Hijra (Part 3)
އެވަގުތުކޮޅަށްފަހު މުޅި ދުވަހު ނަސްރާއާއި އަފްރީން އާ ދެމެދު ވާހަކައެއް ނުދެކެވެއެވެ. ނަސްރާ ނަމާދަށް އަންނާށޭ ބުނީމަ އަފްރީން އަޔަސް ނަމާދު ނިމުމާއެކީ ނަސްރާއަށް އެއްޗެކޭ ބުނެލާނެ ފުރުޞަތެއްނުދީ އޭނަ ދަނީއެވެ. އަފްރީން މުޅި ދުވަހުހެން އުޅުނީ އޭނަގެ ކޮޓަރި ތެރޭގައެވެ. ނަސްރާ އެކޮޓަރީގެ ދޮރު ހުޅުވާފައި ބެލިއިރު އަފްރީން ހުރީ ފިލާވަޅު ހަދާށެވެ. އެހެންކަމުން އޭނަ ފިލާވަޅުތައް ހަދައި ނިމުމުން ވާހަކަ ދައްކަން ނަސްރާ ނިންމިއެވެ.
ހަވީރު ފަހެއްޖަހަން ގާތްވެފައި ވަނިކޮށް އަފްރީން އޭނަގެ ހިސާބު ފޮތާއި ކަލްކިއުލޭޓަރާއި ގަލަން ހިފައިގެން ގޮސް ފެންޑާގައި އެލުވާފައިވާ އުނދޯލީގައި އިށީނެވެ. އޭނަ ފިލާވަޅު ހަދަން އެއްތަނެއްގައި ހުރެހުރެ ފޫހިވުމުން މާހައުލު ބަދަލުކޮއްލީއެވެ. ހިސާބުގެ ފިލާވަޅު ނިމުމުން އޭނަގެ ހުރިހާ ފިލާވަޅެއް ނިމޭނެތީ އަފްރީން ހުރީ ހިތްހަމަޖެހިފައެވެ. އޭނަ ފިލާވަޅުގެ ތެރެއަށް މުޅިން ގެނބުނުތަނާހެން ނަސްރާ އެތަނަށް އައެވެ. ނަސްރާ އައި ބުޅަލަށް ދޭންވެގެން ކުޑަކުޑަ ތަށްޓަކަށް ސަމުސަލަކުން ކާއެއްޗެއް އެއްކޮށްގެނެވެ. އަފްރީން ނަސްރާއަށް ކުޑަކޮށް ބަލާފައި އަނެއްކާވެސް މަސައްކަތާއިގެން ކުރިއަށް ދިޔައެވެ. ނަސްރާ އަފްރީންއަށް ބަލަން ހުރެފައި ގޮސް އެތާ އަނބުގަހުގެ ދަށުގައި ހުރި މަތިގަނޑަކަށް އޭނަ ގެނައި ކާއެއްޗެހި ބިސްމި ކިޔައި ހުސްކޮއްލިއެވެ. ނަސްރާއަށް އެތަނުން ތެދުވެވުނީ ހަމަ ކިރިޔާއެވެ. ބުޅާ އަވަސް އަވަހަށް ދުވަމުން އައިސް ކާންފެށިއެވެ. ނަސްރާ ލުއިގޮތަކަށް ހީލަމުން އަފްރީންއަށް ބަލާލިއެވެ. ނަމަވެސް އަފްރީން އޭނައަށް ބަލައެއްނުލިއެވެ. ނަސްރާ ލަސް ހިނގުމެއްގައި ގޮސް ގެއަށްވަނެވެ.
އަފްރީން އޭނަގެ ފިލާވަޅުގެ އެންމެ ފަހު ސުވާލާ ހަމަވުމާއެކު ހިނިތުންވެލާފައި އަތްމަތި އަވަސްކޮއްލިއެވެ. ހަމަ އެވަގުތު އަނެއްކާވެސް ނަސްރާ އެތަނަށްއައެވެ. ނަސްރާގެ ފިޔަވަޅުގެ އަޑަށް އަފްރީންއާ ނަސްރާއާ ދެމެދު މީގެ އިރުކޮޅެއްކުރިން ހިނގި ނަޒަރު ބަދަލުވުންތައް ތަކުރާރުވިއެވެ. އެއަށްފަހު ނަސްރާ މިފަހަރުވެސް ދިޔައީ ބުޅާ ކައިރިއަށެވެ. ކައިނިމިގެން ގަސްދޮށުގައި ނިދިފައި އޮތް ބުޅަލުގެ ބޮލުގައި ނަސްރާ އޭނަގެ ބޫޓުން ފިރުމާލިއެވެ. އޭގެ އިރުކޮޅެއްނުވެ އަފްރީން ނިކަން ބާރަށް ފޮތް ލައްޕާލިއަޑު އިވުނެވެ. ނަސްރާ ބަލާލިއިރު އަފްރީން ހެވިފައި އިނދެ ގަލަމުގެ ދޯރި ޖަހާލަނީއެވެ. ނަސްރާ ހުރީ ބަލަހައްޓައިގެންކަން އަފްރީންއަށް އެނގުނެވެ. ނަމަވެސް އޭނަ ހަމަ ނުބަލަންވެގެން ދެލޯ މަރާލަމުން އުނދޯލީގައި އޮށޯތެވެ. އޭނަ އެހެން އޮވެފައި އިރުކޮޅެއްފަހުން ލޯ ހުޅުވާލިއިރު އުޑުން އެއްޗެއް ފެނުނެވެ. އަފްރީން ހިންދެމިލަމުން ރަނގަޅަށް ބަލާލިއިރު އެއީ އުޑުގައި އުދުހެމުން ދިޔަ ފެހިކުލައިގެ މަޑިއެކެވެ.
“ދޮންތާ ބަލާ ކައިޓް!” އައި ފޯރިއާއެކީ އަފްރީންއަށް އެދިމާލަށް އިނގިލި ދިއްކޮއްލަމުން ބުނެލެވުނެވެ. ނަސްރާ ބަލާލުމުން އޭނަގެ ހިނިތުންވުން ފަނޑުވިއެވެ. ނަމަވެސް ޙަޤީޤަތުގައި އަފްރީން އޭނަގެ ދޮންތައަށް ރުޅި ނާންނަކަން އޭނައަށް އެވަގުތު އިޙްޞާސް ކުރެވުނެވެ. އޭނަ ރުޅިވާކަށްވެސް ބޭނުމެއްނުވިއެވެ. ރުޅިވެގެން އޭނައަށް ލިބޭނެ ފައިދާއަކީ ވެސް ކޮބައިހޭ އަފްރީންގެ ހިތަށްއެރިއެވެ. އެހެންކަމުން އަފްރީން ރުޅި ނޫންކަން އެންގުމަށްޓަކައި އޭނަގެ ފުރިހަމަ ހިނިތުންވުން ނަސްރާއަށް ދައްކާލިއެވެ. ނަސްރާގެ ދެލޯ ވެސް ހަނިވެގެން ދިޔައީ އޭނަ ވެސް ހިނިތުންވެލީކަމަށް އަންގަމުންނެވެ. އެއަށްފަހު އޭނަވެސް އެ މަޑިއާއި ދިމާލަށް ބަލާލިއެވެ.
“ވާވް! ނޭނގޭ ކިތައް ދުވަސްފަހުން ކަމެއްވެސް ކައިޓެއް މިފެނުނީ. ވަރަށް ކައިޓް އަރުވައި ހަދާދޯ މިރަށު މީހުން؟” ނަސްރާ އަފްރީންއާ ސުވާލުކުރިއެވެ.
“ކޮންތާކު؟ އެތައް އަހަރެއްވެއްޖެ އަފޫއަށްވެސް ކައިޓެއް ނުފެންނަތާ…..އަންނާނަން ކެމެރާ ހިފައިގެން.” އަފްރީން މަޑިއަށް ބަލަންހުރެ އުނދޯލިން ތެދުވެ ދުވެފައި ކަހަލަ ގޮތަކަށް ގޮސް ގެއަށްވަނެވެ. އަފްރީން ވާހަކަ ދެއްކުމުން ހިތްހަމަޖެހުން ލިބުނު ނަސްރާއަށް، އަފްރީން ގެއަށް ވަތްތަން ބަލަން ހިނިތުންވެފައި ހުރެވުނެވެ. ނަސްރާ އަނެއްކާވެސް އެ މަޑިއަށް ބަލާލިތާ އިރުކޮޅެއްނުވެ އޭތި ތިރިއަށް އަންނަމުން ދިޔަހެން ނަސްރާއަށް ހީވިއެވެ. އެ ހީ ޔަޤީނަކަށްވާން މާގިނައިރެއް ނުނެގިއެވެ. އޭތި ތިރިވަމުން ވަމުން ގޮސް އެންމެ ފަހަކަށް ނަސްރާގެ ލޯމަތިން ގެއްލުނެވެ. ނަސްރާ މާޔޫސްވިއެވެ. އަފްރީންއަށް ކެމެރާއާއެކީ ނާދެވެނީސް އޭތި ގެއްލުމުން އަފްރީން މާޔޫސްވާނެވަރު އިޙުސާސްކުރެވުމުންނެވެ. އަފްރީންއަށް ކެމެރާއާއެކީ ނާދެވެނީސް ގެއަށް ވަންނަން ކަމަށް ނަސްރާ ފަސްއެނބުރިލީ ވަގުތު ކަރުގައި ކެމެރާއެއް އަޅުވައިގެން ހުރި އަފްރީން ދޮރުމައްޗަށް އެރީއެވެ.
“ކޮބާ؟” އަފްރީން ދޮރުމަތީގައި ހުރި އޭނަގެ ފައިވާނަށް އަރަމުން ހެވިފައިހުރެ ބުނެލިއެވެ. އަދި ދުވެފައި އައިސް ނަސްރާއާއި އެއްހަމައެއްގައި މަޑުކޮއްލައިފިއެވެ.
“މަޣުރިބު ނަމާދަށް އޭތިވެސް އޮއްސުނީ. ހިނގާ ނަމާދަށް ވުޟޫކޮއްލަން އަވަހަށް.” އަފްރީން އުޑުން މަޑި ހޯދަން ފެށުމުން ނަސްރާ ބުނެލިއެވެ.
“ދެން…..ކާކުތަ އެހާ އަވަހަށް ކައިޓެއް އަރުވާފަ ތިރިކޮއްލާނީ؟” އަފްރީންގެ ތުން ދިގުވިއެވެ.
“ކިހިނެއް އެނގެނީ އަވަސްކަން؟ އަހަރުމެންނަށް އޭތި ފެނުނީ ލަހުން ކަމަށްވެސް ވެދާނެއެއްނު؟” ނަސްރާ ބުނެލިއެވެ.
“ދެން އެކަމަކު……” އަފްރީން ބިންމަތީގައި ދެފައި ޖަހަމުން އެހެން ބުނެލީ އަދިވެސް ތުން ދިގުކޮށް އުޑާއި ދިމާލަށް ބަލަހައްޓައިގެން ހުރެއެވެ. ނަސްރާ އަފްރީންގެ ފުރަގަހުން އޭނަގެ ދެކޮނޑުގައި ހިފަހައްޓާލިއެވެ.
“އެއީ ދެން ކޯޗެއްތަ؟ އެއްދުވަހު އަފޫއާ ދޮންތަވެގެން އެއަށްވުރެ މާ ރީތި ކައިޓެއް އަރުވާނީ.” ނަސްރާ ޖޯޝާއި އެކީގައި ބުނެލިއެވެ.
“ސީރިއަސް؟” އަފްރީން އުޖާލާވެގެން ދިޔަ މޫނަކާއެކީ ނަސްރާއާއި ދިމާލަށް ބަލަމުން ބުނެލިއެވެ. ނަސްރާ އަވަސްއަވަހަށް ބޯޖަހާލުމުން އަފްރީން ޔެސްއޭ ކިޔައި ނަސްރާގެ ގައިގައި ބައްދާލިއެވެ. އެއަށްފަހު ނަސްރާ ނަމާދަށް ހިނގާށޭ ބުނުމުން އަފްރީން ވަގުތުން ހިނގާށޭ ބުނެލިއެވެ.
އިރުއޮއްސެމުން ދިޔަ ވަގުތު ނަސްރާމެންގެ ގެ ހުންނަ މަގުން ކުރިއަށް ހިނގާފަ އައީ މިއަދު ހެނދުނު ނަސްރާއަށް ފެނުނު އަބާންއާއި ކޮންމެވެސް އެހެން އަންހެނަކާ ފިރިހެނެއްގެ އިތުރުން އެއްކަލަ ޒުވާނާއެވެ. އެޒުވާނާއާއި އެއްހަމައެއްގައި ހިނގަމުން ދިޔައީ އަބާންގެ މަންމައާއި ބައްޕަކަން ބަލާ ކޮންމެ މީހަކަށް ވެސް އެނގޭނެއެވެ. އެހެނީ އަނެއް ޒުވާނާ ހިނގަމުން ދިޔައީ އެމީހުންނާ އެއްހަމައެއްގައި ވިޔަސް އެމީހުންނާ ދުރުދުރުންނެވެ. ހެމުން ވާހަކަ ދައްކަމުން ހިނގާފަ އައި އޭނަގެ މަންމައާއި ބައްޕަގެ ދެމެދުގައި ހުރި އަބާންގެ އަތުގައި އޮތީ ފެހިކުލައިގެ މަޑިއެކެވެ. އަބާން އެމީހުންގެ ގެއާއި ކައިރިވިތަނާހެން އެ މަޑި ދެއަތުން މައްޗަށް ހިއްލައި ގެއަށް ވަންނަން ދުއްވައިގަތެވެ. އަބާން ގޭގެ މައިދޮރާއި ހަމަވީތަނާ އޭނަގެ ބައްޕަ އޭނަ މަޑުކުރުވިއެވެ.
“އަބޫ މަޑުކުރޭ! ތިއީ ޔޫންބެ ހެދި އެއްޗެއްނު؟ ޔޫންބެއަށްދީ!” އަބާން ގެ ބައްޕަ ބުނެލިއެވެ. އެއާއެކު އަބާންގެ ޙަރަކާތްތައް ހުއްޓުނެވެ. އޭނަ ފަސްއެނބުރި “ޔޫންބެ”އަށް ބަލާލިއެވެ. އެޒުވާނާ އަބާންއަށް އެވަގުތު ބަލަހައްޓައިގެން ހުރި ގޮތުން އޭނަ ހުރީ ހިނިތުންވެގެންކަމެއް ނުވަތަ ނޫންކަމެއް އެކަކަށްވެސް ނަގައިނުގަނެވޭނެއެވެ. އަބާން އިރުކޮޅަކު ހުރުމަށްފަހު ދެރަ މޫނަކާއެކީ މަޑިއަށް ބަލަހައްޓައިގެން ހުރެ “ޔޫންބެ” ގެ ކުރިމައްޗަށް ގޮސް މަޑުކޮއްލަމުން މަޑި ދިއްކޮއްލިއެވެ. އެޒުވާނާ ކުރުފައިމައްޗަށް ތިރިވެ ސީރިއަސް ނަޒަރެއްގައި ހުރެ އެ މަޑި އަތުލިއެވެ. އެއަށްފަހު އެއްމިޔަކަނުން ހިނިތުންވެލައިގެން އަބާންގެ ލޯބިލޯބި ދެރަ މޫނަށް ބަލަހައްޓައިގެން ހުއްޓެވެ.
“މިއީ ކޮއްކޮ އެއްޗެއް.” އެޒުވާނާ އަބާންގެ އަތަށް އަނބުރައި އެ މަޑި ލައިދެމުން ބުނެލިއެވެ. އެއާއެކު އަބާން އުފަލުން ފުރިގެންގޮސް އެޒުވާނާގެ ގައިގައި ބައްދާލިއެވެ. އެޒުވާނާވެސް ހެވިލާފައި އަބާންގެ ގައިގައި ބައްދައި އޭނަގެ ބުރިކަށީގައި އޯގާތެރިކަމާއެކު ފިރުމާލިއެވެ. އެވަގުތު އަބާންގެ މަންމައާއި ބައްޕަ ހިނިތުންވެފައި އެ މަންޒަރު ބަލަން ތިއްބެވެ. އެ ޒުވާނާ އިރުކޮޅެއްފަހުން އަބާންގެ ގައިން ދޫކޮއްލިއެވެ. އެވަގުތު އަބާންގެ މަންމަ ވާހަކަ ދެއްކިއެވެ.
“އަބޫ ކީކޭތަ ބުނާނީ ޔޫންބެގާތު؟” އަބާންގެ މަންމަ ބުނެލިއެވެ.
“ތެންކިއު!” އަބާން އެހެން ބުނެފައި ކުއްލިއަކަށް އެޒުވާނާގެ ކޯތާފަތަށް ބޮސްދިނެވެ. އަދި އެއަށްފަހު ވަގުތުން ދުވެފައި ގޮސް ގެއަށްވަނެވެ. އެޒުވާނާއާއި އަބާންގެ މަންމައާއި ބައްޕައަށް ހެވެން ފެށިއެވެ. މަޣުރިބު ނަމާދަށް ބަންގި ގޮވަން ފެށީ އެވަގުތެވެ. އެޒުވާނާ ވަގުތުން ދެފައި މައްޗަށް ތެދުވެ ތިމަންނަ ވުޟޫކޮށްގެން އެބައަންނަމޭ ބުނެ އޭނަގެ ގެއަށްދާން ފަސްއެނބުރިލިއެވެ. އަބާންގެ ބައްޕަ އެއަށް އާނއެކޭ ބުނަމުން ގެއަށް ވަދެގެން ދިޔައީ އަންހެނުންނާއި އެކީގައެވެ.
ކޮންމެ ނަމާދެކޭ ވެސް އެއްގޮތަށް މަޣުރިބް ނަމާދުވެސް އަފްރީންއާ އެކީގައި ކުރުމަށްފަހު އަފްރީން ދާން އުޅުމުން ނަސްރާ އޭނަ މަޑުކުރުވިއެވެ. އަފްރީން ވަރަށް ހިމޭންކަމާއެކު ނަސްރާ ބުނާނެ ވާހަކައެއްގެ އިންތިޒާރުގައި އިނެވެ.
“މިއަދު…..އަފޫ ބުނި ވާހަކަ، ދޮންތަ ބަދަލުވެއްޖެއޭ. އަފޫ ބުނެބަލަ އަފޫއަށް ހީވާގޮތުގަ ކީއްވެގެންތަ ދޮންތަ ބަދަލުވާންޖެހުނީ؟” ނަސްރާ އަހާލިއެވެ. އަފްރީން އިރުކޮޅަކަށް އިނދެފައި ފުން ނޭވައެއް ދޫކޮއްލިއެވެ.
“ދޮންތާ އަފޫ ބޭނުމެއްނޫން އަނެއްކާވެސް ދޮންތައާ ފައިޓްކުރާކަށް. މި ޓޮޕިކަށް ވާހަކަ ދެއްކީމަ ދޮންތަވެސް ރުޅި އަންނާނީ އަފޫވެސް ރުޅި އަންނާނީ. ސޯ ޕްލީޒް….” ވާހަކަ ދާނެ މިސްރާބު ދަނެގެންހުރެ އަފްރީން ބުނެލިއެވެ. ނަސްރާ އަނެއްކާވެސް ވާހަކަ ދައްކަން އުޅުމުން އަފްރީން އޭނައަށް ފުރުޞަތެއްނުދީ ކޮޅަށް ތެދުވެ ކޮޓަރިން ނިކުމެގެން ދިޔައެވެ. ނަސްރާ ވީ ދެރައާއެކު އޭނަގެ ކޮއްކޮއަށް ހެޔޮގޮތް ދެއްކެވުމަށް އެދި ދުޢާކުރެވުނެވެ.
ދުވަސްތައް ހަލުވިކަމާއެކީ މާޒީއާ އެކުވަމުން ދިޔައެވެ. ނަސްރާއަށް ރަށުގެ މަދުރަސާއިން ވަޒީފާ ލިބުނީ އޭނަ ހީކުރިވަރަށްވުރެ ވެސް ފަސޭހައިންނެވެ. ނަސްރާ މަސައްކަތް ފަށައިގެން އުޅުނު ދުވަސްވަރު ކުދިކުދި އުދަގޫތަކާއި ކުރިމަތިލާން ޖެހުނެވެ. އެހެނީ މުޅި އެ މަދުރަސާގަ މަސައްކަތް ކުރާ ހުރިހާ މުދައްރިސުންގެ ތެރެއިންވެސް މޫނު ބުރުގާ އަޅައިގެން ހުރީ ހަމައެކަނި ނަސްރާ ކަމަށްވާތީވެއެވެ. ދަރިވަރުންނާއި ބައެއް މުދައްރިސުންގެ ފަރާތުން އޭނައަށް ކަޅިއެޅުންތައް އަމާޒުވިއެވެ. ނަމަވެސް މާ ގިނަ ދުވަހެއްނުވެ ނަސްރާ އޭނަގެ އެކުވެރިކަމުން އެންމެންގެ ރުހުން ހޯދައިފިއެވެ.
ދުވަސްތައް ފާއިތުވަމުން ދިޔަ ވަރަކަށް ނަސްރާއަށް ފެންނަމުން ދިޔަ އެއްކަލަ ޒުވާނާގެ ރަނގަޅު ސިފަތައް ގިނަވާން ފެށިއެވެ. ނަސްރާ އެޒުވާނާއަށް ނުބަލައިވޭތޯ ވަރަށް މަސައްކަތް ކުރިއެވެ. އެހެނަސް ކޮންމެވެސް އެއްބަހަނާއެއް ދައްކާފައި އޭނަގެ ލޮލުގެ ކަޅި ދަތުރުކުރަނީ ހަމަ އެދިމާލަށެވެ. އެޒުވާނާގެ ސިއްރުވެރި ނަޒަރުތައް ވެސް އޭނައަށް އަމާޒުވާކަން ޔަޤީންވީ ދުވަހުއްސުރެ ނަސްރާއަށް އޭނަގެ ނަފްސުގެ މައްޗަށް ބާރު ހިންގަން އުދަގޫވިއެވެ. ނަސްރާ އެޒުވާނާއާމެދު އިތުރަށް އެނގެން ބޭނުންވީތީ އޭނަ އަމިއްލަ ނަފްސަށް ނަފްރަތުކުރިއެވެ.
ރަމަޟާންމަހުގެ ހަނދު ފެނުނުރޭގެ މަޣުރިބު ނަމާދަށްފަހު ނަސްރާ އަފްރީންގާތު އޭނައާއެކީ ތަރާވީޙަށް ދާންވީނޫންހޭ އެހިއެވެ. އަފްރީން ވަގުތުން ބޮޑާހާކަން ފެށިއެވެ. ދަސްކޮށް ތައްޔާރުވާންޖެހޭ އެތައް އިމްތިޙާނެއްގެ ވާހަކަ ދެއްކިއެވެ. ކިތަންމެ ވަރަކަށް މަސައްކަތް ކުރިއަސް ކާމިޔާބުދެއްވަނީ ހަމަ މާތް ﷲކަން ނަސްރާ އަފްރީންއަށް ހަނދާންކޮއްދިނެވެ. އަފްރީން ދެންވެސް ދެކޮޅު ހަދަން ފެށުމުން ނަސްރާ އޭނައަށް އެތައް ނަޞޭޙަތެއް ދިނެވެ. މަރު މަތިން ހަނދާންކޮއްދީ އާޚިރަތުގެ ވާހަކަތައް ނަސްރާ އަފްރީންއަށް ކިޔައިދިނެވެ. އަފްރީން މަޑުމައިތިރިކަމާއެކީ އެވާހަކަތައް އަޑުއަހަން އިނދެފައި އެންމެ ފަހަކަށް ތަރާވީޙަށް ދާން އެއްބަސްވުމުން ނަސްރާއަށް ބަޔާންކުރަންދަތި ހިތްހަމަޖެހުމެއް ލިބުނެވެ. އަފްރީންގެ އީމާންތެރިކަން އެހާވެސް ބަލިކަށްޓެއްނޫންކަން އިޙުޞާސް ކުރެވުމުންނެވެ.
ޢިޝާ ނަމާދަށް ބަންގި ގޮވަން ގާތްވެފައިވަނިކޮށް އަފްރީން އޭނަގެ ނަމާދު ދޮޅި ފަށްޖަހައި ކޮތަޅަކަށް އަޅައިގެން ނަސްރާގެ ކޮޓަރިއަށް އައެވެ. އަމިއްލަ ދޮޅި ފަށްޖަހަން ހުރި ނަސްރާއަށް އަފްރީން ފެނުމުން ހިނިތުންވެލެވުނެވެ. އަފްރީން ހުރީ ގަޔަށް ދޫ ހެދުމަކާއެކު އާދައިގެ ބުރުގާއެއް އަޅައިގެންނެވެ. އަފްރީންވެސް ހިނިތުންވެލަމުން ކޮޓަރީގެ ތެރެއަށް ވަދެގެން ގޮސް ރީތިވާ މޭޒު ކައިރީގައި ހުއްޓިލާފައި ބުރުގާގައި ގޮށެއްޖަހާލިއެވެ. އަފްރީން ލޯގަނޑަށް ބަލަހައްޓައިގެން ހުއްޓާ އެއްލި ކަޅިއަކުން އެ މޭޒުމަތީގައި އޮތް އަނގޮޓިއެއް އޭނައަށް ފެނުނެވެ. އޭނައަށް އެ އަނގޮޓި ނަގައި ބަލާލެވުނެވެ. އާއްމު ގޮތެއްގައި އަފްރީންއަކީ އަނގޮޓިފަދަ އެއްޗެހި ރީތިވެގެން އުޅޭ މީހެއްނޫނެވެ. ނަމަވެސް ނޫކުލައާއި ރަތްކުލައިގެ އެހުން އޭތި ޒީނަތްތެރި ކުރެވިފައިވި ގޮތް އަފްރީންއަށް ރީތިވިއެވެ. އަފްރީން އެއަށް ބަލަހައްޓައިގެން ހިނިތުންވެފައިހުރެ އޭތި އޭނަގެ ކާނާތް އަތުގެ ކަށި އިނގިލީގައި އަޅުވާލިއެވެ. ނަސްރާ އޭނައަށް ގޮވާލީ އެވަގުތެވެ. އެއާއެކު އަފްރީންއަށް ސިހިފައި އަތްތިރި ކޮށްލަމުން ނަސްރާއާއިވީ ފަރާތަށް އެނބުރިލެވުނެވެ.
“ޕިސް ޕިސް….ވައްކަމެއް ކުރީތަ؟” ނަސްރާ ހިސާބަކަށް ހިނިތުންވެފައިހުރެ އަހާލިއެވެ. އަފްރީން ގަދަކަމުން ކަހަލަ ގޮތަކަށް ހީލިއެވެ. ނަސްރާ އަވަހަށް ހިނގާށޭ ބުނެލަމުން ކޮޓަރިން ނިކުންނަން ދިޔައެވެ. އަފްރީން ފުން ނޭވައެއް ދޫކޮއްލަމުން އޭނަގެ ކަނާތު އަތް ހިއްލައި އެ އަނގޮޓިއަށް ބަލާލިއެވެ. އޭތި އޭނަގެ އިނގިއްޔަށް ވަރަށްވެސް ބޮޑެވެ. ދެންމެ އޭނަ އެނބުރިލީއިރު އޭނަގެ އިނގިލިން ކައްސާލާފައި ނުދިޔައީ ކިރިޔާއެވެ. އެހެނަސް އަފްރީން އޭތި ނަގާ ކަހަލަ ޚިޔާލެއް ނުކުރިއެވެ. އޭނަ ކުރިއަށް ހިނގައިގަތީ އޭތި އަޅައިގެންނެވެ.
އަފްރީން މިސްކިތަށް އައީ އެ އަނގޮޓި އަޅައިގެންކަން ނަސްރާއަށް އެނގުނީ، މިސްކިތަށް ވަންނަން ދިޔަ މަގުމަތީގައި އޭތި އަފްރީންގެ އިނގިލިން ކައްސާލައިގެން ގޮސް ތަޅުންގަނޑުމަތީގައި ޖެހުމުންނެވެ. ނަސްރާ ބަލާލި ވަގުތު އަފްރީން ހިނދުކޮޅަކަށް ހުއްޓުން އަރާފައި ހުރުމަށްފަހު ގުދުވެލަމުން އޭތި ނަގައި އިނގިލީގައި އަޅުވާލިއެވެ. އެއަށްފަހު ނަސްރާއަށް ބެލުމެއްނެތި ކުރިއަށް ދާންއުޅުނީ ނަސްރާ ބުނެފާނެ އެއްޗަކުން ސަލާމަތްވުމަށެވެ. އަފްރީން ކުރިއަށް ދެފިޔަވަޅު އެޅިތަނާހެން ނަސްރާ އަފްރީންއާއި އެއްހަމަކުރިއެވެ.
“އަފޫ ކީއްކުރަންތަ ތީތި އަޅައިގެން އައީ؟” ނަސްރާ ދެދަތްޕިލަ ޖައްސައިގެން ހުރެ ސިއްރުން އަހާލިއެވެ.
“އަފޫއަށް ރީތިވީމަ އަފޫ މީތި އަޅައިގެން އައީ. ކިހިނެއްވީ؟ މިއީ ފާފައެއްތަ؟” އަފްރީންވެސް ނުރުހިފައި ކަހަލަ ގޮތަކަށް ސިއްރުން ވާހަކަ ދެއްކިއެވެ.
“ދެން….ތީތި ގެއްލިގެން ނުވާނެ އެއްވެސް ޙާލެއްގަ. އަޑުއިވިއްޖެ؟” ނަސްރާގެ ގާތަށް ރުޅިއައެއްކަމަކު އޭނަ ވާހަކަ ކުރުކޮށްލީ މިސްކިތް ތެރެއަށް ވަދެވުނީތީވެއެވެ. އަފްރީން ކާމިޔާބުގެ ހިނިތުންވުމަކާއެކީ ބޯޖަހާލިއެވެ.
ޢިޝާ ނަމާދަށްފަހު ހުރިހާ ސުންނަތް ނަމާދުތައް އަދާކޮށް ނިމުނުއިރު ބޭރުގައި އޮތީ ވިއްސާރަ ބޯކޮއްލާފައެވެ. ދުވަހުގެ މޫސުމަށް ބަލާފައި ކުޑަ ހިފައިގެން އައި މީހުން އޭގެ ހިޔަލުގައި ގެއަށްދާން ފެށިއެވެ. އަނެއްބައި މީހުން ތެމިގެން ވިޔަސް ގެއަށް ދެވޭތޯ ބެލިއިރު ދެން ތިބި މީހުން ނިންމީ ވިއްސާރަ ތުނި ކޮއްލަންދެން މިސްކިތުގައި މަޑުކޮއްލުމަށެވެ. ނަސްރާމެން އައީ ކުޑައެއް ހިފައިގެން ކަމުގައި ނުވިޔަސް ޝަރީފް އޭނަ ގެނައި ކުޑަ ނަސްރާމެނަށްދިނެވެ. ކޮންމެއަކަސް އަފްރީން ބޭނުންވީ އެގޮތެއް ނޫނެވެ. އޭނަ އައި ފޯރީގައި މިސްކިތުން ނިކުމެ ވާރޭގެ ތެރެއަށް ނިކުތެވެ. އެވަގުތު އަފްރީންއަށާއި ނަސްރާއަށް ވެސް ނޭނގުނު ކަމަކީ އަފްރީންގެ އިނގިލީގައި އޮތް އަނގޮޓި އަނެއްކާވެސް ކައްސާލައިގެން ގޮސް މިސްކިތުގެ ތަޅުންމަތީގައި ޖެހުނުކަމެވެ. ފުރާޅުގައި ޖެހެމުން ދިޔަ ބޮޑެތި ވާރޭ ތިކިތަކުގެ އަޑުގެ ދަށަށް އެ އަނގޮޓި ގޮސް ޖެހުނު އަޑު ގެނބުނީއެވެ. އެ އަނގޮޓި އޮތްތަނުގައި އޮއްވާ މިސްކިތުން ނިކުންނަން އައި މީހެއްގެ ފައިދަށުގައި އޭތިވިއެވެ
އަފްރީން ގޮސް ގެއަށްވަނީވެސް ފުންމަމުން ނަށަމުން ކަހަލަ ގޮތަކަށެވެ. ނަސްރާ ކުޑައިގެ ހިޔަލުގައި ހުރެ އަފްރީންގެ ޙަރަކާތްތަކަށް ބޯހޫރުވަމުން އޭނަގެ ފަހަތުން އައެވެ. އަފްރީން ހުޅުވާލި ގޭގެ މައިދޮރާއި ހަމަވުމުން ނަސްރާ ބޭރުގައި ކުޑަ ބަހައްޓާފައި ގެއަށް ވަންނަން އުޅުނު ވަގުތު ތެމިގެން އައި ޝަރީފް ދުވެފައި ކަހަލަ ގޮތަކަށް ގޭގެ ގޭޓުން ވަދެގެންއައެވެ.
“ބައްޕާ! އަހަރެން ހީކުރީ ބައްޕަ މިސްކިތުގައި މަޑުކުރާނެކަމަށް. ބައްޕަ ކީއްކުރަން…..” ނަސްރާގެ ވާހަކަ ފުރިހަމަ ނުވަނީސް ޝަރީފް ވާހަކަ ދެއްކިއެވެ.
“އެއީ ދެން ކަމެއްނޫނެއްނު؟ ކިހާ މަޖާދޯ އަފޫ؟” ޝަރީފް ނަސްރާއާ އައިސް ހަމަކުރަމުން ދޮރުން ބޯދިއްކޮއްލައިގެން ހުރި އަފްރީންއަށް ދޯދިނެވެ.
“ރައިޓް ބައްޕާ. ދޮންތާ ޑޯންޓް ބީ ސޯ ބޯރިންގް.” އަފްރީން ބުނެލިއެވެ. ޝަރީފް ލުއި ގޮތަކަށް ހީލާފައި ގެއަށްވަނެވެ. ނަސްރާ ވެސް ގެއަށްވަދެ ދޮރު ލައްޕާލިއެވެ.
“އެއީ މަންމަ ގޮތަށް. މަންމައާ ދޮންތައާ ދެމީހުންނަކީ ހަމަ އެއްސްޓައިލެއްގެ ދެމީހުން.” ޝަރީފް އޭނަގެ އިސްތަށިގަނޑު އެއްއަތުން ފޮޅަމުން އަފްރީންގާތު ބުނެލިއެވެ. އެވަގުތު އަފްރީން ރަނގަޅަށް ހީލިއިރު ނަސްރާވެސް އޭނަގެ މޫނުފޮތިކޮޅު ނަގާލިއެވެ. ނަސްރާގެ ތުންފަތްމަތީގައި ހިނިތުންވުމެއްވިއެއްކަމަކު އޭނަގެ ލޯ އިޝާރާތްކުރީ ހިތާމަވެރިކަމަށެވެ. ނަސްރާގެ މޫނުމަތިން އެކުލަވަރު ފެނިފައި ޝަރީފަށް އޭނައަށް ވީގޮތް ނަގައިގަނެވުނެވެ. މަންމަ މަތިން ހަނދާންކޮއްދިނުމުން ނަސްރާއަށް ލިބޭ ހިތްދަތިކަން އަދިވެސް ކުޑައެއްނުވެއެވެ. ޝަރީފް ނަސްރާއަށް ބަލަހައްޓައިގެންހުރެ ބޯހޫރުވާލީ ނަސްރާއަށް ހިތްވަރު ދިނުމުގެ ގޮތުންނެވެ. ނަސްރާ އިސްޖަހާލަމުން ދެލޯ މަރާލައިގެން އިރުކޮޅަކު ހުއްޓެވެ. އެއަށްފަހު އެސްފިޔަ ޖަހަމުން އިސްއުފުލައި ސޯފާގައި އިން އަފްރީންއަށް ބަލާލިއެވެ.
“އަފޫ ކޮބައިތަ އަނގޮޓި؟” ނަސްރާ އަދިވެސް ހިސާބަކަށް ދެރަވެފައިހުރެ އަހާލިއެވެ. އަފްރީން އޭނަ އަޅައިގެން ހުރި ބުރުގާ ނަގާލަން އުޅެފަވެސް އަނގޮޓި މަތިން ހަނދާންވުމުން ވަގުތުން އޭނަގެ ކަނާތް އަތަށް ބަލާލިއެވެ. އެއަތުގައި ނެތުމުން އަފްރީން ދެލޯ ބޮޑުކޮއްލާފައި ސީދާވެލަމުން އޭނަގެ ދެއަތްވެސް ހިއްލައި ބަލާލީ ކަންބޮޑުވުމާއި އެކީގައެވެ. އަފްރީންއަށް ނުތަނަވަސްވެފައި އިނދެ ނަސްރާ ބަލާލެވުނެވެ. ނަސްރާގެ ދެރަ މޫނަށް ނުރުހުންތެރިކަން ފާޅުވިއެވެ.
“ކޮބާ އޭތި؟” ނަސްރާއަށް ކުރިއަށް ފިޔަވަޅެއް އަޅާލަމުން ހަރު އަޑުން އަހާލެވުނެވެ. އޭނަގެ އަޑުގައި ތުރުތުރެއް އެކުލެވިގެންވިއެވެ. އޭނަގެ ލޮލަށް ކަރުނަތައް ޖަމާވެފައިވިއެވެ. ނަސްރާގެ އަޑަށް އަފްރީން ވަގުތުން، އެއީ ނުވާނެކަމެއްކަން ޔަޤީންވެހުރެވެސް އޭނަގެ ޖީބުގައި ވިޔަސް އަނގޮޓި އޮތްތޯ ޖީބު ހުންނަ ދިމާލުގައި އަތްޖައްސާލިއެވެ. ނަމަވެސް އޭނަ އެވަގުތު ލައިގެން ހުރީވެސް ޖީބެއްނެތް ހަރުވާޅެކެވެ. އަފްރީންއަށް އަނެއްކާވެސް ނުތަނަވަސްކަމާއެކީ ނަސްރާއަށް ބަލާލެވުނެވެ.
“ކޮން އަނގޮޓިއެއް؟ ނަސްރާގެ؟” ޝަރީފް ނަސްރާއަށް ބަލަހައްޓައިގެންހުރެ އަހާލިއެވެ. ނަސްރާ ރޮވެން ކައިރިވެފައިހުރެ މަޑުމަޑުން ބޯޖަހާލިއެވެ. ޝަރީފް އެއްފަހަރު ނަސްރާއަށް އަނެއްފަހަރު އަފްރީންއަށް ބަލާލިއެވެ. ހަމަ އެވަގުތު ނަސްރާ ގެއިން ނިކުންނަން އުޅުނެވެ. ނަމަވެސް ޝަރީފާއި ހަމަވީތަނާ ޝަރީފް ނަސްރާގެ ނަމުން ގޮވައި އޭނަގެ ދެކޮނޑުގައި ހިފާލަމުން މަޑުކުރުވިއެވެ.
“ނަސްރާ ކޮންތާކަށް؟” ޝަރީފް އަހާލިއެވެ.
“ބަޕް…އޭތި ހޯދަ….” ނަސްރާގެ ކުރެހިފައިވާ އަޑުން އޭނަ ދައްކަން ފެށި ވާހަކަ މެދުކެނޑުނެވެ.
“ބައްޕަ ދާނަން އޭތި ހޯދަން. ހޯދައިގެން އަންނަނާން އިރާދަކުރެއްވިއްޔާ. އެންމެ ރަނގަޅެއްނު؟” ޝަރީފް ނަސްރާގެ ކޮނޑުގައި ބާރަށް ހިފަހައްޓާލަމުން ބުނެލިއެވެ. ނަސްރާ ތުންފިއްތައިގެންހުރެ އިސްޖަހާލަމުން ބޯޖަހާލިއެވެ. ޝަރީފް ލަހެއް ފަހެއްނުކޮށް ގެއިން ނިކުމެގެން ދިޔައެވެ. އެއާއެކު ނަސްރާ އަނެއްކާވެސް އަފްރީންއާއިވީ ފަރާތަށް އެނބުރުނެވެ. ނަސްރާ ވާހަކަ ދެއްކި ގޮތުން އޭރު އަފްރީން ހުރީ ފެންކަޅިވެފައެވެ. އަފްރީން ހީކުރި ގޮތުގައި މިފަހަރު ނަސްރާ އޭނައަށް މަޢާފަށް އެދޭނެއެވެ. ނަމަވެސް ނަސްރާގެ މޫނުމައްޗަށް އަނެއްކާވެސް ވެރިވީ ނުރުހުންތެރިކަމެވެ.
“ބުނީމެއްނު އޭތި ގެއްލިގެން ނުވާނެއޭ؟ ނުބުނަންތަ؟” ނަސްރާ ރުޅިއާއި ހިތާމަ އެކުވެގެން ދިޔަ އަޑަކުން ބުނެލިއެވެ. އެއަށްފަހު މޫނު އަނބުރާލަމުން ހަރު ހިނގުމެއްގައި ގޮސް އޭނަގެ ކޮޓަރިއަށްވަނެވެ. އިހުނަށްވުރެވެސް ބޮޑަށް ހިތުގައިޖެހިގެން ދިޔަ އަފްރީން ބަލަހައްޓައިގެން ހުރެވުނީއެވެ. ހިތުގައި ޖެހުނު ވަރަށްވުރެ ބޮޑަށް އޭނަ ޙައިރާންވެސްވިއެވެ. އެ އަނގޮޓީގައިވީ އެފަދަ ކޮން ޚާޞިއްޔަތުކަމެއްބާއޭ ހިތަށްއެރިއެވެ.
ކޮޓަރީގެ ދޮރު ލައްޕާލަމުން ގޮސް އެނދުގައި އިށީންގޮތަށް ނަސްރާ ރޯންފެށިއެވެ. މޫނުގައި ދެއަތް އަޅައި ގިސްލަގިސްލަމުންނެވެ. އޭނަގެ މެރިފައިވާ ދެލޮލުގެ ދޭތެރެއިން އޭނައަށް ފެންނަމުން ދިޔައީ ނުސާފު މަންޒަރުތަކެވެ. އެ ކުރީގެ މަންޒަރުތައް ފެނި، ގެއްލެމުން ދިޔައީ އޭނަގެ ސިކުނޑި އެހަނދާންތައް އޭނައަށް އާ ކޮއްދޭން އުޅުމުން އޭނަ އޭގެ މައްޗަށް ފަސްއަޅާލަން އުޅޭފަދައަކުންނެވެ. ނަސްރާ ފުން ނޭވައެއް އެތެރެއަށްލައި މޫނު ދެއަތުން ފޮހެމުން ހަމައަކަށް އެޅޭތޯ ބެލިއެވެ. އެވަގުތު ބޭރުން އަފްރީންގެ ކޮޓަރީގެ ދޮރު ބާރަށް ލެއްޕިގެން ދިޔަ އަޑަށް ނަސްރާ ދިޔައީ ސިއްސައިގެންނެވެ. ނަސްރާއަށް ވަގުތުން އަޑުއައި ދިމާލަށް ބަލާލެވުނެވެ. ދެންމެއަކު އޭނައަށް އަފްރިންއާ ވާހަކަ ދެކެވުނު ގޮތް ނަސްރާގެ ހަނދާނަށް އައެވެ. އަފްރީން އަނެއްކާވެސް އޭނަދެކެ ރުޅި އައީކަން ނަސްރާއަށް ނަގައިގަނެވުނެވެ. ހަމަ އިސާހިތަކު ނަސްރާއަށް އަމިއްލަ ނަފްސު ކުށްވެރިކުރެވުނެވެ. އޭނައަށް ޖަޒުބާތުގައި ޖެހިގެން ވާހަކަ ދައްކަން ނުޖެހޭ ވަރަށް ދެކެވިއްޖެކަން ވިސްނުނެވެ. އޭނައަށް އެންމެ އަނގޮޓިއަކާހެދި އަފްރީންއަށް ރުޅިވުމުގެ އެއްވެސް ޙައްޤެއް ނޯންނާނެވެ. އެ އަނގޮޓި ކިތަންމެ ޚާއްސަވިޔަސްމެއެވެ. ނަސްރާ އަދިވެސް އެއްފަހަރު އޭނަގެ ކޯތާފަތްމަތިން އެއްއަތް ހިންގާލަމުން ފުންނޭވައެއް ދޫކޮއްލިއެވެ. އަދި އަފްރީންގެ ގާތަށް ދާން ޚިޔާލުކޮށްލަމުން ކޮޅަށް ތެދުވިއެވެ.
ނަސްރާ ގޮސް އެންމެ ފުރަތަމަ އަފްރީންގެ ކޮޓަރި ހުޅުވަން އުޅުމުން ނުހުޅުވުނެވެ. އަފްރީން ތެތްހެދުން ބަދަލުކުރަނީކަން ނަސްރާއަށް ވިސްނުނެވެ. ނަސްރާ ހީކުރީ އަފްރީން ދެން މިރޭ ކޮޓަރީގެ ދޮރު ނުހުޅުވާނެކަމަށެވެ. ނަމަވެސް ނަސްރާ ސިޓިންގް ރޫމުގެ ސޯފާގައި ގޮސް އިށީންނަން އުޅުނުތަނާ ކޮޓަރީގެ ތަޅު ނެއްޓުނު އަޑު އިވުނެވެ. ނަސްރާ ލިބުނު ހިތްހަމަޖެހުމާއެކު ލަސް ހިންގުމެއްގައި ގޮސް އަފްރީންގެ ދޮރުގެ ތަޅު މަޑުމަޑުން އަނބުރާލުމުން އެ ދޮރު ހުޅުވިގެން ދިޔައެވެ. ނަސްރާ އެ ދޮރު ކުޑަކޮށް ހުޅުވާލިއިރު އަފްރީން ހުރީ އޭނަގެ ކިޔަވާ މޭޒުކައިރީގައި ދަބަހަށް ފޮތްތައް އަޅާށެވެ. އޭނައަށް ފުރަގަސްދީގެން ހުރި އަފްރީންގެ މޫނު ނަސްރާއަށް ނުފެނުނެއްކަމަކު އަފްރީންގެ ޙަރަކާތްތައް ހުރިގޮތުން އޭނަ ހުރީ ނުރުހިފަކަން ނަސްރާއަށް އެނގުނެވެ. ނަސްރާ ކޮޓަރި ތެރެއަށް ފިޔަވަޅެއް އަޅައި އެ ދޮރު ރަނގަޅަށް ހުޅުވާލިއިރު އެ ދޮރުން ކިޔާލި އަޑު އަފްރީންގެ ޙަރަކާތްތަކަށް ހުއްޓުމެއްގެނައެވެ. އޭނަ އިރުކޮޅަކު ހުރެފައި ފުރަގަހަށް ބަލާލިއިރު ނަސްރާ އޭނައަށް ބަލަހައްޓައިގެން ހުރިތަން ފެނިފައި އޭނަ ވަގުތުން މޫނު އަނބުރައި މަސައްކަތާއި މަޝްޣޫލުވިއެވެ.
“ރުޅިތަ؟” ނަސްރާ މަޑުމައިތިރި އަޑަކުން އަހާލިއެވެ.
“ކިހިނެއްހެންތަ ހީވަނީ؟” އަފްރީން ނުރުހުމުގެ ރާގަކަށް އެހެން ބުނެލީ ނަސްރާއަށް ބެލުމެއްނެތިއެވެ. އެއާއެކު އޭނައަށް އެހެން އަހާލެވުނު ގޮތާއިމެދު އަފްރީންއަށް ހިތާމަކުރެވުނެވެ. އެފަދަ ރާގަކަށް އެއްވެސް މީހަކާ ވާހަކަ ދައްކާކަށް އަފްރީން ބޭނުމެއްނޫނެވެ. އަދި އޭނަގެ ދޮންތައާއި އަމުދުންނެއްނޫނެވެ. ނަމަވެސް އޭނަގެ ދޮންތަ ދެންމެ އޭނައާއި ވާހަކަ ދެއްކީ ކިހިނެއްހޭ ހިތަށްއެރި ވަގުތު އެ ހުރިހާ ހިތާމައެއް ފިލައިދިޔައެވެ.
“ސޮރީ….” ނަސްރާ އިސްޖަހާލަމުން ބުނެލިއެވެ. ނަސްރާގެ އެބަހަށް އޭނައަށް ފުރަގަސްދީގެން ހުރި އަފްރީންގެ ހިތް ވިރިގެންދާން ފެށިއެވެ. އަފްރީންގެ އަރުތެރެ ބެދެން ފެށިއެވެ. މިވަގުތު މަޢާފަށް އެދެންޖެހޭ މީހަކީ ޙަޤީޤަތުގައި އޭނަކަން އޭނައަށް ވެސް އިޙުސާސް އެބަކުރެވެއެވެ. ގެއްލުމެއް ލިބުނީ ދޮންތައަށެވެ. އެ ކުށުގެ ވެރިއަކީ އޭނައެވެ. ދޮންތައަށް މަޢާފަށް އެދެންވީއޭ ފަޅި ސިކުންތަކަށް އަފްރީންގެ ހިތަށް އެރިއެވެ. ނަމަވެސް ދެންމެ އޭނަގެ ދޮންތަވެސް އޭނައާއި އެފަދަ ގޮތަކަށް ވާހަކަ ދައްކަން ނުޖެހޭނެއޭ ހިތަށް އެރިވަގުތު އަނެއްކާވެސް އަފްރީންގެ މޫނުމައްޗަށް ރުޅިވެރިކަން ވެރިވިއެވެ.
“ދޮންތަ އަފޫއަށް މަޢާފުކޮށްފިން. އަފޫ ގަސްދުގައެއް ނޫން އެއަނގޮޓި ގެއްލުވާލީ. އެކަމަކު ދެންމެ ދޮންތައަށް ގަސްދުގައި އެވާހަކަތައް ދެއްކުނީ ރަނގަޅަކަށްނޫން. އަފޫ ދޮންތައަށް މަޢާފެއް ނުކުރާނަންތަ؟” ނަސްރާ ފެންކަޅިވެފައިހުރެ ސުވާލުކުރިއެވެ. މިފަހަރު އަފްރީންގެ ލޮލަށްވެސް ކަރުނަތައް ޖަމާވިއެވެ. އޭނަ އޭނަގެ ދަބަހުގެ ޒިބު އަޅުވައި އޭތި މޭޒުމަތީގައި ބޭއްވިއެވެ. އަދި އޭނަގެ ކަރުނަތައް ހިންދާލަން މަސައްކަތް ކުރަމުން ފަސްއެނބުރިލިއެވެ.
“ޝަރުތެއްގެ މަތިން. އެއީ ކޮން އަނގޮޓިއެއްކަން ބުނެލަދޭންވީ.” އަފްރީން ކިތަންމެ ބޭނުމެއް ނުވިޔަސް އޭނައަށް ވާހަކަ ދެކެވުނީ ކުރެހިފައިވާ އަޑަކުންނެވެ. އޭނަގެ ކުރިމަތީގައި ހުރި ނަސްރާގެ މޫނުމައްޗަށް ވަގުތުން ހިނިތުންވުމެއް ވެރިވެގެން ދިޔައެވެ. އަފްރީން ބަލަބަލާހުއްޓާ ނަސްރާ އައިސް އަފްރީންގެ ގައިގައި ބައްދާލައިފިއެވެ. އަފްރީންގެ ހިތް މިފަހަރު މުޅިން ވިރިގެން ދިޔައީ އޭނަގެ ދޮންތަ އޭނަދެކެ ލޯބިވާވަރު އިޙުސާސް ކުރެވުމުންނެވެ. އަފްރީންއަށް ނުރޮވި ހުރީ ހަމަ ކިރިޔާއެވެ. އޭގެ ކުރިން އޭނަ އަނެއްކާވެސް ވާހަކަ ދެއްކިއެވެ.
“ކާކު ކޮން ދުވަހަކު ދިން އެއްޗެއް އެއީ؟” އަފްރީން ނަސްރާގެ ކޮނޑުމަތީގައި ދަތްދޮޅި ޖައްސައިގެން ހުރެ އަހާލިއެވެ. ނަސްރާ އަފްރީން ގައިން ދޫކޮއްލަމުން މަޑުމަޑުން ދުރުވެލިއެވެ. ހިމޭންކަމުގެ ވަގުތު ކޮޅަކަށްފަހު ނަސްރާ ޖަވާބުދިނެވެ.
“އެއީ މަންމަ ދިން އެއްޗެއް.” ނަސްރާއަށް އެހެން ބުނެލެވުނީ އިވޭ ނުއިވޭ އަޑަކުންނެވެ.
“ވަޓް؟ ސީރިއަސްލީ؟ އެހެންވިއްޔާ އަފޫ ވަރަށް ޖޭ. މަންމަ އަފޫއަށް ދޭން އެކަހަލަ އެއްޗެއް ދޫކޮށްފައެއްވެސް ނުދޭ.” އަފްރީން ހަމައަކަށް އެޅުމަށްޓަކައި އޭނަ ވާހަކަ ދެއްކުމުގެ ރާގު ބަދަލުކޮށްލިއެވެ.
“ތިހެން ނުބުނޭ. މަންމައަށް އޭރު އެފަދަ ތަނަވަސްކަމެއް ލިބިފައިވިނަމަ މަންމަ އަހަރުމެންނަށް ހޯދައި ނުދޭނެ އެއްޗެއް ނެތީސް.” ނަސްރާ މަޑުމަޑުން އަފްރީންގެ ކޮނޑުގައި ހިފަހައްޓައިގެން ހުރެ ބުނެލިއެވެ.
“މަންމަ ވަރަށް ލޯބިވޭދޯ ދޮންތަދެކެ؟” އަފްރީން ދެރަވެފައިހުރެ އަހާލިއެވެ. އަފްރީންގެ މޫނުމައްޗަށް ވެރިވީ ކުލަވަރު ފެނިފައި ނަސްރާއަށް އޭނަގެ މޫނުގައި ދެއަތުން ހިފަހައްޓާލެވުނެވެ.
“މަންމަ ވަރަށް ލޯބިވޭ އެންމެން ދެކެވެސް. އެނގޭތަ؟ އަފޫ ކުޑައިރު މަންމަ އަފޫއަށްޓަކައި މަންމަގެ ދެއަތުން ހެދުން ފަހައިދިން. މަންމައަށް ދެފައި މައްޗަށް ކޮޅަށް ހުރެވުނު ދުވަހު ކޮންމެ ހަވީރަކު އަފޫ ދޮންތައާ ދޮންބެ ގޮވައިގެން އަތިރިމައްޗަށްދާނެ. އަދި ކޮންމެ ރެއަކު އަފޫ ނިދިއަންނަންދެން އަފޫއާއެކީ ކުޅެން އުޅޭނެ ހަމަ ކުޑަކުއްޖަކު ކަމަށް ހެދިގެން.” ނަސްރާ ދެމާނައެއް އެކުލެވޭ ހިނިތުންވުމަކާއެކީ ކިޔައިދިނެވެ.
“އަސްލުވެސް؟” ފެންކަޅިވެފައިހުރި އަފްރީންއަށް އެހެން ބުނެލެވުނީ ވައިއަޑުންނެވެ. މަންމައަކީ އަފްރީންއަށް އޭނަގެ ވަށައިގެންވާ މީހުން ދައްކާ ވާހަކަތަކުން އެނގޭ މީހަކަށް ނޫނީ ނުވެއެވެ. އަފްރީން އޭނަ މަންމައާއެކީ ހޭދަކުރި ވަގުތުތައް ހަނދާންކުރަން ސިކުނޑިއަށް ކިތަންމެ ބާރުލިއަސް އެކަން ކާމިޔާބެއްނުވެއެވެ. މަންމަ ނިޔާވީ އޭނަ އެހާވެސް ކުޑައިރެވެ. އަފްރީންގެ ހިތާމަވެރި މޫނަށް އެއްވެސް ބަދަލެއް ނައުމުން ނަސްރާގެ ހިތްދަތިވިއެވެ.
“އަފޫ…..އަފޫ ދެރަވަނީ ކީއްވެ؟ އަފޫއަށް މަންމަ ދުވަހަކުވެސް ނުފެންނާނެހެން ހީވާތީތަ؟ އެކަމަކު އެއީ ކުށްހީއެއް…..އަހަރުމެން އެންމެން އެކީގަ ބައްދަލުވާނެ ދުވަހެއް އަންނާނެ. އެއީ އިރާދަކުރެވިއްޔާ ސުވަރުގޭގަ. މިއަދު އަހަރުމެންނަށް ކުރެވެން އޮތްހާވެސް ކަމަކީ މަންމައަށްޓަކައި ދުޢާކުރުން.” ނަސްރާ ބުނެލިއެވެ. ނަސްރާގެ އެވާހަކައިން އަފްރީންއަށް ހިތްވަރެއް ލިބުނުކަން ނަސްރާއަށް އެނގުންވީ އަފްރީން ފުންނޭވައެއް ދޫކޮއްލަމުން ބޯޖަހާލި ގޮތުންނެވެ. އަދި އެއަށްފަހު އަފްރީން އިސްއުފުލައި ހިނިތުންވެލުމުން ނަސްރާއަށް ވެސް ހިނިތުންވެލެވުނެވެ. އޭނަ އަދިވެސް އެއްފަހަރު އަފްރީންގެ ގައިގައި ބައްދާލިއެވެ.
އެރޭގެ ކެއުމަށް އިންސާފުކުރަން އުޅެފަވެސް އަފްރީންއާއި ނަސްރާ ނިންމީ ޝަރީފް އައުމުން ނޫނީ ނުކާށެވެ. ޝަރީފް ދިޔަތާ ބައިގަޑި ވީއިރުވެސް އޭނަ ގެއަށް ނައުމުން ނަސްރާއަށް އަމިއްލަ ނަފްސު ކުށްވެރިކުރެވުނެވެ. އޭނައަށް ބައްޕަ މަޑުކުރެވުނު ނަމައޭ ހިތަށްއެރިއެވެ. އަދިވެސް ވާރޭ ހަމަ އެ ބޯމިނުގައި ވެހެމުން ދިޔައީތީ ނަސްރާ އިތުރަށް ކަންބޮޑުވިއެވެ. ޝަރީފް ދިޔައީވެސް ގޭގަ ފޯނު ބާއްވާފައެވެ. އަފްރީންގެ ކޮޓަރީގައި އޭނަ އޭނަގެ ލެޕްޓޮޕުން ކުޅެން އިން ގޭމަށް ބަލަހައްޓައިގެން އިން ނަސްރާއަށް މެދުކެނޑުމެއްނެތި ވިސްނެމުން ދިޔައީ ޝަރީފްއާއި މެދުގައެވެ. ޝަރީފް ބަލައި ދާންވީއޭ ހިތައި ނަސްރާ އަފްރީންގެ ކައިރީގައި އިނދެފައި އެނދުން ތެދުވީ އެބަ އަންނަމޭ ބުނަމުންނެވެ. ނަސްރާއަށް އަފްރީންގެ ކޮޓަރިން ނިކުމެވުނުތަނާހެން ބޭރުން ފިރިހެނަކު ސަލާން ގޮވާލި އަޑު އިވުނެވެ. ނަސްރާއަށް ދެބުމަ ކައިރިކޮއްލަމުން ގޭގެ ލައްޕާލެވިފައި ދޮރަށް ބަލާލެވުނީ އެއީ ޝަރީފްގެ އަޑު ނޫންކަން ޔަޤީންކުރެވުނީތީވެއެވެ. ނަސްރާ ސަލާމުގެ ޖަވާބު ދެމުން ކުރިއަށް ހިނގައިގަތީ މޫނު ނިވާކުރަމުންނެވެ. ނަސްރާ އޭނަގެ އާދައަށްވުރެ އަވަސް ހިނގުމެއްގައި ގޮސް ގޭގެ ދޮރާއި ހަމަވީތަނާ ދޮރުގެ ދަށުން ގޭގެ ތެރެއަށް އެއްޗެއް އައިތަން ނަސްރާއަށް ފެނުނެވެ. ނަސްރާ އެއަށް ބަލާލުމާއެކު އެއީ ރިހިކުލައިގެ އަނގޮޓިއެއްކަން އޭނައަށް ނަގައިގަނެވުނެވެ. އޭނަ ކުރުފައިމައްޗަށް ތިރިވެ އޭތި އަތަށް ނަގައި ބަލާލުމުން އެއީ އޭނަގެ އަނގޮޓިކަން ނަސްރާއަށް އެނގުނެވެ. ސިކުންތުކޮޅަކަށް އެއަށް ބަލަހައްޓައިގެން އިނދެފައި ނަސްރާ ކުއްލިއަކަށް ކޮޅަށް ތެދުވެ ދޮރު ހުޅުވާލިއެވެ. އެވަގުތު ކަޅުކުލައިގެ ދިގު ވާރޭ ކޯޓެއް ލައިގެން ހުރި ޒުވާނަކު ގޭގެ ގޭޓާއި ދިމާލަށް ހިނގާފަ ދިޔަތަން ނަސްރާއަށް ފެނުނެވެ. ނަސްރާއަށް ފުރަގަސްދީފައި ދަމުން ދިޔަ އެ ޒުވާނާގެ ބޯވެސްވަނީ އެ ކޯޓުން ނިވާ ކުރެވިފައެވެ. ނަސްރާ އަދިވެސް އެއްފަހަރު އޭނަގެ އަތުގައި އޮތް އަނގޮޓިއަށް ބަލާފައި އަނެއްފަހަރު އެޒުވާނާއަށް ބަލާލިއެވެ. އެވަގުތު އެޒުވާނާ ގޭގެ ގޭޓާއި ހަމަވެއްޖެއެވެ. އެޒުވާނާ ގޭގެ ގޭޓުން ބޭރަށް ފިޔަވަޅެއް އެޅި ވަގުތާއި ގެއަށް ވަންނަން އައި ޝަރީފް ގޭގެ ތެރެއަށް ފިޔަވަޅެއް އަޅާލި ވަގުތުވީ އެއްވަގުތަށެވެ. ދެމީހުންނަށް އިތުރަށް ކުރިއަށް ނުދެވެނީސް އެދެމީހުންގެ ކޮނޑު ޖެހުނެވެ. އެވަގުތު އެޒުވާނާގެ ބޯ މަތީގައި އޮތް ކޯޓުގެ ބައި ކައްސައިގެން ގޮސް އޭނަގެ ކަޅުކުލަގަދަ ފަންއިސްތަށިގަނޑު ނަސްރާއަށް ކަޝްފުވިއެވެ. އޭގެ ދެވަނަ ސިކުންތުގައި އެޒުވާނާއާއި ޝަރީފްގެ ދެލޯ ބައްދަލުވެގެން ދިޔަ ވަގުތު އެޒުވާނާގެ މޫނުގެ އެއްފަޅި ނަސްރާއަށް ފެނިގެން ދިޔައެވެ. ހަމަ އެއާއެކު އެއީ އޭނައަށް މިހާ ދުވަހު ނަމެއް ނޭނގި ފެންނަމުން ދިޔަ ޒުވާނާކަން ނަސްރާއަށް ނަގައިގަނެވުނެވެ. ބައްޕަ އެޒުވާނާއާއި ދިމާއަށް ބަލަހައްޓައިގެން ހުރިތަން ފެނިފައި އެއީ ކާކުކަން ބައްޕައަށް އެނގޭނެއޭ ނަސްރާގެ ހިތް ބުންޏެވެ. ކުއްލިއަކަށް އެދެމީހުން ވާހަކަ ދައްކާނެ އިރަކަށް ނަސްރާ ކެތްމަދުވިއެވެ
ނުނިމޭ
