ﷲ ދެއްވި އެއް ނިޢުމަތް ތިބާއަށް ޢަދަދު ކުރެވިދާނެ ހެއްޔެވެ؟

“ތިޔަބައިމީހުން ﷲ ގެ ނިޢުމަތްތައް ގުނައި ޢަދަދު ކުރަން އުޅުނަސް އެ ނިޢުމަތްތައް ޢަދަދުނުކުރެވޭނެއެވެ.” ސޫރަތުއްނަޙްލު، 18

މި އާޔަތް ޢާއްމުގޮތެއްގައި ތަރުޖަމާވެގެން އަންނަނީ ‘ނިޢުމަތްތައް’ މި ބަހާއި އެކީގައެވެ. އެހެނަސް ނިޢުމަތަށްޓަކައި ޢަރަބި ބަހުން އާޔަތުގައި ބޭނުންކުރެވިފައިވި ބަސްކަމަށްވާ نِعْمَة

އަކީ އެ ބަހުގެ މުފްރަދު ގޮތެވެ. އެހެން ގޮތަކަށް ބުނާނަމަ އެ ބަސް މާނަ ކުރެވޭނީ އެންމެ ނިޢުމަތެއްގެ ގޮތުގައެވެ. އެހެންކަމުން އާޔަތުގެ ސީދާ ބަސްތަކަށް ބަލައި އާޔަތް މާނަ ކުރާނަމަ މާނަވެގެން ދާނީ މިހެންނެވެ. ތިޔަބައިމީހުން ﷲ ގެ ‘ނިޢުމަތް’ ގުނައި ޢަދަދު ކުރަން އުޅުނަސް އެ ‘ނިޢުމަތް’ ޢަދަދުނުކުރެވޭނެއެވެ. އެހެނަސް އެ މާނައިގައި އައިބު ގޮތެއް އެބަހުއްޓެވެ. އެންމެ ނިޢުމަތެއް ގުނައި ޢަދަދު ކުރަންވީ ކީއްވެ ހެއްޔެވެ؟

ޙަޤީޤަތަކީ ﷲ ސުބުޙާނަހޫ ވަތަޢާލާ އަޅުގަނޑުމެންނަށް ދެއްވި ކޮންމެ ނިޢުމަތެއްގެ ޒާތަކީ އެއީކަމެވެ. އަޅުގަނޑުމެންނަށް ލިބިފައިވާ ލޮލުގެ މިސާލު ނަގަމާ ހިނގާށެވެ. ކޮންމެ ދުވަހަކު މި ލޯ ހުޅުވިގެން ދިޔުމާއެކު އަޅުގަނޑުމެންނަށް އަޅުގަނޑުމެންގެ ވަށައިގެންވި ދުނިޔެ ފެނިގެންދެއެވެ. ޤުދުރަތީ ރީތި މަންޒަރުތައް މުޅި ދުވާލާއި ރޭގަނޑު ފެންނަމުން ދަނީވެސް މި ލޮލުގެ އެހީގައެވެ. އަޅުގަނޑުމެން ލޯބިވާ މީހުންގެ މޫނުތަކުން ހިނިތުންވުންތައް ފެނި ހިތަށް ފިނިކަން ލިބިގެން ދަނީ ވެސް މި ލޮލުގެ ސަބަބުންނެވެ. އަޅުގަނޑުމެން ހިނގާފައާއި ދުވެފައި ދާއިރު ދެވޭ ނުދެވޭ ދިމާލެއް އެނގެނީ ވެސް ލޮލުގެ ސަބަބުންނެވެ. އަޅުގަނޑުމެންނަށް ކުޅިވަރުތަކުގައި ބައިވެރިވެ ކުޅިވަރުތަކުގެ ފޯރި ނެގެނީ ވެސް ލޮލުގެ އެހީގައެވެ. މީގެ އިތުރުން ތަނެއްގައި އަޅައި އަރިއެޅުމުންނާއި އެހެނިހެން ނުރައްކާތަކުން ވެސް އަޅުގަނޑުމެންނަށް ސަލާމަތް ވެވެނީ ލޮލުގެ ފެނުމުގެ ސަބަބުންނެވެ.

ދެންމެ އަޅުގަނޑު މި ސިފަކުރި ހުރިހާ ކަންތައްތަކަށް ބެލިޔަސް، އަޅުގަނޑުމެންގެ ލޯ އަޅުގަނޑުމެންނަށް އެހީވެދޭ ހުރިހާ ގޮތްތަކަށް އަޅުގަނޑަށް އަލި އަޅުވާލެވިފައިވޭ ހެއްޔެވެ؟ ހަމަ ޔަޤީނުންވެސް ނޫނެވެ. އަޅުގަނޑުމެން ކިތަންމެ މަސައްކަތެއް ކުރިޔަސް އަޅުގަނޑުމެންގެ ލޮލުން އަޅުގަނޑުމެންނަށް ފައިދާ ކުރާ ގޮތްތައް އަޅުގަނޑުމެންނަށް ޢަދަދު ނުކުރެވޭނެއެވެ. ސުބްޙާނަ ﷲ!

އެހެންކަމުން އަޅުގަނޑުމެންނަށް ދެވިފައިވި ‘ނިޢުމަތް’ އަޅުގަނޑުމެންނަށް ގުނައި ޢަދަދު ނުކުރެވޭނެކަމަށް ބުނެވޭ ބަހަކީ ހަމަ ޙަޤީޤަތެކެވެ. އެހެނީ ﷲ ދެއްވި އެންމެ ނިޢުމަތަކުން ވެސް އަޅުގަނޑުމެންނަށް އެހީ ލިބި ފައިދާ ކުރާ ގޮތްތައް އަޅުގަނޑުމެންނަށް ޢަދަދު ނުކުރެވޭނެތީވެއެވެ.

އެހެންކަމުން ތިބާގެ ހިތް ޝަކުވާ ކުރާ ހިނދު ހަނދުމަކުރާށެވެ. ތިބާ ހާސްވެ ނުތަނަވަސްވާ ހުރިހާ ކަންތަކަށްވުރެ ބޮޑަށް ﷲ ތިބާއަށް ދެއްވާފައިވި ނިޢުމަތްތައް އަބަދުވެސް ބޮޑުވެފައި ގިނަވެގެންވެއެވެ. ﷲ ދެއްވި އެންމެ ނިޢުމަތަކާއި މެދު ވިސްނައި ފިކުރުކުރާށެވެ. އޭރުން ތިބާ ދެރަވެ ހިތާމަކުރަންޖެހޭ ކަންތަކާމެދު ވިސްނާލާނެ ފުރުޞަތެއް ތިބާއަށް ނުލިބޭނެކަން ގައިމެވެ.

މާތް ﷲ އަޅަމެންނަކީ އަޅަމެންގެ މައްސަލަތަކަށްވުރެ ބޮޑަށް އެކަލާނގެ ދެއްވި ނިޢުމަތްތަކަށް ސަމާލުކަންދޭ ބަޔަކު ކަމުގައި ލައްވާށި! އާމީން!