ނަފްސީ (ސާޅީސްވަނަ ބައި)

“ހޫ އިޒް އިޓް؟” އެ ސުވާލު ކުރަމުން އައިސް އެ އަންހެން ކުއްޖާގެ ފަހަތުގައި ހުއްޓިލީ، ގަދަކަމުން ލޯ ހުޅުވައިގެން، ހަމައެކަނި ސޯޓެއްގައި ހުރި ރާފިލްއެވެ.

ހިލްޔާއަށް އެ ފެނުނު މަންޒަރު ޤަބޫލުކުރަން ދަތިވިއެވެ. އެ މަންޒަރު ދޭހަކުރަން ވެސް ވަގުތުކޮޅެއް ނެގިއެވެ. ރާފިލްއާއި އޭނަގެ ހަތަރުކަޅި ހަމަވީ ވަގުތު ރާފިލްގެ ލޯ ކުއްލިއަކަށް ބޮޑުވެގެން ދިޔުމުން ހީކުރެވުނު ހީކުރުން ޔަޤީން ކުރެވުނެވެ. އެހިނދު ހިލްޔާ ހިފަހައްޓައިގެން ހުރި ކޮތަޅު އަތުން ދޫވެގެން ގޮސް ބިންމަތީގައި ޖެހުނެވެ.

“ހިލް-” ރާފިލް އެ އިނގިރޭސި ކުއްޖާގެ ފަހަތުން ނިކުމެ ކުރިއަށް ފިޔަވަޅެއް އެޅި ވަގުތު ހިލްޔާއަށް ބޭއިޚްތިޔާރުގައި ފަހަތަށް ފިޔަވަޅެއް އަޅާލެވުނެވެ. ހިފަހައްޓައިގެން ހުރި ނޭވާ ދޫކޮށްލެވުނީ ވެސް އެވަގުތެވެ. އެހިނދު ހިތް ބާރަށް ތެޅެމުން ދިޔައިރު ލޮލުން ދިލަ ނަގަން ފެށިއެވެ.

“ހިލްޔާ ލިސެން. އަހަ-” ރާފިލްއަށް އެހާ ހިސާބަށް ބުނެވުނު ތަނާހެން ހިލްޔާއަށް ކުއްލި ގޮތަކަށް ރާފިލްއަށް ފަސް ދެވުނެވެ. އަދި ދިގު އަވަސް ފިޔަވަޅުތަކެއްގައި އެތަނުން ދާން ހިނގައިގަނެވުނެވެ.

“ހިލްޔާ ސްޓޮޕް. ހިލްޔާ! $%#!” ހިލްޔާ ދާތަން ފެނި، ރާފިލް ކޮޓަރިން ނިކުމެވެސް ގޮވިއެވެ. ހިލްޔާ ލިފްޓަށް ގޮސް އެރި މަންޒަރު ފެނިފައި ރާފިލްއަށް ނުބައި ބަހެއް ކިޔާލެވުނެވެ.

“އެއީ ކޮން ކުއްޖެއް؟” އޭރުވެސް ކޮޓަރީގެ ދޮރުމަތީގައި ހުރި އިނގިރޭސި ކުއްޖާ އެހިއެވެ. އެއާއިއެކު ރާފިލް އައިސްފައިވި ރުޅީގައި އެ ކުއްޖާއަށް ވެސް އަވަގުރާނަ ގޮވާލަމުން ނިކުމެގެން ދިޔުމަށް އެންގިއެވެ. ހަމަ އެއާއިއެކު އެ ކުއްޖާ ވެސް ރުޅިވެރިކަމާއިއެކީ ނުބައި ބަހެއް ކިޔާލަމުން ތިމަންނަ ހުންނާކަށް ބޭނުމެއް ނެތޭ ކިޔައި ހެދުން ލުމަށްޓަކައި ކޮޓަރިއަށް ވަނެވެ.

**

ހިލްޔާއަށް އޭނަގެ ފްލޯ އާއި ހަމައަށް ދެވުނުއިރު ނޭވާ ކުރުވެފައިވިއެވެ. އެޕާޓްމެންޓްގެ ދޮރުގެ ކޯޑު ޖަހައި ދޮރުގެ ތަޅުގައި ހިފިއިރު އަތް ތުރުތުރު އަޅައެވެ. ދޮރު ހުޅުވުމާއިއެކު އެޕާޓްމެންޓްގެ ތެރެއަށް ދެމިގަންނަމުން ނުލެއްޕޭ ދޮރަށް ލެނގިލެވުނީ ފައިން ވާގި ދޫވާން އުޅުނުހެން ހީވުމުންނެވެ. ހިލްޔާ ލެނގިލުމާއިއެކު ބާރު އަޑަކާއިއެކު ދޮރު ލެއްޕުނެވެ. އެ އަޑުން ހިލްޔާގެ ހިތަށް އިތުރު ސިހުމެއް ލިބުނެވެ. އެ ސިހުމާއިއެކު ލަސްލަހުން ބިންމައްޗަށް ތިރިވެވުނެވެ.

އެހިނދު ލޮލަށް ސިފަވަމުން ދިޔައީ ދެންމެ ފެނުނު މަންޒަރެވެ. ރާފިލް ހުސް ގަޔާއިއެކީ އަންހެން ކުއްޖެއްގެ ކައިރީގައި ހުރި މަންޒަރެވެ. އެއަށްފަހު ސިފަ ކުރެވެން ފެށީ ރާފިލްގެ ކޮޓަރި ތެރޭގައި އެ ދެމީހުންގެ ދެމެދުގައި ހިނގާފާނެ ކަންތަކެވެ. އެހިނދު ހިލްޔާއަށް ދެލޯ މަރައި ތަގުޅި ކޮށްލަމުން ބޯހޫރުވާލެވުނު ވަގުތު ކުކުރާލެވުނެވެ. މިއީ ޙަޤީޤަތެއްތޯ އަމިއްލަ ނަފްސާއި ސުވާލު ކުރެވުނެވެ. މިއީ ބިރުވެރި ހުވަފެނަކަށް ވެސް ވެދާނެކަމަށް އެވަގުތު ހިތް ބުންޏެވެ. އެހެނަސް ލޯ މަރާލާފައި ހުޅުވާލުމުން ވެސް އެ ވަގުތުކޮޅުން ރެކެވޭ ގޮތެއް ނުވިއެވެ. މިއީ ހަމަ ޙަޤީޤަތެވެ. މުޅި ދުނިޔެއިން ވެސް އެންމެ ލޯބިވަނީ އޭނަ ދެކެ ކަމަށް ބުނި އޭނަގެ ލޯބިވެރިޔާ ވަނީ އެއީ ޙަޤީޤަތެއް ނޫންކަން ސާބިތުކޮށްދީފައެވެ. އޭނަ އެހާ އިތުބާރު ކުރި ލޯބިވެރިޔާ އެ ވަނީ އެ އިތުބާރު ގެއްލުވާލާފައެވެ. އަދި އަމުދުން އެ ލޯބިވެރިޔަކަށްޓަކައި އޭނަ އެހާ ވަފާތެރިވި ލޯބިވެރިޔާ އެވަނީ އޭނައަށް ބޭވަފާތެރިވެފައެވެ. މިއީ އޭނަގެ ފުރިހަމަ ލޯބީގެ ވާހަކައަށް ނުވިތާއޭ ހިތަށްއެރިއެވެ.

މި ހުރިހާ ކަމެއް އެނގުންވުމުން ހިލްޔާގެ ލޯ ކަރުނުން ފުސްވިއެވެ. އިރުކޮޅެއްގެ ތެރޭގައި ހިލްޔާގެ ގިސްލުމުގެ އަޑުން އެ އެޕާޓްމެންޓް ފުރިގެން ދިޔައެވެ.

**

އަވަސްއަވަހަށް ފެންވަރާލުމަށްފަހު އަތު ޖެހުނު އަޅިކުލައިގެ ޖިންސެއް ލައި ކަޅުކުލައިގެ ގަމީހެއް ލަމުން ދިޔަ ރާފިލްގެ މޫނުމަތިން ފެންނަމުން ދިޔައީ ރުޅިވެރިކަމެވެ. މިއޮތް ގަޑިއަކު މި މަސައްކަތް ކުރަން ޖެހުމުން އޭނަ ހުރީ ރުޅި އައިސް ފޫހިވެފައެވެ. މިއީ ޢާއްމު ގޮތެއްގައި އޭނަ ރޭގަނޑު ނަގާހާ މަޖަލެއް ނެގުމަށްފަހު ނިދާ ގަޑިއެވެ.

އެހެނަސް މިއަދު ހަމަ މި ގަޑީގައި ހިލްޔާ ވެސް އޭނަގެ ކޮޓަރިއަށް އަންނަން ވެއްޖެއެވެ. ދީންވެރިއޭ ކިޔައިގެން އުޅޭ ކުއްޖަކު އޭނަގެ ކޮޓަރިއާއި ހަމައަށް އައިސްދާނެ ކަމަށް އޭނަ ހިއެއް ނުކުރެއެވެ. ދީންވެރި މީހުންނަކީ މިގޮތުން ބަލާއިރު ހާދަ ހެއްވާ ބައެކޭ އެވަގުތު ހިތާހިތުން ކިޔާލެވުނެވެ. އިރުއިރުކޮޅާ ޚިޔާލުތަކާއި ދިރިއުޅޭ ވައްޓަފާޅި ބަދަލު ކުރާ ބައެކެވެ. ހިލްޔާ އުޅޭ ގޮތުން ހީވަނީ އެހެންނެވެ.

އަތްދިގު ގަމީހުގެ ގޮށްތައް އެޅުވުމަށްފަހު ރީތިވާ މޭޒުމަތީގައި ހުރި ޖެލް ދަޅުން ޖެލް ނަގައި ރާފިލް އޭނަގެ އިސްތަށިގަނޑު އޮމާންކޮށްލުމަށްފަހު ތަތްކޮށްލިއެވެ. އަދި އޭގެ ކައިރީގައި ހުރި ސެންޓުފުޅި ނަގައި އިހުނަށްވުރެ ވެސް ބޮޑަށް ގަޔަށް ބުރުއްސާލިއެވެ. އެއަށްފަހު އަމިއްލަ ނަފްސަށް ލޯގަނޑުން ބަލާލިއެވެ. ލޯބިވެރިޔަކު ހިތާމަވެރިވެގެން ދިޔަޔަސް ހުންނަންވާނީ ރީއްޗަށްތާއޭ ހިތަށްއެރިއެވެ. އަންހެން ކުއްޖާ ހެއްލޭނީ އޭރުންނެވެ. އޭނަ މި ކުޅޭ ކުޅިވަރުގައި ބޭރުފުށުން ރީތިވުން ނުހަނު މުހިއްމުކަން ތަޖުރިބާއިން އެނގިފައިވެއެވެ.

ޙަޤީޤަތުގައި މިހާތަނަށް އައިއިރު ރާފިލް ހިލްޔާއަށް ފޫހިވެފައިވެއެވެ. އެކި ދުވަސް މަތިން އޭނަ އުޅެއުޅެ ވެސް ހިލްޔާ އެ ހެދުން އެޅުމުގެ ވައްޓަފާޅި ވެސް ބަދަލު ކުރަން އެއްބަސް ނުވުމުންނެވެ. ޙަޤީޤަތުގައި އެކަމަށް އެއްބަސް ނުކުރުވިގެން އުޅެނީ ހިލްޔާއާއި އެކީ މާ ގިނަ ވަގުތު އޭނައަށް ނުލިބޭތީވެއެވެ. އޭނަ އެކި ގޮތްގޮތަށް ބުނެބުނެ ވެސް ހިލްޔާ ޤަވާޢިދުން ހޮސްޕިޓަލް ގެ ޑިއުޓީއަށް އެބަދެއެވެ. ދޭތެރެއަކުން އޭނަ ހިލްޔާއާއި ގުޅުން ބަދަހި ކުރުމަށްޓަކައި ހޮސްޕިޓަލަށް ދިޔަޔަސް އެކަން ކާމިޔާބެއް ނުވެއެވެ. ހޮސްޕިޓަލަށް ދިޔައިއްޔާ ހިލްޔާއަށް ފެންނަނީ އޭނަގެ ގޯސްތަކެވެ.

ހިލްޔާއާއިމެދު ރާފިލް އުއްމީދު ކަނޑާލީ އެހެންވެއެވެ. އެ ބޮޑު ހެދުމުގެ ތެރޭގައިވާ ހަށިގަނޑު ދެކެން ނުހަނު ބޭނުންވިޔަސް، އެކަމަށްޓަކައި އޭނަ ކުރަން ޖެހެނީ މާ ބުރަ މަސައްކަތެކެވެ. އެ މަސައްކަތް ކުރުމަށްވުރެ އިނގިރޭސި ކުދިންނާއި އެކީ ވަގުތު ހޭދަ ކޮށްލިޔަސް މާ ރަނގަޅު ކަމަށް ރާފިލްއަށް ނިންމިފައިވެއެވެ. އަމިއްލަ ބައްޕަގެ ނުފޫޒު ނެތްނަމަ އޭނަ މިހާރު ހިލްޔާ ދޫކޮށްލީހެވެ. އެހެންނޫންނަމަ ލައްވާ ގަދަކަމުން ވެސް އޭނަ ބޭނުންވާ ކަންތައް ކުރުވީހެވެ. އަދި ހިލްޔާ ނިކަމެތިކޮށް އެ ނިކަމެތިކަމުގައި އުޅޭ މަންޒަރު އުފަލާއިއެކީ ބެލީހެވެ. އެހެނަސް އެހެން ހަދައިފިނަމަ އޭނަގެ ބައްޕަ އޭނައަށް އިތުރަށް ލާރި ދޭނެ ހެނެއް ހިއެއް ނުވެއެވެ. ހިލްޔާއާއި އޭނަގެ ގުޅުމަކީ ބައްޕަގެ ވިޔަފާރި ނިންމުމެއް ވިއްޔާއެވެ. އެ ވިޔަފާރީގެ ނަމަށް ބުރޫ އަރާނެ ފަދަ އެއްވެސް ކަމެއް ކުރެވޭކަށް ނެތެވެ.

**

ހިލްޔާއަށް ދޮރު ކައިރީގައި އިށީނދެގެން އިނދެވުނީ ކިހާއިރެއް ވަންދެން ކަން ޚުދު ހިލްޔާއަށް ވެސް ނޭނގެއެވެ. ރާފިލްއާއި އޭނަ ހަމަ ވަކިވާނީތޯ ހިތް ސުވާލު ކުރަމުން ދިޔައެވެ. އެ ސުވާލު ހިތަށް ވެރިވުމުން ހިތަށް ތަދުވަމުން ދިޔައެވެ. އޭނަ ދެން މިހާ ‘ލޯބި’ ގުޅުމެއް ހޯދާނީ ކިހިނެއްތޯ އަމިއްލަ ޒަމީރާއި ސުވާލު ކުރެވުނެވެ. އޭނަ ބަލަހައްޓައި ދެވޭނެހާ މުއްސަނދި ބައިވެރިޔަކު ހޯދާނީ ކިހިނެއް ހެއްޔެވެ؟ މުޅި ރާއްޖެއަށް އޭނައާއި ރާފިލް ‘އެންގޭޖް’ ކުރި ވާހަކަ އެނގިފައި ވަނިކޮށް އޭނަ ރާފިލްއާއި ވަކިވުމުން މީހުން އޭނައާއި މެދު ދެކޭނީ ކިހިނެއް ހެއްޔެވެ؟ އޭނަ ސަޅިބައިސާ ކެނޑި އެންމެންނަށް ދައްކާނީ ކޮން މޫނެއް ހެއްޔެވެ؟

މި ޚިޔާލުތަކުގެ ސަބަބުން ހިލްޔާގެ މުޅި ހަށިގަނޑުން ވެސް ވާގި ދޫވެފައިވިހެން ހީވިއެވެ. އިންސާނާގެ ހިތަކީ އެ އިންސާނަކު އެންމެ ލޯބިވާ ކަމެއް ގެއްލިއްޖެނަމަ ރޫޙު މަރުވެދާ އެއްޗެކެވެ. އެހެންކަމުން އެހާ ހިސާބުން އިންސާނާގެ ގުނަވަންތައް ވެސް އެންމެ ރަނގަޅަށް މަސައްކަތެއް ނުކުރާނެއެވެ. ނަފްސާނީ ބަލީގެ ސަބަބުން ޖިސްމާނީ ބަލިތައް ވެސް ކުރިމަތިވަނީ އެހެންވެއެވެ.

އެހެނަސް ހިލްޔާގެ ހިތުގައި ދުނިޔެއަށް އޮތް ލޯތްބާއި އެކު އަދިވެސް އެހެން ލޯތްބެއް އޮތީތީ ކަންނޭނގެއެވެ. އެވަގުތު ފަތިސް ނަމާދު މަތިން ހިލްޔާގެ ހިތް ހަނދާން ކޮށްދިނެވެ. ތެދުވެލަން ހިތަށް އެރީ ފަތިސް ނަމާދު ނުކުރެވި ނަމާދު ގެއްލިދާނެކަމުގެ އިންޒާރު ސިކުނޑި ދިނުމުންނެވެ.

އެހެންކަމުން ހިލްޔާއަށް ވަރުބަލިވެފައިވާ ހިތަކާއިއެކީ ވެސް ކޮޅަށް ތެދުވެލިއެވެ. ކުރިއަށް ހިނގައިގަންނަން އުޅުނު ތަނާހެން އެޕާޓްމެންޓުގެ ބެލް އަޅުވާލެވުނު އަޑު އިވުނެވެ.

އެއާއިއެކު ހިލްޔާއަށް ޙައިރާންކަމާއެކީ ފަސްއެނބުރިލަމުން މައިދޮރު ކައިރީގައި ހުރި ސްކްރީނަށް ނަޒަރެއް ދެވުނެވެ. ސްކްރީނުން ބޭރުގައި މަޑުކޮށްގެން ހުރި ރާފިލް ފެނިފައި ހިލްޔާގެ މެއަށް ފިނިވިއެވެ. އެހިނދު ބޭއިޚްތިޔާރުގައި ދެބުމަ ކައިރި ކޮށްލެވުނީ ރާފިލްއަށް ނުރުހުންވެފައިވުމުންނެވެ. ދެވަނަ ފަހަރަށް ވެސް ރާފިލް ބެލް އަޅުވާލިއެއްކަމަކު ހިލްޔާއަށް ދެންވެސް ހުރިގޮތަށް ހުރެވުނެވެ.

ހިލްޔާ ވަކި ޙަރަކާތެއް ނުގެނެވި ހުއްޓާ ރާފިލް ވާހަކަ ދެއްކި އަޑު އިވުނެވެ.

“ހިލްޔާ ޕްލީޒް އޮޕެން ދަ ޑޯ. ވާހަކަ ދައްކަން ބޭނުން ހިލްޔާއާ. އައި ވޯންޓް ޓު ސީ ޔޫ.” ރާފިލް ބުންޏެވެ.

ރާފިލްގެ އަޑުގައިވި ތުރުތުރުން ހިލްޔާގެ މޭގައި ރިހުމެއް އުފެދުނެވެ. ތިންވަނަ ފަހަރަށް ވެސް ރާފިލް ބެލް އަޅުވާލުމުން އެ ރިހުން އިތުރުވިއެވެ. ރާފިލްއާއި އޭނަ ދުރުވުމުން ރާފިލް ދެރަވީތޯ ހިތަށްއެރިއެވެ.

“ލިސެން ހިލްޔާ. ޕްލީޒް! ހިލްޔާގެ ސޫރަ ނުފެނި އަހަންނަށް އުޅެވޭނެހެން އަހަންނަށް ހިއެއްނުވޭ.” ރާފިލް އޭނަގެ ދެއަތް ދޮރުގައި ވިއްދާލަމުން ހިތާމަވެރި އަޑަކުން ބުންޏެވެ. އެ ބަސްތައް އަމުނާލި ގޮތުން ހިލްޔާގެ ލޮލުން ކަރުނަ ހިލުނެވެ. އެހެނަސް ދެންވެސް އެއްވެސް ޙަރަކާތެއް ނުގެނެސް ހުރެވުނެވެ.

ހިލްޔާ ބަލަބަލާ ހުއްޓާ ރާފިލް ލަސްލަހުން ދެއަތް ތިރިކޮށްލަމުން ފުން ނޭވައެއް ދޫކޮށްލިއެވެ.

“ޔޫ ނޯ ވަޓް؟ އަހަރެން ހިލްޔާއަށް ޓައިމް ދޭނަން. އެނގޭ ބަލަން ފަސޭހަ މަންޒަރެއް ނޫންކަން ހިލްޔާއަށް ފެނުނީ. ބަޓް އައި ވޯންޓު އެކްސްޕްލެއިން. ބޭނުން އަހަރުމެންގެ ރިލޭޝަންޝިޕް ރީސްޓޯރ ކުރަން. ބިކޯޒް އައި ލަވް ޔޫ. އައި ރިއަލީ ޑޫ.” ރާފިލް ބުންޏެވެ. އެހިނދު އެ އިވުނު ފަހު ބަސްތަކުން ހިލްޔާގެ މެއަށް ގޮތެއް ވިއެވެ. ވީ ރަނގަޅު ގޮތެއް ކަމެއް ނޫނީ ނުބައި ގޮތެއް ކަމެއް ނޭނގުނެވެ.

“ހިލްޔާ ނިކުންނަން ދެން އައި ވިލް ސްޓޭ ހިއާރ. ވަރިހަމަ 24 ގަޑިއިރު ވިޔަސް، 48 ގަޑިއިރު ވިޔަސް އަހަރެއް ވިޔަސް. ފެންފޮދެއް ވެސް ނުބޯނަން ހިލްޔާ ނުފެންނަނީސް އައި ސްވެއާރ.” ރާފިލް އެހެން ބުނެ އެ ދޮރަށް ފަސް ދީފައި ގޮސް ދޮރު ކުރިމައްޗަށް ވާ ގޮތަށް ހުރި ފާރު ކައިރީގައި އިށީނދެ ފާރަށް ލެނގިލީ މަންޒަރު ހިލްޔާއަށް ފެނުނެވެ.

ރާފިލް އެހެން އިންތަން ބަލަން ހުރެހުރެފައި ހިލްޔާ ކޯތާފަތަށް ފޭބި ކަރުނަ ފޮހެލިއެވެ. އިރުކޮޅެއް ވަންދެން ރާފިލް އެހެން އިން މަންޒަރު ބަލަން ހިލްޔާއަށް ހުރެވުނެވެ. ކޮންމެ ގޮތެއްވިޔަސް އޭނައަކީ އެއްވެސް މީހަކަށް އަނިޔާއެއް ދޭން ބޭނުންވާ މީހަކަށް ނުވާތީ ހިލްޔާއަށް ގޮސް ދޮރު ހުޅުވާލެވުނެވެ.

ހިލްޔާ ފެނުމާއެކު ރާފިލް ހިލްޔާގެ ނަމުން ގޮވާލަމުން ކުއްލި ގޮތަކަށް ކޮޅަށް ތެދުވިއެވެ. އެހިނދު ރާފިލް އޭނައާއި ދިމާލަށް އަންނަން ފެށުމުން، ހިލްޔާއަށް ކޮޓަރިން ނިކުމެ ދޮރު ލައްޕާލެވުނީ، އެހެން ކަހަލަ އިންޒާރެއް ސިކުނޑި ދިނުމުންނެވެ. ރާފިލް އައި ގޮތަށް އައިސް ހިލްޔާގެ ކުރިމަތީގައި މަޑުކޮށްލިއެވެ.

“ސޯ ހެޕީ ޓު ސީ ޔޫ….ލުކް ހިލްޔާ، އަހަރެން ނެތިން އެއްވެސް ކަމެއް ފޮރުވާކަށް. އަހަންނަށް ތި ހީކުރާ ކުށެއް ކުރެވިއްޖެ. މި ދިރިއުޅުން ބިޒީކަމުން ގޮއްސަ އަހަންނަށް ކުރެވުނު ކަމެއް އެއީ. އިވެން ޔޫ ނޯ އެއްނު މެން ހޭވް ނީޑްސް ކަން؟ ހިލްޔާއާ ދިމާނުވާ ވަރުން އަސްލު އެހެން އެވީ. އެންޑް ޔޫ ނޯ. އަހަރެން އެ ކުއްޖާއާއެކީ ވަގުތު ހޭދަ ކުރިއިރު ވެސް އެއްފަހަރު ވެސް ހިލްޔާ މަތިން ހަނދާނެއް ނުނެތޭ. ބިކޯޒް ލައިކް އައި އޯލްވޭސް ސޭ. ޔޫ އާރ މައި ލަވް.”

ރާފިލް ނުހަނު އަސަރާއިއެކީ މިފަހަރު ދެއްކި ވާހަކަތަކުން ހިލްޔާގެ މޭ ނުބައި ކުރިއެވެ. ރާފިލްއާއިމެދު ދެކެން ވީ ގޮތް ހިލްޔާގެ ހިތަށް މާ ބޮޑަށް އޮޅިގެން ދިޔުމުންނެވެ. އެއްޗެކޭ ނުބުނެވިފައި ހުއްޓާ ރާފިލް އިތުރަށް ވާހަކަ ދެއްކިއެވެ.

“އެހެންވެ އަހަރެން ބުނަނީ ތަންކޮޅެއް ޓައިޓް ހެދުން ލައި އުޅޭށޭ ލަވް. އޭރުން އައި ވިލް ނޯ ޔޫ އާރ އެޓްރެކްޓިވް ކަން. އެހެން ވެއްޖެއްޔާ އަހަރެން ނުޖެހޭނެ އެހެން އަންހެން ކުދިންނަށް ބަލާކަށް.” ރާފިލް ބުންޏެވެ. މި ޙާލަތުގައި ވެސް ކުށްވެރިވަނީ ހިލްޔާހެން ހީވާ ފަދައަކުންނެވެ.

ރާފިލްގެ އެ މުރާދު ޙާސިލުވިއެވެ. ހިލްޔާ ރާފިލްގެ ބަސްތަކަށް ހެއްލިގެން ދިޔައީ، މި ވޭތުވި 5 މަސް ތެރޭގައި މުޅިން ވެސް އެ ބަސްތަކަށް ހެއްލެން އާދަވެފައިވީތީވެއެވެ. އަދި ހަމަ އެހެންމެ އޭނަ އުނގެނިފައިވާ ދީނީ ޢިލްމާއި އަޚްލާޤުގެ މަތިން މުޅިން ހަނދާން ނެތިފައިވުމުންނެވެ.

ފިރިހެނުންނަކީ ވަރުގަދަ އެދުންތަކެއް ލައްވާފައިވާ ބަޔަކަށް ވިޔަސް އެއީ ފިރިހެނުން ފާޙިޝް ކަންކަމަށް އަރައިގަތުމަށް އޮތް ޢުޒުރެއް ނޫނެވެ. ޙަޤީޤީ ފިރިހެނުންނަކީ އަންހެނުންނަށް އިޙްތިރާމް ކުރާ ބައެކެވެ. ބެލުން ތިރި ކުރާ ބައެކެވެ. ފާޙިޝް ކަންކަމުން ދުރުވުމަށް ނަމާދާއި، ރޯދައާއި ﷲ ގެ ޒިކުރުން އެހީ ހޯދާ ބައެކެވެ. ދުނިޔޭގެ އެއްވެސް ކަމަކީ އެ ޒިކުރުން ދުރުވުމަށް އޮތް ސަބަބެއްކަމުގައި ނަހަދާ ބައެކެވެ. އާޚިރަތް ދުވަހަށް ބިރުވެތިވާ ބައެކެވެ.

އަމިއްލަ ޚިޔާލުތަކުގެ ތެރެއިން ރާފިލް ބުނި ބައެއް ވާހަކަތަކާ އެއްބަސްވަމުން ހިލްޔާ ވާހަކަ ދެއްކިއެވެ.

“އަހަރެން ކުރިން ވެސް ރާފިލް ގާތު ބުނިން، އަހަރެން އެހެން ގޮތަކަށް ހެދުން އަޅާ މަންޒަރު ރާފިލްއަށް ފެންނާނީ މެރީ ކުރުމަށްފަހު އޭ. ބަޓް ޔޫ ޑޯންޓް ވޯންޓް ދެޓް.” ހިލްޔާ ބުންޏެވެ. އެހިނދު ރާފިލްއަށް ބަލާލަން ހިލްޔާ ނުކުޅެދުނެވެ. އިސްޖެހިފައި ހުރެވުނެވެ.

ހިލްޔާގެ އެ ވާހަކައަށްފަހު ހިމޭންކަމުގެ ވަގުތުކޮޅެއް ވޭތުވިއެވެ. އެއަށްފަހު ވާހަކަ ދެއްކީ ރާފިލްއެވެ.

“ދެން ލެޓްސް ގެޓް މެރީޑް.” ރާފިލް ބުނެލި ބަސްތަކާއިއެކީ ލިބުނު ޝޮކުން ހިލްޔާއަށް އިސްއުފުލާލެވުނެވެ. ކަންފަތަށް އިތުބާރު ކުރަން ވެސް ނުކުޅެދުނެވެ. މިއީ ޙަޤީޤަތެއްތޯ ހިތަށްއެރިއެވެ.

“މިހާރުއްސުރެ ޝެޑިއުލް ވެސް ކޮށްލަމާ. 1 ޖެނުއަރީ، ހަވީރު 4 ޖަހާއިރު. ހޮސްޕިޓަލް ޑިއުޓީއިން އަހަރުމެން ލީވް ނަގާނީ. ފޯރ ވެޑިންގް އެންޑް ހަނީމޫން.” ރާފިލް ކިޔައިދިނެވެ. އެހިނދު އިހުނަށްވުރެ ބޮޑަށް ހިލްޔާގެ މޭ ނުބައި ކުރަން ފެށި ގޮތުން އެ ހުރިތަނަށް ހޮޑުލެވިދާނެހެން ހީވިއެވެ. މި ހުރިހާ ދުވަހު އޭނަ ހުރީ އޭނައާއި ރާފިލްގެ ކައިވެނީގެ އިންތިޒާރުގައެވެ. އެހެނަސް އެއީ އޭނަ ބޭނުންވާ ގޮތް ނޫންހެން ހީވި މި ފުރަތަމަ ދުވަހު ރާފިލް އެ ރޭވީ ކައިވެންޏެވެ.

ރާފިލް އެހާ ހިސާބުން ހުއްޓާލީ ވެސް ނޫނެވެ. ހިލްޔާ ދެންވެސް ބަލަބަލާ ހުއްޓާ ރާފިލް ޖިންސް ގެ ޖީބުން ފޯނު ނެގިއެވެ. އެއަށްފަހު ދެ ތިން ފަހަރު ސްކްރީނަށް ފިތާލުމަށްފަހު ފޯނު ކަންފަތުގައި ޖެއްސިއެވެ.

“ހެލޯ ނަހީދުބެ. އަޅުގަނޑާއި ހިލްޔާ ކައިވެނިކުރަން ނިންމައިފިން. 1 ޖެނުއަރީގަ.”

ރާފިލް ބުނެލި ބަސްތަކުން ހިލްޔާގެ ދެލޯ ބޮޑުވީ ހިނދު، ހިތަށް ސިހުމެއް ލިބުނެވެ. އޭނަ ބޭނުންވާކަން ޔަޤީން ނުވާ ކައިވެންޏެއްގެ ވާހަކަ ބައްޕައާއި ހަމައަށް ވެސް ފޯރީ ހެއްޔެވެ؟

“އާނ….އާނ އޯކޭ ނަހީދުބެ. ހިލްޔާ އަދި ބޭބެއަށް ގުޅާނެ އިރުކޮޅަކުން. އޯކޭ.” ރާފިލް ހިނިތުންވުމަކާއިއެކީ ވާހަކަ ދެއްކުމަށްފަހު ފޯނު ކަންފަތުން ނަގައި ތިރި ކޮށްލިއެވެ. އެއަށްފަހު ހިލްޔާއާއި ވާހަކަ ދެއްކިއެވެ.

“މިހާރު ޤަބޫލު ކުރެވޭތަ ލޯބި؟ ދިސް އިޒް ހައު ކޮމިޓެޑް އައި އޭމް ޓު ޔޫ. އައި ވޯންޓު މެރީ ޔޫ. ހިލްޔާ ތި ބުނާހެން އެކީގަ ލައިފެއް ފެށީމަ މިރޭ ހިނގި ކަހަލަ ކަންތައް ނުހިނގާނެ.” ރާފިލް ދެން ވެސް ނުހަނު އަސަރާއިއެކީ ބުންޏެވެ. އެހެނަސް އެ އަސަރު ހިލްޔާގެ ހިތަށް ނުފޯރައެވެ. އެ ހިތް ވީ އެއަށްވުރެ ބޮޑު ނުތަނަވަސްކަމެއްގެ ތެރޭގައެވެ.

“ހިލް-“

“އައި ނީޑް ޓައިމް….އައި ނީޑް ޓައިމް. އެކަނިވެލަން ބޭނުމީ.”

ރާފިލް ކުރިއަށް ފިޔަވަޅެއް އަޅައި އެއްޗެކޭ ބުނަން އުޅުމުން ހިލްޔާ ފަހަތަށް ފިޔަވަޅެއް އަޅައި ތުރުތުރު އަޅާ އަޑަކުން ބުންޏެވެ. ނޭނގުމެއްގެ ތެރެއިން ވެސް ތަކުރާރުކޮށް އޭނަ ބޭނުންވާ ކަމެއް ބުނެލީ، އޭނަގެ ބަސްތަކާއި އިޙްސާސްތަކަށް އިޙްތިރާމް ނުކުރެވޭކަމުގެ އިޙްސާސް ކުރެވުމުންނެވެ.

ހިލްޔާގެ ނަސީބު ރަނގަޅު ކަމުން ކަންނޭނގެއެވެ. އެވަގުތު ރާފިލް ބޯޖަހާލަމުން ‘އޯކޭ’ އޭ ބުންޏެވެ. ހަމަ އެއާއިއެކު ހިލްޔާއަށް ވަގުތުން ރާފިލްއަށް ފަސް ދީފައި ގޮސް އޭނަގެ އެޕާޓްމެންޓަށް ވަދެވުނެވެ.

އެޕާޓްމެންޓަށް ވަން ގޮތަށް ގޮސް ހިލްޔާއަށް އެތާ ހުރި ކިންގް ސައިޒް އެނދުމައްޗަށް ހުރަހަށް ވެއްޓިގަތެވެ. އެ ލަކްޝަރީ އެނދުގެ ލަކްޝަރީ މަޑު ގޮދަނޑި ހިލްޔާގެ ސިކުނޑިއަށް އެވަގުތު ވެރިވެފައިވި ހާސްކަން ފިލުވައެއް ނުދިނެވެ. ހައިޖާނެއް އުފެދިފައިވި ސިކުނޑީގެ ސަބަބުން ބޮލަށް ބަރުވެ، ބޮލުގައި ރިހުމެއް ވެސް އުފެދިފައިވިއެވެ.

ދެން ހަދާނީ ކިހިނެއްތޯ ހިލްޔާގެ ހިތަށްއެރިއެވެ. ދާދި ދެންމެއަކު ރާފިލްއާއި ވަކިވާނީތޯ އަމިއްލަ ޒަމީރާއި ސުވާލު ކުރެވުނެއްކަމަކު މިހާރު ކުރެވެމުން ދިޔައީ ރާފިލްއާއި ކައިވެނި ކުރުމުގެ ސުވާލެވެ. ރާފިލްއާއި އޭނަ ހަމަ ކައިވެނި ކުރާނީތޯ ހިތަށްއެރިއެވެ. ރާފިލްއާއި ވަކިވުމުގެ ޚިޔާލުގައި ހުއްޓާ ކަންތައް މިހެން މިވީ އޭނައާއި ރާފިލް ގުޅުން ތަޤްދީރުގައި ވުމުން ހެއްޔެވެ؟ ރާފިލްއަކީ އޭނައަށް ހަމަ އެންމެ ރަނގަޅުވާނެ ބައިވެރިޔާ ހެއްޔެވެ؟ ފައިސާ ގެ ގޮތުން ބަލާނަމަ ހަމަ ޔަޤީނުން ވެސް ރާފިލްއާއި އެއްވަރުގެ މީހަކު އޭނައަށް ލިބޭނެހެން ހިއެއްނުވެއެވެ. ސޯޝަލް މީޑިއާގައި އޭނަ ހުރިހާ ފޮޓޯއެއް ޕޯސްޓްކޮށްފައި ހުރީ ވެސް އޭނަ ދަންނަ އެންމެންނަށް އެހެން ހީވާނެ ފަދައަކުންނެވެ. އެހެނަސް މިއަދު މިވީ ކިހިނެއް ހެއްޔެވެ؟ ރާފިލްއާއި ވަކިވެގެން އޭނަ އެންމެންނަށް ދައްކާނީ ކޮން މޫނެއް ހެއްޔެވެ؟ ރާފިލްއާއި ވަކި ނުވެ ރާފިލް ބަދަލުވީތޯ ބަލަންވީ ހެއްޔެވެ؟

ހިލްޔާގެ އެ ޚިޔާލުތަކަށް މެދުކެނޑުމެއް އައީ، ވައިބާރ އިން ކޯލެއް އަންނަން ފެށި އަޑު އިވުމުންނެވެ. އެއާއިއެކު ހިލްޔާއަށް އެނދުން ތެދުވެލަމުން އަޑު އަންނަމުން ދިޔަ ދިމާލަށް ނަޒަރެއް ދެވުނެވެ. އެހިނދު އެޕާޓްމެންޓްގެ މައިދޮރު ކައިރީގައި އޮތް އޭނަގެ އަތް ދަބަސް ފެނުނެވެ.

ހިލްޔާ ފުން ނޭވައެއް ދޫކޮށްލަމުން ހިތާއި ދެކޮޅަށް އެނދުން ތެދުވެގެން އެދިމާލަށް ދިޔައެވެ. އަތް ދަބަސް ނެގުމުގެ ބަދަލުގައި ހިލްޔާއަށް ބިންމަތީގައި އިށީނދެވުނީ ހަށިގަނޑުގައި ކުޑަ ވެސް ވަރެއް ނެތުމުންނެވެ. އިތުރަށް ހިނގަން ވެއްޖެނަމަ އޭނައަށް ގޮތެއް ވެދާނެހެން ހީވުމުންނެވެ. ބިންމަތީގައި އިނދެ ދަބަސް ތެރެއިން ފޯނު ނަގައި ބަލާލިއިރު، އޭނަ ހީކުރި ފަދައިން ސްކްރީނުން ފެނުނީ ބައްޕަގެ ނަމެވެ. ހިލްޔާ އިރުކޮޅެއް ވަންދެން ސްކްރީނަށް ބަލަން އިނދެފައި ކޯލު ރިސީވްކޮށް ފޯނު ކަންފަތުގައި ޖެއްސިއެވެ.

“ހެލޯ ބައްޕާ….” ހިލްޔާ ބުނެލީ ހަމައެކަނި އެހާ ވަރަށެވެ. އެހިނދު އޭނަގެ އަޑުގައިވި ތުރުތުރު ބައްޕައަށް ނުއިވޭނެގޮތެއް ވުމަށް އުއްމީދު ކުރެވުނެވެ.

“ރާފިލް ދެންމެ ގުޅި ބައްޕައަށް. ބުނީ ދެކުދިން ކައިވެނި ކުރަން ނިންމައިފީމޯ. ތެދެއްތަ؟” ބައްޕަ ސުވާލުކުރިއެވެ.

“އަ….އާނ.” ހިލްޔާއަށް ޖެހިލުންވުމަކާއިއެކީ ބުންޏެވެ.

“ހިލްޔާ….އުފަލުންތަ ތިހިރީ؟” ބައްޕަ އެހިއެވެ. އެހިނދު ކޮންޓްރޯލެއް ނެތި ހިލްޔާގެ ލޮލަށް ކަރުނަތައް ޖަމާވެ، ލޯ ކަރުނުން ފުސްވިއެވެ. ބައްޕަ އޭނައާއިމެދު އަޅާލާވަރު އިޙްސާސްވުމުން ހިތަށް އަސަރު ކުރީއެވެ. ބޭއިޚްތިޔާރުގައި ދެލޯ މަރައި ތަގުޅިވުމާއިއެކު ލޮލުން ކަރުނަތައް ކޯތާފަތަށް ފައިބައިގެން އައެވެ. އެހިނދު އެސްފިޔަތަކުގެ ދޭތެރެއިން ސިފަވީ ރާފިލް އެ ބީރައްޓެހި ކުއްޖާއާއިއެކީ ހުރި ގޮތެވެ. އޭނަ މި ވާހަކަ ބައްޕައަށް ކިޔައިދޭނީ ފަހެ ކިހިނެއް ހެއްޔެވެ؟

“ދަރިފުޅު؟ އެބަހުރިންތަ؟” ބައްޕަ އަނެއްކާވެސް އެހިއެވެ.

“އާނ ބައްޕާ. މިހިރީ.” ހިލްޔާއަށް ބުނެވުނެވެ. އެހިނދު އޭނަގެ ރޮވިފައިވާ އަޑު ބައްޕައަށް ވަންހަނާ ނުވާނެކަން ހިލްޔާއަށް ޔަޤީންވިއެވެ.

“ބަލިވެތަ ތިއުޅެނީ ދަރިފުޅު؟” ބައްޕަ ކަންބޮޑުވުމަކާއިއެކީ އެހުމުން ހިލްޔާއަށް ވާހަކަ ދެކެވުނެވެ.

“ނޫނޭ. އެއީ މިކޮޅު މޫސުމުގެ ގޮތުން ރޯގާ ވައްތަރުވެގެން މިއުޅެނީ. ބޭސް ކެއީމަ ރަނގަޅުވާނެ. ބޭސް ކާން މިއުޅެނީ.” ހިލްޔާ ކަރުނަތައް ފޮހެމުން ވާހަކަ ދެއްކިއެވެ.

“ފިނި މޫސުން ދޯ؟ ސްވެޓާރ އާ އެއްޗެހި ލައިގެން އުޅެއްޗޭ. ވަކިން ޚާއްސަކޮށް ރޭގަނޑު. މިއަދު އޮފް ދުވަސް ދޯ؟ ބޭސް ކައިގެން ރަނގަޅަށް އަރާމުކޮށްލާ. ބައްޕަ ފަހުން ގުޅާނަން އިރާދަކުރެއްވިއްޔާ.” ބައްޕަ ބުންޏެވެ. އެއާއިއެކު ހިލްޔާ އޯކޭ ބުނުމުން ބައްޕަ ވެސް އޯކޭ ދީފައި ފޯނު ކަނޑާލިއެވެ.

ކޯލު ނިމުމަކަށް އައުމުން ސްކްރީނުން ހިލްޔާއަށް ފެނުނީ ބައްޕައާއި އޭނަގެ ޗެޓް ލޮގެވެ. އެހިނދު އެކި ދުވަސްމަތިން ބައްޕަ އޭނައަށް ފޮނުވާފައި ހުރި މެސެޖުތައް ހިލްޔާއަށް ފެނުނެވެ. އޭގެއިން ގިނަ މެސެޖުތަކަކީ އޭނަ ރިޕްލައި ނުކުރާ މެސެޖުތައް ކަން ހިލްޔާއަށް ފާހަގަވިއެވެ.

“ދަރިފުޅު ކިހިނެއް؟”

“މިއަދު ހޮސްޕިޓަލް ވަރަށް ބިޒީތަ؟”

“ހޮސްޕިޓަލްގަ އެންމެންނާ ވެސް ގުޅިގެން އުޅެއްޗޭ. އޭރުން ކާމިޔާބު ވާނީ.”

“މިސްޑް ކޯލް”

“ދަރިފުޅު ޤަވާޢިދުން ކައި އުޅެން ދޯ؟”

“ހުން ކިހިނެއް މިހާރު؟”

“މިސްޑް ކޯލް”

ހިލްޔާ މައްޗަށް ސްކްރޯލް ކުރި ވަރަކަށް ހައްތަހާ ވެސް ފެނުނީ އެ މެސެޖުތަކެވެ. ބައެއްފަހަރު ހިލްޔާ ބައްޕަގެ މެސެޖުތަކަށް ރިޕްލައި ނުކުރަނީ ހޮސްޕިޓަލުގައި ބުރަވުމުންނެވެ. އަނެއްބައި ފަހަރު ރިޕްލައި ނުކުރަނީ ގޭގައި ހުއްޓަސް ވަރުބަލިވެފައިވުމުންނެވެ. އެހެނަސް ބައްޕަ އޭނައަށް ފޫހިކަމެއް ނެތި މިވަނީ މެސެޖުތަކެއް ކޮށްފައެވެ. ގިނަ ފަހަރު އޭނައަށް ބައްޕަގެ ފޯނު ނުވެސް ނެގެއެވެ. ބައްޕަ އަދިވެސް އޭނަ ދެކެ ލޯބިވަނީ ކިހިނެއްތޯ ހިތަށްއެރިއެވެ.

ހަމަ އެހިނދު އޭނަ އެހެން ކަމެއްގެ މަތިން ވެސް ހަނދާންވިއެވެ. ކިތަންމެ ބުރަ ވިޔަސް އަދި ކިތަންމެ ބަލިވެފައި ވިޔަސް ހިލްޔާ މިހާތަނަށް ރާފިލްގެ ކޯލެއް ދޫކޮށްފައެއް ނުވެއެވެ. ރާފިލްގެ މިސް ކޯލެއް ހުރެއްޖެނަމަ ވަގުތުން ގުޅާލެވެއެވެ. އަދި މެސެޖެއް ކުރިތަން ފެންނައިރަށް ރިޕްލައި ކުރެވެއެވެ. އެހެނަސް ރާފިލް އޭނައާއިމެދު ކަންތައް ކުރީ ކިހިނެއް ހެއްޔެވެ؟

އެ ޚިޔާލުގައި އިންދާ ފޯނަށް ނޮޓިފިކޭޝަނެއް އައެވެ. އެއީ ލަންޑަން ގެ ނަމާދު އެޕްލިކޭޝަނުން އައި ނޮޓިފިކޭޝަނެކެވެ. އޭގައި އޮތީ އިރު އަރަން ބާކީ އޮތީ 20 މިނެޓް ކަމަށެވެ. އެއާއިއެކު ފަތިސް ނަމާދު މަތިން ހަނދާންވުމުން ހިލްޔާއަށް ބޮލުގައިވި ރިހުމާއިއެކީ ވެސް އަވަސްއަވަހަށް ތެދުވެލެވުނެވެ. އެތައް ދުވަހެއް ފަހުން ރޯދައަށް ހުއްޓާ އޭނަ ފަތިސް ނަމާދު ވަގުތު ގެއްލުވާލަން ބޭނުމެއް ނުވީއެވެ.

ދަތް އުނގުޅައި މޫނު ދޮވުމަށްފަހު ހިލްޔާ އަވަސް އަވަހަށް ވުޟޫކޮށްލިއެވެ. އެއަށްފަހު ކޮޓަރިއަށް ނިކުމެ ބިންމަތީގައި އޭނަގެ މަޑު މުށިކުލައިގެ މުސައްލަ އަޅާލަމުން ހަމަ އެ ކުލައިގެ ފޮށާ އެޅިއެވެ. މުސައްލަ މައްޗަށް އެރުމާއިއެކު މިހާރުގެ އާދައިގެ މަތިން ހިލްޔާއަށް ނިޔަތް ގަނެވުނީ ފަރުޟު ފަތިސް ނަމާދު ކުރުމަށެވެ. އެހެނަސް ހަޝަމް ބަންނަން އުޅުނު ވަގުތު ވެސް މިރޭ އޭނައަށް ކުރެވިގެން ދިޔަ އިޙްސާސްތައް ހިތުތެރޭގައި އުތުރި އަރަމުން ދިޔައެވެ. ރާފިލްއާއި ކައިވެނި ކުރުމާއިމެދު ވެސް އަދި ނުކުރުމާއިމެދު ވެސް ހިލްޔާ ހިތްހަމަނުޖެހޭކަން ހިލްޔާއަށް އެނގުންވީ އެވަގުތެވެ.

ހަދަންވީ ގޮތް ޔަޤީން ނުވުމާއިއެކު މުސައްލަ މަތީގައި ހުރެވުނު އެ ވަގުތު އިސްތިޚާރާ ނަމާދު މަތިން ހަނދާންވިއެވެ. ހަމަ ވަގުތުން އިސްތިޚާރާ ނަމާދު ކުރަން ނިންމުނެވެ. އެހެންކަމުން ފަތިސް ނަމާދުގެ އިހު ސުންނަތް ކުރާނީއޭ ހިތަށްއެރިއެވެ. އެ ސުންނަތަކީ ރާފިލްއާއި ކައިވެނި ކުރުމާއިމެދު ކުރެވޭ އިސްތިޚާރާއަކަށް ހެދުމަށެވެ.

އިސްތިޚާރާ އާއިމެދު ޚިޔާލު ކުރެވެމުން ހަނދާނަށް އައީ، މީގެ މަސްތަކެއް ކުރިން މާމަ ބުނެލި ބަސްތަކެވެ.

“ހިލްޔާ ތިހާ ބޮޑެތި ނިންމުންތައް ނިންމަން އިސްތިޚާރާ ނަމާދު ކުރިންތަ؟”

މާމަގެ އެ ބަސްތައް ހިލްޔާގެ ކަންފަތުގައި ގުގުމިއެވެ. އެއީ ރާފިލްގެ ވާހަކަ މާމަ ގާތު ބުނި ފުރަތަމަ ދުވަހު މާމަ ކުރި ސުވާލެކެވެ. ހަމަ އެއާއިއެކު އޭނަ ދިން ޖަވާބު ވެސް ހަނދާނަށް އައެވެ.

“އިސްތިޚާރާ ކުރާނަން މާމާ. އެކަމަކު އަހަންނަށް އެނގޭ މިއީ ޔަޤީން ކަމެއް ކަން. އަހަރެން ކޮންމެހެން ވެސް ރާފިލްއާއި އިންނަން ބޭނުން މާމާ.”

ޚުދު އޭނަގެ އެ ބަސްތައް ހަނދާންވެފައި ހިލްޔާގެ ހިތަށްވީ އުދަގުލާއިއެކީ ދެބުމަ ކައިރި ކޮށްލެވުނެވެ. އޭނަ އެދުވަހު އެހެން ބުނީ ހާދަ ޔަޤީން ކަމާއި އެކުގައެވެ. ނޭނގުމެއްގެ ތެރެއިން ވެސް އިސްތިޚާރާ އޭރު ނުކުރެވި ހުރީ އިސްތިޚާރާގެ ބޭނުމެއް ނެތްހެން އޭނައަށް ހީވީވެތާއެވެ.

އެހެނަސް އެއްވެސް ކަމަކީ ހިލްޔާއަށް ޔަޤީންވާނެ ކަމެއް ނޫންކަން ހިލްޔާއަށް އެ ވަގުތު އިޙްސާސް ކުރެވުނެވެ. އޭނަ އެ ‘ޔަޤީން’ ކުރި އުއްމީދުތައް މިއަދު ވިއްސިވިހާލިވެގެން ގޮއްސިއެވެ. މުސްތަޤްބަލުގައި ވާނެ ކަންތައް އޭނައަށް ނޭނގޭނެތާއެވެ. އަދި ޣައިބުގައިވާ ކަންތައް ވެސް އޭނައަށް ނޭނގޭނެތާއެވެ.

ހިތަށް އެވަގުތު ވެރިވި އިޙްސާސްތަކާއި އެކީ އެ ސުންނަތް ދެ ރަކުޢަތް ކުރަން ނިޔަތް ގަނެ ‘اللّه أَكْبَر’ ކިޔައި ހިލްޔާ ހަޝަމް ބަނެވެ. އެވަގުތު އަވަސްއަވަހަށް ކިޔަވަން ފެށީ ދެންވެސް ރާފިލްގެ ކަންތަކާއިމެދު ވިސްނޭ ޙާލުގައެވެ. އެ ނަމާދުގައި ކިޔެވެމުންދާ އާޔަތްތަކާއި ކިޔެމުންދާ ޒިކުރުތަކަކީ އެ ހިތަށްވާ ބޮޑު ފަރުވާއެއްކަން ހިލްޔާއަށް އެވަގުތު ވެސް ނުވިސްނެއެވެ.

އެހެނަސް ސަލާމް ދިނުމަށްފަހު ދެއަތް އުފުލާލަމުން ހިލްޔާ އޭނަ ބުނަން ކިޔަން އުޅޭ ބަސްތަކަށް ސަމާލުކަން ދިނެވެ.

“اللَّهُمَّ إِنِّي أَسْتَخِيرُكَ بِعِلْمِكَ وَأَسْتَقْدِرُكَ بِقُدْرَتِكَ، وَأَسْأَلُكَ مِنْ فَضْلِكَ الْعَظِيمِ، فَإِنَّكَ تَقْدِرُ وَلاَ أَقْدِرُ وَتَعْلَمُ وَلاَ أَعْلَمُ وَأَنْتَ عَلاَّمُ الْغُيُوبِ اللَّهُمَّ إِنْ كُنْتَ تَعْلَمُ أَنَّ هَذَا الأَمْرَރާފިލްއާއި ކައިވެނި ކުރުން خَيْرٌ لِي فِي دِينِي وَمَعَاشِي وَعَاقِبَةِ أَمْرِي فَاقْدُرْهُ لِي وَيَسِّرْهُ لِي ثُمَّ بَارِكْ لِي فِيهِ وَإِنْ كُنْتَ تَعْلَمُ أَنَّ هَذَا الأَمْرَ شَرٌّ لِي فِي دِينِي وَمَعَاشِي وَعَاقِبَةِ أَمْرِي فَاصْرِفْهُ عَنِّي وَاصْرِفْنِي عَنْهُ، وَاقْدُرْ لِي الْخَيْرَ حَيْثُ كَانَ ثُمَّ أَرْضِنِي بِهِ”

“ޔާ ﷲ! ހަމަކަށަވަރުން މިއަޅާ، އިބައިލާހުގެ ޢިލްމުފުޅުގެ ޒަރިއްޔާއިން އިބައިލާހުގެ ޙަޟްރަތުން ހެޔޮގޮތް އިޚްތިޔާރުކޮށްދެއްވުމަށް އެދެމެވެ. އަދި އިބައިލާހުގެ ކުޅަދުންވަންތަކަމުގެ ޒަރިއްޔާއިން އިބައިލާހުގެ ޙަޟްރަތުން ކުޅަދާނަކަން ދެއްވުމަށް އެދިދަންނަވަމެވެ. އަދި އިބައިލާހުގެ މާތް ދަރުމަވަންތަ ކަމުން ދެއްވުމަށް އެދި ދަންނަވަމެވެ. ފަހެ ހަމަކަށަވަރުން އިބައިލާހު ހުރިހާ ކަމަކަށް ކުޅަދުންވަންތައެވެ. އަދި މިއަޅާ ނުކުޅެދިގެންވަމެވެ. އަދި އިބައިލާހު ހުރިހާ ކަމެއް ދެނެވޮޑިގެންވަމުއެވެ. އަދި މިއަޅާ ނުދަންނަމެވެ. އަދި އިބައިލާހީ ޣައިބުގައިވާ ހުރިހާ ކަމެއް މޮޅަށްދެނެވޮޑިގެންވާ ރަސްކަލާނގެއެވެ. ޔާ ﷲ! ހަމަކަށަވަރުން މިކަމަކީ ރާފިލްއާއި ކައިވެނި ކުރުމަކީ މިއަޅާގެ ދީނާއި، މިއަޅާގެ ދިރިއުޅުމާއި، މިއަޅާގެ ކަންތަކުގެ ނަތީޖާގެގޮތުން މިއަޅާއަށް ހެޔޮކަމެއްކަމުގައި އިބައިލާހު ދެނެވޮޑިގެންވަނީނަމަ ފަހެ އެކަންތައް މިއަޅާއަށް މިންވަރުކޮށްދެއްވާނދޭވެ! އަދި އެކަންތައް މިއަޅާއަށް ފަސޭހަކޮށް ދެއްވާނދޭވެ! ދެން އެކަމުގައި މިއަޅާއަށް ބަރަކާތްލައްވާނދޭވެ! އަދި ހަމަކަށަވަރުން މިކަމަކީ މިއަޅާގެ ދީނާއި، މިއަޅާގެ ދިރިއުޅުމާއި، މިއަޅާގެ ކަންތަކުގެ ނަތީޖާގެގޮތުން މިއަޅާއަށް ނުބައިކަމެއް ކަމުގައި އިބައިލާހު ދެނެވޮޑިގެން ވަނީނަމަ ފަހެ މިއަޅާގެ ކިބައިން އެކަންތައް ދުރުކޮށް ދެއްވާނދޭވެ! އަދި އެކަންތަކުން މިއަޅާ ދުރުކޮށްދެއްވާނދޭވެ! އަދި ހެޔޮކަންތައް މިއަޅާއަށް މިންވަރުކޮށް ދެއްވާނދޭވެ! އެއީ ކޮންމެތަނެއްގައި ވީނަމަވެސް މެއެވެ. އަދި އެކަމާއިމެދު މިއަޅާ ރުއްސަވާނދޭވެ!”

ދުޢާ ކިޔައި ނިމުނު ހިނދު ހިލްޔާ އެތައް ދުވަހެއް ފަހުން ﷲ މަތިން ހަނދުމަކޮށް ހިލްޔާގެ ލޮލުން ކަރުނަ ހިލުނެވެ. އިސްތިޚާރާގެ ދުޢާގައި އެ ބުނެވުނު ކޮންމެ ބަހެއް ހިލްޔާއަށް ހިތުގެ އަޑިން ޤަބޫލު ކުރެވުނެވެ. ހަމަ ޔަޤީނުންވެސް ﷲ ކުޅަދުންވަންތަ ވެވޮޑިގެންވެއެވެ. އޭނަ ނުކުޅެދެއެވެ. އެކަލާނގެ ހުރިހާ ކަމެއް މޮޅަށް ދެނެވޮޑިގެންވެއެވެ. އޭނައަށް ނޭނގެއެވެ.

އެހެންކަމުން ﷲ ސުބްޙާނަހޫ ވަތަޢާލާ ހިލްޔާއަށް އެންމެ ރަނގަޅުވެގެންވާ ގޮތް މިންވަރު ކުރައްވާނެކަން ހިލްޔާއަށް އެވަގުތު ޔަޤީންވިއެވެ. ހަމައެކަނި ލިބިފައިވާ ޢިލްމެއްގެ ސަބަބުންނެއް ނޫނެވެ. ޙަޔާތުގައި މިހާތަނަށް ކުރެވުނު އެއްވެސް އިސްތިޚާރާއަކަށްފަހު ﷲ އޭނަ ގެއްލެނި ކުރައްވާފައި ނުވުމުންނެވެ.

ހިލްޔާއަށް ނޭނގުނު ކަމަކީ، މި އިސްތިޚާރާއާއި، ﷲ އަށް ކުރެވުނު އެ އިތުބާރަކީ އޭނައާއި ﷲ އާއި ދެމެދު ހުޅުވާލެވުނު ‘ދޮރެއް’ ކަމެވެ. އަދި އެ ދޮރުގެ އަނެއްފަރާތުގައި ވަނީ ކިހާ ބޮޑު ރަޙްމަތެއް ކަމެވެ.

ނުނިމޭ