Vaudhu (Part 41)
“ކިއުޓް! ތިކަން ކުރެވިދާނެ ނުލާހިކު ރީއްޗަށް. ދެން ބުނެބަލަ…..މިކަމުގެ ތެރޭގަ ވަރަށް ބަދުނަސީބު ކޭސްއެއްވިއްޔާ އޭނަ މަރުވެސް ވެދާނެތަ؟” މައުވާ ސަމާސާއެއްކުރާ ފަދައަކުން ސުވާލުކޮށްލިއެވެ.
“ސީޒްޝާރގެ ތެރޭގައި ބޮލަށް އަނިޔާއެއްވެއްޖެއްޔާ ހަމަ ވެދާނެ.” އެކޮޅުން ކިޔައިދެވުނެވެ. އެއާއެކު މައުވާގެ ލޮލުން ނުލަފާ ވިދުވަރެއް ފެނިގެން ދިޔައެވެ.
“ގުޑް ނިއުސް….ތިހެން ވެއްޖެއްޔާ ވަރަށް އަވަހަށް ކުއީންސް ޝޮޕް ފިހާރައިގެ މާރކެޓިންގް ޓީމް މެމްބަރެއްގެ ޖަނާޒާ އޮންނާނެ.” މައުވާ އެ ވާހަކަ ފެށީ ހިނިތުންވުމަކާއެކީ ކަމަށްވިޔަސް ވާހަކަ ނިމެމުން ދިޔަދިޔަހެން އެ މޫނުމައްޗަށް ރުޅިވެރިކަން ވެރިވިއެވެ. އެ ވާހަކައަށްފަހު އެކޮޅުން ބުނާނެ އެއްޗެއް އަޑުއެހުމެއްނެތި މައުވާ ފޯނު ކަނޑާލަމުން ފޯނު ކަންފަތުން ނަގާލިއެވެ. އޭރު އޭނަ އިން ކާރު އިންޑިޔާގެ ބޮޑު މަގަކުން ދަތުރުކުރަމުން ދިޔައީ އެއާރޕޯޓަށް ދިޔުމަށެވެ.
**
އޭގެ އަނެއްދުވަހުގެ ހެނދުނު މަލާކަށާއި އަޔާޒަށް ފެށިގެން ދިޔައީ ނުހަނު ހިމޭންކަމާއެކީ އާދައިގެ ގޮތަކަށެވެ. އާދައިގެ މަތިން ދެމީހުން އެކީގައި ތެދުވެ ފަތިސް ނަމާދު ކަސްރަތު ކުރުމަށްފަހު ނާސްތާކޮށްގެން އަޔާޒް މަލާކާއި ވަކިވެގެން ދިޔައީ މަލާކްގާތު ލޯބިވާ ވާހަކަ ބުނުމަށްފަހުގައެވެ. މަލާކް އެދުވަސް ހޭދަކުރަން ފެށީ މީގެ 2 ހަފްތާއެއްހާ ދުވަސްފަހުން ފެށޭ އޭނަގެ އިމްތިޙާނަށްޓަކައި ތައްޔާރުވުމުގެ މަސައްކަތުގައެވެ. ނުހަނު ބުރަކޮށް އެކިއެކި ޕްރެޒެންޓޭޝަންތައް ބަލަމުން ފޮތަކަށް މުހިއްމު ނުކުތާތައް ނަގަމުން ދަނިކޮށް މަލާކްގެ ސަމާލުކަން އެހެން ދިމާލަކަށް ދިޔައީ މޭޒުމަތީގައި އޮތް އޭނަގެ ފޯނު ރިންގުވާން ފެށުމުންނެވެ. ފޯނުގެ ސްކްރީނަށް ބަލާލިއިރު އެއަށް އަރާފައި އޮތީ އޭނައާއެކީ މާރކެޓިންގް ޓީމްގައި މަސައްކަތްކުރާ ފައުޒާގެ ނަމެވެ. އިމްތިޙާންތަކަށްޓަކައި އޭނަ އޮފީހުގެ މަސައްކަތުން ކުޑަ ޗުއްޓީއެއް ނަގާފައި ވަނިކޮށް ފައުޒާ ގުޅާނީ ބޮޑުކަމެއް ވުމުންކަން މަލާކަށް ޔަޤީންވިއެވެ. އެހެންކަމުން އޭނަ ވަގުތުން ފޯނު ނަގައި ކަންފަތުގައި ޖައްސާލިއެވެ. އޭނައަށް އެއްޗެކޭ ނުވެސް ބުނެވެނީސް އެކޮޅުން މާނާގެ ހާސްކަން އެކުލެވިގެން ދިޔަ އަޑު އިވުނެވެ.
“މަލާކް މޭމް! ނިކަން އަވަހަށް އޮފީހަށް އައިސްދެވިދާނެތަ؟ ވަރަށް ބޮޑުކަމެއް ދިމާވެގެން މިއުޅެނީ. އަސްލު އެނގޭތަ؟ އަހަރުމެން ޔިއާރ އެންޑް ސޭލްއަށް ހެދި ހުރިހާ ޕޯސްޓާރތައް ޕްރިންޓަށްދޭން މިއަދު ބެލިއިރު ހުރިހާ އެއްޗެއް ޑިލީޓްވެފަ ހުރީ. މިއަދު ޗެނަލްތަކަށް ފޮނުވަން ހަދާފަ އޮތް އިޝްތިހާރު ވެސް ގެއްލިއްޖެ އޭތި ހުރި ކޮމްޕިއުޓަރުގަ މައްސަލައެއް ޖެހިގެން. ފިހާރަތަކުގަ ޕްރޮމޯޝަނެއް އޮންނާނެ ވާހަކަ ކަސްޓަމަރުންނަށް އަންގާފަ އޮތްވާ އަޅުގަނޑަށް މިއަދު އެނގުނީ ފަސާ އަދި ކޫޕަންތައް ނުފޮނުވާކަން. ކަސްޓަމަރުން ވަރަށް މައްސަލަ ޖައްސަމުންދާ ވާހަކަ ފިހާރައިގަ ހުރި ކުއްޖަކު ބުނި އަޑު އެހިން….އަދި އަދި…އެނގޭތަ؟ ކުރީ ހަފްތާއާއި ބަލާއިރު މި ހަފްތާގަ ހުރިހާ ފިހާރަތަކުގަ ވެސް ލޮސްވީ. ވަކިން ޚާއްޞަކޮށް ޕާރފިއުމް ފިހާރައަށް ވަރަށް ބޮޑު ލޮސްތަކެއްވި….” އެކޮޅުން އެތައް ވާހަކައެއް އެއްފަހަރާ އިވިގެން ދިޔަދިޔަހެން މަލާކްގެ ސިކުނޑިއަށް ހާސްކަމެއް ވެރިވިއެވެ. އޭނަ ކުރަމުން އައި މަސައްކަތެއް ފުރިހަމަ ނުވާ ކަމުގެ އިޙްސާސުންނެވެ. ހަމަ އެހިނދު އެކޮޅުން ދެއްކި ބައެއް ވާހަކަތައް ދޭހަކުރަން ވެސް ދަތިވިއެވެ.
“އެކަމަކު ކިހިނެއް މިހާ ކުޑަ މުއްދަތެއްގެ ތެރޭގައި އެހާ ބޮޑު ލޮސްއެއްވާނީ؟ ސްޓޮކްއަކަށް ގެއްލުމެއް ލިބުނީމަ ނޫނީ އެންމެ ހަފްތާއެއްގެ ތެރޭގަ ބޮޑު ލޮސްއެއްނުވާނެދޯ؟ ކޫޕަންތައް ވީހާވެސް އަވަހަކަށް ފިހާރަތަކަށް ފޮނުވާ….ޗެނަލްތަކަށް ފޮނުވަން ހެދި އިޝްތިހާރުތަކާ ޕޯސްޓަރުތަކުގެ ބެކަޕެއް ނެތީތަ؟” މަލާކް އެ ސުވާލުތައް ކުރަން ފެށިހެން އޭނަގެ ބޮލުގެ ފުއްކިބައިގައި މަޑު ތަދެއް ހިނގާލިއެވެ. އެހެނަސް އެވަގުތު އޭނަވީ އެކަމާމެދު ވިސްނާވަރަށްވުރެ ބޮޑު ނުތަނަވަސްކަމެއްގެ ތެރޭގައެވެ.
“ން….ނެތޭ މަލާކް މޭމް….ވަރަށް ބޮޑަށް މަޢާފަށް އެދެން. މިއީ ހަމަ އަޅުގަނޑުގެ ކުށް. މަލާކް މޭމް ބުނީމަވެސް އަޅުގަނޑު ހުރީ ބެކަޕް ނަހަދާ. މިއަދު މަލާކް މޭމް އޮފީހަށް އައުން ހަމަ ރަނގަޅުވާނީ އޭރުން ޕޯސްޓަރުތަކާ އެއްޗެހި އަލުން ހެދޭނީ. އެއެއްޗެހި ހެދިތާ ދުވަސްވީމަ އަޅުގަނޑުމެންވެސް އެއެއްޗެހި ހުރިގޮތް ހަނދާނެއްނެތް. އަދި އެ އެހާވެސް ގިނަވީމަ. ޗެނަލަށް ފޮނުވާ އިޝްތިހާރު ވެސް ހެދޭނީ ދެން އެއްކަލަ ޑިރެކްޓަރާ ވާހަކަ ދައްކައިގެންދޯ؟ މޭމް ގުޅީމަ ރަނގަޅުވާނީ. މޭމް އެހެންވީމަ އަންނައްޗޭ. އަޅުގަނޑު މި ފޮނުވަނީ ކޫޕަންތައް މިހާރު.” މާނާ އެކޮޅުން ބުނެލި އަޑު އިވުނެވެ. އެ ވާހަކަތައް އަޑުއިވުމުން މާނާގެ ފަރުވާ ކުޑަކަން ފާހަގަވެފައި މަލާކް ނުރުހުންވެސްވިއެވެ. އަވަސްއަވަހަށް އެންމެ ރަނގަޅޭ ބުނެލަމުން އޭނަ ފޯނު ކަނޑާލީ އެހެންވެއެވެ. އެއަށްފަހު އޭނަ ދެވަނަ ވިސްނުމެއްވެސް ނެތި އޭނަ ގޮނޑި ފަހަތަށް ޖައްސާލަމުން އަލަމާރިއާއި ދިމާލަށް ދިޔައީ އޮފީހަށް ދިޔުމަށްޓަކައި ހެދުން ބަދަލުކުރުމަށެވެ.
މަލާކް ތައްޔާރުވެގެން ކޮޓަރިން ނިކުތުމާއެކު ބޮޑުމަންމަގެ ސުވާލުތަކާއި ކުރިމަތިވިއެވެ. މަލާކް ބުނިހާވެސް އެއްޗަކީ އޭނަ އޮފީހަށް އެވަގުތު ދާންޖެހޭ ވާހަކައެވެ. ވަގުތަކީ އަޔާޒާއެކީ ނިޝާން ވެސް ސައިކަލުގައި ތަނަކަށް ގޮސްފައިވާ ވަގުތަކަށްވުމުން ވަސީމާ ދެން ނުދިޔަޔަސް ރަނގަޅުވާނެ ނޫންތޯ ވެސް ބުންޏެވެ. އެހެނަސް މަލާކް ހާސްވެފައިވި ވަރުން އޭނައަށް ދުލެއް ނުދެވުނެވެ. އެހެންކަމުން ވަސީމާ އެމީހުންނަށް ޢާއްމުގޮތެއްގައި ކާރު ދުއްވައިދޭ މޫސަބެއަށް ގުޅައި ނިޝާންގެ ކާރުގައި މަލާކް ފޮނުވިއެވެ. މަލާކް އޭނަގެ ގޮނޑިން އަމިއްލައަށް ތެދުވެ ކާރަށް އެރި މަންޒަރު ބަލަން ހުރެފައި އަވަހަށް އައުމަށް ވަސީމާއަށް ބުނެލެވުނީ މަލާކަށްޓަކައި ކަންބޮޑުވެފައިވި ހިތަކާއި އެކީގައެވެ. މަލާކް ކާރަށް އަރައި ދޮރު ލައްޕާލީ އެއަށް ވަކި އެއްޗެކޭ ބުނުމެއްނެތިއެވެ.
މިނެޓްތަކެއްގެ ދަތުރަކަށްފަހު މަލާކަށް އޭނަ މަސައްކަތް ކުރާ އޮފީސް ހުންނަ ފިހާރައިގެ ޢިމާރާތާއި ހަމައަށް ދެވުނެވެ. ފިހާރަށް ދެވުމާއެކު އެ ބޭބެ ގޮނޑި ގެނެސްދިނުމުން މަލާކް ގޮނޑިއަށް ބަދަލުވީވެސް އަމިއްލައަށެވެ. ދަތުރުމަތީގައި އޭނަގެ ބޮލުގައި އުފެދި ގެއްލެމުން ދިޔަ ރިހުން އޭނަގެ ބޮލަށް ފެތުރެން ފެށިކަން އޭނައަށް ފާހަގަވިއެވެ. އޭނަގެ އިމްތިޙާންތަކަށްޓަކައި ބައެއް މާއްދާތަކަށް ނުވެސް ބެލޭކަން އެނގުންވި އެނގުންވުމާއި ވެސް އެކީގައެވެ. އަވީގެ ތެރެއަށް ނިކުތުމުން ބޮލުގެ ރިހުން ތޫނުވުން ނޫންކަމެއް ނުވިއެވެ. އަވަސްއަވަހަށް ގޮނޑި ދުއްވަމުން ގޮސް ފިހާރަ ތެރެއަށް ވަނެއްކަމަކު އެ ރިހުން އެގޮތުގައިވިއެވެ. އެހެނަސް މަލާކް ހުއްޓުމެއްނެތި އެ ދިޔަ ގޮތަށް ގޮސް ކުރިމަތިން ފެންނަމުން ދިޔަ ލިފްޓަށް އެރީ ޢިމާރާތުގެ އެންމެ މަތީ ބައިގައި ހުންނަ މާރކެޓިންގް ޓީމަށް ޚާއްޞަކޮށްފައިވާ އޮފީހަށް ދިޔުމަށެވެ.
މިނެޓްތަކެއްގެ ތެރޭގައި މަލާކް އިނީ އޭނައަށް ޚާއްޞަ ކުރެވިފައިވާ ކެބިންގައެވެ. އޭނަ އައުމާއެކުހެން މާނާ އައިސް އެއްކަލަ ޝަކުވާތައް އޭނަގެ ކުރިމަތީގައި ބަންޑުންކޮށްލީ ނާއުއްމީދީ އަސަރެއް އުފެދޭ ގޮތަކަށެވެ. މިއަހަރު ހަމަ ޔަޤީނުންވެސް ވާނީ އެންމެ ގިނައިން ގެއްލުންވި އަހަރަށޭ ބުނުމުން މަލާކް ވީ ނުރުހުމުގައި އަޑު އިސްނުކޮށް ހުރެވުނީ ކިރިޔަ ކިރިޔާއެވެ. އެހެނަސް މާނާގެ ތަކުރާރުކޮށް ކުރަމުން ދިޔަ އެ ޝަކުވާތަކާއި އޭނަގެ ބޮލުގެ ރިހުމާއި އެކީގައި ވެސް އޭނަ އޭރު ކުރިމަތިވެފައިވާ މައްސަލަތައް ޙައްލުކުރަން ރޭވުމެއް ރާވާލިއެވެ. އެއަށްފަހު މުޅި ޓީމް އެއްކުރުމަށްފަހު އެދުވަހުގެ ރޭވުން ކިޔައިދިނުމަށްފަހު އެކި މުވައްޒަފުންނާއި އެކި މަސައްކަތްތައް ޙަވާލުކޮށް އަމިއްލައަށް ވެސް ބައެއް ޒިންމާތައް ނެގިއެވެ. އަދި އޭނަގެ ކެބިންއަށް ގޮސް އޭނަގެ މަސައްކަތް ފެށިއެވެ. މަސައްކަތް ފެށުމަށްފަހު ވެސް މަލާކަށް އެކިއެކި ދަތިތަކާއެކީ ކުރިމަތިވަމުން ދިޔައެވެ. އޭނަ އޮފީހަށް އައުމަށް އެންގި މާނާ ދޭތެރެ ދޭތެރެއިން އޭނައަށް ކޮންމެވެސް ނޭދެވޭ ޚަބަރެއް ދެމުން ދިޔައެވެ. ކޮންމެވެސް ފިހާރައެއްގެ ގިނަ ޢަދަދެއްގެ ސްޓޮކް ހަލާކުވީ ވާހަކަ އެއްފަހަރު ބުނިއްޔާ ކޮންމެވެސް އެއް ޝިޕްމެންޓެއް ނުލިބޭ ވާހަކަ އަނެއްފަހަރު ބުނާނެއެވެ. އޭގެއިން ކޮންމެ ފަހަރަކު މަލާކަށް އިތުރު ހާސްކަމެއް ލިބިގެން ދަނީ އެ ލިބޭ ގެއްލުން ފޫ ބެއްދުމަށްޓަކައި އޭނަ އިތުރު މަސައްކަތެއް ކުރަން ޖެހޭކަން އެނގުންވުމުންނެވެ. އެހާ ގިނަ ގެއްލުންތައް ވަމުން ދިޔައީތީ ފިހާރަތައް ކުރިއެރުވުމަށް މިހާރު ހުރި ޚިޔާލުތަކެއްގެ އިތުރުން އާ ޚިޔާލުތަކެއް ވެސް ބޭނުންވާ ކަމަށް އޭނަގެ ސިކުނޑި ބުނަމުން ދިޔަ ގޮތުން އޭނަ އެވަގުތު ކުރަމުން ދިޔަ މަސައްކަތަށް ސަމާލުކަން ދޭންވެސް އޭނައަށް އުދަގޫވަމުން ދިޔައެވެ. އަދި އަމުދުން މަލާކް ކޮންމެވެސް ޕޯސްޓަރެއްގެ މަސައްކަތެއް ނިމެން ގާތްވެފައި ވަނިކޮށް ކުއްލިއަކަށް އޭނަގެ ކޮމްޕިއުޓަރު ނިވިގެން ދިޔަ ގޮތުން މަލާކްގެ ސިކުނޑި ގޯސްވާން އުޅުނުހެން އޭނައަށް ހީވިއެވެ. އެހެނަސް އޭނަ ދެންވެސް ހުއްޓުމެއްނެތި މީހަކު ގެނެސް ކޮމްޕިއުޓަރު ރަނގަޅު ކުރުވައި މެދުކެނޑުމެއްނެތި އޭނަގެ މަސައްކަތް ކުރިއަށް ގެންދިޔައެވެ. މަސައްކަތް ބުރަވުމުގެ ކުރިން އޭނަ މެންދުރު ކާންވެސް ހަނދާނެއްނެތެވެ. ގިނައިރު އިންގޮތަށް އިނުމުގެ ސަބަބުން އޭނަގެ ބުރަކަށީގައި ތަދެއް އުފެދި އެ ތަދު ކަނދުރައާއި ހަމައަށް ގޮސް ބޮލަށް އެރުމުން އޭނަގެ މޭނުބައި ކުރަން އުޅުނުހެން ވެސް މަލާކަށް ހީވިއެވެ. އެހެނަސް ސިކުނޑިއަށް ވެރިވެފައިވި ހާސްކަމެއްގެ ސަބަބުން އޭނަގެ މަސައްކަތް ހުއްޓާލަން ޚުދު އޭނަގެ ދެއަތަށް ވެސް ނުކުޅެދިފައިވި ފަދައަކުން މަލާކަށް މަސައްކަތް ކުރެވެމުން ދިޔައެވެ.
ހެނދުނު ޑިއުޓީ އޮންނަ ދުވަސްދުވަހުގެ އާދައިގެ މަތިން އަޔާޒަށް އެދުވަހުވެސް ގެއަށް އާދެވުނީ ހަވީރު 5 ޖެހިހިކަށްހާއިރެވެ. ގެއަށް އައިސް އާދައިގެ މަތިން މަލާކް ދެކިލުމުގެ އުއްމީދުގައި ކޮޓަރީގެ ދޮރު ހުޅުވާލިއިރު މަލާކް ފެންނަން ނެތުމުން އަޔާޒް ޙައިރާންވިއެވެ. އިމްތިޙާންތައް ނުނިމެނީސް މަލާކް އޮފީހަށް ނުދާން ނިންމާފައިވިކަން އޭނައަށް އެނގޭތީވެއެވެ. އަދި އަމުދުން މަލާކް އޮފީހަށް ދިޔަޔަސް މަލާކަށް ކަނޑައަޅާފައިވާ މަދު ގަޑިއިރުތަކުގެ ސަބަބުން މަލާކް މެންދުރު ވާއިރަށް ގެއަށް އަންނާނެއެވެ. ހިތަށްވެރިވި ކަންބޮޑުވުމާއެކީ އަޔާޒަށް ވަގުތުން ގޮސް ބޮޑުމަންމަ ކައިރިން މަލާކާއިމެދު ސުވާލުކުރެވުނެވެ. މަލާކް އެކަނި އޮފީހަށް ގޮސް އަދިވެސް އަނބުރާ ނާންނަ ވާހަކަ އިވުމުން އަޔާޒަށް ޙައިރާންވި ވަގުތު ނުރުހުންވެސްވިއެވެ. ނުރުހުންވީ ބޮޑުމަންމަ ގަދަކަމުން ވިޔަސް މަލާކް ގޭގައި މަޑުނުކުރުވީތީވެއެވެ. އެހެނަސް އަޔާޒް އެއްޗެކޭ ނުބުނެ ވަގުތުން ގެއިން ނިކުންނަން ދިޔައީ މަލާކް ބަލާ ދިޔުމަށެވެ. ޢިމާރާތުގެ ތިރިއަށް ގޮސް ކާރަށް އަރައި ކާރު ސްޓާޓްކޮށްލި ވަގުތު އަޔާޒްގެ ހިތުގެ ތެޅުން އަވަސްވެފައިވިއެވެ. މަލާކްގެ އިމްތިޙާންތައް ނުނިމެނީސް އޮފީހަށް ނުފޮނުވުމަށްޓަކައި މަލާކްގާތު ޗުއްޓީ ނަގަން އެންގީވެސް އޭނައެވެ. އިމްތިޙާންތަކާއިމެދު އެކަނިވެސް މަލާކް ގެންގުޅޭ ހާސްކަން އޭނައަށް އެނގޭތީވެއެވެ. ކަން މިހެން އޮތްވާ އޮފީހުގެ މަސައްކަތާއިމެދު ވިސްނަންވުމުން މަލާކަށް ދެރަގޮތެއް ވެދާނެތީ އޭނަގެ ހިތް ބިރުގަތެވެ. މަލާކްގެ ސިކުނޑިއަށް ހާސްކަން ވެރިކުރުވަން ބަޔަކު މީހުން ރާވައިގެން އޭނައަށް މިހާރުވެސް އިއްވާފައިވާ ވާހަކަތަކާމެދު އަޔާޒް ރޭކާވެސް ނުލައެވެ.
**
ހަވީރުގެ އެ ވަގުތުވެސް މަލާކްވީ ކޮމްޕިއުޓަރު ދޮށުގައި އޭނަގެ މަސައްކަތްތައް ކުރިއަށް ގެންދާށެވެ. އޭނަ އެހެން އިންއިރު މިއަދު އެ އޮފީހަށް އަންނަން ހަމަޖެހިފައިވި މެހުމާނުގެ މަތިން ވެސް ހަނދާން ނެތިފައިވިއެވެ. އޭނަ ކިރިޔާވެސް އިސްއުފުލައި ބަލާލިނަމަ ކެބިންގެ ބޭރަށްވާ ގޮތަށް ހުރި ބިއްލޫރި ދޮރުގައި ދަމާލެވިފައިވި ބްލައިންޑްތަކުގެ ދޭތެރެއިން އޭނައަށް ނަޒަރެއް ދީގެން ހުރި މީހަކު އޭނައަށް ފެނުނީހެވެ. ކެބިންގެ ބޭރުގައި ހުސްކޮށްހުރި ކޮރިޑޯގެ އަނެއްފަރާތުން ފެންނަމުން ދިޔައީ ތިރިއަށް ދެވޭ ގޮތަށް ކަނާތް ފަރާތުގައި ހެދިފައިވާ ސިޑިއެކެވެ. އެ ސިޑީގެ ރެއިލިންގް ކޮރިޑޯގެ ވާތް ފަރާތުން ފެންނަމުން ދިޔަ ފާރާއި ދިމާލަށް ދިގު ދެމިގެން ގޮސްފައިވިއެވެ. މަލާކަށް ނަޒަރު ހުއްޓައިގެން ހުރި ޒުވާން އަންހެން ކުއްޖާ ހުރީ ސިޑީގެ ކައިރިން އެ ރެއިލިންގްއަށް ލެނގިލައިގެންނެވެ. އުސްފައިވާނަކާއެކީ ކަކުލާއި ހަމައަށް އޮތް ދަނބުކުލައިގެ އަތްކުރު ހެދުމެއް ލައިގެން ހުރީ މައުވާ ނޫން ދެވަނަ މީހެއްނޫނެވެ. މައުވާ މަލާކަށް ބަލަހައްޓައިގެން ހުރިއިރު އޭނަގެ ލޮލުން އަލިފާންކަނި ބުރާހެން މީހަކަށް ހީވެދާނެއެވެ. އޭނަ އުއްމީދުކޮށްގެން ހުރީ އޭނަ މިހާތަނަށް ކުރިވަރު ކުރުމުން ވެސް މަލާކް ބިމަށް ތިރިވާނެކަމަށެވެ. އެހެންނޫނީ ކުޑަމިނުން އެ މަސައްކަތް މަޑު ޖައްސާލާނެކަމަށެވެ. އޭގެ ނަތީޖާއެއްގެ ގޮތުން ފިހާރަތަކަށް ގެއްލުންވުމުގެ ބަދުނާމު މަލާކްގެ ބޮލުގައި އެޅުވިދާނެކަމަށެވެ. އެހެނަސް މަލާކްގެ މޫނުމަތިން ފެންނަމުން ދިޔަ އުދަގޫވަމުން ދިޔަ އަސަރުތަކާއެކީ ވެސް މަލާކް މަސައްކަތް ކުރަމުން ދިޔަ ގޮތުން މައުވާގެ ދަތްކުނޑިވިކުނެވެ. މިއީ ވެސް އޭނަގެ ބައްޕަ އޭނައާއި އެ އަގެއްނެތް ބަލިކަށި އަންހެން ކުއްޖާ އަޅުވާ ކިޔާފާނެފަދަ ކަމެއްކަން އެނގުންވުމުން ވީ ނުރުހުމުގައެވެ.
މައުވާ މަލާކަށް ބަލަން އެ ހުރިގޮތަށް ހުރެފައި ކުއްލިއަކަށް އޭނަގެ އެއްއަތުގައި އެޅުވިފައިވި އަތް ދަބަހުގެ ތެރެއިން އޭނަގެ ފޯނު ނެގިއެވެ. އެއަށްފަހު ނަންބަރުތަކަށް ފިތާލަމުން ފޯނު ކަންފަތުގައި ޖައްސާލިއެވެ. ދެ ތިން ރިންގަކަށްފަހު އެކޮޅުން ފޯނު ނެގުމާއެކު މައުވާ ވާހަކަ ދެއްކިއެވެ.
“މަ ކުރަން ރާވައިގެން ހުރި ހުރިހާ ކަމެއް އަދި ނުކުރަން…..އެކަމަކު މަ ހީކުރީ މިހާވަރު ވާއިރު ކުޑަމިނުން އޭނަގެ މަސައްކަތް ހުއްޓޭނެކަމަށް. ޖާމިޒް ބުނި އެކަމަކު އޭނަ ވަރަށް ގަދައަށް ބޮލުގަ ރިއްސާނެއޭ…..އެކަމަކު މި އަންހެނާ ހީވަނީ މުޅި ކުންފުންޏެއްވެސް އުފައްދަފާނެހެން މި ވަގުތުކޮޅުގެ ތެރޭގަ…” މައުވާ މަޑު އަޑަކުން އެހެން ބުނެލީ އިންތިހާ ދަރަޖައިގެ ނުރުހުންތެރިކަމާއި އެކީގައެވެ.
“އުދަގޫ ވާވަރަށް ބޮލުގަ ރިއްސާނެ އޭނަ. ވަކިން ޚާއްޞަކޮށް މިއަދު މާނާ ލައްވާ އަހަރެން ބޭސް ގުޅައެއް އަޅާފަ ދިން ކޮފީ ތަށްޓަށްފަހު….” ޖާމިޒް ބުނި އަޑު އިވުނެވެ.
“ދެން ކީއްވެގެންހޭ އޭނަ މަސައްކަތް ކުރަމުން އެ ގެންދަނީ؟!” މައުވާ އިހުނަށްވުރެ ގަދަވެފައިވި ރުޅިއަކާއެކީ ސުވާލުކުރިއެވެ.
“ނޭނގެ….ކެރެކްޓާރގެ ގޮތުން ހަމަ ޢަޒުމް ވަރުގަދައީ ކަންނޭނގެދޯ؟ އެގޮތަށް ގިވް އަޕް ނުކުރަން އާދަވެފަ ހުރިއްޔާ ކިތަންމެ ގިނަ ދަތިތައް ކުރިމަތިވިޔަސް ހަމަ އެކަމަކާއިގެން ކުރިއަށްދާ ޕޭޝަންޓުން އުޅޭ. ވަރަށް ގޮތްދޫނުކުރާ ގޮތެއް ހުންނާނެ ތި ޕޭޝަންޓުންގެ….ޕްލަސް އަހަންނަށް ހީވަނީ އަޔާޒް ވަރަށް ބޮޑަށް ތީނަގެ ޓްރީޓްމެންޓް ވެސް ޖައްސާފަހެން ހުރީ. އެހެންވީމަ މިހާވަރު ވީއިރު ގޮތެއްނުވެ ހުންނާނީ. އަހަރެން ރެކޮމެންޑް ކުރާނީ ގޮތެއް ދިމާވަންދެން ހަމަ މި ޖެއްސި ކަންތައް ރިޕީޓް ކުރަން. އަހަރެން ދިން ބޭސް ގުޅައިގެ އަސަރު ހުންނާނެ މާދަމާ ވަންދެން ވެސް….” ޖާމިޒް ކިޔައިދިނެވެ.
“މަށަކަށް ނުހުރެވޭނެ ރިޕީޓް ކޮށްކޮށެއް. މިއަދު މި ދާ ގޮތަށް ގޮސް އޭނަގެ ދުވަސް ދުއްވާލާނަން މަ!” މައުވާ އެހެން ބުނެ މިފަހަރުވެސް ޖާމިޒްއަށް އެއްޗެކޭ ބުނުމުގެ ފުރުޞަތެއް ނުދީ ފޯނު ކަނޑާލަމުން ފޯނު ދަބަހަށް ލިއެވެ. އޭގެ ދެވަނަ ސިކުންތުގައި އޭނަ ރުޅިން ރަތްވެފައިވި މޫނަކާއެކީ ކެބިންއާއި ދިމާލަށް ދާން އުޅުނު ތަނާހެން ކެބިންގެ ދޮރާއި ދާދި ގާތުގައި ހުރި ލިފްޓުގެ ދޮރު ހުޅުވެން ފެށި އަޑު އިވުނެވެ. އޭގެ ދެވަނަ ސިކުންތުގައި ލިފްޓުން އަޔާޒް ނިކުތް މަންޒަރު ފެނިފައި މައުވާއަށް ކުއްލި ގޮތަކަށް އަނެއްފަރާތަށް އެނބުރިލެވުނެވެ. މަލާކާއިމެދު ކަންބޮޑުވެފައިވި އަޔާޒް ލިފްޓުން ނިކުމެ ކެބިންއަށްދާން މިޞްރާބުޖެހި ވަގުތު އެއްލި ކަޅިއަކުން އެކޮޅުގައި ހުރި ސިޑިން ފައިބަން އަމާޒުކުރި އަންހެން ކުއްޖާ އޭނަގެ ލޮލުގައި އެޅިއެވެ. އެހެނަސް އެވަގުތު މަލާކްގެ ޙާލަތު ނޫން އެހެންކަމަކާއިމެދު ވިސްނަން އޭނަ ނުކުޅެދިފައިވުމުން އަޔާޒް އެދިމާލަށް ދެވަނަ ފަހަރަށް ބެލުމެއްނެތި ގޮސް މަލާކްގެ ކެބިންގެ ދޮރާއި ހަމައަށް ދިޔައެވެ. އެ ދިޔަގޮތަށް ގޮސް އެ ދޮރު ކުއްލިއަކަށް ހުޅުވާލަން ހިތަށްއެރިއެއްކަމަކު އަޔާޒް މަލާކާއިމެދު ވިސްނަމުން ފުން ނޭވައެއް ދޫކޮށްލީ ހަމަޖެހިލުމަށެވެ. އެއަށްފަހު އޭނަ ލަސްލަހުން އެ ދޮރުގެ ތަޅުގައި ހިފައި ތިރިކުރަމުން ދޮރު ހުޅުވާލިއެވެ. ދޮރު ހުޅުވުނު އަޑަށް މަލާކް އޭނަގެ ކޮމްޕިއުޓަރު ސްކްރީނުން ނަޒަރު ވަކިކޮށް އެދިމާލަށް ބަލާލީ އަނެއްކާވެސް ކޮންމެވެސް ޚަބަރަކާއިގެން މާނާ އަންނާނެކަމުގެ އުއްމީދުގައެވެ. އެހެނަސް ބަދަލުގައި އަޔާޒް ފެނުމުން އޭނަ ސިއްސައިގެން ދިޔައެވެ.
“އޮހް! އަންވެލްކަމްޑް ގެސްޓެއްވީމަ ދޯ؟ ހެހެ……ކިހިނެއްވީ؟ ބުރަކަށީގަ ރިއްސަނީތަ؟” އަޔާޒް ކެބިންގެ ތެރެއަށް ވަންނަމުން ސަމާސާއެއް ކުރި ހިނދު މަލާކް ތަދުވެގެން އުޅޭ ފަދައަކުން ބުރަކަށީގައި އަތް އަޅާލުމާއެކު އަހާލެވުނެވެ.
“ބުރަކަށީގަ ވެސް ބޮލުގަ ވެސް އެބަ ރިއްސާ. އެކަން ހަނދާން ނައްތާލާފަ ހުއްޓާ ސިއްސައިގެން ދިޔައިމަ މި ހަނދާންވީ…” މަލާކް އަނެއްކާވެސް ކޮންޓްރޯލެއްނެތި އޭނަގެ މަސައްކަތަށް އަނބުރާ ދަމުން ބުނެލިއެވެ.
“އަސްލުވެސްތަ؟ ހިނގާ ގެއަށް އެހެންވީމަ….” އަޔާޒް އޭނަގެ ކަންބޮޑުވުން ފޮރުވަމުން ނިކަން ހަމަޖެހިގެން މަލާކް ކައިރިއަށް ދަމުން ބުނެލިއެވެ.
“ނޫނޭ އަޔާޒް…..ބަލާބަލަ އަދި މަލާކް އެބަޖެހޭ މިކަހަލަ 5 ޕޯސްޓަރު ނިންމަން. މިއީ މަލާކް ކުރާ ކަމެއްވެސް ނޫން އެކަމަކު ނެޓުން ސާޗްކޮށްގެން އެކިއެކި ޕްރޮގްރާމްތައް ބޭނުންކުރާ ގޮތް ދަސްކޮށްގެން މި ހަދަނީ. މިއަދު އަސްލު މި ޕޯސްޓަރުތައް ޑިސްޕްލޭވެފަ ހުންނަންވާނީ އެކަމަކު މި ހުރިހާ ދުވަހު ހެދިހާ ޕޯސްޓަރުތައް އެ ހަލާކުވި ޕީސީއާއެކީ ގެއްލިއްޖެ.” މަލާކް ކިޔައިދިން ވަގުތު އަޔާޒް ހުރީ އޭނަގެ ކައިރީގައި ހުއްޓި ކޮމްޕިއުޓަރުގެ ސްކްރީނަށް ނަޒަރު ހުއްޓައިގެންނެވެ.
“ދެން އެހެންވީމަ ފަހުން ދުވަހަކުން ޕޯސްޓަރު ޑިސްޕްލޭ ކުރަން ލަސްކޮށްލަންވީއެއްނު؟” އަޔާޒް ލަސްލަހުން މަލާކަށް ވިސްނައިދެވޭތޯ ބެލިއެވެ.
“ނޫނޭ އަޔާޒް….މިހާތަނަށް އައިއިރު ހުރިހާ ބޮޑެތި ފިހާރަތަކުން ވެސް ޔިއާރ އެންޑް ސޭލްތައް ފަށައިފި ވަރަށް ކުލަގަދަކޮށް. އަދި އަހަރުމެންގެ ފިހާރައެއްގެ ކައިރީގައި ހުޅުވާފަ ހުރި އާ ފިހާރައިގެ ވެސް އެ ސޭލްގެ ޑިސްޕްލޭތައް އަޅުވައިފި މިހާރު ވެސް. އަހަރުމެން ޑިސްޕްލޭނުކޮށް ދުވަސްވަންޏާ ކަސްޓަމަރުން ގެއްލޭނެ.” މަލާކް އޭނަގެ ކަންބޮޑުވުން ފާޅުކުރިއެވެ.
“ހުމް….ދެން ކޮންކަމެއް ގޯސްކޮށްވާނީ؟ ކިޔާލަދީބަލަ އަހަންނަށް.” އަޔާޒް ޝައުޤުވެރިވާކަމަށް ހެދެމުން ބުނެލިއެވެ. އޭނަ ބޭނުންވީ މަލާކަށް ކަމެއް ވިސްނައިދޭށެވެ.
“ދެން ލޮސްވާނީއެއްނު އަޔާޒް؟ މިހާރުވެސް އަހަރުމެންގެ ބައެއް ސްޓޮކްތައް ހަލާކުވި ވާހަކަ މަލާކަށް އިވިފަ ހުރީ. އެއީ ވެސް އިތުރު ލޮސްތަކެއް. އެއަށް ކޮމްޕެންސޭޓް ކުރަން ވެސް އަހަރުމެން ޖެހޭނެ އާ ކަމެއް ފަށަން….” މަލާކް ކިޔައިދިނެވެ.
“އާ ކަމެއް މިވަގުތަށް ނުފެށިއްޔާ ކިހިނެއްވާނީ؟” އަޔާޒް ސުވާލުކުރިއެވެ.
“އަޔާޒް! ދެން ހަމަ އިތުރު ލޮސްތަކޭ ވާނީ….ހަމަ ކަސްޓަމަރުން ގެއްލޭނީ….ގެއްލެމުން ގެއްލެމުން ގޮއްސަ ފިހާރަތަކުގެ މަޝްހޫރުކަން ގެއްލިދާނެ. މަޝްހޫރުކަން ގެއްލުނީމަ ފޫނުބެއްދޭ ވަރަށް ގެއްލުން ވާން ފަށާނެ. ފިހާރަތައް ބަންދުކުރާ ހިސާބަށްވެސް ގޮސްދާނެ!” މަލާކް ހިސާބެއްގެ ނުރުހުންތެރިކަމާއެކީ އެހެން ބުނެލިތަނާހެން އަޔާޒް ވާހަކަ ދެއްކިއެވެ.
“ފިހާރަ ބަންދުވީމަ ކާކު ބަނގުރޫޓުވާނީ؟ ފިހާރައިގެ ވެރިމީހުން! ފިހާރައިގެ ވެރިމީހުންގެ ތެރެއިން އެކަކީ ކާކު؟ ޑޮކްޓާރ އަޔާޒް ޢަބްދުލްޙަލީމް! ޑޮކްޓަރ އަޔާޒް އެކަން އެނގިހުރެވެސް މި ބުނަނީ މިތަނުގެ މާރކެޓިންގް މެނޭޖަރަށް ކުޑަ ބްރޭކެއް ބޭނުން އެބަވެއޭ މިވަގުތު. އެހެންވީމަ މަސައްކަތް ހުއްޓާލާފަ ގެއަށް އަންނަންވީ މަލާކް.” އަޔާޒް މަލާކާއި ހަތަރުކަޅި ހަމަކޮށްގެން ހުރެ ބުނެލިއެވެ. އަޔާޒް ބުނެލި ވާހަކައިން މަލާކް ކުޑަކޮށް ހުއްޓުން އަރާ ގޮތްވިއެވެ. އޭނައަށް ދެންމެ އޭނަގެ މަސައްކަތަށް ސަމާލުކަން ދެވުނީ އެއަށްވުރެ ބޮޑަށް އޭނަ ވިސްނަންޖެހޭ އޭނަގެ ޞިއްޙަތަށްވުރެ ބޮޑަށްކަން އެނގުންވީ އެވަގުތެވެ. އެހެނަސް އޭނަ ދެންވެސް އެއްޗެކޭ ބުނަން އުޅުނު ވަގުތު އަޔާޒް މަލާކްގެ ކުރިމަތީގައި ހުރި މޮނީޓަރުގެ އެއްފަރާތުގައި ހުރި ބަޓަނަށް ފިތާލަމުން މޮނީޓަރު ނިވާލިއެވެ. އެއާއެކު މަލާކް އަނެއްކާވެސް އޭނައަށް ބަލާލުމުން އަޔާޒް އޭނަގެ މޫނުގައި ލޯތްބާއެކީ ދެއަތުން ހިފަހައްޓާލިއެވެ.
“އަހަރެން އަތުގަ ހުރި ހުރިހާ މުދަލެއް ގެއްލުނަސް ހެޔޮ……އެހުރިހާ ކަމަކަށްވުރެ އަހަންނަށް މަލާކް މުހިއްމުކަން ހަނދާން ބަހައްޓައްޗޭ!” އަޔާޒް މަލާކާއި ލޯ ބައްދަލުކޮށްގެން ހުރެ ބުނެލި ވާހަކައިން މަލާކްގެ ހިތަށް ލިބުނު ހަމަޖެހުމާއެކީ އޭނަގެ ބޮލުގެ ރިހުމަށްވެސް ލުއެއް ލިބުނުހެން އޭނައަށް ހީވިއެވެ. އެ ރިހުން އިތުރަށް ލުއިވެގެން ދިޔައީ އަޔާޒް ގުދުވެލަމުން ނުހަނު އޯގާތެރިކަމާއެކީ އޭނަގެ ނިތަށް ބޮސްދިނުމުންނެވެ. އެއަށްފަހު އަޔާޒް އޭނައާއި ދުރުވެލަމުން ހިނިތުންވުމަކާއެކީ ހިނގާށޭ ބުނެލިއެވެ. އެއާއެކު މަލާކަށް އިންކާރު ކުރުމެއްނެތި ބޯޖަހާލެވުނީ އަޔާޒް އޭނަދެކެ ވާ ލޯބި އިޙްސާސް ކުރެވުމުން ހިތަށް ވެރިވެފައިވި އުފާވެރިކަމެއްގެ ސަބަބުންނެވެ. މަލާކް އަޔާޒާއެކީ ކެބިންއިން ނިކުންނަން ދިޔައީ މާރކެޓިންގް ޓީމްގެ ދެން ތިބި މުވައްޒަފުން ވެސް އޯވާރޓައިމަށް ތިބުން މަޖުބޫރު ނޫންކަމަށް އަންގާފައެވެ. މަލާކް ވަރުބަލިވެފައިވީތީ އަޔާޒް ކެބިންއިން ނިކުތީ މަލާކްގެ ގޮނޑި ދުއްވައިދެމުންނެވެ.
“މަލާކް ހިނގާދޯ މިރޭގެ ކެއުމަށް ބޭރަށްދާން؟ ދެމީހުންގެ އޮފިޝަލް ފަސްޓް ޑޭޓް! މަލާކް މާ ވަރުބަލި ނޫނިއްޔާ އިނގޭ؟” އަޔާޒް މަލާކާއި އެކީ ކެބިންއިން ނިކުންނަމުން ވާހަކަ ދެއްކިއެވެ.
“ވަރުބައްޔޭ؟ މިހާރު ތިހެން ބުނީމަވެސް ވަރުބަލި ފިލައިފި. ހެހެ…..ހިނގާ ހަމަ މިރޭ! ކޮންތަނަކަށް ދާނީ؟” މަލާކްވެސް އުފާވެރި ހިނިތުންވުމަކާއެކީ ސުވާލުކުރިއެވެ. އެއާއެކު ދެމީހުންގެ ދެމެދުގައި އެކިއެކި ރެސްޓޯރެންޓްތަކުގެ މަޝްވަރާއެއް ފެށިގެން ދިޔައެވެ.
އުފާވެރި ވާހަކަތަކެއްގައި ދެމީހުން ތިބެ ގޮސް ލިފްޓަށް އަރައި ލިފްޓުގެ ދޮރު ލެއްޕުނު ވަގުތު އެއްކަލަ ސިޑިން މައްޗަށް އަރަން ފެށި މައުވާގެ މޫނުމަތިން ފެންނަމުން ދިޔައީ އިންތިހާ ދަރަޖައިގެ ރުޅިވެރިކަމެވެ. ދިގު ނިޔަފަތްތަކާއެކީ އޭނަގެ ގޮށްމުއްކެވިފައިވީއިރު އޭނަގެ އަތްތިލަ ނުކެނޑި ހުރީވެސް ކިރިޔަ ކިރިޔާއެވެ. އޭނަ އެހެން ހުއްޓާ އޭނަގެ އަތް ދަބަސްތެރޭގައި އޮތް ފޯނު ރިންގުވާން ފެށިއެވެ. މައުވާ ދެންވެސް އަޔާޒާއި މަލާކް ވަން ލިފްޓަށް ރުޅިވެރި ނަޒަރެއް ދީގެން ހުރެ އެ ފޯނު ނަގައި ކަންފަތުގައި ޖައްސާލިއެވެ.
“ހެލޯ މައު…..އެއްކަލަ އަނުމްއަށް ގުޅާލަންވީއެއްނު ދެން؟ މިހާރު އަހަންނަށްޓަކައި މަސައްކަތް ކޮށްދޭ ކުދިވެރިން ހޯދި ހޯދުމުން އަދި ނުގުޅާހެން ހީވީމަ މި ހަނދާން ކޮށްލަދިނީ.” އެކޮޅުން އިވުނީ ލަމްޔާގެ އަޑެވެ. ލަމްޔާ އެކަން ހަނދާން ކޮށްދިނުމުން އޭނައަށް އަދި އަނުމްގެ ކަންތަކާ ނޫޅެވޭކަން އެނގުންވުމުން އޭނަގެ ރުޅިވެރިކަން ހިސާބަކަށް ހިނދުނެވެ.
“އަދި ގުޅާނަން. މާދަމާ ހެނދުނު.” މައުވާ އެހެން ބުނެލިއިރު އޭނަގެ އަޑުގައި ތުރުތުރެއް އެކުލެވިގެން ދިޔައެވެ.
“މައު ކިހިނެއްތަވީ ތި އަޑަށް؟ ބަލީތަ؟” ލަމްޔާ އެ ސުވާލުކުރި އަޑަށް އަނެއްކާވެސް މައުވާ ރުޅިވެރިކަމުން ރޫރޫ އަޅައިގެން ދިޔައެވެ.
“މަ ބައްޔެއްނޫން. މަ ބައްޔެއްނުވާނެ! ބަލިވާނީ އޭނަ! ލޯބިވެރިޔާއާއި ވަކިވާންޖެހޭނީ އޭނަ! މަ ބައްޕައޭ ކިޔާ މީހާގެ ހުރިހާ މުދަލެއް ގެއްލޭނީ އޭނައަށް! މި ހުރިހާ ކަމެއް ނުވަނީސް މަށަށް ހަމަ ނޭވައެއް ނުލެވޭނެ. މިކަންތައްކޮށްފަ ދެން ލަމްޔާ ދައްތައަށް ވެސް އަހަރެން ޚަބަރެއްވާނީ.” މައުވާ ކަރުނަތައް ވެސް ޖަމާވާން ފެށި ރަތްވެފައިވި ދެލޮލާއެކީ އަންގާލިއެވެ. އެކޮޅުން ހިމޭންކަމުގެ ވަގުތުކޮޅަކަށްފަހު ލަމްޔާ ‘ޝުއާރ’ އޭ ބުނެލުމުން މައުވާ ފޯނު ކަނޑާލިއެވެ. އެއަށްފަހު ފޯނު ދަބަހަށް އަޅަމުން ސިޑިން ފައިބައިގެން ދާން ފެށީ މަލާކް ދިޔަ ދިމާލަށް ވެސް ދާން ބޭނުންނުވުމުން ފަދައެވެ.
**
އެރޭ އަޔާޒާއި މަލާކް އެއްބަސްވީ ފަދައިން އެމީހުން ކާން ދިޔައީ ރެސްޓޯރެންޓަކަށެވެ. ރެސްޓޯރެންޓުގެ އެންމެ މަތީ ބައި ހާމައަށް ހުރިއިރު އަޔާޒްގެ އެދުމަށް އެ ބައިގެ އަލި މަޑުކުރެވި އެދެމީހުން ތިބި މޭޒުގެ މެދުގައި ބައްތިއެއް ބެހެއްޓިފައިވިއެވެ. އަޔާޒް ބޭނުންވީ މަލާކަށްޓަކައި ވީހާވެސް ރީތި އަދި ހިމޭން މާޙައުލެއް ހޯދައިދޭށެވެ. އެ މާޙައުލުގެ ގޮތުން ވެސް މަލާކްގެ ޙާލަތު ރަނގަޅުވާނެކަމުގެ އުއްމީދުގައެވެ. އޮފީހުން ގެއަށް ގެނައި ގޮތަށް އޭނަ މަލާކް އަރާމުކުރަން ބޭއްވީ މަލާކަށް ކެވުނު ވަރަކަށް ކާން ދިނުމަށްފަހު ބޮލުގެ ރިހުމަށް ބޭހެއް ދީފައެވެ. އެހެނަސް އެއަށްފަހުވެސް މަލާކް ‘ކުޑަކޮށް’ ބޮލުގައި ރިއްސާ ވާހަކައާއި މޭނުބައި ކުރާހެން ހީވާ ވާހަކަ ބުނަމުން ދިޔަ ގޮތުން އަޔާޒް ކަންބޮޑުވާ ގޮތްވިއެވެ. ނަމަވެސް އޭނަ އެ ކަންބޮޑުވުން ދެއްކުމެއްނެތި ރަނގަޅުވާނެކަމަށް މަލާކް ގާތު ބުނަމުން ދިޔައީ ކަން އެގޮތަށް ވާނެ ގޮތެއް ހައްދަވައި ދެއްވުމަށްއެދި ހިތާހިތުން ދުޢާކުރަމުންނެވެ. އެހެނަސް ކީއްވެކަމެއް އޭނައަށް ނޭނގެއެވެ. ބޭރަށް ދިޔުމަށްޓަކައި ތައްޔާރުވެގެން ހުރި ވަގުތު ވެސް އަޔާޒަށް މަލާކްގެ މޫނުމަތިން ފެންނަމުން ދިޔައީ ވަރުބަލިކަމެވެ. އަދި އަމުދުން 14 ވިލޭރޭގެ ހަނދެއްހުރި އެރޭ ރެސްޓޯރެންޓުގެ އެ މާޙައުލުގައި އިންއިރު ވެސް މަލާކް ހިނިތުންވެލީ ހިނދު އެ ހިނިތުންވުން އެ ރީތި ލޮލާއި ހަމައަށް ނުފޯރައެވެ. އެކަމާމެދު ހިތަށް ކެތް ނުކުރެވުމުން އެންމެ ފަހުން އަޔާޒަށް ވާހަކަ ދެކެވުނެވެ.
“މަލާކް ނިދި އައިސްގެންތަ؟” ކެއުމުގެ ތެރެއިން އަޔާޒަށް ސުވާލުކޮށްލެވުނެވެ.
“ނޫނޭ….މަލާކަށް މިރޭ ނިދަން އުޅުނަސް ނިދޭނެހެނެއް ހިއެއްނުވޭ. އޮފީހުގަ ކޮފީއެއް ބޮއިގެން މިހިރީ…” މަލާކް ބުނެލިއެވެ.
“ކޮފީއެކޭ؟! ސީރިއަސްލީ މަލާކް! މަލާކް ބުނީމެއްނު މަލާކް ކޮފީ ބުއީމަ ނުނިދޭ ވާހަކައާ އުދަގޫ ވާވަރަށް ވިންދު އަވަސްވާ ވާހަކަ؟ ދެން ކީއްވެ؟” އަޔާޒަށް ހިސާބަކަށް ނުރުހުންވެ އިނދެ އަހާލެވުނެވެ.
“އެއީ ހަމަ އެ ގަޑީގަ އެއްވެސް އެއްޗެއް ނުކައި ހުއްޓާ މާނާ ގެނެސްދިނީމަ ހަމަ ބޯލެވުނީ. އިޓްސް އޯކޭ…މަލާކް އޯކޭ….” މަލާކް ބުނެލިއެވެ. އެހެނަސް އޭނަ ‘އޯކޭ’ އެއް ނޫންކަން އޭނައާއެކީ އަޔާޒަށް ވެސް އެނގުނެވެ. އެދުވަހު ހަވީރު ގެއަށް ގޮސް ކާން އުޅުމުން ނުކެވުނު ގޮތަށް އެގަޑީގައިވެސް އޭނަގެ ކުރިމަތީގައި ހުރި މީރު ކާއެއްޗެހި އޭނައަށް ނުކެވުނެވެ. އެކަމާމެދު އަޔާޒް ޝަކުވާވެސް ކުރަން ނުއުޅުނީ މަލާކަށް ގޮތެއްވެގެން އުޅޭކަން އޭނައަށް ޔަޤީންވުމުންނެވެ. އެރޭ މަލާކް ނުނިދޭނެ ވާހަކަ ބުނުމުން އަޔާޒް އެރޭ މަލާކާއިއެކީ ނިދަން ނިންމީވެސް އަޔާޒްގެ ކޮޓަރީގެ އަރާމު އެނދުގައެވެ. އަޔާޒް އޭނަގެ ބޮލުގައާއި މޫނުގައި ފިރުމަމުން ދަނިކޮށް އެ އިޙްސާސްތަކުގެ ތެރެއަށް ގެނބިގެން ދިޔަދިޔަހެން މަލާކަށް ނިދުނެވެ. އެހެނަސް ގަޑިއިރެއްހާއިރު ފަހުން އަޔާޒްވެސް ނިދުނު ފަހުން މަލާކްގެ ނިންޖަށް އުދަގޫވެގެން ދިޔައީ އޮފީހުގެ އެކިއެކި ކަންތައް އޭނަގެ ސިކުނޑިއަށް ވެރިވާން ފެށުމުންނެވެ. މާނާގެ ކޮންމެވެސް ނުބައި ޚަބަރަކަށްފަހު އޭނަގެ ނުނިމޭ ޕޯސްޓަރެއް ތަކުރާރުކޮށް ހަނދާންވަމުން ދިޔަދިޔަހެން އޭނަގެ ނޭވާވެސް ކުރުވާން ފެށިހެން މަލާކަށް ހީވިއެވެ. އެންމެފަހުން ލޯ ހުޅުވާލަމުން ތެދުވެލެވުނީ އޭނައަށް ނޭވާ ނުލެވިދާނެހެން ހީވުމުންނެވެ. މަލާކް ތެދުވުމާއެކު އެކަން އެނގުންވި އަޔާޒަށް ވެސް ލޯ ހުޅުވާލަމުން ތެދުވެލެވުނެވެ.
“ކިހިނެއްވީ މަލާކް؟” މަލާކްގެ ދެކޮނޑުގައި ހިފައި އޭނައާއި ވީ ފަރާތަށް އަނބުރާލަމުން އަޔާޒަށް އަހާލެވުނެވެ.
“ން…ނޭވާ ނު…ލެވޭ…” މަލާކް ކުރުވެފައިވާ ނޭވާއަކާއެކީ ބުނެލިއެވެ. މަލާކްގެ އެ ބަސްތައް އިވުމާއެކު އަޔާޒް ކޮޓަރީގެ ބޮކިތައް ދިއްލާލަމުން އިތުރު ސުވާލެއްވެސް ކުރުމެއްނެތި މަލާކް ނެބިއުލައިޒްކުރަން އަވަސްވިއެވެ. މަލާކް ނޭވާލާން މަސައްކަތް ކުރަމުން ނެބިއުލައިޒް ކުރަމުން ދިޔަ ވަގުތު އަޔާޒަށް ވިސްނުމެއްގައި އިނދެވުނެވެ. މި ހުރިހާއިރު އޭނައަށް ހީވެފައިވީ މަލާކަށް މި ވަމުންދާހާކަމެއް ވަނީ އޭނަ ހާސްވެފައިވުމުގެ ސަބަބުން ކަމަށެވެ. އެހެނަސް އޭނަ މަލާކް ކައިރިއަށް އައި ވަގުތު މަލާކްގެ ހާސްކަން ގެއްލި ދިޔަކަން އޭނައަށް ޔަޤީނެވެ. އަދި މަލާކަކީ ޙާލަތު ރަނގަޅުވުމުގެ ކިރިޔާވެސް ޢިޝާރާތެއް ލިބިއްޖެނަމަ އެ ޢިޝާރާތުގައި ހިފައިގެން އޭނަގެ އިޙްސާސްތައް ހަމައަކަށް އަޅުވާ ކުއްޖެކެވެ. ވީއިރު މިހާތަނަށް އައިއިރު ވެސް މަލާކްގެ ފަރާތުން މި ޢަލާމާތްތައް ފެންނަމުން ދަނީ ކީއްވެތޯ އަޔާޒަށް ހިތާހިތުން ސުވާލުކޮށްލެވުނެވެ. މަލާކަށް ނޭދެވޭ އެއްޗެއް ދެވިފައިވަނީތޯ ހިތް ބުންޏެއްކަމަކު މަލާކްގެ އޮފީހުގައި އެހެން ހަދާފާނެ މީހަކަށް ހުރެދާނެ މީހަކު ނުވިސްނުމުން އަޔާޒަށް އެ ޝައްކާއި ދުރުވެވުނެވެ. އެހެނަސް ދެންވެސް އޭނަގެ ހިތަށް ހަމަޖެހުމެއް ނުލިބުމުގެ ސަބަބުން ދެވަނަ ފަހަރަށް މަލާކަށް ނިދުނުއިރު ވެސް އޭނައަށް ނިދޭ ގޮތެއްނުވިއެވެ. ފިކުރުތަކެއްގައި އޮތުމަށްފަހު އޭނައަށް ނިދުނީ މަލާކް ނިދިތާ ދޮޅު ގަޑިއިރެއްހާއިރު ފަހުން މަލާކްގެ ޙާލަތު ރަނގަޅުތޯ ޔަޤީންކޮށްފައެވެ.
ނުނިމޭ
