު ނަހީދުބެ އައިސް ޕެކެއް ވެސް އެއީ ދިނީ ނަން ނުބުނާ ކުއްޖާ އެދިގެން ކަމަށް ނަހީދުބެ ބުންޏެވެ. އެއާއިއެކު ދާނިޝްއަށް ހީލެވުނެވެ.

ޖެހިގެން އައި 3 ދުވަހުގެ ކޮންމެ ވަގުތެއްގައި ވެސް ހިލްޔާ އޭނައަށް ކާއެއްޗެހި ފޮނުވަން އުޅޭކަން އެނގުންވުމުން ދާނިޝް އުފާވިއެއްކަމަކު ހިލްޔާއަށް އެހާ ބުރަ ކުރާކަށް ވެސް ބޭނުމެއް ނުވިއެވެ. އެހެންކަމުން ބައެއް ފަހަރު ނަހީދުބެ ސުވާލު ކުރުމުން ނަހީދުބެ އާއިއެކީ ރެސްޓޯރެންޓަށް ދާން ބޭނުންވާ ވާހަކަ ބުނެލައެވެ. އެހެންނޫނީ އެކުވެރިންނާއިއެކީ ތަނަކަށް ގޮސްލައެވެ. އެހެނަސް ދެންވެސް ނަހީދުބެ ‘ނަން ނުބުނާ ކުއްޖާ’ ގެ ނަން އެތައް ފަހަރު މަތިން ދާނިޝް ގެ ގާތު ނަން ގަންނަން ޖެހުނެވެ.

“ނަން ނުބުނާ ކުއްޖާ ބުނީ ޤަވާޢިދުން ބޭސް އެބަ ކަންހޭ؟”

“އެ ކުއްޖާ ބުނީ ބޭސް ކާން ހަނދާން ނެތެންޏާ އެލާމް ކޮށްގެން އުޅޭށޭ.”

“ރެސްޓޯރެންޓުން ކެޔަސް ޞިއްޙަތަށް ފައިދާ ހުރި ކާނާ ކާންވާނެއޭ ނަން ނުބުނާ ކުއްޖާ ބުނީ.”

“ދުޅަ ކުޑަވިޔަސް އެއްކޮށް ދުޅަ ފިލަންދެން އައިސް އަޅާށޯ.”

“ހިތަށް އެބަ އަރާ މި ނަން ނުބުނާ ކުއްޖާ ދާނިޝް އާ އެއްކޮށް ކޯޓަށް ގެންގޮސް ދެވާފާނަމޭ!”

ތިންވަނައަށް ވީ ދުވަހު ނަހީދުބެ އެންމެ ފަހުން ކެތްތެރިކަން ކޮޅުން ލުމުން ފޯނުން ބުނެލި ވާހަކައިން ދާނިޝްއަށް ހެވުނެވެ. އެހިނދު ހިތް އުފާވެރިކަމުން ފުރި ބަންޑުން ވަމުން ދިޔައެވެ. ހިލްޔާ ދުލުން ނުބުންޏަސް ހިލްޔާގެ އެ ހުރިހާ ޢަމަލަކުން ހިލްޔާ އޭނަ ދެކެ ލޯބިވާހެން އޭނައަށް ހީވަމުން ދިޔައެވެ. މި ކުއްޖާ އޭނަ ދެކެ ލޯބިވާ ކަމަށް އެއްބަސްވާނީ ކޮން ދުވަހަކުތޯ ހިތާހިތުން ސުވާލުކޮށްލެވުނީ، އެރޭ އަމިއްލަ ބެލްކަނީގައި ހުރެ ހިލްޔާގެ ބެލްކަންޏަށް ނަޒަރު ހުއްޓައިގެން ހުރެއެވެ.

އެރޭގެ އެވަގުތުގައި ހިލްޔާ އިނީ އެލީ އާއި ހަމްރާއާއި އެކީ ސިޓިންގް ރޫމުގައެވެ. އަންނަ ހުކުރު ދުވަހު ހަމްރާ ގެ ކައިވެނި ކުރެވޭތީ ކައިވެނީގެ ވަލީމާގެ ތައްޔާރީތަކުގެ ވާހަކަ ދެކެވެމުން ދިޔައެވެ. ކައިވެނީގެ ހެދުމާއި ޕާޓީގެ ރޭވުންތަކާމެދު ގަޑިއިރެއް ހާއިރު ވަންދެން ވާހަކަ ދެކެވުމަށްފަހު ދެން ދެކެވެން ފެށީ ޢުމްރާ ގެ ވާހަކައެވެ.

“ދޮންތަ މެރީ ކޮށްގެން ވަގުތުންހެން ދާނީ ޢުމްރާއަށް ދޯ؟ މަމްނޫން އާދޭތަ؟” ހިލްޔާ ސުވާލުކުރިއެވެ.

“އާނ ބުނި އަންނާނަމޭ. ޢުމްރާ ނިންމާލާފަ ދުވަސްކޮޅަކަށް ރިޔާޟްއަށް ދާ ވާހަކަ ވެސް ބުނި.” ހަމްރާ ބުންޏެވެ.

“އޫ ހަނީމޫން!” އެލީ އެހެން ބުނުމުން ހަމްރާގެ މޫނު ރަތްވީއިރު ހިލްޔާ ހިނިތުން ނުވާން މަސައްކަތް ކުރަމުން ދިގުކޮށް އެލީއަށް ގޮވާލިއެވެ.

“ވަޓް؟! އަސްލު އަހަރެން ވެސް ބޭނުމޭ ރިޔާޟްއަށް ދާން. ޓު ބީ ރިއަލް އައިމް ނޮޓް ދެޓް އިންޓްރެސްޓެޑް ޢުމްރާއަށް ދާކަށް. ބައްޕަ ބުނާތީ މި ދަނީ. އަސްލު ބުނަންވީ ކަންނޭނގެ ޓު ގިވް މީ އަ ބްރޭކް. އައި ޖަސްޓް ވޯންޓް ޓު ޓްރެވެލް. ދުބާއި، އޮސްޓްރޭލިޔާ، އިޓަލީ އެންޑް އޯލް ދޯޒް އޯސަމް ޕްލޭސެސް!” އެލީ އެހެން ބުނެލީ ސޯފާއަށް ލެނގިލަމުން ހުވަފެނީ ގޮތަކަށް މައްޗަށް ނަޒަރު ހުއްޓާލަމުންނެވެ.

އެލީ ވާހަކަ ދެއްކި ގޮތުން ހިލްޔާއަށް އިރުކޮޅެއް ވަންދެން އެލީއަށް ބަލަން އިނދެވުނެވެ. އެލީ އެ ގެންގުޅެނީ މީގެ ދުވަސްކޮޅެއް ކުރިން ޚުދު އޭނަ ވެސް ގެންގުޅުނު ނަޒަރިއްޔާތު ކަން ހިލްޔާއަށް އެނގުންވިއެވެ. އޭނަ ވެސް ދުނިޔެ ވަށައި ދަތުރު ކުރަން ބޭނުންވެފައިވީ ދުނިޔޭގެ އެދުން ބޮޑުވެފައިވި ވަރުންނެވެ. މިހާ ދުވަސްވީއިރު ޢުމްރާ އާއި ޙައްޖުގެ އަޅުކަން ހިތަށް ވެސް ނޭރީ އެހެންވެތާއެވެ. އެކަން އެނގުންވުމުން ހިލްޔާއަށް އެލީއާއި ދިމާލަށް ބަލަހައްޓައިގެން އިނދެވުނީ ޙަމްދަރުދީ ގެ ނަޒަރަކުންނެވެ. އޭގެ އިރުކޮޅެއް ފަހުން ވާހަކަ ދެކެވުނެވެ.

“ޢުމްރާއަށް އެއްފަހަރު އާދޭ އެލީ. ދުނިޔޭގަ އެލީގެ ހިތް އެންމެ އެދޭ ތަނަކީ ކޮބައިކަން އިޙްސާސް ކުރެވޭނެ އޭރުން. އިން ޝާ ﷲ.” ހިލްޔާ ބުންޏެވެ. އެ ވާހަކަ ބުނެލީ އާޔަތެއް ހަނދާން ކުރަމުންނެވެ. ކަޢުބަތު ﷲ ގެފުޅަށް މީހުންގެ ހިތް ޖެއްސެވުމަށް އެދި އިބްރާހީމް ޢަލައިހިއްސަލާމް ކުރެއްވި ދުޢާފުޅެވެ. އެލީއަށް ގެފުޅު ހަމަ ލޮލަށް ފެނުމުން އެ އިޙްސާސް ކުރެވޭނެ ގޮތެއްވުމަށް އުއްމީދު ކުރެވުނެވެ.

“ރައިޓް!” އެލީ ކަޅި މައްޗަށް ހިންގާލަމުން ބުންޏެވެ.

“ބަލަ ޔުއާރ ސެލެބްރިޓީ ދާނިޝްބެ ވެސް އެބަ އާދެއޭ ޢުމްރާއަށް!” ހަމްރާ ބުނެލިއެވެ. އެއާއިއެކު އެލީ ހަމްރާއަށް ބަލާލިއެވެ.

“އެ ބުނާ ހެން. ކުރިން އައި ރިއަލީ ޑިޑް ނޮޓް ލައިކް އެލީ އެ ބުނާ ޑޭން އެއްގެ ވާހަކަ ދެއްކީމަ. އެކަމަކު މިހާރު އެނގޭ އެއީ އަސްލު ހީރޯއެއް ކަން. ބަރާބަރަށް ޖަމާޢަތުގަ ނަމާދުކޮށް، ޞަދަޤާތް ކުރަން ފަސޭހަ ކޮށްދޭ ފައުންޑޭޝަނެއް ޤާއިމްކޮށް، އަތް ބިނދިގެން ބަލިވެ އުޅޭއިރު ވެސް އެ ދަނީ ޢުމްރާއަށް. ނައު ދެޓްސް އަ ރިއަލް މޭލް ލީޑް!” ހިލްޔާއަށް ހުއްޓުމެއްނެތި ދާނިޝް އާއި ބެހޭގޮތުން ވާހަކަ ދެކެވުނެވެ. މާ ގިނަ ތަޢުރީފު ކުރެވިއްޖެކަން އެނގުނީ ވާހަކަ ނިމުނު ފަހުން ދޮންތަ އޭނައަށް ދިން ނަޒަރުންނެވެ. އެއާއިއެކު ހިލްޔާ އޭނަގެ ހިނިތުންވުން ފިލުވާލިއެވެ. އެ ދެއްކި ވާހަކައެއް ދެއްކީ ކޮންމެހެން ދާނިޝް އޭނައަށް ޚާއްސަ ވެގެން ނޫންކަން ޚުދު އަމިއްލަ ނަފްސަށް ވެސް ވިސްނައިދިނުމަށެވެ.

“އޯކޭ ފައިން! ދެން އަހަރެން ވެސް ދާނީ އެހެންވެއްޖެއްޔާ. ޑޭން ގެ ޑައި ހާޑް ފޭނެއްގެ ގޮތުގަ ޑޭން ފޮލޯ ކުރަން ވެސް ބޭނުން. އެނީވޭސް ދިޔައީ. މި ވާހަކަ އިވިފަ ފިލްމެއް ބަލާ ހިތްވެއްޖެ.” އެލީ އެހެން ބުނެ ސޯފާއިން ތެދުވެގެން ދާން ހިނގައިގަތެވެ.

“ދެން މި ވެސް ގަޑިއެއްތަ ފިލްމެއް ބަލަން އެލީ. މާދަމާ ސްކޫލް ދުވަސް ވީމަ ނިދާލިއްޔާ މާ ރަނގަޅެއްނު؟” ހަމްރާ ބުންޏެވެ.

“ނޯ ދޮންތާ އައި ނީޑް ޓު ވޮޗް. 9:30 ގަ ނިދާނަން ޕްލީޒް ބައްޕަ ކައިރި ނުބުނައްޗޭ. ޕްލީޒް ޕްލީޒް ޕްލީޒް-“

“އޯކޭ! ދާން އުޅޭ!” އެލީ އާދޭސް ކުރަން ފެށުމުން ހަމްރާ ބުނެލިއެވެ. އެއާއިއެކު އެލީ ދުވެފައި ކޮޓަރިއާއި ދިމާލަށް ދިޔައެވެ.

އެ ވާހަކަތައް އިވިފަ އާއި އެލީއަށް ވީ ގޮތް ފެނިފައި ހިލްޔާއަށް ހީލެވުނެވެ. އެއަށްފަހު ހިލްޔާ ވެސް ތެދުވަން އުޅުނު ވަގުތު ދޮންތަ ވާހަކަ ދެއްކިއެވެ.

“ހިލްޔާ…” ދޮންތަ ގޮވާލީ ހަމައެކަނި އެހާ ވަރަށެވެ.

“ހުމް؟” ވަކިން ހުރި ސޯފާގައި އިން ހިލްޔާއަށް ބުނެވުނެވެ.

“ޔޫ ލައިކް ދާނިޝް ދޯ؟” ފަރުވާތެރި ނަޒަރަކުން އޭނައަށް ބަލަން އިނދެ ހިނިތުންވުމަކާއެކީ ދޮންތަ އެހިއެވެ.

“ނޯ!” ހިލްޔާއަށް ކުއްލި ގޮތަކަށް ވަގުތުން ބުނެވުނެވެ. އޭނައަށް ފިރިހެނަކު ކަމުދާކަން ޤަބޫލު ކުރަން ވެސް އޭނަ ބޭނުންނުވާ ފަދައެވެ. މީގެ ކުރިން ދިމާވެފައިވި ތަޖުރިބާގެ ސަބަބުންނެވެ.

“ކަމޯން ހިލްޔާ…ދާނިޝްއަށް ކޮންމެ ގަޑިއެއްގަ އަމިއްލައަށް ކައްކާ މީލްސް ފޮނުވައި، ކޮންމެ ތިން ގަޑިއިރަކުން ދާނިޝް ގެ ޙާލު ބަލައި، ދާނިޝްއަށް ތިހާ ވަރަށް ތަޢުރީފުކޮށް ހެދޭނީ ސަބަބަކާއި ލައިގެން ދޯ؟” ހަމްރާ ބުންޏެވެ.

“އެކަންތައް ކުރެވެނީ ދާނިޝް ބަލިވެ އުޅޭތީވެއޭ. އެންޑް ހީ އިޒް ލިވިންގް އެލޯން! ދޮންތަ އަޅެ ކަންބޮޑު ނުވޭތަ ދާނިޝް އާއި މެދު؟” ހިލްޔާ އަމިއްލަ ނަފްސުގެ ދިފާޢުގައި ވާހަކަ ދެއްކިއެވެ.

“އައި މީން އައި ޑޫ. އެކަމަކު އެއީ މި ހުރިހާ ދުވަހު ވެސް އެކަނި އުޅުނު މީހެއް. އޭނަ ހަމަ އޯޑަރު ކޮށްގެން ވެސް ކައި ހަދާފާނެ. އަދި ދާނިޝް ގެ އެހާ ކެއަރިންގް ކްލޯޒް ފްރެންޑުން ވެސް އުޅޭ. ހިލްޔާ ކޮންމެހެން ނުޖެހޭ ކަންނޭނގެ ދޯ ދާނިޝްއަށްޓަކައި އެހާ ކަންބޮޑުވެގެން އުޅެން. އަންލެސް….ހީ އިޒް ސްޕެޝަލް ޓު ޔޫ.” ހަމްރާ ވާހަކަ ދެއްކިއެވެ.

“ނޮޓް ސްޕެޝަލް ދޯ އަނެއްހެން އެކަމަކު….އައި ހޭވް ސީން ހިޒް އެކްސް ރޭ. އެހެންވެ ކަންނޭނގެ އެހާ ބޮޑަށް ވޮރީ ވެވެނީ.” ހިލްޔާ ދެންވެސް އެއްބަހެއް ނުވިއެވެ.

ހިލްޔާގެ އެ ވާހަކައިން ހަމްރާ ފުން ނޭވައެއް ދޫކޮށްލިއެވެ. އެއަށްފަހު ހިމޭންކަމުގެ ވަގުތުކޮޅަކަށް ފަހު ވާހަކަ ދެއްކިއެވެ.

“ލައިފް އިޒް ވެރީ ޝޯޓް ހިލްޔާ. ލައިކް ވަންޏާ ލައިކްވާ ވާހަކަ ބުނެލުން ރަނގަޅީ. އަމިއްލައަށް ބުނަން ނުކެރެންޏާ މީހަކު ތްރޫކޮށް ވެސް ބުނެލާ. ދާނިޝް އަކީ ދޮންތަ ދެކޭ ގޮތުގަ ރަނގަޅު މީހެއް. ހިލްޔާއާއި ގުޅޭ ކުއްޖެއް. ހިލްޔާ ވިސްނާލަބަލަ. ހިލްޔާއަށް ދާނިޝް ފެންނާނެ އެންމެ ފަހު ފަހަރަކީ މި ޢުމްރާ ދަތުރު މަތީގަ ކަމަށްވުން ވެސް އެކަށީގެންވޭ. ބައްޕަ ކުރީ ދުވަހު ބުންޏެއްނު ދާނިޝް މިކޮޅަށް އައިއްސަ ހުރީ ޕެއިޑް ލީވްއެއްގައޭ؟ ޕެއިޑް ލީވް ނިމިފަ ހުރި ވާހަކައާއި ދާނިޝް ބޭރަށް ފުރަންޖެހޭ ވާހަކަ ބައްޕަ ބުންޏެއްނު؟ ހިލްޔާގެ ތި އިޙްސާސްތަކުގެ ވާހަކަ ނުބުނެ ހުއްޓާ ދާނިޝް ޢުމުރު ދުވަހަށް ހިލްޔާއަށް ގެއްލިއްޖެއްޔާޔޯ؟”

ދޮންތަ މިފަހަރު ދެއްކި ވާހަކައިން ހިލްޔާއަށް އެއްދިމާލަކަށް ނަޒަރު ހުއްޓައިގެން އިނދެވުނެވެ. އެ ފަހު ސުވާލުން ސޯފާ މަތީގައި ބޭއްވިފައިވި ދެއަތަށް ބާރު ކޮށްލެވުނީ، ދާނިޝް އޭނަ ދޫކޮށް ފުރައިގެން ގޮސްދާނެ ކަމުގެ ޚިޔާލުން ވެސް ހިތަށް އުދަގޫވުމުންނެވެ. އެކަން އެހެން ވެދާނެ ކަމަށް ކުރިން ވިސްނިފައެއް ނެތެވެ. ދާނިޝް އެހެން ހަދާފާނެ ކަމަށް ޤަބޫލުކުރަން އެވަގުތު ވެސް ދަތިވިއެވެ. ދާނިޝް އޭނަ ދޫކޮށް ނުދާނެ ކަމަށް ހިތުގެ ކަނަކުން ގޮވިއެވެ.

ހިލްޔާ އެއްޗެކޭ ނުބުނެ ގިނައިރު ވާން ފެށުމުން ހަމްރާ އިތުރަށް ވާހަކަ ދެއްކިއެވެ.

“އެނީވޭސް، އެއްވެސް ކަމެއް ކުރަން ދޮންތަ ފޯސްއެއް ނުކުރާނަން. އިޓްސް ޔުއާރ ލައިފް ހިލްޔާ. ވިސްނަންވީ ބައެއް ގޮތްތައް ދޮންތަ މި ޙިއްސާ ކުރީ.” ހަމްރާ ބުންޏެވެ. އެއަށްފަހު ތެދުވެގެން ދާން ހިނގައިގަތެވެ.

ދޮންތަ ދެއްކި ވާހަކަތަކުގެ ސަބަބުން އަނެއްކާވެސް އެރޭ ނިދަން ހިލްޔާއަށް އުދަގޫވިއެވެ. އޭނައަށް ދާނިޝް ކަމުދާ ވާހަކަ ދާނިޝް ގާތު ނޫނީ ބައްޕަ ގާތު ބުނަންވީތޯ ހިތަށްއެރިއެވެ. އެހެނަސް ދާނިޝް އާއި އިނުމަކީ އޭނަ އެންމެ ބޭނުންވާ ގޮތްކަމެއް ޚުދު ހިލްޔާއަށް ވެސް ޔަޤީނެއް ނޫނެވެ. ދާނިޝް އާއި އެކީގައިވުމަށް ކުރި އިސްތިޚާރާގެ ހުރިހާ ޢިޝާރާތެއް ބުނަނީ ދާނިޝް އާއި އެކީގައި ވުމަކީ އެންމެ ރަނގަޅު ގޮތްކަމެވެ.

އެހެނަސް ހިލްޔާގެ ހިތުގައި ދެންވެސް ބިރުވެރިކަމެއް އޮތީ، އޭނައަށް ދާނިޝް ކަމުދަނީ ދުނިޔަވީ ސަބަބަކަށްޓަކައި ވެދާނެތީވެއެވެ. ދުނިޔަވީ ސަބަބަކަށްޓަކައި ގުޅުމެއް ބިނާ ކުރުމަކީ ކިހާ ކަތި ފިޔަވަޅެއްކަން ކައިރި މާޒީއެއްގައި ހިލްޔާއަށް ތަޖުރިބާ ކުރެވިފައިވެއެވެ. އަދި އެފަދަ ސަބަބަކަށްޓަކައި މީހަކާއި ގުޅިއްޖެނަމަ އޭނަ އަނެއްކާވެސް ﷲ ސުބްޙާނަހޫ ވަތަޢާލާގެ ހަނދުމައިން ދުރުވެދާނެތީ ބިރުގަނެއެވެ. ﷲ އާއި ކުއްތަންވުމަކީ ދުނިޔެ މަތިން އޭނައަށް ލިބޭނެ އެންމެ ބޮޑު ނިޢުމަތްކަން މިހާރު ހިލްޔާއަށް އިޙްސާސް ކުރެވެއެވެ. އެ ނިޢުމަތް ގެއްލިދާނެ ފަދަ އެއްވެސް ފިޔަވަޅެއް އޮޅުމަކުން ވެސް އަޅަން ބޭނުމެއް ނުވަނީ އެހެންވެއެވެ.

ފިކުރު ބޮޑުވުމުގެ ސަބަބުން ނިދަން އުދަގޫވުމުން ހިލްޔާ ތެދުވެލިއެވެ. އަދި ވުޟޫ އާ ކޮށްލުމަށްފަހު ހެދުން ބަދަލުކޮށް ފޮށާ އަޅައިގެން ނަމާދު ކުރަން ފެށިއެވެ. ނަމާދަށް ހަޝަމް ބަނުމާއިއެކު ހެން ހިލްޔާއަށް އޭނަގެ ފިކުރުތަކުން ދުރުވެވޭ ގޮތްވިއެވެ. ވޭތުވެ ދިޔަ މަސްތަކާއި ޚިލާފަށް މިހާރު ހިލްޔާ ނަމާދުގައި ކިޔޭ ހުރިހާ ޒިކުރެއް ކިޔަނީ ލަސްލަހުންނެވެ. ޤުރުއާން ވެސް ކިޔަވަނީ ލަސްލަހުންނެވެ. ކޮންމެ ޒިކުރަކާއި އާޔަތަކާއި މެދު ފިކުރު ކުރެވޭނެ ފަދައިންނެވެ. ނަމާދަށް އޭނަގެ ހުރިހާ ވަގުތެއް ދެވޭނެހެން ހީވާ ފަދައަކުން ނަމާދު ކުރަނީ، ޙަޔާތުގައި ކުރެވޭނެ އެންމެ މުހިއްމު ކަމަކީ ނަމާދު ކަމަށް ޤަބޫލު ކުރެވޭތީއެވެ. އެހެނީ ނަމާދަކީ އޭނައާއި އޭނަގެ ވެރި ރައްބު ގުޅުވައިދޭ އަޅުކަމެވެ. އަދި އެ ރައްބަކީ އޭނަ ހައްދަވައި، އޭނަ ބަލަހައްޓަވައި، އޭނައަށް ނިޢުމަތްތައް ދެއްވަވައި، އޭނަގެ ޙަޔާތުގެ ހުރިހާ ކަމެއް އޭނައަށް އެންމެ ރަނގަޅުވާނެ ފަދައަކުން ރާއްވަވާ އޭނަގެ ވެރި ރަސްކަލާނގެ ކަމަށްވާތީވެއެވެ.

އެހެންކަމުން ހިލްޔާ އެ ނަމާދުގެ ސަޖިދައިގައި އޭނައަށް ހިދާޔަތް އިތުރު ކޮށްދެއްވުމަށް އެދި ދުޢާ ކުރިއެވެ. އޭނަ ދާނިޝް އާއި ގުޅުމަކީ އޭނަގެ ދުނިޔެއަށާއި އާޚިރަތަށް އެންމެ ރަނގަޅު ގޮތްކަމަށް ވާނަމަ، އޭނައަށް އެކަން ސާފުކޮށް ދެއްކެވުމަށް އެދިއެވެ. ﷲ ރުހިވޮޑިގެންވާ ސަބަބަކަށްޓަކައި ނޫނީ ދާނިޝްއާއި އޭނަގެ ގުޅުން ބިނާ ނުކުރެއްވުމަށް އެދިއެވެ. އަދި އެ ދެމީހުން ގުޅިއްޖެނަމަ އެ ގުޅުމަކީ އެހެން މީހުންނަށް ވެސް ފައިދާ ކުރުވަނިވި ބަރަކާތްތެރި ގުޅުމެއް ކަމުގައި ލެއްވުމަށް އެދިއެވެ.

ހިލްޔާއަށް އެ ފަހު ދުޢާ ކުރެވުނީ އެއްވެސް އިޚްތިޔާރަކާއި ނުލައެވެ. ބޭއިޚްތިޔާރުގައި ވެސް އެ ދުޢާ ކުރެވުނީ ކީއްވެކަން އެ ސަޖިދައިގައި އޮވެވެސް ހިލްޔާއަށް އެނގުނެވެ. ދާނިޝްއަކީ އެހެން މީހުންނަށް ފައިދާ ވާނެ ފަދަ ހެޔޮ ޢަމަލުތައް ކުރަން އިސްނަގާ މީހެކެވެ. ދާނިޝް އާއި ކައިވެނި ކޮށްފިނަމަ ހިލްޔާ އެ ހެޔޮ ކަންތަކުގައި ބައިވެރިވެ އެ ހެޔޮ ކަންތައް އިތުރަށް ފުޅާ ކުރަން އެހީވެދޭން ބޭނުންވިއެވެ.

އިންސާނާ ﷲ އަށް ދުޢާ ކުރާއިރު އެ ދުޢާ އިޖާބަވާނެ ގޮތެއް ޚިޔާލުކޮށްފައި އޮވެދާނެއެވެ. އެހެނަސް އިޚްލާޞްތެރި ހިތަކުން ހަމައެކަނި އެކަލާނގެ ވަޖުހުފުޅު އަދައިގެން ކުރާ ދުޢާއަކުން، އިންސާނަކު ހީވެސް ނުކުރާހާ ހެޔޮ ކަންތައް އެ ދުޢާގެ ސަބަބުން ޙަޤީޤަތަކަށް ވެގެންދެއެވެ.

އޭގެ އަނެއް ދުވަހު ހިލްޔާ ބައްޕައާއި އެކީ ޑިއުޓީއަށް ދާން ނިކުތް ގަޑީގައި ދާނިޝް ވެސް ކްލިނިކަށް ދާން ތައްޔާރުވެގެން އައެވެ. ތަންކޮޅެއް ރަނގަޅަށް ދާނިޝް ހިނގާފައި އައި މަންޒަރު ފެނިފައި ހިލްޔާއަށް ހަމަޖެހުމެއް ލިބުނެވެ. ދާނިޝް ކާރަށް އެރުމުގެ ކުރިން ހިލްޔާއާއި ހިނިތުންވެލުމުން ހިލްޔާ ވެސް ލުއި ގޮތަކަށް ހިނިތުންވެލިއެވެ.

ކްލިނިކަށް ގޮސް ހިލްޔާ ޑިއުޓީ ފެށިތާ މާ ގިނައިރެއް ނުވެ ދާނިޝް ކްލިނިކްގެ ވައިބާރ ގްރޫޕަށް އާ މީހަކު ޖޮއިން ކުރުވިއެވެ. އެއަށްފަހު މުޅި ޓީމަށް ވާ ގޮތަށް ތަންކޮޅެއް ދިގު އިނގިރޭސި މެސެޖެއް ފޮނުވިއެވެ. ދާނިޝް ކްލިނިކް ދޫކޮށް ދާން އުޅޭ ވާހަކައާއި، 15 ފެބްރުއަރީއަކީ ކްލިނިކްގައި ދާނިޝްގެ އެންމެ ފަހު ދުވަސްކަމަށާއި، ދާނިޝްގެ ބަދަލުގައި މެނޭޖަރަކަށް އަންނަން އުޅޭ ހަމްޒާއަށް މަރުޙަބާ ކިޔާފައިވެއެވެ. އެއަށްފަހު ވޭތުވެ ދިޔަ މަސްތަކުގައި ކްލިނިކްގައި ދާނިޝްއަށް ކުރެވުނު ރަނގަޅު ތަޖުރިބާތަކަށް އަލި އަޅުވައި ހުރިހާ މުވައްޒަފުންނަށް ޝުކުރު އަދާ ކޮށްފައިވެއެވެ.

ދާނިޝް ގެ އެ މެސެޖު އައުމާއިއެކު އެއަށް ‘ސޭޑް ރިއެކްޓް’ އަންނަން ފެށިއެވެ. ދާނިޝް ހަނދާންވާނެ ވާހަކައާއި އެކު ހުރިހާ މުވައްޒަފުން ހަމްޒާއަށް އުއްމީދީ މަރުޙަބާތައް ކިޔަމުން ދިޔައެވެ. ހިލްޔާއަށް އެއްވެސް އެއްޗެކޭ ނުކިޔައި އެ މެސެޖުތަކަށް ބަލަން އިނުން ނޫންކަމެއް ނުކުރެވުނެވެ. ޚުދު ދާނިޝް އަމިއްލައަށް ދާނިޝް ދާ ވާހަކަ ލިޔުމުން ހަނދާނަށް އައީ ދޮންތަ ދެއްކި ވާހަކައެވެ. އެހެނަސް ދެންވެސް ހިތް އުފާކޮށްލީ، އޭނައަށް އަދި ދާނިޝް އާއިއެކީ ޢުމްރާއަށް ދެވޭނެ ކަމަށް ހިތް ބުނުމުންނެވެ.

ކޮންސަލްޓޭޝަން ރޫމުގެ ދޮރު ހުޅުވިގެން ދިޔުމުން ހިލްޔާ ފޯނު ލޮކްކޮށްލަމުން އެ ދޮރަށް ނަޒަރު ހުއްޓާލިއެވެ. އެހިނދު އެ ދޮރުން ވަދެގެން އައީ ތިރީހުގެ ޢުމުރުތައް ގުނަމުން ދާހެން ހީވާ އަންހެނެކެވެ. ހުދުކުލައިގެ އޮފީސް މައްޗަކާއި ބެލްސަކާއި އެކީ ޝޯލް އަޅައިގެން ހުރި އެ އަންހެން މީހާ ހިލްޔާ ފެނުމާއިއެކު ހިނިތުންވެލިއެވެ.

“އަނހަ….ޑޮކްޓަރ ހިލްޔާ. ހާދަ ދުވަހެއް ފަހުންނޭ ދޯ މި ފެނުނީ؟” އަންހެން މީހާ ވަދެގެން އަންނަމުން އެހެން ބުނެލުމުން ހިލްޔާ ހިސާބެއްގެ ޙައިރާންކަމާއެކީ ލުއި ގޮތަކަށް ހީލިއެވެ. އެ ވަށްކޮށް ހުރި އަލި މޫނުމަތިން ހިލްޔާ ކުރިން ދުށް ހަނދާނެއްވިއެވެ. މިއީ މުހިއްމު މޫނެކޭ ވެސް ހިތަށްއެރިއެވެ. އެހެނަސް އެއީ ކީއްވެކަމެއް އެވަގުތު ނުވިސްނުނެވެ. މިއީ މާ ކުރީ ދުވަހެއްގައި އޭނައާއި ދިމާވެފައި ހުރި ބަލި މީހަކަށް ވުމުން އެމީހާ އޭނަ މަތިން ހަނދާން ހުރީއޭ ހިތަށްއެރިއެވެ. ހިލްޔާ ދުވަހެއްގެ މަތިން އެތައް ބަލިމީހުން ބަލާއިރު ހުރިހާ ބަލިމީހުން ހަނދާން ހުރުމަކީ ނާދިރު ކަމެކެވެ.

އެހެންކަމުން އެއީ މާ ބޮޑު ކަމެއްކަމުގައި ނުބަލާ އެކަމާއިމެދު ސުވާލު ނުކޮށް ހިލްޔާ އެ ބަލިމީހާ ގެ ޙާލު ބެލިއެވެ. 34 އަހަރުގެ ޢައިޝާ އޭނަ ގާތަށް އައީ މޭގަނޑު މާ ބޮޑަށް ތަޅުވާތީވެއެވެ. އަދި އޭގެ ސަބަބުން ނުވެސް ނިދޭތީވެއެވެ. ހިލްޔާ ބެލި ބެލުމުންނާއި، ނެގި އީސީޖީއިންނާއި ކުރި ސުވާލުތަކަށް ލިބުނު ޖަވާބުތަކުން އެއީ ޢައިޝާ ކޮންމެވެސް ކަމަކާ ވަރަށް ބޮޑަށް ދެރަވެ އުޅޭތީ ވާ ކަމެއް ކަމަށް ނިންމުނެވެ. ޢައިޝާ ވާހަކަ ދައްކާއިރު ވެސް އެ ލޯމަތިން ފާޅުވާ ހިތާމަވެރިކަން ވެސް ހިލްޔާއަށް ފާހަގަވިއެވެ.

“އީސީޖީ ކާރޑިއޮލޮޖިސްޓަށް ދައްކާލަން އަޅުގަނޑު ރެކޮމެންޑް ކުރަން. ބޮޑަށް ހީވަނީ އިމޯޝަނަލް ސްޓްރެސް އާ ހެދި ވާ ކަމެއްހެން. އެއްވެސް ކަމަކާ މާ ބޮޑަށް ވިސްނެނީތަ؟” ހިލްޔާ އެހިއެވެ. އެއާއިއެކު ޢައިޝާ އަނެއްކާވެސް ހީލިއެވެ. އެ ހީލުމުގެ ތެރެއިން ރޮވިދާނެހެން އެ ލޯމަތިން ހީވިއެވެ.

“ނުވިސްނާ ވޭތޯ މަސައްކަތް ކުރަން. އެކަމަކު ނުވޭ…” ޢައިޝާ ބުންޏެވެ.

“އެހެންވިއްޔާ….ކައުންސެލާރ އަކާއި ވެސް ބައްދަލުކޮށްލުން ހަމަ ރަނގަޅު. ބައެއްފަހަރު އަހަރުމެންގެ ޖަޒުބާތުތަކުގެ ސަބަބުން އަހަރުމެންގެ ޖިސްމާނީ ދުޅަހެޔޮކަމަށް ވެސް އަސަރު ކުރޭ. އެހެންވީމަ މާ ލަސްވުމުގެ ކުރިން އެ ޖަޒުބާތުތައް ހަމައަކަށް އެޅުވުން މުހިއްމު. އަޅުގަނޑު މި ވަގުތަށް މި ދެނީ އެންމެ ބޭހެއް. ވީހާވެސް އަވަހަކަށް ހިތުގެ ޑޮކްޓަރަކަށް ދައްކާލައްޗޭ. ކެމޮމައިލް ކަހަލަ ރިލޭކްސިން ސައި ބުއިމަކީ ވެސް މި ޙާލަތަށް ރަނގަޅުވާނެ ކަމެއް.” ހިލްޔާ އޭނަގެ ކުރިމަތީގައި ހުރި ކުއްޖާ ޕްރިންޓަރުން ނެގި ބޭސް ސިޓީގައި ސޮއި ކުރަމުން ބުންޏެވެ.

“ނަހީކް ގާތު ފްރުޓްސް ކާން އެންގި ގޮތަށް ދޯ ޑޮކްޓަރ؟” ޢައިޝާ ދެންވެސް ނުފިލާ ހިނިތުންވުމަކާއެކީ ބުންޏެވެ. ‘ނަހީކް’ ގެ ނަން އިވިފައި ހިލްޔާ ކުޑަކޮށް ހުއްޓުން އަރާ ގޮތްވިއެވެ. އެ ނަމަކީ މުހިއްމު ނަމެއް ކަމަށް ސިކުނޑި އެންގިއެވެ.

“ނަހީކް…އަކީ ކޮން ކުއްޖެއް؟” ހިލްޔާއަށް އަހާލެވުނެވެ.

“ނަހީކްއަކީ އަޅުގަނޑުގެ ދަރިފުޅު. ޑޮކްޓަރ ހިލްޔާ އަނެއް ހޮސްޕިޓަލުގަ އުޅުނުއިރު އަޅުގަނޑު ވަރަށް ގިނައިން ގޮސް އުޅުނީމެއްނު؟ އަބަދު ރޯގާއެއް ޖެހިގެން ނޫނީ ބަނޑަށް ތަދުވެގެން އުޅޭ ނަހީކް.” ޢައިޝާ ކިޔައި ދިންދިންހެން ހިލްޔާގެ ލޮލަށް ނަހީކް ސިފަވެގެން ދިޔައެވެ. އެއާއިއެކު ނަހީކް އެންމެ ފަހުން ބެލި ދުވަސް ވެސް ހަނދާންވިއެވެ.

“ފްރުޓްސް ނުބައި! އަސްލު ކޮއްކޮއަށް ހީވަނީ އެޕްލް ކެއިމަހެން ކޮއްކޮއަށް މިހެން ވާން ފެށީ. ކަރަށް ތަދުވާން ފެށީ އެޕްލް ކެއީމަ.”

ނަހީކްގެ އެ ބަސްތައް ހަނދާންވުމާއިއެކު ނުތަނަވަސްކަމެއް ހިލްޔާގެ ހިތް ވަށާލިއެވެ. އެދުވަސްކޮޅު އޭނައަށް ހީވި ހީވުން ހަނދާންވިއެވެ. ކަރަށް ތަދުވެގެން އައި ކުދިން އެންމެ ފަހުން ކެއީ އާފަލު ކަމަށް ބުނި ބަސްތަކުންނާއި ދެ ކުދިންގެ ޓެސްޓްތަކުން ފެނުނު ނަތީޖާއިން ހީވި ބިރުވެރި ހީވުމެވެ.

“ހަނދާންވެއްޖެ ނަހީކް. ނަހީކް….ކޮބައިތަ މިހާރު؟” ހިލްޔާއަށް ޖެހިލުންވުމަކާއެކީ އަހާލެވުނެވެ.

“ނަހީކް….ނިޔާވިތާ މިއީ 4 ވަނަ މަސް.” ހިނިތުންވުން އެއްކޮށް ފިލައި ދިޔަ އެ މަންމަގެ ދުލުން އިވުނު ބަސްތަކުން ހިލްޔާގެ ދެލޯ ބޮޑުވީ ހިނދު މުޅި މީހާ ގަނޑުވިއެވެ.

ނުނިމޭ