ނަފްސީ (ބައްތިރީސްވަނަ ބައި)

“ދެމީހުން….އެއްކޮށްތަ ދަނީ؟” ދާނިޝްއަށް އެހެން އަހާލެވުނީ ހަމަ އެއްވެސް އިޚްތިޔާރަކާއި ނުލައެވެ.

“އާނ….ރެޒިޑެންސީއަށް ގޮއްސަ ދެމީހުން ކައިވެނި ކުރަން ރާވައިގެން ދަނީ.”

ނަހީދު އެ ބުނި ބަސްތަކާއިއެކީ، ދާނިޝްގެ މޫނުމައްޗަށް ހިތާމަވެރިކަން ވެރިވެގެން ދިޔައީ ޚުދު އޭނައަށް ވެސް ނޭނގިއެވެ.

ދާނިޝްގެ މޫނުމަތި ބަދަލުވެގެން ދިޔަ ގޮތް، ނަހީދަށް މާ ރަނގަޅަށް ފާހަގަވެގެން ދިޔައެވެ. އެއީ ކީއްވެކަން ވެސް ނަހީދަށް އެނގެއެވެ. ދާނިޝްއަށް ހިލްޔާ ކަމުދާކަން ނަހީދަށް އެންމެ ކުރީއްސުރެ ވެސް އެނގެއެވެ. ދާނިޝް ނުބުނި ކަމުގައި ވިޔަސްމެއެވެ. ދެކުދިންގެ ކައިވެނީގެ ވާހަކަ ދެއްކީ ވެސް ދާނިޝްއަކީ ރަނގަޅުވެފައި، ހިލްޔާދެކެ ލޯބިވެސް ވާނެ ކުއްޖެއްކަން ޔަޤީންވީތީވެއެވެ. އޭނަ އެ ދުވަސްތައް ދެކެން ވަރަށް ގިނަ އުއްމީދުތައް ކުރިއެވެ.

އެހެނަސް ކުރިމަތިން ފެންނަމުން ދިޔަ ދާނިޝްގެ ހިތާމަވެރި މޫނާއި، އޭނަގެ ހިތަށް ވެރިވެފައިވާ މޮޅިވެރިކަމުން، އެ އުއްމީދުތައް ވިއްސިވިހާލިވެގެން ގޮއްސިކަން ނަހީދަށް ޔަޤީންވިއެވެ. އެހިނދު ދާނިޝްއާއިއެކު ހިލްޔާއަށްޓަކައި ވެސް ދެރަވިއެވެ. ހިލްޔާއަށް މި ގެއްލުނީ ހިލްޔާ ހާދަ ރަނގަޅަށް ބަލަހައްޓާނެ ކުއްޖެކޭ ހިތަށްއެރިއެވެ. އެކަމާއިމެދު ކުރެވޭނެ ކަމެއް ނަހީދަށް ނުވިސްނުނެވެ.

“ދާނިޝް ކައިވެންޏެއް ނުކުރަންތަ؟” ދާނިޝް އެއްޗެކޭ ނުބުނެ ގިނައިރު ވާން ފެށުމުން ނަހީދު ގަދަކަމުން ހިނިތުންވަމުން ސުވާލު ކުރިއެވެ. ހިތުން އެ ސުވާލުކޮށްލީ ދާނިޝްއާއި ސަމާސާއެއް ކޮށްލުމަށެވެ. އެހެނަސް….

“ން….ނުކުރަން.” ދާނިޝްއަށް ބުނެލެވުނީ ހަމައެކަނި އެހާވަރަށެވެ. ރަނގަޅު ކުއްޖަކު ފެނުމުން ކުރާނެ ކަމަށް ބުނަން ބޭނުން ވިޔަސްމެއެވެ. ނޭނގޭ ސަބަބަކާއިހުރެ ގައިގެ ވަރު ދެރަވެ، އަރުތެރެ ބެދި، ލޮލުން ދިލަނަގަން ފަށާފައިވެއެވެ. އޭގެ ސަބަބުން އަވަސްއަވަހަށް އެސްފިޔަތައް ޖަހަން ޖެހުނެވެ.

ދާނިޝްއަށް ވަމުން ދިޔަ ގޮތް ފެނިފައި ނަހީދު ދާނިޝްގެ އެއްކޮނޑުގައި އަތް އަޅާލިއެވެ.

“ދާނިޝް މިރޭ އަވަހަށް ގެއަށް ދާންވީއެއްނު؟ ހެނދުނުއްސުރެ ދޯ ތިއުޅެނީ މިއަދު؟ ގެއަށް ގޮއްސަ ރެސްޓްކޮށްލާ.” ނަހީދު އެ ކޮނޑުގައި ލުއި ގޮތަކަށް ޖަހާލަމުން ބުންޏެވެ. ދާނިޝް އެއަށް ވަކި ދެކޮޅު ހެދުމެއްނެތި އިސްޖެހިފައި ހުރެ ބޯޖަހާލިއެވެ.

ނަހީދުބެ ދިޔުމުން ދާނިޝް ވެސް ނަހީދުބެ ގެ ނަސޭޙަތާއި އެއްގޮތަށް ގެއަށް ދާން ކްލިނިކުން ނިކުތެވެ. ސައިކަލަށް އަރައި ފުން ނޭވައެއް ދޫކޮށްލީ އޭނަގެ ހިތް މޭތެރޭގައި ޖެހި ފިތި ބާރުވަމުން ދިޔަ އިޙްސާސަށް ލުޔެއް ލިބޭތޯއެވެ. ސައިކަލު ދުއްވާލަމުން ގެއަށް ގޮސް ޙަރަކާތްތައް އަވަސްކޮށްލާފައި އުޅުމުން ދާނިޝްއަށް އޭނަގެ ހިތަށް އުދަގޫ ކުރުވަނިވި ޚިޔާލުތަކާއި ދުރުވެވުނެވެ. ހިލްޔާއާއި ރާފިލް ކައިވެންޏެއް ކުރިޔަސް އޭނައަށް ކޮންކަމެއްތޯ ހިތާހިތުން ކިޔެމުން ދިޔައެވެ.

ފެންވަރައި ވުޟޫކޮށްލައިގެން ނިދުމުގެ ކުރިން ނަމާދު ކުރަން ފެށިއިރު ވެސް ދާނިޝް ތަކުރާރުކޮށް އަމިއްލަ ނަފްސު ގާތު އެހެން ބުނަމުން ދިޔައެވެ. އެހެނަސް ނަމާދު ކުރަން ފެށުމާއިއެކު ދާނިޝްގެ ޙަޤީޤީ އިޙްސާސްތަކަށް ފަސް އަޅަން ދަތިވިއެވެ. މިފަހުން އައިސް އޭނަގެ ހުރިހާ އިޙްސާސެއް ދާނިޝް ޙިއްސާ ކުރަނީ ﷲ އާއި ކަމަށްވުމުންނެވެ. ސަޖިދައިގައި ދިވެހި ބަހުން ދުޢާ ނުކުރިޔަސް، އޭނައަށް ހިތާހިތުން ހުރިހާ އިޙްސާސެއް ބަންޑުން ކޮށްލެވެންދެން ސަޖިދައިގައި އޮވެވެއެވެ.

އެހެންކަމުން ހަޝަމް ބަނދެ، ޤިޔާމުގައި ހުރިއިރު ވެސް ހިތުގައި އެ އިޙްސާސްތައް އުތުރި އަރަން ފެށިއެވެ. މިއަދު އެންމެ ދުވަހަކު ހިލްޔާ ނުފެނުމުން ވެސް އޭނަ ހިލްޔާ މަތިން ހަނދާންވި ގޮތާއި ހިލްޔާ ދެކެން ބޭނުންވި މިންވަރު އެނގުންވިއެވެ. ކަން މިހެން އޮތްއިރު ހިލްޔާ އޭނައާއި މާ ދުރަށް ދާން އުޅޭކަން އެނގުމުން ހިލްޔާ މަތިން ހަނދާންވާނެ ވަރު ތަޞައްވުރެއް ވެސް ނުކުރެވެއެވެ. ނޭނގި ނަމަވެސް ދާނިޝްއަށް މި ހުރިހާ ދުވަހުވެސް ހުރެވުނީ އޭނައާއި ހިލްޔާ ގުޅޭނެ ކަމުގެ އުއްމީދުގައި ކަން ދާނިޝްއަށް އެނގުންވީ އެ ނަމާދުގެ ތެރެއިންނެވެ. ނޭނގި ނަމަވެސް އޭނައަށް ހުރެވުނީ ރާފިލްއާއި ހިލްޔާ ވަކިވާނެ ކަމުގެ އުއްމީދުގައެވެ. އޭނަގެ މަންމަގެ މަރުގެ ސަބަބަކަށް ވީ މީހަކާއި އެ މަންމަ އެހާ ލޯބިވީ ކުއްޖަކު ގުޅޭނެކަމަށް ޒަމީރު އެއްބަހެއް ނުވީއެވެ. އަދި ރާފިލްގެ ދޮގުވެރިކަމުން، ހިލްޔާއަކީ އޭނަ އިންނަން އުޅޭ ކުއްޖާ ކަމަށް ބުންޏަސް އެ ވާހަކަ ޤަބޫލު ނުކުރެވި ހުރީއެވެ.

އެހެނަސް މިއަދު ނަހީދުބެ ގެ ދުލުން އެ ބަސްތައް އިވުމުން އެ ވާހަކަ ޤަބޫލު ކުރަން ދާނިޝްއަށް މަޖުބޫރުވެއްޖެއެވެ. ހިތަށް މިހާ ބޮޑަށް އަސަރުކޮށްފައިވަނީ އެހެންވެއެވެ. ދެވަނަ ރަކުޢަތުގެ ސަޖިދައަށް ގޮސް ދާނިޝްއަށް ހިތާހިތުން އެ ހުރިހާ ވާހަކައެއް ﷲ އަށް ދެންނެވުނެވެ.

“ޔާ ﷲ! މިއަދު މިއަޅާ ކުރި ބައެއް އުއްމީދުތައް މުޅިން ގެއްލިއްޖެ. ހިލްޔާ ދާން އުޅޭތީ މިއަޅާ ދެރަވޭ. ހިލްޔާއަކީ މިވަގުތު އެންމެ ރަނގަޅު ކުއްޖަކަށް ނުވިޔަސް އެއީ ކުރިން ވަރަށް ރަނގަޅު ކުއްޖެއް. މަންމަގެ ވެސް ރުހުން ލިބުނު ކުއްޖެއް. މިއަޅާއާ ހިލްޔާ ގުޅޭނެ ކަމަށް މަންމަ ވަރަށް އުއްމީދު ކުރި. އެކަމަކު….އަހަންނަށް އެ އުއްމީދު ފުރިހަމަ ކޮށްނުދެވުނު. އެކަމާވެސް ދެރަވޭ. ޔާ ﷲ! މިއަޅާގެ މަންމަގެ ފާފަތައް ފުއްސަވައި ހެޔޮ ރަޙްމަތް ލައްވާށި. އަދި ހިލްޔާ ކޮންމެ ހިސާބެއްގައި ވިޔަސް ހިލްޔާއަށް އުފާވެރިކަން ދެއްވައި ހިލްޔާއަށް އެންމެ ހެޔޮ މަގު ދައްކަވާށި….”

ދާނިޝްއަށް އެހާ ހިސާބަށް ހިތާހިތުން ބުނެވުމާއިއެކު އެ ލޮލުން ކަރުނަތައް ފައިބައިގެން އައިސް ގިސްލެވެން ފެށިއެވެ. އޭނައަށް ނޭނގިވެސް އޭނައަށް ހިލްޔާއަށް ހެޔޮ އެދެވޭ މިންވަރު އެނގުންވުމުންނެވެ. އޭނަ ހީކުރީ ހިލްޔާ ބަދަލުވުމުން އޭނަގެ ހިތުގައި ހިލްޔާއަށް ނަފްރަތު އުފެދިފައިވި ކަމަށެވެ. އެހެނަސް އޭނައަށް ހީކުރެވިފައިވީ ހިލްޔާ އިޞްލާޙުވެ، އޭނަގެ ގާތަށް އަނބުރާ އަންނާނެ ކަމަށެވެ. މަންމަ ހުރިނަމަ ހަމަ ގައިމުވެސް އެހެންވީހޭ ހިތަށްއެރިއެވެ. މަންމަގެ ނަޞޭޙަތްތައް ހިލްޔާ ޤަބޫލު ކުރީހެވެ. އަދި މަންމަ މެދުވެރިވެގެން އެ ދެމީހުންގެ ގުޅުން ވެސް ބަދަހިވެގެން ދިޔައީހެވެ.

މަންމަ މަތިން އިތުރަށް ހަނދާންވުމުން އިތުރަށް ރޮއިރޮއިފައި މަންމައަށްޓަކައި ދުޢާ ކުރެވުނެވެ.

ނުހަނު ގަދައަށް ރޮވުނު އެ ނަމާދުތަކަށްފަހު ދާނިޝް ނިދާލަން އެނދަށް އެރި ހިނދު، ހިތަށް ލުޔެއް ލިބިފައިވިއެވެ. ހުރިހާ ހިތާމައެއް ﷲ އާއި ޙަވާލުކޮށްލެވުނު ފަދައަކުންނެވެ. އަދި އެކަލާނގެ އެންމެ ރަނގަޅު ގޮތް މެދުވެރި ކުރައްވާނެ ކަން ޔަޤީން ކުރީ، މަންމަ އޭނައަށްޓަކައި ލިޔެފައިވާ ފޮތުގައި ހުރި ބަސްތަކެއް ހަނދާން ކުރަމުންނެވެ.

**

ނަމާދުން ކިތަންމެ ހަމަޖެހުން ލިބުނެއްކަމަކު އޭގެ އަނެއްދުވަހު ހިލްޔާ ފެނުމާއިއެކު ދާނިޝްގެ ހިތަށް އުދަގޫވިއެވެ. ހިލްޔާ ރާފިލްއާއި ކައިވެނި ކުރަން އުޅެނީ ކީއްވެތޯ ހިތާހިތުން ސުވާލުކޮށްލެވުނެވެ. ރާފިލްގެ އަވައިގައި ޖެހިގެން ހިލްޔާ އެ އުޅެނީ ކީއްވެތޯ ހިތަށްއެރިއެވެ.

އެކި ފަހަރުމަތިން އެކި ޒާތްޒާތުގެ ޚިޔާލުތައް ދާނިޝްގެ ސިކުނޑިއަށް ވެރިވެއެވެ. ބައެއްފަހަރު ރާފިލްގެ ޙަޤީޤަތް ހިލްޔާއަށް ކިޔައިދޭން ހިތަށްއަރައެވެ. މަންމަ ނިޔާވީ ރާފިލްގެ އިޙުމާލުންކަން ހިލްޔާއަށް އެނގިއްޖެނަމަ މި ކައިވެނި ހުއްޓުވިދާނެއޭ ހިތަށްއެރިއެވެ. އެހެނަސް އޭނަގެ ވާހަކަ ހިލްޔާ ޤަބޫލު ކުރާނެ ކަމާއިމެދު ޝައްކު އުފެދުނެވެ. އޭނަ މިއުޅެނީ މަންމަގެ މަރުގެ މައްސަލަ ކޯޓަށް ގެންދެވޭނެހާ ވަރަށް ވެސް ރާފިލްއާއި ދެކޮޅަށް ހެކި ނުހޯދިގެންނެވެ. ވީއިރު މީގެ މަސްތަކެއް ކުރިން ހިނގި ކަމެއްގެ ވާހަކަ އޭނަ ހިލްޔާއަށް ސާބިތުކޮށްދޭނީ ކިހިނެއް ހެއްޔެވެ؟

އަނެއްބައި ފަހަރު ދާނިޝްއަށް ތަޤްދީރުގެ ނިޔާއާއިމެދު ވެސް ޝަކުވާ ކުރެވެއެވެ. އޭނަ މިހާ ރަނގަޅަށް އުޅެން މަސައްކަތް ކުރާއިރު އޭނައަށް ކައިވެންޏެއްގެ ނިޢުމަތް ނުލިބި، ރާފިލް ކަހަލަ މީހުންނަށް އެ ނިޢުމަތް ލިބެނީ ކީއްވެބާއޭ ހިތަށްއަރައެވެ. އެހެނަސް އެ ސުވާލު ހިތަށްވެރިވުމާއިއެކު ދާނިޝްގެ ގައިން ހީބިހި ނަގައެވެ. ސުވާލު މި އުފެއްދެނީ ކޮން ފަރާތެއްގެ ނިންމުމާއިމެދު ކަން އެނގުންވުމުންނެވެ. އޭގެއިން ކޮންމެ ފަހަރަކު އޭނައަށް އިސްތިޣްފާރު ކުރެވެއެވެ. އެއީ ވެސް މަންމަ އޭނައަށްޓަކައި ލިޔެފައިވާ ފޮތުން ދަސްވެފައިވާ އާދައެކެވެ.

ކިތަންމެ ދަތި އިޙްސާސްތަކެއް ދާނިޝްގެ ހިތުގައި ވިޔަސް، ﷲ އަށް ވަކީލުކޮށް، ﷲ ގެ ނިންމެވުމާއިމެދު ޝަކުވާ ނުކުރަން މަސައްކަތް ކުރުމުން، އެ އިޙްސާސްތައް ހަމައަކަށް އެޅުވުމުގައި ދާނިޝް ކާމިޔާބުވިއެވެ. ރާފިލްއާއި ހިލްޔާގެ ކައިވެނީގެ ވާހަކަ އިވުނުތާ ކުޑަ ދުވަސްކޮޅެއް ފަހުން ދާނިޝްއަށް މުޅިންހެން ސާބިތުކަން ލިބުނޭ ބުންޏަސް ދޮގަކަށް ނުވާނެއެވެ. ހިލްޔާއާއި ރާފިލް އެކީގައި އުޅޭ މަންޒަރު ފެނި ދެރަ ވިޔަސް، އެއީ ދާނިޝްގެ މުޅި ދުވަސް ޚަރާބުވާ ސަބަބަކަށް ނުވެއެވެ. އެދެމީހުން ގެ ކައިވެންޏަކީ އޭނަ ބޭނުންވިޔަސް ނުވިޔަސް ދެން ވާން އޮތް ކަމެއްކަން މަޑުމަޑުން ޤަބޫލު ކުރެވެން ފެށިއެވެ.

ހިލްޔާއާއި ރާފިލްގެ ކައިވެންޏާއިމެދު ދާނިޝް ޔަޤީން ކުރަމުން ދިޔައެއްކަމަކު، ހިލްޔާއަށް އެ ޔަޤީންކަމެއް ނުލިބެއެވެ. ދެމީހުންގެ ކައިވެނި ކުރެވޭނީ ޔޫކޭގައި ކަމަށް ރާފިލް ބުނުމުން ހިލްޔާ އުފާވީ ހިނދު، ދެރަ ވެސްވިއެވެ. އުފާވީ ބޭރު ޤައުމެއްގައި ކައިވެނި ކުރުމުގެ ފަޚުރު ލިބޭނެތީވެއެވެ. ދެރަވީ އެ ދެމީހުންގެ ކައިވެނި ލަސްވާތީވެއެވެ. ރާފިލްގެ ސަބަބުން ކިތަންމެ ނޫންކަމަށް ހެދިއެއްކަމަކު، ހިލޭ ފިރިހެނަކާއި އެކީ ދަތުރު ކުރުމަކީ ހިލްޔާ ޖެހިލުންވާ ކަމެކެވެ. ފުރުމުގެ ކުރިން ހިލްޔާ ކައިވެނި ކުރަން ބޭނުންވެފައިވީ އެހެންވެއެވެ. އެހެނަސް ރާފިލް ޚިޔާލު ބަދަލުކުރުމުން އޭނަ ރާފިލްއާއި ދެބަސްވާން ބޭނުމެއް ނުވިއެވެ. ރާފިލް ވެސް އެ ނިންމުން ނިންމާނީ ދެމީހުންގެ ރަނގަޅަކަށް ކަމަށް ޤަބޫލު ކުރެވުނީތީވެއެވެ.

ކޮންމެ ގޮތެއްވިޔަސް މިކަމާއިމެދު ހިތް ނުތަނަވަސްވާ ކޮންމެ ފަހަރަކު ހިލްޔާ ހަމަޖެހުން ހޯދަނީ ނަމާދުންނެއް ނޫނެވެ. އޭގެ ބަދަލުގައި މިހާރު ހިލްޔާގެ ކަމަކީ ލަވަ އަޑުއެހުމެވެ. ސޯޝަލް މީޑިއާއިން ފެންނަ މީހުންގެ ޙަޔާތުގެ ކަންތައް ބަލައި އެމީހުން ހިތާހިތުން ދަށްކުރުމެވެ. ފިލްމާއި ޑްރާމާ ބެލުމެވެ. އެ ޑްރާމާތަކުގައި އުޅޭ މީހުންގެ ޚަބަރު ބެލުމެވެ. ފިހާރަތަކަށް ގޮސް ބާޒާރު ކުރުމެވެ. އަގުބޮޑު ރެސްޓޯރެންޓުތަކަށާއި ކެފޭތަކަށް ގޮސް ވަގުތު ހޭދަ ކުރުމެވެ. އެ ހުރިހާ ތަންތަނެއްގެ ފޮޓޯ ސޯޝަލް މީޑިއާއަށް ލައި އޭނައާއިމެދު ޙަސަދަވެރިވަނީ ކާކުތޯ ކަމާއިމެދު ވިސްނުމެވެ.

މީގެއިން ކޮންމެ ކަމެއް ކުރުމުން ހިލްޔާގެ ހިތަށް ވަގުތީ އުފާވެރިކަމެއް ލިބެއެވެ. ރާފިލް އޭނައާއި ކައިވެނި ކުރުން ލަސްކުރާ ކަމުގެ ޙަޤީޤަތް މަތިން ހަނދާން ނެތެއެވެ. އެހެނަސް އެކަމެއް ނިމޭއިރަށް މާޔޫސްކަން ހިތަށްވެރިވެއެވެ. ދެވިހިފައިވާ މީހެއް ފަދައިން ތަކުރާރުކޮށް އެކަންތައް ކުރަންޖެހެނީ އެހެންވެއެވެ.

މާލޭގައި ‘ޑިޒްނީ’ އަށް ބިނާކޮށް، އަލަށް ހެދުން ފިހާރައެއް ހުޅުވި ވާހަކަ އިވުމާއިއެކު ހިލްޔާ އެއްދުވަހު ހަވީރު އެތަނަށް ދާންޖެހުނީ އެހެންވެއެވެ. އެލީއާއި ހަމްރާ ވެސް އެކަމާ ދެކޮޅު ހެދިއެވެ. ޢާއްމު ދިރިއުޅުމުގައި ނުވެސް ލާ ޒާތުގެ ހެދުމެއް ބެލުމުގެ ބޭނުމެއް ނެތް ކަމަށް އެމީހުން ދެކުނެވެ. އެހެނަސް ހިލްޔާ ކިޔުނު ވަރުން އެމީހުން ހަތިޔާރު ބަހައްޓަން ޖެހުނެވެ.

ހިލްޔާ އެ ފިހާރައަށް ގޮސް ހަމައެކަނި ހެދުންތައް ބެލީއެއް ނޫނެވެ. ޕްރިންސެސް ހެދުންތައް ލައި ލޯގަނޑުން އޭނަ ހުރިގޮތް ބަލައި، އެލީއާއި ހަމްރާ ދެކޭ ގޮތް ވެސް ބަލަމުން ދިޔައެވެ. އެދެމީހުން ވެސް ތިބީ، މި ބޭކާރު ކަމުގައި އެތައް ވަގުތެއް ހޭދަ ވާތީ ފޫހިވެފައެވެ. އެލީގައި އަތުގައި އައިސް ކޮފީ ޓޭކްއަވޭ އެއް ނެތްނަމަ އޭނައަށް އެތާނގައި ނުވެސް ހުރެވުނީހެވެ.

އެހެނަސް ހިލްޔާއަށް އެއީ ބޭކާރު ވަގުތަކަށް ވެގެނެއް ނުދެއެވެ. ކޮންމެ ހެދުމެއް ލާފައި އޭނަ މޫނުބަލާ ލޯގަނޑު ކުރިމަތީގައި ހުއްޓިހުރެ، ފޮޓޯ ނަގައި ރާފިލްއަށް ފޮނުވަމުން ދިޔައެވެ. ރާފިލް އެވަގުތު އޮންލައިންކޮށް ނެތަސް، ފަހުން ރާފިލް އޭނައަށް ކުރާނެ ތަޢުރީފުތަކާއިމެދު ހިލްޔާއަށް ލަދުރަކި ގޮތަކަށް ހިނިތުންވެވެމުން ދިޔައެވެ.

އެލީއާއި ހަމްރާ ހިލްޔާގެ ބާޒާރު ކުރުން ނިމުނީކަމަށް ހީކުރި ތަނާހެން ފިހާރައިގައި ހުރި ކުއްޖާ ހިލްޔާއަށް އެންމެ ފަހުގެ ސިންޑްރެއްލާ ހެދުން ދެއްކިއެވެ. އެއީ މަޑު ނޫކުލައިގެ، ތިރިން ފުފިފައި އޮތް ހެދުމެކެވެ. ލޭސް ފޮތީގެ އެތައް ބައެއް އެ ފަސްބައިގައި ވީ ގޮތުންނާއި، އެކި ދިމަދިމާލުން ވިދަމުން ދިޔަ ގޮތުން ހިލްޔާއަށް އިތުރަށް ރީތިވިއެވެ. އަދި މޭމަތިން ފަށައިގެން ކޮނޑާއި ދިމާލަށް ނޫކުލައިގެ ކޮކާތައް މަދުމަދުން ހަރުކޮށްފައިވި ގޮތުން ހިލްޔާ އަޝޯޚުވިއެވެ. ހަމްރާއާއި އެލީގެ ބަދުނަސީބަށް، ހިލްޔާ އެ ހެދުން ވެސް ލާން ބޭނުންވިއެވެ.

ޗޭންޖިންގް ރޫމުގައި ހުރެ އެ ހެދުން ލުމަށްފަހު، އެހެން ހެދުންތަކާއި އެއްގޮތަށް އެ ހެދުމާއި އެކީވެސް ހިލްޔާ ހެދުމާއި ގުޅޭ ދިގު އަތެއް ލެއްވިއެވެ. އަދި އެ ހެދުމާއި ގުޅޭ މަޑު ނޫކުލައިގެ ވިދާ ޝޯލްއެއް އެޅިއެވެ. ޗޭންޖިންގް ރޫމުން ނިކުތުމާއިއެކު އޭނައަށް އެލީއާއި ދޮންތަގެ ތަޢުރީފު އޮހޭނެ ކަމަށް ހިލްޔާ އުއްމީދު ކުރިއެވެ. އެހެނަސް ހިލްޔާ ނިކުތްއިރު ފެނުނީ، އެ ފިހާރައިގެ ހުރި ދިގު މޫނުބަލާ ލޯގަނޑުގެ ކައިރީގައި ހުރި ސޯފާގައި، ފޫހިވެގެން އިށީނދެފައި އިން އެލީއެވެ. ހިލްޔާ ފެނުމާއެކު އެލީ ވަކި ބަދަލެއް ނުވާ މޫނަކާއެކީ ތެދުވެލިއެވެ.

“ލުކް! ރީތިދޯ އެލީ؟” ހިލްޔާ އުނަގަނޑުގައި އަތް ޖައްސައިގެން ހުރެ ދެ ފަރާތަށް އެނބުރެމުން އެހިއެވެ.

“އައި ގެސް ޔާ…. ކޭން ވީ ގޯ ތުއްތާ؟ މާޒިން ކޮއްކޮ ރޯތީ ދޮންތަ ވޮރީވެގެން އުޅެނީ. ދެންމެ މާމަ ގުޅާފަ ކޮއްކޮގެ މިލްކް ހުސްވީ ވާހަކަ ބުނީމަ ދޮންތަ މިތާ ކައިރި ފިހާރައަކަށް ގޮއްސި މިލްކް ގަންނަން.” އެލީ އާދޭހާއިއެކު ވާހަކަ ދެއްކިއެވެ.

ހިލްޔާ އެއަށް އެއްޗެކޭ ބުނަން އުޅުނު ވަގުތު ފިހާރައިގެ ކުއްޖަކު ހިލްޔާގެ ކައިރިއަށް އައެވެ.

“ތިހާ ރީތިވެގެން އައިއްސަ ޓިއާރާ ވެސް ޓްރާއި ކޮށްލަންވާނެ ނޫންތޯ؟” އެ އަންހެން ކުއްޖާ އައިސް، ރަތް ކުލައިގެ ފޮތިން ނިވާ ކުރެވިފައިވާ ތަބަކެއްގައި އޮތް ރިހިކުލައިގެ އެސްޖެހިފައިވާ ކުޑަ ތާޖެއް ދެއްކިއެވެ. އެ ފެނުމާއިއެކު ހިލްޔާގެ ލޯ ބޮޑުވީ ހިނދު އަނގަ ވެސް ހުޅުވުނެވެ. އިރުކޮޅެއްގެ ހިމޭންކަމަށްފަހު ހިލްޔާ އެލީއަށް ބަލާލިއެވެ.

“އެލީ ޕްލީޒް ވެއިޓް ފޯ ސަމް ޓައިމް. ތުއްތަ މީތި ޓްރައި ކޮށްލަން ބޭނުން. ދޮންތަގެ ޝޮޕިންގް ނިމެންވާއިރަށް ތުއްތަ ވެސް ނިންމާލާނަން.” ހިލްޔާ ވަޢުދުވިއެވެ. އެއާއިއެކު އެލީ އެއްޗެކޭ ނުބުނެ ނުރުހުމުގެ ފުން ނޭވައެއް ދޫކޮށްލިއެވެ. ހިލްޔާ އެއަށް ފަރުވާލެއްނެތި، އޭނައަށް ހާޒިރު ކުރެވުނު ތާޖު ނެގިއެވެ.

**

ގޭގެ މަސައްކަތެއް ކުރުމަށްޓަކައި ބޭނުންވާ ޒާތުގެ ކަށިގަނޑެއް ހުޅުމާލެއިން ނުލިބުމުން، އެ ދުވަހު ހަވީރު ދާނިޝް ދިޔައީ މާލެއަށެވެ. ބޭނުންވާ ކަށިގަނޑު ހޯދައިގެން ގެއަށް ދިޔުމަށްޓަކައި މާލެ ތެރެއިން ދުއްވާފައި ދަނިކޮށް މަގެއްގައި ހަމަނުޖެހުމެއް އުފެދިގެން އުޅޭ މަންޒަރު ފެނުނެވެ. ސައިކަލުގެ ދުވެލި ލަސްކޮށްލަމުން، މަޑުވެސް ކޮށްލެވުނީ އެއީ ފިނި ޖަދަލެއް ނޫންހެން ހީވުމުންނެވެ. ކޮންމެވެސް ފިރިހެނެއްގެ ގަރާޖު ކުރިމަތީގައި ކާރެއް އޮވެގެން، އެމީހެއްގެ ކާރު ނުނެރެވިގެން އަވަގުރާނަ ގޮވަނީއެވެ. އެމީހަކު ގޮވަމުން ދިޔަ އެއްޗެހީގެ ސަބަބުން އެތަނަށް މީހުން ވެސް އެއްވަމުން ދިޔައެވެ. ދާނިޝް ސައިކަލު މަތީގައި ހުރެ ބަލާލިއިރު، ގަރާޖު ކުރިމަތީގައި ޕާކް ކުރެވިފައި އޮތީ ނަހީދުބެ ގެ ކާރެވެ. ކާރުގެ ނަންބަރު ފެނިފައި އެކަން ޔަޤީންވުމުން ވަގުތުން ޖިންސްގެ ޖީބުގައި އޮތް ފޯނު ނަގައި ނަހީދުބެއަށް ގުޅާލެވުނެވެ.

“ސަލާމް ބޭބޭ. ބޭބެ މާލޭގަތޯ؟” އެކޮޅުން ނަހީދުބެ ފޯނު ނެގުމާއިއެކު ދާނިޝްއަށް ވާހަކަ ދެކެވުނެވެ.

“ނޫނޭ މާލޭގައެއް ނޫން. ކިހިނެއްވީ؟” ނަހީދުބެ އެހިއެވެ.

“ބޭބެގެ ކާރު މާލޭގެ ގަރާޖެއްގެ ކުރިމަތީގަ ޕާކް ކުރެވިފަ އޮތީ. އެކަމާ މިހިސާބުގަ މައްސަލަ ވެސް ޖެހިގެން އުޅެނީ.”

“އެހެންތަ؟ ތިއީ ހިލްޔާގެ ކަންތަކޭ. ދާނިޝް ބޭބެއަށް ކަމެއް ކޮށްލަދީބަލަ. ތި ހިސާބުން ހިލްޔާ ހޯދައިގެން ހިލްޔާއަށް ތި ޚަބަރު ދީބަލަ. ފޯނު އަބަދު ސައިލެންޓަށް ލައިގެން އުޅޭ ކުއްޖެއް ތިއީ. ބޭބެ ގުޅުމަށްވުރެ ދާނިޝް ހޯދާލިޔަސް މާ އަވަސްވާނެހެން ހީވަނީ. ކޮންމެވެސް ޑިޒްނީ ފިހާރައަކަށޭ ކިޔާފަ ދިޔައީ.”

“ޑިޒްނީ އޭ؟ އޯކޭ!”

ނަހީދުބެ ބުނި ބަހުން ލިބުނު ޙައިރާންކަމާއިއެކީ ވަށައި ނަޒަރެއް ދެވުމާއިއެކު އެ ފިހާރަ ފެނުމުން ދާނިޝްއަށް އޯކޭ ދެވުނެވެ. އެއަށްފަހު ފޯނު ކަނޑާލުމަށްފަހު ތިރިކޮށްލަމުން ސައިކަލުން ފޭބިއެވެ.

**

ހިލްޔާ ފިހާރައިގެ އަންހެން ކުއްޖާ އަތުން ތާޖު ހޯދި ވަގުތަކީ، ކޮންމެވެސް އެހެން މީހަކަށްޓަކައި އެ އަންހެން ކުއްޖާ އެތަނުން ދާންޖެހުނު ވަގުތެވެ. އެހެންކަމުން ހިލްޔާ ތާޖު އަޅަން ޖެހުނީ އިތުރު އެހީތެރިކަމެއް ނެތި، އަމިއްލައަށެވެ. ހިލްޔާ އެ ތާޖަށް ގެއްލިފައިވީ ވަރުން، ފަހަތުގައި ހުރި އެލީ އެންމެ ފަހުން ނުހުރެވިގެން އެތަނުން ދާން ހިނގައިގަތް ކަމެއް ވެސް ނޭނގުނެވެ. ލޯގަނޑުން އަމިއްލަ ނަފްސަށް ބަލަން ހުރެ، ހިލްޔާ ލަސްލަހުން ފަރުވާތެރިކަމާއެކީ ޝޯލްތަކުގެ ރޫތަކުގެ ދޭތެރެއަށް ތާޖުގެ ކޮޅުތައް ވައްދާލިއެވެ. އެއަށްފަހު އަމިއްލަ ނަފްސަށް ބަލާލިއެވެ. އެހިނދު އަމިއްލަ ނަފްސު ރާނީއެއްގެ ގޮތުގައި ސިފަ ކުރެވުނެވެ. މި ސޫރައަކީ އޭނަގެ ޙަޤީޤަތޭ ހިތަށްއެރިއެވެ.

**

ހިލްޔާ ފެނޭތޯ ފިހާރައަށް ވަދެގެން ދިޔަ ދާނިޝް އެކި ދިމަދިމާލަށް ބަލަމުން ދިޔައީ، އަބާޔާ ލައިގެން ހުރި ކުއްޖެއް ފެނޭތޯއެވެ. ފިހާރައިގެ ވަށައި އެއްބުރު ޖަހާލެވުނުއިރު ވެސް ފެންނަ ގޮތެއްނުވުމުން ހިލްޔާއަށް ނަހީދުބެގެ ކޯލު ލިބި، ބޭރަށް ދިޔައީއޭ ހިތަށްއެރިއެވެ. އެހެނަސް ފިހާރައިން ނިކުންނަން ދިޔަ ވަގުތު އެ ފިހާރައިގައި ހުރި ދިގު މޫނުބަލާ ލޯގަނޑުތަކުގެ ތެރެއިން ލޯގަނޑެއްގެ ކައިރީގައި ހުރި ކުއްޖަކަށް ނަޒަރެއް ދެވުނެވެ. އެއީ އެ ފިހާރައިގައި ހުރި ޒާތުގެ ހެދުމެއް ލައިގެން ހުރި ހަމައެކަނި ޒުވާން ކުއްޖާއެވެ. އެހެން ނޫނީ އެ ހެދުންތަކުގައި ހުސްވެސް ފެންނަމުން ދިޔައީ ކުޑަކުދިންނެވެ.

އެ ކުއްޖާ އޭނަގެ ސަމާލުކަން ހޯދީ ބުރުގާ އަޅައިގެން ހުރެފައި އެ ދިގުމިނުން އެއީ އޭނަ ދަންނަ ކުއްޖެއްހެން ހީވުމުންނެވެ. އެ ހީވި ހީވުމާއިއެކު އެ ދިމާލަށް ހިނގައިގަނެވުނެވެ. ލޯގަނޑުން އޭނަގެ ސޫރަ ނުފެންނާނެ ހިސާބުން ގޮސް ދާނިޝްއަށް އެ އަންހެން ކުއްޖާ އެ ލޯގަނޑުން ފެންނާނެ ހިސާބަށް އާދެވުނެވެ. އެއާއިއެކު އެއީ އޭނަ ހޯދަމުން އައި އަންހެން ކުއްޖާކަން އެނގުންވީ ހިނދު އާޝޯޚުވިއެވެ.

ހިލްޔާ އެވަގުތު ދާނިޝްއަށް ފެނުނީ ހުތުރުކޮށޭ ބުނެފިނަމަ ވާނީ ދޮގަކަށެވެ. ހިލްޔާ އެ ހެދުމުގައި ނުހަނު ރީއްޗެވެ. ވިދާ ޝޯލްއަކުން އެ ދޮން މޫނު ވަށާލެވިފައިވި ގޮތް ލޯތްބެވެ. އެ ތާޖުން ރަމްޒު ކޮށްދެނީ ދާނިޝް ވެސް ހިލްޔާއަށް ދޭން ބޭނުންވާ މަޤާމެވެ. އެހެނަސް ހިލްޔާ އިސްލާމީ ރީތި ހެދުން ދޫކޮށް އެހެން ހެދުމެއް ލައިގެން ހުރުމުން ދެރަވިއެވެ. ހަށިގަނޑުގެ ބައްޓަން އެނގޭފަދަ ހެދުމެއް ހިލްޔާ މިހާ ހާމަތަނެއްގައި ލައިގެން ހުރީތީ ޝަކުވާ ކުރެވުނެވެ. ކޮންމެ ގޮތެއްވިޔަސް ދާނިޝްއަށް އެވަގުތު ބެލުން ތިރި ކުރެވުނެވެ. އެހެނަސް އިސްއުފުލާލަން މަޖުބޫރުވީ ހިލްޔާ ވާހަކަ ދެއްކުމުންނެވެ.

“ނައު ޓެލް މީ އެލީ. ޑޫ އައި ލުކް ލައިކް އަ ޕްރިންސެސް އޯ ޑޫ އައި ލުކް ލައިކް އަ ޕްރިންސެސް؟” ހިލްޔާ ދެންވެސް ލޯގަނޑުން އަމިއްލަ ސޫރައަށް ބަލަން ހުރެ އެހެން ބުނެލީ، ފަޚުރުވެރިކަމުން ފުރިފައިވާ ހިތަކާއި އެކީގައެވެ. ސުވާލު ފަރުމާ ކުރުމުގައި ޖަވާބަކަށް އިތުރު އިޚްތިޔާރެއް ނުދިނީ، ހިލްޔާއަށް އެ ސުވާލުގެ ޖަވާބު ޔަޤީން ކުރެވުނީތީވެއެވެ. އެހެނަސް ފަހަތުން އައީ އޭނަ އުއްމީދު ކުރި އަޑެއް ނޫނެވެ.

“ފްރޮމް ދަ ލުކްސް ޔެސް. އެކަމަކު އުޅުމުގެ ގޮތުން ޔަޤީނެއް ނޫން.”

ފަހަތުން އިވުނު ބީރައްޓެހި، އެހެނަސް ދަންނަ އަޑުން ހިލްޔާގެ މެއަށް ފިނިވީ ހިނދު، ހިނިތުންވުން ފިލައި ދިޔައެވެ. އޭގެ ދެވަނަ ސިކުންތުގައި ފަސްއެނބުރި ބަލާލި ހިނދު، ފެނުނު ސޫރައިން ނޭވާ މެދުކެނޑުނެވެ. އެ ސޫރަ މާސްކަކުން ފޮރުވިފައިވިއެއްކަމަކު ކާކުކަން ވަގުތުން ނަގައިގަނެވުނެވެ.

ނުނިމޭ