ނަފްސީ (ފަންސާސްނުވަވަނަ ބައި)

“ލޯންގް ޓާމްކޮށް ލީވް ކުރާނީ ކީއްވެ؟ ރެޒިޑެންސީއަށް؟ އަދި….ޕްލޭންއެއް ނުކުރަން ދާކަށް.” ހިލްޔާއަށް ބުނެވުނެވެ.

“ރެޒިޑެންސީއަށް ނޫނިއްޔާ….ހިލްޔާ މެރީ ކުރަން ވެސް ޖެހިދާނެއެއްނު؟” ދާނިޝް ބުނެލި ވާހަކައިން، ހިލްޔާގެ މެއަށް ފިނިވިއެވެ. އޭސީގެ ފިނިކަމުގެ ތެރެއިން ވެސް ނިތުން ދާހިއްލިއެވެ. ސިކުނޑިއަށް ވެރިވެގެން ދިޔަ ހާސްކަމެއްގެ ސަބަބުން ދާނިޝްގެ މޫނުމަތިން ފެނުނު ހިނިތުންވުމަށް ވެސް ސަމާލުކަމެއް ނުދެވި، ވާހަކަ ދެކެވުނެވެ.

“އަހަރެން ބޭނުމެއް ނޫން މެރީ ކުރާކަށް.” ހިލްޔާއަށް އަވަސްއަވަހަށް ބުނެވުނެވެ. އެހިނދު ރާފިލް އާއި އިންނަން އޭނަ ތައްޔާރު ވަމުން ދިޔަ ދުވަސްތައް ހަނދާންވަމުން ދިޔަދިޔަހެން ހިތުގެ ތެޅުން އަވަސްވިއެވެ. ނުރައްކަލެއް ކުރިމަތިވާން އުޅޭ ކަމުގެ އިންޒާރު ސިކުނޑި ދޭން ފެށިއެވެ.

“އެއީ ކީއްވެ؟” ފަނޑުވެގެން ދިޔަ ހިނިތުންވުމަކާއިއެކީ ދާނިޝްއަށް އަހާލެވުނެވެ. ކުޑަކޮށް އިސްޖެހިފައި އިން ހިލްޔާގެ މޫނުމަތިން ފެންނަމުން ދިޔަ ނުތަނަވަސްކަމުން ޙައިރާންވިއެއްކަމަކު ހިލްޔާގެ ފާއިތުވި ކައިރި މާޒީ މަތިން ވެސް ހަނދާންވިއެވެ.

“އައި ޑޯންޓް ވޯންޓް ޓު މެރީ މީންސް އައި ޑޯންޓް ވޯންޓް ޓު މެރީ!” ހިސާބެއްގެ ނުރުހުންތެރިކަމާއިއެކީ ހިލްޔާ އެހެން ބުނެލި ހިނދު މުޅި މީހާ ވެސް ރޫރޫ އެޅިއެވެ. އެވަގުތު ވާހަކަ ދެކެވެނީ ދާނިޝް އާއިކަން ވެސް ހަނދާން ނެތިފައިވީ ފަދައެވެ. ހަނދާންވަމުން ދިޔައީ އޭނަ ބޭނުންވާ ގޮތް ހާމަ ކުރުމުން ވެސް އެއާއި ދެކޮޅު ހަދާ ރާފިލް މަތިންނެވެ. އޭނަ ކައިވެނި ކުރަން ބޭނުންނުވާ ވާހަކަ ދުލާއި ހަމައަށް ވެސް ގެންނަން އޭނަ ނުކުޅެދުނު ދުވަހެވެ.

“އައި ހިއާރ ޔޫ ހިލްޔާ. ހިލްޔާ މެރީ ކުރަން ބޭނުމެއް ނޫނިއްޔާ ކުރާކަށް ނުޖެހޭ. އައި ޖަސްޓް ވޯންޓް ޓު ނޯ ވާއި. ޖަސްޓް ކިއުރިއަސް.” ދާނިޝް އެ ބަސްތައް ބުނެލީ ހިތުގެ ފުން މިނުންނެވެ. އޭނަ ހިލްޔާއާއި ކައިވެނި ކުރުމަކީ ހިލްޔާ އެންމެ އެދޭ ގޮތަށް ނުވާނަމަ ހަމަ ޙަޤީޤަތުގައި ވެސް އޭނަ ހިލްޔާއާއި އިންނާކަށް ބޭނުމެއް ނުވެއެވެ. އޭގެ ސަބަބުން އޭނައަށް ވޭނެއް ލިބުނު ކަމުގައި ވިޔަސްމެއެވެ. ހިލްޔާ އޭނައަށް ނުލިބިދާނެ ކަމުގެ ޚިޔާލު އެވަގުތު ވެސް މޭގައި ރިހުމެއް ހިނގާލިއެވެ.

ދާނިޝް ބުނެލި ބަސްތަކުން ހިލްޔާ ހިމޭންވާ ގޮތްވިއެވެ. އެ ބަސްތަކުގެ އިޚްލާޞްތެރިކަން ހިލްޔާގެ ހިތަށް ފޯރި ފަދައެވެ. ރާފިލް މަތިން ހަނދާން ނެތި، ވާހަކަ ދެކެވެނީ ކާކާއި ކަން ހަނދާންވުމުން ހިލްޔާއަށް ދާނިޝްއާއި ދިމާލަށް ބަލާލެވުނެވެ. އެހިނދު ލޮލުން ހިލިފައިވި ކަރުނަތަކުގެ ސަބަބުން އެ ލޮލުގައި ވިދުމެއްވިއެވެ. ހިސާބަކަށް ފުސްވެފައިވާ ލޮލުން، ދާނިޝްގެ ހިތާމަވެރި މޫނު ފެނިފައި ދެންމެ ވާހަކަ ދެކެވުނު ގޮތުން ހިލްޔާ ދެރަވާ ގޮތްވިއެވެ. އެއީ ދާނިޝްއަށް ޙައްޤުވާ ގޮތެއް ނޫންކަމަށް ހިތް އެންގިއެވެ.

ދާނިޝްއަށް ހިމޭންކަމާއިއެކީ ބަލަން އިނދެފައި ހިލްޔާ އަނެއްކާވެސް އިސްޖަހާލަމުން ފުން ނޭވައެއް ދޫކޮށްލިއެވެ. އެއަށްފަހު ދާނިޝްގެ ސުވާލަށް ޖަވާބު ދިނެވެ.

“މެރިއޭޖް އަކީ އަހަރެންގެ ލައިފް ގޯލްއެއް ނޫން.” ވިސްނުމަށްފަހު ހިލްޔާއަށް ދެވުނު ޖަވާބަކީ އެއީއެވެ. މީގެ ދުވަސްކޮޅެއް ކުރިން ކައިވެންޏަކީ އޭނަގެ ޙަޔާތުގެ މަޤްޞަދަކަށް ވެފައިވިއެވެ. އެހެނަސް އޭގެއިން ކުރެވުނު ތަޖުރިބާތަކުގެ ސަބަބުން މިހާރު ކައިވެންޏާއިމެދު ދެކެންވީ ގޮތެއް އޭނައަށް ނޭނގެއެވެ.

“އެހެންތަ؟ ކޮބައިތަ ހިލްޔާގެ ގޯލްއަކީ އެހެންވީމަ؟” ދާނިޝް ގަޔާވެފައިވާ ޒާތަކަށް އެހިއެވެ.

“ޖަންނަތުލް ފިރްދައުސް…” ދެވަނަ ވިސްނުމެއް ވެސް ނެތި ހިލްޔާ ބުންޏެވެ. އެ މަޤްޞަދާއިމެދު މިއަދު ނުހަނު ޔަޤީންވެފައިވާތީވެއެވެ. އޭނަ އުޅެންޏާ އުޅެނީ ސުވަރުގެއަށް ދިޔުމަށެވެ. ސުވަރުގޭގެ އެންމެ މަތީ ދަރަޖައަށް ދެވުމަކީ އޭނަގެ ޙަޔާތުގެ އުއްމީދެވެ.

“ދެޓްސް ބިއުޓިފުލް…ތި ގޯލް ޙާޞިލު ކުރުމަށް އެހެންވީމަ ވީހާވެސް ގިނަ ހެޔޮ ޢަމަލު ކުރަން ޖެހޭ ދޯ؟” ދާނިޝް އަނެއްކާވެސް ލުއި ހިނިތުންވުމަކާއިއެކީ ވާހަކަ ދެއްކިއެވެ. ހިލްޔާ ދިން ޖަވާބުން ދާނިޝް ހިލްޔާ ދެކެ އިތުރަށް ލޯބިވުން ނޫންކަމެއް ނުވިއެވެ.

“އާނ….އެކަމަށްޓަކައި ދިރިއުޅެނީ.” ހިލްޔާ ބުންޏެވެ.

“ކައިވެންޏަކީ ހެޔޮ ޢަމަލެއް ކަމަށް ހިލްޔާ ޤަބޫލު ނުކުރަންތަ؟” ދާނިޝް ކޮށްލި ސުވާލުން ހިލްޔާއަށް ދާނިޝްއާއި ދިމާލަށް ބަލާލެވުނެވެ.

“އިޓް އިޒް…އެކަމަކު ސުވަރުގެއަށް ދާން ކޮންމެހެން މެރީ ކުރާކަށް ނުޖެހޭ.” ހިލްޔާއަށް ބުނެވުނެވެ. އެހިނދު އެ ބަސްތަކާއިމެދު ހިތާމަވެސް ކުރެވުނެވެ. ކައިވެންޏަކީ ރަސޫލާ ﷺ ގެ ސުންނަތަކަށް ވެފައި އެ ސުންނަތާއި އެހާ ދެކޮޅުވެރި ވެވޭތީވެއެވެ.

ހިލްޔާ ދެއްކި ވާހަކައަށް ދާނިޝް ބޯޖަހާލިއެވެ.

“ޔޫ އާރ ރައިޓް. މެރީ ނުކުރަން ޚިޔާރު ކުރެއްވި ޢިލްމުވެރިން ވެސް އުޅުއްވި. އޭގެ ސަބަބުން އެ ޢިލްމުވެރިންގެ މާތްކަމަށް ބަދަލެއް ނާދޭ. އެކަމަކު މި ވާހަކަ ބުނެލާނަން. ޖަންނަތުލް ފިރްދައުސް އަކީ ވަރަށް ހައި ގޯލްއެއް. ހައި ގޯލްއެއް އެޗީވް ކުރަން ބޭނުމިއްޔާ ކަންތައް ކުރަނީ ކޮން ނިޔަތަކާއެކީ ކަން ސާފު ވާ ވަރަށް ކަމެއް ނުކުރަނީ ކީއްވެ ކަމާއިމެދު ވެސް ސާފު ވާން ޖެހޭ. މެރީ ނުކުރަންޏާ ހިލްޔާ މެރީ ނުކުރަން ތި ނިންމަނީ ރަނގަޅު ނިޔަތެއްގަތަ؟ ހިލްޔާ މެރީ ކުރާނެ ރަނގަޅު މީހަކު ނެތީތަ؟ ރަނގަޅު މީހެއް ހުރިއްޔާ އެމީހެއްގެ ދީންވެރިކަން ނެތީތަ؟ އަޚްލާޤާއި ދީންވެރިކަން ހުރި މީހަކު ހުއްޓަސް އެމީހެއްގެ މިޒާޖު ހިލްޔާއާއި ނުގުޅެނީތަ؟ އެމީހެއްގެ ކިބައިގަ ހިލްޔާއަށް ކަމުނުދާ ސިފައެއް ހުރީތަ؟ ކައިވެންޏެއް ކުރިއްޔާ ހެޔޮ ޢަމަލުތަކަށް ވުރެ ހިލްޔާގެ ގޯސް ޢަމަލުތައް ގިނަވާނެހެން ހީވަނީތަ؟ މިއީ ހައްތަހާ ވެސް ރަނގަޅު ސަބަބުތައް. އެކަމަކު މީގެއިން ސަބަބެއް ނެތިއްޔާ….ތި ނިންމުމާއިމެދު ވިސްނާލުން ރަނގަޅު ކަންނޭނގެ ދޯ؟” ދާނިޝް ވާހަކަ ދެއްކިއެވެ.

ދާނިޝް އެ ވާހަކަ ދެއްކީ މުޅިން ވެސް އިޚްލާޞްތެރި ނަސޭޙަތެއްގެ ގޮތުގައެވެ. ހިލްޔާގެ ޚިޔާލު ބަދަލު ކުރުމުގެ އެދުމެއް އެއްގޮތަކަށް ވެސް ނެތެވެ. އެކަން އެގޮތަށް ވެދާނެ ގޮތެއް ވުމަށް އުއްމީދު ކުރެވުނަސް މެއެވެ. ހިތުގެ ފުން މިނުން ބޭނުންވީ ޖަންނަތުލް ފިރްދައުސްއަށް ދިޔުމަށް ހިލްޔާއަށް އެހީވުމަށެވެ.

ދާނިޝްގެ އެ ވާހަކައިން ހިލްޔާ ފުން ވިސްނުމަކަށް ގެއްލޭ ގޮތްވިއެވެ. އެހެނަސް އެ ވިސްނުމާއިގެން ކުރިއަށް ނުދެވެނީސް ފަހަތުން މީހަކު ކަރު ކެހިލި އަޑު އިވުނެވެ. ފަހަތަށް ނަޒަރެއް ދިން އިރު ދޮރު މަތީގައި ހުރި ބައްޕަ ފެނިފައި ހިލްޔާއަށް ކުއްލި ގޮތަކަށް ކޮޅަށް ތެދުވެލެވުނީ ހަމަ އެއްވެސް އިޚްތިޔާރަކާއި ނުލައެވެ.

“ކޮބާ ދާނިޝް ގެއަށް ދާން ވެއްޖެތަ؟” ނަހީދު ވޯޑުގެ އަލި ބޮކިތައް ދިއްލާލަމުން އެތެރެއަށް ވަންނަން ފެށިއެވެ. ދެންމެ ދާނިޝް ދެއްކި ވާހަކައަށް ނަހީދު އެއްޗެއް އިތުރު ކުރާކަށް ބޭނުމެއް ނުވިއެވެ. ދާނިޝްގެ ނަސޭޙަތުން ހިލްޔާއަށް އެއްޗެއް ވިސްނޭނެކަން ނަހީދަށް ޤަބޫލު ކުރެވުނެވެ.

“މާ ލަސްވެސް ވެއްޖެ ބޭބޭ. އާހްހް!” ދާނިޝް ވާހަކަ ދައްކަމުން މާ ބޮޑު ވިސްނުމެއްނެތި އެނދުން ފޭބި ވަގުތު ފަޔަށް ވީ ތަދާއެކީ އަރިވެސް ނޭޅީ ކިރިޔާއެވެ. ދާނިޝް ގުދުވެގެން ދިޔަ ވަގުތު ހިލްޔާ ކައިރިއަށް ޖެހިލިއެއްކަމަކު ނުހިފިއެވެ. ހިފަން ނުވެސް ޖެހުނީ ބައްޕަ ދިގު ފިޔަވަޅުތަކެއްގެ އައިސް ދާނިޝްގެ އަތުގައި ހިފަހައްޓާލުމުންނެވެ.

ދާނިޝް ގޮވައިގެން ކާރާއި ހަމައަށް ދެވެން ދެން ވެސް ނަހީދު ދިޔައީ ދާނިޝްގެ އަތުގައި ހިފައިގެންނެވެ. ފަޔަށް ވަމުން ދިޔަ ތަދުގެ ސަބަބުން ދާނިޝްއަށް ހިނގެމުން ދިޔައީ ކޮރު ޖަހަމުން ކަމަށްވާތީވެއެވެ. އެދެމީހުންގެ ފަސްފަހަތުން އައި ހިލްޔާ ދާނިޝްގެ ޙާލު ފެނިފައި އިތުރަށް ދެރަވާ ގޮތްވިއެވެ.

ގެއަށް ދިޔަ މަގުމަތީގައި ހިލްޔާ އިނީ ކާރު ފަހަތު ސީޓުގައެވެ. މުޅި ދަތުރު މަތީގައި ބައްޕައާއި ދާނިޝްއާއި ދެމެދު ހުއްޓުމެއްނެތި ވާހަކަ ދެކެވުނެވެ. ދާނިޝް ދާން އުޅޭ ވާހަކައާއި، ކްލިނިކަށް އަންނަން އުޅޭ އާ މެނޭޖަރު ގެ ވާހަކައާއި، އޯސިސް ވިޔަފާރީގެ އެކިއެކި ވާހަކަތަކެވެ. އޭގެއިން ކޮންމެ ވާހަކައަކަށް ވެސް ދާނިޝް ޖަވާބު ދެމުން ދިޔަ ގޮތުން ހިލްޔާ ގަޔާވިއެވެ. ބައްޕަ މީގެ މަސްތަކެއް ކުރިން ދާނިޝްއަކީ ‘ފައްކާ ބިޒްނަސް މައިންޑްސެޓް’ އެއް ހުރި މީހެއްކަމަށް ބުނި ސަބަބު އެރޭ އެނގުންވެގެން ދިޔައެވެ.

ބައްޕައާއި ދާނިޝް ދެއްކި ވާހަކަތަކުގެ ތެރެއިން ހިލްޔާ ކިރިޔާ ވެސް ބައިވެރި ވާން ޖެހުނީ ޢުމްރާ ގެ ވާހަކައިގައެވެ. ބައްޕަ ދާނިޝް ދާން އުޅޭ ދަތުރުގައި ޢުމްރާއަށް ދާން ނިންމުމުން ހިލްޔާއަށް ނޭނގޭ އުފަލެއް ލިބުނެވެ. އެ ދަތުރުގައި އެލީއާއި، ހަމްރާއާއި މާމަ ވެސް ގެންދިޔުމުގެ ވާހަކަ ދެކެވިގެން ދިޔުމުން އެ ދަތުރާއި މެދު ހިލްޔާގެ ހިތުގައި ޖޯޝެއް އުފެދެން ފެށިއެވެ.

ޢުމްރާގެ ވާހަކަ ދައްކައި ނިމުނު ވަގުތަކީ ކާރު ގޮސް ދާނިޝް އުޅޭ ޢިމާރާތުގެ ކުރިމަތީގައި މަޑުކޮށްލި ވަގުތެވެ. ދާނިޝް އުދަގުލާއިއެކީ ކާރުން ފޭބިއިރު ވެސް ވޭނީ އާހުގެ އަޑުތައް އިވުމުން ހިލްޔާގެ ހިތް ދެރަވިއެވެ. ބައްޕަގެ އެހީ ހޯދަން އިންކާރު ކުރަމުން، ދާނިޝް އެކަނި ގެއާއި ދިމާލަށް ހިނގަމުން ދިޔަ މަންޒަރު ކާރުގެ ކުޑަދޮރުން ބަލަން ހިލްޔާ އިނީ ކަންބޮޑުވެފައެވެ.

“ބައްޕާ….ދާނިޝް އުޅެނީ ހަމަ މުޅިން އެކަނިތަ؟” ދާނިޝް ލޯމައްޗަށް ގެއްލުނު ވަގުތު ހިލްޔާއަށް އެހެން އަހާލެވުނީ އެއްވެސް އިޚްތިޔާރަކާއި ނުލައެވެ. އެވަގުތު ވެސް ދާނިޝް ވަދެގެން ދިޔަ ދޮރުން ނަޒަރު ވަކި ނުކުރެވެއެވެ.

“އާނ އެކަނި އުޅެނީ…” ބައްޕަ ބުންޏެވެ.

“ހާދަ އުދަގޫވާނެއޭ އެ ޙާލުގަ ހުރިހާ ކަމެއް އެކަނި ކުރަން…” ހިލްޔާ އެހެން ބުނިއިރު ގޭގެ ގަރާޖާއި ދިމާލަށް ދިޔުމަށް ކާރު އަނބުރާލެވެނީއެވެ. އޭރުވެސް ހިލްޔާގެ ނަޒަރު އެއްދިމާލަކަށް ހުއްޓިފައިވިއެވެ. އެ މޫނުމަތިން ކަންބޮޑުވުން ފާޅުވަމުން ދިޔައެވެ.

“އަސްލުވެސް….އަހަރުމެން ވާނެ ވީ ވަރަކުން އެހީވެދޭން.” ބައްޕަ ބުންޏެވެ. އެހިނދު ކާރު އޮތް މިޞްރާބުގެ ސަބަބުން ދާނިޝް އުޅޭ ޢިމާރާތް ހިލްޔާގެ ލޯ މަތިން ގެއްލުނެވެ. އެހިނދު ވިސްނެން ފެށީ ބައްޕަ ބުނި ފަދައިން ދާނިޝްއަށް އެހީވެދޭން ކުރެވިދާނެ ކަންތަކެވެ.

އެރޭ ކޮޓަރިއަށް ގޮސް ނިދަން ތައްޔާރުވެފައި ހިލްޔާއަށް އެތައް ފަހަރު މަތިން އަބާޔާ ލައިގެން ބެލްކަންޏަށް ނިކުމެވުނެވެ. ބެލި ކޮންމެ ފަހަރަކު ދާނިޝްގެ ކޮޓަރީގައި އަލި ބޮކި ދިއްލިފައިވާ ތަން ފެނިފައި ލޮލަށް ސިފަ ކުރެވެނީ ދާނިޝް ކޮންމެވެސް ކަމެއް ކުރަން ދަތިވެގެން އުޅޭ މަންޒަރެވެ. އޭގެއިން ކޮންމެ ފަހަރަކު ފިކުރު ބޮޑުވެފައި އިރުގަނޑެއް ވަންދެން ހިލްޔާއަށް އެ ބެލްކަންޏާއި ދިމާލަށް ބަލަހައްޓައިގެން ހުރެވެއެވެ. އަދި ދާނިޝްއަށްޓަކައި ދުޢާ ކުރެވެއެވެ.

ހިލްޔާގެ ހިތަށް ކިރިޔާ ވެސް ހަމަޖެހުމެއް ލިބުނީ 12 ޖަހަން ގާތްވަމުން ދިޔަ ވަގުތު އެ ބެލްކަންޏަށް ދިޔައިރު ބެލްކަނީގެ އަލި ބޮކި ނިވިގެން ދިޔުމުންނެވެ. އެއާއިއެކު ދާނިޝް އޮށޯންނާނީ ކަން ޔަޤީންވެ، ހިލްޔާ ވެސް ހިތުން ކޮޓަރިއަށް ވަނީ ނިދާލުމަށެވެ.

އެހެނަސް އެނދުގައި އޮށޯވެ، ނިދުމުގެ ކުރިން ކިޔާ ޒިކުރުތައް ކިޔައި ނިމުނުއިރު ވެސް ހިލްޔާގެ ލޮލަކަށް ނިންޖެއް ނާދެއެވެ. ލޯމަރާލުމުން ލޮލަށް ސިފަވަނީ އަތުގައި ޕްލާސްޓަރު އަޅައިގެން އެނދުމަތީގައި އިން ދާނިޝްއެވެ. ދާނިޝް އުދަގުލާއިއެކީ ހިނގާފައި ގޮސް ގެއަށް ވަން ގޮތެވެ. ދާނިޝް އުދަގުލާއިއެކީ ކުރާނެ ކަންތައް އޭނައަށް އަންދާޒާ ކުރެވުނު ގޮތެވެ.

މީގެ އިތުރުން ދާނިޝް މިރޭ އޭނަ ގާތު ކުރި ސުވާލުތައް ވެސް ހިލްޔާގެ ކަންފަތުގައި ގުގުމަމުން ދިޔައެވެ.

“މެރީ ނުކުރަންޏާ ހިލްޔާ މެރީ ނުކުރަން ތި ނިންމަނީ ރަނގަޅު ނިޔަތެއްގަތަ؟”

“ހިލްޔާ މެރީ ކުރާނެ ރަނގަޅު މީހަކު ނެތީތަ؟”

“ރަނގަޅު މީހެއް ހުރިއްޔާ އެމީހެއްގެ ދީންވެރިކަން ނެތީތަ؟”

“އަޚްލާޤާއި ދީންވެރިކަން ހުރި މީހަކު ހުއްޓަސް އެމީހެއްގެ މިޒާޖު ހިލްޔާއާއި ނުގުޅެނީތަ؟”

“އެމީހެއްގެ ކިބައިގަ ހިލްޔާއަށް ކަމުނުދާ ސިފައެއް ހުރީތަ؟”

“ކައިވެންޏެއް ކުރިއްޔާ ހެޔޮ ޢަމަލުތަކަށް ވުރެ ހިލްޔާގެ ގޯސް ޢަމަލުތައް ގިނަވާނެހެން ހީވަނީތަ؟”

އޭގެއިން ކޮންމެ ސުވާލެއް ސިކުނޑިއަށް ވެރިވަމުން ދިޔަހެން ޖަވާބަކަށް ނޫނެކޭ ހިލްޔާގެ ހިތް ބުނަމުން ދިޔައެވެ. ކައިވެނި ކުރާނެ ރަނގަޅު މީހެކޭ ހިތަށްއަރާއިރަށް ދާނިޝް ހަނދާންވިއެވެ. ދާނިޝްގެ ދީންވެރިކަމާއި އަޚްލާޤް ހަނދާނަށް އައެވެ. ދާނިޝް އޭނައާއި ނުހަނު ގުޅޭހެން ޚުދު އޭނައަށް ވެސް ހީވާކަން އެނގުންވިއެވެ. ދާނިޝްގެ ކިބައިން އޭނައަށް ކަމުނުދާ އެންމެ ސިފައެއް ވެސް އަދި ފެނިފައި ނުވާކަން އެނގުންވިއެވެ. ދާނިޝް ކަހަލަ ރަނގަޅު މީހަކާއި ކައިވެނި ކުރެވިއްޖެނަމަ ހަމަ ޔަޤީނުން ވެސް ގިނަ ހެޔޮ ޢަމަލުތައް ކުރަން އޭނައަށް ހިތްވަރެއް ލިބޭނެކަން ހިލްޔާގެ ހިތަށް ޔަޤީން ކުރެވުނެވެ. އެހެންކަމަށްވާނަމަ….އޭނަ ދާނިޝްއާއި އިންނަންވީ ހެއްޔެވެ؟

ހިތަށް ވެރިވި އެ ޚިޔާލާއިއެކު ހިލްޔާއަށް ތެދުވެލެވުނީ ހަމަ އެއްވެސް އިޚްތިޔާރަކާއި ނުލައެވެ. އެހިނދު ފިކުރު ބޮޑުވެފައިވި ވަރުން ދެބުމަ ކައިރިވެފައިވިއެވެ. އެ ޙާލުގައި ރަޖާއާއިއެކު ފައި ކުރުކޮށްލަމުން ދެ ކަކުލުގައި ދެ އަތުން ބައްދާލިއެވެ. އެއަށްފަހު ޙާލަތާއި މެދު ގަދައަށް ވިސްނެން ފެށިއެވެ.

މި ޙާލަތުގައި ދާނިޝް އާއި އިނުމަކީ ދީނީ ގޮތުން ރަނގަޅު ނިންމުންކަން ހިލްޔާއަށް ސާފުވިއެވެ. އެހެނަސް ހިލްޔާ އޮޅުން އަރާ ތަންކޮޅެއް އަދިވެސް އެބަ ވެއެވެ. އޭނައަށް ދާނިޝް ކަމުދާ ސަބަބެވެ. އެ ސަބަބު އެނގުން ހިލްޔާއަށް މުހިއްމުވިއެވެ. އެހެނީ ނުހަނު ކައިރި މާޒީއެއްގައި ވެސް ފިރިހެނަކު ކަމުގޮސްގެން ކައިވެނީގެ ޙަފްލާއަކާއި ހަމައަށް ވެސް ދިޔައެވެ. އެހެނަސް އެ ގުޅުން ވެގެން ދިޔައީ ދެމިގެންދާ ފަދަ ގުޅުމަކަށް ނޫނެވެ. އެއީ ހިލްޔާ ރާފިލް ދެކެ ލޯބިވީ ރާފިލްގެ އަތުގައިވާ ފައިސާއާއި މުއްސަނދިކަމުގެ ސަބަބުން ކަމަށްވާތީ ކަން މިއަދު ވިސްނެއެވެ.

އޭނައަށް ދާނިޝް ކަމުދަނީ މިއަދު ދާނިޝް އެޑްމިން އޮފިސަރެއްގެ ބަދަލުގައި މެނޭޖަރަކަށްވުމުން ހެއްޔެވެ؟ ހިލްޔާއަށް ވިސްނާލެވުނެވެ. ހަމަ އެއާއިއެކު އެ ސުވާލަށް ނޫނެކޭ ހިތް ބުންޏެވެ. ދާނިޝް ރިސެޕްޝަންގައި ހުރި ނަމަވެސް މިއަދު އޭނައަށް ދާނިޝް ކަމުދިޔައީސްކަން ހިލްޔާއަށް ޔަޤީން ކުރެވުނެވެ. އަދި އަމުދުން ވަޒީފާއެއް ނެތި ދާނިޝް މޭވާ ހައްދައިގެން ލާރި ހޯދިޔަސް ހިލްޔާއަށް ދާނިޝް ކަމުދިޔައީހެވެ. އެހެނީ ދާނިޝްއަކީ ޒިންމާދާރު ބައިވެރިޔަކަށް ވާނެކަން ހިލްޔާއަށް ޔަޤީންވެފައިވާތީވެއެވެ. އަދި ދާނިޝްއަކީ އޭނަ ފަދައިން ހުނަރުތައް އިތުރު ކުރަން މަސައްކަތް ކޮށް ކުރިއަރައިދާން މަސައްކަތް ކުރާ މީހެއްކަން އެނގޭތީވެއެވެ. ކޮންމެ ޙާލެއްގައި އުޅެން ޖެހުނަސް ހިލްޔާ ނިކަމެތި ނުކޮށް ވީ އެންމެ ރަނގަޅަކަށް ބަލަހައްޓާނެކަމުގެ ޔަޤީންކަން ހިތަށް ލިބިފައިވެއެވެ.

އެ ޔަޤީންކަން އޭނައަށް ލިބިފައިވަނީ ކިހިނެއް ހެއްޔެވެ؟ އެހާ ބޮޑަށް ދާނިޝް އާއިމެދު ހެޔޮކޮށް ވިސްނޭ ވަރަށް ދާނިޝް ކަމުދަނީ ކީއްވެ ހެއްޔެވެ؟ ދާނިޝް ރީތިވުމުން ހެއްޔެވެ؟ ދާނިޝް އޭނައަށް ދޭ ސަމާލުކަމުގެ ސަބަބުން ހެއްޔެވެ؟ ދާނިޝް ކުރާ ސަމާސާތަކުގެ ސަބަބުން ހެއްޔެވެ؟

ހިލްޔާއަށް އޭގެ ޖަވާބެއް އެއްގޮތަކަށް ވެސް ނޭނގުނެވެ. އެހެންކަމުން އިތުރަށް ފިކުރު ކުރުމުގެ ބަދަލުގައި ހިލްޔާ ދުޢާއަށް އަތް އުފުލިއެވެ.

“ޔާ ﷲ! ދާނިޝް މި އަޅާއަށް ކަމުދާ ސަބަބު މިއަޅާއަށް ޔަޤީން ކޮށްދެއްވާނދޭވެ! އެ ސަބަބަކީ އިބަރަސްކަލާނގެ ރުހިވޮޑިގެންވާ ސަބަބަކަށްވާނަމަ، އަޅަމެންގެ ގުޅުން ފަސޭހަ ކޮށްދެއްވާނދޭވެ! އަދި އެ ސަބަބަކީ އިބަރަސްކަލާނގެ ރުހިވޮޑިގެންނުވާ ސަބަބަކަށްވާނަމަ މި އިޙްސާސް މި އަޅާގެ ހިތުން ފިއްލަވާނދޭވެ! އާމީން!”

ދުޢާ ކުރުމަށްފަހު މޫނުގައި އަތް އަޅާލުމުން ހިލްޔާގެ ހިތަށް ހަމަޖެހުމެއް ލިބުނެވެ. ހިލްޔާއަށް މިއަދު މުހިއްމު ހަމައެކަނި ކަމަކީ ﷲ ގެ ރުހިވޮޑިގަތުން ފަދައެވެ. މާޒީގައި ހިލްޔާ އުޅުނީ ޙަޔާތުގެ ލޯބީގެ ވާހަކަ ރީތި ކުރަން ކަމަށްވިޔަސް، މިއަދު އެފަދަ މަޤްޞަދެއް އެއްގޮތަކަށް ވެސް ނެތެވެ. މިއަދު ހިލްޔާގެ ނަޒަރުގައި ﷲ ގެ ރުހިވޮޑިގަތުން ލިބުމަކީ ދެ ދުނިޔޭގެ ބާއްޖަވެރިކަން ކަމަށްވާތީވެއެވެ.

އަނެއްކާވެސް އޮށޯތުމަށްފަހު ނުނިދުމުން ނިދަން ވެސް ހިލްޔާ އެހީ ހޯދީ ﷲ ގެ ޙަޟްރަތުންނެވެ. އެއަށްފަހު އަސްތަޣްފާރު ކުރަން ފެށިތާ މާ ގިނައިރެއް ނުވެ ހިލްޔާއަށް ނިދުނެވެ.

**

ނިދިފައި އޮތް ދާނިޝްއަށް ހޭލެވުނީ 4 ޖެހިއިރު އަރިމަތީ މޭޒުމަތީގައި އޮތް ފޯނު އެލާމްވާން ފެށުމުންނެވެ. ދެލޯ ތަގުޅިކޮށްލަމުން އެލާމްގެ އަޑު ކަނޑުވާލަން ކަނާތު އަތް ހިއްލާލަން އުޅުނެއްކަމަކު އަތަށް ބަރުވުމުން އެކަން ކާމިޔާބެއް ނުވިއެވެ. އުދަގުލާއެކީ ލޯ ހުޅުވާލެވުނީ ދެނެވެ. އަތުގައިވާ ޕްލާސްޓަރު ފެނިފައި ވެސް ދާނިޝްއަށް ވަރުބަލިކަމެއް އިޙްސާސް ކުރެވުނެވެ. އެހެނަސް އެ އިޙްސާސަށް ގެނބުމުގެ ބަދަލުގައި ފޯނުގެ އަޑު އަންނަމުން ދިޔަ ދިމާލަށް ބަލާލެވުނެވެ. އޮށޯވެ އޮތް ބާލީހުގެ ކަނާތް ފަރާތުގައި އޮތް ފޯނަށް ވާތު އަތް ދިއްކޮށްލަމުން ދާނިޝް ފޯނު ކަނޑާލިއެވެ. އެ ގެނެވުނު ޙަރަކާތުން ބުރަކަށްޓަށް ވީ ތަދާއިއެކީ ދާނިޝްގެ ލޮލުން ނިދި ފިލިއެއްކަމަކު ވަރުބަލިކަމާއިއެކީ އެނދުގައި އޮވެވުނެވެ. އެހިނދު ބުރަކަށީގެ ތަދާއިއެކު ދުޅަވެފައިވާ ލޮލަށް ވެސް ތަދުވިއެވެ. ރޭ ގެއަށް އައިސް ރޮވުނު ރުއިމުގެ އަސަރު އޭރުވެސް އެ ލޯމަތިން ފާޅުވަމުން ދިޔައެވެ.

ރޭ ދާނިޝް އުދަގުލާއެކީ ހިނގަމުން ގޮސް އެޕާޓްމެންޓް ގެ ދޮރު ހުޅުވަން ޖެހުނީ ވެސް ވަރަށް މަސައްކަތުންނެވެ. ވާތް އަތުން ފަޓުލޫނުގެ ޖީބުގައި އޮތް ވޮލެޓް ނަގައި އެ ވޮލެޓް ތެރެއިން ތަޅުދަނޑި ނަގަން އުޅެނިކޮށް ތަޅުދަނޑި ބިންމައްޗަށް ވެއްޓުނެވެ. ގުދުވެފައި ތަޅުދަނޑި ނަގަންވުމުން ގައިގެ އެކި ތަންތަނަށް ތަދުވިއެވެ.

އެ ހުރިހާ ދަތިކަމެއްގެ ސަބަބުން ކަންނޭނގެއެވެ. އެޕާޓްމެންޓްގެ ދޮރު ހުޅުވައި ބޮކި ދިއްލާލި ވަގުތު، ދާނިޝް މަންމަ މަތިން ހަނދާންވީ މާ ބޮޑަށެވެ. އޭނަ މިއަދު ގެއަށް އައިއިރު މަންމަ ގޭގައި ހުރި ނަމަ މަންމަ ވަގުތުން އޭނައަށް އެހީވެދޭން އަންނާނެއޭ ހިތަށްއެރިއެވެ. ބޭރުގައި އުޅުނުއިރު ފުރަތަމަ ލައިސަންސް ލިބިގެން އުޅެނިކޮށް ސައިކަލު އެކްސިޑެންޓެއް ވެގެން ހޮސްޕިޓަލުގައި އޮތް ދުވަސްތައް ހަނދާނަށް އައެވެ. އެދުވަހު މަންމަ ކަމުން ކަން ހުއްޓައި އޭނަ ބަލަން އައެވެ. އެހެނަސް އެދުވަހު ދާނިޝް މަންމައަށް މާ ބޮޑު ސަމާލުކަމެއް ނުދެއެވެ. ބޮޑަށް ސަމާލުކަން ދެމުން ދިޔައީ ފޯނުން އޭނައާއި ވާހަކަ ދައްކަމުން ދިޔަ އެކުވެރިންނަށާއި އޭނަ ބަލަން އައި އެކުވެރިންނަށެވެ. މަންމަ އޭނައަށް ކާން ދީ ބޭސް ދޭން އުޅޭތީ މަންމައަށް ޗޮއްކަނޑައި ކުދި ކިޔެމުން ދިޔައެވެ. މަންމައަކީ ބުރައެއްގެ ގޮތުގައި އެދުވަހު ސިފަ ކުރެވުނެވެ.

އެ ދުވަސްތައް ހަނދާންވެފައި އެޕާޓްމެންޓް ތެރެއަށް ވަދެގެން ދިޔަ ވަގުތު ވެސް ދާނިޝް ގެ ލޮލުން ކަރުނަ ހިލުނެވެ. ނުރޯން ކިތަންމެ މަސައްކަތް ކުރިއެއްކަމަކު ކޮޓަރިއަށް ވަދެވުމާއިއެކު ދާނިޝްއަށް ގިސްލެވެން ފެށީ ހިތަށް ކެތް ނުކުރެވުމުންނެވެ. މަންމަ އޭނައާއި ވަކިވިތާ 7 މަސްވެފައިވާ ކަމާއި، މިއީ މަންމަ ނެތި އޭނައަށް ބޮޑުކަމެއްވީ ފުރަތަމަ ފަހަރު ކަން ވެސް ހަނދާންވެފައި އަދި ބޮޑަށް ރޮވުނެވެ. ހުވަފެނަކުން ވެސް މަންމަ ނުފެނި ހުއްޓިފައިވާކަން އެނގުންވުމުން ދާނިޝްއަށް އެނދުމަތީގައި ގޮސް އިށީނދެ ގަދައަށް ރޮވުނެވެ. ރޮވެމުން ދިޔައިރު މަންމަގެ ނަމުން ގޮވެމުން ދިޔައީ ހަމަ އެއްވެސް އިޚްތިޔާރަކާއި ނުލައެވެ.

ދާނިޝްއަށް އެގޮތަށް ރޯން އިނދެވުނީ ކިހާ އިރެއް ވަންދެން ކަމެއް ޚުދު އޭނައަށް ވެސް ނޭނގެއެވެ. އެހެނަސް ވަކި ހިސާބަކުން ރުއިން ހުއްޓާލަމުން ތެދުވެލީ، އޭގެ އަނެއްދުވަހު ފަތިސް ނަމާދަށް ހޭލަން ޖެހޭކަން ހަނދާން ކުރަމުންނެވެ.

ފަތިހު އެނދުގައި އޮށޯވެ އޮވެވެސް ދާނިޝް ގަދަކަމުން ތެދުވެލީ ނަމާދަށްޓަކައެވެ. ހޭލުމަށްފަހު ކިޔާ ދުޢާ ކިޔާލުމުން އާދައިގެ މަތިން ހިތަށް ޝުކުރުވެރިކަމެއް ވެރިވިއެވެ. ހަށިގަނޑުގައި ކިތަންމެ ރިހުމެއް ވިޔަސް ﷲ ސުބްޙާނަހޫ ވަތަޢާލާ އޭނައަށް ޙަޔާތް ދެއްވީތީ ޝުކުރު ކުރެވުނެވެ. އަދި ކޮންމެ ކަމެއްގައި ވެސް އެކަލާނގެ ހެވެއް ލައްވާކަން ހަނދާން ކުރެވުނެވެ.

ދަތިކަމާއިއެކީ ވެސް ފާޚާނާއަށްވަދެ ދަތް އުނގުޅައި ވުޟޫކޮށްލީ ﷲ މަތިން ހަނދުމަ ކުރަމުންނެވެ. ﷲ ގެ ރުހިވޮޑިގަތުމަށް އެދިގެންނެވެ. ދަމުނަމާދު އިށީނދެގެން އިނދެ ކޮޓަރީގައި ކޮށްލީ، ފަތިސް ނަމާދު ވެސް ގޭގައި ކުރަން ޖެހޭނެތީ ހިތް ދެރަވެފައިވާ ޙާލުގައެވެ. ފަޔަށް ތަދުވަމުން ދާ ގޮތުން ހިނގާފައި ދެވޭނެހެން ހީނުވީތީވެއެވެ. ރޭ ބޭސް ކާން ހަނދާން ނެތުނުކަން ވެސް އެނގުންވީ އެ ވަގުތެވެ.

ފަތިސް ނަމާދަށް ބަންގި ގޮވިތާ މާ ގިނައިރެއްނުވެ ފޯނު ރިންގުވާން ފެށުމުން ދާނިޝް ގޮނޑިން ތެދުވެގެން ގޮސް ފޯނު ނެގިއެވެ. ގުޅަނީ ފަޔާޒް ކަން އެނގުމުން ފޯނު ނަގައި ކަންފަތުގައި ޖައްސާލެވުނެވެ.

“ބްރޯ ކިހިނެއްތަ؟ ކާރުގަ މިސްކިތަށް ދާނެ ވަރެއް އެބަ ހުރިތަ؟” ފަޔާޒް އެހިއެވެ.

“އޯކޭ ދެން މިހާރު. ކާރުގަ ވިއްޔާ ދެވޭނެ އިން ޝާ ﷲ. ކިހިނެއްވީ؟ ޔައިޝް އައީތަ މިކޮޅަށް މިރޭ؟” ދާނިޝް އެހިއެވެ.

“ނޫނޭ. މަ ގުޅައިގެން ކާރުގަ މިކޮޅަށް ގެނައީ. މިތިބީ ތިރީގަ. އައިސްދެންތަ ކޮޓަރިއާއި ހަމައަށް ދާނިޝް ބަލާ؟” ފަޔާޒް އެހިއެވެ.

“ނޫން ބްރޯ އޯކޭވާނެ. މި އަންނަނީ. ޔޫ ގާއިސް އާރ ދަ ބެސްޓް!” ދާނިޝްއަށް ބުނެވުނެވެ. އޭނަގެ ހެޔޮ އެކުވެރިންނަށްޓަކައި ޝުކުރުވެރިވެވޭ ޙާލުގައެވެ.

“ވީ ނޯ! މާ ޝާ ﷲ! ދެން އަވަހަށް އަންނަން އުޅޭ.” ފަޔާޒް އެހެން ބުނި ބުނުމުން ދާނިޝްއަށް ހީލެވުނެވެ. އެއަށްފަހު ފޯނު ކަނޑާލަމުން ތިރިއަށް ދާން އަވަސްވެގަނެވުނެވެ.

ކާރުގައި ތިން މީހުން ދިޔައީ ޢާއްމު ގޮތެއްގައި ދާނިޝްއާއި ފަޔާޒް ނަމާދު ކުރާ މިސްކިތަށެވެ. މިސްކިތާއި ހަމައަށް ދިޔައިރު ބަންގި ގޮވައިފިއެވެ. ތިން އެކުވެރިން އެކީގައި ކުރީ ސަފުގައި ތިބެ ނަމާދު ކުރިއެވެ. ދާނިޝްގެ ހިތަށް އިތުރު އުފަލެއް ލިބުނީ ނަމާދަށްފަހު މިސްކިތުން ނިކުންނަމުން ދަނިކޮށް ނަހީދުބެ އާއި ވެސް ދިމާވުމުންނެވެ. ނަހީދުބެ އަކީ ކުރިން އެއްވެސް ވަރަކަށް މިސްކިތުން ފެންނަ މީހެއް ނޫނެވެ. އެހެނަސް ހިލްޔާއަށް ބަދަލުތަކެއް އައި ފަހުން ދޭތެރެ ދޭތެރެއިން ނަހީދުބެ އާއި މިސްކިތުން ދާނިޝް ދިމާވެއެވެ. ފަތިސް ނަމާދަށްފަހު މިސްކިތުން އެދުވަހު ދިމާވީ އަލަށެވެ. އެހެންކަމުން ނަހީދުބެ ފެނުމުން ލިބުނު އުފާވެރިކަން ދެގުނަވިއެވެ.

ފަތިސް ނަމާދަށްފަހު ދާނިޝް ގެ އެކުވެރިން ރާވާފައިވީ ދާނިޝް ގޮވައިގެން ހެނދުނު ސައި ބޯން ރެސްޓޯރެންޓަކަށް ދިޔުމަށެވެ. ނަހީދުބެ ވެސް އެ މީހުންނާއި އެކީ އައުމަށް ދަޢުވަތު ދިނުމުން ނަހީދުބެ އެ ދަޢުވަތު ޤަބޫލު ކުރިއެވެ.

ކުޑަ ރެސްޓޯރެންޓުގައި ތިބެ ދެކެވުނު ވާހަކަތަކުގެ ތެރެއިން ދާނިޝް އާއި އެކީ ޢުމްރާއަށް ދާން އުޅެނީ ފަޔާޒާއި ފަޔާޒްގެ ޢާއިލާގެ އިތުރުން ޔައިޝް ކަން ނަހީދަށް އެނގިގެން ދިޔައެވެ. އެ ބައްދަލުވުމުގެ ތެރެއިން ދާނިޝް މެން އެ ދާ ގްރޫޕާއި އެކީ ނަހީދުމެންނަށް ވެސް ޢުމްރާއަށް ދެވޭނެހެން ބުކިންގް ހެދުމަށް ގްރޫޕަށް މެސެޖުތަކެއް ފޮނުވިއެވެ. އެކަމާއިމެދު ދާނިޝް އުފާ ކުރި ހިނދު ދާނިޝްގެ އެކުވެރިން އޭނައަށް ލާނެތް ހިނިތުންވުންތައް ދެމުން ދިޔައެވެ.

**

އެދުވަހު ފަތިސް ނަމާދަށްފަހު ނާސްތާ ތައްޔާރު ކުރަމުން ދިޔަ ވަގުތު ހިލްޔާއަށް ވިސްނެމުން ދިޔައީ ދާނިޝް ގެ ނާސްތާ އާއި މެދުގައެވެ. ދާނިޝް ކައްކައި ކައި އުޅެނީ އަމިއްލައަށް ކަން ހިލްޔާއަށް ކުރިން ވެސް ބައްޕަ ފަރާތުން އެނގިފައިވެއެވެ. އަތް ބިނދިފައިވުމުން އެކަން ކުރަން ދަތިވާނެކަން ހިލްޔާއަށް އެނގެއެވެ. އެހެންކަމުން ދާނިޝްއަށްޓަކައި ނާސްތާ ތައްޔާރު ކުރަން ވިސްނެމުން ދިޔައެވެ. ބައްޕަ މިސްކިތުން އައުމުން ދާނިޝްއަށް މީރުވާނެ އެއްޗަކާއި މެދު ސުވާލު ކުރަން ނިންމުނެވެ. ދާނިޝްއަށް ދިވެހި ކާނާ މީރެއް ނޫންކަމަށް އުސްތާޒާ އަސްމާ ބުނި ފަނޑު ހަނދާނެއް ހުރީތީވެއެވެ.

ބައްޕަ ގެއަށް އައީ 7:30 ވާން ވެސް ގާތްވެފައި ވަނިކޮށެވެ. އެހިނދު ހިލްޔާ ދޮންތައާއިއެކީ ނާސްތާ ކުރުމަށްފަހު ތަށިތައް ދޮންނަމުން ދިޔައެވެ. މާމަ މާ ކުރިން ނާސްތާ ކޮށްލައިގެން ކޮޓަރިއަށް ވަދެފައިވީއިރު އެލީ ސްކޫލަށް ގޮސްފައިވިއެވެ. ނާސްތާ ފެށުމުގެ ކުރިން ހިލްޔާ ބައްޕައަށް ގުޅައި ޚަބަރު ބަލާފައިވުމުން ބައްޕަ ވީ ކޮން ތަނެއްގައި ކަން އެނގުނެވެ. ބައްޕަ ބަދިގެ ދޮށަށް ބޯދިއްކޮށްލުމާއިއެކު ހިލްޔާއަށް ސުވާލުތައް ކުރެވުނީ އެހެންވެއެވެ.

“ބައްޕާ….ކޮބައިތަ ދާނިޝް؟ ރަނގަޅަށް ނާސްތާ ކުރިތަ ދާނިޝް؟” ހިލްޔާއަށް ބައްޕައާއި ދިމާލަށް މުޅިން އެނބުރި، ދެ ފިޔަވަޅު ކުރިއަށް އަޅާލަމުން އެ ސުވާލުތައް ކުރެވުނީ ހަމަ އެއްވެސް އިޚްތިޔާރަކާއި ނުލައެވެ. އެ އަޑުގައި ކަންބޮޑުވުމެއް އެކުލެވިގެން ދިޔަކަން ޚުދު ހިލްޔާއަށް އެނގުންވެގެން ދިޔުމުން ހިލްޔާ ލަދުގަންނަ ގޮތްވިއެވެ. އެކަން އެހެން މީހަކަށް ފާހަގަ ނުވާނެ ގޮތެއް ވުމަށް އެދެވުނެވެ. އެހެނަސް އެވަގުތު އުނދުން ކައިރީގައި ދަރިފުޅަށް ދޭން ތަރުކާރީ މަޑު ކުރަމުން ދިޔަ ހަމްރާ ހިލްޔާއަށް ޒާތެއްގެ ނަޒަރެއް ދިނެވެ.

“އާނ ރަނގަޅަށް ކުރި ނާސްތާ. ބައްޕައަށް ރަނގަޅަށް ނާސްތާ ކުރެވުނުތޯ ނާހާނަންތަ؟” ބައްޕަ ޒާތެއްގެ ހިނިތުންވުމަކާއެކީ އެ ސުވާލު ކުރުމުން ހިލްޔާ އިތުރަށް ލަދުގަންނަ ގޮތްވިއެވެ.

“ދާނިޝް….ބަލިވީމައޭ އެ ސުވާލު ކުރީ ބައްޕާ. ބޭސް ކައިގެންތަ ދާނިޝް ހުރީ؟” ހިލްޔާއަށް އެ ސުވާލުތަކާއިގެން ދެވުނީ ކުރިއަށެވެ.

“ރޭ ބޭސް ކާން ހަނދާން ނެތުނު ވާހަކަ ބުނި-“

“ވަޓް؟! ކިހިނެއް ހަނދާން ނެތުނީ؟ އެއީ ހަނދާން ނައްތަން ޖެހޭ ކަމެއް ނޫނެއްނު؟” ހިލްޔާއަށް ހިސާބެއްގެ ނުރުހުންތެރިކަމާއެކީ ބުނެވުނެވެ.

“ދޯ ދެން…..އެކަނި އުޅޭއިރު ހަނދާން ވެސް ނެތިދާނެތާ. ބުނި ގެއަށް ގޮއްސަ ކާނަމޭ.” ބައްޕަ ބުންޏެވެ.

“ރޭ ބޭސް ނުކެއިމަ…މިހާރު ބޮޑަށް ތަދު ވެސް ވާނެ. ރަނގަޅަށްތަ ހުރީ ގެއަށް ދިޔައިރު؟”

“ތެދުތެދަށް ބުނަންޏާ…ކުޑަކޮށް ސަކަރާތްވެފަ ހުރީ. މިސްކިތުން ފެނުނުއިރު ވެސް ލޯ ދުޅަވެފަ ހުރީ. ފަހުން ބައްޕަ ކިހިނެއްވީހޭ އެހީމަ ބުނީ ރޭ މަންމަ މަތިން މާ ބޮޑަށް ހަނދާންވީމަ ދެރަވީއޭ.”

ބައްޕަ ބުނެލި އެ ވާހަކައިން ހިލްޔާ ހިމޭންވާ ގޮތްވިއެވެ. އެހިނދު ޚުދު ހިލްޔާގެ ހިތް ވެސް ދެރަވެ، އެ މޫނުމައްޗަށް ހިތާމަވެރިކަން ވެރިވިއެވެ. އެހެނަސް އެ އިޙްސާސްތައް ހިންދަމުން އަވަސްއަވަހަށް ވާހަކަ ދެކެވުނެވެ.

“ދެން….ފައިގަ ދުޅަވެފަ ހުރި ތަނުގަ އައިސް އެޅިތަ؟” ހިލްޔާ އެ ސުވާލު ކުރިއިރު އަރުތެރެ ބެދެން ފަށާފައިވިއެވެ.

“ނާހަން ތި ވާހަކައެއް. އެކަމަކު އެޅި ހެނެއް ހިއެއް ނުވޭ.”

“މެންދުރު ކާނީ ކިހިނެއް؟”

“އޯޑާރ ކުރާނީއޭ ބުނީ.”

“އުނހު….އަހަރެން ލަންޗެއް ހަދައިދޭނަން. މޯނިންގް ޑިއުޓީ ނިންމާލާފަ އައިސް.”

“އެހެންވީމަ ބުނަންވީ ދޯ ލަންޗަށް މިގެއަށް އަންނަން.”

“ނޫން. އަންނަން އުދަގޫވާނެ ދާނިޝްއަށް. ފަޔަށް ތަދުވާނެ އަދިވެސް. އަހަރެން ހަދައިދިނީމަ ބައްޕައަށް ގެންގޮސް ދެވިދާނެތަ؟”

“އާނ…ގެންގޮސް ދެވިދާނެ.”

“ބައްޕަ ދާނިޝް ކައިރިން އަހާލައްޗޭ ކޯޗެއްތޯ ބޭނުމީ ލަންޗަށް. އަހަރެން….ގެ ނަން ނުބުނެ.”

“އޯކޭ…”

ބައްޕަ އެހެން ބުނުމުން ހިލްޔާއަށް ބޯޖަހާލެވުނެވެ. އެއަށްފަހު ސިންކުގައި ބާކީ ހުރި ކޯޅި ތަށްޓެއް ދޮވެލުމަށްފަހު ހަރުގަނޑުގައި ޖަހާލަމުން ޓިޝޫއަކުން އަތް ފޮހެލިއެވެ. އެއަށްފަހު އަވަސް ފިޔަވަޅުތަކެއްގައި ބަދިގެއިން ނިކުންނަން ދިޔައީ އަވަސް ފިޔަވަޅުތަކެއްގައެވެ. ޑިއުޓީއަށް ދާން ގަޑި ޖެހެމުން ދާތީވެއެވެ. އަދި ހަމަ އެހެންމެ ހިތު ތެރޭގައިވި ޖަޒުބާތުތައް އުތުރި އަރަމުން ދިޔައީތީ ވެސްމެއެވެ.

ހިލްޔާ ބަދިގެއިން ނިކުމެގެން ދިޔުމުން ކަމެއް އެނގުންވެގެން އުޅޭ ފަދަ ހިނިތުންވުންތަކެއް ނަހީދާއި ހަމްރާއާއި ދެމެދު ބަދަލުވެ، ދެމީހުންނަށް ވެސް ހިލްޔާ ދިޔަ ދިމާލަށް ނަޒަރެއް ދެވުނެވެ.

ހިލްޔާ އެދުވަހު ޑިއުޓީއަށް ދާން ތައްޔާރުވަމުން ދިޔަ ވަގުތު ހިތުގެ ހަމަޖެހުން ގެއްލިފައިވިއެވެ. ހަނދާންވަމުން ދިޔައީ ރޭ އެތައް އިރެއް ވަންދެން ދާނިޝްގެ ކޮޓަރީގައި އަލި ބޮކި ދިއްލިފައިވީ ގޮތެވެ. އެ ހުރިހާ އިރު ދާނިޝް އެކަނި އިނދެގެން ރުއީތޯ ހިތަށްއެރިއެވެ. އެ މަންޒަރު ލޮލަށް ސިފަ ކުރަން ވެސް ހިލްޔާއަށް ދަތިވިއެވެ. އެހެނަސް އިޚްތިޔާރަކާއި ނުލާ ހިލްޔާގެ ހަނދާންތައް އުސްތާޒާ އަސްމާ ނިޔާވި ދުވަހަށް ދަތުރު ކުރިއެވެ. އެރޭ ދާނިޝް އޭނައަށް ބީރައްޓެއްސަކަށް ވީ ހިނދު އިވިފައިވި ދާނިޝް ގެ ރުއިމުގެ އަޑެވެ. އެދުވަހު މިސްކިތުގައި އެކަނި އިށީނދެގެން އިން ގޮތެވެ.

މޫނުބަލާ ލޯގަނޑު ކުރިމަތީގައި ހުރެ ޝޯލް އަޅަމުން ދިޔަ ވަގުތު ހިލްޔާއަށް ސިފަކުރެވެމުން ދިޔައީ އެ މަންޒަރުތަކެވެ. ޝޯލް އަޅައި ނިންމާލުމަށްފަހު ލޯގަނޑުން ފެނުނު އަމިއްލަ ސޫރައަށް ސަމާލުކަން ދެވުނުއިރު ޚުދު ހިލްޔާ ވެސް ޙައިރާންވިއެވެ. އެ މޫނުމަތިން ފާޅުވަމުން ދިޔައީ ރޮވެން ކައިރިވެފައި ހުރި އަސަރެކެވެ. މިއީ ހަމަ ގައިމުވެސް މީގެ މަސްތަކެއް ކުރިން ދާނިޝް ދެރަވެފައި ހުރީތީ އޭނައަށް ކުރި އަސަރެއް ނޫނެވެ.

ކީއްވެ ހެއްޔެވެ؟ ދާނިޝްއަށްޓަކައި އޭނަގެ ހިތުގައި މިފަދަ ފުން އިޙްސާސްތައް އުފެދިފައިވަނީ ކީއްވެ ހެއްޔެވެ؟ ހަމަ ގައިމުވެސް މިއަދު ރީތި ލޯބީގެ ވާހަކައެއްގައި އުޅޭކަށް އޭނަ ބޭނުމެއް ނުވެއެވެ. އަދި އަމުދުން ކައިވެންޏެއް ކޮށްގެން މީހުންނަށް އޭނަގެ ރީތި ދިރިއުޅުން އެހެން މީހުންނަށް ދައްކަން ބޭނުންވުމުގެ އެދުމެއް ވެސް ހިތުގައެއް ނެތެވެ. ވީއިރު ކީއްވެ ހެއްޔެވެ؟ ހިލްޔާ ޖަވާބު ބޭނުންވިއެވެ.

ނުނިމޭ