ﷲ ގެ އެހީ ނާންނަނީ ކީއްވެ ހެއްޔެވެ؟

ﷲ ގެ އެހީ ނާންނަނީ ކީއްވެ ހެއްޔެވެ؟

މި ސުވާލު މަރިޔަމް (ސަލާމުން ޢަލައިހާ) އަށް ވެސް ކުރެވުނީހެވެ. އެއްވެސް ފިރިހެނަކާއި ގުޅުމެއް ހިންގުމެއްނެތި ދަރިއަކަށް ބަލިވެ އިން ހިނދެވެ. އެ ދަރިފުޅުގެ ސަބަބުން އެކަމަނަގެ ޤަދަރާއި ޢިއްޒަތް ވެއްޔާއި މޮޑެވިދާނެކަން ޔަޤީންވި ހިނދެވެ. ޔޫސުފް ޢަލައިހިއްސަލާމް އަށް ވެސް އެ ސުވާލު ކުރެވުނީއެވެ. އެކަލޭގެފާނު ވަޅެއްގެ ތެރެއަށް ވައްޓާލެވި، އަޅެއްގެ ގޮތުގައި ވިކި ނުކުރާ ކުށަކަށްޓަކައި ޖަލަށް ލެވުނު ހިނދެވެ. ޔަޢްޤޫބް ޢަލައިހިއްސަލާމް އަށް ވެސް އެ ސުވާލު ކުރެވުނީހެވެ. އެކަލޭގެފާނުގެ ދަރިކަލުން ނުފެނި ވޭތުވި އެތައް އަހަރެއްގެ ތެރެއިން ރުއިމުގެ ސަބަބުން އެކަލޭގެފާނުގެ ލޮލުގެ ފެނުން ވެސް ގެއްލި ދިޔަ ހިނދެވެ. މުޙައްމަދު ޞައްލަ ﷲ ޢަލައިހި ވަސައްލަމްއަށް ވެސް އެ ސުވާލު ކުރެވުނީހެވެ. އެކަލޭގެފާނާއި އެކަލޭގެފާނުގެ އަޞްޙާބުންނަށް ހަމައެކަނި އެ ބޭކަލުންގެ އީމާންތެރިކަމުގެ ސަބަބުން އެތައް އަހަރުތަކެއް ވަންދެން އަނިޔާ ލިބެމުން ދިޔަ ހިނދެވެ.

އެހެންކަމުން ދެން ތިބާ ﷲ ގެ އެހީއާއިމެދު ވިސްނާ ހިނދަކު މި ވާހަކަތަކުގެ މަތިން ހަނދާން ކުރާށެވެ. މި ވާހަކަތަކުގައި ހިމެނެނީ ﷲ ގެ ރަސޫލުންނާއި އެކަލާނގެ ކަރާމާތްތައް ދެއްކެވި ފަރާތްތަކަށްވިޔަސް މި ފަރާތްތަކަށް ވެސް ތަދު އިޙްސާސް ކުރެވުނެވެ. އެ ބޭކަލުންގެ ލޯފުޅުތަކުން ވެސް ކަރުނަތައް އޮހޮރިގެންއައެވެ. އެބޭކަލުން ވެސް ވީ އެހީއަކަށް ވަރަށް ބޮޑަށް ބޭނުންވެފައެވެ. އެހެނަސް މި ހުރިހާ ވާހަކައަކުން އަޅުގަނޑުމެންނަށް ލިބޭ ޢިބްރަތަކީ ކޮބައިކަން އެނގޭ ހެއްޔެވެ؟ ހަމައެކަނި ދަތި ޙާލަތްތަކުގައި އެ ބޭކަލުން ﷲ އަށް ވަކީލުކުރި ގޮތެއް ނޫނެވެ. އެހެނެއްކަމަކު މީގެ އިތުރުން ﷲ ގެ ރޭއްވެވުންތަކުގެ ފުރިހަމަކަން ވެސްމެއެވެ.

އާނއެކެވެ. މަރިޔަމް ސަލާމުން ޢަލައިހާ އެދަރިކަލުންނާއެކީ ބަލިވެ އިންނެވި ދުވަސްކޮޅަކީ އެކަމަނާ ވަރަށް ހިތާމަކުރެއްވި ދުވަސްކޮޅެކެވެ. އެހެނަސް ހަމަ އެ ދަރިކަލުންގެ ސަބަބުން އެކަމަނާގެ ދަރަޖަ އެތައް ގުނައެއް އިތުރުވެގެން ދިޔައެވެ. އަދި އެކަމަނާގެ ޤަދަރާއި ޢިއްޒަތް ދެމެހެއްޓެވީ ޚުދު ﷲ ސުބުޙާނަހޫ ވަތަޢާލާއެވެ. އެކަލާނގެ ބާވައިލެއްވި އެންމެ ފަހު ފޮތުގައި ވެސް އެކަމަނާގެ ނަންފުޅު ދިފާޢުކުރައްވާފައިވެއެވެ. ޤިޔާމަތާއި ޖެހެންދެން ވެސް އަންނާނެހާ އެންމެންނަށް އެކަމަނާގެ މައުސޫމްކަން ޔަޤީންކޮށްދެއްވުމަށެވެ. އަދި އެކަމަނާގެ ވާހަކައިން އެތައް ބަޔަކަށް ހިތްވަރެއް ލިބިގެންދާނެ ފަދައަކުންނެވެ. އާނއެކެވެ. ޔޫސުފް ޢަލައިހިއްސަލާމް ވަރަށް ދަތި ދުވަސްތަކެއް ކަނޑައްތު ކުރައްވާފައިވެއެވެ. އެހެނަސް އެކަލޭގެފާނު 10 ވަރަކަށް އަހަރު ވަންދެން ޖަލުގައި ހުންނެވި ހުންނެވުމުގެ ސަބަބުން ރަސްގެފާނަށް އެކަލޭގެފާނުގެ ވާހަކަ އިވި މުޅި ޤައުމެއް ބަނޑަށް ޖެހިގެން ދިޔުމުން އެކަލޭގެފާނަށް ސަލާމަތްކޮށްދެއްވުނެވެ. އާނއެކެވެ. ޔަޢްޤޫބް ޢަލައިހިއްސަލާމް އެހާ ގިނަ ދުވަސްވަންދެން ކީރިތި ކުރައްވާފައިވެއެވެ. އެހެނަސް އެކަލޭގެފާނުގެ ވާހަކައިގެ ސަބަބުން ކުރިއަށް އަންނާނެ ހުރިހާ ބައްޕައިންނަށް ރީތިވެގެންވާ ކެތްތެރިކަމުގެ ފަހަތުގައިވާ ޙިކުމަތް ވިސްނޭނެއެވެ. އާނއެކެވެ. މުޙައްމަދު ޞައްލަ ﷲ ޢަލައިހި ވަސައްލަމް އާއި އެކަލޭގެފާނުގެ އަޞްޙާބުންނަށް ވަރަށް ގިނަ އަހަރު ވަންދެން އަނިޔާކުރެވި ބަލިކަށި ކުރެވިގެން ދިޔައެވެ. އެހެނަސް އެ އަނިޔާގެ ސަބަބުން އެ ބޭކަލުންނަށް ކެތްތެރިކަމުގެ ލާމަސީލު ނަމޫނާ ދެއްކުނެވެ. އޭގެ ސަބަބުން އެތައް ބައެއްގެ ހިތްތައް އިސްލާމްދީނަށް ލެނބިގެން ދިޔައެވެ.

އެހެންކަމުން ތިބާ މިއަދު ކޮންމެވެސް ދަތި ޙާލަތެއް ކަނޑައްތު ކުރަމުން ދާނަމަ ހަނދާންކުރާށެވެ. ތިބާގެ ތި ދަތި ޙާލަތަކީ ﷲ ގެ ބޮޑު ރޭއްވެވުމުގެ ތެރެއިންވާ ކަމެއް ކަމުގައި ވެދާނެއެވެ. ތިބާގެ ތި އިމްތިޙާނުގެ ތެރެއިން ކުރިއަށް އޮތްތަނުގައި ތިބާ ކުރިމަތިލާންޖެހޭ ކަމަކަށްޓަކައި ތިބާ ވަރުގަދަ ކުރެވިގެން ދަނީ ކަމަށްވެދާނެއެވެ. ތިބާގެ ތި އިމްތިޙާނުގެ ސަބަބުން ތިބާއަކީ އެހެން އެތައް ބަޔަކަށް އެހީއެއް ވެދޭނެ މީހަކަށް ވެދާނެއެވެ. ތިބާގެ ތި އިމްތިޙާނުގެ ސަބަބުން ތިބާޔަކީ އެތައް އެހެން ބަޔަކަށް ހިތްވަރެއް ލިބިދޭ ފަދަ މީހަކަށް ވެދާނެއެވެ. މިފަދަ ގޮތެއް ވިޔަސް ނުވިޔަސް ދަންނާށެވެ! ތިބާ ތަޙައްމަލުކުރާ ކޮންމެ ވޭނަކަށް ﷲ ސުބުޙާނަހޫ ވަތަޢާލާ ތިބާއަށް އުޖޫރަ ދެއްވެއެވެ. އަދި ހަނދާން ބަހައްޓާށެވެ. ޝައްކެއްނެތް ގޮތުގައި ﷲ ގެ އެހީ ވަނީ ނުހަނު ގާތުގައެވެ.

މާތް ﷲ އަޅަމެންނަކީ ދަތި އިމްތިޙާންތަކުގެ ތެރެއިންވެސް އެކަލާނގެއަށް އޮތް އިތުބާރާއި އީމާންތެރިކަން ވަރުގަދަ ބަޔަކު ކަމުގައި ލައްވާށި! އާމީން!