ނަފްސީ (ސައުވީސްވަނަ ބައި)

އެހެނަސް އާދައިގެ މަތިން ދާނިޝްއަށް މާ ގިނައިރެއް ނުވެ އެ ޚިޔާލީ ފޮލާތަކުން ނިކުމެވުނެވެ. އޭނަ ކިތަންމެ ބޭނުންވިޔަސް ހިލްޔާއަކީ އޭނަގެ މީހަކަށްވާނެ ކުއްޖެއް ނޫންކަން ހަނދާންވިއެވެ. އޭނަގެ ލޯބީގެ ފަސާނާއަކީ ފެށުމުގެ ކުރިން ވެސް ނިމިފައިވާ ވާހަކައެކެވެ. ވީއިރު އޭނައަށް ދެންމެ އަމިއްލަ ނަފްސާއި ދެކޮޅުވެރިވެ، ވަފާތެރިކަމުގައި ހުރެވުނީ އޭނައަށް ލިބެން ވެސް ނެތް ކުއްޖަކަށްޓަކައި ހެއްޔެވެ؟ ހިތަށް ވެރިވި އެ ޚިޔާލުން ދާނިޝްގެ މޭގައި ރިހުމެއް ހިނގާލި ހިނދު، ލޮލުން ކަރުނަ ހިލުނެވެ.

އެހެނަސް ދާނިޝް އެވަގުތު ހިލްޔާގެ ކުރިމަތީގައި ބަލިކަށި ވާން ބޭނުމެއް ނުވިއެވެ. އެހެންކަމުން ދިގު ފިޔަވަޅުތަކެއްގައި ގޮސް އެތާ ހުއްޓި ހުރި ހިލްޔާއާއި ވައި އެޅޭ ހިސާބުން ގޮސް އެ ރޫމުން ނިކުތެވެ.

ދާނިޝް އެ ނިކުމެގެން ދިޔަ ގޮތަށް ކްލިނިކުން ވެސް ނިކުމެގެން ދިޔައެވެ. އެވަގުތު އެނގުނުހާ ވެސް ކަމަކީ އޭނަ މުޅި އެ މާޙައުލާއި ދުރަށް ގޮސް އެކަނިވާން ބޭނުންވި ކަމެވެ. ޑިއުޓީ ގަޑި އަދި ނުނިމޭކަން ހަނދާންވީ ވެސް ސައިކަލަށް އެރި ފަހުންނެވެ. އެހެނަސް އެވަގުތު 10 ޖަހަން ގާތްވާނީކަން އަންދާޒާވުމުން މަޑު ނުކުރަން އިތުރު ހިތްވަރެއް ލިބުނެވެ.

ސައިކަލު ދުއްވަމުން ދިޔައިރު މަގުމައްޗަށް ސަމާލުކަން ދޭންޖެހޭތީ ދާނިޝް ގެ ސިކުނޑިއަށް ކޮންމެވެސް ވަރެއްގެ ލުއެއް ލިބުނެވެ. އެހެނަސް ދާނިޝް އުޅޭ ޢިމާރާތާއި ހަމައަށް ގޮސް ސައިކަލު ޕާކް ކުރެވުމާއިއެކު މުޅި މީހާ ވަރުބަލިވެފައިވާ މިންވަރު އެނގުންވިއެވެ. ޢިމާރާތަށް ވަދެގެން ދިޔަދިޔަހެން ޒިވް ދެއްކި ވާހަކަތަކާއި، އޭނަ ޒިވްއަށް ދިން ރައްދުތައް ކަންފަތުގައި ތަކުރާރުކޮށް ގުގުމަމުން ދިޔައެވެ. އަދި ހަމަ އެއާއިއެކު އެ ވާހަކަތައް ދެކެވުނުއިރު ހިތަށް އަރައި ފޭބި ޖަޒުބާތުތައް ވެސް ރާޅު ބާނިތަކެއް އައިސް ހިތުގެ ހިމޭންކަން ނަގަމުން ދިޔައެވެ. އަދި އަމުދުން މިރޭގެ ޙާދިސާއަށްފަހު ހިލްޔާ އޭނައާއި މެދު ދެކޭނެ ގޮތް ހިތަށް ވެރިވުމުން އެ ހިތުގެ ޙާލަތު ގޯސްވަމުން ދިޔައެވެ.

މި ޖަޒުބާތުތަކާއި އެކީ ގޮސް ދާނިޝް އެޕާޓްމެންޓް ގެ ދޮރު ހުޅުވާލުމާއިއެކު އޭނައަށް މަރުޙަބާ ކިޔުނީ ފަޅުކަމެވެ. އެތެރެއަށް ވަދެ ދޮރު ލައްޕާލި ހިނދު އަމިއްލަ އެކަނިވެރިކަން އެރޭ ދާނިޝްއަށް އިޙްސާސް ކުރެވުނީ މާ ބޮޑަށެވެ. ވަރެއް ނެތް ފަދައިން ހިނގަމުން ގޮސް ސޯފާއަށް ވެއްޓިގަންނަމުން ދާނިޝްއަށް އިށީނދެވުނެވެ. އެވަގުތު ސިކުނޑިއަށް ވެރިވީ، ހިލްޔާ އެންމެ ފަހުން އޭނައާއި ކޮށްލި ސުވާލެވެ.

“އެއީ ކާކުތަ ދާނިޝް؟”

ހަމަ އެއާއިއެކު ޒިވް އަކީ ކާކުކަން ދާނިޝްގެ ހަނދާނަށް އަންނަން ފެށިއެވެ.

**1 އަހަރު ކުރިން**

“މައި މޭން އަވަހަށް އާދޭ!”

ދާނިޝް ރެސްޓޯރެންޓެއްގެ ޓެރެސް ބަޔަށް އެރިތަނާހެން، އެތާހުރި ދިގު މޭޒުދޮށުގައި ތިބި މީހުންގެ ތެރެއިން މިންހާޖް ގޮވާލިއެވެ. ދާނިޝް ހިނިތުންވުމަކާއިއެކީ މިންހާޖް ގާތަށް ގޮސް މިންހާޖް މުއްކޮށްގެން ހުރި އަތުގައި އޭނަގެ އަތް ވެސް މުއްކޮށްލަމުން މަޑުމަޑުން ޖަހާލިއެވެ. އެއަށްފަހު މުޅިންހެން ފުރިފައިވި އެ މޭޒުދޮށުން ހުސްކޮށް ހުރި ގޮނޑިއެއް ހޯދައި ދާނިޝް ގޮސް އިށީނެވެ. އޭނަ އިށީނުމުން ބާކީ ހުރީ ދާނިޝްގެ ކުރިމައްޗަށް ވާ ގޮތަށް ހުރި ގޮނޑި އެކަންޏެވެ.

އެ މޭޒު ދޮށުގައި ތިބީ ދާނިޝް ތިން ވަނައަށް ކުޅެން އުޅޭ ދިވެހި ޑްރާމާގެ ޑައިރެކްޓަރާއި، ޕްރޮޑިއުސަރާއި އެކްޓަރުންނެވެ. އަންހެނުންނާއި ފިރިހެނުން މަސްހުނި އެ ބައްދަލުވުމުގައި ދާނިޝް ގޮސް އިށީނީ ފިރިހެން އެކްޓަރެއްގެ ކައިރީގައެވެ.

މިހާތަނަށް އައިއިރު ދިވެހި ފިލްމީ ދާއިރާގެ އެންމެންނަށް ވެސް އޭނަގެ ޒާތް އެނގިފައިވުމުން މިފަދަ ބައްދަލުވުންތަކުގައި އޭނައަށް ގޮނޑިއެއް ހުސްކުރާނީ ވެސް އެފަދައިންނެވެ. އެކަން އެގޮތަށް ކުރުމުގައި އެމީހުން އޭނައަށް މަލާމާތްތައް އަމާޒުކުރާ ކަން ވެސް ދާނިޝްއަށް ރަނގަޅަށް އެނގެއެވެ. އަދި މިހާތަނަށް އައިއިރު އޭނައާއި މެދު ނޭދެވޭ ހީކުރުންތައް ވެސް ހީކުރަން ފަށާފައިވެއެވެ. އެކަމާއިމެދު ދާނިޝްގެ ހިތް ނުތަނަވަސް ވާން ފަށާފައިވެއެވެ.

ފިލްމީ ދާއިރާގެ އެންމެންގެ ރުހުން ހޯދަން ދާނިޝް ބޭނުންވެއެވެ. މިއީ ވަޒީފާއެއް ނެތިގެން އޭނަ އައި ދާއިރާއަކަށް ނުވިޔަސް، މިއީ އޭނައަށް ކަމުދާ ދާއިރާއެކެވެ. މި ދާއިރާއިން މަޝްހޫރުކަމާއި ރީތި އަންހެން ކުދިންގެ ސަމާލުކަން އޭނައަށް ލިބެއެވެ. މި ދެ ކަމަކީ ރީތި ދިވެހި އަންހެން ކުއްޖަކާއި އިނުމަށް އޭނަ ދެކެމުން އައި ހުވަފެން ޙަޤީޤަތަކަށްވުމަށް ފަހިވި މަގެއް ކަމުގައި ފެނުނެވެ. ޔުނިވާރސިޓީގައި ކިޔަވަމުން ދަނިކޮށް ޙަޔާތުގައި އެންމެ ފުރަތަމަ ދިމާވި ދިވެހި ޒުވާނާ ކަމަށްވާ މިންހާޖް ގާތް ކުރެވި، މިންހާޖް ދެއްކި މަގުން ހިނގަން ފެށުނީ ވެސް އެ ހުވަފެނުގެ ސަބަބުންނެވެ.

އެހެނަސް މިންހާޖާއި ދާނިޝްގެ ވިސްނުން ކިހާ ތަފާތުކަން ދާނިޝްއަށް އެނގުންވީ، ރާއްޖެ އައިސް މިންހާޖް އަންހެން ކުދިންނާއި އެކީ އުޅެން ފެށި ގޮތުންނެވެ. އަދި އަމުދުން މިންހާޖް ގެ އެކުވެރިންގެ ތެރެއިން ވެސް ލިބުނު އެކުވެރިން އަންހެން ކުދިންނާއި މެދު ވާހަކަ ދައްކަން ފެށި ގޮތުން ދާނިޝްއަށް ލިބުނީ ޝޮކެކެވެ. އޭނަގެ މުސްލިމް އެކުވެރިން، ބޭރު ޤައުމުތަކުން ލިބުނު މުސްލިމް ނޫން އެކުވެރިންނަށް ވުރެ ލަދު ކުޑައީ ކީއްވެތޯ އަމިއްލަ ނަފްސާއި ސުވާލު ކުރެވުނެވެ. ބޭރުގައި ކިޔެވިއިރު އޭނަ އެންމެ ގާތްކޮށް ގެންގުޅުނީ ދެ ނަޞާރާ އެކުވެރިންނާއި މުސްލިމް އެކުވެރިއެކެވެ. ނަޞާރާ ދެ އެކުވެރިން ވެސް އަންހެން ކުދިންނަށް އިޙްތިރާމް ކުރެއެވެ. އަދި ކައިވެނިން ބޭރުގައި ގުޅުން ހިންގުމަކީ އެމީހުންގެ ދީނުގައި ފާފައަކަށް ނުވިޔަސް، އެމީހުން ޚިޔާރު ކުރަނީ ކައިވެންޏަށްފަހު ނޫނީ އަންހެން ކުއްޖަކާއި ގާތް ނުވުމަށެވެ.

ކޮންމެ ގޮތެއް ވިޔަސް ވޭތުވެ ދިޔަ 4 ވަރަކަށް އަހަރު ތެރޭގައި އެ އެކުވެރިންގެ ނޭދެވޭ އަސަރު ދާނިޝްއަށް ކޮށްފައިވެއެވެ. ކުރީ ކޮޅު އަންހެނުންނާއި ފިރިހެނުން މަސްހުނިވާ ބައްދަލުވުންތަކަށް ދިޔުމަށް ވެސް ދާނިޝް ނުތަނަވަސްވެއެވެ. މަންމަ ދީފައިވާހާ ނަސޭޙަތްތަކެއްގެ ސަބަބުންނެވެ. އެހެނަސް މިހާތަނަށް އައިއިރު އެކަމަށް އާދަ ވެއްޖެއެވެ. އަންހެނަކާއި ބައްދަލުވާއިރު ސަލާމް ކުރުން މާ ބޮޑު ކަމަކަށް ނުވެއެވެ.

ނަމަވެސް ދެންވެސް ފިލްމީ ދާއިރާގައި އުޅޭ ޑައިރެކްޓަރުން ހިތްހަމަޖެހޭހާ ވަރަށް ދާނިޝްއަށް އަންހެނުންނާއި ގާތް ނުވެވެއެވެ. އެއީ އޭނަގެ ޒަމީރު އެއްގޮތަކަށް ވެސް އެއްބަސްވާ ކަމަކަށް ނުވާތީވެއެވެ. އެއީ މަންމަ އޭނައަށް ދީފައިވާ ތަރުބިއްޔަތެވެ. ކޮންމެ އަންހެން ކުއްޖަކީ ވެސް ޤަދަރުވެރި ކުއްޖެކެވެ. އެއީ ކޮންމެވެސް މީހެއްގެ އަންބެކެވެ. ނޫނީ މަންމައެކެވެ. ނޫނީ ދައްތައެކެވެ. އޭނަގެ އަމިއްލަ އަނބިމީހާ ނުވަތަ މަންމަ ނުވަތަ ދައްތައަކާއި ހިލޭ ފިރިހެނަކާއި ގާތްވާން ނޭދޭ ހިނދު، އޭނަ އެހެން މީހެއްގެ ޢާއިލާއަށް ނިސްބަތްވާ އަންހެން ކުއްޖަކާއި ގާތްވާނީ ކިހިނެއް ހެއްޔެވެ؟

އެރޭ ރެސްޓޯރެންޓް މޭޒުދޮށުން ވެސް މި ފިލްމުގައި ދާނިޝް އަންހެން ކުއްޖާއާއި ގައިގޯޅިވާން ޖެހޭ ވާހަކަ ދައްކަން ފެށުމުން ދާނިޝްގެ ސިކުނޑިއަށް ވެރިވީ އެ ޚިޔާލުތަކެވެ. އެހެނަސް އެމީހުންގެ ވާހަކަތަކަށް ރައްދެއް ނުދީ ހީލުމަކުން ވާހަކަ ނިންމަމުން ދެވުނެވެ. އޭނަ ޤަބޫލު ކުރާ ގޮތް ބުނެވޭ ވަރަށް ވުރެ އޭނަ ހުރީ އެތާ ތިބި އެންމެންގެ ރުހުން ހޯދަން ބޭނުންވެފައެވެ. އަދި އަމުދުން އޭނައާއި އެކު މިފަހަރު މަސައްކަތް ކުރަން އުޅޭ އަންހެން ކުއްޖާ ވެސް ދެކިލަން ބޭނުންވެފައިވިއެވެ. އޭނަ އައިތަނާހެން މިފަހަރު އޭނައާއި އެކު މަސައްކަތް ކުރާނީ އަލަށް ފިލްމީ ދާއިރާއަށް ވަންނަން އުޅޭ ކުއްޖެއްކަން ޑައިރެކްޓަރު ބުންޏެވެ. އަދި އެއީ ވެސް ބޭރު ޤައުމުތަކުގައި އުޅެފައި، ހުހަށް ހުރި ކުއްޖެއްކަމަށް ދެން ތިބި އެކްޓަރުން ދާނިޝްއަށް އެންގިއެވެ. އެ ވާހަކަތަކުން ދާނިޝް އެ ކުއްޖާ ދެކެން ކެތްމަދުވިއެވެ. އޭނައާއި ދިމާވާން މިއުޅެނީ އޭނަ ކައިވެނި ކުރަން އުޅޭ ކުއްޖާތޯ ހިތަށްއެރިއެވެ.

“އޮހް! ހިއާރ ކަމްސް ޒިވް!” ދާނިޝްގެ ކައިރީގައި އިން ޒުވާނާ އެހެން ބުނުމާއިއެކު ދާނިޝްއަށް އޭނަގެ ކުރިމައްޗަށް ވާ ގޮތަށް ހުރި ދޮރަށް ނަޒަރެއް ދެވުނެވެ. އެއާއިއެކު އެހެން ދިމާލަކަށް ނަޒަރު ހިންގަން ދާނިޝްއަށް ދަތިވިއެވެ. ކުރިމަތިން ފެންނަމުން ދިޔައީ ބޭރުފުށުގެ ރީތިކަމުން އޭނަ ބޭނުންވާހާ ސިފައެއް ހުރި ކުއްޖެކެވެ. ކަކުލުން ތިރިއަށް އޮތް އަތް ކުރު ނޫކުލައިގެ ހެދުމެއް ލައިގެން ހުރި ކުއްޖާއަށް ލިބިފައިވީ އެންމެ ފުރިހަމަ ބައްޓަމެވެ. އެ ދޮންކޮށް ހުރި ވަށް މޫނު ދުރުން ވެސް ފެނުނީ ލޮބުވެތި ސޫރައެއްގެ ގޮތުގައެވެ. ކޮނޑުން ތިރިއަށް ދާ ފަން އިސްތަށިގަނޑުން އެ ރީތިކަން އިތުރު ކުރުވިއެވެ.

ދާނިޝް އިން ގޮތަށް އިންދާ ޒިވް ވަދެގެން އަންނަން ފެށުމުން އެތާ ތިބި އަންހެނުންނާއި ފިރިހެނުން ވެސް ވަކިވަކިން ޒިވް ގައިގައި ބައްދަމުން މަރުޙަބާ ކިޔަމުން ދިޔަ ގޮތުން ދާނިޝް ނުރުހުންވާ ގޮތްވިއެވެ. އެ ފިރިހެނުން ގޮސް ޒިވް ގެ ގައިގައި ބައްދާނީ އިތުރު އެހެން އެދުމެއްގައެއް ނޫންކަން ޔަޤީނާއި ގާތް ކުރެވުނީތީވެއެވެ. އެންމެ ފަހުން ޒިވް އައިސް ސީދާ އޭނައާއި ކުރިމައްޗަށް ވާ ގޮތަށް ހުރި ގޮނޑި ކައިރިއަށް އައުމުން ދާނިޝްއަށް ތެދުވެލެވުނެވެ. އެއީ ވެސް ޒިވް އަށް އިޙްތިރާމް އަދާ ކުރުމުގެ ގޮތުންނެވެ. ތެދުވެލުމަށްފަހު ދާނިޝް ސަލާމަށް އަތް ދިއްކުރިއެވެ.

“ހައި….އައިމް ދާނިޝް. ނައިސް ޓު މީޓް ޔޫ.” ދާނިޝް ބުންޏެވެ. ޒިވް އޭނަގެ އަތުގައި ހިފިއިރު އެ ލޮލުގައިވި ވިދުމާއިމެދު ދާނިޝް އާޝޯޚުވިއެވެ.

“ހައި! ދާނިޝް ނޭނގޭނީ ކާކަށް؟ އައިމް ޔުއާރ ފޭން!” ޒިވް ޖޯޝާއިއެކީ ބުނެލި ވާހަކައިން ދާނިޝް ގެ މޫނުމައްޗަށް ފުރިހަމަ ހިނިތުންވުމެއް ވެރިވިއެވެ.

އެ ވެގެން ދިޔައީ ‘އެކުވެރިކަމެއް’ ގެ ފެށުމަށެވެ. އެހެނަސް ދާނިޝް ބޭނުންވަނީ ހަމައެކަނި ޒިވް ގެ އެކުވެރިޔަކަށް ވާކަށް ނޫންކަން ފެށުނީއްސުރެ ވެސް ދާނިޝްއަށް އެނގުނެވެ. އެރެއިން އެރެއަށް ވެސް ޒިވް ގެ ފަރާތުން ކައިވެންޏަކަށް އެދެން ދާނިޝް ބޭނުންވިއެވެ. އެހެނަސް ދުވަސްތައް ފާއިތުވާން ފެށިހެން ޒިވް ގެ މިޒާޖާއި މެދު ވިސްނުނެވެ. އެއީ ވެސް މަންމަ އޭނައަށް ދީފައިވާ އެތައް ނަސޭޙަތެއްގެ ސަބަބުންނެވެ. ޒިވް އެހާ ގަޔަށް ބާރު، ކުރު ހެދުންތައް ލައިގެން އުޅޭކަށް އޭނަ ނުރުހެއެވެ. ހިލޭ ފިރިހެނުންނާއި އެހާ ގާތުން އުޅުން ވެސްމެއެވެ. ޒިވް އެކަމާއި އެއްބަސްވާނެތޯ ހިތަށްއެރިއެވެ. ދާނިޝް މި ހިތަށް އުދަގޫ ކުރުވަނިވި ސުވާލު ޙިއްސާކުރީ މިންހާޖާއެވެ.

“ޑޭން ގެ ތި ވިސްނުން ބަދަލުކުރަން އަދިވެސް ނުވޭތަ؟ ބަލަ މި ޒަމާނުގެ ހުރިހާ އަންހެން ކުދިން އުޅޭނީ އެހެންނޭ. ބޮޑު ގޯނިތަކަށް އެރިގެން އުޅޭނީ ހައްދު ފަހަނަޅާފައިވާ ވިސްނުމުގެ އަންހެން ކުދިން. އެހެން ނޫނީ އަމިއްލަ ބޮޑީ ޝޭޕާއި މެދު ހިތްހަމަނުޖެހޭތީ ފޮރުވަން އުޅޭ ކުދިން. ކިހާ ސަޅިތަ އަންހެން ކުދިން ޒިވްގެ ޑްރެސިންގް ސްޓައިލްއަށް އެހެން އުޅުނީމަ؟ އޯލްސޯ ވައި ކާންޓް ޔޫ ޓްރަސްޓް ހާރ؟ އަހަރުމެން އެންމެން މިއީ އެކްޓަރުން. ޒިވް ޖެހޭނެ ހަމަ އެހެން އެކްޓާރސް އާ ކައިރިވާން. އޭގެ މާނައެއް ނޫން ޒިވް ޑޭންއަށް ޗީޓް ކުރާނެއޭ. ޑޭން ގެ ވިސްނުން ހަމަ ތަންކޮޅެއް ފްލެކްސިބަލް ވާން ޖެހެނީ.”

އެއްދުވަހު ކެފޭއެއްގެ މޭޒުދޮށުން ދާނިޝްއާއި ވަކިން ކުރި ބައްދަލުވުމެއްގައި މިންހާޖް ބުންޏެވެ. މިންހާޖް އެ ދެއްކި ވާހަކަތައް ދާނިޝްއަށް ފަހުމްވާ ގޮތެއް ނުވިއެވެ. އެހެން ފިރިހެނުންނާއި ގާތްވެގެން ވެސް ޒިވް އޭނައަށް ވަފާތެރި ވާނީ ކިހިނެއްތޯ ހިތަށްއެރިއެވެ. އެހެނަސް އެ ވާހަކަ ދުލާއި ހަމައަށް ނުގެނެވުނެވެ. މިންހާޖް އެ ބުނިހެން އޭނައަށް މި ކަންތައް ފަހުމް ނުވަނީ އޭނަގެ ވިސްނުމުގައި ހުރި ‘ކޮށިކަމުން’ ކަމަށް ޤަބޫލު ކުރެވުނެވެ.

“އަހަންނަށް ފެންނަނީ މި ފުރުސަތުގެ ބޭނުން ހިފައި ޑޭން ޒިވް އާ ޑޭޓް ކުރަން. ކުއްލިއަކަށް މެރީ ކުރުމަކީ ވެސް ބޯދާ ވިސްނުމެއް. ފުރަތަމަ ޑޭޓް ކުރޭ. އޭރުން އަންހެނުންނާ ދުރުން އުޅޭތީ ޑޭން އާ ބެހޭގޮތުން ގަދައަށް ފެތުރެން އުޅޭ ރޫމާރ ވެސް ހުއްޓުވޭނެ.” މިންހާޖް ބުންޏެވެ. ދާނިޝްއަށް މިންހާޖްގެ އެ ޚިޔާލާއި މުޅިން އެއްބަސް ނުވެވުނަސް ހިތް ނުތަނަވަސްވެފައި އިނދެ ބޯޖަހާލެވުނެވެ.

އޭގެ އަނެއްދުވަހު ޝޫޓިންގްއަށް ގޮސް ދާނިޝް ޒިވް އާއި އެކީ ތިބެ ސްކްރިޕްޓް ކިޔަން ޖެހުނެވެ. ދެމީހުން އެކީގައި ކުޅޭ މަންޒަރަކަށްވުމުން އެ މަންޒަރު އެންމެ ރަނގަޅަށް ކުޅޭނެ ގޮތް މަޝްވަރާ ކުރުމަށެވެ. އެކަކު އަނެކެއްގެ ކުރިމައްޗަށް ވާ ގޮތަށް ސްޓޫޑިއޯ ގައި ގޮނޑި އަޅައިގެން ތިބެ ސްކްރިޕްޓް ކިޔަމުން ގޮސް ޒިވް ވާހަކަ ދެއްކިއެވެ.

“އޫ….މީގަ މިއޮތީ އަޒްލާން ލޫނާގެ ގައިގައި ބައްދައިގެން ހުރެއޭ ދުރުގަ ހުރި މީހަކަށް ބަޑިން ޝޫޓް ކުރަނީ. އޭގެ މާނައަކީ ޑޭން ޖެހޭނެއޭ އަހަރެން ހަގް ކުރަން މި ފަހަރު!” ޒިވް ފޯރިއާއިއެކީ ބުންޏެވެ.

“އުނހު….އޭގެ ބަދަލުގަ އަޒްލާންއަށް ލޫނާ ފަހަތަށް ލައިގެން ހުރެވެސް ޝޫޓް ކުރެވޭނެ ދޯ؟ ދެޓް މޭކްސް މޯ ސެންސް. ހަގް ކޮށްގެން ހުރިއްޔާ އެޓޭކެއް ވެސް ލޫނާއަށް އައިސްދާނެ ދޯ؟” ދާނިޝް ނުހަނު ސީރިއަސްކަމާއިއެކީ ސްކްރިޕްޓް ކިޔަމުން ބުންޏެވެ.

“މައި ގޯޑް ވާއި އާރ ޔޫ ލައިކް ދިސް ޑޭން؟! އެމީހުން ބުނަނީ ތެދެއްތަ އަނެއްކާ؟” ޒިވް އެ ސުވާލު ކުރުމުން ދާނިޝްއަށް އިސްއުފުލައި ބަލާލެވުނެވެ.

“ކޮން ބަޔަކު ކީކޭ ބުނަނީ؟” ދާނިޝް އެހެން އަހާލީ ބޭރުފުށުން ހަމަޖެހުން ދައްކައިގެން ވިޔަސް، ހިތުގައި ނުތަނަވަސްކަމެއް ވިއެވެ. ޒިވް އެ ޢިޝާރާތް ކުރަނީ ކޮން ވާހަކައަކަށްކަން އަންދާޒާ ކުރެވުނީތީވެއެވެ.

“ދެޓް ޔޫ އާރ ގޭއި.” ޒިވް އެހެން ބުނުމާއިއެކު ދާނިޝްގެ ޙަރަކާތްތައް ހިނދުކޮޅަކަށް ހުއްޓުނެވެ. ރީތި އަންހެން ކުއްޖަކު އޭނައާއި ދިމާލަށް އެހެން ބުނުމުން ގަތް ލަދާއިއެކު ވަގުތުން ވާހަކަ ދެކެވުނެވެ.

“އައިމް ނޮޓް. އައި ލައިކް ޔޫ.” ދާނިޝްއަށް އަވަސް އަވަހަށް ބުނެވުނެވެ. ބުނެވުނު ބަސްތަކުގެ ބަރުދަން އެނގުނީ އެ ވާހަކައިން ޒިވް ހުއްޓުން އެރި ތަން ފެނުމުންނެވެ. ލުއި ހިނިތުންވުމެއްގައި ޒިވް އޭނައަށް ބަލަހައްޓައިގެން އިނދެފައި ވާހަކަ ދެއްކިއެވެ.

“އައި ލައިކް ޔޫ ޓޫ. ލެޓްސް ޑޭޓް!”

ޒިވް ދާނިޝްއަށް އެއްޗެކޭ ބުނުމުގެ ފުރުސަތެއް ނުދީ އެންގިއެވެ. އެއާއިއެކު ދާނިޝް ނުތަނަވަސްކަމެއްގައި އިނދެ ވެސް ބޯޖަހާލީ މިންހާޖް ދެއްކި ވާހަކަތައް ވެސް ހަނދާން ކުރަމުންނެވެ. އެހެން އެއްވެސް ކަމަކަށް ވުރެ ބޮޑަށް އޭނައާއި ބެހޭ ގޮތުން ފެތުރޭ ދޮގު ވާހަކައަށް ހުއްޓުމެއް ގެންނަން ބޭނުންވިއެވެ.

އެކަން ކާމިޔާބު ވެސްވިއެވެ. މާ ގިނަ ދުވަހެއް ނުވެ ދާނިޝްއާއި ޒިވް ރައްޓެހިވީ ވާހަކަ ނޫސްތަކުގައި ޝާއިޢު ކުރެވިގެން ދިޔައެވެ. ނަތީޖާއެއްގެ ގޮތުން ދެމީހުންގެ މަޝްހޫރުކަން ވެސް އިތުރުވިއެވެ. އެކުގައި މަސައްކަތް ކުރާ މީހުންނާއި ފޭނުންގެ ވެސް ތަރުޙީބު އެ ގުޅުމަށް ލިބިގެން ދިޔުމުން ދާނިޝްގެ ނަޒަރުގައި އެ ގުޅުން ޒީނަތްތެރިވިއެވެ.

ޒީނަތްތެރިވީ ވީހެން ދާނިޝް ގެ ހިތުގައި ޒިވް އާއި ކައިވެނި ކުރުމުގެ އެދުން ބޮޑުވިއެވެ. ކައިވެނި ކުރަން ބޭނުންވަނީ އެންމެ ސަބަބަކާއި ހެދިކަން ދާނިޝްއަށް ސާފުކޮށް އެނގުނެވެ. ޒިވް ގެ ބޭރުފުށުގެ ރީތިކަން ފިޔަވައި އެހެން އެއްވެސް ކަމަކާއި މެދު ދާނިޝް ހިތްހަމަނުޖެހޭތީވެއެވެ. ކުރީ ކޮޅު ކައިވެންޏެއްގެ ވާހަކަ ނުދައްކާ ހުރެވުނީ ވެސް އެހެންވެއެވެ. ކައިވެންޏެއް ކުރަނީ ހަމައެކަނި އެންމެ އެދުމެއްގައި ނޫންކަން މަންމަ ބުނެދީފައިވާތީވެއެވެ. ކައިވެންޏެއްގެ ބޭނުމަކީ ހަރުދަނާ ޢާއިލާއެއް ބިނާ ކުރުން ކަމަށް ވެސް މަންމަ ބުނެދީފައިވާތީވެއެވެ. އަދި އެ ޚިޔާލާއިމެދު ޚުދު ދާނިޝްއަށް ވެސް އެއްބަސް ވެވުނީތީވެއެވެ.

އެހެނަސް ޒިވްގެ ހެދުން އެޅުމުގެ ވައްޓަފާޅި އާއި، މީހުންގެ ތެރޭގައި އުޅެމުން ވެސް އޭނައާއި ގާތްވަމުން ދިޔަ ގޮތާއި، ކުރަމުން ދިޔަ ލަދުކުޑަ ސަމާސާތަކުގެ ސަބަބުން ދާނިޝްގެ ހަވާނަފްސު ހިތާއި ސިކުނޑިއަށް ސަވާރުވިއެވެ. އެހެންކަމުން އެއްރެއަކު ޒިވް ގޮވައިގެން ހޮޓެލެއްގެ ރެސްޓޯރެންޓަކަށް ދެވުނެވެ. ދާނިޝް ގެ މަޤްޞަދަކަށްވެފައިވީ ޒިވް އާއި ކައިވެނީގެ ވާހަކަ ދެއްކުމެވެ. ދެންވެސް ކައިވެނިން ބޭރުގައި އެފަދަ ގުޅުމެއް ހިންގާކަށް ބޭނުމެއް ނުވިއެވެ. އެހެނަސް ނޭނގުމެއްގެ ތެރެއިން ވެސް ރޭގަނޑު ހޮޓެލަކުން ޒިވް އާއި ބައްދަލުކުރަން އޭނައަށް ނިންމުނީ ކީއްވެކަން އެނގުންވުމުން އަމިއްލަ ނަފްސު ކުށްވެރި ކުރެވުނެވެ.

ޒިވް އައުމުގެ ކުރިން ޒިވް އަ ގުޅައި މި ބައްދަލުވުން ނޯންނާނެ ވާހަކަ ބުނަންވީތޯ މޭޒުދޮށުގައި އިނދެ ދާނިޝްގެ ހިތަށްއެރިއެވެ. އެކަމާއިމެދު ދެ ޚިޔާލެއްގެ ވަނިކޮށް އެއްފަރާތަކުން ޒިވް ގެ އަޑު އިވުނެވެ.

“ޑޭން!”

ޒިވް ގޮވާލި އަޑަށް ދާނިޝްއަށް ކަނާތް ފަރާތަށް ނަޒަރެއް ދެވުނެވެ. އެއާއިއެކު އެހެން ދިމާލަކަށް ބަލާލަން ދާނިޝް ނުކުޅެދުނެވެ. ކަކުލާއި ހަމައަށް އޮތް ރަތް ކުލައިގެ އަތް ކުރު ހެދުމެއް ލައިގެން ހިނިތުންވުމެއްގައި އޭނައާއި ދިމާލަށް އަންނަނީ، މުޅި ޙަޔާތުގައި ވެސް އޭނަ ދުށް އެންމެ ރީތި އަންހެން ކުއްޖާގެ ގޮތުގައި އެވަގުތު ސިފަ ކުރެވުނެވެ. ޝައިޠާނާ އެވަގުތު އެ މަންޒަރު ޒީނަތްތެރި ކުރި ގޮތުން އެ ކުރު ހެދުމާއިމެދު އޭނަ ހިތްހަމަނުޖެހޭ ކަން ވެސް ދާނިޝް ހިނދުކޮޅަކަށް ހަނދާން ނެތުނެވެ. ޒިވް ފަރި ގޮތަކަށް ހިނގާފައި އައިސް އޭނަގެ ކުރިމަތީގައި ހުރި ގޮނޑީގައި އިށީންނަން ދެން ދާނިޝްއަށް އެސްފިޔަ ޖަހާލުމެއް ނެތި ޒިވް އާއި ދިމާލަށް ބަލަން ހުރެވުނެވެ. ޒިވް އިށީނުމަށްފަހު ވެސް އެއްވެސް އެއްޗެކޭ ނުބުނެ ބަލަން އިނދެވުނެވެ.

“ވަޓް؟” ޒިވް ނޭނގޭ ކަމަށް ހަދައި ނުހަނު ލަދުވެތި ގޮތަކަށް ހީލަމުން އެހިއެވެ. އެއާއިއެކު ހަމަހޭވެރިކަމެއް ލިބުނު ދާނިޝް ބެލުން ތިރި ކުރަމުން ނުކުރަމުން ކަހަލަ ގޮތަކަށް ހީލިއެވެ.

“ޔޫ ލުކް ބިއުޓިފުލް.” ދާނިޝް ބުންޏެވެ. ޒިވްއަށް ނުބަލާ އިންނަން އުދަގޫވެފައިވި ގޮތުން އެވަގުތު އަމިއްލަ ނަފްސު ކުށްވެރި ކުރެވެމުން ދިޔައެވެ.

“އައި ނޯ. ދާނިޝް ތި ބަލާ ގޮތުން ހުރިހާ ކަމެއް އެބަ އެނގޭ.” ޒިވް އެހެން ބުނެ އެއްމިޔަކަނުން ހިނިތުންވެލުމުން ދާނިޝްގެ މެއަށް ފިނިވިއެވެ. އޭނަ މިރޭ އެއްވެސް އެއްޗެކޭ ހިތަށް ނާރުވާ ބޮޑު ފާފައަކަށް އަރައިގަންނަންވީތޯ ހިތަށްއެރިއެވެ.

“ހިނގާދޯ އޯޑާރ ދޭން؟” ދާނިޝް އެ ޚިޔާލުތަކާއި ދުރުވާން ބުނެލިއެވެ. އަދި އަވަސްއަވަހަށް އެހެން ހިނގާފައި ދިޔަ ވެއިޓަރަކަށް ގޮވާލިއެވެ.

ކާއެއްޗެހި ގެނެވެންދެން އެދެމެދުގައި ދެކެވެން ފެށީ ޝޫޓިންގް ގެ ވާހަކައެވެ. އެ ވާހަކަތަކުގެ ތެރެއިން ވެސް ދާނިޝްއަށް އާދަޔާ ޚިލާފަށް ޒިވް އާއި ސަމާސާކޮށް ތަޢުރީފު ކުރެވެމުން ދިޔައެވެ. މިއީ ރީތި ލޯބީގެ ފިލްމެއްގެ މަންޒަރެއްގެ ގޮތުގައި ސިފަ ކުރެވެން ފެށިއެވެ. ޒިވް އާއި އެކީ ހޮޓެލް ގެ ރޫމަކަށް ދާ ޚިޔާލުތައް ވެސް ދޭތެރެ ދޭތެރެއިން ކުރެވެމުން ދިޔައެވެ. އެހެނަސް އޭގެއިން ކޮންމެ ފަހަރަކު ހިތަށް އާދަޔާ ޚިލާފު ނުތަނަވަސްކަމެއް ވަދެގެން ދެއެވެ.

އެ ޚިޔާލަށް އިތުރު ދިރުމެއް ލިބިގެން ދިޔައީ، ކެއުމުގެ ތެރެއިން ޒިވް ކޮށްލި ސުވާލުންނެވެ.

“ސޯ….ކެއުމަށްފަހު ކޮން ކަމެއް އޮތީ؟” ޒިވް ކޮށްލި އެ ސުވާލާއި އެކީ، އުލުން މަސްކޮޅު ކަފަމުން ދިޔަ ދާނިޝްގެ ޙަރަކާތަށް ހުއްޓުމެއް އައެވެ. އެވަގުތު ޒިވްގެ ލޮލުން ފެނުނު ވިދުވަރުން ހިތް ބާރަށް ތެޅެން ފެށިއެވެ.

“ކް…ކަމެއް ނެތް.” ދާނިޝްއަށް އެހެން ބުނެވުނީ ޖެހިލުންވުމަކާއި އެކީގައެވެ.

“އަސްލުވެސްތަ؟ އަހަރެން ހީކުރީ ދާނިޝް މިގޮތަށް އަހަރެން ރޭގަނޑު ހޮޓެލަކަށް ގެންނާނީ ކަމަކު ކަމަށް. މިއީ އަދި ދާނިޝް އަމިއްލައަށް އިސްނަގައިގެން ބޭއްވި ފުރަތަމަ ޑޭޓް އަދި. އައި ވޯޒް އެކްސްޕެކްޓިންގް މޯ…” ޒިވް ހިސާބަކަށް ދެރަވާ ކަމަށް ހެދި އިސްޖަހަމުން ބުންޏެވެ. ފިރިހެނެއްގެ ޙިއްސުތަކާއި ހުރިހާ އުކުޅެއް އޭނައަށް އެނގޭ ފަދައެވެ.

ދާނިޝް އޭނަގެ އުލާއި ވަޅި ތަށްޓަށް ދޫކޮށްލީ، ޒިވް އޭނަ މިތަނަށް ގެނައި ޙަޤީޤީ ސަބަބު ހަނދާންވުމުންނެވެ.

“ޒިވް…އަސްލު އެއްޗެކޭ ބުނަން ޒިވް މިތަނަށް މި ގެނައީ. އައި ރިއަލީ ލައިކް ޔޫ ޒިވް. އެހެންވީމަ އަސްލު….މިހެން އަހަން ބޭނުންވަނީ. ވިލް ޔޫ….މެރީ މީ؟” ދާނިޝްއަށް ބުނެވުނެވެ.

ނުނިމޭ