ނަފްސީ (ތެޔާޅީސްވަނަ ބައި)

“فَقُلْتُ ٱسْتَغْفِرُوا۟ رَبَّكُمْ إِنَّهُۥ كَانَ غَفَّارًا

ފަހެ، ތިމަންކަލޭގެފާނު ވިދާޅުވީމެވެ. ތިޔަބައިމީހުންގެ ވެރިރަސްކަލާނގެ ޙަޟްރަތުގައި ފާފަފުއްސެވުމަށްއެދި، ތިޔަބައިމީހުން ދަންނަވާށެވެ! ހަމަކަށަވަރުން، އެކަލާނގެއީ، ގިނަގިނައިން ފާފަފުއްސަވާ ރަސްކަލާނގެކަމުގައިވެއެވެ.

يُرْسِلِ ٱلسَّمَآءَ عَلَيْكُم مِّدْرَارًا

(އޭރުން) އެކަލާނގެ ތިޔަބައިމީހުންގެ މައްޗަށް ބޯކޮށް (ވެހޭގޮތުގައި) ވާރޭ ފޮނުއްވާނެއެވެ.

وَيُمْدِدْكُم بِأَمْوَٰلٍ وَبَنِينَ وَيَجْعَل لَّكُمْ جَنَّٰتٍ وَيَجْعَل لَّكُمْ أَنْهَٰرًا

އަދި މުދާތަކާއި، ދަރިންގެގޮތުން، އެކަލާނގެ ތިޔަބައިމީހުންނަށް މަދަދު ދެއްވާނެއެވެ. އަދި އެކަލާނގެ ތިޔަބައިމީހުންނަށްޓަކައި ބަގީޗާތައް ލައްވާނެއެވެ. އަދި އެކަލާނގެ ތިޔަބައިމީހުންނަށްޓަކައި ކޯރުތައްވެސް ލައްވާނެއެވެ.”.

ރޭގަނޑުގެ ވަގުތެއްގައި، ކޮޓަރީގެ އެނދުމަތީގައި އިން ދާނިޝް ފޯނުން ބަލައިގެން ނޫޙް ސޫރަތުގެ އެ އާޔަތްތައް ކިޔަވަމުން ދިޔައީ، މިޝަރީ އަލް އަފަސީ ގެ ރާގަށެވެ. ޢައްމާ ފޮތް ނުބަލާ ދަސް ކުރުމަށްފަހު ދާނިޝް ތަބާރަ ފޮތް ބަލައިގެން ކިޔަވަން ފަށާފައިވެއެވެ. މުޅި ޤުރުއާން ފަރިތަކޮށް ކިޔެވުމަށް އާދަ ކުރުމުގެ ނިޔަތުގައެވެ. އެހެނަސް ތަބާރަ ފޮތުން ފެނުނު އެންމެ ފުރަތަމަ ކުރު ސޫރަތަކީ ނޫޙު ސޫރަތް ކަމަށްވުމުން، ފަޔާޒްގެ ނަސޭޙަތް ހަނދާންކޮށް ނޫޙު ސޫރަތް ހިތުދަސްކުރަން ބޭނުންވިއެވެ. ހިތުދަސްކުރަން ދާނިޝް ބޭނުންވީ މާނައާއި ވެސް އެކީގައެވެ. އެހެންކަމުން ކޮންމެ އާޔަތެއް ކިޔެވުމަށްފަހު މާނަ ވެސް ހިތުން ކިޔަމުން ދިޔައެވެ.

އެހާ ހިސާބަށް މާނަ ބަލާލެވުމުން ދާނިޝްއަށް އެ އާޔަތްތަކާއިމެދު ވިސްނަން މަޑުކޮށްލެވުނެވެ. އެނދުމަތީގައި އިނދެފައި އޭނަގެ ކޮޓަރީގެ ބެލްކަންޏަށް ނިކުމެވޭ ދޮރާއި ދިމާލަށް ބަލާލެވުނީ ވިއްސާރައިގެ ހިލަމެއްވޭތޯއެވެ. ފާފަ ފުއްސެވުމަށް އެދި ދުޢާ ކުރުމުން ވާރޭ ވެހޭނެ ކަމުގެ ޚަބަރު އާޔަތުގައި އޮތުމުންނެވެ. އަދި ފާފަ ފުއްސެވުމަށް އެދި ﷲ ގެ ޙަޟްރަތުގައި ދެންނެވުމުން އެކަލާނގެ މީހުންނަށްޓަކައި މުދަލާއި ދަރިން އިތުރު ކޮށްދެއްވާކަން އެނގުމުން، މިއީ އޭނަގެ ކައިވެނީގެ ހުވަފެނަށް އޮތް ފަހި މަގެއްތޯ ހިތަށްއެރިއެވެ. ދާނިޝްގެ މިހާރުގެ ހުވަފެނަކީ ހަމައެކަނި ރީތި ދިވެހި އަންހެން ކުއްޖަކާއި އިނުމެއް ނޫނެވެ. އޭގެ އިތުރަށް     ބޭނުންވަނީ ރަނގަޅު އަންހެން ކުއްޖަކާއި ކައިވެނިކޮށް ހަރުދަނާ ޢާއިލާއެއް ބިނާ ކުރާށެވެ. ކައިވެނީގެ ޙަޤީޤީ މަޤްޞަދު ދާނިޝްއަށް ވިސްނިފައިވަނީ އަދި ކިރިޔާއެވެ.

ކައިވެންޏާއިމެދު ވިސްނެން ފެށުމާއިއެކު ދާނިޝްގެ މެއަށް އުދަގޫވެ، ގައިގެ ވަރު ދެރަވިއެވެ. މިއަދަކީ އޭނަ އެދުވަހަކުން ރެކުމަށް އެދެމުން ދިޔަ ދުވަހެވެ. 1 ޖެނުއަރީއެވެ. އޭނަ ކައިވެންޏާއި ގުޅިގެން ދެކޭ ހުވަފެންތަކުގައި އަންހެން ކުއްޖާގެ މަޤާމް ފުރުވި ހިލްޔާގެ ކައިވެނި ކުރެވޭ ދުވަހެވެ. ހިތާއި ދެކޮޅަށް ވެސް އޭނަ ހިލްޔާގެ ސޫރަ އެ ހުރިހާ ހުވަފެނަކުން ވަކި ކުރަންޖެހޭ ދުވަހެވެ. ހިލްޔާއަށްޓަކައި ދުޢާކޮށް، ހިލްޔާއާއި މެދު ވިސްނަން އަމިއްލަ ނަފްސަށް އިޒުނަ ދޭނެ ފަހު ދުވަހެވެ. އެހެނީ މިއަދަށްފަހު ހިލްޔާ ވާނީ އެހެން މީހެއްގެ އަންބަކަށެވެ. އެހެން މީހެއްގެ ޙައްޤަކަށެވެ. އެހެން މީހެއްގެ އަންބަކާއިމެދު ވިސްނުމުގެ ޙައްޤެއް އޭނައަށް އެއްގޮތަކަށް ވެސް ލިބިގެނެއް ނުވެއެވެ.

އެ ޚިޔާލުތަކުން އާދައިގެ މަތިން ދާނިޝްގެ މޭގައި ރިހުމެއް އުފެދުނެވެ. ލޮލުން ކަރުނަ ހިލުނު ހިނދު އޭނަ އަނެއްކާވެސް މިކަމާއިމެދު ހަމަ ރޯންވީތޯ ހިތަށްއެރިއެވެ. ހިލްޔާގެ ކައިވެނި މިހާރު ކުރެވިދާނެތޯ އަމިއްލަ ނަފްސާއި ސުވާލު ކުރެވުނެވެ. ހިލްޔާގެ ކައިވެނި ކުރެވެނީ އެދުވަހު ޔޫކޭ ގަޑިން 4 ޖަހާއިރު ކަން ދާނިޝްއަށް އެނގިފައިވެއެވެ. އެ ކައިވެންޏަކީ މުޅި ރާއްޖެއަށް ނުހަނު މަޝްހޫރުކޮށް އެންމެންގެ ދެކުމަށް ސޯޝަލް މީޑިއާގައި ލައިވް ކުރެވޭ ކައިވެންޏެއްކަން ތުންތުންމަތިންނާއި ޚަބަރުން ވެސް އިވިފައިވުމުންނެވެ.

އެދުވަހު ވަކިން ޚާއްސަކޮށް ދާނިޝް އެއްވެސް ސޯޝަލް މީޑިއާއަކަށް ނުވަދެ ހުރި ސަބަބަކީ އެއީއެވެ. ހިލްޔާ އެހެން މީހަކާއި ކައިވެނި ކުރާ މަންޒަރު ދެކުމުގެ ޝައުޤެއް އޭނަގެ ހިތުގައި ނެތުމުންނެވެ. އެފަދަ މަންޒަރެއް ދެކޭނެހާ ހިތްވަރެއް ވެސް އޭނަގެ ކިބައިގައި ހުރި ހެނެއް ހިއެއްނުވެއެވެ. ރާއްޖޭގެ ގަޑި ރޭގަނޑު 11 ޖަހަން ގާތްވަމުން ދިޔައީތީ މިހާރު ހިލްޔާގެ ކައިވެނި ކުރެވިދާނެކަމަށް ދާނިޝްއަށް ނިންމުނެވެ. އެހެންކަމުން ދާނިޝް އެވަގުތު ނުރޯން ނިންމަމުން ވަރުގަދަ ޢަޒުމަކާއިއެކީ ދެލޯ މަތިން އެއްއަތް ހިންގާލިއެވެ.

ހަމަ އެވަގުތު އެނދުމަތީގައި އޮތް ދާނިޝްގެ ފޯނު ރިންގުވާން ފެށިއެވެ. ސްކްރީނުން ފަޔާޒްގެ ނަން ފެނިފައި ދާނިޝް ހިސާބަކަށް ޙައިރާންވާ ގޮތްވިއެވެ. ފަޔާޒް ޢާއްމު ގޮތެއްގައި އެހާ ދަން ގަޑީގައި ގުޅައި ނަހަދާތީވެއެވެ.

ފަޔާޒަށް ބޮޑު ކަމެއް ދިމާވީއޭ ހިތައި ދާނިޝް ފޯނު ނަގައި ކަންފަތުގައި ޖެއްސިއެވެ.

“އައްސަލާމްޢަލައިކުމް.” ދާނިޝް ސަލާމް ގޮވިއެވެ.

“ވަޢަލައިކުމުއްސަލާމް…ދާނިޝް ގާތު މި ވާހަކަ ބުނަންވީތޯ ނުބުނަންވީތޯ ވަރަށް ވިސްނަން ހުރެފަ މި ގުޅާލީ. އެންމެ ފަހުން ހިތަށްއެރީ ދާނިޝް އެނގެން ބޭނުންވާނެއޭ މި ވާހަކަ.” ފަޔާޒް ބުންޏެވެ.

“ކޮން ވާހަކައެއް؟” ދެ ބުމަ ކައިރިކޮށްގެން އިނދެ ދާނިޝްއަށް އަހާލެވުނެވެ. އެހިނދު އެކޮޅުން ފަޔާޒް ފުން ނޭވައެއް ދޫކޮށްލި އަޑު އިވުނެވެ.

“މިއަދު އަދި އެއްވެސް ސޯޝަލް މީޑިއާއަކަށް ނުވަންނަން ދޯ ހަމަ؟” ފަޔާޒް އެހިއެވެ. ފަޔާޒްގެ އެ ސުވާލުން ހިތަށް ވެރިވި ހިލްޔާގެ ނަމާއިއެކު ދާނިޝްގެ މެއަށް ފިނިވިއެވެ.

“ން…ނުވަންނަން. ކިހިނެއްވީ؟” ދާނިޝްއަށް އަވަސްވެގެން ދިޔަ ހިތުގެ ތެޅުމާއިއެކު އަހާލެވުނެވެ.

“މަރިޔަމް ހިލްޔާ ނަހީދުގެ ވެޑިންގް ސެރެމަނީ ދާނިޝް އަމިއްލައަށް ބަލާލަބަލަ.” ފަޔާޒް ބުންޏެވެ. އެހިނދު ދާނިޝްއަށް ކުއްލިއަކަށް ކަންފަތުން ފޯނު ނަގައި ފޯނު ކަނޑާލެވުނީ ފަޔާޒަށް ވެސް ނުރުހުންވެފައިވާ ޙާލުގައެވެ. ބުނަން އުޅޭ އެއްޗެއް ފަޔާޒް ސާފުކޮށް ނުބުނާތީވެއެވެ.

އެއަށްފަހު ދާނިޝް ވަގުތުން ވަނީ ފޭސްބުކަށެވެ. ފޭސްބުކަށް ވަނުމާއިއެކު ފެނިގެން ދިޔައީ ދިވެހި އާރޓިކަލްއެކެވެ. މަޝްހޫރު ރާފިލް ނަސީމް އާއި ހިލްޔާ ނަހީދުގެ ކައިވެނި ‘ކެންސަލް’ ވީ ވާހަކައެވެ. އެ އާރޓިކަލް ފެނިފައި ދާނިޝްއަށް އިޙްސާސް ކުރަންވީ ގޮތެއް ނޭނގުނެވެ. އޮޅުން އަރާ ގޮތްވިއެވެ. އެ އާރޓިކަލް ހުޅުވުމުގެ ބަދަލުގައި ދާނިޝް އިތުރަށް ސްކްރޯލްކޮށްލީ ފަޔާޒް ބުނިހެން ހިލްޔާގެ ކައިވެނީގެ ޙަފްލާ ފެނޭތޯއެވެ. ދެ ތިން ޕޯސްޓަކަށްފަހު މަލާމާތް ކުރާ ޒާތުގެ ޖުމްލައަކާއިއެކު ކައިވެންޏެއްގެ ކުރު ވީޑިއޯކޮޅެއް ހުއްޓެވެ. ދާނިޝް އެ ޖުމްލަ ރަނގަޅަށް ކިޔުމެއްނެތި ވީޑިއޯ ބަލަން ފެށިއެވެ. މިއީ ހިލްޔާމެންގެ ކައިވެނީގެ ރަސްމީ ވީޑިއޯއިން ނަގާފައިވާނެ ތަންކޮޅެއްކަން ޔަޤީން ކުރެވުނެވެ.

ވީޑިއޯއިން އެންމެ ފުރަތަމަ ފެނުނީ ހިލްޔާ ނަހީދުބެއާއިއެކު ހިނގަމުން ދިޔަ މަންޒަރެވެ. ދެމީހުންގެ ފަހަތުން އެ މަންޒަރު ދެއްކިފައިވީއިރު، ދެމީހުންގެ ކުރިމައްޗަށްވާ ގޮތަށް ފެންނަމުން ދިޔަ ސަލީބުން ދާނިޝްގެ ދެލޯ ބޮޑުވިއެވެ. މިއީ އެޑިޓް ކުރެވިފައިވާ ވީޑިއޯއެއްތޯ ވެސް ހިތަށްއެރިއެވެ. އެހެނަސް ފަހަތުން އިވެމުން ދިޔަ ރާގުން އެއީ ހަމަ ފައްޅިއެއްކަން ދާނިޝްއަށް ޔަޤީން ކުރެވުނެވެ. ހިލްޔާއާއި ރާފިލްގެ ކައިވެނި ކުރެވެނީ ފައްޅިއެއްގައިތޯ ހިތަށްއެރިއެވެ. ހިލްޔާ މިފަދަ ތަނަކަށް ވަންނަން ރުހޭތޯ އަމިއްލަ ޒަމީރާއި ސުވާލު ކުރެވުނެވެ.

ސިކުންތުކޮޅެއްގެ ތެރޭގައި ނަހީދުބެއާއި ހިލްޔާ ކުރިމަތިން ފެނުނެވެ. އެހިނދު ނަހީދުބެއާއި ހިލްޔާގެ މޫނުމަތިން ވެސް އުފާވެރިކަމެއް ނުފެނެއެވެ. ހިލްޔާގެ މޫނު ފެނިފައި ދާނިޝް ވީ ދެރައެވެ. ހިލްޔާއަށް ކިހިނެއްވީތޯ ހިތަށްއެރިއެވެ. ބަލީ ހެއްޔެވެ؟ ނުނިދާ ހުރީ ހެއްޔެވެ؟ ކަމަކާއި ދެރަވެފައި ހުރީ ހެއްޔެވެ؟ އެ ހުރިހާ މޭކަޕެއްގެ ދަށުގައި ފޮރުވިފައިވާ އެ ކަންތައް ދާނިޝްއަށް ނަގައިގަނެވުނު ފަދައެވެ.

ސިކުންތުކޮޅެއްގެ ތެރޭގައި ހިނިތުންވެގެން ހުރި ރާފިލް ފެނުމުން ދާނިޝް އައި ރުޅީގައި ކަތުރުކަށިގަނޑަށް ބާރުވިއެވެ. ހިލްޔާގެ ޙާލު ރަނގަޅު ނޫން ދުވަހެއްގައި ރާފިލް އަމިއްލަ މޫނު އުޖާލާ ކޮށްގެން ހުރެ ހިލްޔާއާއި ކައިވެނިކުރަން އުޅޭތީވެއެވެ. އަދި އަމުދުން ދެމީހުންގެ ކައިވެނި ކޮށްދޭން ހުރި ފައްޅީގެ ބޮޑު މީހާ ފެނިފައި އިތުރަށް ނުރުހުންވާ ގޮތްވިއެވެ. ކޮންމެ ގޮތެއްވިޔަސް މިއީ ހިލްޔާގެ ޚިޔާލަކަށް ނުވާނެކަމަށް ހިތުގެ އަޑިން ޔަޤީން ކުރެވުނެވެ.

ނަޞާރާއިން ކައިވެނި ކުރާއިރު ބުނާފަދަ ބަސްތައް އިވެން ފެށުމުން ދާނިޝްގެ ހިތަށް އިތުރަށް އުދަގޫވިއެވެ. މިއީ ހަމަ ގައިމުވެސް ހިލްޔާ ބޭނުންވާނެ ގޮތެއް ނޫންކަމަށް ބުނެ ހިތް ހަޅޭއްލެވިއެވެ. އެމީހާ ވާހަކަ ދައްކަމުން ގޮސް ވަކި ހިސާބަކުން ހިލްޔާ ކައިވެންޏަށް ޤަބޫލުތޯ އެހިއެވެ. އެ ހިނދު ދާނިޝްއަށް ނޭވާ ހިފަހައްޓާލެވުނެވެ. ކެމެރާ ހިލްޔާގެ މޫނަށް ހުއްޓުނެވެ.

ދެން ވޭތުވި 10 ސިކުންތު ޤަރުނަކަށް ދެމިގެން ދިޔަހެން ދާނިޝްއަށް ހީވިއެވެ. އެއަށްފަހު ހިލްޔާ އިސްއުފުލާލުމަށްފަހު ވާހަކަ ދެއްކިއެވެ.

“އައި ކާންޓް ޑޫ ދިސް..” ހިލްޔާ އެ ބުނެލި ބަސްތަކާއިއެކު ދާނިޝްގެ ހިތުގެ ތެޅުން ވެސް ހިނދުކޮޅަކަށް މަޑުޖެހިލިހެން ހީވިއެވެ. އިސާހިތަކު ހިލްޔާ ބޯމަތީގައި އޮތް ލޭސް ފޮތިގަނޑުގެ ބައި ބިންމައްޗަށް ވައްޓާލަމުން އަތުގައި އޮތް އަނގޮޓި ނަގައި ދުރަށް އުކާލި މަންޒަރު ފެނި، ދާނިޝްއަށް ޤަބޫލު ކުރަން ވެސް ދަތިވިއެވެ. އެއަށްފަހު ހިލްޔާ ރާފިލްއަށް ފަސްދީފައި ފައްޅިން ނިކުންނަން ފެށި މަންޒަރު ވެސް ފެނުނެވެ. ވަކި ހިސާބަކުން ރާފިލް ހަރުއަޑުން ހިލްޔާއަށް ނިސްބަތްކޮށް ކިޔާލި ހުތުރު ބަސް އިވިފައި ދާނިޝްއަށް ފޯނުގައި ބާރަށް ހިފަހައްޓާލެވުނެވެ. ހަމަ އެހިނދުން އެހިނދަށް ވެސް ރާފިލްގެ މޫނުމައްޗަށް ހޫނު އެތިފަހަރެއް ވިއްލާލަން ބޭނުންވިއެވެ.

ހިލްޔާ ވަކި މަޑު ކުރުމެއްނެތި ފައްޅިން ނިކުންނަމުން ދިޔަ މަންޒަރު މެދުކެނޑުނީ، އެހާ ހިސާބުން ވީޑިއޯ ނިމުމުންނެވެ. އެހިނދު ދާނިޝްއަށް އޭނަ ހިފަހައްޓައިގެން ހުރި ނޭވާ ދޫކޮށްލެވުނެވެ. އިސާހިތަކު ބާރަށް ތެޅެމުން ދިޔަ ހިތުގެ އިޙްސާސްވެ، ދެންމެ ފެނުނު މަންޒަރުގެ މާނައާއިމެދު ވިސްނަން ސިކުނޑި ފެށިއެވެ.

ރާފިލްއާއި ހިލްޔާގެ ކައިވެނި ނުވީތޯ އަމިއްލަ ނަފްސާއި ސުވާލު ކުރެވުނެވެ. އެކަމާއިމެދު ހިތުގެ ކަނަކުން އުފާވާން އުޅުނެއްކަމަކު އުފަލެއް ނުކުރެވުނެވެ. ހިލްޔާގެ ޙާލާއިމެދު ވިސްނާލުމުންނެވެ. އެ ކައިވެނީގެ ޙަފްލާއަށް އައިއިރު ވެސް ހިލްޔާ ބަލި ނަމަ، މިފަދަ ފިޔަވަޅެއް އެޅުމަށްފަހު ހިލްޔާގެ ޙާލަކީ ކޮބައިތޯ ހިތަށްއެރިއެވެ. ރާފިލް ހިލްޔާއަށް ގޯހެއް ހަދާފާނެތީ ވެސް ހިތް ބިރުގަތެވެ. ކިރިޔާ ވެސް ހިތަށް ހަމަޖެހުމެއް ލިބުނީ ނަހީދުބެ ހިލްޔާއާއިއެކީ ހުރިކަން ޔަޤީންވުމުންނެވެ.

ހަމަ އެހިނދު ވަގުތުން ވައިބާރ ހުޅުވާލަމުން ނަހީދުބެ ގެ ނަން ހޯދާލުމަށްފަހު ނަހީދުބެއަށް ގުޅާލެވުނެވެ. ކޮންމެހެން ވެސް އެވަގުތު ހިލްޔާގެ ޙާލު ބަލާލަން ބޭނުންވުމުންނެވެ. އެހެނަސް އެކޮޅުން ނަހީދުބެ ގެ ފޯނު ރިންގުވަމުން ގޮސް ކެނޑުނެވެ. ދެވަނަ ފަހަރަށް ގުޅުމުން ވެސް އެހެން ވުމުން މި ގަޑީގައި ނަހީދުބެއަށް ނުގުޅޭނެކަން ޔަޤީންވިއެވެ.

ދެންވެސް ހިލްޔާގެ ޙާލު ބަލަން ބޭނުންވެފައިވި ވަރުން ޖެހިލުންވެ ހުރެވެސް ވައިބާރގައި ހިލްޔާގެ ނަން ސާޗްކޮށްލަމުން އޭނައާއި ހިލްޔާގެ ޗެޓް ލޮގް ހުޅުވާލެވުނެވެ. އެ ދެމެދުގައި ދެކެވިފައި ހުރީ ހުސްވެސް ކްލިނިކް ޑިއުޓީތަކުގެ ވާހަކައެވެ. އެކި ދުވަސް މަތިން ހިލްޔާ އޭނަގެ ޑިއުޓީ ގަޑި ބަދަލު ކުރަން އެދިފައިވީއިރު އަނެއްބައި ދުވަހު ބަލިވެގެން ނާދެވޭ ވާހަކަ އަންގާފައިވިއެވެ.

އެ މެސެޖުތައް ބަދަލު ކުރިއިރު ހިލްޔާގެ ޕްރޮފައިލް ފޮޓޯގައި ހުރީ ރަތް ފިނިފެންމަލެއްގެ ފޮޓޯއެކެވެ. އެހެނަސް މިއަދު ޕްރޮފައިލް ފޮޓޯ ބަދަލު ކުރެވިފައިވި ތަން ފެނިފައި ދާނިޝްއަށް އެ ފޮޓޯއަށް ފިތާލެވުނީ އެއްވެސް އިޚްތިޔާރަކާއި ނުލައެވެ. އެއްފަރާތަކުން ނެގިފައިވި އެ ފޮޓޯގައި ހިލްޔާ ހުރީ ގަދަ ނޫކުލައިގެ ބުރުގާއަކާއި ހަމަ އެ ކުލައިގެ އަބާޔާއެއްގައި، މަޑު ނޫކުލައިގެ ރެއިލިންގްއެއްގައި އަތް އަޅުވައިގެންނެވެ. ރޭގަނޑު ނެގިފައިވާ އެ ފޮޓޯއިން ވެސް ދާނިޝްއަށް ހިލްޔާގެ އެ ރީތި މޫނުމަތިން އުފާވެރިކަމެއް ނުފެނުނެވެ. ކީއްވެ ހެއްޔެވެ؟

ފޮޓޯއަށް ބަލަން އިނދެފައި ދާނިޝް ކުއްލި ގޮތަކަށް ވައިބާރ ކްލޯޒްކޮށްލީ، މާ ގިނައިރު ވަންދެން އެ ފޮޓޯއަށް ބަލަހައްޓައިގެން ހުރުމުގެ ނަތީޖާއާއިމެދު ވިސްނުމުންނެވެ. ފޮޓޯ ބެލުން ހުއްޓާލިއެއްކަމަކު ދާނިޝް ދެންވެސް ހިލްޔާ ދެކެން ބޭނުންވެފައިވިއެވެ. ހިލްޔާ އަނބުރާ މާލެ އަންނާނެ ކަމުގެ ޚިޔާލުން އުފާވިއެއްކަމަކު ހިތުގައި ދެންވެސް ހިލްޔާއާއިމެދު ކަންބޮޑުވުންވިއެވެ. ހިލްޔާ ހެޔޮ ޙާލެއްގައިވުމަށް އެދި ހިތާހިތުން ދުޢާ ކުރެވުނެވެ.

**

ކައިވެނީގެ ހެދުމުގައި ހިލްޔާ އިށީނދެގެން އިނީ ރާފިލް އޭނައަށް ހިފައިދީފައިވާ ލަކްޝަރީ އެޕާޓްމެންޓުގައެވެ. ރޫހު މަރުވެފައި ހިލްޔާ އެހެން އިންދާ ކުއްލިއަކަށް އެޕާޓްމެންޓް ދޮރުގައި މީހަކު ބާރަށް ޓަކި ދޭން ފެށި އަޑަށް ހިލްޔާ ސިއްސައިގެން ދިޔައެވެ.

“މި ދޮރު ވައްޓާނުލަނީސް ދޮރު ހުޅުވަން އުޅޭ! $%*&@.”

ބޭރުން ރާފިލްގެ ރުޅިވެރި އަޑު އިވިފައި ހިލްޔާގެ ހިތް ރޫރޫއެޅިއެވެ. ބޭއިޚްތިޔާރުގައި ކޮޅަށް ތެދުވެލެވުނީ އަމިއްލަ ދިފާޢުގައި ކަމެއް ކުރެވޭތޯއެވެ. އެހެނަސް ތަކުރާރުކޮށް އިވެމުން ދިޔަ ބާރު ޓަކިތަކުގެ ސަބަބުން ފައި ތުރުތުރު އަޅަމުން ދިޔައީތީ ފިޔަވަޅު އަޅަން އުދަގޫވިއެވެ. އެހެނަސް އުދަގުލާއިއެކީ ވެސް ހިލްޔާއަށް ފަހަތަށް ޖެހެމުން ދިޔައީ ދޮރުގެ އަނެއް ފަރާތުގައި ހުރި ރާފިލްއަށް ގެންފައިވި ބިރެއްގެ ބޮޑު ކަމުންނެވެ.

ހިލްޔާ މިފަދަ ޙާލެއްގައި ފަހަތަށް ޖެހެމުން ގޮސް އެޕާޓްމެންޓް ގެ ފާރާއި ކައިރިވީ ވަގުތު ކުއްލި ގޮތަކަށް އެޕާޓްމެންޓްގެ ދޮރު ބާރު އަޑަކާއި އެކީ ހުޅުވިގެން ދިޔައެވެ. އެ މަންޒަރު ފެނި، ހިލްޔާއަށް ހަޅޭއްލެވި، ރޮވެން ކައިރިވީ ވަގުތު، ކަޅުކުލައިގެ ކޯޓު ފަޓުލޫނުގައި ހުރި ރާފިލް ދިގު ފިޔަވަޅުތަކެއްގައި އޭނައާއި ދިމާލަށް އަންނަން ފެށިއެވެ. އެހިނދު ހިލްޔާގެ ހިތް މޭފަޅާލާފައި ނިކުމެދާނެހެން ހީވާ ވަރަށް ތެޅެމުން ދިޔައެވެ.

“މަށަށް ފަސްދީފަ ގޮއްސަ، މަ ލަދުގަންނަވާލާފަ ކަލެއަށް ސަލާމަތް ވެވޭނެ ކަމަށްތަ ކަލޭ ހީކުރީ؟ އެނ؟” ރާފިލް ހަރުއަޑުން ވާހަކަ ދައްކަމުން ގޮސް ހިލްޔާގެ މޭމަތީގައި އަޅައި ކޮއްޕާލިއެވެ. ރޮވިފައި ހުރި ހިލްޔާ އެފަދަ ކަމަކަށް ތައްޔާރުވެގެން ނެތުމުން ފަހަތަށް ވެއްޓެން ދިޔައެވެ. އެހެނަސް ދާދި ކައިރީގައި ފާރު ހުރުމުން ނުވެއްޓި ނުހަނު ބާރަށް ގޮސް ޖެހުނީ ފާރުގައެވެ. ބުރަކަށްޓާއި ކޮނޑަށްވީ ތަދާއިއެކީ ރުއިމުގެ ތެރެއިން ވެސް ހިލްޔާގެ އަނގައިން އާހެއްގެ އަޑު ނިކުތެވެ.

“އަދި ރޯން ތަންކޮޅެއް އަވަސް. މަ ކަލެއަށް ނުކުރާނެ ކަމެއް މިއަދު ނުހުންނާނެ!” ރާފިލް އަލިފާން ކަނި ބުރާހެން ހީވާ ލޮލާއިއެކީ ހިލްޔާ އަޅައިގެން ހުރި ހުދުކުލައިގެ ޝޯލްގައި ބާރަށް ހިފެހެއްޓިއެވެ. ޝޯލްގައި ހިފައި ދަމައިގަތް ގަތީނުން ރާފިލް ހިލްޔާގެ ޝޯލް އެއްކޮށް ނެގިއެވެ. އެހިނދު ޝޯލްގެ ހުރި ބައެއް ޕިންތައް ކާރާއި މޫނުގެ އެކި ދިމަދިމާލަށް ހެރުމުން ހިލްޔާއަށް ވީ ތަދަށްވުރެ، ރާފިލްއަށް އޭނަގެ އިސްތަށިގަނޑާއި ކަނދުރާ ކަޝްފުވުމުން ހިތަށްވީ ތަދު ބޮޑުވިއެވެ. ބުރުގާ އެޅިފަހުން ފުރަތަމަ ފަހަރަށް ހިލޭ ފިރިހެނެއްގެ ކުރިމަތީގައި އެގޮތަށް ހުރެވުމުން ލަދުވެސް ގަތެވެ. އަދި އަމުދުން ކުރިމަތީގައި މިހިރީ އޭނަގެ ފިރިމީހާގެ ބަދަލުގައި އޭނައަށް އަނިޔާވެރިވާން އުޅޭ މީހެއްކަން އެނގުމުން ގަތް ބިރާއި އެއްވަރަށް ދެރަވެސް ވިއެވެ.

ގޮށަކުން ހައްޔަރު ކުރެވިފައިވާ ހިލްޔާގެ އިސްތަށިގަނޑު ހޭވިފައިވީއިރު، ރާފިލް ދެންމެ ދަމާލި ޝޯލްގެ އެއްބައި ކޮނޑުން އޭރުވެސް އެލުވިފައިވިއެވެ. އޭނައަށް އެވަގުތު ހުރެވުނީ ހުތުރުކޮށްކަން އިޙްސާސް ކުރެވިފައި ވަނިކޮށް ރާފިލް ވާހަކަ ދެއްކިއެވެ.

“މާ ރީތީއެއް ވެސް ނޫނޭ މާ ބޮޑަށް ފޮރުވިގެން އުޅެނީ. މަށަށް ޔަޤީން މި ހެދުމުގެ ދަށުގަ ވެސް ނުހުންނާނެކަން މަ ބަލަން ބޭނުންވާ އެއްޗެއް.” ރާފިލް އެހެން ބުނެ، ހިލްޔާއަށް އެއްޗެކޭ ބުނެލާނެ ފުރުސަތެއް ވެސް ނުދީ ހިލްޔާގެ ފުރަގަހަށް އަތް ދިއްކޮށް އެ ހެދުމުގެ ޒިބު ތިރިއަށް ދަމާލިއެވެ. އިސާހިތަކު ހިލްޔާ ހީވެސް ނުކުރާހާ ފަސޭހައިން އެ ހެދުން ތިރިއަށް ފައިބައިގެން ދިޔައެވެ. އެއާއިއެކު ހިލްޔާއަށް ރާފިލްގެ ކުރިމަތީގައި ހުރެވުނީ އެތެރެއިން ލައިގެން ހުރި އަތް ކުރު، ކަކުލާއި ހަމައަށް އޮތް ހުދުކުލައިގެ ހެދުމެއްގައެވެ.

ހިލްޔާ ޤަބޫލުކުރަން ވެސް ދަތިވެފައި ހުރެ ދެއަތް މެއާއި ދިމާލުން ހުރަސް ކުރިއެވެ. އެވަގުތު ވެސް ހުއްޓުމެއްނެތި ރޮވެމުން ދިޔައިރު މޭގައިވި ރިހުން ތޫނުވަމުން ދިޔައެވެ.

“ތި ރުއިން ހުއްޓާލާ. ހުއްޓާލާށޭ ބުނީމަ ހުއްޓާލާނީ!” ރާފިލް އެހެން ބުނެ ހިލްޔާގެ ކޯތާފަތް މައްޗަށް ހޫނު އެތި ފަހަރެއް ވީއްލިއެވެ. އެއަށްފަހު ހިލްޔާއަށް ވިސްނާނެ ފުރުސަތެއް ނުދީ ހިލްޔާގެ އިސްތަށިގަނޑުގައި ބާރަށް ހިފެހެއްޓިއެވެ. އެހިނދު ވީ ތަދާއިއެކީ ހިލްޔާއަށް އިތުރަށް ރޮވުން ނޫންކަމެއް ނުވިއެވެ.

ރާފިލް ދެންވެސް އަވަގުރާނަ ގޮވަމުން ހިލްޔާގެ އިސްތަށިގަނޑުން ދޫނުކޮށް ހިލްޔާ ކޮއްޕަމުން ދަމަމުން ގޮސް ފާޚާނާއަށް ވަނެވެ. އަދި ހިލްޔާ ލައްވާ ގަދަކަމުން ބާތް ޓަބްގެ ކައިރީގައި ކަކޫ ޖެއްސުވިއެވެ. ރާފިލް އިސާހިތަކު ބާތް ޓަބް ފެނުން ފުރުވަން ފެށިއެވެ. އެ ހުރިހާ ވަގުތު ހިލްޔާއާއި ދިމާލަށް ރާފިލް ހަރު އަޑުން އެއްޗެހި ކިޔަމުން ދިޔައެއްކަމަކު ހިލްޔާއަށް އޭގެއިން އެއްވެސް ވާހަކައެއް ސާފެއް ނުވިއެވެ. އެއަށްވުރެ ގަދައަށް ރޮވެމުން ދިޔައެވެ. ވަށައިގެންވި މަންޒަރުތައް ނުފެންނަހާ ވަރަށް ލޯ ދުޅަވެ، ލޮލަށް ތަދުވަމުން ދިޔައެވެ.

ހިލްޔާގެ ރުއިން ހުއްޓޭ ގޮތްވީ ރާފިލް ކުއްލި ގޮތަކަށް ހިލްޔާގެ ބޯ ބާތް ޓަބްގެ ފެންގަނޑަށް ކޮއްޕާލުމުންނެވެ. އެއާއިއެކު އިސާހިތަކު ހިލްޔާގެ ނޭވާ ކުރުވާން ފެށިއެވެ. އެންމެ ކުރިން އޭނަ މަރުވާނީ އެ ކުރުވެފައިވާ ނޭވާގެ ސަބަބުންކަމެއް ނޫނީ މެއަށް ވަމުން ދިޔަ ތަދެއްގެ ސަބަބުން ކަމެއް ހިލްޔާއަށް ޔަޤީނެއް ނުކުރެވުނެވެ. މި ޙާލުގައި ވަނިކޮށް ރާފިލް ފަޓުލޫނުގެ ޖީބުން ތޫނު ވަޅިއެއް ނެގިއެވެ. އަދި އެ ވަޅި ނަގައި ހިލްޔާގެ ބުރަކަށްޓާއި ދިމާލަށް އަމާޒުކޮށް ޖަހަން އުޅުނެވެ.

ލަވައިގަނެވުނު އަޑު ހަރު ހަޅޭކަކާއިއެކު ހިލްޔާއަށް ކުއްލި ގޮތަކަށް އެނދުން ތެދުވެވުނެވެ. އެހިނދު ހިލްޔާގެ ނޭވާ ކުރުވެ، ހިތް ބާރަށް ތެޅެމުން ދިޔައެވެ. އޭސީގެ ފިނިކަމުގެ ތެރެއިން ވެސް ގަދައަށް ދާހިއްލަމުން ދިޔައެވެ.

އެއްކޮށް އަނދިރިކޮށްފައިވާ އެ ކޮޓަރީގެ އެނދުމަތީގައި ހިލްޔާ އެހެން އިންދާ ކޮޓަރީގެ ދޮރުގައި މަޑު ޓަކިއެއް ދިން އަޑަށް ވެސް ހިލްޔާ އެނދުން ހިއްލޭ ވަރަށް ސިއްސައިގެން ދިޔައެވެ.

“ހިލްޔާ ދަރިފުޅު ކިހިނެއްވީ؟”

ބޭރުން އިވުނު ބައްޕަގެ އަޑާއިއެކު ހިލްޔާގެ ހިތަށް ތަސައްލީއެއް ލިބުނެވެ. އެހެނަސް ދެންވެސް ދެންމެ ފެނުނީ ހުވަފެނެއްތޯ ނޫނީ ޙަޤީޤަތެއްތޯ ޔަޤީން ކުރަން ދަތިވެފައިވިއެވެ. އެއީ އެހާވެސް ސާފުކޮށް ފެނުނު ހުވަފެނެކެވެ.

“ދަރިފުޅު ބުނެބަލަ. ކިހިނެއްވީ ހަޅޭއްލެވީ؟” ބައްޕަ އަނެއްކާވެސް ސުވާލުކުރިއެވެ. އެއާއިއެކު ހިލްޔާއަށް ވާހަކަ ދެކެވުނެވެ.

“ކް…ކަމެއް ނުވޭ ބައްޕާ.” ހިލްޔާގެ އަޑު ނިކުތީ ތުރުތުރަކާއި އެކީގައެވެ. އެނދުގައި އިނދެ އެ ބުނި ބަސްތައް ބައްޕައާއި ހަމައަށް ފޯރާނެކަމަށް އުއްމީދު ކުރެވުނެވެ. ހިލްޔާގެ ނަސީބު ރަނގަޅުކަމުން އެކަން އެގޮތަށްވިއެވެ.

“ކަމަކަށް ބޭނުންވަންޏާ ބައްޕައަށް ގޮވާލައްޗޭ ދަރިފުޅު.” ބައްޕަ އެކޮޅުން ބުނި އަޑު އިވުނެވެ.

އޭގެ ޖަވާބަކަށް ހިލްޔާއަށް މަޑު އަޑަކުން ހޫންލައްވާލެވުނެވެ. ބައްޕައަށް އެ އަޑު ނުއިވޭނެކަން ޔަޤީން ކުރެވުނެވެ. އެހެނަސް ދެން ބައްޕަގެ އަޑެއް ހިލްޔާއަށް ނުއިވުނެވެ. ބައްޕައަށް އޭނަ ބޭނުންވީ ގޮތް އެނގުންވީ ކަން ފަހުމްވިއެވެ.

އެހިނދު ހިލްޔާއަށް ފުން ނޭވައެއް ދޫކޮށްލެވުނެވެ. ފާއިތުވި ގަޑިއިރުތަކުގެ ތެރޭގައި ހިނގި ކަންތައް ހަނދާންކޮށްލެވުނެވެ. ރާފިލްއާއި ކައިވެންޏެއް ކުރަން އޭނަ ނަޞާރާއިންގެ ފައްޅިއަކަށް ދިޔަ ގޮތެވެ. އޭނަ ހަނދާންވެގެން ދިޔަ އާޔަތްތަކުގެ ސަބަބުން އޭނައަށް ރާފިލްއަށް ފަސްދެވުނު ގޮތެވެ. ފައްޅިން ނިކުމެގެން ދިޔަ ގޮތަށް ގޮސް އޭނަ ކާރަށް އަރައި ދުއްވާލި ގޮތެވެ. ކާރުން ގޮސް ފަރުބަދައެއްގެ ކޮޅާއި ހަމައަށް ގޮސް މަޑުކޮށްލެވުނު ގޮތެވެ. އެއަށްފަހު ރޮވުނު ގޮތެވެ.

ހިލްޔާ ކާރު ތެރޭގައި ރޯން އިންދާ ކާރުގެ ކުޑަދޮރުގައި އައިސް ޓަކި ދިނީ ބައްޕައެވެ. ބޭރު ބަލާލިއިރު ވާރޭ ތެރެއިން އޭނަ ބަލާ އައި ބައްޕަ ފެނިފައި ހިލްޔާ ކަރުނަތައް ފޮހެލަމުން ކާރުން ފޭބިއެވެ. ބައްޕަ އޭނަ ގޮވައިގެން ގޮސް އެރީ ޓެކްސީއަކަށެވެ. ރާފިލް އޭނައަށް ގަނެދިން އެއްވެސް އެއްޗެއް އިތުރަށް ބޭނުން ކުރަން އޭނަ ބޭނުންނުވި ފަދައިން ބައްޕަ ވެސް ބޭނުމެއް ނުވީއެވެ. ޓެކްސީ ތެރެއިން ބައްޕަ އޭނަގެ ނިންމުމާއިމެދު އުފާކުރާ ވާހަކަ ބުންޏެވެ. އެކަމާއިމެދު ހިލްޔާ ހިސާބަކަށް ހިތްހަމަޖެހުނެއްކަމަކު ދެންވެސް އެ ހިތުގައި ޝައްކެއްވިއެވެ. ރާފިލް ދޫކުރުމަށް ނިންމި ނިންމުމަކީ އެންމެ ރަނގަޅު ނިންމުންތޯ ޔަޤީނެއް ނުވިއެވެ. އަދިވެސް އެ ހިތުގައި ދުނިޔެއަށްޓަކައި އޮތް ލޯބީގެ ބާކީ ބައެއްވުމުންނެވެ.

އެ ޝައްކުތައް އިތުރުވެގެން ދިޔައީ ބައްޕަ އޭނައާއި އެކީ އުޅެން ހިފި ‘ކުޑަ’ އެޕާޓްމެންޓް ގެ ސަބަބުންނެވެ. އެއީ ވެސް 3 ތަރީގެ އެޕާޓްމެންޓަކަށް ވެފައި ފުދޭވަރަކަށް ތަނަވަސް އެޕާޓްމެންޓަކަށް ވިޔަސް ހިލްޔާއަށް އެތަން ކުޑަ ތަނެއްގެ ގޮތުގައި ސިފަ ކުރެވުނެވެ. ރާފިލް އޭނައަށް ހޯދައިދިން ފަދަ ދިރިއުޅުމެއް އެހެން މީހަކަށް ހޯދައި ނުދެވޭނެކަމަށް ސިކުނޑި ތަކުރާރުކޮށް ބުނަމުން ދިޔައެވެ. އަދި އެ ނޫން ދިރިއުޅުމަކީ ނިކަމެތި ދިރިއުޅުމެއްގެ ގޮތުގައި ސިފަ ކުރެވުނެވެ.

ކޮންމެ ގޮތެއްވިޔަސް ހިލްޔާ ގެއަށް އައިސް މަޣްރިބް ނަމާދާއި ޢިޝާ ނަމާދު ކުރި ވަގުތު ކޮންމެވެސް ވަރަކަށް ހިތަށް ހަމަޖެހުމެއް ލިބުނެވެ. އެހެނަސް އެ ހަމަޖެހުމުން ހިލްޔާގެ ޖިސްމާނީ ޞިއްޙަތަށް އަދި މާ ބޮޑު އަސަރެއް ނުކުރިއެވެ. އަރުތެރެ ބެދިފައިވުމުގެ ސަބަބުން ގަދަކަމުން ކާން އުޅުމުން ވެސް ރަނގަޅަށް ކެވޭ ގޮތެއް ނުވިއެވެ. ބައްޕަ އެކަމާއިމެދު ދެރަވިކަން އެނގުމުން ހިލްޔާ ވެސް ދެރަވާ ގޮތްވިއެވެ. އެހެނަސް އޭނަގެ ޙާލަތު ރަނގަޅު ކުރަން ޚުދު އޭނައަށް ވެސް ކުރަންވީ ކަމެއް ނުވިސްނުނެވެ.

ހިލްޔާ އެރޭ ނިދަން އޮށޯތީ ހިތް މުޅިން ހުސްވެފައިވާ ކަހަލަ އިޙްސާސަކާއި އެކީގައެވެ. އޭނަ ދެން އުޅެންވީ ކޮން ކަމަކަށްޓަކައި ކަމެއް ނުވިސްނުނެވެ. މި ހުރިހާ ދުވަހު އުޅެމުން ދިޔައީ އޭނަގެ ރީތި ލޯބިގެ ވާހަކައަށްޓަކައެވެ. ރާފިލްއަށްޓަކައެވެ. އޭނަގެ އުފާވެރި ދިރިއުޅުން އެންމެންނަށް ދެއްކުމަށްޓަކައެވެ. އެހެނަސް މިއަދު އެ ހުރިހާ ކަމެއް ވަނީ ގެއްލިފައެވެ.

އެ ހުސްކަމާއިއެކީ ހިލްޔާގެ ހިތުގައި ބިރުވެރިކަމެއް ވެސްވިއެވެ. ރާފިލްއަށް ފަސްދިނުމުގެ ބިރުވެރިކަމެވެ. ރާފިލް ބައްޕައަށާއި އޭނައަށް ކޮށްފާނެ ކަމެއްގެ ބިރުވެރިކަމެވެ. އެ ނުތަނަވަސްކަމުގައި އޮވެ ހިލްޔާއަށް ނިދުމުގެ ކުރިން ކިޔާ ޒިކުރުތައް ވެސް ކިޔާލެވުނީ ވަކި ވަރަކަށެވެ. ފިކުރުތަކުގައި އޮތްވާ ނިދުމުން ފެނުނީ އެ ހުރިހާ ބިރުވެރި ޚިޔާލެއް ޙަޤީޤަތަކަށް ވެދާނެ ގޮތެވެ.

އަމިއްލަ ޚިޔާލުތަކުގައި ހުރެ ހިލްޔާ ފުން ނޭވައެއް ދޫކޮށްލިއެވެ. ދާހިއްލާފައިވުމުން އެވަގުތު ފެންވަރާލަން ބޭނުންވިއެވެ. ފާރުގައި ހުރި ގަޑިން 3 ޖަހާފައިވި މަންޒަރު ފެނިފައި ތެދުވެގެން ދަމު ނަމާދު ކޮށްލާނީއޭ ހިތަށްއެރިއެވެ. އެހެނަސް އެވަގުތު ހަށިގަނޑަށް ވެރިވެފައިވި ވަރުބަލިކަމެއްގެ ސަބަބުން ދެން ނުތެދުވެވޭނެއޭ ހިތް ބުންޏެވެ. އަނެއްކާވެސް އެނދުގައި އޮށޯވެވުނީ އެހެންވެއެވެ.

**

ހިލްޔާގެ ކޮޓަރީގެ ދޮރު ކައިރީގައި ހުރެފައި ނަހީދު ގޮސް އެޕާޓްމެންޓުގައި ހުރި ސިޓިންގް ރޫމުގެ ސޯފާގައި އިށީނެވެ. އެއަށްފަހު ފުން ނޭވައެއް ދޫކޮށްލެވުނެވެ. ހިލްޔާ ރާފިލްއާއި ކައިވެނި ނުކުރުމަށް ނިންމުމުން ހިތަށް ހަމަޖެހުމެއް ލިބުނެއްކަމަކު އަދި އޭގެ ފުރިހަމަ އުފަލެއް ނުލިބެއެވެ. އޭނަ ހިލްޔާ ގޮވައިގެން މި އެޕާޓްމެންޓަށް އައި ވަގުތު ވެސް ހިލްޔާ ނެގި މަޑުވެފައި އިން ގޮތުންނެވެ. ނަހީދު ހީކުރީ ހިލްޔާ ނުހަނު ޔަޤީންކަމާއި އެކީ ރާފިލްގެ ގޯސްކަމުގެ ވާހަކަ ދައްކާނެ ކަމަށެވެ. އެހެނަސް ރާފިލްއަކީ ހިލްޔާ ވެސް އެއްދުވަސްވަރެއްގައި ކައިވެނި ކުރަން ނުހަނު ބޭނުންވި ޒުވާނެއްކަން އެ ދަތުރު މަތިން އެނގުންވިއެވެ. ރާފިލްއާއި ދުރުވުމަކީ ރަނގަޅު ގޮތްކަން އެނގުނަސް ހިލްޔާ ދެރަވާނެތާއެވެ.

ނަހީދު ހިފި މި އެޕާޓްމެންޓަށް އައި މަގުމަތީގަ އާއި އެޕާޓްމެންޓަށް އައި ފަހުން ވެސް ތަކުރާރުކޮށް ގުޅަމުން ދިޔަ ހަމްރާއާއި އެލީއަށް ހިލްޔާގެ ހާޒިރީގައި ނަހީދު ނުގުޅީ އެހެންވެއެވެ. ހިލްޔާ ފެންވަރައި ތާޒާވެލަން ކޮޓަރިއަށް ވަނުމުން ނަހީދު ހަމްރާއަށް ގުޅައި ކުރު ގޮތަކަށް ވީ ގޮތް ކިޔައިދިނެވެ. އަދި ހިލްޔާގެ ޙާލު ރަނގަޅު ނުވަނީސް ހިލްޔާ ގާތު މި ވާހަކަ ނުދެއްކުމަށް އެދުނެވެ. ހަމްރާ އެ ވާހަކައާއި އެއްބަސްވިއެވެ.

ހަމްރާއާއި އެލީއާއި ހާފިޒާ ދެންވެސް ހިލްޔާގެ ޙާލާއި މެދު ސުވާލު ކުރަމުން ދިޔައީތީ، ހިލްޔާ ނިދަން ވަދެލުމުން ނަހީދު އެމީހުންނަށް ގުޅައި ޚަބަރު ދިނެވެ. ހިލްޔާ ގެއަށް އައި ފަހުން އެއްވެސް ވާހަކައެއް ނުދައްކާ ކަމަށާއި، ރޭގަނޑު ރަނގަޅަށް ނުވެސް ކެވޭ ވާހަކަ ބުންޏެވެ. އެކަމާއިމެދު އެންމެން ކަންބޮޑުވުން ފާޅު ކުރިއެއްކަމަކު ދެންވެސް ހިލްޔާ ރާފިލްއާއި ވަކިވެފައިވާތީ އެންމެން ހިތްހަމަޖެހުން ފާޅުކުރިއެވެ. ދެން ހިލްޔާގެ ޙާލަތު ރަނގަޅުވާނެ ކަމަށް އެންމެން ވެސް ޤަބޫލު ކުރިއެވެ.

ޚުދު ނަހީދަށް ވެސް ހީވެފައިވީ އެހެންނެވެ. އެހެނަސް ދާދި ދެންމެއަކު އޭނަ ސިޓިންގް ރޫމުގެ ސޯފާގައި ނިދިފައި އޮތްވާ އިވުނު ހިލްޔާގެ ހަޅޭކުގެ އަޑުން ހިތުގައި ޝައްކު އުފެދެން ފެށިއެވެ. މި ޙާލަތުން އަރައިގަތުމަށް އޭނަ ހީކުރާ ވަރަށްވުރެ ބޮޑު އެހީއެއް ހިލްޔާއަށް ބޭނުންވާނެ ކަމަށް ހިތް ބުންޏެވެ.

ނަހީދު އެހެން އިންދާ ފޯނަށް ވައިބާރ ނޮޓިފިކޭޝަނެއް އައެވެ. ނަހީދު ފޯނަށް ބަލާލިއިރު އެއީ ދާނިޝްގެ ފަރާތުން އައި މެސެޖެކެވެ. ނަހީދު އެ މެސެޖު ހުޅުވައި ބަލާލިއެވެ.

“ނަހީދުބެ….ހިލްޔާ ކިހިނެއްތަ؟”

ދެ މިސް ކޯލަށްފަހު ފޮނުވިފައިވި މެސެޖަކީ އެއީއެވެ. ހިލްޔާގެ ޚަބަރު ދާނިޝްއަށް އެ ލިބުނީކަން އެނގުންވިއެވެ. ނަހީދު ދެވަނަ ވިސްނުމެއް ވެސް ނެތި ދާނިޝްއަށް ގުޅާލިއެވެ.

**

ދާނިޝް ހިލްޔާއާއި މެދު ފިކުރު ކުރަން އިނދެފައި އެންމެ ފަހުން ނަހީދުބެއަށް މެސެޖެއް ކޮށްލީ ހަމަ ނުހުރެވިގެންނެވެ. މެސެޖު ކޮށްލިތާ މާ ގިނައިރެއް ނުވެ ނަހީދުބެ ގުޅަން ފެށުމުން އާދައިގެ މަތިން ހިތުގައި ނުތަނަވަސްކަމެއް އުފެދުނެވެ. ފޯނަށް ބަލަން އޭނަގެ ހިތުގައި ހިލްޔާއަށްޓަކައި އިޙްސާސްތަކެއް ވާކަން ނަހީދުބެއަށް ޝައްކުވެދާނެތީވެއެވެ. އެހެނަސް މިއަދު އެ ނުތަނަވަސްކަމަށްވުރެ ހިލްޔާގެ ޙާލު ބަލާލަން ބޭނުންވި ވަރު ބޮޑުވިއެވެ. އެހެންކަމުން ކޯލު ރިސީވްކޮށް ފޯނު ކަންފަތުގައި ޖައްސާލިއެވެ.

“ސަލާމް ނަހީދުބެ….ހިލްޔާ…ކިހިނެއްތަ؟” ދާނިޝްއަށް ދުރުދުރުން ވެސް ވާހަކަ ދެއްކުމެއްނެތި ސީދާ މަޢުޟޫއަށް ދެވުނީ ހިތް އެކަމަށް އެދުނު ވަރުންނެވެ. ނޭނގޭ ސަބަބަކާހުރެ އިތުރަށް ޖެހިލުންވާކަށް ވެސް ދާނިޝް ބޭނުމެއް ނުވިއެވެ.

“ހިލްޔާ…ބަލިކޮށް އުޅެނީ.” ނަހީދު ކުރު ގޮތަކަށް ބުންޏެވެ. އެއާއިއެކު ދާނިޝްއަށް ވާހަކަ ދެކެވުނެވެ.

“ވީޑިއޯ ފެނިފަ ވެސް ހީވިއޭ. ބަލިކޮށް އުޅޭތީތަ ކައިވެނި ކެންސަލްކޮށްލީ؟” ދާނިޝްއަށް އަހާލެވުނެވެ. އެވަގުތު އޭނަގެ ހުރިހާ ނުތަނަވަސްކަމެއްގެ މަތިން ހަނދާން ނައްތާލެވުނެވެ. އެވަގުތު އެހެން ހުރިހާ ކަމަކަށްވުރެ މުހިއްމުވީ ހިލްޔާގެ ރައްކާތެރިކަން ޔަޤީން ކުރުމަށް އޭނައަށް ކުރެވެން އޮތްހާ ކަމެއް ކުރުމެވެ.

“ނޫނޭ. ހިލްޔާ ކައިވެންޏަށް ދިޔައިރު ވެސް ހުރީ ރާފިލްއާއިމެދު ހިތްހަމަނުޖެހިފަ. ފަހު ވަގުތު ހިލްޔާގެ ދުލާއި ހަމައަށް އެ ބަސްތައް އައީ.” ނަހީދު ވެސް ވަކި އިތުރު ސުވާލެއް ކުރުމެއް ނެތި ކިޔައިދިނެވެ. ދާނިޝްގެ ހިތުގައި އަދިވެސް ހިލްޔާއަށްޓަކައި އިޙްސާސްތަކެއް ވާކަން އެނގުންވުމުން ހިތަށް އުފަލެއް ލިބުނެވެ.

“އެކަހަލަ މީހަކާމެދު މީހަކަށް ހިތްހަމަޖެހިގެން ހުރެވޭނީ ވެސް ކިހިނެއްތަ؟ އަދި އަމުދުން ފައްޅިއަކަށް ގޮއްސަ ހިލްޔާއަށް ހަމަޖެހިގެން ހުރެވޭނީ ކިހިނެއް؟ ނަހީދުބެ ޕްލީޒް. ހިލްޔާ ވީހާވެސް އަވަހަކަށް ތި މީހަކާ ދުރަށް ގެންދޭ. އޭނަގެ ހިޔަނި ވެސް ނޭޅޭ ހިސާބަށް ގެންދޭ.”

“ގެންދާނަމޭ ގެންދާނަމޭ. މިހާރު ވެސް މިއުޅެނީ ރާފިލް މިކޮޅުގަ އުޅޭ ސަރަޙައްދާއި ދުރު ހިސާބެއްގަ. ހިލްޔާގެ ބަލި ކުޑަކޮށް ރަނގަޅުވީމަ މާލެއަށް ވެސް ގެންދަން ކަމަށް މިއުޅެނީ. ބަލި ރަނގަޅު ނުވިޔަސް އަވަހަށް މާލެ ގެންނަންވީދޯ؟ ދާނިޝް ފުރުމުގެ ކުރިން؟”

“ނޫން ނޫން. ތިކޮޅުގަ ހުންނާނެ ދޯ މިކޮޅަށްވުރެ ރަނގަޅު ބޭސް ވެސް؟ ހިލްޔާއަށް ރަނގަޅު ފަރުވާއެއް ހޯދައިދީގެން މިކޮޅަށް ގެނެސްދީ ބޭބޭ. އަޅުގަނޑު….އިންތިޒާރު ކުރާނަން.”

ދާނިޝް އެ ބުނެލި ބަސްތަކުން ހިލްޔާއަށްޓަކައި އުއްމީދުގެ ހުޅުކޮޅެއް ނަހީދުގެ ހިތުގައި ރޯވިއެވެ. ދާނިޝްއަކީ އަމިއްލަ އެދުމުގެ ކަންފުޅެއް ވެސް ނެތި ހިލްޔާ ދެކެ ލޯބިވާ ކުއްޖެއްކަން އެވަގުތު އެނގުންވުމުންނެވެ. ހިލްޔާއަށް މި ލޯބި ފަހުމްވެ، މި ލޯބި ތަޖުރިބާ ކުރެވުން ނަހީދުގެ އުއްމީދަކަށްވިއެވެ.

ނުނިމޭ