ނަފްސީ (އެކާޅީސްވަނަ ބައި)

ހިލްޔާއަށް ނޭނގުނު ކަމަކީ، މި އިސްތިޚާރާއަކީ އޭނައާއި ﷲ އާއި ދެމެދު ހުޅުވާލެވުނު ‘ދޮރެއް’ ކަމެވެ. އަދި އެ ދޮރުގެ އަނެއްފަރާތުގައި ވަނީ ކިހާ ބޮޑު ރަޙްމަތެއް ކަމެވެ.

އެދުވަހު ބައްޕަގެ ނަސޭޙަތާއި އެއްގޮތަށް ހިލްޔާ ފަތިސް ނަމާދަށްފަހު ނިދާލިއެވެ. ނިދާފައި ހޭލެވުނުއިރު 10 ޖަހައި ބޮޑުވަނީއެވެ. ހޭލެވުމާއިއެކުހެން އެދުވަހު ފަތިހު ފެނުނު މަންޒަރު މަތިން ހަނދާންވެ، މޭމަތީގައި ބަރު އެއްޗެއް ބޭއްވުނު ކަހަލަ އިޙްސާސެއް ކުރެވުނެވެ. އިރުގަނޑެއް ވަންދެން އެނދުގައި އޮތް ގޮތަށް އޮވެވުނީ އެހެންވެއެވެ. ބޮލުގައި ލުއި ރިހުމެއްވީއިރު ހުން ވެސް އައިސްފައިވިކަން ފާހަގަވިއެވެ. އެހެނަސް ވެފައިވާ ވަރުބައްޔާއެކީ ތެދުވެލެވުނީ މެންދުރު ނަމާދު ވަގުތު މަތިން ހަނދާންވުމުންނެވެ.

ތެދުވެ ތާޒާ ވެލީ ވަގުތު ޟުޙާ ނަމާދު މަތިން ހިލްޔާ ހަނދާންވިއެވެ. ޟުޙާ ނަމާދުގެ ނަން އޭނަގެ ހިތަށް ވެރިވީ ކިހާ ޒަމާނަކަށް ފަހު ކަމެއް ވެސް ހިލްޔާއަށް ނޭނގެއެވެ. އެ ނަމާދު ކުރަން ހިތަށް އެރިއެއްކަމަކު އެވަގުތު ކޮޓަރި ތެރޭގައި ފުރިފައި ހުރި ހެދުން ވަށިގަނޑު ފެނުނެވެ. އިސާހިތަކު ނަމާދުގެ ކުރިން އެކަން ކޮށްލުމަށް ޝައިޠާނާ ވަސްވާސްދިނެވެ. ހިލްޔާ އެ ވަސްވާހަށް ހެއްލޭ ގޮތްވިއެވެ.

އެޕާޓްމެންޓް ތެރޭގައި ހުރި މެޝިނަށް ހެދުން އެޅުމަށްފަހު ހިލްޔާ އެޕާޓްމެންޓް ތެރެ ރީތި ކުރަން ފެށިއެވެ. ހަފްތާގެ ގިނަ ވަގުތު ހޮސްޕިޓަލްގައި ހޭދަ ކުރާތީ ސާފު ކުރަންޖެހޭ ބައި ގިނަވިއެވެ. އެހެން ހަފްތާތަކުގައި ރާފިލް ބުނާ ފަދައިން އެ ޢިމާރާތުގެ މަސައްކަތު މީހެއް ގާތު ހިލްޔާ ބުނެލަނީއެވެ. ރާފިލް އެއަށް ލާރި ދައްކާ ގޮތަށެވެ. އެހެނަސް ނޭނގޭ ސަބަބަކާ ހުރެ މިހާ ހިސާބުން ހިލްޔާ އެއްގޮތަކަށް ވެސް ރާފިލްއަށް ބަރޯސާވާކަށް ބޭނުމެއް ނުވިއެވެ. މި ވިސްނުމުގައި ހުރެ އޭނަ ރާފިލްއާއި ކައިވެނި ކުރާނީ ކިހިނެއް ކަމެއް ހިލްޔާއަށް ނޭނގެއެވެ. އެހެނަސް ދެން މި ޙާލަތާއިމެދު އިތުރު ކަމެއް ނުކުރަން ހިލްޔާ ނިންމިއެވެ. ﷲ ތަޢާލާ އޭނައަށް ގޮތެއް ދައްކަވަންދެން ކަންތައް ދާ ގޮތަށް ދާން ދޫކޮށްލަން ނިންމުނެވެ.

މަސައްކަތުގައި އުޅުމުން ހިލްޔާއަށް ސިކުނޑި ހާސް ކުރުވަމުން ދިޔަ ޚިޔާލުތަކާއި ކޮންމެވެސް ވަރަކަށް ދުރުވެވުނެވެ. އެހެނަސް ހުން ގަދަވަމުން ދިޔަ އިޙްސާސް ކުރެވުނެވެ. ބޭސް ކާން ހިތަށް އެރިއެއްކަމަކު ރޯދަ ހިފައިގެން ހުރިކަން ހަނދާންވިއެވެ. ރޯދަ ކަނޑާލަން ޚިޔާލު ކުރެވުނަސް އަދި ހުރެވޭތޯ ބަލާނީއޭ ހިތަށްއެރިއެވެ.

ހިލްޔާ މަސައްކަތަށް ނިމުމެއް ގެނައީ، މެންދުރު ނަމާދު ވަގުތު ގާތްވުމުންނެވެ. ފެންވަރައި ތާޒާވެލައިގެން އާދައިގެ މަތިން ހިލްޔާ ނަމާދަށް ތައްޔާރުވިއެވެ. އެވަގުތު މެންދުރު ނަމާދު ވަގުތު ވެފައިވުމުން ހިލްޔާ މުސައްލަ މަތީގައި ނަމާދަށް ހުއްޓުނެވެ. މިފަހަރު ވެސް ސުންނަތް ކޮށްލަން ހިތް ބުންޏެވެ. އެހެނަސް ގައިގައި ވަރެއް ނެތުމުން ޚިޔާލު ބަދަލުކޮށްލެވުނެވެ. ނަމާދަށް ހަޝަމް ބަންއިރު ނަމާދު ކޮށް ނިންމުމަށްފަހު ރޯދަ ކަނޑާލަން ނިންމުނެވެ.

އެހެނަސް ހިލްޔާ ނަމާދުކޮށް ނިމުނު ތަނާހެން އެނދުމަތީގައި އޮތް ހިލްޔާގެ ފޯނު ރިންގުވާން ފެށިއެވެ. ވައިބާރ ރިންގްޓޯން ގެ ބަދަލުގައި ފޯނުގެ ރިންގްޓޯން އިވުމުން ގުޅަނީ ރާފިލްކަން ޔަޤީންވިއެވެ. ރާފިލްގެ ނަން ހިތަށް ވެރިވުމާއިއެކު ހިތް ރޫރޫ އެޅިއެވެ. އެހެނަސް ހިލްޔާ ހިތްވަރު ކޮށްލަމުން މުސައްލަ މަތިން ތެދުވެގެން ގޮސް ފޯނު ނަގައި ބަލާލިއެވެ. ރާފިލް އަވި އައިނެއް ޖަހައިގެން ހުރި ފޮޓޯގެ މަތީގައި ‘ލަވް’ ޖަހައި އެ ބަހުގެ ފަހަތަށް ހިތެއް ލެވިފައިވި ގޮތުން ހިލްޔާ އަމިއްލަ ނަފްސަށް ނުރުހުންވިއެވެ. އެހެނަސް އެ ވަގުތަށް އެ އިޙްސާސްތަކުން އަރައިގަންނަމުން ފޯނު ނެގިއެވެ.

“ހެލޯ؟” ހިލްޔާއަށް ފިނި ގޮތަކަށް ސުވާލުގެ ރާގަކަށް އަހާލެވުނެވެ. މުހިއްމު ކަމަކު ނޫނީ ރާފިލް އޭނައަށް ގުޅައިގެން ނުވާނެހެން ހީވާ ފަދައަކުންނެވެ.

“ހައި ލަވް. ހޭލާތަ ތިއުޅެނީ؟” ރާފިލް އެހިއެވެ. ހިލްޔާގެ ދެބުމަ ކައިރިވިއެވެ.

“ހުމް ހޭލާ.” ވާހަކަ ދައްކާ ހިތެއް ނެތިފައި ހިލްޔާ ބުންޏެވެ.

“ގްރޭޓް. މިއަދު ލަވް ގެ އޮފް ޑޭ ވީމަ އަހަރެން ވެސް ޑިއުޓީއަށް ނުދާން ނިންމީ. ސޯ ވީ ކޭން ހޭންގް އައުޓް.” ރާފިލް އެހެން ބުނުމާއިއެކު ހިލްޔާ އިތުރަށް ވަރުބަލިވިއެވެ.

“ރާފިލް އައި ޑޯންޓް ތިންކް-“

“އުނހު…..ލޯބި ޖެހޭނީ އަންނަން ހަމަ. ވީ ނީޑް ޓު ބޮންޑް. ބޮންޑް ވީމަ އަހަރުމެން ދެމެދުގަ އޮތް ލޯބި މަތިން ހަނދާންވާނީ. ހަނދާންވީމަ ޔޫ އެންޑް އައި ވިލް ބީ ހެޕީ އަގެއިން. އަވަހަށް ތައްޔާރުވެގެން ތިރިއަށް އާދޭ. އަހަރެން މިހިރީ ރެޑީވެގެން އައިސް ލޮބީގަ. ވިލް ބީ ހިއާރ ވެއިޓިންގް ފޯ ޔޫ.” ރާފިލް ބުންޏެވެ.

އެހިނދު ހިލްޔާ ހިމޭންވީ ހިނދު، އެ މޫނުމައްޗަށް ވެރިވެފައިވީ ނުރުހުންތެރިކަމެވެ. އޭނަ ބަލިވެ އުޅޭ ވާހަކަ ބުނުމުގެ ފުރުސަތު ވެސް ރާފިލް ނުދިނީތީ ފުރަތަމަ ޤަބޫލުކުރަން ވެސް ދަތިވިއެވެ. އެހެނަސް މިއީ ހަމަ ރާފިލްގެ ގޮތްކަން އެވަގުތު އެނގުންވިއެވެ. ހަނދާނަށް އައީ މި ނޫނަސް ރާފިލް އެތައް ފަހަރު މަތިން އޭނަ ދެއްކި ވާހަކައެއް އަޑު ނާހާ އަމިއްލައަށް ބޭނުންވާ ގޮތަށް ކަންކުރަން ހިލްޔާއަށް ޖެއްސި ގޮތެވެ.

އެކަން އެނގުންވުމުން ވީ ނުރުހުމުގައި ހިލްޔާއަށް އިންކާރު ކުރެވެން އުޅުނެވެ. އެހެނަސް…

“އޯކޭ ހިނގާ.” ހިލްޔާއަށް ބުނެވުނެވެ. އަދިވެސް ރާފިލްއާއި ދެކޮޅުވެރިވުމުގެ ހިތްވަރެއް ލިބިފައި ނުވުމުންނެވެ. ރާފިލް ވަނީ އެހާ ވެސް ބޮޑަށް ހިލްޔާގެ ސިކުނޑިއާއި ކުޅެފައި ކަން ޚުދު ހިލްޔާއަށް ވެސް ނޭނގެއެވެ.

އެހެނަސް އެދުވަހު ތަފާތު ގޮތެއްވިއެވެ. އެ ކޯލު ނިމުމުން ހިލްޔާ އަނެއްކާވެސް އޭނަގެ ސްކްރީނުގައި ‘ލަވް’ ގެ ނަމުން ސޭވް ކުރެވިފައިވާ ނަންބަރު ފެނުނެވެ. ހިލްޔާ ވަގުތު އެ ކޮންޓެކްޓް ހުޅުވާލަމުން ‘ރާފިލް’ ގެ ނަމުން އެ ނަންބަރު ސޭވް ކުރިއެވެ. އަދި އެ ނަންބަރާއިއެކު ސޭވް ކުރެވިފައިހުރި ފޮޓޯ ރިމޫވް ކުރިއެވެ.

ހިލްޔާ ގޮވައިގެން ރާފިލް ދިޔައީ ބޮޑު މޯލްއަކަށެވެ. މޯލްގެ ތެރެއިން ފެނުނު ކޮންމެ ބްރޭންޑެޑް ސްޓޯރަކަށް ވަދެ ރާފިލް ހިލްޔާއަށް އަގުބޮޑެތި އެއްޗެހި ގަންނަމުން ދިޔައެވެ. އަތްދަބަހާއި، ސެންޓު ފުޅިއާއި، އަތުގައި އަޅާ ރަނާއި ރިހީގެ ބްރޭސްލެޓާއި އެހެނިހެން އެއްޗެއްސެވެ. ރާފިލް ދެއްކި ކޮންމެ އެއްޗަކަށް މާ ބޮޑު ބެލުމެއް ނެތި ހިލްޔާ އާނއެކޭ ބުނަމުން ދިޔައެވެ. ގިނަފަހަރު ހިލްޔާ ދޭތިން ކުރެ އެކަތި ޚިޔާރު ކުރުމުން ވެސް ރާފިލް އަނެކަތީގެ މޮޅު ކަމުގެ ވާހަކަ ދައްކައި ހިލްޔާ ޚިޔާރު ކުރި ވައްތަރު ނޫން އެހެން ވައްތަރެއް ގަނެލައެވެ. އެހެންނޫނީ ދޭތި އެއްކޮށް ގަނެލައެވެ.

މިއީ މީގެ ދުވަސްކޮޅެއް ކުރިން ހިނގި ކަމެއް ނަމަ މިއިން ވެސް ހިލްޔާގެ ހިތުގައި ރާފިލްއަށް ޚާއްސަ މަޤާމެއް ދެވުނީހެވެ. ޑްރާމާތަކުގައި މުއްސަނދި ބަޠަލާ އަންހެން ކުއްޖާއާއިމެދު ކަންތައް ކޮށްދެނީ މިފަދައިން ކަމަށްވާތީވެއެވެ. އެހެނަސް މިއަދު ކީއްވެ ކަމެއް ނޭނގެއެވެ. މިއީ ހަމަ ޙަޤީޤަތުގައި ވެސް އޭނަ ބޭނުންވާ ގޮތް ކަމާއިމެދު އެވަގުތު ޝައްކު އުފެދުނެވެ. އެ ވިދާ ބަބުޅަމުންދާ އަގުބޮޑު ދުނިޔަވީ އެއްޗެއްސަށް ބެލެމުން ދިޔައީ އެއްވެސް އަސަރެއް ނެތް ގޮތަކަށެވެ.

ރާފިލް ހިލްޔާއަށް ‘ހަދިޔާ’ ކުރުމަށް ގަތް ކޮތަޅުތައް އުފުއްލުމަށް ފިހާރައިގެ އަންހެން ކުއްޖަކު އުޅުނެވެ. އެއީ ވެސް ރާފިލް ލާރި ދީގެން ކުރި ކަމެކެވެ. ގަޑިއެއްހާއިރު ވަންދެން ބާޒާރުކޮށް ނިމުމުން ރާފިލްގެ އެދުމަށް އެ ކުއްޖާ އެ ކޮތަޅުތައް ހިފައިގެން ގޮސް މޯލްގެ ލޮކަރަކަށް ލުމަށް ދިޔައެވެ.

އެހާ ހިސާބަށް ދިޔައިރު ހިލްޔާ ހުރީ އިހުނަށްވުރެ ދެ ގުނައަށް ހުންގަދަވެފައެވެ. އަދިވެސް ބޭސް ނުކެވޭކަން އެނގުންވީ އެ ވަގުތެވެ. ހިލްޔާ އެއްޗެކޭ ބުނަން އުޅުނު ވަގުތު ރާފިލް ވާހަކަ ދެއްކިއެވެ.

“ހިނގާދޯ ދެން ސްކޭޓްކުރަން ދާން؟ މިތާ ހުރޭ ވަރަށް ސަޅި ސްކޭޓިންގް އޭރިއާއެއް.” ރާފިލް ބުންޏެވެ.

“ރާފިލް އައި ޑޯންޓް ސްކޭޓް. މިވަގުތު ބޭނުންވަނީ-“

“އުނހު ހިލްޔާ! ޑޯންޓް ބީ ސްކެއާރޑް. އައި ވިލް ޓީޗް ޔޫ. އާދޭ!”

ރާފިލް އެހެން ބުނެ ހިލްޔާއަށް އިތުރު އެއްޗެކޭ ބުނުމުގެ ފުރުސަތެއް ނުދީ ކުރިއަށް ހިނގައިގަތެވެ. ރާފިލް ހިނގައިގަތް މަންޒަރަށް ބަލަން ހިލްޔާއަށް އިރުކޮޅެއް ވަންދެން ނުވެސް ހިނގާ ހުރެވުނެވެ. ރާފިލްއަށް ނާންގާ އެތަނުން ނިކުމެގެން ދާން ވެސް އެވަގުތު ހިތަށްއެރިއެވެ. އެހެނަސް އޭގެ ނަތީޖާއާއިމެދު ވިސްނާލެވުނެވެ. ރާފިލްއަކީ އޭނައާއި ޚިޔާލު ތަފާތު ވިޔަސް ރުޅި އިސްކޮށް ހަދާ މީހެކެވެ. އޭނަ ރާފިލް ދޫކޮށް މިތަނުން ގޮއްސިއްޔާ ހަދާފާނެ ގޮތަކާއިމެދު ބިރުގަތެވެ. އެހެންކަމުން ގައިގައި ނެތް ވަރަކާއި އެކީވެސް ހިލްޔާ ރާފިލް ދިޔަ ދިމާލަށް ދިޔައެވެ.

މުޅި ދުވަސް ހޭދަވީ މިފަދަ ގޮތަކަށެވެ. އިރުއޮއްސެން ގާތްވީ ހިލްޔާއަށް ބޭސް ނުލިބުނު ތާނގައި ކާއެއްޗެއް ކާނެ ފުރުސަތެއް ވެސް ނުލިބިއެވެ. އުޅެނީ ބަލިވެކަން ރާފިލް ގާތު ނުވެސް ބުނެވިއެވެ. އެހެނަސް ހިލްޔާގެ ނަސީބު ރަނގަޅުކަމުން ކަންނޭނގެއެވެ. އިރުއޮއްސެން 20 މިނެޓަށް ވެފައި ވަނިކޮށް ރާފިލް ހިލްޔާ ގޮވައިގެން މޯލްއިން ނިކުންނަން ދިޔައެވެ. މޯލްގެ މައިދޮރު ކައިރީގައި ހުރި ފާރމަސީ ފެނިފައި ހިލްޔާ ރާފިލް ގާތު އެބަ އަންނަމޭ ބުނެ، މަޑު ނުކޮށް ފާރމަސީއަށް ގޮސް ވަނެވެ. އަދި އޭނަގެ ހުމަށް ރަނގަޅުވާނެ ބޭހަކާއި ފެންފުޅިއެއް ގަނެގެން ނިކުތެވެ.

ހިލްޔާގެ އަތުގައި ހުރި ބޭސް ފެނިފައި ބަލީތޯ ރާފިލް އެހިއެވެ. ހުންއައިސްގެން ކަމަށް ބުނެ ހިލްޔާ ވާހަކަ ކުރު ކުރިއެވެ.

ރޯދަ ކަނޑާނުލެވި ދުވަހުގެ އެހާ ހިސާބަށް ދިޔުމުން ހިލްޔާ ދެން ބޭސް ކާން ބޭނުންވީ މަޣްރިބް ނަމާދު ވަގުތު ވުމުންނެވެ. އެހެންކަމުން ފިހާރައިން ގަތް އެއްޗެހި ކާރަށް ލައި، ކާރަށް އަރައި ރާފިލް ދުއްވާލި ވަގުތު ވެސް ހިލްޔާ ބޭސް ގުޅަ ނުކައެވެ. މަޣްރިބަށް ގޮވަން 5 މިނެޓް ބާކީ އޮތީތީވެއެވެ.

“އަދިވެސް ބޭސް ނުކަނީތަ؟ ކާލަބަލަ ލޯބި. އޭރުން ހުން ފިނިވާނީ.” ރާފިލް ހިލްޔާއަށް ލުއި ނަޒަރުތައް ދެމުން ބުންޏެވެ.

“މަޣްރިބް ޓައިމްވީމަ ކާންވެގެން. ރޯދައަށް މިހިރީ.” ހިލްޔާ ކުރިމައްޗަށް ނަޒަރު ހުއްޓައިގެން އިނދެ ބުންޏެވެ.

“ރޯދައަށޭ؟! ކީއްކުރާ ރޯދައެއް؟” ރާފިލް ނުރުހުންވެފައި ފަދައަކުން ކޮށްލި ސުވާލުން ހިލްޔާއަށް އެ މޫނަށް ބަލާލެވުނެވެ. ރާފިލް ޙައިރާންވީ އޭނަ އާދައިގެ ދުވަހެއްގައި ހިފީ ކޮން ރޯދައެއްކަން ނޭނގިގެންބާއޭ ހިތަށްއެރިއެވެ.

“ރޯދަ މަހުން މިސްވެފަ ހުރި ރޯދައެއް. މޭކް އަޕް ކުރަނީ. ރޯދަ މަސް ކައިރިވާތީ.” ހިލްޔާ ދެންވެސް ރާފިލްގެ މޫނުން ނަޒަރު ވަކި ކުރުމެއްނެތި ބުންޏެވެ. އެހިނދު ދެން ރައްދުގައި އައި ހިލްޔާ ހީވެސް ނުކުރާ ޒާތުގެ ވާހަކައެކެވެ.

“ހަހް! ކީއްކުރާ ރޯދައެއް؟ އަދި ތިހާ ބަލިވެ އުޅޭއިރު. ތި ރޯދަ ނުހިފިއްޔާ އެނގޭނީ ވަކި ކާކަށް؟” ރާފިލް އެހިއެވެ. އެހިނދު ހިލްޔާގެ ހިތް ބިރުވެރިކަމާއިއެކު ރޫރޫއެޅި ހިނދު، އެ ބިރުވެރިކަމުގެ ސަބަބުން ލޯ ބޮޑުވިއެވެ. އެހެނަސް ރާފިލް ނުހަނު އާދައިގެ ގޮތަކަށް އެ ސުވާލު ކުރުމުން ހިނދުކޮޅަކަށް ނަމަވެސް އޭނައަށް ﷲ ބައްލަވާ ވޮޑިގެންވާ ކަމާއިމެދު ޝައްކު އުފެދުނެވެ. އެހެންނޫނަސް ހިލްޔާ އާދަވެފައިވަނީ ރާފިލް ބުނާ ވާހަކަތައް ޤަބޫލުކުރަން ކަމަށްވުމުންނެވެ.

ހިލްޔާ ވަކި އެއްޗެކޭ ނުބުނެވިފައި އިންދާ ރާފިލް އިތުރަށް ވާހަކަ ދެއްކިއެވެ.

“ލެޓް މީ ޓެލް ޔޫ ހިލްޔާ. އޯލް ރެލިޖަންސް އާ ޖަސްޓް އަ ފޭކް. މީހުން ލާރި ހޯދަންވެގެން އުފައްދާފަ ހުންނަ އިންސްޓިޓިއުޝަންސް އެއީ. ހުރިހާ ދީނަކަށް ވެސް ބަލައިފިއްޔާ އެނގޭނެ އެއީ ފަޤީރު މީހުންގެ ހިތްހަމަ ޖައްސަން ހަދާފަ ހުންނަ ޚިޔާލުތައް. އެއްވެސް އެކޮމްޕްލިޝަޑް މީހަކު ދީންވެރިވެގެން އުޅޭތަން ދުށިންތަ؟ ނޯ! ވާއި؟ ބިކޯޒް ދޭ ޑޯންޓް ނީޑް އިޓް. އަޅެ އަހަރެން މި ބުނީ ދޮގެއްތަ؟” ރާފިލް ވާހަކަ ދައްކަމުން ގޮސް ހިލްޔާއާއި ސުވާލު ކުރިއެވެ.

ރާފިލް ދެއްކި ހުރިހާ ވާހަކައަކުން ހިލްޔާގެ ހިތަށް ލިބުނު ޝޮކާއި އެކީ އެހިތަށް ވަރަށް ބޮޑަށް އުދަގޫވެގެން ދިޔައެވެ. ރާފިލް އެ ކުރި ސުވާލަށް ރައްދު ދިނުމަށްޓަކައި ދޫ ޙަރަކާތް ކުރުމަށް ވަގުތުކޮޅެއް ނެގީ އެހެންވެއެވެ.

“ޔެސް ރާފިލް! އަހަންނަށް ދީން އުނގަންނައިދިން އުސްތާޒާއަކީ ވަރަށް އެކޮމްޕިޝްޑް ލޯޔާރއެއް. އިންޓަނޭޝަނަލް ލޯ ކިޔަވައިގެން ހުރި ލޯޔާރއެއް. އިސްލާމް އިޒް ދަ ވަން ޓްރޫ ރެލިޖަން! ރާފިލް މިކަން ޤަބޫލު ނުކުރަނީތަ؟” ހިލްޔާއަށް އެ ފަހު ބަސްތައް ބުނެލެވުނީ ހަމަ އެއްވެސް އިޚްތިޔާރަކާއި ނުލައެވެ. އަދި އެ ފަހު ސުވާލު ކޮށްލެވުނީ ހަމަ ޙަޤީޤަތުގައި ވެސް އޭގެ ޖަވާބު ބޭނުންވެގެންނެވެ. އެ ޖަވާބު ގޯސްވެއްޖެނަމަ ރާފިލްއާއިއެކީ އޭނައަށް އުޅެވޭނެހެން ހީ ނުވުމުންނެވެ.

“ން…ނޫނޭ ނޫނޭ ކުރަމޭ. އޮފްކޯސް އިސްލާމް އިޒް ދަ ޓްރުތްއޭ. އަސްލު އަހަރެން ބުނީ އެހެން ދީންތަކުގެ ވާހަކަ. އަހަރެން ވެސް އިސްލާމް ގޯހެކޭ ނުބުނާނަންދޯ؟” ރާފިލް އަވަސްއަވަހަށް ވާހަކަ ދެއްކިއެވެ. އެހިނދު ހިލްޔާ އޮޅުން އަރާ ގޮތްވިއެވެ. ރާފިލް ދެންމެ ދެއްކި ވާހަކައިން ރާފިލްއަށް އިސްލާމްދީން ގޯސްހެން އޭނައަށް ހީވީ ކީއްވެތޯ ހިތަށްއެރިއެވެ. އެހެނަސް އެވަގުތު އައިސްފައިވި ހުމާއި ވެފައިވި ވަރުބަލިން ރަނގަޅަށް ވިސްނޭ ގޮތެއް ނުވިއެވެ. ހަމަ އެހިނދު މަޣްރިބް ނަމާދު ވަގުތުގެ ނޮޓިފިކޭޝަން އަތުގައި އޮތް ފޯނަށް އައުމުން ހިލްޔާ ބޭސް ކާން އަވަސްވިއެވެ.

ހިލްޔާ ބޭސްކަމުން ދިޔަ ވަގުތު ރާފިލްގެ މޫނުމައްޗަށް ވެރިވެފައިވި ރުޅިވެރިކަމާއި އެ ކަތުރުކަށިގަނޑަށް ބާރުވެގެން ދިޔަ ގޮތް ހިލްޔާއަށް ނުފެނެއެވެ.

ވާނީވެސް އެހެންތާއެވެ. މިއީ ހިލްޔާގެ ކުރިމަތީގައި ރާފިލްއަށް ބަލިކަށިކަމެއް އިޙްސާސް ކުރެވުނު ދެވަނަ ފަހަރެވެ. އާނއެކެވެ. ފުރަތަމަ ފަހަރު ވެގެން ދިޔައީ މިއަދު ހެނދުނަށެވެ. އޭނަ ބުނެބުނެ ވެސް ހިލްޔާ އޭނައާއި މެދު ރަނގަޅަށް ނުވިސްނުމުން ކައިވެންޏަށް އެދެން ޖެހުނީ އަމިއްލަ ހިތާއި ދެކޮޅަށެވެ. އޭނަ އެވަގުތު ވެސް ހިލްޔާގެ ޖަޒުބާތުތަކުގެ ބޭނުން ހިފައި ކައިރިވާން އުޅުމުން ހިލްޔާ އެ ފުރުސަތެއް ވެސް ނުދިނެވެ. އެކަމާއި ހެދި ވެސް އޭނަ އައިސްފައިވީ އަމަށަކު ރުޅިއެއް ނޫނެވެ. މިއަދު މެންދުރު ހިލްޔާ ދެއްކި އެއްވެސް ވާހަކައެއް އަޑުނާހާ ހިލްޔާ ބޮޑު ފިހާރައަކަށް ގެންގޮސް ހިލްޔާ ވަރުބަލި ވާނެކަން ޔަޤީންވާހާ ވަރަށް ހިންގީ އެހެންވެއެވެ. އެހެނަސް އެއަށްފަހު ވެސް މިވީ ކިހިނެއް ހެއްޔެވެ؟

އަނެއްކާވެސް އޭނަ ދައްކަމުން ދިޔަ ވާހަކައަކަށް ހިލްޔާ ރައްދު ދީފިއެވެ. އޭނަގެ ކޮޅު އޭނައަށް މޮޅު ނުކުރެވޭނެ ޒާތަށެވެ. ކީއްވެ ހެއްޔެވެ؟ ކިހިނެއް ހެއްޔެވެ؟ މި އަންހެނާއަށް އޭނައާއި އެހެން ވާހަކަ ދައްކަން ކެރުނީ ކިހިނެއް ހެއްޔެވެ؟ އޭނަ ނިކަން ކުޅި ދައްކާލާނެއެވެ. ކައިވެންޏަކީ މާ ރީތި ގުޅުމެއްހެން ހިލްޔާއަށް ހީވާނަމަ ކައިވެންޏަކީ ނަރަކައެއްކަން އޭނަ ހިލްޔާއަށް ދައްކާލާނެއެވެ. އެ ބުނާ އިސްލާމް ދީނަކީ ތެދެއްކަމަށް ހިލްޔާ ހީކުރާނަމަ އެ ދީން ގަދަކަމުން ވިޔަސް އޭނަ ހިލްޔާ ލައްވާ ދޫކުރުވާނެއެވެ.

ރާފިލް މިހާވަރަށް ރުޅި އައިސް މިހާ ނުލަފާ ރޭވުންތައް ރޭވިކަން ހިލްޔާއަށް ރޭކާވެސް ނުލައެވެ. އެނގުނުހާ ވެސް ކަމަކީ އެދުވަހަށްފަހު ރާފިލް އޭނަ ގެންގުޅެމުން ދިޔައީ ‘އާސްމާނުގައި’ ކަމެވެ. ހިލްޔާ ހޮސްޕިޓަލަށް ގެންގޮސް ހޮސްޕިޓަލް ޑިއުޓީ ނިމުމުން ބަލާ އަންނަނީ ވެސް ރާފިލްއެވެ. އެ ހުރިހާ ވަގުތު ކާރު ތެރެއިން އިވެނީ ހިތާމަވެރި ވިޔަސް އުއްމީދީ ލޯބީގެ ލަވައެކެވެ. މާޒީގައި ކުރެވުނު ކުށަކަށް މަޢާފަށް އެދޭ ލަވަތަކެވެ. އެ ލަވަތައް އިއްވުމަށްފަހު ރާފިލް ހިލްޔާ ގެންދަނީ ބޮޑު މޯލަކަށެވެ. ނޫނީ 5 ތަރީގެ ރެސްޓޯރެންޓަކަށެވެ. ނޫނީ އަގުބޮޑު ކެފޭއަކަށެވެ. ކުރީ ދުވަހާއި ޚިލާފަށް ފަހުން އައިސް ރާފިލް ކޮންމެ ތަނަކަށް ދަނީ ވެސް ހިލްޔާގެ ހުއްދަ ހޯދައިގެން ހިލްޔާ ރުހޭތޯ ޔަޤީންކޮށްފައެވެ. ހޮސްޕިޓަލް ޑިއުޓީ ނިންމުމަށްފަހު ހިލްޔާ ގެއަށް ދާން ބޭނުން ވެއްޖެނަމަ ދެކޮޅު ހެދުމެއް ނެތި ގެއަށް ލައިދެއެވެ.

ރާފިލްގެ އުޅުން އަނެއްކާވެސް ބަދަލުވުމުން ހިލްޔާ އޮޅުން އަރާ ގޮތްވިއެވެ. އެ އޮޅުމުގައި އޮވެ ކޮންމެ ރެއަކު ހިލްޔާގެ ލޮލުން ނިދި ގެއްލިދެއެވެ. މީގެ ސަބަބުން ހިލްޔާ ޖަޒުބާތީ ގޮތުން ވެސް ބަލިކަށިވާ ގޮތްވިއެވެ. ޙަޔާތުގެ ބޮޑު ނިންމުމަކާއިމެދު އަބަދު ހަދަންވީ ގޮތެއް ޔަޤީން ނުވެފައިވާ ޙާލުގައި އުޅެންވުމުން ރޮވެން ވެސް ރޮވެއެވެ. އޭނައަށް ރަނގަޅު ހަމަ އެއްވެސް ގޮތެއް ނެތްހެން ހީވަމުން ދިޔައީތީވެއެވެ. ރާފިލްއާއި ކައިވެނި ކުރަން ނިންމިޔަސް ރާފިލް އޭނައަށް ގޯސްވުން ގާތެވެ. ރާފިލްއާއި ކައިވެނި ނުކޮށްފިނަމަ އޭނައަށް އެ ދޫކޮށްލެވެނީ އޭނައަށް ލިބިދާނެ ރަނގަޅު ބައިވެރިއެއްހެން ވެސް ހީވަމުން ދިޔައެވެ.

އެހެނަސް ދެން ކަންތައް ވާން ފެށީ ހިލްޔާ ހީވެސް ނުކުރާ ފަދައަކުންނެވެ. ރާފިލް ވަކި ހިސާބަކުން އެކި ފަހަރުމަތިން ދައްކަން ފެށި ވާހަކަތަކުގެ ޒާތުން ހިލްޔާގެ ހިތަށް އުދަގޫވާ ގޮތްވިއެވެ.

“ޔޫ ނޯ އައި ރިއަލީ ލައިކް ކްރިސްޓިއަން ވެޑިންގްސް.”

“ހިލްޔާ ވެޑިންގްގަ ލާނީ ވައިޓް ޑްރެސްއެއްދޯ؟ މޫނުގަ އަޅާ ލޭސް ވެއިލްއަކާ އެކީ؟”

“ހިލްޔާ އައިލްއިން ވޯކް ކޮށްފަ ދާއިރު އަހަންނަށް ރޮވޭނެ އައި ސްވެއާރ.”

“އެންމެންގެ މެދުން ހިނގާފަ ދޯ ހިލްޔާ އަހަރެން ގާތަށް އަންނާނީ؟”

“ބަޓް ވާއި ރާފިލް ވާއި؟!”

އެއްދުވަހު ހަވީރު ރާފިލްއާއިއެކީ ކެފޭއެއްގައި އިންދާ ރާފިލް ކޮށްލި ސުވާލަށް ހިލްޔާއަށް ބުނެވުނެވެ. އެހިނދު ރާފިލްގެ ދެބުމަ ކައިރިވިއެވެ.

“ކިހިނެއްވީ؟ ޔޫ ޑޯންޓް ލައިކްތަ މެދުން ހިނގާފަ ދާ އައިޑިއާ؟” ރާފިލް އެހިއެވެ.

“ނޮޓް ޖަސްޓް ދެޓް. ތި ބުނާ ކްރިސްޓިއަން ވެޑިންގް. ތިއީ މުސްލިމުން ކުރާ ކަމެއް ނޫނެއްނޫންތަ؟” ހިލްޔާއަށް ނުރުހުންތެރިކަމާއެކީ ބުނެވުނެވެ.

“ބަލަ ކްރިސްޓިއަން އޭ ބުންޏަސް ނޮޓް އެގްޒެކްޓްލީ ކްރިސްޓިއަން އޭ. އެހެންނޫނަސް މިހާރު ރާއްޖޭގަ ގިނަ މުސްލިމުން ވެސް މެރީކޮށް ހަދަނީ ހަމަ ބްރައިޑް ވައިޓް ޑްރެސް ލައިގެނެއް ނޫންތަ؟” ރާފިލް ބުންޏެވެ.

“ވައިޓް ޑްރެސްއެއް ނޫނޭ މައްސަލައަކީ. ތި ވެޑިންގް ސެރެމަނީ ވެސް ތި ރާވަނީ މުޅިން ތަފާތުކޮށް ނޫންތަ؟” ހިލްޔާ އެހިއެވެ. އެއާއިއެކު ރާފިލް ޗޮއްކަނޑާލިއެވެ.

“ނޫނޭ. ހަމަ މުސްލިމުން ކުރާ ގޮތަށޭ މެރީ ކުރާނީ. ހިލްޔާގެ ބައްޕަ ވަލީ ވެސް ދޭނެ. ކުރީ ދުވަހު ހިލްޔާ ބައްޕައަށް ގުޅާފަ ބުނިން އެދުވަހަކު އޮންލައިންކޮށް ގުޅާފައޭ ވަލީ ދޭނީ.” ރާފިލް ބުނެލި ވާހަކައިން ހިލްޔާ ޝޮކަކަށް ދިޔައެވެ.

“ވަޓް؟!” ޤަބޫލު ކުރަން ދަތިވެފައި ހިލްޔާއަށް އަހާލެވުނެވެ. ދެންމެ އިވުނީ އޭނައަށް މުޅިން އާ ޚަބަރެކެވެ.

“އާނ….ހިލްޔާ ވެސް ބޭނުންވަނީ އެގޮތް ނޫންތަ؟ ކުރީ ދުވަހު ބުނީމެއްނު ފެމިލީ މީހުންނަށް ވެސް މިހާ ދުރަށް އަންނަން އުދަގޫވާނެއޭ. ސޯ އައި ތޯޓް އެގޮތަށޭ ހިލްޔާ ބޭނުންވާނީ.” ރާފިލް ބުންޏެވެ.

އެއާއިއެކު ހިލްޔާގެ އަނގައިން ލުއި އާހެއްގެ އަޑު ނިކުތެވެ. އެއާއިއެކު އެތަނުން ތެދުވެލެވުނީ އެއްވެސް އިޚްތިޔާރަކާއި ނުލައެވެ. އަދި ރާފިލްއަށް ފަސްދީފައި ދާން ހިނގައިގަނެވުނެވެ. ރާފިލްއަށް އެވަގުތު ނުރުހުންވީ ވަރުންނެވެ. ކޮންމެ ގޮތެއްވިޔަސް ރާފިލް އޭނަގެ ފަސްފަހަތުން ކެފޭއިން ނިކުމެގެން އައިސް ތިމަންނައަށް ގޯހެއް ހެދުނީތޯ އެހުމުން ހިލްޔާއަށް މަޑުކޮށްލެވުނެވެ. އެހިނދު ހިލްޔާ އެއްޗެކޭ ބުނަން ބޭނުންވިޔަސް އެއްޗެކޭ ނުބުނެވުނެވެ. ރާފިލްއާއި ޖަދަލު ކުރާނެ ހިތްވަރެއް އޭނަގެ ނެތެވެ. ރާފިލް ތިމަންނަ ގެއަށް ގެންގޮސްދެންތޯ އެހުމުން ހިލްޔާއަށް އާނއެކޭ ބުނެ ކާރަށް އެރުނީ އެހެންވެއެވެ.

**

އޯސިސް ފިހާރައިގެ މަތީ ބައިގައި ހުންނަ އޮފީހުގައި ނަހީދު އިނީ ކޮމްޕިއުޓަރުން މަސައްކަތެއް ކުރާށެވެ. 10 ޖަހަމުން ދިޔަ ވަގުތު މަސައްކަތް ނިމުމާއިއެކު ނަހީދަށް ފުން ނޭވައެއް ދޫކޮށްލެވުނެވެ. އެއަށްފަހު އިށީނދެގެން އިން ބޮޑު ގޮނޑިއަށް ލެނގިލަމުން ނަހީދު މޭޒުމަތީގައި އޮތް އޭނަގެ ފޯނު ނަގައި ފޯނު ސްކްރީނުގައި އިނގިލި ޖެއްސިއެވެ. އެއާއިއެކު ލޮކް ސްކްރީނުގައި ހުރި ފޮޓޯ ފެނިފައި މިހާރުގެ އާދައިގެ މަތިން ހުއްޓުން އަރާ ގޮތްވިއެވެ.

ލޮކް ސްކްރީނުގައި ހުރީ ހިލްޔާ މެޑިކަލް ސްކޫލްއިން ގްރެޖުއޭޓްވީ ދުވަހު ނަހީދާއެކީ ނަގާފައި ހުރި ފޮޓޯއެކެވެ. ޔުނިވާރސިޓީގެ ކުރިމަތީގައި އޮތް ފެނި ވިނަގަނޑުމަތީގައި ހިލްޔާ ނަހީދު ކައިރި ހުއްޓިލައިގެން ހުރިއިރު އެ މޫނުމަތީގައި ފުރިހަމަ ހިނިތުންވުމެއްވިއެވެ. ލައިގެން ހުރި ގްރެޖުއޭޝަން ގައުން ފެނިފައި ނަހީދު އަދާއި ޖެހެން ވެސް ފަޚުރުވެރިވެއެވެ. އެ ފޮޓޯ ފެންނަ ކޮންމެ ފަހަރަކު އަބަދުވެސް އެދެވެނީ ދަރިފުޅުގެ އުފާވެރިކަމާއި ކާމިޔާބަށެވެ.

އެހެނަސް މިފަހުން ނަހީދު އެ ފޮޓޯ ލޮކް ސްކްރީނަށް ލާންޖެހުނީ ހިލްޔާ މަތިން ހަނދާންވާ ވަރުންނެވެ. އެއީ އޭނަގެ ލޮލަށް ނުފެންނަ ދަރިފުޅު ކަމަށްވުމުންނެވެ. އަދި މިހާރު އެ ދަރިފުޅާއިމެދު އެންމެ ކަންބޮޑުވާ ދަރިފުޅަށް ވުމުން ވެސްމެއެވެ. އެ ކަންބޮޑުވުން ދެ ގުނަވެފައިވަނީ ކުރީ ދުވަހު ލިބުނު ރާފިލްގެ ކޯލަކުންނެވެ.

“ހެލޯ ނަހީދުބެ. ހިލްޔާ ބުނީ ނަހީދުބެ ކޮންމެހެން ވެޑިންގްއަށް ނަޔަސް އޯކޭއޯ. އޮންލައިންކޮށް ވަލީ ދިނަސް އޯކޭ ވާނެ ނޫންހެއްޔޯ. ސޯ ކޮންމެހެން އެވަރަށް ޚަރަދުކޮށްފަ މިކޮޅަށް ނައުމަށް އަންގަން މި ގުޅާލީ.”

ރާފިލްގެ އެ ބަސްތަކުން ނަހީދުގެ މޭގައި ރިހުމެއް އުފެދުނެވެ. ކޮންމެހެން ރާފިލް އޭނަގާތު ނާންނާށޭ ބުނީތީވެއެއް ނޫނެވެ. އެހެނެއްކަމަކު އޭނަގެ ދަރިފުޅު އޭނަ އެހާ ދުރުކޮށްލީހެން ހީވުމުންނެވެ. މިފަހުން އައިސް ހިލްޔާއަށް ގުޅާއިރު ހިލްޔާ އަބަދުވެސް ބަލި އަޑަކުން ވާހަކަ ދައްކާތީ ނަހީދު ހުންނަނީ ހިލްޔާގެ ޙާލު އަމިއްލަ ލޮލުން ބަލަން ބޭނުންވެފައެވެ. އެކަމަށްޓަކައި އެކޮޅަށް ދިޔުމަށް ޓިކެޓް ވެސް ނެގިފައިވެއެވެ. އެހެނަސް ހިލްޔާ ބޭނުންވަނީ އެ ގޮތް ނޫންހެން ހީވުމުން އިންތިހާއަށް ދެރަވާ ގޮތްވިއެވެ. ސީދާ ހިލްޔާ ގާތު އެ ސުވާލު ނުކުރެވި ހުރީ، ޚުދު ހިލްޔާގެ ދުލުން އެ ބަސްތައް އިވިއްޖެނަމަ އޭނައަށް ވެދާނެ ގޮތެއް ޔަޤީން ނުވީތީވެއެވެ.

ނަހީދު ހިތްދަތި ޚިޔާލުތަކުގައި އިންދާ، ކުއްލިއަކަށް ވައިބާރ ކޯލެއް އަންނަން ފެށުމުން ނަހީދަށް ސީދާ ވެލެވުނެވެ. ސްކްރީނުގެ މަތިން ހިލްޔާގެ ނަން ފެނިފައި ނަހީދަށް ޤަބޫލު ކުރަން ވެސް ދަތިވެފައިވެއެވެ. އެއްވެފައިވާ ޖަޒުބާތުތަކާއިއެކީ ނަހީދު ކޯލު ރިސީވްކޮށް ފޯނު ކަންފަތުގައި ޖެއްސިއެވެ.

“ހެލޯ ދަރިފުޅު. ދަރިފުޅު ކިހިނެއް؟” ނަހީދަށް އަވަސްއަވަހަށް ސުވާލުކޮށްލެވުނެވެ.

ލަންޑަންގެ އެޕާޓްމެންޓްގައި އޭނަގެ އެނދު ކައިރިން ބިންމަތީގައި އިށީނދެގެން އިން ހިލްޔާ، އާދައިގެ މަތިން ބައްޕަގެ އޯގާތެރި އަޑު އިވިފައި ފެންކަޅިވާ ގޮތްވިއެވެ. އެހެނަސް ފުން ނޭވައެއް އެތެރެއަށް ލަމުން ވާހަކަ ދެއްކިއެވެ.

“ރަނގަޅު ބައްޕާ. ބައްޕަ ކިހިނެއް؟” ހިލްޔާ ތުރުތުރު އަޅާ އަޑަކުން އެހިއެވެ.

“ބައްޕަ ވެސް….ރަނގަޅު. ދަރިފުޅު ކީއްކުރަނީ؟ ކައިފިންތަ މިރޭ؟” ނަހީދު އޭނަގެ ޖަޒުބާތުތައް ކޮންޓްރޯލް ކުރަމުން އެހިއެވެ.

“އާނ ބައްޕާ ކުޑަ ގޮތެއް ހަދައިގެން. ބައްޕަ އަންނާނަން ދޯ އަހަރެންގެ ވެޑިންގްއަށް؟ މިކޮޅަށް؟” ހިލްޔާ އެހިއެވެ. ހިލްޔާގެ އެ ސުވާލުން ނަހީދުގެ ދެބުމަ ކައިރިވިއެވެ.

“އެކަމަކު….ދަރިފުޅު ބޭނުމެއް ނުވެއެއްނޫންތަ ބައްޕަ ތިކޮޅަށް ދާން. ރާފިލް ބުނީ އެހެން.” ނަހީދު ބުންޏެވެ.

“ނޫން. ބައްޕަ އާދޭ. ބައްޕަ ޕްލީޒް އާދޭ.” ހިލްޔާ އެހެން ބުނެލި ހިނދު އެ ދެލޮލުން ކަރުނަ ފައިބައިގެން އައެވެ. އެހިނދު ރޮވެން އުޅުމުން ގިސްލުމުގެ އަޑު ބޭރުވިޔަ ނުދިނުމަށްޓަކައި އަނގަމަތީގައި އަތް އަޅާލެވުނެވެ.

“އޯކޭ ދަރިފުޅު. ދަރިފުޅު ބުނިއްޔާ ބައްޕަ އަންނާނަން.” ނަހީދު ވެސް އަސަރުން ފުރިފައިވި ހިތަކާއެކީ ބުނެލި ހިނދު އެ ލޮލުން ކަރުނަ ހިލުނެވެ. އެހިނދު ހިލްޔާ ކުއްލި ގޮތަކަށް ފޯނު ކަނޑާލުމުން ނަހީދަށް ފޯނު ކަންފަތުން ވަކިކޮށްލަމުން ފޯނުގެ ސްކްރީނަށް ނަޒަރެއް ދެވުނެވެ. އެހެނަސް އެވަގުތު ސްކްރީން ފެނުނީ ކަރުނުން ފުސްވެފައިވި ލޮލުންނެވެ.

އެވަގުތު ހަނދާނަށް އައީ ހިލްޔާގެ އެންމެ ކުޑައިރުގެ ހަނދާނެކެވެ. ހިލްޔާއަކީ ކުޑައިރު ކިތަންމެ ބަލިވިޔަސް އަދި ކޮންމެ ކަމެއް ދިމާވިޔަސް ސްކޫލްގައި ގަދަ ހަދައިގެން ހުންނަ ކުއްޖެކެވެ. މުދައްރިސުން އެދުނަސް ބައްޕައަށް ނުގުޅައިވޭތޯ މަސައްކަތް ކުރާނެއެވެ. އެހެނަސް އެއްދުވަހު ސްކޫލުން ގުޅީ ހިލްޔާ ކުޅުމުގެ ތެރެއިން ވެއްޓި އަތް ބިންދައިގެން ދިޔުމުންނެވެ. އެދުވަހު މުދައްރިސް ހިލްޔާގެ އަތަށް ފޯނު ދިނުމުން ރޮއިރޮއިފައި ބައްޕަ އައިސް ދިނުމަށް އެދުނެވެ.

މިއަދު ހިލްޔާ އޭނައަށް އެފަދައިން ގުޅައި އާދޭސް އެ ކުރަނީ ކޮންފަދަ ޙާލެއްގައި އުޅޭތީތޯ އެވަގުތު ހިތަށްއެރިއެވެ. އެހިނދު ލޮލުން ކަރުނަ ފައިބަން އުޅުމުން އަތުގެ އިނގިލިތަކުގެ ލޮލުގައި އަތް އަޅާލެވުނެވެ. އެހިނދު ނަހީދުގެ ލުއި ގިސްލުމެއްގެ އަޑު އިވެން ފެށިއެވެ.

**

ހިލްޔާގެ ޙަޔާތަށް އައިސްގެން އުޅޭ ޠޫފާނާއިމެދު ރޭކާވެސް ލުމެއްނެތި ދާނިޝް އުޅެމުން ދިޔައެވެ. މާސްކް ނަގާލުމަށްފަހު ދާނިޝް އުޅެމުން ދިޔައީ ނުހަނު ހަމަޖެހޭ ދިރިއުޅުމެކެވެ. އެކުވެރިން ހީކުރި ފަދައިން މިފަހުން އައިސް ސޯޝަލް މީޑިއާގައި އަބަދުހެން ދައުރުވަނީ އޭނަ ކޮންމެވެސް ރަނގަޅުކަމެއް ކުރާ މަންޒަރެވެ. ނަތީޖާއެއްގެ ގޮތުން އޭގެއިން ބައެއް ކަންތައް ‘ޓްރެންޑް’ ވެސް ވެގެންދެއެވެ. ‘ބީ ލައިކް ޑޭން’ ހޭޝްޓެގް ގެ ދަށުންނެވެ. މިއީ ފަޔާޒް ހެދި ހޭޝްޓެގަކަށް ވިޔަސް މި ހޭޝްޓެގް ސޯޝަލް މީޑިއާގައި ގިނަ ދުވަހަށް ދެމިގެން ދިޔައެވެ.

ދާނިޝްގެ ހިތަށް އެންމެ ބޮޑު އުފަލެއް ލިބުނީ ނަމާދަށް މިސްކިތަށް ދިޔުން ސޯޝަލް މީޑިއާގައި ޓްރެންޑް ވެގެން ދިޔުމުންނެވެ. އެކަންތައް ބައެއް މީހުން ހަޖޫޖަހައި ކުރިން ދާނިޝްގެ ފޭނުންނަށް އުޅުނު މީހުން ވެސް ދާނިޝް މަތިން ފޫހި ކޮށްފައިވެއެވެ. ދާނިޝް ވެސް މާ ‘އެކްސްޓްރީމް’ ވީ އޭ ކިޔައި އެމީހުން ދާނިޝް ދޫކޮށްލީއެވެ. އެހެނަސް އަނެއްބައި ފޭނުން ދެންވެސް ދާނިޝް ‘ފޮލޯ’ ކުރަމުން ދިޔައެވެ. ހަމަ އެކަނި ސޯޝަލް މީޑިއާއިންނެއް ނޫނެވެ. މީގެ އިތުރުން އެމީހުންގެ ޢަމަލުތަކުން ވެސް ދާނިޝް އުޅޭ ގޮތަށް އުޅެވޭތޯ މަސައްކަތް ކުރަމުން ދިޔައެވެ.

މިހާ ހިސާބަށް އައިއިރު ދާނިޝްއަށް ނުހަނު ރީތިކޮށް ޤުރުއާން ކިޔަވަން ދަސްވެފައިވެއެވެ. އެކީގައި ޤުރުއާން ކިޔަވާ ކުޑަ ކުދިންނާއި މުޅިން އެކުވެރި ވެފައިވެއެވެ. އެކުދިންނާއި ‘ޑީލް’ ޖައްސާހާ ގާތްވެފައިވެއެވެ. ޑީލެއް ޖައްސަނީ ކުއްޖަކު ރަނގަޅު ކަމެއް ކޮށްފިނަމަ އޭގެ އަނެއްދުވަހު ދާނިޝް އެ ކުއްޖަކަށް ޗޮކްލެޓެއް ދޭ ގޮތަށެވެ. ނޫނީ އެ ކުއްޖަކު ބޭނުންވާ ކަމެއް ކޮށްދޭ ގޮތަށެވެ. މިގޮތުން އަވަހަށް ޤުރުއާން ފިލާވަޅު ދަސްކުރުމަށާއި، ގޭގައި މަންމަމެންނަށް އެހީވުމަށާއި، މިސްކިތުން ފެންނަ މުސްކުޅި ބޭބެއިންނަށް ގޮނޑި ނަގައި ދިނުން ފަދަ ރީތި އާދަތައް ދާނިޝް މެދުވެރިވެގެން އެކުދިންނަށް ދަސްވެފައިވެއެވެ. މިސްކިތުގައި ޤުރުއާން ދަސްކުރާ ވަގުތު ކުއްޖަކު ފޫހިވެއްޖެނަމަ ‘ޓްރުތް އޯރ ޑެއާރ’ ވެސް ކުޅެއެވެ. އެއީ ކުއްޖެއްގެ ޚިޔާލެއްގެ މަތިން ދާނިޝް ފެށި ކަމެކެވެ. އެހެނަސް ޑެއާރ ކުރަނީ ވެސް، ރުޅިވެފައިވާ ކުއްޖަކަށް މަޢާފުކުރުން ފަދަ ކޮންމެވެސް ރަނގަޅުކަމެއް ކުރުމަށެވެ.

ކުރިން ދާނިޝް އެ ކުދިންގެ ތެރޭގައި މަޝްހޫރުވެފައިވަނީ ‘މާސްކް ބޭބެ’ ގެ ގޮތުގައި ކަމަށްވިޔަސް މިހާރު އެއީ ހުރިހާ ކުދިންގެ ދޮންބެއެވެ. ‘ޑޭންބެ’ ގެ ނަމުން ފެށުނު ނަން ބަދަލުވަމުން ގޮސް ހެދުނު ނަމެކެވެ.

ދާނިޝް ޢައްމާ ފޮތް އެއްކޮށް ހިތުދަސްކޮށް ޤުރުއާން މުދައްރިސަށް ކިޔައިދޭން ތިބި ދުވަހު ހުރިހާ ކުދިން ވަށައިގެން ކަނުލާ އަޑުއަހަން ތިއްބެވެ. ދާނިޝް އެއްވެސް ކުށެއްނެތި ނާސް ސޫރަތާއި ހިސާބަށް ދިޔުމުން ހުރިހާ ކުދިން ވެސް ނުހަނު ޖޯޝާއިއެކީ ބަލަން ތިއްބެވެ. ބައެއް ކުދިންނަށް މަޑުން ވެސް ނުތިބެވެއެވެ. ދާނިޝް ފަހު އާޔަތް ކިޔަވައި ނިމުމާއިއެކު ހުރިހާ ކުދިން ‘ޔެސް’ އޭ ކިޔައި ހަޅޭއްލަވަމުން ގޮސް ދާނިޝްގެ ގައިގައި ބައްދާލަން އައެވެ. އެއާއިއެކު ދާނިޝް އޭނައަށް އަތްލެވޭ ކުދިންގެ ގައިގައި ފިރުމާލަމުން ހީލިއެވެ.

“ދޮންބެ ދޮންބެ ބަލާ. މިއީ ހުރިހާ ކުދިން ދޮންބެއަށް ދޭ ކާޑެއް.”

މައިސޫން އެއްފަރާތަކުން އައިސް ދާނިޝްއަށް ހުދުކުލައިގެ ލަންބާލެވިފައިވާ ގަނޑެއް ދިއްކޮށްލުމުން ހުރިހާ ކުދިން ދާނިޝްއާއި ދުރުވެލިއެވެ. ދާނިޝް އެ ގަނޑު ނިއުޅާލަމުން އެތެރެ ބަލާލިއެވެ. ބޮޑު އިނގިރޭސި އަކުރުން ‘ޤުރުއާން ޕާޓީ’ އޭ ލިޔެވިފައި ތިރީގައި ‘ޓައިމް’ އޭ ލިޔެވި 5 ލިޔެވިފައިވެއެވެ.

“މިއަދު 5 ކުންތަ؟ ކޮން ގެއަކު ޕާޓީ އޮތީ؟” ދާނިޝް މައިސޫން ކުރެން އެހިއެވެ. އެއާއިއެކު އެއްކުއްޖަކަށްވުރެ ގިނަ ކުދިން އެކީގައި ޖަވާބު ދޭން ފެށިއެވެ.

“މައިސޫންގެ ގޭ. މިހާރު އަންނަންވީ. ބައްޕި ހުންނާނެ ވެއިޓް ކޮށްގެން.” އެއްވެގެން ދިޔަ އަޑުތަކުގެ ތެރެއިން ނުފޭދި ދިޔަ މައިސޫންގެ ވާހަކަ ދާނިޝް އަޑުއެހިއެވެ.

“ދޮންބެ އެކަނިތަ އަންނަންވީ؟ މިކުދިންނަށް އިންވައިޓް ނުކުރަންތަ؟” ދާނިޝް އެހިއެވެ. އެއާއިއެކު ދާނިޝްގެ ފަހަތުގައި ހުރި ފިރިހެން ކުއްޖަކު ވާހަކަ ދެއްކިއެވެ.

“ނޫނޭ ހުރިހާ ކުދިން ދާނެ. މިއަދު މަންމިމެން ބަލާ އަންނާނީ މައިސޫންމެންގެ ގެއަށޭ ޔޫއްކޮ މަންމި ބުނީ.” ޔޫއްކޮ އެހެން ބުނުމުން އެހެން ކުދިން ވެސް އާނއެކޭ ބުނެ ބޯޖަހާލިއެވެ. އެއާއިއެކު މިއީ ފަޔާޒްގެ ރޭވުމެއްކަން އެނގުނެވެ. އެހިނދު ޤުރުއާން މުދައްރިސް ތިމަންނަ ވެސް ދާންވާނެ ނޫންހޭ ބުނެ ތެދުވެލުމުން އެންމެންނަށް ހީލެވުނެވެ.

ދާނިޝްއާއި ޤުރުއާން މުދައްރިސް ހުރިހާ ކުދިން ގޮވައިގެން މިސްކިތާއި ދާދި ކުރިމަތީގައި ހުންނަ އެޕާޓްމެންޓް ޢިމާރާތަށް ދިޔައެވެ. އަދި 10 ކުދިން ދެ ބަޔަކަށް ބަހާލައިގެން ދާނިޝްއާއި ޤުރުއާން މުދައްރިސް ލިފްޓުން ފަޔާޒްގެ އެޕާޓްމެންޓަށް ދިޔައެވެ. ފަޔާޒްގެ އެޕާޓްމެންޓް ހުރީ ޕާޓީއަށް ނުހަނު ރަނގަޅަށް ތައްޔާރު ކޮށްފައެވެ. ފުއްޕާހަމާއި ފެއަރީ ލައިޓްސްއިން ގޭތެރެ ރީތި ކުރެވިފައިވީއިރު ގޭގެ ދިގު ކާމޭޒުދޮށުގައި ހުރިހާ އެންމެންނަށް އިށީނދެވޭ ގޮތަށް ހުއްޓެވެ. އެކި ބާވަތުގެ ހެދިކާ ހުރިއިރު، މެދުގައި ‘ކޮންގްރެޖުލޭޝަންސް ދޮންބެ’ ލިޔެވިފައިވާ ކުޑަ ޗޮކްލެޓް ކޭކެއްވިއެވެ. ދާނިޝް ކޭކު ފަޅައި ހުރިހާ ކުދިންނަށް ވެސް ކޭކުކޮޅުތައް ބަހާލަ ދިނެވެ. ކުދިންނާއި އެކީގައި ކުރެވެމުން ދިޔަ ސަމާސާތަކާއިއެކީ ވަގުތު ފާއިތުވަމުން ދިޔަ ގޮތެއްވެސް ނޭނގުނެވެ. އެންމެ މަޖާވީ މައިސޫން ދާނިޝްއަށް ދޭން އުޅޭ ހަދިޔާއެއްގެ ވާހަކަ އައުމުންނެވެ.

“އެނގޭތަ ދާނިޝް މައިސޫން އުޅުނޭ ދާނިޝްއަށް ދޭން ހަދިޔާއެއް ގަނެދޭން. އެކަމަކު މަށަށް ޓައިމެއް ނުވެގެން އެއިނީ ނުދެވިފަ.” ފަޔާޒް ދާނިޝްގެ ކުރިމައްޗަށް ވާ ގޮތަށް ކާމޭޒުދޮށުގައި އިނދެ ބުންޏެވެ. އެއާއިއެކު ސިޓިންގް ރޫމުގެ ސޯފާގައި އިން މައިސޫން ކުއްލި ގޮތަކަށް އެތެރެއަށް ނޭވައެއް ދަމާލިއެވެ.

“އޯހް ނޯ! ދޮންބެ ގެ ގިފްޓް! އެބަ އަންނަން ދޮންބޭ!” މައިސޫން ފުންމައިގެން ސޯފާއިން ތެދުވެލަމުން ދުވެފައި ގޮސް ކޮޓަރިއަށް ވަނެވެ. އެހިނދު ދާނިޝްއާއި އެއްވަރަށް ފަޔާޒް ވެސް އޮޅުން އެރިއެވެ.

މައިސޫން ނިކުމެގެން އައީ ރިހިކުލައިގެ ވިދާ ގަނޑަކުން ވަރަށް ގަދައަށް ބަންދު ކުރެވިފައިވާ އެއްޗެއް ހިފައިގެންނެވެ. ދާނިޝްގެ އަތަށް އޭތި ލިބުނުއިރު އޭގެ ވަށައި ވަށައި ގިނައިން ޓޭޕު އެޅިފައިވި ގޮތުން އެއީ މައިސޫން އަމިއްލައަށް ހެދި ހަދިޔާއެއްކަން އެނގުނެވެ. ދާނިޝް އޭތި ކަނޑައި ބަލާލިއިރު އެއީ ދެބައިކުޅަ އެއްބަޔަށް ބޭނުން ކުރެވިފައިވާ ތުނބުޅީގައި ލާ ތެޔޮ ފުޅިއެކެވެ. ދާނިޝް އެއަށް ބަލަން އިނދެފައި ފަޔާޒަށް ބަލާލި ހިނދު ފަޔާޒް ހަޅޭއްލަވާފައި ތިއީ މަގޭއޭ ކިޔަން ފެށިއެވެ. އެއާއިއެކު ދާނިޝް ސަމާސާއަކަށް ދެނެއް ނުލިބޭނެއޭ ކިޔަން ފެށިއެވެ. އެ ސަމާސާ ނިމުނީ ދެ އެކުވެރިންނަށް ވެސް ގަދައަށް ހެވުމުންނެވެ.

ކުދިން ލަސްލަހުން މަދުވަމުން ގޮސް ދެ ތިން ކުދިންނަށް ވީ 6 ޖަހަން ގާތްވަމުން ދިޔަ ވަގުތެވެ. އެހިނދު ދާނިޝްއާއި ފަޔާޒް ކުޑަކޮށް ތާޒާ ވައި ހޯދާލަން ދިޔައީ ގޭގެ ބެލްކަންޏަށެވެ. މަޣްރިބަށް ގޮވަން އަދި ވަރަށް ވަގުތު އޮތުމާއިއެކު މިސްކިތް ކައިރީގައި ހުރުމުންނެވެ.

“ދެން ކޮބާ ޕްލޭނަކީ ދާނިޝް ގެ؟” ފަޔާޒް ހިމޭންކަމުގެ ތެރެއިން ސުވާލު ކުރިއެވެ.

“ކޮން ޕްލޭނެއް؟” ދާނިޝްއަށް އަހާލެވުނެވެ.

“ޢައްމާ ފޮތް ތި ދަސްވީ. ދެން އިތުރަށް ދަސް ނުކުރާނަންތަ؟” ފަޔާޒް އެހިއެވެ. އެއާއިއެކު ދާނިޝް ފުން ނޭވައެއް ދޫކޮށްލިއެވެ.

“ދަސްކޮށްފަ ހަނދާން ނެތިއްޖެއްޔާޔޯ؟” ދާނިޝް އެހިއެވެ.

“ތިއީ ގަންނަން ޖެހޭ ބިރެއް ނޫން. ޤުރުއާން ހަނދާން ކުރަން މަސައްކަތް ކުރާ އަޅަކަށް ﷲ ތަޢާލާ އެކަން ފަސޭހަ ކޮށްދެއްވާނެ. މި ސުވާލަށް ޖަވާބު ދީބަލަ. ދާނިޝްގެ މަންމައަށް ދާނިޝް ސަޕްރައިޒެއް ދޭން ބޭނުންތަ؟” ފަޔާޒް އެހިއެވެ. އެއާއިއެކު ދާނިޝްއަށް ފަޔާޒާއި ދިމާލަށް ބަލާލެވުނެވެ.

“މަންމައަށް ކިހިނެއް ސަޕްރައިޒެއް ދޭނީ؟” ދާނިޝް އެ ސުވާލު ކުރަމުން މާޔޫސީ ގޮތަކަށް އިސްޖަހާލިއެވެ.

“އާޚިރަތުގަ ވާހަކައޭ. ދާނިޝް ޤުރުއާން ހިތުދަސްކޮށްފިއްޔާ މަންމައަށް ތާޖެއް ލިބޭނެއެއްނު؟ ބައްޕައަށް ވެސް؟” ފަޔާޒް ބުންޏެވެ. އެއާއިއެކު ދާނިޝްއަށް ކަމެއް އެނގުންވީ ފަދައަކުން ދެލޯ ބޮޑުކޮށްލެވުނެވެ. ފަޔާޒް އެ ބުނި ވާހަކައަކީ އެއީ ކުރިން ވެސް އޭނައަށް އެނގޭ ވާހަކައެކެވެ. އެހެނަސް ހަނދާން ނެތިފައިވީ ވާހަކައެކެވެ.

ދާނިޝް އެއްޗެކޭ ނުބުނެ ހުއްޓާ ފަޔާޒް އަނެއްކާވެސް ވާހަކަ ދެއްކިއެވެ.

“އަޅެ ޓްރައި ކޮށްލަބަލަ. އޭރުން ސުވަރުގެއިން ދިމާވެފަ މަންމަ ޝޮކެއްގަ ހުރެފަ ބުނާނެ، ތިމަންނަގެ ސެލެބްރިޓީ ދަރިފުޅު ޤުރުއާން ހިތު ދަސްކޮށްފިއޭ.” ފަޔާޒް ހެވިފައި ހުރެ ބުންޏެވެ. އެއާއިއެކު ދާނިޝް ވެސް ހީލިއެވެ.

“ދޯ؟ ޓްރައި ކުރަންވީ ހަމަ.” ދާނިޝް ޚިޔާލަކަށް ގެއްލެމުން ބުނެލިއެވެ. މަންމައާއި ބައްދަލުވުމުގެ ޚިޔާލެވެ.

“ހުމް…..ބޭރަށް ދިޔަޔަސް ޤުރުއާން ދޫކޮށްނުލައްޗޭ. ހަމަ ދާން ޖެހޭތަ؟ ދެން އަނބުރާ މިކޮޅަށް ނާންނާނަން؟” ފަޔާޒް އެހިއެވެ.

“އަނބުރާ ނާންނަ ގޮތަކަށް ނޫން. ރާއްޖެ ނައިސް ދެން ނުހުރެވޭނެ. މިހާރު މި ދަނީ ހަމަ ދާން ބޭނުންވެގެން. ޕެއިޑް ލީވްގެ އަދި ދެ މަސް ބާކީ އެބަހުރި. ލީވްގަ ހުއްޓަސް އެކޮޅުގެ މަސައްކަތް އޮންލައިން ކޮށް ކުރަމުން ދިޔައީ. އެކަމަކު މިހާރު ދެން އިން ޕާރސަން ގޮއްސަ މަސައްކަތް ދާ ގޮތް ބަލާލަން ބޭނުން.” ދާނިޝް ކިޔައިދިނެވެ.

“ހުމް…ގޮއްސަ ވީހާ ވެސް އަވަހަކަށް އަންނައްޗޭ. ވަރަށް ހަނދާންވާނެ ދާނިޝް މަތިން.” ފަޔާޒް ބުންޏެވެ. ދާނިޝް ބޯޖަހާލިއެވެ.

ހަމަ އެވަގުތު ފަޓުލޫނުގެ ޖީބުގައި އޮތް ފޯނު ރިންގުވާން ފެށިއެވެ. ފޯނު ނަގައި ބަލާލިއިރު ގުޅަނީ ނަހީދުބެއެވެ. ފަޔާޒަށް އެ ވާހަކަ އެންގުމުން ފަޔާޒް އެތެރެއަށް ދާން ހިނގައިގަތެވެ. އެހިނދު ދާނިޝް ފޯނު ނެގިއެވެ.

“ހެލޯ ނަހީދުބެ.” ދާނިޝް ބުންޏެވެ.

“ހެލޯ ދާނިޝް. ދާނިޝް ފުރަނީ ކޮން ދުވަހަކުއޭ އެ ދުވަހު ބުނީ؟” ނަހީދުބެ އެކޮޅުން އެހިއެވެ.

“ޑިސެމްބާރ 28 ގަ. ކިހިނެއްވީ؟” ދާނިޝްއަށް އަހާލެވުނެވެ.

“ޖެނުއަރީ 1 ގެ ފަހަށް މަޑު ނުކުރެވޭނެތަ؟ ޖެނުއަރީ 1 ގަ ހިލްޔާގެ ކައިވެނި އެބައޮތް ޔޫކޭގަ. އެހެންވެ އެ ތާރީޚަށް ފުރަން ނަހީދުބެ މިއުޅެނީ. ދާނިޝް މިކޮޅުގަ ހުރިއްޔާ ހިތްހަމަޖައްސައިގެން ބޭބެއަށް ފުރޭނެ.” ނަހީދުބެ އެދުނެވެ.

އެހިނދު ދާނިޝް ހިމޭންވާ ގޮތްވިއެވެ. އަނެއްކާވެސް ހިލްޔާގެ ކައިވެނީގެ ވާހަކައިން ހިތުގައި ރަނގަޅުވާން ފަށާފައިވި ޒަޚަމަށް އަނެއްކާވެސް ތަދުވިއެވެ.

ނުނިމޭ