ނަފްސީ (ފަންސާސްއަށްވަނަ ބައި)

ނަފްސީ (ފަންސާސްއަށްވަނަ ބައި)

“ހަރުގަނޑަކުން ވެއްޓިގެން. ޕޮސިބަލް ފްރެކްޗާރ…އިޓްސް ދާނިޝް ސާރ.” ހިލްޔާ ކޮންސަލްޓޭޝަން ރޫމުން ނިކުތުމުން ނަރުސް ކުއްޖާ ހިލްޔާއާއި ދާދި އެއްވަރަކަށް ހިނގަމުން ކިޔައިދިނެވެ. ނަރުސް ކުއްޖާ އެންމެ ފަހުން ބުނެލި ބަސްތަކާއެކީ ހިލްޔާއަށް ދެލޯ ބޮޑުކޮށްލަމުން ނަރުސް ކުއްޖާއަށް ބަލާލެވުނެވެ. އޭގެ ދެވަނަ ސިކުންތުގައި ހިލްޔާގެ އެ އަވަސް ހިނގުން ދުވުމަކަށް ބަދަލުވިއެވެ.

ހިލްޔާއަށް ގޮސް އެމަޖެންސީ ރޫމުގެ ދޮރުމައްޗަށް އެރި ތަނާހެން އެތާހުރި އެނދެއްގައި އިން ދާނިޝް ފެނުނެވެ. ދާނިޝް ފެނިފައި ހިނދުކޮޅަކަށް މަޑުކޮށްލެވުނެއްކަމަކު އަނެއްކާވެސް ދިގު ފިޔަވަޅުތަކެއްގައި ދާނިޝް ކައިރިއަށް ދެވުނެވެ. އެހިނދު ނަރުސް ކުދިން ފުރަތަމަ އަވަސް ފަރުވާއެއްގެ ގޮތުން ދާނިޝްގެ ކަރުގައި އަޅުވާފައިވާ ބެލްޓެއްގައި ކަނާތު އަތް އަޅުވާފައިވިއެވެ.

“ކިހިނެއް ވެއްޓުނީ؟” ހިލްޔާ އެ ސުވާލުކޮށްލީ ދާނިޝްއާއި އެކީ، ދާނިޝް ކައިރި އެތާ ހުއްޓި ހުރި ޒުވާނާއަށް ވެސް ވާ ގޮތަށެވެ. ދާނިޝްގެ މޫނުމަތިން ތަދުވަމުންދާ މިންވަރު އެނގުމާއިއެކު ދާނިޝްއަށް ޖަވާބެއް ނުދެވިދާނެތީވެއެވެ. އެހެނަސް އެންމެ ފުރަތަމަ ވާހަކަ ދެއްކީ ދާނިޝްއެވެ.

“ހަރުގަނޑަށް….އަރަމުން ދަނިކޮށް.” އުދަގޫ ގޮތަކަށް ދާނިޝް ބުންޏެވެ.

“ކިހާ އުސްމިނަކުން ވެއްޓުނީ؟” ހިލްޔާ ދާނިޝްގެ އެކުވެރިޔާއަށް ބަލާލަމުން އަހާލިއެވެ.

“ގާތްގަނޑަކަށް ފޯރ ޓު ފައިވް ފީޓް. ކަނާތް ފަރާތަށް ގޮއްސަ ވެއްޓުނީ.” ފަޔާޒް ޖަވާބު ދިނެވެ.

“ދާނިޝް….ބޯ އަނބުރާތަ؟” ހިލްޔާ އަނެއްކާވެސް ދާނިޝްއަށް ބެލިއެވެ. ދާނިޝް އިސްޖެހިފައި އިނދެ ބޯހޫރުވާލިއެވެ.

“ކަނާތު އުޅަނބޮށި ފިޔަވައި އެހެން ތަނަކަށް ތަދުވޭތަ؟” ހިލްޔާ އެހިއެވެ.

“ކޮނޑަށް ތަދުވޭ. ބުރަކަށި….ފަޔަށް ވެސް.” ދާނިޝް ކިޔައިދިނެވެ.

“ހަރުގަނޑުގެ ބައެއް ގޮސް ވެއްޓުނީ ދާނިޝް ފައި މައްޗަށް.” ފަޔާޒް އިތުރު ކުރުމުން ހިލްޔާއަށް އެއްފަހަރު ފަޔާޒަށް އަނެއްފަހަރު ދާނިޝްއަށް ބަލާލީ އިތުރު ކަންބޮޑުވުމަކާއިއެކީގައެވެ.

“ބަލާލާނަން އިނގޭ…” ހިލްޔާ އެހެން ބުނެލީ ސީރިއަސްކަމާއި އެކީގައެވެ. ބަލިމީހަކު ތަދުވާ ވާހަކަ ބުނުމުން ހީވާ ހީވުމެއްގެ މައްޗަށް ފަރުވާއެއް ނުދެވޭނެއެވެ. ލިބިފައިވާ އަނިޔާގެ ޒާތް ނޭނގި އެންމެ އެކަށީގެންވާ ފަރުވާއެއް ނުދެވޭނެއެވެ.

ހިލްޔާ ދާނިޝްގެ ގަމީހުގެ ގޮށްތަކާއި ދިމާލަށް ބަލާފައި ދާނިޝްގެ ޙާލު ހުރި ގޮތަށް ބަލަމުން އެ ޚިޔާލު ބަދަލުކުރިއެވެ. މި ޙާލަތުގައި ފަސޭހަވާނީ ގަމީސް ކަފާލުން ކަމަށް ސިކުނޑި ބުންޏެވެ. އެހެންކަމުން ކައިރީގައި ހުރި ކަބަޑެއްގެ މަތީގައި ހުރި ތަބަކުން އެކަމަށް ޚާއްސަ ކަތުރެއް ނެގިއެވެ. އެއަށްފަހު ދާނިޝްގެ ގިރުވޯނާއި ދިމާލުން ކޮނޑު ފެންނާނެހެން ގަމީސް ކަފާލުމަށް ކަތުރާއިއެކީ ދާނިޝްއާއި ދިމާލަށް އެނބުރިލިއެވެ. އެހެނަސް ހަމަ އެހިނދު އިސްއުފުލައި އޭނައަށް ބަލަން ހުރި ދާނިޝްއާއި ހަތަރުކަޅި ހަމަވުމުން ހިލްޔާ ގަނޑުވާ ގޮތްވިއެވެ.

ދާނިޝްއަށް އިސްއުފުލާލެވުނީ ހިލްޔާ ‘ބަލާލާނަމޭ’ ބުނި ހިސާބުންނެވެ. ހިލްޔާ އެ މާނަ ކުރަނީ އޭނަ ހީކުރާ ގޮތަށްތޯ ހިތަށްއެރިއެވެ. އެހެން ބުނުމަށްފަހު ހިލްޔާ އޭނަގެ ގަމީހުގެ ގޮށްތަކަށް ނަޒަރު ހުއްޓާލި ގޮތުން އަތަށް ވަމުން ދިޔަ ތަދު މަތިން ވެސް ހިނދުކޮޅަކަށް ހަނދާންނެތޭ ގޮތްވިއެވެ. ގޮށްތަކަށް ބަލަން ހުރެހުރެފައި ހިލްޔާ ތަބަކަކުން ކަތުރެއް ނެގުމުން ދާނިޝްގެ މެއަށް ވެސް ގޮތެއްވިއެވެ. އެ ކަތުރު ހިލްޔާ ނެގީ އޭނައަށް މި ހީކުރެވޭ ކަމެއް ކުރަންތޯ ހިތަށްއެރިއެވެ.

ހިލްޔާއަށް ހަމަ އެއްވެސް ޙަރަކާތެއް ނުގެނެވިފައި އިރުކޮޅެއް ވަންދެން ހުރެވުނެވެ. މިއީ އޭނަ އަލަށް ކުރަން އުޅޭ ކަމެއް ނޫނެވެ. މެލޭޝިޔާ އާއި ޔޫކޭ ގެ އެމަޖެންސީ ރޫމުތަކުގައި ވެސް އޭނަ މިފަދައިން ކަން ކޮށްފައި ވެއެވެ. އެއީ މިއަށްވުރެ އަދި މާ ގޯސް ޙާލަތްތަކެއްގައި ތިބި ބަލިމީހުންނެވެ. އޭގެއިން އެއްވެސް ފަހަރަކު ކުޑަ ވެސް އެއްޗެކޭ ހިތަކަށް ނާރައެވެ. ގިނަފަހަރު މަތިން ހިލްޔާ އެމަޖެންސީއަށް އަންނަ މީހުންނަށް ފަރުވާ ދެނީ އެމީހުންގެ މޫނަށް ވެސް ބެލުމެއް ނެތި ކަމަށްވާތީވެއެވެ. އެމަޖެންސީގައި މުހިއްމު ވަނީ ވީހާ ވެސް އަވަހަކަށް ފަރުވާ ފޯރުކޮށްދިނުން ކަމަށްވާތީވެއެވެ.

އެހެނަސް މިއަދު ހިލްޔާގެ ކުރިމަތީގައި އެ އިނީ އޭނައަށް އާދައިގެ ބަލި މީހެއް ނޫންކަން ހިލްޔާއަށް އެވަގުތު އެނގުންވިއެވެ. ދާނިޝްގެ ގަމީސް ކަފާލުމުގެ ޚިޔާލުން ލަދުގަތެވެ. ކަފާލައިފިނަމަ ޚުދު އޭނައަށް ވެސް ކުރެވިދާނެ އިޙްސާސްތަކާއިމެދު ބިރުގަތެވެ. ދާނިޝް އޭނައަށް ދީގެން ހުރި ނަޒަރުން އެދެމެދުގައި އުފެދިދާނެ ޖަޒުބާތުތަކާއިމެދު ވެސް ބިރުގަތެވެ. އަދި އަމުދުން އެއީ ދާނިޝްގެ ގަމީހަށް ވީތީ ކަފާލަން ވެސް ބޭނުމެއް ނުވިއެވެ. އެއީ ކީއްވެކަމެއް ނޭނގުނެވެ.

މިހާ ބޮޑަށް ޖަޒުބާތުގައި ޖެހިގެން ދާނިޝްއަށް ފަރުވާއެއް ނުދެވޭނެކަން ހިލްޔާއަށް އެވަގުތު އެނގުންވިއެވެ. އެއާއިއެކު އަތުގައި އޮތް ކަތުރު ތަބަކުގައި ބާއްވަމުން ހިލްޔާއަށް ވާހަކަ ދެކެވުނެވެ.

“ޕެއިން ކިލާރ އިންޖެކްޓް ކުރޭ. އަދި އަތުގަ ހުރި ސްލިންގާއިއެކީ އައިސް އަޅާ. އަތުގެ އެކްސް ރޭ އެއް ނަގާފަ ޑޮކްޓަރ އިމްރާން އަށް ރިފާރ ކުރޭ. ޑޮކްޓަރ ކައިރި މިހާރު ވެސް އޮބްޒަވޭޝަނަށް އަންނަން ބުނޭ. އޭއެސްއޭޕީ!”

ހިލްޔާ ކައިރީގައި ހުރި ނަރުސް ކުދިންނަށް އެންގިއެވެ. އެއާއިއެކު ދެ ކުދިން ވެސް ބޯޖަހާލަމުން އެއްކުއްޖަކު ގަނޑުފެން ޕެކް ނަގަން އަވަސްވީއިރު އަނެއް ކުއްޖާ ޑޮކްޓަރ އިމްރާންއަށް ގޮވަން ދިޔައެވެ. ޑޮކްޓަރ އިމްރާން އަކީ ކަށީގެ ޑޮކްޓަރެވެ. ދެން ހުރި މެޑިކަލް އޮފިސަރުގެ ބަދަލުގައި ޑޮކްޓަރ އިމްރާން އައުމަށް ހިލްޔާ އެންގީ ދާނިޝް ގެ ފަރުވާ އަވަސް ކުރުމަށެވެ. ނަރުސް ކުދިންނާއި ވާހަކަ ދެއްކުމަށްފަހު ވެސް ހިލްޔާއަށް ދާނިޝްއަށް ނަޒަރެއް ދެވުނެވެ. ދާނިޝް ދެން ވެސް ފުން ނަޒަރަކުން އޭނައަށް ބަލަން އިން ގޮތުން ހިލްޔާއަށް އިޙްސާސް ކުރަންވީ ގޮތެއް ނޭނގުނެވެ. އެ މޫނުމަތިން ތަދުވެގެން އުޅޭ ފަދަ އަސަރެއް ފެނުމުން ހިލްޔާ ދެރަވިއެވެ. އިތުރަށް އެތާ ހުރެއްޖެނަމަ ޚުދު އޭނައަށް ވެސް ވެދާނެ ގޮތެއް ނޭނގުނީތީ ހިލްޔާ ދާނިޝްއަށް ފަސްދީފައި ދާން ހިނގައިގަތެވެ.

ހިލްޔާ ދާން ފެށުމުން ދާނިޝް ގެ ހިތް މޭތެރޭގައި އޮވެ ގެނބުނެވެ. އަތާއި ގައިގެ އެކި ތަންތަނަށް ވަމުން ދިޔަ ތަދު ދެގުނަވެގެން އަނބުރާ އައިހެން ހީވިއެވެ. ހިލްޔާ އަމިއްލައަށް އޭނައާއި ކައިރި ނުވެ އެހެން ޑޮކްޓަރެއްގެ ބެލުމުގެ ދަށަށް އޭނަ ފޮނުވީ ކީއްވެކަން ދާނިޝްއަށް ސާފުވިއެވެ. ހިލްޔާގެ މޫނުމައްޗަށް ވެރިވި ކުލަވަރުތަކުން ބަސް ބުނުމެއްނެތި ހިލްޔާގެ ހުރިހާ އިޙްސާސެއް ދާނިޝްއަށް އެނގުނު ފަދައެވެ. އެހެނަސް އެވަގުތު ހިލްޔާ އޭނަގެ ޑޮކްޓަރެއްގެ ގޮތުގައި ނޫނަސް އޭނަގެ ކައިރީގައި ހުންނާނެ ނަމައޭ ހިތަށްއެރިއެވެ. ހިލްޔާ ލޯމައްޗަށް ގެއްލެމުން ދިޔަ ވަގުތު ހިލްޔާއަށް ގޮވައި ނުދާށޭ ބުނަން ހިތަށްއެރިއެވެ. އެހެނަސް އޭނައާއި ހިލްޔާއާއި ދެމެދު އެފަދަ ގުޅުމެއް ނެތީތީ ހިތް މާޔޫސްވިއެވެ.

**

އެމަޖެންސީ ރޫމުން ނިކުމެގެން ދިޔަ ގޮތަށް ދިގު ފިޔަވަޅުތަކުގައި ހިލްޔާ ދިޔައީ އޭނަގެ ކޮންސަލްޓޭޝަން ރޫމަށެވެ. ރޫމަށް ގޮސް ވަދެ ދޮރު ލައްޕާލެވުނީ ވެސް ތަންކޮޅެއް ބާރަށެވެ. އެވަގުތު ހިލްޔާގެ ހިތުގެ ތެޅުން އަވަސްވެފައިވިއެވެ. ރޫމުގައި ދެން އިންނަ ކުއްޖާ ނެތް ކަމަށްޓަކައި ހިލްޔާއަށް ޙަމްދު ކުރެވުނެވެ. އެވަގުތު ބޭނުންވީ އެކަނިވެލާށެވެ.

ދެންމެ ކަންތައް ހިނގާ ދިޔަ ގޮތް އެވަގުތު ހިލްޔާގެ ލޯމަތިން ސިފަވާން ފެށިއެވެ. ދާނިޝް އެނދުމަތީގައި އިށީނދެގެން އިންގޮތެވެ. ވާހަކަ ދެއްކިއިރު އެ އަޑުގައިވި ރިހުމެވެ. އޭނަ ދާނިޝްގެ ގަމީސް ކަފާލަން އުޅުނު ވަގުތު އެދެމީހުންގެ ހަތަރު ކަޅި ހަމަވީ ގޮތެވެ. ދާނިޝް އޭނަގެ ރޫޙުގެ ފުން މިނަށް ބަލާލިހެން ހީވި ނަޒަރެވެ. އެއަށްފަހު އޭނަ ދާނިޝްއަށް ފަސްދީފައި އައި ގޮތެވެ.

އެ ފަހު މަންޒަރު ލޮލަށް ސިފަވުމުން ހިލްޔާ މޫނުގައި ދެއަތް އަޅާލެވުނެވެ. އެހިނދު ހިތް މާޔޫސްވެފައިވިއެވެ. ދާނިޝް އެހެން ޑޮކްޓަރަކާއި ޙަވާލު ކުރެވުނަސް އޭނައަށް ދާނިޝް ކައިރީގައި މަޑު ކުރެވުނު ނަމައޭ ހިތަށްއެރިއެވެ. އޭނަ ދުވަހަކުވެސް އެހެން ބަލި މީހެއްގެ ގާތަށް ދާން ޖެހިގެން ނޫނީ އެމަޖެންސީގައި ހުންނަ ބަލި މީހަކު އެކަނި ކޮށްފައެއް ނުވެއެވެ. ނަރުހުން އޭނަ ބުނާ ފަރުވާތަކާއިގެން ކުރިއަށް ދިޔަޔަސް ޑޮކްޓަރަކު ހުރުމުގެ ތަސައްލީ ބަލި މީހާއަށް ދިނުމަށްޓަކައި ހިލްޔާ ހުރެދެއެވެ.

މިއަދު ދާނިޝްއަށްޓަކައި އޭނައަށް އެހާ ވަރު ވެސް ކޮށްނުދެވުނީ ހެއްޔެވެ؟ ދާނިޝް އާއިމެދު އޭނައަށް މިހާ ގޯސްކޮށް ކަންތައް ކުރެވެނީ ކީއްވެ ހެއްޔެވެ؟ މިއީ ހަމަ ގައިމުވެސް ދާނިޝް ކަހަލަ ހިތްހެޔޮ މީހަކަށް ޙައްޤުވާ ގޮތެއް ވެސް ނޫނެވެ.

އެކަމާއިމެދު ވިސްނަން ހުރެފައި ހިލްޔާ މޫނުން އަތް ނަގާލިއެވެ. އެހިނދު ދާނިޝް އާއި އެހީވެދޭނެ ގޮތަކާއިމެދު ވިސްނަމުން ހިލްޔާ ގޮސް އޭނަގެ މޭޒުދޮށުގައި އިށީނދެ، މޭޒުމަތީގައި ހުރި ފޯނުން ނަންބަރަކަށް ފިތާލިއެވެ.

“އައްސަލާމްޢަލައިކުމް…ތިކޮޅުން ދާނިޝް ސާރ ގެ އެކްސްރޭ ނެގުނީމަ ޑޮކްޓަރ އިމްރާން އާއެކީ އަޅުގަނޑަށް ފޯވާޑް ކޮއްލަދެއްޗޭ. ޑޮކްޓަރ ހިލްޔާ…އާދެ.” ހިލްޔާ އެދުނެވެ.

އޭގެ އިރުކޮޅެއް ފަހުން ހިލްޔާއަށް އެކްސްރޭ ރޫމުން މެއިލްއެއް ލިބުނީ މެންދުރު ޑިއުޓީގެ އެންމެ ފަހު ބަލިމީހާ ބަލަން އިންދައެވެ. އެ ބަލިމީހާ ނިކުމެގެން ދިޔުމުން ހިލްޔާ ކެތްތެރިކަމެއް ނެތި މެއިލް ހުޅުވައި ބެލިއެވެ. އެއާއިއެކު ދާނިޝްގެ އަތުގެ އެކްސްރޭ ފެނުނެވެ. ދާނިޝްގެ މުލައްދަނޑި ކަށިގަނޑާއި އުޅަނބޮށި ކަށިގަނޑު ދުރުވެފައިވީއިރު، އުޅަނބޮށި ކަށިގަނޑުގައި ރެނދުވެސް ލާފައިވިއެވެ. އެ މަންޒަރު ފެނުމުން ހިލްޔާއަށް ވެސް ތަދުވިހެން ހީވިއެވެ. އެ މޫނުމަތިން ވެސް ފާޅުވީ އެފަދަ އަސަރެކެވެ.

މިއީ އެހެން ބަލިމީހުންގެ އެކްސް ރޭ އާއި އެހެނިހެން ޓެސްޓްތަކަށް ބަލާފައި ވާ ގޮތެއް ނޫންކަން އެވަގުތު ވެސް ހިލްޔާއަށް އެނގުންވިއެވެ. މިއަށްވުރެ މާ ގޯސް އެކްސްރޭތައް ވެސް އޭނައަށް ފެނިފައިވެއެވެ. އެހެނަސް ބަލިމީހާގެ ތަދު އިޙްސާސް ކުރުމުގެ ބަދަލުގައި ހިލްޔާ އަވަސްވެގަންނަނީ ފަރުވާ ދިނުމަށެވެ.

އެވަގުތު އެ އިޙްސާސްތައް ފަހުމް ކުރަން މަސައްކަތް ކުރުމުގެ ބަދަލުގައި ހިލްޔާ ބޭނުންވީ އެހެން ކަމެއް ކުރާށެވެ. އެކްސްރޭއަށް ބަލަން އިނދެފައި ހިލްޔާ ފޯނު ނަގައި އޯސިސްގެ ވައިބާރ ގްރޫޕަށް ވަނީ ޑޮކްޓަރ އިމްރާން ގެ ނަންބަރު ހޯދުމަށެވެ. ނަންބަރު ހޯދުމަށްފަހު ހިލްޔާ ދެވަނަ ވިސްނުމެއް ނެތި ޑޮކްޓަރ އިމްރާންއަށް ގުޅިއެވެ.

“އައްސަލާމްޢަލައިކުމް ޑޮކްޓަރ އިމްރާން. މިއީ ޑޮކްޓަރ ހިލްޔާ. ދާނިޝް ސާރ ކިހިނެއްތޯ؟” ހިލްޔާ އެ ބޭރު ޑޮކްޓަރާއި އިނގިރޭސި ބަހުން ސުވާލުކުރިއެވެ.

ޑޮކްޓަރ އިމްރާން ދެއްކި ވާހަކަތަކުން އަނެއްކާވެސް ހިލްޔާއަށް އެނގިގެން ދިޔައީ ހިލްޔާއަށް އެކްސްރޭއިން ވެސް އެނގުނު ކަންތަކެވެ. ދާނިޝް ގެ ފަޔަށާއި ބުރަކަށްޓަށް ވެސް ތަދުވެގެން އުޅޭ ވާހަކަ ބުނިކަމަށް ހިލްޔާ ބުނުމުން، ފައިގެ ބައެއް ދުޅަވެފައިވާ ކަމަށާއި، އެއީ ބުރަކަށީގެ މަސްގަނޑުގައި ހުރި ތަދެއް ކަމަށް ޑޮކްޓަރ އިމްރާން ބުންޏެވެ. ބެލިބެލުމުން މައިބަދައިގެ މައްސަލައެއް ހުރިކަމަށް ނުބެލެވޭ ކަމަށް ވެސް ޑޮކްޓަރު ބުންޏެވެ.

އެ ވާހަކަތައް އަޑުއެހުމަށްފަހު ހިސާބެއްގެ ހަމަޖެހުމުގެ ނޭވައެއް ދޫކުރަމުން ހިލްޔާ ޑޮކްޓަރ އިމްރާނަށް ޝުކުރު އަދާކުރިއެވެ. އެ ކޯލު ނިމުމުން ދެންވެސް ހުއްޓުމެއްނެތި ހިލްޔާއަށް ދާނިޝްއާއި މެދު ފިކުރު ކުރެވުނެވެ.

އެހެނަސް އެ ގަޑީގެ ޑިއުޓީ ނިންމާލުމަށްފަހު ހިލްޔާ ދާންޖެހުނީ ދާނިޝް ނުފެނިއެވެ. ޑޮކްޓަރ އިމްރާން ބުނިގޮތުން އޭރު ދާނިޝް ވީ ޕްރޮސީޖާރ ރޫމުގައެވެ. އަތުގައި ޕްލާސްޓަރު އެޅުމަށެވެ. ކްލިނިކުން ނިކުންނަން ދަމުން ހިލްޔާއަށް ކްލިނިކްގެ މަތީ ބައިގައި ވާ ޕްރޮސީޖާރ ރޫމަށް ބަލާލެވުނީ ހަމަ އެއްވެސް އިޚްތިޔާރަކާއި ނުލައެވެ. އެވަގުތު އެތަނަށް ދިޔުމަށް ހިތް އެދުނެވެ. އެހެނަސް ދާނީ ކޮން ސަބަބަކާއި ލައިގެން ކަމެއް ނުވިސްނުނެވެ. ދާނިޝް އޭގެ ނުބައި މާނައެއް ނަގާފާނެ ކަމުގެ ބިރުހީވުމުންނެވެ. އެ ނުބައި މާނައަކީ ކޮބައިކަމެއް ޚުދު ހިލްޔާއަށް ވެސް ނޭނގުނެވެ.

ގެއަށް ދިޔަ މުޅި ދަތުރުމަތީގައި ހިލްޔާއަށް ދާނިޝްއަށްޓަކައި ދުޢާ ކުރެވުނެވެ. ނޭނގޭ ސަބަބަކާ ހުރެ ލޮލުން ކަރުނަ ވެސް ހިލެމުން ދިޔައެވެ. އެހެނަސް ކާރު ދުއްވަމުން ދިޔައީތީ އަމިއްލަ ރައްކަލަށްޓަކައި ހިލްޔާ އަވަސްއަވަހަށް އެސްފިޔަ ޖަހަމުން ކަރުނަތައް ހިންދަމުން ދިޔައެވެ.

ހިލްޔާ ގެއަށް ގޮސް ވަންއިރު ޢަޞްރު ނަމާދަށް ނިކުންނަމުން ދިޔަ ބައްޕަ ފެނުމާއިއެކު ހިލްޔާއަށް ވާހަކަ ދެކެވުނީ ހިތަށް އުދަގޫވެފައިވި ވަރުންނެވެ.

“ބައްޕާ….ދާނިޝްގެ އަތް ބިނދިއްޖެ.” އެ ވާހަކަ ބުނި ހިނދު އޭނަގެ އަޑު ރޫރޫއެޅި ގޮތުން ޚުދު ހިލްޔާ ވެސް ޙައިރާންވިއެވެ.

“ކީކޭ؟! ކިހިނެއް ބިނދުނީ؟” ބައްޕަ ވެސް ހާސްކަމާއިއެކީ އެހިއެވެ.

“ހަރުގަނޑަކުން ވެއްޓިގެންނޯ. ކްލިނިކުން ޓްރީޓްމެންޓް ނަގައިގެން އެޑްމިޓްކޮށްފަ އޮތީ.” ހިލްޔާ އެ ވާހަކަ ބުނެ ނިމުނުއިރު ލޮލުން ކަރުނައެއް ވެސް ފައިބައިގެން އައި ގޮތުން ހިލްޔާ އަޖާއިބުވާހާވިއެވެ.

ހިލްޔާ އެ ޙާލުގައި ވަނިކޮށް ބައްޕަ އެހެންހޭ ކިޔައި ކާރުގެ ތަޅުދަނޑި ދޭން ބުނެ މަޑު ކުރުމެއް ވެސް ނެތި ތަޅުދަނޑި ހިފައިގެން ނިކުންނަން ދިޔައެވެ. ބައްޕަ ދިޔުމުން ހިލްޔާއަށް ވެސް އެދިމާލަށް ބަލާލެވުނެވެ. ދާނިޝްގެ ޙާލު ބަލަން ބައްޕަ ފަހަތުން ދާން ހިތަށްއެރިއެވެ. ކްލިނިކްގައި ހުރެފައި ދާނިޝްގެ ޙާލު ނުބަލާ އާދެވުނީތީ ދެރަވިއެވެ.

އެހެނަސް ހިލްޔާ ހުރިގޮތަށް ހުއްޓާ ބައްޕަ ލޯމައްޗަށް ގެއްލުނެވެ. ބައްޕަ ފަހަތުން ދިޔުމުގެ ހިތްވަރެއް ނުލިބުނެވެ. ފިޔަވަޅެއް އަޅަންވީ ދިމާލެއް ނޭނގި ހުރެފައި ހިލްޔާ ގޭގެ ތެރެއަށް ދާން ނިންމީ، ޢަޞްރު ނަމާދު ގާތްވަމުން ދާކަން ހަނދާންވުމުންނެވެ. އަދި އެރޭ ޑިއުޓީއަށް ގޮސް ދާނިޝްގެ ޙާލު ބަލަން ހިތާހިތުން ނިންމުނެވެ.

އެ އެދުން ހިލްޔާގެ ހިތުގައި އޮތީތީ ހިލްޔާއަށް އެރޭ ރޭގަނޑު ޑިއުޓީއަށް ދެވުނީ ވެސް ތަންކޮޅެއް އަވަހަށެވެ. ޢިޝާ ނަމާދު ކޮށްގެން ހިލްޔާ ގެއިން ނިކުތީ ރޭގަނޑު ރަނގަޅަށް ނުވެސް ކައެވެ. ހަމައެކަނި ކޮފީ ތަށްޓެއް ބޯން ހުއްޓާ ބިސްކޯދެއް ކާން މަޖުބޫރުވީ މާމަ ކުދި ކިޔުނު ވަރުންނެވެ.

އެހެނަސް ހިލްޔާ އުއްމީދު ކުރި ގޮތާއި ޚިލާފަށް ކްލިނިކަށް ދިޔަ ގޮތަށް ގޮސް ހިލްޔާއަށް ދާނިޝްއާއި ބައްދަލެއް ނުކުރެވެއެވެ. ވޯޑުގެ ދޮރުމައްޗަށް ގޮސް އެރިއިރު ދާނިޝްގެ އެނދު ކައިރީގައި ހުރި ގޮނޑީގައި ޒުވާނަކު އިންއިރު އެނދުގެ އަނެއްފަރާތުގައި އެހެން ޒުވާނަކު ވެސް ހުއްޓެވެ. ތިން މީހުން ވާހަކަ ދައްކަމުން ދިޔަ ގޮތުން އެއީ ދާނިޝްގެ އެކުވެރިންކަން އެނގެއެވެ.

ޑޮކްޓަރެއްގެ ހައިސިއްޔަތުން ވޯޑަށް ވަދެލަން ހިނދުކޮޅަކަށް ނަމަވެސް ހިލްޔާގެ ހިތަށްއެރިއެވެ. އެހެނަސް ދުރުން ވެސް ދާނިޝްގެ ސޫރަ ފެނިފައި އޭނައަށް އެހެން ހަދާކަށް ނުކެރުނެވެ. މީގެ ކުރިން އޭނަ އެތައް ފިރިހެނުން އެއްވެފައި ތިބޭ ވޯޑުތަކަށް ވެސް ވަދެގެން ގޮސްފައިވެއެވެ. އެންމެން ދުރުވާނެ ފަދައިން ނުހަނު ސާބިތު އަޑަކުން ދުރުވުމަށް އަންގަމުންނެވެ. އޭނަ އެ ޙާލަތުގައި ގެންގުޅޭ މިޒާޖުން އޭގެއިން ފިރިހެނަކަށް އެއްޗެކޭ ބުނަން ނުކެރެއެވެ. އެއްދުވަހު އެއްޗެކޭ ބުނަން ކެރުނު ފިރިހެނަކު ވަގުތުން ހޮސްޕިޓަލުގެ ސެކިއުރިޓީއަށް ގޮވައި ހޮސްޕިޓަލުން ނެރުނެވެ.

ދާނިޝްގެ ކުރިމަތީގައި މިއަދު އޭނައަށް އެފަދަ މިޒާޖެއް ގެންގުޅެވޭނެ ހެނެއް ހިއެއް ނުވެއެވެ. ދާނިޝް ފެނުމާއިއެކު އޭނަގެ މުޅި ނަފްސަށް ވެސް ވެރިވަނީ ލަދުވެތިކަމެކެވެ. އަދި އަމުދުން އެތާ އެތިބީ ދާނިޝްގެ އެކުވެރިންނަށް ވީތީ އެމީހުންނަށް ވެސް އިޙްތިރާމް ކުރެވުނެވެ. މި އިޙްސާސްތަކުގެ ފަހަތުގައިވާ ސަބަބެއް އެއްގޮތަކަށް ވެސް ނޭނގުނެވެ.

ކްލިނިކްގައި އެނދުމަތިވެފައި އޮތް ދާނިޝް އެކުވެރިން ދައްކަމުން ދިޔަ ވާހަކަތަކަށް ރައްދު ދެމުން ހެމުން ދިޔައެވެ. އެދުވަހު ހަވީރު ހުރިހާ އެކުވެރިން އެއްވި ވަގުތު އެންމެ ވާހަކަ ސިއްރު ކުރާ ފަޔާޒް ވެސް، މިއަދު އެމަޖެންސީގައި ދާނިޝް ބަލަން އައީ ވަރަށް ޚާއްސަ ޑޮކްޓަރެއް ކަމަށް ބުނެލައިފިއެވެ. އެ ޑޮކްޓަރަކީ ކާކުކަން ނަޖާހަށް އެނގި ވާހަކައިގެ ފޯރި ހިފިއެވެ. ނަޖާހާއި ލާނާއާއި ދެމެދު ދެކެވިފައިވާ ވާހަކަތައް އެހެން އެކުވެރިންނަށް އިވިގެން ދިޔުމުން ވަގުތުން ދާނިޝްއާއި ހިލްޔާ އެންމެން އަޅުވައި ކިޔަން ފެށިއެވެ.

ދާނިޝް އެ ވާހަކަތަކަށް ރައްދުދެމުން ހެމުން ދިޔައެއްކަމަކު ހިތް ދެރަވެފައިވިއެވެ. އޭގެ އިރުކޮޅެއް ކުރިން ނަހީދުބެ އޭނަ ބަލަން އައިސް ބުނެފައިވާ ވާހަކައިންނެވެ.

“ވަރަށް ދެރަވެފަ ހުރެ ހިލްޔާ ގެއަށް އައިސް އެހެން ބުނީ. ރޮވިފަ ހުރީ ހަމަ.”

ނަހީދުބެ ގެ ވާހަކައިން ހިލްޔާ އޭނައާއި މެދު އަޅާލާކަން އެނގި އުފާވި ވަރަށްވުރެ ބޮޑަށް ހިތާމަ ކުރެވުނެވެ. މޮޔަ ކުއްޖާއޭ ހިތަށްއެރިއެވެ. ދުރުގައި ހުރެގެން ހިތްދަތިވާއިރު ވެސް އެ ހުންނަނީ ދުރުގައެވެ. އެކަމަކު އެއީ ކީއްވެ ކަމާއިމެދު ވެސް ދާނިޝްއަށް ވިސްނުނެވެ. އެދުވަހު ހިލްޔާ އޭނައަށް އިތުބާރު ނުކުރާހެން ހީވީ ކީއްވެ ހެއްޔެވެ؟ ހިލްޔާ އޭނައާއި ގުޅެން ޤަބޫލު ނުވާނެހެން ހީވީ ކީއްވެ ހެއްޔެވެ؟ ވިސްނާ ވިސްނާ ވެސް ދާނިޝްއަށް އޭގެ ޖަވާބެއް ނުލިބުނެވެ.

އުސޫލެއްގެ ގޮތުން ވޯޑުގައި ތިބި މީހުންގެ ޙާލު ބަލަން ޖެހެނީ ހިލްޔާ ކަމަށް ވިޔަސް، ހިލްޔާ އެރޭ ދާނިޝްގެ ޙާލު ބަލަން ފޮނުވީ ޑޮކްޓަރ އިމްރާނެވެ. ދާނިޝް ބަލަން ކިތަންމެ ބޭނުން ވިޔަސް ދާނިޝްގެ ކުރިމައްޗަށް ދާން އޭނަ މިހާ ޖެހިލުންވަނީ ކީއްވެކަމެއް އެއްގޮތަކަށް ވެސް ނޭނގުނެވެ.

ކޮންމެ ގޮތެއްވިޔަސް ހިލްޔާ އެރޭ ދާނިޝް ގެ ގާތަށް ދާން މަޖުބޫރުވީ، ޑޮކްޓަރ އިމްރާން ދާނިޝް ބަލަން ގޮސްފައި ދާނިޝްއަށް ދިން އައިވީ ގެ ސަބަބުންނެވެ. 10 ޖެހިއިރު ވެސް އައިވީ ހުސްނުވާތީ ވޯޑުގައި ހުރި ނަރުސް ކުއްޖާ އެރޭ އެންމެ ފަހަށް ކްލިނިކްގައި ހުރި ހިލްޔާއާއި ވާހަކަ ދެއްކިއެވެ.

“ޑޮކްޓަރ….އަޅުގަނޑު، ގެއަށް ދާން އެބަޖެހޭ. ބޭބީ ރޮނީ…ދާނިޝް ސާރ ގެ އައިވީ ނުނިމޭތި-“

“އިޓްސް އޯކޭ އަޅުގަނޑު ހުރެދޭނަން.”

އެ ނަރުސް ކުއްޖާގެ ޖުމްލަ ނުވެސް ނިމެނީސް ހިލްޔާއަށް ބުނެވުނެވެ. ދަރިފުޅު ރޯއިރު ގެއަށް ދާން ޖެހޭ މަންމައަކު މަޑު ކުރުވަން އެއްގޮތަކަށް ވެސް ބޭނުމެއް ނުވީތީވެއެވެ. އެވަގުތު ހިލްޔާއަށް ހުރެވުނީ ވެސް ލޮބީ އޭރިއާގައެވެ. ވޯޑަށް ދާ މަގުމަތީގައެވެ. ޑިއުޓީ ނިންމާލާފައި އެ ދިމާލަށް ދެވެން ފެށީ ހަމަ އެއްވެސް އިޚްތިޔާރަކާއި ނުލައޭ ބުންޏަސް ދޮގަކަށް ނުވާނެއެވެ. އެހެނަސް އެވަގުތު ދިޔުމުގެ ކުރިން ބައްޕައަށް ގުޅާލެވުނެވެ.

“ބައްޕާ….އަދި ދާނިޝް ނުނިމޭ އިނގޭ. އަދި އައިވީ ނަގާނެ އެރައުންޑް ފައިވް ޓު ޓެން މިނިޓްސް.” ހިލްޔާއަށް ބުނެވުނެވެ. ދާނިޝް ބަލަން އޭނަ ނުދިޔަޔަސް ޑޮކްޓަރ އިމްރާން ގެ ފަރާތުން އޭނަ ދާނިޝްގެ ޙާލަތާއި ފަރުވާގެ އެންމެ ކުޑަ ތަފްޞީލަށް ދާންދެން ހޯދާފައިވެއެވެ.

“އޯކޭ އެހާކަށް ހާއިރަށް އަންނާނަން ބަލާ.” ބައްޕަ އެކޮޅުން ބުންޏެވެ. އެއާއިއެކު އެ ކޯލު ނިމުމަކަށް އައުމުން ހިލްޔާ ދާނިޝްގެ އައިވީ ނަގަން ބޭނުންވާނެ ސާމާން ތައްޔާރު ކުރަން ދިޔައެވެ.

ނަރުހުން ގެންގުޅޭ ތަބަކެއް ހިފައިގެން ވޯޑް ގެ ދޮރާއި ހަމަވަމުން ދިޔަދިޔަހެން ހިލްޔާގެ ފިޔަވަޅުތައް ލަސްވެގެން ދިޔައެވެ. އެ ލަސް ފިޔަވަޅުތަކާއިއެކީ ގޮސް ހިލްޔާ ވޯޑުގެ ދޮރުމައްޗަށް އަރައި ދޮރުގައި ހުރި ބިއްލޫރި ހަތަރެސްކަން ބައްޓަމުން އެތެރެއަށް ނަޒަރެއް ދިނެވެ. ވޯޑުގައި ފަނޑު އޮރެންޖް ކުލައިގެ ބޮތްކެއް ދިއްލިފައިވީއިރު، ވޯޑުގެ މެދާއި ހިސާބުގައި ހުރި އެނދެއްގައި އޮތް ދާނިޝް ނިދިފައިވިހެން ހިލްޔާއަށް ހީވިއެވެ. އެހެންކަމުން ހިލްޔާ ވޯޑުގެ ދޮރު ކަހާލީ ނުހަނު މަޑުމަޑުންނެވެ. އެއްވެސް އަޑެއް ނުކިޔާނެ ފަދައަކުންނެވެ.

ދޮރު ހުޅުވުމުން ދާނިޝް ނިދިފައި އޮތްކަން ޔަޤީންވުމުން ހިލްޔާ ދޮރު ނުލައްޕަން ނިންމިއެވެ. އިތުރު އަޑެއް ދާނިޝްއަށް އިވޭކަށް ހިލްޔާ ބޭނުމެއް ނުވިއެވެ. އަދި އަމުދުން އޭނަ ދާނިޝްއާއި އެއްތަނެއްގައި އެކަހެރިވެ، ދޮރު ލައްޕާލަން ވެސް ނުކެރުނީއެވެ.

އެވަގުތު އެއީ ކީއްވެކަމާއިމެދު ހިލްޔާއަށް ނުވިސްނުނެވެ. އެވަގުތު ހުރިހާ ސަމާލުކަމެއް ނިދިފައި އޮތް ދާނިޝްއަށް ދެވުމުންނެވެ. ޢާއްމު ގޮތެއްގައި ބަލިމީހަކު ދޫކުރާ ގަޑި ގާތްވުމުން ބަލިމީހާގެ ބެލެނިވެރިޔާއާއި ސުވާލު ކުރުމަށްފަހު ހިލްޔާ ނޫނީ ނަރުސް ކުއްޖަކު އަލި ބޮކިތައް ދިއްލާލައެވެ. ބަލިމީހާ ބަލަން ދަނީ ވެސް އަލި ބޮކިތައް ދިއްލާލުމަށްފަހުއެވެ. އެހެނަސް އެވަގުތު ދާނިޝްގެ އެ އަރާމު ނިންޖަށް ކުޑަވެސް އުދަގުލެއް ކުރާކަށް ހިލްޔާގެ ހިތް ނޭދުނެވެ.

ލަސް ހިނގުމެއްގައި ގޮސް ހިލްޔާ ދާނިޝްގެ އެނދު ކައިރީގައި މަޑުކޮށްލިއެވެ. ދާނިޝްގެ ކާނަތް އަތުގައި ޕްލާސްޓަރު އެޅުވިފައިވީއިރު ގަދަ ނޫކުލައިގެ ކަވަރަކުން ޕްލާސްޓަރު ފޮރުވައި ކަރުގައި އެޅުވިފައިވިއެވެ. އެހާއިރު ވީއިރު ދާނިޝް އެމަޖެންސީއަށް އައިއިރު ލައިގެން ހުރި މަޑު ނޫކުލައިގެ ގަމީސް ހުދު ގަމީހަކަށް ބަދަލު ކުރެވިފައިވިއެވެ. ބަލާ ބެލުމަށް ދާނިޝް ފެންނަމުން ދިޔަގޮތް ތާޒާވުމުން އެކުވެރިން ވަރަށް އެހީވެފައިވާކަން ހިލްޔާއަށް އެނގުނެވެ.

ހިލްޔާ ދާނިޝްގެ އެނދު ކައިރިން ފާރުގައި ހުރި ބޯޑަށް ބަލަން އެދިމާލަށް ނަޒަރެއް ދިންއިރު ކަބަޑު މަތީގައި ހުރި މަތި އަޅާފައިވާ ކާއެއްޗެހީގެ ޕްލާސްޓިކް ޓްރޭއެއް ފެނުނެވެ. ކަބަޑު ކައިރިއަށް ޖެހިލަމުން ހިލްޔާ ބަލާލިއިރު އެކި ބަޔަށް ބެހިފައިވާ އެ ޓްރޭގެ ބޮޑު ބައި ހުރީ ނުކެވިއެވެ. ފްރައިޑް ރައިސްއިން ކުޑަ ބަތްކޮޅެއް ކެވިފައިވީއިރު ޑެވިލްޑް ފިޝް އިން ވެސް މަދުވެފައިވީ ކުޑަ އެތިކޮޅެކެވެ. ސަލަޑް ކޮޅު ހުރި ގޮތަށް ހުއްޓެވެ.

އެ ޓްރޭ ފެނިފައި ހިލްޔާ ދެރަވިއެވެ. ދާނިޝްއަށް ނުކެވޭނީ ހުމުގެ ސަބަބުންކަން ހިލްޔާއަށް އެނގުންވިއެވެ. ޑޮކްޓަރ އިމްރާން ބުނި ގޮތުން ރޭގަނޑު ދާނިޝް ބަލަން ދިޔައިރު ދާނިޝް ވީ ވަރަށް ހުން ގަދަ ވެފައެވެ. އައިވީ އަޅަން ޖެހުނީ އެހެންވެއެވެ. އެކަން ހަނދާންވެފައި ހިލްޔާއަށް އެތާ ފާރުގައި ދާނިޝްގެ މަޢުލޫމާތު ހުރި ބޯޑަށް ނަޒަރެއް ދެވުނެވެ. އެންމެ ފަހުން ފިނި ހޫނުމިން ނެގިފައި ވަނީ 8:30 ވީއިރެވެ. މިހާރު ދާނިޝް ގެ ހުން ފިނިވެދާނެތޯ ހިތް ސުވާލު ކުރި ހިނދު ދާނިޝްއަށް ބަލާލަމުން އެ ނިތުގައި އަތް ޖައްސާލަން ހިލްޔާއަށް އަތް ހިއްލާލެވުނީ ހަމަ އެއްވެސް އިޚްތިޔާރަކާއި ނުލައެވެ. އެ އަތް ވަކި ހިސާބަކުން މަޑުކޮށްލެވުނީ ޚުދު އޭނައަށް ވެސް ލިބުނު ސިހުމަކާއިއެކީގައެވެ. ދާނިޝްއާއި އެކީގައި ހުންނަ ވަގުތު އޭނައަކީ ޑޮކްޓަރެއްކަން އޭނަ ހަނދާން ނެތެނީ ކީއްވެ ހެއްޔެވެ؟

އެކަމާއިމެދު ވެސް އިތުރަށް ވިސްނުމެއް ނެތި ހިލްޔާ އޭނަގެ އަތުގައި ހުރި ދަގަނޑު ޓްރޭ އެނދާއި ކަބަޑާއި ދެމެދު ހުރި ކުޑަ ހަރުގަނޑެއްގެ މަތީގައި ބެހެއްޓިއެވެ. އެއަށްފަހު އޭނަގެ ހުދު ކޯޓުގެ ޖީބުގައި އޮތް ތާރމޯމީޓަށް ނެގިއެވެ. އަދި އޭތި ދާނިޝްގެ ނިތަށް ދިއްކޮށްލަމުން ފިނި ހޫނުމިން ބެލިއެވެ. އެއިން ކިޔާލި އަޑާއިއެކު ދާނިޝްގެ މެރިފައިވި ލޯ ތަގުޅިވެގެން ދިޔައެވެ. އެހެނަސް ހިލްޔާއަށް އެކަން ފާހަގަ ނުވީ އެވަގުތު ތާރމޯމީޓަރ ގެ ސްކްރީނަށް ބަލަން ހުރުމުންނެވެ. އެވަގުތު ދާނިޝްގެ ހުމެއް ނެތްކަން އެނގުމުން ފުން ނޭވައެއް ދޫކުރަން އުޅުނު ވަގުތު ދާނިޝްގެ އަޑު އިވުނެވެ.

“ގެއަށް…..ދާ ގަޑި ޖެހުނީތަ؟” ދާނިޝްއަށް ނިދި ބަރުވެފައިވާ އަޑަކުން ލޯ ހުޅުވަން ބޭނުންނުވެފައި ވެސް ދެ ފަރާތަށް ނަޒަރެއް ދެމުން އަހާލެވުނެވެ. ނިދާލެވުނުއިރު ވެސް ނިދުނީ ދެން ހޭލެވޭނީ ނަރުސް ކުއްޖަކު އޭނައަށް ގޮވާ އަޑަށޭ ހިތާއެވެ. ހިތުން އެހެން އަހާލެވުނީ ވެސް ނަރުސް ކުއްޖެއް ކައިރިންނެވެ. އެހެނަސް އޭނަގެ އެނދު ކައިރީގައި ހުރީ ކާކުކަން ސާފުވުމާއިއެކު އިސާހިތަކު ލޮލުން ހުރިހާ ނިންޖެއް ފިލިއެވެ.

“އަދި…ގަޑި ނުޖެހޭ. އަދި ލެޓްސް ސޭ، ތްރީ މިނިޓްސް.” ހިލްޔާ ނުތަނަވަސްވެފައިވާ ޙާލު އެހެން ބުނެލީ، އައިވީގެ ވާގަޑުގައިވާ ބަޓަނަކަށް ފިތައި އައިވީގެ ބާރު މިން އަވަސް ކުރަމުންނެވެ. އެއީ އެވަގުތު އޭނަ ކުރަންޖެހޭ ކަމެއް ނޫނެވެ. އެހެނަސް އުއްމީދު ކޮށްގެން ނެތް ވަގުތަކު ދާނިޝް އޭނައާއި ވާހަކަ ދައްކައި، ވާހަކަ ދެއްކިއިރު އިވުނު ނިދިބަރުވެފައިވާ އަޑުގެ ސަބަބުން މުޅި މީހާއަށް ވެސް ގޮތެއްވިއެވެ. ހިތުން އެހެން ދިމާލަކަށް ބަލާލީ އޭނަގެ މޫނުމައްޗަށް ވެރިވި ކުލަތައް ދާނިޝްއަށް ފޮރުވުމަށެވެ.

“ލުކް ހޫޒް ފައިނަލީ ހިއާރ. އަހަރެން ނުބަލާ ބާކީ ހުރި ކުއްޖާ.” ދާނިޝް ލުއި ހިނިތުންވުމަކާއެކީ ބުނެލިއެވެ. ޙަޤީޤަތުގައި ވެސް އެވަގުތު ހިތް އުފާވިއެވެ. އެތައް ބަޔަކު މިހާތަނަށް އައިއިރު އޭނަ ބަލަން އައިސްފައި ވިޔަސް އޭގެ ހިތްހަމަޖެހުން ލިބުނީ އަދި ކިރިޔާއެވެ.

“ކޮންމެހެން ބަލާކަށް ނޫން އައީ. ޑޮކްޓަރސް ޑިއުޓީ. ކިހިނެއް މިހާރު؟” ހިލްޔާ އެހެން އަހާލީ އެތާ ހުރި ގޮނޑީގައި އިށީންނަމުންނެވެ. އަނެއްކާވެސް ބޭއިޚްތިޔާރުގައި އޭނަގެ ޙަޤީޤީ ޖަޒުބާތުތައް ފޮރުވުނީތީ ޚުދު ހިލްޔާ ވެސް ދެރަވިއެވެ.

“އޯކޭ ޑޮކްޓަރ…ރަނގަޅު މިހާރު އަލްޙަމްދުލި ﷲ.” ދާނިޝް ދެންވެސް ނުފިލާ ހިނިތުންވުމަކާއެކީ ޖަވާބުދިނެވެ. ހިލްޔާ އޭނަ ދުރު ކޮށްލާ ސަބަބެއް ނޭނގުނަސް އޭގެ ސަބަބުން އެވަގުތުކޮޅުގެ އުފާވެރިކަން ނަގާނުލުމަށެވެ.

“ތަދުވޭތަ އަދިވެސް؟” ހިލްޔާ އެހިއެވެ.

“އަތަށް ތަދުވަނީ ކުޑަކޮށް. އެކަމަކު މޫވް ކުރީމަ އަދިވެސް ފަޔަށާއި ބުރަކަށްޓަށް އުދަގޫ ވާވަރަށް ތަދުވޭ.”

“ދުވަސް ނަގާނެ ތަދު އެއްކޮށް ފިލަން. ހުން ގަދަ ވީ ވެސް ތަދު ހުރީމަ. ހީލްވަމުން ދާއިރު ބައެއްފަހަރު އެހެންވާނެ. ގަޑިން ގަޑިއަށް ބޭސް ކައްޗޭ. އޯލްސޯ ފައިގަ ދުޅަވެފަ ހުރި ތަނުގަ އައިސް އަޅައްޗޭ. 20 މިނެޓްސް އަށް. 3 ޓައިމްސް އަ ޑޭ. އޭރުން އަވަހަށް ފަސޭހަ ވާނެ އިން ޝާ ﷲ.”

“ޔާ….ކިހިނެއް ހިލްޔާއަށް އެނގުނީ ފައި ދުޅަވެފަ ހުރިކަން؟”

“އެއީ…..ޑޮކްޓަރ އިމްރާން އަހަންނަށް ކިޔައިދިނީ.”

“އައި ސީ….”

ދާނިޝް އެހެން ބުނެފައި ވަކި އެއްޗެކޭ ބުނުމެއްނެތި ޒާތެއްގެ ނަޒަރަކުން އޭނައަށް ބަލަހައްޓައިގެން އޮންނަން ފެށުމުން ހިލްޔާއަށް އުދަގޫވިއެވެ. ޑޮކްޓަރ އިމްރާން ކުރެން އޭނަ އެ ސުވާލު ކުރި ނިޔަތާއިމެދު ދާނިޝް ސުވާލު އުފައްދާހެން ހީވުމުން ލަދުގަންނަ ގޮތްވިއެވެ. އެ އިޙްސާސުން އަރައިގަތުމަށްޓަކައި ވާހަކަ ދެކެވުނެވެ.

“މިރޭ….ނުކަންތަ؟” ހިލްޔާއަށް އަހާލެވުނެވެ.

“ނުކެވުނު އެއްކޮށް. ފްރެންޑުން އަހަންނަށް އެހާ ވަރަށް އަހަރެން ކައިރިން އަހާފަ ގެނައި އެއްޗެއް ވެސް ނުކެވުނު. ހުން ގަދަވީ ގަޑި އެއީ.” ދާނިޝް ކިޔައިދިނެވެ.

“ކޭން އަންޑަސްޓޭންޑް. އަސްލު ބަލިއިރު ގަދަކަމުން ކާކަށް ވެސް ނުވާނެ. ކެވޭ ވަރަކަށް ކެއީމަ ހުންނާނީ ރަނގަޅަށް. އައި ތިންކް ވީ އާރ ޑަން ހިއާރ.” ހިލްޔާ ވާހަކަ ދައްކަމުން ގޮސް އައިވީއަށް ބަލާލަމުން ކޮޅަށް ތެދުވެލިއެވެ.

އައިވީ ފުޅި ހުސްވެފައިވާ ތަން ފެނިފައި ހިލްޔާ ދާނިޝްގެ އަތާއި ގުޅިފައިވާ އައިވީގެ ހޮޅި ވަކިކޮށްލިއެވެ.

“ސުވާލެއް ކޮށްލަންތަ ހިލްޔާ؟” ހިލްޔާގެ ޙަރަކާތްތަކަށް ބަލަން އޮވެ ދާނިޝް އެހިއެވެ.

“ހުމް…” އައިވީ ހޮޅި ސްޓޭންޓުގައި ހައްޔަރު ކޮށްލަމުން ހިލްޔާ އޭނަ ގެނައި ދަގަނޑު ތަބަކުން ކަފަކޮޅަކަށް ސެނިޓައިޒާރ އެޅިއެވެ.

“ޑޮކްޓަރ އިމްރާން ބުނީ 6 ހަފްތާ ފަހުންނޭ ޕްލާސްޓަރު ނެގޭނީ. ޑޮކްޓަރ ހިލްޔާ ކައިރިން އަހަން ބޭނުންވަނީ އެއަށް ޝޯޓް ކަޓެއް ނޯންނާނެހޭ؟ އެއަށްވުރެ އަވަހަށް ޕްލާސްޓާރ ނުނެގޭނެތަ؟” ދާނިޝް އެހިއެވެ. އޭރު ހިލްޔާ ދާނިޝްގެ އަތުގެ ބެންޑޭޖް ނަގަން އެ ދިމާލުގައި ކަފަކޮޅުން ސެނިޓައިޒާރ ލަމުން ދިޔައެވެ.

“ހެހެ….ތިބައި އަހަންނަށް ވުރެ ބޮޑަށް އެނގޭނީ ވެސް ޑޮކްޓަރ އިމްރާންއަށް. 6 ހަފްތާއޭ ބުނިއްޔާ 6 ހަފްތާއިން ނެގުން ރަނގަޅީ. ބައެއް ކޭސެސްތަކުގަ ބައެއް މީހުން ރަނގަޅުވޭ 4 ހަފްތާއިން ވެސް.” ހިލްޔާ އެހެން ބުނެލީ ދާނިޝްގެ ބެންޑޭޖް ލަސްލަހުން އެ އަތުން ވަކި ކުރަމުންނެވެ.

“ސޯ އަހަރެންގެ ކޭސް ވެދާނެ ދޯ 4 ހަފްތާއަށް؟” ދާނިޝް އެހިއެވެ.

“ނޭނގެ. 4 ހަފްތާވީމަ އެކްސްރޭ ނަގާފަ ބަލަން ޖެހޭނީ. ވީހާވެސް ގިނަ މުއްދަތަށް ބެހެއްޓުން ރަނގަޅީ. ޔޫ ޑޯންޓް މެސް ވިތް ބޯން ހީލިންގް. ނަގަނީ އިނގޭ.” ހިލްޔާ ވާހަކަ ދައްކަމުން ގޮސް ‘އިންޒާރެއް’ ދިނީ ދާނިޝް ގެ އަތުގައިވާ ކަށި ނަގަން ތައްޔާރުވެ ހުރެއެވެ. ސީލިންގްއަށް ނަޒަރު ހުއްޓައިގެން އޮތް ދާނިޝް ކިރިޔާ ބޯޖަހާލި ތަނާހެން ހިލްޔާ ކަށި ނަގާލުމުން ދާނިޝްގެ އަނގައިން ލުއި އާހެއްގެ އަޑު ނިކުތެވެ. ހިތާހިތުން ދާނިޝްއަށް މަޢާފަށް އެދެމުން ހިލްޔާ ދާނިޝްގެ އަތުގައި ކަފަކޮޅެއް ޖައްސައިގެން ހުއްޓެވެ.

“ދެން އެހެންވީއިރު….ޢުމްރާއަށް ވެސް ދާންޖެހޭނީ މިހެން ދޯ؟” ދާނިޝް ފިކުރު ބޮޑުވެފައިވާ ގޮތަކަށް ސީލިންގްއަށް ނަޒަރު ހުއްޓައިގެން އޮވެ ބުނެލިއެވެ. އެހިނދު ހިލްޔާ ސާފު ކަފަކޮޅަކާއި ޓޭޕްކޮޅެއް ނަގައި ދާނިޝް އައިވީ ކަށި ޖެހި ތަނުގައި އެޅިއެވެ.

“ޔެސް….ޓްރެވެލް ކުރާއިރު އަދި އަމުދުން ޕްލާސްޓަރު ނެގުން ރަނގަޅެއް ނޫން. ޕްލާސްޓަރު އަޅަނީ ކަށިތައް އަނބުރާ ހުރި ޕޮޒިޝަނަށް ގެންނަން. ޕްލާސްޓާރ އާ ނުލާ މޫވް ކުރަންޏާ އިތުރަށް ގޯސްވެދާނެ. ތެދުވެލަން ބޭނުންތަ؟” ހިލްޔާއަށް އިށީނުމުގެ ކުރިން އަހާލެވުނެވެ. އެއާއިއެކު ދާނިޝް ލުއި ގޮތަކަށް ބޯޖަހާލިއެވެ. އެއަށްފަހު ފަޔަށާއި ބުރަކަށްޓަށް ތަދުވަމުން ދާ ޙާލު ތެދުވަން ފެށީ އެއްގޮތަކަށް އޮވެ އޮވެ ވަރުބަލިވުމުންނެވެ.

ދާނިޝް އުދަގުލާއިއެކީ ތެދުވަން ފެށުމުން ހިލްޔާއަށް ދާނިޝްގެ ކޮނޑުގައި ހިފަހައްޓާލެވެން އުޅެވުނީ ހަމަ އެއްވެސް އިޚްތިޔާރަކާއި ނުލައެވެ. އެހެނަސް އޭނަގެ އެ ޖަޒުބާތު އައީ ޑޮކްޓަރެއްގެ ހައިސިއްޔަތުން ނޫންހެން ހީވުމުން ހުއްޓުން އަރާފައި ހުރެވުނެވެ. ދާނިޝް އުދަގުލާއިއެކީ އެއްއަތުން ރަޖާ ދުރުކޮއްލަމުން އެނދުން ފައި ބޭލުމަށްފަހު އެނދުގައި އިށީނދެވެން ދެން ވެސް ހިލްޔާ ގެ އެހީވެދޭން ބޭނުންވެފައިވި އަތް ހިއްލިފައިވިއެވެ. އެހެނަސް ދާނިޝްއަށް އެނދުގައި ހަމަޖެހިގެން އިށީނދެވުމުން ހިލްޔާއަށް އަތް ތިރި ކޮށްލެވުނެވެ.

“ދެން ނެތް ދޯ ކުރެވޭނެ ކަމެއް؟ ގިނަ ޘަވާބު ލިބެން ދިމާވި ކަމެއް ކަންނޭނގެ.” ދާނިޝް އިސްޖެހިފައި އިނދެ ބުންޏެވެ. އެހިނދު ހިލްޔާއަށް ލުއި ގޮތަކަށް ހީލެވުނެވެ. ދާނިޝް ވާހަކަ ދެއްކި ގޮތުން ހަނދާންވީ އުސްތާޒާ އަސްމާއެވެ. މާ ބޮޑު ވިސްނުމެއްނެތި ޢާއްމު ދިރިއުޅުމުގެ ކަންތައް އުސްތާޒާ ވެސް އާޚިރަތާއި ނުހަނު ފަސޭހައިން ގުޅުވާތީވެއެވެ.

“އަސްލުވެސް….ގިނަ ތަކުލީފު އުފުލަން ޖެހުނު ވަރަކަށް ޘަވާބު ގިނަވާނީ އިން ޝާ ﷲ. އެއީ ﷲ ގެ ރަޙްމަތް.” ހިލްޔާ އަނެއްކާވެސް ގޮނޑީގައި އިށީންނަމުން ބުންޏެވެ. ބައްޕަ އަންނަން ދެން ދާނިޝް ކޮޅަށް ތެދުކުރުވަން ބޭނުމެއް ނުވިއެވެ. ފައިގައި ރިއްސާނެކަން އަންދާޒާ ކުރެވުނީތީވެއެވެ.

“އިން ޝާ ﷲ…” ދާނިޝް އެހެން ބުނެލަމުން ހިމޭންކަމާއެކީ އެ ޕްލާސްޓަރު އަޅާފައިވާ އަތަށް ބަލަހައްޓައިގެން އިން ގޮތުން ހިލްޔާ ދެރަވާ ގޮތްވިއެވެ. މިއަދު އެމަޖެންސީ ރޫމުގައި އޭނައަށް ކަންތައް ކުރެވުނު ގޮތް އެވަގުތު ލޮލަށް ސިފަވެގެން ދިޔައެވެ. ދާނިޝް އެކަނި ބަހައްޓާފައި ދެވުނު ގޮތް ހަނދާންވުމުން ވާހަކަ ދެކެވުނެވެ.

“އައިމް ސޮރީ….ދާނިޝް.” ހިލްޔާއަށް އެއްދިމާލަކަށް ނަޒަރު ހުއްޓައިގެން އިނދެ ބުނެވުނެވެ.

“ކޮން ކަމަކަށް؟” ދާނިޝްއަށް ހިލްޔާއާއި ދިމާލަށް ބަލާލަމުން އަހާލެވުނެވެ.

“މިއަދު….އެމަޖެންސީ ރޫމަށް ދާނިޝް ދޫކޮށްލާފަ ދެވުނީމަ. އައި ޝުޑް ހޭވް ސްޓޭއިޑް. ޑޮކްޓަރ އިމްރާން އަންނަންދެން.” ހިލްޔާ ދެންވެސް ދާނިޝްއަށް ބަލަން ނުކެރިފައި އިނދެ ބުންޏެވެ.

ހިލްޔާ ވާހަކަ ދެއްކި ގޮތުން ދާނިޝްއަށް ބަލަހައްޓައިގެން އިނދެވުނެވެ. އޭނަ ދެރަވި ކަމަކާއިމެދު ހިލްޔާ ވެސް ދެރަވި ކަން އެނގުމުން ތުންފަތުގައި ހިނިތުންވުމެއް ކުޅެލިއެވެ. އެހިނދު ވާހަކަ ދެކެވުނެވެ.

“އެމަޖެންސީ ޕްރޮޓޮކޯލް އާ ޚިލާފު ކަމެއް ދޯ އެ ކުރެވުނީ؟” ދާނިޝް ސަމާސާވެރި ރާގަކަށް އަހާލިއެވެ. އެހެނަސް ހިލްޔާއަށް އެވަގުތު އެ ސަމާސާ ނަގައިނުގަނެވުނެވެ.

“އައި މީން…ޓެކްނިކަލީ ނޯ. ބިކޯޒް އެހެން ޑޮކްޓަރަކާއި ޙަވާލު ކޮށްފަ އަހަރެން ދިޔައީ. ބަޓް ފްރޮމް މައި ސްޓޭންޑާޑްސް، އައި ހޭވް ފެއިލްޑް. މިއަދު އެހެން ހެދުނީމަ.” ހިލްޔާ ދެންވެސް މާޔޫސީ ގޮތަކަށް ބުންޏެވެ.

“އަހަންނަށް ވެސް ފާހަގަވި ހިލްޔާ ނަރުހުންނަށް ކަން ކުރަންވީ ގޮތް އެންގިއިރު އޯޑާރސް ވެސް އެހާ ކްލިއާރއެއް ނޫން. މި ނޫނަސް އަހަރެން ހުރީ ހިލްޔާ އޮބްޒާވްކޮށްފަ. މިއަދަށްވުރެ ރަނގަޅަށް ހިލްޔާ އަބަދުވެސް ކަންތައް ކުރަނީ…” ދާނިޝް ބުންޏެވެ. ހިލްޔާގެ ހުނަރުވެރިކަން ހިލްޔާއަށް ހަނދާން ކޮށްދިނުމަށެވެ. އެންމެ ދުވަހެއްގެ ސަބަބުން މާޔޫސް ނުވުމަށް ހިތްވަރު ދިނުމަށެވެ. އެހެނަސް ދެން ހިލްޔާ ދެއްކީ ދާނިޝް ހީނުކުރާ ކަހަލަ ވާހަކައެކެވެ.

“އަސްލު….އައި ވޯޒް ނާވަސް ޓުޑޭ.” ހިލްޔާ ދެންވެސް ދާނިޝްއަށް ބެލުމެއްނެތި ބުންޏެވެ. އެ ވާހަކައިން ދާނިޝް ގެ ދެބުމަ ކައިރިވިއެވެ.

“ކޮން ކަމަކާ؟” ޖަވާބު ޔަޤީނާއި ގާތްވާ ޙާލު ދާނިޝްއަށް އަހާލެވުނެވެ. އެ ސުވާލާއިއެކު ހިލްޔާ އޭނައަށް ބަލާލި ގޮތުން އެ ޔަޤީންކަން ދެގުނަވިއެވެ.

ދާނިޝް ކުރި ސުވާލުން ހިލްޔާ ނުތަނަވަސްވާ ގޮތްވިއެވެ. ދާނިޝް ގެ ސަބަބުން ކަމަށް ހިތް ބުންޏެއްކަމަކު ދުލާއި ހަމައަށް އެ ބަސްތައް ގެންނަން ނުކެރުނެވެ. ދާނިޝް އޭގެ މާނަ ނަގާނެ ގޮތެއް ނޭނގުމުންނެވެ. ޚުދު އޭނަ ވެސް އޭގެ މާނަ ނަގަން ވީ ގޮތެއް ހިލްޔާއަށް ނޭނގެއެވެ.

ހިލްޔާ އެއްޗެކޭ ނުބުނެ ގިނައިރު ވާން ފެށުމުން ދާނިޝް ވާހަކަ ދެއްކިއެވެ.

“ވެލް….ކޮންމެ ކަމަކާ ހެދި ވިޔަސް މިއަދު ސާރވިސް ކުޑަކޮށް ލޯ ކޮށް ދިޔައީ ދޯ؟ އަދި އެ ވެސް މެނޭޖާރ އަށް ސާވް ކުރިއިރު….އެހެންވީއިރު ކޮންސީކުއެންސަކަށް ޓޫ ވީކްސް އަށް ސަސްޕެންޑް ވެގެން ނަހީދުބެއާއި އެކު ޢުމްރާއަށް ދާންވީއެއްނު؟” ދާނިޝް ބުންޏެވެ.

ދާނިޝްގެ ވާހަކައިގެ ކުރީކޮޅު ހިލްޔާގެ ހިތް ނުތަނަވަސްކަމުން ފުރެން ފެށިއެއްކަމަކު ނިމުނުއިރު އެ ހިތަށް އުފާވެރިކަމެއް ވެރިވިއެވެ. އެ އުފާވެރިކަމާއެކީ ދާނިޝްއަށް ބަލާލިއިރު ދާނިޝް ހިނިތުންވުމެއްގައި އިން ތަން ފެނިފައި ހިލްޔާއަށް ހީލެވުނެވެ. އެއާއިއެކު ދާނިޝްއަށް ވެސް ހީލެވުނެވެ.

އެހިނދު ދާނިޝް ކުރިމައްޗަށް ބަލާލެވުނު ވަގުތު އެ ދޮރުމައްޗަށް އެރި ނަހީދުބެ ފެނުނެވެ. ނަހީދުބެ ވަންނަން އުޅެފައި އެ ދޮރުމަތީގައި މަޑުކޮށްލި މަންޒަރު ފެނުނީ ދާނިޝްއަށް އެކަންޏެވެ. ހިލްޔާ އިށީނދެގެން އިނީ އެ ދޮރަށް ފަސްދީގެން ކަމަށްވާތީވެއެވެ. ނަހީދުބެ ލުއި ހިނިތުންވުމަކާއެކީ އެތާ މަޑުކޮށްލުމުން ނަހީދުބެ ބޭނުންވާ ގޮތް ދާނިޝްއަށް އެނގުންވިއެވެ. އެހެންކަމުން ދާނިޝް ހިލްޔާއަށް ނަހީދުބެ ނުދައްކަން ނިންމިއެވެ.

“ޢުމްރާއާއިމެދު…އެބަ ވިސްނަން. އެބަ ހިތަށްއަރާ ދާނީއޭ. އެކަމަކު އަދި ކްލިނިކަށް އައިސް ކިރިޔާ 1 މަސް ވީއިރު ދާންވީމަ ވެސް ދެރަވޭ.” ހިލްޔާ ބުންޏެވެ.

“ލައިކް ޔޫ ޝުޑް! ޑޮކްޓަރ ހިލްޔާ ދިޔައިމަ އަހަރުމެން މެޑިކަލް އޮފިސާރއެއް ނުލިބިގެން އުޅެންޖެހުނު ޙާލު އެނގޭތަ؟ ތިން ފަހަރު އޮފިސަރުން ރިޕްލޭސް ކުރަން ޖެހުނު. އެކަކު ވެސް ހަރު ނުލާ! އޭރު ވެސް ޑޮކްޓަރ ހިލްޔާގެ ޕްރޮބޭޝަން ނިމުނުތަނާ ދިޔައީ. އަނެއްކާ ޝޯޓް ނޯޓިސްއެއްގަ ޑޮކްޓަރ ހިލްޔާ ގޮއްސިއްޔާ ބްލެކްލިސްޓަށް އަރާނީ.” ދާނިޝްގެ ސަމާސާވެރި ރާގު ނަގައިގަނެވުމުން ހިލްޔާއަށް އަނެއްކާވެސް ހެވޭ ގޮތްވިއެވެ. ދާނިޝް ވެސް އެ ލުއި ގޮތަކަށް ހީލިއެވެ.

“ދެން އެހެންވިއްޔާ ނުކެރޭނެ ދާކަށް ވެސް.” ހިލްޔާ ހެވިފައި އިނދެ ބުންޏެވެ.

“ޖަސްޓް ޖޯކިންގް. ހިލްޔާ ހަމަ ދާން ބޭނުމިއްޔާ ދާންވީ. ހަމައެކަނި ޢުމްރާއަކަށް ނޫން. އެހެން ސަބަބަކަށްޓަކައި ލޯންގް ޓާމްކޮށް ލީވް ކުރަން ވިޔަސް އޯކޭވާނެ. ނަހީދުބެ ބޭރުން ރަނގަޅު މެޑިކަލް އޮފިސަރަކު ހޯދަފާނެ.” ދާނިޝް ލަސްލަހުން އޭނަ ހިލްޔާ ގާތު ދައްކަން ބޭނުންވެފައިވާ މަޢުޟޫއަށް ވާހަކަ އަނބުރަން ފެށިއެވެ. ނަހީދުބެ ވެސް ހުރުމާއި އެކީގައެވެ. ހިލްޔާއާއި އޭނަގެ ދެމެދަށް ވެރިވެފައިވާ މި ދުރުކަމުގެ ވޭނުން ދެމީހުން ވެސް މިންޖު ކޮށްދެވޭތޯއެވެ.

“ލޯންގް ޓާމްކޮށް ލީވް ކުރާނީ ކީއްވެ؟ ރެޒިޑެންސީއަށް؟ އަދި….ޕްލޭންއެއް ނުކުރަން ދާކަށް.” ހިލްޔާއަށް ބުނެވުނެވެ.

“ރެޒިޑެންސީއަށް ނޫނިއްޔާ….ހިލްޔާ މެރީ ކުރަން ވެސް ޖެހިދާނެއެއްނު؟” ދާނިޝް ބުނެލި ވާހަކައިން، ހިލްޔާގެ މެއަށް ފިނިވިއެވެ.

ނުނިމޭ