ނަފްސީ (ސައުރަޔާޅީސްވަނަ ބައި)

ނަފްސީ (ސައުރަޔާޅީސްވަނަ ބައި)

“ގެންދާނަމޭ ގެންދާނަމޭ. މިހާރު ވެސް މިއުޅެނީ ރާފިލް މިކޮޅުގަ އުޅޭ ސަރަޙައްދާއި ދުރު ހިސާބެއްގަ. ހިލްޔާގެ ބަލި ކުޑަކޮށް ރަނގަޅުވީމަ މާލެއަށް ވެސް ގެންދަން ކަމަށް މިއުޅެނީ. ބަލި ރަނގަޅު ނުވިޔަސް އަވަހަށް މާލެ ގެންނަންވީދޯ؟ ދާނިޝް ފުރުމުގެ ކުރިން؟”

“ނޫން ނޫން. ތިކޮޅުގަ ހުންނާނެ ދޯ މިކޮޅަށްވުރެ ރަނގަޅު ބޭސް ވެސް؟ ހިލްޔާއަށް ރަނގަޅު ފަރުވާއެއް ހޯދައިދީގެން މިކޮޅަށް ގެނެސްދީ ބޭބޭ. އަޅުގަނޑު….އިންތިޒާރު ކުރާނަން.”

ދާނިޝްއަށް ބޭއިޚްތިޔާރެއް ނެތި ވާހަކަ ދައްކަމުން ގޮސް އެ ފަހު ބަސްތައް ބުނެލީ، ހިސާބެއްގެ ޖެހިލުންވުމަކާއި އެކީގައެވެ. އޭނައަށް މި ވާހަކަ ދެކެވެނީ ކިހިނެއްކަން އެނގުންވީ އެވަގުތެވެ. އެ ފަހު ބަސްތަކުގެ މާނައާއި މެދު ވިސްނާލެވުމުން ދެލޯ މަރައި ތަގުޅި ކޮށްލެވުނެވެ. އެހެނަސް އެ ބަސްތައް ބުނެވުނީތީ އުފާވެސް ކުރެވުނެވެ.

“އޯކޭ ދާނިޝް. ހިލްޔާ ޞައްޙަ ސަލާމަތުން ބޭބެ ތިކޮޅަށް ގެނެސްދޭނަން އިރާދަކުރެއްވިއްޔާ. އެހެންވީމަ މީގެ މާނައަކީ ތަންކޮޅެއް ގިނަ ދުވަސް ވަންދެން އޯސިސްއަށް ޓެމްޕޮރަރީ މެނޭޖާރއެއް ލިބުނީއޭ ދޯ؟” ނަހީދުބެ އެކޮޅުން ސަމާސާވެރި ރާގަކަށް އެހެން ބުނުމުން ދާނިޝްއަށް ހީލެވުނެވެ.

“އާނ ބޭބޭ އެހެން ކަމަށް ބަލާ. ބޭބެ މިކޮޅުގެ އެއްވެސް ކަމަކާމެދު ނުވިސްނާ. ބޭބެއާއި ހިލްޔާ އަންނަންދެން އަޅުގަނޑު މިކޮޅުގަ އުޅޭނަން އިން ޝާ ﷲ.” ދާނިޝް ބުންޏެވެ.

ނަހީދުބެ އެ ވާހަކައަށް އޯކޭ ދެމުން ދާނިޝްއަށް އަލްވަދާޢު ކިޔުނެވެ. ދާނިޝް ވެސް އަލްވަދާޢު ކިޔުމަށްފަހު ފޯނު ކަނޑާލިއެވެ. ކޯލަށްފަހު ފޯނުގެ ސްކްރީނަށް ބަލަހައްޓައިގެން އިނދެ ދާނިޝްއަށް ފުން ނޭވައެއް ދޫކޮށްލެވުނެވެ. އޭގެ ދެވަނަ ސިކުންތުގައި ހިނިތުންވެސް ވެލެވުނެވެ. ދެންމެ ދެކެވުނު ވާހަކަތަކުން ނަހީދުބެ އޭނައާއި ހިލްޔާގެ ގުޅުމަށް ރުހޭހެން ހީވުމުންނެވެ.

**

ހިލްޔާގެ ޙާލަތު ހުރީ، އޭނަ ދެކެ ލޯބިވާ މީހުންގެ ލޯބި އިޙްސާސް ކުރެވޭ ވަރަށްވުރެ ގޯސް ޙާލަތެއްގައެވެ. ވަކިން ޚާއްސަކޮށް އެ ޙާލަތު އިތުރަށް ގޯސްވީ، އެ ދުވަސްކޮޅު ހިލްޔާގެ ޙައިޟުގެ ދުވަސްތައް ޖެހުމުންނެވެ. އެ ހިތަށް ކިރިޔާ ވެސް ދިރުމެއް ލިބޭ ކަމަކަށް ހިލްޔާ އެ ދުވަސްކޮޅު ކުރަމުން ދިޔައީ ނަމާދެވެ. ނަމާދު ނުކޮށް ހުއްޓާލުމުން އެ މެދުކަނޑާލެވެނީ އޭނަގެ ހިތަށް އުއްމީދު ގެނެސްދިން އެންމެ ބާރުގަދަ ބޭސްކަން ހިލްޔާ ނުދެނެހުއްޓެވެ. އެހެންކަމުން ނަމާދު ނުކުރެވޭ ދުވަސްތަކުގައި ﷲ ގެ ނަންފުޅު އިހުނަށްވުރެ ބޮޑަށް ޒިކުރުކޮށް، ދުޢާ ދަންނަވައި ޤުރުއާނާއި ގާތްވާން ޖެހޭނެކަން ހިލްޔާއަށް ނޭނގެއެވެ.

ޙައިޟުގެ ދުވަސްވަރަކީ އަންހެނުންނަށްވާ އިމްތިޙާނެކެވެ. އެ ދުވަސްކޮޅު ނަމާދު ކުރުން މަނާ ކުރައްވާފައިވަނީ ﷲ ސުބްޙާނަހޫ ވަތަޢާލާގެ ރަޙްމަތުންނެވެ. އެއްވެސް އިންސާނަކަށް ފަހުމް ނުވިޔަސް އަންހެނަކަށް ކުރިމަތިވާ ދަތިތައް ﷲ ސުބްޙާނަހޫ ވަތަޢާލާ މޮޅަށް ދެނެވޮޑިގެންވާތީވެއެވެ. އެ ދުވަސްވަރަކީ ހަމައެކަނި ތަދު ތަޙައްމަލު ކުރަންޖެހޭ ދުވަސްވަރެއް ނޫނެވެ. ހަމަ މިއާއިއެކު ޖަޒުބާތީ ގޮތުން ވެސް އަންހެނަކު ބަލިކަށިވެގެންދާ ދުވަސްކޮޅެކެވެ. އިޚްތިޔާރަކާއި ނުލާ ވެސް ހިތަށް ވެރިވާ އެ ނޭދެވޭ އިޙްސާސްތަކުގެ ޙައްލަކީ ﷲ ގެ ޒިކުރެވެ. ﷲ ގެ ކަލާމްފުޅެވެ. ބަލިކަށި ވިޔަސް އެކަލާނގެ ރުހިވޮޑިގަތުން ހޯދުމަށް ކުރެވެން އޮތް ހެޔޮ ޢަމަލުތައް ކުރުމެވެ.

އެ އިޙްސާސްތަކަށް އޮތް ހުރިހާ ޙައްލަކުން ހިލްޔާ ދުރުވެފައިވުމުން، ޙައިޟުގެ ދުވަސްވަރު ޖެހުމުން، އެ ހިތަށް އެ ދުވަސްކޮޅު ވެރިވެފައިވި ހިތާމަތަކާއި ބިރުވެރިކަން ދެގުނަވިއެވެ. ނަމާދު ކުރަން ނުޖެހޭތީ ހުސް ވަގުތުތައް ގިނަވިއެވެ. އެ ހުސް ވަގުތުތަކުގައި ސޯޝަލް މީޑިއާ ސްކްރޯލް ކުރެވެން ފެށިއެވެ. ސޯޝަލް މީޑިއާގައި އޭނައަށް ޢާއްމު މީހުން މަލާމާތް ކޮށްފައިވާ މިންވަރު ފެނުނީ އެ ފަދައިން ފޭސްބުކަށް ވަން ފުރަތަމަ ދުވަހެވެ. ރާފިލްއާއި އޭނަ ވަކިވިތާ އެންމެ ދުވަހެއް ވޭތުވި ފަހުން އޭނަގެ ފޮޓޯއާއިއެކު ޖޯކު ޖަހާ މީމްތަކާއި ރީލްތައް ވެސް ހެދިގެން ގޮއްސިއެވެ. ބައެއް މީހުން އެ މީމްތަކަށް ހީހީފައި ހުރިއިރު އަނެއްބައި މީހުން ސީދާ ހިލްޔާއަށް ވެސް އަވަގުރާނަ ގޮވާފައި ހުއްޓެވެ. އަނެއްބައި ފިރިހެނުން ހިލްޔާގެ ރީތިކަން ފާހަގަކޮށް އެމީހުންނާއި އިންނަން ހިލްޔާ އެއްބަސްވެދާނެ ކަމަށް ބުނަމުން ދިޔައެވެ.

އެ ހުރިހާ އެއްޗެއް ފެނުނު ފުރަތަމަ ދުވަހު ހިލްޔާއަށް ދުވަހަކުވެސް އިޙްސާސް ނުކުރެވޭ ފަދަ ލަދުވެތިކަމެއް އިޙްސާސް ކުރެވުނެވެ. އެންމެންގެ ކުރިމަތީގައި ފަޟީޙަތްވި ކަހަލަ އިޙްސާސެއް ކުރެވުނެވެ. އަދި އަމުދުން އޭނަ މިފަހުން ހޯދި އެކުވެރިންގެ ތެރެއިން ބައެއް މީހުން ވެސް ނުސީދާކޮށް އޭނައާއި ބެހޭގޮތުން ސްޓޭޓަސްތައް ލިޔެ، މަލާމާތް ކޮށްފައިވިއެވެ. އޭނައަށް އާސްމާނުގައި އުދުހިލާފައި، ފިޔަ ކަނޑައިގެން ގޮސް ބިމަށް ވެއްޓެން ޖެހުނު ގޮތުގެ ވާހަކަ އެއް އެކުވެރިޔަކު ނުހަނު ފަށުވިކޮށް ލިޔެފައިވިއެވެ.

އެދުވަހު ފޭސްބުކުން އިންސްޓާގްރާމުން ސްނެޕްޗެޓުން ތަކުރާރުކޮށް ވަދެ ނިކުމެ އުޅެވެމުން ހިލްޔާއަށް ދިޔައެވެ. ދުވަހުގެ ގިނަ ވަގުތު ހޭދަ ކުރެވެން ފެށީ އެކަނި ކޮޓަރީގެ ކަނެއްގައި އިނދެ އެކަން ކުރުމުގައެވެ. އޭގެއިން އެއްވެސް އެޕަކުން ބަލާބަލާ ވެސް އޭނައަށް ރުހުމުގެ ލޮލަކުން ބަލާލާނެ މީހަކު ނުފެނުމުން ހަތަރު އުދަރެސް ފެނު ޖެހުނު ކަހަލަ އިޙްސާސެއް ކުރެވުނެވެ. އެކަމާއިމެދު ދެރަވިއެއްކަމަކު އޭނައަށް މަލާމާތް ކުރާ މީހުންނަށް ރުޅިވެސް އައެވެ. ހިލްޔާގެ ހުރިހާ ވިސްނުމަކާއި އިޙްސާސެއް އެ މަލާމާތްތަކުން ހިސާރުވެގެން ދިޔަ ފަދައެވެ. ވާނީވެސް އެހެންތާއެވެ. މި ހުރިހާ ދުވަހު އޭނަގެ އެއް ‘އިލާހަކަށް’ ވެފައިވީ މީހުން އޭނައާއި މެދު ދެކޭ ގޮތެވެ. މީހުން އޭނައާއި މެދު ދަށްކޮށް ދެކުމަކީ ހިލްޔާއަށް ބަރުދާސްތު ކުރެވޭނެ ކަމެއް ނޫނެވެ. އެހެނަސް މި ޙާލަތުގައި ދެން މީހުން ރުއްސޭނެ ގޮތެއް ހިލްޔާއަށް އެއްގޮތަކަށް ވެސް ނުވިސްނުނެވެ.

ނަތީޖާއެއްގެ ގޮތުން ނާއުއްމީދީ އިޙްސާސްތަކުން ހިލްޔާގެ ހިތް ފުރިގެން ދިޔައެވެ. އޭނަގެ ޙަޔާތް ބަރުބާދުވީ ކަމުގެ އިޙްސާސް ކުރެވުނެވެ. މުޅި ދުނިޔެއިން ވެސް އެންމެ ބަދުނަސީބު މީހަކީ އޭނަ ކަމަށް ޤަބޫލު ކުރެވުނެވެ. އުޅެމުން ދިޔަ ‘ކުޑަ’ އެޕާޓްމެންޓާއި، ކައިރި ކުޑަ ރެސްޓޯރެންޓަކުން ބައްޕަ ގެންނަ ކާ އެއްޗެހިން އެކަން އިތުރަށް ހިތާހިތުން ޔަޤީން ކުރެވެމުން ދިޔައެވެ. މިފަދައިން އޭނަ އުޅެން ޖެހޭނަމަ އުޅުމުގެ ބޭނުމަކީ ވެސް ކޮބައިތޯ ހިތަށްއެރިއެވެ. އޭނައަށް ދެން މުސްތަޤްބަލުގައި އުފާވެރި ދިރިއުޅުމެއް ލިބުމުގެ ކުޑަ ވެސް ފުރުސަތެއް އެބައޮތް ހެއްޔެވެ؟ އޭނައަށް ރާފިލް ކަހަލަ މުއްސަނދި އަދި މޮޅު މީހަކު ދެން ލިބޭނެ ހެއްޔެވެ؟ ނުލިބޭނަމަ އޭނަ އިންނަން ޖެހޭނީ ފަޤީރު މީހަކާ ހެއްޔެވެ؟ އޭރުން ޢާއްމު މީހުން އޭނައާއި މެދު ދެކޭނީ ދަށްކޮށް ހެއްޔެވެ؟ ސޯޝަލް މީޑިއާގައި ދެއްކޭނެ ފަދަ ‘އުފާވެރި’ ދިރިއުޅުމެއް އޭނައަށް ދެން ދުވަހަކުވެސް ނުލިބޭނީ ހެއްޔެވެ؟

މި ކަންތަކާއި އެކީ ހިލްޔާ އޭނަގެ ރެޒިޑެންސީއާއި މެދު ވެސް ކަންބޮޑުވަމުން ދިޔައެވެ. ކަންތައް މި ދިމާވި ގޮތުން ހިލްޔާ މި ވަގުތު މަސައްކަތް ކުރަމުންދާ ހޮސްޕިޓަލަށް ހިލްޔާއަށް އަނބުރާ ދެވިދާނެ ހެނެއް ހިއެއް ނުވެއެވެ. ރާފިލް އޭނައަށް ހޯދައިދިން ފުރުސަތަކަށް އަނބުރާ ދާކަށް ހިލްޔާ ބޭނުމެއް ނުވިއެވެ. ރާފިލް ފެންނަ ހިސާބަކަށް ދާން ވެސް ހިލްޔާ ހިތް ބިރުގެންފައިވުމުންނެވެ.

ކަން މިހެން އޮތް އިރު އޭނަގެ ހިތުގައި ޑޮކްޓަރަކަށްވުމަށް އޮތް އުއްމީދު ވެސް ނިމުމަކަށް އައީތޯ ހިތަށްއެރިއެވެ. އެހެން ކަމަށްވާނަމަ އޭނަ ދެން އުޅެންވީ ކޮން ކަމަކަށްޓަކައި ހެއްޔެވެ؟ ހެނދުނު ތެދުވަންވީ ކޮން ކަމަކާ ހެއްޔެވެ؟ އޭނައަށް މި ފެންނަމުން ދާ ބިރުވެރި ހުވަފެންތަކަށް ނިމުމެއް ނާންނާނީ ހެއްޔެވެ؟ ނިމުމެއް ނައިސިއްޔާ އޭނައަށް ދެން ދުވަހަކުވެސް އަރާމު ނިންޖެއް ނުނިދޭނީ ހެއްޔެވެ؟ އެ ހުވަފެންތަކުން ފެންނަހާ ވަރަށް ރާފިލް ބިރުވެރި ނަމަ، އޭނައަށް ދެން ބޭރު ތެރޭގައި އުޅެން ކެރޭނީ ކިހިނެއް ހެއްޔެވެ؟ ރާފިލް އޭނަ ފެންނައިރަށް ވެސް އޭނައަށް ހިތު ހުރިހާ ގޮތަކަށް ހަދަން ފަސް ނުޖެހޭނެއެވެ.

ހިތާއި ސިކުނޑިއަށް ތަކުރާރުކޮށް ވެރިވަމުން ދިޔަ ޚިޔާލުތަކުގެ ސަބަބުން ހިލްޔާއަށް ގިނަ ފަހަރު އެނދުން ވެސް ނުތެދުވެވެއެވެ. ބައްޕަ ކޮޓަރީގެ ދޮރުގައި ޓަކި ދީފައި ކިތަންމެ އާދޭސް ކުރިޔަސް، އެނދުން ނުތެދުވެވިފައި ދުވަހުގެ ބޮޑުބައި ފާއިތު ވަންދެން އޮވެވެއެވެ.

ހިލްޔާއަށް އަންނަމުން ދިޔަ ބަދަލުތައް ފެނިފައި ނަހީދުގެ ފިކުރު ބޮޑުވަމުން ދިޔައެވެ. ނަހީދު ހީކުރީ ދުވަސްތައް ފާއިތުވާ ވަރަކަށް ހިލްޔާގެ ޙާލަތު ވާނީ ރަނގަޅު ކަމަށެވެ. އެހެނަސް ކަންތައް މުޅިން އިދިކޮޅަށް ހިނގާ މަންޒަރު ފެނި، ނަހީދުގެ ގޮތް ހުސްވާ ގޮތްވިއެވެ. ހަދާނެ ގޮތެއް ނޭނގިފައި ހަމްރާއާއި އެލީއާއި ހިލްޔާގެ މާމަ ގާތު ވެސް ހިލްޔާއަށް ގުޅައިގެން ވާހަކަ ދައްކަން އެދެވިފައިވެއެވެ. އެހެނަސް ހިލްޔާ އެއްވެސް މީހެއްގެ ފޯނެއް ނުނަގައެވެ. ނަހީދު އޭނަގެ ފޯނުން ހަމްރާއަށް ގުޅައި ހިލްޔާއާއި ވާހަކަ ދައްކަން ދިނުމުން ވެސް ހިލްޔާ އެއްބަހެއް ނުވެއެވެ. ހިލްޔާ އަބަދުވެސް ބޭނުންވަނީ ކޮޓަރި ތެރޭގައި އެކަނި ހުންނާށެވެ. ފާއިތުވި ދެ ތިން ދުވަސް ތެރޭގައި ހިލްޔާގެ ކެއުން ވެސް އިންތިހާއަށް މަދެވެ. ހަވީރު ވަގުތު ކޮޓަރިން ނިކުމެފައި ކޮފީއަކާއި އެކީ ބިސްކޯދެއް ކާލި ކަމެވެ.

ނަހީދު އެންމެ ދެރަވީ، ދާނިޝްއަށް މި ޚަބަރު ދޭންވުމުންނެވެ. ނަހީދު ހުރީ ހިލްޔާ ރަނގަޅު ވަންދެން އުފާވެރި ޚަބަރެއް ނޫނީ ދާނިޝްއަށް ނުދޭށެވެ. އެހެނަސް ދާނިޝް އޭނައަށް ގުޅާ ވަރުން ގުޅާލަން ޖެހުނެވެ.

“އެނދުން ނުތެދުވެއޭ ތި ބުނީ؟ ހުން އައިސްގެންތަ؟” ދާނިޝް ސުވާލު ކުރިއެވެ.

“ނޫން….ހީވަނީ، ހިލްޔާ ޑިޕްރެޝަނަށް ހެން އެ ދަނީ. ވަރަށް މަދުން ކަނީ ވެސް. ބޭބެ އުޅެއުޅެ ހިލްޔާ ހިތްހަމަޖެހޭ ކަހަލަ ވާހަކައެއް ނުދެކެވޭ. ކައުންސެލާރއެއްގެ ގާތަށް ދާން ބުނުމުން އެއްބަހެއް ނުވޭ.” ނަހީދު ކިޔައިދިނެވެ.

ނަހީދުބެ ގެ އެ ވާހަކަތައް އިވުނު ދާނިޝް އިނީ، އަމިއްލަ ގޭގެ ކާ މޭޒުދޮށުގައި ރޭގަނޑު ކާށެވެ. ހިލްޔާއަށް ނުކެވޭ ވާހަކަ އިވުނު ހިނދު އަނގައަށް ލާން އުޅުނު ބަތް ސުވާ އަނގައަށް ނުލެވި، ލަސްލަހުން ތިރިކޮށްލެވުނެވެ. އިސާހިތަކު ދާނިޝްގެ ގައިގެ ވަރު ދޫވިއެވެ. އެހެނަސް ވާހަކަ ދެކެވުނެވެ.

“އެއީ ޑިޕްރެޝަނަށް ނުވާނެ ބޭބެ. އިން ޝާ ﷲ. އަހަރެން ބުނާނީ ސޯޝަލް މީޑިއާގަ ވެސް ހިލްޔާއާއި ބެހޭގޮތުން ނޭދެވޭ ވާހަކަތައް ދެކެވިފަ ހުރީމަހެން ހިލްޔާ ތިހާ ސަކަރާތްވީ. ވީހާވެސް ވަރަކުން ހިލްޔާ ގާތު އެއީ އެއްވެސް ކަމެއް ނޫންކަން ބުނެދީ ސަޕޯޓް ދޭންވީ. ވަރަށް އަވަހަށް ހިލްޔާ ރަނގަޅު ވެދާނެ އިން ޝާ ﷲ.” ދާނިޝް އޭނަގެ ހިތަށް ވެރިވި ނާއުއްމީދީ އިޙްސާސްތަކަށް ފަސްއަޅަމުން އެހެން ބުނެލީ، ނަހީދުބެއާއި އެކީ ޚުދު އަމިއްލަ ނަފްސަށް ވެސް އެކަމުގެ ޔަޤީންކަން ދިނުމަށެވެ.

އެއަށްފަހު އެ ކޯލު މާ ދިގެއް ނުވެއެވެ. ނަހީދުބެ ވެސް ‘އިން ޝާ ﷲ’ އޭ ބުނެ އިތުރު ވާހަކައެއް ދެއްކުމެއް ނެތި ފޯނު ކަނޑާލިއެވެ. ފޯނު ކެނޑުމުން ދާނިޝް ދެން އެރޭގެ ކެއުން ކުރިއަށް ގެންދަން ޖެހުނީ ގަދަކަމުންނެވެ. ސިކުނޑިއަށް ވެރިވާން ފެށި ނޭދެވޭ ޚިޔާލުތަކުގެ ސަބަބުންނެވެ.

ޙަޔާތުގެ މިހާ ހިސާބަށް އައިއިރު ޑިޕްރެޝަން ގައި އުޅެފައިވާ އޭނަގެ ތިމާގެ މީހުންނާއި ދެކެ ފަރިތަ މީހުންގެ ވާހަކަ ދާނިޝްއަށް އިވިފައިވެއެވެ. ޑިޕްރެޝަނަކީ ޖެހިއްޖެނަމަ އެހާ ފަސޭހައިން އަރައިގަނެވޭ ޙާލަތެއް ނޫންކަން އެ ވާހަކަތަކުން ދާނިޝްއަށް އެނގިފައިވެއެވެ. އެއީ މީހެއްގެ މުޅި ދިރިއުޅުން ހުއްޓުމަކަށް ގެނެސް، އަމިއްލައަށް މަރުވާން ބޭނުންވާ ޙާލަތަކަށް ވެސް ގެންގޮސްފާނެ ޙާލަތެއްކަން ދާނިޝްއަށް އެނގެއެވެ.

އެހެންކަމުން ދާނިޝް ކަންބޮޑުވިއެވެ. ހިލްޔާ އެފަދަ ޙާލަތަކަށް ދާކަށް ދާނިޝް އެއްގޮތަކަށް ވެސް ބޭނުމެއް ނުވިއެވެ. އެފަދަ ޙާލަތެއްގައި ވާނަމަ ނުހަނު އަވަހަށް ހިލްޔާ ރަނގަޅުވުމަށް ދާނިޝްއަށް ހިތާހިތުން އެދެވުނެވެ.

އާދައިގެ މަތިން ކަންބޮޑުވުމުން ދާނިޝް ޚިޔާރު ކުރީ ނަމާދު ކުރާށެވެ. ދުޢާއިން ޙާޞިލު ނުކުރެވޭނެ ކަމެއް ނޯންނާނެކަން މިހާރު އޭނައަށް ޔަޤީންވެފައިވެއެވެ. މި ހުރިހާ ދުވަހު އޭނަ ދުޢާ ކުރަމުން ދިޔައީ ރާފިލްއާއި ހިލްޔާ ގުޅުމަކީ ހިލްޔާއަށް އެންމެ ރަނގަޅު ގޮތް ކަމުގައި ނުވާނަމަ، ހިލްޔާ ރާފިލްއާއި ދުރުކޮށްދެއްވުމަށް އެދިއެވެ. މިހާރު ހިލްޔާ އެ ވަނީ ރާފިލްއާއި ދުރުވެފައެވެ. ރާފިލްއަކީ ހިލްޔާއަށް ރަނގަޅުވާނެ މީހެއް ނޫންކަން ފަހު ވަގުތު ރާފިލް ކިޔާލި ބަސްތަކުން ވެސް އެނގެއެވެ.

ވީއިރު ހިލްޔާގެ އެ ފުން ހިތާމަ ފިއްލެވުމަށް ވެސް ﷲ ސުބްޙާނަހޫ ވަތަޢާލާ ކުޅަދުންވަންތަވެ ވޮޑިގެންވެއެއް ނޫން ހެއްޔެވެ؟ ދާނިޝްއަށް އެކަން ޤަބޫލު ކުރަން ދަތިވިޔަސް، ކުޑަ ދުވަސްކޮޅެއްގެ ތެރޭގައި ހިލްޔާ އެ އަޑިގަނޑުން ސަލާމަތް ކޮށްދެއްވުމަށް އެކަލާނގެ ކުޅަދުންވަންތަވެ ވޮޑިގެންވެއެއް ނޫން ހެއްޔެވެ؟

ދާނިޝް އޭނަގެ ކޮޓަރިއަށް ގޮސް ދެ ރަކުޢަތުގެ ނަމާދެއް ކުރަން ފެށީ މި ޚިޔާލުތަކާއި އެކީގައެވެ. އަދި ނަމާދުގެ ފުރަތަމަ ސަޖިދައަށް ގޮސް، ސަޖިދައިގައި ކިޔާ ޒިކުރު ކިޔުމަށްފަހު ދުޢާ ކުރަން ފެށިއެވެ.

“ޔާ ﷲ! ހިލްޔާ ވަނީ ޑިޕްރެޝަނަށް ގޮސްފައިކަމަށް ނަހީދުބެ ބުނެފި. މިއަޅާ އެކަމާމެދު ދެރަވެ ކަންބޮޑުވޭ. ހިލްޔާއަށް ދެރަ ގޮތެއް ދިމާވުމަށް ނޭދޭ. ޔާ ރައްބު! ޑިޕްރެޝަނަކީ ފަސޭހައިން ރަނގަޅުވާ ބައްޔެއް ނޫންކަން މިއަޅާއަށް އެނގޭ. އެހެނަސް އިބަރަސްކަލާނގެ ގެ ރަޙްމަތްފުޅުން ހިލްޔާ ވީހާ ވެސް އަވަހަކަށް ޑިޕްރެޝަނުން ރަނގަޅު ކޮށްދެއްވާފާނދޭވެ! ހިލްޔާގެ ހިތުގައި ހިތާމައިގެ ލިސާނެއް ވެސް ނުލައްވާނދޭވެ! މި އަޅާ ދެން ހިލްޔާއާއި ބައްދަލުވާ ހިނދު ހިލްޔާގެ ހިތަކީ، އިބަރަސްކަލާނގެ ހަނދުމައިން ފުރި، ހަމަޖެހުން ލިބިގެންވާ ހިތެއް ކަމުގައި ލައްވާނދޭވެ!”

ދާނިޝްއަށް އެ ދުޢާތައް ކޮށް ނިމުނުއިރު ބަޔާން ކުރަން ދަތި ހަމަޖެހުމެއް ލިބުނެވެ. މިއީ ހަމަ ޔަޤީނުން އިޖާބަވާނެ ދުޢާއެއް ކަމަށް ހިތާހިތުން އެވަގުތު ބުނެވުނެވެ. ދުޢާގައި އޭނަ އެދުނު ކަންތައް ވާނެ ގޮތެއް ސިކުނޑިއަށް ފަހުމް ނުވި ކަމުގައި ވިޔަސްމެއެވެ.

**

ނަމާދު ނުކުރެވޭތާ 9 ވަނައަށްވީ ދުވަހު ހިލްޔާ އިހުނަށްވުރެ ބޮޑަށް ހިކިފައި ވެސްވެއެވެ. ރަނގަޅަށް ނުކެވޭތީއާއި، ހިލްޔާގެ ސިކުނޑީގެ ހާސްކަން އިތުރުވެފައިވީތީ، ޙައިޟުގެ ދުވަސްތައް ނިމެންޖެހޭ ދުވަހު ނިމޭ ގޮތެއް ވެސް ނުވިއެވެ. ނަތީޖާއެއްގެ ގޮތުން ހިލްޔާގެ ޙާލަތު ގޯހުން ގޯހަށް ދިޔައެވެ.

ފަހުން ފަހުން އައިސް ޙަޔާތުގެ މަޤްޞަދާއިމެދު ކުރެވޭ ސުވާލަށް ޖަވާބެއް ނުލިބުމުން އޭނަ ދެން ހޭލަން ނުޖެހޭނެނަމައޭ ހިލްޔާގެ ހިތް ބުނަން ފެށިއެވެ. މި ދިރިއުޅުމަކުން ދެން ކުރާނެ ކަމެއް ނެތް ކަމަށް ޤަބޫލު ކުރެވިފައިވެއެވެ. ވަކި ވަރަކަށް ކެއުމުން މީހާގެ މަރާއި ގާތްވާނެ ފަދަ ބޭސްތަކުގެ ނަންތައް ހަނދާންވާން ފެށިއެވެ. އުޅެމުންދާ އެޕާޓްމެންޓުގެ ބެލްކަނީއަށް ގޮސް އެތަނުން ފުންމާލައިފިނަމަ ވާނީ ކިހިނެއްތޯ ވިސްނެން ފެށިއެވެ. ބަދިގެއިން ތޫނު އެއްޗެއް ފެންނައިރަށް އެއިން އަމިއްލަ ނަފްސަށް އަނިޔާ ދެވޭ މަންޒަރު ސިފަ ކުރެވެން ފެށިއެވެ.

މިއީ ކިހާ ނުރައްކާތެރި ޚިޔާލުތަކެއްކަން ހިލްޔާއަށް އެނގުންވިއެވެ. މި ވާހަކަތައް އެހެން މީހަކާއި ޙިއްސާ ކުރަން ބޭނުންވިއެވެ. އެހެނަސް އެހެން މީހުންނާއި މި ވާހަކަ ޙިއްސާ ކުރުމުން އެމީހުން އޭނައާއި މެދު ދެކޭނެ ގޮތާއިމެދު ފިކުރު ކުރެވުނީތީ އެހެން ހަދާކަށް ނުކެރުނެވެ. އެހެންނޫނަސް ނަފްސު އެދެމުން ދިޔައީ އެއްވެސް މީހަކާއި ވާހަކަ ދެއްކުމެއްނެތި އެކަނި ހުރުމަށެވެ. މީހަކާއި ވާހަކަ ދެއްކުމަށް ވެސް ހިލްޔާއަށް ވަރަށް ގިނަ ހަކަތަ ބޭނުންވާހެން ހީވުމުންނެވެ. އެ ހަކަތައެއް އޭނަގެ ހަށިގަނޑުގައި ހުރިހެން ހީއެއް ނުވީތީވެއެވެ.

އެހެންކަމުން ހިލްޔާ މި ޚިޔާލުތަކާއިއެކީ އެކަނިވެރިވިއެވެ. ނަތީޖާއެއްގެ ގޮތުން މަދު ދުވަސްކޮޅެއްގެ ތެރޭގައި ހިލްޔާއަށް ބޭއިޚްތިޔާރުގައި އެ ޚިޔާލު ކުރެވެމުން ދިޔަ ކަންތައް ޢަމަލީ ގޮތުން ކުރެވެން އުޅުނެވެ. ވަޅި ފެންނަ ކޮންމެ ފަހަރަކު ވަޅި ނަގައިގެން އަމިއްލަ ނަފްސަށް އަނިޔާއެއް ކުރެވެން އުޅެވެއެވެ. އެ ކަންތައް ހިނގަނީ ހިލްޔާގެ އިޚްތިޔާރުން ބޭރުގައެވެ. އެހެނަސް ނޭނގޭ ސަބަބަކާހުރެ އެކަން ކުރެވުމުގެ ކުރިން ހިލްޔާއަށް ހަމަހޭވެރިކަމެއް ވެފައި އަމިއްލަ ނަފްސު ހުއްޓުވާލެވެއެވެ.

ބޭއިޚްތިޔާރުގައި އަމިއްލަ ނަފްސަށް އަނިޔާ ދެވެން ފަށައިފިކަން އެނގުންވުމުން ހިލްޔާގެ ހިތަށް ބިރުވެރިކަމެއް ވަނެވެ. ހިލްޔާއަށް ކޮންމެ ފަހަރަކު ހަމަހޭވެރިކަމެއް ވަނީ ހުރިހާ ތައްޔާރީއެއް ވުމަށްފަހު އެންމެ ފަހު ފިޔަވަޅު އެޅުމުގެ ކުރިންނެވެ. އެއްފަހަރު ވަޅިން އަނިޔާއެއް ދެވެން އުޅުނިއްޔާ އަނެއްފަހަރު ބެލްކަނީގެ ރެއިލިންގް މައްޗަށް އަރައި އިށީނދެގެން އިނދެވެއެވެ. އަނެއްބައި ފަހަރު ފޮތިކޮޅުތައް އެއްކޮށް ފަށެއް ނަގައި އެއްކުރެވެން ފަށައެވެ. އެއީ ކީއްކުރަން އޭނަ ކުރާ ކަމެއްކަން އެނގުންވަނީ ވަކި ހިސާބަކުންނެވެ. ބޭއިޚްތިޔާރުގައި އެކަމަށްޓަކައި ދިރާސާ ކުރެވިފައިވާ މިންވަރު ވެސް އެނގުންވަނީ އެހާ ހިސާބުންނެވެ.

ތަކުރާރުކޮށް މިކަންތައް ވާން ފެށުމުން ހިލްޔާއަށް މި ކަމާއިމެދު އަމިއްލަ ނަފްސާއި ސުވާލު ކުރެވުނެވެ. އޭނަ އެ ފިޔަވަޅު ނާޅައި ފަސްޖެހެނީ ކީއްވެ ހެއްޔެވެ؟ އޭނަ ދެން ދިރިއުޅެން ހަމަ ބޭނުމެއް ނުވެއެއް ނޫން ހެއްޔެވެ؟ ހުރިހާ އުފާވެރިކަމެއް ގެއްލި، އުފާވެރިކަމުގެ ހިލަމެއް ވެސް ނުވާ ދިރިއުޅުމެއް އުޅެން އޭނަ ބޭނުމެއް ނުވެއެއް ނޫން ހެއްޔެވެ؟ ރާފިލްއަށް ބިރުން އޭނަ އުޅެންޖެހޭ އުޅުމެއްގެ ބޭނުމަކީ ކޮބައިހެއްޔެވެ؟ މުޅި ދުނިޔޭގެ އެންމެންގެ މަލާމާތް ރައްދުވާ ދިރިއުޅުމެއްގެ ބޭނުމަކީ ކޮބައިހެއްޔެވެ؟

ހިތަށް ވެރިވި މި ޚިޔާލުތަކާއިއެކު އެ ފިޔަވަޅު އަޅަން ހިލްޔާ ނިންމިއެވެ. އެ ނިންމުން ނިންމި ދުވަހަކީ ހިލްޔާގެ ޙައިޟުގެ ދުވަސްތައް ނިމުނު ދުވަސް ވެސްމެއެވެ. އެ ފިޔަވަޅު އެޅުމުގެ ކުރިން ހިނައިގަންނަންވީތޯ ހިތަށްއެރިއެވެ. އެހެނަސް ހިނައިގަތިއްޔާ ނަމާދު ކުރަންޖެހޭނެ ކަމަށް ޝައިޠާނާ ބުންޏެވެ. މި ހުރިހާ ދުވަހު ﷲ ގެ ހަނދުމައިން ދުރުވެފައިވުމުން ހިލްޔާ ޝައިޠާނާގެ ބަސްތަކަށް މުޅިން ހެއްލިފައިވިއެވެ. ނަމާދު ކުރާނެ ހަކަތައެއް ވެސް ނެތް ނޫންތޯ ޝައިޠާނާ ބުނުމުން ހަށިގަނޑުން އިތުރު ވަރުބަލިކަމެއް ވެސް އިޙްސާސް ކުރެވުނެވެ.

ހިލްޔާ ވަޅިއެއް ހިފައިގެން ކޮޓަރީގެ ބެލްކަނީއަށް ދިޔައީ ހަވީރުގެ ވަގުތެވެ. ބައްޕަ ގާތު އޭނައަށް ދޭން އެއްޗެއް ގަނެދިނުމަށް ބުނެ ފޮނުވާލުމަށްފަހު އެވެ. ވަޅި ހިފައިގެން ހިލްޔާ ބެލްކަނީއަށް ނިކުތްއިރު އުޑުމަތި ބަނަކޮށް ދައްކަމުން ދިޔައެވެ. ޖެހެމުން ދިޔަ ވައިރޯޅިތަކުން ހިލްޔާ އަޅައިގެން ހުރި ވަށް ބުރުގާއާއި އެކީ ލައިގެން ހުރި އަބާޔާ ވެސް ވިހުރެމުން ދިޔައެވެ. ވަޅިއާއި އެކީ ގޮސް ބެލްކަނީ ކައިރީގައި ހުއްޓިލަމުން ހިލްޔާ ތިރިއަށް ނަޒަރެއް ދިނެވެ. 12 ވަނަ ފަންގިފިލާއިން މަގުން ދުއްވަމުން ދިޔަ ކާރުތައް ފެންނަމުން ދިޔައީ ފުދޭވަރަކަށް ކުޑަކޮށެވެ.

ރާވައިގެން އައި ކަންތައް ހަނދާން ކޮށްލަމުން ހިލްޔާ ފުން ނޭވައެއް ދޫކޮށްލިއެވެ. އަދި ކަނާތު އަތުން ހިފަހައްޓައިގެން ހުރި ވަޅި، ވާއަތުގެ މައިނާރާއި ދިމާލަށް އަމާޒު ކުރިއެވެ. އެވަގުތު ބައްޕަ އާއި އެކީ ޢާއިލާގެ އެންމެންގެ ސޫރަތައް ވެސް ލޮލަށް ސިފަވިއެވެ. އޭނަ މަރުވުމުން އެންމެން ދެރަވާނެއޭ ހިތަށްއެރިއެވެ. އެހެނަސް މިހާ ހިސާބަށް އައިއިރު އޭނަ ދެރަވެފައިވާ މިންވަރާއި ދިރިއުޅެން ބޭނުންނުވާ މިންވަރު ވެސް އެމީހުންނަށް އެނގޭނެ ކަމަށް ޤަބޫލު ކުރެވުނެވެ.

ދެން ހިލްޔާގެ ނިންމުމަށް އެޅޭނެ އެއްވެސް ހުރަހެއް ނެތްހެން ހީވި ވަގުތު، ކަނާތް ފަރާތުން ޤުރުއާނުގެ އާޔަތެއްގެ އަޑު އިވެން ފެށިއެވެ.

“كُلُّ نَفْسٍ ذَآئِقَةُ ٱلْمَوْتِ ۖ ثُمَّ إِلَيْنَا تُرْجَعُونَ”

ކޮންމެ  ނަފްސަކީވެސް، މަރުގެ ރަހަ ލިބިގަންނާނޭ އެއްޗެކެވެ. ދެން ތިޔަބައިމީހުން އެނބުރި ރުޖޫޢަ ކުރައްވާހުށީ، ތިމަންރަސްކަލާނގެ ޙަޟްރަތަށެވެ.

އެ އާޔަތަކީ ކޮން ސޫރަތެއްގެ އާޔަތެއްކަން ނޭނގުނަސް، އެނގިފައި ހުރި ޢަރަބިން، އާޔަތުގެ މާނަ ހިލްޔާއަށް ފަހުމްވިއެވެ. އެހިނދު ހިލްޔާގެ ހިތް ރޫރޫ އަޅައިގެން ދިޔަ ހިނދު ކުއްލިއަކަށް އަތާއި ވަޅި ދުރުކޮށް، ދެއަތް ވައްޓާލެވުނެވެ. އެއަށްފަހު ކަނާތް ފަރާތަށް ނަޒަރެއް ދެވުނެވެ. އެހިނދު ޤުރުއާން ޖަހާފައިވަނީ ކައިރީގައި ހުރި ޢިމާރާތުގައިވާ ބެލްކަނީއެއްގައި ބުރުގާ އަޅައިގެން ހުރި އިނގިރޭސި އަންހެނެކެވެ. އަންހެން މީހާ ހިލްޔާއަށް ބަލާލާފައި ހިނިތުންވެލިއެވެ.

ހިލްޔާއަށް އެވަގުތު ހިނިތުންވާކަށް ނޭނގުނެވެ. އިތުރު ޤުރުއާނުގެ އާޔަތްތައް އިވެމުން ދިޔަދިޔަހެން އެއަށް ސަމާލުކަމެއް ނުދެވުނަސް ހިތަށް ގޮތެއްވަމުން ދިޔައެވެ. އަދި އަމުދުން ދެންމެ އިވުނު އާޔަތާއިމެދު ވިސްނާލެވުނެވެ. އަމިއްލައަށް މަރުވުމަކީ އަދި އޭނަ މިހާތަނަށް ހީކުރިހާ ކުޑަކަމެއް ނޫންކަން އެނގުންވިއެވެ. މަރުވުމަށްފަހު ވެސް ޙަޔާތެއްވެއެވެ. އެ ޙަޔާތުގައި އޭނައާއި މެދު ވާނީ ކިހިނެއް ހެއްޔެވެ؟ އަމިއްލައަށް މަރުވުމަކީ ފާފައެއް ކަމަށް އޭނައަށް އިވިފައިވެއެވެ. ވީއިރު އޭނަ މިފަދައިން މަރުވެއްޖެނަމަ އޭނައަށް ވާނީ ކިހިނެއް ހެއްޔެވެ؟

މި ޚިޔާލުތަކުގައި ހުރެ ހިލްޔާ ދިގު ފިޔަވަޅުތަކެއްގައި ގޮސް ކޮޓަރިއަށް ވަނެވެ. އަދި އެ ދިޔަ ގޮތަށް ގޮސް އެނދުގެ ކުރިމައްޗަށް ވާ ގޮތަށް ތިރިވެލަމުން އެނދު ކައިރިން ބިންމަތީގައި އިށީނެވެ. އެއަށްފަހު އަތުގައި އޮތް ވަޅި ދުރަށް ހޫރާލިއެވެ. އެހިނދު ނޭނގޭ ސަބަބަކާހުރެ މުޅި މީހާ ތުރުތުރު އަޅަމުން ދިޔައެވެ. ކުރެވެން އުޅުނު ކަމުގެ ބޮޑުކަން އެނގުންވުމުން ކަންނޭނގެއެވެ.

އެހެނަސް ދެންވެސް ހިލްޔާގެ ހިތަށް އުދަގޫވެފައިވިއެވެ. އޭނަގެ ހިތުގައި ކަމަކަށް ވަރުގަދަ ޢަޒުމެއް މިއަދު ކަނޑައެޅުނީ ކިހާ ދުވަހެއް ފަހުން ކަމެއް ޚުދު ހިލްޔާއަށް ވެސް ނޭނގެއެވެ. އެ ޢަޒުމު ދޫކޮށް އަނެއްކާވެސް ސިކުނޑި ފިކުރުތަކުން ފުރިގެން މި ދިޔައީ ޤުރުއާނުގެ އާޔަތެއްގެ ސަބަބުންނެވެ. އެކަމާއިމެދު އެ ވަގުތުކޮޅަށް ހިނދުކޮޅަކަށް ނުރުހުންވެސް ވިއެވެ. އެހެނަސް ﷲ ގެ އާޔަތަކަށް ނުރުހުންވެގެން ނުވާނެކަމަށް ހިލްޔާގެ ހިތް އެންގިއެވެ.

އެހިނދު އެ އާޔަތްތަކާއި ﷲ ގެ ހިދާޔަތާއި ދުރުވެ، އަމިއްލައަށް މަރުވާން ބޭނުންވާތީ އަމިއްލަ ނަފްސަށް ނުރުހުންވާ ގޮތްވިއެވެ. އޭނަ މި ކަމާއިމެދު ނަސޭޙަތެއް ބޭނުންވާކަން އެނގުންވިއެވެ. އެހިނދު އެންމެ ފުރަތަމަ ހަނދާންވީ އުސްތާޒާ އަސްމާ ގެ ނަމެވެ. އެހެނަސް އުސްތާޒާ ދުނިޔޭގައި ނެތްކަން އެނގުންވުމުން ހަނދާންވީ މާމަ މަތިންނެވެ.

އިސާހިތަކު ހިލްޔާ އޭނަގެ އަބާޔާގެ އަރިމަތީ ޖީބުގައި އޮތް ފޯނު ނެގިއެވެ. އަދި ވައިބާރ ހުޅުވާލަމުން މާމަ ނަންބަރަށް ގުޅާލިއެވެ. ދެ ތިން ރިންގަކަށްފަހު މާމަ އެކޮޅުން ފޯނު ނެގިއެވެ.

“އައްސަލާމްޢަލައިކުމް ކަނބުލޮ. ހާދަ ދުވަހެއް ފަހުންނޭ ތި ގުޅާލީ. ޙާލު ރަނގަޅުތަ؟” މާމަ އެކޮޅުން އެހިއެވެ.

“ރަނގަޅެއް….ނޫން މާމާ. ސުވާލެއް ކޮށްލަންތަ؟” ހިލްޔާ އެހިއެވެ.

“އާނ ދަރިފުޅު ކީކޭ؟” މާމަ އެހިއެވެ. އެއާއިއެކު ހިމޭންކަމުގެ ވަގުތުކޮޅަކަށްފަހު ހިލްޔާ ވާހަކަ ދެއްކިއެވެ.

“މް…މަރުވުމަށްފަހު ވާނީ ކިހިނެއް؟” ހިލްޔާއަށް އަހާލެވުނެވެ.

“މަރުވުމަށްފަހު….އަހަރުމެން ބަރުޒަޚުގެ ޢާލަމަށް ދާނީ. ކަށްވަޅުގައި އަހަރުމެންނާއި ސުވާލު ކުރެވޭނެ. އަހަރުމެންގެ ރައްބަކީ ކޮބައިތޯ. ދީނަކީ ކޮބައިތޯ. ނަބިއްޔަކީ ކޮބައިތޯ. އިސްލާމްދީނާއި އެއްގޮތަށް ދިރިއުޅުން ބައްޓަން ކުރި މީހަކަށް ނޫނީ މި ސުވާލުތަކަށް ޖަވާބެއް ނުދެވޭނެ. އެއަށްފަހު ބަރުޒަޚުގައި އަހަރުމެންނަށްޓަކައި ސުވަރުގެ ފެންނަ ދޮރެއް ނޫނީ ނަރަކަށް ފެންނަ ދޮރެއް ހުޅުވިގެން ދާނެ.”

މާމަ ވަކި އިތުރު ސުވާލެއް ކުރުމެއްނެތި ތަފްޞީލުކޮށް ކިޔައިދިން ގޮތުން ހިލްޔާ ޖަޒުބާތުގައި ޖެހޭ ގޮތްވިއެވެ. ހިލްޔާއަށް ނޭނގި ލޮލުން ކަރުނަ ހިލޭ ގޮތްވިއެވެ. އިންސާނާގެ ނިމުން އަންނާނެ ގޮތް ހަނދާންވުމުންނެވެ. އަދި އަމުދުން މާމަ ސުވާލު ނުކުރާތީ މާމައާއި ވާހަކަ ދައްކަން ހިލްޔާއަށް ފަސޭހަވުމުން ވެސްމެއެވެ. މީހުންނާއި ވާހަކަ ދެއްކުމަކީ އުދަގޫ ކަމެއްހެން މި ހުރިހާ ދުވަސް ވަންދެން ހިލްޔާއަށް ހީވެފައިވިއެވެ.

“އަހަރެން…ބޭނުންވަނީ މަރުވާން، މާމާ. ދިރިއުޅޭކަށް ބޭނުމެއް ނޫން. ދުނިޔެ ދޫކޮށްލަން ބޭނުންވަނީ.”

އެ ބަސްތައް ފުރަތަމަ ފަހަރަށް ދުލާއި ހަމައަށް ގެނެވުމުން ހިލްޔާގެ ލޯ ކަރުނުން ފުރިގެން ދިޔައެވެ. ހިތަށް ވެރިވެފައި އޮތް ބޮޑު ބުރައެއް ހިއްލާލެވުނު ކަހަލަ އިޙްސާސެއް ކުރެވުނެވެ. އޭނަގެ މި ޙާލަތުން އަރައިގަނެވޭނެ ފަދަ ނަސޭޙަތެއް މާމަ ދޭނެ ކަމަށް ހިލްޔާއަށް އުއްމީދު ކުރެވުނެވެ. އެހެނަސް ފާއިތުވި ހިމޭންކަމަށްފަހު މާމަ ބުނެލީ ހިލްޔާ އުއްމީދު ވެސް ނުކުރާ ފަދަ ބަސްތަކެވެ.

“ދުނިޔެ ދޫކޮށްލާ.”

މާމަ އެ ބުނި ބަސްތަކާއިއެކު ހިލްޔާގެ ލޮލަށް ޖަމާވެފައިވި ކަރުނަތަކުގެ ތެރެއިން ކަރުނައެއް ކޯތާފަތަށް ފޭބިއެވެ. އެހިނދު ރޮވެން އުޅެފައިވެސް މޫނުމައްޗަށް ޙައިރާންކަމެއް ވެރިވިއެވެ. ކަންފަތަށް އިތުބާރު ކުރަން ނޭނގިފައި އިނދެ ހިލްޔާއަށް ވާހަކަ ދެކެވުނެވެ.

“ވަޓް އާރ ޔޫ ސޭއިންގް މާމާ؟ އަހަރެން ކޮންމެހެން ބޭނުމެއް ނުވެއޭ މަރުވާން. މި ބުނީ….ބޭނުންވޭ. އެކަމަކު އެކަހަލަ ފާފައަކަށް އަރާކަށް ބޭނުމެއް ނޫން.” ހިލްޔާއަށް ކަންބޮޑުވުމަކާއިއެކީ ބުނެވުނެވެ. މާމަ މޮޔަވީތޯ ވެސް ހިނދުކޮޅަކަށް ހިތަށްއެރިއެވެ.

“ފާފައަކަށް އަރައިގަންނާށޭ ނުބުނަން. ދުނިޔެ ދޫކޮށްލާފަ އާޚިރަތަށްޓަކައި އުޅޭށޭ މި ބުނީ.”

މާމަ އެ ބުނެލި ޖުމްލައިން ހިލްޔާގެ ނިތުން ރޫތައް ފިލައިގެން ދިޔައެވެ. އެތައް އަހަރެއް ވަންދެން ލޮލުގައި އެޅިފައިވި ފަރުދާއެއް އުފުލިގެން ދިޔަހެން އެ ހިނދުކޮޅުގައި ހީވިއެވެ.

ނުނިމޭ