Hijra (Part 23)
އަފްރާޒް…..މަންމަ މިހިރީ ކައިގެން. ޝަކިއްތަ ދިޔައީ މަންމައަށް ކާންދީފައި. އާދޭސްކުރަން….އެއްދުވަހު ވިޔަސް ދެކުދިން ޒުވާބުނުކުރޭ.” އާބިދާ އޭނަގެ ފުރަގަސްދީގެން ހުރި އަފްރާޒްގެ އަތުގައި ހިފާލަމުން ރޮވިފައިކަހަލަ ގޮތަކަށް ބުނެލިއެވެ. އަފްރާޒްއާއި ނަސްރާ ދެންވެސް އެކަކު އަނެކަކަށް ރުޅިވެރިކަމާއެކީ ބަލަހައްޓައިގެން ތިބީއެވެ. އިރުކޮޅެއްފަހުން ނަސްރާ އަފްރާޒްއަށް ލޯއަޅާފައި މޫނުއަނބުރާލަމުން އެތަނުން ދުރަށް ހިނގައިގަތެވެ
އާބިދާ ކިތަންމެ ހިތާމައެއް ކުރިޔަސް އަފްރާޒްއާއި ނަސްރާގެ ޒުވާބަކަށް ނިމުމެއްނާދެއެވެ. ނަސްރާ އަފްރާޒްއަށް އަންނަނީ އަމަށަކު ރުޅިއެއްނޫނެވެ. އެންމެ ބޮޑަށް ރުޅި އަންނަނީ އޭނައާއި އޭނަގެ ލޯބިވެރިންގެ ދެމެދަށް އަފްރާޒް ވަންނާތީވެއެވެ. ނަސްރާގެ ލޯބިވެރިޔަކު މިވެނި ގަޑިއެއްގައި ގުޅާނެކަން ކޮންމެވެސް އެއްގޮތަކަށް އެނގިފައި އޮތިއްޔާ އަފްރާޒް މުޅި އެދުވަހު ގޭގެ ފޯނު ކައިރީގައި ހުންނާނެއެވެ. މީގެ 3 އަހަރު ކުރިން ނަސްރާ ލޯބިވެރިޔަކު ގެންގުޅޭ ވާހަކަ އަފްރާޒް ޝަރީފް ގާތުވެސް ބުނެފައިވެއެވެ. އެދުވަހު ޝަރީފްގެ ހޫނު އެތިފަހަރެއް ނަސްރާގެ ކޯތާފަތްމައްޗަށް އެރިއެވެ. އަދި އެއްމަސް ދުވަސް ވަންދެން ނަސްރާ ގޭގައި މަޑުކުރަން ޖެހުނެވެ. މުޅި އެ އެއްމަސް ތެރޭގައި ނަސްރާގެ ހިތުގައި އަފްރާޒްއަށްޓަކައި އެއްވި ނަފްރަތާއި އެކީ އެއީ އޭނަގެ ދޮންބެ ނޫންކަމުގައި ނަސްރާ ނިންމައިފިއެވެ. ނަސްރާ އޭނަގެ މުޅި ޢާއިލާއާއި ވެސް ވަކިވާން ބޭނުންވިއެވެ. މި ޢާއިލާއާއެކީ އޭނައަށް “އުފާވެރި” ދިރިއުޅުމެއް ނުލިބޭނެކަން ޔަޤީންވުމުންނެވެ. އޭނަ ބޭނުންވީ މިނިވަން ވާށެވެ. އޭނަ ބޭނުންވީ ކިޔަވައި މޮޅު މީހަކަށްވެ މުއްސަނދިވާށެވެ. އަދި އޭނަ ފަދަ ރީތި، މޮޅު މީހަކާއި އިނދެގެން މި އެންމެންނަށް އޭނަ ދެން ނުވެސް ފެންނާނެ ހިސާބަކަށްދާށެވެ. ނަސްރާ މި ނިންމުން ނިންމީ އޭނައަށް މިހާ ދުވަސްވަންދެން ހިޔާވަހިކަން ދީ ބަލައި ބޮޑުކުރީ އެ މީހުންކަން ހަނދާން ނައްތާލަމުންނެވެ. އަދި އެ މީހުންގެ ހަރުކަށިކަމުގެ ފަހަތުގައިވީ ނަސްރާއަށްޓަކައި ފޮރުވިފައިވި ލޯތްބެއްކަން ނޭނގިއެވެ.
ނަސްރާ އޭނަގެ ޢާއިލާއަށް ނުރުހުންވާ މިންވަރު އޭނަގެ މޫނުމަތިން ސާފުކޮށް ފެނެއެވެ. ގެއަށް އައިއްޔާ އެ މޫނުމަތީގައި ވާނީ ބަނަކަމެކެވެ. އެ ކަމާމެދު ޝަރީފް ވެސް ފަހަކަށް އައިސް އެއްވެސް އެއްޗެކޭ ނުބުނެއެވެ. ނަސްރާއަށް އެކި ގޮތްގޮތަށް ވިސްނައިދީ ދީ ޝަރީފް ވަރުބަލިވެއްޖެއެވެ. ނަސްރާ ކިތަންމެ ފޮރުވައިގެން އުޅުނަސް ސްކޫލްގައި ނަސްރާގެ އުޅުން ހުންނަ ގޮތް ޢާއިލާގެ އެންމެނަށް އެނގެއެވެ. އެންމެންވެގެން ނުސީދާ ގޮތަށާއި ސީދާ ގޮތަށް އެތައް ފަހަރަކު ނަސްރާއަށް ނަޞޭޙަތްތެރިވެފައިވެއެވެ. އެހެނަސް ނަސްރާއަށް ކުޑަވެސް ބަދަލެއް އަންނަ ގޮތެއްނުވެއެވެ. ޝަރީފްއާއި އަފްރާޒް ނަސްރާގެ މަތިން އުއްމީދު ކަނޑައިފިއެވެ. ނަމަވެސް އާބިދާ އުއްމީދު ކަނޑައެއްނުލައެވެ. ނަސްރާގެ އުޅުމަށްޓަކައި އާބިދާއަށް އަމިއްލަ ނަފްސު ކުށްވެރި ކުރެވެއެވެ. އާބިދާ ދެކުނު ގޮތުގައި ނަސްރާ ބަސްނާހާ ކުއްޖަކަށްވީ އޭނަގެ ބަލީގެ ސަބަބުން ނަސްރާއަށް ކުރިމަތިވި ޙާލަތްތަކާއިހެދިއެވެ. ނަސްރާއަށް އެންމެ ބޮޑަށް ލޯބި ބޭނުންވީ ޢުމުރުގައި އެތަކެއް ޒިންމާއެއް އޭނަގެ ބޮލުގައި އެޅިގެން ދިޔުމުންނެވެ. އާބިދާއަށް ވިސްނުނު ގޮތުގައި މި ޙާލަތް ބަދަލުވީ ދުވަހަކުން ނަސްރާވެސް ބަދަލުވާނެއެވެ. އެ މީހުންގެ ޙާލަތް ބަދަލުކޮށްދެއްވުމަށް އެދި އާބިދާއަށް ދުޢާކުރެވެނީ ކިތައް ފަހަރު ކަމެއްވެސް އޭނައަކަށް ނޭނގެއެވެ. ނަސްރާ އޭނަގެ އެކުވެރިންގެ އަތުގައި އެޅުވިފައި ހުންނަ ފަށްތައް ފެނިފައި ޙަސަދަވެރިވާކަން އެނގުމުން އާބިދާ ކޮންމެ ގޮތެއް ހަދާފައި ވެސް ނަސްރާއަށް އެކަހަލަ ފަށެއް ގެނެސްދޭން ބޭނުންވިއެވެ. އާބިދާ ޝަރީފްމެނަށް ވެސް އެންގުމެއްނެތި އެތައް ރެއެއްގެ ނިދި ނަގައިގެން ބާލީސް އުރައިގައި މާ ޖެހުމުގެ މަސައްކަތްކޮށް ފައިސާ އެއްކުރިއެވެ. އަދި ޝަކީލާގެ އެހީގައި އެ ފައިސާއިން އަނގޮޓިއެއް ހެއްދިއެވެ. އެއްދުވަހު ނަސްރާ ސްކޫލުން ގެއަށް އަންނައިރަށް އާބިދާ ހިނިތުންވުމެއްގައި އެ އަނގޮޓި ހިފައިގެން ސިޓިންގް ރޫމުގައި އިނެވެ. އެދުވަހު ނަސްރާ ހުރީ އޭނަގެ ރައްޓެހިވެގެން އުޅުނު ކުއްޖާ އޭނަ ދޫކުރީތީ މޫޑު ޚަރާބުވެފައެވެ. އާބިދާ އެކަން ނޭނގި ހުރެ ނަސްރާއަށް ގޮވާލަމުން އޭނަގެ އަތަށް އަނގޮޓި ލައިދިނީ ނަސްރާ އުފަލުން ގޮސް އޭނަގެ ގައިގައި ބައްދާލާނެ ކަމުގެ އުއްމީދުގައެވެ.
“މިއީ ކޯޗެއް؟ އަހަރެން މި ހުރިހާ ދުވަހު މިގޭގެ ތެރޭގަ ކުރި މަސައްކަތުގެ މުސާރަތަ؟ ޗި! ހަމަ އެހާވެސް ކުޑަ އަގެއްތަ އޮތީ؟ މީތި ރީއްޗެއްވެސް ނޫން. ބަލާތި! އެއްދުވަހު އަހަރެން މިގެއިން ވެސް އަދި މި ޤައުމުން ވެސް އެރިގެން ދާނަން. އެދުވަހަކުން އަހަންނަށް ޙައްޤުވާ ކަހަލަ ދިރިއުޅުމެއް އަހަންނަށް ލިބޭނެ. އަހަރެންގެ އަގު ވަޒަންކޮށް އަހަންނަށް ލޯބިދޭނެ މީހަކު އަހަރެންގެ ޙަޔާތުގަ ހުންނާނެ.” ނަސްރާ އެންމެ ފަހު ޖުމްލަ ބުނެލީ ފެންކަޅިވެފައި ހުރެއެވެ. އެއީ މިއަދު އޭނަގެ ލޯބިވެރިޔާ އޭނައާއި ދިމާލަށް ބުނި ބަސްތައް ހަނދާން ވެފައެވެ. ނަސްރާ އޭނަގެ އަތުގައި އޮތް އަނގޮޓި އަތުގެ ކޮޅަށް ހޫރާލަމުން އޭނަގެ ކޮޓަރިއަށް ދާން ހިނގައިގަތެވެ. އަނގޮޓި ޓައިލްސްތަކުގެ މަތިން ފުންމަމުން ގޮސް މަޑުޖެހިލިތަން ބަލަން އިން އާބިދާގެ ލޯ ފުސްވިއެވެ. އޭނަ ހިތުން އޭނަ އުޅުނީ ނަސްރާގެ އަގު ވަޒަން ކޮށްދޭށެވެ. ބަލި ޙާލުގައި އުޅެމުން ވެސް އެތައް ބުރަ މަސައްކަތަކަށްފަހު ނަސްރާއަށްޓަކައި ހޯދައިދިން ހަދިޔާއަކީ އޭނަގެ ލޯބީގެ ނިޝާނަކަށް ވާނެކަމަށް އާބިދާ ހީކުރިއެވެ. ނަމަވެސް ނަސްރާ ކަންތައް މިކުރި ގޮތުން ޙަޤީޤަތަކީ އެއީއެއްނޫންހެން ހީވެއްޖެއެވެ. އާބިދާއަށް އެކަނި އިނދެ ގިސްލެވެން ފެށިއެވެ.
އޭގެ ހަފްތާއެއްހާ ދުވަސްފަހުން އާބިދާ ދުނިޔެ ދޫކޮށްދިޔައެވެ. އެކަމަކުން ވެސް ނަސްރާގެ ހަރު ހިތަށް މާ ބޮޑު އަސަރެއް ކުރިކަމަކަށް ނުވެއެވެ. ގޭތެރޭގައި އެންމެން ކަރުނަ އަޅައި ރޮމުން ދިޔައިރު ނަސްރާ ކަނެއްގައި ހިމޭންވެފައި އިނީއެވެ. އާބިދާ ހުއްޓަސް ނެތަސް ވާނީ އެކައްޗެކޭ ނަސްރާގެ ހިތް ބުނަމުން ދިޔައެވެ. އޭނަ ޖެހޭނީ ހަމަ ގޭގައި ނޯކަރެއްގެ ރޯލު އަދާކުރާށެވެ.
އަތްމަތި ދަތި ޙާލެއްގައި ވެސް އަފްރާޒް އާއި ނަސްރާ ވެސް ކިޔަވަމުން ދިޔައީ ގުޑުމެއްނާރާ ޢަޒުމެއްގައެވެ. އަފްރާޒް ކިޔަވަމުން ދިޔައީ އޭނަގެ ކޮއްކޮ އަފްރީން ބޮޑުވާ ދުވަހަކުން މި ޙާލަތް އެ ކޮއްކޮއަށް ތަޙައްމަލުކުރަން ނުޖެހޭނެ ފަދަ މުސްތަޤްބަލެއް ބިނާކުރުމުގެ އުއްމީދުގައެވެ. ނަސްރާ ކިޔަވަމުން ދިޔައީ ހަމައެކަނި އަމިއްލަ ނަފްސަށްޓަކައިކަން އޭނަ އަފްރީންއަށް އަޅާލުން ކުޑަކުރާ ގޮތުން ވެސް އެނގެއެވެ. ނަސްރާ ކިޔަވަން އިންދާ އަފްރީން ފޮތެއް ހިފައިގެން ކިޔައިދޭށޭ ބުނެފިއްޔާ ނަސްރާ އެތަކެއްޗެއް ކިޔައި އަފްރީން ރޮއްވާލައެވެ. އެއިން ކޮންމެ ފަހަރަކު އަފްރީން ހައްލާލާ މީހަކީ އަފްރާޒްއެވެ. ފަހަކަށް އައިސް އަފްރީންއަށް ގިނައިން ކާންދީ ހަދަނީވެސް އަފްރާޒްއެވެ. އޭރު އަފްރީން އުޅުނީ ނަސްރާއަށް ބިރުންނެވެ.
މި ކަންތައް ބަދަލުވެގެން ދިޔައީ އޭގެ 2 އަހަރެއްހާ ދުވަސްފަހުން އަފްރާޒް އޭނައަށް ލިބުނު ސްކޮލާޝިޕެއްގެ ދަށުން ސައުދީ އަރަބިޔާއަށް ފުރައިގެން ދިޔުމުންނެވެ. އަފްރާޒްއަށް އޭ ލެވެލްގެ ގަދަ ދިހައިގެ އެއްވަނަ ލިބުނުތަން ޓީވީއިން ބަލަން ނަސްރާ އިނީ ޙަސަދައިގެ އަލިފާންގަނޑެއްގައި އަނދައަނދައެވެ. އޭނަ އަދި އެއަށްވުރެ ވެސް ރަނގަޅު ނަތީޖާއެއް ހޯދުމަށް ގަދައަޅައި މަސައްކަތް ކުރަން ފެށިއެވެ. ނަތީޖާއެއްގެ ގޮތުން ނަސްރާއަށް އޯ ލެވެލްގެ ގަދަ ދިހައިގެ އެއްވަނަ ލިބި 3 މާއްދާއަކުން ދުނިޔޭގެ ފެންވަރުގެ ވަނަތައް ވެސް ލިބުނެވެ. އޯ ލެވެލްއަށްފަހު ވެސް ނަސްރާއަށް ސްކޮލާޝިޕެއް ލިބެން އުޅުނެވެ. ނަސްރާ އެ ޤަބޫލު ނުކުރީ އަފްރާޒް ސަމާސާއަކަށް އޭނައާއި ދިމާލަށް އޯ ލެވެލް އަކީ ދެން ކޯޗެއްހޭ ބުނުމުންނެވެ. ނަސްރާ އެ ބަސްތައް ނެގީ ސަމާސާއެއްގެ ގޮތުގައެއް ނޫނެވެ. އޭނަ އަފްރާޒްއަށްވުރެ މޮޅުކަން ނަސްރާ އަފްރާޒްއަށް ދައްކަން ބޭނުންވިއެވެ. އެހެންކަމުން އޭ ލެވެލްއަށް ކިޔަވަން މަޑުކުރިއެވެ. އޭ ލެވެލް ފެށުމުގެ ކުރިން ދިގު ޗުއްޓީއެއްގައި ގޭގައި ހުންނަން ޖެހުމުން ނަސްރާއަށް ފޫހިކަމާއި އެކަނިވެރިކަން އިޙްޞާސް ކުރެވުނެވެ. އެހެންކަމުން އޭނަ އެ ޗުއްޓީ ތެރޭގައި އަފްރީން ކައިރިން މަޢާފަށް އެދި އަފްރީންއާއި އެކުވެރިވިއެވެ.
ބޮޑުވަމުން ދިޔަ އަފްރީންގެ ހިތުން ނަސްރާއަށް ގަތް ބިރު ފިލައި ނަސްރާދެކެ ލޯބިވާން ފެށިއެވެ. ނަސްރާ ކުރާ ހުރިހާ ކަމެއް އަފްރީންއަށް މޮޅުކަމަކަށްވިއެވެ. އަފްރީން ބޭނުންވީ ހުރިހާ ގޮތަކުން ވެސް ނަސްރާ ގޮތަށްވާށެވެ. ނަސްރާ ކިޔަވާތަން ފެނުނިއްޔާ އަފްރީން ވެސް ކިޔަވާނެއެވެ. ނަސްރާ ވަކި ގޮތަކަށް ހެދުން އަޅަންޏާ އަފްރީން ވެސް އެގޮތަށް ހެދުން އަޅަން ބޭނުންވެއެވެ. ނަސްރާ ވަކި ގޮތަކަށް ބޮލުގަ ފުނާ އަޅަންޏާ އަފްރީން ވެސް ނަސްރާ ލައްވައި އެގޮތަށް އޭނަގެ ދިގުވަމުން ދިޔަ އިސްތަށިގަނޑު ހައްދައެވެ. އަފްރީން 6 އަހަރުގެ ޅަ ޢުމުރުގައި ވެސް ނަސްރާއާއެކީ އޭނަ ބަލާ އިނގިރޭސި ފިލްމުތައް ބަލައެވެ. އަފްރީންއަށް ނުބައި މަންޒަރެއް ފުރަތަމަ ފެނުނު ދުވަހު އޭނައަށް މޫނުގައި ދެއަތް އަޅާލެވުނެވެ. ނަމަވެސް ނަސްރާ ޗެނަލް ބަދަލެއް ނުކުރުމުން އަފްރީންއަށް އެއީ ގޯހެއްނޫންހެން ހީވާން ފެށިއެވެ. ނަސްރާއާއެކީ ބަލަމުން ދިޔަ ފިލްމުތަކާއި އިވެމުން ދިޔަ ލަވަތަކުގައިވި ޢިބާރާތްތަކުން ދިރިއުޅުމުގައި ފިރިހެން ކުއްޖެއްގެ ލޯތްބެއްވުމަކީ ވަރަށް މުހިއްމު ކަމެއްހެން އެ ޢުމުރުގައި ވެސް އަފްރީންއަށް ހީވާންފެށިއެވެ. ކާރޓޫންތަކުން ފެންނަހެން އޭނަގެ “ޕްރިންސް ޗާމިންގް”އެއް އެއްދުވަހު އަންނާނެކަން އަފްރީންއަށް ޤަބޫލުކުރެވެން ފެށިއެވެ. ދިރިއުޅުމުގެ މަޤްޞަދަކީވެސް އެ ޚާއްޞަ ފިރިހެން ކުއްޖާއަށްޓަކައި އިންތިޒާރު ކުރުންހެން އަފްރީންއަށް ހީވިއެވެ.
އޭނަގެ ސަބަބުން އަފްރީންއަށް އަންނަމުން ދިޔަ ބަދަލުތަކާމެދު ނަސްރާއަށް ރޭކާވެސް ނުލައެވެ. އަފްރީން އަމިއްލައަށް އަމިއްލަ ކަންތައް ކުރަން ފެށި ފަހުން ވެސް އަފްރީން ނަސްރާ މޭކްއަޕްކުރާ ގޮތަށް މޭކަޕްކުރަން މަސައްކަތް ކުރެއެވެ. ނަސްރާ ކުރީގައި ލައިއުޅުނު ކުރު ހެދުންތައް ވެސް އަފްރީން ލާން ފެށިއެވެ. ނަސްރާ އެއީ މާ ބޮޑު މައްސަލައެއްކަމުގައި ނުބެލިއެވެ. އޭނަ އެކަމަށް މާ ބޮޑު ފަރުވާލެއް ދިނުމެއްނެތި ކިޔެވުމާއިގެން ކުރިއަށް ދިޔައެވެ. ނަސްރާ އޭ ލެވެލްގައި ވެސް ކިޔަވައި ނިންމާލީ މުޅި ޤައުމުން އެއްވަނަ ޙާޞިލުކުރަމުންނެވެ. ދުނިޔޭގެ ވަނައެއް ލިބުމުން ނަސްރާ އިތުރަށް ފޮނިވިއެވެ. އެއީ އަފްރާޒްއަށް އޭ ލެވެލް ނިންމިއިރު ދުނިޔޭގެ ވަނައެއް ލިބިފައި ނުވާތީވެއެވެ.
ނަސްރާއަށް ސްކޮލާޝިޕެއް ލިބުމުން އަފްރާޒްއާއި ޝަރީފް އޭނަގާތު އެދުނީ އަފްރާޒްއާއެކީ ކިޔަވަން ސައުދީއަށް ދިޔުމަށެވެ. ނަސްރާ އެކަމަށް ވަގުތުން އިންކާރުކުރިއެވެ. އަފްރާޒް އެއުޅެނީ އަނެއްކާވެސް އޭނަ ނޯކަރަކަށް ހަދަން ކަމަށް ނަސްރާގެ ހިތް ބުންޏެވެ. އޭނަ ނިންމީ ލަންޑަނަށްދާށެވެ. ލަންޑަނަކީ އޭނަ އަބަދުވެސް ދާން ބޭނުންވެގެން ހުރި ތަނަކަށްވާތީވެއެވެ. ނަސްރާ އެމީހުންގެ އަޑެއް ނާހާނެކަން އެނގި އަފްރާޒްއާއި ޝަރީފް އިތުރު އެއްޗެކޭ ނުބުންޏެވެ.
ނަސްރާ ފުރައިގެން ދިޔަ ދުވަހު އަފްރީން ރުއެވެ. ނަސްރާ އޭނަ ވަރަށް ގިނައިން ގުޅާނެކަމަށްބުނެ އަފްރީންގެ ހިތްހަމަ ޖައްސާލަދިނެވެ. ލަންޑަނަށް ގޮސް ކުރީކޮޅު ނަސްރާ ވަރަށް ގިނައިން އަފްރީންއަށް ގުޅައި ހެދިއެވެ. އަފްރާޒްއާއި ޝަރީފް އޭނައަށް ނުގުޅަންޏާ ނަސްރާ އެމީހުންނަކަށް ނުގުޅައެވެ. ކިޔެވުން ފެށިގެން ދިޔުމުން ނަސްރާ އެ ތިން މީހުންނާއި ވެސް ވާހަކަ ދައްކަމުން ދިޔަ މިންވަރު މަދުވެގެން ދިޔައެވެ. އޭނައަށް އާ އެކުވެރިން ލިބުމުންނެވެ.
ނަސްރާ ވަރަށް ގިނަ ވަގުތު އޭނަގެ ގާތް ތިން އަންހެން އެކުވެރިންނާއެކީ ހޭދަކުރަން ފެށިއެވެ. ނަސްރާއަށް އެ މީހުންގެ އިސްތަށިގަނޑު ހުންނަ ގޮތާއި ހެދުން އަޅާގޮތް ވަރަށް ރީތިވިއެވެ. ނަސްރާގެ އެކުވެރިން އެމީހުން ކިޔަވަން އުޅުނު ޔުނިވާސިޓީއިން ބުރުގާ އަޅައިގެން ހުރި އަންހެން ކުއްޖެއް ފެނުނިއްޔާ އެ ކުއްޖަކަށް މަލާމާތް ކުރެއެވެ. އެ ކުއްޖަކީ ވަރަށް ނުކެރޭ ކުއްޖެއްގެ ގޮތުގައި ސިފަކުރެއެވެ. އެ ވާހަކަތައް އިވޭ ކޮންމެ ފަހަރަކު އޭނައަށް ބުރުގާ އަޅައިގެން ނުހުރެވުނުކަން ނަސީބޭ ނަސްރާގެ ހިތަށްއަރައެވެ. އޭނަ އޭނަގެ އެކުވެރިން ކައިރީގައި އޭނައަކީ މުސްލިމެކޭ ވެސް ނުބުނެއެވެ. އޭނަ ޤަބޫލުކުރަން ބޭނުންވާ ގޮތަކީ ވެސް އެއީއެވެ. އޭނަ ލަންޑަނަށް އައީވެސް ނަމާދުކުރާނެ އެއްޗެއް ނުހިފައެވެ.
މާ ގިނަ މަސްތަކެއް ނުވެ ނަސްރާގެ އިސްތަށިގަނޑު އޭނަގެ އެކުވެރިންގެ އިސްތަށިގަނޑާއި އެއްވަރަށް ކޮނޑުން ކުޑަ ތަންކޮޅެއް މައްޗަށް ކޮށާލެވުނެވެ. ނަސްރާގެ އިސްތަށިގަނޑުގެ އެތަން މިތަނުގައި ކުލަޖެހިގެން ދިޔައެވެ. ނަސްރާ އެއްދުވަހު އޭނަގެ އެކުވެރިންނާއެކީ ބޮޑު ހެދުން ފިހާރައަކުން ނިކުތް އިރު އޭނަ ހުރީ ކަކުލުން މައްޗަށް އޮތް ކޮނޑެއްނެތް ހެދުމެއްލައި އުސް ފައިވާނަކަށް އަރައިގެންނެވެ. އެންމެ ފުރަތަމަ އެ ހެދުން ލައިގެން މަގަށް ނިކުތްއިރު ނަސްރާ ހިސާބަކަށް ލަދުގަތެވެ. އޭނަ ރަށުގައި އުޅުނުއިރު އަބަދުވެސް ލައި އުޅުނީ ޓޮޕާއި ޖިންސެވެ. އޭނައަށް 12 އަހަރު ފުރުނު ފަހުން އޭނަ ދުވަހަކުވެސް މިހާ ހާމަކަން ބޮޑު ގޮތެއްގައި ހެދުން އަޅާފައެއް ނުވެއެވެ. ނަސްރާ އޭނަ އުނދަގޫވެގެން އުޅޭކަން އޭނަގެ އެކުވެރިންނަށް ފޮރުވިއެވެ. ހުރިހާ އެކުވެރިންވެގެން ނަސްރާ ރީތި ވާހަކަ ބުނުމުން ނަސްރާއަށް ވަކި ވަރެއްގެ ހަމަޖެހުމެއް ލިބުނެވެ. އޭނަ ވިސްނަންވީ ކަމެއްނެތް ކަމަށް ނަސްރާ އޭނަގެ ނަފްސަށް ވިސްނައިދެވޭތޯ މަސައްކަތް ކުރިއެވެ.
ދުވަސްތައް ފާއިތުވަމުން ދިޔަ ވަރަކަށް ނަސްރާގެ ފިރިހެން އެކުވެރިން ވެސް ގިނަވަމުން ދިޔައެވެ. އެ ފިރިހެން އެކުވެރިންގެ ތެރެއިން ނޫކުލައިގެ ކަޅިއެއްގެ ވެރި ޖޯން ނަސްރާގެ ހިތުގައި އެޅިއެވެ. ޖޯން ވެސް އޭނައަށް ޙާއްޞަ ސަމާލުކަމެއް ދޭހެން ނަސްރާއަށް ހީވުމުން އޭނައަށް ޖޯން އިތުރަށް ކަމުދިޔައެވެ. ޔުނިވާރސިޓީގެ ފަރާތުން ބޭއްވި ޑާންސް ޕާޓީއެއްގައި ޖޯން އޭނައާއި ދިމާލަށް އެއްއަތް ދިއްކޮއްލުމުން ނަސްރާ ޖެހިލުންވުމަކާއެކީ އޭނަގެ އަތް ޖޯންގެ އަތްމަތީގައި ބޭއްވިއެވެ. ލޯބީގެ ލަވައަކަށް ނަސްރާ ޖޯންއާއެކީ ނެށިއިރު އޭނައަށް ދުވަހަކުވެސް ނުކުރެވޭފަދަ އިޙްޞާސްތަކެއް ކުރެވުނެވެ. އޭނަ މީގެ ކުރިން ދުވަހަކުވެސް ފިރިހެނަކާއި މިހާ ކައިރިވެފައި ނުވާތީވެއެވެ. އުފާވިއެއްކަމަކު ހިތުގައި ބިރުވެރިކަމެއް ވެސްވިއެވެ. މިއީ މިކަން ވާންޖެހޭ ގޮތެއްނޫންކަމުގައި ނަސްރާގެ ހިތް މެދުކެނޑުމެއްނެތި ބުނަމުން ދިޔައެވެ. ނަމަވެސް ނަސްރާ ޖޯންއަކާއި ދުރެއްނުވެއެވެ. ކުރެވެމުން ދިޔަ އިޙްޞާސްތަކުގެ ފޮނިކަމުންނާއި ވަށައިގެންވި އެންމެންގެ ނަޒަރު އެދެމީހުންނަށް ހުއްޓިފައިވީތީވެއެވެ. ލަވަ ނިމިގެން ދިޔަ ވަގުތު ޖޯން ނަސްރާގެ އަތަށް ދަމައި ގާތަށް ގެނެސް ނަސްރާގެ ގައިގައި ބައްދާލިއެވެ. އެއާއެކު ނަސްރާގެ ހިތް ބާރަށް ތެޅެން ފެށިއެވެ. އެންމެންގެ އަތްތިލަ ބަޑީގެ އަޑު ގުގުމައިގެން ދިޔައިރު ޖޯން ވައިއަޑުން ނަސްރާގެ ކަންފަތުގައި “އައި ލަވް ޔޫ”އޭ ބުނެލުމުން ނަސްރާގެ ގައިން ހީބިހި ނަގައިގެން ދިޔައެވެ. ޖޯން އިރުކޮޅެއްފަހުން ނަސްރާ އޭނަގެ ގައިން ދުރުކޮއްލީ ހިނިތުންވުމަކާއެކީ ކަމަށްވިޔަސް ނަސްރާއަށް ހުރެވުނީ ހިނިތުންވާން ނޭނގިފައެވެ. ޖޯން އޭނަގެ އަތުގައި ހިފައިގެން ހިނގައިގަތުމުން ނަސްރާގެ ފައި އެންމެ ފުރަތަމަ މަސައްކަތެއް ނުކުރިއެވެ. އޭގެ ސަބަބުން އޭނަ އަރިއަޅާލާފައި ނުވެއްޓުނީވެސް ކިރިޔާއެވެ. ޖޯން ފަހަތް ބަލާފައި ބަލައިގެންނޭ ބުނުމުން ނަސްރާ ގަދަކަމުން ހިނިތުންވެލަމުން ބޯޖަހާލިއެވެ. ޖޯންއާއެކީ ހިނގާފައި ދިޔައިރު ނަސްރާއަށް އެއްފަރާތެއްގައި ތިބި އޭނަގެ އެކުވެރިން ހެވިފައި ދެއަތުން ދެ ބޮޑުވާ އިނގިލި ދިއްކޮށްގެން ތިބުމުގެ މާނައެއް ނަސްރާއަކަށް ސާފެއްނުވިއެވެ. ވަރަށް ބޮޑު ތޫފާނެއް އަންނަން އުޅޭކަމުގެ އިންޒާރު ނަސްރާގެ ހިތް އޭނައަށް ދިނެވެ.
ޖޯން ނަސްރާ ގޮވައިގެން އޭނަގެ ކާރު ކައިރިއަށް ގޮސް ކާރަށް އެރުމަށް އެންގިއެވެ. މިދަނީ ކޮންތަނަކަށްތޯ ނަސްރާ ސުވާލު ކުރުމުން ޖޯން ހިނިތުންވުމަކާއެކީ ބުނެލީ އޭނަގެ ގެއަށް ކަމަށެވެ. އެ ޖަވާބު އިވިފައި ކާރަށް ނޭރުމަށް ނަސްރާގެ ހިތް ވަގުތުން އެންގިއެވެ. ނަމަވެސް ކާރަށް ނޭރުމުން ވާނެ ގޮތާއިމެދު ނަސްރާއަށް ވިސްނާލެވުނެވެ. ނަސްރާގެ ތިން އެކުވެރިން މިގޮތަށް ފިރިހެނަކާއެކީ ދާން ޖެހިލުންވާ ކުއްޖަކަށް މަލާމާތް ކުރާ ގޮތް ނަސްރާއަށް އެނގެއެވެ. އޭނަ ކާރަށް ނޭރިއްޔާ ޖޯން ވެސް ހީކުރާނީ އޭނައަކީ ނުކެރޭ ކުއްޖެއް ކަމަށެވެ. ނަސްރާއަށް އޭނަގެ ދެއަތް މުއްކަވާލެވުނެވެ. އޭނައަކީ ނުކެރޭ ކުއްޖެއްނޫނެވެ. އޭނައަކީ ވަކި ގޯސް ކުއްޖެއްވެސް ނޫނެވެ. އޭނަ މިރޭ ޖޯންއާއެކީ އޭނަގެ ގެއަށް ދާނެއެވެ. ނަމަވެސް ޖޯން މާ ކައިރިވާން އުޅުނިއްޔާ އޭނައާއި ދުރުވާނެއެވެ. އެ ޚިޔާލު ހިތަށް ވަނުމުން އެގޮތް ރަނގަޅުވާނެ ކަމުގައި ނަސްރާގެ ސިކުނޑި ބުންޏެވެ. އޭނަ ހަމަޖެހިފައިވާ ހިތަކާއެކީ ކާރަށް އެރިއެވެ.
ޖޯން ނަސްރާ އޭނަގެ ގެއަށް ގެންގޮސް އެންމެ ފުރަތަމަ ދިޔައީ އެގޭގެ ރާ ފުޅިތައް ހުންނަ މޭޒާއި ދިމާލަށެވެ. ޖޯން އެތަނަށް ގޮސް ނަސްރާއަށް ވެސް ތަށްޓެއް ދިއްކޮއްލުމުން ނަސްރާއަށް ބޭއިޚްތިޔާރުގައި ތިމަންނަ ނުބޮމޭ ބުނެލެވުނެވެ. ޖޯން ހިނިތުންވުމަކާއެކީ އެންމެ ރަނގަޅޭ ބުނެލަމުން އަމިއްލަ އެ ތަށި ބޮއި ހުސްކޮށްލިއެވެ. ޖޯން އޭނައަށް ގަދަކަމުން ބޯންދޭން ނުއުޅުމުން ޖޯން ކިހައި ރަނގަޅުހޭ ނަސްރާގެ ހިތަށްއެރިއެވެ. ޖޯން ނަސްރާގެ އަތުގައި ހިފައި ތިމަންނަގެ ކޮޓަރި ދައްކަންތޯ ބުނެލިއެވެ. ނަސްރާ ހިނިތުންވުމަކާއެކީ ބޯޖަހާލީ އަދި ކޮޓަރި ދެއްކިއަސް އެއީ މައްސަލައެއް ނޫންކަމުގައި ހިތް ބުނީތީވެއެވެ. ނަސްރާ އޭނަގެ އެހެނިހެން ފިރިހެން އެކުވެރިންނާއި އެކީގައި އެ މީހުންގެ ކޮޓަރީގައި ފިލާވަޅުތައް ހަދައި އުޅެއެވެ. އެހެންވީމަ މިއީ ވަކި ގޯހަކަށް ނުވާނެއެވެ. ޖޯން ނަސްރާގެ އަތުގައި ހިފައިގެން އެތާހުރި ސިޑިން މައްޗަށް އަރަން ފެށިއެވެ. އަރަމުން ދިޔަ ވަގުތު ޖޯން ނަސްރާގެ އަތް މައްޗަށް ހިއްލައި އެ އަތުގައި ބޮސްދިނުމުން ނަސްރާގެ އެއްކަލަ ހިތް ތެޅިގެންފިއެވެ. ނަމަވެސް މިއީ މާ ބޮޑު ގޯހެއް ނޫންކަމަށް ބުނެ ނަސްރާ އޭނަގެ ހިތް މައިތިރި ކުރިއެވެ. ނަސްރާގެ އެހެނިހެން ފިރިހެން އެކުވެރިން ވެސް ސަމާސާއަކަށް އެކަހަލަ ކަންތައް ކުރެއެވެ. ޖޯން ކޮޓަރީގެ ދޮރު ހުޅުވައި ކޮޓަރިއަށް ވަނުމުން ނަސްރާ ވެސް އެ ތަނަވަސް ކޮޓަރިއަށްވަނެވެ. ނަސްރާ ކޮޓަރީގެ އެކި ދިމަދިމާލަށް ބަލަބަލާ ހުއްޓާ ފުރަގަހުން ކޮޓަރީގެ ދޮރު ތަޅުލެވުނު އަޑަށް ނަސްރާއަށް ސިހިފައި އެ ދިމާލަށް ބަލާލެވުނެވެ. އެވަގުތު ޖޯން ހިނިތުންވުމެއްގައި ހުރެ އޭނަގެ ކޯޓު ބާލަމުން ގަމީހުގެ ގޮށްތައް ވެސް ނައްޓަން ފެށިއެވެ. ފަޅި ސިކުންތަކަށް ނިކުންނަންވީއޭ ހިތަށްއެރިއެއްކަމަކު މީގަ ވެސް ވަކި މާ ބޮޑު ގޯހަކީ ކޮބައިބާވައޭ ނަސްރާގެ ހިތަށްއެރިއެވެ. ފިރިހެނުން ގަމީހަކާއިނުލާ ތިބޭތަން އޭނައަށް ޓީވީއިން އެތައް ފަހަރަކު ފެނިފައިވެއެވެ. ޖޯން ގަމީސް ބާލާފައި ނަސްރާގެ ކައިރިއަށް އައިސް ނަސްރާގެ ގައިގައި ބައްދާލިއެވެ. މި ވަނީ ހަމަ ގައިމުވެސް ގޯހެކޭ އޭނަގެ ހިތް ބުނެލިއެއްކަމަކު އޭގެ ދެވަނަ ސިކުންތުގައި މިރޭ ޕާޓީގައި ވެސް ޖޯން އޭނައާއި މިހާ ކައިރިވިކަން ނަސްރާގެ ހަނދާނަށްއައެވެ.
ޖޯން ދެންވެސް ކުރި ކޮންމެ ޙަރަކާތަކަށް ނަސްރާގެ ހިތް އުޒުރުތައް ދައްކަމުން ދިޔައެވެ. ވަކި ހިސާބަކުން ނަސްރާ އަމިއްލަ ނަފްސަށް އުޒުރުތައް ދައްކަން ނުކުޅެދުނެވެ. ނަމަވެސް އޭރު މާ ލަސްވެއްޖެއެވެ. އޭރު އޭނަ ރަނގަޅު މީހަކަށް ވާކަށް ބޭނުމެއްނުވިއެވެ. އޭނަ ކަހަލަ ނުބައި މީހަކު ވާންޖެހޭނީ ނުބައި ކަންތައް ކުރާ މީހެއްކަމަށް ނަސްރާގެ ހިތް ބުނެލައިފިއެވެ.
އޭގެ އަނެއްދުވަހު އޭނައަށް އޮވެވުނީ ކޮންތާކުކަން އެނގުމުން ނަސްރާއަށް ލުއްކެއްޖަހައި އެނދުން ތެދުވެވުނެވެ. ކައިރީގައި އޮތް ޖޯން ފެނިފައި ރޭގަ ހިނގިހާ ކަންތައް ނަސްރާގެ ލޮލަށް ސިފަވެގެން ދިޔުމުން އޭނައަށް ދެލޯ މަރައި އޭނަގެ ދެއަތުގެ އިނގިލިތައް އިސްތަށިގަނޑަށް މަހާލެވުނެވެ. ނަސްރާ އެ ވަގުތު ބޭނުންވީ އެތަނުން ވީހާވެސް ދުރަށް ދުއްވައިގަންނާށެވެ. ނަސްރާ އަވަސްއަވަހަށް އެނދުން ތެދުވެ ހެދުން ލައި އެގެއިން ނިކުމެގެން ގޮސް ޓެކްސީއެއް ހޯދިއެވެ. ޓެކްސީއެއް ހޯދައި އޭނަ އުޅޭ އެޕާޓްމެންޓް ހުންނަ ޢިމާރާތުގެ ނަން ބުނުމަށްފަހު ނަސްރާ ޓެކްސީގެ ސީޓަށް ލެނގިލިއެވެ. ދެލޯ މަރައިގެން އޮންނަން ފެށުމުން އަނެއްކާވެސް އެ މަންޒަރުތައް ފެނުމުން ނަސްރާއަށް ދެލޯ ހުޅުވާލެވުނެވެ. އޭނަގެ ޚިޔާލުތަކުން މި ފެންނަނީ ހަމަ އޭނަތޯ އަމިއްލަ ނަފްސާއި ސުވާލުކޮށްލެވުނެވެ. އޭނައަށް ހަމަ އެހާވެސް ބޮޑު ކުށެއް ކުރެވިއްޖެ ހެއްޔެވެ؟ ނަސްރާއަށް ޤަބޫލުކުރަން ވެސް ދަތިވިއެވެ. ރޭގަ އެކަމެއް ކުރިއްޔާ ކުރީ އޭނައެއް ނޫންކަމުގައި ނަސްރާ އޭނަގެ ހިތަށް ވިސްނައިދޭން އުޅުނެވެ. ނަމަވެސް ޙަޤީޤަތަކީ އެއީއެއްނޫން ކަމަށްބުނެ ނަސްރާއަށް ކުރެވެމުން ދިޔަ އިޙްޞާސްތައް ހެކިދެމުން ދިޔައެވެ. ނޭނގޭ ސަބަބަކާހުރެ ނަސްރާ ހަމަ އެވަގުތު ބައްޕަ މަތިން ހަނދާންވިއެވެ. ބައްޕައަށް މިކަން އެނގޭ ދުވަހަކުން ވާނީ ކިހިނެއްބާއޭ ހިތަށްއެރިއެވެ. ބައްޕައާއި ދޮންބެ ގެ ރުޅިވެރި ނަޒަރުތައް އޭނައަށް އަމާޒުވެފައިވިތަން ސިފަވެފައި ނަސްރާގެ ލޮލަށް ކަރުނަތައް ޖަމާވިއެވެ. އެއީ އޭނަގެ ޢާއިލާ ނޫންކަމުގައި ނަސްރާ ނިންމާފައި އޮތަސް މިއަދު އެ މީހުން އޭނަ ބާކީކޮށްލާނެކަމަށް ޚިޔާލުކުރެވުނު ވަގުތުވެސް އޭނަ ދެރަވެއްޖެއެވެ. ދުވަހަކުވެސް އިޙްޞާސް ނުކުރެވޭ ފަދަ އެކަނިވެރިކަމެއް ނަސްރާއަށް އިޙްޞާސް ކުރެވުނެވެ.
ނަސްރާ އޭނަގެ އެޕާޓްމެންޓަށް ވަތް ވަގުތުވެސް އޭނަގެ މޫނުމަތިވަނީ ބަނަވެފައެވެ. ނަސްރާ އެޕާޓްމެންޓަށް ވަތްތާ އިރުކޮޅެއްފަހުން ނަސްރާގެ އެކުވެރިއަކު ގުޅާފައި ރޭގަ ކަންތައް ވީ ކިހިނެއްތޯ ލާނެތް ހިނިތުންވުމަކާއެކީ ސުވާލުކުރުމުން ނަސްރާ އުޅުނީ އެއްވެސް އެއްޗެކޭ ނުބުނާށެވެ. ނަމަވެސް އެކުވެރިޔާ އާދޭސްކުރުމުން އެންމެ ފަހަކަށް ނަސްރާ އެންމެ ޖުމްލައަކުން ރޭގަ ވީ ކަންތައް ކިޔައިދީފިއެވެ. ނަސްރާގެ އެކުވެރިޔާ އެކަމާމެދު ކުރީ އުފަލެވެ. އަދި އެކަމަށްޓަކައި ނަސްރާއަށް މަރުޙަބާ ކިޔުނެވެ. ނަސްރާއަށް ހުރެވުނީ ޙައިރާންވެފައެވެ. ނަސްރާގެ އެކުވެރިޔާ ބުނި ގޮތުގައި މިއީ އެހާވަރަށް ވިސްނާ ކަންތައްތަކެއްނޫނެވެ. މި ޢުމުރުގައި މަޖާ ނުކުރަންޏާ ދެން މަޖާކުރާނީ ކޮން ޢުމުރަކުތޯ އެކުވެރިޔާ ސުވާލު ކުރިއެވެ. އޭނަ ދެއްކި ވާހަކަތަކަކުން ނަސްރާއަށް ހިސާބެއްގެ ހަމަޖެހުމެއް ލިބުނެވެ. އަދި އޭނަ ކުރީ ކޮންމެ އަންހެން ކުއްޖަކަށް ވެސް މި ޢުމުރުގައި އެފަދަ ޙާލަތެއްގައި ކުރެވޭނެ ކަން ކަމަށް ނިންމުނެވެ.
ދުވަސްކޮޅެއް ވަންދެން ނަސްރާ އުޅުނީ ފިރިހެން ކުދިންނާއި ދުރުދުރުންނެވެ. ވަކިން ޚާއްޞަކޮށް ޖޯންއާއެވެ. ނަސްރާގެ ނަސީބު ރަނގަޅުކަމުން ޖޯންވެސް ވަކި ނަސްރާއާއި މާ ބޮޑަށް އެކުވެރިވާކަށް ނުއުޅުނެވެ. އޭނަ ދެކެ ލޯބިވާ ވާހަކަ ބުނެވުނުކަން ހަނދާން ނެތުނީ ކަންނޭނގެއެވެ. ޖޯން މާ ގިނަ ދުވަސްތަކެއް ނުވެ އެހެން އަންހެން ކުއްޖަކާއި ރައްޓެހިވިއެވެ. އެކަމާމެދު ދެރަވާންވީ ކަމެއް ނުވަތަ އުފާކުރަން ވީ ކަމެއް ނަސްރާއަކަށް ނޭނގުނެވެ.
ނަސްރާ އޭނަގެ ކިޔެވުމަށް ސަމާލުކަން ދެވޭތޯ މަސައްކަތް ކުރިއެވެ. ނަމަވެސް އެރޭގެ ހަނދާންތައް ބިރުވެރި ހުވަފެނެއް ފަދައިން ނަސްރާގެ ލޯކުރިމަތިން ސިފަވަމުން ދިޔައެވެ. އޭނައަށް އެ ހަނދާންތަކުން ދުރުވެވެން އުޅުނުތަނާ ނަސްރާގެ އެކުވެރިން އޭނައަށް އާ އާދައެއް ދަސްކޮށްދީފިއެވެ. ރޭގަނޑު ދަންވަންދެން ހުސް ހުތުރު މަންޒަރުތައް ހުންނަ ވީޑިޔޯތައް އެންމެ އެކީގައި ތިބެ ބެލުމެވެ. އޭގެ ވީޑިޔޯއެއް ބެލި ފުރަތަމަ ރޭ މި ކުރެވެނީ ނުބައި ކަމެކޭ ވެސް ނަސްރާގެ ހިތަކަށް ނާރައެވެ. އޭނަ ވަނީ އަމިއްލަ އަތުން އެކަންތައް ކޮށްފައެވެ. ބެލުމަކީ ވަކި ކޮން ކަމެއްތޯ ހިތް ބުނަމުން ދިޔައެވެ. މާ ގިނަ ދުވަހެއް ނުވެ ނަސްރާ އެ ވީޑިޔޯތަކަށް ދެވިހިފިއެވެ. ކޮންމެ ރެއަކު އެ ވީޑިޔޯ ބަލާ ގަޑިއަކަށް އިންތިޒާރު ކުރެވެން ފެށިއެވެ. ފަހަކަށް އައިސް އެ ވީޑިޔޯ ހުޅުވާ މީހަކީ ވެސް ނަސްރާ ކަމަށްވިއެވެ. އެއްރެއަކު ވީޑިޔޯއެއްގެ ބަދަލުގައި ނަސްރާގެ އެކުވެރިޔަކު އައީ އެފަދަ މަންޒަރުތައް ސިފަ ކުރެވިފައިވި ވާހަކައެއް ހިފައިގެންނެވެ. ނަސްރާގެ އެއް އެކުވެރިޔަކު އެ ވާހަކަ ކިޔަމުން ދިޔައިރު ނަސްރާއާއި އޭނަގެ އަނެއް ދެ އެކުވެރިން ޝައުޤުވެރިކަމާއެކީ އަޑުއަހަން ތިއްބެވެ. އޭގެ އަނެއްދުވަހު ނަސްރާ އޭގެ 10 ވަރަކަށް ފޮތް ގަނެލިއެވެ.
ނުނިމޭ
