ނަފްސީ (ފަންސާސް އެއްވަނަ ބައި)

ނަފްސީ (ފަންސާސް އެއްވަނަ ބައި)

އެ ޚިޔާލުތަކުގައި ހުރެ ހިލްޔާއަށް ވަގުތުން އޭނަގެ އެނދުގެ ކައިރިއަށް ދެވުނީ ފޯނު ނެގުމަށެވެ. އަރިމަތީ މޭޒުމަތީގައި އޮތް ފޯނު ނަގައި ހިލްޔާއަށް ވަގުތުން ބައްޕައަށް ގުޅާލެވުނެވެ.

“ހެލޯ ބައްޕާ. ކޮން ދުވަހަކުތަ ކްލިނިކަށް ޖޮއިން ކުރަންވީ؟” ހިލްޔާއަށް ވަގުތުން އަހާލެވުނެވެ.

“ހަމަ….ޖޮއިން ކުރަންވީ މި ހަފްތާގަ ވެސް. ހާދަ ކުއްލި ގޮތަކަށް ދަރިފުޅު ތި ނިންމީ؟” ބައްޕަ އެކޮޅުން އެހިއެވެ.

“އާނ….ޑޮކްޓަރަކަށް ވީ މަޤްޞަދު ހަނދާންވީ. އެނގޭ ކުރީ ފަހަރު ވެސް ވަރަށް ކުއްލި ގޮތަކަށް ކަން ކްލިނިކަށް ޖޮއިން ކުރީ ބައްޕާ. އެކަމަކު މިފަހަރު ބައްޕަ ޑިސްއެޕޮއިންޓް ނުކުރާނަން އިން ޝާ ﷲ.” ހިލްޔާ ބުންޏެވެ.

“ހެހެ….ކުރީ ފަހަރު ވެސް ދަރިފުޅު ޑޮކްޓަރެއްގެ ގޮތުގަ ޑިސްއެޕޮއިންޓިންގްއެއް ނޫނޭ. ބައްޕައަށް އަބަދުވެސް އެނގޭ ހިލްޔާއަކީ މޮޅު ޑޮކްޓަރެއްކަން.” ބައްޕަ ވާހަކަ ދެއްކިއެވެ.

“ނޫން ބައްޕާ. އަހަންނަށް އެނގޭނީ އަހަރެން ފަރުވާ ކުޑަ ކުރި ވަރު. ހަމައެކަނި އަމިއްލަ އެދުމުގަ އޭރު މަސައްކަތް ކުރަމުން ދިޔައީ. އެކަމަކު މިހާރު ބޭނުންވަނީ ބަލިމީހުންނަށް އެންމެ ފުރިހަމަ ފަރުވާ ފޯރުކޮށްދޭން….. މަންމަ ގޮތަށް.” ހިލްޔާ ބުންޏެވެ.

ފޯނުގެ އަނެއްކޮޅުގައި އިން ނަހީދަށް ހިލްޔާގެ އެ ފަހު ބަސްތައް އިވުނު ހިނދު ހިމޭންވާ ގޮތްވިއެވެ. ތުންފަތްމައްޗަށް ވެރިވެފައިވި ހިނިތުންވުން ހިސާބަކަށް ފޭދިގެން ދިޔައީ ހިލްޔާގެ މަންމަ ލަތީފާގެ ސޫރަ ލޮލަށް ސިފަވުމުންނެވެ. ނަހީދަށް ހަމަހޭވެރިކަމެއްވީ ހިލްޔާ އޭނައަށް ‘ބައްޕާ’ އޭ ކިޔައި ގޮވާލުމުންނެވެ.

“ލައްބަ ދަރިފުޅު. ދަރިފުޅު ވެސް މަންމަ ކަހަލަ އޯގާތެރި ހެލްތްކެއާރ ވޯކާރ އަކަށް ވައްޗޭ.” ނަހީދު ބުންޏެވެ.

“ލައްބަ ބައްޕާ. އިން ޝާ ﷲ.” ހިލްޔާ ބުނެލިއެވެ.

އެ ކޯލު ނިމުމަކަށް އައުމުން ވެސް އަމިއްލަ ކޮޓަރި ތެރޭގައި ހުއްޓި ހުރި ނަހީދަށް ހިނިތުންވުމެއްގައި ހުރެވުނެވެ. އެވަގުތު ފޯނުގެ ބެކްގްރައުންޑުން، ލަތީފާއާއި އޭނަގެ އިތުރުން އެމީހުންގެ ތިން ކުދިންގެ ފޮޓޯ ފެނިފައި އެ ހިނިތުންވުން ފުންވިއެވެ. މިވަގުތު ހިލްޔާ ގެ ކިބައިން ފެންނަމުން ދާ ބަދަލަކީ ލަތީފާގެ އުއްމީދެއްކަން ޔަޤީން ކުރެވުނީތީ ނަހީދަށް އުފަލެއް ލިބުނެވެ.

ހިލްޔާ ކްލިނިކަށް ނިކުންނަން ޖެހޭ ދުވަހަކަށް ނަހީދު ކަނޑައެޅީ އެ ހަފްތާގެ ހޯމަ ދުވަހެވެ. ހިލްޔާ ވަނުމުގެ ކުރިން ވާންޖެހޭ ތައްޔާރީތަކެއް ވުމަށް ވެސްމެއެވެ. ލިބުނު ދެ ދުވަހުގެ ބޭނުން ހިލްޔާ ހިފީ ޑޮކްޓަރީ ދިރާސާތައް ކިޔުމަށެވެ. ގިނަ ދިރާސާތައް ކިޔުނު ވަރަކަށް އޭނައަށް ބަލިމީހުން ބެލޭ މިންވަރު ރަނގަޅު ކުރެވޭނެކަން އެނގޭތީވެއެވެ. މަޤްޞަދަކަށް ވެފައިވީ އޭނައަށް ﷲ ދެއްވާފައިވާ ހުނަރަކުން އެހެން މީހުންނަށް އެހީވުމެވެ. އެ ހުނަރަކީ ﷲ ދެއްވި އަމާނާތެއްކަން ދަނެގެންނެވެ. އަދި އޭގެ އަޖުރު އާޚިރަތުގައި ﷲ ދެއްވާނެ ކަމުގެ އުއްމީދުގައެވެ.

ހޯމަ ދުވަހުގެ ހެނދުނު އެތައް ދުވަހެއް ފަހުން ހިލްޔާ ކްލިނިކަށް ދާން ތައްޔާރު ވާން ފެށިއެވެ. އެހެނަސް އެންމެ ފަހުން އެ ކްލިނިކަށް ދިޔަ ދުވަހާއި ޚިލާފަށް ހިލްޔާ އެދުވަހު ޚިޔާރު ކުރީ ކަޅުކުލައިގެ ސާދާ އަބާޔާއަކާއި ބުރުގާއެކެވެ. އަލަމާރިން ފެނުނު އަގު ބޮޑު ހެދުންތަކާއި ބޫޓުތަކާއި ސެންޓުފުޅިތައް ހިލްޔާގެ ނަޒަރުގައި އެދުވަހު އެއްވެސް އެއްޗަކަށް ނުވިއެވެ. އޭނަ އެ ހުރިހާ އެއްޗެއް ގަންނަމުން ދިޔައީ، ނޭނގި ނަމަވެސް އަބަދު ދުނިޔޭގެ ޒީނަތްތެރިކަމުގައި އުޅުމުގެ އެދުމުގައި ކަން ހިލްޔާއަށް އެނގުންވިއެވެ. އެއީ ކިހާ ބަލިކަށި، ހިތާމަހުރި ވިސްނުމެއްކަން އެނގުންވުމުން މާޒީގައިވި އޭނަގެ ނަފްސަށް ހިލްޔާ ޙަމްދަރުދީވިއެވެ.

ހަމައެކަނި ދުނިޔެއަށްޓަކައި ދުނިޔޭގެ އެއްޗެހި ހޯދުމަކީ ފޫ ނެތް ފަޔަށް ފެން ފުރުން ފަދަ ކަމެކެވެ. އެހެނީ ދުނިޔެއިން ލިބޭނެ އެއްވެސް އެއްޗަކީ ހިތަށް އޭގެ އެންމެ ފުރިހަމަ ހަމަޖެހުން ގެނުވާނެ އެއްޗެއް ނޫނެވެ. އެއިން ކޮންމެ އެއްޗަކީ ކުޑަ ވަގުތުކޮޅެއްގެ އުފާވެރިކަމެއް ދޭ އެއްޗެކެވެ. އަދި އެއީ އަބަދު ދެމިހުންނާނެ އެއްޗެއް ނޫނެވެ. އަދި ހަމަ އެހެންމެ ޚުދު އިންސާނާ ވެސް އެއެއްޗެއް ދޫކޮށްފައި ވަކި ހިސާބަކުން ދާން ޖެހެއެވެ.

އަބަދު ދެމިވޮޑިގެންވާނެ ހަމައެކަނި ފަރާތަކީ މަރުވުމެއްނެތި ދިރިދެމިވޮޑިގެންވާ ﷲ އެވެ. މީގެ އިތުރުން އަބަދު ދެމިގެންދާނީ އެކަލާނގެ ގެ އަޅުންނަށްޓަކައި އެކަލާނގެ ކަނޑައެޅުއްވި އާޚިރަތުގެ އަޖުރެވެ. އެ އާޚިރަތަށްޓަކައި ކުރެވޭ ދެމިގެންދާ ޢަމަލުތަކާއި، އެ ޢަމަލުތައް ގިނަ ކުރުމަށް ކުރެވޭ އުއްމީދެވެ. އިންސާނާގެ ހިތް ޒުވާންކަމުގައި ދެމިހުންނާނެ ހަމައެކަނި ގޮތަކީ މި ކަންތަކުން ހިތް ފުރުވުމެވެ. އެހެނީ ނިމުން ހުންނަ ކަންތަކުގައި ހިފުމަކީ ހިތަށް ލިބޭ ތަކުލީފެކެވެ. ތަކުލީފުތައް ގިނަވަމުންދާ ވަރަކަށް ހިތް ބަލިކަށިވެ، މަރުވެގެންދެއެވެ.

ހިލްޔާގެ ހުރިހާ އުއްމީދެއް މިހާރު ގުޅިފައިވަނީ އާޚިރަތާއި ކަމަށްވުމުން ހިލްޔާ އޭނަގެ ކޮޓަރީގައި ހުރި އަގު ބޮޑު އެއްޗެހިތައް ޞަދަޤާތެއްގެ ގޮތުގައި ދޭން ބޭނުންވިއެވެ. އެހެނަސް ރާއްޖޭގައި ހުންނަ އެފަދަ ޖަމްޢިއްޔާއެއްގެ މަޢުލޫމާތު ނޭނގޭތީ އެދުވަހު ހެނދުނު ނާސްތާގެ ތެރެއިން ބައްޕައާއި އެ ސުވާލު ކޮށްލެވުނެވެ.

“ހުރޭ ބައިވަރު ޖަމްޢިއްޔާ. އެކަމަކު ބައްޕައަށް އެންމެ އިތުބާރު ކުރެވެނީ އިޚްވާން ފައުންޑޭޝަންއަށް. އެއީ ދާނިޝްއާއި ދާނިޝްގެ އެކުވެރިން ވެގެން އުފެއްދި ޖަމްޢިއްޔާއެއް. އެމީހުން ހަމަ އެދުވަހުން އެދުވަހަށް ލިބޭ އެއްޗެހި އެންމެ ބޭނުންވާ މީހުންނަށް ބަހާލާ. އެއްވެސް ޕްރޮފިޓެއް ނުނަގާނެ. ބައްޕަ ވަރަށް ގާތުން ދުށިން އެމީހުން ވޯކް ކުރާ ގޮތް.” ބައްޕަ ކިޔައިދިނެވެ.

“ދާނިޝް ތިބުނީ….އޯސިސް ގަ އުޅޭ ދާނިޝް؟” ހިލްޔާއަށް ޔަޤީން ކޮށްލުމުގެ ގޮތުން އަހާލެވުނެވެ. މިފަހުން އައިސް ދާނިޝްގެ ރަނގަޅު ވާހަކަތައް އިވޭ ވަރުން، މިއީ ހަމަ އެއް އިންސާނެއްގެ ކިބައިގައި ހުރި ހެޔޮ ސިފަތަކެއްތޯ ޤަބޫލުކުރަން ދަތިވަމުން ދިޔައެވެ.

ހިލްޔާ އެހެން އަހާލުމާއިއެކު ބައްޕަ ބޯޖަހާލަމުން ވާހަކަ ދެއްކިއެވެ.

“އާނ އެ ދާނިޝް. ދަރިފުޅު ބުނެލާ ތިމަންނަ އަތުގަ އެބަހުއްޓޭ ބައެއް އެއްޗެހި. ދާނިޝް ގެންގޮސްދީފާނެ.” ބައްޕަ ބުންޏެވެ.

އެ ވާހަކައަށް ބޯޖަހާލަމުން ހިލްޔާ ހޫންލައްވާލި ވަގުތު އިސްޖަހާލެވުނީ ބޭއިޚްތިޔާރުގައެވެ. ދާނިޝްއާއި ވާހަކަ ދެއްކުމުގެ ޚިޔާލުން ވެސް ޖެހިލުންކަމެއް އިޙްސާސް ކުރެވި، ކޯތާފަތާއި ދިމާލުން ހޫނުކަމެއް އިޙްސާސް ކުރެވުނެވެ. އެއީ ކީއްވެކަމެއް އެއްގޮތަކަށް ވެސް ނޭނގުނެވެ.

‘ދާނިޝް ގެންގޮސްދީފާނެ’ އޭ ބުނުމުން ހިލްޔާގެ ހަނދާނަށް އައީ، ދާނިޝް އާ ދިމާވި ފުރަތަމަ ދުވަހެވެ. އެދުވަހު ކްލިނިކްގައި އޭނަ އުދަގުލާއި އެކީ ބޭސް ފޮށިތައް އުފުއްލަމުން ދަނިކޮށް ދާނިޝް އެދުމެއް ނެތި އައިސް އޭނައަށް އެހީވެދިން ގޮތެވެ. އެދުވަހު މާސްކް އަޅައިގެން ހުރި އެ ޒުވާނާ އޭނަގެ ހިތް ދަމައިގަތް ގޮތެވެ. އެ ޒުވާނާގެ ކިބައިން އިޙްސާސް ކުރެވުނު ފިރިހެންވަންތަ ކަމެވެ. އެދުވަހު ދާނިޝްއާއިމެދު އިތުރަށް ދަނެގަންނަން ބޭނުންވި ގޮތެވެ.

އެކަންތައް ހަނދާންވުމުން ހިލްޔާއަށް ބޯހޫރުވާލެވުނީ އެއްވެސް އިޚްތިޔާރަކާއި ނުލައެވެ. އެ އިޙްސާސްތަކުގެ ޒާތުން ހަނދާނަށް އައީ ނުހަނު ކައިރި މާޒީއެއްގައި އޭނަ ފިރިހެނަކާއި ދިމާވެ، ރައްޓެހިވެގެން އުޅެންޖެހުނު ޙާލެވެ. އެ ޙާލު ތަޙައްމަލު ނުކުރެވުމުން ޚުދު އޭނަގެ ކައިވެނީގެ ޙަފްލާ ތެރެއިން އޭނަ ނިކުންނަން ޖެހުނު ގޮތެވެ. އެ ހުރިހާ ކަމެއްގެ ނަތީޖާއެއްގެ ގޮތުން މުޅި މުޖުތަމަޢުގައި އޭނަ ބަދުނާމުވެފައިވާ ގޮތެވެ.

ހިލްޔާއަށް ވީ ގޮތުން ބައްޕަ ކިހިނެއްވީތޯ އެހިއެވެ. އޭގެ ޖަވާބު ހިލްޔާއަށް އަވަސްއަވަހަށް ކަމެއް ނުވެއޭ ބުނެލެވުނެވެ.

ކްލިނިކަށް ދިޔުމަށް ނިންމި ދުވަހުން ފެށިގެން ބޭރު ތެރޭގައި ހިލްޔާއާއި މެދު ދެކެވެމުން ދާނެ ވާހަކަތަކާއިމެދު ހިލްޔާ މުޅިންހެން ހަނދާން ނެތިފައިވިއެވެ. އެހެނަސް ގެއިން ނިކުންނަން މިޞްރާބުޖެހި ވަގުތު އެ ހަނދާންތައް އަނެއްކާވެސް އާވާން ފެށިއެވެ. އެއާރޕޯޓް ތެރެއިން މީހުން އޭނައަށް ބަލާފައި ސިއްރު ވާހަކަތައް ދެއްކި ހަނދާންވުމުން ހިތް މޭތެރޭގައި އޮވެ ޖެހި ފިތި ބާރުވާން ފެށިހެން ހީވިއެވެ. ކްލިނިކަށް ނުދާންވެސް ސިކުނޑީގެ ކަނަކުން ގޮވަމުން ދިޔައެވެ. އެކަމަށްޓަކައި ބަހަނާތަކެއް ވެސް ދެއްކިއެވެ. އެހެނަސް އެ އިޙްސާސްތަކުން އަރައިގަނެވުނީ އޭނަ ޑޮކްޓަރުކަން ކިޔެވި މަތިވެރި މަޤްޞަދު މަތިން ހަނދާންވުމުންނެވެ. މީހުންނަށް ޖެހިލުންވުމުގެ ސަބަބުން ގޭގަ ހުރެގެން އޭނަ އެއްގޮތަކަށް ވެސް ޘަވާބު ހޯދުމަށް ލިބިފައިވާ މި ފުރުސަތު ނަގާލާކަށް ބޭނުމެއް ނުވިއެވެ.

ހިލްޔާ ގެއިން ނިކުމެގެން ގޮސް ކާރަށް އަރަން ދިޔައިރު މަގުން ހިނގާފައިދާ އެންމެން އޭނައަށް ބަލާނެ ކަމަށް ހިލްޔާއަށް ހީކުރެވުނެވެ. އެހެނަސް ހިލްޔާއަށް ބަލާލެވުނު އެންމެންހެން އޭނައާއިމެދު އަޅާލުމެއް ނެތި އެމީހުންގެ އަމިއްލަ މިޞްރާބުތަކަށް ދާ މަންޒަރު ފެނުނެވެ. އެއިން ކޮންމެ މީހެއްގެ ވެސް ދިރިއުޅުމަކާއި އެމީހުން ކުރަންޖެހޭނެ ފިކުރުތަކެއް ވާނެތާއޭ ހިލްޔާގެ ހިތަށްއެރިއެވެ. އޭނައަށް ކިތަންމެ ހީވިޔަސް އެންމެންގެ ދިރިއުޅުމުގެ މަޤްޞަދަކީ އޭނައާއިމެދު ވާހަކަ ދެއްކުމެއް ނޫނެވެ.

އެ ޚިޔާލުގެ ސަބަބުން ކާރަށް އަރައި ކްލިނިކަށް ދިޔުމަށް ދަތުރު ފެށިއިރު ހިލްޔާގެ ހިތަށް ހަމަޖެހުމެއް ލިބިފައިވިއެވެ. ދަތުރު މަތިން ކާރުގައި ޤުރުއާން ޖަހާލުމުން އެ ހަމަޖެހުން އިތުރުވިއެވެ.

15 ވަރަކަށް މިނެޓްގެ ދުއްވުމަށްފަހު ހިލްޔާ ގޮސް އޯސިސް ވެލްނެސް ސެންޓާރ ގެ ޕާކިންގް އޭރިއާގައި ކާރު ޕާކްކޮށްލިއެވެ. އެވަގުތު ގަޑިން 7:45 ވީއެވެ. އާދެވުނީ ތަންކޮޅެއް އަވަހަށްކަން އެނގުންވުމުން ކާރުގައި މަޑުކޮށްލަންވީތޯ ހިތަށްއެރިއެވެ. އެހެނަސް މާ ގިނައިރެއްނުވެ ކާރުން ފޭބީ، ކްލިނިކް ތަންކޮޅެއް އަވަހަށް ހުޅުވިފައި ވެސް ހުރެވިދާނެކަމަށް ހިތް ބުނުމުންނެވެ.

އެހެންކަމުން ހިލްޔާ ކާރު ނިވައިލުމަށްފަހު ކާރުން ފޭބިއެވެ. އަދި ލަސް ހިނގުމެއްގައި ކްލިނިކަށް ގޮސް ސިޑިން އަރައިގެން ގޮސް ކްލިނިކްގެ ޕޯރޓިކޯއަށް އެރިއެވެ. އެ ދޮރު ހުރި ގޮތުންނާއި ޕާރކިންގް އޭރިއާގައި އޭނަގެ ކާރު ފިޔަވައި އެހެން ދުއްވާ އެއްޗެއް ނެތުމުން ކްލިނިކް ހުރީ ބަންދުވެފައި ކަން ހިލްޔާއަށް ޔަޤީނާއި ގާތް ކުރެވުނެވެ. އެހެނަސް އެ ދޮރާއި ހިސާބަށް ގޮސް ދޮރުގެ ތަޅުގައި ހިފާލި ވަގުތު ތަޅުލެވިފައި ހުރިކަން އެނގުނެވެ. އެއާއިއެކު ތަޅު ދޫކޮށްލަމުން ފުން ނޭވައެއް ދޫކޮށްލެވުނީ، އޭނަ ދެން ޖެހޭނީ ބޭރުގައި އިންތިޒާރު ކުރަން ކަން އެނގުންވުމުންނެވެ.

އެ އިންތިޒާރުގައި ޒިކުރު ކުރުމަށް ޚިޔާލު ކުރި ވަގުތު ކްލިނިކާއި ނުހަނު ގާތުން ސައިކަލެއްގެ އަޑު އިވުނެވެ. އިސާހިތަކު ހިލްޔާ ފަސްއެނބުރި ބަލާލިއިރު ކްލިނިކްގެ ކުރިމައްޗަށް ކަޅުކުލައިގެ އެއާރބްލޭޑް ސައިކަލެއްގައި އައިސް މަޑުކުރި ޒުވާނަކު ފެނުނެވެ. ހުދުކުލައިގެ އަތްދިގު ގަމީހަކާއި ކަޅުކުލައިގެ ފަޓުލޫނެއްގައި ހުރި އެ ޒުވާނާ ސީދާ އޭނައާއި ދިމާލަށް ބަލާލި ހިނދު ހިލްޔާގެ ނޭވާ ހިނދުރީގައި ތާށިވިއެވެ. ވަށް ބައްޓަމަށް ދާ މޫނާއި، ކަޅުކުލަ ގަދަ ތުނބުޅިއާއި، ބުމައާއި ކުރުކޮށް ކޮށާފައިވާ އެ ފަން އިސްތަށިގަނޑު ފެނިފައި އެފަދަ ރީތިކަމެއް އޭނައަށް ދުވަހަކުވެސް ފެނިފައި ނުވާކަމަށް ހިލްޔާގެ ހިތާއި ސިކުނޑި ބުންޏެވެ. އަދި އަމުދުން އެ ޒުވާނާ ސައިކަލުގައި އިނދެ އޭނައަށް ބަލާލާފައި ހިނިތުންވެލީ ހިނދު ދެ ފައިން ވާގި ދޫވާން އުޅުނުހެން ވެސް ހީވިއެވެ.

“އަނހަ….ހިލްޔާ އައިއިރު ތަޅުލާފަދޯ ހުރީ؟ މަޑު ކުރޭ.” ޒުވާނާ އެހެން ބުނެ ސައިކަލުން ފައިބަން ފެށުމުން ހިލްޔާ އެތަނުން ދާން ވެސް ބޭނުންވިއެވެ. އެ ޒުވާނާއާއިމެދު އެހާ ބޮޑަށް ޖެހިލުންވަނީ ކީއްވެކަމެއް ނޭނގުނެވެ. ގަތް ލަދާއިއެކު އިސްޖަހާލެވުނެއްކަމަކު ދެންވެސް އިޚްތިޔާރަކާއި ނުލާ އެ ޒުވާނާއަށް ބެލުނެވެ. ސައިކަލުން ފޭބި ހިނދު އެ ގަމީސް ހިފިފައިވަނީ ކަސްރަތީ ހަށިގަނޑެއްގައިކަން އެނގުންވުމުން ހިލްޔާއަށް އަނެއްކާ އިސްޖަހާލަން ނުހަނު ދަތިވިއެވެ. ޒުވާނާ އޭނައާއި ދިމާލަށް އަންނަން ފެށުމުން ޒުވާނާއަށް ބަލަމުން ނުބަލަމުން ގޮސް ދޮރަށް ނަޒަރު ހުއްޓާލެވުނެވެ. އެ ހިނދު ޒުވާނާ އައިސް ފަޓުލޫނުގެ ޖީބުން ނެގި ތަޅުދަނޑިއަކުން ކްލިނިކްގެ ދޮރު ހުޅުވާލިއެވެ.

“ދެއާރ ޔޫ ގޯ!” ޒުވާނާ ދޮރު ބޮޑުކޮށް ހުޅުވައި ދިނުމަށްފަހު ތަޅުދަނޑި ނަގާލުމަށްފަހު އަނެއްކާވެސް ހިލްޔާއަށް ހިނިތުންވުމެއް ހަދިޔާ ކުރިއެވެ. ޒުވާނާގެ އަޑު ނުހަނު ގާތުން އިވުމުން ހިލްޔާއަށް މަސްތެއްގެ އިޙްސާސް ކުރެވުނެވެ.

“ތޭންކްސް.” ހިލްޔާ ދެންވެސް އިސްޖަހައިގެން ހުރެފައި އެހެން ބުނެ، އަވަސްއަވަހަށް އެތެރެއަށް ވަންނަން އުޅުނެވެ. މި ކުރެވެނީ ރަނގަޅު އިޙްސާސްތަކެއް ނޫންހެން ހީވުމުންނެވެ. އެހެނަސް އެވަގުތު އެ ޒުވާނާ އަނެއްކާވެސް ވާހަކަ ދެއްކިއެވެ.

“ވެލްކަމް….ވަރަށް ގިނައިރުވެއްޖެތަ ބޭރުގަ ހުންނަތާ؟ ދެން ފަހަރަކު އަހަންނަށް ގުޅާލައްޗޭ މިހެން ވިއްޔާ.” ޒުވާނާ ދެންވެސް ލުއި ހިނިތުންވުމެއްގައި ހުރެ ވާހަކަ ދެއްކުމުން، ހިލްޔާއަށް ފިޔަވަޅުތައް މަޑުޖައްސާލަމުން ޒުވާނާއަށް ބަލާލެވުނެވެ.

“އެހާ ގިނައިރެއް ނުވޭ. އަހަންނަށް ނޭނގެ ގުޅާނެ ނަންބަރެއް.” ހިލްޔާއަށް އެ ބީރައްޓެހި ޒުވާނާއަށް ބަލަން ހުރެ ބުނެވުނެވެ.

“ނޭނގެއޭ…..ތިބުނީ؟ އޭރު އަހަރެންގެ ނަންބަރު ސޭވް ނުކުރަންތަ ހިލްޔާ؟” ޒުވާނާ ހިސާބެއްގެ ޙައިރާންކަމެއްގައި ހުރެ ސުވާލު ކުރުމުން ހިލްޔާގެ ދެބުމަ ކައިރިވިއެވެ. މިއީ އޭނަ ދަންނަ މީހެއްތޯ އެވަގުތު ހިތަށްއެރިއެވެ. އެ ޒުވާނާ އޭނަގެ ނަން ކިޔަމުން ދިޔަ ގޮތުންނާއި، އެ ހުދުކުލައިގެ ގަމީހާއި ފަޓުލޫނާއި، އެ ކަޅުކުލައިގެ އެއާރބްލޭޑް ސައިކަލާއި، އެ ޒުވާނާ ސައިކަލުން ފޭބި ގޮތާއިމެދު ވިސްނެމުން ދިޔަހެން ސިކުނޑީގައި މީހަކު ކޮއްޓާލިހެން ހީވިއެވެ.

ހިލްޔާ އެއްޗެކޭ ނުބުނެވިފައި ހުއްޓާ އެ ޒުވާނާ އަނެއްކާވެސް ވާހަކަ ދެއްކިއެވެ.

“ހިލްޔާއަށް ނޭނގުނުދޯ މިއީ ކާކުކަމެއް؟” އެ ޒުވާނާ ފުންވެގެން ދިޔަ ހިނިތުންވުމަކާއިއެކީ މޫނު ހިސާބަކަށް އަރިކޮށްލަމުން އެހިއެވެ. ހަމަ އެހިނދު ކަމެއް ޔަޤީންވެގެން ދިޔުމުން މެއަށް ފިނިވެގެން ދިޔަ ހިނދު ހިލްޔާއަށް ވާހަކަ ދެކެވުނެވެ.

“ދާނިޝް….ތަ؟” ހިލްޔާއަށް ބުނެވުނެވެ. އެ ހިނދު ޒުވާނާ ހީލުމުން ހިލްޔާއަށް ވެސް ޙައިރާންކަމެއްގެ ތެރެއިން ހިނިތުންވެލެވުނެވެ.

“ހިތަށްއެރިއޭ ބަލަހައްޓައިގެން ތި ހުންނަ ގޮތުން. އެއާރޕޯޓުން ފެނުނީމަ ވެސް ނޭނގުނީދޯ؟” ދާނިޝް ނުފިލާ ހިނިތުންވުމަކާއެކީ އެހިއެވެ. އެއާއިއެކު އަނެއްކާވެސް ކަމެއް އެނގުންވެގެން ދިޔުމުން ހިލްޔާގެ ދެލޯ ބޮޑުވެ، އަނގަ ކުޑަކޮށް ހުޅުވުނެވެ.

“އޮހް! ދެޓް ވޯޒް އޯލްސޯ ޔޫ! ހެހެ…..ނޭނގޭނެއެއްނު މާސްކް ނަގާލީމަ؟!” ހިލްޔާ އެހެން ބުނުމުން ދާނިޝް އިތުރަށް ހީލުމުން ހިލްޔާއަށް ވެސް ހެވޭ ގޮތްވިއެވެ. އޭނައަށް ދާނިޝް ނޭނގުނު ގޮތް ޚުދު އޭނައަށް ވެސް މަޖާކަމަކަށްވިއެވެ.

“ރައިޓް! މޫނު ބުރުގާ ނަގާލީމަ ނުވެސް އެނގޭނެދޯ؟ ހެހެ…” ދާނިޝް ހިލްޔާ ބުނި އެއްޗެއް ހަނދާން ކުރަމުން ބުނެލި ވާހަކައިން އަނެއްކާވެސް އެ ދެމީހުންނަށް އެކީގައި ހެވޭ ގޮތްވިއެވެ. އެ ހުނުން ނިމުމަކަށް އައުމުން ހިނިތުންވުމެއްގައި ހުރެ ހިލްޔާ ވާހަކަ ދެއްކިއެވެ.

“މިހާރު މާސްކް ނަގާލީތަ އެއްކޮށް؟ ބަލި ރަނގަޅުވީދޯ؟ މާ ޝާ ﷲ!” ހިލްޔާ އޭނައަށް ހީވެފައިވި ހީވުންތަކުގެ މައްޗަށް ބުންޏެވެ.

“ބަލިވެގެންނެއް ނޫނޭ މާސްކް އަޅައިގެން ހުރީ. ހިލްޔާ ދިވެހި ޚަބަރު ނުބަލަން ދޯ؟” ދާނިޝް އެހިއެވެ. އެއާއިއެކު ހިލްޔާގެ ދެބުމަ ކައިރިވިއެވެ.

“ޚަބަރު ނުބެލޭތާ ދުވަސްކޮޅެއް ވެއްޖެ. ކިހިނެއްވީ؟” ހިލްޔާއަށް އަހާލެވުނެވެ.

“ކުޑަކޮށް ޚަބަރުތަކުގެ ތެރެއިން ހާވާލީމަ އެނގޭނެ އަހަރެންގެ މާސްކް ސްޓޯރީ. އެނީވޭސް….ހިނގާ ހިލްޔާގެ ރޫމް އަހަރެން ދައްކައިދޭނަން.” ދާނިޝް މަޢުޟޫ ބަދަލު ކޮށްލަމުން އިތުރަށް ދޮރު ހުޅުވާލީ، އޭނަ މާސްކް ނަގާލި ޙާދިސާގެ ވާހަކަ ހިލްޔާއަށް އަމިއްލައަށް ކިޔައިދޭން ނުކުޅެދުމުންނެވެ. މާސްކް ނަގާލަން އޭނަ މަޖުބޫރުވީ ކޮންމެވެސް އަންހެން ކުއްޖެއްގެ ކުރިމަތީގައި ކަމަށްވުމުންނެވެ. ޚަބަރުތައް ބަލާލުމުން ހިލްޔާ އޭނައާއިމެދު ގޯސްކޮށް ނުދެކޭނެ ގޮތެއް ވުމަށް އުއްމީދު ކުރެވުނެވެ.

ހިލްޔާ ކްލިނިކަށް ވަދެގެން ދިޔައީ އޭނައަށް ވުރެ ކުރިއަށް ހިނގާފައި ދިޔަ ދާނިޝް ގެ ފަސްފަހަތުންނެވެ. އެހިނދު ދާނިޝް އާއިމެދު ސިކުނޑީގައި ސުވާލު މާކުތަކެއް ޖެހިފައިވިއެވެ. ދާނިޝް އެ ބުނީ ކޮން ޚަބަރުތަކެއްގެ ވާހަކައެއްތޯ ހިތަށްއެރިއެވެ. ދާނިޝް އުޅެނީ މީހަކާއި އިނދެގެންތޯ 10 ވަނަ ފަހަރަށް ހިތަށްއެރިއެވެ.

ހިލްޔާ މި ޚިޔާލުތަކުގައި ވަނިކޮށް ކްލިނިކްގެ ކޮންސަލްޓޭޝަން ރޫމްތައް ހުރި ކޮރިޑޯގެ އެންމެ ކޮޅުގައި ހުރި ރޫމާއި ހަމައަށް ދެވުމުން، ދާނިޝް އެ ދޮރު ކައިރީގައި މަޑުކޮށްލުމުން ހިލްޔާ ވެސް މަޑުކޮށްލިއެވެ.

“މިއީ ޑޮކްޓަރ ހިލްޔާގެ ރޫމް. ޓްރާންސްލޭޓް ކުރާ ކުއްޖާ އަންނާނެ އިރުކޮޅަކުން. ވެލްކަމް ބެކް އެންޑް އޯލް ދަ ބެސްޓް!” ދާނިޝް ހިލްޔާގެ ރޫމްގެ ދޮރު ކަހާލަދެމުން ހިނިތުންވުމަކާއިއެކީ ބުންޏެވެ.

“ތޭންކްސް.” ހިލްޔާ ހިނިތުންވުމަކާއިއެކީ ބުންޏެވެ.

“އެއްވެސް ކަމެއް އިތުރަށް ބޭނުންވަންޏާ ނޫނީ އެއްވެސް ދަތިކަމެއް ހުރިއްޔާ ރޫމުގަ ހުރި ފޯނުން 3 ޑައިލްކޮށްލައްޗޭ. އޭރުން އަހަންނާ ކޮންޓެކްޓް ކުރެވޭނެ އިން ޝާ ﷲ.” ދާނިޝް ބުންޏެވެ.

“އޮހް….ރިސެޕްޝަންގެ ނަންބަރު މިހާރު ބަދަލުވީތަ؟ ކުރިން ހުންނަނީ 1 ދޯ؟” ހިލްޔާ އެހިއެވެ.

“ނޫނޭ. މިހާރު ރިސެޕްޝަންގަ އެހެން ކުދިން އުޅޭ. އަހަރެން ވޯކް ކުރަނީ އެޑްމިން ރޫމުގަ.” ދާނިޝް ބުންޏެވެ.

“ވާވް! ޕްރޮމޯޓްވީ ދޯ؟” ހިލްޔާއަށް ޖޯޝަކާއެކީ ބުނެވުނެވެ.

“ހެހެ….ޕްރޮމޯޓްއެއް ނޫން. އެންމެ ކުރިން ޖޮއިން ކުރީ ވެސް އެޑްމިން ގެ ގޮތުގަ. މިހާރު އެ އޮފީސް ހަމައަކަށް އެޅުނީމަ އޮފީހަށް މޫވް ކުރީ. އެ އޮފީހުގަ ވެސް މިހާރު އުޅޭ އެހެން މުވައްޒަފުން. އެންޑް މިހާރު ކްލިނިކް ގެ ވައިބާރ ގްރޫޕެއް ވެސް އޮވޭ. މިއަދު ހިލްޔާ އެޑް ކޮށްލާނަން އިނގޭ. އިން ޝާ ﷲ!” ދާނިޝް ނުފިލާ ހިނިތުންވުމަކާއެކީ ބުންޏެވެ.

ދާނިޝްގެ އެ ވާހަކަތަކަށް ހިލްޔާ ބޯޖަހާލަމުން ޝުކުރު އަދާ ކުރިއެވެ. އެއަށް ދާނިޝް ބޯޖަހާލަމުން ދެން ދިޔައީއޭ ބުނެ ހިލްޔާއަށް ފަސްދީފައި ދާން ހިނގައިގަތެވެ.

ދާނިޝް ދިޔުމުން ހިލްޔާ އޭނަގެ ރޫމަށް ވަދެ، ދޮރު ލައްޕާލިއެވެ. އެއަށްފަހު ދޮރު ކައިރީގައި ހުއްޓިލައިގެން ހުރެވުނީ، އެވަގުތު ވެސް ދާނިޝްގެ އެ ރީތި ސޫރަ ލޮލަށް ސިފަވަމުން ދިޔައީތީވެއެވެ. ދާނިޝްގެ ފިރިހެންވަންތަ އަޑު ކަންފަތުގައި ގުގުމަމުން ދިޔަހެން ހިނިތުންވެވެމުން ދިޔައީތީވެއެވެ. އޭނައަށް ވަމުން ދިޔަ ގޮތް އެނގުންވުމުން ހިލްޔާއަށް ސީރިއަސް ވެލެވުނީ ކުއްލިއަކަށެވެ.

އޭނައަށް މިވަނީ ކިހިނެއްތޯ ހިތަށްއެރިއެވެ. ފިރިހެނަކު ކަމުދިޔުމުގެ އިޖާޒަތެއް އޭނައަށް އަދި އަމިއްލަ ނަފްސަށް ދެވޭކަށް ނެތެވެ. އޭނަ ‘ލޯބި’ ވެގެން އިންނަން އުޅުނު ފިރިހެނަކާއި އަމިއްލައަށް ދުރުވިތާ އަދި މާ ގިނަ ދުވަހެއް ނުވެއެވެ. އަދި އަމުދުން އޭނައާއިމެދު ވަނީ ނުހަނު ހުތުރު ވާހަކަތައް ފެތުރިފައެވެ. ދާނިޝްއަކީ މީހަކާއި ނުއިންނަ ޒުވާނަކަށް ވިޔަސް، ދާނިޝްއާއި އޭނަ ގުޅޭނެ ހެއްޔެވެ؟ ޚުދު ދާނިޝް ވެސް ބޭނުންވަނީ ޢިއްފަތްތެރިކަން ޔަޤީންވާ އަންހެން ކުއްޖެއް ނޫން ހެއްޔެވެ؟ ދާނިޝްއަށް އޭނައާއި ބެހޭގޮތުން ސޯޝަލް މީޑިއާގައި ފެތުރިފައިވާ ވާހަކަތައް އިވިފައިވާނެ ހެއްޔެވެ؟ އިވިފައިވީހެނެއް ހިއެއް ނުވެއެވެ. އެ ނޫންނަމަ ދާނިޝް އޭނައާއި ހިނިތުންވުންތަކާއި އެކީ ވާހަކަ ދެއްކީސް ހެއްޔެވެ؟

ހިލްޔާއަށް ނޭނގުނު ކަމަކީ ދާނިޝްގެ އެ ހިނިތުންވުންތަކުގެ ފަހަތުގައިވާ ސަބަބަކީ އެ ވާހަކަތައް އިވިފައިވުން ކަމެވެ. އާނއެކެވެ. ދާނިޝްގެ އެދުމަކަށް ވެފައިވީ މި ކްލިނިކަކީ ހިލްޔާއަށް ކުރިމަތިވެފައިވާ ޠޫފާނުން ލިބޭ ރައްކާތެރިކަމެއް ކަމުގައި ހެދުމެވެ. އެގޮތުން އަޅަންޖެހޭ ހުރިހާ ފިޔަވަޅެއް ދާނިޝް އަޅާފައިވެއެވެ. މިގޮތުން ހިލްޔާ ކްލިނިކާއި ގުޅޭ ވާހަކަ އިވުނު ދުވަހު ހިލްޔާގެ ޑޮކްޓަރީ ހުނަރުތަކަށް އަލި އަޅުވާ ޕޯސްޓެއް ކްލިނިކްގެ ސޯޝަލް މީޑިއާ ޕޭޖްތަކުގައި ޖެހިއެވެ. އަދި އެ ޕޯސްޓްތަކަށް އައި ކޮންމެ ނޭދެވޭ ކޮމެންޓެއް ޑިލީޓް ކުރިއެވެ. ނަތީޖާއެއްގެ ގޮތުން އެ ޕޯސްޓްގެ ތިރީގައި މުޅިން ހުރީ ހިލްޔާއަށް ތަޢުރީފު ކޮށްފައިވާ ކޮމެންޓްތަކެވެ.

މީގެ އިތުރުން މީގެ ދެ ދުވަސް ކުރިން ދާނިޝް ކްލިނިކްގެ ހުރިހާ މުވައްޒަފުންނާއި ބައްދަލުވުމެއް ވެސް ބާއްވާފައިވެއެވެ.

“އަޅުގަނޑުމެންގެ ޓީމަށް ޖޮއިން ކުރަން އުޅޭ ޑޮކްޓަރ ހިލްޔާއަކީ ވަރަށް މޮޅު ޑޮކްޓަރެއް. މި ކްލިނިކް އެންމެ ފުރަތަމަ ހުޅުވުނުއިރު އެންމެ ފުރަތަމަ މަސައްކަތް ކުރެއްވި މެޑިކަލް އޮފިސާރ އެއީ. މިހާތަނަށް އައިއިރު ޕޭޝަންޓުންގެ ޓްރަސްޓް އެންމެ ބޮޑަށް ލިބިފައިވާ ޑޮކްޓާރ ވެސްމެ. ސްޓެޓިސްޓިކްސް ބަލާލީމަ އެކަން އެނގޭނެ ކޮންމެ މީހަކަށް ވެސް. ޑޮކްޓަރ ހިލްޔާއާއިމެދު ފެތުރިފައިވާ ވާހަކަތަކަކީ ތި ބޭފުޅުންގެ ކަންބޮޑުވުމެއްކަން އަޅުގަނޑު ޤަބޫލުކުރަން. އެކަމަކު އައި އެޝުއާރ ޔޫ، ޑޮކްޓަރ ހިލްޔާގެ ސަބަބުން ކްލިނިކަށް ލިބޭނެ ކުރިއެރުން އެއަށްވުރެ ބޮޑުވާނެ އިން ޝާ ﷲ. ސޯ ލެޓްސް ސަޕޯޓް ހާރ. ޓީމް މެމްބާރއެއް ގޮތުގަ ބަލައިގެން ލެޓްސް ހެލްޕް ހާރ. އެނގޭ މި ޓީމަކީ އަބަދުވެސް އަލަށް ޖޮއިން ކުރާ މެމްބާރސްއަށް ހެލްޕް ކޮށްދީ ކުރިއަރައިދާން މަސައްކަތް ކުރާ ޓީމެއްކަން. ލެޓްސް ނޮޓް ޕުޓް އެނީވަން ޑައުން. ލެޓްސް ބިލްޑް އެވްރީވަން އަޕް.”

ދާނިޝް އެ ވާހަކަތައް ދެއްކުމުން އެންމެން ވެސް އެއްބަސްވުމުގެ ގޮތުން ބޯޖެހިއެވެ. ދާނިޝް އެ ހުރިހާ އެންމެންނަށް ވެސް އިތުބާރު ކުރެއެވެ. ޑޮކްޓަރުން ފިޔަވައި އެތާނގައި އުޅޭ ހުރިހާ މުވައްޒަފުންނަކީ އޭނަގެ ދަށުން ތަމްރީންވެފައިވާ މީހުންނެވެ. ތަމްރީން ކުރުމުގައި ދާނިޝް ގެންގުޅެފައިވާ ކެތްތެރިކަމާއި އިޙްތިރާމްގެ ސަބަބުން އެ އެންމެން އޭނައަށް އިޙްތިރާމް ކުރާކަން ދާނިޝްއަށް އެނގެއެވެ.

އެހެނަސް ދެންވެސް ދާނިޝްގެ ހިތުގެ ކަނެއްގައި ކަންބޮޑުވުން ވިއެވެ. ކޮންމެ ގޮތެއްވިޔަސް ޣީބަ ބުނުމަކީ އޭގެ ތެރެއިން ބައެއް މުވައްޒަފުންގެ ކަށީގައި ހިފާފައިވާ ކަމެއްކަން ދާނިޝްއަށް އެނގެއެވެ. ދާނިޝް ވީ ވަރަކުން ހިލްޔާގެ ޝިފްޓުގައި އެފަދަ މުވައްޒަފުން ނުހިމަނައި ވޭތޯ ބެލިއެވެ. ހިލްޔާގެ ރޫމުގައި ބަހައްޓަން ނިންމާފައިވަނީ ވެސް ކްލިނިކަށް އަލަށް ގުޅުނު ނުހަނު ހިތްހެޔޮ އަންހެން ކުއްޖެކެވެ. ކަމެއް ދިމާވިޔަސް އެހެން މީހަކަށް ނުގުޅައި ސީދާ އޭނައަށް ގުޅުމަށް ހިލްޔާއަށް އަންގާފައިވަނީ، އޮޅުމަކުން ވެސް އެފަދަ މުވައްޒަފަކާއި ހިލްޔާ ވާހަކަ ދައްކަން ޖެހިދާނެތީވެއެވެ. ކްލިނިކްގެ ކުދިކުދި ކަންތައް ބެލުމަކީ މިހާރު އޭނަގެ ކަމަކަށް ނުވިޔަސް ދާނިޝް ހިލްޔާއަށްޓަކައި އެކަން ކޮށްދޭން ބޭނުންވިއެވެ.

ހިލްޔާ ހީކުރީ އެދުވަހު އެތައް ބައެއްގެ ނުރުހުންތެރި ނަޒަރުތައް އޭނައަށް އަމާޒުވާނެ ކަމަށެވެ. ކްލިނިކްގެ މުވައްޒަފުންނާއި ބަލިމީހުންގެ ވެސްމެއެވެ. އެހެނަސް އެ ހުރިހާ އެންމެން ވެސް އެއްވެސް ކަމެއް ނުވާ ފަދައަކުން އޭނައާއި މުޢާމަލާތް ކުރަމުން ދިޔަ ގޮތުން ހިލްޔާ ޙައިރާންވާހާވިއެވެ. ރާފިލް ސޯޝަލް މީޑިއާގައި ފެތުރި ވާހަކަތައް މީހުން ހަނދާން ނެތުނީތޯ ނުވަތަ އެއީ ނުހިނގާ ޙަޤީޤަތަކަށް ވީތޯ ހިލްޔާގެ ހިތަށް އަރަމުން ދިޔައެވެ.

ވާނީވެސް އެހެންތާއެވެ. އެދުވަހު ރިސެޕްޝަންގައި ހުރި ނާއިފް، ހިލްޔާގެ ގާތަށް ފޮނުވަމުން ދިޔައީ، ޚިޔާރު ކުރާނީ ކޮން މެޑިކަލް އޮފިސަރެއްގެ ގާތަށްތޯ ސުވާލު ކުރުމަށްފަހުއެވެ. އެއީ ވެސް ދާނިޝްގެ އަމުރުގެ ދަށުން ހިނގި ކަމެކެވެ. ޙަޤީޤަތަކީ އެދުވަހު ގިނަ ބަލިމީހުން ދިޔައީ ހިލްޔާގެ ބަދަލުގައި ދެން ހުރި މެޑިކަލް އޮފިސަރުގެ ގާތަށް ކަމެވެ. އެހެނަސް އެކަން ހިލްޔާއަށް ރޭކާ ނުލައެވެ.

އެހެން މީހުން އޭނައާއިމެދު ކަން ކުރަމުން ދިޔަ ގޮތާއިމެދު ހިލްޔާ އޮޅުމެއްގައި ވިޔަސް، ހިލްޔާއަށް އެދުވަހު އެއްކަމެއް ސާފުވިއެވެ. ކްލިނިކްގެ ހުރިހާ މުވައްޒަފުން ވެސް ދާނިޝްއަށް އިޙްތިރާމް ކުރާކަމެވެ. މަސައްކަތުގެ ތެރެއިން ދިމާވި ތަރުޖަމާ ކުރާ ކުއްޖާއާއި ނަރުހުން ވެސް ދާނިޝްއަށް މުޚާތަބު ކުރީ ‘ދާނިޝް ސާރ’ ގެ ނަމުންނެވެ. މުޅި ކްލިނިކުން ވެސް ދާނިޝްއަށް ދާނިޝްގެ ނަމުން ގޮވަނީ ހަމައެކަނި އޭނަހެން ހިލްޔާއަށް ހީވިއެވެ. ދާނިޝް ވަނީ އޭނަ ހީކުރާ ވަރަށް ވުރެ މަތީ މަޤާމެއްގައި ހެން ހީވިއެވެ.

އެދުވަހު މެންދުރު ވަގުތު ގެއަށް ދާން ކާރަށް އެރި ވަގުތު ގެއަށް ގޮސް ބައްޕައާއި އެ ސުވާލު ކުރަން ހިތަށްއެރިއެވެ. އެހެނަސް އޭގެ ދެވަނަ ސިކުންތުގައި ޚިޔާލު ބަދަލުކޮށްލެވުނެވެ. މިއީ އޭނަގެ ކިބައިގައި ހުރި ނޭދެވޭ ސިފައެއް ކަމަށް ޤަބޫލު ކުރެވުނެވެ. މީހަކަށް ލިބިފައިވާ މަޤާމަކާއި ޢިއްޒަތެއްގެ ފަހަތުން ދުވުމަކީ ކިހާ ބޯދާ ވިސްނުމެއްކަން މިހާރު ހިލްޔާއަށް އެނގެއެވެ. މީހެއްގެ ޙަޤީޤަތް އެނގޭނީ އެކަންތަކުންނެއް ނޫނެވެ. އެހެނެއްކަމަކު އެމީހެއްގެ އަޚްލާޤާއި އުޅުމާއި ސުލޫކުންނެވެ. މަޤާމާއި ޢިއްޒަތަކީ ބައެއް މީހުން ގަދަ ބާރުން ވެސް ހޯދާ ކަންތަކަށް ވާތީވެއެވެ. އެހެނަސް އަޚްލާޤަކީ މީހަކު އަމިއްލަ ނަފްސު އިޞްލާޙު ކުރަން ގަދަ އަޅައި މަސައްކަތް ކޮށްގެން ނޫނީ އޭގެ މަތީގައި ދެމިނުހުރެވޭނެ ކަމެކެވެ.

އެހެންކަމުން ހިލްޔާ ހުރީ ކިތަންމެ ބޭނުން ވިޔަސް އެރޭ ގެއަށް ގޮސް ދާނިޝްގެ ވާހަކަ ނުދައްކާށެވެ. އެހެނަސް ބޭއިޚްތިޔާރުގައި އެ ވާހަކަ ދެކެވެން ފެށީ، އެރޭ ދޮންތައާއި އެލީއާއި އެކު ސިޓިންގް ރޫމުގެ ސޯފާގައި ތިބެ ދެކެވުނު ވާހަކައެއްގެ ތެރެއިން، ދާނިޝް ބުނި ވާހަކައެއް ހަނދާންވުމުންނެވެ.

“ޔޫކޭ ގަ ހުރިއިރު ޑިޑް އައި މިސް ސަމް ބިގް ނިއުސް؟ ރާއްޖޭގެ ކޮންމެވެސް ބޮޑު ނިއުސްއެއް؟” ހިލްޔާއަށް ވީހާވެސް ދުރުދުރުން އަހާލެވުނެވެ. ދާނިޝް ގެ ނަން ގަންނަން ވެސް ނުކެރިފައިވުމުންނެވެ.

“ނޯ….އަނެއްހެން ޕޮލިޓިކަލް ކަންތައް ހިނގީ. އޭޒް ޔޫޝުއަލް. ކިހިނެއްވީ؟” ހަމްރާ ބުންޏެވެ.

“ތެދެއް؟” އެލީ ވެސް ޙައިރާންކަމާއެކީ އެހިއެވެ.

“އެއީ….މިއަދު ދާނިޝް އަހަރެން ގާތު ބުނީ ދިވެހި ޚަބަރު ނުބަލަން ދޯ އޭ. އަހަންނަށް އަސްލު ދާނިޝް ނޭނގުނީ މާސްކް ނަގާލާފަ ހުރީމަ. މާ ފަހުން އަހަންނަށް އެނގުނީމަ އެހެން ބުނީ.” ހިލްޔާ ކިޔައިދިނެވެ. ދާނިޝް ގެ ވާހަކަ ދައްކާއިރު އޭނަގެ މޫނަށް ތަފާތު ކުލަވަރެއް ވެރިވިޔަސް ދޮންތަމެންނަށް އެކަން ފާހަގަ ނުވާނެ ގޮތެއްވުމަށް އެދެމުންނެވެ.

“މައި ގޯޑް ދޮންތާ ދޮންތަ އޭރު އަހަރެން ފޮނުވި ވީޑިއޯ ނުބަލަން ދޯ؟” އިސާހިތަކު އެލީ ދެލޯ ބޮޑުކޮށް، ސީދާ ވެލަމުން އެއްނޭވައިން ބުންޏެވެ.

“ކޮން ވީޑިއޯއެއް؟” ހިލްޔާ އޮޅުން އަރާ ގޮތްވިއެވެ.

“އެއްކަލަ….ޑޭން ގެ ވީޑިއޯ. އެރޭ ގުޅާފަ ބުނީމެއްނު ޑޭން އަކީ ކާކުކަން އެނގިއްޖެއޭ؟ ކިޔާފަ ވީޑިއޯ ވެސް ފޮނުވީމެއްނު ވައިބާރ އިން؟” އެލީ ވާހަކަ ދެއްކިއެވެ. އެލީ ވާހަކަ ދެއްކި ދެއްކިހެން ހިލްޔާ އެރޭ ގެ މަތިން ހަނދާންވިއެވެ. އެހެނަސް ދެންވެސް އޮޅުން އެރިއެވެ. އެލީ މަޢުޟޫ ބަދަލު ކުރިހެން ހީވިއެވެ.

“ޑޭން އޭ؟ ފިލްމީ ތަރި ޑޭން؟” ހިލްޔާއަށް އަހާލެވުނެވެ. މި ފަހަރު އެލީއަށް ވުރެ ކުރިން ހަމްރާ ވާހަކަ ދެއްކިއެވެ.

“އާނ….އެލީ ޑައި ހާޑް ވެގެން އުޅޭ ތަރި ޑޭން އަކީ އަސްލު ދާނިޝް. ފިލްމު ކުޅުން ހުއްޓާލާފަ އެހެން މީހުންނަށް މޫނު ނުދައްކަން ވެސް މި ހުރިހާ ދުވަހު މާސްކް އަޅައިގެން އުޅުނީ. ދެން އެއްރެއަކު ވަރަށް ޑްރެމެޓިކް ކޮށް އޯސިސް ފިހާރައިގެ ތެރެއިން މާސްކް ނެގީ. އެ ވީޑިއޯ ގެ ވާހަކަ އެލީ އެ ބުނަނީ.” ހަމްރާ ކިޔައިދިން ދިން ހެން ހިލްޔާގެ ދެބުމަ ކައިރިވިއެވެ. ދާނިޝްއަކީ ފިލްމު ކުޅުން ހުއްޓާލި ފިލްމީ ތަރިއެއް ހެއްޔެވެ؟ އެއީ ކުރިން އޭނަ ހީވެސް ނުކުރާ ފަދަ ހީކުރުމެކެވެ. ދާނިޝްއާއި ބެހޭގޮތުން އޭނައަށް އެނގެން އަދި ކިތައް ސިއްރު އެބަ އޮތް ހެއްޔެވެ؟

ހިލްޔާ ވަކި އެއްޗެކޭ ނުބުނެވިފައި އިންދާ އެލީ ވާހަކަ ދެއްކިއެވެ.

“ޔޫ ޝުޑް ވޮޗް އިޓް ރައިޓް ނައު ތުއްތާ. ބަލާބަލަ މި ވީޑިއޯ ޕްލީޒް! އިޓްސް އެޕިކް!” އަބަދުވެސް ޑޭންގެ ވާހަކަ ދައްކައި ޙިއްސާ ކުރަން ބޭނުންވެފައި ހުންނަ އެލީ، ވަކިން ހުރި ސޯފާއިން ތެދުވެގެން އައިސް ހިލްޔާގެ ކައިރީގައި އިށީނދެ، ވައިބާރއިން ހިލްޔާއަށް އޭނަ ފޮނުވާފައި ހުރި ފޭސްބުކް ލިންކަށް ފިތާލިއެވެ. އެލީ އޭނަގެ ފޯނު ހިލްޔާގެ އަތަށް ލައިދިން ހިނދު، އެ ވީޑިއޯ ޕްލޭ ވާން ފެށިއެވެ.

ހިލްޔާއަށް ފެނިގެން ދިޔައީ އޯސިސް ފިހާރައިގެ ތެރޭގައި ކަޅުކުލައިގެ މާސްކަކާއި ތޮތްޕެއް އަޅައިގެން ހުރި ދާނިޝް، ބުރުގާ ނާޅާ ހުރި އަންހެން ކުއްޖެއްގެ ކުރިމަތީގައި ހުރި މަންޒަރެވެ. އެ މަންޒަރުން ހިލްޔާގެ ހިތަށް އުދަގުލެއް ވިއެވެ. އެ ކުއްޖާ ދާނިޝްއާއި ކައިރިވެ، އިވޭ ނުއިވޭ އަޑަކުން ދައްކަން ފެށި ވާހަކަ އެ ވީޑިއޯއިން ސާފުކޮށް އިވުނެވެ.

“ވެލް ޔޫ ހޭވް އަ ޗޮއިސް. މިވަގުތު ވެސް. އިވެން އިފް ޔޫ އާރ ގޭއި، އަހަރެންގެ އަތުގަ ހިފައި އަހަރެން ބައްދާލާ. އަހަރެން ދެކެ ވަރަށް ލޯބިވެއޭ ބުނޭ. ޓު އެޑް ޓު ދެޓް އަހަންނާ އެކީ ހޮޓެލަކަށް ވެސް ހިނގާ. އޭރުން ހަމަ ކުޑަ ވެސް ޝައްކެއް ނޯންނާނެތާ…ހަހަހަހަ!”

އެ ކުއްޖާ ދެއްކި ވާހަކަތަކުން ހިލްޔާގެ ބުމަގޮށްޖެހުނީ ޚުދު އޭނައަށް ވެސް ނޭނގިއެވެ. މީގެ ކުރިން އަންހެން ކުއްޖަކަށް މިހާ ރުޅި އައި ހަނދާނެއް ނުވެއެވެ. ރުޅި އައީ ދާނިޝް އާއި ބެހޭގޮތުން ބުނެލި ބަހުންނެވެ. އަދި ދާނިޝްއަށް އެ ދަޢުވާތު ދިން ކަމެއްގެ ސަބަބުން ވެސް މެއެވެ. އޭގެ ޖަވާބުގައި ދާނިޝް ދޭނެ ރައްދަކާއިމެދު ހިތް ނުތަނަވަސް ވާ ގޮތްވިއެވެ.

އެހެނަސް ދާނިޝްގެ ބަސްތަކެއްގެ ކުރިން ފެނުނީ ދާނިޝްގެ ޢަމަލެކެވެ. އިސާހިތަކު ދާނިޝް ބޮލުގައި އޮތް ތޮފި ނަގައި މާސްކް ވެސް ނެގިއެވެ. ދާނިޝް އެ އުޅެނީ ގޯސްކަމެއް ކުރަން ކަމަށް ހިލްޔާއަށް ހީކުރެވުނު ވަގުތު ދާނިޝް ވާހަކަ ދެއްކިއެވެ.

“އަހަރެން ޒިވްއާއެކީ ދާކަށް ބޭނުމެއް ނޫން. އަހަރެން ލޯބިވާ އަންހެން ކުއްޖަކު ހުރޭ.”

ދާނިޝްގެ އެ ބަސްތަކުން ހިލްޔާގެ މެއަށް ލޮޅުމެއް އައެވެ. އެ ފަހު ޖުމްލައަކީ އޭނައަށް އަމާޒުވި ބަސްތަކެއް ހެން ހީވީ ކީއްވެ ކަމެއް ނޭނގުނެވެ.

ނުނިމޭ