ނަފްސީ (ފަސްދޮޅޮސްހަތަރުވަނަ ބައި)

ނަފްސީ (ފަސްދޮޅޮސްހަތަރުވަނަ ބައި)

“އައި ލައިކް ޔޫ ޓޫ…ހިލްޔާ.” ދާނިޝް ބުންޏެވެ.

ދާނިޝްގެ އެ ބަސްތައް އިވިފައި ހިލްޔާއަށް އިސްއުފުލާލެވުނެވެ. އެހިނދު ދާނިޝް އޭނައަށް ހިނިތުންވުމަކާއެކީ ބަލަހައްޓައިގެން ހުރުމުން ބޭއިޚްތިޔާރުގައި ހިނިތުންވެލެވުނެވެ. އޭނަގެ އިޙްސާސްތައް އެންމެ ފަހުން ދާނިޝްއަށް އެނގިގެން މި ދިޔަ ގޮތް ހިތަށް ގެނެވުމުން ހީލެވުނެވެ. ހިލްޔާގެ އެ ހީލުމުގައި ދާނިޝް ވެސް ބައިވެރިވުމުން އިސާހިތަކު ހުރިހާ ނުތަނަވަސްކަމެއް ހިލްޔާގެ ހިތުން ފިލައިދިޔައެވެ.

ދެމީހުންގެ ހުނުން މަޑުވެގެން ދިޔުމުން އެންމެ ފުރަތަމަ ވާހަކަ ދެއްކީ ދާނިޝްއެވެ.

“ސޯ…ހިލްޔާގެ ގޯލްއަކީ ޖަންނަތުލް ފިރްދައުސް ވީމަ…މީހަކު ލައިކް ވަންޏާ އޮތީ އެންމެ އޮޕްޝަނެއް ދޯ؟” ދާނިޝް އުފާވެރި ހިނިތުންވުމަކާއެކީ ދޯ ދިނުމުން ހިލްޔާގެ ހިނިތުންވުން ފުން ވީ ހިނދު ކޯތާފަތް ރަތްވިއެވެ. ހިލްޔާ އެއްވެސް އެއްޗެކޭ ނުބުނުމުން ދާނިޝް ވާހަކަ ދެއްކިއެވެ.

“ސޯ ވިލް ޔޫ-“

“ޔެސް!”

“މެރީ މީ؟”

ދާނިޝް ގެ ސުވާލުގެ މެދު ތެރެއިން ހިލްޔާގެ ޖަވާބު އައުމުން ދެމީހުންނަށް ހިސާބަކަށް ހުއްޓުން އަރާފައި އެކަކު އަނެކަކަށް ބަލަން ސިކުންތުކޮޅަކަށް ތިބެވުނެވެ. އެއަށްފަހު ދެމީހުންނަށް އެކުއެކީގައި ހީލެވުނީ ހިލްޔާގެ ކެތްތެރިކަން ކުޑަވެފައިވި މިންވަރުންނެވެ.

“ހަމަ ނާހައިގެން ދޯ މި ކުއްޖާ ހުރީ؟ ހެހެހެ….” ދާނިޝް އެހެން ބުނުމުން ހިލްޔާއަށް ލަދުރަކި ގޮތަކަށް އިސްޖަހައިގެން ހުރެ ހުނުން ނޫންކަމެއް ނުކުރެވުނެވެ.

ހިލްޔާއަށް ދެންވެސް އެއްޗެކޭ ނުބުނެވުމުން ދާނިޝް އަނެއްކާވެސް ވާހަކަ ދެއްކިއެވެ.

“ވަރަށް އުފާވެއްޖެ ހިލްޔާގެ ޖަވާބު އިވިފަ. އެކަމަކު މީގެ މާނައެއް ނޫން ހިލްޔާ މާދަމާ އަހަންނާ މެރީ ކުރަންވީއޭ. އަހަންނަށް ހިލްޔާއާއި ބެހޭގޮތުން ވަރަށް ބޮޑަށް އެނގޭ. އެކަމަކު ހިލްޔާއަށް އަހަންނާ ބެހޭގޮތުން ނޭނގޭ ބައިވަރު ކަންތައް އަދިވެސް އެބަހުރި ދޯ؟” ދާނިޝް ބުންޏެވެ. ދާނިޝް ގެ އެ ވާހަކައިން ހިލްޔާއަށް ބޯޖަހާލަމުން ވާހަކަ ދެކެވުނެވެ.

“އާނ….ދާނިޝް އުޅެނީ ޗައިނާގަ ދޯ؟” ހިލްޔާއަށް އަހާލެވުނެވެ. ދާނިޝް އާއި ބެހޭގޮތުން އެންމެ ފަހުން އެނގިފައިވާ އާ މަޢުލޫމާތަކީ އެއީ ކަމަށް ވާތީވެއެވެ.

“ޔެސް އެންޑް ނޯ. ކިޔައިދޭނަން ނަހީދުބެ އާއިއެކީ ހިލްޔާއާއި ބަދަލުކޮށްފަ އިން ޝާ ﷲ. ހުރިހާ ވާހަކައެއް ކިޔައިދޭން ބޭނުން ހިލްޔާއަށް….ސޯ، މާދަމާ އަންނަންވީ ދޯ މިގެއަށް؟” ދާނިޝް އެހިއެވެ.

“މިރޭ….ވެސް އޯކޭއެއްނު؟” ހިލްޔާއަށް ބުނެވުނެވެ. އެއާއިއެކު ޚުދު އޭނަގެ ކެތްތެރިކަން ކުޑަވެފައިވާ މިންވަރު ހިލްޔާއަށް އެނގުންވުމުން ހިލްޔާގެ ކޯތާފަތް ރަތްވިއެވެ.

“ހިލްޔާ ދަތުރު ވަރުބައްޔެއް ވެސް ނުވޭތަ؟”

“ވަރުބަލި އެކަމަކު، މެންދުރާއި ހަވީރު ރެސްޓް ކުރީމަ ރަނގަޅުވާނެ އިން ޝާ ﷲ. ދާނިޝް ވަރުބަލިއްޔާ މާދަމާއަށް ހަދާލަމާ؟”

“ނޫނޭ އަހަންނަށް ވެސް އޯކޭ މިރޭ. ނަހީދުބެ ތަންކޮޅެއް ބިޒީހެން ހީވަނީ. ނަހީދުބެ އެއްބަސްވިއްޔާ މިރޭ އަންނާނަން އިން ޝާ ﷲ.”

“ބައްޕަ…ކައިރި އަދި މި ވާހަކަ ބުނަންވާނެ ދޯ؟ އަހަރެން ބުނަންވީތަ؟”

“އޮހް ހިލްޔާ….ނަހީދުބެއަށް މި ކައިވެނީގެ މަލަމަތި ފެންނަތާ ކޮން ދުވަހެއް؟”

ދާނިޝް އެ ބުނެލި ވާހަކައިން ހިލްޔާގެ ދެބުމަ ކައިރިވިއެވެ.

“ވަޓް ޑޫ ޔޫ މީން؟” ހިލްޔާއަށް އަހާލެވުނެވެ.

“އަހަރެން މީގެ މަހެއްހާ ދުވަސް ކުރިން ނަހީދުބެއަށް މި ޕްރޮޕޯޒަލް ހުށަހަޅައިފިން. ނަހީދުބެއާއި އަހަރެން ވެސް އިންތިޒާރު ކުރީ ހިލްޔާ ކައިވެންޏަކަށް ތައްޔާރުވާނެ ދުވަހަކަށް. ހިލްޔާ ކައިވެންޏަށް އެއްބަސްވީކަން އެނގުނީމަ ނަހީދުބެ އުފަލުން ގޮސް މިރޭ ވެސް ޕާޓީއެއް ނުދޭނެ ކަމެއް ނޭނގޭ. ހެހެހެ…” ދާނިޝް އެ ވާހަކަ ބުނުމަށްފަހު ހޭންފެށުމުން ހިލްޔާއަށް ވެސް ހެވުނެވެ.

ދާނިޝް އެ ވާހަކަ ދެއްކިދެއްކިހެން ފާއިތުވި ދުވަސްތަކުގައި ބައްޕަގެ ފަރާތުން ފެނުނު ކަންތައް ހިލްޔާއަށް ފަހުމްވިއެވެ. އޭނަ ގާތު ދާނިޝްގެ ވާހަކަ ދެއްކުމާއި، ދާނިޝްއާއިމެދު ދެކޭ ގޮތާއިމެދު ސުވާލު ކުރުމާއި، އޭނަ ދާނިޝްއަށް އެހާ ގިނަ ކަންތައް ކޮށްދީ މާ ބޮނޑިއެއް ދޭ ހިސާބަށް ދިޔުމުން ވެސް އެކަމާއިމެދު ސުވާލު ނުކުރި ގޮތެވެ. ބައްޕަ ވެސް އޭނައާއި ދާނިޝްގެ ގުޅުމަށް ރުހޭކަން އެނގުންވުމުން ހިލްޔާގެ ހިތަށް ފުން ހިތްހަމަޖެހުމެއް ލިބުމެވެ. މިއީ ވެސް ދާނިޝްއާއި ކައިވެނި ކުރުމަށް ލިބުނު އިސްތިޚާރާގެ ހެޔޮ ނިޝާނެއް ކަމަށް ބެލެވުނެވެ.

ދާނިޝް ހީކުރި ފަދައިން، ބައްޕައަށް ދާނިޝްގެ ފަރާތުން އެ ޚަބަރު ލިބުމުން ބައްޕަ އުފަލުން ގޮސް އެރޭގެ ކެއުން އޯޑަރު ކުރަން ނިންމިއެވެ. ޚަބަރު ލިބުނީއްސުރެ ބައްޕަގެ މޫނުމަތިން ހިނިތުންވުން ނުފިލާތީ ހިލްޔާގެ ހިތަށް ލިބުނީ އާދަޔާ ޚިލާފު އުފަލެކެވެ. ބައްޕަ މިހާ އުފަލުން ހުއްޓާ އޭނައަށް ކުރިން ދުވަހަކުވެސް ފެނިފައި ނުވާކަމަށް ހިތާހިތުން ނިންމުނެވެ.

އެރޭގެ ކެއުމަށް ޢާއިލާގެ އެންމެން އެކީ ގޭގެ ކާމޭޒުދޮށުގައި އިންސާފު ކުރިއެވެ. އެ ކެއުމަށް މަމްނޫން އާއި ހަމްރާ ވެސް މާޒިން ގޮވައިގެން އައެވެ. މޭޒުދޮށުގައި ހިލްޔާއާއި ދާނިޝްއާއި ދެމެދު މާ ގިނަ ވާހަކައެއް ނުދެކެވުނެވެ. އެންމެންހެން ހިލްޔާއާއި ދާނިޝް މި ހުރިހާ ދުވަހުވެސް އުޅުނު ގޮތް ސިފަ ކޮށްފައި އަޅުވައި ކިޔަމުން ދިޔައީތީވެއެވެ. ދާނިޝް ސީދާ އޭނައާއި ކުރިމައްޗަށް ވާގޮތަށް އިންދާ އެ ވާހަކަތައް އިވެމުން ދިޔައީތީ ލަދުން ގޮސް ހިލްޔާގެ ކެއުން ވެސް ލަސްވިއެވެ. އެހެނަސް ހިލްޔާ ހީކުރި ގޮތާއި ޚިލާފަށް އެރޭ ރަނގަޅަށް ކެވުނެވެ. ހިތަށް ލިބިފައިވި އުފަލެއްގެ ބޮޑުކަމުން ނުތަނަވަސްކަމުގެ މަތިން ހަނދާން ނެތިފައިވި ފަދައެވެ.

ކެއުމަށްފަހު މަމްނޫން އާއި ހަމްރާ ގެއަށް ދާންޖެހުނެވެ. މާޒިން ކުޑަކޮށް ބަލިވެ އުޅޭތީވެއެވެ. އެލީ ނިންމަން ޖެހޭ ސްކޫލް މަސައްކަތެއް އެބައޮތް ކަމަށް ބުނެ ކޮޓަރިއަށް ވަނެވެ. ހާފިޒާ ވެސް ކޮޓަރިއަށް ވަނީ އަދި ދަތުރު ވަރުބަލި ނުފިލާތީވެއެވެ. އެންމެ ފަހުން ސިޓިންގް ރޫމުގައި ބާކީވީ ހިލްޔާއާއި ދާނިޝްއާއި ނަހީދެވެ. ހިލްޔާ ބައްޕައާއި އެކީ ސިޓިންގް ރޫމުގެ ދިގު ސޯފާގައި އިންއިރު، ދާނިޝް ހިލްޔާގެ ކުރިމައްޗަށް ވާ ގޮތަށް ވަކިން ހުރި ސޯފާއެއް ގެނެސް އެ ސޯފާގައި އިނެވެ. ދާނިޝް ސީދާ އޭނަގެ ކުރިމައްޗަށް ވާ ގޮތަށް އިނުމުން ހިލްޔާ ހިސާބަކަށް ނުތަނަވަސްވާ ގޮތްވިއެވެ. އެހެނަސް ދާނިޝްއާއި ވާހަކަ ދައްކަން ބޭނުންވެފައިވި މިންވަރުން ވާހަކަ ދެކެވުނެވެ.

“ސޯ…ޓެލް މީ އެބައުޓް ޔޫ.” ހިލްޔާއަށް ބުނެވުނެވެ. އެއާއިއެކު ދާނިޝް ހިލްޔާއަށް ބަލާލަމުން ލުއި ގޮތަކަށް ހީލިއެވެ. އެއަށްފަހު ވާހަކަ ދެއްކިއެވެ.

“ސޯ…އައިމް މުޙައްމަދު ދާނިޝް ވަސީމް. 31. ނެވާރ މެރީޑް. ހެހެހެ….” ދާނިޝް ހިލްޔާއަށް މިހާރު ވެސް އެނގޭ ކަންތައް ކިޔައިދޭން ފެށުމުން ހިލްޔާ ތުން ފިއްތާލި ގޮތުން ދާނިޝްއަށް ހެވޭ ގޮތްވިއެވެ.

“ތިކަންތައް އެނގެއޭ. ކޮންތާކު އުޅެނީ؟ ވަޓް ޑޫ ޔޫ ޑޫ؟” ހިލްޔާ ނުހަނު އެނގެން ބޭނުންވެފައި ސުވާލު ކުރިއެވެ.

“އަދި އަހަރެންގެ ފިކްސްޑް ހޯމްއެއް ނެތް. އެކި ޤައުމުތަކުގަ އަހަރެން އުޅެނީ. އަބަދުވެސް ބޭނުންވީ މެރީ ކޮށްގެން ވައިފް އާއިއެކީ ވައިފް ބޭނުންވާ ތަނެއްގަ ސެޓްލް ވާން. އަސްލު ބޮޑަށް ޓްރެވެލް ކުރަން ޖެހެނީ ޖޮބް ގެ ގޮތުން. މަލްޓިނޭޝަނަލް ކޮމްޕެނީއެއް ވީމަ.” ދާނިޝް ކިޔައިދިނެވެ.

“ކޮން ޖޮބެއްގަ ދާނިޝް އުޅެނީ؟” ހިލްޔާއަށް އަހާލެވުނެވެ.

“އެނގޭތަ އޯގެނިކް ޗީފް ކޮމްޕެނީ؟” ދާނިޝް އެހިއެވެ. އެއާއިއެކު ހިލްޔާގެ ދެބުމަ ކައިރިވިއެވެ.

“ނޭނގެ.” ހިލްޔާއަށް ބުނެވުނެވެ.

“އަދި ނޭނގޭނެތާ….ކޮމްޕެނީގެ ޕްރޮޑަކްޓްސް އަދި އޮފިޝަލީ ރާއްޖެއަށް އެތެރެ ނުކުރެވޭ. އެކަމަކު ޕްލޭން ކޮށްފަ އެބައޮތް. އެނީވޭސް….މި ކޮމްޕެނީއަކީ ޖެނުއިން އޯގެނިކް ޕްރޮޑަކްޓްސް ހައްދާ ކުންފުންޏެއް. ހަމަ އެއްވެސް ވަރަށް ކެމިކަލް ބޭނުން ނުކޮށް ގަސް ހައްދައި، ފާމް އެނިމަލްސް ބަލަހައްޓައި ހަދާ ކުންފުންޏެއް. ދެން ހާވެސްޓްކޮށްގެން ލިބޭ މޭވާއާއި ތަރުކާރީއާއި މީޓް ވީ ސެލް. އަދި އެއިން ޕްރޮޑަކްޓްސް ހަދައިގެން ވެސް ވިއްކަން. ޢާއްމު ގޮތެއްގަ އޯގެނިކް ކޮމްޕެނީސް އޯގެނިކް އޭ ބުނެފަ ވެސް ކެމިކަލްތައް ބޭނުން ކުރޭ. ބަޓް ވީ ޑޯންޓް. އެހެންވީމަ އައި ރިއަލީ ލައިކް ދަ ކޮމްޕެނީ. އައި ރިއަލީ ލައިކް ވަޓް އައި ޑޫ.” ދާނިޝް ނުހަނު ޖޯޝާއި އެކީ ކުންފުނީގެ ވާހަކަ ކިޔައިދިން ގޮތުން ހިލްޔާއަށް އެ ފަހު ބަސްތައް ޤަބޫލު ކުރެވުނެވެ.

“އެހެންވީމަ…ދާނިޝް ވޯކް ކުރަނީ ފާމް ގަ؟” ހިލްޔާއަށް ޖެހިލުންވުމަކާއެކީ އަހާލެވުނެވެ. އޭނަގެ އެ ސުވާލުން ދާނިޝް ނުރުހުންވެދާނެތީވެއެވެ.

ހިލްޔާ އެހެން އަހާލިތަނާހެން ބައްޕަ އެއްޗެކޭ ބުނަން އުޅުނެވެ. އެހެނަސް އޭގެ ކުރިން ދާނިޝް ވާހަކަ ދެއްކިއެވެ.

“މިހާ ހިސާބަށް އައިއިރު، އަހަރެން މިއީ ކޮމްޕެނީގެ ބޯޑް މެމްބާރއެއް. އެކަމަކު ފާމް ގަ ވެސް ވޯކް ކުރިން. އައި ރިއަލީ ލައިކް ފާރމިންގް. އެމްބީއޭ ނިންމާލާފަ ބޮޓެނީ އިން ޑިޕްލޮމާއެއް ހޯދީ ވެސް ގަސް ހައްދާ ހިތްވާ ވަރުން. ހެހެ….އެކަމަކު އެހެން ސަބަބެއް ވެސް އެބައޮތް. އަހަރެން ދެކޭ ގޮތުގަ އަހަންނަށް އަހަރެންގެ ދަށުން މަސައްކަތް ކުރާ މީހުން ބެލެހެއްޓޭނީ އެމީހުންގެ މަސައްކަތް ރަނގަޅަށް އެނގިގެން.” ދާނިޝް ކިޔައިދިނެވެ. އެ ވާހަކައަށް ބުނާނެ އެއްޗެއް ހިލްޔާއަށް ނުވިސްނިގެން އުޅެނިކޮށް ނަހީދު ވާހަކަ ދެއްކިއެވެ.

“ހަމަ ތެދެއް ހިލްޔާ. ދާނިޝް ގެ އެ ޚިޔާލަކީ ބަދަލު ކުރެވޭނެ ޚިޔާލެއް ނޫން. އެންމެ ފުރަތަމަ އޯސިސްއަށް އެޕްލައި ކުރީމަ އެއޮތް އެކްސްޕީރިއެންސް އާ ސެޓްފިކެޓްތައް ފެނިފަ ބައްޕަ ވަގުތުން ބޭނުންވީ ދާނިޝް މެނޭޖާރއަކަށް ހަދަން. އެކަމަކު ހަމަހިލާ އެއްބަހެއް ނުވިއޭ. ތިމަންނަ އެޑްމިންއަށް ހަދައިދޭށޭ. އޭރުން ކްލިނިކަށް ބޮޑު އިންވެސްޓެއް ދެވަނަ ފަހަރަށް ނުކޮށް ވާނެހެން ބްރޭކް އީވެން ވަންދެން ލަސްލަހުން މުވައްޒަފުން އިތުރު ކުރަމުން ދާނަމޭ. ދާނިޝް ގެ އެ ޚިޔާލު ކިހާ ރަނގަޅުކަން މިހާރު ވިސްނޭ. އޯގެނިކް ޗީފް ގަ ކީއްކުރަން؟ ބައްޕަ ދާނިޝް ހަދައިދީފާނަން ދާނިޝް އޯސިސް ގެ ބޯޑް މެމްބަރަކަށް ވެސް! ހެހެ…..އެކަމަކު ދެރައީ ދާނިޝް މަޑު ކުރަން ޚިޔާލު ނުކުރާތީ. ދާނިޝްގެ ބައްޕަގެ ކުންފުނިވީމަ ދޫ ނުކުރެވޭނެތާ ދޯ؟”

ބައްޕަ ވާހަކަ ދެއްކި ދެއްކިހެން ހިލްޔާއަށް އެއްފަހަރު ބައްޕައަށް އަނެއްފަހަރު ދާނިޝްއަށް ބަލާލެވުނެވެ. އަނެއްކާވެސް ދާނިޝްއާއި ގުޅޭ އާ މަޢުލޫމާތެއް ލިބުނުކަން އެނގުންވުމުންނެވެ.

“ހެހެ…ކޮންމެހެން ބައްޕަގެ ކުންފުންޏަށް ވީމައެއް ނޫން. ލައިކް އައި ސެއިޑް އެ ކުންފުނީގެ ވިޝަން އަހަންނަށް ވަރަށް ކަމުދޭ. ޞިއްޙަތަށް ރަނގަޅު ޤުދުރަތީ ކާނާ ލޯތްބާއިއެކު މީހުންނަށް ފޯރުކޮށްދިނުން. ހިލްޔާއަށް އެނގޭތަ އެއީ އަހަރެންގެ ބައްޕަ ގެ ވިޝަންއެއް.” ދާނިޝް ހިލްޔާ ގާތު ބުންޏެވެ.

“ދާނިޝް ގެ ބައްޕަ މީންސް…އުސްތާޒާ ގެ ލޭޓް ހަޒްބެންޑް ދޯ؟” ހިލްޔާ ވިސްނުމެއްގައި އިނދެ އެހިއެވެ. އެއާއިއެކު ދާނިޝްއަށް ހީލެވުނެވެ.

“މަންމަ ކިޔައިދީފަ ދޯ ހުރީ ހުރިހާ ވާހަކައެއް؟” ދާނިޝް އެހިއެވެ.

“ނޫން…އެނގެނީ ދާނިޝް ވަރަށް ކުޑައިރު ބައްޕަ….ނިޔާވިކަން. އެ ބައްޕަ ގަސް ހައްދާ ހިތްވާ ވާހަކަ ކިޔައިދިން. އެކަމަކު ގަސް ހެއްދުމަކީ އުސްތާޒާއަށް ކުރަން އެނގޭކަމެއް ނޫންކަމަށް ބުނެއުޅުނު.” ހިލްޔާގެ އެ ވާހަކައިން ދާނިޝްއަށް އަނެއްކާވެސް ލުއި ގޮތަކަށް ހީލެވުނެވެ.

“އާނ….މަންމައަށް ވަރަށް ނޭނގޭނެ އެ ބައިބައި. އެހެންވީމަ ވަރަށް ކުރާ ހިތެއް ވެސް ނުވާނެ. ހެހެ…އަސްލު، އަހަރެން ކުޑައިރު ބައްޕައާއި މަންމަ ވެސް އުޅުނީ ޗައިނާގަ. ފުރަތަމަ ބައްޕަ ޗައިނާއަށް ދިޔައީ ހޮޓަލެއްގެ މެނޭޖަރަކަށް. ރާއްޖޭގެ ރިސޯޓެއްގަ ވޯކް ކުރަމުން ދަނިކޮށް ގެސްޓެއްގެ ފަރާތުން ލިބުނު އޮފާރއެއް އެއީ. ވަކި ހިސާބަކުން ހޮޓެލްއިން މީހުންނަށް ދިން ކާ އެއްޗެހިން މީހުން ބަލިވާން ފެށީމަ ހޮޓެލް ބަނގުރޫޓުވީ. ދެން ބައްޕަ ޖޮބެއް ނެތިގެން ފެކްޓްރީއަށް ދިޔައީ. އެތަނުން ދިމާވި އެކުވެރިންނާއެކީ އުފެއްދި ކުންފުންޏެއް ޗީފް އޯގެނިކް އަކީ. ކުޑަކުޑަ ދަނޑެއްގަ އެމީހުން އަމިއްލައަށް ތަރުކާރީ ހައްދައިގެން އަމިއްލައަށް ހުރިހާ ކަމެއްކޮށް ތަރުކާރީ ވިއްކަން ފެށީ. އެންޑް ނައު….އިޓްސް އަ މިލިއަން ޑޮލާރ މަލްޓިނޭޝަނަލް ކޮމްޕެނީ. މާ ޝާ ﷲ. ބައްޕަ ނިޔާވީ ކުންފުނި ހަމައަކަށް އެޅިގެން 5 އަހަރު ފުރުނު ފަހުން. އޭރު އައި ވޯޒް 2. ބައްޕަ މަތިން އެހާ ބޮޑަށް ހަނދާނެއް ނުހުރޭ. މަންމަ މި ހުރިހާ ވާހަކައެއް ކިޔައިދިނީ.” ދާނިޝް ކިޔައިދިނެވެ.

“އޮހް…” ހިލްޔާއަށް ބުނެވުނެވެ. އެހުރިހާ ވާހަކައެއްގެ ތެރެއިން އެ ފަހު ވާހަކައިން ދާނިޝް މާޔޫސްވިހެން ހީވުމާއިއެކު ހިލްޔާގެ ހިތް ވެސް މާޔޫސްވިއެވެ.

“އެހެންވީމަ ބޭސިކަލީ ދާނިޝް އެ ކުރިއަށް ގެންދަނީ ދާނިޝް ގެ ބައްޕަގެ ލެގަސީ ދޯ؟” ނަހީދު ބުންޏެވެ.

“ހެހެ…ސޯޓް އޮފް. ގިނައިން ވޯކް ކުރެވިފަ ހުންނާނީ ވެސް ޗައިނާގަ ހުންނަ އެ ކުންފުނީގެ ހެޑްކުއާރޓާސް ގަ.” ދާނިޝް ބުނެލިއެވެ.

“އެހެންވީމަ ދާނިޝް އަބަދުވެސް ވޯކް ކުރީ ތި ކުންފުނީގަތަ؟” ހިލްޔާއަށް އަހާލެވުނެވެ.

“ޔާ….މި ކުންފުނީގަ ވޯކްކުރީ. 18 އަހަރުވީއްސުރެ. ކޮމްޕެނީގެ ހުރިހާ ޑިޕާޓްމެންޓެއްގަ މިހާރު ވޯކް ކުރެވިފަ ހުންނާނީ އަލްޙަމްދުލި ﷲ. ޗުއްޓީއެއް ވެސް ނުނަގާ ރެއާއި ދުވާލު ވޯކް ކޮށްފަ ހުންނާނީ. އެންމެފަހުން ސީއީއޯ ގަދަކަމުން އަހަރެން ފޮނުވި ޕެއިޑް ލީވްއެއް މިއީ. ބުނީ އަހަރެއް ވަންދެން ދާށޭ. އަހަރެން ބުނިން 8 މަހުން އަންނާނަމޭ. އެކަމަކު….އަދި ނުދެވިފަ މިހިރީ. އެކަމާ މައްސަލައެއް ނުޖައްސަނީ އޮރިޖިނަލީ ސީއީއޯ އަހަންނަށް އަހަރެއްގެ ޗުއްޓީ ދީފަ އޮތީމަ.” ދާނިޝް ބުންޏެވެ.

“ބްރޭކަށް ފޮނުވީމަ ވެސް މިކޮޅުގަ ހުރެގެން މަސައްކަތް ދޯ ދާނިޝް ކުރަނީ؟” ނަހީދު އެހެން ބުނުމާއިއެކު ދާނިޝް ހީލުމުން ހިލްޔާއަށް ވެސް ހީލެވުނެވެ.

އެރޭ ދާނިޝް އާއި ވާހަކަ ދައްކަމުން ގޮސް 2 ގަޑިއިރު ފާއިތުވީ ގޮތެއް ވެސް ހިލްޔާއަށް ނޭނގުނެވެ. ހިލްޔާއަށް ހުއްޓުމެއްނެތި ދާނިޝްއާއި ސުވާލު ކުރެވެމުން ދިޔައެވެ. އަދި ނުހަނު ގަޔާވެފައި ދާނިޝްގެ ޖަވާބުތައް އަޑުއެހެމުން ދިޔައެވެ. 10:30 ވެ 11 ޖަހަނީ ކަމަށް ބައްޕަ ބުނުމުން އެ ބައްދަލުވުން ނިމުމުން ވެސް ހިތުގައި ޝަކުވާ އުފެދުނެވެ.

ދާނިޝްގެ ހިތް ތިރިކަން ހިލްޔާއަށް އެނގުންވީ، އެރޭ ނިދުމުގެ ކުރިން އޯގެނިކް ޗީފްއާއި މެދު ގޫގުލް ސާޗް ކުރުމުންނެވެ. އޯގެނިކް ޗީފްގެ ވެބްސައިޓުން ހިލްޔާއަށް ދާނިޝް ސިފަ ކުރިހާ ވާހަކަތައް ފެނުނެވެ. އަދި ކޮންމެވެސް އެއް ޞަފްޙާއަކުން އެ ކުންފުނީގެ މެނޭޖްމެންޓުގައި ތިބި މީހުންގެ ފޮޓޯތައް ފެނިގެން ދިޔައެވެ. ދާނިޝްއަކީ ހަމައެކަނި އެ ކުންފުނީގެ ބޯޑް މެމްބަރެއް ނޫނެވެ. ދާނިޝްއަކީ ކުންފުނީގެ ޗީފް ފައިނޭންޝަލް އޮފިސަރެވެ. ސީއީއޯ އާއި އެންމެ ގާތުން ހުރި މަޤާމެވެ. އަދި މީގެ އިތުރުން ކުންފުނީގެ 40% ޙިއްސާ ވަނީ ދާނިޝް ގެ ނަމުގައެވެ.

އެނދުމަތީގައި އިނދެ ފޯނުން ދާނިޝްގެ ވާހަކަތައް ކިޔަމުން، އެ ލިޔުމުގެ ކައިރީގައި ކަޅު ކުލައިގެ ކޯޓެއް ލައިގެން ހުރި ދާނިޝް ގެ ފޮޓޯއަށް ބަލަމުން ދިޔަ ހިލްޔާގެ އަނގަ ހުޅުވިފައިވިއެވެ. ހަނދާނަށް އައީ މީގެ މަސްތަކެއް ކުރިން އޭނަ ދާނިޝް އާއިމެދު ދަށްކޮށް ދެކުނު ގޮތެވެ. އެހާ މަތީ މަޤާމެއް ދާނިޝް ފުރުވަމުން ދިޔައެއްކަމަކު ދާނިޝް އޯސިސް ކްލިނިކްގެ ކުދިކުދި މަސައްކަތްތައް ވެސް ކުރަމުން ދިޔަ ގޮތެވެ. ނުހަނު އާދައިގެ ހެދުން ލައިގެން ނުހަނު އާދައިގެ އުޅުމެއް އުޅެމުން ދިޔަ ގޮތެވެ. މިއީ ހިލްޔާ ދަންނަ ކޮންމެވެސް މީހެއްގެ މުޅިން އިދިކޮޅެވެ. ބައެއް މީހުންނަކީ ﷲ ކިތަންމެ ގިނައިން ދެއްވާފައި ވިޔަސް އެ ނިޢުމަތްތަކުގެ ބޭނުން ހިފައި އެހެން މީހުން ދަށްކޮށްލާ ބައެއް ނޫންތާއޭ ހިތަށްއެރިއެވެ.

ހިލްޔާ ހީކުރީ ދާނިޝް އޭނައާއި ދައްކާ ވާހަކަތަކުގެ ތެރެއިން ކޮންމެވެސް ދުވަހަކުން އެ ބަސްތައް ދުލާއި ހަމައަށް ގެންނާނެ ކަމަށެވެ. އެހެނަސް ދެންވެސް ދާނިޝް ދެއްކިހާ ވާހަކަތަކުން ހިލްޔާއަށް އިޙްސާސް ކުރެވުނީ ދާނިޝްގެ ހިތްތިރި ކަމާއި ހިތް ހެޔޮކަމެވެ.

އޭގެ ފަހުން އައިރޭ ދާނިޝްގެ ކުޑައިރު ގެ ވާހަކަތައް ދާނިޝް ކިޔައިދިނެވެ. ކުޑައިރު ދާނިޝް އުޅުނީ ޗައިނާގައިކަން ހިލްޔާއަށް އެނގުނެވެ. އެހެނަސް ދާނިޝް ގެ މަންމަ ދާނިޝް ގޮވައިގެން މެލޭޝިޔާއަށް ބަދަލުވީ، ޗައިނާގައި އުޅޭއިރު ދާނިޝް އެ ޘަޤާފަތާއި އެއްގޮތަށް މީހުންނަށް ބޯލަނބަން ފެށުމުންނެވެ. އެހެންކަމުން ގްރޭޑް 5 ކާއި ހަމައަށް ދާނިޝް ކިޔެވީ މެލޭޝިޔާގައި ކަމަށް ދާނިޝް ބުންޏެވެ. އެއަށްފަހު މަންމަ ކިޔެވުމަށްޓަކައި ސަޢޫދީއަށް ބަދަލުވުމުން އެހާ ހިސާބުން ގްރޭޑް 10 އަކާއި ހަމައަށް އޭނަގެ ކިޔެވުން ކުރިއަށް ދިޔައީ ސަޢޫދީގައި ކަމަށް ދާނިޝް ބުންޏެވެ. ސަޢޫދީގައި އުޅެމުން މަންމަ އާދޭސް ކުރުމުން ވެސް އޭނަ ޢަރަބި ނުކިޔެވި ވާހަކައާއި ޢުމްރާއަށް ނުދިޔަ ވާހަކަ ބުނިއިރު ދާނިޝް ގެ ލޮލުން ކަރުނަ ހިލުނެވެ. އެ މަންޒަރު ފެނިފައި ހިލްޔާގެ ލޮލަށް ވެސް ކަރުނަތައް ޖަމާވިއެވެ.

ގްރޭޑް 10 އެއް ނިންމުމަށްފަހު އަނެއްކާވެސް ދާނިޝް ޗައިނާއަށް އަނބުރާ ދިޔަ ވާހަކަ ދާނިޝް ކިޔައިދިނެވެ. ޗައިނާއަށް ގޮސް ޗައިނާ ބަސް ދަސްކުރި ވާހަކައާއި ވިޔަފާރި ކިޔަވަން ފެށީ ވިޔަފާރިއަށް އޮތް ޝައުޤުވެރިކަމެއްގެ ބޮޑުކަމުން ކަމަށް ދާނިޝް ބުންޏެވެ.

“ފޯ މީ، ބިޒްނަސް އިޒް އަ ތްރިލް. ބިޒްނަސް ސްޓޯރީސް އިވިފަ އަބަދުވެސް އިންސްޕަޔާރ ވޭ. ބިޒްނަސް ކިޔަވަން ފެށިފަހުން ކުޑަ ބިޒްނަސްތައް ހިންގަން ވެސް ފެށިން. ކޯސްގެ ޕްރޮޖެކްޓްސް ގޮތުގަ. އޭރު ބިޒްނަސް ހިންގަނީ ޖަސްޓް ފޯ ޕްރޮފިޓް. ދެން މޫނުމައްޗަށް އެތިފަހަރެއް ލިބުނީ ގްރޫޕް ޕްރޮޖެކްޓެއް ހެދި ފަހަރަކު. ހޫނު މޫސުމުގަ ލެމަނޭޑް ސްޓޭންޑަކުން ފައިދާ ޖެހެނީ ކިހާ ވަރެއްތޯ ބަލާ ޕްރޮޖެކްޓެއް. އަހަރެން އަމިއްލައަށް އިސްނަގައިގެން ނެގީ ބިޒްނަސް ގެ ފައިނޭންސް ބައި. ޕްރޮފިޓް ފެންނާނީ އެ ބައިގަ ހުރީމަ ކަމަށްވާތީ. ދެން މި ސްޓޭންޑް ހުޅުވިތާ ދުވަސްކޮޅެއްފަހުން ކަސްޓަމަރުން ލެމަނޭޑް ގެ ރަހައާއި މެދު ޝަކުވާ ކުރަން ފެށީ. އަހަންނަށް ފެނުނީ އެ ޝަކުވާތަކާއި ކަލްކިއުލޭޝަންތަކުން ޕްރޮފިޓް ދަށް ވާ މަންޒަރު. އެކަމުގެ ރުޅި ބާލެވުނީ ލެމަނޭޑް ތައްޔާރު ކުރަމުން ދިޔަ ކުދިންނަށް. މިއަދު ވެސް ލަދުގަނޭ ޗައިނާގެ އެ ދެ ފްރެންޑުންނާއި ދިމާލަށް ހަޅޭއްލެވުނު ހަނދާންވެފަ. މާ ފަހުން އެނގުނީ ލެމަނޭޑް ހަދާ ދެކުދިންގެ ތެރެއިން އެއްކުއްޖެއްގެ މަންމައަކު ކެންސަރު ޖެހިގެން ހޮސްޕިޓަލުގަ އޮތްކަން….އަސްތަޣްފިރު ﷲ…އެ ފަހުން 3 ދުވަސް ވަންދެން އެ ކުއްޖާއަށް ނާދެވޭތީ އަހަރެން އަމިއްލައަށް ލެމަނޭޑް ހަދަން ފެށިން. އެކަމަކު ކަސްޓަމަރުންނަށް މީރުވާނެހެން ހަދަން އަހަންނަށް ނޭނގުނު. އެހާ ހިސާބުން އެނގުނީ ބިޒްނަސް ގަ އުޅޭ ކޮންމެ މީހެއްގެ މުހިއްމުކަން. ބިޒްނަސް ގަ އިންވޯލްވް ވާ ކޮންމެ މީހެއްގެ ޙާލަތު ވެސް މުހިއްމު ކަން. އެހެންވީމަ ބެސްޓް އެޑްމިން މޭކްސް ބެސްޓް މެނޭޖާރ ކަމަށް އަހަރެން ވެސް ޤަބޫލު ކުރަން. ހެހެ….” ދާނިޝް ދިގުކޮށް ވާހަކަ ދެއްކިއެވެ.

އެ ވާހަކަ ނުހަނު ޝައުޤުވެރިކަމާއެކީ އަޑުއަހަން އިނދެފައި ހިލްޔާއަށް ހީލެވުނެވެ. ދާނިޝްގެ ހިތްތިރި ވެފައިވާ އެއްސަބަބު އެ ވާހަކައިގެ ތެރެއިން އެނގުންވެގެން ދިޔުމުން ވަކި އެއްޗެކޭ ނުބުނެ ވިސްނުމަކަށް ގެއްލިފައި ދާނިޝްއަށް ބަލަން އިނދެވުނެވެ.

“ވަރަށް ފޫހި ދޯ މާ ދިގުދިގުކޮށް ބިޒްނަސް ވާހަކަ ދެއްކީމަ؟ އަހަންނަށް ވަރަށް މިހެންވޭ. ޝައުޤުވެރިކަން ހުންނަ ވާހަކައެއް ވަރަށް ގިނައިން ދެކެވޭ.” ދާނިޝް އޭނަގެ ބޮލުގެ ފުއްކިބައިގައި އަތް ހިންގަމުން ބުންޏެވެ.

“ނޫނޭ ފޫއްސެއް ނުވޭ. ދާނިޝް ތި ވާހަކަ ދައްކާ ގޮތުން މިހާރު އަހަރެން ވެސް ބިޒްނަސްއަށް އިންޓްރެސްޓް ޖެހިއްޖެ. ހެހެހެ….” ހިލްޔާ ލުއި ގޮތަކަށް ހީލުމުން ދާނިޝް ވެސް ހީލިއެވެ.

“އައްދެ! އޯސިސްއަށް މި ލިބުނީ ޗެއާރވުމެންއެއްތަ؟” ނަހީދު އެހެން ބުނުމުން ހިލްޔާއާއި ދާނިޝްއަށް އިހުނަށްވުރެ ބޮޑަށް ހީލެވުނެވެ.

“ދެން އެހާވަރެއް ނުވޭ ބައްޕާ. އެކަމަކު އޯސިސް އާއި ޗީފް އޯގެނިކް ޕާޓްނާރޝިޕެއް ހަދަން އަހަންނަށް ފެނޭ. ރާއްޖެއަށް އޮތެންޓިކް އޯގެނިކް މޭވާއާއި ތަރުކާރީ އެތެރެކޮށް ވިއްކަން.” ހިލްޔާއަށް ބުނެވުނެވެ. އެއީ ރޭއްސުރެ އޭނައަށް ކުރެވެމުން ދިޔަ ޚިޔާލެކެވެ. މޭވާގެ ވާހަކަ ދައްކާ ކޮންމެ ފަހަރަކު ނަހީކް މަތިން ހަނދާން ވެސް ވާތީވެއެވެ.

“ތިކަން ކުރަން އުޅެފަ އެރާރއެއް އަރައިގެން ޕޯޒްވީއޭ.” ދާނިޝް ބުންޏެވެ.

“ކޮން އެރާރއެއް؟” ހިލްޔާއަށް ދެބުމަ ކައިރި ކޮށްލެވުނެވެ. އެއާއިއެކު ދާނިޝް ފުރަތަމަ ސިކުންތުގައި އަނގަ ބަންދު ކުރިއެވެ. އެހެނަސް ދެއަތުގެ މުލައްދަނޑި ކަކޫ މަތީގައި ބާއްވައި ދެއަތް ގުޅުވާލަމުން ކުރިމަތީގައި އިން ހިލްޔާއާއި ދިމާލަށް ގުދުވެލީ ސިއްރެއް ބުނަން އުޅޭ ފަދައަކުންނެވެ.

“ބިޒްނަސް ސީކްރެޓެއް އިނގޭ. އެހެން މީހަކަށް ނާންގައްޗޭ. އަސްލު…އަހަރެން މިކޮޅަށް އައީ އޯގެނިކް ޗީފް ގެ 3 ކޭސް އާފަލު ހިފައިގެން. އެ 3 ކޭސް މާލޭގެ ތިން ފިހާރައަކަށް ވިއްކީ ކަސްޓަމަރުންގެ ޑިމާންޑް އޮންނަ ވަރު ބަލަން. އެކަމަކު ވަކި ހިސާބަކުން މާލެ ތެރެއިން ފެންނަން ފެށީ އަހަރުމެންގެ ނަމުގަ ލޭބަލް ވެފައިވާ އެހެން އާފަލުތަކެއް. އަހަރުމެން އާފަލުގަ ތަތްކޮށްފަ ހުންނަ ސްޓިކާރ އާއި އެއްގޮތް ސްޓިކާރއެއް. އެކަމަކު ސިންސް 1989 ގެ ބަދަލުގަ އެ ލޭބަލް ގަ އޮންނަނީ 1998. އެއީ ކޮން ބަޔަކު ކިހިނެއް އަދި ކީއްވެ ކުރި ކަމެއް ކަމެއް އަދި ނޭނގޭ…”

ދާނިޝް އެ ވާހަކަ ކިޔައި ދިންދިންހެން ހިލްޔާގެ ގައިން ހީބިހި ނެގިއެވެ.

ނުނިމޭ