ނަފްސީ (ފަންސާސްތިންވަނަ ބައި)

ނަފްސީ (ފަންސާސް ތިންވަނަ ބައި)

ދާނިޝް އެދުވަހު ހަވީރު ހުރީ ހުޅުމާލޭގައި ހުރި އިޚްވާން ފައުންޑޭޝަން ގެ ޢިމާރާތުގެ މަސައްކަތް ބެލުމަށެވެ. އެއީ ދާނިޝް އާއި ދާނިޝްގެ އެކުވެރިން ވެގެން ކުއްޔަށް ހިފި 8 ފަންގިފިލާގެ ޢިމާރާތެކެވެ. އެމީހުން ރާވާފައިވީ ޢިމާރާތުގައި އެކި ކަހަލަ ވިޔަފާރިތައް ހިންގުމެވެ. އެ ވިޔަފާރިތަކަށް ހުރިހާ އެކުވެރިން ވެގެން ރައުސްމާލެއް ކަނޑައަޅާ ގޮތަށެވެ. އަދި އެ ވިޔަފާރިން ލިބޭ ފައިދާއިން ކުލި ދެއްކުމަށްފަހު ބާކީ ވާ ބައިން ޞަދަޤާތް ވެސް ކުރުމަށެވެ.

 

އެދުވަހު ހަވީރު ވެސް ނަޖާހާއިއެކީ އެ ޢިމާރާތުގެ 3 ވަނަ ފަންގިފިލާއަށް ގޮސް އެ ބައިގައި ހިންގާނީ ކޮން ކަހަލަ ވިޔަފާރިއެއް ކަމާއިމެދު މަޝްވަރާ ކުރެވުނެވެ. އިރުގަނޑެއް ވަންދެން ވާހަކައިގައި ތިބެފައި އެ ބައްދަލުވުން ނިމުމަކަށް އައީ، ނަޖާހުގެ މަންމަ ކޮންމެވެސް ކަމަކާ ގުޅާލުމުންނެވެ. ނަޖާހު ދާން ވުމުން ދާނިޝް ވެސް އެވަގުތު ޢިމާރާތުން ނިކުމެ ގެއަށް ދާން މިޞްރާބު ޖެހިއެވެ.

 

އެ ޢިމާރާތުން ގެއަށް ދާ މަގުމަތީގައި ދާނިޝްގެ ލޮލުގައި އަޅާ ހޮޓަލެއްވެއެވެ. މޫންލައިޓް ނަމަކަށް ކިޔާ އެ ހޮޓެލް ފެނުމާއިއެކު ދާނިޝްގެ ހިތަށް އުދަގޫތަކެއް ވެއެވެ. އެ ހޮޓެލަކީ މީގެ ދެ އަހަރު ކުރިން އޭނަ ޒިވް ގެންދިޔަ ހޮޓަލެވެ. ޒިވް އާއިއެކީ އެއް ކޮޓަރިއަކަށް ވަންނަން އުޅުނު ހޮޓަލެވެ.

 

ހޮޓެލް ފެންނަ ކޮންމެ ފަހަރަކު އެ ހަނދާންތައް އާވެ، ދާނިޝް ގެ މުޅި ނަފްސު ލަދުވެތިކަމުން ފުރިގެން ދެއެވެ. އޭރު ދާނިޝްގެ ނަޒަރުގައި އަންހެން ކުއްޖަކާއި އެގޮތަށް ބައްދަލު ކުރުމަކީ މާ ބޮޑު ކަމަކަށް ވިޔަސް، މިއަދު ދާނިޝްގެ ހިތް އެކަމަށްޓަކައި އަމިއްލަ ނަފްސަށް މަލާމާތް ކުރެއެވެ. ބުރުގާ ވެސް ނާޅާ ކުރު ހެދުން ލާ އަންހެން ކުއްޖަކާ ވަކިން ބައްދަލު ކުރަން ބޭނުންވި ނިޔަތް ހަނދާންވެފައި ވެސް ފާފަ ފުއްސެވުމަށް އެދި ދުޢާ ކުރެވެއެވެ. އެފަދަ ފާފައަކަށް އޭނަ އަނބުރާ ނުގެންދެވުމަށް އެދި ދުޢާ ކުރެވެއެވެ.

 

މިފަހުން އައިސް ދާނިޝް އެ ހޮޓެލާއި ދިމާލަށް ނުވެސް ބަލައެވެ. އެއީ މާޒީކަމަށް އަމިއްލަ ނަފްސަށް ވިސްނައިދީގެންނެވެ. އެހެނަސް އެދުވަހު އެ ހޮޓެލާއި ގާތްވީ ވީހެން ސައިކަލުގެ ދުވެލި ލަސްކޮށްލެވުނީ، އެ ހޮޓެލްގެ ކުރިމަތިން ހިލްޔާގެ ކާރު ފެނުމުންނެވެ. ނަހީދުބެ މިވަގުތު ޔަޤީނުން ވެސް ހުންނާނީ އޯސިސް ފިހާރައިގައި ކަން އެނގުމުން، އެ ކާރު މިތަނަށް ގެނައީ ހިލްޔާ ކަން ދާނިޝްއަށް ޔަޤީން ކުރެވުނެވެ. ސައިކަލު ގޮސް އެ ކާރުގެ ފަހަތުގައި މަޑުކޮށްލެވުނީ ހަމަ އެއްވެސް އިޚްތިޔާރަކާއި ނުލައެވެ. ހިލްޔާ މިވަގުތު މި ހޮޓެލަށް އައީ ކީއްކުރަންތޯ ހިތަށްއެރިއެވެ. އިތުރަށް ނުހޯދަން ހިތް ބުންޏެއްކަމަކު ހޯދަން ވެސް ދާނިޝް ބޭނުންވިއެވެ. އެއީ އޭނަ އިންނަން ޚިޔާލު ކުރާ ކުއްޖާއަށް ވުމުން އުޅޭ ނުއުޅޭ ގޮތް ވެސް ބަލަން ވާނެ ނޫން ހެއްޔެވެ؟

 

ހިތަށް ވެރިވި އެ ޚިޔާލު ދާނިޝްއަށް އަމިއްލަ ނަފްސާއި ކަހަލަ ގޮތަކަށް ހީލެވުނެވެ. އެއީ ހިލްޔާ ދެކިލަން އޭނައަށް ވިސްނުނު ބަހަނާއެއްކަން އެނގުންވިއެވެ. ހިލްޔާއާއި ބައްދަލު ނުކުރިޔަސް ހިލްޔާ މިތަނަށް އައީ ކީއްވެކަން ދާނިޝް ދަނެގަންނަން ބޭނުންވިއެވެ. އެ ސަބަބު ނޭނގި މިރޭ ނިދޭނެ ހެނެއް ވެސް ހިއެއް ނުވެއެވެ. އެ ފެންނަ މަންޒަރަކީ ހިލްޔާއާއި އިންނަން ކުރި އިސްތިޚާރާގެ ޢިޝާރާތަކަށް ވެދާނެކަމަށް ދާނިޝްއަށް ހިތާހިތުން ބުނެވުނެވެ.

 

ހޮޓެލަށް ވަދެގެން ދިޔަ ގޮތަށް ދާނިޝް ލިފްޓަށް އަރައި އެންމެ މަތީ ފްލޯގެ ނަންބަރަށް ފިތާލިއެވެ. ހިލްޔާ ދިޔައިއްޔާ ޓެރެސްގައި ވާ ރެސްޓޯރެންޓަށް ހެން ހީވުމުންނެވެ. އެންމެ މަތީ ފްލޯއަށް ގޮސް ޓެރެސްއަށް އެރުމަށް ދާނިޝް ސިޑީގެ ހަރުފަތްތައް ގިރާކުރަން ފެށިއެވެ. އެންމެ ފަހު ހަރުފަތްތަކާއި ހަމައަށް ދެވުނުއިރު ދާނިޝްއަށް ހިލްޔާގެ އަޑު އިވުނެވެ.

 

“ސޯ އިޓްސް ލައިކް….ސުވަރުގޭގަ ވީ ވިލް މީޓް އަހަރުމެންގެ މުނި މުނި މުނި މުނި މުނި ކާފަމެންނާއި މާމަމެންނާއި އަހަރުމެންގެ ކުދިންގެ ކުދިންގެ ކުދިންގެ ކުދިން. ޖަސްޓް އިމޭޖިން!”

 

ހިލްޔާގެ ޖޯޝުން ފުރިގެން ވި އަޑު އިވިފައި ދާނިޝްގެ ފިޔަވަޅުތައް ލަސްވެ، އެ ތުންފަތް މައްޗަށް ޙައިރާންކަން އެކުލެވިފައިވި ހިނިތުންވުމެއް ވެރިވިއެވެ. މިއީ ހިލްޔާ މިހާ ފޯރިއާއިއެކު ވާހަކަ ދެއްކި އަޑު ދާނިޝްއަށް އިވުނު ފުރަތަމަ ފަހަރެވެ.

 

“އިޓް ވުޑް ބީ އޯސަމް ދޯ! އަދި އަދި….ޕްރޮފެޓްސް އާ ވެސް ވީ ކޭން މީޓް ދޯ؟”

 

ކޮންމެވެސް އެހެން އަންހެން ކުއްޖެއްގެ އަޑު އިވުނު ހިނދު، ދާނިޝް އެ ޓެރެސްގެ ދޮރާއި ހަމަވިއެވެ. އެހިނދު ޓެރެސްގެ ރެއިލިންގް ކައިރީގައި ހުރި މޭޒުގެ ކޮޅުގައި އިން ހިލްޔާ ފެނިފައި ދާނިޝްއަށް ނޭނގި، ހިނިތުންވުން ފުންވެ، އެ ނަޒަރު ލޮބުވެތި ނަޒަރަކަށް ބަދަލުވިއެވެ. އެއްވެސް އިޚްތިޔާރަކާއި ނުލާ ދޮރުކަންޏަށް ލެނގިލެވުނީ މުޅި ހަވީރު ވޭތުވިޔަސް އެތާ ހުރުމަށް ހިތް އެދުމުންނެވެ. ހިލްޔާ އެ ދައްކަނީ ދީނީ ވާހަކައެއްކަން އެނގުންވުމުން ހިތުގައި ހިލްޔާއަށްޓަކައި އޮތް ލޯބި އިތުރުވިއެވެ.

 

“ޔެސް ޔެސް! ޕްރޮފެޓްސް އެކަންޏެއް ނޫން. އޮވެއެއްނު އާޔަތެއް. وَمَن يُطِعِ ٱللَّهَ وَٱلرَّسُولَ فَأُو۟لَٰٓئِكَ مَعَ ٱلَّذِينَ أَنْعَمَ ٱللَّهُ عَلَيْهِم مِّنَ ٱلنَّبِيِّـۧنَ وَٱلصِّدِّيقِينَ وَٱلشُّهَدَآءِ وَٱلصَّٰلِحِينَ وَحَسُنَ أُو۟لَٰٓئِكَ رَفِيقًا. ﷲ އާއި ރަސޫލާ ﷺ އަށް ކިޔަމަންވާ މީހުން ވާނީ އެބައެއްގެ މައްޗަށް ﷲ ނިޢުމަތް ލެއްވި ނަބިއްޔުންނާއި ޞިއްދީޤުންނާއި، ޝަހީދުންނާއި ޞާލިޙުންގެ ތެރެއިންނޭ. އަދި-“

 

“ހިލްޔާ ސުވާލެއް ކޮށްލަންތަ؟”

 

ހިލްޔާ ވާހަކަ ދައްކަމުން ދަނިކޮށް ދާނިޝްއަށް ފަސްދީގެން އިން އަންހެނަކު އެހެން އަހާލުމުން ދާނިޝްގެ ހިނިތުންވުން ފޭދުނެވެ. ދާނިޝް ހުރީ ހިލްޔާ ދައްކަމުން ދިޔަ ވާހަކައަށް ނުހަނު ޝައުޤުވެރިވެފައެވެ. އެފަދައިން އާޔަތެއް ބުނެދެމުން ދަނިކޮށް މެދުކަނޑާލުމުން ދާނިޝް ހިސާބަކަށް ނުރުހުންވިއެވެ.

 

“ލައްބަ.”

 

ހިލްޔާ އެހެން ބުނި ހިނދު އެ މޫނުމައްޗަށް ހިނިތުންވުމެއް ވެރި ކުރުވީ ގަދަކަމުން ކަން ދާނިޝްއަށް އެނގުނެވެ.

 

“މިތާ ދެން ތިބި ކުދިން ވެސް މިކަން އެނގެން ބޭނުންވާނެހެން ހީވަނީ އެހެންވީމަ މި ސުވާލު ކުރަނީ. ނަސީމްގެ ދަރި ރާފިލް ހިލްޔާއާއި ބެހޭ ގޮތުން ދެއްކީ ތެދު ވާހަކައެއްތަ؟”

 

އިވިގެން ދިޔަ ސުވާލުން ދާނިޝްގެ ބުމަގޮށްޖެހިގެން ދިޔަ ވަގުތު ސީދާ ވެސް ވެލެވުނެވެ. އެ ވާހަކަ ދެއްކި އަންހެނަކީ ހިލްޔާއަށް ހެޔޮ އެދޭ މީހެއް ނޫންހެން ހީވުމުން ވަގުތުން ސަމާލުވެލެވުނު ފަދައެވެ. ހިލްޔާއަށް އެހިނދު ވެގެން ދިޔަ ގޮތް ފެނި ދާނިޝްގެ ހިތް މޭތެރޭގައި އޮވެ ގެނބުނެވެ. އެ މޫނުމަތި މުޅިން މިލައިގެން ދިޔަ މަންޒަރު ފެނި، ދެންމެ އެ ސުވާލު ކުރި އަންހެން މީހާއަށް އިތުރަށް ނުރުހުންވާ ގޮތްވިއެވެ.

 

ދާނިޝް ބަލަބަލާ ހުއްޓާ އެ އަންހެން މީހާ ކައިރީގައި އިން ހިލްޔާގެ އެކުވެރިޔާ އަންހެން މީހާގެ އަތުގައި ހިފައި ހުއްޓުވަން އުޅޭ ޒާތަށް ސިއްރުން އެއްޗެކޭ ބުންޏެވެ. އެހެނަސް އެ އަންހެން މީހާ ގެ ވާހަކަ ދިޔައީ ކުރިއަށެވެ.

 

“ރަނގަޅު ވާހަކައެއް ނޫންތަ؟ އޭރުންނެއްނު އަހަރުމެންނަށް ވެސް އެނގޭނީ ހިލްޔާއާއިމެދު ދެކެންވީ ގޮތް؟ އޭރުންނެއްނު އެ ފާފައިން ދުރުވާން އަހަރުމެންނަށް ހިލްޔާއަށް ނަސޭޙަތްތެރި ވެވޭނީ ވެސް. ބޭރުގަ އުޅޭއިރު ފިރިހެނުންގެ ކޮޓަރިތަކަށް ވަނުމަކީ މިހާރު ހަމަ ވަރަށް ގިނަ އަންހެން ކުދިންނަށް ކުރެވޭ ކަމެއް. އެ ފާފައިން އަރައިގަތުމަކީ ވެސް އުދަގޫކަމެއް. ހިލްޔާއަށް އަހަރުމެންނަށް ނަސޭޙަތްތެރި ވެވޭނީ އޭރުންނެއް ނޫންތަ؟”

 

އެ ވާހަކަތައް އިވިގެން ދިޔަދިޔަހެން ދާނިޝްގެ ގޮށްމުއްކެވިގެން ދިޔަ ހިނދު ދަތްކުނޑި ވިކުނެވެ. އައި ރުޅީގެ ހޫނުގައި ހުރެ ވެސް ހިލްޔާއަށް ބަލާލެވުނު ހިނދު މެއަށް ފިނިވިއެވެ. އެހިނދު ހިލްޔާ އިން ގޮތް ފެނިފައި ހިތަށް އުދަގޫވިއެވެ. ހިލްޔާ ދެންމެ އެ ދެކެވުނު ވާހަކަތަކަށް ރައްދެއް ދޭނެ ކަމަށް ދާނިޝްއަށް އުއްމީދު ކުރެވުނެވެ. އެއްޗެކޭ ބުނާށޭ ހިތާހިތުން ބުނެ ހިލްޔާއަށް ހިތްވަރު ދެވުނެވެ. އެހެނަސް ހިލްޔާ އިނީ އެއަށްވުރެ ބަލިކަށި ވެފައިކަން އެނގުންވުމުން ދާނިޝްއަށް ކުރިއަށް ފިޔަވަޅެއް އަޅާލަމުން ވާހަކަ ދެކެވުނެވެ.

 

“ނަސޭޙަތެއް ބޭނުންވަނީ އަހަރުމެންނަށް ހެން ހިއެއް ނުވޭތަ؟” ކިތަންމެ ރުޅި އަޔަސް މަޑުމައިތިރި އަޑަކުން ދާނިޝް ފެށިއެވެ. ރުޅިވެރިކަމަށްވުރެ މަޑުމައިތިރިކަމަކީ ބާރުގަދަ ކަމެއްކަން ރަސޫލާ ﷺ ގެ ސުންނަތުން ދަސްވެފައިވާތީވެއެވެ.

 

ދާނިޝް ވާހަކަ ދެއްކުމާއިއެކު އެންމެންގެ ނަޒަރު އޭނައަށް އަމާޒުވިއެވެ. އެހިނދު އޭނައަށް ބަލާލި ހިލްޔާއާއި ދާނިޝްއަށް ހަތަރުކަޅި ހަމަކޮށްލެވުނެވެ. އެއްކަލަ އަންހެން މީހާ ވާހަކަ ދެއްކި ވަގުތަކީ އެއީއެވެ.

 

“މިއީ ކޮން ސޮރެއް؟” އަންހެން މީހާ އެހެން އަހާލަމުން ދެން ތިބި ކުދިންނަށް ބެލިއެވެ. އެ ކުދިން ނޭނގެއޭ ބުނުމުން ދާނިޝް އިތުރަށް ވާހަކަ ދެއްކިއެވެ.

 

“އަޅުގަނޑަކީ ތި ބޭފުޅުންނަށް ބީރައްޓެއްސެއް. އެކަމަކު ދެންމެ އިވުނު ވާހަކަތަކުން ހިތަށް އުދަގޫވީމަ މި ވާހަކަ ދެކެވެނީ. މުއުމިން އަންހެނެއްގެ ބޮލުގަ ތިފަދަ އިލްޒާމެއް އެޅުވުމަކީ ކިހާ ބޮޑު ފާފައެއްކަން އަހަރުމެންގެ ތެރެއިން ގިނަ މީހުންނަށް ނުވިސްނޭ. ވިސްނޭނެނަމަ އެފަދަ ވާހަކައެއް ދެއްކުމުގެ ކުރިން އެތައް ހާސް ފަހަރު ފިކުރު ކުރެނީސް. އެފަދަ އިލްޒާމެއް މީހެއްގެ ބޮލުގަ އަޅުވާފަ އޭގެ މައްޗަށް ހެކިވެރިން ނުގެނެވޭނަމަ ﷲ ގެ ޙަޟްރަތުގަ ދޮގުވެރިންނަކީ އަހަރުމެން. ފާފަވެރިންނަކީ އަހަރުމެން. ކަން މިހެން އޮތްއިރު އަހަރުމެން އެ ކުއްޖަކާއި ދެކޮޅަށް އަހަރުމެން ވާހަކަ ދެއްކި ކުއްޖަކީ ﷲ ގެ ޙަޟްރަތުގަ އެތައް ދަރަޖައެއް މަތިވެފައިވާ ކުއްޖަކަށް ވެދާނެ.”

 

ދާނިޝް އެ ވާހަކަ ނިންމާލަމުން ހިލްޔާއަށް ބަލާލި ހިނދު ހިލްޔާގެ ކޯތާފަތްމައްޗަށް ކަރުނަތައް ފޭބި ތަން ދާނިޝްއަށް ފެނުނެވެ. އެ މަންޒަރު ފެނިފައި ހިތަށް ތަދުވިއެވެ. އަވަސް ފިޔަވަޅުތަކެއްގައި ގޮސް ހިލްޔާގެ ގައިގައި ބައްދާލަން ބޭނުންވިއެވެ. އެ ކަރުނަތައް ފޮހެލަދޭން ހިތް އެދުނެވެ. އެހެނަސް އެދެމެދުގައި ވާހާ ދުރުމިނާއި އިންތަކުގެ މަތިން ހަނދާންވެފައި ހުރި ގޮތަށް ހުރުން ނޫންކަމެއް ނުކުރެވުނެވެ.

 

ދާނިޝްގެ ވާހަކަތަކުން އެންމެން ހުއްޓުން އަރާފައި ތިއްބާ ހިލްޔާ އަވަސްއަވަހަށް ދެ އަތުން ކަރުނަތައް ފޮހެލިއެވެ. އަދި ގޮނޑީގައި އޮތް އޭނަގެ އަތް ދަބަސް ކޮނޑުގައި އަޅުވަމުން ދާނިޝް ހުރި ދިމާލަށް އަންނަން ފެށިއެވެ. ހިލްޔާ އަންނަނީ އޭނަގެ ގާތަށް ހެން ދާނިޝްއަށް ހީވީ އޭނަގެ ހިތް އެކަމަށް އެދިފައި ހުރި ވަރުންނެވެ. އެހެނަސް އިސްޖަހައިގެން އައި ހިލްޔާ އޭނަ ފަހަނަޅައި ޓެރެސް އިން ނިކުމެގެން ދިޔައީއެވެ.

 

އެހިނދު ހިލްޔާގެ އެކުވެރިން ހިލްޔާގެ ނަމުން ގޮވަމުން ތެދުވެލިއެވެ. އެމީހުން ވެސް ޓެރެސް ގެ ދޮރާއި ދިމާލަށް އަންނަން ފެށުމުން ދާނިޝް އެތަނުން ދުރުވެލިއެވެ. ހިލްޔާގެ ދެ އެކުވެރިން ނިކުމެގެން ދިޔުމުން ދާނިޝް ވެސް އެތަނުން ދާން ބޭނުންވެފައިވިއެވެ. ހިލްޔާގެ ޙާލު ބަލާލަން ބޭނުންވެފައިވިއެވެ. އެހެނަސް އެވަގުތު އެހެން ނެހެދީ، އެތާ އޭރުވެސް އޭނައަށް ބަލަން އެ މެދު ޢުމުރުގެ އަންހެން މީހާ ހުރުމުންނެވެ. އޭނަ މިވަގުތު ހިލްޔާގެ ފަހަތުން ދިޔުމުން މި އަންހެން މީހާ ހިލްޔާއާއި މެދު އިތުރު ހީކުރުމެއް ހީކުރާކަށް ދާނިޝް ބޭނުމެއް ނުވިއެވެ. އޭނައަކީ ހިލްޔާއަށް ވެސް ބީރައްޓެއްސެއް ހެން ހީވާނެ ފަދައަކުން ކަން ކުރަން ބޭނުންވިއެވެ.

 

އެހެންކަމުން ދާނިޝް އެ އަންހެން މީހާ ބަލަން ހުއްޓާ ހިނގާފައި ގޮސް އެ ޓެރެސްގެ އަނެއްކޮޅުގައި ހުރި މޭޒެއްގައި ގޮސް ނުހަނު ހަމަޖެހިގެން އިށީނެވެ. އަންހެން މީހާ އޭނައަށް ބަލަން ހުރެފައި ތުން އޫކޮށްލަމުން އެތަނުން ދާން ހިނގައިގަތެވެ. އެ އަންހެން މީހާ ލޯ މައްޗަށް ގެއްލުމުން ދާނިޝްއަށް ފުން ނޭވައެއް ދޫކޮށްލެވުނެވެ. އެވަގުތު މެއަށް ނުބައި ގޮތެއް ވެފައިވުމުން އެ ނޭވާ ލާން ވެސް އުދަގޫވިއެވެ. އެއީ ކީއްވެ ކަމާއިމެދު ވިސްނާލެވުމުން ހިލްޔާގެ ލޮލުން ފޭބި ކަރުނަތައް ފޭބި ގޮތް ހަނދާނަށް އައެވެ. ހިލްޔާ އުފަލުގައި ހުރިކަން ޔަޤީން ކުރެވިގެން ނޫނީ ދެން އޭނަގެ ހިތަށް ހަމަޖެހުމެއް ނުލިބޭނެކަން ދާނިޝްއަށް އެވަގުތު އެނގުންވިއެވެ.

 

ހިލްޔާ އެވަގުތު ވެސް ދެކެން ދާނިޝް ބޭނުންވެފައިވި ވަރުން އެވަގުތު ގޮނޑިން ތެދުވެ، ޓެރެސްގެ ރެއިލިންގް ކައިރިއަށް ދެވުނެވެ. އަދި ތިރިއަށް ނަޒަރެއް ދެވުނެވެ. ދާނިޝް އެ ބަލަހައްޓައިގެން ހުރި ދިމާލުން ހޮޓެލްގެ ކުރިމަތީގައި ޕާކް ކުރެވިފައި އޮތް ހިލްޔާގެ ކާރު ފެނުނެވެ.

 

ދާނިޝް ބަލަބަލާ ހުއްޓާ ހިލްޔާ އަވަސް ފިޔަވަޅުތަކެއްގައި ހޮޓެލުން ނިކުމެގެން އައެވެ. ހިލްޔާގެ ފަހަތުން ހިލްޔާގެ އެކުވެރިން ވެސް ނިކުތެވެ. އެހެނަސް ހިލްޔާ އެ އެކުވެރިންނަށް ބަލާލުމެއް ނެތި ކާރަށް އެރީއެވެ. އަދި ކާރު ސްޓާޓް ކޮށްލަމުން ކާރު ދުއްވާލިއެވެ. އެ މަންޒަރު ފެނިފައި ދާނިޝްއަށް މާޔޫސީ ނޭވައެއް ދޫކޮށްލެވުނެވެ. އާދައިގެ މަތިން ހިލްޔާއަށްޓަކައި ހިތާހިތުން ދުޢާ ކުރެވެން ފެށިއެވެ.

 

**

 

ކާރު ދުއްވަމުން ދިޔަ ހިލްޔާގެ ހިތުގައި ވަނީ ހައިޖާނެއް އުފެދިފައެވެ. ވަރުދާގެ ދުލުން ބޭރުވި ވިހަގަދަ ބަސްތައް ކަންފަތުގައި ގުގުމަމުން ދިޔަދިޔަހެން ހިލްޔާގެ ލޯ ކަރުނުން ފުސްވަމުން ދިޔައެވެ. ކުރިމަތިން ފެންނަމުން ދިޔަ މަންޒަރު ސާފު ކުރަން އެސްފިޔަ ޖަހާލާ ކޮންމެ ފަހަރަކު ލޮލުން ކަރުނަތައް ފައިބަމުން ދިޔައެވެ. އެހެނަސް އަނެއްކާވެސް ލޯ ފުސްވުމުން، އެ ޙަރަކާތް ތަކުރާރު ކުރެވެމުން ދިޔައެވެ.

 

ވަރުދާ ގެ ބަސްތަކަކާއި އެކީ ދާނިޝް އޭނަ ދިފާޢު ކުރި ގޮތް ވެސް ހިލްޔާގެ ހަނދާނަށް އަންނަމުން ދިޔައެވެ. ދާނިޝް އޭނަ ދިފާޢު ކުރީތީ ހިތުގެ ކަނަކުން އުފާވިއެއްކަމަކު، ދެރަވެސް ވަމުން ދިޔައެވެ. ދެރަވީ، އޭނައާއި ބެހޭގޮތުން އެހާ ހުތުރު ވާހަކައެއް ދާނިޝްގެ ކަންފަތާއި ހަމައަށް ވެސް ފޯރައިފިކަން އެނގުންވުމުންނެވެ. އެ ޚިޔާލު ހިތަށް ވެރިވާ ކޮންމެ ފަހަރަކު އެ ހިތް ދެރަވަނީ މުޅިން އެހެން ދަރަޖައަކަށެވެ. ދާނިޝް އޭނަ ދިފާޢު ކުރިޔަސް ދާނިޝް އޭނައާއިމެދު މިހާރު ދެކޭނީ ކިހިނެތްތޯ ހިތް ސުވާލު ކުރަމުން ދިޔައެވެ. ދާނިޝް މިއަދު އޭނައަށްޓަކައި ވާހަކަ ދެއްކީ ދާނިޝްގެ ހިތް ހެޔޮ ކަމުންނެވެ. ކޮންމެހެން އޭނަ ކަމުދާތީވެއެއް ނޫންކަން ޔަޤީނެވެ. އޭނައަށް އެހެން ހީވި ކަމުގައިވިޔަސްމެއެވެ. އޭނައަށް ދެން ދުވަހަކުވެސް އުފާވެރިކަމެއް ނުލިބޭނީ ހެއްޔެވެ؟ އިންނާނެ ރަނގަޅު މީހަކު ނުލިބޭނީ ހެއްޔެވެ؟ އަބަދުމެ އުޅެން ޖެހޭނީ މާޒީގައި ކުރެވުނު ފާފަތަކުގެ ބަނަކަމުގައި ހެއްޔެވެ؟

 

ނާއުއްމީދީ އިޙްސާސްތަކުން ހިލްޔާގެ ހިތް ފުރިގެން ދިޔަ ހިނދު ގިސްލެވެން ގާތްވިއެވެ. ހަމަ އެހިނދު މަގުން އަންނަމުން ދިޔަ ކާރެއް އޭނަގެ ކާރުގައި ނުޖެހި ދިޔައީ ކިރިޔާއެވެ. ހަމަ އެހިނދު އަމިއްލަ ރައްކާތެރިކަމާއިމެދު ބިރުގަތުމުން ހިލްޔާއަށް މަގުގެ އެއްފަރާތުގައި އޮތް ވިނަގަނޑާއި ދިމާލަށް ގޮސް ކުއްލި ގޮތަކަށް ކާރު މަޑުކޮށްލެވުނެވެ. ކާރު މަޑުކޮށްލެވުމާއިއެކު ހިލްޔާއަށް ގިސްލެވެން ފެށިއެވެ. އޭރުވެސް ވަރުދާއާއި ދާނިޝްގެ ބަސްތައް ކަންފަތުގައި ގުގުމަމުން ދާ ޙާލުގައެވެ. ރާފިލް އޭނައާއި މެދު ފަތުރާފައިވާ ވާހަކަތައް ވެސް ހޮނު ގުގުރީގެ ސިފައިގައި ކަންފަތަށް އިވެމުން ދިޔައެވެ. މި ހުރިހާ ކަމެއްގެ ސަބަބުން ހިލްޔާއަށް އިތުރަށް ރޮވުނެވެ. މި ޙަޔާތުގެ ބޭނުމެއް ނެތް ކަމަށް ސިކުނޑީގެ ކަނަކުން ގޮވިއެވެ.

 

އެ ބަސްތައް ހިތަށް ވެރިވުމާއިއެކު ހިލްޔާގެ ރުއިން ހުއްޓުނީ ކުއްލި ގޮތަކަށެވެ. ޙަޔާތުގެ ބޭނުމަކީ ކޮބައިކަން އޭނައަށް އެނގިފައިވާ ކަމަށް ހިތް ހަނދާން ކޮށްދިނުމުންނެވެ. ޙަޔާތުގެ ބޭނުމަކީ އާޚިރަތް ހޯދަން މަސައްކަތް ކުރުން ކަން ހަނދާންވިއެވެ. ވީއިރު އޭނަ މި ކަންކަމާއިމެދު މިހާ ދެރަވަނީ ކީއްވެތޯ އަމިއްލަ ނަފްސާއި ސުވާލު ކުރެވުނެވެ. ވަރުދާ ކޮންމެ އެއްޗެކޭ ބުންޏަސް، އަދި ދާނިޝް އޭނައާއި މެދު ކޮންމެ ގޮތަކަށް ދެކުނަސް އެއިން އޭނަގެ އާޚިރަތަށް ކުރާނެ ނޭދެވޭ އަސަރެއް ނެތެވެ. މުހިއްމީ ﷲ ގެ ރުހިވޮޑިގަތުމެވެ. ﷲ ތަޢާލާގެ ރަޙްމަތް އޭނައަށް ލިބުމެވެ.

 

ހިތަށް ވެރިވި އެ ޚިޔާލުތަކުން ހިލްޔާއަށް ވައި އަޑުން ﷲ އާއި ވާހަކަ ދެކެވުނެވެ.

 

“ޔާ ﷲ! މި ހުރިހާ ކަމަކީ އިބަރަސްކަލާނގެ މިއަޅާއާއި މެދު ރުހިވޮޑިގެންނުވާ ކަމުގެ ނިޝާނަކަށް ނުވާނަމަ، މިއަޅާއަށް ހެޔޮ. މި އިމްތިޙާންތަކަކީ މިއަޅާގެ އާޚިރަތަށް އެންމެ ރަނގަޅު ގޮތް ކަމަށް ވާނަމަ، މި އިމްތިޙާންތަކުން ކާމިޔާބުވުމުގެ ތައުފީޤު މިއަޅާއަށް ދެއްވާށި. މިއަޅާގެ ޙަޔާތް ދަތިވަނީ މިއަޅާގެ ފާފަތަކުގެ ސަބަބުން ކަމަށްވާނަމަ އެ ފާފަތައް ފުއްސަވާށި. އަދި މި އަޅާއަށް އިބަރަސްކަލާނގެ ގެ ނިމުމެއް ނުވާ ރަޙްމަތާއި، ލޯބިފުޅު ދެއްވާށި. އަދި މި އަޅާއަށް ދިރިއުޅުމުގެ ހުރިހާ ކަމެއްގައި ފަސޭހަކަން މިންވަރު ކުރައްވާށި. އާމީން!”

 

ބޭއިޚްތިޔާރުގައި ދެ އަތް އުފުއްލައިގެން ކުރެވުނު އެ ދުޢާގެ ސަބަބުން، ނޭނގޭ ހަމަޖެހުމަކުން ހިލްޔާގެ ހިތް ވަށާލެވިގެން ދިޔަ ކަހަލަ އިޙްސާސެއް ކުރެވުނެވެ. ޙަޤީޤަތުގައި ވެސް ހިތްތަކަށް ހަމަޖެހުން ލިބެނީ ހަމަ ޔަޤީނުން ވެސް ﷲ ގެ ހަނދުމައިން ކަން އެނގުންވީ އެވަގުތެވެ.

 

ކޮންމެ ގޮތެއްވިޔަސް އެއީ ހިލްޔާއަށް މީހުންގެ ވާހަކަތަކުގެ ސަބަބުން ރޯންޖެހުނު ފަހު ދުވަހަށް ނުވިއެވެ. އޭގެ ފަހުން ހިލްޔާ ކްލިނިކަށް ދާން ފެށުމުން ކްލިނިކުން ޑިއުޓީ ބަދަލުވި މުވައްޒަފުންގެ ދުލުން ވެސް ހިލްޔާއަށް އޭނައާއި ގުޅޭ ގޮތުން ހުތުރު ވާހަކަތައް އިވެމުން ދިޔައެވެ.

 

“@#! އެއް ކީއްކުރަންދޯ މި ކްލިނިކްގަ މަސައްކަތް ކުރަން ގެނެސްގެން އުޅެނީ؟”

 

“ކްލިނިކްގެ އިމޭޖް މުޅިން ޚަރާބު އޭނައާ ހެދި! ބަލި މީހަކު ވެސް އަންނަނީއެއް ނޫނޭ އޭނަ ކައިރިއަށް. ކީއްކުރަން ބަހައްޓާފަ އިންނަ އަންހެނެއް؟”

 

“ބޮސް ގެ ދަރިއެއް ވިޔަސް ދެން ލަދު ޙަޔާތް ގެއްލިފަ ހުރި އަންހެނަކަށް މިތަނުން ވަޒީފާ ދީގެން ވެސް ނުވާނެ ދޯ؟”

 

“ދާނިޝް ސާރ އެހެންޏާ ނުދޭނެ އެކަހަލަ މީހަކަށް ޖޮބެއް. ބޮސް ބުނީމަ ދިނީ ކަމަށް ވާނީ.”

 

ރިސެޕްޝަންގައި އުޅޭ ދެ އަންހެން ކުއްޖަކާއި، ފާރމަސީގައި މަސައްކަތް ކުރާ ކުއްޖަކާއި ބައެއް ނަރުހުންގެ ފަރާތުން ހިލްޔާއަށް މި ވާހަކަތައް އިވިފައިވަނީ ކްލިނިކްގެ ތެރޭގައި އުޅުމުގެ ތެރެއިންނެވެ. އެ އެންމެން އެ ވާހަކަތައް ދައްކަނީ ހިލްޔާއަށް ސިއްރުންނެވެ. ހިލްޔާ ފެންނަހާއިރަށް އެމީހުން ވާހަކަ ހުއްޓާލަމުން ހިލްޔާއަށް ހިނިތުންވުންތަކެއް ދައްކައެވެ. އެއިން ހިލްޔާއަށް ލިބޭ ހަމަޖެހުމެއް ނެތެވެ.

 

މި ކަންތަކުގެ ސަބަބުން ހިލްޔާއަށް ކްލިނިކުން ނިކުމެ ކާރު ތެރޭގައި އިނދެ ކޮންމެ ދުވަހަކު ރޮވެއެވެ. އަދި ގެއަށް ގޮސް ކޮޓަރީގައި އެކަނި ވުމުން ވެސް ގަދައަށް ރޮވެއެވެ. އަމިއްލަ ނަފްސުގެ ދިފާޢުގައި އެ އެންމެން ކުރިމަތީގައި ހިލްޔާ އަޑު ހަރުކޮށް ވާހަކަ ދައްކަން ބޭނުންވެއެވެ. ހުތުރު ޢަމަލެއް ކުރީ އޭނައެއް ނޫންކަމާއި އެކަން ކުރީ ރާފިލް ކަމަށް ބުނަމުންނެވެ. އޭނައަށް ބޭވަފާތެރިވީ ރާފިލްކަމަށް ބުނަން އެތައް ފަހަރަކު ނަފްސު ބުނެއެވެ. އެހެނަސް އެގޮތަށް ކަން ކުރާކަށް ހިލްޔާ ބޭނުމެއް ނުވެއެވެ. ﷲ ވަންހަނާ ކުރައްވާފައިވާ މީހެއްގެ ފާފައެއް ހާމަކުރާ މީހަކަށް ވާކަށް ހިލްޔާ ބޭނުމެއް ނުވިއެވެ. އެއީ ﷲ އެންމެ ރުހިވޮޑިގެންވާނެ ގޮތް ނޫންހެން ހީވުމުންނެވެ. ކްލިނިކްގައި މީހުން އޭނައާއިމެދު ގޯސް ވާހަކަ ދައްކާކަން ވެސް އެއްވެސް މީހަކަށް ނާންގާ ހުންނަނީ އެހެންވެއެވެ. އެހެނަސް ދެންވެސް ދެރަވަމުން ދިޔައެވެ. އޭނަގެ ހިތަށް ވަމުން ދާ ތަދަކީ އޭނަގެ ފާފަތަކުގެ ސަބަބުން ﷲ އޭނައަށް ދެއްވާ ޢަޒާބެއް ކަމަށް ވަކި ހިސާބަކުން ވިސްނެން ފެށިއެވެ. ޝައިޠާނާ އެ ޚިޔާލުގެ ބޭނުން ހިފައި ހިލްޔާ އަނެއްކާވެސް ނާއުއްމީދުގެ ތެރެއަށް ފޮނުވަން ފެށިއެވެ.

 

ހިލްޔާއަށް އަންނަމުން އައި ބަދަލު ފާހަގަވުމުން އަނެއްކާވެސް ނަހީދު ކަންބޮޑުވާ ގޮތްވިއެވެ. އަނެއްކާވެސް ހިލްޔާގެ މޫނުމަތި މިލައި، އަބަދު ރޮވިފައި ހުންނަ އަސަރެއް އެ މޫނުމައްޗަށް ވެރިވެ، ބަސްމަދު ވެފައިވާ ގޮތުން ނަހީދު ފިކުރު ބޮޑުވާ ގޮތްވިއެވެ. ކިހިނެއްވީތޯ ސުވާލު ކުރުމުން ހިލްޔާ ކޮންމެ ފަހަރަކު ވާހަކަ ބަދަލު ކޮށްލަނީއެވެ. ހިލްޔާއަށް މިހެން ވާން ފެށިތާ ތިން ވަނައަށް ވީ ރޭ އެކި ގޮތްގޮތަށް ސުވާލު ކުރުމުން ހިލްޔާ ތަފާތު ޖަވާބެއް ދިނެވެ.

 

“އޭރު…ބައްޕަގެ ބަސް ނޭހުނީތީ ދެރަވަނީ. ބައްޕަގެ ބަސް ނާހާ ރާފިލްއާއެކީ ދިޔައިމަ މިހެން މިވީ. ދެރަވަނީ…އަހަރެންގެ ފާފަތަކުގެ ގިނަކަން އިޙްސާސް ކުރެވުނީމަ. ދުވަހަކުވެސް އަހަރެންގެ ފާފަތަކަށްވުރެ ހެޔޮ ޢަމަލުތައް ގިނަ ނުވާނެހެން ހީވީމަ.”

 

ހިލްޔާ އެރޭ ސިޓިންގް ރޫމުގެ ސޯފާގައި އިނދެ ރޮވިފައިވާ އަޑަކުން ބުންޏެވެ. ވާހަކަ ނިމުމާއިއެކު ހިލްޔާއަށް ގިސްލެވެން ފެށިއެވެ. އަދި ވަގުތުން ސޯފާއިން ތެދުވެގެން ދާން ހިނގައިގަތެވެ. ހިލްޔާ އެ ބުނި އެއްޗެއް ނަހީދަށް ވިސްނުނެއްކަމަކު އެއީ އެހާ ގިނަ ދުވަސް ވަންދެން ހިތާމަ ކުރަންވީ ކަމެއް ކަމެއް ޔަޤީނެއް ނުކުރެވުނެވެ. އެކަން ޔަޤީން ކުރުމަށްޓަކައި ދާނިޝްއާއި އެރޭ ވެސް ބައްދަލު ކުރަން ނިންމުނެވެ.

 

“ހީވަނީ ކްލިނިކް ގެ ތެރެއިން ކަމެއް ހިނގަނީހެން. މީހުން ވަރަށް ދައްކާ ދޯ އެ ވާހަކަ؟ ކްލިނިކް ތެރޭގަ؟”

 

އެރޭ ރެސްޓޯރެންޓެއްގެ މޭޒުދޮށުން ދާނިޝްއާއި ބައްދަލުކޮށްލަމުން ނަހީދަށް އަހާލެވުނެވެ.

 

“އަހަންނަކަށް ނުއިވޭ. ވެދާނެ މި ހަފްތާގަ މާ ގިނައިރު އޮފީސް ތެރޭގަ އުޅެވުނީމަ ކަމަށް ވެސް.” ދާނިޝްއަށް ބުނެވުނެވެ. އޭނައަށް ޙަޤީޤަތުގައި ވެސް އަދި އެއްވެސް މުވައްޒަފެއްގެ ފަރާތުން އެފަދަ ވާހަކައެއް ނުއިވެއެވެ. އެހެނަސް ވޭތުވެ ދިޔަ 3 ދުވަހުގައި ހިލްޔާ ދެރަވެފައި ހުންނަ މަންޒަރު ފެނިފައި ކަމެއް ވާހެން ހީވިއެވެ. އެހެނަސް އެފަދަ މަންޒަރެއްގެ ހިލަމެއް އޭނައަށް ވެފައިނުވާތީ، ދާނިޝްއަށް ހީވެފައިވީ ހިލްޔާ ދެރަވެފައި ހުރީ އެދުވަހު އެއްކަލަ އަންހެން މީހާ ދެއްކި ވާހަކަތަކުގެ ސަބަބުން ކަމަށެވެ. އެ ވާހަކަ ނަހީދުބެއަށް ކިޔައިދީ، ހިލްޔާގެ ޙާލު ބަލައި ދިނުމަށް ވެސް ބުނެވިފައިވެއެވެ.

 

“ދާނިޝް އާއި ވައިއެޅޭ ހިސާބުގަ ވެސް އެކަހަލަ ވާހަކައެއް ދައްކަން އެކަކަށް ވެސް ނުކެރޭނެ. ނިކަން ރަނގަޅަށް މިކަން ބަލާދީބަލަ ދާނިޝް. ބޭބެއަށް ހިއެއްނުވެ ދާނިޝް ތިބުނި ދުވަހު އެކަނި ވީ ކަމެއްގެ ސަބަބުންހެން ހިލްޔާ ދެރަވެފަ އެ ހުންނަނީ. އަދި ބޭބެ ސުވާލު ކުރީމަ މިރޭ ބުނި އެއްޗެއް އެނގޭތަ؟ ބުނީ ތިމަންނައަށް ހީވަނީ ތިމަންނަގެ ފާފަތަކަށް ވުރެ ހެޔޮ ޢަމަލުތައް ދުވަހަކުވެސް ގިނަ ނުވާނެ ހެންނޭ. އެހެންވެގެންނޭ ދެރަވަނީ. މި ކަމާއިމެދު ދާނިޝް ހިލްޔާއަށް ނަސޭޙަތެއް ދީފާނަންތަ؟”

 

ނަހީދުބެ އެ ބުނި ފަހު ބަސްތަކާއިއެކީ ދާނިޝް ވިސްނުމަކަށް ގެއްލޭ ގޮތްވިއެވެ. އެ ފަހު ސުވާލުގެ ޖަވާބަކަށް ބޯޖަހާލަން ދާނިޝްއަށް އިރުކޮޅެއް ނެގީ އެހެންވެއެވެ. މި ހުރިހާ ދުވަހު ވެސް ހިލްޔާ ދެރަވެފައި ހުންނަ މަންޒަރު ފެނިފައި އޭނަ ހުންނަނީ ހިލްޔާގެ ހިތްހަމަޖައްސައިދޭން އެއްޗެއް ބުނެލާ ހިތުންނެވެ. އެހެނަސް ހިލްޔާގެ ގާތަށް ގޮސް ދެއްކިއްޔާ ދެއްކެނީ ކްލިނިކްގެ ވާހަކައެކެވެ. އެދެމެދުގައި ޒާތީ ވާހަކަ ދެކެވޭ ފަދަ ގުޅުމެއް އުފެދިފައި ނުވާތީވެއެވެ. ވަރަށް ހިތްވަރު ކޮށްފައި މިއަދު ހިލްޔާ ކިހިނެއްތޯ އެއްދުވަހު ދާނިޝްއަށް އަހާލެވުނެވެ. އެދުވަހު ހިލްޔާ އިސްޖެހިފައި ހުރެ ‘ރަނގަޅޭ’ ބުނުމަށްފަހު ދާނިޝް ފަހަނަޅައި ދިޔައީއެވެ. އެއިން ދާނިޝްގެ ހިތް ދެރަވިއެވެ.

 

އެހެނަސް ނަހީދުބެ ދެންމެ ދެއްކި ވާހަކައިން އެ ދެމެދުގައި ގުޅުމެއް އުފެދިދާނެ ގޮތެއް ދާނިޝްއަށް ވިސްނުނެވެ. ހަމަ އެހިނދުން އެހިނދަށް ވެސް ނަހީދުބެ އެ ބުނި ނަސޭޙަތްތައް ހިލްޔާއަށް ފޯރު ކޮށްދެވިދާނެ ރީތި ގޮތެއް ޚިޔާލު ކުރެވުނެވެ.

 

ކޮންމެ ގޮތެއްވިޔަސް އެންމެ ކުރިން ދާނިޝް ބޭނުންވީ ނަހީދުބެ އެ ބުނިހެން ކްލިނިކް ތެރެއިން ހިލްޔާ ދެރަވާ ކަހަލަ ކަމެއް ހިނގާތޯ ބަލައި އެކަން ހުއްޓުވާށެވެ. އެކަމަށްޓަކައި އޭގެ އަނެއްދުވަހު ކްލިނިކަށް ގޮސް ދާނިޝް ބްރޭކް ގަޑިއަށް ގެއަށް ނުދެއެވެ. ދާނިޝް ކޮންމެ ދުވަހަކުވެސް 10 އަކާއި 11 އާއި ދެމެދު ކްލިނިކްގައި ނުހުންނަކަން އެންމެންނަށް އެނގޭނެއެވެ. ދާނިޝްގެ ބޭނުމަކަށް ވެފައިވީ އޭނަ ‘ނުހުންނަ’ ގަޑީގައި މުވައްޒަފުން އުޅޭ ގޮތް ބެލުމެވެ.

 

މިގޮތުން 10:15 ހިކަށް ހާއިރު ދާނިޝް ހުރީ އޭނަގެ ރޫމުން ނިކުމެގެން ވަދެވެން ހުންނަ އެޑްމިން އޮފީހުގައެވެ. އެ އޮފީހުގައި އުޅޭ މުވައްޒަފުން ވެސް އެވަގުތު ބްރޭކަށް ގޮސްފައިވުމުން އެ ގަޑީގައި އޮފީސް އޮތީ ހުހަށެވެ. ދާނިޝް ނުހަނު ވިސްނުންތެރި ކަމާއިއެކީ ދޮރު ހުޅުވުމުން ވެސް ނުފެންނަ ދިމާލުގައި ހުންނަ ކަބަޑު ކައިރިއަށް ދިޔައެވެ. އަދި އެވަގުތުގެ ބޭނުންވެސް ހިފުމަށް ކަބަޑުން ފެނުނު ބޮކްސް ފައިލެއް ނަގައިގެން އޭގައި ހުރި ގަނޑުތައް ބަލަން ފެށިއެވެ. މީގެ 3 މަސް ކުރިން އައި މުވައްޒަފުންގެ މަސައްކަތް ރަނގަޅުތޯ ބެލުމަށެވެ.

 

ދާނިޝް އެ ފައިލް ހުޅުވިތާ މާ ގިނައިރެއްނުވެ އެ އޮފީހުގައި މަސައްކަތް ކުރާ 2 ފިރިހެން މުވައްޒަފުން އޮފީހަށް ވަދެގެން އައެވެ.

 

“ތިއީ ހަމަ އަސްލު ވާހަކައެއްތަ؟ ބޮސް ގެ ބިޒްނަސް ގެ 50% ނަސީމްގެ ބިޒްނަސް އަށް ދާ ގޮތަށް އެދެމީހުން އިންނަން އުޅުނީ؟” ނުޢައިމް ހާރިސް ކުރެން ސުވާލު ކުރަމުން އޮފީހަށް ވަނެވެ.

 

“އާނއެކޭ. މަ އަޑު އެހިން ބޮސް ގެ އަންހެން ދަރި ބޮސް އާ ވަރަށް ފައިޓް ކުރި ވާހަކަ ވެސް. ފައިޓް ކޮށްފަ ގޮއްސަ އެ އިންނަން އުޅުނު މީހާއަށް ވެސް ބޭވަފާތެރި އެ ވީ. މުއްސަނދިންގެ ގޮތް.” ހާރިސް ނުޢައިމް އާއިއެކީ އޮފީހުގެ އަނެއް ފަރާތުގައި ހުރި ކޮފީ މެޝިން ކައިރިއަށް ދިޔައެވެ. ދާނިޝް ހުރި ދިމާލުންނާއި ދެމީހުން ވާހަކައަށް ގެއްލިފައިވުމުން އެމީހުންނަށް ދާނިޝް ނުވެސް ފެނުނު ފަދައެވެ.

 

“ބޭވަފާތެރި އޭ އެ ބުނަނީ ޑޭޓް ކުރި ވާހަކަތަ؟ ފޭސްބުކް ވީޑިއޯ ގަ ހުރި މީހާ ބުނި ގޮތުން އެހާ ސާފެއް ނޫން. ދިގު ހެދުން ލައިގެން އުޅޭ ކުއްޖެއް އެހާ ގޯސްކަމެއް ވެސް ނުކުރާނެ ކަންނޭނގެ ދޯ؟” ނުޢައިމް ބުންޏެވެ.

 

“ތިއީ ހީވާ ގޮތް. އެ އަންހެން ކުއްޖާ އެއް ރެއަކު ހޮސްޕިޓަލް ޑިއުޓީ ނިންމާލާފަ ޑޮކްޓަރ މެތިއުއާއިއެކީ ހޮސްޕިޓަލުން ނިކުތް ފޮޓޯ ވެސް ހުރި. ޑޮކްޓަރ މެތިއު ލިޔެފަ އޮތީ އެ ކުއްޖާ ތިމަންނައަށް އެދުނީއޭ ހޮޓެލަކަށް ދާން. ގޮއްސަ ހަދަންވީ ގޮތް ވެސް ކިޔައިދި-“

 

ހާރިސްގެ އެ ވާހަކަ އެހާ ހިސާބަށް ދިޔަ ތަނާހެން ހާރިސްއާއިއެކު ނުޢައިމް ވެސް ސިއްސައިގެން ދިޔައީ ބާރު އަޑަކާއެކު ފައިލެއް ލައްޕާލެވުނު އަޑަށެވެ. ލިބުނު ސިހުމާއިއެކު އަޑު އައި ދިމާލަށް ބަލާލި ހިނދު އެތާ ބުމަގޮށްޖެހި، ކަތުރު ކަށިގަނޑަށް ބާރުކޮށްގެން ހުރި ދާނިޝް ފެނިފައި އެ ދެމީހުންގެ ވެސް ލޯ ބޮޑުވިއެވެ. ދެމީހުން ގަނޑުވެފައި ތިއްބާ ދާނިޝް ވާހަކަ ދެއްކިއެވެ.

 

“ދުށިންތަ؟” ރުޅިން ތުރުތުރު އަޅާ ޙާލު، ދާނިޝް ކޮށްލީ ކުރު ސުވާލެކެވެ.

 

“ކް…ކޯޗެއް ސާރ؟” ނުޢައިމް ބިރުން ރޫރޫ އަޅާ އަޑަކުން އެހިއެވެ. ހާރިސް އޭރު ވެސް ހުރީ ހިރިލަން ވެސް ނުކެރިފައެވެ. ވާނީވެސް އެހެންތާއެވެ. އެހެންޏާ އަބަދު ހިނިތުންވެގެން ހުންނަ ދާނިޝް ރުޅި އައިސްފައި ހުރިތަން އެމީހުންނަށް މި ފެނުނީ ފުރަތަމަ ފަހަރަށެވެ.

 

“އެދެމީހުން އެއްކޮޓަރިއެއްގަ ތިބެ އެކަން ކުރި ތަން ހާރިސް އާއި ނުޢައިމް އަމިއްލަ ލޮލުން ދުށިންހޭ؟” ދާނިޝް އެހިއެވެ.

 

“ންން…ނޫން ސާރ.” ހާރިސް ބުނެލިއެވެ.

 

“ދެން މި ވާހަކަ ދެކެވެނީ ކީއްވެބާއޭ ހިތަށް އަރަނީ. ތިކަމާއި ގުޅިގެން ޑޮކްޓަރ ހިލްޔާއަށް ތިބޭފުޅުންނާއި ދެކޮޅަށް ކޯޓަށް މައްސަލައެއް ހުށަހެޅިދާނެކަން އެނގޭތަ؟ އެކަން އެގޮތަށް ކުރުމުގެ ހުރިހާ ޙައްޤެއް ޑޮކްޓަރ ހިލްޔާއަށް ލިބިގެންވޭ. ނިކަން ވިސްނާލަބަލަ. ހާރިސް ރުހޭނެތަ ހާރިސްގެ އަނބިމީހާ ނޫނީ ހާރިސްގެ މަންމަ ނޫނީ ހާރިސްގެ ދަރިފުޅާއިމެދު މީހަކު ތި ގޮތަށް ވާހަކަ ދައްކަން؟ ނުރުހޭނެ! ޑޮކްޓަރ ހިލްޔާއަކީ އަހަރުމެންގެ ބޮސް ގެ ދަރިފުޅު. އަހަރުމެންނަށް ހެޔޮ އެދޭ އަހަރުމެންނަށް އެކި ގޮތްގޮތުން އެހީވެދޭ ބޮސް ގެ ދަރިފުޅު. ބޮސް މި ވާހަކަތައް އިވިފަ ހާރިސް މެންނަށް އޭގެ އަދަބެއް ދިނުމުގެ ކުރިން ދެރަވާނެ މިންވަރު ވިސްނާލިންތަ؟” ދާނިޝް ނުރުހުންތެރި އަޑަކުން ދެއްކި ވާހަކަ ތަކުން ނުޢައިމްއާއި ހާރިސްއަށް ވެސް އިސްޖަހާލެވުނެވެ. އެވަގުތު ހާރިސް ޖައްސާލި ކޮފީ މެޝިންގެ ވެސް އަޑު ކެނޑިގެން ދިޔުމުން މުޅި ތަނަށް މަރު ހިމޭންކަމެއް ވެރިވިއެވެ.

 

ނުޢައިމް އާއި ހާރިސް ގެ ފަރާތުން ދެން ޖަވާބެއް ނާންނާނެކަން އެނގުމުން ދާނިޝް ހިމޭންވެލަމުން އިތުރަށް ވާހަކަ ދެއްކިއެވެ.

 

“ބޮސް އާ ހަމައަށް މި ވާހަކަ ގެންދާކަށް ވެސް ނެތިން. ހާރިސް ގެ ގޮތެއް ނޭނގޭ އެކަމަކު ހަމަ ޔަޤީނުން ވެސް ސާރ ބޭނުމެއް ނުވޭ ބޮސް ދެރަ ކޮށްލާކަށް. އެކަމަކު މިކަން ކްލިނިކް ގަ ތަކުރާރު ވިއްޔާ ބޮސް އާއި ހަމައަށް މި ވާހަކަ ގެންދަން ޖެހިދާނެ.” ދާނިޝް ބުންޏެވެ.

 

ހާރިސް އާއި ނުޢައިމް ކުރެވުނު ކަމާއިމެދު ހިތާމަ ކުރެވޭ ޙާލު ދެންވެސް އިސްޖެހިފައި ތިއްބެވެ. ދާނިޝް ވަކި އިތުރު އެއްޗެކޭ ނުބުނެ އަތުގައި އޮތް ފައިލް ކަބަޑުގައި ޖަހާލަމުން އެތަނުން ނިކުންނަން ދިޔައެވެ.

 

އެޑްމިން އޮފީހުން ނިކުމެގެން ލޮބީއަށް ނިކުންނަން ދިޔަ މަގުމަތީގައި ދާނިޝްގެ ކަންފަތާއި ހަމައަށް އަނެއްކާވެސް އެ ޒާތުގެ ވާހަކައެއް ފޯރިއެވެ.

 

“ޑޮކްޓަރ ހިލްޔާ ކޮންމެ ދުވަހަކު ރޮއި ވަރުބަލިވެފަ ހުންނަހެން ހީވަނީ. ޑޮކްޓަރ ރާފިލް މަތިން ހަނދާންވަނީ ބާ؟” ރިސެޕްޝަންގައި މަސައްކަތް ކުރާ ޔާނާ ހަމަ އެތާ އިން ސުދާ ކުރެން އެހިއެވެ.

 

“އޮފްކޯސް! އެއީ ޗީޓް ކުރާ މީހުންގެ ގޮތް. ޗީޓް ކޮށްފަ ވެސް ދެން ހުރި މީހާ މަތިން ހަނދާންވާނެ. ރިމައިންޑްސް މީ އޮފް މައި އެކްސް.” ސުދާ އެހެން ބުނުމާއިއެކު ޔާނާ ހިނިގަނޑެއް ޖަހާލިއެވެ. އެ އަޑު އިވިފައި އަނެއްކާވެސް އާވެގެން ދިޔަ ރުޅިގަނޑުގައި ދާނިޝްގެ ދަތް ކުނޑި ވިކި، ގޮށްމުއްކެވުނެވެ.

 

“އަދި މާ ބޮޑަ ހަނދާންވާނެތަ އެއްކޮށް ރޫމެއް ޝެއާރ ކުރީމަ. އެއީ އެހާ ފަސޭހައިން ހަނދާން ނައްތާލެވޭނެ ކަހަލަ އިޙްސާސްތަކެއް ނޫން. އެންޑް ޑޮކްޓަރ ރާފިލް އިޒް ހޭންޑްސަމް އެންޑް ސްޓްރޯންގް. އައިމް ޝުއާރ ހީ އިޒް ގުޑް އިން ބެޑް…” ޔާނާ ވަކި ހިސާބަކުން ވާހަކަ ދެއްކީ ވައި އަޑުން ކަމަށްވިޔަސް ދާނިޝްއަށް އެ ބަސްތައް އިވުނެވެ.

 

އެހާ ހިސާބުން ކެތް ނުކުރެވުމުން ދާނިޝް ހިނގާފައި ގޮސް ރިސެޕްޝަން ކުރިމައްޗަށް އެރިއެވެ. ޔާނާއާއި ސުދާއަށް ދާނިޝް ފެނުމާއިއެކު ކޮޅަށް ތެދުވެލަމުން ސީރިއަސް ވެލިއެވެ.

 

“ޔާނާ، ސުދާ. ސުވާލެއް ކޮށްލަންތަ؟” ކިތަންމެ ރުޅި އައިސްފައި ވިޔަސް ދާނިޝް ދެންވެސް ހިމޭންކަން ޚިޔާރު ކުރިއެވެ.

 

“ލައްބަ ސާރ.” ދެމީހުން އެކުއެކީގައި ބުންޏެވެ.

 

“މި ކްލިނިކްގަ އެހާ ވޯކް ކުރާ ހިތެއް ނުވޭ ދޯ ޔާނާ އާއި ސުދާ؟” ދާނިޝް ނުހަނު އާދައިގެ ސުވާލެއް ފަދައިން އެހިއެވެ. އެއާއިއެކު އެދެމީހުން ބޯހޫރުވާލިއެވެ.

 

“ނޯ ނޯ ސާރ. މިއީ މިހާރު ކޮންމެ ޕޯސްޓެއްގަ ވިޔަސް ވޯކް ކުރަން އެންމެ ރަނގަޅު ކްލިނިކް. ސެލެރީ ވެސް ރަނގަޅު، މެނޭޖްމެންޓް ވެސް ރަނގަޅު. ވޯކް އެންވަރަމެންޓް ވެސް އެހާ ރަނގަޅު. އަޅުގަނޑު ކައިރި މުސްތަޤްބަލެއްގަ ލީވް ކުރާކަށް ނެތިން.” ސުދާ ބުންޏެވެ. ޔާނާ ވެސް އެއްބަސް ވުމުގެ ގޮތުން ‘އަޅުގަނޑު ވެސް’ އޭ ބުންޏެވެ.

 

އެމީހުން ވާހަކަ ދެއްކީ ހިތުގެ ފުން މިނުންކަން އެނގި ދާނިޝް ބޯޖަހާލިއެވެ. އެއަށްފަހު ވާހަކަ ދެއްކިއެވެ.

 

“އެކަމަކު ސުދާމެންގެ ވާހަކަ ހުންނަ ގޮތުން ހީވަނީ ކްލިނިކަށް ގެއްލުން ދޭން އުޅޭހެން. ޑޮކްޓަރ ހިލްޔާއާއިމެދު ތި ފަދައިން ވާހަކަ ދައްކައިގެން ކްލިނިކަށް ވާނީ ފައިދާއަށް ވުރެ ބޮޑަށް ގެއްލުން. ކޮންމެ ޓީމް މެމްބަރަކީ ވެސް ކްލިނިކްގެ ބިންގާ ހިފަހައްޓާ މީހެއް. އޭގެއިން އެއްވެސް މީހަކަށް ދެވޭ ކުޑަ ގެއްލުމަކީ ވެސް މުޅި ކްލިނިކަށް ދެވޭ ގެއްލުމެއް. ތި ވާހަކަތައް ޑޮކްޓަރ ހިލްޔާއަށް އިވި ހުރެ ޕޭޝަންޓުންނަށް ރަނގަޅު ފަރުވާއެއް ދެވޭނެހެން ހީވޭތަ؟ ނޫނީ ޑޮކްޓަރ ގެ ފޯކަސް ގެއްލިދާނެހެން ހިއެއް ނުވޭތަ؟ އެހެން ވެއްޖެއްޔާ ޕޭޝަންޓަކަށް ގެއްލުމެއް ލިބި ކްލިނިކަށް އަސަރު ނުކުރާނެތަ؟” ދާނިޝް އެ ސުވާލުތައް ކުރި ކުރިހެން ސުދާއާއި ޔާނާ ވެސް ކުށްވެރިން ފަދައިން އިސްޖަހާލިއެވެ.

 

“ސޮރީ…ސާރ.” ޔާނާ ކިރިޔާ އިވޭ އަޑަކުން ބުންޏެވެ.

 

“ބެޓާރ ނޮޓް ރިޕީޓް.” ދާނިޝް ބުންޏެވެ.

 

އެއަށްފަހު ދާނިޝް ޑޮކްޓަރުންގެ ކޮރިޑޯ ހުންނަ ފަރާތަށް އެނބުރިލީ ވަގުތު ހުއްޓުން އެރިއެވެ. އެތާ އޭނައަށް ބަލަހައްޓައިގެން ހިލްޔާ ހުރި މަންޒަރު ފެނުމުންނެވެ. ހިލްޔާގެ ކަރުގައި އަޅުވާފައި އޮތް ކަށިގަނޑާއި، ހިލްޔާގެ މިޞްރާބު އެ ކޮރިޑޯއާއި ދިމާލަށް ހުރި ގޮތުން ވޯޑުގައި ހުރެފައި ހިލްޔާ އަނބުރާ ރޫމަށް ދަނީކަން ނަގައިގަނެވުނެވެ.

 

ހިލްޔާގެ އެ ދުޅަވެފައިވާ ލޯ ދާނިޝްއަށް އަމާޒުވެ ހުރެފައި ޔާނާއާއި ސުދާއަށް ވެސް ދަތުރު ކުރިއެވެ. އެ ހިނދު އެ ހިތާމަވެރި މޫނަށް އިތުރު ވަރުބަލިކަމެއް ވެރިވި މަންޒަރު ދާނިޝްއަށް ފެނި، އެ ހިތް ގެނބިގެން ދިޔައެވެ. ދެންމެ އޭނަ ދެއްކި ވާހަކަތަކުގެ އިތުރުން ޔާނާމެން ދެއްކި ވާހަކަތައް ވެސް ހިލްޔާއަށް އިވިފައިވިކަން ޔަޤީން ކުރެވުނެވެ.

 

ހިލްޔާގެ ނަމުން ގޮވާލުމަށް ދާނިޝްއަށް އަނގަ ހުޅުވާލެވުނު ވަގުތު ހިލްޔާ އިސްޖަހާލަމުން ހިނގަން ފެށިއެވެ. ދާނިޝް ބަލަބަލާ ހުއްޓާ ހިލްޔާ އެ ކޮރިޑޯގެ ތެރެއަށް ގޮސް ދާނިޝްގެ ލޯމައްޗަށް ގެއްލުނެވެ. އެހިނދު މޭގައި ރިހުމެއް އުފެދުނެވެ. ދެންމެ އޭނައަށް އެންމެ ދެ ފަހަރު މަތިން އެ ވާހަކަތައް އިވި، އޭނަ އެހާ ނުރުހުންވިނަމަ، އެތައް ފަހަރު މަތިން އެފަދަ ވާހަކަތައް އިވުމުން ހިލްޔާއަށް ކުރާނީ ކޮން ފަދަ އަސަރެއްތޯ ހިތަށްއެރިއެވެ. އެކަން އޭނައަށް ކުރިން ނުވިސްނުނީތީ އަމިއްލަ ނަފްސު ކުށްވެރި ކުރެވުނެވެ. އޭނައަށް ވާނެނަމަ އޭނަ ގަދަ ބާރުން މި އެންމެންގެ އަނގަ ބަންދު ކުރީހެވެ. އެހެނަސް އެއީ މީހުންނާއި މެދު ކަން ކުރުން އެންމެ ރަނގަޅު ގޮތް ނޫންކަން ދާނިޝްއަށް އެނގެއެވެ. މީހަކަށް ވިސްނިގެން އަންނަ ބަދަލެއް ނޫނީ އަންނަ ބަދަލުތަކަކީ ވަގުތީ އެއްޗެކެވެ. އެހެންކަމުން އެއީ ޙައްލެއް ނޫނެވެ.

 

ޙައްލަކަށް ދާނިޝްއަށް ވިސްނުނީ މި ޙާލަތާއި ކުރިމަތިލުމަށް ހިލްޔާއަށް ހިތްވަރު ދިނުމެވެ. އެކަމަށްޓަކައި ރޭވި ރޭވުން އޭގެ އެދުވަހުން އެދުވަހަށް ފަށަން ނިންމުނެވެ.

 

ދެވަނަ ފަހަރަށް ވެސް ދާނިޝް އޭނަ ދިފާޢު ކުރާ އަޑު އިވިފައި ހިލްޔާއަށް ކުރެވުނީ ކުރީ ދުވަހު ކުރެވުނު ފަދަ އިޙްސާސްތަކެވެ. އެދުވަހު ކްލިނިކް ގެ ރޫމުގައި ހުރެވެސް ރޮވެން ގާތްވުމުން ފާޚާނާގެ ތެރެއަށް ގޮސް މޫނު ދޮވެލެވުނެވެ. އޭނަގެ ޙަޔާތަށް ކުރަނީ ހަމަ އޭނަގެ ފާފަތަކުގެ އަސަރު ކަމަށް ތަކުރާރުކޮށް ހިތް ބުނަމުން ދިޔައީތީ މުޅި މީހާގެ ގައިން ވަރު ވެސް ދޫވަމުން ދިޔައެވެ. އެ އިޙްސާސުން އަރައިގަންނަންވީ އެއްވެސް ގޮތެއް ނުވިސްނުމުން ހިލްޔާ މަސައްކަތުގައި ނުހަނު ގަދައަށް މަޝްޣޫލުވިއެވެ. ބަލިމީހަކު ނެތަސް ކޮންމެވެސް ދިރާސާއެއް ކިޔުމުގައި ވަގުތު ހޭދަ ކުރިއެވެ.

 

އެދުވަހު ހިލްޔާގެ ޑިއުޓީ ނިމެން ގާތްވަމުން ދިޔައީ 9 ޖެހި ވަގުތެވެ. އެވަގުތު ކްލިނިކްގައި ބޭއްވިފައި އޮތް އަންހެނަކު ދޫކޮށްލަން ވޯޑަށް ދާން ޖެހުނެވެ. ވޯޑުން އަނބުރާ ކޮންސަލްޓޭޝަން ރޫމަށް ދިޔައިރު ހިލްޔާގެ މޭޒުމަތީގައި ސިޓީ އުރައެއް އޮތެވެ. ސިޓީ އުރައިގެ ބޭރުގައި ލިޔެވިފައިވީ ‘ފޯ ހިލްޔާ’ އެވެ.

 

ޙައިރާންކަމެއްގައި ހުރެފައި ހިލްޔާއަށް ވަށައި ހޯދާލެވުނީ ތަރުޖަމާ ކުރާ ކުއްޖާ ހުރިތޯއެވެ. މިއީ އެ ކުއްޖާ ބޭއްވި އެއްޗެއްހެން ހީވިއެވެ. އެހެނަސް އެކަން ޤަބޫލުކުރަން ދަތިވިއެވެ. އެކުއްޖާ މީގެ 15 ވަރަކަށް މިނެޓް ކުރިން މިދަނީ ގެއަށް ކަމަށް ބުނެ ދަބަސް އަޅުވައިގެން ދިޔަތަން ހިލްޔާ ދުށްޓެވެ.

 

ހިލްޔާ އެ ސިޓީ އުރައާއިއެކީ އިށީންނަމުން ސިޓީ އުރަ ކަނޑާލިއެވެ. އަދި އޭގެ ތެރޭގައި ފަށްޖަހާފައި އޮތް ގަނޑު ނިއުޅާލިއެވެ. އެއާއިއެކު ހިލްޔާއަށް ފެނިގެން ދިޔައީ ދުޢާއެކެވެ.

 

“اللهُمَّ مَغْفِرَتُكَ أَوْسَعُ مِنْ ذُنُوْبِي, وَرَحْمَتُكَ أَرْجَى عِنْدِي مِنْ عَمَليْ”

 

“ޔާ ﷲ! އިބަރަސްކަލާނގެ ގެ ފާފަފުއްސެވުން މިއަޅާގެ ފާފަތަކަށް ވުރެ ތަނަވަސްކަން ބޮޑުވެގެންވެއެވެ. އަދި މި އަޅާގެ ޢަމަލުތަކަށްވުރެ ބޮޑަށް މިއަޅާ އިބަރަސްކަލާނގެ ގެ ރަޙްމަތާއިމެދު އުއްމީދު ކުރަމެވެ.”

 

ހިލްޔާއަށް ކުރިން އެނގިފައި ނުވާ އެ ދުޢާ ކިޔާލެވުނު ހިނދު، ހިތަށް އާ އުއްމީދެއް ވެރިވެގެން ދިޔައެވެ. އާނއެކެވެ. އޭނަގެ ފާފަތަކަށްވުރެ ﷲ ގެ ފުއްސެވުން ތަނަވަހެވެ. އަދި އޭނަ އުއްމީދު ކުރަންވީ އޭނަގެ ހެޔޮ ޢަމަލުތައް ގިނަވުމަށް ވުރެ ﷲ ގެ ރަޙްމަތަށެވެ. އެހެނީ ކިތަންމެ ގިނަ ހެޔޮ ޢަމަލެއް ކުރިޔަސް ސުވަރުގެއަށް ވަދެވޭނީ ﷲ ގެ ރަޙްމަތުންނެވެ.

 

ނުނިމޭ