ނަފްސީ (ސައްބީސްވަނަ ބައި)

“ކީއްވެ ތިކަން އެނގެން ހިލްޔާ ޝައުޤުވެރި ތިވަނީ. ޔޫ އާރ ނޮޓް އިންޓްރެސްޓެޑް އިން ހިމް. އެހެންވީމަ ކީއްކުރަން ދާނިޝް އާއިމެދު ތި ކަންބޮޑުވަނީ؟” ބައްޕަ އެ ކޮށްލި ސުވާލާއިއެކީ ހިލްޔާގެ އަނގަ ބަންދުވިއެވެ. އެހެނަސް އަމިއްލަ ނަފްސުގެ ދިފާޢުގައި އަވަސްއަވަހަށް ވާހަކަ ދެކެވުނެވެ.

“ކޮންމެހެން ދާނިޝްއާއިމެދު ކަންބޮޑެއް ނުވޭ. ކްލިނިކްގެ ކަންތަކާއިމެދު ކަންބޮޑުވެގެން ދެއްކި ވާހަކައެއް އެއީ. އެނީވޭސް ބައްޕާ. އަހަރެން ބައްޕަ އާ ދައްކަން މުހިއްމު ވާހަކައެއް އެބައޮތް.” ހިލްޔާ ކުއްލި ގޮތަކަށް އެ ފަހު ޖުމްލަ ބުނެލީ ރާފިލް މަތިން ހަނދާން ކުރަމުންނެވެ. ދާނިޝްއަށްވުރެ ބޮޑަށް ރާފިލްއާއި މެދު ހަނދާން ކުރަން ގަދަ އަޅައި މަސައްކަތް ކުރަމުންނެވެ.

“ކޮން ވާހަކައެއް؟” ބައްޕަ ދެ ބުމަ ކައިރި ކޮށްލަމުން އެހެން އަހާލުމާއިއެކު ހިލްޔާގެ ހިތް ނުތަނަވަސްވިއެވެ. އޭނައާއި ރާފިލްގެ ވާހަކަ ބައްޕަ ގާތު ބުނަން ބޭނުންވިއެއްކަމަކު އެ ގުޅުމުގެ ވާހަކަ ބުނުމުން ބައްޕައަށް ވާނެ ގޮތެއް އަންދާޒާ ނުކުރެވުނީތީވެއެވެ.

“ފް…ފަހުން ބުނާނަން ބައްޕާ.” އެ ނުތަނަވަސް ކަމުގައި ހިލްޔާއަށް އެހެން ބުނެލަމުން ސޯފާއިން ތެދުވެލެވުނެވެ. މުސްތަޤްބަލާއިމެދު ބުނެވުނު އެ ވާހަކައަށް ‘އިން ޝާ ﷲ’ ނުބުނެވޭކަން ހަނދާންވީ މާ ދުރަށް ހިނގައިގަނެވުނު ފަހުންނެވެ. އެ ހިނދު ހިލްޔާއަށް ދެލޯ މަރައި ތަގުޅި ކޮށްލެވުނެވެ. އޭނައަށް ‘އިން ޝާ ﷲ’ މި ފަހުން އައިސް ކިޔެނީ ވަރަށް ވެސް މަދުންނެވެ. އެއީ ކީއްވެކަން ދަނެގަންނަން ހިލްޔާ ނުކުޅެދިފައިވިއެވެ. އެހެނަސް އެ ކަމާއިމެދު ކަންބޮޑުވަނީ ކުޑަ ވަގުތު ކޮޅަކަށެވެ. ވާނީވެސް އެހެންތާއެވެ. ނޭނގުމެއްގެ ތެރެއިން ވެސް ހިލްޔާގެ ހިތް ﷲ ގެ ހަނދުމައިން ދުރުވުމުގެ ސަބަބުން ދުނިޔޭގެ ކަންތަކުން ހިތް ފުރިފައިވެއެވެ. ނަތީޖާއެއްގެ ގޮތުން ދުވަހުގެ ގިނަ ވަގުތު ފިކުރު ކުރެވެނީ ވެސް ކޮންމެވެސް ދުނިޔަވީ ކަމަކާއި މެދުގައެވެ. މިހެން އުޅެމުން ހިތަށް ކުރިމަތިވެފައިވާ ބަލިމަޑުކަމަށް ފަރުވާއެއް ދެވޭނީ ވެސް ކިހިނެއް ހެއްޔެވެ؟

ޣާފިލުކަމުގައި ހިލްޔާ ދުވަސްތައް ގުނަމުން ދިޔައިރު، ދާނިޝް އެ ޣާފިލުކަމުން ނިކުންނަން މަސައްކަތް ކުރަމުން ދިޔައެވެ. އެރޭ ހިތުތެރޭގައި އެހާ ބޮޑު ހައިޖާނެއް އުފެއްދި ޙާލަތަށް ފަހު ވެސް ގަދަކަމުން ނަމާދު ކުރިއެވެ. އަދި އެއަށްފަހު ވެސް ނަމާދުތަކަށް ފަރުވާތެރިވިއެވެ. ނަމާދު ކުރާ ހިތް ނުވިޔަސްމެއެވެ. މަންމަ މަތިން ހަނދާން ކުރަމުންނެވެ. މަންމައާއި ސުވަރުގެއިން ބައްދަލުވާން ބޭނުންވާކަން ހަނދާން ކުރަމުންނެވެ. ނޭނގި ނަމަވެސް އީމާންތެރިކަން ބަލިކަށިވީ އެ ޙާލަތުގައި ވެސް ދާނިޝްއަށް ރަނގަޅު ގޮތުގައި ހިފަން ދަސްވިއެވެ.

ދާނިޝްގެ ހިތުތެރޭގައިވި އިޙްސާސްތަކަށް އިންޤިލާބެއް އައީ އެދުވަހު ހަވީރު ނަހީދުބެ އޭނައަށް ގުޅައި ރޭގެ ޙާދިސާ އާއިމެދު ސުވާލު ކުރުމުންނެވެ. ހިލްޔާ ދެއްކި ވާހަކައެކޭ ބުނެ ކިޔައިދިން ވާހަކަތަކުން ދާނިޝް ބިން ފަޅައިގެން ގޮސް ވަޅުލެވެން ބޭނުންވިއެވެ. ނަހީދުބެއަށް ހުރިހާ ވާހަކައެއް ތެދުތެދަށް ކިޔައިދެވުނީ ވެސް ޖެހިލުންވުމަކާއި އެކީގައެވެ. ހަމަ އެއާއިއެކު ހިލްޔާ އޭނައާއިމެދު ދެކޭނެ ގޮތާއިމެދު ވެސް ކަންބޮޑުވިއެވެ. ހިލްޔާ އަކީ އޭނަ އިންނަން އުޅޭ ކުއްޖާ ކަމާއި، ނަހީދުބެއަކީ އޭނަގެ ވާން އުޅޭ ބަފައިބެހެން ހީވާ ދަރަޖައަށެވެ. ދާނިޝްއަށް ކޯލު ނިންމުމަށްފަހު ވެސް އެ އިޙްސާސްތަކާއި ދުރުވެވުނީ އިރުކޮޅެއް ފަހުންނެވެ. ހިލްޔާއަކީ އޭނަގެ މީހެއް ނޫންކަން ޤަބޫލު ކުރަން އޭނައަށް ދަތިވާ ގޮތުން ޚުދު ދާނިޝް ވެސް ޙައިރާންވާހާ ވެއެވެ.

ދާނިޝްއަށް އެފަދަ އިޙްސާސްތައް ކުރެވެމުން ދިޔައިރު، ރާފިލްއަށް ކުރެވެމުން ދިޔައީ އެއާއި އިދިކޮޅު އިޙްސާސްތަކެވެ. ހިލްޔާ އޭނައާއި ރައްޓެހިވެގެން އުޅުނެއްކަމަކު ހިލްޔާއަކީ އޭނަގެ މީހެއް ނޫންހެން ރާފިލްއަށް ހީވަމުން ދިޔައެވެ. ވަކިން ޚާއްސަކޮށް ރޭ ހިލްޔާ ދެއްކި ވާހަކަތަކުންނެވެ. ކްލިނިކް ގައި ދާނިޝް އާއި ކޮންމެވެސް އަންހެން ކުއްޖަކާއި ދެމެދު ހިނގި ކަންތައްގަނޑެއްގެ ވާހަކަ ކިޔައިދިން އިރު، ހިލްޔާގެ އަޑުގައިވި ޙަސަދަވެރިކަން ރާފިލްއަށް މާ ރަނގަޅަށް ވެސް ނަގައިގަނެވުނެވެ. އެހެންކަމުން ރާފިލް އެ ވާހަކަތައް އަޑު އަހަމުން ދިޔައިރު ދެ ކަމަކަށްޓަކައި ދާނިޝްއަށް ޙަސަދަވެރިވިއެވެ. އެއްކަމަކީ ހިލްޔާއަށް ދާނިޝް ކަމުދާހެން ހީވުމެވެ. ދެވަނަ ކަމަކީ ހިލްޔާ އެ ސިފަ ކުރި ފަދަ އަންހެން ކުއްޖެއްގެ ސަމާލުކަން ދާނިޝްއަށް ލިބުމެވެ.

އެ ވާހަކަ އަޑުއަހަމުން ދިޔައިރު ވެސް ހިލްޔާ އެ ސިފަ ކުރި އަންހެން ކުއްޖަކާއި މެދު ރާފިލް ޝައުޤުވެރިވިއެވެ. އެއީ އޭނައާއި އެންމެ ގުޅޭނެ ޒާތުގެ އަންހެން ކުއްޖެއްކަން ޔަޤީން ކުރެވުނެވެ. އެ ކުއްޖާ ހުންނާނެ ގޮތް ސިފަ ކުރަން ގަދަ އަޅައި މަސައްކަތް ކުރެވުނީ ވެސް އެހެންވެއެވެ. އެންމެ ފަހުން ކެތްތެރިކަން ކޮޅުންލުމުން އެރޭ ކްލިނިކަށް ދާން ރާފިލް ނިންމިއެވެ. އެ ކުއްޖަކު ކްލިނިކަށް އަންނާނީ ދާނިޝް ޑިއުޓީއަށް އަންނާނެ ގަޑިއެއްގައި ކަމަށް ހީކުރެވުމުންނެވެ. އަދި އަމުދުން މިރޭ އޭނަ ކޮންމެހެން ވެސް ހިލްޔާގެ ކުރިމަތީގައި ދާނިޝް ދަށްކޮށް، އެދެމީހުންގެ ގުޅުމާއިމެދު ދާނިޝް ޙަސަދަވެރި ކޮށްލަން ބޭނުންވިއެވެ.

**

ރާފިލް ރޭވުމެއް ރާވާކަމާއި މެދު ރޭކާ ވެސް ލުމެއް ނެތި ހިލްޔާ އެރޭ ޑިއުޓީއަށް ދިޔައެވެ. ކުރީ ރެއެކޭ އެއްފަދައިން ކްލިނިކް ގެ ޕާކިންގް އޭރިއާގައި ހިލްޔާއަށް ކާރު ޕާކް ކޮށްލެވުނުއިރު ގަޑިން 7:50 ވީއެވެ. ކާރު ޕާކް ކުރުމަށްފަހު ހިލްޔާއަށް ފޯނަށް ނަޒަރެއް ދެވުނީ ރާފިލް ގެ މެސެޖެއް އައިސްފައި ހުރިތޯ ބެލުމަށެވެ. އެހެނަސް މެސެޖެއް އައިސްފައި ނެތުމުން ހިލްޔާ ޙައިރާންވިއެވެ. އެ ދުވަހު ހަވީރުގެ ކޯލުގައި އޭނައަށް ރާފިލް ނުރުހޭ ކަހަލަ ވާހަކަ ދެއްކުނީތޯ ހިތާހިތުން ސުވާލު ކޮށްލެވުނެވެ. އެއީ އެ ހިނދުކޮޅުގައި ބޮޑު ފިކުރަކަށް ވިއެވެ. ﷲ ގެ ރުހިވޮޑިގަތުމާއިމެދު ފިކުރު ނުކުރެވޭ ވަރަށް މީހުންގެ ރުހުމާއި މެދު ވިސްނެމުން ދިޔައެވެ. މީހުންގެ ރުހުމުގެ މައްޗަށް ހިތް ބަރޯސާވުމަކީ ހާދަ ދެރަ، ނިކަމެތި ޙާލަތެކެވެ.

ކޮންމެއަކަސް ޑިއުޓީ ގަޑި ކައިރިވަމުން ދާތީ ގިނައިރު ކާރުގައި ނުއިނދެ ކާރުން ފައިބަން ހިލްޔާއަށް ޖެހުނެވެ. ކާރުން ފައިބައިގެން ކްލިނިކަށް ވަންނަމުން ދިޔައިރު ހަނދާންވާން ފެށީ ދާނިޝް މަތިންނެވެ. އެއާއިއެކު ހިލްޔާގެ ހަމަޖެހުމެއް ނުވާ ހިތުގެ ސަބަބުން ހުރިހާ ވިސްނުމެއް ދެން ދިޔައީ ދާނިޝްއާއި މެދު ފިކުރު ކުރުމަށެވެ. އެދުވަހު ހަވީރު ޒިކުރު ނުކިޔޭކަން ވެސް ދޭތެރެއަކުން ހަނދާންވިއެއްކަމަކު، މީހުންގެ ފިކުރުތަކުން ސިކުނޑި ފުރިފައިވުމުން ޒިކުރު ކިޔަން ނުކުޅެދުނެވެ. އެހެން ކަންތަކުން ފުރިފައިވި ހިތަކުން ޒިކުރު ކިޔުމަށް ދޫ ޙަރަކާތް ކުރުވާނީ ކިހިނެއް ހެއްޔެވެ؟

ދުނިޔެއާއި އާޚިރަތުގައި ވެސް ފައިދާއެއް ނެތް ޚިޔާލުތަކެއްގައި ހުރެ ހިލްޔާ ގޮސް ސައިން އިން ކުރިއިރު، ދާނިޝް ފެނުމުގެ ނަސީބެއް ހިލްޔާއަށް ނުލިބުނެވެ. އެކަމާއިހެދި މޫޑު ޚަރާބުވެފައި ހުރެ ކޮންސަލްޓޭޝަން ރޫމުތަކާއި ދިމާލަށް ދާން އުޅެނިކޮށް، ކްލިނިކް ގެ މައިދޮރު ހުޅުވުނު އަޑު އިވުނެވެ. އެއާއިއެކު ފަސްއެނބުރި ބަލާލިއިރު، ދާނިޝް އެ ދޮރުން ވަދެގެން އައީއެވެ. ދާނިޝް އޭނަ ފެނިފައި ކުޑަކޮށް ހުއްޓުން އެރިކަން ހިލްޔާއަށް ފާހަގަވިއެވެ. އެއީ ކީއްވެކަމެއް ހިލްޔާއަށް ނޭނގުނެވެ. ދާނިޝް މަޑުމަޑުން އިސްޖަހާލަމުން އަނެއްފަރާތަށް އެނބުރި ސައިން އިން ކުރިތަން ފެނިފައި ހިލްޔާ އަނެއްކާވެސް ދާނިޝްއަށް ފަސް ދިނެވެ. އެހެނަސް ހިލްޔާއަށް މާ ދުރަށް ނުދެވެނީސް ދާނިޝްގެ އަޑު އިވުނެވެ.

“ހިލްޔާ!”

ދާނިޝް ގޮވާލި އަޑަށް، ހިލްޔާ ފިޔަވަޅުތައް މަޑުޖައްސާލަމުން އަނެއްކާވެސް ދާނިޝްއަށް ބަލާލިއެވެ. ނޭނގޭ ސަބަބަކާހުރެ ދާނިޝް އޭނައަށް ގޮވާލި ގޮތް ހިލްޔާއަށް ރީތިވިއެވެ.

“ކީކޭ؟” ދާނިޝް އެއްޗެކޭ ނުބުނުމުން ހިލްޔާއަށް އަހާލެވުނެވެ.

“އައިމް ސޮރީ…ރް…ރޭގަ ހިނގި ކަންތަކަށްޓަކައި. ދެން އެކަހަލަ ކަމެއް ނުހިނގާނެ…އިރާދަކުރެއްވިއްޔާ.” ދާނިޝް އިސްޖަހައި، އިސް އުފުލަމުން ކުށްވެރިއެއް ފަދައިން ވާހަކަ ދެއްކިއެވެ.

އެއާއިއެކު ކަން ހިނގާފައިވާނެ ގޮތް ހިލްޔާއަށް ވިސްނުނެވެ. ބައްޕަ އޭނަ ދެއްކި ވާހަކަތައް ދާނިޝްއަށް ކިޔައިދިނީ ކަން އެނގުންވިއެވެ. އަދި އެ ޚަބަރު ލިބިފައިވަނީ އޭނަގެ ފަރާތުންކަން ވެސް ދާނިޝްއަށް އެނގޭކަން ވެސް ފަހުމްވިއެވެ.

“ވެލް….ތިއީ އުއްމީދަކީ. ދެން އެކަހަލަ ކަމެއް ނުހިނގާނެކަމަށް. ތަންކޮޅެއް ބިރުވެރިވެސްމެ ދޯ ބީރައްޓެއްސެއް އައިސް ކްލިނިކްގެ ސްޓާފް އޮންލީ ރޫމަކަށް ވަނީމަ…” ހިލްޔާއަށް ނޭނގުމެއްގެ ތެރެއިން ވެސް ވާހަކަ ދެކެވުނީ އޭނަ އެވަގުތު ވީ ދާނިޝްއަށް ވުރެ މަތިވެރި މަޤާމެއްގައި ކަމަށް ޤަބޫލު ކުރަމުންނެވެ. ދާނިޝް އެވަގުތު ފެނުނީ ހަމައެކަނި އޭނަގެ މުއްސަނދި ބައްޕަގެ މުވައްޒަފެއްގެ ގޮތުގައެވެ.

ރާފިލްގެ މިޒާޖުގެ ނޭދެވޭ އަސަރު ހިލްޔާއަށް ކޮށްފައިވެއެވެ. އެއީ ރާފިލްއާއި ދިމާވުމުގެ ކުރިން ވެސް ހިތުތެރޭގައިވި އުފަންވެފައިވި ކިބުރުވެރިކަމެކެވެ. އަމިއްލަ ކުށްތަކަށް އިޢުތިރާފުވުމުގެ ބަދަލުގައި އެ ކުށަށް ފަސްއަޅަން މަސައްކަތް ކުރުމުން ޖެހުނު ބައްޔެކެވެ. ރާފިލްގެ އުޅުން ފެނިފައި ހިލްޔާ އެ ކިބުރުވެރިކަން ދެގުނަވެގެން ދިޔައެވެ. ދުނިޔޭގައި އުޅޭ ‘މޮޅެތި’ މީހުންނަށް އެހެން ނޫނަސް ދެން ތިބި މީހުން ފެންނާނީ ދަށްކޮށް ނޫންތޯ މިހާރު ހިލްޔާގެ ހިތް ބުނެއެވެ.

“އެނގޭ. އެއީ އެއްގޮތަކަށް ވެސް ސޭފް ކަމެއް ނޫން. އެހެންވީމަ މިހާރު އެކަހަލަ ހުރިހާ ރޫމްތައް ލޮކްކޮށްފަ ހުންނާނީ ވެސް. ސެކިއުރިޓީ ވެސް ތަންކޮޅެއް ވަރުގަދަ ކުރަން އެބަ ޚިޔާލުކުރަން.” ދާނިޝް ކްލިނިކަށްޓަކައިވާ އިޚްލާޞްތެރިކަމާއި އެކީ އޭނަ ރޭވި ކަންތައް ކިޔައިދިނެވެ. އެހެނަސް ހިލްޔާއަށް އެވަގުތު ފެނުނީ އެ އިޚްލާޞްތެރިކަމުގެ ބަދަލުގައި އެހެން ކަމެކެވެ.

“އައި ނޯ ޔޫ އާ ހާޑް ވޯކިންގް ދާނިޝް. އެހެންވީމަ އަސްލު އެ ވާހަކަ ކިޔައިދިން އިރު ދާނިޝް ގެ ފޯލްޓެއް ހައިލައިޓް ނުކުރަން. ރޭ އަސްލު ހިނގީ ބައްޕަ ވަރަށް ނުރުހޭ ކަމެއް. އެކަމަކު ބައްޕަ ދާނިޝްއަށް ކުރާ ޓްރަސްޓް ގެ ސަބަބުން ހިއެއް ނުވޭ ދާނިޝްއަށް އެކްޝަނެއް ނަގާނެހެން. ޔޫ ވިލް ސްޓިލް ހޭވް ދިސް ޖޮބް. ޑޯންޓް ވޮރީ.” ހިލްޔާ ބުންޏެވެ. ދާނިޝްއަކީ އޭނަގެ ބައްޕަ ދޭ މުސާރަ ކޮޅު ގެއްލިދާނެތީ ބިރުން އުޅޭ މީހެއްކަމަށް ނިންމަމުންނެވެ.

ހިލްޔާއަށް ނޭނގުނަސް ދާނިޝްއަށް ހިލްޔާގެ އެ ބޮޑާކަން މާ ރަނގަޅަށް ވެސް ފެނުނެވެ. ހިލްޔާގެ ވާހަކަ ދެއްކުމުން އެ ފާހަގަވި ބަދަލުން ދާނިޝްއަށް ދެބުމަ ކައިރި ކޮށްލެވުނެވެ. އޭނައާއިމެދު ހިލްޔާ އެހާ ދަށްކޮށް ދެކުނީތީ ނުރުހުން ވެސްވިއެވެ. އެ ވީ ނުރުހުމުގައި އެއްޗެކޭ ބުނަން ހިތަށްއެރި ވަގުތު ކްލިނިކްގެ މައިދޮރު ހުޅުވުނެވެ. އެއާއިއެކު ދާނިޝްއާއި ހިލްޔާއަށް އެކުއެކީ ގައި އެދިމާލަށް ބަލާލެވުނެވެ.

ކްލިނިކްގެ މައިދޮރުން ވަދެގެން އައީ ހިނިތުންވުމެއްގައި ހުރި ރާފިލްއެވެ. ރާޅު ބާނި ނަގާ އިސްތަށިގަނޑު އެއްފަރާތަކަށް ކަހައި، ގަޔަށް ބާރު އޮރެންޖް ކުލައިގެ އަތް ކުރު ޓީޝާޓަކާއި ކަޅުކުލައިގެ ޖިންސް ގައި ރާފިލް ފެނުނީ ތަފާތު ގޮތަކަށެވެ. އެ ތަފާތު ގޮތް ހިލްޔާގެ ހިތަށް ވީ ރީތީގައި އެހެން ދިމާލަކަށް ބަލަން ނުކުޅެދުނެވެ. އެ ރީތިކަން ދެގުނަވީ މިއީ އޭނައާއި އިންނަން އުޅޭ އޭނަގެ މުއްސަނދި ލޯބިވެރިޔާކަން ހަނދާންވުމުންނެވެ. ދުނިޔޭގެ އެދުމުން ފުރިފައިވާ ހިތެއްގެ ހުރިހާ ޝަހުވަތެއް އެއްފަހަރާ ފުރިހަމަވަމުންދާ ފަދައެވެ.

ހިލްޔާ ބަލަބަލާ ހުއްޓާ ރާފިލް ބަދަލުނުވާ ހިނިތުންވުމެއްގައި އައިސް ހިލްޔާގެ ކުރިމަތީގައި މަޑުކޮށްލިއެވެ. ދުވަހަކުވެސް ނުވާހާ ރީތިވެ، ދުވަހަކުވެސް ހިލްޔާއަށް ނުދައްކާހާ ރަނގަޅު މޫޑެއްގައި ހުރީ ފަހަތުގައި ހުރި ދާނިޝްއަށް ދައްކަން ކަން އެކަކަށް ވެސް ނޭނގެއެވެ.

“ޔޫ ލުކް…ޑިފަރެންޓް!” ހިލްޔާއަށް ވެސް ފުރިހަމަ ހިނިތުންވުމެއްގައި ހުރެ ބުނެވުނެވެ. އެވަގުތު އެ ލޮބީ އޭރިއާގައި ތިބި ބައެއް ބަލިމީހުންނަށް އެމީހުން ފެންނަކަން ހިލްޔާއަށް އެނގުނެވެ. އެއިން ލިބުނީ އުފަލެކެވެ. އޭނަގެ ރީތި ލޯބީގެ ވާހަކަ އެންމެންނަށް ދައްކަން ބޭނުންވިއެވެ. ފިލްމުތަކުން ވާ ފަދައިންނެވެ.

“ފޯ ޝުއާރ ޔޫ މީން ހޭންޑްސަމް؟ ހަހަހަ….އިޓްސް އޯލް ފޯ ޔޫ، މައި ލަވް. ހިތަށް އެރީ މިރޭ މިތަނަށް އައިއްސަ ސަޕްރައިޒެއް ދޭނީއޭ ލޯބިއަށް.” ރާފިލް ވެސް ވާހަކަ ދެއްކީ، ވަށައިގެން ތިބި މީހުންނަށް ވަންހަނާ ވާނެ ޒާތަކަށް ނޫނެވެ. އެމީހުންގެ ވާހަކައިން އެތާ ތިބި ބަލިމީހުންނަށް ވާނެ އުދަގުލަކަށް ފަރުވާލެއް ނެތެވެ.

އެކަން ފާހަގަވި މީހަކަށް ހުރީ ދާނިޝްއެވެ. އެހެނަސް ރާފިލް ގެ ގޮތް އެނގޭތީ އެއްޗެކޭ ނުބުނެ ހުރެވުނެވެ. ނާއިފްއާއި ޑިއުޓީ ބަދަލުކުރަން ރިސެޕްޝަނާއި ދިމާލަށް ދާން އުޅެފައިވެސް ނުދެވިފައި ހުރެވުނީ ހިނިތުންވުމެއްގައި ހުރި ހިލްޔާ ފެނިފައެވެ. ކިތަންމެ ބޭނުމެއް ނުވިޔަސް އެވަގުތު ރާފިލްއަށް ހަސަދަވެރިވިއެވެ. ހިލްޔާގެ ހިނިތުންވުމުގެ ފަހަތުގައިވާ ސަބަބަކަށް އޭނަ ވާން ބޭނުންވިއެވެ. އޭނައަށް އެ ނަސީބު ނުލިބޭނީތޯ ހިތަށްއެރިއެވެ.

“މިއަދު އަހަރުމެންގެ 2 ވީކް އެނިވާރސަރީއެއްނު؟ އެހެންވީމަ މިރޭ ހިލްޔާއަށް ދޭން ސީރީސް އޮފް ސަޕްރައިޒެސް އެބަހުރި!” ރާފިލް އެ ބުނި ވާހަކައިން ހިލްޔާއަށް ހީލެވުނެވެ.

“2 ވީކް އެނިވާރސަރީ ވެސް މީހުން ހަދާތަ؟ ހެހެހެ….” ހިލްޔާ ސުވާލުކުރިއެވެ.

“ވެލް އައި ޑޫ. މިއީ އަހަރެން 2 ވީކް އެނިވާރސަރީ އަންހެން ކުއްޖަކާ އެކު ހެދި ފުރަތަމަ ފަހަރު. އެންޑް އިޓްސް ސްޕެޝަލް ފޯ މީ. ޔޫ ވިލް ނޯ ވާއި ޓުނައިޓް.” ރާފިލް ނުހަނު ޖަޒުބާތީ ގޮތަކަށް ބުންޏެވެ. އެ ބަސްތައް އިވިފައި ހިލްޔާ ރާފިލްގެ އޮޔާއި ޖެހިގެން ދިޔައެވެ. އޭނައަކީ ރާފިލްއަށް ޚާއްސަ މީހެއްހެން ހީވިއެވެ. މީގެ ކުރިން ރާފިލް އަންހެން ކުދިންނާއި ރައްޓެހިވެފައި ވިޔަސް ހިލްޔާއާއި ‘ކަނެކްޓް’ ވާ ގޮތަށް އެއްވެސް ކުއްޖަކާއި ރާފިލް ނުގުޅޭ ވާހަކަ ވެސް ނުހަނު ޖަޒުބާތީކޮށް ރާފިލް ކިޔައިދީފައިވެއެވެ. އެ އެކަނިވެރިކަމުގެ ފަސާނާގެ ހުރިހާ ބަހެއް ހިލްޔާއަށް ޤަބޫލު ކުރެވުނެވެ. ހިލްޔާ ރާފިލްއަށް ޚާއްސަ ވެވެން އޮތީ އެ ފަސާނާ ޤަބޫލު ކޮށްގެން ކަމަށްވުމުންނެވެ.

ރާފިލް އާއި ހިލްޔާ ލޯބީގެ ވާހަކަތައް އަޑުއަހަން އިތުރަށް ހުންނަން ބޭނުން ދާނިޝް ރިސެޕްޝަނާއި ދިމާލަށް ދާން ހިނގައިގަތެވެ. އެވަގުތު ނާއިފް ވެސް ރިސެޕްޝަނުން ނިކުންނަނީއެވެ. ނާއިފް އާއި ދިމާވުމުން ދުވަހުގެ މަސައްކަތާއި މެދު އެއްޗެކޭ ބުނަން އުޅުނު ވަގުތު ކްލިނިކް ގެ މައިދޮރު ހުޅުވުނު އަޑު އިވުނެވެ. އެއީ ބަލި މީހެކޭ ހިތައި ދާނިޝް އަޅާނުލަން ހުއްޓާ ރާފިލް ގެ އަޑު އިވުނެވެ.

“އޮހް! ދެޓްސް ޔުއާރ ފަސްޓް ސަޕްރައިޒް!” ރާފިލް އެހެން ބުނެލި އަޑަށް ދާނިޝް އާއި އެކީ ނާއިފް ވެސް އެ ދޮރާއި ދިމާލަށް ބަލާލިއެވެ. އެއާއިއެކު އެ ދޮރުން ވަދެގެން އައީ މާލޭގެ ބޮޑު އިލެކްޓްރޯނިކްސް ފިހާރައެއްގެ ޔުނިފޯމުގައި ތިބި ދެ ބޭރު މީހުންނެވެ. އެ ދެމީހުން ވަދެގެން އައީ ޕާރުސަލް ކުރެވިފައިވާ ބޮޑު ފޮށްޓަކާއި އެކީގައެވެ.

“އެއީ ކޯޗެއް؟” ހިލްޔާ ރާފިލް އާއި ކޮށްލީ، އެތާ ތިބި އެންމެންގެ ހިތުގައި ވެސް އޮތް ސުވާލެވެ.

“މިނީ ބާރއެއް. ހިލްޔާ ގެ ކޮންސަލްޓޭޝަން ރޫމުގަ ބަހައްޓަން. ކުރީ ދުވަހު ބުނީމެއްނު ހިތަށް އަރައޭ ދިގު ޑިއުޓީ ގަޑިއެއްގަ ފިނި އެއްޗެއް ބޯލަން ލިބޭނެ ނަމައޭ. ސޯ އައި ތޯޓް އައި ވިލް ގިފްޓް ޔޫ ދިސް.” ރާފިލް އެ ބުނި ވާހަކައިން ހިލްޔާ ގެ ހިތް އުފަލުން ނަށައިގަތެވެ. އޭނަ ލޯބިވެރިޔާއަކީ އޭނަ ބުނާ ބަސްތައް ހަނދާން ކޮށްގެން ހުރެ އޭނަގެ މައްސަލަތައް ޙައްލު ކޮށްދޭ މީހެއްކަން އެނގުންވުމުންނެވެ. ހިލްޔާ ބަލަބަލާ ހުއްޓާ ފިހާރައިން އައި ދެމީހުން ދާނިޝް ދެއްކި ގޮތަށް ކްލިނިކްގެ މައިދޮރު ކައިރިން ފާރު ކައިރީގައި ބެހެއްޓިއެވެ.

“ސޯ ކޮންސިޑަރޭޓް އޮފް ޔޫ ލަވް! އައި ރިއަލީ އެޕްރިޝިއޭޓް!” ހިލްޔާއަށް ބުނެވުނެވެ.

“އެނީތިންގް ފޯ ޔޫ މައި ލަވް. ދެން މިއޮތީ އިންވިޓޭޝަނެއް. ކޮންސަލްޓޭޝަން ރޫމަށް ގޮސް މާ ލަސްނުކޮށް މީތި ބަލާލައްޗޭ.” ރާފިލް ފިޔާތޮށި ކުލައިގެ ސިޓީ އުރައެއް ދިއްކުރިއެވެ.

“އޯކޭ. ބާއި ދެން! ޕޭޝަންޓްސް ވެއިޓް ކޮށްގެން އެބަ ތިބި.” ހިލްޔާ ލޮބީ އޭރިއާގެ ގޮނޑިތަކުގައި ތިބި ބަލިމީހުންނަށް ނަޒަރެއް ދެމުން ބުންޏެވެ.

“އޯލްރައިޓް! ބާއި ލަވް!” ރާފިލް ހިނިތުންވުމަކާއިއެކީ އެހެން ބުނުމުން ހިލްޔާ ލުއި ހީލުމަކަށްފަހު އެތަނުން ދާން ހިނގައިގަތެވެ.

ހިލްޔާ ލޯ މައްޗަށް ގެއްލުމުން ރާފިލް ދެން ނަޒަރު ހުއްޓާލީ ރިސެޕްޝަންގައި ހުރި ދާނިޝް އާއި ދިމާލަށެވެ. އޭނަގެ މުރާދު ޙާޞިލުވީތޯ ޔަޤީން ކުރުމަށެވެ. ރިސެޕްޝަން މޭޒުގެ ފަހަތަށް ވަދެ އިށީންނަން އުޅުނު ދާނިޝް، ރާފިލް ބަލަހައްޓައިގެން ހުރިތަން ފެނިފައި މަޑުކޮށްލިއެވެ. އެ މަޑުކޮށްލި މަޑުކޮށްލުމުގެ މާނަ ރާފިލް ނެގީ ޙަސަދަވެރިކަމުގެ ގޮތުގައެވެ. އެ ލޯމަތިން ވަކި ތަފާތެއް ފާހަގަ ނުކުރެވުނަސް ރާފިލް އޭނަގެ މުރާދު ޙާޞިލުވީ ކަމަށް ނިންމައި ހިނިތުންވެލިއެވެ. އަދި އެކަމަށްޓަކައި އަމިއްލަ ނަފްސަށް ތަޢުރީފު ކުރިއެވެ.

އެއަށްފަހު ރާފިލް ކްލިނިކުން ނިކުންނަން ދިޔުމަށް މައިދޮރާއި ދިމާލަށް އެނބުރުނެވެ. އެހެނަސް އެވަގުތު މިރޭ އޭނަ ރޭވި އެހެން ކަމެއްގެ މަތިން ހަނދާންވުމުން އަނެއްކާވެސް ރިސެޕްޝަނަށް ބަލާލަމުން އެދިމާލަށް ހިނގައިގަތެވެ.

ރާފިލް ގޮސް ރިސެޕްޝަން ކައިރީގައި މަޑުކޮށްލިއިރު ދާނިޝް އިނީ ގޮނޑީގައި އިށީނދެލައިގެންނެވެ. ރާފިލް ހުރިކަން އެނގި ދާނިޝް އޭނައަށް ބަލައިލިއެވެ.

“ހައު ކޭން އައި ހެލްޕް ޔޫ؟” ދާނިޝް ކޮށްލީ ރިސެޕްޝަނަށް އަންނަ ކޮންމެ މީހަކާއި ވެސް ކުރާ ސުވާލެވެ.

“ރޭގަ…ކްލިނިކަށް އަހަރެންގެ ކޮއްކޮ އައިދޯ؟” ރާފިލް ރިސެޕްޝަން ގައި އަތް އަޅުވާލަމުން ދޮގަކުން ވާހަކަ ފެށިއެވެ. އޭނަ ބޭނުންވީ ރޭ އައި އަންހެން ކުއްޖާގެ ތަފްޞީލު ދާނިޝް ކައިރިން ހޯދާށެވެ.

“ކޮއްކޮއޭ؟ ނުދެނަހުރިން.” ދާނިޝްގެ ދެބުމަ ކައިރިވިއެވެ.

“ކޮއްކޮއޭ ބުންޏަސް ކުޑަ ކުއްޖެއް ނޫނޭ. ޓުވެންޓީސް ގަ އުޅޭ ކުއްޖެއް. ހިމަހިމަކޮށް ހުންނާނީ. ޓޮޕްއާއި ޖިންސް ލައި އުޅޭނީ. ބިއުޓިފުލް ބްރައިޓް ސްކިން. ރޭގަ ކޮއްކޮ ދާނިޝްއާ ވަރަށް ގިނައިރު ވަންދެން ވާހަކަ ދައްކަން ހުރި ވާހަކަ ހިލްޔާ ބުނި.” ރާފިލް ބުންޏެވެ.

ރާފިލް އެ ދެއްކި ވާހަކަތަކުން އެތައް ސަބަބަކާހުރެ ދާނިޝްގެ މޭނުބައި ކުރިއެވެ. ފުރަތަމަ ކަމަކަށް ރާފިލް އެ ދައްކަނީ ޒިވް ގެ ވާހަކަ ކަން އެނގުމުންނެވެ. ދެވަނަ ކަމަކަށް ރާފިލް އޭނަގެ ‘ކޮއްކޮ’ ސިފަ ކުރި ގޮތުންނެވެ. ތިންވަނަ ކަމަކަށް ރޭ ހިނގި ކަންތަކުގެ ވާހަކަ ހިލްޔާ ރާފިލްއަށް ވެސް ކިޔައިދިން ކަން އެނގުމުންނެވެ.

ރާފިލް ޖަވާބެއްގެ އިންތިޒާރުގައި ހުންނަން ފެށުމުން ދާނިޝްއަށް ވާހަކަ ދެކެވުނެވެ.

“ރާފިލްގެ ކޮއްކޮއެއް މިތަނަށް އައިއްޔާ ރާފިލްއަށް ދޯ އެންމެ ރަނގަޅަށް އެނގޭނީ؟” ދާނިޝް ބުންޏެވެ. ޒިވް ގެ ބޭބެއެއް ނުހުންނަކަން ވެސް ހަނދާންވެ، އޮޅުން އަރާފައި އިނދެއެވެ.

“އެއީ ޢާއިލާއަށް ފިލައިގެން އުޅޭ މީހެކޭ. ދުނިޔެއިން މޮޔަވެގެން އުޅޭ އަންހެނެއް އެއީ. ދެން ފަހަރަކު ކްލިނިކަށް އައިއްޔާ އަހަންނަށް އަންގާލަދެއްޗޭ. ރޭ އައިއްސަ ނަންބަރެއް ކަހަލަ އެއްޗެއް ދިންތަ؟ މިރޭ އަންނާނަމޭ ބުނިތަ؟” ރާފިލް ދެން ދެއްކި ވާހަކަތަކުން ދާނިޝް އިތުރަށް އޮޅުން އެރުން ނޫންކަމެއް ނުވިއެވެ. އޮޅުން އެރި ވަރުން ރާފިލް އެ ދައްކަނީ ޒިވް ގެ ވާހަކަ ނޫންބާއޭ ވެސް ހިތަށްއެރިއެވެ.

“ނުދޭ ނަންބަރެއް. ހިއެއްނުވޭ އަންނާނެ ހެނެއް.” ދާނިޝްއަށް ބުނެވުނެވެ. އެއާއިއެކު ރާފިލް ޗޮކެއް ކަނޑާލަމުން އަތުން ބޮލުގެ ފުއްކިބައިގައި ފިރުމާލިއެވެ.

“އޯކޭ އެހެންވިއްޔާ. އެ ކުއްޖާގެ ޚަބަރެއް ވިއްޔާ އަހަންނަށް އަންގާލަދެއްޗޭ.” ރާފިލް ބުންޏެވެ. ދާނިޝް އެ ވާހަކައަށް ބޯޖަހާލުމުން ރާފިލް އިތުރު އެއްޗެކޭ ނުބުނެ ދާން ހިނގައިގަތީ، އޭނައަށް އެ ރީތި އަންހެން ކުއްޖާ ނުފެނުނު ކަމުގެ މާޔޫސްކަމާއި އެކީގައެވެ. އެހެނަސް އެ މާޔޫސްކަން ހިސާބަކަށް ފޭދިގެން ދިޔައީ، އޭނަ މިރޭ ކޮންމެހެން ވެސް އޭނައާއި ހިލްޔާ ގެ ގުޅުން އިތުރު ފައްތަރަކަށް ގެންދިޔުމަށް ރާވާފައިވާ ރޭވުން މަތިން ހަނދާންވުމުންނެވެ.

**

ކޮންސަލްޓޭޝަން ރޫމަށް ވަދެވުމާއިއެކު އެހެން އެއްވެސް ކަމެއް ކުރުމުގެ ކުރިން ހިލްޔާ އަވަސްވީ ރާފިލް ދިން ކުޑަ ސިޓީ އުރަ ހުޅުވުމަށެވެ. ހަމަޖެހިލައިގެން މޭޒުދޮށުގައި އިށީނދެ، ހިލްޔާ އެ ސިޓީ އުރަ ހުޅުވައި، އޭގެ ތެރޭގައި އޮތް އޮމާން ހުދުކުލައިގެ ކާޑެއް ނެގިއެވެ. އޭގައި ހުރީ ރާފިލްގެ ރީތި އިނގިރޭސި ލިޔުމެވެ.

“ޔޫ، މީ އެންޑް ދަ ކްލައުޑް. އިޓްސް އަ ޑޭޓް! ޓައިމް: 10:00 އައި ވިލް ޕިކް ޔޫ ؛)”

ރާފިލް އެ މެސެޖު ލިޔެފައި އޮތް ގޮތުން ހިލްޔާއަށް ހެވުނުއިރު ކޯތާފަތް ވެސް ރަތްވިއެވެ. ‘ކްލައުޑް’ މި ބަހުގެ މަތީގައި ކޮޅިގަނޑެއް ކުރަހައި ކޮޅިގަނޑުގައި ވެސް އުފާވެރި މޫނެއް ކުރަހާފައިވިއެވެ. ކާޑުގައި މާ ބޮޑު ތަފްޞީލެއް ނެތަސް ރާފިލް އެ ބުނި އެއްޗެއް ހިލްޔާއަށް ނަގައިގަނެވުނެވެ. އޭނައާއި އެކީ ‘ދަ ކްލައުޑް’ ރެސްޓޯރެންޓަށް ދާން ބޭނުންވާ ވާހަކަ ކުރިން ވެސް ރާފިލް ބުނެފައިވެއެވެ. މިރެއަކީ ރާފިލްގެ އިންތިޒާރުގެ ނިމުން އަންނާނެ ރޭ ތާއޭ ހިތަށްއެރިއެވެ.

ރާފިލް އާއިއެކީ ރޭގަނޑު ބޭރަށް ދާ ޚިޔާލުން ހިތަށް އުދަގޫ ވިޔަސް، ހިލްޔާ އެކަމާއިމެދު ނުވިސްނޭތޯ މަސައްކަތް ކުރިއެވެ. ރާފިލް އޭނައާއިއެކު ބޭރަށް ދާން ބޭނުންވެގެން ހުންނަތާ ދުވަސްކޮޅެއް ވެއްޖެއެވެ. އަދި މިފަހަރު އެ ޚިޔާރު ކުރީ ވެސް އޭނަ އެދުނު ފަދައިން ޑިއުޓީއިން ބޭރު ވަގުތެވެ. މި ގަޑީގައި ނޫނީ ދެމީހުން ދިމާވާނީ ވެސް ކިހިނެއްތޯ ހިތައި ރާފިލްގެ ދަޢުވަތު އުފަލާއި އެކީ ޤަބޫލު ކުރަން ނިންމިއެވެ. އެހެންނޫނަސް 11 ޖަހާއިރު ގެއަށް އަޔަސް ބައްޕަ އޭނައާއި ސުވާލެއް ނުކުރާނެތީވެއެވެ. ބައެއް ރޭރޭ ބަލި މީހުން ގިނަވުމުގެ ސަބަބުން ޑިއުޓީ އެހާއިރަށް ވެސް ނިމޭތީވެއެވެ.

ބައްޕަ ހިލްޔާއާއިމެދު ދެކޭ ގޮތަކާއިމެދު ހިލްޔާއަށް ނުވިސްނެއެވެ. އަދި ﷲ ގެ ރުހިވޮޑިގަތުމަށްވުރެ ވެސް ހިލްޔާއަށް މިހާ ހިސާބަށް އައިއިރު މުހިއްމު ވެފައިވީ ރާފިލްގެ ރުހުން ކަމަށް ވެފައިވިއެވެ.

**

10 ޖެހި ވަގުތު އަނެއްކާވެސް ރާފިލް ކްލިނިކަށް ވަދެގެން އައި މަންޒަރު ފެނިފައި ދާނިޝް ގެ ތަބީޢަތް ގޯސްވިއެވެ. ރާފިލް އައީ ހިލްޔާގެ ކަމަކުތޯ ހިތަށްއެރި ވަގުތަކީ ޑިއުޓީ ނިންމާލާފައި ހިލްޔާ ލޮބީއަށް ނިކުމެގެން އައި ވަގުތެވެ. ދާނިޝް އެއްފަހަރު ހިލްޔާއަށް އަނެއްފަހަރު ރާފިލްއަށް ބަލާލި ވަގުތަކީ ދެ ލޯބިވެރިން އެކަކު އަނެކަކާއި ހިނިތުންވެލީ ވަގުތެވެ. އެ މަންޒަރު ފެނިފައި ހިތަށް ވީ އުދަގުލުން އިސްޖަހާލެވުނެއްކަމަކު ދެންވެސް އެ ދެމީހުން އެކީގައި ހިނގާފައި ދިޔަ މަންޒަރު ފެނުނެވެ. ދެވަނަ ފަހަރަށް ރާފިލް ހިލްޔާއަށް ދޮރު ހުޅުވައި ދިނުމުން ހިލްޔާ ރާފިލްއާއި އެކީ ނިކުމެގެން ދިޔަ މަންޒަރު ފެނިފައި ދާނިޝްގެ އަނގައިން ބޭރުވީ ލުއި އާހެއްގެ އަޑެވެ. އެއީ ވޭނީ އާހެކެވެ. ކުރީ ދުވަހާއި ޚިލާފަށް މިއަދު ހިލްޔާއާއި ރާފިލް ގެ ބައްދަލުވުމަށް އަންނާނެ ހުރަހެއް ނުވެސް ނެތްކަން އެނގުންވީ ހިނދު، ދާނިޝްއަށް އޭނަ ހިފަހައްޓައިގެން ހުރި ބިއްލޫރި ބަރުގައި އިހުނަށްވުރެ ބާރަށް ހިފަހައްޓާލެވުނެވެ.

**

ރާފިލް ގެ ކާރަށް އަރައި ސްޓާޓް ކޮށްލެވުމާއިއެކު ކުރީގެ އިނގިރޭސި ލަވައެއް އިވެން ފެށިއެވެ. އެއީ ކުރީ ދުވަހެކޭ ވެސް އެއްފަދައިން ލޯބީގެ ލަވައެކެވެ. ކާރު ޕާކިންގް އޭރިއާއިން ނެރެ، ދުއްވާލަމުން ރާފިލް އެ ލަވައިގެ މައިގަނޑާއި އެއްކޮށް ކިޔަން ފެށުމުން މި ހުރެވުނީ ހުވަފެނެއްގައި ހެން ހިލްޔާއަށް ހީވިއެވެ. އޭނަގެ ލޯބިވެރިޔާއަކީ ރީތިކޮށް ލަވަ ވެސް ކިޔާ މީހެއްކަން އެނގުންވުމުން އެކަމާއިމެދު ސުވާލު ކުރެވުނެވެ.

“އަދި ހިލްޔާއަށް ނޭނގެނީއެއް ނު؟ އެކި ބަސްބަހުން ވެސް ލަވަ ކިޔަން އެނގޭ. ޔުނިވާރސިޓީގަ އުޅުނުއިރު ވެސް ސްޓޫޑެންޓް ކްލަބްތަކުގެ ސިންގިންގް ކޮމްޕެޓިޝަންތަކުގަ ވެސް ބައިވެރިވިން. އެންމެން ބުނި ސިންގާރ އަކަށް ވާށޭ ވެސް. ހެހެ…އެކަމަކު އެއީ އެހާ ޕްރިސްޓީޖިއަސް ޖޮބެއް ނޫން ދޯ؟ އެކަމަކު އެބަ ވިސްނަން ލަވަ ކިޔާފަ އިންސްޓަގްރާމަށް އަޕްލޯޑް ކުރަން.” ރާފިލް ކާރު ދުއްވަމުން ހިލްޔާއަށް ލުއި ނަޒަރުތައް ދެމުން ވާހަކަ ދެއްކިއެވެ.

“ޔާ ދެޓް ވުޑް ބީ ކޫލް!” ހިލްޔާއަށް އެ ބަސްތައް ބުނެވުނީ އިޚްތިޔާރަކާއި ނުލައެވެ. ބުނެވުމާއިއެކު ހިސާބަކަށް ހުއްޓުން ވެސް އެރިއެވެ.

މީގެ މަސްތަކެއް ކުރިން ހިލްޔާއަކީ ލަވައާއި މިއުޒިކާއި ދުރުގައި އުޅުނު މީހެކެވެ. އެއީ ފުރާވަރުގައި ދީނާއި މެދު އުނގެނެން ފެށުމުން ނިންމި ނިންމުމެކެވެ. އަދި އަމުދުން ޤުރުއާނާއި އެކީ ގިނަ ވަގުތު ހޭދަ ކުރަން ފެށިފަހުން ލަވައާއި މިއުޒިކަށް މާ ބޮޑު ޝައުޤުވެރިކަމެއް ވެސް ނުހުރެއެވެ. ސޯޝަލް މީޑިއާގައި އެފަދަ އެއްޗެއް ޙިއްސާ ކުރުމަކީ އަދި މާ ދުރު ކަމެކެވެ. ޙިއްސާ ކޮށްފިނަމަ އެ ބަލާ ކޮންމެ މީހަކަށް އެއިން ކުރާނެ ނޭދެވޭ އަސަރުގެ ފާފަ އޭނަގެ ބޮލުގައި އެޅޭނެ ކަމުގެ ބިރަށެވެ.

އެހެނަސް މިއަދު މި ވަނީ މަންޒަރު ބަދަލުވެފައެވެ. ހިލްޔާއަށް މި އިނދެވުނީ ލަވައެއް ޖަހާލެވިފައިވާ ކާރެއްގެ ތެރޭގައެވެ. އެ ލަވަ ރީތި ކަމުގައި ވެސް ސިފަ ކުރެވުނެވެ. ގެއަށް ގޮސް އެ ލަވަ ތަކުރާރުކޮށް އަޑުއެހުމުގެ ޝައުޤެއް ވެސް ހިތުގައި އުފެދިފައިވިއެވެ. އަދި އަމުދުން ޙަޔާތުގެ ބައިވެރިއެއްގެ ގޮތުގައި ވެސް ހިތުގައި ޒީނަތްތެރިވެފައިވަނީ ލަވަ ކިޔައިދެވޭނެ ފަދަ މީހެކެވެ. އޭނަގެ އެފަދަ ލޯބިވެރިޔާ ލަވަ ކިޔައި އެހެން މީހުންނާއި ޙިއްސާ ކުރުމަށް އެދެވުނީ އެހެންވެއެވެ.

އަމިއްލަ ނަފްސަށް އައިސްފައި މިވަނީ ހެޔޮ ބަދަލެއްތޯ ނުވަތަ ގޯސް ބަދަލެއްތޯ ހިލްޔާއަށް ހިތާހިތުން ސުވާލު ކުރެވުނެވެ. އެހެނަސް ހިލްޔާއަށް އެ ސުވާލާއިމެދު ވިސްނާނެ ފުރުސަތެއް ނުލިބުނީ ރާފިލް ވާހަކަ ދައްކަން ފެށުމުންނެވެ. އެއާއިއެކު ހިލްޔާ އަނެއްކާވެސް އެ ވަގުތުކޮޅުގެ މަސްތަށް ގެއްލުނެވެ. ދެންމެ ހިތަށް ވެރިވި ޚިޔާލާއިމެދު ވިސްނުމުގެ ބޭނުމެއް އޮތްކަމަކަށް ނުފެނުނެވެ. އެހެންނޫނަސް ކުރީކޮޅު އޭނައަށް އުޅެވިފައިވީ މާ ބޮޑަށް ދީންވެރިވެގެން ކަމަށް ހިތާހިތުން ކިޔާލެވުނެވެ. މިހާރު އޭނައަށް އިހުނަށްވުރެ ރަނގަޅަށް ވިސްނެއެވެ. ވީއިރު ދޭތެރެއަކުން މިގޮތަށް ލަވައެއް އަޑުއަހާލިޔަސް އެއީ މާ ބޮޑު މައްސަލައެއް ނޫނެއް ނޫންހެއްޔެވެ؟ އެއަކުން އޭނަގެ އީމާންތެރިކަމަށް މާ ބޮޑު އަސަރެއް ކުރާނެހެން ހިއެއްނުވެއެވެ.

ހިދާޔަތަކީ ހިލްޔާގެ އަތްމަތީގައި ވާ އެއްޗެއް ކަމަށް ހިލްޔާއަށް ނިންމުނު ފަދައެވެ. ހިދާޔަތުގެ މަގަކީ ﷲ ރުހިވޮޑިގެންވާ ގޮތަށް ހިނގަން މަސައްކަތް ކޮށްގެން މެނުވީ، އެ މަގުގައި ސާބިތު ނުވެވޭނެ މަގެއްކަން ހިލްޔާއަށް އެނގޭނެ ނަމައެވެ. އީމާންތެރިކަމަކީ، އެ އީމާންތެރިކަން ފާފަތަކުން ރައްކާތެރި ކޮށްގެން މެނުވީ ދެމި އޮންނާނެ އެއްޗެއް ނޫންކަން ހިލްޔާއަށް އެނގޭނެ ނަމައެވެ.

ރާފިލް އާއި ހިލްޔާ ‘ދަ ކްލައުޑް’ ރެސްޓޯރެންޓުގެ ޢިމާރާތާއި ހަމަވީ، ރާފިލް ދުއްވަން ފެށިތާ ބައިގަޑިއިރު ފަހުންނެވެ. ހިލްޔާ ހީކުރި ވަރަށްވުރެ މިރޭ ގެއަށް ދެވޭ ގޮތް ލަސްވާނެތީ އެވަގުތު ވެސް ކަންބޮޑުވިއެވެ. އެހެނަސް ރާފިލް އުފަލުގައި ހުރުމުން އެ ހާސްކަން ރާފިލްއަށް ދައްކަން ބޭނުމެއް ނުވިއެވެ.

ޢިމާރާތުގެ ލިފްޓަށް އަރައިގެން ގޮސް އެންމެ މަތީ ފަންގިފިލާގައި ހުރި ރެސްޓޯރެންޓާއި ހަމައަށް ދެވުނުއިރު، ރެސްޓޯރެންޓުގެ ފިރިހެން މުވައްޒަފަކު ލިލީ މާ ބޮނޑިއެއް ހިފަހައްޓައިގެން ހުއްޓެވެ. ހިލްޔާ ހީކުރީ އެއީ އެތާ އޮތް ޙަފްލާއަށް އެތާ މަޑުކޮށްގެން ހުރި މީހެއްކަމަށެވެ. އެހެނަސް އެމީހުންނަށް އެހާ ހިސާބަށް ދެވުމާއިއެކު ރާފިލް އެމީހާއަށް ޝުކުރު އަދާ ކުރަމުން އެ މާ ބޮނޑި ހޯދައި ހިލްޔާއަށް ދިއްކުރިއެވެ.

“ހެޕީ ޓޫ ވީކް އެނިވާރސަރީ!” ރާފިލް އެހެން ބުނުމުން ހިލްޔާއަށް މާ ބޮނޑި ހޯދައި އަނެއްކާވެސް ހީލެވުނެވެ. ރާފިލް 2 ހަފްތާގެ އެނިވާރސަރީ ފާހަގަ ކުރާތީ މަޖާ ކަމަކަށް ވިއެވެ. ހިލްޔާ ހީލުމުން ރާފިލް ވެސް ހީލިއެވެ.

“ޝެލް ވީ؟” ރާފިލް ރެސްޓޯރެންޓްގެ ދޮރަށް ޢިޝާރާތް ކުރަމުން އެހިއެވެ. ހިލްޔާ ބޯޖަހާލުމުން ރާފިލް ހިލްޔާއަށް ވަނުމަށް ތަން ދެއްކިއެވެ. އަދި ހިލްޔާގެ ފަސްފަހަތުން ވަދެގެން ދިޔައެވެ.

ބޮޑެތި ކުޑަ ދޮރު ތަކުން ވަށާލެވިގެންވި އެ ރެސްޓޯރެންޓުގެ ބޭރުން ފެންނަމުން ދިޔައީ މާލޭގެ މަލަމައްޗެވެ. މިއީ ޢާއްމު ގޮތެއްގައި ހިލްޔާމެން ގޮސް އުޅޭ ރެސްޓޯރެންޓަށް ވުރެ ރީތި ތަނެކެވެ. މިތަނަށް ހިލްޔާ ކުރިން އައިސްފައިވަނީ އެންމެ ފަހަރަކުއެވެ. އެއީ މަތީ ސާނަވީ ނިމުނު ދުވަހު އެކުވެރިންނާއި އެކީ މިތަނަށް އައުމަށް ބައްޕަ ދިން ހަދިޔާއެއްގެ ގޮތުންނެވެ. އެދުވަސް ހަނދާންވެފައި ވާހަކަ ދެއްކިއެވެ.

“ވާވް! ކުރިނަށްވުރެ މިތަން ރީތިހެން ހީވަނީ. އައި ޝުޑް ކަމް ހިއާރ މޯ. އެއްވެސް ބަޔަކު ނާންނަނީތަ މިރޭ؟” ހިލްޔާ ވަށައިގެން ފެންނަމުން ދިޔަ ހުސް ގޮނޑިތަކަށް ނަޒަރެއް ދެމުން އެހިއެވެ.

“މޭއިބީ އަހަރުމެންނަށް ޕްރައިވަސީ ދޭން އެކަކުވެސް ނައީ ކަންނޭނގެ.” ރާފިލް ބުންޏެވެ. އެއާއިއެކު ހިލްޔާއަށް ރާފިލްއާއި ދިމާލަށް ބަލާލެވުނެވެ.

“ޑޯންޓް ޓެލް މީ ޔޫ…..ޔޫ އާރ ކްރޭޒީ!” ހިލްޔާގެ ޖުމްލައިގެ އެއްބައި އަނގައިގައި އޮތްވާ ރާފިލް އެއްލޯ މަރާލުމުން ހިލްޔާއަށް ޖަވާބު ލިބުނެވެ. ރާފިލް އެ ދެމީހުންނަށްޓަކައި މުޅި އެ ތަން ހިފީއެވެ. ހިލްޔާ އެ ފަހު ބަސްތައް ބުނުމާއިއެކު ރާފިލް ހީލުމުން ހިލްޔާއަށް ވެސް ހީލެވުނެވެ. އޭނަގެ ލޯބިވެރިޔާގެ މުއްސަނދިކަމުގެ އުފަލުގައެވެ.

ރާފިލް ހިލްޔާއަށް ދައްކާލީ އެ ހޯލުގެ މެދަށްވާ ގޮތަށް ހުރި މޭޒަށެވެ. ރާފިލް ދުރުކޮށްދިން ގޮނޑީގައި ހިލްޔާ އިށީނދެ، އަތުގައި އޮތް މާ ބޮނޑި މޭޒުމަތީގައި ބޭއްވިއެވެ. އެހިނދު ރާފިލް ވެސް ގޮސް ހިލްޔާގެ ކުރިމައްޗަށް ވާ ގޮތަށް އިށީނދެ ހިނިތުންވެލިއެވެ. ހަމަ އެވަގުތު ހިލްޔާގެ އަތް ދަބަސް ތެރޭގައި އޮތް ފޯނު ރިންގުވާން ފެށި އަޑު އިވުނެވެ. ހިލްޔާ އަވަސްއަވަހަށް ފޯނު ނަގައި ސްކްރީނަށް ބެލިއެވެ. ގުޅަނީ އެލީ ކަން އެނގުމުން ހިލްޔާ ފޯނު ނަގައި ކަންފަތުގައި ޖެއްސިއެވެ.

“ހެލޯ އެލީ ކީކޭ؟” ހިލްޔާ އެހެން އަހާލީ ހިސާބެއްގެ ކަންބޮޑުވުމަކާއި އެކީގައެވެ. ބައްޕަ އޭނައާއި ބެހޭގޮތުން އެލީ އާއި ސުވާލެއް ކުރީއޭ ހިތާއެވެ.

“ދޮންތާ އަދި ގެއަށް ނާންނަން ދޯ؟ ގެއަށް އަންނަ މަގުމަތީގަ އަހަންނަށް ޕެންސް ގަނެދެއްޗޭ. މާދަމާ އެގްޒާމްއެއް އެބައޮތް. އަހަރެން އަތުގަ ހުރި ޕެންސް އިން އެހާ ރަނގަޅަށް ނުލިޔެވޭ.” އެލީ ބުންޏެވެ.

“އެލީ ތުއްތަގެ ރޫމްގެ ސްޓަޑީ ޓޭބަލް ވަތްގަނޑުގަ ވެސް ހުންނާނެ ގަލަން. އެތަނުން ރަނގަޅު އެއްޗެއް ނަގާ.” ހިލްޔާ ހިސާބެއްގެ ހަމަޖެހުމަކާއިއެކީ ބުންޏެވެ.

“އޮހް…އޯކޭ ތުއްތާ.” އެލީ ބުންޏެވެ. އެއާއިއެކު ކޯލް ނިމުމަކަށް އައެވެ.

“ކާކު؟” ހިލްޔާ ފޯނު މޭޒުމަތީގައި ބޭއްވުމުން ރާފިލް އެހިއެވެ.

“ކޮއްކޮ. ޔޫ ނޯ ހައު ޔަންގާ ސިބްލިންގްސް އާ….” ހިލްޔާ ބޯހޫރުވާލަމުން ބުންޏެވެ.

“ހުމްމް…ހިލްޔާ ފޯނު ސައިލެންޓަށް ލާންވީއެއްނު؟ އިޓްސް އަވާރ ފަސްޓް އޮފިޝަލް ޑޭޓް ދޯ؟ އެންޑް ގައިމުވެސް ކްލިނިކުން ފޯނެއް ނާންނާނެ މިރޭ.” ރާފިލް އެދުނެވެ.

ރާފިލް އެ އެދުނު ގޮތް ހިލްޔާއަށް ލޯބިވިއެވެ. އެހެންކަމުން ދެވަނަ ވިސްނުމެއްވެސް ނެތި ފޯނު ސައިލެންޓަށް ލައި ބަންޑުން ބާއްވާލެވުނެވެ. އެންމެ ފުރަތަމަ ރާފިލްއާއި މިފަދައިން ބައްދަލު ކުރިއިރު ރާފިލް ހެދި ފަދައިންނެވެ.

**

އަމިއްލަ ކޮޓަރީގައި ނުހަނު މުހިއްމު އޮންލައިން ކޮންފަރެންސެއް ނިންމާލި ނަހީދު ފުން ނޭވައެއް ދޫކުރިއެވެ. ގަޑިން 10:45 ވެފައިވި މަންޒަރު ފެނިފައި ހަނދާންވީ ހިލްޔާ މަތިންނެވެ. ދަރިން ކިތަންމެ ބޮޑުވެފައި ވިޔަސް ނަހީދަށް އޭނަގެ ތިން ކުދިންގެ ވާނުވާ އަބަދުވެސް ބެލެއެވެ.

އެހެންކަމުން ހިލްޔާ މިހާރު ގެއަށް އައިސްދާނެ ކަމަށް އަމިއްލަ އަމިއްލައަށް ނުނިންމާ ކޮޓަރިން ނިކުމެ ސިޑިން ފައިބައިގެން ދިޔައީ ބޫޓު ހަރުގަނޑާއި ދިމާލަށެވެ. އެ ހަރުގަނޑުގައި ހިލްޔާ މިފަހުން ލައި އުޅޭ ބޫޓު ނެތުމުން ހިލްޔާ އަދި ނާންނަނީކަން އެނގުންވިއެވެ. މީގެ ކުރިން ރެއެއްގައި ވެސް ބަލި މީހުން ގިނަވުމުން ސަބަބުން ދެ ރެއެއްގައި ހިލްޔާ 11 ޖަހައި ބޮޑުވި ފަހުން އައިސްފައިވެއެވެ. މިރޭ ވެސް އެކަހަލަ ގޮތެއްވީއޭ ހިތައި ނަހީދު އަޅައެއް ނުލިއެވެ. ޑިއުޓީގައި ހުއްޓާ ގުޅައިފިނަމަ ހިލްޔާއަށް އުދަގޫ ވާނެ ކަމަށްޓަކައެވެ.

**

‘ދަ ކްލައުޑް’ ރެސްޓޯރެންޓުގައި ހިލްޔާއާއި ރާފިލްގެ ކެއުން ފެށިގެން ދިޔުމުން ވެސް އެ ދެމެދުގައި އެތައް ވާހަކައެއް ދެކެވުނެވެ. ދިރިއުޅުމާއި ގުޅޭ ވާހަކައެވެ. ދެމީހުންގެ ލޯބީގެ ވާހަކައެވެ. އަދި އެ ލޯތްބާއި ގުޅިގެން އެދެމެދު ކުރެވޭ ސަމާސާތަކެވެ.

ކެއުން ނިމުމަކާއި ހަމައަށް އަންނަމުން ދިޔަދިޔަހެން ރާފިލް ކުޑަކޮށް ސީރިއަސްވިއެވެ.

“ހިލްޔާ…..އަސްލު ވަރަށް މުހިއްމު ވާހަކައެއް ބުނަން ވެގެން ހިލްޔާ މި ޑޭޓަށް މި ގެނައީ.” ރާފިލް ބުންޏެވެ.

“ކޮން ވާހަކައެއް؟” ހިލްޔާ މާ ބޮޑު ކަމަކަށް ނަހަދައި އޭނަގެ ޗޮކްލެޓް މިލްކް ޝޭކުން ބޮމުން އެހިއެވެ.

“ހެހެ….ކުޑަކޮށް ނާވަސްވެސް އެބަވޭ ބަޓް….ހިއާރ އައި ގޯ. ލައިކް އައި ކީޕް ޓެލިންގް ޔޫ ދޯ؟ އައި ރިއަލީ ލަވް ޔޫ. ކިތަންމެ މަދު ދުވަސްކޮޅެއް ވިޔަސް އައި ރިއަލީ ކަނެކްޓް ވިތް ޔޫ. ދެމީހުން އެކީގަ ގޮއްސަ އެއް ތަނަކުން ރެޒިޑެންސީ ހެދުމަކީ މިހާރު ހުވަފެނުން ވެސް ފެންނަ ކަމެއް. ހެހެހެ…….އެންޑް އޯލްސޯ އައި ނޯ، ހިލްޔާއަކީ ވަރަށް މޮޑެސްޓް ކުއްޖެއްކަން. އެހެންވީމަ މިގޮތަށް ރައްޓެހިވެގެން ތިބެ އަހަންނާ އެއްކޮށް ބޭރު ޤައުމަކަށް ނުދާނެކަން. ސޯ އައި ކުޑް އޮންލީ ތިންކް އޮފް ވަން ތިންގް.” ރާފިލް އެ ބުނި ބުނުމުން ހިލްޔާއަށް ވެސް ސީރިއަސްވެ، ސީދާ ވެލެވުނެވެ.

ހިލްޔާ ބުނާނެ އެއްޗެއް ނޭނގިފައި އިންދާ ރާފިލް ގޮނޑިން ތެދުވުނެވެ. އަދި ލަސް ހިނގުމެއްގައި އައިސް ހިލްޔާގެ ކުރިމަތީގައި އެއް ކަކޫމައްޗަށް ތިރިވެ ޖިންސް ގެ ޖީބުން ކުޑަ ނޫކުލައިގެ މަހުމަލް ފޮށްޓެއް ނެގިއެވެ.

“ވިލް ޔޫ މެރީ މީ، ހިލްޔާ؟” އެ ފޮށި ހުޅުވައި ފޮށީގެ ތެރޭގައި އޮތް ޑައިމަންޑް އަނގޮޓި ދައްކާލަމުން ރާފިލް އެހިއެވެ.

ނުނިމޭ