ނަފްސީ (ފަސްދޮޅޮސްފަސްވަނަ ބައި)

ނަފްސީ (ފަސްދޮޅޮސްފަސްވަނަ ބައި)

“ބިޒްނަސް ސީކްރެޓެއް އިނގޭ. އެހެން މީހަކަށް ނާންގައްޗޭ. އަސްލު…އަހަރެން މިކޮޅަށް އައީ އޯގެނިކް ޗީފް ގެ 3 ކޭސް އާފަލު ހިފައިގެން. އެ 3 ކޭސް މާލޭގެ ތިން ފިހާރައަކަށް ވިއްކީ ކަސްޓަމަރުންގެ ޑިމާންޑް އޮންނަ ވަރު ބަލަން. އެކަމަކު ވަކި ހިސާބަކުން މާލެ ތެރެއިން ފެންނަން ފެށީ އަހަރުމެންގެ ނަމުގަ ލޭބަލް ވެފައިވާ އެހެން އާފަލުތަކެއް. އަހަރުމެން އާފަލުގަ ތަތްކޮށްފަ ހުންނަ ސްޓިކާރ އާއި އެއްގޮތް ސްޓިކާރއެއް. އެކަމަކު ސިންސް 1989 ގެ ބަދަލުގަ އެ ލޭބަލް ގަ އޮންނަނީ 1998. އެއީ ކޮން ބަޔަކު ކިހިނެއް އަދި ކީއްވެ ކުރި ކަމެއް ކަމެއް އަދި ނޭނގޭ…”

ދާނިޝް އެ ވާހަކަ ކިޔައި ދިންދިންހެން ހިލްޔާގެ ގައިން ހީބިހި ނެގިއެވެ. ހިލްޔާ އެއްޗެކޭ ނުބުނެވިފައި އިންދާ ބައްޕަ ވާހަކަ ދެއްކިއެވެ.

“ކޮން ފިހާރައަކުންތަ ފޭކް އާފަލުތައް ވިއްކީ؟ ފިހާރަ އެނގިއްޖެއްޔާ ސަޕްލައި ކުރި މީހަކު ވެސް އެނގިދާނެއެއްނު؟” ބައްޕަ ބުންޏެވެ.

“އަހަރެން ބެލި ބެލުމަށް 5 ފިހާރައަކުން ވިއްކާފަ ހުރީ. އެ 5 ފިހާރައިގެ ވެރިންނާއި ވެސް ވާހަކަ ދެއްކިން. ކޮންމެ މީހަކު ވެސް ބުނީ ސަޕްލަޔާރއެއްގެ ފަރާތުންނެއް ނޫނޭ ލިބުނީ. ކޮންމެވެސް ބީރައްޓެއްސެއް އައިސް ކޭސްތައް ވަރަށް އަގު ހެޔޮކޮށް ވިއްކީއޭ. އެ އާފަލުތައް ފުދޭވަރަކަށް ރީތިވެފަ، މީރުވެސް ވެފަ، އަގު ހެޔޮވީމަ އެމީހުން އާފަލު ގަތިއްޔޯ ބުނީ. އާފަލު ގެނައި ބީރައްޓެހި މީހާގެ ސިފަތައް އެންމެން ކައިރިން އެހިން. އެކި މީހުން ދިނީ ތަފާތު ސިފަ ކުރުންތައް. އެހެންވީމަ ކޮންމެވެސް މީހަކު ބަޔަކު ފޮނުވައިގެން ކުރި ކަމެއް މިއީ….” ދާނިޝް އެއްދިމާލަކަށް ނަޒަރު ހުއްޓައިގެން އިނދެ އެ ވާހަކަ ކިޔައިދިން އިރު، އެ މޫނުމަތިން ނުރުހުންތެރިކަން ފާޅުވަމުން ދިޔައެވެ.

“ދާނިޝް އެ އާފަލު ކެއިންތަ؟” ހިލްޔާއަށް ހާސްވެފައިވާ ހިތަކާއެކީ އަހާލެވުނެވެ. އެ އާފަލު މީރު ވާހަކަ ދާނިޝްގެ ދުލުން އިވުމުންނެވެ.

“ނުކަން….އައި ރުޅިއެއްގަ އެ ހުރިހާ އާފަލު ގަނެފަ އުކާލަން ހިތަށްއެރީ. އުޅުނިން ޗީފް އޯގެނިކްގެ ޓީމެއް ގެނެސް އެ އާފަލު އެތެރެވާ ގޮތާއި އެއްޗެހި ރަނގަޅަށް ތަޙުޤީޤު ކުރުވަން. އެކަމަކު އޭގެ ކުރިން އެ އާފަލުތައް މާލެއިން ހުސްވެއްޖެ. އަހަރެން އަނެއްކާ އެ 5 ފިހާރައަށް ގޮއްސަ އެހީމަ ބުނީ އިތުރަކަށް ނުލިބެއޭ އެ އާފަލެއް. އާފަލު ކޭސް ބެހި މީހުން ނަންބަރު ނުދޭ ކަމަށްވަނީ. މިހާރު އަހަރުމެން މިދަނީ އެ ކަހަލަ އާފަލުތައް އެހެން ޤައުމުތަކުގަ ހުރިތޯ ތަޙުޤީޤު ކުރަމުން.” ދާނިޝް ކިޔައިދިނެވެ.

ދާނިޝްގެ އެ ވާހަކައިން އެ މައްސަލަ ޙައްލު ނުވާކަން ހާމަވިޔަސް ހިލްޔާގެ ހިތަށް ފިނިކަމެއް ލިބުނެވެ. ދާނިޝް އެ ‘ނުރައްކާތެރި’ އާފަލުން ދުރުވެފައިވާކަން އެނގުންވުމުންނެވެ.

އެރޭ ގެއަށް ގޮސް ނިދަން އޮށޯތް ވަގުތު ދާނިޝްގެ މެއަށް ލުޔެއް ލިބިފައިވިއެވެ. އެތައް ދުވަހެއް ވަންދެން އޭނަގެ ސިކުނޑި ހާސް ކުރުވަމުން ދިޔަ ވާހަކައެއް އޭނައަށް އިތުބާރު ކުރެވޭ މީހަކާއި ޙިއްސާ ކުރެވުމުންނެވެ. ކުރިއަށް އޮތް ދުވަސްތަކުގައި އޭނައަށް ލިބެން އުޅެނީ އެފަދަ ބައިވެރިއަކާއި އެކީ ހޭދަ ކުރެވޭނެ ދުވަސްތަކެއް ކަން އެނގުންވި ހިނދު ހިނިތުންވެލެވުނެވެ. މަސައްކަތުގެ މާޙައުލުގައި ގޮންޖެހުމެއް ދިމާވެފައި ވިޔަސް ކުރިއަށް ދިޔުމަށް އިތުރު ހިތްވަރެއް ލިބުނެވެ. މި ނިޢުމަތްތައް އޭނައަށް މި ލިބެނީ ހަމައެކަނި ﷲ ގެ ޙަޟްރަތުން ކަން ހަނދާންވުމުން އެކަލާނގެއަށް ޙަމްދު ކުރެވުނެވެ.

އެހިނދު ދާނިޝްއަށް މިހާތަނަށް އައިއިރު އޭނައާއި ހިލްޔާއާއި ދެމެދު ދެކެވިފައިވާ ވާހަކަތަކާއިމެދު ވިސްނާލެވުނެވެ. އެހިނދު ގިނައިން ދެކެވިފައިވީ އޭނަގެ ވާހަކަތައް ކަން އެނގުންވުމުން ދާނިޝް ހިސާބަކަށް އަމިއްލަ ނަފްސާއިމެދު ހިތްހަމަނުޖެހުނެވެ. ހިލްޔާއަށް އެހާ ގިނަ ވާހަކައެއް ދައްކަން ފުރުސަތެއް ނުދެވޭހެން ހީވުމުންނެވެ. ދެމީހުންގެ ގުޅުން ކައިވެންޏަކާއި ހަމައަށް ގެންދެވޭނީ ދެމީހުންގެ ދެމެދުގައި މުހިއްމު ސުވާލުތަކެއް ކުރެވި، ޙަޔާތުގެ މުހިއްމު ކަންތަކާއިމެދު މަޝްވަރާ ކުރެވުނުހާ އަވަހަކަށެވެ. އެހެންކަމުން ޖެހިގެން އަންނަ ދުވަސްތަކުގައި ހިލްޔާއާއި އެފަދަ ސުވާލުތައް ކުރަން ދާނިޝް ނިންމިއެވެ.

މިގޮތުން ދެމީހުންގެ ކައިވެންޏާއި ޢާއިލާއާއިމެދު ދެކޭ ގޮތާއިމެދު ވާހަކަ ދެކެވުނީ ދާނިޝް ގެ އިސްނެގުމުންނެވެ. ދެމީހުން ވެސް އެ ކަންތަކާއި ގުޅިގެން ކުރި މަޝްވަރާތައް ނުހަނު އެއްގޮތް ވެގެން ދިޔުމުން ދެމީހުން އެކަކު އަނެކަކާއިމެދު އިތުރަށް ހިތްހަމަޖެހޭ ގޮތްވިއެވެ. ކިރިޔާ ވެސް ޚިޔާލު ތަފާތުވާހެން ހިލްޔާއަށް ހީވީ، ދާނިޝް އޭނަގެ ވަޒީފާއާއިމެދު ސުވާލު ކުރުމުންނެވެ.

“ހިލްޔާ ޑޮކްޓަރަކަށް ވާން ބޭނުންވަނީ ކީއްވެ؟” ދާނިޝް އެހިއެވެ.

“ތިބުނީ؟” ހިލްޔާއަށް ދެބުމަ ކައިރި ކޮށްލަމުން އަހާލެވުނެވެ.

“މި ބުނީ….ލައިފްގެ އެހާ ވަގުތު ނަގާ ޖޮބެއްގަ ހިލްޔާ އުޅެންވާނީ ރަނގަޅު ނިޔަތެއްގަ ދޯ؟ އެހެންނޫނީ ވަރަށް ގިނަ ވަގުތެއްނު އެ ބޭކާރުވަނީ؟” ދާނިޝް ބުންޏެވެ.

އެހިނދު ހިލްޔާއަށް އެއްޗެކޭ ބުނަން އުޅެފައިވެސް މަޑު ކޮށްލެވުނެވެ. ދާނިޝް އެ ދެއްކީ ތެދު ވާހަކައެއްކަމަށް ސިކުނޑި ބުންޏެވެ. ދާނިޝް ގެ އެ ސުވާލުން ދާނިޝް އޭނަގެ އާޚިރަތާއިމެދު އަޅާލާކަން އެނގުންވުމުން އިތުރަށް ގަޔާވާ ގޮތްވިއެވެ. ވިސްނުމެއްގައި އިނދެފައި ހިލްޔާއަށް ވާހަކަ ދެކެވުނެވެ.

“އަސްލު….ބޭނުންވަނީ ބަލިވެގެން އުއްމީދު ކަނޑާލަން ގާތްވެފައިވާ މީހުންނަށް ވެސް އުއްމީދަކަށް ވެދޭން. ވަކިން ޚާއްސަކޮށް އަސްލު ޔަޤީން ނުވާ ބައްޔެއްގައި އުޅޭ މީހުންނަށް އެ ބައްޔަކީ ކޮބައިކަން ޔަޤީންކޮށް ފަރުވާ ހޯދައިދޭން. އެއީ އަހަންނަށް ވެވޭނެ ކަމެއްހެން ހީވޭ. އިން ޝާ ﷲ….ކިހިނެއްވީ؟ ދާނިޝް ބޭނުމެއް ނުވަނީތަ އަހަރެން ޑޮކްޓަރަކަށް ވާން؟” ހިލްޔާއަށް ވާހަކަ ދެއްކުމަށްފަހު އަހާލެވުނެވެ. ދާނިޝްގެ އެ ސުވާލުން ނޭނގި ނަމަވެސް ސިކުނޑީގައި ބިރުވެރިކަމެއް އުފެދުނީތީވެއެވެ. މާޒީގައި އަބަދު އޭނަ މޮޅު ޑޮކްޓަރަކަށް ވެދާނެތީ އޭނަ ދަށްކުރަން އުޅުނު މީހެއްގެ ހަނދާން އެ ސިކުނޑީގައި ހުރީތީވެއެވެ.

“ނޫނޭ….ހިލްޔާ ރަނގަޅު ނިޔަތެއްގަ ކުރާ ހިތުން ކުރަންޏާ އަހަރެން ނެތިން ހިލްޔާ ހުއްޓުވާކަށް. އައި ވިލް ސަޕޯޓް ޔޫ އިން ޝާ ﷲ. އެކަމަކު ހިލްޔާ ގޭގަ މަޑުކުރަން ބޭނުމިއްޔާ ޔޫ ކޭން. ހަމަ އެއްވެސް ކަންބޮޑުވުމެއްނެތި. އިޓްސް އަޕް ޓު ޔޫ.” ދާނިޝް ހިނިތުންވުމަކާއެކީ ބުންޏެވެ. އެ ބުނެލި ބުނެލުމުން ހިލްޔާގެ ހުރިހާ ހާސްކަމެއް ފިލައިގެން ދިޔަދިޔަހެން އެ ނިތުން ރޫ ފިލައި، ތުންފަތްމައްޗަށް ލުއި ހިނިތުންވުމެއް ވެރިވިއެވެ. ދާނިޝްގެ އެ ބަސްތަކުން ވެސް އިޙްސާސް ކުރެވުނީ ހިތް ވަށާލާ ފަދަ ރައްކާތެރިކަމެކެވެ. އެހެން ހުރިހާ ކަމެއް ދޫކޮށް ދާނިޝް ގާތު ހުރެދޭނަމޭ އެވަގުތު ބުނަން ހިތަށް އެރިއެވެ. އެހެނަސް ޚުދު އޭނަ ޑޮކްޓަރަކަށް ވަނީ ކީއްވެކަން ހަނދާންވުމުން އެ ބަސްތައް ދުލާއި ހަމައަށް ނުގެނެވުނެވެ. ޑޮކްޓަރަކަށް ވެ ހުރެ އޭނަ ކޮންމެހެން ޙައްލު ކުރަން ޖެހޭ މައްސަލައެއް އެބަ އުޅޭކަން ހަނދާންވުމުން ވެސް މެއެވެ.

އެރޭ ދެކެވުނު ވާހަކަތަކުގެ ތެރެއިން ދާނިޝް ހިލްޔާ ގާތު ޒިވް ގެ ވާހަކަ ބުނަން އުޅުނެވެ. އެހެނަސް ހިލްޔާގެ ކުރިމަތީގައި އަދި އަމުދުން ނަހީދުބެ ވެސް އިންދާ އެ ވާހަކަ ދުލާއި ހަމައަށް ގެންނަން ނުކުޅެދުނެވެ. އެންމެ ފަހުން ގެއަށް ދާން ޖެހުނީ އެ ވާހަކަ ނުބުނެވިއެވެ. ގެއަށް ގޮސް ވެސް މެސެޖަކުން ހިލްޔާއަށް އެ ވާހަކަތައް ކިޔައިދޭން ހިތަށްއެރިއެވެ. އެހެނަސް އެއާއިމެދު ޚިޔާލު ތަފާތުވިއެވެ. އިހަށް ފަސްކޮށްލަންވީތޯ ހިތަށްއެރިއެވެ. ހިލްޔާ ގާތު ފަހުން ބުނަން އޭނަ ނިންމާފައިވާ އެހެން ވާހަކައެއް ވެސް އެބަ އޮތެވެ. މުސާރަ ލިބިލިބި ހުއްޓާ އޭނަ އޯސިސްއަށް ވަން ސަބަބެވެ. އެކަމާއިމެދު ހިލްޔާ ސުވާލު ކުރުމުން ޙަޤީޤީ ސަބަބުން ހިލްޔާ ކިޔައި ނުދިނީ، ހިލްޔާގެ ކުރިމަތީގައި ރާފިލްގެ ނަން ގަންނަން ބޭނުމެއް ނުވުމުންނެވެ. އަދި ރާފިލް އޭނަގެ މަންމައާއިމެދު ކަން ކުރި ގޮތް ޚުދު އޭނަ ވެސް ހަނދާންވެ އޭނައަށް ރުޅި އިސްކުރެވިދާނެތީވެއެވެ. ދެމީހުންގެ ގުޅުން ތަންކޮޅެއް ފުން ވަންދެން އެ ވާހަކަ ފަސްކޮށްލަން ނިންމުނީ އެހެންވެއެވެ.

އެހެނަސް ޒިވް ގެ ވާހަކައަކީ ފަސް ނުކުރެވޭނެ ވާހަކައެކެވެ. އެހެނީ ހިލްޔާއަށް މިހާރު ވެސް ވާނީ ޒިވް އާއި އޭނަގެ ވީޑިއޯ ފެނިފައެވެ. ޒިވް އޭނައާއި އެކީ އޯސިސް ކްލިނިކްގެ ރޫމެއްގައި އެކަހެރި ވެގެން ތިބި މަންޒަރު ވެސް ހިލްޔާއަށް ފެނިފައިވާކަން ހަނދާންވިއެވެ. ހިލްޔާގެ ހިތުގައި އެ ސުވާލުވެސް އުފެދިފައިވާނެތާއެވެ. މިހާރު ވެސް ހިލްޔާ ސުވާލު ނުކޮށް ހުރީ ކުރަން ނުކެރިގެން ކަމެއް އެނގެނީއެއް ވެސް ނޫނެވެ.

ވަރަށް ވިސްނުމަށްފަހު ޒިވްގެ ވާހަކަ ހިލްޔާއާއި ޙިއްސާ ކުރަން ނިންމަމުން ދާނިޝް އިސްތިޚާރާ ނަމާދު ކުރިއެވެ. އެއަށްފަހު އެނދުމަތީގައި އިށީނދެ ފުން ނޭވައެއް ދޫކޮށްލަމުން އަރިމަތީ މޭޒުމަތީގައި އޮތް ފޯނު ނެގިއެވެ. އަދި ވައިބާރއިން ހިލްޔާގެ ނަން ސާޗްކޮށްލަމުން ދެމީހުންގެ ޗެޓް ލޮގް ހުޅުވިއެވެ. ކައިވެނި ކުރަން ނިންމި ފަހުން ވެސް އެ ޗެޓް ލޮގްގައި މާ ގިނަ ވާހަކައެއް ދެކެވިފައެއް ނެތެވެ. ދެމީހުން ހިލްޔާގެ ގެއިން ނުހަނު ގިނައިން ބައްދަލުކޮށް ވާހަކަ ދައްކައި ހަދާތީވެއެވެ. އެންމެ ފަހުން ދެކެވިފައިވީ ދެމީހުންގެ ތެލެސީމިއާ ޓެސްޓް ގެ ވާހަކައެވެ. ކަން ދިމާކުރި ގޮތުން ދެމީހުންނަށް ވެސް ލިބިފައިވީ ހުދު ކާޑެވެ. އެ ވާހަކަ ޙިއްސާކޮށް ދެމީހުން އެކަމާމެދު އުފާ ފާޅުކޮށްފައިވިއެވެ.

އެ މެސެޖުތައް ކިޔުމަށްފަހު ހިނިތުންވުމަށްފަހު ދާނިޝް ނުހަނު އުދަގުލާއިއެކީ މެސެޖެއް ލިޔަން ފެށިއެވެ. މެސެޖު ލިޔަން ފަށާފައި އެތައް ފަހަރަކު ފޮހެމުން ވީހާ ވެސް ރަނގަޅަށް އެ މެސެޖު ލިޔެވޭތޯ ދާނިޝް މަސައްކަތް ކުރިއެވެ.

**

ހިލްޔާ ނިދަން ތައްޔާރުވުމަށްފަހު އޮށޯތީ ހިނިތުންވުމަކާއެކީގައެވެ. މިއީ މިފަހުގެ އަބަދުވެސް އާދައެވެ. ނިދަން އޮށޯތުމަށްފަހު ވެސް އިރުކޮޅެއް ވަންދެން ދާނިޝްގެ ޚިޔާލުތަކުގައި އޮވެވެއެވެ. އަދި ދާނިޝްގެ ރީތި ސިފައެއް ހިތަށް ވެރިވާ ކޮންމެ ފަހަރަކު ﷲ އަށް ޙަމްދު ކުރެވެއެވެ. އަދި ދާނިޝްއަށްޓަކައި ދުޢާ ކުރެވެއެވެ.

އެ ޚިޔާލުތަކުގެ އޮވެފައި ހިލްޔާ ނިދުމަށްޓަކައި ޒިކުރުތައް ކިޔަން އުޅުނު ވަގުތު އަރިމަތީ މޭޒުމަތީގައި އޮތް ފޯނަށް ނޮޓިފިކޭޝަނެއް އައި އަޑު އިވުނެވެ. ޢާއްމު ގޮތެއްގައި ހިލްޔާ އެ ގަޑީގައި ނޮޓިފިކޭޝަނެއް އަޔަސް ނުބަލައެވެ. އެ ގަޑީގައި މީހެއްގެ މެސެޖެއް ޢާއްމު ގޮތެއްގައި ނުވެސް އަންނާނެއެވެ. އެހެނަސް ނޭނގޭ ސަބަބަކާއި ހުރެ އެވަގުތު ފޯނު ނެގުނެވެ. ސްކްރީނުގެ މަތިން ދާނިޝްގެ ނަން ފެނުމާއިއެކު ހިތަށް ވެރިވި ޖޯޝާއި އެކީ ހިލްޔާއަށް އެ ނޮޓިފިކޭޝަނަށް ފިތާލެވުނެވެ. އިސާހިތަކު ފޯނުން ހުޅުވިގެން ދިޔައީ ވައިބާރއެވެ. ވައިބާރ އިން އައިސްފައިވި ދާނިޝް ގެ ދިގު މެސެޖު ފެނިފައި ހިލްޔާއަށް ކިޔެން ފެށިއެވެ.

“ހިލްޔާ….ވަރަށް ވިސްނައިފިން ހިލްޔާ ގާތު މި ވާހަކަ ބުނާނީތޯ ނުވަތަ ނުބުނާނީތޯ. އެންމެ ރަނގަޅުވާނީ ބުނުން ކަމަށް ނިންމުނީމަ ހިއާރ ގޯޒް….އަހަރެން ކުރިން އަންހެން ކުއްޖަކާ ރައްޓެހިވިން. އެކުގައި ފިލްމު ކުޅުނު ކުއްޖެއް އެއީ. ޒިވް. ހީވަނީ ހިލްޔާއަށް އަހަންނާ ޒިވް ގެ ވީޑިއޯ ފެނިފަ ކަންނޭނގެ ހުންނާނީ ފޭސްބުކުން. އަހަރެން މާސްކް ނެގި ވީޑިއޯ. އެދުވަހު ޒިވް އަހަންނާ އެހެން ވާހަކަ ދެއްކީ ޒިވް އާ އަހަންނާ ދެމެދު އެކަހަލަ ގުޅުމެއް އޮތީތީވެއެއް ނޫން. އަހަރެން ޒިވް އާއި ރައްޓެހިވެގެން އުޅުނީ ވެސް އެންމެ މަހެއް ވަންދެން. އެއީ ކައިވެންޏެއް ކުރަން ބޭނުންވާ ކުއްޖެއް ނޫން. އެހެންވެ ބްރޭކް އަޕް ކުރީ. އެ ފަހުން އެހާ ގިނައިން ޒިވް އާ ވާހަކަ ދައްކާ ވެސް ނުއުޅެން. ކްލިނިކުން އެ ދުވަހު އަހަންނާ އެކީގަ އެޑްމިން އޮފީހުން ފެނުނު ކުއްޖަކީ ވެސް އެއީ. އެދުވަހު ވެސް އެއްވެސް ކަމެއް ނުހިނގާ. މި ވާހަކަތައް ހިލްޔާއަށް ކިޔައިދޭން ބޭނުންވީ….އަހަރެންގެ ފަރާތުން ނުއިވި އެހެން މީހެއްގެ ފަރާތުން ހިލްޔާއަށް މި ވާހަކަތައް އިވުމުން މާ ދެރަވެދާނެހެން ހީވީތީ…”

ދާނިޝް ގެ އެ މެސެޖު ކިޔާލެވުނުހެން ހިލްޔާގެ ދެބުމަ ކައިރި ކުރެވިފައިވީ އެ މެސެޖުން ހިތަށްވީ އުދަގުލުންނެވެ. އެ ވީޑިއޯ ފެނުނު ދުވަސް ހިލްޔާ މިފަހުން ދޭތެރެ ދޭތެރެއިން ހަނދާންވަމުން ދިޔައެވެ. އެއީ ދާނިޝް އާއި ކުރިން ރައްޓެހިވެފައިވާނެ ކުއްޖެއް ކަމަށް ކުރިން ވެސް ހީވެފައިވިއެވެ. އެކަން ޤަބޫލުކޮށް އެއީ ދާނިޝް ގެ މާޒީކަމަށް ސިކުނޑީގެ ކަނެއްގައި ނިންމިފައި ވިޔަސް، ދާނިޝް ގެ ދުލުން އެ ބަސްތައް އިވިފައި އަދި އެ ނިންމުމާއި ހަމައަށް ހިތް ގެންނަން ވަގުތުކޮޅެއް ބޭނުންވިއެވެ.

ހިލްޔާ އެ ވާހަކަ ހަޖަމުކުރުމަށްޓަކައި މެސެޖަށް ބަލަން އޮތްވާ ދާނިޝް އަނެއްކާވެސް ޓައިޕް ކުރަން ފެށިތަން ހިލްޔާއަށް ފެނުނެވެ.

**

ހިލްޔާއަށް އޭނަގެ މެސެޖު ފެނިފައިވި މަންޒަރު ފެނިފައި އެނދުގައި އިން ދާނިޝްއަށް ފޯނަށް ބަލަން އިނދެވުނީ ނޭވާ ހިފަހައްޓައިގެންނެވެ. ހިލްޔާގެ ނުރުހުމުގެ މެސެޖަކަށް އަމިއްލަ ނަފްސު ތައްޔާރު ކުރެވެން ފެށިއެވެ. އެހެނަސް މިނެޓްތަކެއް ހިނގިއިރު ވެސް ހިލްޔާ އެއްވެސް އެއްޗެކޭ ނުބުނުމުން ހިތަށް މާ އުދަގޫވިއެވެ. ތަކުރާރުކޮށް އަމިއްލައަށް ލިޔެފައިވާ މެސެޖު ކިޔެން ފެށީ އެ މެސެޖު ހިލްޔާގެ ނަޒަރިއްޔާތުން ފެންނާނެ ގޮތަކާއިމެދު ވިސްނުމަށެވެ. އިސާހިތަކު އޭނަ ޒިވް އާއި އެކީ އަމިއްލައަށް އިސްނަގައިގެން ކޮޓަރިއަކާއި ހަމައަށް ދިޔަ ހަނދާންވެސް އާވިއެވެ. އެއީ ވެސް ހިލްޔާ ގާތު ބުނަން ޖެހޭނެ ވާހަކައެއްތާއޭ ހިތަށްއެރިއެވެ. އޭނަގެ ދުލުން ނުއިވި އެހެން މީހެއްގެ ދުލުން ހިލްޔާއަށް އެ ވާހަކަ އިވިއްޖެނަމަ ހިލްޔާއަށް ވާނެ ގޮތެއް ވެސް ނޭނގެއެވެ. ޒިވް ހަމަ ގައިމުވެސް އެ ވާހަކަ އެތައް ބަޔަކާއި ދައްކާފައިވާނެއެވެ.

ދާނިޝްއަށް އަނެއްކާވެސް ޓައިޕް ކުރެވެން ފެށީ އެ ވާހަކަ ވެސް ހިލްޔާގާތު ބުނުމަށެވެ. އެހެނަސް ވަކި ހިސާބަކަށް ޓައިޕްކޮށްފައި މެސެޖު ވަގުތުން ފޮހެލެވުނީ، އޭނައަށް ހިލްޔާ ނޫން ކުއްޖަކު ރީތި ވި ވާހަކަ ހިލްޔާއަށް އިވުމުން ހިލްޔާ ދެރަވެދާނެކަމަށް ހިތް ބުނުމުންނެވެ. އެހިނދު ހިތަށް ވެރިވި އިޙްސާސުން އެއްގޮތަކަށް ވެސް އެ މެސެޖު ލިޔަން ނުކުޅެދުނެވެ. އެންމެ ފަހުން އެއީ ނުބުންޏަސް މައްސަލައަކަށް ނުވާނެ ވާހަކައެއް ކަމަށް ނިންމާލެވުނެވެ. އެއީ މާޒީއާއިއެކު ވަޅުލެވިފައިވާ ހަނދާނެއް ކަމަށް ނިންމުނެވެ.

**

ދާނިޝް ޓައިޕް ކުރަން ފަށާފައި ހުއްޓާލުމުން ވެސް ހިލްޔާއަށް އިރުކޮޅެއް ވަންދެން ދާނިޝްގެ މެސެޖެއްގެ އިންތިޒާރުގައި އޮވެވުނެވެ. އެހެނަސް އިރުކޮޅެއް ފަހުން ދާނިޝް އޮފްލައިން ވި ކަން އެނގުންވުމުން ހިލްޔާއަށް ފުން ނޭވައެއް ދޫކޮށްލެވުނެވެ. އޭނަ ޖަވާބެއް ނުދިނުމުން ދާނިޝް ގެ ހިތަށް އުދަގޫވީތާއޭ ހިތަށްއެރިއެވެ.

ދާނިޝް ގެ މެސެޖަށް ބަލަން އޮވެފައި ހިލްޔާ އިންޓަނެޓް ބްރައުޒާރ ހުޅުވިއެވެ. އަދި ‘ޒިވް އާއި ޑޭން’ ގެ ވާހަކަތައް ސާޗް ކުރިއެވެ. އެއާއިއެކު އެ ދެމީހުން ރައްޓެހިވެގެން އުޅުނު ދުވަސްވަރު ނޫސްތަކުގައި ލިޔެވިފައިވާ އާރޓިކަލްތައް ފެނުނެވެ. އެ އާރޓިކަލްތަކުން ދާނިޝްއާއި ޒިވް އެކީގައި ތިބި ފޮޓޯތައް ފެނިފައި ހިލްޔާ ޙަސަދަވެރިވީ ވަކި ވަރަކަށެވެ. އެހެނީ އެއްވެސް ފޮޓޯއަކުން ދާނިޝް ޒިވްއާއި އޭނަ ހީކުރި ވަރަށް ގާތްކޮށް ހުރިތަނެއް ނުފެނެއެވެ.

ޙަސަދަވެރިކަމަށްވުރެ ބޮޑަށް ހިލްޔާ ގެ ހިތަށް އިޙްސާސް ކުރެވުނީ، ފިލްމީ ދުނިޔެ ދޫކޮށްގެން ދާނިޝް އެ ވީ ޤުރުބާނީ ގެ ބޮޑުކަމެވެ. ޒިވް އަކީ ހާދަ ރީތި ކުއްޖެކޭ ހިތަށްއެރިއެވެ. އެއީ އޭނައަށްވުރެ ވެސް ބުރު ސޫރަ ރީތި ކުއްޖެއްކަމަށް ހިލްޔާއަށް ހިތާހިތުން ނިންމުނެވެ. ފިލްމީ ދާއިރާއިން ދާނިޝްއާއި ދިމާވި ރީތި ހަމައެކަނި އަންހެން ކުއްޖަކީ އެއީ ކަމަށް ނުވުން ވެސް ގާތެވެ. ދާނިޝް ބޭނުންވި ނަމަ އެ ކުދިންނާއި އެކީ ބޭނުންހާ ގޮތަކަށް އުޅެވުނީހެވެ. އެއިން ކަމަކުން ނިކުމެދާނެ ނޭދެވޭ ނަތީޖާއިން ރެކެވޭނެހާ ބާރާއި ފައިސާ ދާނިޝް ގެ އަތުގައި އެބަހުއްޓެވެ.

އެހެނަސް ދުނިޔޭގެ އެ ލައްޒަތުގެ މައްޗަށް ދާނިޝް ޚިޔާރު ކޮށްފައިވަނީ އާޚިރަތެވެ. މަންމަ ނިޔާވުމުން ދާނިޝް ފިލްމީ ދާއިރާ ދޫކޮށް ތައުބާވި ވާހަކައިން ހިލްޔާއަށް އެނގުންވީ އެކަމެވެ. އާޚިރަތަށް އީމާންނުވާ ނަމަ ދާނިޝް އެފަދަ ބަދަލެއް ޙަޔާތަށް ނުގެނައީސްތާއެވެ. އެހެނަސް ދާނިޝް އެ ވަނީ ފުރިހަމަ ތައުބާއަކުން ތައުބާވެ، ﷲ ގެ މަގަށް ރުޖޫޢަވެފައެވެ. ބާރާއި މުދަލުގެ އިމްތިޙާނަކީ، އެފަދައިން ކޮންމެ ކޮންމެ މީހަކަށް ކާމިޔާބު ކުރެވިދާނެ އިމްތިޙާނެއް ނޫނެވެ.

އެކަން އެނގުންވީ ހިނދު ހިލްޔާގެ ތުންފަތްމައްޗަށް ލުއި ހިނިތުންވުމެއް ވެރިވިއެވެ.

**

އެރޭ 4 ޖެހިއިރު ދަމުނަމާދަށް ފޯނު އެލާމްވުމުން ދާނިޝްއަށް ހޭލެވުނެވެ. އެލާމް ކަނޑާލަމުން ތެދުވެފައި އަނެއްކާވެސް ފޯނު ނެގުނީ، އޭނަ ރޭ ހިލްޔާއަށް ފޮނުވި ‘ނުރައްކާތެރި’ މެސެޖު މަތިން ހަނދާންވެފައެވެ.

ފޯނުން ވައިބާރ ހުޅުވުމާއިއެކު ހިލްޔާ 12 ޖަހަން ގާތްވެފައި ވަނިކޮށް ފޮނުވާފައިވާ މެސެޖު ފެނުނެވެ.

“ތިއީ ދާނިޝް ގެ މާޒީ. އަހަރެންގެ ވެސް މާޒީއެއް އޮތް ގޮތަށް. މާޒީ މަތިން ހަނދާން ނައްތާލާފަ ދެމީހުން މުސްތަޤްބަލެއް ބިނާކުރުން ކިހިނެއްވާނީ؟”

ހިލްޔާގެ އެ ސީދާ ސާދާ މެސެޖުން ދާނިޝް ގެ ހިތަށް ލިބުނު ހަމަޖެހުމާއިއެކު މޫނުމައްޗަށް ފުރިހަމަ ހިނިތުންވުމެއް ވެރިވިއެވެ.

ނުނިމޭ