ނަފްސީ (އަށުތިރީސްވަނަ ބައި)
މެންދުރު ވަގުތު ސްވިމިންގް ޕޫލެއްގެ ކައިރީގައި ބެހެއްޓިފައިވި ޕޫލް ލައުންޖް ގޮނޑީގައި އޮތް ޒިވްގެ ލޮލުގައި އަވި އައިނެއް އެޅިފައިވިއެވެ. ކުރު އިސްތަށިގަނޑާއި ލައިގެން ހުރި އަތްކުރު ޓީޝާޓާއި ކުރު ޖިންސް ސޯޓު ތެމިފައިވީ ގޮތުން ޒިވް އޮތީ ފަތައި ނިމިގެންކަން އެނގެއެވެ.
ނުހަނު އަރާމުކޮށް ނިދިފައި އޮތްވާ ޒިވްގެ އެ ނިދި ޚަރާބުވެގެން ދިޔައީ، ގޮނޑި މަތީގައި އޮތް ފޯނު ރިންގުވާން ފެށުމުންނެވެ. ފަހުގެ އިނގިރޭސި ލަވައެއް ރިންގްޓޯނެއްގެ ގޮތުގައި އިވެން ފެށުމުން ޒިވް ސިހިފައި ހޭލެވުނެވެ. އޭގެ ދެވަނަ ސިކުންތުގައި ފޯނު ނަގައި ބަލާލަމުން ޗޮކެއް ކަނޑާލިއެވެ. ސްކްރީނުން ފެނުނީ ޑައިރެކްޓާރ ލަތީފް ގެ ނަމެވެ.
ޒިވް ކޮންމެހެން ޑައިރެކްޓާރ ލަތީފަށް ރުޅިއެއް ނާދެއެވެ. އެހެނަސް އެވަގުތު ފޯނު ނަގާ ހިތް ނުވި އެތައް ސަބަބުތަކެއް ވިއެވެ. ފުރަތަމަ ކަމަކީ މިއީ އޭނަގެ ޗުއްޓީ ދުވަސްތަކަށް ވުމުންނެވެ. ޗުއްޓީގައި އުޅޭއިރު އެއްކޮށް މަސައްކަތް ކުރާ އެއްވެސް މީހަކަށް އޭނަ ގުޅާ ހިތެއް ނުވެއެވެ. އަދި އަމުދުން މިފަހުން އައިސް ޑައިރެކްޓާރ ލަތީފް އޭނަ ލައްވާ ކުރުވަން އުޅޭ ކަމެއްގެ ސަބަބުން އޭނަ ވަނީ ފޫހިވެފައެވެ.
މީގެ ދެ މަސް ކުރިން ޒިވް ދާނިޝްގެ ގާތަށް އޯސިސް ވެލްނެސް ސެންޓާރ އަށް ދިޔައީ ޑައިރެކްޓާރ ލަތީފް އެދިގެންނެވެ. ޒިވް މެދުވެރިވެގެން ވިޔަސް ދާނިޝް ފިލްމީ ދާއިރާއަށް އަނބުރާ ގެންނަން ޑައިރެކްޓާރ ލަތީފް ބޭނުންވެއެވެ. ދާނިޝް އެމީހުންގެ ފިލްމާއި ވަކިވި ފަހުން ފިލްމަށް ލިބެމުން ދިޔަ މަޤްބޫލުކަން ބޮޑުތަނުން ގެއްލުނެވެ. އޭގެ ސަބަބުން ލަތީފަށް ގެއްލުންތަކެއްވިއެވެ. ލަތީފްގެ އުއްމީދަކަށްވީ ޒިވް ދާނިޝްގެ ގާތަށް ދިޔުމުން ދާނިޝް އަނބުރާ އައިސް ލަތީފްމެންގެ ޓީމާއި ގުޅުމެވެ. ޚުދު ޒިވްގެ ވެސް އުއްމީދަކަށްވީ އެގޮތަށް ކަންތައްވެ، އަނެއްކާވެސް އޭނައާއި ދާނިޝް ގުޅިގެން ދިޔުމެވެ. ކޮންމެހެން ދާނިޝް ދެކެ ލޯބިވާތީވެއެއް ނޫނެވެ. ދާނިޝްގެ ފަރާތުން ޒިވް ބޭނުންވީ އެންމެ ކަމެކެވެ. ހިތް ފުރޭވަރަށް އެކަން ޙާޞިލު ވަނިކޮށް އޭނައަށް ނިމުނީއެވެ.
އެހެނަސް ވޭތުވެ ދިޔަ ދެ މަސް ދުވަހު އޭ ދާނިޝް އާއި ގާތްވާން އުޅެއުޅެ އެކަން ކާމިޔާބު ނުވުމުން ޒިވް ދާނިޝްއަށް ވެސް ނުރުހުންވާ ގޮތްވިއެވެ. އެންމެ ފަހުން ދާނިޝްއަށް ގުޅުމުން ދާނިޝް އޭނައަށް ގުޅާނެ ވާހަކަ ބުނުމުން އޭނަ އެތައް ގަޑިއިރު ވަންދެން ދާނިޝްއަށް އިންތިޒާރު ކުރިއެވެ. އެރެއަށްޓަކައި އިތުރަށް ތައްޔާރު ވެސްވިއެވެ. އެހެނަސް އިންތިޒާރު ދިގުލައިގެން ދާން ފެށުމުން ދާނިޝްއަށް ގުޅާލެވުނެވެ. ދާނިޝް އޭނަގެ އާ ނަންބަރު ވެސް ބްލޮކް ކޮށްފައިވިކަން އެނގުންވުމުން ޒިވް އައީ އަމަށަކު ރުޅިއެއް ނޫނެވެ. ހިނދުކޮޅަކަށް އަމިއްލަ ރީތިކަމާއިމެދު ވެސް ސުވާލު އުފެދުނެވެ. ދާނިޝް ފަދަ ރީތި ފިރިހެނަކު އޭނައަށް ތަކުރާރުކޮށް މި ފަސްދެނީ އޭނަ ހުތުރުވުމުން ތޯ ހިތަށްއެރިއެވެ. އަމިއްލަ ނަފްސަށް ކުރާ އިތުބާރަށް ވެސް އަސަރު ކުރިއެވެ. އަމިއްލަ އަގު ޒިވް ވަޒަން ކުރަނީ ލިބޭ ފިރިހެނުންގެ ސަމާލުކަމުން ކަމަށްވުމުންނެވެ.
އެހެނަސް ޒިވްގެ އެ ނައްސި ޚިޔާލުތައް މާ ގިނަ ދުވަހަށް ދިގުދެމިގެނެއް ނުދެއެވެ. ވަގުތުން އަމިއްލަ ނަފްސު ދިފާޢު ކުރުމަށްޓަކައި ދާނިޝް ދަށްކޮށްލެވުނެވެ. ހިތާހިތުން ދާނިޝް އާއި ދިމާލަށް އެތަކެއްޗެއް ގޮވުނެވެ. އެ ފަހުން ޑައިރެކްޓަރު ލަތީފް ގުޅުމުން މިއީ އޭނައަށް ވާނެ ވަރުގެ ކަމެއް ނޫންކަމަށް އޭނަ ސާފުކޮށް ބުނެފައިވެއެވެ. ކޮންމެހެން އޭނައަށް ފަސްދޭ ފިރިހެނެއްގެ ފަހަތުން އޭނަ ވެސް ދާކަށް ބޭނުމެއް ނޫނެވެ.
ޒިވް އެ ޚިޔާލުތަކުގައި އިނދެ ފޯނުގެ ސްކްރީނަށް ބަލަން އިންދާ އެ ފޯނު ކެނޑިގެން ދިޔައެވެ. ދެވަނަ ފަހަރަށް ލަތީފް ގުޅަން ފެށުމުން ޒިވް ގެ ޚިޔާލު ބަދަލުވިއެވެ. މިފަހުން ލަތީފް ދާނިޝްއާއި ބެހޭ ގޮތުން އޭނައާއި ވާހަކައެއް ދައްކާފައި ނުވާތީވެއެވެ. މި ގުޅަނީ އޭނައަށް ދޭނެ އާ ފިލްމެއްގެ ވާހަކަ ދައްކާށޭ ހިތަށް ކޯލު ރިސީވް ކޮށްލެވުނެވެ.
“ހެލޯ.” ޒިވް ދެންވެސް ގޮނޑިއަށް ލެނގިލަމުން ފޯނު ކަންފަތުގައި ޖެއްސިއެވެ.
“ހެލޯ….ޗުއްޓީގަ ދޯ ޒިވް؟ ކިހާ ހިސާބެއްގަ؟” ލަތީފް އެހިއެވެ.
“ރިސޯޓެއްގަ.” ޒިވް ޖަވާބު ދިނެވެ.
“ރާއްޖެއިން ބޭރަކަށް ނުދަންދޯ ނަސީބަކުން؟ ހެހެ….އަނެއްކާވެސް އާ ޑްރާމާއެއްގެ އައިޑިއާ އެބައޮތް. ފަހު ދުވަސްގެ ސީކުއަލް. އޭގަ ހަމަ ޒިވް ކާސްޓް ކުރަން ބޭނުންވަނީ. ޒިވް އާއެކީ…ޑޭން ކާސްޓް ކުރެވިއްޖެއްޔާ ވަރަށް ސަޅި-“
“ނޮޓް ދިސް އަގެއިން ލަތީފް! އަހަރެން ލައްވާ އަނެއްކާ ތިކަން ކުރުވަން ނޫޅޭ. އައި ޓޯލްޑް ޔޫ ހީ އިޒް ގޭއި! އަ @*%!” ޒިވް އައި ރުޅީގައި އަވަގުރާނަ ގޮވިއެވެ.
“ތިބުނީ…ފިލްމު ކުޅެން ވެސް ބޭނުމެއް ނުވެއޭތަ؟” ލަތީފް އެހިއެވެ. އެއާއިއެކު ޒިވްގެ ނިތުން ރޫފިލައި އަނގަ ލައްޕާލެވުނެވެ. ލަތީފް ގެ ފިލްމަކަށް އޭނައަށް ނޫނެކޭ ނުބުނެވޭނެއެވެ. ލަތީފަކީ މުޅި ރާއްޖެއިން ވެސް އެންމެ މަޝްހޫރު ޕްރޮޑިއުސަރެވެ.
“ނޫނޭ ފިލްމު ކުޅެދީފާނަން. އެކަމަކު އެ ގޭއި ފިރިހެނާ ގެންނާކަށް އަހަންނަށް މަސައްކަތެއް ނުކުރެވޭނެ.” ޒިވް ބުންޏެވެ.
“ވެލް ޓޫ ބޭޑް. އިތުރު ފިލްމެއް އުފައްދަން އެފޯޑް ކުރެވެން އޮތީ ޑޭން ކަމްބެކްއެއް ޖެހީމަ. އޭރުން ލިބުނު ގެއްލުމުން އަރައިގަނެވޭނީ. ނޯ ޑޭން މީންސް ނޯ މޫވީ ފޯ ޔޫ. އެބަ ވިސްނޭ މި ބުނާ އެއްޗެއް؟” ލަތީފް ބުންޏެވެ.
އެއާއިއެކު އަނެއްކާވެސް ޒިވްގެ ނިތަށް ރޫ ގިނަވިއެވެ. ލަތީފް މި މާނަ ކުރަނީ އޭނައަށް ދާނިޝް އަނބުރާ ފިލްމު ކުޅެން ނުގެނެވޭނެ ނަމަ އޭނައަށް ލަތީފްގެ ފިލްމެއް ނުކުޅެވޭނެއޭ ހެއްޔެވެ؟ އެކަން އެނގުންވުމުން ޒިވްގެ ދަތްކުނޑި ވިކުނެވެ. ވަގުތުން ލަތީފާއި ދިމާލަށް ހަޅޭއްލަވައިގަނެވެން އުޅުނެވެ. އެހެނަސް އަނގަ ހުޅުވާފައި ލައްޕާލެވުނީ، ލަތީފަކީ ފިލްމީ ދާއިރާގެ ކިހާ މަޝްހޫރު ޑައިރެކްޓަރެއްކަން ހަނދާންވުމުންނެވެ. ފިލްމީ ދާއިރާއިން ކުރިއަށް ދާން ބޭނުންނަމަ، ލަތީފާއި ވަކިވެވޭކަށް ނެތެވެ.
ޒިވް ވަކި އެއްޗެކޭ ނުބުނެ އޮތްވާ ލަތީފް އަނެއްކާވެސް ވާހަކަ ދެއްކިއެވެ.
“ޓްރަސްޓް މީ ޒިވް. ޑޭން އަހަރުމެންގެ ގާތަށް ގެނައުން އުދަގޫ ކަމަކަށް ނުވާނެ. މި ހުރިހާ ދުވަހު ހުސް އެއްގޮތަކަށް މަސައްކަތް ކުރާތީ އެކަން ނުވީ. ދާނިޝް ގެ ޙަޤީޤީ ބަލި ފައި އަހަންނަށް އެބަ އެނގޭ މިހާރު. އަޑު އަހަން ބޭނުން؟” ލަތީފް ބުންޏެވެ.
“ބުނޭ.” ޒިވް އެހެން ބުނެލީ، ނުހަނު އެނގެން ބޭނުންވާ ޙާލުގައެވެ.
**
ދާނިޝްއާއި ދެކޮޅަށް ރޭވުމެއް ރޭވެމުން ދާ ކަމުގެ ހިލަމެއް ވެސް ނުވެ، ދާނިޝް އުޅެމުން ދިޔައީ ނުހަނު އުފާވެރި ދިރިއުޅުމެކެވެ. އޭނައަށް ލިބެމުން ދިޔަ އާ އެކުވެރިންނާއި އެކީގައެވެ. އާނއެކެވެ. ވޭތުވެގެން ދިޔަ ދުވަސްތަކާއި އެކީ ފަޔާޒްގެ އިތުރުން އެހެނިހެން ޞާލިޙު އެކުވެރިން ވެސް ދާނިޝްއަށް ލިބުނެވެ. އޭގެ ތެރޭގައި ފަޔާޒް އޭނައަށް ތަޢާރަފު ކޮށްދިން 2 އެކުވެރިންނާއި މިސްކިތުން ދިމާވި އެހެން އެކުވެރިޔަކު ވެސް ހިމެނެއެވެ.
އެ އެކުވެރިންނާއި އެކީ ވަގުތު ހޭދަ ކުރާ ކޮންމެ ފަހަރަކު ދާނިޝްއަށް ބަޔާން ކުރަން ދަތި ހިތްހަމަޖެހުމެއް ލިބެއެވެ. މިއީ ޙަޔާތުގައި ވެސް އޭނައަށް ހެޔޮ ކަންތައް ކުރުމަށް ހިތްވަރު ދޭ އެކުވެރިން ލިބުނު ފުރަތަމަ ފަހަރެވެ. އެކަން އެނގުންވާ ކޮންމެ ފަހަރަކު ހަނދާންވަނީ އޭނަ އެރޭ މިސްކިތުގައި އެކަނި އިނދެ ކުރި ދުޢާއެވެ. ޞާލިޙު އެކުވެރިއެއް ދެއްވުމަށް އެދި ކުރި ދުޢާއެވެ. އަދި ހަމަ އެހެންމެ މަންމަގެ ފޮތުން ފެނުނު ﷲ ގެ ވަޢުދު ފުޅެވެ. އީމާންވެ ޞާލިޙު ޢަމަލު ކުރާ މީހުން ޞާލިޙުންގެ ތެރެއަށް ވައްދަވާނެކަމަށް އޮތް އާޔަތެވެ.
ބައެއްފަހަރު އެ އެކުވެރިންގެ ތެރޭގައި އިނދެ މި ހުރިހާ ކަމެއް ހިތަށް ގެނެވިފައި ދާނިޝް ގެ ލޮލުން ކަރުނަ ހިލެއެވެ. ﷲ އަކީ ހަމަ ޔަޤީނުން ވެސް ދުޢާ އިޖާބަ ކުރައްވާ ރަސްކަލާނގެކަން އިޙްސާސް ކުރެވުމުންނެވެ. އަދި ހަމަ ޙަޤީޤަތުގައި ވެސް ﷲ އެކަލާނގެ ވަޢުދުފުޅާއި ޚިލާފުވެވޮޑިގެން ނުވާކަން ޔަޤީން ކުރެވުމުންނެވެ.
“އެއްކަލަ އެއްކަލަ ދޮންކަލޯ އެބަ އިނޭ ގެއްލިފަ ކަމަށް ހެދިގެން.”
އެއްދުވަހު ހަވީރު ޢަޞްރު ނަމާދަށްފަހު ހުރިހާ އެކުވެރިން ރޫފްޓޮޕް ކެފޭ އެއްގައި ތިއްބާ ދާނިޝްގެ ކުރިމަތީގައި އިން ނަޖާހު ދާނިޝްގެ މޫނާއި ދިމާލުން އަތް ހޫރާލިއެވެ. އެއާއިއެކު ދާނިޝްއަށް ހަމަހޭވެރިކަމެއް ވިއެވެ.
“ކީކޭ؟” ދާނިޝްއަށް އަހާލެވުނެވެ. އެމީހުން ސުވާލެއްކޮށް އޭނަގެ ޖަވާބެއްގެ އިންތިޒާރުގައި ތިބިހެން ހީވުމުންނެވެ. ދާނިޝް އެހެން އަހާލުމާއިއެކު ނަޖާހު މޫނުގައި އަތް އެޅި ހިނދު ދެން ތިބި މީހުން ހޭންފެށިއެވެ. އެމީހުން ހޭން ފެށިގޮތް މަޖާވުމުން ދާނިޝްއަށް ވެސް ހީލަމުން ކިހިނެއްވީތޯ އަހާލެވުނެވެ.
“އަހަރުމެން އެންމެންނަށް ފާހަގަވީ ދާނިޝް ގެއްލިފަ އިންކަން. ނަޖާ ބުނީ ގެއްލިފަ އިނަސް ދާނިޝް އިންނާނީ އަޑު އަހައިގެންނޭ އަހަރުމެން ދެއްކި ވާހަކަ. ދެން ނަޖާ އެއްޗެކޭ އެއްޗެކޭ އަހާފަ ޖަވާބެއް ނުދިނީމަ އެ ހޭލެއްވީ. ހޭލެއްވީމަ މި އެނގުނީ އަޑު ނާހާކަން ތިއިނީ.” ފަޔާޒް ހުނުން ކޮންޓްރޯލް ކުރަމުން ކިޔައިދިނެވެ.
“އޮހް…ކީކޭ ނަޖާ އެހީ؟” ދާނިޝްއަށް ދެންވެސް ހެވިފައި އިނދެ އަހާލެވުނެވެ.
“މިއަދު ވެސް ޓޭކްއަވޭ ހޭ ހަދާނީ ދާނިޝްއަށް.” ނަޖާހު އެހިއެވެ.
“އާނ….ތަންކޮޅެއް މީހުން ގިނަ ދޯ އެހެންވީމަ މާސްކް ނެގޭކަށް ނެތް.” ދާނިޝް ބުންޏެވެ.
“އަހަރުމެންގެ ދާނިޝްގެ ޙާލު ދެރަ މޫނު ބުރުގާ އަޅާ ކުދިންނަށްވުރެ. ދެން ތި މާސްކް ނަގާލާކަށް ނުވޭތަ ހަމަ؟” މޭޒުގެ ކޮޅުގައި އިން ޔައިޝް އެހިއެވެ. މިހާ ތަނަށް އައިއިރު އެ ހުރިހާ އެކުވެރިންނަށް ވެސް ދާނިޝްއަކީ ކާކު ކަމާއި ދާނިޝް މާސްކް އަޅައިގެން އުޅެނީ ކީއްވެކަން އެނގިފައިވެއެވެ. އެހެނަސް ދާނިޝްގެ އިޙްސާސްތަކަށް އިޙްތިރާމްކޮށް އެކަކު ވެސް ދާނިޝްގެ ސިއްރު ބޭރު ތެރެއަށް ފާޅުކޮށްފައި ނުވެއެވެ.
“ޔާ…..އަސްލު ބޭނުމެއް ނޫން އަނެއްކާވެސް އެ ޕަޕަރާޒީ ލައިފަށް އަނބުރާ ދާކަށް. ޔޫ ޑޯންޓް ނޯ އެމީހުން އަހަރެން ސްޓޯކް ކޮށްފަ ސޯޝަލް މީޑިއާއަށް ޕޯސްޓް ކުރާވަރު. މީހުންގެ ސެންޓާރ އޮފް އެޓެންޝަންއަށް ދާކަށް ބޭނުމެއް ނޫން. މާޒީގެ ޙަޔާތުގެ ހުރިހާ ކަމަކާ ދުރަށް ދާން ބޭނުންވަނީ. އައި ހޭޓް ދެޓް ލައިފް!” ދާނިޝް ވާހަކަ ފެށީ ނުހަނު އާދައިގެ ގޮތަކަށް ކަމަށް ވިޔަސް އެ ފަހު ޖުމްލަ ބުނެލީ ސާފު ނަފްރަތާއި އެކީގައެވެ.
މި ފަހުން އައިސް އެ މާޒީ މަތިން ހަނދާންވުމުން ވެސް ދާނިޝް އަންނަނީ ރުޅިއެވެ. ރުޅި އަންނަނީ އަމިއްލަ ނަފްސަށެވެ. އޭރު އުޅެވުނު ގޮތް ހަނދާންވުމުންނެވެ. އޭރު ކައިރި ކޮށްގެން އުޅުނު އެކުވެރިން އޭނަ ދީނާއި ދުރު ކުރުވި ގޮތެވެ. އެ ޙަޔާތުގައި އޭނަ ޤުރުއާނާއި ދުރުވެ މިއުޒިކާއި ގާތްވެފައިވި ގޮތެވެ. ނަމާދަށް ފޫހިވެފައިވި ގޮތެވެ. ލަދުކުޑަ އަންހެން ކުދިންނާއި ގާތުން އުޅުނުއިރު ބެލުން ތިރި ނުކުރި ގޮތެވެ. މި ހުރިހާ ކަމެއްގެ ސަބަބުން އޭނަގެ މަންމަ ކުރި ހިތާމަތަކެވެ.
އޭރު ދާނިޝް އެގޮތަށް އުޅުނީ އެ ދިރިއުޅުން އޭނަގެ ނަޒަރުގައި ޒީނަތްތެރިވެފައިވާތީވެއެވެ. އެހެނަސް މިހާރު އޭނައަށް ދިރިއުޅުމުގެ ޙަޤީޤީ ޒީނަތްތެރިކަން ފެނިއްޖެއެވެ. ދުނިޔޭގެ ޙަޔާތުގެ ޙަޤީޤީ ޒީނަތްތެރިކަމަކީ ﷲ ގެ ހިދާޔަތެވެ. އެކަލާނގެ ގެ ޒިކުރެވެ. އެކަލާނގެ ބާވައިލެއްވި އެކަލާނގެ ގެ ކަލާމްފުޅު ކަމުގައިވާ ޤުރުއާނެވެ. އެކަލާނގެ ފޮނުއްވި ރަސޫލާ ﷺ ސުންނަތެވެ. މި ކަންތައް މަރާއި ޖެހެންދެން ވެސް، އަދި އެއަށްފަހު ވެސް އިންސާނާއަށް ވާގިވެރިވުމުގައި ދެމި ހުންނާނެވެ. ދުނިޔޭގެ އެހެން ހުރިހާ ލައްޒަތަކީ ވަގުތީ އެއްޗެކެވެ. ދާނިޝްއަށް ނަފްރަތު ކުރެވެނީ އެހާ ގިނަ ދުވަސްވަންދެން އޭނައަށް އެ ވަގުތީ ކަންތަކުގައި ދިރިއުޅުން ބޭކާރު ކޮށްލެވުނީތީވެއެވެ. މާސްކް ނަގާލަން ބޭނުން ނުވާ އެއް ސަބަބަކީ އެ ޙަޔާތުގެ ހިޔަންޏެއް ވެސް އޭނަގެ މި އާ ޙަޔާތަށް އަޅުވަން ބޭނުމެއް ނުވީތީވެއެވެ.
“އަހަންނަށް ވިސްނޭ އެއްޗެއް ބުނަންތަ ދާނިޝް؟” އެކުވެރިންގެ މެދަށް ހިމޭންކަމުގެ ވަގުތުކޮޅަކަށްފަހު ވާހަކަ ދެއްކީ ފަޔާޒެވެ. އެއާއިއެކު އެންމެންގެ ސަމާލުކަން ފަޔާޒަށް ހުއްޓުނެވެ.
“ވަޓް؟” ދާނިޝްއަށް އަހާލެވުނެވެ.
“އަހަންނަށް ފެންނަނީ ދާނިޝް މާސްކް ނަގާލާފަ ހަމަ އޮޕެންލީ އުޅެން. އޭރުން ޕަޕަރާޒީ ފޮޓޯ ނަގާފަ ޕޯސްޓް ކުރީމަ ދާނިޝް ރަނގަޅު ކަންތައް ކުރާ މަންޒަރުތަކެއް ނޫންތަ ޕަބްލިކަށް ފެންނާނީ؟” ފަޔާޒް ބުންޏެވެ. އެއާއިއެކު ދާނިޝް ހިމޭނުން އިންދާ އެތާ ދެން ތިބި އެކުވެރިން ވެސް އެއްބަސްވިއެވެ.
“އެއީ ތެދެއް. އޭރުން ދާނިޝްގެ ފޭނުންނަށް އުޅޭ ޒުވާން ކުދިންނަށް ރަނގަޅު ކަންތައް ކުރުމަށް ހިތްވަރެއް ލިބިދާނެއެއް ނޫންތަ؟” ހަސަން އެހެން ބުނުމާއިއެކު އަނެއްކާވެސް ހުރިހާ އެކުވެރިން އެއްބަސްވުމުގެ ގޮތުން ހޫންލައްވައި ބޯޖަހަން ފެށިއެވެ.
“އެހެން ނޫނަސް ތި ޕަޕަރާޒީ މީހުން ފޮޓޯ ނަގައި އުޅޭނީ ކުޑަ ދުވަސްކޮޅަކަށް. ދާނިޝް ފިލްމީ ދާއިރާއަށް އަނބުރާ ނުދަންޏާ އެމީހުން ދުވަސްކޮޅަކުން ހުއްޓާލާނެ އިން ޝާ ﷲ.” ނަޖާހު ބުންޏެވެ.
“ތެދެއް. ދާނިޝް މަޝްހޫރުވުމަކީ ﷲ މެދުވެރި ކުރެއްވެވި ގޮތެއް. މި ފުރުސަތުގެ ބޭނުން ރަނގަޅު ގޮތުގަ ހިފުމަކީ ދާނިޝްއަށް ގިނަގުނަ ޘަވާބު ލިބިގެންދާނެ ކަމެއް އިން ޝާ ﷲ.” ޔައިޝް ވެސް އިތުރު ކުރިއެވެ.
ދާނިޝް އެ ހުރިހާ ވާހަކައެއް އަޑުއަހަން ހިމޭނުން ވިސްނުމެއްގައި އިނދެފައި ވާހަކަ ދެއްކިއެވެ.
“ވިސްނާނަން ތިކަމާ.” އެއްދިމާލަކަށް ނަޒަރު ހުއްޓައިގެން އިނދެ ދާނިޝް ބުންޏެވެ.
“ޑޫ އިސްތިޚާރާ ބްރޯ. އިސްތިޚާރާ ގެ ޑީޓެއިލްސް އާ ވޭނާ ހޫނުގެ ވާހަކަ ޔައިޝް ކައިރިން އަހާ.” ފަޔާޒް އެހެން ބުނުމާއިއެކު އަނެއްކާވެސް ހުރިހާ އެކުވެރިން އެކުއެކީގައި ހީލިއެވެ. ޔައިޝް މިހާރު ކައިވެނި ކޮށްގެން އުޅޭ ކުއްޖާގެ ކުރިން އެހެން ކުއްޖަކާއި އިންނަން އުޅުނެވެ. ކުރިން އެ ދިމާވި ކުއްޖާއާއި އިންނަން އުޅެއުޅެ އިސްތިޚާރާގެ ސަބަބުން ކުރިމަތިވި އެތައް ކަމެއްގެ ވާހަކަ ޔައިޝް ނުހަނު އަސަރާއެކީ އަބަދުވެސް ކިޔައިދެއެވެ. އަދި އެ ކުއްޖާއާއި ކައިވެނި ނުކުރެވުނީތީ މިއަދު ޝުކުރުވެރިވާ ވާހަކައާއި، އެންމެ ފަހުން ކައިވެނި ކުރެވުނު ކުއްޖާގެ ރަނގަޅު ކަމުގެ ވާހަކަ އަބަދުވެސް ދައްކައެވެ. އިސްތިޚާރާއާއި ގުޅިގެން އަބަދުވެސް ޔައިޝްގެ ނަން ގަނެވެނީ އެހެންވެއެވެ.
**
ދާނިޝް ގެ ހިތް އުފާވެރިކަމާއި އުއްމީދުން ފުރެމުން ދިޔައިރު، ހިލްޔާގެ ހިތް ފުރެމުން ދިޔައީ ދަތި ކުރުވަނިވި އިޙްސާސްތަކަކުންނެވެ. ވާނީވެސް އެހެންތާއެވެ. ދާނިޝް ރަނގަޅު މަގު ޚިޔާރުކޮށް، ޞާލިޙު އެކުވެރިން ޚިޔާރު ކުރަމުން ދިޔައިރު، ހިލްޔާ ދިޔައީ ހެޔޮ މަގުން އެއްކިބާވެ، ލިބިފައިވާ ޞާލިޙު އެކުވެރިންނާއި ދުރުވަމުންނެވެ. ހިލްޔާއަށް ދޭތެރެ ދޭތެރެއިން އެ އެކުވެރިންނާއެކީ ހަދާފައިވާ ވައިބާރ ގްރޫޕަށް ބަލާލެވެއެވެ. މަތިމަތިން ބެލި ބެލުމުން އުސްތާޒާ އަސްމާގެ ފޮތްތަކުގައިވާ ފިލާވަޅުތައް އެހެން މީހުންނަށް ފޯރު ކޮށްދިނުމަށް އެމީހުން ރޭވުމެއް ރާވަނީއެވެ. ހިލްޔާ އެ މެސެޖުތައް ބަލަނީ އެ އެކުވެރިންނާއިމެދު ދަށްކޮށް ދެކޭ ޙާލުގައެވެ. އެމީހުން އެކުރަނީ އެހާ ބޭނުންތެރިކަމެއް ނޫންހެން ހީވާ ޙާލުގައެވެ. ހިލްޔާގެ ނަޒަރުގައި މިހާރު ބޭނުންތެރި ކަންކަމަކީ ދުނިޔޭގެ ކާމިޔާބު ލިބޭނެ ކަންކަން ކަމަށްވިއްޔާއެވެ.
އެހެނަސް އެ ވިސްނުމުން ހިލްޔާއަށް ލިބެމުން ދިޔައީ ހިތްހަމަނުޖެހުމެވެ. އަދި ބަލިކަށިކަމެވެ. ރާފިލްއާއި އެކީ އެއް އެމަޖެންސީ ރޫމުގައި މަސައްކަތް ކުރި ރެއަށްފަހު ހިލްޔާގެ ހިތް ރާފިލްއަށްޓަކައި މުޅިން ސާފެއް ނުވެއެވެ. ހިލްޔާ އެރެއިން އެ ރެއަށްވެސް ރާފިލްއަށް ރައްދު ދޭން ބޭނުންވިއެވެ. ފައިސާ ބޭނުން ވިޔަސް ބަލި މީހަކަށް އަނިޔާއެއް ދޭން ނުވާނެއޭ ބުނަން ބޭނުންވިއެވެ. އެހެނަސް ހިލްޔާ ދެންވެސް ނޭނގޭ ޖެހިލުންވުމެއް ހިލްޔާގެ ހިތުގައި އޮތެވެ.
އެއްގޮތަކަށް ވެސް ރާފިލް ނުރުހުން ކުރުވާކަށް ހިލްޔާގެ ހިތް ނޭދެއެވެ. ރާފިލް ކަހަލަ އެހެން މީހަކު ބައިވެރިއެއްގެ ގޮތުގައި އޭނައަށް ނުލިބޭނެކަމަށް ސިކުނޑި ބުނަމުން ދިޔައީތީވެއެވެ. ރާފިލް ހާ މުއްސަނދި މީހަކު ފެންނާނީ ވެސް ދެން ކިހިނެއްހޭ ބުނެ ހިލްޔާގެ ހިތް ކަންބޮޑުވުން ފާޅުކުރެއެވެ. ރާފިލްއާއި ދެކޮޅުވެރި ވެވެން ނެތީ އެހެންވެއެވެ. ހިލްޔާ ކޮންމެހެން ވެސް ރާފިލްއާއި ގުޅުމުގެ ފަޚުރުވެރިކަން ހޯދަން ބޭނުންވެފައިވިއެވެ.
އުޑުތަކާއި ބިމުގައިވާހާ ޚަޒާނާއެއް މިލްކުވެވޮޑިގެންވަނީ ﷲ އަށްކަން ހިލްޔާއަށް އެނގޭނެ ނަމައެވެ. ޢިއްޒަތްވަނީ ﷲ އަށާއި އެކަލާނގެ ރަސޫލާއަށާއި މުއުމިނުންނަށްކަން ހިލްޔާއަށް އެނގޭނެނަމަ އެވެ. އެހެންނޫނީ މިއީ އުނގެނިފައި ވިޔަސް ހިލްޔާ ހަނދާން ނެތިފައިވާ ޤުރުއާނުގެ ފިލާވަޅުތަކެވެ.
ކޮންމެ ގޮތެއްވިޔަސް ރާފިލްއާއި އެކީ މަސައްކަތް ކުރަމުން ދިޔަދިޔަހެން، ރާފިލް ހޮސްޕިޓަލް ތެރެއިން ހަދަމުން ދިޔަ ގިނަ ގޯސްތައް ހިލްޔާއަށް ފެންނަން ފެށިއެވެ. އެންމެ ފަހުން ހިލްޔާއަށް އެއްޗެކޭ ނުބުނެ ނުހުރެވުނީ، ރާފިލް ދިން ބޭހެއްގެ ސަބަބުން ބަލި މީހެއްގެ ޙާލަތު ގޯސްވެ، އައިސީޔޫއަށް ލާންޖެހުމުންނެވެ. ބޭރުފުށުން ބަލާ މީހުންނަށް އެއީ ރާފިލްގެ ސަބަބުން ވީ ކަމެއްކަން ނޭނގުނަސް ހިލްޔާއަށް ސާފުކޮށް އެނގުނެވެ.
“ރާފިލް އައިމް ސޮރީ ޓު ސޭއި ދިސް ބަޓް ޔޫ ނީޑް ޓު ސްޓޮޕް!” އެރޭ ގެއަށް ދިޔަ މަގުމަތީގައި ކާރު ތެރެއިން ހިމޭނުން އިނދެފައި ހިލްޔާއަށް ބުނެވުނެވެ.
“ސްޓޮޕް ވަޓް؟” ރާފިލް އެހިއެވެ. ހިލްޔާ ރާފިލްއަށް ބެލިއެވެ.
“ސްޓްރޯންގް މެޑްސްތައް ދިނުން. ބަލިމީހުންނާ ނުގުޅޭ ބޭސްތައް ދިނުން. ފޯ ގޯޑްސް ސޭކް ސްޓޮޕް! އެހެންކަމެއް ނުވިޔަސް ވީ ޝުޑް ފީލް ސިމްޕަތީ ޕޭޝަންޓްސްއަށް. އެންޑް އައި ޑޯންޓް އެގްރީ. ނުބައި ބޭސްތައް ދީގެން އަހަރުމެން ރިޗްއެއް ނުވާނެ. ޕޭޝަންޓްސް ގެ ޓްރަސްޓް ޑޮކްޓާރސް އަށް ލިބުނީމަ ޑޮކްޓާރސް ކާމިޔާބުވާނީ.”
ހިލްޔާ ބުންޏެވެ. އެހިނދު ހިތް ބާރަށް ތެޅެމުން ދިޔައެވެ. ފުރަތަމަ ފަހަރަށް ރާފިލް ނުރުހޭނެ ކަހަލަ ވާހަކައެއް ދެކެވުމުންނެވެ. ފުރަތަމަ ފަހަރަށް ރާފިލްއާއި ދެބަސްވެވުމުން ރާފިލް އެއާއިމެދު ދެކޭނެ ގޮތެއް އަންދާޒާ ނުކުރެވުނީތީވެއެވެ.
ހިލްޔާއަށް ޤަރުނެއްހެން ހީވި ހިމޭންކަމުގެ ވަގުތުކޮޅަކަށްފަހު ރާފިލް ވާހަކަ ދެއްކިއެވެ.
“ސޯ ޔޫ ތިންކް އައި އޭމް އަ ބޭޑް ޕާރސަން؟” ރާފިލް އެހިއެވެ. އެހިނދު އެ ރާގުން ހިލްޔާއަށް އިޙްސާސް ކުރެވުނު ނުރައްކާތެރިކަމުން މެއަށް ފިނިވިއެވެ. ހިލްޔާއަށް ވަގުތުން އެއްޗެކޭ ބުނެވެން އުޅުނެވެ.
“ނޫން އެހެން-“
“ޔޫ ތިންކް އައިމް ދަ ވިލަން؟” ރާފިލް ދަތްކުނޑި ވިކާލަމުން އެހިއެވެ. އެކަން ހިލްޔާއަށް އެނގުންވުމުން ބިރުވެރިކަމެއް ހިތަށްވަނެވެ. އެހިނދު ރާފިލް ކާރުގެ ސްޕީޑް ބާރު ކުރިކަން އެނގި ހިލްޔާގެ ހިތް ތެޅެން ފެށީ މޭފަޅާލާފައި ނިކުމެދާނެހެން ހީވާ ވަރަށެވެ.
“އެހެން ނުބުނަން ރާފިލް. އަހަ-“
“ދެން ކީކޭ ބުނަން ތިއުޅެނީ ހިލްޔާ؟! އެނ؟ އަހަރެން މިއީ ހިލްޔާއަށް ލޯބި ނުވެވޭ ވަރުގެ ގޯސް މީހެކޭތަ؟ އޯރ…ހިލްޔާ އަހަރެން ދެކެ ލޯބި ނުވެއޭތަ؟” ރާފިލް ރޫރޫ އަޅާ ހަރު އަޑަކުން ވާހަކަ ދައްކަމުން ގޮސް ކުއްލި ގޮތަކަށް ކާރު އަނބުރާލި ހިނދު ހިލްޔާއަށް ދެލޯ މަރައި ތަގުޅި ކޮށްލަމުން ހަޅޭއްލެވުނެވެ.
ހިނދުކޮޅެއްގެ ތެރޭގައި ކާރު ކުއްލި ހުއްޓުމަކަށް އައުމުން ހިލްޔާއަށް ލަސްލަހުން ލޯ ހުޅުވާލެވުނެވެ. އަމިއްލަ ކަންފަތުގައި ދެ އަތް އަޅައިގެން އިނދެވުނުކަން ވެސް އެނގުންވީ އެވަގުތެވެ. ކުރިމަތިން ކާރު ކިރިޔާ ގޮސް ނުޖެހި ހުރި ގަހެއް ފެނިފައި ހިލްޔާއަށް ހިފަހައްޓައިގެން ހުރި ނޭވާ ދޫކޮށްލެވުނެވެ. ހަމަ އެވަގުތު ލުއި ގިސްލުމެއްގެ އަޑު އިވެން ފެށުމުން ހިލްޔާއަށް ވާތް ފަރާތަށް ނަޒަރެއް ދެވުނެވެ. އެހިނދު ޑްރައިވާރސް ސީޓުގައި އިން ރާފިލްގެ ލޮލުން ކަރުނަތައް ފައިބަމުން ދިޔައެވެ.
ހިލްޔާ އިޙްސާސް ކުރަންވީ ގޮތެއް ނޭނގިފައި ރާފިލްއަށް ބަލަން އިންދާ ރާފިލް ލަސްލަހުން ކަރުނަތައް ފޮހެލަމުން ވާހަކަ ދެއްކިއެވެ.
“އައިމް ސޮރީ ހިލްޔާ. ހިލްޔާ ވާހަކަ ދެއްކި ގޮތުން އަހަރެން ޓްރިގާރވީ. އަސްލު….އައި ހޭވް ހޭޑް އަ ޑިފިކަލްޓް ލައިފް. ވަރަށް ސްޓްރިކްޓްކޮށް މޯމްއާ ޑޭޑް އަހަރެން ގެންގުޅެފަ ހުރީ. އެހެންވީމަ ތިގޮތަށް ފޯލްޓް ހައިލައިޓް ކުރީމަ އެ ޕެއިންފުލް މެމޮރީސް އަނބުރާ އަންނަނީ. ސޯ ޕްލީޒް ހިލްޔާ. މިއަށްފަހު ތިގޮތަށް ވާހަކަ ނުދެއްކުން އެދެން. އައި ބެގް ޔޫ. އައި ޑޯންޓް ވޯންޓް ޓު ހާޓް ޔޫ. އައި ލަވް ޔޫ ސޯ މަޗް….” ރާފިލް ކަރުނައިން ފުރިފައިވި ލޮލާއިއެކީ ނުހަނު އަސަރުން ފުރިގެންވާ އަޑަކުން ބުންޏެވެ.
އެހިނދު ރާފިލް ދެއްކި ވާހަކަތަކުގެ އަވައިގައި ހިލްޔާ ވެސް ޖެހުނެވެ. އެހެންކަމުން ހިލްޔާގެ ލޮލުން ވެސް ކަރުނަ ހިލުނެވެ. މިއީ ހަމަ އޭނަގެ ރީތި ލޯބީގެ ވާހަކައޭ ހިތަށްއެރީ، މިރޭ ރާފިލްގެ ފަރާތުން ފެނުނު ގޯސްތައް ހަނދާން ނެތިފައިވާ ޙާލުގައެވެ. މިވަގުތަކީ އޭނަ ރާފިލްއަށް އެހީތެރިވެދޭންވީ ވަގުތޭ ހިތް ބުނީ، ރާފިލްއާއި އޭނަގެ ލޯބި އިތުރަށް ޒީނަތްތެރިކުރަން ބޭނުންވެފައިވި މިންވަރުންނެވެ.
“އިޓްސް އޯކޭ ރާފިލް. އައިމް ހިއާރ ފޯ ޔޫ. ދެން އެހެންނެއް ނަހަދާނަން. ކުރިން ނޭނގޭ ރާފިލްގެ ތި ޕާސްޓް އާއި މެދު. ދެން އެހެން ނަހަދާނަން. ހުއްޓާލާ ދެން. އެވްރީތިންގް ވިލް ބީ ފައިން.” ހިލްޔާ ރާފިލްއަށް ޙަމްދަރުދީވެފައިވާ ޙާލު، ކުރިމަތީގައި ހުރި ކަބަޑުގެ ތެރެއިން ޓިޝޫ ނަގައި ރާފިލްއަށް ދިއްކޮށްލިއެވެ. ރާފިލް އޭގައި ހިފަމުން ބޯޖަހާލިއެވެ.
“އައި ނޯ. ބިކޯޒް ޔޫ އާރ ދަ ލަވް އޮފް މައި ލައިފް.” ރާފިލް ލުއި ހިނިތުންވުމަކާއެކީ ބުނުމުން ހިލްޔާއަށް ވެސް ހިނިތުންވެލެވުނެވެ. އެހިނދު ޢަޒުމެއް ކަނޑައެޅުނެވެ. ރާފިލްގެ އެ މާޒީގެ ‘ހަނދާންތައް’ ފޮހެނުލެވެނީސް ރާފިލްގެ ނޭދެވޭ ސިފައެއްގެ ވާހަކަ ނުދެއްކުމަށެވެ.
ހިލްޔާއަށް ނޭނގުނު ކަމަކީ އޭނައަށް ނިންމުނު ނިންމުމުން ރާފިލްގެ މުރާދު ޙާޞިލުވީ ކަމެވެ. ރާފިލް ދެއްކި ވާހަކަތަކުގައި ކުޑަ ވެސް ޙަޤީޤަތެއް ނެތް ކަމެވެ. ބޭނުމަކަށްވެފައިވީ އޭނަގެ ނޭދެވޭ ސިފަތައް ފެނުނަސް އެއާއިމެދު ހިލްޔާއަށް އެއްޗެކޭ ނުބުނެވޭ ޙާލަތަކަށް ހިލްޔާ ގެނައުމެވެ. ހިލްޔާގެ މޫނުމަތިން ފެނުނު އަސަރުން ވެސް އޭނަ އެކަމުގައި ކާމިޔާބު ވެއްޖެކަން ރާފިލްއަށް އެނގުނެވެ.
ހިދާޔަތުގެ މަގުން އެއްކިބާވުމުގެ ސަބަބުން އަމިއްލަ ނަފްސު ނިކަމެތި ކުރެވެމުން ދާ ގޮތް ހިލްޔާއަށް ނުފެނެއެވެ. ހެވާއި ނުބައި ވަތްކެއް ނުވެއެވެ. ޙަޤީޤަތާއި ވަހުމުގެ ތަފާތު ނުފެންނަހާ ވަރަށް އަނދިރިވެފައިވިއެވެ.
**
އޭގެ އަނެއްދުވަހު ދާނިޝްއަށް އަލިވިލިގެން ދިޔައީ ނޫހުގައި އޭނައާއި ބެހޭގޮތުން ޝާއިޢު ކުރެވިގެން ދިޔަ ޚަބަރަކުންނެވެ. ހެނދުނު ކްލިނިކަށް ގޮސް އޭނަ ސައިން އިން ވީ ތަނާހެން ފަޔާޒް އޭނައަށް ގުޅާފައި ވައިބާރ ބެލުމަށް އެންގިއެވެ. އިތުރު އެއްޗެކޭ ވެސް ނުބުނެ ފަޔާޒް ފޯނު ކަނޑާލުމުން ވަގުތުން ވައިބާރ ބަލާލަން ދާނިޝްއަށް މަޖުބޫރުވިއެވެ.
ފަޔާޒް ފޮނުވާފައި ހުރީ ނޫހެއްގެ އާރޓިކަލް އެކެވެ. އޭގައި ހުރީ ދާނިޝް މާސްކް އަޅައިގެން ފަޔާޒާއި އެކީ ހިނގަމުން ދިޔަ ފޮޓޯއެކެވެ. ފަޔާޒްގެ މޫނު ފުސްކޮށްފައިވިޔަސް މާސްކް އެޅިފައިވި ދާނިޝް ގެ މޫނު ސާފުކޮށް ފެނެއެވެ.
“މަޝްހޫރު ތަރި ޑޭން ފިރިހެނަކާ ރައްޓެހި!”
ދާނިޝްއަށް ޤަބޫލު ކުރަން ވެސް ދަތިވެފައި އެ ޞުރުޚީއަށާއި ފޮޓޯއަށް ބަލަބަލާ ހުރެވުނެވެ. އެއަށްފަހު ކުއްލި ގޮތަކަށް ލިންކަށް ފިތާލަމުން އެ ލިޔުން ކިޔަން ފެށުނެވެ. އޭގައި އޮތީ މަޝްހޫރު ތަރި ‘ޑޭން’ ރާއްޖޭގައި އުޅޭ ޚަބަރު އިތުބާރު ހިފޭ ފަރާތަކުން ލިބިފައިވާ ކަމަށެވެ. ޑޭން އުޅެނީ މާސްކް އަޅައިގެން ކަމަށާއި، މޫނު ފޮރުވައިގެން އުޅެނީ ސަބަބަކާއި ލައިގެން ކަމަށް ފެންނަ ކަމަށެވެ. އަދި އެ ސަބަބަކީ، ކުރިން ވެސް ތުންތުންމަތިން ހީވި ހީވުން ކަމަށެވެ. ދާނިޝްއާއި ޒިވްއާއި ވަކިވި ސަބަބު ކަމަށެވެ. އެއީ ޑޭން ޝައުޤުވެރިވަނީ ފިރިހެނުންނާއިމެދު ކަމަށް ލަފާ ކުރެވޭ ކަމަށެވެ. މީގެ އިތުރު ތަފްޞީލާއި ޔަޤީންކަން ކުރިއަށް އޮތް ދުވަސްތަކުގައި ހޯދޭނެ ވާހަކަ ވެސް ލިޔެފައިވެއެވެ.
ލިޔުން ކިޔާލެވުނުހެން ދާނިޝްއަށް ވަގުތުން އޭނަގެ މާޒީގެ އާދަތަކާއި އެއްގޮތަށް ކޮމެންޓްތައް ކިޔެން ފެށުނެވެ. ކޮމެންޓްތަކުގައި އޭނަގެ ބައެއް ސަޕޯޓަރުން އެއީ ޑޭން ނޫންކަމަށް ބުނަމުން ދިޔައިރު އަނެއްބައި މީހުން އެއީ ހަމަ ޑޭން އޭ ބުނެ ހިތާމަ ކުރަމުން ދިޔައެވެ. މަދު ބަޔަކު އޭނަ ދިފާޢުކޮށް އެއީ އޭނަގެ އެކުވެރިޔަކަށް ވެދާނެ ކަމަށް ބުނެފައިވެއެވެ.
ދާނިޝް އިޙްސާސް ކުރަންވީ ގޮތެއް ނޭނގިފައި ހުއްޓާ ފަޔާޒް ގުޅަން ފެށިއެވެ. ދާނިޝްއަށް ފޯނު ނަގައި ކަންފަތުގައި ޖައްސާލެވުނެވެ.
“މިހެންވެ އަހަރެން ބުނީ ތި މާސްކް ނަގާލާށޭ. އެންޑް ދިސް ވަންސް އެންޑް ފޯ އޯލް.” ފަޔާޒް ހިސާބެއްގެ ނުރުހުންތެރިކަމާއިއެކީ ބުންޏެވެ.
“މިހާރު…ނަގައިފިއްޔާ ކަންތައް ގޯހުން ގޯހަށް ނޫންތަ ދާނީ؟ އަހަންނަށް ހީވަނީ އަހަރެން ބޭރަށް ފުރަންވީހެން.” ދާނިޝްއަށް އަވަސްއަވަހަށް ބުނެވުނެވެ. މާޒީގެ އާދަތަކާއި އެއްގޮތަށް އެވަގުތު އޭނަ މީހުންނަށް ޖެހިލުންވާ ގޮތްވިއެވެ.
“އަހަންނަށް ހިއެއް ނުވޭ ތިއީ އެންމެ ރަނގަޅު ގޮތްހެން. ކިހާ ދުވަހެއް ވަންދެން ފިލައިގެން އުޅޭނީ؟ ތިއީ އުޅެންވީ ގޮތެއް ނޫން ދާނިޝް. ﷲ ފިޔަވައި އެހެން ފަރާތަކަށް ތިހާ ބިރުގަންނާކަށް ނުވާނެ.” ފަޔާޒް ބުންޏެވެ.
ދާނިޝްއަށް އޭނަ ހިފަހައްޓައިގެން ހުރި ނޭވާ ދޫކޮށްލެވުނީ އެވަގުތެވެ. ފަޔާޒް އެބުނީ ތެދެއްކަން ހިތަށް އެވަގުތު އިޙްސާސް ކުރެވުނެވެ. އެހެނަސް ދެންވެސް ޖެހިލުންވިއެވެ. އެތައް އަހަރެއް ވަންދެން ހިތުތެރޭގައި ގެންގުޅުނު އިޙްސާސްތައް ބަދަލުކުރުމަކީ ފަސޭހަކަމެއް ނޫނެވެ. ވޭތުވެ ދިޔަ އަހަރުތައް އޭނަ ހޭދަ ކުރީ މަޝްހޫރުކަން ހޯދުމުގައެވެ. ޙަޔާތުގެ މަޤްޞަދަކަށްވެފައިވީ އޭނަގެ ސަޕޯޓަރުންގެ ރުހުން ހޯދުމެވެ. އެ ރުހުން ގެއްލިދާނެ ފަދަ އެއްވެސް މަޤާމެއްގައި ނުހުރެ ވެވޭތޯ ދާނިޝް މި ހުރިހާ ދުވަސް ވަންދެން މަސައްކަތް ކޮށްފައިވެއެވެ.
ވީއިރު އޭނަ މިއަދު މި މަޤާމުގައި ހުރެ މާސްކް ނަގާލާނީ ކިހިނެއް ހެއްޔެވެ؟ މާސްކް ނެގުމުން ވަށައިގެން ފެންނަ އެންމެ އޭނައާއި ދިމާލަށް ހޭނެ ނޫންހެއްޔެވެ؟ މަލާމާތް ކުރާނެ ނޫން ހެއްޔެވެ؟ ސޯޝަލް މީޑިއާގައި އޭނަގެ ޖޯކެއް ހަދާފާނެ ނޫން ހެއްޔެވެ؟ މި ހުރިހާ ކަމެއް ވެދާނެތީ ދާނިޝް ދެންވެސް ބިރުގަތެވެ. ކިތަންމެ ބޭނުން ނުވިޔަސްމެއެވެ.
އެހެންކަމުން އެދުވަހު ނަމާދު ވަގުތުތަކުގައި މިސްކިތުން ދިމާވެފައި ވެސް ފަޔާޒް ދާނިޝްއަށް ދިންހާ ނަސޭޙަތެއްވީ ބޭކާރެވެ. މަގުމަތިން ހިނގާފައި ދާއިރު މީހުން އޭނައަށް ބަލާހެން ހީވާ ކޮންމެ ފަހަރަކު ދާނިޝް ޖެހިލުންވަމުން ދިޔައެވެ. އޭގެ ސަބަބުން އެދުވަހަށްފަހު މާސްކާއި އެކީ ކަޅު ކުލައިގެ ތޮތްޕެއް ވެސް އެޅެން ފެށިއެވެ. ކްލިނިކްގައި އުޅޭ މީހުން އެކަމާއިމެދު ސުވާލު ކުރުމުން ދާނިޝް ވަކި އެއްޗެކޭ ނުބުނެއެވެ.
މިފަދަ ގޮތަކަށް ދެ ތިން ދުވަސް ވޭތުވިއެވެ. އެ ދެ ތިން ދުވަސް ތެރޭގައި އެހެން އުޅެން ވެފައިވުމުން ދާނިޝްއަށް ދަތިވެސް ވާން ފަށާފައިވެއެވެ. އަބަދު ވިސްނެމުން ދަނީ އޭނައަށް ބަލާ މީހަކަށް އޭނައަކީ ކާކުކަން އެނގޭތޯ ނުވަތަ ނޭނގޭތޯއެވެ. މި ފިކުރު ބޮޑުވުމުގެ ސަބަބުން ހަމަ ޙަޤީޤަތުގައި ވެސް ބޭރަށް ފުރައިގެން ދާން ވިސްނެމުން ދިޔައެވެ. އެހެނަސް ދެން ވެގެން ދިޔައީ ދާނިޝް ހީވެސް ނުކުރާ ގޮތެކެވެ.
އެއްރެއަކު ދާނިޝް އޯސިސް ސުޕާރމާކެޓަށް ދިޔައީ ނަހީދުބެ ގެ އެދުމުގެ މަތިންނެވެ. އެ ފިހާރައިގައިވާ އެއްޗެހީގެ ބްރޭންޑްތައް ބަލައި އެއީ އެންމެ ކޮލިޓީ ބްރޭންޑްތައްތޯ ޔަޤީން ކޮށްދިނުމަށް ނަހީދުބެ އެދުނެވެ. އަދި ފިހާރައިގެ ހުރިހާ ކަމެއް މަތިމަތިން ބަލައި އިތުރަށް ރަނގަޅު ކުރެވޭނީ ކޮންކަމެއްތޯ ބަލައި ދިނުމަށް ވެސް އެދުނެވެ.
ދާނިޝް އެ މަސައްކަތުގައި ހުރީ ފިހާރައިގެ މައިދޮރާއި ދިމާވާ ގޮތަށް ހުރި ޗޮކްލެޓް ޖަހާފައިވާ ބޮޑު ހަރުގަނޑުގެ ކައިރީގައެވެ. ކޮންމެ ޒާތެއްގެ ޗޮކްލެޓެއް ނަގައި އެއަށް ފަރުވާތެރި ނަޒަރުތައް ދެމުން ދާނިޝް އޭނަގެ ފޯނުގައި އޭނައަށް ފާހަގަވީ ކަންތައް ނޯޓު ކުރަމުން ދިޔައެވެ. އެވަގުތު ވެސް ދާނިޝް ހުރީ ކަޅުކުލައިގެ މާސްކަކާއި ކަޅުކުލައިގެ ތޮތްޕެއް އަޅައިގެން ކަމަށްވަމުން ފިހާރައަށް ވަންނަ މީހުންގެ ޙައިރާންކަން އެކުލެވިފައިވި ނަޒަރުތައް އޭނައަށް އަމާޒުވަމުން ދިޔައެވެ.
ދާނިޝް އެއަށް ފަރުވާލެއްނެތި މަސައްކަތް ކުރަމުން ދަނިކޮށް މައިދޮރުން ވަދެގެން އައި އަންހެން ކުއްޖެއް އޭނަ ކައިރީގައި މަޑުކޮށްލިއެވެ.
“ހުމް….އައި ތިންކް އައި ވޯންޓް އަ ކިސް.” ދަންނަ އަޑަކުން ނުހަނު ގާތުން އިވިގެން ދިޔަ ވާހަކައިން ދާނިޝްއަށް އެދިމާލަށް ބަލާލެވުނެވެ. އެހިނދު އެތާ ހުރީ އެ ‘ކިސެސް’ ނަމަކަށް ކިޔާ ޗޮކްލެޓް ޕެކެޓެއް ހިފައިގެން ހުރި ޒިވް ނޫން ދެވަނަ މީހެއް ނޫނެވެ. ދާނިޝް ފެނުމުން ވެސް ނޫން ކަމަށް ހަދާފައި އިތުރަށް ވާހަކަ ދެއްކިއެވެ.
“ވެލް….ކިހިނެއް ހޯދާނީ ކިސްއެއް؟ ކޭން ޔޫ ހެލްޕް މީ؟” ޒިވް އާދައިގެ މަތިން ދެ މާނަ އެކުލެވޭ ގޮތަށް އެހެން ބުނުމުން ދާނިޝްއަށް މިރޭ ބަލިކަށިކަމެއް އިޙްސާސެއް ނުކުރެވެއެވެ. އޭގެ ބަދަލުގައި މައްޗަށް ކަޅި އަރުވާލެވުނީ ވީ ފޫއްސެއްގެ ބޮޑުކަމުންނެވެ. ޒިވްއަކީ އޭނަ ފަހާފަހާ ދުރުނުވާ މެއްސެއްގެ ގޮތުގައި ސިފަ ކުރެވުނެވެ. އެރޭ ނޭނގޭ ސަބަބަކާހުރެ އޭނައަށް ޒިވް އެހާ ރީއްޗެއް ވެސް ނުވިއެވެ. އީމާންތެރިކަން ހިތުގައި ޒީނަތްތެރިވެގެން ދިޔަދިޔަހެން ލަދުކުޑަ ކަމުގެ ހުރިހާ ސިފައެއް އޭނައަށް އިންތިހާއަށް ހުތުރުވެފައިވި ފަދައެވެ. އަދި ޒިވް އަކީ އޭނަ ﷲ އާއި ދުރު ކުރުވާނެ ފަދަ ފާފަތަކަށް އަރައިގަތުމަށް ބާރު އަޅާ މީހެއްކަން އެނގުންވުމުން ޒިވްއަށް ނުރުހުންވެސް ވެފައިވިއެވެ.
“ކައުންޓަރަށް ދިޔައިމަ ގަނެވޭނެ.” ދާނިޝް ވެސް ނޫންކަމަށް ހަދާފައި އެހެން ބުނުމަށްފަހު އޭނަގެ މަސައްކަތަށް އަނބުރާ ދިޔައެވެ.
“ވެލް ޓޫ ބޭޑް. މިތަނުން އަހަރެން އެ ހޯދަން ބޭނުންވަނީ. އައި ނޯ ޔޫ އާރ ގޭއި. އެކަމަކު ގޭއި މީހަކަށް ވެސް އަހަރެން އިގްނޯރ ނުކުރެވޭނެ. ކުރިން އެހެން ވެފަ ވެސް އެބަހުރި. ހެހެހެ….” ޒިވް މަޑު އަޑަކުން ހިނިގަނޑެއް ޖަހާލިއެވެ. ދާނިޝް އައި ރުޅީގައި ކަތުރުކަށިގަނޑަށް ބާރުކޮށްލެވުނެވެ. އަމިއްލަ ދިފާޢުގައި އެއްޗެކޭ ބުނަން އުޅެފައިވެސް ނުބުންޏެވެ. ޒިވްއަށް އޭނަގެ ވަގުތުގެ ފަޅި ސިކުންތެއް ވެސް ދިނުމަކީ ބޭކާރު ކަމެއްގެ ގޮތުގައި ސިފަ ކުރެވުނީތީވެއެވެ.
ހުނުން ކޮންޓްރޯލް ކުރުމަށްފަހު ޒިވް އަނެއްކާވެސް ދުރު ނުވެ ހުރެ ވާހަކަ ދެއްކިއެވެ.
“އޯކޭ އައި ވިލް ގޯ ސްޓްރައިޓް ޓު މައި ޕޮއިންޓް. ލަތީފް ބޭނުން އެބަވޭ ފަހު ދުވަސް ޑްރާމާގެ ސީޒަން 2 ހަދަން. އޭގެ ލަތީފް ކާސްޓް ކުރަން ބޭނުންވަނީ އަހަންނާ ޑޭން. މިހާރު ސްޕްރެޑްވެފައިވާ ރޫމާރސް ގެ ސަބަބުން ޔޫ ހޭވް އޮންލީ ވަން ވޭ އައުޓް. ޑޭން ވީ އަހަރުމެންނާއި އެކު ފިލްމު ކުޅެން. އޭރުން އަހަރުމެން ޑޭން ގެ އިމޭޖް ސަޅިވާނެ ގޮތަކަށް އަންމާސްކް ކޮށްދޭނަން. އެކްޓަކަށް ވިޔަސް އަހަރުމެން ރައްޓެހިވެގެން އުޅޭކަމަށް އަނެއްކާވެސް ޕަބްލިކަށް އަންގާލާނީ. ޑްރާމާގެ ޕްރޮމޯ ސްޓަންޓަކަށް. ތިންކް އެބައުޓް އިޓް. މުޅި ޢުމުރު ދުވަހު ތި މާސްކް އާ ތޮފި އަޅައިގެން ނުއެއް އުޅެވޭނެ ދޯ؟ އެބަ އިނގޭތަ މިރޭ މިތާ ވަށައިގެން ވެސް ބައެއް ނޫސްވެރިން އެބަ ތިބި. ކިތަންމެ ފިލަން އުޅުނަސް ތިއީ ޑޭން ކަން އެންމެންނަށް އެނގެއޭ….” ޒިވް ފަހު ޖުމްލަތައް ބުނެލީ އިހުނަށްވުރެ ވެސް ސިއްރުންނެވެ.
އެވަގުތު ޒިވް ގެ ނަޒަރުތައް ދެ ފަރާތަށް ދިޔުމުން ދާނިޝްއަށް ވެސް އެ ދެ ދިމާލަށް ނަޒަރު ހިންގާލެވުނެވެ. އެހިނދު މައިދޮރު ކައިރީގައާއި ކައުންޓަރު ކައިރީގައި ވެސް ދާނިޝް ދަންނަ ދެ ނޫސްވެރިން ތިއްބެވެ. ނޭނގި ތިބީ ކިތައް ބަޔަކު ކަމެއް ވެސް ނޭނގެއެވެ. މި މަންޒަރު ބަޔަކު މީހުން ރެކޯޑް ކޮށްގެން ތިބުން ވެސް ގާތެވެ. މިއީ ޒިވް ރާވައިގެން ކުރި ކަމަކަށްވުން ނުހަނު ގާތެވެ.
“ވެލް ޔޫ ހޭވް އަ ޗޮއިސް. މިވަގުތު ވެސް. އިވެން އިފް ޔޫ އާރ ގޭއި، އަހަރެންގެ އަތުގަ ހިފައި އަހަރެން ބައްދާލާ. އަހަރެން ދެކެ ވަރަށް ލޯބިވެއޭ ބުނޭ. ޓު އެޑް ޓު ދެޓް އަހަންނާ އެކީ ހޮޓެލަކަށް ވެސް ހިނގާ. އޭރުން ހަމަ ކުޑަ ވެސް ޝައްކެއް ނޯންނާނެތާ…ހަހަހަހަ!”
ޒިވް އެ ވާހަކަ ދައްކަމުން ގޮސް ސިއްރު ހިނިގަނޑެއް ޖަހާލުމުން ދާނިޝްގެ ރުޅިވެރިކަން އިންތިހާއަށް ގޮސް ކެތްތެރިކަން ކޮޅުންލިއެވެ. އެވަގުތުން ވަގުތަށް ޒިވް ދެއްކި ހުރިހާ ވާހަކައަކަށާއި ދެއްކިހާ ބިރަކަށް ސާފު ޖަވާބެއް ދޭން ބޭނުންވިއެވެ. އެހެންކަމުން އިސާހިތަކު ބޯ މަތީގައި އޮތް ތޮފި ނަގައި ކަންފަތުގައި އަޅުވާފައި ހުރި މާސްކް ނެގިއެވެ. އެހިނދު ދާނިޝްގެ ކުރިމަތީގައި ހުރި ޒިވް ދެލޯ ބޮޑުވީ ހިނދު ހުއްޓުން އަރާ ގޮތްވިއެވެ.
“އަހަރެން ޒިވްއާއެކީ ދާކަށް ބޭނުމެއް ނޫން. އަހަރެން ލޯބިވާ އަންހެން ކުއްޖަކު ހުރޭ.” މޫނު ކަޝްފުވި އެ ވަގުތުކޮޅު ހިތުގެ ތެޅުން އަވަސް ވީ ހިނދު ދާނިޝްއަށް އެ ބަސްތައް ބުނެވުނީ ހަމަ އެއްވެސް އިޚްތިޔާރަކާ ނުލައެވެ.
ނުނިމޭ
September 14, 2025 @ 3:17 pm
Dear readers, please note that I will only be able to upload the next episode next Sunday In Sha Allah.
Busy week this is!
If you benefit from the story please share with friends and family 🫶
September 14, 2025 @ 3:29 pm
“They are the ones who say, “Do not spend on those who are with the Messenger of Allah until they disband.” And to Allah belongs the treasures of the heavens and the earth, but the hypocrites do not understand. (7) They say, “If we return to al-Madinah, the more honored [for power] will surely expel therefrom the more humble.” And to Allah belongs [all] honor, and to His Messenger, and to the believers, but the hypocrites do not know. (8) – Surah Al-Munaafiqoon, 7-8
A very direct reference to some ayahs in this episode so couldn’t help but share. Subhaanallah its not just Hilya. Even we tend to get caught up in the hustle of life to the point where this world could become our only concern. We start worrying about this world as if we control it. As if we own it. And we end up feeling like the more of this world we have, the more honour we have.
However these beliefs are in fact beliefs of the hypocrites. The hypocrites, because of their weakness of faith dont realize Allah owns the treasures of the heavens and the earth. And that honour can only come from Allah and by living the way the Messenger (SAW) taught us. Like Umar (RA) once said, “We were a humiliated nation and Allah honoured us with Islam.”
We see in history how the light of Islam shined and Muslims conquered over the great empires. It didnt happen because they were powerful. It happened because of unwavering faith in Allah and unconditional obedience to the Prophet (SAW)
May Allah open our eyes to the beauty of Islam. May Allah make us see the truth as truth and allow us to follow it, and may He make us see falsehood as falsehood and allow us to stay away from it. Aameen!