ނަފްސީ (ސައުރަތިރީސްވަނަ ބައި)

“ހިލްޔާ ބޭނުންވަނީތަ އަހަރެންގެ މޫނު ދެކެން؟” ދާނިޝް އެހިއެވެ.

ހިލްޔާއަށް އެ ސުވާލަށް ވަގުތުން އާނއެކޭ ބުނެ ޖަވާބެއް ދެވެން އުޅުނެވެ. އެހެނަސް ކީއްވެކަމެއް ނޭނގެއެވެ. އެ ބަސްތައް ބުނަން ދޫ ޙަރަކާތް ނުކުރިއެވެ. އެވަގުތު ރާފިލް މަތިން ހަނދާންވުމުންނެވެ. ދާނިޝްއާއި އޭނަގެ ގުޅުން އެންމެ ތަންކޮޅަކުން ވެސް ކުރިއަށް ގޮސްފިނަމަ، ރާފިލްއާއި އޭނަގެ ގުޅުން ފުނޑުފުނޑުވެދާނެހެން ހީވިއެވެ. އެއީ ކީއްވެކަމެއް އެއްގޮތަކަށް ވެސް ނުވިސްނުނެވެ. ދާނިޝްއާއިމެދު ހިލްޔާއަށް އިޙްސާސް ކުރެވެނީ ކޯޗެއްކަމެއް ހިލްޔާއަށް ނޭނގެއެވެ.

ހިލްޔާ ދެބުމަ ކައިރި ކޮށްގެން އޭނައަށް ބަލަހައްޓައިގެން ހުންނަން ފެށުމުން ދާނިޝް ގެ ހިތަށް އުދަގޫވިއެވެ. ހިލްޔާ އެ ޖެހިލުންވާ ސަބަބަކީ ރާފިލް ކަން ދާނިޝްއަށް ނަގައިގަނެވުނެވެ. ހަމަ އެއާއިއެކު އޭނައަށް މި ކުރެވެނީ ކޮން ކަމެއް ކަން ވެސް ދާނިޝްއަށް އެނގުންވީ އެ ވަގުތެވެ. ބޭކާރު ގޮތުގައި ހިލްޔާއާއި ވާހަކަ މި ދެކެވެނީ ނޭނގުމެއްގެ ތެރެއިން ވެސް ހިލްޔާ އޭނަ ކައިރީގައި މަޑު ކުރުވަންކަން އެނގުންވިއެވެ.

ދާނިޝް ހުރީ ހިލްޔާ ފުރުވަން އެއާރޕޯޓަށް ނުވެސް އަންނާށެވެ. ނަހީދުބެ އެ ޚަބަރު އޭނައަށް ދީފައި ދާނިޝް ހިލްޔާ ފުރުވަން ނާންނާނަންތޯ އެހުމުން ވަކި ޖަވާބެއް ނުދެވުނެވެ. ނުދާން ޢަޒުމް ކަނޑައަޅައިގެން ހުރީ އަމިއްލަ ނަފްސާއި ދެކޮޅަށެވެ. އޭނަ އެއާރޕޯޓަށް ދިޔައިއްޔާ ދާނީ ރަނގަޅު ނިޔަތެއްގައި ނޫންކަން ދަނެގެންނެވެ. އަދި އަމުދުން ހިލްޔާ ރާފިލްއާއިއެކީ އަބަދުގެ އަބަދަށް އޭނަގެ ލޯ މައްޗަށް ގެއްލޭތަން ދެކެން ބޭނުމެއް ނުވީއެވެ.

އެހެނަސް ހަވީރު ވެ، ހިލްޔާ އެއާރޕޯޓަށް ދާން އޮތް ގަޑި ކައިރި ވަމުން ދިޔަދިޔަހެން ދާނިޝްއަށް ގިނަގިނައިން ގަޑިއަށް ބެލެން ފެށިއެވެ. އޭނަ ފަހު ފަހަރަށް ވެސް ހިލްޔާ ނުދެކެ ހިލްޔާ ދިޔަ ދޭނީތޯ ހިތަށްއެރިއެވެ. ހިލޭ އަންހެނަކު ފަހު ފަހަރަށް ދެކެން ދިޔުމުގެ ބޭނުމެއް ވަކި ނެތްކަމަށް ބުނެ ދާނިޝް އަމިއްލަ ނަފްސަށް ވިސްނައިދެވޭތޯ މަސައްކަތް ކުރިއެވެ. އެހެނަސް އަމިއްލަ ބަލިކަށިކަމާއި އެކަނިމާއެކަނި ކުރިމަތިލާން ޖެހުމުން ދާނިޝްއަށް އެންމެ ފަހުން ބަލި ޤަބޫލު ކުރެވުނީއެވެ.

ދާނިޝްގެ ކުރިމަތިން ފެންނަމުން ދިޔަ މަންޒަރާއި، ހިތު ތެރެއިން ކުރެވެމުން ދިޔަ އިޙްސާސްތަކަކީ، އެ ބަލި ޤަބޫލު ކުރުމުގެ ނަތީޖާއެވެ. ބޭއިޚްތިޔާރުގައި ވެސް އޭނައަށް ހިލްޔާގެ ޖަޒުބާތުތަކާއި ކުޅެވިއްޖެއެވެ. އަދި އެކަން ކުރުމުގައި އަމިއްލަ ހިތުގައި ހިލްޔާއަށްވި އިޙްސާސްތައް ވެސް ދެގުނަ ކުރެވިއްޖެއެވެ. ހިލްޔާ އާއި އޭނައާއި ދެމެދު މިއަށްވުރެ ގާތް ގުޅުމެއް އޮންނާނެނަމައޭ އެވަގުތު ހިތަށްއެރިއެވެ. ހިލްޔާ ޖެހިލުންވުމެއް ނެތި އޭނަގެ މޫނު ދެކެން ބޭނުމޭ ބުނެވޭ ފަދަ މަޤާމެއްގައި ހިލްޔާ ވި ނަމައޭ ހިތް ބުންޏެވެ.

އެ ޚިޔާލުތަކުން ދާނިޝްއަށް ނިކުމެވުނީ ނުހަނު ކައިރިން ކާރެއް ބަރުގޮނު އަޅާލި އަޑަށެވެ. އެއާއިއެކު ދާނިޝްއާއި ހިލްޔާއަށް އެކުއެކީގައި ސިހިފައި ވާތްފަރާތަށް ބަލާލެވުނެވެ. ހިލްޔާމެންގެ ކާރު އެތާ އޮންނާތީ ކުރިއަށް ނުދެވިގެން އުޅޭ ކާރެއް ފެނިފައި ދާނިޝްއަށް ވާހަކަ ދެކެވުނެވެ.

“ނަހީދުބެ ކޮބާ؟” ދާނިޝްއަށް އަހާލެވުނެވެ.

“އެކޮޅުގަ ވީ….ކާރުގަ ތަޅުދަނޑި ޖަހާފަ ދިޔައީ. އައި-“

“އޮހް….އެހެންވީމަ އަހަރެން ކާރު ދުރުކޮށްލަ ދޭނަން. ހިލްޔާ ދާންވީއެއްނު ޓްރޯލީއާއެކީ ޓާރމިނަލާއި ދިމާލަށް؟” ދާނިޝް އަވަސްއަވަހަށް ބުންޏެވެ.

ހިލްޔާ ބޯޖަހާލުމާއިއެކު ދާނިޝް އޭނައަށް ފަސްދީފައި ގޮސް ކާރަށް އެރިއެވެ. އޭގެ ދެވަނަ ސިކުންތުގައި ކާރު އެތަނުން ދުރުވެ، ނުހަނު ފަރިތަ ގޮތަކަށް އަނބުރާލެވިގެން ދިޔުމުން ހިލްޔާ އޭނަގެ ޓްރޯލީގެ އަތްގަނޑުގައި ހިފައި ކޮއްޕަމުން ޓާރމިނަލާއި ދިމާލަށް ދިޔައެވެ. ދަމުން ވެސް ހިލްޔާއަށް ފަސްއެނބުރި ބަލާލެވުނެވެ. އެހެނަސް އެވަގުތު ދާނިޝް ދުއްވާފައި ދިޔަ ބައްޕަގެ ކާރު ފެންނާކަށް ނެތެވެ. އެހެންކަމުން އަނެއްކާވެސް ކުރިމައްޗަށް ބަލައި ކުރިއަށް ހިނގަމުން ދިޔަ ވަގުތު ހިލްޔާއަށް ދާނިޝްއާއިމެދު ވިސްނެން ފެށިއެވެ. ހަނދާނަށް އައީ މީގެ ދުވަސްކޮޅެއް ކުރިން ވެސް ދާނިޝް ކާރު ޕާކް ކުރުމުގައި އޭނައަށް އެހީވުމަށް ތަޅުދަނޑި ހޯދައިގެން ދިޔަ ގޮތެވެ.

ދާނިޝް ކާރު ވެސް ދުއްވަނީތޯ އެދުވަހު ވެސް ހިތަށްއެރިއެވެ. ކާރު ދުއްވާނަމަ ސައިކަލެއް ދުއްވަނީ ކީއްވެތޯ ހިތް ސުވާލު ކުރިއެވެ. އެއީ ދާނިޝް ކުރިން ބޭރުގައި އުޅެފައިވާތީ ހެއްޔެވެ؟ ބޭރުގައި އުޅުނުއިރު ދާނިޝް ކާރު ދުއްވައި އުޅުނީ ހެއްޔެވެ؟

މި ކަންތަކާއިމެދު ވިސްނަން ހިލްޔާއަށް މާ ބޮޑު ފުރުސަތެއް ނުލިބުނީ، މާ ގިނައިރެއް ނުވެ ބައްޕައާއި ރާފިލްއާ އަރާ ހަމަވުމުންނެވެ. އިސާހިތަކު ރާފިލް އޭނައާއި ހިނިތުންވުމަކާއެކީ ވާހަކަ ދައްކަން ފެށުމުން ހިލްޔާ ދާނިޝް ގެ މަތިން މުޅިން ހަނދާން ނެތޭ ގޮތްވިއެވެ. ރާފިލް އެހެން ހެދުމުގައި ބައްޕަ ދައްކަމުން ދިޔަ ވާހަކައެއް މެދު ކަނޑާލައި ބައްޕަ ނެތް ކަމަށް ހެދީކަން ހިލްޔާއަށް ފާހަގައެއް ނުވިއެވެ.

އޭގެ އިރުކޮޅެއްފަހުން ހަމްރާއާއި އެލީއާއި ހާފިޒާ ވެސް އެތަނަށް އައެވެ. އަދި މާ ގިނައިރެއް ނުވެ ހިލްޔާ އެ އެންމެންނަށް އަލްވަދާޢު ކިޔަން ޖެހުނެވެ. ހިލްޔާ ބައްޕައާއި ސަލާމްކޮށް ދެން ތިބި އެންމެންގެ ގައިގައި ބެއްދިއެވެ. ހަމްރާއާއި އެލީ ކޮންމެ ދުވަހަކު އެމީހުންނަށް ގުޅުމަށް އެދުނެވެ. ހާފިޒާ އެދުނީ ރަނގަޅަށް ކައިގެން ޞިއްޙަތަށް ބަލައިގެން އުޅުމަށެވެ. ބައްޕައަށް ފަނޑު ހިނިތުންވުމެއްގައި ހުރެ އެއްވެސް ކަމެއް ދިމާވިއްޔާ ގުޅާލުމަށް އެދުނެވެ. ހިލްޔާ އެ ވާހަކައަށް އާނއެކޭ ބުނެލި ހިނދު، ފަހަތުގައި ހުރި ރާފިލްގެ ބުމަގޮށްޖެހި، އަތް މުއްކެވިގެން ދިޔަ ކަމެއް ހިލްޔާއަށް ނޭނގެއެވެ.

ބައްޕައާއި އޭނަގެ މުޅި ޢާއިލާއަށް ފަސްދީފައި ރާފިލް އާއިއެކީ އެއާރޕޯޓަށް ވަންނަން ދިޔަ ވަގުތު، އަމިއްލަ ރައްކާތެރިކަން ދޫކޮށްލެވުނު ކަމުގެ އިޙްސާސެއް ހިލްޔާއަށް ކުރެވުނެވެ. ހިނގަމުން ދިޔައިރު ރާފިލްއަށް ބަލާލެވުނީ، އެފަދަ ރައްކާތެރިކަމެއް އިޙްސާސް ކުރެވޭތޯ ބެލުމަށެވެ. އެހެނަސް ރާފިލް އޭނަގެ އެންމެ ސޫޓް ކޭސް ދަމަމުން ހިލްޔާއަށް ބެލުމެއް ވެސް ނެތި ކުރިއަށް ދިޔަ ގޮތުން ހިލްޔާއަށް އެ އިޙްސާސެއް ނުކުރެވުނެވެ. އޭނަ އެ ބަރު ޓްރޯލީ ކޮއްޕަމުން ދާއިރު ރާފިލް އެހީއެއް ވެދޭނެނަމައޭ ހިތަށްއެރިއެވެ. އޭނައަށް ނުވާނެތީވެއެއް ނޫނެވެ. އެހެނެއްކަމަކު މި ހުރިހާ ދުވަހު އޭނަގެ ބައްޕަ އޭނައަށް ދައްކާފައިވީ އެ މިސާލު ކަމަށްވުމުންނެވެ. ފިރިހެނުންނަކީ އަންހެނުންނަށް މިފަދަ ކަންކަމުގައި އެހީވެދޭން ތިބޭ ބައެއްކަމުގައި ހިލްޔާއަށް ބައްޕަގެ ފަރާތުން ދަސްވެފައިވެއެވެ.

އެހެނަސް އަނެއްކާވެސް ރާފިލްގެ ބަސްތަކުން ހިލްޔާގެ ސިކުނޑި ފުރުނެވެ. އޭނައަކީ ‘މިނިވަން’ އަދި ‘ވަރުގަދަ’ އަންހެން ކުއްޖަކަށްވުމުން އޭނައަށް މި ކަންތައް ކުރެވެން ވާނެއޭ ހިތަށްއެރިއެވެ. ރާފިލްއަށް އެންމެ ކަމުދަނީ އެކަހަލަ ކުދިން ކަމަށްވުމުން ހިލްޔާ އޭނަގެ ‘ބޯދާ’ ޚިޔާލުތައް ދޫކޮށް ކުރިއަށް ދިޔައެވެ.

ހިލްޔާއަށް ނުފެނުނީ، ރާފިލްގެ އެ ޚިޔާލުތަކުން ހާމަވަމުން ދާ ރާފިލްގެ ފިނޑިކަމެވެ. ފިރިހެންވަންތަކަން ކުޑަ ކަމެވެ. ހިލްޔާ ބާރުވެރި ކުރުމުގެ ނަމުގައި އަމިއްލަ ޒިންމާތަކުން ރެކުމަށް އަޅާފައިވާ ފިޔަވަޅުތަކެވެ.

ރާފިލް ހިލްޔާއާއި ވާހަކައެއް ދައްކާލީ ޗެކިންގް ކިއުގައި މަޑު ކުރުމަށްފަހުއެވެ. ކާން ދާނީ ބާރގާރ ކިންގަށް ދޯ އޭ ބުންޏެވެ. ހިލްޔާއަށް އެތަން އެހާ ކަމު ނުދިޔަޔަސް ވަގުތުން އާނއެކޭ ބުނެލިއެވެ. މިހާތަނަށް އައިއިރު ރާފިލްއަށް ނޫނެކޭ ބުނަން ނުކުޅެދިފައިވަނީ، ނަފްސާނީ ގޮތުން ރާފިލް ހިލްޔާ ބަލިކަށި ކޮށްފައިވި މިންވަރުންކަން ހިލްޔާއަށް ނޭނގެއެވެ. ބާރުވެރި ކުރުވުމުގެ ޖަޒުބާތުތައް ހިލްޔާގެ ހިތުގައި އަށަގެނުވިޔަސް، އަބަދުވެސް އެންމެ މޮޅު ގޮތަކީ ރާފިލް ބުނާ ގޮތްކަމަށް ޤަބޫލު ކުރުމަށް ހިލްޔާގެ ވިސްނުން ބަދަލުވެފައިވެއެވެ.

15 ވަރަކަށް މިނެޓް ފަހުން ޗެކިންގް ވުމަށްފަހު ހިލްޔާ ރާފިލްއާއި އެކީގައި އިނީ ބާރގާރ ކިންގް ގެ މޭޒުދޮށުގައެވެ. އެ މޭޒުދޮށުގައި އިށީނދެވުމުން ހިލްޔާއަށް ވާހަކަ ދެކެވުނެވެ.

“ބައްޕައާ އެހާ އިންޓެންސްކޮށް ދެކެވުނީ ކޮން ވާހަކައެއް؟” ހިލްޔާއަށް އަހާލެވުނެވެ. އެ ހުރިހާ އިރު ވީއިރު ރާފިލްއާއި އެ ސުވާލު ނުކޮށް ހުރެވުނީ ރާފިލް ނުރުހުންވެދާނެ ތީވެއެވެ. އެ ސުވާލު ކުރިއިރު ވެސް އެ ނުރުހުމާއިމެދު ހިތުގައި ނުތަނަވަސްކަމެއް ވިއެވެ.

“ޑޯންޓް އިވެން އާސްކް. ހިޓްލަރު ދައްކާނެ ވާހަކަތައް އެނގެއެއްނު؟ ހިލްޔާ ރަނގަޅަށް ބަލައްޗޯ. ކައިވެންޏެއް ކޮށްގެން ނޫނީ ކައިރި ނުވާށޯ. ބްލާ ބްލާ ބްލާ….ގޯޑް އައި ކާންޓް ސްޓޭންޑް ހިމް. އޭޒް އިފް އަހަރެން ހިލްޔާ ނުބާނެހެން ހީވަނީ. އޯލްސޯ ހާދަ އޯލްޑް ފެޝަންޑް ވިސްނުމެކޭ އެ ގެންގުޅެނީ ދޯ؟ ކޮންމެހެން ކައިވެނި ނުކުރިޔަސް އަހަންނަށް ހަމަ ހިލްޔާގެ އެޕާޓްމެންޓަށް ވިޒިޓް ކުރެވިދާނެދޯ؟” ރާފިލް ބުންޏެވެ.

ރާފިލް އެ ކޮށްލި ފަހު ސުވާލުން ހިލްޔާއަށް ނުތަނަވަސް ގޮތަކަށް ހީލެވުނެވެ. ރާފިލްގެ އެ ސުވާލަށް ނޫނެކޭ ބުނަން ބޭނުންވިއެވެ. ރާފިލް އޭނައާއި ނުއިންނަ ޙާލުގައި ރާފިލް އޭނަގެ އެޕާޓްމެންޓަށް ވަނުމަކީ އޭނަ ވެސް ރުހޭ ގޮތެއް ނޫނެވެ. އެހެނަސް އެހެން ބުނާކަށް ނުކެރުނެވެ. އެއާއިމެދު ރާފިލް ރުޅިވެރިވެދާނެ މިންވަރެއް ނޭނގުނީތީވެއެވެ.

ހިލްޔާ ވަކި އެއްޗެކޭ ނުބުނެ އިންދާ ރާފިލް ބޯހޫރުވާލިއެވެ.

“ކޮންމެ ގޮތެއްވިޔަސް އަހަރެން ނުޖެހޭދޯ ތި ހިޓްލަރު ބުނާހާ ގޮތަކަށް އުޅޭކަށް. މިރޭ ފުރައިގެން ދިޔައިމަ އަހަރުމެން އުޅޭނެ ގޮތަކަށް އަހަރުމެން އުޅޭނީ. ނޫންތަ ހިލްޔާ؟” ރާފިލް ބުންޏެވެ.

ހިލްޔާއަށް އެ ވާހަކަތައް ބޯޖަހާލެވުނީ ވަރަށް ކުޑަކޮށެވެ. ރާފިލް އެ ސިފަކުރި ‘އުޅޭނެ ގޮތަކީ’ ކޮބައިކަން ސާފެއް ނުވުމުންނެވެ. ރާފިލްގެ މަންމައާއި ބައްޕަ މިކަމާއިމެދު ދެކެނީ ކިހިނެއްތޯ ހިތަށްއެރިއެވެ. އެ ދެމީހުން އެންގޭޖްމެންޓް ޕާޓީއިން ފެނުނު ފަހުން ހިލްޔާއަށް އެމީހުން ފެނިފައެއް ނުވެއެވެ.

“ރާފިލްގެ ޕޭރެންޓްސް ނާންނަނީތަ ރާފިލް ފުރުވަން؟” ހިލްޔާއަށް އަހާލެވުނެވެ.

“ޔެސް! ޔޫ ނޯ ވާއި؟ ބިކޯޒް ދޭއި ނޯ އައި އޭމް އަ މޭން! މިނިވަންކަމާއެކު ދޫކޮށްފަ އެ ހުންނަނީ. ހިލްޔާގެ ބައްޕައަށް ނުވިސްނުނަސް ވިސްނޭ ޕޭރެންޓްސް އުޅެއޭ.” ރާފިލް ބޮޑާވެގަތުމަށްޓަކައި ދޮގެއް ހެދިއެވެ. އޭނަގެ މަންމަ ނައީ އޭނަގެ މަންމައަކީ ބައްޕަ އެދޭ ތަނަކަށް ނޫނީ ގެއިން ނިކުތުމުގެ މިނިވަންކަމެއް ލިބިފައި އޮންނަ މީހަކަށް ނުވާތީވެއެވެ. ބައްޕަ ނައީ، އޭނަގެ ބައްޕައަކީ އެހެން ނޫނަސް އޭނައާއި ގާތް ގުޅުމެއް އޮންނަ މީހަކަށް ނުވާތީވެއެވެ. އެހެނަސް ރާފިލް ދެންމެ އެ ބަސްތައް ބުނެލީ، ހިލްޔާއާއި ހިލްޔާގެ ޢާއިލާ އޭނައާއި އޭނަގެ ޢާއިލާއަށްވުރެ ދަށްކޮށްލުމަށެވެ.

ހިލްޔާއަށް އެ ދަށްކޮށްލުން އިޙްސާސް ކުރެވުނެވެ. އެ އިޙްސާސާއި އެކީ އިސްވެސް ޖަހާލެވުނެވެ. އޭނަގެ ބައްޕަ ވެސް އޭނައަށް ‘މިނިވަންކަން’ ދީފައި ހުންނާނެ ނަމައޭ ހިތަށްއެރިއެވެ.

“އެނީވޭސް، ޔޫ އާރ ލުކިންގް ވެރީ ބިއުޓިފުލް ޓުޑޭ. ހިޓްލަރު ބައްޕައާމެދު އަޕްސެޓް ނުވެ އަހަންނަށްޓަކައި ސްމައިލް ކޮށްލަބަލަ.” ރާފިލް ވަގުތުން މޫޑު ބަދަލުކޮށްލިއެވެ. އޭނަ ހިލްޔާ ދަށްކޮށްލީކަން ހިލްޔާއަށް ވަންހަނާ ކުރުމުގެ ގޮތުންނެވެ. އެކަން ކާމިޔާބުވެސް ވިއެވެ. ހިލްޔާ ހިނިތުންވެލުމާއިއެކު، އަނެއްކާވެސް ރާފިލްއަކީ އޭނަދެކެ ލޯބިވާ ލޯބިވެރިޔާކަން ހަނދާންވިއެވެ. އޭނަގެ މި ‘ނިކަމެތި’ ދިރިއުޅުމުން އޭނަ ސަލާމަތް ކޮށްދޭނެ ހަމައެކަނި ފަރާތަކީ މިއީ ކަމަށް ޤަބޫލު ކުރެވުނެވެ.

އެވަގުތު ކޮޅުން ފެށިގެން ރާފިލް މުޅިން ވެސް ދެއްކީ ހިލްޔާ އުފާވާނެ ކަހަލަ ވާހަކަތަކެވެ. ހިލްޔާ ހެއްވާލާ ފަދަ ސަމާސާތަކެއް ކުރިއެވެ. އެކަންތަކުގެ މުރާދު ޙާސިލުވިއެވެ. ހިލްޔާގެ ހުރިހާ އުފާވެރިކަމެއްގެ ޙަޤީޤީ ސަބަބަކީ ރާފިލް ކަމަށް ޤަބޫލު ކުރެވުނެވެ. ދޭތެރެ ދޭތެރެއިން ރާފިލް އޭނަ ދެރަވާ ކަހަލަ ވާހަކަތައް ދައްކައި، އޭނައާއި އަޅާނުލާހެން ހީވިޔަސް، ރާފިލްއަކީ ރަނގަޅު ބައިވެރިއެއްކަމަށް ޔަޤީން ކުރެވުނެވެ. އެއްވެސް ގުޅުމަކީ އެންމެ ފުރިހަމަ ގުޅުމަކަށް ނުވާނެ ނޫން ހެއްޔެވެ؟

ފުރަން ގާތްވަމުން ދިޔަދިޔަހެން އަނެއްކާވެސް ރާފިލް ގެ ފަރާތުން ހިލްޔާ ހިތްހަމަނުޖެހޭ އެހެން ކަމެއް ފެންނަން ފެށިއެވެ. ލަދުވެތިކަމުގައި އޭނައާއި ރާފިލްގެ ނަޒަރިއްޔާތު ތަފާތުކަން ހިލްޔާއަށް އެނގުންވާން ފެށިއެވެ.

ޑިޕާރޗާރގެ ގޮނޑީގައި ތިބެ، އެއާރޕޮޑް ޙިއްސާ ކޮށްގެން ރާފިލްގެ ފޯނުން ފިލްމެއް ބެލުމުގެ ޚިޔާލު ހުށަހެޅީ ރާފިލްއެވެ. އެއީ އިނގިރޭސި ލޯބީގެ ފިލްމެކެވެ. ހިލްޔާއަށް އިނގިރޭސި ފިލްމުތައް އެހާ ކަމުނުދިޔަޔަސް ރާފިލްއަށް އާނބަސް ބުނެވުނެވެ. ފިލްމުގެ ތެރެއިން އަންހެން އަދި ފިރިހެން ބަޠަލާގެ ލަދު ކުޑަ މަންޒަރެއް އަންނަން ފެށުމުން ހިލްޔާއަށް ލޯ މަރާލަމުން އަނެއް ފަރާތަށް މޫނު އަނބުރާލެވުނީ ބޭއިޚްތިޔާރުގައެވެ. މިއީ އޭނަ އެކަނި އިނދެ ބަލާއިރު ވެސް އަވަސްކޮށް ފޮނުވާލާ ތަންތަން ކޮޅެވެ. ބަލަން ހަމަ ނުކެރެނީއެވެ.

އެހާ މީހުން ގިނަ ހާމަ އެއާރޕޯޓުގައި، އަދި އަމުދުން ރާފިލް އާ އެކީ އެ މަންޒަރު ބަލަންވުމުން ހިލްޔާގެ އެ ލަދުވެތިކަން އިންތިހާ ދަރަޖައަށް ދިޔައެވެ. ރާފިލްއަށް މި ތަނުގައި އެ މަންޒަރު ބަލަން ކެރޭތީ ވެސް އަޖާއިބުވާހާވިއެވެ.

“ވަޓް ހެޕެންޑް؟” ރާފިލް ފިލްމު މަޑުކޮށްލުމަށްފަހު ހިލްޔާއަށް ބަލާލަމުން އެހިއެވެ.

“މް…މާ އެހެން ކަހަލަ ސީންއެއް ދޯ؟ ހެހެ….” ހިލްޔާއަށް ޖެހިލުންވުމަކާއެކު ބުނެލެވުނެވެ.

“ވަޓް؟ ދިސް؟ މިއީ އެއްވެސް އެއްޗެއް ނޫނެއްނު އަދި؟ ޑޯންޓް ޓެލް މީ މީތި ފެނިފަ ލަދުންނޭ ތިއުޅެނީ.” ރާފިލް ސީދާ ވެލަމުން ރަނގަޅަށް ހިލްޔާއަށް ބެލުމުން ހިލްޔާއަށް ހީލުމަކާއެކީ ރަތްވެގެން ދިޔަ މޫނު ފޮރުވާލެވުނެވެ.

“ދެން ލަދު ގަންނާނެއެއްނު ތިކަހަލަ ސީންއެއްވީމަ؟” ހިލްޔާ ހަމައަކަށް އެޅެން މަސައްކަތް ކުރަމުން މޫނުން އަތް ނަގައި ބުނެލިއެވެ.

“އުނހު…އަހަރެންގެ ގާލްފްރެންޑެއް ވިއްޔާ މިކަހަލަ ސީންއެއް ފެނިފަ ލަދެއް ނުގަންނާނެ. މެރީ ކުރާ ވާހަކަ ދައްކަނީ. މެރީ ކުރުމަށްފަހު ޕްރެކްޓިކަލީ މި ކަންތައް ކުރާނީ. ދެން ބެލުމުގަ ކޮބާ މައްސަލައަކީ؟ ބަލަން ނުކެރެންޏާ ކުރަން ވެސް ލަދު ގަންނާނެ ދޯ؟ ދެޓް ވުޑް ބީ އަ ޓާން އޮފް.” ރާފިލް އެހެން ބުނެ ބޯހޫރުވާލަމުން އަނެއްކާވެސް ފިލްމު ޕްލޭ ކުރަން ފެށިއެވެ.

އެއާއިއެކު ހިލްޔާއަށް އަނެއްކާވެސް އެ ލަދުކުޑަ މަންޒަރުތަކުގެ ޑައިލޮގްތައް އިވެން ފެށިއެވެ. އެ މަންޒަރުތައް އޭނައަށް ބަލަން ނުކެރޭތީ ރާފިލް އޭނައަށް ނުރުހުންވާހެން ހީވުމުން ހިލްޔާ ދެރަވިއެވެ. ރާފިލް ރުއްސުމަށްޓަކައި އަނެއްކާވެސް ސްކްރީނަށް ނަޒަރެއް ދެވުނެވެ. އެހެނަސް އަނެއްކާވެސް ހިލްޔާއަށް ލޯ މަރާލެވުނީ، އެކަމާ އޭނަގެ ޒަމީރު އެއްގޮތަކަށް ވެސް އެއްބަސް ނުވުމުންނެވެ. އެކަމާއިމެދު އަމިއްލަ ނަފްސާއިމެދު ހިތްހަމަ ނުޖެހުނެވެ.

ރާފިލް ފަދަ ހަވާ ނަފްސަށް ތަބާވާ މީހަކު ރުއްސަން ކޮންމެހެން ނުޖެހޭނެކަން ހިލްޔާއަށް އެނގޭނެ ނަމައެވެ. ހިލްޔާއަށް އެ މަންޒަރުތައް ބަލަން ނުކެރެނީ، އޭރުވެސް ހިތު ތެރޭގައިވި އީމާންތެރިކަމެއްގެ ސަބަބުންކަން ހިލްޔާއަށް އެނގޭނެ ނަމައެވެ. ލަދުވެތިކަން ގެއްލުމަކީ އެ އީމާންތެރިކަން ވެސް ގެއްލުން ކަން އެނގޭނެ ނަމައެވެ.

**

ދާނިޝްއަށް އެރޭ އެއާރޕޯޓުން ގެއަށް ދެވުނުއިރު 9 ޖަހަން ގާތްވަނީއެވެ. ގެއަށް ގޮސް ވަންއިރު ހިތުގެ ބޮޑު ބަޔަކުން އިޙްސާސް ކުރެވެމުން ދިޔައީ ހުސްކަމެވެ. އެއީ ކީއްވެތޯ އަމިއްލަ ނަފްސާއި ސުވާލު ކުރުމުން ސިފަވެގެން ދިޔައީ އޭނަ ހިލްޔާއަށް ފަސްދީފައި ނަހީދުބެ ގެ ކާރަށް އަރަން ދިޔަ ގޮތެވެ. ހިލްޔާއަށް ރަނގަޅަށް އަލްވަދާޢު ވެސް ނުކިޔޭކަން މާ ފަހުން އެނގިގެން ދިޔަ ގޮތެވެ. މިއަދަށްފަހު އޭނައަށް ހިލްޔާ ދެން ދުވަހަކުވެސް ނުފެނުމަކީ ގާތްކަމެއް ކަން އެނގުންވި ގޮތެވެ. ފެނުނަސް ދެން ފެންނާނީ އެހެން މީހެއްގެ އަންބެއްގެ ގޮތުގައި ކަން ޤަބޫލު ކުރެވުނު ގޮތެވެ.

މި ހުރިހާ ޚިޔާލުތަކާއިއެކީ ދާނިޝް ގެއަށް ވަދެގެން ގޮސް ޙަރަކާތްތައް އަވަސްކޮށްލިއެވެ. ހިލްޔާގެ ކައިވެނީގެ ވާހަކަ ނަހީދުބެ ގެ ފަރާތުން އިވުނު ރޭ ފަދައިން ކަންތައް ކޮށްފިނަމަ ހިތަށް ލުޔެއް ލިބިދާނެ ކަމަށް ހީކުރަމުންނެވެ. ސިކުނޑި ތާޒާކޮށްލުމަށްޓަކައި ފެންވަރާލުމަށްފަހު ވުޟޫކޮށްލިއެވެ. އަދި އާދައިގެ މަތިން ނިދުމުގެ ކުރިން ނަމާދު ކުރަން ތައްޔާރު ވެލީ ފަސޭހަ އަޅިކުލައިގެ ޓީޝާޓަކާއި ކަޅުކުލައިގެ ފަޓުލޫނެއް ލަމުންނެވެ.

ދާނިޝް ހީކުރި ގޮތާއި ޚިލާފަށް އެރޭ އެ ހުރިހާ ކަމެއްގެ ތެރެއިން ވެސް އޭނަގެ ހިތަށް އުދަގޫވަމުން ދިޔައެވެ. އުޅެމުން ދިޔަ ވަގުތުކޮޅަށް ސަމާލުކަން ދޭން ދަތިވަމުން ދިޔައެވެ. މީގެ ދުވަސްކޮޅެއް ކުރިން ހިތަށް ވެރިވާން ފެށި ހިތާމަވެރިކަން ހިތަށް މުޅިން ވެރިވެފައިވި ފަދައެވެ. މުޅިންހެން ވިސްނެމުން ދިޔައީ ހިލްޔާ ރާފިލްއާއިއެކީ ވަރަށް ދުރަށް ފުރަން އުޅޭ ކަމާއި މެދުގައެވެ. ރާފިލްގެ ބަދަލުގައި އޭނަ އެ މަޤާމުގައި ނެތީ ކީއްވެތޯ ތަކުރާރުކޮށް ހިތަށް އަރަމުން ދިޔައެވެ. އޭނައަށް ކައިވެންޏެއް ނުކުރެވެންވީ ކީއްވެ ހެއްޔެވެ؟ އޭނަ މިކަމަށް އެދޭތާ ކިހާ ދުވަހެއް ހެއްޔެވެ؟ ރީތި ދިވެހި އަންހެން ކުއްޖަކާއި އިނުމަށް އުއްމީދު ކުރެވުމަކީ މާ ބޮޑު ކަމެއް ހެއްޔެވެ؟ މިއީ ދުވަހަކުވެސް ފުރިހަމަ ނުވާނެ އުއްމީދަކީ ހެއްޔެވެ؟

ނަމާދު ކުރުމަށް ޢާއްމުކޮށް ހުއްޓޭ ތަނަށް ގޮސް ނަމާދު ކުރުމުގެ ބަދަލުގައި ދާނިޝްއަށް އިށީނދެވުނީ އެ ޚިޔާލުތަކާއި އެކީގައެވެ. ކިތަންމެ ބޭނުމެއް ނުވިޔަސް ތަޤްދީރާއި މެދު ހިތުގައި އުފެދެން ފެށި ޝަކުވާތައް ގިނަވާން ފެށިއެވެ. ހިތުގައި އުފެދުނު ހިތާމަވެރި އިޙްސާސްތަކުގެ ބޭނުން ޝައިޠާނާ ހިފުމުންނެވެ.

ހިލްޔާ ދާނިޝްއަށް ނުލިބެންވީ ކީއްވެބާއޭ ތަކުރާރުކޮށް ދާނިޝްގެ ހިތް ސުވާލު ކުރަން ފެށިއެވެ. ރާފިލް ކަހަލަ ގޯސް މީހުންނަށް މި ޙަޔާތުގައި ވެސް ލިބެން ޖެހޭނީ ހިތާމަތަކެއް ނޫންތޯ ހިތަށްއެރިއެވެ. ރާފިލް އޭނަގެ މަންމަ މަރާލުމަށްފަހު އޭނައަށް ކަމުދާ އަންހެން ކުއްޖާއާއި އިނުމުން ވެސް އެ ވަނީ ހާދަ ބޮޑު ނާއިންސާފެކެވެ.

ބައެއްފަހަރު ޙަޔާތުގައި ކަން ހިނގާ ގޮތްތަކުން ކަންތައް ވަނީ ނާއިންސާފުން ހެން އިންސާނުންނަށް ހީވެދާނެއެވެ. އެ ހުރިހާ ކަމަކީ ވެސް ﷲ ގެ ފުރިހަމަ ނިންމެވުންކަން އިންސާނާއަށް ފަހުމް ނުވަނީ، އިންސާނާއަށް ލިބިފައިވާ ޢިލްމު ކުޑަވުމުންނެވެ. ﷲ ސުބްޙާނަހޫ ވަތަޢާލާ އެއްވެސް މީހަކަށް ދެރަ ގޮތެއް މެދުވެރި ނުކުރައްވައެވެ. އެކަލާނގެ ޞާލިޙު އަޅުތަކުންނަށް ދަތި ޙާލަތްތައް މެދުވެރި ކުރައްވަނީ އާޚިރަތުގައި އެ އަޅުތަކުންގެ ދަރަޖަ މަތިވެރި ކުރެއްވުމަށެވެ. ގޯސް އަޅުތަކުންނަށް މުހުލަތެއް ދެއްވަނީ ތައުބާވުމުގެ ފުރުސަތު ދެއްވުމަށެވެ. އަދި އެ މީހުން ތައުބާ ނުވެއްޖެނަމަ އެމީހުން ކުރާ ނުބައި ޢަމަލުތަކުގެ ޢަޒާބު ބޮޑު ކުރެއްވުމަށެވެ.

އުއްމީދު ކުރާ ނިޢުމަތަކަށްވުރެ ފުރިހަމަ ނިޢުމަތެއް އޮވެގެން ނޫނީ އެ ލިބުން ލަސް ނުވާކަން ދާނިޝްއަށް އެނގޭނެ ނަމައެވެ. އަދި އާޚިރަތުގެ ޘަވާބަށް އެދޭ މީހެއްގެ ހިދާޔަތާއި ޘަވާބު އިތުރުވާނެ ގޮތަކަށް ނޫނީ ﷲ ކަންތައް މެދުވެރި ނުކުރައްވާނެކަން ދާނިޝްއަށް އެނގޭނެ ނަމައެވެ. ކައިވެންޏަކީ ވެސް އަޅުކަމެކެވެ. ކައިވެންޏެއް ކުރުމުގައި ނިޔަތް އިޚްލާޞްތެރިވުމަކީ ޘަވާބު އިތުރުވާނެ ކަމެކެވެ. އަދި އެ ނިޔަތް އެނގިގެން ކައިވެނި ކުރުމަކީ މި ދުނިޔޭގައި ވެސް އުފާވެރިކަން އިތުރުވާނެ ކަމެއްކަން ދާނިޝްއަށް ނޭނގެއެވެ. އެ ނިޔަތަކަށް ވާންޖެހެނީ ކޮންކަމެއް ކަން ވެސް ދާނިޝްއަށް ސާފެއް ނޫނެވެ. އަޅަކަށް ޢިލްމެއް ލިބިފައި ނުވާނަމަ، ޙަޔާތުގެ ތަޖުރިބާތަކުގެ ތެރެއިން ވެސް ﷲ ސުބްޙާނަހޫ ވަތަޢާލާ އެ އަޅަކަށް ދަސްކޮށްދެއްވައެވެ.

ދާނިޝް ހިތަށް އުދަގޫ ކުރަމުން ދިޔަ އިޙްސާސްތަކުން އަރައިގަންނަމުން، ނަމާދު ކުރުމަށް ތެދުވެލަން އުޅުނުތަނާހެން ފޯނު ރިންގުވާން ފެށި އަޑު އިވުނެވެ. ދާނިޝް އަތް ދިއްކޮށްލަމުން އެނދުމަތީގައި އޮތް ފޯނު ނަގައި ސްކްރީނަށް ބަލާލިއިރު ގުޅަނީ ނުދަންނަ ނަންބަރަކުންނެވެ. ކްލިނިކްގެ މަސައްކަތެއްގައި އޭނަ ގެނައި މީހަކަށް ވެދާނެއޭ ހިތައި ކޯލު ރިސީވް ކޮށްލެވުނެވެ.

“ހެލޯ؟” ދާނިޝްއަށް ސުވާލުގެ ރާގަކަށް ބުނެލެވުނެވެ.

“ހައި ޑޭން.” ކަންފަތް ދޮށުން އިވުނީ އޭނަ ދަންނަ އަންހެންވަންތަ އަޑެކެވެ. އުދަގޫވެފައިވި ހިތަކާއި، އެކަނިވެރި އެ ވަގުތުކޮޅު އަންހެން ކުއްޖަކު އޭނައަށް އެހާ ލޯބިން ގޮވާލުމުން ދާނިޝް ހިސާބަކަށް ބަލިކަށިވިއެވެ. އެ ގުޅީ ކާކުކަން ދަނެގަންނަން އިރުކޮޅެއް ނެގީ އެހެންވެއެވެ.

“ޒިވް.” ދާނިޝްއަށް އެހެން ބުނެލެވުނުއިރު ދެ ބުމަ ކައިރި ކޮށްލެވުނެވެ. ހިތުގައި ވަގުތުން ނުރުހުންތެރިކަމެއް އުފެދުނެވެ. އެހެނަސް ފޯނު ކަނޑާލަން ހިތަށްއެރިއެއްކަމަކު އެ ވަގުތު ފޯނު ކަނޑާނުލެވުނީ، ޒިވްގެ ހީލުމުގެ އަޑު އިވުމުންނެވެ. އެހިނދު މަސްތުގައި ޖެހުނު ކަހަލަ އިޙްސާސެއް ދާނިޝްއަށް ކުރެވުނެވެ.

“އަދިވެސް ހަނދާން އެބަހުރި ދޯ އަހަރެންގެ އަޑު؟ އެޑްމިޓް އިޓް ޑޭން. އަދިވެސް އަހަރެން މަތިން ހަނދާންވޭ ދޯ؟” ޒިވް ބުންޏެވެ.

“ނުވޭ.” ދާނިޝްއަށް ތެދުތެދަށް ބުނެވުނެވެ.

“އަޅެ ދެން….ޑޭން އަހަރުމެންގެ ގުޅުމަށް ފުރުސަތެއް ނުދެންޏާ ހަނދާނެއް ނުވާނެއެއްނު؟ މިރެއަކީ ކޮން ރެއެއްކަން ޑޭންއަށް އެނގޭތަ؟” ޒިވް އެހިއެވެ.

“ނޭނގެ.” ދާނިޝްއަށް ބުނެވުނެވެ. އެވަގުތު ވެސް ފޯނު ކަނޑާލުމަށް ބުނެ ހިތް ހަޅޭއްލަވަމުން ދިޔައެއްކަމަކު އެކަމަށް ނުކުޅެދިފައިވިއެވެ.

“މިރެއަކީ އަހަރުމެން ރައްޓެހިވި ދުވަހަށް 1 އަހަރު ފުރޭ ދުވަސް. ޓައިމް ފްލާއިސް ދޯ؟ އައި ރިމެމްބާރ…އެހެންނެއްނު ވާނީ؟ ތިހާ ހޭންޑްސަމް ވެފަ ހޮޓް ފިރިހެނަކު އަހަރެން ދުނިޔޭގެ އެއްވެސް ކަންކޮޅަކުން ނުދެކެން. އޮންލީ ޔޫ ކޭން މޭކް މީ ފީލް ދިސް ވޭ. އަންޑަސްޓޭންޑް އެބަވޭތަ ޑޭންއަށް؟” ޒިވް ވާހަކަ ދެއްކިއެވެ.

ޒިވް ގެ ވާހަކަތައް އެ މިޞްރާބަށް ދާން ފެށުމުން ދާނިޝްއަށް ފޯނުގައި ބާރަށް ހިފަހައްޓާލެވުނެވެ. އެއްޗެކޭ ވެސް ނުބުނެ ފޯނު ކަނޑައި އެ ނަންބަރު ބްލޮކް ކޮށްލުމަށެވެ. އެހެނަސް އޭނަ މިހެން އުޅޭނީ ކިހާ ދުވަހެއް ވަންދެންތޯ ޝައިޠާނާ އެވަގުތު އޭނަ ގާތު ބުންޏެވެ. އޭނައަކީ ވެސް އެދުންތަކެއް ހުރި ފިރިހެނެކެވެ. މުޅި ޢުމުރު ދުވަހު އުޅެފައިވަނީ އަންހެނުންނާއި ދުރުންނެވެ. ކޮންމެވެސް ދުވަހަކުން ކައިވެންޏަކަށް ފަހު އަންހެން ކުއްޖަކާއި ގާތްވުމަށެވެ. މަންމަ ކިޔައިދިން ރީތި ގޮތުގައި ހިފުމަށެވެ.

އެހެނަސް މުޅި ޢުމުރު ދުވަހަށްފަހު އޭނަ އެހާ އެދިގެން އިންނަން ބޭނުންވި އަންހެން ކުއްޖާ ވެސް އެ ވަނީ ފުރަން ގޮއްސައެވެ. އޭނައަށްވުރެ މާ ލަދުކުޑަ ފިރިހެނަކާއި އިންނަން ނިންމައިގެންނެވެ. އެދުންތައް ފުރިހަމަ ވެވެން އޮތީ ލަދުކުޑަ ވެގެން ކަމަށްވާނަމަ އޭނަ ވެސް ލަދުކުޑަ ނުވާންވީ ކީއްވެ ހެއްޔެވެ؟ އަދި އަމުދުން ހިލްޔާއަކީ ވެސް ދީން އުނގެނިގެން ވެސް ފިރިހެނަކާއި ރައްޓެހިވެގެން އުޅޭ ކުއްޖެކެވެ. ދީނުގައި އެއީ ގޯސް ކަމަކަށް ވާނަމަ ހިލްޔާ އެކަމާއި ދުރުވީސް ނޫންހެއްޔެވެ؟

“ހެލޯ؟ ޑޭން އެބަހުރިންތަ؟” ދާނިޝް އެއްޗެކޭ ނުބުނެ ގިނައިރުވާން ފެށުމުން ޒިވް އެހިއެވެ. އެއާއިއެކު ދާނިޝްއަށް ހަމަހޭވެރިކަމެއް ލިބުނެވެ.

“އެބަ ހުރިން.” ދާނިޝް ބުންޏެވެ. އެހިނދު ފޯނު ކަނޑާލާ ޚިޔާލު މުޅިން ބަދަލު ކުރެވިއްޖެއެވެ. ހިލްޔާ މީހަކާއި ރައްޓެހިވެގެން އުޅޭއިރު، އޭނަ މިހެން އަންހެން ކުއްޖަކާއި ކުޑަކޮށް ވާހަކަ ދައްކާލިޔަސް އެއީ މައްސަލައެއް ނޫނެއްނޫންތޯ ހިތަށްއެރިއެވެ.

ﷲ ގެ ތަޤްދީރާއިމެދު ތަކުރާރުކޮށް ސުވާލު އުފެއްދުމަކީ ފާފަތަކަށް ހުޅުވޭ ދޮރެކެވެ. އެކަލާނގެ ރަޙްމަތުން އުއްމީދު ކަނޑާލެވޭ ކަމެކެވެ. ދާދި ދެންމެއަކު ފޯނު ބާއްވަން އުޅެފައިވެސް ދާނިޝްގެ ޚިޔާލު ބަދަލުވީ އެހެންވެއެވެ. އެވަގުތުކޮޅު ހިތުގައި ޒީނަތްތެރިވާން ފެށީ އެހެންވެއެވެ.

“ހާދަ ޖެނެރަސް އޭ މިރޭ. އުފާވެއްޖެ ޑޭން އަހަންނާ ވާހަކަ ދައްކާތީ. އަހަރެން ހިތަށްއަރާ އެއްޗެއް ބުނަންތަ؟ އަހަރުމެން މާޒީ މަތިން ހަނދާން ނައްތާލާފަ އަލުން ފަށަންވީއޭ. އަހަރުމެން ދެމީހުން އަސްލު ހާދަ ގުޅޭނެއޭ. އަހަންނަށް ހެޔޮ ޑޭން ފިލްމު ނުކުޅުނަސް. ޑޭން ރައްޓެހި ނުވާނަންތަ އަހަންނާ؟” ޒިވް އެހިއެވެ.

ޒިވްގެ އެ ސުވާލަށް ޖަވާބު ދޭން ނޭނގިފައި ދާނިޝްއަށް އިނދެވުނެވެ. ރައްޓެހިވުމޭ ބުނުމުން ހަނދާނަށް އަންނަން ފެށީ މާޒީގައި ޒިވް އޭނައާއި ގާތްވާން އުޅުނުހާ ގޮތްތަކެވެ. ޒިވް ގެ ނަޒަރުގައި ރައްޓެހިވުމަކީ އެއީ ކަން ދާނިޝްއަށް ރަނގަޅަށް އެނގެއެވެ. މި ހުރިހާ ދުވަހު އޭނަ ދިޔައީ އެކަމަށް އިންކާރު ކުރަމުންނެވެ.

އެހެނަސް ކީއްވެކަމެއް ނޭނގެއެވެ. އެވަގުތު ކޮޅުގައި ދާނިޝް ބަލިކަށިވެފައިވިއެވެ. ކައިރި މާޒީއެއްގައި އޭނަގެ ކައިވެނި ނުކުރެވޭނެކަން ޔަޤީން ކުރެވިފައި ވުމުންނެވެ. ހިލްޔާ އޭނަ ނޫން މީހަކު ޚިޔާރު ކޮށްފައިވުމުންނެވެ. ހިލްޔާ އޭނައާއި މާ ދުރަށް ފުރަން އުޅޭކަން އެނގުންވުމުންނެވެ.

ދާނިޝް އެއްޗެކޭ ނުބުނެ ގިނައިރުވާން ފެށުމުން ޒިވް ވާހަކަ ދެއްކިއެވެ.

“ލުކް ޑޭން. އަހަންނަށް އެނގޭ ތިއީ ވަރަށް ރަނގަޅު މީހެއްކަން. އެނގޭ އެހެންވީމަ ކަން ޑޭން އަހަންނާ ގާތް ނުވާނީ. އެކަމަކު އަހަރެން ހިތަށްއަރާ އެއްޗެއް ބުނަންތަ؟ އަ ގުޑް މޭން ލައިކް ޔޫ ޑިޒާވްސް އަ ގުޑް ވުމެން. ޑޭން ގެ ރޭތައް ފުރިހަމަ ކޮށްދޭނެ އަންހެން ކުއްޖަކު ޑޭންއަށް ބޭނުންވަނީ. އެންޑް އަހަންނަށް ހީވަނީ އަހަންނަށްވުރެ ރަނގަޅަށް އެކަން ކުރެވޭނެ މީހަކާ ޑޭން އަދި ދިމާވެސް ނުވާނެހެން. އައި ރިއަލީ ވިޝް ޔޫ ވާރ ހިއާރ. ވަކިން ޚާއްސަކޮށް މިރޭ ނިދަން ތައްޔާރުވެގެން އެނދަށް އަރާފަ އޮތީމަ ޑޭން މަތިން ހަނދާންވެގެން މި ގުޅާލީ. ޑޭން އަންނަންވީއެއްނު؟ ޓު މައި ޕްލޭސް؟”

ޒިވް ވާހަކަ ދައްކަމުން ދިޔަ ރާގާއި މިޞްރާބު ހީވެސް ނުވާހާ އަވަސްއަވަހަށް ބަދަލުވަމުން ދިޔަހެން، ދާނިޝްގެ ހިތުގެ ތެޅުން އަވަސްވިއެވެ. ޒިވް އެ ކޮށްލި ފަހު ސުވާލާއެކު ހިންދިރުވާލެވުނެވެ.

ނުނިމޭ