ނަފްސީ (ސަތިރީސްވަނަ ބައި)
ހިލްޔާގެ ނަސީބު ރަނގަޅުކަމުން ރާފިލް ބަލަމުން ދިޔަ ފިލްމުގެ ގޯސް މަންޒަރު އެހާ ގިނައިރު ވަންދެން ދެމިގެނެއް ނުދެއެވެ. އަނެއްކާވެސް ފިލްމުގައި އުޅޭ އެހެން މީހުންގެ އަޑު އެއާރޕޮޑުން އިވެން ފެށުމުން ހިލްޔާ ރާފިލް ގެ އަތުގައި އޮތް އައިޕެޑަށް ނަޒަރެއް ދިނެވެ. އޭނައަށް ބެލޭނެހެން ހީވާ މަންޒަރެއްކަން އެނގުންވުމުން ހިލްޔާ ފިލްމު ބެލުމާއިގެން ކުރިއަށް ދިޔައެވެ. އެހެނަސް މާ ގިނައިރެއް ނުވެ އެއާރޕޯޓު މުވައްޒަފަކު އައިސް ރާފިލް ގާތު ވާހަކައެއް ބުނަން އައުމުން ރާފިލް ފިލްމު ޕޯޒް ކުރިއެވެ.
“މިހާރު ލައުންޖަށް އަންނަން ބޭނުންތޯ؟” އެ މުވައްޒަފު ރާފިލް ގާތު ސުވާލު ކުރި އަޑު ހިލްޔާއަށް އިވުނެވެ.
“ޝުއާރ…ހިލްޔާ ލެޓްސް ގޯ.” ރާފިލް އެހެން ބުނެ ތެދުވެލުމުން ހިލްޔާއަށް އޮޅުމެއްގައި ހުރެ ތެދުވެލެވުނެވެ.
“ކޮން ތަނަކަށް؟” ހިލްޔާއަށް އަހާލެވުނެވެ.
“ޔޫ ވިލް ސީ!” ރާފިލް އެއްމިޔަކަނުގެ ހިނިތުންވުމަކާއިއެކީ އެހެން ބުނުމަށްފަހު އެ މުވައްޒަފާއި އެކީ ހިނގައިގަތެވެ. ހިލްޔާ ދެންވެސް ސާފު ނުވެފައި ހުރެ ހިސާބެއްގެ ނުތަނަވަސްކަމާއިއެކީ ރާފިލްގެ ފަހަތުން ދިޔައެވެ.
އެ މުވައްޒަފު ރާފިލް އާއި ހިލްޔާ ގޮވައިގެން ދިޔައީ ލީލި ލައުންޖަށެވެ. އެއީ ފަސްޓް ކްލާސް ފަސިންޖަރުން ފްލައިޓް ގެ އިންތިޒާރުގައި މަޑުކުރާ ލައުންޖެވެ. ލައުންޖްގެ ތެރެއިން މައިގަނޑަކަށް ފެނުނީ ބޮޑެތި ސޯފާތަކެވެ. އެ މުވައްޒަފު ރާފިލްއާއި ހިލްޔާ ގެންގޮސް އެމީހުން އިށީންނަންވީ ތަނާއި ހަމައަށް ގެންދިޔައެވެ. އެއީ ދެކޮޅުގައި ބޮޑު ކަޅުކުލައިގެ ދެ ސްޕޮންޖް ސޯފާ ބެހެއްޓިފައިވި ހުދުކުލައިގެ ވަށް އޮމާން މޭޒެކެވެ. އެ މޭޒުމަތީގައި ދެ ހުދުކުލައިގެ ތަށި ހުރިއިރު، އެއްތަށީގެ ކައިރީގައި، ޒާތެއްގެ އޮރެންޖް ކުލައިގެ ބުއިމެއް ހުރި ތަށްޓެއްވިއެވެ. އެ ބުއިމާއިމެދު ސުވާލު އުފެދިފައި ވަނިކޮށް ރާފިލް މުވައްޒަފު މީހާއަށް ޝުކުރު އަދާ ކުރުމަށްފަހު ހިލްޔާއާއި ދިމާލަށް އެނބުރިލިއެވެ.
“އަވަހަށް އިށީނދެލާ. އެމީހުން ޑެޒާޓެއް ގެންނާނެ އިރުކޮޅަކުން. އިތުރަށް ޑިނާރއެއް ނަގަން ބޭނުންތަ ހިލްޔާ؟” ރާފިލް އެހެން ބުނެލަމުން ހިލްޔާއަށްވުރެ ކުރިން ސޯފާގައި އިށީނެވެ. ހިލްޔާ ޖަވާބެއްގެ ގޮތުން ބޯހޫރުވާލަމުން ރާފިލްގެ ކުރިމައްޗަށް ވާ ގޮތަށް ހުރި ސޯފާގައި އިށީނެވެ. އެހިނދު ރާފިލްގެ ކައިރީގައި ހުރި ބުއިމުގެ ގަދަ ވަސް ނޭފަތާއި ހަމައަށް ފޯރުމުން ބޭއިޚްތިޔާރުގައި ނޭފަތުގައި އަތް އަޅާލެވުނެވެ.
އެހެނަސް ރާފިލްއަށް އެކަން ފާހަގަވީ ހެނެއް ހިއެއް ނުވެއެވެ.
“ސަޅި ދޯ މި ލައުންޖް؟ ހިލްޔާ ކުރިން މި ލައުންޖަށް އައިންތަ؟” ރާފިލް އެހިއެވެ.
“ނޫން ނާންނަން…” ހިލްޔާއަށް ވަށައި ނަޒަރެއް ދެމުން ބުނެލެވުނެވެ.
“އޮހް….ވީ އޯލްވޭސް ފްލައި ފަސްޓް ކްލާސް. އެހެންވީމަ އަބަދުވެސް މި ލައުންޖްގަ ޖައްސާލަނީ. ނޯ ވޮރީސް، ދެން ހިލްޔާ ވެސް އަބަދުވެސް ފްލައި ކުރާނީ ފަސްޓް ކްލާސް އިން. ސިންސް ޔޫ އާރ މައި ވުމެން.” ރާފިލް ބުންޏެވެ.
ހަމަ އެއާއިއެކު ހިލްޔާގެ މޫނުމައްޗަށް ލަދުރަކި ހިނިތުންވުމެއް ވެރިވިއެވެ. އިސާހިތަކު އަނެއްކާވެސް ހިތް ފަޚުރުވެރިކަމުން ފުރިގެން ދިޔައެވެ. ރާފިލް އޭނަގެ ލޯބިވެރިޔަކަށް ވީތީވެއެވެ. މިއީ ހަމަ އޭނަ ބަލައި އުޅޭ ފަދަ ޑްރާމާއެއްތާއޭ ހިތަށްއެވެ. ހަމަ އެހިނދު އަމިއްލަ ބައްޕައާއިމެދު ވެސް ދަށްކޮށް ދެކެވުނެވެ. ބައްޕައަށް ލާރި ލިބުނަސް ބައްޕަ މިހާ ދުވަސް ވީއިރު ވެސް އޭނަ ފަސްޓް ކްލާހުގައި އުދުހިޔަ ނުދިނީ ކީއްވެތޯ ހިތަށްއެރިއެވެ. ބައްޕަ އަބަދުވެސް ފައިސާ ރައްކާ ކުރަނީ ވިޔަފާރިއަށްޓަކައި ކަމަށްވީތީ ހެއްޔެވެ؟ އެހެންނޫނީ ބައްޕަ ރާފިލްއަށް ވުރެ ‘ފަޤީރުވުމުން’ ހެއްޔެވެ؟
އެ ސުވާލުތަކަށް ހިލްޔާއަށް ހިތާހިތުން އާނއެކޭ ބުނެވުނެވެ. އަދި އެވަގުތުކޮޅުގައި އޭނައަށް ބައްޕަ ދޫކޮށް ރާފިލްގެ ގާތަށް އާދެވުނީތީ އުފާ ކުރެވުނެވެ. ގިނައިން ދުނިޔެ ލިބުމުން އޭނައަށް ރައްކާތެރިކަން ލިބެނީ ކަމަށް ޤަބޫލު ކުރެވުނީތީވެއެވެ.
ދުނިޔެއަކީ ކިހާ ބަލިކަށި ތަނެއްކަން ހިލްޔާއަށް ވިސްނޭނެ ނަމައެވެ. ދުނިޔެ ދިއްކޮށްލާ އެހީތެރިކަމުގެ އަތަކީ ކެހިވެރިކަމުގެ އަތެކެވެ. އިންސާނާގެ ޙަޤީޤީ ރައްކާތެރިޔަކީ ﷲ ސުބްޙާނަހޫ ވަތަޢާލާއެވެ. އެ ނޫން ރައްކާތެރިޔަކު ޚިޔާރު ކޮށްފިނަމަ، އެ ޚިޔާރު ކުރި ރައްކާތެރިއެއްގެ ސަބަބުން އިންސާނާ ހިތްދަތިކަމާއި ކުރިމަތިލާން ޖެހޭނެއެވެ.
ލައުންޖްގައި ޑެޒާޓެއްގެ ގޮތުގައި ގެނެވުނީ ހިލްޔާއަށް ނުހަނު މީރުވި ބެލްޖިއަން ޗޮކްލެޓް ބްރައުނީއެކެވެ. ކެއުމުގެ ކުރިން ވެސް އޭތި މީރުވާނެކަން ދަނެގެން ހިލްޔާ އޭގެ ފޮޓޯ ސްނެޕްކޮށް، ލީލި ލައުންޖް ޓެގް ކުރިއެވެ. އޭނަ އުޅެނީ ކިހާ އަގުބޮޑެތި ތަންތާނގައި ކިހާ މީރުކޮށް ކައިގެންކަން ހުރިހާ އެކުވެރިންނަށް އެންގުމަށެވެ.
ލައުންޖްގައި ބައިގަޑިއިރެއްހާއިރު ހޭދަވުމާއިއެކު އެއްކަލަ މުވައްޒަފު ރާފިލްއާއި ހިލްޔާ ބަލާ އައެވެ. ދެމީހުންނަކީ ފަސްޓް ކްލާސް ފަސިންޖަރުންނަށްވުމުން އެއްވެސް ކިއުއެއްގައި މަޑު ނުކޮށް ބޯޑް ކުރުމަށްފަހު ފްލައިޓަށް އަރަން އެންމެ ކުރިން ދެވުނެވެ. ބްރިޓިޝް އެއާރވޭއިސްގެ ފަސްޓް ކްލާސް ބަޔަށް ވަދެވުމާއިއެކު އަންހެން ކެބިން ކްރޫއެއް އުޖާލާވި ހިނިތުންވުމަކާއިއެކީ ދެމީހުންނަށް މަރުޙަބާ ކިޔުނެވެ. ފްލައިޓްގެ ތެރެއަށް ހިލްޔާއަށް ނަޒަރެއް ދެވުނީ އެއަށްފަހުއެވެ. އެބައިގައި ހުރި ބޮޑެތި ކަޅުކުލައިގެ ސީޓުތަކާއި، ސީޓުތަކުގެ މަތީގައި ބެހެއްޓިފައިވި ބޮޑެތި ހުދުކުލައިގެ ބާލީސްތަކާއި، ކޮން ސީޓެއްގެ ކުރިމަތީގައި ޖާގަ ދެވިފައިވި މިންވަރުން މިއީ ފްލައިޓެއް ކަމާއިމެދު ވެސް ހިލްޔާ ހިނދުކޮޅަކަށް ހަނދާން ނެތޭ ގޮތްވިއެވެ.
ކޮންމެ ސީޓެއް ވެސް ކުޑަ ކުޑަ ކެބިންއެއްހެން ހެދިފައިވުމުން ހިލްޔާއާއި ރާފިލް އިށީންނަން ޖެހުނީ ފުދޭ ވަރަކަށް ދުރުދުރުގައެވެ. އެހެނަސް ހިލްޔާ އެ ކެބިންގެ ހުޅުވިފައިވާ ތަންކޮޅުން ކުރިމައްޗަށް ބެލުމުން ރާފިލްގެ ކެބިންގެ ތެރެ ފެނެއެވެ. ރާފިލް އިށީނުމާއިއެކު ހިލްޔާ ހިނިތުންވުމަކާއިއެކީ ހަނާ އެޅިއެވެ. ރާފިލް ހިނިތުންވުމަކާއެކީ ބޯ ޖަހާލި ހިނދު ހިލްޔާގެ ގާތަށް ކެބިން ކްރޫއެއް އައެވެ.
“ވަޓް ވުޑް ޔޫ ލައިކް ޓު ޑްރިންކް؟” އަންހެން ކެބިން ކްރޫ އެކުވެރި ހިނިތުންވުމަކާއިއެކީ އެހިއެވެ. އެހިނދު ކެބިން ކްރޫ ކޮއްޕަމުން ދިޔަ މޭޒުމަތިން ހިލްޔާއަށް ފެނުނީ ރަލުގެ އެކި ޒާތްޒާތުގެ ފުޅިތަކެވެ.
“އެނީތިންގް ނޮން އަލްކަހޯލިކް އިފް އެވެއިލެބަލް.” ހިލްޔާއަށް ހިސާބެއްގެ ޖެހިލުންވުމަކާއިއެކީ ބުނެލެވުނެވެ. މުސްލިމް ނޫން މީހުން މި ފޯރު ކޮށްދޭ ‘ފުރިހަމަ’ ޚިދުމަތްތަކުގެ ތެރޭގައި މުސްލިމަކަށްވުމަށް ހިލްޔާ ޖެހިލުންވެފައިވި ފަދައެވެ. މުސްލިމެއްގެ ގޮތުގައި އުޅުމުން މި ‘ފަޚުރުވެރި’ ދިރިއުޅުން އުޅޭ ޣައިރު މުސްލިމުން އޭނައަށް ނަފްރަތު ކޮށްފާނެ ކަމުގެ ބިރު ހީވިއެވެ. އެހެނަސް…
“ޝުއާރ…” އެ ކެބިން ކްރޫ ދެން ވެސް ނުފިލާ ހިނިތުންވުމަކާއެކީ އެހެން ބުނުމަށްފަހު ހިލްޔާ އެ އެދުނު ފަދަ ބުއިންތަކަށް ހުރީ ކޯޗެއްކަން ބުނެދިނެވެ. ހިލްޔާ ޚިޔާރު ކުރީ ނޮން އަލްކަހޯލިކް ސްޕާކްލިންގް ގްރޭޕް ޖޫހެވެ. ރާ ފުޅިއެއްގެ ޒާތަށް ހުރި ފުޅިއަކުން ރާ ބޮއި އުޅޭ ޒާތަށް ހުރި ތަށްޓަކަށް އޭނަގެ ޖޫސް އެޅިގެން ދިޔުމުން ހިލްޔާއަށް އުފަލެއް ލިބުނެވެ. ނޫން ކަމަށް ހަދާފައިވެސް ހިލްޔާ އުޅެން ބޭނުންވެފައިވީ ޣައިރު މުސްލިމެއްގެ ގޮތުގައި ފަދައެވެ.
ހިލްޔާގެ ޖޫސް ދިނުމަށްފަހު ކެބިން ކްރޫ ދިޔުމުން ހިލްޔާއަށް އަނެއްކާވެސް ރާފިލްއާއި ދިމާލަށް ނަޒަރެއް ދެވުނެވެ. އެހިނދު ރާފިލްގެ ކުރިމަތީގައި ވެސް އޭނަގެ ކުރިމަތީގައި ހުރި ފަދަ ތަށްޓަކާއެކީ ފެހި ކުލައިގެ ދިގު ފުޅިއެއް ވެސްވިއެވެ. ރާފިލް ނެގީ ކޮން ބުއިމެއްތޯ ހިތަށްއެރިއެވެ. މުޅި ފުޅިއެއް އެއްކޮށް ނަގާފައިވުމުން ހިލްޔާއަށް ނުބައި ހީކުރުމެއް ހީކުރެވުނެވެ. އެހެނަސް ހިލްޔާއަށް އެ ޚިޔާލަށް ބޯހޫރުވާލެވުނެވެ. ރާފިލްއާއިމެދު ގޯސްކޮށް ވިސްނާކަށް ބޭނުމެއް ނުވިއެވެ. ރާފިލްއަކީ ވެސް މުސްލިމަކަށްވުމުން ރާފިލް ވެސް ގޯސް ބުއިމެއް ނުބޯނެ ނޫން ހެއްޔެވެ؟
ހިލްޔާ ބަލަބަލާ އިންދާ ކުޑަދޮރުން ބޭރު ބަލަން އިން ރާފިލް ލަސްލަހުން އޭނަގެ ބުއިމުން ކޯވަރެއް ދަމާލިއެވެ. އަދި ކުރިމަތީގައި ހުރި ބަޓަނަކަށް ފިތާލަމުން އެތާ ހުރި ކުޑަ ދޮރެއް ހުޅުވިއެވެ. އެހިނދު ހިލްޔާއަށް ވެސް އޭނަގެ ކުރިމަތިން ފެނުނު ބަޓަނަށް ފިތައި ދޮރު ހުޅުވާލެވުނެވެ. އެއާއިއެކު އެ ކުޑަ ކަބަޑުން ފެނިގެން ދިޔަ ރީތި ވާ ސާމާން ފެނިފައި ހިލްޔާގެ ހިތަށް ޖޯޝެއް ވެރިވިއެވެ. އެތާ ނެތް އެއްޗެއް ނެތޭ ބުންޏަސް ދޮގަކަށް ނުވާނެއެވެ. ދަތް އުނގުޅާ ބުރުހުން ފެށިގެން މޫނުގައި ހާކާ މޮއިސްޗަރައިޒާއާއި ހަމައަށެވެ. މީގެ އިތުރުން އެ ހުޅުވި ދޮރުގައި މޫނު ބަލާ ލޯގަނޑެއް ހަރުކުރެވިފައިވުމުން ވަގުތުން އަމިއްލަ ސޫރައަށް ބަލައި މޫނު ތާޒާ ކޮށްލުމުގެ މަސައްކަތް ފެށުނެވެ.
އެއީ އެ ފްލައިޓު މަތިން ހިލްޔާގެ ހިތް ޖޯޝުން ފުރުނު ފަހު ފަހަރަށް ނުވިއެވެ. ފްލައިޓުން ދޭން ފެށި ކާއެއްޗެހީގެ މީރުކަމާއި، ވައިފައި ގެ އަވަސްކަމާއި، ނިދަން އޮށޯވެ އޮތް އިރު ގައިގައި އަޅަން މަޑުކޮށް އޮތް ބޯ ރަޖާއެއް ލިބުމުން ހިލްޔާގެ ހިތް އުފަލުން ބަންޑުން ވަމުން ދިޔައެވެ. އޭގެއިން ކޮންމެ ރީތިކަމެއް ފެނުމުން ވަގުތުން އެކުވެރިންނަށް ސްނެޕް ކުރެވެމުން ދިޔައީތީ އިތުރު އުފަލެއް ލިބުނެވެ. މުޅި ދުނިޔެއިން ވެސް އެންމެ އުފާވެރި ދިރިއުޅުމެއް އުޅެނީ އޭނައަށް ކަމަށް ހިލްޔާއަށް ހިތާހިތުން ބުނެވެމުން ދިޔައެވެ.
އެހެނަސް ކީއްވެކަމެއް ނޭނގެއެވެ. އެރޭ ނިދަން އޮށޯވެފައި ހިލްޔާއަށް ހިތުގެ ފުންމިނުން ހުސްކަމެއް އިޙްސާސް ކުރެވުނެވެ. ހިސާބެއްގެ ނުތަނަވަސްކަމެއް ވެސް އެ ހިތުގައިވިއެވެ. ދުނިޔޭގެ ހުރިހާ އުފަލެއް އޭނައަށް ލިބިއްޖެނަމަ ދެން އޭނަ ހަދާނީ ކިހިނެއްތޯ ހިތަށްއެރިއެވެ. އެ ހުރިހާ އުފަލެއް ލިބި އޭނައަށް އެ ހުރިހާ ކަމެއް ލިބުނުކަން މީހުންނަށް ދައްކައި ނިމުމުން ހަދާނީ ކިހިނެއް ހެއްޔެވެ؟ ކަންތައް މިގޮތުގައި ކުރިއަށް ގޮއްސިނަމަ އޭނައަށް އެ ހުރިހާ އުފަލެއް ލިބެން މާ ގިނަ ދުވަހެއް ނެތެވެ.
އެ ޚިޔާލާއިއެކީ ހިލްޔާގެ ހަނދާނަށް އައީ، މުއްސަނދި އަދި މަޝްހޫރު އެތައް ފިލްމީ ތަރިންނެއް އަމިއްލައަށް މަރުވާ ވާހަކަތަކެވެ. އެމީހުން އަމިއްލައަށް މަރުވަނީ އޭނަގެ ހިތަށް މި އިޙްސާސް ކުރެވުނު ހުސްކަން ބޮޑުވެގެން ދިޔުމުންތޯ ހިތަށްއެރިއެވެ.
ހިލްޔާ އެ ސުވާލާއިއެކު ފުން ވިސްނުމަކަށް ގެއްލެން އުޅުނު ތަނާހެން ފްލައިޓް ތަންކޮޅެއް ބާރަށް ތަޅުވަން ފެށިއެވެ. އިސާހިތަކު ހިލްޔާގެ ހިތް އޭނައަށް ﷲ މަތިން ހަނދުމަ ކޮށްދިނެވެ. ހަމަ ވަގުތުން ރައްކާތެރިކަމަށްޓަކައި ކިޔޭ ހުރިހާ ޒިކުރެއް ދުލުން ކިޔެން ފެށިއެވެ. އެހެން ދެ ތިން މިނެޓަށްފަހު އަނެއްކާވެސް ފްލައިޓް ހަމައަކަށް އެޅުމުން ހިލްޔާއަށް ޒިކުރުތައް ކިޔުން ހުއްޓާލެވުނެވެ. ދުނިޔެއިން ރައްކާތެރިކަން ލިބޭނެ ކަމުގެ އަވާމެންދުރަށް ގެއްލުނެވެ. އެވަގުތު ވަރުބަލިވެފައިވުމުން ހިލްޔާއަށް ނިދާލެވުނެވެ.
ފްލައިޓުން ލިބެމުން ދިޔަ ޚިދުމަތްތަކުގެ ލައްޒަތުގައި 11 ގަޑިއިރު ހޭދަވެގެން ދިޔަ ގޮތެއް ވެސް ހިލްޔާއަށް ނޭނގުނެވެ. އެ 11 ގަޑިއިރު ތެރޭގައި ރާފިލްއާއި އެއްގޮތަކަށް ވެސް ދިމަލެއް ނުވެއެވެ. ރާފިލް އޭނަ ގާތަށް ނުވެސް އާދެއެވެ. އެކަމާއިމެދު ހިތުގައި ޝަކުވާ އުފެދުނަސް ހިލްޔާ ވަކި މައްސަލައެއް ނުޖެއްސިއެވެ. ރާފިލް އޭނައަށް މި ތަޖުރިބާ ކޮށްދޭ ކަންތަކުން އެކަން ފޫބައްދާލެވޭ ކަމަށް ޤަބޫލު ކުރެވުނެވެ.
ހިލްޔާ އާއި ރާފިލް ދަތުރު ކުރަމުން ދިޔަ ފްލައިޓް ހީތްރޯ އެއާރޕޯޓުގައި ޖެއްސީ ޔޫކޭ ގަޑިން 6 ޖެހި ވަގުތެވެ. ދުވަސްވަރަކީ ޔޫކޭއަށް ޙަރީފު މޫސުމުގެ ދުވަސްވަރު ކަމަށްވުމުން އެވަގުތު އިރު އޮއްސެމުން ދިޔައެވެ. ފްލައިޓްގެ ކުޑަދޮރުން އިރު އޮއްސެމުން ދިޔަ މަންޒަރު ފެނި، ހިލްޔާއަށް އުފަލެއް ލިބުނެވެ. އެ މަންޒަރު ފެނި، ސިކުނޑީގެ ކަނަކުން މަޣްރިބް ނަމާދު މަތިން ހަނދާން ކޮށްދިނެވެ. ނަމާދު މަތިން ހަނދާންވުމުން ފޫހިވިއެވެ. ފްލައިޓް މަތިން ނިދީގައި އޮތްވާ ހިލްޔާއަށް ފަތިސް ނަމާދު ވަގުތު ގެއްލުނެވެ. އެހެންކަމުން ފަތިސް ނަމާދު ކޮށްލީ އިތުރު ފޫއްސަކާއި އެކީގައެވެ. މެންދުރު ނަމާދާއި ޢަޞްރު ނަމާދު ކުރުކޮށްފައި ޖަމްޢު ކުރަން ވުމުން ވެސް ހިލްޔާ އިނީ ބުރަވެފައެވެ. މިތިބަ ޣައިރު މުސްލިމުންހެން އޭނަ ނަމާދު ކުރަން ނުޖެހޭނެނަމައޭ ވެސް ހިތަށްއެރިއެވެ. އެހެނަސް ނޭނގޭ ސަބަބަކާހުރެ ހިތަށް ވެރިވި ބިރުވެރިކަމުން އެ ޚިޔާލާއި ދުރުވެވުނެވެ.
ފްލައިޓުން ފައިބަމުން ދިޔަ ވަގުތު އަނެއްކާވެސް ރާފިލް އާއި ދިމާވުމުން ހިލްޔާ ނަމާދު މަތިން އެއްކޮށް ހަނދާން ނެތޭ ގޮތްވިއެވެ. ރާފިލް ހިނިތުންވުމަކާއިއެކީ ފްލައިޓް ކަމުދިޔަތޯ އެހިއެވެ. ހިލްޔާ ނުހަނު ޖޯޝާއިއެކީ އާނއެކޭ ބުނެ އޭނަ ޙައިރާންވި ކަންތަކުގެ ވާހަކަ ފޯރިއާއިއެކީ ރާފިލްއަށް ކިޔައިދޭން ފެށިއެވެ.
ހީތްރޯ އެއާރޕޯޓުން ވެސް ރާފިލްއާއި ހިލްޔާއަށް ލިބުނީ ޚާއްސަ ސަމާލުކަމެކެވެ. މިގޮތުން އަނެއްކާވެސް އެއްވެސް ކިއުއެއްގައި މަޑު ނުކޮށް، އެމީހުންގެ ދަބަސްތައް ވެސް ނަގައިދޭނެ މީހަކު ހުރުމުން ދަބަސް އުފުއްލާކަށް ނުޖެހުނެވެ. އަދި އަމުދުން އެއާރޕޯޓު މުވައްޒަފަކު އެމީހުން ގޮވައިގެން ދިޔަ ގޮތަށް ގޮސް އެއާރޕޯޓުގެ ބޭރުގައި އޮތް ކަޅުކުލައިގެ އޮފް އަރާ ބޮޑު ޓެކްސީއަކަށް އެރުވިއެވެ.
އޭގެއިން ކޮންމެ ކަމެއް ތަޖުރިބާ ކުރެވެމުން ދިޔަދިޔަހެން ހިލްޔާގެ ހިތުގައި އޮތް ކިބުރުވެރިކަން ބޮޑުވަމުން ދިޔައެވެ. ރާފިލް ޚިޔާރު ކުރުމަކީ ހަމަ އެންމެ ރަނގަޅު ނިންމުން ކަމަށް އޭނައަށް ޔަޤީން ކުރެވެމުން ދިޔައެވެ. ބާއްޖަވެރި ޙަޔާތަކަށް ބޭނުންވަނީ ހަމައެކަނި ފައިސާހެން ހިލްޔާއަށް އެވަގުތު ހީވަމުން ދިޔަ ފަދައެވެ. އެހެންނޫނީ މީހަކު ހިލްޔާގެ ވިސްނުން ބައްޓަން ކުރަމުން ދިޔައީ އެފަދައިންނެވެ.
ހިލްޔާއާއި ރާފިލްއަށް އެމީހުން އުޅޭ އެޕާޓްމެންޓްގެ ޢިމާރާތާއި ހިސާބަށް ދެވުނީ 2 ގަޑިއިރުގެ ދުއްވުމަށް ފަހުއެވެ. އެ ޢިމާރާތަކީ ވެސް ހަމަ އެހާ ފެންވަރުގެ ޢިމާރާތެކެވެ. މުޅިންހެން ކަޅު ބިއްލޫރިހެން ހީވާ ދިގު ޢިމާރާތުގެ ކޮޅު ހިލްޔާއަށް ފެނުނީ އެއްކޮށް މައްޗަށް ބޯ ހިއްލައިގެންނެވެ. ހޮޓެލްގެ އެކުވެރި މުވައްޒަފުން ހިލްޔާއާއި ރާފިލް ހޮޓެލަށް ވަނީއްސުރެ ރޫމާއި ހަމައަށް ދެވެންދެން އެމީހުންނާއި އެކީ އުޅުނެވެ. ރާފިލް އަމިއްލަ ލަގެޖް ކޮޓަރިއަށް ލުމަށްފަހު ވެސް ހިލްޔާ ރޫމާއި ހަމައަށް ލާން އައިސްދިނީތީ ހިލްޔާއަށް އުފަލެއް ލިބުނެވެ. ރާފިލް ގެ އެ އެންމެ ޢިޝާރާތުން ރާފިލް މި ހުރިހާއިރު އޭނަ ދުރުކޮށްފައި ހުރި ގޮތް ހަނދާން ނެތުނު ފަދައެވެ.
“އޯކޭ ދެން ދިޔަޔަސް. އަހަރެން މި ވަންނަނީ ރޫމަށް. ތެންކިއު ސޯ މަޗް ފޯ އެވްރީތިންގް.” ހިލްޔާ އެޕާޓްމެންޓް ގެ ހުޅުވިފައިވާ ދޮރު ކައިރީގައި ހުރެ ރާފިލް ގާތު ބުންޏެވެ. އެވަގުތު ހޮޓެލް މުވައްޒަފުން ގޮއްސިއެވެ.
“ތެންކިއު ބުނެލަން، އަހަރެން ނުވައްދާނަންތަ؟” ރާފިލް ކުރިއަށް ފިޔަވަޅެއް އަޅާލަމުން، ލޮލުގައިވި ނުލަފާ ވިދުވަރަކާއި އެކީ އެހިއެވެ. އެހިނދު ހިލްޔާގެ މެއަށް ފިނިވީ ހިނދު، ހިތް ބާރަށް ތެޅެން ފެށިއެވެ.
“ނޯ ރާފިލް. މިގަޑީގައެއް ނޫން!” ހިލްޔާއަށް އަވަސްއަވަހަށް ބުނެލެވުނެވެ. އެހިނދު ބުނެވުނު އެއްޗަކާއި މެދު ވިސްނާލެވުނެވެ. އެއްވެސް ގަޑިއެއްގައި ރާފިލް އޭނަގެ އެޕާޓްމެންޓަށް ވަންނާކަށް ހިލްޔާ ނުރުހެވެ. އެހެނަސް އެ ނޫން ގޮތަކަށް ބުނެލެވުނީ ރާފިލް ނުރުހުންވެދާނެތީވެއެވެ.
ހިލްޔާ ހީކުރީ އޭނަ އެހެން ބުނުމުން ވެސް ރާފިލް ނުރުހުންވާނެ ކަމަށެވެ. އެހެނަސް ރާފިލް ލުއި ގޮތަކަށް ހީލުމުން ހިލްޔާއަށް ޙައިރާންކަމެއް ލިބުނެވެ.
“ނުވަންނާނަމޭ. ބައެއް ކަންތައް އެންމެ ފަން ވާނީ ވެޑިންގް ނައިޓް ގަ ކުރީމަދޯ؟ އެހެންވީމަ ފަސް ކުރަމުން މިދަނީ. ކާންޓް ވެއިޓް ފޯ ދެޓް ނައިޓް.” ރާފިލް އެހެން ބުނެ އެއްލޯ މަރާލިއެވެ. އެ ހިނދު ހިލްޔާގެ ކޯތާފަތް ރަތްވެގެން ދިޔައެވެ. އިސާހިތަކު ރާފިލް އެންމެ ޞާލިޙު މީހުންގެ ތެރެއިން ހިމެނުނެވެ. ރާފިލް ވެސް ކައިވެންޏަކާއި ނުލައި އޭނައާއި ގާތްވާން ބޭނުންނުވާ ކަން އެނގުމުންނެވެ.
“މީ ޓޫ. ދެން ގުޑް ނައިޓް އެހެންވީމަ. އައި ވޯންޓް ޓު ރެސްޓް.” ހިލްޔާ ބުންޏެވެ.
“އޯކޭ. އެއްވެސް އެއްޗެއް ބޭނުމިއްޔާ ރިސެޕްޝަނަށް ގުޅާފަ އަންގާލާތި. އައި ވިލް ބީ ޕޭއިންގް ހުރިހާ އެއްޗަކަށް ސޯ ޑޯންޓް ވޮރީ އެބައުޓް މަނީ.” ރާފިލް ބުންޏެވެ. ހިލްޔާ އެ ވާހަކައަށް ހިނިތުންވުމަކާއި އެކީ ބޯޖަހާލިއެވެ. އެއަށްފަހު ފަހުގެ އަލްވަދާޢުތައް ބަދަލުވުމުން ހިލްޔާ އެޕާޓްމެންޓް ގެ ދޮރު ލެއްޕިއެވެ.
ހިލްޔާ އެ ތަނަވަސް އެޕާޓްމެންޓަށް ވަދެ ދޮރު ލައްޕާލި ހިނދު ހިލްޔާގެ ހިތަށް ނޭނގޭ ނުތަނަވަސްކަމެއް ވެރިވިއެވެ. އޭނަ ދުވަހަކު ވެސް އަމިއްލަ ޢާއިލާއާއި މިހާ ދުރަށް އައިސް ވަކިން އުޅެފައެއް ނެތެވެ. ރާފިލް ގެ މުއްސަނދިކަމުން އޭނަ ހަމަ ގައިމުވެސް މަގުމައްޗެއް ނުވާނެއޭ ހިތަށްއެރިއެވެ. އެހެނަސް ދެންވެސް އެހެން މީހުންގެ ފަރާތުން ލިބިދާނެ އަނިޔާއަކާއިމެދު ބިރުގަތެވެ. ބޭރު ޤައުމުތަކުގައި އެފަދަ ކަންތައް ހިނގަނީ މަދުންނެއް ނޫނެވެ. އެ ބިރުވެރިކަމުގެ ސަބަބުން ލެއްޕިފައިވި ދޮރާއި ދިމާލަށް އަނެއްކާވެސް ބަލާލެވުނެވެ. ދޮރުގައި ތަންޑެއް ވެސް ހުރި މަންޒަރު ފެނި، ވަގުތުން ތަންޑު ވެސް އަޅުވާލެވުނެވެ. އެއަށްފަހު ހެނދުނާއި ހަވީރުގެ ޒިކުރުތައް ނުކިޔޭކަން ހަނދާންވެފައި، ރައްކާތެރިކަން ލިބިގަންނަ ޒިކުރު ކިޔާލެވުނެވެ.
“بِسْمِ اللّهِ الّذِي لاَ يَضُرُّ مَعَ اسْمِهِ شَيْءٌ فِي الْأَرْضِ وَلاَ فِي السَّمَاءِ, وَهُوَ السَّمِيعُ الْعَلِيْم”
“ﷲ ގެ އިސްމުފުޅުގެ ބަރަކާތުން (ރައްކާތެރިކަން ލިބިގަންނަމެވެ.) އެކަލާނގެ އިސްމުފުޅުގެ ބަރަކާތާއިއެކު، ބިމާއި އުޑުން އެއްވެސް އެއްޗެއް ގެއްލުމެއް ނުދޭނެއެވެ. އަދި އެކަލާނގެއީ މޮޅަށް އައްސަވައިވޮޑިގެންވާ މޮޅަށް ދެނެވޮޑިގެންވާ ރަސްކަލާނގެއެވެ.”
ޒިކުރު ތިން ފަހަރު ކިޔާލުމުން ހިލްޔާއަށް ހަމަޖެހުމެއް ލިބުނެވެ. މިއީ އެހެން ޒިކުރެއް ނުކިޔުނަސް ހިލްޔާއަށް ކިޔޭ ޒިކުރެކެވެ. މިފަހުން އައިސް ޒިކުރު ކުރެވެނީ ދުނިޔެއަށް ވާ ލޯތްބެއްގެ ބޮޑުކަމުކަމުން ދުނިޔެ ގެއްލިދާނެކަމުގެ ބިރަށެވެ. ﷲ އޭނަ އަބަދުވެސް ރައްކާތެރި ކުރާނެކަމުގެ ޔަޤީން ކަމާއި އެކީގައެވެ. އެވަގުތު ނަމާދު ކުރަން އަވަސްވެގަނެވުނީ، އެ ރައްކާތެރިކަން ކަށަވަރު ކުރުމަށެވެ.
**
ދޮރު ލެއްޕިގެން ދިޔުމާއިއެކު ރާފިލްގެ ހިނިތުންވުން ފިލައި، ބުމަގޮށްޖެހުނެވެ. އިސާހިތަކު ހިތާހިތުން ހިލްޔާއަށް އެއްޗެހި ގޮވެން ފެށިއެވެ. އޭނަ އަމިއްލައަށް ފައިސާ ދީގެން ހިލްޔާއަށް ބެހެއްޓި މި އެޕާޓްމެންޓަށް އޭނަ ނުވައްދަން ހިލްޔާއަކީ ވަކި ކާކުތޯ ހިތަށްއެރިއެވެ. އެ ޚިޔާލާއި އެކު ވީ ނުރުހުމުގައި ރާފިލް އަމިއްލައަށް އެ އެޕާޓްމެންޓްގެ ދޮރު ހުޅުވުމަށް ތަޅާއި ދިމާލަށް އަތް ދިއްކުރިއެވެ. އޭނައަށް އެ އެޕާޓްމެންޓްގެ ކޯޑު އެނގެއެވެ. އެހެންކަމުން މި ދޮރު ހުޅުވުން ވާނީ ފަސޭހަ ކަމަކަށެވެ.
އެހެނަސް ތަޅުގައި ނުހިފެނީސް ރާފިލްގެ ޚިޔާލު ބަދަލުވިއެވެ. މިއީ އަދި ހިލްޔާއާއި ގާތްވާން އެންމެ މުނާސަބު ވަގުތު ނޫންކަމަށް ސިކުނޑި އެންގިއެވެ. އޭނަ ދެން ހިލްޔާއާއި ގާތްވާނީ ކައިވެންޏަށްފަހު ކަމަށްވަނީ ބުނެވިފައެވެ. ދެން އެ ނޫން ގޮތަކަށް ހިލްޔާގެ ޚިޔާލު ބަދަލު ކުރެވޭނީ އަދި ދުވަހުންނެވެ. އެހެންނޫނަސް ފްލައިޓް މަތިން އޭނައާއި ދިމާވި އަންހެން ކުއްޖަކާ އެކީ ވަގުތު ހޭދަކޮށް އޭނަގެ ހިތް ވަނީ ފުރިފައެވެ. އަދި އޭނަ ބޭނުންވެއްޖެނަމަ މި ޤައުމުގެ އެހެން ރީތި ކުއްޖެއްގެ ގާތަށް ވެސް އޭނައަށް ދެވިދާނެއެވެ. ހުރިހާ އަންހެން ކުދިންނަކީ ހިލްޔާ ކަހަލަ ވިސްނުން ‘ކޮށި’ ބައެއް ނޫނެވެ. ބޮޑު ހެދުންގަނޑެއްގެ ތެރެއަށް ވަދެގެން އެ އުޅެނީ ނުވިސްނޭތީވެއެވެ. ހިލްޔާއަށް ނޭނގިވެސް އެ ފަސް ދެނީ ހާދަ ގިނަ އަރާމަށާއި ލައްޒަތަށެވެ. ހިލްޔާ އެ ނޫން ގޮތަކަށް ހެދުން އަޅާނަމަ ހާދަ ގިނަ ފިރިހެނުންގެ ސަމާލުކަން ހިލްޔާއަށް ލިބޭނެއެވެ.
އެ ޚިޔާލު ހިތަށް ވެރިވުމުން ރާފިލް ފުން ނޭވައެއް ދޫކޮށްލިއެވެ. ހިލްޔާގެ މި ޚިޔާލުތައް ބަދަލު ކުރަން ޢަޒުމް ކަނޑަ އަޅަމުންނެވެ. މިވަގުތު ހިލްޔާގެ ގާތަށް ނުދާން ނިންމީ ރޭވުމެއް ރާވަމުންނެވެ. އަދިވެސް ރާފިލްގެ ޚިޔާލުގައި އޮތީ ހިލްޔާއާއި ކައިވެނި ނުކޮށް ހިލްޔާގެ މުޅި ވިސްނުން ބަދަލު ކުރުމަށްފަހު ހިލްޔާއާއި ގާތްވުމަށެވެ. އެ ޚިޔާލާއިމެދު އަމިއްލަ ނަފްސަށް ތަޢުރީފު ކުރަމުން ރާފިލް ހިލްޔާގެ އެޕާޓްމެންޓްގެ ދޮރަށް ފަސް ދީފައި ދާން ހިނގައިގަތެވެ.
މީހުންގެ މައްޗަށް ބާރު ފޯރުވައި، ކަންތައް ރާވަނީ އަނިޔާވެރިންހެން އަނިޔާވެރިޔަކަށް ހީވެދާނެއެވެ. އެހެނަސް ޙަޤީޤަތަކީ ﷲ ގެ އިޒުނަފުޅާއި ލައިގެން މެނުވީ އެކަކަށް ވެސް އަނެކަކަށް އަނިޔާއެއް ނުދެވޭނެ ކަމެވެ. އެއިން ކޮންމެ ކަމެއްގައި ﷲ ގެ ފުރިހަމަ ޙިކުމަތްތެރިކަމާއި ރޭވުންތެރިކަން ވެއެވެ. ﷲ ކޮންމެ އަޅަކަށް ވެސް ކަންތައް މެދުވެރި ކުރައްވަނީ އެ އަޅަކަށް ހިދާޔަތް އިތުރުވާނެ ގޮތަކަށެވެ. އެކަލާނގެ ގެ އެހީފުޅަށް އެދި އެކަލާނގެއަށް ތައުބާވާން މަގުފަހިވާނެ ފަދަ ގޮތަކަށެވެ. އަދި އެއްވެސް އަޅަކަށް ބަރުދާސްތު ނުކުރެވޭނެ ފަދަ އިމްތިޙާނެއް އެކަލާނގެ ނުޖައްސަވައެވެ.
**
ރާފިލްއާއި ހިލްޔާ ދެން ދިމާވީ އޭގެ އަނެއްދުވަހު 6 ޖެހި ވަގުތެވެ. އެދުވަހު 8 ޖަހާއިރު ދެމީހުން ވެސް ޑިއުޓީއަށް ދާންޖެހޭތީ އެމީހުން އުޅޭ ޢިމާރާތުގައި ހުންނަ ރެސްޓޯރެންޓަކުން ނާސްތާ ނެގުމަށެވެ. ފަސް ތަރީގެ ނާސްތާއަށްފަހު ދެމީހުން ވެސް ތައްޔާރު ވެ ޢިމާރާތުން ނިކުތީ 7:05 ހިނގި ވަގުތެވެ. ހިލްޔާ ހީކުރީ ދެމީހުން ހޮސްޕިޓަލަށް ދާނީ ޓެކްސީއަކުން ކަމަށެވެ. އެހެނަސް ޢިމާރާތުން ނިކުތްއިރު އެތާ ޕާކް ކުރެވިފައި އޮތް އަޅިކުލައިގެ ކާރެއްގެ ޑްރައިވާރސް ސީޓަށް އަރަން ރާފިލް ދިޔުމުން ހިލްޔާއަށް ސުވާލު ކުރެވުނެވެ.
“ކާކުގެ ކާރެއް؟” ކާރު ކައިރިއަށް ގޮސް އަރަން ޖެހިލުންވެފައި ހުރެ ހިލްޔާއަށް އަހާލެވުނެވެ.
“މިކޮޅުގަ ދުއްވަން އަހަރެން ގަތް ކާރެއް. އަނބުރާ ދާންވީމަ ވިއްކާލާނީ. އަރާ.” ރާފިލް އެހެން ބުނެ އަތުގައި އޮތް ރިމޯޓުން ކާރު އަންލޮކް ކޮށްލިއެވެ. އެއާއިއެކު ހިލްޔާ ރާފިލްގެ ވަރޭ ހިތައި ބޯހޫރުވާލަމުން ކާރަށް އެރިއެވެ. އެއީ ވެސް ބެންޒެއްކަން ކާރަށް އެރުމާއިއެކު ހިލްޔާއަށް އެނގުނެވެ. ދެމީހުން ކާރަށް އަރައި ހަމަޖެހިލުމާއިއެކު ރާފިލް އޭނަގެ ފޯނު ބްލޫޓޫތް ކާރާއި ގުޅާލިއެވެ. އަދި ދެމީހުންނަށް ރީތި ލޯބީގެ އިނގިރޭސި ލަވައެއް ޖަހާލިއެވެ. ހަމަ އެއާއިއެކު ހިލްޔާއަށް އާދައިގެ މަތިން ޚިޔާލީ ފޮލާ ކެއްކެން ފެށިއެވެ. ދެމީހުންގެ ލޯބީގެ ‘ބާރުގަދަކަން’ އިޙްސާސް ކުރެވެން ފެށިއެވެ.
ދުއްވަން ފެށިތާ އިރުކޮޅެއްފަހުން ރާފިލް ވާހަކަ ދައްކަން ފެށިއެވެ.
“ސޯ….ހިލްޔާ ބުނީ ކޮން ސްޕެޝަލްޓީއަކަށޭ ދާނީ؟” ރާފިލް ހިލްޔާއަށް ލުއި ނަޒަރެއް ދެމުން އެހިއެވެ.
“ޖެނެރަލް ސާރޖަރީ. މައި ޑްރީމް އެއީ ހަމަ.” ހިލްޔާ ބުންޏެވެ. ހިލްޔާ ހީކުރީ ރާފިލް އޭނައަށް ތަޢުރީފު ކުރާނެ ކަމަށެވެ. އެހެނަސް…
“ޖެނެރަލް ސާރޖަރީދޯ؟ ހާދަ ޓަފް ފީލްޑެކޭ.” ރާފިލް ބުނެލިއެވެ.
“ޔާ….އެކަމަކު އަސްލު ވަރަށް ބޭނުން ސާރޖަންއަކަށް ވާން.” ހިލްޔާއަށް ބުނެވުނެވެ. އޭނަ ސާރޖަންއަކަށް ބޭނުންވާ ސަބަބު ޚުދު އޭނަ ވެސް ހަނދާނެއް ނެތެވެ. މިވަގުތު ހިތުގެ އިޙްސާސްތައް ބައްޓަން ވެފައިވާ ގޮތުން، ސާރޖަންއަކަށް ވާން ބޭނުންވެފައިވީ އެއީ ފަޚުރުވެރި މަޤާމަކަށް ވީތީވެއެވެ.
“އިފް ޔޫ އާސްކް މީ އައި ރެކޮމެންޑް އިންޓާނަލް މެޑިސިން ފިޒިޝިއަންއަކަށް ވާން. އޭރުން ހަމަ އިށީނދެ އިނދެ ބޭސް ލިޔެލިޔެފަ މީހުން ފޮނުވަމުން ދިޔައިމަ ނިމުނީ. އޯލްސޯ އަންހެން ކުދިން ޖެހޭނެދޯ ފިއުޗާރ އާއިމެދު ވެސް ވިސްނަން. އަހަރެން އަޑުއަހާ ގޮތުގަ ޢާއްމު ގޮތެއްގަ އަންހެން ކުދިން ބަނޑުބޮޑުވީމަ ތި ސާރޖަރީއާއި އެއްކޮށް ދުރުވާން ޖެހެނީ. ވަރަށް ބިޒީވެގެންދާނެ ދޯ ބޭބީއެއް ލިބުނީމަ. މެޓާރނިޓީއަށް ގޮއްސަ އަނބުރާ އަންނައިރު ދޭއި ލޫޒް ޓަޗް.” ރާފިލް ވާހަކަ ދެއްކި ދެއްކި ގޮތުން ހިލްޔާގެ ހިނިތުންވުން ލަސްލަހުން ފޭދިގެން ދިޔައެވެ. އޭނަ ނުހަނު ޔަޤީންކަމާއިއެކީ މި ހުރިހާ ދުވަސް ވަންދެން ދެކެމުން އައި ހުވަފެނާއިމެދު ކުއްލިއަކަށް ޝައްކުތައް އުފެދެން ފެށިއެވެ.
ހިލްޔާއަށް ނޭނގުނު ކަމަކީ އެއީ ރާފިލް ހަމަ އެ ޤަޞްދުގައި ކުރި ކަމެއް ކަމެވެ. ހިލްޔާ ޚިޔާރު ކުރި ސްޕެޝަލްޓީއިން ހިލްޔާ އޭނައަށް ވުރެ ވިސްނުން ތޫނުކަން އިޙްސާސްވެ، ރާފިލް ޙަސަދަވެރިވީއެވެ. ވާނީވެސް އެހެންތާއެވެ. އޭނަ އެމްބީބީއެސް އިން ފާސްވެ، ޑޮކްޓަރުކަން ލިބުނީ ވެސް ބައްޕަގެ ފައިސާގެ އެހީގައެވެ. ކަން މިހެން އޮތްއިރު އޭނަ މި ‘ބަލިކަށި’ އަންހެން ކުއްޖާ އޭނައަށްވުރެ މަތީ މަޤާމެއް ލިބިޔަ ދޭނީ ކިހިނެއް ހެއްޔެވެ؟ އަދި އަމުދުން މި ނާތަހުޒީބު ވިސްނުން ގެންގުޅޭ އޭނައަށްވުރެ ‘ފަޤީރު’ އަންހެން ކުއްޖާއެވެ. ހަމަ ހިލާ އޭނަ އެހެން ވިޔަ ނުދޭނެއެވެ.
އެ ޚިޔާލުގައި އިނދެ ރާފިލް އޭނަގެ ޖިންސްގެ ޖީބުގައި އޮތް ވޮލެޓް ނަގައި ހިލްޔާއަށް ދިއްކުރިއެވެ.
“އެނީވޭސް ވޮލެޓް ހުޅުވާލަބަލަ ލަވް. އޮންނާނެ ޕްލެޓިނަމް ކާޑެއް. އިޓްސް އޯލް ޔުއާރސް. ޔޫ ކޭން ބާއި އެނީތިންގް ޔޫ ވޯންޓް.” ރާފިލް އެހެން ބުނަމުން ދިޔަދިޔަހެން ހިލްޔާ ވޮލެޓް ހުޅުވިއެވެ. ވޮލެޓުން އެންމެ ފުރަތަމަ ވެސް ހިލްޔާގެ ފޮޓޯއެއް ފެނިފައި އަނެއްކާވެސް ހިލްޔާގެ މޫނުމައްޗަށް ހިނިތުންވުމެއް ވެރިވިއެވެ. އަދި އެ ހިނިތުންވުމުގައި އިނދެ، ރާފިލް އެ ބުނި ޕްލެޓިނަމް ކާޑު ނެގީ ވެސް އުފާލާއި އެކީގައެވެ.
ހިލްޔާގެ ހިނިތުންވުން ލޮލުގެ ކޮޅުން ފެނިފައި ރާފިލްގެ މޫނުމައްޗަށް ވެރިވީ އެއްމިޔަކަނުގެ ހިނިތުންވުމެކެވެ. މިއީ ފައިސާއަށް ހެއްލޭ ކުއްޖެކޭ ހިތަށްއެރިއެވެ. ކަންތައް މިހެން ދާނަމަ އޭނަ ނުހަނު ފަސޭހައިން ހިލްޔާ ބަލިކަށިކޮށް އޭނަގެ ބާރުގެ ދަށަށް ގެންނާނެއެވެ.
ނުނިމޭ
