ނަފްސީ (ތޭވީސްވަނަ ބައި)

ނަފްސީ (ތޭވީސްވަނަ ބައި)

ހިލްޔާ އަވަސް ހިނގުމެއްގައި ގޮސް ކްލިނިކަށްވަދެ އަތް ދަބަހުން ނެގި ކާޑުން ސައިން އިން ކުރި ވަގުތު 7:57 ވީއެވެ. ސައިން އިން ކުރުމަށްފަހު ހިލްޔާ މައިދޮރާއިވީ ފަރާތަށް އެނބުރިލީ ވަގުތު އެ ދޮރުން ވަދެގެން އައި ދާނިޝް ހިލްޔާއަށް ފެނުނެވެ. ދާނިޝް ވެސް އައީ ޑިއުޓީއަށް ކަމަށްވުމުން ދާނިޝް އެނބުރިލީ ސީދާ ހިލްޔާއާއި ދިމާލަށެވެ. ދެމީހުންގެ ހަތަރުކަޅި ހަމަވުމާއިއެކު ހިލްޔާގެ މެއަށް ގޮތެއްވިއެވެ. ރާފިލްއާއި އެތައް އިރެއް ވަންދެން ވާހަކަ ދެއްކިއިރު ވެސް ނުކުރެވުނު އެތައް އިޙްސާސެއް ދާނިޝްގެ އެ އެންމެ ފެނިލުމުން ވެސް ކުރެވިގެން ދިޔައެވެ.

ހިލްޔާ ފެނިފައި ދާނިޝްއަށް ވެސް ކުރެވިގެން ދިޔައީ އެފަދަ އަސަރެކެވެ. މުޅި ދުވަހު ގޭތެރެ ސާފުކޮށް، ހެދުންތައް ދޮވެ، ހުރިހާ ހެދުމެއް އިސްތިރި ކުރީ އެންމެ ހިނދުކޮޅަކަށް ވެސް ހިލްޔާއާއި މެދު ނުވިސްނުމަށެވެ. ގިނައިރު ވަންދެން ނުވިސްނައިފިނަމަ ހިތުގައި ވަޅުލަން މަސައްކަތް ކުރަމުންދާ އިޙްސާސްތައް ހަނދާން ނެތިދާނެ ކަމަށް ހީކުރެވުނެވެ. މިވަގުތާއި ޖެހެންދެން މުޅިން ހަނދާން ނެތުނީ ކަމަށް ވެސް ހީކުރެވިފައިވިއެވެ. އެހެނަސް ހިލްޔާ ފެނުމާއިއެކު ހިތުގައި ވަށައިގެން ރާވަން ފަށާފައިވާ ހުރިހާ ފާރެއް ބިމަށް ތިރިވިއެވެ.

ދާނިޝް ހަމަހޭވެރިކަމެއް ވީ ހިމޭންކަމުގެ ސުކޫތަކަށްފަހު ހިލްޔާ އިސްޖަހާލަމުން އޭނައަށް ފަސްދީފައި ކްލިނިކަށް ވަދެގެން ދާން ފެށުމުންނެވެ. އެކަމާއިމެދު ހިތުގައި ޝަކުވާ އުފެދުނެއްކަމަކު އެ ޝަކުވާ އަޑު ނާހަން މަސައްކަތް ކުރަމުން ދާނިޝް ސައިން އިން ކުރިއެވެ. ހުރިހާ އުއްމީދެއް ނައްތާލާފައި ވަނިކޮށް ފަހަތުން ހިލްޔާގެ އަޑު އިވުނެވެ.

“ދާނިޝް!”

ދުރު ހިސާބަކުން އިވުނު ހިލްޔާގެ އަޑަށް، ދާނިޝްގެ މޭ ތެރޭގައި ގެނބެން ފެށި ހިތަށް ދިރުމެއް އައެވެ. ބާރަށް ތެޅެން ފެށި އެ ހިތާއިއެކީ ދާނިޝް ފަސްއެނބުރި ހިލްޔާއަށް ބެލިއެވެ. އެހިނދު ހިލްޔާ ހުރީ އޭނައަށް ބަލަހައްޓައިގެންނެވެ.

“ޔެސް؟” ދާނިޝްއަށް ބުނެވުނެވެ.

“އިންޓަރނެޓް ސްލޯ އަހަރެންގެ ރޫމްގަ. އާސަންދަ ޕޯރޓަލް ލޯޑްވާން ގިނައިރު ނަގާތީ ޕޭޝަންޓްސް ރޯލް ވަނީ ތަންކޮޅެއް ލަހުން…” ހިލްޔާ ޝަކުވާ ހުށަހެޅިއެވެ. ހިލްޔާއަށް ކުރިން ވެސް އެކަން ފާހަގަވެފައިވެއެވެ. އެހެނަސް މިރޭ ދާނިޝްއާއި އެ ވާހަކަ ޙިއްސާ ކޮށްލެވުނީ އެދުވަހު ހަވީރު އިންޓަނެޓް މާ ބޮޑަށް ލަސްވުމުންނެވެ.

“އެހެންދޯ؟ އަހަރެން ހިތަށް އެރިއޭ އެ ރޫމަށް އެހެންވާނެއޭ. ރައުޓާރ އާ ތަންކޮޅެއް ދުރުގަ އެ ރޫމް ހުންނާތީ އަހަރެން އުޅުނިން ބޫސްޓާރ އެއް އިންސްޓޯލް ކުރަން. އެކަމަކު ހިލްޔާ ވަކި އެއްޗެކޭ ނުބުނާތީ ހީކުރީ އޯކޭ ކަމަށް.” ދާނިޝް ވާހަކަ ދެއްކިއެވެ. ހަމަ އެއާއިއެކު ހިލްޔާއަށް ކުރިމަތިވި ދަތިކަން ފިލުވާނެ ގޮތަކާއިމެދު ސިކުނޑި ވަގުތުން ރޭވުމެއް ރާވަން ފެށިއެވެ.

“ނޫނޭ. މިއަދު އަދި ވަރަށް ސްލޯ.” ހިލްޔާ ބުންޏެވެ.

“އޮހް…ނޯ ވޮރީސް. މިރޭ ބޫސްޓާރއެއް އިންސްޓޯލް ކޮށްދޭނަން.”

“ނޫން މިރޭ ނޫނަސް އޯކޭ. އައި ކޭން މެނޭޖް. ދެން އެހާ އެހާ ސްލޯއެއްވެސް ނޫން. ރަޝްކޮށްގެން ފިކްސް ކުރާ ވަރަށް…”

“ކޮމްޕްލެއިންޓެއް އައިމަ އެކަން ޙައްލު ކުރުމަކީ އަހަރެންގެ ޖޮބް ދޯ؟ މިރޭ ރަނގަޅުވާނެ ތިކަން އިރާދަކުރެއްވިއްޔާ.”

“ބަޓް-“

ހިލްޔާއަށް އިތުރު އެއްޗެކޭ ބުނެވުމުގެ ކުރިން ދާނިޝް، ނާއިފް ގެ ނަމުން ގޮވަމުން ރިސެޕްޝަނާއި ދިމާލަށް ދިޔައެވެ. ހިލްޔާ ބުނަން އުޅުނީ ދާނިޝް އެހާ ބުރަކޮށް އުޅޭއިރު ވަގުތުން ވަގުތަށް މިކަހަލަ ކަމެއް ޙައްލު ނުކުރިޔަސް ރަނގަޅުވާނެ ކަމަށެވެ. މި ދިޔަ ހަފްތާގައި ދާނިޝް މުޅިންހެން އުޅުނީ ކްލިނިކްގައި ކަން ހިލްޔާއަށް އެނގެއެވެ. މިރޭ ވެސް އެ އައީ ރިސެޕްޝަންގައި އިނުމަށެވެ. އެ މަސައްކަތް ކުރަމުން ދާނިޝް އޭނަ އެދުނު އެދުން ފުރިހަމަ ކުރުން ވާނީ ކިހާ ބުރަ ކަމަކަށް ހެއްޔެވެ؟

އެހެނަސް ނޭނގޭ ސަބަބަކާއި ހުރެ ދާނިޝްއަށް އެއީ ބުރަކަމެއް ހެން ހިއެއް ނުވިއެވެ. ހިލްޔާ ބަލަބަލާ ހުއްޓާ ދާނިޝް ނާއިފް ގާތަށް ގޮސް ވައިފައި ބޫސްޓާރއެއް ގަނެގެން އައުމަށް އެދުނެވެ. އަދި ރަނގަޅު ބޫސްޓާރއެއް އަގު ހެޔޮކޮށް ލިބޭނެ ފިހާރައެއް ވެސް ބުންޏެވެ. ކަމަކަށް އެދުމާއިއެކު ދާނިޝް އެކަމެއް ފުރިހަމަ ކޮށްދޭ ގޮތުން ދާނިޝްއަށްޓަކައި ހިލްޔާގެ ހިތުގައިވި އިޙްތިރާމް މަތިވިއެވެ. ދެންމެ މި ބަދަލުވި ވާހަކަ ކޮޅުން ވެސް ދާނިޝްގެ ޒިންމާދާރު ކަން އިޙްސާސްވުމުންނެވެ.

ހިލްޔާއަށް ނޭނގުނު ކަމަކީ، ދާނިޝްއަށް އެގޮތަށް ޢަމަލު ކުރެވެމުން ދިޔައީ ހަމައެކަނި ޒިންމާދާރުކަމުގެ ސަބަބުން ނޫންކަމެވެ. މިއީ އެހެން ޑޮކްޓަރަކު އެދުނު ކަމަކަށްވި ނަމަ، އޭނަ އިންޓަރނެޓް ސްޕީޑް ހުރި ވަރު ބަލައި، މާ ބޮޑަށް ލަސްކަމަށްވާނަމަ އަމިއްލައަށް އެކަމާއި ނޫޅެ އައިޓީ މީހަކަށް ގުޅާލީހެވެ. އެހެނަސް މިއީ ހިލްޔާ ގެ ކަމަށްވުމުން ޝަކުވާއެއް ކަމަށްވުމުން ވީހާވެސް އަވަހަކަށް އަދި ވީ އެންމެ ފުރިހަމައަށް އެ މައްސަލަ ޙައްލުކޮށްދޭން ބޭނުންވިއެވެ. އަދި ޙައްލު ކޮށްދިނުމުގައި އަމިއްލައަށް ވެސް ޙަރަކާތްތެރިވާން ބޭނުންވިއެވެ. އެއީ ކީއްވެކަން ދާނިޝްއަށް މިހާރު އެނގެއެވެ.

އެހެނަސް ރާފިލް ބުނި ބަސްތައް ހަނދާން ކުރަމުން އެކަމާއިމެދު މާ ބޮޑަށް ނުވިސްނޭތޯ ބެލިއެވެ. ގަދަކަމުން އެކަމާއިމެދު ނުވިސްނުމުން ހިތަށް މާޔޫސްކަން ލިބުނަސް މެއެވެ. ހިލްޔާ އޭނައަށް ނުލިބިދާނެކަމަށް ހިތް ބުނާ ކޮންމެ ފަހަރަކު ގައިގެ ވަރު ދެރަވެއެވެ. ހަމަ އެއާއިއެކު އަމިއްލަ އެކަނިވެރިކަން ވެސް އިޙްސާސް ކުރެވެމުން ދިޔައެވެ. އަދި ޙަޔާތުގެ ބައިވެރިޔަކަށް ބޭނުންވާ މިންވަރު ވެސް ހިތަށް ގެނެވެއެވެ.

**

ރޭގަނޑުގެ އެވަގުތު އޯސިސް ކްލިނިކްގެ ކުރިމައްޗަށް ލަސްލަހުން އައިސް މަޑުކޮށްލީ ނޫކުލައިގެ ކާރެކެވެ. ކާރު މަޑުކޮށްލިތާ މާ ގިނައިރެއްނުވެ ކާރުގެ ކުރީ ސީޓުގެ ދޮރު ހުޅުވިގެން ދިޔައެވެ. އިސާހިތަކު ކާރުން ފޭބީ ޒުވާން އަންހެން ކުއްޖެކެވެ. އެކުއްޖާ ހުރީ ނޫ ކުލައިގެ ބާރު ޖިންސަކާއި، އަތް ކުރު އަދި ގަޔަށް ބާރު ހުދުކުލައިގެ މައްޗެއް ލައިގެންނެވެ. ހިމަތޮޅިކޮށް ހުއްޓަސް ހަށިގަނޑުގެ ބައްޓަމުގައި އަޅައިގަންނަ ގޮތެއް ހުއްޓެވެ. އެ އަލި ހަންގަނޑު ބޮކިތަކުގެ އަލީގެ ތެރެއިން ވިދަމުން ދިޔަ ހެން ވެސް ހީވިއެވެ. ކޮނޑަށްވުރެ މައްޗަށް ވީ ކަޓެއް ޖައްސާފައި އޮތް ފަން އިސްތަށިގަނޑާއި، ހިތިފަތު ބުމައާއި ތުނި ތުންފަތާއި ކުޑަ ނޭފަތް އެ ރީތިކަން އިތުރު ކޮށްދިނެވެ. މަގުން އެވަގުތު ދުއްވަމުން ދިޔަ ހުރިހާ ފިރިހެނުންގެ ނަޒަރު އެ އަންހެން ކުއްޖާއަށް އަމާޒުވަމުން ދިޔައީ ވެސް އެ ރީތިކަމާއިމެދު އާޝޯޚުވެގެން ކަން ޔަޤީނެވެ.

އަންހެން ކުއްޖާ ކާރުން ފޭބުމާއިއެކު މާ ގިނައިރެއް ނުވެ އެ ކާރު ދުއްވާލައިފިއެވެ. ހަމަ އެވަގުތު ކުއްޖާގެ ކަނާތް އަތުގެ މުލައްދަނޑީގައި އެޅުވިފައިވި އަތްދަބަހުން ފޯނު ރިންގުވާން ފެށިއެވެ. އިސާހިތަކު އެ ކުއްޖާ ފޯނު ނަގައި ކަންފަތުގައި ޖެއްސިއެވެ.

“ހެލޯ؟ އާނ…..މިހިރީ އޯސިސް ވެލްނެސް ސެންޓާރ ގަ. ޔަޤީންތަ މިތާ ޑޭން ހުންނާނެކަން؟” އެ ކުއްޖާ ސުވާލު ކުރިއެވެ. އެ ކުއްޖާގެ އަޑު ވެސް ހަމަ އެހާ ރީއްޗެވެ.

“90% ޝުއާރ. 100% ވެދާނެދޯ ޒިވް އަށް ރިސެޕްޝަން ގަ ހުރި މީހަކު ފެނުނީމަ؟ ޒިވްއަށް ވިއްޔާ ޑޭން އެންމެ ރަނގަޅަށް އެނގޭނީ. ޔޫ ނޯ ވަޓް ޔޫ ހޭވް ޓު ޑޫ.” އެ ކޮޅުން ފިރިހެނަކު ބުނި އަޑަށް އަންހެން ކުއްޖާގެ މޫނުމައްޗަށް ވެރިވީ އެއްމިޔަކަނުގެ ހިނިތުންވުމެކެވެ.

“ހުމް….އޯކޭ.” އެ ކުއްޖާ ފަހު ބަހަކަށް ބުންޏެވެ. އެއާއިއެކު ކޯލް ނިމުމަކަށް އައެވެ.

**

ހިލްޔާގެ ޑިއުޓީ ފެށުނުތާ ގަޑިއެއްހާއިރު ފަހުން ހިލްޔާގެ މޭޒުމަތީގައި ހުރި ލޭންޑްލައިން ފޯނު ރިންގުވާން ފެށިއެވެ. އެވަގުތު ހިލްޔާ އެތާހުރި ބަލިމީހާއަށް ބޭސް ސިޓީ ދީފައި ފޮނުވާލަނީއެވެ. އެމީހާ ބޭރަށް ނިކުންނަން ފެށިތަން ބަލަން އިނދެފައި ހިލްޔާ ފޯނު ނެގީ ޙައިރާންކަމެއްގައި އިނދެއެވެ. މިވަގުތު އެ ފޯނުން ގުޅާނީ ކާކުކަން ނުވިސްނުމުންނެވެ.

“ހެލޯ؟” ހިލްޔާއަށް ބުނެވުނީ ސުވާލުގެ ރާގަކަށެވެ.

“އާނ ހެލޯ ހިލްޔާ. މިހާރު އިންޓަނެޓް ސްޕީޑް ރަނގަޅުތޯ އަހާލަން ވެގެން މި ގުޅާލީ. އޮޓޯ އިން ކަނެކްޓް ވެފަ ނެތިއްޔާ ވައިފައި އައިކޮން އަށް ފިތާލާފަ އޯސިސް ޕްލަސް ޕްލަސް އަށް ކަނެކްޓް ކޮށްލަބަލަ. ސޭމް ވައިފައި ޕާސްވޯޑް ހުންނާނީ. އައިޓީ މީހާ ފޮނުވާލުމުގެ ކުރިން އޯކޭވީތޯ ޔަޤީން ކޮށްލަން މި ގުޅާލީ.”

އެކޮޅުން ވާހަކަ ދެއްކީ ދާނިޝްއެވެ. ދާނިޝް އެވާހަކަ ބުނަމުން ދިޔަދިޔަހެން ހިލްޔާ ދިޔައީ ކޮމްޕިއުޓަރުން ދާނިޝް ބުނިގޮތަށް ހަދަމުންނެވެ. ދާނިޝް އެ ބުނި ނެޓްވޯކަށް ކަނެކްޓް ކޮށްލުމަށްފަހު ހިލްޔާ އާސަންދަ ޕޯޓަލް ހުރި ޓެބް ކްލޯޒް ކުރިއެވެ. އެއަށްފަހު އަނެއްކާވެސް އެ ޕޯޓަލް ސާޗްކޮށްލިއެވެ. ސިކުންތެއްގެ ތެރޭގައި ލޯޑްވެގެން ދިޔުމުން ހިލްޔާއަށް ހިނިތުންވެލެވުނެވެ.

“އޯ ވާވް އިޓްސް ފާސްޓް! ތޭންކްސް!” ހިލްޔާއަށް ހަމަ އެ ހިނިތުންވުމުގައި އިނދެ ބުނެވުނެވެ.

“ހެހެ…ޔޫ އާރ ވެލްކަމް.” ދާނިޝް ބުންޏެވެ. އެއާއިއެކު ހިލްޔާގެ ރޫމަށް ބަލިމީހަކު ވަދެގެން އައުމުން ހިލްޔާ ދެންވެސް ނުފިލާ ހިނިތުންވުމެއްގައި އިނދެ ފޯނުގެ އަތްގަނޑު ބޭއްވިއެވެ.

**

އެކޮޅުން ފޯނު ކެނޑިގެން ދިޔައިރު ރިސެޕްޝަންގައި އިން ދާނިޝް ގެ މޫނުމަތީގައި ވެސް ވީ ހިނިތުންވުމެކެވެ. ހިލްޔާއަށް ދަތިވަމުން ދިޔަ ކަމެއް ފަސޭހަ ކޮށްދިނުމުން ހިތަށް އުފަލެއް ލިބުނީއެވެ. ފޯނުގެ އަތްގަނޑު ބާއްވަމުން ކުރިމަތީގައި ހުރި އައިޓީ މީހާގާތު ބޯޖަހާލަމުން އޯކޭ ދިނީ ވެސް ނޭނގުމެއްގެ ތެރެއިން އެ ހިނިތުންވުމުގައި އިނދެއެވެ.

އައިޓީ މީހާ ދިޔުމުން ކޮޅަށް ހުރި ދާނިޝް ގޮނޑީގައި އިށީނދެލިއެވެ. އެރެއަކީ ބަލިމީހުން ފުދޭ ވަރަކަށް މަދު ރެއަކަށްވުމުން ދާނިޝްއަށް މިފަދައިން ހުސް ވަގުތުކޮޅުތައް ލިބެމުން ދިޔައެވެ. ހުސް ވަގުތުތައް ލިބުމުން ވީ ގެއްލުމެވެ. ހިލްޔާއަށްޓަކައި ހިތުގައިވި އިޙްސާސްތަކުގެ ތެރޭގައި ޣަރަޤުވުން ނޫންކަމެއް ނުވިއެވެ. ނުވާނެ ކަމެއްކަން އެނގިހުރެ ވެސް އޭނައާއި ހިލްޔާގެ ގުޅުން ކުރިއަށް ގޮސްފިނަމަ އޭނަ ހިލްޔާއާއިއެކީ ހިއްސާ ކުރާނެ ވަގުތު ކޮޅުތައް ސިފަ ކުރެވެމުން ދިޔައެވެ. އެހެނަސް…..

“އެއީ އަހަރެން އިންނަން އުޅޭ ކުއްޖާ.”

ދޭތެރެއަކުން ކަންފަތުގައި ގުގުމައިގެން ދާ އެ ބަސްތަކުން ދާނިޝްގެ އެ ހުރިހާ ޚިޔާލުތައް ވިއްސިވިހާލިވެ، އެ ހިނިތުންވުން ފިލައިގެން ދެއެވެ. އެވަގުތު ވެސް ވެގެން ދިޔައީ އެކަހަލަ ގޮތެކެވެ. ހިތްދަތިވެގެން ދިޔަ އެވަގުތު އިސްޖަހާލެވުނެވެ. އެވަގުތު ކްލިނިކްގެ މައިދޮރު ހުޅުވިގެން ދިޔަ އަޑަށް ބަލިމީހަކު އައީ ކަމަށް އަމިއްލަ ޒަމީރު ގާތު ބުނެވުނެވެ. އުސް ފައިވާނެއްގެ ޓަކުންޓިކުންގެ އަޑު އިވުމުން އެއީ އަންހެން ކުއްޖެއްކަން އެނގުނެވެ. އެހެނަސް ދެންވެސް އަމިއްލަ ނަފްސު ހަމައަކަށް އަޅުވަން އިސްޖެހިފައި އިނދެވުނެވެ. އެކުއްޖަކު ރިސެޕްޝަން ކައިރިއަށް އައިސް މަޑުކޮށްލިކަން އެނގުންވުމުން ދާނިޝް ފުން ނޭވައެއް އެތެރެއަށް ވާހަކަ ދެއްކިއެވެ.

“ވެލްކަމް ޓު އޯސިސް ވެލްނެސް ސެންޓާރ. ހައު….ކޭން ވީ ހެލްޕް ޔޫ؟” ދާނިޝް އިސްއުފުލާލަމުން ފުރަތަމަ ކޮމްޕިއުޓަރުން ހުޅުވިފައި ހުރި ބޭނުންނުވާ ބައެއް އެއްޗެހި ކްލޯޒް ކުރީއެވެ. ފަހު ބަސްތައް ބުނަމުން އަންހެން ކުއްޖާއަށް ބަލާލުމާއިއެކު ދާނިޝް ގަނޑުވިއެވެ.

ކުރިމަތިން ފެނިގެން ދިޔައީ ދާނިޝްއަށް މާ ރަނގަޅަށް އެނގޭ ސޫރައެކެވެ. އެ ވަށްކޮށް ހުރި ދޮން މޫނެވެ. ދިގު އެސްފިޔަތަކުން ހިޔާ އެޅިފައިވާ އެ ރީތި ދެލޮލެވެ. ފިޔާތޮށި ކުލައަށްދާ އެ އޮމާން ތުންފަތެވެ.

“ޒިވް…” އެ ނަން ދާނިޝްއަށް ކިޔާލެވުނީ ހިތާހިތުންނެވެ. ހިތަށް ވެރިވި އެ ނަމާއި، ފެނުނު ސޫރައިން ޚިޔާލުތައް ދާން ފެށި މިޞްރާބު އެނގުންވުމާއިއެކު ދާނިޝްއަށް ބެލުން ތިރިކޮށް، އިސްޖަހާލެވުނެވެ.

“ސޯ ޔޫ އާރ ޑޭން ދޯ؟ ކާންޓް ބިލީވް ދިސް. އެހާ ވަރަށް ނަންބަރުތައް ބްލޮކް ކޮށްފަ ހީކުރީ ކޮންމެވެސް ފްލައިޓަކަށް އަރައިގެން އަތު ނުޖެހޭ ހިސާބަކަށް ގޮއްސަ ކަމަށް ޑޭން ހުންނާނީ. ބަޓް ޔޫ އާރ ހިއާރ!” ޒިވް ވާހަކަ ދެއްކީ މެދުމިނުގެ އަޑަކުންނެވެ. އެހެނަސް އެ ލޯމަތިން ވިދުމެއް ފާޅުވަމުން ދިޔަ ގޮތުން އެ ހިތުގައިވި ޖޯޝު އެނގެއެވެ.

“ހައު ކޭން އައި ހެލްޕް ޔޫ؟” ދާނިޝް އޭނަގެ ތެޅެން ފެށި ހިތް މައިތިރި ކުރަން މަސައްކަތް ކުރަމުން ސުވާލު ތަކުރާރު ކުރިއެވެ. އޭނަ ފިލައިގެން އުޅެނީ ކޮންތާކުކަން މާޒީއިން އައި މީހަކަށް އެނގުމުން ދާނިޝްގެ ތަބީޢަތް ގޯސްވިއެވެ.

“އޮހް….ހެލްޕް ބޭނުންވެގެން މި އައީ. އެންޑް އޮންލީ ޔޫ ކޭން ހެލްޕް މީ. އެއްކަލަ ރެއަށްފަހު މައި ހާޓް އިޒް ސްޓިލް ސިކް. ޑޭމް! އެއް އަހަރު ވެއްޖެދޯ އެ ރެއަށް؟ އިއްޔެ ވީ ކަމެއްހެން އަދިވެސް ހަނދާން އެބަހުރި….” ޒިވް ހުވަފެނީ ގޮތަކަށް ދާނިޝްއަށް ބަލަން ހުރެ ވާހަކަ ދެއްކިއެވެ.

ދާނިޝް އިސްޖެހިފައި އިނެއްކަމަކު ޒިވް އެ ބުނި ބަސްތަކުން އެ ސިފަކުރި ރޭ މަތިން ހަނދާންވިއެވެ. އެ ހަނދާންތަކާއިއެކު އެރޭ ހިތަށް ވެރިވި ޖަޒުބާތުތަކާއި އެދުންތައް ވެސް ހަނދާނަށް އައެވެ. އެވަގުތު އިޙްސާސް ކުރެވުނު ބަލިކަށި ކަމުގައި އެއްޗެކޭ ނުބުނެވުނެވެ.

“ޑޯންޓް ޔޫ ތިންކް….އެރޭ ނުކުރެވުނު ކަންތައް އަހަރުމެން ކުރަންވީއޭ؟” ޒިވް ބުންޏެވެ.

އެހިނދު ދާނިޝްގެ ހިތަށް ވެރިވި ނުރުހުންތެރިކަމާއިއެކު އިސްއުފުލާލެވުނެވެ.

“އައި ޑޯންޓް ތިންކް ސޯ.” ދާނިޝް ސީދާސާދާ ޖަވާބެއްދިނެވެ.

**

ހިލްޔާ ކޮންސަލްޓޭޝަން ރޫމުގައި އިނދެފައި ތެދުވެލީ، އެވަގުތު އޭނަ ބަލަންޖެހޭ ބަލި މީހުން ނެތުމާއިއެކު، އޭނަ އެނދުމަތި ކުރި ބައެއް ބަލި މީހުންގެ ޙާލު ބަލާލަން ދިޔުމަށެވެ. ރޫމުން ނިކުމެގެން ގޮސް ކޮންސަލްޓޭޝަން ރޫމުގެ ކޮރިޑޯ ފަހަނަޅައި ދެވުމާއިއެކު މިހާރުގެ އާދައިގެ މަތިން ރިސެޕްޝަނާއި ދިމާލަށް ބެލުނެވެ. އެހިނދު ފެނުނު މަންޒަރުން ހިލްޔާގެ ފިޔަވަޅުތައް މަޑުޖެހުނެވެ. ރިސެޕްޝަންގެ މޭޒުގައި އަތް އަޅުވައި، ދާނިޝް އާއި ވާހަކަ ދައްކަން ހުރި ޒުވާން އަންހެން ކުއްޖާ ފެނުމުންނެވެ.

ފުރަތަމަ ނަޒަރުން ހިލްޔާ ހީކުރީ އެއީ ކްލިނިކަށް އައިސް ހުރި ބަލިމީހެއް ކަމަށެވެ. އެހެނަސް ދުރުން ފެނުނު ފެނުމުން ވެސް އެދެމެދުގައި ގުޅުމެއް ވާކަން ހިލްޔާއަށް ނަގައިގަނެވުނެވެ. ދެމީހުން ދައްކަމުން ދިޔަ ވާހަކަ ސާފެއް ނުވިއެއްކަމަކު ދާނިޝްގެ ލޯމަތިން ނުރުހުންތެރިކަމެއް ހިލްޔާއަށް ފެނުނެވެ. ހިލްޔާ ވޯޑްތައް ހުރި ރޫމުތަކާއި ކައިރިވުމުން އެ ދިމާލުން ނަޒަރު ވަކި ކުރިއެވެ. ހަމަ އެވަގުތު ދާނިޝްގެ އަޑުއިވުނެވެ.

“ދާން އުޅޭ!”

ދާނިޝް އެހެން ބުނީ އެހާ ބާރަށް ކަމަށް ނުވިޔަސް، އެރޭ ކްލިނިކް ފުދޭވަރަކަށް ހުސްވުމުން އެ އަޑު ހިލްޔާއަށް އިވުނެވެ. އެހިނދު ހިލްޔާގެ ދެބުމަ ކައިރިވެ ވިސްނުމަކަށް ގެއްލުނެވެ.

**

“ޑޯންޓް ބީ ލައިކް ދިސް ޑޭން. އޯކޭ ދެން ރުޅި ނާދޭ. ރުޅި ނައިސް ފިލްމް އިންޑަސްޓްރީއަށް ކަމް ބެކެއް ޖެހުމާއިމެދު ވިސްނަބަލަ. ޔޫ އާރ މިސިންގް އައުޓް އޮން ސޯ މަޗް!” ޒިވް ދެން ފެށި ވާހަކައިން ދާނިޝް އިތުރަށް ނުރުހުންވިއެވެ.

“ސޮރީ. ތިކަމެއް ކުރެވޭކަށް ނެތް.” ދާނިޝް ކޮމްޕިއުޓަރަށް ނަޒަރު ހުއްޓާލަމުން ބުންޏެވެ.

“އެއްކަލަ ޑައިލޮގް. ރޮމް ސީންއެއް ކުޅެން ދޭއިރަށް ޑޭން ބުނާ ބަސްތައް ތިއީ. ސޯ އިނޮސެންޓް ޔޫ އާރ. އެކަމަކު އަހަންނަށް އެނގެއޭ އަސްލު ޑޭން ހިތާއި ދެކޮޅަށްކަން ނޫނެކޭ ބުނަނީ.  ނޫނެކޭ ބުނަނީ. ޑޭން ތިހެން އުޅޭކަށް ކޮންމެހެން ނުޖެހެއޭ. ޔޫ އާ 30 ޔިއާރސް! ކިހާ ދުވަހެއް ވަންދެން ތިހެން އުޅޭނީ؟” ޒިވް ފަރުވާތެރިކަމާއިއެކީ ބަސްތައް އަމުނާލީ ދާނިޝް ބަލިކަށި ކުރުމަށެވެ. އެކަން ކާމިޔާބު ވެސްވިއެވެ. އެ ބަސްތަކަށްފަހު އިޙްސާސް ކުރެވުނު ބަލިކަށި ކަމާއިއެކު އަނެއްކާވެސް ދާނިޝްއަށް އެއްޗެކޭ ނުބުނެވުނެވެ.

**

15 ވަރަކަށް މިނެޓް ވަންދެން ވޯޑުގައި އުޅުމަށްފަހު ހިލްޔާ ނަރުހުންގެ ސްޓޭޝަން ބައިގެ ތެރެއިން ގޮސް ލޮބީ އޭރިއާއަށް ނިކުތެވެ. ލޮބީއަށް ދިޔައިރު އޭރުވެސް އެއްކަލަ އަންހެން ކުއްޖާ ރިސެޕްޝަންގައި ހުރި މަންޒަރު ފެނިފައި ހިލްޔާ ނުރުހުންވާ ގޮތްވިއެވެ. ނުރުހުންވީ ކްލިނިކްގެ ރިސެޕްޝަން ގައި ޒާތީ ވާހަކައެއް ދައްކަން ހުންނާތީ ކަމެއް ނޫނީ އެ ކުއްޖާ ދާނިޝް އާއި ވާހަކައެއް ދައްކަން ހުންނާތީ ކަމެއް ނޭނގުނެވެ. އެނގުނުހާ ވެސް ކަމަކީ އޭނަ އެ އަންހެން ކުއްޖާ އެތަނުން ދުރު ކުރުވަން ބޭނުންވި ކަމެވެ. އެކަމަށްޓަކައި ކޮންސަލްޓޭޝަން ރޫމްތަކުގެ ކޮރިޑޯއާއި ހަމައަށް ގޮސް އެ ހިސާބުން ރިސެޕްޝަނަށް ބަލާލީ ދާނިޝް މި ޙާލަތުގައި ދެކެނީ ކިހިނެއްތޯ ޔަޤީން ކުރުމަށެވެ. އެވަގުތު ވެސް އެ ލޯ މަތިން ހަމަނުޖެހުމެއް ފެނުމުން ހިލްޔާއަށް ވާހަކަ ދެކެވުނެވެ.

“އެކްސްކިއުޒް މީ….ކޮން ޑޮކްޓަރަކަށްތޯ ތި ބޭފުޅާ ދައްކާލަން ބޭނުމީ؟” ހިލްޔާއަށް އަހާލެވުނެވެ. އެއާއިއެކު ޒިވް އާއި ދާނިޝް ގެ ނަޒަރު ވެސް ހިލްޔާއަށް އަމާޒުވިއެވެ.

“މި އުޅެނީ ބުނަން ރިސެޕްޝަން ގަ.” ޒިވް ނުހަނު އޮމާންކޮށް ޖަވާބުދިނެވެ.

އެއާއިއެކު ހިލްޔާއަށް އަނގަ ބަންދުކޮށްލެވުނެވެ. ދެން ބުނެވޭނެ އެއްޗެއް ނުވިސްނުމުންނެވެ. އެހެންކަމުން ހިލްޔާއަށް ޖެހުނީ އިތުރު އެއްޗެކޭ ނުބުނެ އަމިއްލަ ރޫމަށް ދާށެވެ.

**

“އެއީ ކާކު؟ ޔުއާރ ލަވް އިންޓްރެސްޓް؟” ދާނިޝް ހިލްޔާ ދިޔަ ދިމާލަށް ބަލަހައްޓައިގެން އިންނަން ފެށުމުން ޒިވް އެހިއެވެ. އެއާއިއެކު ދާނިޝްއަށް އެ ދިމާލުން ނަޒަރު ވަކިކޮށްލެވުނެވެ.

“ނޫން.” ދާނިޝްއަށް އަވަސްއަވަހަށް ބުނެވުނެވެ. ޒިވް ‘ލަވް އިންޓްރެސްޓް’ މާނަ ކުރާ ގޮތުން ހިލްޔާގެ އަބުރަށް ކުޑަވެސް ކިލަނބުކަމެއް ގެނައުމަށް ބޭނުމެއް ނުވިއެވެ.

“ވަރަށް ހީވޭ އެކަމަކު. އެނީވޭސް. އެކަހަލަ ބޮޑު ހެދުން ލާ ކުދިން ޑޭން އަށް ކަމުދާނެހެން އަހަންނަށް ހިއެއް ނުވޭ. އައި އޭމް ޔުއާރ ޓައިޕް ދޯ؟ މުޅި ލައިފް ގަ ވެސް ހަމައެކަނި އަހަންނާ ރައްޓެހިވާނީ އެހެންވެތާ. އެހެންވީމައޭ މި ބުނަނީ. އެރޭ ހިނގި ކަންތައް އަހަރުމެން އަދި އެބަޖެހޭ ކުރިއަށް ގެންދަން. ވަކި ހިސާބަކުން ޕޯޒް ވީމަ ކަޑައެއްނު؟” ޒިވް ތަކުރާރުކޮށް އެ ވާހަކަ ދައްކަން ފެށުމުން ދާނިޝް ނުރުހުންވާ ގޮތްވިޔަސް އެ ނުރުހުންތެރިކަން ފާޅެއް ނުކުރެވުނެވެ. ބަލިކަށިވެފައިވި ހިތުގެ ކަނަކުން ޒިވް އެ ބުނަމުން ދިޔަ ބަސްތަކާއި އެއްބަސްވެސް ވެވެމުން ދިޔައީތީވެއެވެ.

“ބޭނުމެއް ނޫން އެކަމަކު.” ދާނިޝް ވެސް އެ ބަލިކަށިކަމުން އަރައިގަންނަން ތަކުރާރުކޮށް މަސައްކަތް ކުރިއެވެ.

“ކަމޯން ތިންކް އެބައުޓް އިޓް. މިހާރު ދާނިޝް ގެ މަންމަ ވެސް މަރުވެއްޖެއެއްނު؟ މަންމަ ނެތެއްނު އެއްޗެކޭ ބުނާކަށް؟ އޯލްސޯ ޔޫ އާރ ލިވިންގް އެލޯން. ހިނގާދޯ މިރޭ ދެމީހުން ދާނިޝް ގެ އެޕާޓްމެންޓަށް ދަމާ؟”

ޒިވް މިފަހަރު ވާހަކަ ދެއްކި މިޞްރާބުން ދާނިޝްގެ ހިތުގައި ރުޅީގެ އަލިފާނެއް ރޯވިއެވެ. މަންމަގެ މަރާއިމެދު މީހަކު އުފާކުރިހެން ހީވުމުން އައި ރުޅީގައި ބުމަގޮށްޖެހި، މޭޒުމަތީގައި އޮތް އަތް މުއްކެވުނު ހިނދު މީހާ ވެސް ތުރުތުރު އެޅިއެވެ.

އެކީގައި ފިލްމު ކުޅޭ މީހުންގެ ތެރެއިން އޭނަގެ މަންމައަކީ އުސްތާޒާ އަސްމާ ކަން އެނގޭނީ ޒިވް އަށް އެކަންޏެވެ. މަންމަގެ މަރުގެ ޚަބަރުގެ ބޭނުން ހިފައިގެން ޒިވް މިފަދަ ވާހަކައެއް ދައްކާނެ ކަމަށް އޭނަ ދުވަހެއްގެ ކޮޅުން ވެސް ހިއެއް ނުކުރެއެވެ. އިސާހިތަކު އެތަކެއްޗެއް ގޮވައިގަންނަން ހިތަށް އެރިއެވެ. އައި ރުޅީގައި ކަތި ފިޔަވަޅެއް އެޅިދާނެތީ ދާނިޝް ކޮޅަށް ތެދުވެލިއެވެ. އަދި ޒިވްއަށް އިތުރަށް ބެލުމެއްވެސް ނެތި ރިސެޕްޝަނުން ނިކުންނަން ހިނގައިގަތެވެ.

ދާނިޝް އޭނަގެ ގާތަށް އަންނާނެ ކަމަށް ހީކޮށް ޒިވް ބަލަން ހުއްޓެވެ. އެހެނަސް ޒިވް ބަލަބަލާ ހުއްޓާ ދާނިޝް މިޞްރާބު ޖެހީ އެތާ ހުރި އެޑްމިނިސްޓްރޭޝަން ރޫމަށް ދިޔުމަށެވެ. އެއީ އެއްކޮށް ނުނިމި ހުރި އެޑްމިން ރޫމެކެވެ. އެހެނެއްކަމަކު އެ ދޮރުގައި ‘ސްޓާފް އޮންލީ’ އޭ ލިޔެފައިވި ގަނޑެއް ތަތްކުރެވިފައިވިއެވެ. ދާނިޝް ގޮސް އެތަނަށް ވަނީ ހިތުން އިތުރަށް އޭނައާއި ގާތްވުމުގެ ފުރުސަތެއް ޒިވްއަށް ނުދިނުމަށެވެ.

އެހެނަސް ޒިވްގެ އަމާޒު އެއަށްވުރެ ބާރުގަދަކަން ދާނިޝް ނުދެނެ ހުއްޓެވެ. ދާނިޝް އެ ރޫމަށް ވަދެ ދޮރު ލައްޕާލި ވަގުތު ‘ސްޓާފް އޮންލީ’ އޭ ލިޔެވިފައިވި މަންޒަރު ފެނުނަސް ޒިވް އެއަށް ފަރުވާލެއްނެތި  އެ ދިމާލަށް ދިޔައެވެ.

އެޑްމިން ރޫމަށް ވަދެވުނު ދާނިޝް ފުން ނޭވައެއް ދޫކޮށްލިއެވެ. އެ ރޫމުގައި އެހެން މިހެން ބެހެއްޓިފައިވި ހަރުތަކާއި މޭޒުތަކާއި ގޮނޑިތައް ހުއްޓެވެ. ދާނިޝް ގޮސް އެތާ ހުރި މޭޒެއްގައި އިށީނދެލަން އުޅުނު ތަނާހެން ރޫމުގެ ދޮރު ހުޅުވިގެން ދިޔައެވެ. އެ ދޮރުން ވަދެގެން އައި ޒިވް ފެނިފައި ދާނިޝްއަށް ޤަބޫލު ކުރަން ވެސް ދަތިވިއެވެ.

“ވަޓްސް ރޯންގް ވިތް ޔޫ؟! މިއީ ޢާއްމު މީހުން ވަނުން މަނާ ރޫމެއް!” ދާނިޝްއަށް ސީދާ ވެލަމުން ހަރު އަޑުން ބުނެވުނެވެ.

“އައި ނޯ. އެކަމަކު ޑޭން އާ ބައްދަލު ކުރަންވެގެންނޭ މި އައީ.” ޒިވް ނުހަނު ހަމަޖެހިގެން ހުރެ އޭނަގެ އަތް ދަބަސް އެތާ ހުރި ކުޑަ މޭޒެއްގައި ބެހެއްޓިއެވެ.

“މޮޔަވެގެންތަ ތިއުޅެނީ ޒިވް؟” ދާނިޝްއަށް އަހާލެވުނެވެ. ދެންވެސް ވާހަކަ ދެކެވުނީ ހަރު އަޑުންނެވެ.

“އާނ….ދާނިޝްއަށްޓަކައި މޮޔަވެގެން މިއުޅެނީ.” ޒިވް ދާނިޝް އާއި ދިމާލަށް ލަސް ފިޔަވަޅުތަކެއްގައި އަންނަމުން ބުންޏެވެ.

“ސްޓޮޕް! އަހަރެން މި ބުނަނީ ޒިވް ތިބުނާ އެއްވެސް ކަމެއް އަހަންނަށް ނުކުރެވޭނެއޭ. އޯލްސޯ އަހަރެންގެ މަންމައާއިމެދު ތިހެން ވާހަކަ ދައްކާފަ އަހަރެން ޒިވް އާ ގާތްވާން ތި އުއްމީދު ކުރަނީ ކިހިނެއް؟” ދާނިޝް އިންތިހާ ދަރަޖައިގެ ރުޅިވެރިކަމާއި އެކީ އެހިއެވެ.

“އޮހް….ހާޓްވީތަ އެހެން ބުނީމަ؟ ސޯ ސޮރީ. ސޯ އިންސެންސިޓިވް އޮފް މީ. މަޢާފު ކޮށްލަދޭނަންތަ؟” ޒިވް ދާނިޝްއާއި ނުހަނު ކައިރިއަށް އައިސް ހަތަރު ކަޅި ހަމަކޮށްލަމުން އެހިއެވެ. އެހިނދު ދާނިޝްގެ ހިތުގެ ތެޅުން އަވަސްވެގެން ދިޔައީ އެވަގުތުކޮޅުގެ ބިރުވެރިކަން އިޙްސާސްވުމުންނެވެ. އަނެއްކާވެސް އޭނަގެ އެދުންތައް ޒިވް އެ އެދޭ ގޮތަށް ލެނބެން ފެށުމުން އަމިއްލަ ނަފްސާއި މެދު ވެސް ނުރުހުންވިއެވެ.

ހަދާނެ ގޮތެއް ނޭނގިފައި ދާނިޝް ހުއްޓާ އެ ރޫމުގެ ދޮރުގައި މީހަކު ޓަކި ދިން އަޑު އިވުނެވެ. އެއާއިއެކު ޒިވް އާއި ދާނިޝް ގެ ނަޒަރު އެ ދޮރަށް އަމާޒުވިއެވެ. އެ ހިނދު ހުޅުވިގެން ދިޔަ އެ ދޮރުގެ އަނެއް ފަރާތުން ހިލްޔާ ފެނިގެން ދިޔުމުން ދާނިޝްގެ ހިތަށް ހަމަޖެހުމެއް ލިބުނެވެ.

“މި ދިމާލުން މާ އަޑު ހަރުވާތީ މި ވަދެވުނީ. މިއީ ނިއު ސްޓާފްއެއްތަ ދާނިޝް؟” ހިލްޔާ ރަނގަޅަށް ދޮރު ލެއްޕުމެއްނެތި އެތާ ތެރެއަށް ވަދެ، ދެމީހުންނަށް ވާނެހެން ސުވާލު ކުރިއެވެ.

“ނޫން ސްޓާފްއެއް ނޫން މިއީ. މި ކުއްޖާ ޖެހޭނެދޯ މިތަނުން ދާން ވީހާ ވެސް އަވަހަކަށް.” ދާނިޝް ފުރުސަތުގެ ބޭނުން ހިފިއެވެ.

“ހުމް….ނަހީދު ސާރ ނުރުހުންވެލައްވާނެ މި ކަމާ. މި ކުއްޖާ ކަމަކަށް ބޭނުންވެގެންތަ މިއުޅެނީ؟” ހިލްޔާ ޒިވްއަށް ބަލާލަމުން އެހިއެވެ.

ޒިވް އެ ވާހަކައަށް ކަޅި މައްޗަށް ހިންގާލިއެވެ. އޭނައާއި ދާނިޝްގެ ދެމެދަށް މީހަކު ވަނުމުން ވީ ފޫއްސެއްގައި ފަދައެވެ.

ޒިވް އިތުރު އެއްވެސް އެއްޗެކޭ ނުބުނެ އެތަނުން ނިކުންނަން ހިނގައިގަތެވެ. އަދި ހިލްޔާއާއި ގާތްވަމުން ދިޔަދިޔަހެން ހިލްޔާއަށް ލޯ އެޅިއެވެ. އަދި އެތާ މޭޒުމަތީގައި އޮތް އޭނަގެ އަތް ދަބަސް ނަގައިގެން ނިކުތެވެ.

ޒިވް ލޯ މައްޗަށް ގެއްލުމުން ދާނިޝްއަށް ހަމަޖެހުމުގެ ނޭވައެއް ދޫކޮށްލެވުނެވެ. އެހިނދު ހިލްޔާ ހުރިތާ ހުރެ އޭނައަށް ބެލިއެވެ.

“އެއީ ކާކުތަ ދާނިޝް؟” ހިލްޔާ އެ ސުވާލު ކުރުމުން އިސްޖެހިފައި ހުރި ދާނިޝްއަށް އިސްއުފުލާލެވުނެވެ. އޭނަ ހީކުރި ގޮތާއި ޚިލާފަށް ހިލްޔާ އޭނައާއި ވާހަކަ ދެއްކުމުން ހިތަށް ދިރުމެއް އައެވެ.

“އެއީ….”

ދާނިޝްއަށް ބުނެވުނީ ހަމައެކަނި އެހާވަރަށެވެ. ތެދުތެދަށް ބުނަންވީ ވާހަކައިގެ ޒާތުންނެވެ. އަދި އަމުދުން ދާދި ދެންމެއަކު އޭނައަށް ކުރަން އުޅެވުނު ކަންތަކުންނެވެ. އޭގެއިން އެއްވެސް ކަމެއް ހިލްޔާއަށް އެނގޭކަށް ދާނިޝް ބޭނުމެއް ނުވިއެވެ. ހިލްޔާއާއި އެކީ މުސްތަޤްބަލެއް ބިނާކުރަން އޭނަ ބޭނުންވެއެވެ. ވީއިރު މާޒީގެ އެ ވާހަކަތަކުން ހިލްޔާ ދެރަކޮށްލަން ހިތް ނޭދުނެވެ. ހަމަ އެ ހިނދު ގޮސް ހިލްޔާގެ ގައިގައި ބައްދާލަން ބޭނުންވިއެވެ. އޭނައަށް ދެންމެ ތަޖުރިބާ ކުރެވުނު ހުރިހާ ބަލިކަށިކަމެއްގެ ޝަކުވާއެއްގެ ގޮތުންނެވެ. އޭނަ ލައްވާ ގަދަކަމުން ޒިވް ކުރުވަން އުޅުނު ކަންތަކުގެ ޝަކުވާއެއްގެ ގޮތުންނެވެ. އޭނަ އެފަދައިން ހިލްޔާގެ ގައިގައި ބައްދައިފިނަމަ އޭނަގެ ހިތަށް ތަސައްލީއެއް ލިބޭނެކަން ޔަޤީން ކުރެވުނެވެ.

އެހެނަސް އާދައިގެ މަތިން ދާނިޝްއަށް މާ ގިނައިރެއް ނުވެ އެ ޚިޔާލީ ފޮލާތަކުން ނިކުމެވުނެވެ. އޭނަ ކިތަންމެ ބޭނުންވިޔަސް ހިލްޔާއަކީ އޭނަގެ މީހަކަށްވާނެ ކުއްޖެއް ނޫންކަން ހަނދާންވިއެވެ. އޭނަގެ ލޯބީގެ ފަސާނާއަކީ ފެށުމުގެ ކުރިން ވެސް ނިމިފައިވާ ވާހަކައެކެވެ. ވީއިރު އޭނައަށް ދެންމެ އަމިއްލަ ނަފްސާއި ދެކޮޅުވެރިވެ، ވަފާތެރިކަމުގައި ހުރެވުނީ އޭނައަށް ލިބެން ވެސް ނެތް ކުއްޖަކަށްޓަކައި ހެއްޔެވެ؟ ހިތަށް ވެރިވި އެ ޚިޔާލުން ދާނިޝްގެ މޭގައި ރިހުމެއް ހިނގާލި ހިނދު، ލޮލުން ކަރުނަ ހިލުނެވެ.

އެހެނަސް ދާނިޝް އެވަގުތު ހިލްޔާގެ ކުރިމަތީގައި ބަލިކަށި ވާން ބޭނުމެއް ނުވިއެވެ. އެހެންކަމުން ދިގު ފިޔަވަޅުތަކެއްގައި ގޮސް އެތާ ހުއްޓި ހުރި ހިލްޔާއާއި ވައި އެޅޭ ހިސާބުން ގޮސް އެ ރޫމުން ނިކުތެވެ.

ދާނިޝްއަށް ނޭނގުނު ކަމަކީ، ފާފައަކުން ދުރުވެގަންނަންވީ ވަކި މީހަކަށްޓަކައި ނޫންކަމެވެ. ފާފަތަކުން ދުރުވަނީ ﷲ އަށްޓަކައެވެ. އެކަލާނގެ ޙަޟްރަތުން ޘަވާބު ލިބިގަތުމަށްޓަކައެވެ. ޤިޔާމަތް ދުވަހު ރައްކާތެރިކަން ލިބިގަތުމަށްޓަކައެވެ. ދެންމެ ދާނިޝްގެ ހިތުގައި ފާފައިން ދުރުވުމުގެ އެދުމެއް އޮތީ ހިތުގައި އޮތް އީމާންތެރިކަމުގެ ސަބަބުންނެވެ. އެހެނަސް ދީނުގެ ޢިލްމު އެހާ ބޮޑަށް އުނގެނިފައި ނުވުމުން އެ ނިޔަތް ދާނިޝްއަށް ސާފު ނުވީއެވެ. ޢިލްމު ލިބިފައިވިނަމަ، ދެންމެ އެ ފާފައިން ދުރުވެވުނު ކަމަށްޓަކައި ﷲ އަށް ޝުކުރު ކުރެވުނީހެވެ. ދެންމެ އެ ފާފައިން ދުރުވުމަށް ކުރި މަސައްކަތުގެ ސަބަބުން ވެސް ﷲ ތަޢާލާ އޭނައަށް ހިދާޔަތް އިތުރު ކޮށްދެއްވާނެކަން ދާނިޝްއަށް ނޭނގެއެވެ.

ނުނިމޭ