ނަފްސީ (ފަންސާސްފަސްވަނަ ބައި)
މިހާރުގެ އާދައިގެ މަތިން އެރޭ ވެސް ހިލްޔާ ދަމު ނަމާދަށް ކޮށްފައިވި އެލާމާއިއެކު ހޭލެވުނެވެ. ވަރުބަލިވުމުގެ ސަބަބުން ކިތަންމެ ނިދި އައިސްފައި ވިޔަސް އެނދުން ތެދުވެލީ، އޭނަގެ ވެރި ރައްބު މަތިން ހަނދާން ކުރަމުންނެވެ. ރޭގަނޑުގެ އެންމެ ފަހު ތިންބައި ކުޅަ އެއްބަޔަކީ ފާފަ ފުއްސެވުމަށް އެދުމަށާއި ދުޢާ ކުރުމަށް މޮޅު އިތުރުވެގެންވާ ގަޑިއެއްކަން ހަނދާން ކުރަމުންނެވެ. އޭނަ ދަތިކަމާއިއެކީ ވެސް ތެދުވެގެން ކޮށްލާ ދެ ރަކުޢަތުގެ ނަމާދަކީ އާޚިރަތުގައި އޭގެ ސަބަބުން އޭނަ ސަލާމަތް ވެދާނެ ދެ ރަކުޢަތް ކަން ހަނދާން ކުރަމުންނެވެ.
ފާޚާނާއަށް ގޮސް ދަތް އުނގުޅައި ވުޟޫ ކޮށްލައިގެން ނިކުމެ ހިލްޔާ ނަމާދަށް ތައްޔާރުވިއެވެ. އަދި ދަމު ނަމާދަށް ނިޔަތް ގަންނަމުން ހަޝަމް ބަނެވެ. ނަމާދުގައި ހިލްޔާ މުޅިންހެން ކިޔަވަމުން ދިޔައީ ޢައްމާ ފޮތުގެ ސޫރަތްތަކެވެ. ނަމާދުގައި އޭނައަށް އެހެން ސޫރަތްތައް ކިޔެވޭނެ ނަމައޭ ހިތް ބުނަން ފެށިތާ ދުވަސްކޮޅެއް ވެއްޖެއެވެ. ތަބާރަ ފޮތަކީ ކުރިން ހިތު ދަސްކޮށްފައިވާ ފޮތަކަށް ވިޔަސް ނަމާދުގައި ކިޔަވަން ޖެހިލުންވަނީ، އެ ސޫރަތްތައް ވަރަށް ބޮޑަށް ހަނދާން ނެތިފައިވާތީވެއެވެ.
އެހެންކަމުން އެރޭގެ ދަމު ނަމާދުގެ ސަޖިދަތަކުގައި، ކުރެވުނު ދުޢާތަކުގެ ތެރެއިން، އޭނައަށް ޤުރުއާން ހިތުދަސްކުރުމުގެ ތައުފީޤު ދެއްވުމަށް އެދި ހިލްޔާއަށް ދުޢާ ކުރެވުނެވެ. އެ ދުޢާއާއިއެކު ފުރަތަމަ ދެ ރަކުޢަތް ނިންމުމަށްފަހު ދާނިޝް އޭނައަށް އެދުވަހު ދިން ދުޢާ ވެސް ކިޔާލެވުނެވެ. އެހިނދު ހިތަށް ލިބިގެން ދިޔަ ހަމަޖެހުމާއިއެކު، މުޅި ޤުރުއާން ނޫނަސް، އޭނަ ދަސްކުރުމަށްފަހު ހަނދާން ނެތުނު ބައި ދަސްކޮށްލަން ޢަޒުމް ކަނޑައެޅުނެވެ.
އެ ދެ ރަކުޢަތަށްފަހު ހިލްޔާ ފަތިސް ނަމާދު ޖެހެންދެން ދެ ރަކުޢަތް ކުރަމުން ދުޢާތައް ކުރަމުން ދިޔައެވެ. އެ ދުޢާތަކަކީ ގިނައިން ދާނިޝް އޭނައަށް ހަނދާން ކޮށްދީފައިވާ ދުޢާތަކަށްވުމުން ދާނިޝް މަތިން ވަރަށް ބޮޑަށް ހަނދާންވަމުން ދިޔައެވެ. ދާނިޝްއާއި މެދު އޭނައަށް ކުރެވެނީ މުޅިން އާ އިޙްސާސްތަކެކެވެ. އެހެންކަމުން އެ އިޙްސާސްތަކުގެ އަސްލަކީ ކޮބައިކަމެއް ނޭނގެއެވެ. ހިލްޔާގެ ހިތުގައި ދާނިޝްއަށްޓަކައި އިޙްތިރާމްވެއެވެ. އޭނައާއި އެ ދުޢާތައް ޙިއްސާ ކުރުމުން ޝުކުރުވެރިކަން ވެއެވެ. ދޭތެރެދޭތެރެއިން ދާނިޝްގެ ރީތިކަމަށް ހިތާހިތުން ތަޢުރީފު ކުރެވެއެވެ. އަބަދުހެން ދާނިޝް ފެންނަ ހިސާބުގައި ހުންނަން ބޭނުންވެއެވެ. ބައެއްފަހަރު މި އިޙްސާސްތަކާއިމެދު ބިރުވެސް ގަނެއެވެ. މީގެ ނަތީޖާ ނިކުމެދާނެ ގޮތެއް ނޭނގޭތީވެއެވެ. އަދި އެއީ އެހާވެސް ފުން އިޙްސާސްތަކަށް ވާތީވެއެވެ.
ހިލްޔާއަށް މި އިޙްސާސްތައް ﷲ އާއި ޙިއްސާ ކުރެވުނެވެ. ކިތަންމެ ލަދު ގަތަސް ﷲ ސުބްޙާނަހޫ ވަތަޢާލާ ހުރިހާ ކަމެއް މޮޅަށް ދެނެވޮޑިގެންވާކަން ހަނދާން ކުރަމުންނެވެ. ދޮންތަ މިރޭ ސިފަކުރިހެން އޭނަ ވެސް ބޭނުންވަނީ ދާނިޝްއާއި ދުރުވާށެވެ. އެހެނަސް އެއީ އެންމެ ރަނގަޅު ގޮތްކަން ޔަޤީން ނުވުމުން ހިލްޔާއަށް އިސްތިޚާރާ ނަމާދެއް ވެސް ކޮށްލެވުނެވެ. ދާނިޝްއާއި އެކީގައިވުމަށް ކުރި އިސްތިޚާރާއެވެ. ‘އެކީގައިވުން’ ހިލްޔާ މާނަ ކުރީ ކިހިނެއްކަމެއް ޚުދު ހިލްޔާއަށް ވެސް ނޭނގެއެވެ. އެހެނަސް ﷲ އޭނައަށް އެކަން ސާފުކޮށްދެއްވާނެކަން ހިލްޔާ ޔަޤީން ކުރިއެވެ.
އެދުވަހު ފަތިސް ނަމާދަށްފަހު އިރު އަރަންދެން ހިލްޔާ އިނީ މުސައްލަ މަތީގައެވެ. އެދުވަހުން އެދުވަހަށް ވެސް ޤުރުއާން ހިތުދަސްކުރުމުގެ އެދުން ހިތުގައި ބޮޑުވުމުން އިރު އަރަންދެން ތަބާރަ ސޫރަތް ދަސްކުރަމުން ދިޔައެވެ. އެއީ ކުރިން ދަސްކޮށްފައިވާ ސޫރަތަކަށް ވެފައި ހިލްޔާއަށް ޢަރަބި ވެސް ކޮންމެވެސް ވަރަކަށް އެނގޭތީ ދަސްކުރަން ވަރަށް ފަސޭހަވިއެވެ. ނުހަނު ފަރިތަކޮށް ފުރަތަމަ ދެ ޞަފްޙާ ދަސްކޮށްލެވުމުން އިރުއެރުމަށްފަހު ބައިގަޑިއެއްހާއިރު ފަހުން ކުރި ޟުޙާ ނަމާދުގައި އެ ޞަފްޙާތައް ކިޔަވާލެވުމުން އިތުރު ހިތްހަމަޖެހުމެއް ލިބުނެވެ.
ހިލްޔާއަށް ފޯނުގައި އަތް ލެވުނީ ޟުޙާ ނަމާދަށް ފަހުއެވެ. ފޯނު ނެގިއިރު އޭނަގެ އެކުވެރިންގެ ގްރޫޕުން މެސެޖުތަކެއް އަންނަމުން ދިޔައެވެ. ހިލްޔާ ގްރޫޕް ހުޅުވާލަމުން މެސެޖުތައް ކިޔަން ފެށިއެވެ.
މަރީ: އޭ ކޮލެސްޓްރޯލް މަތިވެގެން މިއުޅެނީ. އެކްސަޒައިން ކުރުން ހުއްޓާލުމުގެ ނަތީޖާ 😭
ސާދާ: އަޅޭ! ވީ ޝުޑް ރީސްޓާޓް. ހަށިގަނޑަކީ ވެސް އަމާނާތެއް ލެޓްސް ޓޭކް ކެއާރ އޮފް އިޓް.
މަރީ: އާނ އެކަމަކު ކޮންތަނަކަށް ދާނީ. ކުރިން އަހަރުމެން ދިޔަ ޖިމް މިހާރު ބަންދުކޮށްފަ ހުންނަނީ. ނީނާ މިހާރު ބޭރުގަ އުޅެނީ. ދެން ހުންނަނީ އަންހެނުންނާ ފިރިހެނުން މިކްސްކޮށް ދާ ޖިމްތައް. މަށަށް ލާހިކެއްނޫން އެކަހަލަ ތަނެއްގަ ލިފްޓް ކުރާކަށް.
ލާނާ: ހުރެއޭ މިހާރު އެކަހަލަ ޖިމެއް! މި އަހަރު ހުޅުވުނު ތަނެއް.
މަރީ: ކޮންތަނެއް؟
ސާދާ: ވެއާރ؟
ލާނާ: ނަޖާހު ފްރެންޑުންނާއި އެކީ ހުޅުވި ތަނެއް. ބުނީމެއްނު އިޚްވާން ފައުންޑޭޝަން ގެ ވާހަކަ؟ އެ ބިލްޑިންގް ސެކަންޑް ފްލޯގަ ހުންނަނީ ޖިމެއް. އަންހެނުންނާ ފިރިހެނުންނަށް ވަކިން ދެ ބައި ހުރޭ. އެއްދުވަހު ނަޖާ އަހަރެން ގޮވައިގެން ދިޔަ. އަދި އިންސްޓްރަކްޓާރއެއް ނުހުރޭ އެކަމަކު ރިސެޕްޝަނުން މެމްބާރޝިޕް ނަގައިގެން ވަދެވޭ.
ސާދާ: ވީ ޝުޑް ގޯ! އިން ޝާ ﷲ!
ހިލްޔާ: މިއަދު ހަވީރު ޢަޞްރަށްފަހު ކިހިނެއް؟
ހިލްޔާއަށް އެ ވާހަކަތައް ކިޔާފައި ނުހުރެވިގެން ބުނެވުނެވެ. އެދުވަހު އޭނައަށް އޮތީ ހެނދުނުގެ ޑިއުޓީއަކާއި ރޭގަނޑު ޑިއުޓީއެކެވެ. އެކުވެރިންނާއިއެކީ ކަސްރަތު ކުރި ދުވަސްތައް ހަނދާންވެފައި ހިލްޔާ ވެސް އެ ބުނާ ޖިމަކަށް ދާން ބޭނުންވިއެވެ. އަދި ‘އިޚްވާން ފައުންޑޭޝަން’ ގެ ނަން އިވިފައި ދާނިޝް މަތިން ހަނދާންވުމުން އުފަލެއް ލިބުނެވެ. އުފާވީ ކޮންމެހެން އެތަނަށް ދިޔުމުން ދާނިޝް ފެންނާނެތީވެއެއް ނޫނެވެ. އަމުދުން ކަސްރަތު ކުރަން އޭނަ ގޮސްފައި ހުއްޓާ ދާނިޝްއަށް އޭނަ ފެންނާކަށް ހިލްޔާގެ ހިތް ނޭދުނެވެ. އުފާވީ ދާނިޝް އެކުވެރިންނާއެކީ ހިންގާ ޖަމްޢިއްޔާއަކުން އެފަދަ ރަނގަޅު ޚިދުމަތެއް ފޯރު ކޮށްދޭތީވެއެވެ. އޭގެ ސަބަބުން ދާނިޝްއަށްޓަކައި ހިލްޔާގެ ހިތުގައިވި ‘ބީރައްޓެހި’ އިޙްސާސްތައް އިތުރުވިއެވެ.
ހިލްޔާގެ އެ ސުވާލަށް 3 އެކުވެރިން ވެސް އެއްބަސްވުމުން އެދުވަހު ހަވީރު ހިލްޔާ ޖިމަށް ދާން ތައްޔާރުވިއެވެ. ކަކުލަށްވުރެ ތަންކޮޅެއް މައްޗަށް އޮތް އަތްދިގު ޓީޝާޓަކާއި ޓްރެކް ޝޫޓެއް ލުމަށްފަހު މަތިން ކަޅުކުލައިގެ އަބާޔާއެއް ލައި ޝޯލް އަޅަމުންނެވެ. އަދި ކުޑަ ދަބަހެއްގައި ވަށް ބުރުގާއަކާއި ފެންފުޅިއާއި ތުވާލިއެއް އަޅައިގެން ނިކުތެވެ.
ލާނާ ކިޔައިދީފައިވާ މަގުތަކުން ދަތުރު ކުރަމުން ގޮސް ހިލްޔާއަށް އިޚްވާން ފައުންޑޭޝަން ގެ ޢިމާރާތާއި ހަމައަށް ދެވުނުއިރު 4 ޖަހައިފިއެވެ. އޭރު ސާދާ ވެސް ސައިކަލުގައި އައިސް ޕާކިންގް އޭރިއާގައި މަޑުކޮށްލިތަން ފެނުނެވެ. އެހެންކަމުން ހިލްޔާ ސާދާއާއެކީ ޖިމަށް ޢިމާރާތަށް ވަންނަން ދިޔައެވެ. ލާނާއަށް ގުޅުމުން ލާނާ ފިރިމީހާއާއިއެކު މާ ކުރިން އައިސްފައިވާ ވާހަކަ ބުންޏެވެ. އަދި އެ މީހުންނަށް ޢިމާރާތުގެ ތެރެއިން މަގު ދެއްކުމަށް ތިރިއަށް އެބަ އަންނަ ކަމަށް ބުންޏެވެ.
ޢިމާރާތަށް ވަނުމާއިއެކު ގްރައުންޑް ފްލޯގެ ހުދުކުލައިގެ ފާރުތަކުން ނުހަނު ރީތި އަދި ބޮޑު ޕޯސްޓަރުތައް ފެންނަން ފެށިއެވެ. ކޮންމެ ޕޯސްޓަރެއްގައިވީ ޞަދަޤާތާއި ގުޅޭ ކޮންމެވެސް އާޔަތެކެވެ. ނޫނީ ޙަދީޘެކެވެ. ކުރިމަތިން ފެންނަމުން ދިޔަ އެންމެ ބޮޑު ޕޯސްޓަރުގައި އިޚްވާން ފައުންޑޭޝަން ގެ ‘މޮޓޯ’ ލިޔެވިފައިވިއެވެ.
“ރަޙްމަތް ލިބިގަތުމަށްޓަކައި ރަޙުމް ކުރާށެވެ.”
ހިތާހިތުން އެ ބަސްތައް ކިޔާލެވުނު ހިނދު ހިލްޔާގެ ފިޔަވަޅުތައް ވެސް ލަސްވިއެވެ. ވަށައިގެން ފެނުނު ހުރިހާ އާޔަތްތަކާއި ޙަދީޘްތަކުގެ ސަބަބުން އެވަގުތު ކޮޅު ތެރެއިން ވެސް އީމާންތެރިކަން ވަރުގަދަވިހެން ހީވިއެވެ. އެ ހިނދު ވެސް ދާނިޝް މަތިން ހަނދާންވިއެވެ. މި ޙަދީޘްތަކާއި އާޔަތްތައް މިތާ އެންމެންނަށް ފެންނަހެން ބެހެއްޓުން ވާނީ ދާނިޝްގެ ޚިޔާލަކަށް ކަން ޔަޤީނާއި ގާތް ކުރެވުނެވެ.
އޭގެ އިރުކޮޅެއް ފަހުން ހިލްޔާއާއި އޭނަގެ އެކުވެރިން ތިބީ ޢިމާރާތުގެ ދެވަނަ ފްލޯގައިވާ އަންހެނުންގެ ޖިމްގައެވެ. އެ ޖިމަށް ދިޔަ މަގުމަތީގައި ފިރިހެނުންގެ ޖިމް ހުރަސް ކުރާކަށް ވެސް ނުޖެހެއެވެ. އަންހެނުންގެ ޖިމްގައި ކުޑަ ދޮރުތައް ވެސް ހުރީ މަގާއިވާ ފަރާތަށް އެކަންޏެވެ. ފުޅާކޮށް ހެދިފައިވާ އެ ކުޑަދޮރުތަކުން ފެންނަމުން ދިޔައީ ދުރުދުރަށް ފެންނަމުން ދިޔަ މާ ކަނޑުގެ ރީތި މަންޒަރެކެވެ.
“ދިސް އިޒް ރިއަލީ ނައިސް އަސްލު! އަލްޙަމްދުލި ﷲ.” ހިލްޔާ ޑަމްބް ބެލް އަކުން އަތުގެ ކަސްރަތުކޮށް ނިންމާލީ، ކުޑަދޮރުން ބޭރު ފެންނަ ގޮތަށް ހުރި ސްޓޫލްއެއްގައި އިނދެއެވެ.
“އައި ނޯ ރައިޓް! ކޮންމެ ދުވަހަކު ނޫނަސް އެޓް ލީސްޓް ވަންސް އަ ވީކް އަންނަންވީ.” ސާދާ ވެސް ގަޑިއިރެއްހާއިރު ގެ ތަފާތު ކަސްރަތުތައް ކުރުމަށްފަހު އައިސް ހިލްޔާގެ ކުރިމައްޗަށް ވާ ގޮތަށް އޮތް މެޓް މަތީގައި އިށީނެވެ. އެހިނދު ލާނާވެސް ފެން ބޮމުން އައިސް ހަމަ އެތާނގައި އިށީނެވެ.
“ވަންސް އަ ވީކެއް ނޫން. އެޓް ލީސްޓް ޓުވައިސް އަ ވީކް. މަގޭ ކޮލެސްޓްރޯލްއާ މެދު ވިސްނަބަލަ!” މަރީ ޓްރެޑްމިލް އިން ފައިބަމުން އެހެން ބުނި ގޮތުން އެންމެންނަށް ހީލެވުނެވެ.
“ޓުވައިސް ރަނގަޅު ކަންނޭނގެ. ނަޖާ ވެސް މި ފަހުން ޖިމަށް ދާން ފެށީ. މިފަހުން މި ފްރެންޑް ގްރޫޕަށް ވަދެގެން. އޭނަގެ ފްރެންޑް ދާނިޝް އޯ އެންމެ މޮޅީ ޖިމްގެ ކަންތަކަށް. ދާނިޝް ބުންޏޯ ފަށާއިރު މަދުން ޖިމަށް ގޮއްސަ ގޭގަ އެހެން ކަސްރަތުތައް ކުރިޔަސް އޯކޭވާނެއޯ.” ލާނާ ކިޔައިދިނެވެ. އެހިނދު މަރީ ވެސް އެމީހުން ތިބި ތާނގައި އައިސް އިށީނެވެ.
ދާނިޝްގެ ނަން ގަނެވުމާއިއެކު ހިލްޔާއަށް ނޭނގި ހިލްޔާގެ މޫނު ރަތްވެގެން ދިޔައެވެ. ދާނިޝް ޖިމަށް ދާކަން އެނގުމުން ދާނިޝް ޖިމްގައި ކުރާނެ ކަންތައް ލޮލަށް ސިފަކުރެވުނެވެ. އެހިނދު އަނެއްކާވެސް މުޅިން ބީރައްޓެހި އިޙްސާސްތައް ކުރެވެން ފެށިއެވެ. ދާނިޝް މިވަގުތު ފިރިހެނުންގެ ޖިމްގައި ވާނެތޯ ހިތް ސުވާލު ކުރީ ދާނިޝް ދެކެން ބޭނުންވުމުންނެވެ.
“އޭ ތިއީ އެއްކަލަ ފިލްމު ކުޅުން ހުއްޓާލި ދާނިޝް ދޯ؟ ނަޖާ ގެ ފްރެންޑަކީ؟” މަރީ އެހިއެވެ. އެއާއިއެކު ހިލްޔާއަށް އޭނަގެ ކަންފަތް ހުޅުވާލެވުނެވެ. އެ ސުވާލުގެ ޖަވާބު އެނގުނަސް ދާނިޝްގެ ވާހަކަތައް ގިނައިން އިވުމަށް ހިތް އެދުނެވެ.
“ޔާ….އެކަމަކު މިހާރު ފިލްމުތަކަށް ނަފްރަތު ކުރެއޯ ނަޖާ ބުނީ. މަޖަލަކަށް ފިލްމެއް ބަލަން ހިނގާށޯ ބުންޏަސް ރުޅި އާދެޔޯ. އެންޑް އޯލްސޯ….ހީ އިޒް ސިންގަލް! އިން ހިޒް ތާޓީސް. ހިލްޔާ މިކަމާއިމެދު ބުނަން ބޭނުންވާ އެއްޗެއް އެބައޮތް ބާ؟” ލާނާ ލާނެތް ރާގަކަށް ކޮށްލި އެ ސުވާލާއިއެކު ހުރިހާ ނަޒަރުތައް ހިލްޔާއަށް ހުއްޓުނެވެ. އެއާއިއެކު ހިލްޔާ ގަނޑުވާ ގޮތްވިއެވެ.
**
“އޭ ދާނިޝް އެއްކަލަ ލޯބިވާ ކުއްޖާގެ ޚަބަރެއް ނުވަނީ ކީއްވެ؟ މިހާރު އަހަރުމެން ކިހާ ދުވަހެއް ކެއުމަކަށް ވެއިޓް ކޮށްގެން ތިބޭތާ؟” ނަޖާހު ދަގަނޑެއްގައި ހިފައިގެން މައްޗަށް ގޮސް ތިރިއަށް ފައިބަމުން އުދަގޫ އަޑަކުން ސުވާލު ކުރިއެވެ.
“އަދި ޚަބަރެއް ވާނެ އަދި މަޑުކުރޭ. އިން ޝާ ﷲ.” ދާނިޝް އިށީނދެގެން އިނދެ ލެގް ޕްރެސް ހަދަމުން ބުންޏެވެ.
“މަށަށް ފެންނަނީ ތި ކުއްޖާ ޑިޗްކޮށްލަން. މާ ގިނަ ދުވަސް ތި ކުރަނީ މެރީ ނުކޮށް. ރަނގަޅު ކުއްޖެއް ވެއްޖެއްޔާ އެހެން ނަހަދާނެ.” ޔައިޝް އެތާހުރި ބައިސްކަލެއްގައި އިނދެ ދުއްވަމުން އެހިއެވެ. އެހިނދު ކަސްރަތު ކޮށް ވަރުބަލިވެ ބަންޑުން ބިންމަތީގައި އޮތް ހަސަން ‘އެގްރީޑް’ އޭ ބުންޏެވެ. އެވަގުތު ހުރިހާ ކަމެއް އެނގޭ ފަޔާޒް ޓްރެޑްމިލް މަތީގައި ހުރެ ވަކި އެއްޗެކޭ ނުބުންޏެވެ.
“ވެލް…ސޭޑް ޓު ނޯ.” ނޫންކަމަށް ހަދާފައި ދާނިޝް ބުންޏެވެ. ހިލްޔާގެ ވާހަކަ އެ އެކުވެރިންނަށް ކިޔައިދޭން ދާނިޝް ބޭނުންވީ ކައިވެނީގެ ދަޢުވަތާއި އެކީގައެވެ.
“މަ ރަނގަޅު ޚިޔާލެއް ދެންތަ؟ މަށަށް އެބަ އެނގޭ ދާނިޝްއާއި ގުޅޭނެ ވަރަށް ރަނގަޅު ކުއްޖެއް. ސިންގަލް. ނެވާ މެރީޑް. ލޭޓް ޓުވެންޓީސް. ދީންވެރި ކުއްޖެއް. މި ކުއްޖާއަށް ޕްރޮޕޯޒް ކުރަންވީއެއްނު؟ އަހަރެންގެ ވައިފްގެ ފްރެންޑެއް ވީމަ ސެޓް ވެސް ކޮށްދީފާނަން. އެޕޭރެންޓްލީ ޔުއާރ މޯމް އުސްތާޒާ އަސްމާގެ ފެވަރިޓް ސްޓޫޑެންޓް އެއީ.” ނަޖާހު ދަގަނޑު ގަނޑުން ދޫކޮށް، އެތާ ހުރި ގޮނޑީގައި އިށީނދެ ފެންފުޅި ނަގަމުން ވާހަކަ ދެއްކިއެވެ.
“އެހެންތަ؟ ކޮން ކުއްޖެއް؟” ދާނިޝްއަށް ދެބުމަ ކައިރިކޮށްލަމުން އަހާލެވުނެވެ. މަންމަގެ ‘ފޭވަރިޓް ސްޓޫޑެންޓް’ އޭ ބުނުމުން ހަނދާންވީ މަންމަ ނުހަނު ޖޯޝާއި އެކީ ހިލްޔާގެ ވާހަކަ ދެއްކި ގޮތެވެ.
**
“އަމް…އައި…ޑޯންޓް ނޯ.” ހުއްޓުން އަރާފައި އިނދެފައި ޖަވާބެއްގެ ގޮތުން ހިލްޔާއަށް ބުނެވުނެވެ.
“ދެޓް މީންސް ޔޫ ވިލް ކޮންސިޑާރއޭ ދޯ؟” ލާނާ ޖޯޝެއް ވެރިވި ލޮލާއިއެކީ ބުންޏެވެ.
“ދެން އަދި ހިލްޔާއަށް ޓައިމް ވެސް ބޭނުންވާނެއެއްނު ޕާސްޓް އިން މޫވް އޮން ވާން ވެސް؟ އެހެން ފިރިހެނެއްގެ ޚިޔާލުތައް ކުރެވެންޏާ އާ ރިލޭޝަންޝިޕަކަށް ދިޔުން ބުއްދިވެރިއެއް ނޫން.” ސާދާ ބުންޏެވެ.
“ތެދެއް ހިލްޔާ އަދި ޓައިމް ބޭނުންވޭތަ؟” ލާނާ ހިލްޔާއަށް ބަލާލަމުން އެހިއެވެ.
އެހިނދު ހިލްޔާއަށް ވިސްނާލެވުނެވެ. އޭނަ ރާފިލް މަތިން އަދިވެސް ހަނދާންވޭތޯ ހިތަށްއެރިއެވެ. އެވަގުތު އެ ޖަވާބު ނުހަނު ސާފުކޮށް ލިބުނެވެ. ރާފިލް މަތިން އޭނަ އެއްގޮތަކަށް ވެސް ހަނދާނެއް ނުވެއެވެ. މީހަކު އޭނައާއިމެދު ފަތުރާ ދޮގު ޚަބަރު އިވޭ ހިނދު ރާފިލް މަތިން ހަނދާން ވިޔަސް އެ ވަގުތުކޮޅު ނިމުމާއިއެކުހެން ހަނދާން ނެތެއެވެ. އެކަން އެނގުންވި ހިނދު ޚުދު ހިލްޔާ ވެސް ޙައިރާންވިއެވެ. މިހާ އަވަހަށް ރާފިލް މަތިން އޭނަ ހަނދާން ނެތުނީ ކީއްވެ ހެއްޔެވެ؟ އޭނައަށް ދުވަހަކުވެސް ރާފިލް ދެކެ ލޯބި ނުވެވެނީ ހެއްޔެވެ؟
“ޓައިމް…ބޭނުމެއް ނުވޭ. ހަނދާނެއް ނުވޭ މާޒީ މަތިން.” ހިލްޔާއަށް އެއްދިމާލަކަށް ނަޒަރު ހުއްޓައިގެން އިނދެ ބުނެވުނެވެ.
“ހަނދާން ކުރަންވީ ސަބަބެއް ވެސް ނެތް ދޯ؟ ޗާޗަކަށް ގެންދާ މީހަކު ހަނދާން ކުރާނެ ކަމެއް ނެތް!” މަރީ ނުރުހުންތެރިކަމާއިއެކީ ބުންޏެވެ. ސާދާ ވެސް އެއްބަސްވުމުގެ ގޮތުން އާނއެކޭ ބުންޏެވެ.
“އެހެންވީއިރު ހިލްޔާ ވިސްނަބަލަ ދާނިޝް އާއިމެދު. ޑޫ ޔޫ ނޯ އެއީ އުސްތާޒާގެ ދަރިފުޅޭ! ވަރަށް ދީނީ ޢިލްމު ވެސް ހުރެޔޯ ނަޖާ ބުނީ. ކިޔައިދިން ގޮތުން އަހަންނަށް ހީވި ވަރަށް ހިލްޔާއާއި ގުޅޭނެހެން. އަޅެ ޗާންސެއް ދޭންވީއެއްނު؟” ލާނާ ނުހަނު ފޯރިއާއިއެކީ ބުންޏެވެ.
ހިލްޔާ އެ ބަސްތަކަށް އާނއެކޭ ބުނަން ބޭނުންވިއެވެ. އެހެނަސް ދާނިޝްއާއި ގުޅެން އޭނަ ޖެހިލުންވާ ސަބަބުތައް އެވަގުތު އެނގުންވިއެވެ.
“އެކަމަކު….އަހަންނާ ގުޅޭ ރޫމާރސްތައް އިވިފަދޯ ހުންނާނީ ދާނިޝްއަށް؟” ހިލްޔާއަށް ބުނެވުނެވެ
**
“ތަންކޮޅެއް ކޮންޓްރޮވާޝަލް ނަމެއް. މަރިޔަމް ހިލްޔާ ނަހީދު. އައި ނޯ ސޯޝަލް މީޑިއާގަ އެކުއްޖާގެ އިމޭޖް ރަނގަޅެއް ނޫން. ބަޓް ޓްރަސްޓް މީ. އަހަރެންގެ ވައިފް ބުނީ އެއީ ހުސް ދޮގެކޯ. ވައިފް ބުނީ ތިމަންނަ އެއަށްވުރެ ކުރީއްސުރެ ވެސް ހިލްޔާއާއި ފްރެންޑްވާނެއޯ. އަބަދުވެސް ވަރަށް ދީންވެރި ވަރަށް އަޚްލާޤް ރަނގަޅު ކުއްޖެކޯ ބުނީ.” ނަޖާހު ނުހަނު ސީރިއަސްކޮށް ދާނިޝްއަށް ކިޔައިދިނެވެ.
“އެހެންތަ؟” ދާނިޝް ދެންވެސް ނޫންކަމަށް ލާނެތް ހިނިތުންވުމަކާއެކީ ރާގަކަށް އެހިއެވެ. ފާރަށް މޫނުވާ ގޮތަށް ޓްރެޑްމިލް މަތީގައި ހުރި ފަޔާޒަށް ވެސް ނުހީ ހުރެވެމުން ދިޔައީ ކިރިޔާއެވެ. ދާދި ދެންމެއަކު ނަޖާހުމެން ދާނިޝް ގާތު ‘ލޯބިވާ ކުއްޖާ’ ދޫކޮށްލުމަށް ނަސޭޙަތްތެރިވެފައި ނޭނގުމެއްގެ ތެރެއިން ވެސް ހަމަ އެކުއްޖާއާއި ގުޅުމަށް ބުނަމުން ދާތީވެއެވެ.
**
“އިވުނަސް ކޮބާ މައްސަލައަކީ؟ އެއީ ރަނގަޅު މީހެއް ވިއްޔާ ހިލްޔާއަށް އިތުބާރު ކުރާނެ.” ލާނާ ބުންޏެވެ. މަރީއާއި ސާދާ ވެސް އެއްބަސްވުމުގެ ގޮތުން ބޯޖަހާލިއެވެ.
“އެކަމަކު….ދާނިޝް އަހަންނާ ގުޅުނިއްޔާ ދާނިޝްއަށް ވެސް ރޫމާރސް ގެ އަސަރު ކުރާނެ ދޯ؟ އޯލްސޯ އާރ ޔޫ ޝުއާރ ހީ އިޒް ސިންގަލް؟ ފޭސްބުކް ވީޑިއޯއެއްގަ ކޮންމެވެސް އަންހެން ކުއްޖެއް ކައިރި ބުންޏެއްނު ތިމަންނަ ލޯބިވާ ކުއްޖެއް ހުރެޔޯ؟ މެރީ ނުކުރިޔަސް ކޮންސިޑާރ ކުރާ ކުއްޖަކު ހުރެދާނެ ދޯ؟” ހިލްޔާ އެހިއެވެ. އަދި ލާނާގެ ފަރާތުން އޭގެ ސާފު ޖަވާބެއް ލިބޭނެ ކަމަށް އުއްމީދު ކުރެވުނެވެ. ދާނިޝް އެފަދައިން ވިސްނާ ވެސް ކުއްޖެއް ނުހުންނަ ގޮތެއް ވުމަށް އެދެވުނެވެ. އެހެނަސް…
“ދޯ؟ ފޮގޮޓް ދެޓް ޕާޓް. ނަޖާ ވެސް ބުނި ތިހެން. ބުނީ ތިމަންނަމެންނާ ވަރަށް ޝެއާރ ނުކުރާނެއޭ ޕާރސަނަލް ވާހަކަތައް. އެކަމަކު ނަޖާ ބުނީ ތިމަންނައަށް ހިއެއް ނުވޭ އެ ރިލޭޝަންޝިޕް ވޯކް ކުރާނެހެނެއް. އެހެންވީމަ އަސްލު ހިލްޔާ ގާތު މި ވާހަކަ ދެއްކީ….” ލާނާ ކިޔައިދިނެވެ.
**
“އާނ އެހެން. ވަރަށް ރަނގަޅު ކުއްޖެއް އެއީ. އެ ކުއްޖާއާއި މެރީ ކޮށްފިއްޔާ ބްރޯގެ ޙަޔާތް ހަމަ ސެޓް ވީ. އިން ޝާ ﷲ! އެހާ މުއްސަނދި އަދި އެހާ މޮޅު ކުއްޖެއް އެއީ. ތަބާރަކަ ﷲ!” ނަޖާހު އައި ޖޯޝާއިއެކީ ތެދުވެލަމުން ބުންޏެވެ.
“މާ ޝާ ﷲ…ނަޖާ ބުނީތީ ތިކަމާ އުޅެލާނަން އިނގޭ. އިން ޝާ ﷲ.” ދާނިޝް ބުންޏެވެ.
“ދެޓްސް މޯ ލައިކް އިޓް މައި ފްރެންޑް!!!” ނަޖާހު ނުހަނު އުފާވެފައި ބުންޏެވެ. އެހިނދު ފަޔާޒް ނުއިވޭ ގޮތަކަށް ހީ ހަލާކު ވަމުން ދިޔަ މަންޒަރު ދާނިޝްއަށް ލޮލުގެ ކޮޅުން ފެންނަމުން ދިޔައެވެ.
އެވަގުތު ދާނިޝްއަށް ވެސް ހިނިތުންވެލެވުނެވެ. ކޮންމެ ދުވަހަކުހެން ހިލްޔާއާއި އިނުމަށް ރަނގަޅު ސަބަބުތަކެއް އޭނައަށް ފެންނަމުން ދާ ފަދައެވެ. ހިލްޔާއަކީ އޭނައަށް ހެޔޮއެދޭ އޭނަގެ އެކުވެރިން ވެސް ރުހޭ ކުއްޖެއްކަން މިހާރު އެނގިއްޖެއެވެ.
**
“އަސްލު…ދާނިޝް ކަހަލަ މީހަކު ސިންގަލް ކޮށް ހުރުން ވެސް އަންލައިކްލީ ދޯ؟ ސިންގަލް ވިއްޔާ ހީ އިޒް ލައިކް…..ދަ މޯސްޓް އެލިޖިބަލް ބެޗްލާރ!” ހިލްޔާއަށް ބުނެވުނެވެ.
“އެންޑް ޔޫ، މައި ފްރެންޑް، އާރ ދަ މޯސްޓް އެލިޖިބަލް ބެޗްލޮރެޓް! އަހަންނަށް ދާނިޝް ނުފެނުނަސް އަހަންނަށް ވަރަށް ބޮޑަށް ހީވޭ ދާނިޝްއާއި ހިލްޔާ ގުޅޭނެހެން. އަޅެ ބައްޕަ ތްރޫކޮށް ދާނިޝް އިންވެސްޓިގޭޓް ކޮށްލަބަލަ. ހިލްޔާގެ ބައްޕައަށް އެނގެއެއްނު ވަރަށް ގިނަ މީހުން؟” ލާނާ ބުންޏެވެ.
އެހިނދު ހިލްޔާއަށް ބައްޕަ މަތިން ހަނދާންވެފައި ލޯ މަރާލެވުނެވެ. ބައްޕަގެ ދުލުގައި ދާނިޝްއަށްޓަކައި ތަޢުރީފެއް ނޫނީ ނޯންނާނެކަން ޔަޤީން ކުރެވުނެވެ. މިއީ ދާނިޝްއާއި ‘އެކީގައިވުމަށް’ އޭނައަށް ފެންނަ އިސްތިޚާރާގެ ޢިޝާރާތްތަކެއްތޯ އެވަގުތު ހިތަށްއެރިއެވެ.
“ވިސްނާނަން ތިކަމާ. އިން ޝާ ﷲ.” ހިލްޔާއަށް ބުނެވުނެވެ. އަދި ހަމައެކަނި ވިސްނޭނީއެވެ. ދާނިޝްއާއި ‘އެކީގައިވާން’ ކިތަންމެ ބޭނުންވިޔަސް އަދިވެސް ކައިވެންޏެއްގެ ޚިޔާލު ކުރަން ހިލްޔާ ޖެހިލުންވެއެވެ. އޭނަ އެންމެ ފަހުން ފިރިހެނަކާއި ކައިވެނި ކުރަން ޚިޔާލު ކުރުމުން ކަންތައް ވެގެން ދިޔަ ގޮތުންނެވެ. ދާނިޝްއަކީ ރާފިލް ކަހަލަ މީހެއް ނޫންކަން ހިލްޔާއަށް ޔަޤީންކުރެވެއެވެ. އެހެނަސް އޭނަގެ ހިތުގެ ފުން މިނުގައި އަދިވެސް ބިރުވެރިކަމެއް ވަނީއެވެ. އޭނައާއި ބެހޭގޮތުން ދާނިޝްއަށް އިވިފައިވާނެ ދޮގު ވާހަކަތައް ހަނދާންވެފައި އެ ބިރުވެރިކަން އިތުރުވިއެވެ.
އޭގެ އިރުކޮޅެއްފަހުން ހިލްޔާ ސާދާއާއިއެކީ އިޚްވާން ފައުންޑޭޝަންގެ ޢިމާރާތުން ނިކުތެވެ. ލާނާ މަޑުކޮށްލީ އޭނަ ދާނީ ނަޖާހު ނިމުމުން ކަމަށް ބުނަމުންނެވެ. ސާދާ ޢިމާރާތުން ނިކުމެ ވަގުތު ސައިކަލަށް އަރައި ނައްޓާލީ، ދަރިފުޅު ބަލާ ސްކޫލަށް ދާން ޖެހޭތީވެއެވެ. ސާދާ ދިޔުމުން ހިލްޔާ ވެސް ކާރަށް އަރަން ދިޔައެވެ. ކާރު ކައިރީގައި މަޑުކޮށްލި ވވަގުތު އެއްލި ކަޅިއަކުން ތަންކޮޅެއް ދުރުގައި ޕާކް ކުރެވިފައިވި ކަޅުކުލައިގެ އެއާރބްލޭޑް ސައިކަލް ފެނުނެވެ. ނުހަނު ދަންނަ ވައްތަރަށް ހުރި އެ ސައިކަލު ފެނުމުން ފަހަތަށް ޖަހިލާފައި ހިލްޔާއަށް ނަންބަރު ބޯޑު ބަލާލެވުނީ ހަމަ އެއްވެސް އިޚްތިޔާރަކާއި ނުލައެވެ. އެއާއިއެކު އެއީ ކާކުގެ ސައިކަލެއްކަން އެނގުންވުމާއިއެކު އޭނައަށް ފުރިހަމައަށް ހިނިތުންވެވުނު ހިނދު ކޯތާފަތް ރަތްވެގެން ދިޔައެވެ. ދާނިޝް ވެސް މިވަގުތު ހުރީ ޖިމުގައި ތާއޭ ހިތަށްއެރިއެވެ. އެހިނދު ދާނިޝް އާއިމެދު އިތުރަށް ގަޔާވެވޭ ގޮތްވިއެވެ.
ހިލްޔާއަށް ވަމުން ދިޔަ ގޮތް ޚުދު ހިލްޔާއަށް ވެސް އެނގެން ވަގުތުކޮޅެއް ނެގިއެވެ. މީހަކު ނެތް ތަނެއްގައި ގަދައަށް ހިނިތުންވެލާފައި ހުރެވުނުކަން އެނގުންވުމާއިއެކު ހިނިތުންވުން ފިލުވާލާފައި ސީރިއަސްވެލެވުނެވެ. އެހެނަސް ކާރަށް އަރަމުން ދިޔައިރު އަނެއްކާވެސް ބޭއިޚްތިޔާރުގައި ހިނިތުންވެލެވުނެވެ.
ހިލްޔާގެ ކާރު ލަސްލަހުން މަގަށް ނެރެ، ދުއްވާލި ވަގުތަކީ، ދާނިޝް ވެސް އެ ޢިމާރާތުން ނިކުތް ވަގުތެވެ. އެ ކަޅުކުލައިގެ ކާރާއިއެކު ކާރުގެ ނަންބަރު ބޯޑުވެސް ދާނިޝްއަށް ފެނުނު ވަގުތެވެ. އެހިނދު ދާނިޝްގެ މޫނުމައްޗަށް ވެރިވީ ޙައިރާންކަން އެކުލެވިފައިވި ހިނިތުންވުމެކެވެ. ހިލްޔާ މި ޢިމާރާތަށް އައީ ކީއްކުރަންތޯ ހިތަށްއެރިއެވެ. ޞަދަޤާތެއް ޙަވާލުކުރަން ހެއްޔެވެ؟ ނޫނީ ކަސްރަތު ކުރަން ހެއްޔެވެ؟ އޭގެއިން ކޮންމެ ކަމަކަށްޓަކައި އަޔަސް ދާނިޝް ހިލްޔާދެކެ އިތުރަށް ގަޔާވުން ނޫންކަމެއް ނުވިއެވެ.
ދާނިޝްއަށް އަވަސް ފިޔަވަޅުތަކެއްގައި ސައިކަލާއި ހަމައަށް ގޮސް ސައިކަލު ދުއްވާލެވުނީ، ބޭއިޚްތިޔާރުގައި ވެސް ހިލްޔާގެ ކާރާއި އެއްވަރު ކުރަން ބޭނުންވެފައިވުމުންނެވެ. ސައިކަލު ދުއްވަން ފެށިތާ 5 ވަރަކަށް މިނެޓް ފަހުން އެ މުރާދު ޙާޞިލުވުމުން ދާނިޝް ލަސް ދުއްވުމެއްގައި ހިލްޔާގެ ކާރުގެ ފަހަތުން ދުއްވަމުން ދިޔައެވެ. ޑްރައިވާރސް ސީޓުގައި އިނދެ އެއްވެސް ލޯގަނޑަކުން އޭނަ ނުފެންނާނެ ދިމާލެއްގައި ހުރެއެވެ.
ހިލްޔާ ކާރު ދުއްވަމުން ގޮސް ޒިބްރާ ކްރޮސްއެއްގެ ކައިރީގައި ހުރި ޓްރެފިކް ލައިޓަކާއި ޖެހުނެވެ. ހިލްޔާގެ ކާރާއިއެކު އެހެނިހެން ކާރުތަކާއި ސައިކަލުތައް ވެސް އެތާނގައި މަޑުކުރިއެވެ. ވަގުތުގެ ގޮތުން މަގުމަތީގައި ބައިވަރު މީހުން އުޅެއެވެ. ހިލްޔާ އިނީ ކުރިމަތި ހުރަސް ކުރަމުން ދިޔަ މީހުންނަށް ނަޒަރު ހުއްޓައިގެން ޒިކުރު މަތީގައެވެ.
ހިލްޔާ އެހެން ބަލަބަލާ އިންދާ ޒިބްރާ ކްރޮސްއިން އެންމެ ފަހުން ހުރަސް ކުރަމުން ދިޔަ ޒުވާން އަންހެން ކުއްޖަކު ކުއްލި ގޮތަކަށް ފިޔަވަޅުތައް މަޑުޖައްސާލައިފިއެވެ. އަތްކުރު ޓޮޕަކާއި ޖިންސެއްގައި ހުރި އެ އަންހެން ކުއްޖާ މޭމަތީގައި އަތް އެޅިއެވެ. އޭގެ ދެވަނަ ސިކުންތުގައި އެކުއްޖާ ލަސްލަހުން ލޯ މެރި، ބިމަށް ތިރިވި މަންޒަރު ފެނުމުން ހިލްޔާގެ ޑޮކްޓަރީ ސިކުނޑި ވަގުތުން ސަމާލުވިއެވެ.
ނުނިމޭ