ނަފްސީ (ތެއްތިރީސްވަނަ ބައި)

“ފްރޮމް ދަ ލުކްސް ޔެސް. އެކަމަކު އުޅުމުގެ ގޮތުން ޔަޤީނެއް ނޫން.”

ފަހަތުން އިވުނު ބީރައްޓެހި، އެހެނަސް ދަންނަ އަޑުން ހިލްޔާގެ މެއަށް ފިނިވީ ހިނދު، ހިނިތުންވުން ފިލައި ދިޔައެވެ. އޭގެ ދެވަނަ ސިކުންތުގައި ފަސްއެނބުރި ބަލާލި ހިނދު، ފެނުނު ސޫރައިން ނޭވާ މެދުކެނޑުނެވެ. އެ ސޫރަ މާސްކަކުން ފޮރުވިފައިވިއެއްކަމަކު ކާކުކަން ވަގުތުން ނަގައިގަނެވުނެވެ.

“ދާނިޝް…”

ހިލްޔާއަށް އެ ނަން ކިޔާލެވުނީ ހިތާހިތުންނެވެ. އެހިނދު އެއްވެގެން ދިޔަ ޖަޒުބާތުތައް އެ ހިތަށްވެރިވިއެވެ. އެ ޖަޒުބާތުތަކުގެ ތެރެއިން ކުރި ހޯދީ ލަދުވެތިކަމެވެ. އޭނައަށް ލައިގެން ހުރެވުނީ ދިގުވެފައި ނިވާކަން ބޮޑު ވިޔަސް، ހަށިގަނޑުގެ ބައްޓަން އެނގޭ ހެދުމެއްކަން އެނގުންވީ އެ ވަގުތެވެ. އޭނައަކީ ހިލޭ ފިރިހެނެއްގެ ކުރިމަތީގައި މިއިން ޒަމާނެއްގައި ވެސް ހަށިގަނޑުގެ ބައްޓަން އެނގޭ ފަދަ ހެދުމެއް ލީ މީހެއް ނޫނެވެ.

އެ ލަދުވެތިކަމުގައި ދާނިޝް ދެންމެ ބުނި އެއްޗަކާއިމެދު ވިސްނާ ނުލެވެނީސް އަނެއްކާވެސް ދާނިޝްގެ އަޑު އިވުނެވެ.

“ބޭރުގަ ކާރު ގަރާޖެއްގެ ކުރިމަތީ ޕާކް ކުރެވިފަ އޮންނާތީ މައްސަލަ ބޮޑުވެގެން އެބަ އުޅޭ. ކާރު އެތަނުން ދުރު ކުރަން އަވަހަށް އާދޭ.” ދާނިޝް އަސަރެއް ނެތް ގޮތަކަށް ބުންޏެވެ.

ދާނިޝް ކުއްލިއަކަށް ބުނެލި ވާހަކައިން ބޭރުގައި އޮތް ކާރު ލޮލަށް ސިފަވުމުން ހިލްޔާގެ ސިކުނޑި ހާސްވިއެވެ. ވަގުތުން އޭނަގެ އަތް ދަބަސް އޮތް ދިމާލަކާއިމެދު ވިސްނާލަމުން އެތާހުރި ލޯގަނޑާއި ދިމާލަށް އެނބުރިލިއެވެ. އަދި ލޯގަނޑު ކައިރީގައި ހަތަރެސްކަނަށް ހުރި ކުޑަ ސްޕޮންޖް ސޯފާއެއްގެ މަތީގައި އޮތް އޭނަގެ އަތް ދަބަސް ނަގަން އަތް ދިއްކުރިއެވެ. ބޮޑު ހެދުން ލައިގެން އެ ޙަރަކާތް ގެނައުން ވެސް ވީ އޭނައަށް އުދަގޫ ކަމަކަށެވެ. މި ހެދުމާއިއެކީ އޭނަ އެއްގޮތަކަށް ވެސް ބޭރަށް ދާން ބޭނުމެއް ނޫނެވެ. އެކަން އެނގުންވުމުން އަތްދަބަހުގައި އޮތް ތަޅުދަނޑި ނަގައި ދާނިޝްއާއި ދިމާލަށް އެނބުރިލެވުނެވެ.

“ދާނިޝް އަހަންނަށް ކާރު ދުރު ކޮށްދެވިދާނެތަ؟ އަހަރެން ޗޭންޖް ކުރަން ޓައިމް ނަގާނެ. އޯ ވެއިޓް…ޔޫ ޑޯންޓް ޑްރައިވް.” ހިލްޔާ ދާނިޝްއާއި ދިމާލަށް ދެ ތިން ފިޔަވަޅު އަޅާލަމުން ކާރުގެ ތަޅުދަނޑި ދިއްކޮށްފައިވެސް އަނބުރާ އަތް ދަމައިގަތެވެ. ދާނިޝް ދުއްވަނީ ހަމައެކަނި ސައިކަލެއް ކަން ހަނދާން ކުރަމުންނެވެ.

“އައި ޑްރައިވް…” ދާނިޝް އެހެން ބުނެލަމުން ކަނާތު އަތް ދިއްކުރިއެވެ. އެ ބުނެލި ބަސްތަކުން ހިލްޔާއަށް ދެބުމަ ކައިރި ކޮށްލަމުން ދާނިޝްއަށް ބަލަން ހުރެފައި، އަތުގައި އޮތް ތަޅުދަނޑި ދާނިޝްގެ އަތަށް ލައިދިނެވެ. އެއާއިއެކު ދާނިޝް ވަގުތުން އަނެއް ފަރާތަށް އެނބުރި، ދިގު ފިޔަވަޅުތަކެއްގައި ގޮސް ހިލްޔާގެ ލޯމައްޗަށް ގެއްލުނެވެ.

**

ހަމްރާ ކައިރީގައި ހުރި ފިހާރައިން ދަރިފުޅަށް ބޭނުންވާ ކިރު ދަޅު ގަނެގެން ނިކުތީ އެލީ އާއި ވެސް އެކީގައެވެ. ދާދި ދެންމެއަކު ބައްޕަ ހަމްރާއަށް ގުޅައި ކާރުގެ ޚަބަރު ދިނުމުން އެމީހުން ހިލްޔާއަށް ޚަބަރު ދޭން އަވަސްއަވަހަށް ނިކުތީއެވެ. ނިކުތުމާއި އެކުހެން އެ މަގުމަތި ހަލަބޮލިވެފައިވި މިންވަރު ދެމީހުންނަށް ވެސް ފާހަގަވިއެވެ. މިހާތަނަށް އައިއިރު ގަރާޖުން ނުނެރެވިގެން އުޅޭ ކާރު ތަކުރާރުކޮށް ބަރުގޮނު ވެސް އަޅަން ފަށާފައިވެއެވެ.

“މައި ގޯޑް ތުއްތާ މޭކްސް ޓްރޮބްލް!” ހަމްރާއާއި އެކީ ޕޭވްމެންޓުން ހިނގަމުން އެލީ ބުންޏެވެ. ދެމީހުން ޑިޒްނީ ފިހާރައާއި ގާތްވަމުން ދިޔަ ވަގުތަކީ މާސްކެއް އަޅައިގެން ހުރި ޒުވާނަކު އެ ފިހާރައިން ނިކުތް ވަގުތެވެ. ދެމީހުން ބަލަބަލާ ތިއްބާ އެ ޒުވާނާ ނިކުމެގެން ގޮސް ސީދާ އެރީ އެމީހުންގެ ކާރަށެވެ.

“އެއީ ކާކު؟! ވަގެއްތަ އަނެއްކާ؟” އެލީ ހާސްކަމާއެކީ އެހިއެވެ.

“ނޯ އެއީ ކްލިނިކްގަ އުޅޭ ކުއްޖެއް ކަންނޭނގެ. ބައްޕަ ބުނި ކްލިނިކްގެ ކުއްޖަކު ވެސް އައިސް ހުރި ވާހަކަ.”

ހަމްރާ އެހެން ބުނި ވަގުތަކީ އެ ކާރު ގެ ކުރިއާއި ފަހަތުގައި ހުރި ސައިކަލުތަކުގައި ވެސް ޖެއްސުމެއްނެތި ލަސްލަހުން އަނބުރަމުން ދިޔަ ވަގުތެވެ. ކާމިޔާބު ކަމާއިއެކީ ކާރު އަނބުރާލުމަށްފަހު ގަރާޖާއި ތަންކޮޅެއް ދުރު ހިސާބެއްގައި ކާރު ޕާކް ކުރެވިގެން ދިޔައެވެ.

“ވޮހް! ހީ އިޒް ސްމޫތް! އައި ލައިކް ހިމް!” އެލީ ޖޯޝާއިއެކީ އެހެން ބުނުމާއިއެކު ހަމްރާ އެލީގެ ބޮލުގެ ފުއްކިބައިގައި ޖެހިއެވެ. އެއާއިއެކު އެލީ ތަދުވެގެން އަޑެއް ލެއްވިއެވެ.

“ނޮޓް ޔުއާރ އޭޖް! އޯލްސޯ މީހަކު ކާރު ޕާކް ކުރާ ގޮތުގެ މައްޗަކަށް ނޫން މުޅި ދިރިއުޅުން ބިނާ ކުރާނީ!” ހަމްރާ ނުރުހުންތެރިކަމާއެކީ ބުންޏެވެ.

“އައި ނޯ އޭ ދޮންތާ. ޖަސްޓް ޖޯކިންގް.” އެލީ ތުން އޫކޮށްލަމުން ބޮލުގައި ފިރުމަމުން ބުނެލިއެވެ.

“ފުރަތަމަ ޖަސްޓް ޖޯކިންގް އޭ. ދެން ފެންނާނީ ބައްޕައާ ފައިޓް ކުރާތަން. މެން އާރ ނޮޓް އިވެން ވޯތް އިޓް. ފިރިހެނަކާއިމެދު އެއްފަހަރު ވެސް ނުވިސްނާ އުޅެން ދަސްކޮށްބަލަ. ދިރިއުޅުން ފަސޭހަވެގެން ދާ ގޮތް ބަލަން.” ހަމްރާ އެލީއަށް ވުރެ ކުރިއަށް އަރައިގެން ގޮސް ހިލްޔާ ހޯދުމަށްޓަކައި ހެދުން ފިހާރައަށް ވަންނަމުން ކުދި ކިޔުނެވެ. އެލީ ދެންވެސް ތުން އޫކޮށްގެން ހުއްޓެއްކަމަކު ދޮންތަގެ ފަހަތުން ގޮސް ފިހާރައަށް ވަންއިރު ދޮންތަގެ ވާހަކަތަކާއި ކޮންމެވެސް ވަރަކަށް އެއްބަސް ވެވުނެވެ.

**

ޗޭންޖިންގް ރޫމުގައި ހުރި ހިލްޔާ އޭނަގެ ގަދަ މުށިކުލައިގެ އަބާޔާ ލިއެވެ. އެއަށްފަހު ލޯގަނޑުން ބަލަން ހުރެ ބޮލުގައި އޮތް ހެޑްކެޕްގެ މަތިން ގަދަ މުށިކުލައިގެ ޝޯލްއެއް އެޅުމަށް، ބޯމަތީގައި ޝޯލް ބޭއްވިއެވެ. ޝޯލް އެޅުމަށްޓަކައި ޕިންތައް ނަގަން އުޅެފައިވެސް ހިތަށް އުދަގޫ ކުރަމުން ދިޔަ ޚިޔާލުތަކެއްގެ ސަބަބުން، އެތާހުރި ކުޑަ ސްޓޭންޑެއްގެ މަތީގައި ބޭއްވިފައި އޮތް އޭނަގެ ފޯނު ނެގުނެވެ. އަދި އަވަސްއަވަހަށް ޓެލެގްރާމް ހުޅުވާލަމުން އޭނަ ރާފިލްއަށް ފޮނުވާފައި ހުރި ފޮޓޯތަކަށް ބަލާލިއެވެ.

ރާފިލްއަށް އޭރުވެސް އެ ފޮޓޯތައް ފެނިފައި ނުވުމުން ހިތަށް ލިބުނު އުފަލާއިއެކީ، ހިލްޔާ އަވަސްއަވަހަށް އެ ފޮޓޯތައް ޑިލީޓް ކުރިއެވެ. ޑިލީޓް ކުރިކަމުގެ ލިސާނެއް ވެސް ނެތި، ޗެޓް ލޮގުން ފޮޓޯތައް ގެއްލިގެން ދިޔުމުން ހިލްޔާއަށް ހަމަޖެހުމެއް ލިބުނެވެ.

ޙަޤީޤަތުގައި ދެންމެ އެ ފިހާރައިގެ ހުރެ ފުރަތަމަ އެ ހެދުންތައް ލީއިރު، ހިލްޔާއަށް ޖެހިލުންކަމެއް އިޙްސާސް ކުރެވުނެވެ. އެހެނަސް އެ ޖެހިލުންވުމުން އަރައިގަނެވުނީ ރާފިލްގެ ބަސްތައް ހަނދާން ކުރަމުންނެވެ. އޭނަ ކޮންމެ ކަމަކަށް ވެސް ‘ކެރެން’ ޖެހޭނެ ކަމަށް ހަނދާން ކުރަމުންނެވެ. އަދި އަމުދުން ހެދުން ލައިގެން ޗޭންޖިންގް ރޫމުން ނިކުމެ، މާ ބޮޑަށް ޖެހިލުންނުވީ، ކޮންމެ ލޯގަނޑެއްގެ ދެ ފަރާތުން ބޮޑެތި ހެދުން ހަރުގަނޑުތައް ހުރުމުން ފުދޭވަރަކަށް ނިވާކަން ލިބުނީތީވެއެވެ. އަދި ދުވަހުގެ އެ ވަގުތު އެ ފިހާރައިގައި އެހާ މީހުން ގިނަ ނުވީ ތާނގައި އެންމެ ފިރިހެނަކު ނޫނީ ފެނިފައިވެސް ނުވުމުންނެވެ. އެ ހުރިހާ ކަމެއްގެ މައްޗަށް ރާފިލްއަށް ފޮޓޯ ފޮނުވުނީ ރާފިލްއަކީ އޭނަ އިންނަން އުޅޭ ޒުވާނާކަމަށް އަމިއްލަ ނަފްސު ގާތު ބުނަމުންނެވެ.

އެހެނަސް ކީއްވެކަމެއް ނޭނގެއެވެ. ދާނިޝް ފެނުމާއިއެކު އެ ހުރިހާ ޢުޒުރެއް ވިއްސިވިހާލިވެގެން ދިޔައެވެ. ދާނިޝްގެ ކުރިމަތީގައި އޭނައަށް ލަދުވެތިކަން އިޙްސާސް ކުރެވުނެވެ. ދާނިޝްގެ މަޤާމުގައި ރާފިލް ހުރިނަމަ އޭނައަށް އެ އިޙްސާސް ނުކުރެވުނީސްކަން ޔަޤީނެވެ. ރާފިލްއާއި ޚިލާފަށް ދާނިޝް އޭނަ ޖެހިލުން ކުރުވައެވެ. ބަހެއް ބުނުމެއް ވެސް ނެތި ކަންތައް ކުރަންޖެހެނީ ކިހިނެއް ކަން އޭނައަށް އަންގައިދޭ ފަދައެވެ.

އެހެން އެ ވަނީ، ދާނިޝްއަކީ އަޚްލާޤް ރަނގަޅު މީހަކަށް ވުމުންކަން ހިލްޔާއަށް ނުވިސްނެއެވެ. ދާނިޝްގެ އެ ބެލުން ތިރި ކުރުމާއި، އޭނައާއި ވާހަކަ ދެއްކުމުގައި ގެންގުޅޭ އިޙްތިރާމްގެ ސަބަބުން، ދާނިޝްގެ ހާޒިރީގައި ހިލްޔާއަށް އަމިއްލަ ނަފްސަށް ޤަދަރު ކުރެވެނީކަން ހިލްޔާއަށް ފަހުމެއް ނުވިއެވެ.

އެ ވަގުތު ދާނިޝްއާއި މެދު ވެސް ވިސްނެން ފެށީ ރާފިލްގެ ނަޒަރިއްޔާތުންނެވެ. ރާފިލްގެ އަޑުން ވެސްމެއެވެ. ދާނިޝް ގެ ކުރިމަތީގައި އޭނަ ޖެހިލުންވުމުން އެނގެނީ ދާނިޝް ގެ ގޯސްކަމޭ ހިތަށްއެރިއެވެ. އަދި އަމުދުން ދާނިޝް އޭނަ ކުރި ސުވާލަށް އެ ބުނީ ކީކޭ ހެއްޔެވެ؟ ސޫރައިގެ ގޮތުން ރީއްޗޭ ބުނީ ހިތުން އޭނަގެ ހިތް އަތުލަން ހެއްޔެވެ؟ އޭނައާއި ‘ފްލާޓް’ ކުރަން ހެއްޔެވެ؟ އަދި އުޅުމުގެ ގޮތުން ޔަޤީނެއް ނޫނޭ ބުނެލީ ދާނިޝްއަށް އޭނަ ނުލިބުނީތީ އޭނަ ދެރަކޮށްލަން ހެއްޔެވެ؟

އަމިއްލަ އަމިއްލައަށް ނިންމުނު ނިންމުންތަކާ އެކީ ހިލްޔާގެ ހިތުގައި ދާނިޝްއަށްޓަކައި ރުޅިވެރިކަމެއް އުފެދުނެވެ. އެ ރުޅިވެރިކަމާއިއެކީ އަވަސްއަވަހަށް ޝޯލް އެޅެން ފެށިއެވެ.

ދެން ފާއިތުވާން ފެށި ދުވަސްތަކަކީ ހިލްޔާ ޔޫކޭއަށް ދާން ތައްޔާރުވާން ފެށި ދުވަސްތަކެވެ. އެއް މަސް ތެރޭގައި ފުރަންޖެހޭތީ ހިލްޔާ އެކަމަށްޓަކައި ވެސް ކުރަންޖެހޭ ވަރަށްވުރެ ގިނައިން ބާޒާރު ކުރިއެވެ. ޚުދު ރާފިލް ގެ ވެސް ހުންނަނީ އެކަހަލަ އުޅުމަކަށްވާތީވެއެވެ.

އެ މަސް ތެރޭގައި ހިލްޔާ އެތައް ފަހަރަކު ބުނުމުން ދެ ފަހަރު މަތިން ރާފިލް ބައްޕައާއި ބައްދަލު ކުރަން އައުމުން ހިލްޔާއަށް އުފަލެއް ލިބުނެވެ. އަދި އަމުދުން އޭގެއިން ދެވަނަ ބައްދަލުވުމުގައި ރާފިލް ފުރުމުގެ ކުރިން ހިލްޔާއާއި ‘އެންގޭޖް’ ވެ، އެންގޭޖްމެންޓް ޕާޓީއެއް ބާއްވަން ބޭނުންވާ ވާހަކަ ރާފިލް ބުނުމުން އެ އުފާވެރިކަން ދެގުނަވިއެވެ.

“ތިބުނީ، ރަން ކިޔާ ވާހަކަތަ؟” އެރޭގެ އެ ބައްދަލުވުމުގެ ތެރެއިން، ސިޓިންގް ރޫމުގެ ސޯފާގައި ތިބެ، ބައްޕަ ސުވާލުކުރިއެވެ.

“ނޫނޭ ހަމަ އެންގޭޖްމެންޓް. ދެމީހުން އަނގޮޓި ބަދަލު ކުރާ ޕާޓީއެއް. ޕާޓީ ބާއްވާއިރު މީޑިއާއަށް ވެސް އިންވައިޓް ކުރަން މި ވިސްނަނީ. ޑޭޑް ވެސް އެބަ ބުނޭ މި ވާހަކަ ޕަބްލިކް ކުރަން.” ރާފިލް އޭނަގެ އެއްފައި، އަނެއްފައިގެ ކަކޫ މަތީގައި ބާއްވައިގެން ނުހަނު ބޮޑާ ގޮތަކަށް އިނދެ ބުންޏެވެ. އެހެނަސް ހިލްޔާއަށް އެ ބޮޑާ ކަމެއް ނުފެނެއެވެ. ރާފިލް އެ ބުނަމުން ދިޔަ ކޮންމެ ވާހަކައަކާއެކީ އެ ހިތަށް ޖޯޝެއް ވެރިވަމުން ދިޔައެވެ. އޭނަގެ ރީތި ލޯބީގެ ވާހަކަ ހަމައެކަނި އޭނަގެ ސޯޝަލް މީޑިއާގެ ބަދަލުގައި، ރާފިލް މުޅި ދުނިޔެއަށް ދައްކަން އުޅޭތީވެއެވެ.

“އެކަމަކު، ތިއީ ޢާއްމުކޮށް ދިވެހިން ކޮށްއުޅޭ ކަމެއް ވެސް ނޫންދޯ؟” ނަހީދު އެހެން ބުނުމާއިއެކު ހިލްޔާ ވާހަކަ ދެއްކިއެވެ.

“ނޯ ބައްޕާ. ޓްރެންޑް ނުވިޔަސް މިއީ ހަމަ މަދުމަދުން ދިވެހިން ވެސް ކޮށް އުޅޭތީ ފެންނަ ކަމެއް. ދިވެހިން ކުރިޔަސް ނުކުރިޔަސް އަހަރެން އަބަދުވެސް އުއްމީދުކުރިން އެންގޭޖްމެންޓް ޕާޓީއަކަށް.” ހިލްޔާ ރާފިލް އެދޭހާ ގޮތަކަށް އޭނަގެ އުއްމީދުތައް ބަދަލު ކުރަމުން ބުންޏެވެ.

“އެކަމަކު….މީޑިއާގަ މިހާ ޒާތީ ވާހަކައެއް ޖެހުން ރަނގަޅުތަ؟ އޭގަ ހިލްޔާގެ ފޮޓޯ ވެސް ދައުރުވާނެތަ؟ މި ކަންކަމާއިމެދު ހިލްޔާ ރުހޭތަ؟” އެ ސުވާލުތައް ކޮށްލީ، ވަކިން ހުރި ސޯފާއެއްގައި އިން ހާފިޒާއެވެ. އެއަށްވެސް ރައްދު ދިނީ ހިލްޔާއެވެ.

“އޮފްކޯސް މާމާ. އެއީ ކޮންމެހެން މައްސަލައެއް ނޫނެއްނު؟ ހަމަ އަބާޔާ ލައިގެންނޭ ހުންނާނީ ފޮޓޯގަ.” ހިލްޔާ ބުންޏެވެ.

ހާފިޒާއަށް އެ ވާހަކައާއިމެދު އެއްވެސް އެއްޗެކޭ ނުބުނެވުނެއްކަމަކު އެ މޫނުމަތިން ހަމަނުޖެހުން ފާޅުވިއެވެ. ނަހީދަށް ވެސް ވީ އެކަހަލަ ގޮތެކެވެ. އެހެނަސް ހިލްޔާގެ ގޮތް ދަސްވެފައިވީތީ ދެމީހުން ވެސް އެއްވެސް އެއްޗެކޭ ނުބުނީ، ހިތަށް އުދަގޫވެފައިވާ ޙާލުގައެވެ.

ހިލްޔާއާއި ހިލްޔާގެ ޢާއިލާއަށް ވެސް ނޭނގުނު ޙަޤީޤަތަކީ، ރާފިލް އެންގޭޖްމެންޓް ޕާޓީއެއް ބާއްވަން ބޭނުންވި ސަބަބެވެ. އަދި އެ ޕާޓީގެ ވާހަކަ މީޑީއާގައި ޖަހަން ބޭނުންވާ ސަބަބެވެ.

ޙަޤީޤަތަކީ މީގެ ހަފްތާތަކެއް ކުރިން ރާފިލްއާއި އޭނަގެ ބައްޕައާއި ދެމެދު ކޯޅުންތައް ފެށިފައިވީކަމެވެ. ރާފިލް ހިލްޔާއާއި ކައިވެނި ކުރުން ލަސްކުރަމުން ދާތީވެއެވެ. މިހާތަނަށް އައިއިރު އޭނައަށް ހިލްޔާއާއެކީ ކައިވެންޏަކާއި ހަމައަށް ދެވޭނެކަން ރާފިލްއަށް ސާފުކޮށް އެނގެއެވެ. އެހެނަސް އޭނަ ދެންވެސް ކައިވެންޏެއް ކުރާކަށް ބޭނުމެއް ނޫނެވެ. ކައިވެނިން ބޭރުގައި އަންހެން ކުދިންނާއި ގުޅުން ހިންގުމަކީ އޭނައަށް މާ މަޖާ ކަމަކަށް ވާތީވެއެވެ. އަދި އަންހެން ކުއްޖަކާއި ކައިވެނިން ގުޅިގެން އެ ކުއްޖަކަށް އަންބެއްގެ މަޤާމު ދީފިނަމަ، އަންހެން ކުއްޖަކު މާ ޤަދަރުވެރި ކުރެވެނީކަމަށް ރާފިލްއަށް ޤަބޫލު ކުރެވެއެވެ. އެއީ އޭނަ ކުރާ ހިތްވާ ކަމެއް ނޫނެވެ.

ރާފިލް ގެ ބައްޕަ ތަކުރާރުކޮށް ބުނުމުން ވެސް ކައިވެނި ނުކުރެވިގެން އުޅެނީ އެހެންވެއެވެ. އެންމެ ފަހުން ބައްޕަ ބިރު ދައްކަން ފެށުމުން އެންގޭޖްމެންޓެއްގެ ޚިޔާލު ރާފިލް ދިނީއެވެ. ކޮންމެ ގޮތެއްވިޔަސް ބޭނުމަކީ ރާފިލް މީހަކާއި އިންނަން އުޅޭކަން ޢާއްމުންނަށް އެންގުން ކަމަށްވުމުން، ބައްޕަ އެ ޚިޔާލާއި އެއްބަސްވިއެވެ. އެއިން ރާފިލްއަށް ވަގުތީ ހަމަޖެހުމެއް ލިބުނެވެ.

ރާފިލް އާއި ހިލްޔާގެ ‘އެންގޭޖްމެންޓް’ ޕާޓީ ބޭއްވިގެން ދިޔައީ މާލެއާއި ކައިރި ރިސޯޓެއްގައެވެ. އެ ޙަފްލާއަށް 100 އަށްވުރެ ގިނަ މީހުން ހާޒިރުވިއެވެ. އޭގެ ތެރެއިން ގިނަ މީހުންނަކީ ހިލްޔާ ނުވެސް ދަންނަ މީހުންނެވެ. ގިނައީ ރާފިލްގެ ބައްޕައާއިއެކީ ވިޔަފާރި ކުރާ މީހުންނާއި އެ ވިޔަފާރިތަކުގައި މަސައްކަތް ކުރާ މުވައްޒަފުންނެވެ. ރާއްޖޭގެ ދެ ޗެނަލެއްގެ މީޑިއާއިން ވެސް ޕާޓީއަށް ޒިޔާރަތް ކުރިއެވެ.

ކިތަންމެ ނޫންކަމަށް ހެދުނަސް އެ ހުރިހާ ކަމަކާއިމެދު ހިލްޔާ ނުތަނަވަސްވިއެވެ. ރާފިލް އާއި އޭނަގެ ގުޅުމުގެ ވާހަކަ އެންމެންނަށް އަންގަން އޭނަ ބޭނުންވި ކަމަށް އޭނަ ހީކުރިއެވެ. އެހެނަސް އެރޭ އެކަމާއިމެދު ޝައްކު އުފެދުނެވެ. އެ ޕާޓީއަކީ ދެމީހުންގެ ކައިވެނި ޕާޓީއަށް ނުވީތީ ކަންނޭނގެއެވެ. ރާފިލްއަކީ އޭނަގެ މީހަކަށް ވެދާނެކަމުގެ ޔަޤީންކަން އޭނައަށް ނުލިބޭތީ ކަންނޭނގެއެވެ. ކަން މިހެން އޮތްއިރު އޭނައާއި ރާފިލްގެ ނަން ގުޅުވައިގެން މީހުން ވާހަކަ ދައްކަން ހިލްޔާގެ ހިތް ނޭދުނެވެ. އެހެނަސް މި ހުރިހާ ވާހަކައެއް ހިލްޔާ ބޭއްވީ އަމިއްލަ ހިތު ތެރޭގައެވެ. އަދި ރާފިލްއާއި އޭނަގެ ގުޅުން އިތުރަށް ބަދަހިވާނެކަމަށް ހިތާހިތުން ކިޔަމުންނެވެ.

އޭގެ އަނެއްދުވަހު ނޫސްތަކުގައި އެންމެ ހޫނު ޚަބަރަކަށް ވެގެން ދިޔައީ މަޝްހޫރު ވިޔަފާރިވެރިޔާ ނަސީމްގެ ފިރިހެން ދަރިފުޅު ރާފިލްއާއި ވިޔަފާރިވެރިޔާ ނަހީދު ގެ އަންހެން ދަރިފުޅު ހިލްޔާ ގެ ‘އެންގޭޖްމެންޓް’ ޕާޓީގެ ވާހަކައެވެ. އެހާ ހަލުވިކޮށް މުޅި ރާއްޖެއަށް އެ ޚަބަރު ފެތުރިގެން ދިޔުމުން ހިލްޔާގެ ހިތަށް ފުރަތަމަ ވީ އުދަގުލެވެ. ސޯޝަލް މީޑިއާގައި މީހުން ތިއީ ހުޅަނގު މީހުންގެ ގޮތް ނޫންތޯ ބުނެ މަލާމާތުގެ ބަސްތައް ރައްދު ކޮށްފައިވުމުން ހިލްޔާ ލަދުވެސް ގަތެވެ. އެ ހުރިހާ އިޙްސާސަކުން އަރައިގަނެވުނީ އެ ކަންތަކާއިމެދު ރާފިލްއާއި ވާހަކަ ދެއްކުމުންނެވެ. މީހުން އެ ޒާތުގެ ވާހަކަ ދައްކަނީ ހިލްޔާއާއި ރާފިލްއަށް ޙަސަދަވެރިވެގެން ކަމަށް ރާފިލް ބުންޏެވެ. އަދި މުޅި ރާއްޖެއަށް މި ވާހަކަ ފެތުރުމުން ހިލްޔާ ފަޚުރުވެރިވާންވީ ކަމަށް ރާފިލް ބުންޏެވެ.

“ނައު ދަ ހޯލް މޯލްޑިވްސް ނޯސް އައިމް ޔުއާރސް.”

އެރޭ ކުރި ކޯލުގައި ރާފިލް ބުނި އެ ބަސްތަކަށް ހީލެވުމާއިއެކު ހިލްޔާ މުޅިން ރާފިލްގެ އަވައިގައި ޖެހުނެވެ. ހަމަ ޙަޤީޤަތުގައި ވެސް މި ވީ ރަނގަޅަށޭ ހިތަށްއެރިއެވެ. އަދި ކައިވެނި ނުކުރެވުނަސް ދެން އޭނަ ނޫން އަންހެން ކުއްޖަކަށް ރާފިލް ގެ ޙަޔާތުން ޖާގައެއް ނުލިބޭނެއޭ ހިތަށްއެރިއެވެ.

ހިލްޔާގެ އެންގޭޖްމެންޓުގެ ޚަބަރު ދާނިޝްއަށް ވެސް އޮންލައިން ނޫހަކުން ފެނުނެވެ. ނަހީދުބެ ގެ ފަރާތުން ކުރިން ވެސް އެ ޚަބަރު ލިބިފައިވިއެއްކަމަކު، ނޫހުން ރާފިލްއާއި ހިލްޔާގެ ފޮޓޯތައް ފެނުމުން ހިތަށް އުދަގޫވީ އެހެން ދަރަޖައަކަށެވެ. ކިތަންމެ ބޭނުމެއް ނުވިޔަސް ޗުއްޓީ ވި މުޅި އެ ދުވަސް ހޭދަ ކޮށްލެވުނީ ދޭތެރެ ދޭތެރެއިން އެ ފޮޓޯތައް ބަލައި އަމިއްލަ ހިތް ދަތި ކުރުވުމުގައެވެ. ހިލްޔާއާއި ރާފިލްގެ ގުޅުމާއިމެދު ވިސްނުމުގައެވެ. މި މީހުންގެ ‘އެންގޭޖްމެންޓް’ މިހާ ފުރިހަމަ ވެއްޖެނަމަ އަދި ކައިވެނި ޕާޓީ ކިހާ ވަރެއް ވާނެތޯ ހިތަށްއެރިއެވެ. ކައިވެންޏަށް އެހާ ވަރަށް ޚަރަދުކޮށް، ކައިވެނީގެ ވާހަކަ މިހާ ބޮޑަށް ހާމަ ކުރުމަކީ ހިލްޔާ ރުހޭ ކަމެއްތޯ ދާނިޝްއަށް ތަކުރާރުކޮށް އަމިއްލަ ޒަމީރާއި ސުވާލު ކުރެވުނެވެ.

ކޮންމެ ގޮތެއްވިޔަސް އެރޭ ވެސް ދާނިޝް ވާގި ހޯދީ ކެތްތެރިކަމުންނާއި ނަމާދުންނެވެ. ނަމާދު ތެރެއިން ﷲ އާއި އޭނަގެ ހުރިހާ އިޙްސާސެއް ޙިއްސާކޮށް، ހިތްހަމަޖައްސާލިއެވެ. ދެންވެސް ހިލްޔާ ދުވަހުން ދުވަހަށް އޭނައާއި ދުރުވެ، ވަކިވަމުން ދާކަމުގެ ހިތާމަ، ހިތުގެ ކަނެއްގައި ލަސްލަހުން ބޮޑުވަމުން ދިޔަ ކަމުގައި ވިޔަސްމެއެވެ.

ޕާޓީ ބޭއްވުނުތާ 3 ދުވަސްފަހުން ހިލްޔާ ޕެކް ކުރުމުގައި މަޝްޣޫލުވިއެވެ. އޭގެ އަނެއްދުވަހު ފުރަން ޖެހޭތީވެއެވެ. ޕެކް ކުރުމުގައި ހިލްޔާ އެހެން އެއްވެސް ކަމަކަށްވުރެ ބޮޑަށް ސަމާލުކަން ދިނީ އޭނަގެ އެންމެ ރީތި ހެދުންތައް ޕެކް ކުރުމަށެވެ. ޕެކް ކުރުމުގެ ތެރެއިން ހިލްޔާއަށް އޭނަގެ ކޮޓަރީގައި ހުރި ކުޑަ ފޮތް ހަރުގަނޑު ފާހަގަވިއެވެ. އެ ހަރުގަނޑުގައި ހުރި ދީނީ ފޮތްތަކާއި، ދުޢާ ފޮތްތަކާއި، ހަރުގަނޑުގެ މަތީގައި ބެހެއްޓިފައިހުރި ފޮތް ގޮނޑީގައި އޮތް އޭނަގެ ނޫކުލައިގެ މުޞްޙަފް ވެސް ފެނުނެވެ. އެ އެއްޗެހި ފޮށްޓަށް އަޅަންވީތޯ ހިތަށްއެރިއެވެ.

އެ ސުވާލު ހިތަށް ވެރިވުމުން ހިލްޔާގެ ހަނދާނަށް އައީ އޭނަ މެލޭޝިޔާއަށް ފުރަން އުޅުނު ދުވަސްކޮޅު އޭނަ އެ ހުރިހާ އެއްޗެއް ފޮށްޓަށް އަޅައިގެން ދިޔަ ގޮތެވެ. ބޭރަށް ކިޔަވަން ގޮސް އުޅެމުން އެ ފޮތްތައް ކިޔައި، މުޞްޙަފުން ޤުރުއާން ވެސް ކިޔަވަން ހިތުލައިގެންނެވެ. އެހެނަސް ކިޔަވަން ދިޔުމަށްފަހު ހިލްޔާއަށް އެ ފޮތްތަކަށް ސަމާލުކަމެއް ނުދެވެއެވެ. ދިމާވި އެކުވެރިންގެ ސަބަބުން މުޞްޙަފުން ގިނައިން ޤުރުއާން ކިޔެވުނު ދުވަސްކޮޅެއް ދިޔަޔަސް، މެލޭޝިޔާގައި ހޭދަކުރި ފަސް އަހަރުގައި ނިސްބަތުން މުޞްޙަފްގައި އަތްލެވުނީ މަދުންނެވެ. ދީނީ ފޮތެއްގައި އަތްޖެހުނީ ދެ ތިން ފަހަރަކުއެވެ.

އެ ހަނދާން އާވުމުން ހިލްޔާ އެ ފޮތްތަކާއި މުޞްޙަފް ނުގެންދަން ނިންމިއެވެ. އެހެންނޫނަސް ޔޫޓިއުބުން ދީނީ ޢިލްމު އުނގެނި، ފޯނުން ޤުރުއާން ކިޔެވިދާނެ ކަމަށް ހިތާހިތުން ކިޔަމުންނެވެ. ‘ބޭކާރު’ ގޮތުގައި ފޮށި ބަރު ކުރާނެ ކަމެއްނެތޭ ހިތަށްއެރިއެވެ.

އާނއެކެވެ. ދަތުރު ކުރުމުގައި މުޞްޙަފެއް ނުގެންދިޔުމުގައި މައްސަލައެއް ނެތެވެ. މައްސަލައަކީ ހިލްޔާގެ ވިސްނުމުގައި މުހިއްމުކަން ދެވިފައިވި ކަންތަކެވެ. މުޞްޙަފް ފޮށްޓަށް އެޅުމުން ބަރުވެދާނެހެން ހީވިޔަސް އޭނަ ގަނެފައި ހުރި 5 ވައްތަރެއްގެ ބޫޓު އެޅުން އެއީ އެއްވެސް ކަމަކަށް ނުވިއެވެ. ރީތިވާ ސާމާނު ވެސް ވަކި ކުޑަ ދަބަހަކަށް އަޅައި ބަރުވެދާނެއޭ ހިތަށްއެރިޔަސް، އެއީ މުހިއްމު އެއްޗެހި ކަމަށް ހިތް ބުނުމުން ވަގުތުން އެ ސާމާނު އެޅުނެވެ. އާޚިރަތް ދޫކޮށް ދުނިޔެ ހޯދަން ހިލްޔާ ތައްޔާރުވަމުން ދިޔަ ފަދައެވެ.

ކޮންމެ ގޮތެއްވިޔަސް މުޞްޙަފް ފޮށްޓަށް ނާޅަން ނިންމި ފަހުން ހިލްޔާއަށް ކޮޓަރިއަށް ވަންނަ ކޮންމެ ފަހަރަކު މުޞްޙަފް ފާހަގަވަނީ މާ ބޮޑަށެވެ. އޭނަ އެންމެ ފަހުން ހަމަޖެހިގެން އިށީނދެ އިނދެ މުޞްހަފުން ޤުރުއާން ކިޔެވި ހަނދާނެއް ހިލްޔާގެ ނެތެވެ. ފަރުޟު ނަމާދުތަކުގައި ކުރު ސޫރަތެއް ކިޔެވޭހާ ކަމެވެ. މުޞްޙަފް ފެންނަ ކޮންމެ ފަހަރަކު ޤުރުއާނާއި ދުރުވެފައިވި މިންވަރު ހިލްޔާއަށް އެނގުންވުމުން ހިތް ދެރަވަމުން ދިޔައެވެ. އޭނައަށް ހެޔޮ އެދޭ ނުހަނު ގާތް އެކުވެރިޔަކާއި ދުރުވަމުން ދިޔަ ކަހަލަ އިޙްސާސެއް ކުރެވުނެވެ. އެހެނަސް އެ އެކުވެރިޔާއާއި ގުޅުން ރުޖޫޢަ ނުކުރެވޭ ހިސާބަށް ގޮއްސިހެން ހިލްޔާއަށް ހީވަމުން ދިޔައެވެ. ފަހުގެ ނިންމުމަކަށް މުޞްޙަފް ބާއްވާފައި ފުރަން ނިންމުނީ އެހެންވެއެވެ.

ހިލްޔާގެ ފުރުން އޮތީ އެރޭ 11 އިންނެވެ. އެހެންކަމުން 8 ޖަހަން ގާތްވަމުން ދިޔަ ވަގުތު ނަހީދު ހިލްޔާ ގޮވައިގެން އެއާރޕޯޓަށްދާން ނެއްޓިއެވެ. ކާރުގައި ހަމްރާވެސް ރޯގާޖެހި ބަލިވެ އުޅުނަސް ދަރިފުޅު ގޮވައިގެން އައިއިރު، އެލީ އާއި ހާފިޒާ ވެސް ތިއްބެވެ.

ކާރު ތެރެއިން އެކިއެކި ވާހަކަތައް ދެކެވުނެވެ. އެ ވާހަކަތަކުގެ ތެރެއިން ނަހީދު މިފަހުން އައިސް ތަކުރާރުކޮށް ކުރާ ސުވާލު އަނެއްކާވެސް ހިލްޔާއާއި ކުރިމަތިވިއެވެ.

“ރާފިލްއާއި ވަކިންދޯ ހިލްޔާ އެކޮޅަށް ގޮއްސަ އުޅެނީ.” ނަހީދަށް އެހެން އަހާލެވުނީ ކިތައް ވަނަ ފަހަރު ކަމެއް ޚުދު ނަހީދަށް ވެސް ނޭނގެއެވެ.

“ޔެސް ބައްޕާ. އެއް ބިލްޑިންގްއެއްގަ އުޅެނީ. އެކަމަކު ވަކި އެޕާޓްމެންޓްސް ގަ އަހަރުމެން އުޅެނީ. ރާފިލް 8 ވަނަ ފްލޯ. އަހަރެން 6 ވަނަ ފްލޯ. ރާފިލް ވެސް ރުހޭ ކަމެއް ނޫނޭ ކައިވެނީގެ ކުރިން އެއްކޮށް އުޅުމަކީ.” ހިލްޔާ ބައްޕައަށް ޔަޤީންކަން ދިނުމުގެ ގޮތުން ބުންޏެވެ. އެހެނަސް އެ ފަހު ޖުމްލަ ބުނެލީ ޔަޤީންކަމެއް ނެތިއެވެ. ރާފިލް މިހާރު ވެސް ސަމާސާ ވެރި ގޮތެއްގައި އެކަކު އަނެކެއްގެ ކޮޓަރިއަށް ވަންނަ ވާހަކަ ދައްކައެވެ. އެކަމާއިމެދު ހިލްޔާ ހިތް ނުތަނަވަސް ވިޔަސް ރާފިލްއާއި އެ ވާހަކަ ޙިއްސާއެއް ނުކުރެއެވެ. ރާފިލްއާއި ޙިއްސާ ކޮށްފިނަމަ ދެމީހުންގެ ދެމެދުގައި މައްސަލަ ޖެހި، އޭނަގެ ފުރިހަމަ ލޯބީގެ ވާހަކައިގެ ޚިޔާލީ ފޮލާ ވިއްސިވިހާލި ވެދާނެތީވެއެވެ.

އެއާރޕޯޓުގެ އިންޓަނޭޝަލަން ޓާމިނަލާއި ހަމައަށް ގޮސް ކާރު ޕާކްކޮށްލި ވަގުތަކީ ރާފިލްގެ ކާރު ވެސް އެމީހުންގެ ކާރުގެ ކުރިއަށް އަރައިގެން ދިޔަ މަންޒަރު ފެނުނު ވަގުތެވެ.

“އެއީ ރާފިލްގެ ކާރުދޯ؟” ނަހީދު ލޯ ދިއްކޮށްފައި އެ ދިމާލަށް ބަލަމުން އެހިއެވެ.

“އާނ….ހަމަ ޓައިމްއަށް އެ އައީ.” ހިލްޔާ ލުއި ހިނިތުންވުމަކާއިއެކީ ބުންޏެވެ.

“ހިލްޔާ….ބައްޕަ އެބަ އަންނަން އިނގޭ. އިރުކޮޅަކަށް ރާފިލްއާއި ވަކިން ވާހަކަ ދައްކާލަން ބޭނުން. ހިލްޔާއަށް ފޮށިތައް ނެގޭނެދޯ؟” ނަހީދު އަވަސްއަވަހަށް ބެލްޓު ނައްޓާލަމުން އަވަސްވެގަތެވެ. މިފަހުން އައިސް ސިކުނޑި ހާސްވެ ފިކުރު ބޮޑުވެފައި ހުންނަވަރުން ރަނގަޅަށް ނުވެސް ވިސްނެއެވެ. ހިލްޔާ އޭނަގެ ބަސް އަޑު ނާހާއިރު، ހިލްޔާ އިންނަން އުޅެނީ ވެސް އޭނަގެ ބަސް އަޑު ނާހާ މީހަކާއި ކަން އެނގުންވި ފަހުންނެވެ.

ރާފިލް އާއި ވާހަކަ ދެކެވުނު މަދު ފަހަރުން ނަހީދަށް އިޙްސާސް ކުރެވުނީ ރާފިލް އޭނައަށް އިޙްތިރާމް ނުކުރާ ކަމެވެ. ގިނަ ފަހަރު އޭނަ ވާހަކައެއް ދައްކަން އުޅުނަސް ރާފިލް ވާހަކަ ބަދަލުކޮށްލައެވެ. އަދި އަމުދުން އެހެން މީހުންގެ ތެރޭގައި ރާފިލްގެ ސަމާލުކަން ހޯދުން ވަނީ ދަތިކަމަކަށެވެ. ހިލްޔާއާއި ރާފިލް އެއްތަން ނުވަނީސް ނަހީދު ކޮންމެހެން ވެސް ހިލްޔާއާއިއެކީ ރާފިލް ފުރުމުގެ ކުރިން، ރާފިލްއާއި ބައްދަލު ކުރަން ބޭނުންވަނީ އެހެންވެއެވެ.

ހިލްޔާ ޙައިރާންކަން މަތީ ހުރެ ޖަވާބަކަށް ‘އޯކޭ’ ދިން ވަގުތު ނަހީދު އަވަސްއަވަހަށް ކާރުން ފައިބައި ދޮރު ލައްޕާލައިފިއެވެ. އެއާއިއެކު ހިލްޔާ ކާރުގެ ޑިކީ ހުޅުވާ ބަޓަނަށް ފިތާލަމުން ކާރުން ފޭބިއެވެ. ހިލްޔާއާއި އެކީ ކާރުގައި ދެން ތިބި މީހުން ވެސް ފޭބިއެވެ.

ކާރުން ފައިބައި މާ ގިނައިރެއް ނުވަނީސް ހަމްރާ ވާހަކަ ދެއްކިއެވެ.

“އޮހް….މާޒިން ކޮއްކޮ ނެޕީ ޗޭންޖް ކުރަން ޖެހިއްޖެހެން ހީވަނީ…” ހަމްރާ އެހެން ބުނުމާއިއެކު ހެން ވެސް ރަތްވެފައިވާ ނޭވައާއިއެކީ ކިނބިހިއެއް އެޅުނެވެ.

“އޯ ނޯ އައި ސްމެލް އިޓް!” ހަމްރާގެ ކައިރިން ހިނގަމުން ދިޔަ އެލީ ނޭފަތުގައި ދެ އަތް އެޅިއެވެ.

“އަޅޭ ދެން ކިހިނެއްތަ ހަދާނީ؟” ހާފިޒާ ކަންބޮޑުވުމަކާއިއެކީ ސުވާލު ކުރިއެވެ.

“މިތަނުން ގޮސް އެއާރޕޯޓަށް ވަދެ އަދި ކުޑަ ތަންކޮޅަކަށް ހިނގާލީމަ ފެންނާނެ ޢާއްމު މީހުންނަށް ވަދެވޭ ފާޚާނާއެއް. އެލީ ޔޫ ނޯ ދަ ޕްލޭސް ދޯ؟” ހިލްޔާއަށް ޑިކީ ކައިރިއަށް ގޮސް އެންމެންނާއި ކުރިމަތިލަމުން ބުނެވުނެވެ.

“ޔާ އައި ނޯ. ހިނގާ ދޮންތާ.” އެލީ ބުންޏެވެ. އެވަގުތު މާޒިންގެ ސާމާން ހުރި ކުޑަ ދަބަހެއް އެލީގެ އަތުގައި އޮތެވެ.

“މާމަ ވެސް ދާނަން. ހަމްރާ ތިއުޅެނީ ވަރަށް ބަލިވެ.” ހާފިޒާ ބުނެލިއެވެ.

“ޔެސް ގުޑް އައިޑިއާ. ތުއްތަ ނުވަންނައްޗޭ އަހަރުމެން އަންނަންދެން. ވީ ވިލް ބީ ބެކް ސޫން!” އެލީ އެދުނެވެ. ހަމްރާ ވެސް ހިލްޔާއަށް ބަލާލަމުން އެ ވާހަކައަށް ބޯޖެހިއެވެ.

“ނުވަންނާނަމޭ. ތުއްތައާއި އެކީ އަދި ތި ދިމާލަށް ހިނގާބަލަ އަވަހަށް. ޓްރޯލީއެއް ނަގަން ވެސް އެބަޖެހޭ.” ހިލްޔާ ބުންޏެވެ.

އެއަށްފަހު ދޮންތަމެންނާއި މާމައާއިއެކީ އެއާރޕޯޓަށް ދިޔައެވެ. އެ ދިޔަ މަގުމަތީގައި ރާފިލްއާއި ބައްޕަ ނުހަނު ސީރިއަސް ވާހަކައެއްގައި ތިބި މަންޒަރު ފެނުނެވެ. އެހެނަސް އެކަމާއިމެދު ވިސްނަން ފުރުސަތެއް ނުލިބެނީސް އެލީ ހިލްޔާ ގާތު ދާންވީ މަގު ޔަޤީން ކުރިއެވެ. ހިލްޔާ ޔަޤީންކަން ދިނުމުން އެލީ ހަމްރާއާއި މާމަ ގޮވައިގެން އެއާރޕޯޓަށް ވަނެވެ. އެހިނދު ހިލްޔާ ޓްރޯލީއެއް ހިފައިގެން އަވަސްއަވަހަށް ކާރު ކައިރިއަށް ދިޔައީ، އެތާ ކާރުތައް ގިނަވަމުން ދާތީއާއިއެކު އެތަނުން ކާރު އަވަހަށް ދުރު ކުރުމަށެވެ.

ޓްރޯލީއާއިއެކު ކާރުގެ ޑިކީ ކައިރިއަށް ގޮސް ހިލްޔާ ޑިކީ ހުޅުވާލިއެވެ. އެހިނދު ޑިކީ ތެރޭގައި އޮތް އޭނަގެ ކަޅުކުލައިގެ ސޫޓް ކޭހާއި، އޭގެ މަތީގައި ބެހެއްޓިފައި ހުރި އޭނަގެ ބެކްޕެކް ވީއިރު، މާމަ އޭނައަށްޓަކައި ބަންދުކޮށްފައި ހުރި ދިވެހި ކާއެއްޗެހީގެ ދެ ފޮށްޓެއް އެއްފަރާތުގައި ބެހެއްޓިފައިވިއެވެ. ހިލްޔާ އެންމެ ފުރަތަމަ އޭނަގެ ސޫޓް ކޭސް ނަގަން އުޅުނު ވަގުތުން ފަހަތުން އައި މީހަކު އޭނައަށްވުރެ ކުރިން ސޫޓް ކޭސް ނަގަން ފެށުމުން ހިލްޔާއަށް ދުރުވެލެވުނެވެ. ދުރުވެލީ ތަނާހެން އެމީހަކު ސޫޓް ކޭސް ނަގައި ޓްރޯލީގައި ބޭއްވިއެވެ. ހިލްޔާ ރަނގަޅަށް ބަލާލިއިރު އެއީ ގަދަ ނޫކުލައިގެ އަތް ދިގު ގަމީހަކާއި، ކަޅުކުލައިގެ ފަޓުލޫނެއް ލައިގެން ކަޅުކުލައިގެ މާސްކެއް އަޅައިގެން ހުރި ޒުވާނެކެވެ. އެ މާސްކާއި، ހަށިގަނޑު ހައިބަތު ފެނުމާއިއެކު އެއީ ދާނިޝް ހިލްޔާއަށް ނަގައިގަނެވުނެވެ. އަދި އަމުދުން އެމީހެއްގެ ފަރާތުން ފަސޭހައެއް ލިބުމުން ވެސް އެއީ ދާނިޝް ކަން ޔަޤީން ކުރެވުނެވެ.

ހިލްޔާއަށް ބެލުމެއް ވެސް ނެތި ދާނިޝް ހުރިހާ ފޮށްޓެއް ޓްރޯލީގައި ބެހެއްޓުމަށްފަހު ބެކްޕެކް ވެސް ޓްރޯލީގެ މަތީ ބައިގައި ބެހެއްޓިއެވެ. އެއަށްފަހު ކާރުގެ ޑިކީ ލައްޕާލަމުން ހިލްޔާއަށް ބަލާލިއެވެ.

“ތޭންކްސް….” ހިލްޔާއަށް ބުނެވުނެވެ. އެހިނދު މީގެ ދުވަސްކޮޅެއް ކުރިން އެއްކަލަ ހެދުން ފިހާރައިގައި ދާނިޝްއަށް އައި ރުޅީގެ މަތިން ހަނދާނެއް ނެތެވެ. ނޭނގޭ ސަބަބަކާހުރެ ދާނިޝްއަށް ރުޅިވެގެން ހުންނަން ހިލްޔާއަށް ދައްޗެވެ.

ހިލްޔާ ޝުކުރު އަދާ ކުރުމުން ދާނިޝް ބޯޖަހާލުން ނޫންކަމެއް ނުކުރިއެވެ. ހިލްޔާ ހީކުރީ ދާނިޝް ދެން ދައްކާނީ ކާރު ދުރުކުރާ ވާހަކަ ކަމަށެވެ. ދާނިޝް ކޮންމެވެސް ސާފު މަޤްޞަދެއްގައި ނޫނީ މިހާތަނަށް އައިއިރު އޭނައާއި ވާހަކައެއް ދައްކާފައި ނުވުމުންނެވެ. އެހެނަސް….

“ފުރަނީ؟” ދާނިޝް ކޮށްލި ސުވާލުން ހިލްޔާއަށް ލިބުނީ ޙައިރާންކަމެވެ. އެހެނަސް ޖަވާބެއްގެ ގޮތުން ބޯޖަހާލެވުނެވެ.

“އޯލް ދަ ބެސްޓް.” ދާނިޝް އެހެން ބުނިއިރު ލުއި ގޮތަކަށް ހިނިތުންވިހެން ހިލްޔާއަށް ހީވިއެވެ. އެ ހިނިތުންވުން ހިލްޔާއަށް ފެންނަ ގޮތެއް ނުވުމުން ހިލްޔާގެ ހިތުގައި ޝަކުވާ އުފެދުނެވެ. ތަނަށް ވެރިވެފައިވި ރީނދޫ ބޮކިތަކުގެ އަލިން މާސްކާއި އެކީ ވެސް ދާނިޝް ފެންނަމުން ދިޔަ ގޮތް ހިލްޔާއަށް ރީތިވިއެވެ.

“ތޭންކްސް….ސުވާލެއް ކޮށްލަންތަ؟” ހިލްޔާ އެހިއެވެ.

“ހުމް…” ދާނިޝް ބުންޏެވެ.

“ދާނިޝް ކީއްވެ ތިހާ ޑެޑިކޭޓެޑް ކޮށް މާސްކް އަޅައިގެން ތިއުޅެނީ؟ ބަލީތަ؟ މިހުރިހާ ދުވަސް ވީއިރު ވެސް، އަހަރެން ދުވަހަކުވެސް ދާނިޝް ނުދެކެން. އޯލްމޯސްޓް….މޫނު ބުރުގާ އަޅައިގެންދޯ ތިއުޅެނީ؟” ހިލްޔާއަށް ނުހަނު ސީރިއަސްކަމާއެކީ ވާހަކަ ދެކެވުނެވެ.

އެހެނަސް ހިލްޔާ ކޮށްލި ފަހު ސުވާލާއިއެކީ ދާނިޝް ހީލުމުން ހިލްޔާއަށް ވެސް ހީލެވުނެވެ. އެއީ ދާނިޝްގެ ހީލުމުގެ އަޑު ހިލްޔާއަށް އިވުނު ފުރަތަމަ ފަހަރެވެ. އެއީ ރީތި އަޑެކެވެ. ދާނިޝްއާއި އެކީގައި ހީލުމުން ނޭނގޭ އުފަލެއް ލިބުނެވެ.

ހުނުން މަޑުވުމަށްފަހު އެދެމެދަށް ހިމޭންކަމެއް ވެރިވިއެވެ. އެ ހިމޭންކަން ނަގާލީ ދާނިޝްއެވެ.

“ހިލްޔާ ބޭނުންވަނީތަ އަހަރެންގެ މޫނު ދެކެން؟” ދާނިޝް އެހިއެވެ.

ނުނިމޭ