ނަފްސީ (ސަތާޅީސްވަނަ ބައި)

“އަޅުގަނޑަށް ފަހުމްވޭ ބޭބޭ. އާޚިރަތަށްޓަކައި އުޅުމަކީ ދެ ދުނިޔޭގެ ވެސް ބާއްޖަވެރިކަން ލިބުމުގެ ސިއްރު. ހިލްޔާއަށް އެކަން އެނގިފަ އެ ޙަޤީޤަތާއި އެއްގޮތަށް އުޅޭކަން އެނގުނީމަ ވަރަށް އުފާވެއްޖެ….ކޮން ދުވަހަކުތަ މިކޮޅަށް އަންނަނީ ބޭބެމެން؟” ދާނިޝްއަށް ނުފިލާ ހިނިތުންވުމަކާއިއެކީ ސުވާލު ކުރެވުނެވެ. އޭނަގެ ހިތުގައި އެތައް ދުވަހެއް ވަންދެން އޮތް އެދުން ފުރިހަމަ ކުރަން ދާނިޝް ކެތްމަދުވިއެވެ. ވީހާވެސް އަވަހަކަށް ހިލްޔާ ކުރެން ކައިވެންޏަށް އެދުމަށް ހިތް އެދެމުން ދިޔައެވެ.

“އަދި ދެ ތިން ދުވަސް ވަންދެން ހިލްޔާގެ ޙާލު ބެލުމަށްފަހު ފުރަންވީ ދެން. މާ ގިނަ ދުވަސް ވަންދެން ދާނިޝް ދެން ތިހެން ދަތިކޮށް އުޅެން ނުޖެހޭނެ.” ނަހީދުބެ ބުންޏެވެ. އެ ޖުމްލައިގެ މާނަ ދާނިޝްއަށް އެތައް ގޮތަކަށް ނެގުމުން އެ މޫނުމައްޗަށް ފުރިހަމަ ހިނިތުންވުމެއް ވެރިވިއެވެ.

“ދޯ؟ އިން ޝާ ﷲ. އަލްޙަމްދުލި ﷲ. ވަރަށް އުފާވެއްޖެ މި ކޯލުގެ ސަބަބުން ބޭބޭ. އަވަހަށް ރަށަށް އާދޭ.” ދާނިޝް އެދުނެވެ.

އެ ވާހަކައަށް ނަހީދުބެ އާނއެކޭ ބުނެ އޯކޭ ދިނުމުން އެ ކޯލު ނިމުނެވެ. ދާނިޝް ފޯނު ކަންފަތުން ނަގާލި ހިނދުވެސް އެ މޫނުމަތިން ހިނިތުންވުން ނުފިލައެވެ. ފޯނު މޭޒުމަތީގައި ބޭއްވުމަށްފަހު ވެސް އަތް ހިއްލައި ޙަމްދު ކުރެވުނީ، އޭނައަށް ދެންމެ މި ލިބުނު އުފާވެރިކަމުގެ އަސްލަކީ ﷲ ކަން އެނގުންވުމުންނެވެ. ހިލްޔާގެ ޙާލު ރަނގަޅުވުމަކީ އޭނަ ކުރި ދުޢާއެކެވެ. މިއަށްފަހު ﷲ އަށް އޭނަ ކުރާ އެއްވެސް ދުޢާއަކާއިމެދު ޝައްކު ކުރެވޭނެހެން ހިއެއް ނުވެއެވެ.

އެރެއަށްފަހު ދާނިޝްއަށް ހުރިހާ ކަމެއް ކުރުމުގެ ތެރެއިން ވެސް ހުރެވެނީ ހިނިތުންވުމެއްގައެވެ. ދާނިޝްގެ އެކުވެރިންނަށް މި ކަން ފާހަގަވާން މާ ގިނަ ވަގުތެއް ނުނެގިއެވެ. ހުރިހާ އެކުވެރިންނަށް ވެސް އޭނައަށް ކުއްޖަކު ކަމުގޮސްގެން އުޅޭކަން އެނގުނެވެ. އެއީ ކޮން ކުއްޖެއްކަން ދާނިޝް މިވަގުތަށް ހާމަ ކުރީ ހަމައެކަނި ފަޔާޒަށެވެ. ފަޔާޒަކީ ދާނިޝްގެ އެންމެ ގާތް އެކުވެރިޔާ ކަމަށްވެފައި ހިލްޔާއާއިމެދު ދާނިޝްއަށް ވިސްނުނު ވަރު އެނގޭ ހަމައެކަނި އެކުވެރިޔަކީ ވެސް އެއީ ކަމަށްވާތީވެއެވެ.

އެދުވަހަށްފަހު ފާއިތުވާން ފެށި ދުވަސްތަކާއިއެކު ހިލްޔާގެ ހިނިތުންވުންތައް ވެސް ގިނަ ގިނައިން ފެންނަން ފެށިއެވެ. ﷲ ރުހިވޮޑިގެންވާ ފަދަ ދިރިއުޅުމެއް ބިނާ ކުރަން މަސައްކަތް ކުރެވޭތީ ހިތަށް ވެރިވެފައިވަނީ އާދަޔާ ޚިލާފު ހިތްހަމަޖެހުމެކެވެ. ޙަޔާތުގެ މަޤްޞަދު ސާފުވުމުން އަޅަންވީ ކޮންމެ ފިޔަވަޅެއް ނުހަނު ސާފުކޮށް އެނގެމުން ދިޔައެވެ. މުސްތަޤްބަލާއިމެދު އަދިވެސް ކަންބޮޑުވުމެއް ހިލްޔާގެ ސިކުނޑީގެ ކަނެއްގައިވިއެވެ. އޭނަގެ ރެޒިޑެންސީ ދެން ކުރިއަށް ގެންދާނީ ކިހިނެއްތޯ ހިތަށް އަރަމުން ދިޔައެވެ. އޭނަ ޑޮކްޓަރަކަށް ވާން ޙަޤީޤަތުގައި ވެސް ބޭނުންވޭތޯ އަމިއްލަ ނަފްސާއި ސުވާލު ކުރެވުނެވެ. އެންމެ ދުރަށް ވިސްނުމުން ވެސް ހަނދާންވަނީ ޑޮކްޓަރަކަށްވުމުން ލިބޭނެ ޤަދަރާއި ފައިސާ ހޯދުމަށްޓަކައި ޑޮކްޓަރަކަށް ވާން ބޭނުންވެގެން އުޅުނު ހަނދާނެވެ. އެފަދަ ނިޔަތަކަށްޓަކައި ހިލްޔާ ދެން އުޅޭކަށް ބޭނުމެއް ނުވިއެވެ. ޢަމަލުތައް ބިނާވެގެން ވަނީ ނިޔަތުގެ މައްޗަށެވެ. ހެޔޮ ނިޔަތެއް ނެތި ކުރާ މަސައްކަތްތަކަކީ އާޚިރަތުގައި މުޅިން ބޭކާރު ވެގެން ދާނެ މަސައްކަތްތަކެވެ.

ދެންވެސް ޑޮކްޓަރުކަން މިހާ ހިސާބަށް ހިލްޔާއަށް ކިޔެވިފައިވާނީ ސަބަބަކާއި ލައިގެން ކަމަށް ހިލްޔާގެ ހިތް ބުންޏެވެ. އެހެންކަމުން ޑޮކްޓަރުކަމާއިގެން ކުރިއަށް ދިޔުމާއިމެދު ހިލްޔާ ދެވަނަ ވިސްނުމެއް ނެތި އިސްތިޚާރާ ކުރިއެވެ. އެއީ އޭނައަށް އެންމެ ރަނގަޅު ގޮތް ކަމަށްވާނަމަ ވަގުތު ޖެހުމުން ﷲ އެގޮތް މިންވަރު ކުރައްވާނެކަން ޔަޤީން ކުރެވުނީތީވެއެވެ. ހިލްޔާގެ ޙަޔާތް ބަދަލުވިތާ ދެވަނައަށްވީ ދުވަހުގެ ރޭ ކެއުމުގެ ތެރެއިން އެ ވާހަކަ ދެއްކުމުން ހިލްޔާ އެހާ ކަންބޮޑު ނުވީ އެހެންވެއެވެ.

“ދަރިފުޅު ދެން ކިހިނެއް ހަދާނީ؟ މިކޮޅުގަ ހުރެގެން ރެޒިޑެންސީ ޕްރޮގްރާމް ނިންމާނީތަ؟” ހިލްޔާގެ ކުރިމައްޗަށްވާ ގޮތަށް ހުރި ގޮނޑީގައި އިން ބައްޕަ އެހިއެވެ.

“ނޫން ބައްޕާ. އިތުރަށް އެ ހޮސްޕިޓަލަށް ދާން ބޭނުމެއް ނޫން. އެއީ އެހެން ނޫނަސް އެންމެ ރަނގަޅު ގޮތުގަ އަހަންނަށް ލިބުނު ޕްރޮގްރާމެއް ނޫން. މި ވަގުތަށް….ބޭނުންވަނީ ރަށަށް ދާން. އަދިވެސް އަހަރެންގެ ހެލްތް އެހާ ރަނގަޅެއް ނޫން. ގެއަށް ގޮއްސަ ދުވަސް ކޮޅަކަށް ރެސްޓް ކޮށްލަން ބޭނުންވަނީ. ދޮންތައާއި އެލީއާއި މާމައާއި އެއްކޮށް ޓައިމް ސްޕެންޑް ކުރަން ބޭނުންވަނީ.” ހިލްޔާ އެއްދިމާލަކަށް ނަޒަރު ހުއްޓައިގެން އިނދެ އެ ވާހަކަ ދެއްކިއިރު، ތުންފަތްމައްޗަށް ލުއި ހިނިތުންވުމެއް ވެރިވިއެވެ. އެ ޚިޔާލު ކުރި ކަންތަކުން ހިތަށް ލިބުނު އުފަލުންނެވެ.

“އެންމެ ރަނގަޅު. ދަރިފުޅު ބޭނުން ގޮތެއް. ބޭނުމިއްޔާ އޯސިސްއަށް ވެސް ޖޮއިން ކުރަންވީ ހަމަ. މެޑިކަލް އޮފިސާރއެއްގެ ޕޮޒިޝަން އެބައޮތް ހުހަށް. ދާނިޝް އެބަ އުޅޭ ކުއްޖަކު ނުލިބިގެން.” ބައްޕަ ބުންޏެވެ.

ބައްޕަ ފަހު ޖުމްލައިން ބުނެލި ނަމުން ހިލްޔާގެ ޙަރަކާތްތައް ލަސްވިއެވެ. ‘ދާނިޝް’ ގެ ނަން ހިތަށް ވެރިވުމާއިއެކު ހަނދާނަށް އައީ މާސްކަކުން ފޮރުވިފައިވާ ސޫރައެވެ. އެއާއިއެކު ހިލްޔާއަށް ވާހަކަ ދެކެވުނެވެ.

“ދާނިޝް އަދިވެސް އުޅޭތަ އޯސިސްގަ؟” ހިލްޔާއަށް އެންމެ ފުރަތަމަ ވެސް ކޮށްލެވުނީ އެ ސުވާލެވެ. ދާނިޝް އޯސިސްއަށް އައީ މުޅިއަކުން ނޫންހެން އޭނައަށް އަބަދުވެސް ހީވެފައިވިއެވެ. ބައްޕަ ކުރީކޮޅު ދާނިޝްގެ މޮޅުކަމަށް އަލި އަޅުވާފައިވި ގޮތުން ކަންނޭނގެއެވެ. އެހެނަސް ރާފިލްގެ ސަބަބުން ދާނިޝްއަކީ ކިހާ މޮޅު މީހެއްކަން ހޯދަން ވެސް ހިލްޔާ ހަނދާން ނެތުނީއެވެ.

“އާނ އުޅޭ. އެކަމަކު ވަރަށް އަވަހަށް ރިޒައިން ކުރަން އުޅެނީ. އިޓްސް ސޭޑް. ދާނިޝްގެ ސަބަބުން މިހާ ކުޑަ މުއްދަތެއްގެ ތެރޭގަ ކްލިނިކް އެވަރަށް އެސްޓެބްލިޝްވެފަ އެހެރީ. މާ ޝާ ﷲ….އެނީވޭސް، އެހެންވީމަ މި ހަފްތާ ތެރޭ ފުރަން ޓިކެޓް ނަގަންވީދޯ؟” ބައްޕަ ބުންޏެވެ. ބައްޕަ ކުއްލި ގޮތަކަށް މަޢުޟޫ ބަދަލު ކޮށްލުމުން ހިލްޔާ ކުރަން އުޅުނު ސުވާލެއް ނުކުރެވުނެވެ. އިތުރަށް ދާނިޝްގެ ވާހަކަ ފެންމަތި ކުރަން ހިލްޔާއަށް ނުކެރުނީތީ ހިލްޔާއަށް ބައްޕަގެ ސުވާލަށް ޖަވާބު ދެވުނެވެ.

“ޓިކެޓް ލިބުނުހާ އަވަހަކަށް ހަމަ ދާންވީ.” ހިލްޔާއަށް ބުނެލެވުނެވެ. އޭރުވެސް ދާނިޝްގެ ޚިޔާލުތަކަށް ހިލްޔާ ގެއްލިފައިވިއެވެ. ކުއްލި ގޮތަކަށް ދާނިޝްއާއިމެދު ހުރިހާ ކަމެއް ދަނެގަންނަން ބޭނުންވިއެވެ. ދާނިޝް އަދިވެސް އުޅެމުން ދާނީ އެކަނިތޯ ހިތަށްއެރިއެވެ. އެކަނިވެރިކަމުގައި އެހެން އުޅެން ދާނިޝް ދެރަ ނުވާނެ ހެއްޔެވެ؟ ދާނިޝް މީހަކާއި އިނދެފާނެ ހެއްޔެވެ؟ އެހެންނޫނީ އިންނަން ޚިޔާލު ކުރާ ކުއްޖަކު ހުރެދާނެ ހެއްޔެވެ؟

ކުޑަ ހިނދުކޮޅެއްގެ ތެރޭގައި ހިތަށް ވެރިވި އެ ސުވާލުތަކުން ހިލްޔާއަށް ބޯހޫރުވާލެވުނެވެ. ދާނިޝްގެ ކައިވެނި ކުރެވުނުތޯ ނުވަތަ ނުކުރެވޭތޯ އޭނަ ބަލަންޖެހޭ ހެއްޔެވެ؟ އެއީ އޭނައާއި ގުޅުން ހުރި ކަމެއް ހެއްޔެވެ؟ ދާނިޝްއަކީ އޭނައަށް މުޅިއަކުން ކަމުދިޔަ ޒުވާނެއްވެސް ނޫނެވެ. އޭނައަށް ދާނިޝްގެ ސޫރަ ވެސް ފެނިފައިވަނީއެއް ނޫނެވެ. އެހެން ނޫނަސް އޭނަ އެއްވެސް ފިރިހެނަކާއި އެފަދަ ގޮތަކުން ގުޅޭކަށް އަދި ތައްޔާރެއް ނޫނެވެ. ވީއިރު ދާނިޝް އާއިމެދު ސުވާލު ކުރުމުގެ އަދި ވިސްނުމުގެ ވެސް ބޭނުމެއް ނެތެވެ.

މި ޚިޔާލުތަކުން ހިލްޔާއަށް ދާނިޝްގެ ޚިޔާލުތަކާއި ދުރުވެވުނެވެ.

މާލެ ދިޔުމަށް ޓިކެޓް ލިބުނީ އޭގެ ދެ ދުވަސް ފަހަށެވެ. އެހެންކަމުން ހިލްޔާ ޕެކް ކުރުމުގެ މަސައްކަތް ފެށިއެވެ. މިފަހަރު ޕެކް ކުރުމުގައި ހިލްޔާއަށް އޭނަ ގަނެފައިވާ އަގުބޮޑު އެއްޗެހިވީ ބުރައަކަށެވެ. މިއީ އޭނަ ކީކޭ ހިތަށް އަރައިގެން ގަތް އެއްޗެހިތޯ ހިތަށްއެރިއެވެ. އެއީ ހުސް ވެސް ދެއްކުންތެރި ކަމަށްޓަކައި ގަނެވިފައިވާ ތަކެތި ކަން އެނގުމުން އަމިއްލަ ނަފްސާއިމެދު ޙަމްދަރުދީ ވެވުނެވެ. އެ ދެއްކުންތެރިކަމުގައި ބޭކާރު ކުރެވުނު ވަގުތާއި ފައިސާގެ މަތިން ހަނދާން ވުމުންނެވެ. އެފަދަ މަޤާމަކަށް އޭނަގެ ނަފްސު ދެން ދުވަހަކުވެސް ނުގެންދިޔުމަށް ހިލްޔާއަށް އެދުވަހު ޢަޒުމެއް ކަނޑައެޅުނެވެ.

ރާފިލް އޭނައަށް ގަނެދީފައިވާ އަގުބޮޑު ސާމާންތައް ފެނިފައި އެ ހުރިހާ އެއްޗެއް އުކާލަން ހިލްޔާގެ ހިތް ފުރަތަމަ އެދުނެވެ. އެހެނަސް އިސްރާފު ކުރަން ވެސް ހިތްހަމަނުޖެހުމުން ހިލްޔާ އެ ހުރިހާ އެއްޗެހި ފޮށްޓަކަށް އަޅައި ބަންދު ކުރިއެވެ. އަދި ޔޫކޭގެ ޗެރިޓީ އޯރގަނައިޒޭޝަނަކަށް ގުޅައިގެން އެމީހުންނާއި އެ ތަކެތި ޙަވާލު ކުރިއެވެ. އެކަމާއިމެދު ހިލްޔާ ހިތްހަމަޖެހުނެވެ. އަދި އަމިއްލައަށް ގަނެފައިވާ އެއްޗެހި މާލެ ގެންދަން ނިންމީ އެ އެއްޗެހި ދޮންތައާއި އެލީއަށް ހަދިޔާ ކުރުމަށެވެ.

ހުކުރު ދުވަހު ހިލްޔާ ރާއްޖެ އަންނަ ކަން އެނގުނީއްސުރެ ދާނިޝްގެ ރޫޙަށް އިތުރު ޖޯޝެއް ވެރިވެފައިވިއެވެ. ކުރާ ކޮންމެ ކަމެއް ދާނިޝް ކުރަމުން ދިޔައީ ނުހަނު އުފަލާއި އެކީގައެވެ. ހިލްޔާ އައުމުން އޭނައާއި ހިލްޔާގެ ލޯބީގެ ވާހަކަ ކުރިއަށް ދާނެ ގޮތާއިމެދު ޚިޔާލީ ފޮލާ ވެސް ކެއްކެމުން ދިޔައެވެ. ހަމަ އެއާއިއެކު އެ ޚިޔާލުތަކަށް ވުރެ ވެސް ރީތި ޙަޤީޤަތެއް އޭނައާއި ހިލްޔާއަށް މިންވަރު ކޮށްދެއްވުމަށް އެދި ދުޢާ ކުރެވެމުން ދިޔައެވެ.

ދެން ހުސް ވެސް އަންނާނީ އުފާވެރި ދުވަސްތަކެއްހެން ހިލްޔާއާއި ދާނިޝްއަށް ވެސް ހީވި ފަދައެވެ. ދުޢާތައް އިޖާބަވުމަކީ މުޅިން ވެސް އޭނަ ބޭނުންވާ ގޮތަށް ކަންތައްވުން ކަމަށް ދާނިޝްއަށް ހީވިއިރު، އީމާންތެރިކަމުގެ ފޮނިކަމުގެ އިޙްސާސުގައި ދެން ދުވަހަކުވެސް ދަތިކަމެއް ނުލިބޭނެކަމަށް ހިލްޔާއަށް ހީވަމުން ދިޔައެވެ.

އެހެނަސް ﷲ ސުބްޙާނަހޫ ވަތަޢާލާ އީމާންތެރިކަމުގެ ފޮނިކަން އިޙްސާސް ކުރެވޭ ކޮންމެ މީހަކު އިމްތިޙާން ކުރައްވައެވެ. އެ އީމާންތެރިކަމުގެ ތެދުވެރިކަން ނޫނީ ދޮގުވެރިކަން ސާބިތު ކުރެއްވުމަށެވެ. އީމާންތެރިކަމުގައި ހިފަހައްޓަނީ ހަމައެކަނި އިޙްސާސަކަށްޓަކައިތޯ ނޫނީ ހަމައެކަނި ﷲ އަށް އިޚްލާޞްތެރިވެގެންތޯ ސާބިތު ކުރެއްވުމަށެވެ.

ހިލްޔާ ފުރަން އޮތް ދުވަހު ޕެކްކޮށްގެން ބައްޕައާއި އެކީ ހީތްރޯ އެއާރޕޯޓަށް ދިޔައީ އެދުވަހު ރޭގަނޑު 10 ޖެހި ވަގުތެވެ. ޗެކިން ވުމަށްފަހު ބައްޕައާއިއެކީ ހިލްޔާ ގޮސް އެއާރޕޯޓުގެ ޑިޕާރޗާރ ގޮނޑީގައި އިށީންތަނާހެން ބައްޕަގެ ފޯނު ވައިބާރ ރިންގްޓޯން އިވެން ފެށިއެވެ. ހިލްޔާ ބައްޕައަށް ބަލާލި ވަގުތު ބައްޕަ ފޯނު ސްކްރީނަށް ބަލާލަމުން ވާހަކަ ދެއްކިއެވެ.

“އެލީ ގުޅަނީ. އަދި ހަވީރު 3 ޖަހާނީ ދޯ ރާއްޖެއަށް؟ ސްކޫލުން އައިސް ގުޅާ ހިތްވީ ކަންނޭނގެ.” ބައްޕަ ލާނެތް ރާގަކަށް އެހެން ބުނުމުން ހިލްޔާއަށް ލުއި ގޮތަކަށް ހީލެވުނެވެ. ހިލްޔާ ބަލަބަލާ ހުއްޓާ ބައްޕަ ފޯނު ކަންފަތުގައި ޖެއްސިއެވެ.

“ހެލޯ އެލީ. ދެން މި އަންނަނީއޭ ދޮންތަ. ތިހާވަރަށް ނުގުޅިޔަސް އޯކޭވާނެ.” ބައްޕަ ހިލްޔާއަށް ވެސް ނަޒަރެއް ދީފައި ހިނިތުންވުމެއްގައި އިނދެ ބުންޏެވެ.

އެހެނަސް ކީއްވެ ކަމެއް ނޭނގެއެވެ. އެކޮޅުން ދައްކަމުން ދިޔަ ވާހަކައެއް އިވެމުން ދިޔަހެން ބައްޕަގެ ހިނިތުންވުން ފޭދިގެން ދިޔައެވެ.

“ކީކޭ؟” ބައްޕަ ދެ ބުމަ ކައިރިވެފައި އިނދެ ޤަބޫލު ކުރަން ދަތިވެފައި އިނދެ އެ ސުވާލު ކުރުމުން، ހިލްޔާގެ ނިތަށް ވެސް ރޫ ގިނަވިއެވެ. ހިލްޔާ ބަލަބަލާ އިންދާ ބައްޕަ ކުއްލި ގޮތަކަށް ފޯނު ކަނޑާލިއެވެ. ހިލްޔާ ކިހިނެއްވީތޯ އަހާލިއެއްކަމަކު ބައްޕަ އޭނައަށް ބަލާލުމެއް ވެސް ނެތި އަވަސް ޙަރަކާތްތަކާއި އެކީ ފޯނާއި ކުޅެން ފެށިއެވެ. ހިލްޔާއަށް ބޭއިޚްތިޔާރުގައި ފޯނަށް ބަލާލެވުނުއިރު ބައްޕަ ފޭސްބުކަށް ވަނީއެވެ.

**

އެދުވަހު ހަވީރު 3 ޖެހިއިރު ދާނިޝް ކްލިނިކް ގެ ޑިއުޓީ ނިންމާލުމަށްފަހު ކްލިނިކުން ނިކުތީއެވެ. ސައިކަލަށް އެރުމަށް ކްލިނިކްގެ އެ ފަރާތުގައި އޮތް ޕާކިންގް އޭރިއާއަށް ދިޔަ ވަގުތު ދާނިޝްއަށް މީހަކު ގުޅަން ފެށިއެވެ. ސްކްރީނުން ފެނުނީ ފަސީހުގެ ނަމެވެ. އެއީ އޯސިސްގެ މާރކެޓިންގް މެނޭޖަރެވެ. ދާނިޝް ކޯލު ނަގައި ފޯނު ކަންފަތުގައި ޖެއްސިއެވެ.

“އާނ ފަސީހު ކީކޭ؟” ދާނިޝްއަށް އަހާލެވުނެވެ.

“މިހާރު ހުންނާނެ މެޑިކަލް އޮފިސާރއެއް ހޯދަން ޕޯސްޓްކޮށްލާފަ. އެއްވެސް ޗޭންޖެއް ގެންނަން ބޭނުމިއްޔާ ލެޓް މީ ނޯ.” ފަސީހު ބުންޏެވެ.

“ހިއެއްނުވޭ ޗޭންޖެއް ބޭނުންވާނެހެން. ފަސީހު ފޮނުވީމެއްނު އޭތި އަހަންނަށް. ޕްލޭން ކުރި ޑިސްކްރިޕްޝަން ވެސް ރަނގަޅު. އެކަމަކު ބަލާލާނަން. އޯކޭ.” ދާނިޝް އެހެން ބުނެ ފަސީހު ވެސް އޯކޭ ދިނުމުން ފޯނު ކަނޑާލިއެވެ. އެއަށްފަހު ފޯނުން ފޭސްބުކަށް ވަނީ ފަސީހު ބުނި ޕޯސްޓް ބަލާލުމަށެވެ.

އެހެނަސް ފޭސްބުކް ހުޅުވާލުމާއިއެކު ދާނިޝްއަށް ފެނިގެން ދިޔަ ސޫރައިން ދާނިޝް ހުއްޓުން އަރާ ގޮތްވިއެވެ. އެއީ ރާފިލް ނޫން ދެވަނަ މީހެއްނޫނެވެ. އޮޓޯ ޕްލޭ އޮން ކުރެވިފައިވުމުން އެ ވީޑިއޯ ދާނިޝްއަށް ފެނުމާއިއެކު ޕްލޭ ކުރެވެން ފެށިއެވެ. ވީޑިއޯގައި ރާފިލް އިނީ ކަޅުކުލައިގެ ގަމީހެއް ލައިގެން ސޯފާގައި އިށިނދެގެންނެވެ. ނުހަނު ފެންވަރަށް ނެގިފައިވާ އެ ވީޑިއޯއިން ރާފިލްގެ މިލާފައިވާ މޫނުގެ ތަފްޞީލުތައް ނުހަނު ސާފުކޮށް ފެނެއެވެ. ބައެއް އެސްފިޔަތައް އެއްވެފައިވީ ގޮތުން އެ އެސްފިޔަތައް ތެމިފައިވީހެން ވެސް ހީވެއެވެ. ރާފިލްގެ އެ ސޫރަ ފެނުނު ފުރަތަމަ ސިކުންތުގައި ވެސް ދާނިޝް ނުރުހުންވާ ގޮތްވިއެވެ. އެއީ ދޮގުވެރި ބޭރުފުށަކަށް ނޫނީ ނުވާނެކަން ޔަޤީން ކުރެވޭހާވިއެވެ. ވީޑިއޯ ފެށުނުއިރު ރާފިލް އެއްޗެކޭ ނުބުނެ އިސްޖެހިފައި އިރުކޮޅެއް ވަންދެން އިނެވެ. އެއަށްފަހު ވާހަކަ ދެއްކިއެވެ.

“މި ޒަމާނަކީ ލޯބީގެ އަގު ވަޒަން ކުރެވޭ ޒަމާނެއް ނޫން. ޢުމުރު ދުވަހު ލޯބިވާނަމޭ ކިޔާފަ ވެސް….އެންމެ ލޯބިވާ ކަމަށް ބުނި ކުއްޖާ އަހަރުމެންނަށް ފަސްދޭ ކަހަލަ ޒަމާނެއް. އަހަންނަށް ވެސް ވީ އެކަހަލަ ގޮތެއް. ޔެސް….މައި ބްރައިޑް ރޭން އަވޭ. ބައެއް މީހުންނަށް ވެގެން ދިޔައީ އެއީ ޖޯކަކަށް. ބަޓް ދެޓްސް ދަ މޯސްޓް ހާޓް ބްރޭކިންގް ޑޭ ފޯ މީ. މައި ލަވް…..ޓާންޑް ހާރ ބެކް ޓު މީ…” ރާފިލް ރޮވެން ގާތްވާ ފަދައަކުން ދެއްކި ވާހަކައިން ދާނިޝްއަށް ކަޅި މައްޗަށް ހިންގާލެވުނެވެ. ރާފިލް ހިލްޔާ ދިޔަ ހިނދު އެހާ ދެރަވި ނަމަ، އެވަގުތު ހިލްޔާއާއި ދިމާލަށް އަވަގުރާނަ ގޮވީސް ހެއްޔެވެ؟

އެ ޚިޔާލުން އެ ވީޑިއޯ އިތުރަށް ބަލަން ބޭނުން ނުވެގެން ސްކްރޯލް ކޮށްލަން ދާނިޝް އުޅުނު ވަގުތު ރާފިލް އިތުރަށް ވާހަކަ ދެއްކިއެވެ.

“ހިލްޔާ….ވާއި ޑިޑް ޔޫ ޑޫ ދިސް ޓު މީ؟ އަހަރެންގެ ލޯބީގަ އެއްވެސް އުނިކަމެއްވީތަ؟ ޑިޑް ޔޫ ނޮޓް ލަވް މީ ލައިކް އައި ލަވްޑް ޔޫ؟ ޑޮކްޓަރ މެތިއު….އިނގިރޭސި މީހަކަށްވީމަތަ އަހަންނަށްވުރެ ބޮޑަށް ޑޮކްޓަރ މެތިއު ކަމުދިޔައީ؟ އަހަރެން އުއްމީދެއް ވެސް ނުކުރަން. އެއީ ހިލްޔާއަށްވުރެ ޢުމުރުން މާ ދޮށީ ވެސް މީހެކޭ! އަހަންނަށް ހިލްޔާއަށް ފުރިހަމަ ކޮށްނުދެވުނު ކަމެއް އޭނައަށް ފުރިހަމަ ކޮށްދެވުނީތަ؟ އަހަރުމެން އެކުގައި ހޭދަ ކުރި ރޭތައް ހަނދާން ނައްތާލާފަތަ ޑޮކްޓަރ މެތިއުއާއި އެކީ ރޭތައް ހޭދަ ކުރީ؟ ހާދަ…ހިތަށް ތަދުވިއޭ އެ މަންޒަރު ފެނުނު ރޭ. ހައު ކުޑް ޔޫ ޑޫ ދިސް ޓު މީ؟”

ރާފިލް މިފަހަރު ދައްކަން ފެށި ވާހަކަތަކުން އައި ރުޅީގައި ދާނިޝްއަށް ފޯނުގައި ހިފަހައްޓާލެވުނު ގޮތް ބާރުވުމުން އިނގިލިތައް ވެސް ރަތްވެގެން ދިޔައެވެ. އައި ރުޅީގައި އެވަގުތު ހަމަ ހޭ ވެސް ގެއްލުނުހެން ހީވިއެވެ. ރާފިލް ކަރުނަތައް އޮހޮރަމުން އެންމެ ފަހުން ކޮށްލި ސުވާލާއިއެކު އަތުގައި އޮތް ފޯނު އަތުގައި ހުރި ބާރު މިނާއިއެކީ ބިމަށް ޖަހާލެވުނެވެ.

ނުނިމޭ