ނަފްސީ (އެއްވަނަ ބައި)
بِسْمِ اللّهِ الرَّحْمنِ الرَّحِيم
“ކޮއްކޮ ފުންކޮށް ނޭވާ ލާ….”
ހިލްޔާ އެހެން ބުނެލީ ކުރިމަތީގައި އިން ކުޑަ ފިރިހެން ކުއްޖާގެ މޭމަތީގައި ސްޓެތޮސްކޯޕް ޖައްސަމުންނެވެ. އެ ކުއްޖާ ވަގުތުން ފުން ނޭވާތަކެއް ލާން ފެށިއެވެ. އެއާއިއެކު ހިލްޔާއަށް އެ ކުއްޖާގެ ހިތުގެ ތެޅުމުގެ އަޑާއިއެކީ ފުއްޕާމޭގެ ތެރެއަށް ވައި ވަދެ، ނިކުންނަމުން ދިޔަ އަޑުތައް ވެސް އިވުނެވެ.
މޭމަތީގެ އެކި ދިމަދިމާލުން ސްޓެތޮސްކޯޕް ޖެއްސުމަށްފަހު ހިލްޔާ ތެދުވެލަމުން އެ ކުއްޖާގެ ބުރަކަށީގައި ވެސް ޖެއްސިއެވެ. އަދި އިވެމުން ދިޔަ އަޑުތަކުން ނިންމުމެއް ނިންމަމުން އަނެއްކާވެސް ގޮސް އޭނަގެ ގޮނޑީގައި އިށީނދެ، ސްޓެތޮސްކޯޕް މޭޒުމަތީގައި ބޭއްވިއެވެ.
“މޭގައި އިންފެކްޝަން ހުރިކަމަކަށް ނުބެލެވޭ. ކަރުތެރެ ދުޅަވެފަ ހުރީމަ ވައިރަލް އިންފެކްޝަނެއްގެ ފެށުން ކަމަށް ބެލެވެނީ. އެހެންވީމަ ރޯގާއަށާއި ކެއްސުމަށް ބޭހެއް ދޭނަން މިވަގުތަށް. 3 ދުވަސް ތެރޭ ރަނގަޅު ނުވެއްޖެއްޔާ ފޮލޯ އަޕް ހެދުން އެދެން.”
ހިލްޔާ އޭނަ ދޭން ބޭނުންވާ ބޭސްތައް އާސަންދަ ޕޯރޓަލްއިން ސާރޗް ކުރަމުން ވާހަކަ ދެއްކިއެވެ. އޭނައަށް ވާހަކަ ދެކެވުނީ އެ ކުޑަ ކުއްޖާއަށް ވުރެ ބޮޑަށް އެ ކުއްޖާގެ މަންމައާއި މުޚާތަބު ކުރަމުންނެވެ. އެކަމާއިމެދު ހިސާބަކަށް އަމިއްލަ ނަފްސު ކުށްވެރި ކުރެވުނެވެ. ޑޮކްޓަރެއްގެ ގޮތުގައި އަބަދުވެސް ބަލިމީހާ ހިތްހަމަޖެހޭ ގޮތަށް ވާހަކަ ދައްކަން ޖެހޭނެކަން ހަނދާނަށް އައެވެ. އެހެނަސް އެވަގުތު އެކަން ކުރާނެ ހަކަތައެއް ހިލްޔާގެ ކިބައިގައި ނެތެވެ. އެދުވަހުގެ ގިނަ ވަގުތުތައް އެމަޖެންސީގައި ހުރި ގިނަ ޢަދަދެއްގެ ބަލިމީހުން ބެލުމަށްފަހު، އޯޕީޑީގައި އިންނަން ވުމުން ހިލްޔާ އިންތިހާއަށް ވަރުބަލިވެފައިވިއެވެ. އެވަގުތު ގަޑިން ރޭގަނޑު 10 ޖަހަމުން ދިޔައެއްކަމަކު ވަރަށް ދަންވެއްޖެ ކަމުގެ އިޙްސާސް ކުރެވެމުން ދިޔައެވެ.
“ދެން ނޫން މަންމާ ފްރުޓްސް ނުކެވޭނެ!!!” ހިލްޔާއަށް އޭނަގެ ޚިޔާލުތަކުން ނިކުމެވުނީ އެ ކުޑަ ކުއްޖާ ރޯގާ އަޑަކުން ބާރަށް އެހެން ބުނެލި އަޑަށެވެ. އެ ކުއްޖާއާއި މަންމައާއި ދެމެދު ވާހަކަތައް ދެކެވެމުން ދިޔަކަން ވެސް އެނގުންވީ ދެނެވެ.
“އެއީ ކީއްވެޔޯ؟ ފްރުޓްސް ކެއީމައޭ އަވަހަށް ރަނގަޅުވާނީ…” ބޭސް ސިޓީ ޕްރިންޓަށް ފޮނުވާލަމުން ހިލްޔާ އެކުއްޖާއާއި ދިމާލަށް އެނބުރި، ހިނިތުންވެލިއެވެ. ހިލްޔާ މާސްކް އަޅައިގެން ހުރުމުން އެ ހިނިތުންވުން ފާޅުވީ ހަމައެކަނި އެ ލޮލުންނާއި، ވާހަކަ ދެއްކި އަޑުންނެވެ.
“ފްރުޓްސް ނުބައި! އަސްލު ކޮއްކޮއަށް ހީވަނީ އެޕްލް ކެއިމަހެން ކޮއްކޮއަށް މިހެން ވާން ފެށީ. ކަރަށް ތަދުވާން ފެށީ އެޕްލް ކެއީމަ.” އެ ކުއްޖާ އެންގިއެވެ.
“އޮހް….އެޕްލް އެލާޖީއެއް ހުންނަނީތަ އަނެއްކާ؟” ހިލްޔާ ހިސާބެއްގެ ކަންބޮޑުވުމަކާއިއެކީ އެ ކުއްޖާގެ މަންމައަށް ބަލާލިއެވެ.
“ނޫނޭ އެއީ ހަމަ ފްރުޓްސް ނުކާންވެގެން ދައްކާ ބަހަނާ. އޭގެ ކުރިން ވެސް ކަރަށް ތަދުވެގެން އުޅުނު.” އެ މަންމަ ކިޔައިދިނެވެ.
“އޮހް….އެހެންވިޔަސް ނަހީކް ލައިކް ވާ ކަހަލަ ފްރުޓެއް މަންމި ދެއްޗޭ. އޭރުން ނަހީކް ވަރަށް ރަނގަޅަށް ކައިގެން ބޭސް ބޮއިގެން ރަނގަޅުވާނެދޯ؟” ހިލްޔާ އެކުވެރި ރާގެއް އަޅުވަމުން ނަހީކަށް ދޯ ދިނެވެ. އެހެނަސް ނަހީކް ދެންވެސް ތުން އޫކޮށްގެން އިނދެ، ދެއަތް މެއާއި ދިމާލުން ހުރަސްކުރިއެވެ. ނަހީކް އިންގޮތުން ހިލްޔާ ހީލި ވަގުތު، އެތާ ތަރުޖަމާނަކަށް އިން ކުއްޖާ، ނަހީކް ގެ މަންމައާއި ބޭސް ސިޓީ ޙަވާލު ކުރިއެވެ. އެއާއިއެކު ނަހީކް ގެ މަންމަ ހިލްޔާއަށް ޝުކުރު އަދާ ކޮށްލަމުން ދާން ހިނގައިގަތެވެ.
ނަހީކްއަކީ އެރެއަށް ބަލަންޖެހޭ އެންމެ ފަހު ބަލިމީހާކަން ކޮމްޕިއުޓަރުން އެނގުންވުމާއިއެކު ހިލްޔާއަށް ނިމުނީދޯ އޭ ބުނެ ގޮނޑިން ތެދުވެލެވުނެވެ. އެއާއިއެކު ތަރުޖަމާނަކަށް އިން ކުއްޖާ ވެސް ހިނިތުންވުމަކާއިއެކު ނިމުނީއޭ ބުނެ ތެދުވެލިއެވެ. އެއާއިއެކު ހިލްޔާ އޭނަގެ މާސްކް ނަގާލަމުން ޑަސްބިނަށް އެޅިއެވެ. އަދި އަވަސް އަވަހަށް ހުދުކުލައިގެ ކޯޓު ބާލަމުން އެ ކޯޓު ގޮނޑީގައި އެޅުވުމަށްފަހު، އަރިމަތީ މޭޒުމަތީގައި އޮތް އޭނަގެ އަތް ދަބަސް ނަގައި ކޮނޑުގައި އެޅުވިއެވެ. އެ ހިނދު އަތުކުރީގައި އޮތް ސްމާޓް ވޮޗް ދިއްލުނު ހިނދު ގަޑިން 10:07 ވެފައިވި މަންޒަރު ފެނިފައި މެއަށް ގޮތެއްވީ ކަމެއް ހަނދާންވުމުންނެވެ. އެހާއިރު ވީއިރު ވެސް އޭނައަށް މަޣްރިބް ނަމާދާއި ޢިޝާ ނަމާދު ވެސް ނުކުރެވޭކަން ހަނދާންވުމުންނެވެ.
“އަސްތަޣްފިރު ﷲ…” ހިލްޔާގެ ހިތަށް ވެރިވީ އެ ބަސްތަކެވެ.
އެމަޖެންސީ ވޯޑުގެ ޑިއުޓީއާއި އޯޕީޑީގެ ދެމެދުން މަޣްރިބް ނަމާދު ކުރަން ވަގުތުކޮޅެއް ލިބުނު ހަނދާން އާވުމުންނެވެ. އެވަގުތު އޭނަ ރޭގަނޑުގެ ކެއުން އިސްކުރި ހަނދާންވުމުންނެވެ. އަދި ކެއުމުގެ ތެރެއިން އެކުވެރި އެހެން ޑޮކްޓަރަކާއި ވާހަކަ ދެއްކުމުގައި ބައިގަޑިއިރު ހޭދަވެ، ނަމާދު މަތިން އެއްކޮށް ހަނދާން ނެތުނުކަން އެނގުންވުމުންނެވެ.
އެ އެނގުންވުމާއިއެކު ހިލްޔާ ހޮސްޕިޓަލުން ނިކުންނަން ހިނގާފައި ދިޔައީ ވަރުބަލިވެފައިވާ ހިތަކާއިއެކީގައެވެ. ބޭރުފުށުން އޭނަ ކަޅުކުލައިގެ އަބާޔާއަކާއި ކަޅުކުލައިގެ ބުރުގާއެއް އަޅައިގެން ހުރުމުން އޭނަ ކިހާ ދީންވެރިހެން މީހުންނަށް ހާދަ ހީވާނެތާއެވެ. އެހެނަސް އޭނަގެ ޙަޤީޤަތް އެނގެނީ އޭނަގެ ވެރި ރައްބަށެވެ. އޭނަ ބަދަލުވެފައިވާ މިންވަރު ވެސް އެނގެނީ އޭނަގެ ވެރި ރައްބަށެވެ.
ހިލްޔާގެ ހިތުގައި އެންމެ ފުރަތަމަ ދީނަށްޓަކައި ލޯބި ޖެހުނީ ފުރާވަރުގައެވެ. ބޭރުފުށުގެ ރީތި ކަމާއިމެދު އިންތިހާއަށް ކަންބޮޑުވި އެ ޢުމުރުގައި އެހީގެ އަތެއް ދިއްކޮށްލީ ހިލްޔާގެ މާމައެވެ. ﷲ ބައްލަވާ ވޮޑިގެންވަނީ ބޭރުފުށުގެ ރީތިކަމަށް ނޫން ކަމާއި، އެކަލާނގެ ބައްލަވާ ވޮޑިގެންވަނީ ހިތްތަކަށް ކަމަށް ބުނެދިނީ މާމައެވެ. ހިލްޔާ ދީނާއި މެދު ގަޔާވީ އެ ބަސްތަކުން އިޙްސާސް ކުރެވުނު މިނިވަންކަމުންނެވެ. އެހާ ހިސާބުން އެހެން މީހުން އޭނައާއިމެދު ދެކޭ ނަޒަރިއްޔާތަށް އަޅުވެތިވާން ނުޖެހޭކަން ވިސްނުނެވެ. އެކަން ޔަޤީންވެ، އީމާންކަމުގެ ފޮނިކަން އިޙްސާސް ކުރެވުނީ، މާމަ ދިން އެތައް ނަސޭޙަތަކާއި، މާމައާއި އެކީ އުނގެނުނު އެތައް ޢިލްމެއްގެ ސަބަބުންނނެވެ.
ހޮސްޕިޓަލުގެ ޢިމާރާތުން ނިކުމެ، އެއްފަރާތުގައި ޕާކް ކުރެވިފައި އޮތް ކަޅުކުލައިގެ ކާރަށް ހިލްޔާ އެރީ މި ޚިޔާލުގައި ހުރެއެވެ. ޑްރައިވާރސް ސީޓަށް އަރައި ދޮރު ލައްޕާލުމަށްފަހު ހިލްޔާ ވަރުބަލިކަމުގެ ނޭވައެއް ދޫކޮށްލިއެވެ. އެއަށްފަހު ސީޓުގައި ބޯޖައްސާލަމުން ލޯ މަރާލި ހިނދު، ހަމަ ދެންމެ ދެންމެ ނިދި ދާނެހެން ހީވިއެވެ. އެހެނަސް ނުކުރެވޭ ނަމާދުތަކުގެ މަތިން ހަނދާންވުމާއިއެކު ލޯ ހުޅުވާލެވުނެވެ.
އެހިނދު ހިލްޔާއަށް އަމިއްލަ ނަފްސާއިމެދު ޝަކުވާ ކުރެވުނެވެ. ފުރާވަރުގައި އޭނަގެ ހިތު ތެރޭގައި އުފެދުނު އީމާންތެރިކަން ކޮބައިތޯ ހިތަށްއެރިއެވެ. މަތީ ސާނަވީގެ ކިޔެވުން ނިމި، ޔުނިވާރސިޓީގައި ކިޔެވުމުގެ ބުރަ ކަމުގެ ތެރެއިން އެ އީމާންތެރިކަން ގެއްލުނީ ހެއްޔެވެ؟ އޭނަ އެ އީމާންތެރިކަން އަނބުރާ ގެންނަން ހާދަ މަސައްކަތެއް ކޮށްފިއެވެ. ކޮންމެ ރަމަޟާން މަހެއް އައުމުން އާ ޖޯޝަކާއި އެކީ ޤުރުއާން ކިޔަވައި ދީނުގެ ޢިލްމު އުނގެނެން މަސައްކަތް ކުރެއެވެ. އެހެނަސް ވަކި ހިސާބަކުން އެ ހުރިހާ ކަމެއް އަނެއްކާވެސް މެދު ކެނޑިގެން ދެއެވެ. ނަމާދުތަކަށް ފަރުވާ ކުޑަވެ، ސުންނަތް ނަމާދުތައް އޭނަގެ އާދަތަކުގެ ތެރެއިން އެއްކޮށް ގެއްލިދެއެވެ. ކީއްވެ ހެއްޔެވެ؟
“ޔާ ﷲ….” ހިލްޔާގެ ހިތުން އައި އަޑަކީ އެއީއެވެ. އެވަގުތު ﷲ އަށް އެ ހުރިހާ ޝަކުވާއެއް ދަންނަވަން ބޭނުންވުމުންނެވެ. އިތުރު އެންމެ ބަހެއް ނުބުންޏަސް ﷲ އޭނަގެ ޙާލަތް ދެނެވޮޑިގެންވާނެކަން ހަނދާން ކުރަމުންނެވެ.
ހިލްޔާ އެހެން އިންދާ ފޯނަށް ނޮޓިފިކޭޝަންތައް އަންނަން ފެށި އަޑަށް، އަތް ދަބަސް ތެރެއިން ފޯނު ނަގައި ބަލާލެވުނެވެ. ބަލާލިއިރު އެއީ އޭނަ ފުރާވަރުގައި ހަދާފައިވާ އުޚްތުންގެ ވައިބާރ ގްރޫޕެކެވެ. ގްރޫޕް ހުޅުވާލިއިރު އުޚްތަކު އާޔަތެއް ޙިއްސާކޮށް އެ އާޔަތުގެ ތަފްސީރު ކިޔައިދޭން ފަށާފައިވެއެވެ. ނަމާދާއި ކެތްތެރިކަމުން ވާގި ހޯދުމަށް އަމުރު ކުރައްވާފައިވާ އާޔަތް ފެނުމާއިއެކު، މިއީ އޭނަ އުނގެނިފައިވާ އާޔަތެކޭ ހިތާހިތުން ކިޔާލެވުނެވެ. އެހެނަސް އެ އުޚްތާ ލިޔެފައިވާ މެސެޖުތައް ކިޔަން ފެށިއެވެ.
ހަމަ އެވަގުތު ފޯނު ރިންގުވާން ފެށުމުން ހިލްޔާއަށް އެ މެސެޖުތައް ކިޔައި ނުލެވުނެވެ. ސްކްރީނުން ‘އެލީ’ ގެ ނަން ފެނިފައި ހިލްޔާ ކޯލު ރިސީވްކޮށް، ކަންފަތުގައި ޖެއްސިއެވެ.
“ކީކޭ އެލީ؟” ހިލްޔާ އެހިއެވެ.
“ތުއްތާ އަދި ގެއަށް ނާންނަންދޯ؟ އިފް ސޯ ފިހާރައަކަށް ގޮއްސަ ރާމެން ގަނެގެން އަންނައްޗޭ. މި ޑްރާމާ ބަލާ ގަޑީގަ ކާ ހިތުން މިއުޅެނީ…” ހިލްޔާގެ 14 އަހަރުގެ ކޮއްކޮ އެކޮޅުން ވާހަކަ ދެއްކިއެވެ.
“ސާބަހޭ! އަދި މިރޭ ނުކަން؟” ހިލްޔާއަށް ގަޑިއަށް ނަޒަރެއް ދެމުން އަހާލެވުނެވެ.
“އާނ ތުއްތާ…ޑްރާމާ ބަލަން އިންދާ ހަނދާން ނެތުނީ. ބައްޕަ ކައިރި ނުބުނައްޗޭ ޕްލީޒް. ގެނެސްދެއްޗޭ އިނގޭ. ލަވް ޔޫ ލޯޑްސް.”
“ހުމް ދެން ހެވޭ. ކޮބައިތަ ދޮންތަ؟”
“ދޮންތަ….ދޮންތަބެ ނައިސްގެން އިރުގަނޑެއް ވަންދެން ސިޓިންގް ރޫމުގަ އިނދެފަ މިހާރު ކޮޓަރިއަށް ގޮސްފި…”
އެލީގެ އެ ވާހަކަ އިވިފައި ހިލްޔާގެ ދެބުމަ ކައިރިވިއެވެ. މިފަހުން އައިސް ދޮންތައާއި ދޮންތަގެ ފިރިމީހާއާއި ދެމެދު ވަނީ މައްސަލަތަކެއް ޖެހިފައެވެ. އެކަމުގެ ތަފްޞީލު މުޅި ޢާއިލާއިން ވެސް އެނގެނީ ހަމައެކަނި ހިލްޔާއަށެވެ. ދޮންތަ އެ ވާހަކަ އެހެން މީހަކާއި ހިއްސާ ނުކުރުމަށް އެދިފައިވުމުންނެވެ. ދޮންތަބެ އަދި ރަނގަޅުވާނެ ކަމަށް ދޮންތަ ބުނެފައިވާތީވެއެވެ. އެހެނަސް މިފަހުން އައިސް ދޮންތަބެ ގެ ސަބަބުން ދޮންތައަށް އައިސްފައިވާ ބަދަލުތައް ފެނިފައި ހިލްޔާއަށް ކެތްކުރެވެނީ ކިރިޔަ ކިރިޔާއެވެ.
“އޯކޭ ތުއްތާ ބޭއްވީ! ރާމެން ހަނދާންކޮށް ގެނެސްދެއްޗޭ!” ހިލްޔާ އެއްޗެކޭ ނުބުނެ އިންދާ އެލީ ތަކުރާރު ކުރިއެވެ. ހިލްޔާ އެ ވާހަކައަށް އޯކޭ ދިނުމުން އެލީ ފޯނު ކަނޑާލިއެވެ. އެއާއެކު ހިލްޔާ ކާރު ސްޓާޓްކޮށްލިއެވެ.
ހުޅުމާލެ ތެރެއިން 10 ވަރަކަށް މިނެޓް ވަންދެން ދުއްވުމަށްފަހު ހިލްޔާ ކާރު ޕާކްކޮށްލީ ބޮޑު ފިހާރައެއްގެ ކައިރިއަށެވެ. ފިހާރައަށް ވަދެގެން ގޮސް އެލީ ބޭނުންވާ ރާމެން އާއެކީ ގެއަށް ބޭނުންވާ ބައެއް އެހެން އެއްޗެހި ވެސް ޓްރޯލީއަށް އަޅަމުން ހިލްޔާ ދިޔައެވެ. ހިތްހަމަޖެހޭ ވަރު ވުމުން ހިލްޔާ ޓްރޯލީ ކޮއްޕަމުން ކައުންޓަރު ކައިރިއަށް ދިޔައެވެ. އެވަގުތު ކައުންޓަރު މަތީގައި އެއްޗެހި ބައިތިއްބަމުން ދިޔައީ މެދު ޢުމުރުގެ އަންހެނެކެވެ. ކަޅުކުލައިގެ ދިގު ހެދުމަކާއި އާދައިގެ ބުރުގާއަކާއި ނަންބަރު އައިނެއް އަޅައިގެން ހުރީ ހިލްޔާ ދަންނަ މީހެއްހެން ހިލްޔާއަށް ހީވިއެވެ. އެކަން ޔަޤީންވެގެން ދިޔައީ އެމީހާ، ހުރިހާ އެއްޗެއް އެއްޗެއް ކައުންޓަރު މަތީގައި ބެހެއްޓުމަށްފަހު ސީދާ ވެލުމުންނެވެ.
“އުސްތާޒާ!” ހިލްޔާއަށް ދެލޯ ބޮޑުކޮށްލަމުން އާދައަށްވުރެ ބާރު އަޑަކުން ގޮވައިލެވުނީ ހިތަށް ވެރިވި ޖޯޝާއި އެކީގައެވެ. އެއާއިއެކު އެ އަންހެން މީހާ ހިލްޔާއާއި ދިމާލަށް ބަލައިލިއެވެ.
“އަނހަ މިއީ ކޮން ކުއްޖެއް……ހިލްޔާ ތަ؟” އެ އަންހެން މީހާ ސުވާލު ކުރުމަށްފަހު ހިލްޔާއަށް ފަރުވާތެރިކަމާއެކު ބަލާލަމުން އެހިއެވެ. އެއާއިއެކު ހިލްޔާއަށް އަނގަ މަތީގައި ދެ އަތް އަޅާލަމުން ބޯޖަހާލެވުނެވެ.
ވާނީވެސް އެހެންތާއެވެ. ކުރިމަތިން އެ ފެންނަނީ ހިލްޔާއަށް ދީނީ ޢިލްމު އުނގަންނައި ދިނުމުގައި ބޮޑު ދައުރެއް އަދާ ކުރި އުސްތާޒާ އަސްމާއެވެ. ދީން އުނގެނުނަސް ދުނިޔެ ހޯދަން މަސައްކަތް ކުރެވިދާނެކަން ދަސްކޮށްދިނީ މި އުސްތާޒާއެވެ. އީމާންތެރިކަމަކީ މީހެއްގެ އުފެއްދުންތެރިކަމާއި ތޫނު ވިސްނުން ދޫކޮށްލަން ޖެހޭ ސަބަބެއް ނޫންކަން އުނގަންނައިދިނީ އުސްތާޒާއެވެ. އޭގެ ބަދަލުގައި މީހެއްގެ ކާމިޔާބީގެ އަސްލަކީ އީމާންތެރިކަން ކަމުގައި ކިޔައިދިނެވެ. އަދި ހަމަ މިއާއިއެކު އުސްތާޒާ ވަނީ އަމިއްލަ ދިރިއުޅުމުން ވެސް މި މިސާލު ދައްކާފައެވެ. ދީނީ ފޮތްތައް ލިޔެ، ރާއްޖެއިން ބޭރުގައި ހުއްޓަސް ރާއްޖޭގެ އުޚްތުންނަށް ދީން އުނގަންނައި ދިނުމަށް އޮންލައިން ސެޝަންތައް ހިލޭ ހިންގާއިރު، އުސްތާޒާއަކީ ނުހަނު ކާމިޔާބު ވަކީލެކެވެ. އެވަގުތު ވެސް ހިލްޔާގެ ހިތުގައި ޖޯޝެއްވީ، އުސްތާޒާ ގެ ސެޝަންތަކުގައި ބައިވެރިވިއިރު، ހިތުގައި އުފެދުނު އީމާންތެރިކަމުގެ މަތިން ހަނދާންވުމުންނެވެ.
“އުސްތާޒާ….އަހަރެން މަތިން ހަނދާން އެބަހުރިތޯ؟ ސެޝަނެއްގަ ބައިވެރި ނުވެވޭތާ ވެސް ދުވަސްވެއްޖެ.” ހިލްޔާ އެހެން ބުނެލީ، ޔުނިވާރސިޓީގެ ދުވަސްތައް ހަނދާން ކުރަމުންނެވެ. އުޚްތުންގެ ގްރޫޕުން އުސްތާޒާގެ ސެޝަންތަކުގެ ލިންކުތައް ހިލްޔާއަށް ފެނިފައިވެއެވެ. އެހެނަސް މަސައްކަތް ބުރަވުމުން ބައިވެރިވެވޭ ގޮތެއް ނުވެ، އެތައް ސެޝަނެއް ގެއްލިފައިވެއެވެ.
“ހެހެ….ހިލްޔާ މަތިން ހަނދާން ހުންނަނީ ވަރަށް ޚާއްސަ ހަނދާނަކުން. ފުރާވަރުގެ ކުއްޖަކު ދީނާއިމެދު އެހާ ޖޯޝުގަ އުޅެދާނެކަން އުސްތާޒާއަށް ސާބިތުކޮށްދިނީ ހިލްޔާ.” އަސްމާ ކައުންޓަރުގައި ހުރި ކާޑު މެޝިނަށް ކާޑު ދިއްކުރަމުން ބުންޏެވެ. އެ ވާހަކައަށް ހިލްޔާއަށް ހީލެވުނީ ހިސާބަކަށް ދެރަވެފައިވާ ޙާލުގައެވެ. މިއަދު އޭނަގެ ހިތުގައި އެ ޖޯޝު ނެތްކަން އެނގުންވުމުންނެވެ.
“އުސްތާޒާ…..މިކޮޅަށް އައީ ކޮން ދުވަހަކުތޯ؟ ފުރަތަމަ ފަހަރަށް ހަމަ ލޮލަށް ފެނުނީމަ ވަރަށް އުފާވެއްޖެ އަސްލުވެސް!” ހިލްޔާ އުޖާލާވި ހިނިތުންވުމަކާއެކީ ބުންޏެވެ.
“މިހާރު މައްސަރެއް ވެދާނެ. ހިތަށްއަރަނީ މިކޮޅަށް އާދެވުނީމަ ތި ޙަލަޤާ ގްރޫޕްގެ ހުރިހާ ކުދިންނާއި ބައްދަލު ކޮށްލާނީއޭ. އެކަމަކު ކުޑަކޮށް ބަލިވެ އުޅޭތީ ފަސް ކުރެވެނީ….” އުސްތާޒާ އެހެން ބުނެލީ، ކައުންޓަރު މަތީގައި ސޭޓު ބެހެއްޓި ހުދުކުލައިގެ ކުޑަ ކޮތަޅު ނަގަމުންނެވެ. ކޮތަޅު ނަގައި އަދި އެއްކޮށް ތިރި ކޮށްނުލެވެނީސް އެ ކޮތަޅު އުސްތާޒާގެ އަތުން ދޫވެގެން ދިޔަ މަންޒަރު ފެނިފައި ހިލްޔާގެ ހިނިތުންވުން ފަނޑުވިއެވެ.
“އުސްތާޒާ! އެއީ ކިހިނެއްތޯ އެ ވީ؟!” ހިލްޔާ އެހެން އެހީ، ޓައިލްސް މައްޗަށް ވެއްޓިފައި ހުރި އާފަލާއި އޮރެންޖު ނަގަން އަވަސްވަމުންނެވެ.
“އެއީ…..އަތުން ކައްސާލީ…ހެހެ…..” އުސްތާޒާ ވެސް ގުދުވެލަމުން ކޮތަޅަށް އެއްޗެހި އަޅަން ފެށިއެވެ. އެހިނދު އުސްތާޒާގެ ކޮތަޅުގައި ހިފައިގެން ހުރި ވާތް އަތުގައި ހުރި ތުރުތުރެއް ހިލްޔާއަށް ފާހަގަވިއެވެ. ނުރައްކަލެއްގެ އިންޒާރު ހިލްޔާގެ ސިކުނޑި ދިން ހިނދު ހިލްޔާ އުސްތާޒާ އާއިއެކީ ކޮޅަށް ތެދުވެލިއެވެ.
“އުސްތާޒާ މި ފަހުން ޑޮކްޓަރަކަށް ދެއްކިންތޯ؟” ހިލްޔާއަށް އެހެން އަހާލެވުނީ ދެންވެސް އުސްތާޒާއަށް ފަރުވާތެރި ނަޒަރެއް ދެމުންނެވެ. އޭނައަށް ހީވާ ހީވުންތަކުގެ އެހެން ހިލަމެއް ވޭތޯއެވެ.
“އާނ ދެއްކިން. އަސްލު އުސްތާޒާ މިކޮޅަށް އައިސްގެން އުޅެނިކޮށް ގޭގެ ތެރެއަށް ވެއްޓުނީ. އެފަހުން ވާތް އަތަށް ވަރަށް ތަދުވޭ. ޑޮކްޓަރު ބޭސްދީފަ ބުނީ ފިޒިއޯ ހެދީމަ ރަނގަޅުވާނެއޭ. އެކަމަކު އަދި އެއްކޮށް ރަނގަޅު ނުވެގެން މިއުޅެނީ.” އަސްމާ ކިޔައިދިނެވެ.
އެއާއިއެކު ހިލްޔާއަށް ހިސާބެއްގެ ތަސައްލީއެއް ލިބުނެވެ. އުސްތާޒާ އެ ބުނި އެއްޗެއް ޤަބޫލުކުރަން ބޭނުންވިއެވެ. އުސްތާޒާ ބަލާފައިވާނެ ޑޮކްޓަރަކީ އޭނައަށް ވުރެ ތަޖުރިބާކާރު ޑޮކްޓަރަކަށްވުން ގާތެވެ. ހިލްޔާ މެޑިކަލް އޮފިސަރެއްގެ ގޮތުގައި މަސައްކަތް ކުރާތާ އަދި ވީ އެންމެ 6 މަހެވެ. ގިނަ ފަހަރު އޭނަ ދޭ ޚިޔާލުތަކާއި، އޭނައާއި އެކީ މަސައްކަތް ކުރާ ސީނިއާރ ޑޮކްޓަރުންގެ ޚިޔާލު ތަފާތުވެއެވެ. އަދި ގިނަ ފަހަރު އެމީހުންގެ ޚިޔާލުތަކަކީ ޙަޤީޤަތަކަށް ވެގެންދެއެވެ. އެހެންކަމުން އޭނައަށް ދެންމެ ހީވީ ހީވުމަކީ ވެސް ގޯހަކަށް ވެދާނެ ނޫންހެއްޔެވެ؟
“އެހެންދޯ؟ ޝަފާކި ﷲ އުސްތާޒާ….ދަނީތޯ؟” އުސްތާޒާ ހިލްޔާއަށް ފަސްދޭން އުޅުނުހެން ހީވުމުން ހިލްޔާއަށް އަހައިލެވުނެވެ.
“އާނ ދަނީ….ދަރިފުޅު މިހާރު ހުންނާނެ އުސްތާޒާގެ އިންތިޒާރުގަ.” އުސްތާޒާ ބުންޏެވެ.
“އޮހް….އުސްތާޒާގެ ދަރިފުޅާ އެކީ ދޯ ފިހާރައަށް އައީ؟” ހިލްޔާއަށް އަހައިލެވުނެވެ. އުސްތާޒާގެ ވާހަކަތައް ހަނދާން ކުރަމުން އުސްތާޒާގެ ދަރިފުޅު މިހާރު ބޮޑުވެފައިވާނެ ކަން ހަނދާން ކުރަމުންނެވެ.
“ނޫނޭ…އޭނަ ހުރީ ގޭގަ. ރޭގަނޑު ހިނގާލަން ނިކުމެފަ ފިހާރައަށް މި ވަދެލީ…”
“އެހެންވީއިރު އަޅުގަނޑު އުސްތާޒާ ގެއަށް ގެންގޮސް ދެންތޯ؟ އަޅުގަނޑު މި އައީ ކާރުގަ….”
“އެންމެ ރަނގަޅު…”
އުސްތާޒާ ހިނިތުންވުމަކާއިއެކީ އެއްބަސްވުމުން ހިލްޔާއަށް ވެސް ހިނިތުންވެލެވުނެވެ. އުސްތާޒާ އާއިއެކީ ގިނަ ވަގުތު ހޭދަ ކުރެވޭނެތީ އުފާވީ ހިނދު، އުސްތާޒާ ގެ ބަލި ޙާލަތުގައި އެކަނި ދޫކޮށްނުލެވޭ ކަމުގެ ހިތްހަމަޖެހުން ވެސް ލިބުނެވެ. ނޭނގޭ ސަބަބަކާހުރެ ދެންމެ ހިލްޔާއަށް ހީވި ހީވުމާއިހުރެ ސިކުނޑީގައި އޭރުވެސް ނުތަނަވަސްކަމެއް ވިއެވެ. އުސްތާޒާ އާއި އިތުރު ސުވާލުތައް ކުރަން ބޭނުންވިއެއްކަމަކު ޖެހިލުންވިއެވެ. އެ ހީވާ ހީވުން ޙަޤީޤަތަކަށް ނުވެއްޖެނަމަ އޭނަގެ ސުވާލުތަކުން ބޭކާރު ގޮތުގައި އުސްތާޒާ ކަންބޮޑު ކޮށްލެވިދާނެތީވެއެވެ.
އިރުކޮޅެއްގެ ތެރޭގައި ހިލްޔާ އިނީ އުސްތާޒާ އާއިއެކު ކާރު ތެރޭގައެވެ. ދެމެދުގައި ދެކެވިގެން ދިޔަ ވާހަކަތަކުގެ ތެރެއިން އުސްތާޒާ އުޅެނީ ހިލްޔާ މެންގެ ގެއާއި ދިމާ ކުރިމައްޗަށް ހުންނަ ޢިމާރާތުގައި ކަން އެނގުނެވެ. އެކަމާއިމެދު ހިލްޔާގެ އުފާވެރިކަން ދެގުނަވިއެވެ.
“އެހެންވީމަ ދެން ކޮންމެ ދުވަހަކު އަންނާނަން އުސްތާޒާ އާއި ބައްދަލުކުރަން އިން ޝާ ﷲ! އުސްތާޒާގެ ވާހަކަތައް އިވުނީމަ ހާދަ އީމާންތެރިކަން ވަރުގަދަ ވެއޭ…..އަޅުގަނޑު މިއުޅެނީ އީމާންތެރިކަން ބަލިކަށިވީމަ ހަދާނެ ގޮތެއް ނޭނގިގެން. ނަމާދަށް ވެސް ފަރުވާ ކުޑަ އެބަވެވޭ. ވަރަށް ދެރަވޭ އަސްލު. ކިހިނެއްތޯ އަޅުގަނޑު ހަދަންވީ؟”
ކާރު ދުއްވަމުން ކުރީ ސީޓުގައި އިން އުސްތާޒާއަށް ލުއި ނަޒަރުތައް ދެމުން ހިލްޔާ އެހިއެވެ.
“އީމާންތެރިކަމަކީ އަބަދު އެއް މިނެއްގައި ހުންނާނެ އެއްޗެއް ނޫނޭ ހިލްޔާ. ރަސޫލާ ﷺ ގެ ޙަދީޘެއްގައި ވާ ގޮތުން، ހެދުމެއް ބާ ވާ ފަދައިން އަހަރުމެންގެ އީމާންތެރިކަން ވެސް ބާ ވާނެ. އެހެންކަމުން އެ އީމާންތެރިކަން އާ ކޮށްދެއްވުމަށް އެދި ﷲ ގެ ޙަޟްރަތުން އެދެން ޖެހޭނެ. اللّهُمَّ جَدِّدِ الْإِيمَانَ فِي قَلْبِي….” އުސްތާޒާ ދުޢާއެއް ދަސްކޮށްދިނެވެ. ހިލްޔާއަށް ކޮންމެވެސް ވަރަކަށް ޢަރަބި އެނގޭތީ އޭގެ ތަރުޖަމާއެއް ބޭނުމެއް ނުވިއެވެ.
“މާ ޝާ ﷲ، އުސްތާޒާ….ތިއީ ކުރިން އަޅުގަނޑަށް ނޭނގޭ ދުޢާއެއް…ޖަޒާކި ﷲ ޚައިރަން.” ހިލްޔާ ޝުކުރު އަދާ ކުރިއެވެ.
“ކޮންމެ ކަމެއްގައި ވެސް ދުޢާކޮށް ﷲ ގެ ވާގިއަށް އެދުން ވަރަށް މުހިއްމު ހިލްޔާ. އަހަރުމެން ހުރިހާ ގޮތަކުން ވެސް ﷲ އަށް ބަރޯސާވާން ޖެހޭކަން ހަނދާން ކުރަން ޖެހޭނެ. އަދި އެކަލާނގެ އިރާދަ ކުރައްވައިފިކަމެއް އަހަރުމެންނަށް ލަހެއް ފަހެއް ނެތި ލިބިގެންދާނެ. އުސްތާޒާގެ ދަރިފުޅު އުސްތާޒާގެ ގާތަށް އަނބުރާ އައި ގޮތަށް.” ނުހަނު އަސަރުން ފުރިގެންވި ގޮތަށް ނިމުނު އެ ވާހަކައިން ހިލްޔާއަށް އުސްތާޒާއާއި ދިމާލަށް ބަލައިލެވުނެވެ.
“މާ ޝާ ﷲ….އެ ދަރިފުޅަށް މިހާރު ހިދާޔަތް ލިބުނީތޯ؟” ހިލްޔާ އެ ސުވާލުކޮށްލީ، އުސްތާޒާގެ ދަރިފުޅުގެ ވާހަކަ މަތިން ހަނދާން ކުރަމުންނެވެ. އެ ކުއްޖާއަކީ އެހާ ގޯސް ނުވިޔަސް ދީނާއި ދުރު ކުއްޖެއް ކަމަށް އުސްތާޒާ ކިޔައިދީފައިވަނީ ފިލާވަޅެއްގެ ގޮތުންނެވެ. ހިދާޔަތް ދައްކަވާ ފަރާތަކީ ހަމައެކަނި ﷲ ކަން ސާބިތުކޮށްދިނުމަށެވެ. ޚުދު އުސްތާޒާގެ ދުލުން އެތައް ބަޔަކަށް ހިދާޔަތް ލިބިފައިވިޔަސް އުސްތާޒާގެ އަމިއްލަ ދަރިފުޅު ދީނާއި ދުރުވުމުންނެވެ.
“ކުރިން ވަރަށް އުސްތާޒާ އާއިއެކީ ވަގުތު ހޭދަ ނުކުރާނެ. އެކަމަކު މިފަހުން އެކީގަ އުޅެން ފަށައިފި. މަންމައާއި އެކީ ވަގުތު ހޭދަ ކުރުމުގެ އެ ހެޔޮ ޢަމަލުގެ ސަބަބުން އެ ކުއްޖާއަށް ހިދާޔަތް އިތުރުވުން އުސްތާޒާ ގެ އުއްމީދަކީ. އިން ޝާ ﷲ. އަދި ވެސް އުއްމީދު ކަނޑާ ނުލާނަން.” އުސްތާޒާ ކިޔައިދިނެވެ.
“އިން ޝާ ﷲ…” ހިލްޔާ އެހެން ބުނެލީ، ސިކުނޑިއަށް ވެރިވި އެތައް ސުވާލެއް އެއްފަރާތް ކުރަމުންނެވެ. އުސްތާޒާ ގެ އެ ދަރިފުޅުގެ ތަފްޞީލު ދަނެގަންނަން ބޭނުންވިއެވެ. މިހާތަނަށް އައިއިރު އެއީ އަންހެން ކުއްޖެއް ކަމެއް ނޫނީ ފިރިހެން ކުއްޖެއް ކަމެއް ވެސް އެކަކަށްވެސް ނޭނގެއެވެ. އެކުއްޖާ ގޯހީ ކިހާ ވަރަކަށް ކަމެއް ނޭނގެއެވެ. އެނގޭހާ ވެސް ކަމަކީ އެއީ ހިލްޔާއާއި ގާތް ޢުމުރެއްގެ ކުއްޖެއްކަމެވެ. ކިތަންމެ އެނގެން ބޭނުންވިޔަސް ސުވާލު ނުކުރީ، ނުބެހޭ ކަންކަމާއި ސުވާލު ނުކުރުމަކީ ރިވެތި އަޚްލާޤުގެ ތެރެއިން ވާ ކަމެއްކަން ހަނދާން ކުރަމުންނެވެ.
އިރުކޮޅެއްގެ ތެރޭގައި ހިލްޔާގެ ކާރު ޕާކް ކުރެވިގެން ދިޔައީ ހުޅުމާލޭގެ 10 ފަންގިފިލާގެ ޢިމާރާތެއްގެ ކުރިމައްޗަށެވެ. އުސްތާޒާ ހިލްޔާއަށް ޝުކުރު އަދާ ކުރުމުން، ހިލްޔާ ހިނިތުންވެލިއެވެ. އަދި ތިމަންނަގެ ގެ މިހިރީއޭ ބުނެ އަނެއް ފަރާތުގައި ހުރި ތަނަވަސް 15 ފަންގިފިލާގެ ޢިމާރާތް ދެއްކިއެވެ. އަދި ދެން ކޮންމެ ދުވަހަކު އުސްތާޒާއަށް ‘އުދަގޫ’ ކުރާނެ އަވަށްޓެރިއެއް ލިބުނީއޭ ބުނެ ސަމާސާ ކުރިއެވެ.
އުސްތާޒާ ކާރުން ފޭބުމަށްފަހު ގެއަށް ގޮސް ވަންނަން ދެން ވެސް ހިލްޔާއަށް ހިނިތުންވުމެއްގައި ބަލަން އިނދެވުނެވެ. އޭނަގެ ހިތުގެ އީމާންތެރިކަން ބަލިކަށިވި ކަމަށް ހިތަށް ވެރިވީ ޝަކުވާއާއިއެކު ﷲ ސުބްޙާނަހޫ ވަތަޢާލާ އޭނައަށް މި ފޮނުއްވީ ކިހާ ބޮޑު ނިޢުމަތެއްތޯ ހިތަށްއެރިއެވެ. އުސްތާޒާއާއި މިހާ ގާތްކޮށް އުޅުމުން އޭނަގެ އީމާންތެރިކަން އަނެއްކާވެސް ވަރުގަދަ ވާނެ ކަމަށް ހިލްޔާއަށް ޔަޤީނާއި ގާތް ކުރެވުނެވެ. އޭނަ އެންމެ އަޑު އަހާ ހިތުން އަޑުއަހަނީ ވެސް އުސްތާޒާގެ ނަސޭޙަތްތަކަށް ވާތީވެއެވެ.
ހިލްޔާ އޭނަގެ ބައްޕަގެ ގޭގެ ޢިމާރާތުގެ ކައިރީގައި ހެދިފައިވި ގަރާޖަށް ކާރު ވެއްދިއިރު ވެސް، އެ މޫނުމައްޗަށް ހިނިތުންވުންތަކެއް ވެރިވަމުން ދިޔައެވެ. އުސްތާޒާ އާއި ދިމާވުމުން ހިތަށް ވެރިވެފައިވި ޖޯޝު އަދިވެސް އެގޮތުގައިވީތީވެއެވެ.
ހިލްޔާ ޢިމާރާތަށް ވަދެގެން ގޮސް ލިފްޓަށް އަރައި ފިތާލީ 10 ވަނަ ނަންބަރަށެވެ. މުޅި އެ ޢިމާރާތަކީ މާލެއަށް އުފަން ހިލްޔާގެ ބައްޕަ ނަހީދުގެ ގެ ކަމަށް ވިޔަސް އެމީހުން އުޅެނީ 10 ވަނަ ފަންގިފިލާގައެވެ. އެއަށްވުރެ ތިރީގައި ހުރި ފަންގިފިލާތަކުގައި މީހުން ކުއްޔަށް އުޅޭއިރު މަތީ ފަންގިފިލާތަކަކީ އަދި ހަދަމުންދާ ތަންތަނަކީ 10 ވަނަ ފަންގިފިލާއާއި އެއްވަރަށް ހަދަމުންދާ ތަންތަނެވެ.
10 ވަނަ ފަންގިފިލާގެ ޚާއްޞަ ކަމަކީ މުޅި އެ ފަންގިފިލާއަކީ އެއް ގެ ކަމަށްވާތީވެއެވެ. ފަންގިފިލާގެ ދޮރު ހުޅުވާލުމާއިއެކު ތަނަވަސް ސިޓިންގް ރޫމެއް ހިލްޔާއަށް ފެނިގެން ދިޔައީ އެހެންވެއެވެ. ސިޓިންގް ރޫމުގެ ސޯފާގައި ދެފައި ވަށް ކޮއްގެން އިން އެލީއަށް އޭނަގެ ގެނައި ރާމެން ނޫޑުލްސް ދިނުމަށްފަހު ދެންވެސް ކައިގެން އަވަހަށް ނިދަން ދިޔުމަށް ހިލްޔާ ބުންޏެވެ. އަދި ކުރު ގޮތަކަށް ބައްޕައާއި، މާމައާއި ދޮންތަގެ އިތުރުން ދޮންތަބެ ގެ ޚަބަރު ވެސް ބެލިއެވެ. އެނގުނު ގޮތުގައި އެންމެން ވީ ނިދާފައެވެ. އިރުކޮޅެއް ކުރިން ދޮންތަބެ ވެސް އައިސްފައިވާ ވާހަކަ އިވުމުން ހިލްޔާއަށް ދޮންތައާއި މެދު ހިސާބެއްގެ ހަމަޖެހުމެއް ލިބުނެވެ.
ހިލްޔާގެ ކޮޓަރި ވަނީ އެ ބޮޑު ފަންގިފިލާގެ މަތީބައިގައި ކަމަށްވުމުން ހިލްޔާ ސިޑިން އަރައިގެން މައްޗަށް ދިޔައެވެ. އަދި އޭނަގެ ބޮޑު ކޮޓަރީގެ ފާޚާނާއަށް ވަދެ ފެންވަރައި ތާޒާ ވެލުމަށްފަހު ވުޟޫ ކޮށްލިއެވެ. ފަސޭހަ މަޑު ފޮއްޗެއްގެ ދިގު ހެދުމެއް ލީ، ނަމާދު ކޮށްލުމަށެވެ. ކިތަންމެ ވަރުބަލި ވެފައިވިޔަސް ހިލްޔާ ހީވާގި ވެލަމުން އޭނަގެ މަޑު މުށިކުލައިގެ މުސައްލަ ނަގައި ހަމަ އެ ކުލައިގެ ފޮށާ އަޅައިގެން އެންމެ ފުރަތަމަ މަޣްރިބް ނަމާދު ޤަޟާ ކުރިއެވެ. އެއަށްފަހު ޢިޝާ ނަމާދު ވެސް އަދާ ކުރުމަށްފަހު މުސައްލަ މަތީގައި އިނދެ ޒިކުރުތައް ކިޔައިލިއެވެ. އެއަށްފަހު ދެއަތް އުފުލައިލީ ދުޢާއެއް ކުރަން ހިތް އެދުނު ވަރުންނެވެ.
“اللّهُمَّ جَدِّدِ الْإِيمَانَ فِي قَلْبِي….ޔާ ﷲ! މިއަޅާގެ ހިތުތެރޭގައިވާ އީމާންތެރިކަން އާ ކޮށްދެއްވާށި!”
އެ ދުޢާއަށް ފަހު ހިލްޔާ އާމީން ކިޔާލީ އޭނަ ދެން ބޭނުން އެހެން އެއްވެސް ކަމެއް ނެތް ފަދައަކުންނެވެ. އާނއެކެވެ. ފުރާވަރުގައި ކުރެވުނު ތަޖުރިބާއިން ހިލްޔާއަށް ދަސްވެފައިވަނީ އެކަމެވެ. ދިރިއުޅުމަށްޓަކައި އެންމެ މުހިއްމީ ހިތުގައިވާ އީމާންތެރިކަމެވެ. އީމާންތެރިކަން ރަނގަޅުވެއްޖެނަމަ، ޙަޔާތުގެ އެހެން ކަންތައް ވެސް ބާއްޖަވެރި ވެގެން ދެއެވެ. އަދި ހިތާމަވެރި ކަމެއް ދިމާވިޔަސް އެކަމަކުން އަރައިގަންނަން ފަސޭހަވެދެއެވެ.
ދުޢާ ކުރުމަށްފަހު ހިތަށް ލިބުނު ހަމަ ޖެހުމާއިއެކު ހިލްޔާ ފޮށާ ނަގައި ފަށް ޖަހާލަމުން މުސައްލަ ތެރެއަށް އެޅިއެވެ. އަދި ފޮށަލާއި އެކީ މުސައްލަ ފަށްޖަހާލަމުން އޭނަގެ ބޮޑު އަލަމާރީގެ ފިލައެއްގެ މަތީގައި ބޭއްވިއެވެ.
އެއަށްފަހު ހިލްޔާ ގޮސް އިށީނީ ރީތިވާ މޭޒު ދޮށުގައެވެ. ނިދުމުގެ ކުރިން މޫނު ތާޒާ ކުރުމަކީ ހިލްޔާގެ އާދައަކަށް ވުމުންނެވެ. ނުހަނު ތަރުތީބުން ރީތިވާ މޭޒުމަތީގައި ބެހެއްޓިފައިވި ރީތިވާ ސާމާނުގެ ތެރެއިން ނައިޓް ކްރީމެވެ. ކްރީމް ލައި ނިންމުމަށްފަހު ހިލްޔާ އަމިއްލަ ސޫރައަށް ނަޒަރެއް ދިނެވެ.
ހިލްޔާއަށް ލިބިފައިވަނީ ރީތި ސޫރައެކެވެ. ދޮންވެފައި ދިގު މޫނެކެވެ. ކޮނޑުން ތިރިއަށް ދިގުމިން އޮންނަ ކަޅުކުލަ ގަދަ ބޯ، ފަން އިސްތަށިގަނޑު ރީތި ގޮށަކުން އައްސާލެވިފައިވިއެވެ. ފިޔާތޮށި ކުލަ އަރާ ތުންފަތެކެވެ. ކަޅު ކުލަ ގަދަ ބުމައަކީ ހަދާފައިވާ ބުމައެއްހެން މީހަކަށް ހީވެދާނެއެވެ. ބޯ އެސްފިޔަތަކުން ހިޔާ އެޅިފައިވަނީ ކަޅު ކުލައިގެ ރީތި ދެލޮލަށެވެ. ހިލްޔާ އެ ސޫރައަށް ބަލަން އިނދެ ފުރިހަމައަށް ހިނިތުންވެލުމުން، ދިގު އަޑިކޮޅެއް އެ ކޯތާފަތަށް އެރިއެވެ.
ހިލްޔާގެ އެކުވެރިން ބުނާ ގޮތުގައި، ހިލްޔާގެ ނޭފަތުގެ ބައްޓަން އެ ހުރި ވަރަށް ވުރެ ހިމަ ނަމަ، މަޝްހޫރު ފިލްމީ ތަރި، އެނާ ހެތާވޭ އާއި އެއްވެސް ތަފާތެއް ނެތީހެވެ. ފުރާވަރުގައި އަމިއްލަ ސޫރައަށް އެހާ ގިނައިން ބެލުނު އެއް ސަބަބަކީ އެއީއެވެ. އެހާ ރީތި ސޫރައެއް ލިބިފައި ވިޔަސް ހިލްޔާގެ ސަމާލުކަން މުޅިންހެން ހުއްޓިފައިވަނީ އޭނަގެ ނޭފަތަށެވެ. މާމަގެ ސަބަބުން ހިތަށް ވެރިވި އީމާންތެރިކަމުން އޭގެ ބޮޑު ބައެއް ހިތުން ފިލައިގެން ދިޔަޔަސް، އެއްކޮށް ފިލައިގެނެއް ނުދެއެވެ. ޑޮކްޓަރުކަން ކިޔަވަން ފެށި ފަހުން، ޕްލާސްޓިކް ސާރޖަރީ އާއި ބެހޭގޮތުން ދޭތެރެ ދޭތެރެއިން ހޯދެން ވެސް ހޯދެއެވެ.
އެވަގުތު ވެސް އެ ޚިޔާލުތަކުން ސިކުނޑި ފުރެން ފެށި ވަގުތު ހިލްޔާ ވަގުތުން ރީތިވާ މޭޒުގެ ގޮނޑިން ތެދުވެ ބޯހޫރުވައިލިއެވެ.
” اللَّهُمَّ أَنْتَ حَسَّنْتَ خَلْقِي فَحَسِّنْ خُلُقِي” ހިލްޔާ މޫނު ބަލާ ލޯގަނޑުން އަމިއްލަ ސޫރަ ފެންނަ ހިނދު ކިޔާ ދުޢާ ކިޔާލީ އަވަސްއަވަހަށެވެ. ޢަރަބި އެނގުނަސް އެވަގުތު އެ ދުޢާގެ މާނައަށް ސަމާލުކަމެއް ނުދެއެވެ. އޭގެއިން ބުނަނީ އަޚްލާޤް ރަނގަޅު ކޮށްދެއްވުމަށް ކުރެވޭ ދުޢާއެއް ކަމަށް ސިކުނޑީގެ ކަނަކުން ބުންޏެވެ. އެހެނަސް ދާދި ދެންމެއަކު ހިލްޔާގެ ހިތަށް ވެރިވި އިޙްސާސްތަކުގެ ޙައްލު ވީ އެ ދުޢާގައި ކަން ހިލްޔާގެ ހިތަށް ރޭކާނުލައެވެ. އެ ހިތް ވީ އެހާ ވެސް ބޮޑަށް ޣާފިލުވެފައެވެ. ﷲ ގެ ހަނދުމައިން ތަކުރާރުކޮށް ދުރުވުމުގެ ސަބަބުންނެވެ.
ހިލްޔާ ރީތިވާ މޭޒުދޮށުން ތެދުވެ، އެނދާއި ދިމާލަށް ދާން ޚިޔާލު ކުރަމުން ވެސް، ބެލްކަންޏަށް ނިކުމެވޭ ދޮރާއި ދިމާލަށް ބަލައިލީ، ކަމެއް ހަނދާންވުމުންނެވެ. އެހިނދު ބެލްކަންޏަށް ނިކުމެވޭ ދޮރުގެ ފޮތި ދަމާފައިވީ ހިލްޔާ ބުރުގާ ނާޅާ ހުންނާތީވެއެވެ.
އެވަގުތު ބެލްކަނީ ކައިރިއަށް ދާން ބޭނުންވީތީ ހިލްޔާ، އަލަމާރިން ނެގި ޝޯލްއެއް މަދު ޕިންތަކަކުން ނުހަނު އާދައިގެ، ބޮޑު ގޮތަކަށް އެޅިއެވެ. އެއަށްފަހު ފޮތި ކަހާލަމުން ބެލްކަނީގެ ބިއްލޫރި ކައްސާ ދޮރުވެސް ކަހާލިއެވެ. އިސާހިތަކު ރޭގަނޑުގެ ފިނި ވައި ގައިގައި ޖެހުނެއްކަމަކު އެހާ ފިންޏެއް ނުވެއެވެ. ފިނި ނުވީ ލައިގެން ހުރި ހެދުމުގެ ސަބަބުން ކަމެއް، ނޫނީ އެވަގުތު ހިތަށް ވެރިވި ޚިޔާލުތަކުން ކަމެއް ހިލްޔާއަށް ޔަޤީނެއް ނުކުރެވުނެވެ.
މަގުން ދުއްވަމުން ދިޔަ ސައިކަލުތަކާއި ކާރުތަކުގެ އަޑު ގަދަވިއެއްކަމަކު ހިލްޔާގެ ނަޒަރު ހުއްޓިފައިވީ ކުރިމަތިން ފެންނަމުން ދިޔަ ބެލްކަންޏަށެވެ. އެ ބެލްކަންޏަށް ވެސް ނިކުމެވޭ ކަހާ ދޮރުގެ އަނެއްފަރާތުން ފޮތި ދަމާފައިވިއެވެ. ރޭގަނޑު 12 ޖަހައި ބޮޑުވެފައިވި އެ ވަގުތު ކުރިމަތިން ފެންނަމުން ދިޔަ އެ ޢިމާރާތުގެ ހުރިހާ ފަންގިފިލާއެއް ފެންނަމުން ދިޔައީ އަނދިރި ކޮށެވެ. އެންމެ މަތީގައިވި އެ 10 ވަނަ ފަންގިފިލާ ފިޔަވައެވެ. ދަމާފައިވި ފޮތީގެ އަނެއް ފަރާތުން ދިއްލިފައިވާ ރީނދޫ ކުލައިގެ ބޮތްކެއްގެ އަލި ފެންނަމުން ދިޔައެވެ.
ހިލްޔާއަށް އެ ބެލްކަނީ ފާހަގަވާން ފެށީ މީގެ މައްސަރެއްހާ ދުވަސް ކުރިންނެވެ. އޭގެ ކުރިން އެ ފަންގިފިލާގައި އެއްވެސް ބަޔަކު ނޫޅޭކަން ހިލްޔާއަށް ޔަޤީންވެފައިވީ، އެއްވެސް ވަގުތެއްގައި އެ ބެލްކަނީގައި ބޮތްކެއް ނުދިއްލޭތީވެއެވެ. އެހެނަސް މައްސަރެއްހާ ދުވަސް ކުރިން ބޮކި ދިއްލެން ހިލްޔާ އަޖާއިބުވާ ފަދަ ގޮތަކަށެވެ. އެތާނގައި އެ އުޅޭ މީހަކު ވަރަށް އަވަހަށް ނިދައެވެ. އެކަން އެނގެނީ 9:30 ވާއިރު ކޮންމެ ރެއަކު ބޮކި ނިވޭތީވެއެވެ. އަދި ދަންވަރު 12 ނޫނީ 1 ޖަހާއިރު އަބަދުވެސް ބޮކި ދިއްލޭނެއެވެ. އެއަށްފަހު ފަތިސް ނަމާދާއި ޖެހެންދެން ބޮކި ދިއްލިފައި ހުންނާނެއެވެ.
އެހާ އާދަޔާ ޚިލާފު ގޮތަކަށް ބޮކި ދިއްލި، ނިވޭތީ ހިލްޔާއަށް އެމީހަކާއި މެދު ވިސްނުނެވެ. ޢާއްމު ގޮތެއްގައި ދަންވަރު ހޭލާ ހުންނަ މީހެއްނަމަ، އެހާ އަވަހަށް ނުނިދާނެއެވެ. ދަންވަރު ހޭލާ ހުރުމުން ހިލްޔާއަށް އެންމެ ފުރަތަމަ ވިސްނުނީ ގޯސްކޮށެވެ. އެއީ އަންހެނަކަށް ވިޔަސް ފިރިހެނަކަށް ވިޔަސް ދަންވަރު ހޭލާ ހުރެ ހެޔޮ ކަމެއް ނުކުރާނެ ކަމަށް ހީކުރެވުނީ ޒަމާނަށް ވިސްނާފައެވެ.
އެއީ ކުށް ހީއެއްކަން ހިލްޔާއަށް އެނގުނީ، އެއްރޭ އެ ފަރުދާ ކެހިފައި ހުރުމުން ފެނުނު މަންޒަރުންނެވެ. އެ ކޮޓަރި ތެރޭގައިހުރީ ނަމާދަށް ހުރި ފިރިހެން ޒުވާނެކެވެ. ޤިބްލައިގެ ގޮތުން އެ ޒުވާނާ ހިލްޔާއަށް ފަސްދީގެން ހުރުމުން އެ ޒުވާނާގެ ސޫރައެއް ހިލްޔާއަށް ނުފެނުނެވެ. އެހެނަސް އެ ހައިބަތު ހުރި ހަށިގަނޑުގެ ބައްޓަމުންނާއި، އެ ޒުވާނާގެ އަޅުކަމުގެ މަންޒަރުން ހިލްޔާގެ ޒުވާން ހިތަށް ގޮތެއްވިއެވެ.
26 އަހަރުގެ ޢުމުރަށް އައިއިރު ހިލްޔާއަށް ރީތި ފިރިހެނުން ފެނިފައިވެއެވެ. އެހެނަސް މިހާތަނަށް އައިއިރު އެއްވެސް ފިރިހެން ކުއްޖަކާއި ރައްޓެހިވެފައެއް ނުވަނީ، ކިޔެވުމަށް ދެވުނު ސަމާލުކަމުގެ ބޮޑުކަމުންނެވެ. ކުރިއަށް އޮތް ތަނުގައި ވެސް ހިލްޔާ ކިޔަވަން ޚިޔާލު ކުރެއެވެ. މީހުން ކިތަންމެ އެއްޗެއް ކިޔުނަސް ކައިވެނީގެ ޚިޔާލު އަދިވެސް އޮތީ ވަރަށް ދުރުގައެވެ. އިންޓާނަލް ސާރޖަރީ އިން ސްޕެޝަލައިޒް ވުމަކީ ހިލްޔާގެ ހުވަފެނަކަށްވާތީވެއެވެ. އެ ހުވަފެނަށްވުރެ ރީތި ޙަޔާތެއް އޭނައަށް ހޯދައިދޭނެ ފިރިހެނަކާއި އަދި ދިމާވެފައެއް ނުވެއެވެ. އެހެނަސް އެ ޒުވާނާ އެރޭ ފެނުނު ފަހުން ދަމާ ބާރަކުން ހިލްޔާގެ ހިތް އެދިމާލަށް ދެމެމުން ދިޔައެވެ.
އެހިނދު އުސްތާޒާ ދެއްކި ވާހަކައެއް ހިލްޔާގެ ހަނދާނަށް އައެވެ. އުސްތާޒާ އުޅެނީ އެ ޢިމާރާތުގެ 10 ވަނަ ފަންގިފިލާގައި ކަމަށް ބުނި ބުނުމެވެ. އެއާއިއެކު ހިލްޔާގެ ހިތް ތެޅިލިއެވެ. އުސްތާޒާގެ ދަރިފުޅަކީ އެއީތޯ ހިތަށް އެރިއެވެ.
އެހިނދު ހިތަށް ވެރިވާން ފެށި އުފާވެރި ޚިޔާލުތަކަށް ކުއްލި ހުއްޓުމެއް އައީ އެ ބެލްކަނީގެ އަނެއްފަރާތުން ފެންނަމުން ދިޔަ ބޮކި ކުއްލިއަކަށް ނިވިގެން ދިޔުމުންނެވެ. އެއާއިއެކު ހިލްޔާގެ ދެބުމަ ކައިރިވީ، ކޮންމެވެސް ގޯހެއް ވެއްޖެހެން ހީވުމުންނެވެ. އިރުކޮޅެއް ވަންދެން އެ ދިމާލަށް ބަލަން ހުރުމަށްފަހު، އެ ޒުވާނާ މިރޭ ނިދީ އެ ގަޑީގައި ކަމަށް ވެދާނެއޭ ހިތަށްއެރިއެވެ.
އެހެން ހިތައި ހިލްޔާ އަނެއް ފަރާތަށް އެނބުރެން ޚިޔާލު ކުރިތަނާ ފައިގައި ތަޅު އެޅުވުނީ އެމްބިއުލާންސްގެ ސައިރަން ގެ އަޑު ނުހަނު ގާތުން އިވެން ފެށުމުންނެވެ. ތިރިއަށް ބަލައިލިއިރު އެމްބިއުލާންސް މަޑުކޮށްލީ ކުރިމަތިން ފެންނަމުން ދިޔަ ޢިމާރާތުގެ ކައިރިއަށެވެ. އިސާހިތަކު އެމްބިއުލާންސުން މީހުން ފައިބައިގެން އެ ޢިމާރާތަށް ވަން މަންޒަރު ހިލްޔާއަށް ފެނުނު ހިނދު މެއަށް ފިނިވިއެވެ. ކުއްލި ގޮތަކަށް ހަނދާންވީ އެރޭ އުސްތާޒާގެ އަތުގައިވި ތުރުތުރެވެ. އޭނައަށް ހީވި ހީވުމެވެ. ނުތަނަވަސްކަމުގައި މިނެޓްތަކެއް ހިނގައި ދިޔަކަމެއް ވެސް ހިލްޔާއަށް ނޭނގުނެވެ. އެ ހުރި ގޮތަށް ހުއްޓާ ޢިމާރާތުން ނިކުމެގެން އައި މީހުން އުފުއްލައިގެން އައި ސްޓްރެޗާރ މަތީގައި އޮތީ އުސްތާޒާ ކަން ޔަޤީންވީ ހިނދު، ހިލްޔާ ގަނޑުވިއެވެ.
ނުނިމޭ
March 29, 2025 @ 5:21 pm
Bismillah!
Here is to the beginning of a new journey In Sha Allah. So glad to be back to you readers Alhamdhulillah. All praise and thanks is for Allah Who brought me back here again. Whatever good I am able to convey through this story is only from Him and any shortcoming in it is from me.
I dedicate this story to any reader who has felt a closeness to Allah and you dearly wish to hold onto it. I think through my previous stories, I sort of conveyed the idea that once you have made a big turn towards Allah, that’s your happy ending, at least spiritually. That yes there maybe life challenges but we wont be tested with weakness in Iman.
However that isn’t true. For our Iman to remain strong, we must continually turn back to Allah and there are consequences for not doing so. Through this story, I hope to share these lessons in depth In Sha Allah. This is a reminder, from my heart to yours.
I ask Allah to keep us all steadfast on our beautiful faith. To not let our hearts deviate after He swt has guided us. Aameen!
March 29, 2025 @ 5:23 pm
Abdullah ibn Amr reported: The Messenger of Allah, peace and blessings be upon him, said, “Verily, the faith of one of you will wear out within him, just as a shirt becomes worn out, so ask Allah to renew faith in your hearts.”
Source: al-Mu’jam al-Kabīr lil-Ṭabarānī 14668
Grade: Sahih (authentic) according to Al-Albani
March 29, 2025 @ 5:45 pm
Varah varah reethi… Maashaa Allah…❤️❤️❤️
Jana ge vaahaka thakun varah gina ibraiyy libi dheenaai behey gothun dhasvey…. 😊😊😊 when next?.
March 29, 2025 @ 6:00 pm
Reethi shauguveri feshumeh 😊
Kuda kameh faahaga kollaanan. Eii namaadhegge vaguthu faaithu viyas, kuran jeheynee tharutheebun. Maghrib koffa isha kuran jeheynee kithamme lasviyas.
March 30, 2025 @ 4:19 am
Rangalhu kolladhin kamahtakai Jazaakillah Khairan Anonymous. Mihaaru rangalhu koffin Alhamdhulillah ^_^ And you have guided me and any reader who reads this to follow the correct way Ma Sha Allah!
March 30, 2025 @ 2:23 am
Varah reeti . When next
March 30, 2025 @ 4:15 am
Maashaa Allah mi part vx varah varah reethi…. when next??
March 30, 2025 @ 4:22 am
Alhamdhulillah (All praise and thanks is for Allah) ^_^
Next part will be uploaded on Wednesday In Sha Allah. I strongly advise all readers to make the dua included in this episode as frequently as you can. Especially at times where duas are accepted. It has personally done wonders for me Alhamdhulillah.
March 30, 2025 @ 8:05 am
Slm janaa dhahthaa.. kihineii tha haalu??Masha Allah mi story ge first part varah varah reethi🥰..
Eid Mubarak janaa dhahthaa ❤️