Hadhiya (Part 31)

“ހުރިހާ އައިޓީ މީހުންގެ ތެރެއިން ވެސް އައްޒާމް މި ޚިޔާރުކުރީ އައްޒާމް މި ކަންތަކަށް ކިހާ ޤާބިލުކަން އެނގޭތީ…..އަދި އެ ހެކަރުންނަށް ހެޔޮ ވިސްނުން ވިސްނައިދެވޭނެ މީހަކީ ވެސް އައްޒާމްކަން އެނގޭތީ.” އެ އަންހެން މީހާ ދެއްކި ވާހަކައިގެ ޒާތުން އައްޒާމްގެ ނިތަށް ރޫގިނަވިއެވެ. އޭނައަށް ހެކަރުންގެ ކިބައިން ސައިޓް ސަލާމަތް ކޮށްދެވުނަސް އެ ހެކަރުންނަށް ހެޔޮ ވިސްނުން ވިސްނައިދޭނީ ކިހިނެއް ހެއްޔެވެ؟ މިއީ އޮޅުމެއްގެ ތެރޭގައިވި އަންހެނެކޭ ހިތައި އައްޒާމަށް ވާހަކަ ދެކެވުނެވެ.

 

“އަމް…އަޅުގަނޑަކަށް އެ ހެކަރުންނަކާއި ވާހަކައެއް ނުދެއްކޭނެ. އެކަމަކު އިން ޝާ ﷲ ސައިޓް ރަނގަޅު ކޮށްދޭން ކުރެވެން އޮތްހާ ކަމެއް ކުރާނަން. ސައިޓްގެ ލިންކާއި ސައިޓް އެކްސެސްކުރަން ބޭނުންވާނެ މަޢުލޫމާތު ވައިބާރއިން މި ނަންބަރަށް ފޮނުވާލަދިނުން އެދެން.” އައްޒާމް އަދަބުވެރިކަމާއެކީ ބުނެލިއެވެ.

 

“އާދެ ފޮނުވާނަން. އެކަމަކު ބުނެލަން ބޭނުންވަނީ ވަރަށް އަވަހަށް މިކަމުގެ ފަހަތުގަ ތިބި މީހުން އައްޒާމްގެ ކައިރިއަށް ދާނެއޭ. ދިޔައިމަ އައްޒާމްވާނެ ސާބިތު ހިތަކާއެކީ ޙައްޤު ބަސް ބުނަން. މިއީ އައްޒާމްގެ ބޮޑު ދައްތައަކު ދިން ނަޞޭޙަތެއްގެ ގޮތުގަ ބަލައިގަތުން އެދެން.” އެކޮޅުން ދެއްކި ވާހަކައިން އައްޒާމް އިތުރަށް ޙައިރާންވުން ނޫންކަމެއް ނުވިއެވެ. އޭނަ ހިމޭންކަމުގެ ވަގުތުކޮޅަކަށް ފަހު އެއްޗެކޭ ބުނަން އުޅުނު ތަނާހެން މަޢުލޫމާތު އެބަ ފޮނުވަމޭ ބުނެ އެ އަންހެން މީހާ ފޯނު ކަނޑާލިއެވެ. އެއާއެކު ކުޑަ ސިހުމެއް ލިބުނު އައްޒާމް އޭނަގެ ފޯނު ކަންފަތުން ދުރުކޮށްލަމުން ފޯނުގެ ސްކްރީނަށް ބަލާލިއެވެ. އެހިނދު ޑޭޓާ އޮންކޮށްލެވިފައިވުމުން އޭނައަށް އައި ވައިބާރ މެސެޖާއިއެކީ ފޯނު ވައިބްރޭޓްވިއެވެ. އެ ވާނީ އެ އަންހެން މީހާގެ މެސެޖަކަށްކަން ޔަޤީން ކުރަމުން އައްޒާމް ވައިބާރ ހުޅުވާލިއެވެ. އޭނައަށް ހީވީ ރަނގަޅަށެވެ. އޭނައަށް މެސެޖުތަކެއް އައިސްފައިވީ ހަމަ އެ ދިގު ނަންބަރުންނެވެ. ނަމަކަށް ޖަހާލެވިފައިވީ ކުޑަ ހުދުކުލައިގެ ދޫންޏެއްގެ ފޮޓޯއެކެވެ. ސައިޓްގެ ނަމާއި ސައިޓްގެ އެޑްމިންއަށް ލޮގް އިން ކުރެވޭ ޔޫޒާރ ނޭމްގައާއި ޕާސްވޯޑްގައިވެސް ޖެހިފައިވީ ‘މުސްލިމާ’ އޭ ލިޔެވިފައިވި ގޮތުން އެ އަންހެން މީހާ އޭނަގެ ޝަޚްޞިއްޔަތު ފޮރުވަން މަސައްކަތް ކޮށްފައިވި މިންވަރު އައްޒާމަށް ފާހަގަވިއެވެ. އަންހެން މީހާގެ ވައިބާރ ފޮޓޯއަކަށް ލެވިފައިވި ފޮޓޯ އޭނައަށް ފާހަގަވީ އެހިނދެވެ. އެއީ 4 އަހަރަށްދާނެ ފިރިހެން ކުއްޖެއްގެ ފޮޓޯއެކެވެ. އޭނައަށް އެ ފޮޓޯއަށް ފިތާލެވުނީ އިޚްތިޔާރަކާއި ނުލައޭ ބުންޏަސް ދޮގަކަށް ނުވާނެއެވެ. ބޮޑުކޮށް ފެނިގެން ދިޔަ ފޮޓޯގައި ޕާކެއްގެ ތެރޭގައި ހިނިތުންވެ ހުރި ފިރިހެން ކުއްޖާ ފެނިފައި އެކުއްޖާ އޭނަ ދަންނަ މީހަކާއި ވައްތަރު ކަމަށް އައްޒާމްގެ ސިކުނޑި ބުންޏެވެ. އެހެނަސް އެއީ ކާކުކަން ހަނދާންކުރަން އުޅެއުޅެ އޭނައަށް ކާމިޔާބު ކުރެވޭ ގޮތެއްނުވިއެވެ. އެންމެ ފަހުން އޭނަ ވިސްނުމެއްގެ ތެރޭގައި ހުރެ އިސްއުފުލާލި ވަގުތު އޭނަގެ ކުރިމަތީގައި ހުރި ހަރުގަނޑު ތެރެއިން އެއްޗެއް ބަލަން ހުރި މީހަކު ފެނިފައި އޭނަ ހުއްޓުން އެރިއެވެ. އޭނަގެ ކުރިމަތިން ފެނުނީ އޭނަގެ ގާތް އެކުވެރިޔާ ހަސަން ނޫން ދެވަނަ މީހެއްނޫނެވެ. އެއާއެކު ކުއްލިއަކަށް ވީ އުފަލާއެކީ ހަސަންގެ ގާތަށް ދާން އުޅުނު ވަގުތު އޭނައަށް ނަގައިވުމުން އޭނައަށް ވިސްނެން ފެށިއެވެ.. އޭނައަށް ދެންމެ ފޮޓޯއިން ފެނުނު ކުއްޖާ ފެނިފައި ހަނދާންވީ ހަސަން ނޫން މީހަކު ނޫންކަން އެނގުނު ވަގުތު އައްޒާމަށް އެއްފަހަރު އެ ފޮޓޯއަށް އަނެއްފަހަރު ހަސަނަށް ބެލެމުން ދިޔައެވެ. އެކުއްޖާގެ އަލިމޫނާއި ކަޅު ފަން އިސްތަށިގަނޑާއި ހަސަންގެ ހުރި އެ ސިފަތަކާއި ވަތްކެއްވެސް ނުވެއެވެ. ހަމަ އެއާއެކު އައްޒާމަށް ވިސްނެން ފެށިއެވެ. އެ އަންހެން މީހާއަކީ ހަސަންގެ މަންމައަށް ވެދާނެތޯއޭ އައްޒާމްގެ ހިތް ސުވާލު ކުރިތަނާހެން އޭނައަށް ކެތްމަދުވެގެން ދިޔަ ހިތަކާއެކީ ‘ހަސަން’ އޭ ކިޔައި ގޮވާލަމުން އޭނަގެ ގާތަށް ދެވެން ފެށިއެވެ.

 

**

 

އައްޒާމްގެ އަޑަށް ހަރުގަނޑު ކައިރީގައި ހުއްޓިހުރި މުޙްސިނަށް އެ ދިމާލަށް ބަލާލެވުނެވެ. އޭނައާއި ދިމާލަށް އަންނަމުން ދިޔަ އައްޒާމް ފެނިފައި އެއްވެގެން ދިޔަ ޖަޒުބާތުތައް އޭނަގެ ހިތަށްވެރިވިއެވެ. އައްޒާމަކީ އޭނައާއި ދެބެއިންގެ ދެދަރި ކުއްޖެއްކަން ނޭނގިވެސް އޭނަގެ ގާތް އެކުވެރިޔަކަށް ވެފައިވި ފަރާތެކެވެ. މުޙްސިނަށް އެ ޙަޤީޤަތް އެނގުނީ އެދެމެދުގައި އެކުވެރިކަން ވަރުގަދަ ވެފައިވަނިކޮށެވެ. އައްޒާމްގެ ކާފަގެ ކޮޓަރިން އޭނައަށް ފެނުނު ފޮޓޯއަކުންނެވެ. އެ ފޮޓޯގައިވަނީ އޭނަގެ މަންމައާއި އައްޒާމްގެ މަންމަގެ ފޮޓޯއެކެވެ. އެ މަންޒަރު ފެނުނު ހިނދުވެސް މުޙްސިންގެ ގައިން ހީބިހި ނަގައިގެން ދިޔައެވެ. އެ ފޮޓޯގައި މަންމަގެ ކައިރީގައި ހުއްޓިހުރީ މަންމައަށް ކިތައް އަނިޔާއެއްކުރި މީހެއްކަން އެނގުންވުމުންނެވެ. ހަމަ އެ ހިނދު އައްޒާމަކީ އެ އަންހެން މީހާގެ ދަރިފުޅުކަން އެނގުނު ހިނދު އުފާވީ ވަގުތު ދެރަވެސްވިއެވެ. އުފާވީ އޭނައާއި އައްޒާމްގެ ދެމެދުގައި އެހާ ގާތްގުޅުމެއް އޮންނަކަން އެނގުމުންނެވެ. ދެރަވީ އައްޒާމް އެފަދަ އަނިޔާވެރި މީހެއްގެ ދަރިއަކަށްވުމުންނެވެ. މުޙްސިން އައްޒާމާއި ހާޝިމް ދޫކޮށްފައި ދިޔައީ އޭނަ އައްޒާމާއި އެކީގައި އުޅޭކަމުގެ ހިލަމެއްވެސް އެމީހުންނަށް ވެއްޖެނަމަ އެމީހުން އެކަމުގެ ފައިދާ ނަގާނެކަން އެނގޭތީވެއެވެ. މި ވާހަކަ އައްޒާމާއި ޙިއްސާކުރުމުން އައްޒާމް އޭނައަށް އިތުބާރު ކުރާނެކަން ޔަޤީނެއް ނުވީތީ އައްޒާމާއި ވަކިވާން މަޖުބޫރުވީއެވެ. އައްޒާމްވެސް އޭނަގެ މަންމަދެކެ ނުހަނު ލޯބިވާނެކަމަށް ހީކުރެވިފައި އޮތުމުންނެވެ.

 

ސިކުންތުކޮޅެއްގެ ތެރޭގައި އެތައް ޚިޔާލެއް މުޙްސިންގެ ސިކުނޑިއަށް ވެރިވެ ހުއްޓުމަކަށް އައި ވަގުތު އައްޒާމް އައިސް އުޖާލާވި ހިނިތުންވުމަކާއެކީ އޭނަގެ ގައިގައި ބައްދާލަން އަތް ހިއްލާލިއެވެ. އެ ހިނދު މުޙްސިން ވެސް އޭނަގެ ތުންފަތްމައްޗަށް ހިނިތުންވުމެއް ފަތުރާލަމުން އޭނަގެ ބޮޑު ‘ބޭބެ’ ގެ ގައިގައި ބައްދާލިއެވެ. އެ ހިނދު މުޙްސިނަށް ލޯތްބާއި ރައްކާތެރިކަން އިޙްސާސް ކުރެވުނެވެ. ކޮންމެ ޙާލެއްގައި ވެސް އައްޒާމް އޭނައަށް އެހީވާނެކަން އޭނައަށް ޔަޤީން ކުރެވުނީ ކީއްވެކަމެއް ނޭނގެއެވެ. އެހެނަސް އައްޒާމް އޭނައާއި ދުރުވެލީ ވަގުތުވެސް ހިތުގެ ކަނެއްގައި ނުތަނަވަސްކަމެއްވިއެވެ.

 

“ސޯ ހެޕީ ޓު ސީ ޔޫ ބްރޯ! ކޮންތާކު އުޅެފަތަ ތިއައީ؟ ހާދަ މިސްއެއްވިއޭ!” އައްޒާމް ހަމަ އެ ހިނިތުންވުމުގައި ހުރެ ވާހަކަ ދެއްކިއެވެ.

 

“ހެހެ….މާ ދުރަކަށް ނުދަން. އައްޑޫއަށް ދިޔައީ….ހައު އާރ ޔޫ؟” މުޙްސިން އެހިއެވެ. އެ ހިނދު ލިބިފައިވި އުފާވެރިކަމެއްގެ ސަބަބުން އައްޒާމް އޭނައަށް ދެންމެ ފެނުނު ފޮޓޯގެ މަތިން ހަނދާން ނެތިފައިވިއެވެ.

 

“އަލްޙަމްދުލި ﷲ! އަމިއްލައަށް ކިހިނެއްތަ؟ ކާކާ އެކީ މިހާރު ތިއުޅެނީ؟” އައްޒާމް ސުވާލުކުރިއެވެ.

 

“ހަމަ ރަނގަޅު އަލްޙަމްދުލި ﷲ! މިހާރު މިއުޅެނީ….ބައްޕައާއެކީ.” މުޙްސިން އިތުރަށް ދޮގު ހަދަން ބޭނުމެއް ނުވެފައިހުރެ ބުނެލިއެވެ.

 

“ރިއަލީ؟ ދެޓްސް ގްރޭޓް މާ ޝާ ﷲ!” އައްޒާމް އެހެން ބުނެލީ ޙަޤީޤަތުގައި ވެސް އޭނަގެ އެކުވެރިޔާއަށްޓަކައި އުފާވެފައިހުރިއެވެ. އޭނަ ހީކުރި ގޮތާއި ޚިލާފަށް އޭނަގެ އެކުވެރިޔާގެ ޢާއިލާއެއް އެބައޮތްކަން އެނގުންވުމުން އައްޒާމަށް ހިތާހިތުން ޙަމްދުކުރެވުނެވެ. ހަމަ އެއާއެކު ދެންމެ އޭނައަށް ފެނުނީ ހަސަންގެ ފޮޓޯއެއް ނޫންކަން އޭނައަށް ނޭނގި އޭނަގެ ސިކުނޑި ޔަޤީންކުރިއެވެ. މިއުޅެނީ ބައްޕައާއެކީގައޭ ބުނުމުން އައްޒާމަށް ނިންމުނީ ހަސަންގެ މަންމަ ނިޔާވެފައިވީ ކަމަށެވެ. ވިސްނުމެއްގެ ތެރޭގައި އައްޒާމް ވަނިކޮށް އޭނައަށް އައި ބަދަލެއް ފާހަގަކުރެވުނު މުޙްސިނަށް ވާހަކަ ދެކެވުނެވެ.

 

“ޒާމް ވެސް މިހާރު ހާދަ މާ ޝާ ﷲ އިން ޝާ ﷲ ވެގެންނޭ ތިއުޅެނީދޯ؟ ކޮން ބޭހެއް ކައިގެންތަ ތިއުޅެނީ އަނެއްކާ؟” މުޙްސިން އެ ސުވާލުތައް ކޮށްލީ އެއްދުވަހު އައްޒާމްވެސް އޭނައާއި އެ ޒާތުގެ ސުވާލެއްކޮށްލި ރާގަކަށެވެ. އެއާއެކު އައްޒާމަށް ހީލެވުނެވެ.

 

“ހެހެ….ދެން ބަދަލުވެސް އަންނާނެތާ ދޯ ﷲ ގެ އިރާދަފުޅުން؟ އަބަދު އެއްގޮތަކަށް ކަންތައް ނޯންނާނެ….މިއުޅެނީ ސެންޓަރު ވެސް ބޮޑުކޮށްގެން. ވަރަށް އަވަހަށް މެރީވެސް ކުރަން މިއުޅެނީ.” އައްޒާމަށް ފަހު ޖުމްލަ އިތުރުކޮށްލެވުނީ އޭނަ އެ ވާހަކަ ޙިއްސާކުރަން ބޭނުންވެފައިވި މިންވަރުންނެވެ.

 

“އައްދޭ!!! އަދި ނުވެސް ބުނެއެއްނު ތި ހުންނަނީ މަގޭ ކައިރި؟! ސައި ނުދޭތި މަށަށް ނާންގާ! ދުނިޔޭގެ ދެކޮޅު ދައްކާލާނަން!” މުޙްސިން ސަމާސާވެރި ރާގަކަށް އެހެން ބުނެލީ އޭނަގެ ހުރިހާ ނުތަނަވަސްކަމެއްގެ މަތިން ވެސް ހަނދާން ނައްތާލަމުންނެވެ. އޭނަ ބުނެލި ވާހަކައިން އައްޒާމަށް ހެވެން ފެށުމުން އޭނައަށް ވެސް ހެވުނެވެ. އެމީހުންނަށް އިތުރު ވާހަކައެއް ނުދެއްކެނީސް އައްޒާމަށް ފޯނެއް އަންނަން ފެށިއެވެ.

 

“އޫޕްސް….ކާފަ. ލަސްވެގެން އެ ގުޅަނީ. ދަނީ އިނގޭ މިތަނުން މީތި ހިފައިގެން. ކާފައަށް ކެވޭތޯ ބަލަން. ކުޑަކޮށް ބަލިވެ އުޅެނީ….ޚަބަރެއް ވެލައްޗޭ! އަހަރެން އަތުގަ އޮންނާނީ ހަމަ އޭރުގެ ވެސް ނަންބަރު.” އައްޒާމް ވާހަކަ ދައްކަމުން އެތާހުރި ހަރުން ކަދުރު ޕެކެޓެއް ނަގައިގެން ހިނިތުންވެލިއެވެ. މުޙްސިން ވެސް ހިނިތުންވުމަކާއެކީ ބޯޖަހާލުމުން އައްޒާމް އަވަސް ފިޔަވަޅުތަކެއްގައި އޭނައަށް ފަސްދީފައި ދިޔައެވެ. އައްޒާމް މުޙްސިންގެ ލޯމައްޗަށް ގެއްލުނުތަނާހެން އޭނަގެ ފަހަތުން އައި އޭނަގެ ބައްޕަގެ އަޑު އިވުނެވެ.

 

“ކާކާ މާ ގިނަ ވާހަކައެއް ތިދެއްކީ ދެންމެ؟” ގަތް އެއްޗެހި އަޅާފައި ހުރި ޓްރޯލީ ކޮއްޕަމުން އެތަނަށް އައި މިރްޒާން އެހިއެވެ.

 

“އެއީ….ކުރީގަ އެކުގަ އުޅުނު ފްރެންޑެއް. އަ….ހިނގާދޯ މިތަނުން މީތި ނަގަން؟” މުޙްސިން އައްޒާމްގެ ނަން ބުނަން އުޅެފައިވެސް ހަރުގައި ހުރި ޗީޒް ދަޅެއް ނަގަމުން ވާހަކަ އޮޅުވާލިއެވެ. އައްޒާމްގެ ވާހަކަ ދައްކައިފިނަމަ އޭނައަށް ހުއްޓުމެއްނެތި އައްޒާމްގެ މަންމައާއި ބައްޕަގެ ވާހަކަ ދެއްކޭނެކަން ވެސް އެނގުންވުމުންނެވެ. އެދެމީހުން އޭނަގެ މަންމައަށް ޖެއްސި ޙާލުގެ ސަބަބުން އެމީހުންގެ ނަންގަންނަން ވެސް މުޙްސިނަށްވަނީ ދަތިކަމަކަށެވެ. އެވަގުތު ވެސް އެ ވާހަކަ ދައްކަން ނުކުޅެދުނީ އެހެންވެއެވެ.

 

**

 

އެދުވަހު ގެއަށް ގޮސް އައްޒާމް އެންމެ ފުރަތަމަ ކަމަކަށް އޭނަގެ ކާފަގެ ޙާލު ބެލީއެވެ. ގެއަށް ދިޔައީއްސުރެ ރޭގަނޑު ވަންދެން ވެސް އޭނަ އުޅުނީ ކާފައާއި އެކީގައޭ ބުންޏަސް ދޮގަކަށް ނުވާނެއެވެ. ހުމާއި އަރިދަފުސް ރޯގާއާއެކީ ހާޝިމް ދޭތެރެދޭތެރެއިން ގަދައަށް ކެއްސަމުން ވެސް ދިޔައެވެ. އެހެނަސް އައްޒާމްގެ ހިތްވަރުން ހާޝިމަށް ރަނގަޅަށް ކާންދީފައި ބޭސް ދިނުމުން މަޣްރިބާއި ގާތްވަމުން ދިޔަ ވަގުތު ހާޝިމްގެ ހުން ފިނިވެފައިވިއެވެ. ކާފަ ކުޑަކޮށް އަރާމުކުރަން އޮށޯތުމުން އައްޒާމް ވަގުތުން ދިޔައީ މިއަދު އޭނައަށް ގުޅި އަންހެން މީހާގެ ސައިޓްގެ ޙާލަތު ބަލާލުމަށެވެ. ލެޕްޓޮޕުން އެ ސައިޓަށްވަދެ އޭނަ ބަލާލިއިރު ހަމަ ޙަޤީޤަތުގައި ވެސް އެ ސައިޓްގައި ލިޔެވިފައިވީ ދީނަށް ނަފްރަތު ކުރާ މީހުންގެ ލިޔުންތަކެވެ. އެ ލިޔުންތައް ފެނުނު ފުރަތަމަ ސިކުންތުގައި އައްޒާމްގެ ބުމަގޮށްޖެހުނެއްކަމަކު މާ ގިނައިރެއްނުވެ އޭނައަށް ހެވުނީ އެ ވާހަކަތަކަށް މަލާމާތްކުރާ ފަދައަކުންނެވެ. އެމީހުން އެ ވާހަކަތައް ދައްކަނީ ވަރަށް ސާބިތު ފައިތިލައެއްގެ މަތީގައި ތިބެގެންހެން އެމީހުންނަށް ހީވާނެދޯ އޭ ހިތަށްއެރުމުންނެވެ. އެ ވާހަކަތައް ދައްކައިގެން އެމީހުންނަށް އެ ހަޖޫޖެހެނީ ޚުދު އަމިއްލަ ނަފްސުތަކަށް ކަމެއްވެސް ނޭނގެއެވެ. މާމަތީގައިވި އަލިގަދަ އިރަކާއި ދިމާލަށް ކުޅުޖަހަން މަސައްކަތް ކުރުމުން އެ ކުޅު ޖެހި މީހެއްގެ މޫނަށް އޭތި އަނބުރާ އަންނަ ބީދައިން، ﷲ ގެ ދީނަށާއި އެކަލާނގެ ރަސޫލާ ޞައްލަ ﷲ ޢަލައިހި ވަސައްލަމްއަށް މަލާމާތްކުރުމުން އެ މަލާމާތްތައް އެމީހުންނަށް އަނބުރާ ރައްދުވެއެވެ. އެހެނީ އެމީހުން އެ ވާހަކަތައް ދައްކަނީ ވަކި ވިސްނުމުގެ ބޭނުން އެހާ ރަނގަޅަށް ބޭނުން ކުރުމެއްނެތި ހަމައެކަނި އަމިއްލަ އެދުމެއްގެ ބޭނުމުގައި ކަމަށްވުމުންނެވެ. ދީނާއިމެދު ވިސްނަން ވެސް ބޭނުމެއްނުވަނީ އަމިއްލަ ހަވާ ނަފްސުތަކުގެ އަޅުންނަށްވުމަށެވެ. އެ އަޅުވެތިކަމުން މިނިވަންވެ ހަމައެކަނި ﷲ އަށް އަޅުވެތިވުމުން ނޫނީ ޙަޤީޤީ މިނިވަންކަން އިޙްސާސެއް ނުކުރެވޭނެކަން ނޭނގިއެވެ. މި ފަދަ ޚިޔާލުތަކެއްގައި ހުރެ އައްޒާމް އެ ސައިޓް ރަނގަޅުކުރުމުގެ މަސައްކަތް ފެށިއެވެ. އޭނަ އެ މަސައްކަތް ފެށިތާ މާ ގިނައިރެއްނުވެ މަޣްރިބް ނަމާދަށް ބަންގި ގޮވަން ފެށިއިރަށް އޭނަ ކާފައާއެކީ ގޭގައި ނަމާދުކުރަން އަވަސްވިއެވެ. އޭނަ މަސައްކަތެއް ކުރަން ހުރީ ﷲ ގެ ދީނަށްޓަކައި ކަމަށްވިޔަސް އައްޒާމް އޭނަގެ ނަމާދާއި ޒިކުރުތައް އަވަސް އަރުވައެއް ނުލިއެވެ. އޭގެ ބަދަލުގައި އޭނަގެ އެ މަސައްކަތުގެ ވާހަކަވެސް ﷲ ގެ ޙަޟްރަތުގައި ދަންނަވައި އޭނައަށް ކާމިޔާބީ ދެއްވުމަށްއެދި އިޚްލާޞްތެރި ހިތަކާއެކީ ދުޢާކުރިއެވެ. ކޮންމެ ކަމެއްގައި ވެސް އޭނައަށް ކާމިޔާބު ލިބުންވަނީ ހަމައެކަނި ﷲ ގެ ޙަޟްރަތުންކަން ޔަޤީންވާތީވެއެވެ. މަޣްރިބް ނަމާދަށްފަހު އަނެއްކާވެސް މަސައްކަތުގައި އުޅެފައި އައްޒާމް ޢިޝާ ނަމާދުވެސް ވަގުތުން އަދާކުރިއެވެ. އެއަށްފަހު ވެސް އޭނައަށް މަސައްކަތް ނިންމާލެވުނީ އޭގެ ގަޑިއިރެއްހާއިރު ފަހުންނެވެ. މަސައްކަތް ކާމިޔާބު ކުރެވުމުން ލިބުނު ހިތްހަމަޖެހުމާއެކީ އައްޒާމަށް ހިނިތުންވުމަކާއެކީ ޙަމްދުކުރެވުނެވެ. އަދި ސައިޓްގެ ލިންކް އެއްކަލަ އަންހެން މީހާއަށް ފޮނުވާލީ އުފާވެރިކަން ވެރިވެފައިވި ހިތަކާއެކީގައެވެ. އޭގެ މާ ގިނައިރެއްނުވެ އެ އަންހެން މީހާ ‘ޖަޒާކަ ﷲ ޚައިރަން’ އޭ ބުނެ މެސެޖެއް ކުރިއެވެ. އެއަށްފަހު އައްޒާމަށްޓަކައި ދުޢާއެއްކޮށްފައިވެސް މެސެޖެއް ފޮނުވާފައިވިއެވެ. އައްޒާމް ފޮނުވި ‘އާމީން’ އާއެކީ އެ ވާހަކަ ނިމުމަކަށް އައެވެ.

 

**

 

އެރޭގެ އެ ވަގުތު މިރްޒާނާއި މުޙްސިން ތިބީ ޓީވީ ބަލާށެވެ. ދެމީހުން ނުހަނު ޝައުޤުވެރިކަމާއެކީ ބަލަން ތިބީ ބޮޑު މަހާއި ބެހޭގޮތުން ފޮނުވަމުން ދިޔަ ޑޮކިއުމެންޓްރީއެކެވެ. ޑޮކިއުމެންޓްރީގެ މެދުތެރެއިން އިޝްތިހާރު އައުމުން ދެމީހުންނަށް ވެސް ހަމަހޭވެރިކަމެއް ލިބުނެވެ.

 

“އަމޭޒިންގް ދޯ ބައްޕާ؟ ސުބްޙާނަ ﷲ! ވޭލް ފެންނަ ކޮންމެ ފަހަރަކު އަހަރެންގެ ހިތަށްއަރާ ޔޫނުސް ޢަލައިހިއްސަލާމް ވީ އޭގެ އެއްޗެއްގެ ބަނޑު ތެރޭގައޭ.” މުޙްސިން ބުނެލިއެވެ.

 

“ހެހެ….މަންމަ ކިޔައިދިން ވާހަކަތައް ދޯ ތީ؟” މިރްޒާން އާދައިގެ މަތިން އަމްނާގެ ވާހަކައެއް އަހާލީ ޝައުޤުވެރިކަމާއި އެކީގައެވެ.

 

“އާނ….މަންމަ ވަރަށް ކިޔައިދޭނެ. އަދި އާޔަތްތައް ވެސް ކިޔައިދޭނެ. ހިތަށްއަރަނީ އަސްލު އެ ނަޞޭޙަތްތަކުގެ ސަބަބުންނޭ އެކަނި މިހާ ހިސާބަށް އައިއިރު ވެސް ރަނގަޅަށް މި އުޅެވުނީ…” މުޙްސިން ވިސްނުމެއްގެ ތެރެއަށް ގެއްލެމުން ބުނެލިއެވެ. މިރްޒާން އެ ވާހަކައަށް ބޯޖަހާލިއެވެ.

 

“ރަނގަޅަށް ތި ބުނީ. ކިތަންމެ ކުޑަ ނަޞޭޙަތަކުން ވެސް ﷲ ގެ އިރާދަފުޅުން މީހަކަށް ހިދާޔަތް ލިބިގެންދޭ.” މިރްޒާން އެހެން ބުނަމުން ޗެނަލް ބަދަލުކުރަން ފެށިއެވެ. އޭގެ މާ ގިނައިރެއްނުވެ އޭނަ މަސައްކަތް ކުރާ ޗެނަލާއި ދިމާވިއެވެ. ޗެނަލުން ފޮނުވާފައިހުރީ މީގެ ދެރެއެއްހާ ކުރިން މާލޭގެ މަގެއްގައި ހިނގި މުޒާހަރާއެއްގެ މަންޒަރުތަކެވެ. އެއީ ސަރުކާރު ހިންގާ ޕާޓީއިން އެމީހުންނަށްވުރެ ބޮޑަށް ތާޢީދު ލިބިފައިވި ޕާޓީއާއި ދެކޮޅަށް ބާއްވާ މުޒާހަރާއެކެވެ. ސަރުކާރު ހިންގާ ޕާޓީގެ ދައުރަށް ދުވަސްވެފައިވުމާއެކު އެ ޕާޓީގައި ހުރި ނޭދެވޭ ކަންތައް ގިނަ ރައްޔިތުންނަށް އާއްމުވެ އެމީހުންނާއި ދެކޮޅުވަމުން ދާތީވެއެވެ. ޓީވީއިން ފެންނަމުން ދިޔަ މަންޒަރުތަކުން މަގުމަތީގައިވި އެތައް ބަޔަކަށާއި ޚަބަރު ގެނެސްދޭން ހުރި ޕްރެޒެންޓަރަށް ވެސް ޙަމަލާތައް އަމާޒުވެ ޒަޚަމްވި މަންޒަރު ފެނުނެވެ.

 

“އޯ ނޯ! ފަޔާ…” ފަޔާޒްގެ މޫނަށް މީހަކު ވިއްލާލި އެތިފަހަރަކާއެކީ އޭނަ ވެއްޓުނު މަންޒަރު ފެނިފައި މިރްޒާނަށް ކިޔާލެވުނެވެ. އޭނައަށް ކުރިން ވެސް މި ވާހަކަ އިވިފައިވިއެއްކަމަކު މަންޒަރު މިފެނުނީ އަދި ކިރިޔާއެވެ.

 

“އެއީ ބައްޕަ ދަންނަ މީހަކީތަ؟ މިއީ ބައްޕަމެންގެ ޗެނަލްދޯ؟” މުޙްސިން އެހިއެވެ. މިރްޒާން ދެންވެސް ޓީވީއަށް ބަލަން އިނދެ ތުންފިއްތާލަމުން ބޯޖަހާލިއެވެ.

 

“ބައްޕަ ނުދަންތަ މިކަހަލަ ތަންތަނަށް؟” މުޙްސިން ސުވާލުކުރިއެވެ. އެއާއެކު މިރްޒާނަށް މުޙްސިނާއި ދިމާލަށް ބަލާލަމުން އެ ސުވާލާއިމެދު ވިސްނެން ފެށިއެވެ. އޭނަ އެ ޒާތުގެ ކަންތަކުން ދުރުވީ ކޮން ސަބަބަކާހެދިކަން އެވަގުތު މިރްޒާންގެ ހަނދާނަށްއައެވެ. އަމްނާ އޭނައާއި ވަކިވުމުގެ ސަބަބުތަކުގެ ތެރެއިން އެންމެ ބޮޑު ސަބަބަކީ އޭނަ ނޫސްވެރިޔަކަށްވުމުން ކަން އޭނައަށް އިޙްސާސް ކުރެވުނީއެވެ. އޭނަ ތެދު ޚަބަރު ފަތުރަން މަސައްކަތް ނުކުރިނަމަ މައިސޫން ރުޅި ނައީހެވެ. މައިސޫން ރުޅި ނައި ނަމަ އޭނަގެ ޢާއިލާ އެފަދަ ބޮޑު އަނިޔާއެއްގެ އަމާޒުފަތްގަނޑަކަށް ނުވީހެވެ. ނޫސްވެރިކަމާއި އޭނަ ދުރުވެލީ އެހެންވެއެވެ. އެހެންނޫނަސް އޭނަ އެފަދަ ވަޒީފާއެއްގައި އުޅެފައި އޭނަ އަނބުރާ ގެއަށް އަންނާނީ ކާކު ކައިރިއަށްތޯ މިރްޒާންގެ ހިތަށް އޭރު އެރިއެވެ. އޭނައަށް ކޮންމެ ދުވަހަކު ކުރިއަށް ދާން ހިތްވަރު ދެމުން ދިޔައީ އަމްނާގެ ސާބިތުކަން އެކުލެވިފައިވި ބަސްތަކެވެ. މިއަދު އޭނަ އެ ނިޢުމަތުން މަޙްރޫމްވެފައިވުމުން ދެން އެ ދާއިރާއިން ކުރިއަށް ނުދެވޭނެހެން ހީވި ވަގުތު މިރްޒާނަށް ވާހަކަ ދެކެވުނެވެ.

 

“ނުދަން.” މިރްޒާން ޖަވާބުގައި ބުނެލީ ހަމައެކަނި އެހާވަރަށެވެ. އޭނަ ހިތްދަތިކުރުވާ އަމްނާގެ ހަނދާންތައް އާ ނުކުރުމަށް ގަދައަޅަމުންނެވެ.

 

“އެއީ ކީއްވެ ބައްޕާ؟ އަސްލު ވަރަށް މުހިއްމު ކަމެއްނޫންތަ މި ސިޔާސީ މީހުން ދައްކާ ދޮގުތަކާއި އިދިކޮޅަށް ވާހަކަ ދެއްކުމީ؟ މަންމަ ލިޔުނު ފޮތެއްގަ ވެސް އެ ވާހަކަ ލިޔުނު.” މުޙްސިން ބުންޏެވެ. އެއާއެކު މިރްޒާން ލުއި ގޮތަކަށް ހީލިއެވެ.

 

“ރަނގަޅަށް މަންމަ އެ ބުނީ. އެކަމަކު އެއީ ވަރަށް ދަތި މަސައްކަތެއް. މިހާރުވެސް ބަލާބަ އެ ނޫސްވެރިޔާއަށްވީ ގޮތް.” މިރްޒާން ޓީވީއަށް ޢިޝާރާތް ކުރަމުން ބުނެލިއެވެ.

 

“ދަތި ކަމަކަށް ވިޔަސް ﷲ އަށްޓަކައި މުސްލިމުންގެ މެދުގައި އެއްބައިވަންތަކަން ޤާއިމްކުރަން މަސައްކަތް ކޮށްފިނަމަ އެކަމަށް ނަޞްރު ދެއްވާނީ ހަމައެކަނި ﷲ! إِن تَنْصُرُ اللّهَ يَنْصُرْكُم وَيُثَبِّتْ أَقْدَامَكُمْ….” މުޙްސިން ވާހަކަ ދައްކަމުން ގޮސް އޭނަގެ އާދައެއްގެ މަތިން އާޔަތެއް ކިޔާލިއެވެ. ކޮންމެ ފަހަރެކޭވެސް އެއްފަދައިން މުޙްސިންގެ ދުލުން އާޔަތެއް އިވުމުން މިރްޒާނަށް ހިނިތުންވެލެވުނެވެ. އެހެނަސް އެހެން ފަހަރުތަކާއި ޚިލާފަށް އެ ހިނިތުންވުމުގައި ޙައިރާންކަމެއް އެކުލެވިގެން ދިޔައީ މުޙްސިން ދެންމެ ކިޔާލީ ޚުދު އަމްނާ ވެސް އޭނައަށް އެ ނަޞޭޙަތް ދީފައި ކިޔުނު މުޙައްމަދު ސޫރަތުގެ އާޔަތްކަން އެނގުންވުމުންނެވެ. އެ ހިނދު ލޯބިން ފުރިގެން ދިޔަ ހިތަކާއެކީ މިރްޒާނަށް އަނެއްކާވެސް ބޯޖަހާލަމުން އިން ޝާ ﷲ އޭ ކިޔާލެވުނެވެ.

 

އޭގެ އިރުކޮޅެއް ވަންދެން އެ ދެމީހުން ސޯފާގައި ތިބެފައި ތެދުވެލީ ނިދާލަންވީ ކަމަށް ބުނަމުންނެވެ. އެހެނަސް އެވަގުތު ދެމީހުން ވެސްވީ ނިދޭނެފަދަ ޙާލެއްގައެއް ނޫނެވެ. ދެންމެ ދެކެވިގެން ދިޔަ ވާހަކައިން އަމްނާގެ ޚިޔާލުތަކުން މިރްޒާންގެ ސިކުނޑި ފުރިގެން ދިޔައިރު މުޙްސިންވެސް އޭނަގެ މަންމަ މަތިން ހަނދާންވާންފެށީ މާ ބޮޑަށެވެ. މުޙްސިން ކޮޓަރިއަށް ގޮސް ވަގުތުން ނެގީ އޭނަގެ އަތުގައި ހުރި މަންމަގެ ފޮތްތަކުގެ ކޮޕީތަކުގެ ތެރެއިން ކޮޕީއެކެވެ. އެއީ ޒުވާން މުސްލިމް ކުދިންނަށް ޚާއްޞަކޮށްގެން އޭނަގެ މަންމަ ލިޔެފައިވި ފޮތެވެ. އާދައިގެ މަތިން މުޙްސިން ކިޔަވާ މޭޒުދޮށުގައި އިނދެ އެ ފޮތް ކިޔަން ފެށިތާ މާ ގިނައިރެއްނުވެ އޭނަގެ ލޯ ކަރުނުން ފުސްވެ އޭގެއިން ކަރުނަތަކެއް އައިސް އެ ފޮތުގެ ޞަފްޙާއެއްގައި ޖެހުނެވެ. ހަމަ އެހިނދު އޭނައަށް ހިތާހިތުން އޭނައާއި އޭނަގެ މަންމަ ގުޅުވައިދިނުމަށް އެދި ދުޢާ ކުރެވުނެވެ.

 

އެއްދުވަސްވަރެއްގައި އޭނައާއި އަމްނާ ޙިއްސާކުރި ކޮޓަރީގެ އެނދުގައި އިށީނދެ އިން މިރްޒާންގެ ޙާލަކީ ވެސް އެއީއެވެ. ކޮންމެ ރެއެކޭ ވެސް އެއްފަދައިން އޭނައަށް އެރޭވެސް ކެތްތެރިކަން ކޮޅުން ލަމުން ދިޔަ ހިތަކާއެކީ އަމްނާގެ ނަން ގޫގުލްއިން ސާރޗްކުރެވެމުން ދިޔައެވެ. ނަން ސާރޗްކުރާއިރަށް އަމްނާ ލިޔެފައި ހުރި ފޮތްތަކުގެ ނަންތައް ފެނެއެވެ. އެހެނަސް އޭގެއިން އެއްވެސް ލިންކަކުން އަމްނާގެ ފޮޓޯއެއް ފެންނަ ގޮތެއްނުވެއެވެ. މުޙްސިން ބުނި ގޮތުގައި މަންމަ ބޭނުންވި ގޮތަކީ އެއީއެވެ. އޭގެ ސަބަބުން ވެސް މިރްޒާންގެ ހިތުގައި އަމްނާއަށްޓަކައި އިތުރު ލޯތްބެއް އުފެދުނެވެ. އޭނައަށް އެވަގުތު މުހިއްމުވީ ވެސް ފޮޓޯއެއް ނޫނެވެ. އެއަށްވުރެ ބޮޑަށް މުހިއްމުވީ އަމްނާ ހުންނާނެ ތަނެއްގެ މަޢުލޫމާތެވެ. އަމްނާއަކީ ލިޔުންތެރިއެއްކަން އެނގި މުޙްސިންގެ ޙަޤީޤަތް ވެސް އެނގުނު ފަހުން މިރްޒާނާއި މުޙްސިން ވެގެން އަމްނާގެ ފޮތްތައް ޝާއިޢުކުރި ތަންތަނަށް ގުޅާފައިވެސް އަމްނާގެ މަޢުލޫމާތު ލިބޭތޯ މަސައްކަތް ކުރިއެވެ. އެހެނަސް އަމްނާ އެންމެ ފަހުން ވެސް ފޮތެއް ނެރެފައިވަނީ މީގެ 5 އަހަރު ކުރިން ކަމަށްވުމުން އެމީހުންނަށް އެއްގޮތަކަށް ވެސް އަމްނާ ވީތަނެއް އެނގޭ ގޮތެއްނުވިއެވެ. މީސްމީޑިޔާގެ އެކިއެކި ތަންތަނުން ވެސް އަމްނާގެ ނަން ހޯދާ ގޮޅީގައި ޖަހައިގެން އެ ނަމާއި ގުޅޭ ޕްރޮފައިލެއް ފެނޭތޯ ވަރަށް މަސައްކަތް ކުރެއެވެ. އެހެނަސް ކޮންމެ ރެއަކު އެ މަސައްކަތް ހުއްޓާލަންޖެހެނީ ވަރުބަލިވެގެންދާ ހިތަކާއި އެކީގައެވެ. އެރޭވެސް މިރްޒާނަށް އެންމެ ފަހުން އޭނަގެ ފޯނު ލޮކްކޮށްލެވުނީ ބޮލުގައި އުފެދުނު ރިހުމާއެކީ މޭމައްޗަށް ވެސް ތަދުވާން އުޅުނުހެން ހީވުމުންނެވެ. އެ ތަދާއިމެދު މިހާރު އޭނަ ވާ ނުތަނަވަސްކަމެއްގެ ސަބަބުން މިރްޒާން ފުން ނޭވައެއް އެތެރެއަށް ލައި ބޭރުކުރަމުން ރަނގަޅު ޚިޔާލުތައް ކުރެވޭތޯ މަސައްކަތް ކުރިއެވެ. އެހެނަސް އެކަން ކާމިޔާބެއްނުވިއެވެ. އަމްނާއާއެކީ ހޭދަކުރި އުފާވެރި ވަގުތުކޮޅުތައް އޭނަގެ ލޯކުރިމަތިން ސިފަވަމުން ދިޔަދިޔަހެން އޭނަގެ ލޮލަށް ވެސް ކަރުނަތައް ޖަމާވާން ފެށިއެވެ. އެ ދުވަސްތައް އަނބުރާ އަންނާނެނަމައޭ ހިތް ބުނަން ފެށިއެވެ. ހަމަ އެ ހިނދު އޭނަ އަމްނާ މަތިން މިހާ ހަނދާންވާއިރު އަމްނާ އޭނަ މަތިން ހަނދާންވާނެތޯ މިރްޒާންގެ ހިތް ސުވާލުކުރިއެވެ.

 

**

 

އެރޭގެ އެ ހިނދު ލަންޑަނަށް ދަންވަރު 3:30 ވާން ގާތްވެފައި ވަނިކޮށް އާދައިގެ ކޮޓަރިއެއްގެ އެނދުމަތީގައި ހިމަތޮޅި ހަށިގަނޑެއްގެ ވެރި އަންހެނަކު އިށީނދެގެން އިނެވެ. ގަޔަށް ދޫކޮށްއޮތް އަތްދިގު ޓީޝާޓަކާއި ހަރުވާޅެއް ލައިގެން އަންހެން މީހާ އިންއިރު އެއީ ޒުވާން ފުރައިގެ ކުއްޖެއްހެން ހީވެއެވެ. އެހެނަސް ދޫކޮށް އައްސާލެވިފައިވި ކޮނޑަށްވުރެ ތަންކޮޅެއް ތިރިއަށް އޮތް އިސްތަށިގަނޑުގެ ދޭތެރެއިން ފަޅާފައިވި މަދު ނުރަތަކުން އޭނަވަނީ ދުވަސްވެފައިކަން އެނގެއެވެ.

 

އަންހެން މީހާގެ ނަޒަރު ހުއްޓިފައިވީ އޭނަގެ އަތުގައި އޮތް ފޯނަށެވެ. ފޯނުން ހުޅުވާލެވިފައިވީ 10 އަހަރަށްދާ ފިރިހެން ކުއްޖެއްގެ ފޮޓޯއެކެވެ. ރަނގަޅަށް އެ ފޮޓޯއަށް ބަލައިފިނަމަ ހިނިތުންވުމެއްގައި އެ ފޮޓޯގައި ހުރީ މުޙްސިންކަން މުޙްސިން ފެނިފައި ހުރި މީހަކަށް ޔަޤީންވާނެއެވެ. މުޙްސިންގެ ފޮޓޯއަށް އެ އަންހެން މީހާގެ ނަޒަރު ހުއްޓުނުތާ މާ ގިނައިރެއްނުވެ ކަރުނަތަކެއް އައިސް އެ ފޯނުގެ ސްކްރީނުގައި ޖެހުނެވެ. އޭގެ އިރުކޮޅެއް ނުވެ އަންހެން މީހާ ކަރުނަތައް އޭނަގެ ކޯތާފަތުންނާއި ފޯނުން ވެސް ފޮހެލަމުން ފޭސްބުކަށް ވަދެލިއެވެ. ފޭސްބުކްގައި ‘މުސްލިމާ’ ގެ ނަމުން ހުޅުވާލެވިފައިވި ޕްރޮފައިލް ޕޭޖް ފެނުނެއްކަމަކު އޭނަ އިތުރު ތަނަކަށް ނުފިތައި ހޯދާ ގޮޅިއަށް ފިތާލިއެވެ. އެއަށްފަހު ތުރުތުރު އަޅަމުން ދިޔަ އަތަކުން ‘އެމް’ އަކުރު އަޅާލިއެވެ. އޭގެ އިރުކޮޅެއް ފަހުން ‘އައި’ އަޅާލިއެވެ. މިފަދައިން ގޮސް ބައި މިނެޓެއްގެ ތެރޭގައި ލިޔެ ނިމުނީ މިރްޒާންގެ ނަމެވެ. މިރްޒާންގެ ފުރިހަމަ ނަން އެރުމާއެކު އަންހެން މީހާ އެ ނަމަށް ފިތާލިއެވެ. މިރްޒާންގެ ޕްރޮފައިލް ހުޅުވި އެންމެ ފުރަތަމަ ބަގީޗާއެއްގެ މަންޒަރެއްވި ކަވާރ ފޮޓޯ ފެނި ލޯޑް ނުވުމުގެ ސަބަބުން ޕްރޮފައިލް ޕިކްޗާރއަށްވީ ހުދުކުލަ އަރާފައެވެ. ސިކުންތުކޮޅެއްފަހުން މިރްޒާން ހިނިތުންވުމެއްގައި ހުރި ފޮޓޯއެއް އެތަނުން ފެނިގެން ދިޔަތަނާހެން އަންހެން މީހާ ހާސްވެގެން ދިޔަ ނޭވާއަކާއެކީ ފޯން ލޮކްކޮށްލަމުން ބިރުން ކަހަލަ ގޮތަކަށް އޭތި ދުރަށް އެއްލާލިއެވެ. ސިންގަލް ބެޑްގެ މެދާއި ހިސާބުގައި ފޯނު ޖެހުނު ވަގުތު އަންހެން މީހާއަށް ގިސްލެވެން އުޅުނުހެން ވެސް ހީވިއެވެ. އެހެނަސް އޭނަ ދެވަނަ ފަހަރަށް ވެސް ލޯމަތިން އެއްއަތް ހިންގާލަމުން ކޮޅަށް ތެދުވެލިއެވެ. އެއަށްފަހު އެ ކޮޓަރީގައި ހުރި ކުޑަ ކިޔަވާ މޭޒުގެ ކައިރިއަށް ދިޔައެވެ. އެ މޭޒުގެ މެދަށްވާ ގޮތަށް ބެހެއްޓިފައިވީ ޕާރުސަލެކެވެ. އެ ޕާރުސަލުގައިވީ މިރްޒާނާއި އަމްނާގެ ދެމެދުގައި ބަދަލުވެ ދިޔަ ހަދިޔާތަކުގައި އާއްމުގޮތެއްގައި ހުންނަ ދެކުލައެވެ. އަންހެން މީހާ އެއަށް ބަލަހައްޓައިގެން ހުރެފައި އޭގެ ކައިރީގައި ބޭއްވިފައި އޮތް ތުނި ތުނޑެއް ހުރި މާކަރެއް ނެގިއެވެ. އަދި މާކަރުގެ މަތި ނަގާލަމުން ތުރުތުރު އަޅަމުން ދިޔަ އަތަކާއި އެކީގައި އޭގެ ކަނެއްގައި އަކުރެއް އަޅަން ފެށީއެވެ. އިރުކޮޅެއް ވަންދެން ލިޔުމަށްފަހު އަންހެން މީހާ އޭގެ މަތިން އަތް ހިއްލާލިއިރު ތުރުތުރުގެ އަސަރު ހުރި އަކުރުތަކުން އެޅިފައިވީ ‘މިޒް’ އެވެ.

 

ނުނިމޭ