ނަފްސީ (ނަވާޅީސްވަނަ ބައި)

ނަފްސީ (ނަވާޅީސްވަނަ ބައި)

އެއާރޕޯޓުން ހިލްޔާ ނިކުންނަމުން ދިޔައީ އިސްއުފުލަން ބޭނުން ނުވެފައި ހުރެއެވެ. އޭރުވެސް ރާފިލްގެ ބަސްތައް ސިކުނޑީގައި ގުގުމަމުން ދިޔައެވެ. އޭނައަށް ފެނުނު މީހުން އޭނައާއި މެދު ދައްކާނެ ވާހަކަތައް ޚިޔާލު ކުރެވެމުން ދިޔައެވެ. ނަތީޖާއެއްގެ ގޮތުން އޭރުވެސް ހިނގެމުން ދަނީ އެއާރޕޯޓުން ކަން ހިލްޔާ ދޭތެރެ ދޭތެރެއިން ހަނދާން ނެތެމުން ދިޔައެވެ.

ހިލްޔާ އިސްއުފުލާލަން ކިރިޔާ ވެސް ހިތަށްއެރީ، ބައްޕައާއި އެއްވަރަކަށް ހިނގަމުން ގޮސް ދޮރަކުން ނިކުމެވުމުންނެވެ. އެތައް ދުވަހެއްފަހުން ރާއްޖޭގެ ހޫނުކަން އިޙްސާސްވި ވަގުތު ވައިރޯޅިއެއް ޖެހިލުމުން، ހިތަށް ހިސާބެއްގެ ފިނިކަމެއް ލިބުނެވެ. އެއާރޕޯޓުން މި ނިކުމެވުނީކަން އެނގުންވި ހިނދު އިސްއުފުލާލެވުނީ، އެލީއާއި ދޮންތަގެ ނަން ހިތަށް ވެރިވުމުންނެވެ. އެހެނަސް އިސްއުފުލާލި ވަގުތު ފެނިގެން ދިޔައީ ހިލްޔާ ދުވަހަކުވެސް ދެކެފައި ނުވާ ސޫރައެކެވެ.

ހިލްޔާއަށް ވުރެ އިސްކޮޅުން ދިގު އެ ޒުވާނާގެ ފަން އިސްތަށިގަނޑު ކުރުކޮށް ކޮށާލެވިފައިވިއެވެ. ވަށް ބައްޓަމަށް ހުރި އެ ސޫރައިގައި ފިރިހެންވަންތަކަމުގެ ހުރިހާ ސިފައެއްވިއެވެ. ގަދަ ބުމައާއި ދިގު ނޭފަތާއި، އެވަގުތު ކުޑަކޮށް ހުޅުވިފައިވި އޮމާން ތުންފަތެވެ. ހިސާބަކަށް ދިގުކުރެވި، ރީތިކޮށް ކޮށާލެވިފައިވާ އެ ކަޅުކުލަ ގަދަ ތުނބުޅިން ފިރިހެންވަންތަކަން ދެގުނަ ކޮށްދިނެވެ.

އެ ޒުވާނާގެ އެ ސޫރަ ފެނިފައި އެސްފިޔަ ޖަހާލުމެއްނެތި ހިލްޔާއަށް ބަލަހައްޓައިގެން ހުރެވުނެވެ. ހިނދުކޮޅަކަށް އޭނަގެ ހުރިހާ ހާސްކަމެއްގެ މަތިން ހަނދާން ވެސް ނެތޭ ގޮތްވިއެވެ. އެއީ ކާކުތޯ ހިތަށްއެރިއެވެ. ޒުވާނާ އޭނައަށް ބަލަހައްޓައިގެން ހުރިގޮތުން އޭނައަކީ ކާކުކަން އެނގޭހެން ހީވެއެވެ. އެއާރޕޯޓް ތެރެއިން ފެނުނު މީހުންނާއި ޚިލާފަށް މި ޒުވާނާ އޭނައަށް ޙަމްދަރުދީގެ ނަޒަރަކުން ބަލަހައްޓައިގެން ހުރުމުން މިއީ އޭނައަށް ހެޔޮ އެދޭ މީހެއްހެން ހީވިއެވެ. އޭނައާއި ގާތް މީހެއްހެން ހީވިއެވެ. އެ ލޯމަތިން އެއީ ކުރިން ފެނިފައި ހުރި ޒުވާނެއްހެން ވެސް ހީވިއެވެ. އެހެނަސް އެ ސޫރަ ބީރައްޓެހިވީ ގޮތުން ހިލްޔާއަށް ޙައިރާންކަމެއްގައި ހުރެވުނެވެ.

“ހިލްޔާ….”

ހިލްޔާއަށް ހަމަހޭވެރިކަމެއްވީ އެއްފަރާތަކުން އިވުނު ދޮންތަގެ އަޑުންނެވެ. އެއާއިއެކު އެ ޒުވާނާ ގެ ސޫރައިން ނަޒަރު ވަކިކޮށް ހިލްޔާއަށް ވާތް ފަރާތަށް ބަލާލެވުނެވެ. އެހިނދު ހިތާމަވެރި މޫނަކާއެކީ އޭނައަށް ބަލަން ހުރި ދޮންތަ ފެނިފައި ހިލްޔާ އަނެއްކާވެސް އޭނަ ދެރަވާންވީ ހުރިހާ ސަބަބެއްގެ މަތިން ހަނދާންވެގެން ދިޔައެވެ. އެއާރޕޯޓް ތެރެއިން މީހުން އޭނައަށް ދިން ނަޒަރުތަކާއި ދެއްކި ސިއްރުވެރި ވާހަކަތަކެވެ. ރާފިލް އޭނައާއި ބެހޭގޮތުން ފަތުރާފައިވާ ބޮޑުވެގެންވާ ދޮގެވެ. ރާފިލްގެ ފަރާތުން ލިބުނު ކެހިވެރިކަމެވެ. މި ހުރިހާ ކަމެއް އޭނަގެ ޢާއިލާއާއި ދުރުގައި އޭނަ ތަޙައްމަލުކޮށްފައިވާ ގޮތެވެ.

އެ ހުރިހާ ކަމެއް އެއްފަހަރާ ސިކުނޑިއަށް ވެރިވުމުން ހިލްޔާގެ ލޮލަށް ކަރުނަތައް ޖަމާވިއެވެ. ކަރުނުން ފުސްވެފައިވާ ލޮލުން ދޮންތައަށް ބަލަން ހުރެ ވައި އަޑުން ‘ދޮންތާ’ އޭ ކިޔައި ގޮވާލެވުނެވެ. ހަމަ އެވަގުތު ދޮންތަ އަވަސްއަވަހަށް އައިސް އޭނަގެ ގައިގައި ބައްދާލުމުން ހިލްޔާއަށް ރޮވޭ ގޮތްވިއެވެ. ދޮންތައަށް ވެސް ރޮވުނުކަން ހިލްޔާއަށް އެނގުނެވެ. އެހެނަސް އިރުކޮޅެއްގެ ތެރޭގައި ދޮންތަ އޭނަގެ ބުރަކަށީގައި ފިރުމާލަމުން ވާހަކަ ދެއްކިއެވެ.

“ދެން ހުރިހާ ކަމެއް ރަނގަޅުވާނެ ހިލްޔާ. ހިލްޔާ އަނބުރާ އައިމަ ވަރަށް އުފާވެއްޖެ. ބައިވަރު ސަޕްރައިޒް އެބަ ހުރި ހިލްޔާއަށް ދޭން، ދޯ އެލީ؟” ދޮންތަ އޭނައާއި ދުރުވެލަމުން އޭނަގެ ދެކޮނޑުގައި ހިފަހައްޓައިގެން ހުރެ ހިނިތުންވުމަކާ އެކީ ފަހަތުގައި ހުރި އެލީއަށް ދޯދިނެވެ. އެހިނދު ވެސް ދޮންތަގެ އެސްފިޔަތައް ތެމިފައިވިއެވެ.

“ޔެސް ތުއްތާ! ބީ ރެޑީ ހަމަ ކޮންމެ ފަދަ ކަމެއް ވެސް ވެދާނެ. ރިމެމްބާރ ގްރެޖުއޭޝަނުން އަނބުރާ އައި ދުވަހު ކްލައުން؟” އެލީ ނުހަނު ޖޯޝާއިއެކީ އެ ބުނެލި ވާހަކައިން ހަނދާނަށް އައި ކަމަކުން ހިލްޔާއަށާއި ހަމްރާއަށް ވެސް ހެވުނެވެ. އެލީ މަޖަލަކަށް ހިލްޔާއަށްޓަކައި ތައްޔާރުކޮށްފައިވާ ހަދިޔާއެއް ހުޅުވުމުން އޭގެ ތެރެއިން ސްޕްރިންގެއްގައި ހަރުކޮށްފައި ހުރި ޖޯކަރެއްގެ މޫނެއް އައިސް ހިލްޔާގެ މޫނުގައި ޖެހުނީއެވެ.

“އުނހޫ އެކަހަލަ އެއްވެސް ކަމެއް ނުކުރާތި. ދިގު ދަތުރެއް ކޮށްފަ އައިސް ތިބޭ މީހުންނަށް މަރުޙަބާ ކިޔަންވާނީ އެމީހުން ހިތްހަމަޖެހޭ ގޮތަށް.” ހާފިޒާ ކުދި ކިޔުނެވެ. ހިލްޔާއަށް މާޒިން ކޮއްކޮ އުރާލައިގެން ހުރި ހާފިޒާ ފެނުނީ އެ ވަގުތެވެ. އެއާއިއެކު ހިލްޔާއަށް ހިނިތުންވުމެއްގައި ހުރެވުނެވެ.

“މާމާ….” ހިލްޔާއަށް މާނަވީ ގޮތަކަށް ގޮވާލެވުނެވެ. ހަނދާނަށް އައީ މާމަ ފޯނުން ގުޅައިގެން ބުނެލި އެންމެ ޖުމްލައަކުން އޭނަގެ ނުރައްކާތެރި ވިސްނުންތަކަށް ނިމުމެއް އައި ގޮތެވެ. ދުނިޔެ ދޫކޮށް އާޚިރަތަށްޓަކައި އުޅުމަށް ބުނެލި ބުނެލުމުންނެވެ. މާމަ އެ ދިން ނަސޭޙަތަށްޓަކައި ހިލްޔާއަށް ޢުމުރު ދުވަހު ވެސް މާމައަށް ޝުކުރުވެރި ވެވޭނެކަން ޔަޤީނެވެ. އަދި ހަމަ އެހެންމެ މާމަގެ ދުލުން އެ ބަސްތައް އޭނައަށް އިއްވައި، އެއިން އޭނަގެ ހިތަށް ބަދަލެއް ގެންނެވި ﷲ އަށް ވެސް އެއަށްވުރެ ބޮޑަށް ޝުކުރު ކުރެވޭނެއެވެ.

“ލައްބަ ދަރިފުޅު. ދެން އާދޭ އެންމެން. މިތާ ދޮރުމަތީގަ ނުއެއް ތިބެވޭނެދޯ؟” މާމަ ބުންޏެވެ. އެއާއިއެކު ދޮންތަ ހިލްޔާގެ އަތުގައި ހިފާލަމުން އަންނާށޭ ބުނި ހިނދު އެލީ ޔޫކޭ އާއި މެދު ސުވާލުތައް ކުރަން ފެށިއެވެ. ޔޫކޭގައި އުޅެމުން ޕްރިންސް ވިލިއަމް ފެނުނުތޯ ސުވާލު ކުރުމާއިއެކު އަނެއްކާވެސް ހިލްޔާއަށް ހެވޭ ގޮތްވިއެވެ.

ހިލްޔާ ހަމްރާއާއިއެކީ ހިނގާފައި ގޮސް އެލީއާއި މާމަ ތިބި ހިސާބަށް ދިޔައިރު ހީލި ގޮތުން ދާނިޝްއަށް ވެސް ހިނިތުންވެލެވުނެވެ. ދެންވެސް ހިލްޔާގެ ލޯމަތިން ފެނުނު ވަރުބަލިކަމުން ދާނިޝްގެ ވެސް ހިނިތުންވުން ލޮލާއި ހަމައަށް ނުފޯރައެވެ. އެހެނަސް ހިލްޔާގެ ޙާލު ދެން ރަނގަޅުވާނެކަމުގެ އުއްމީދެއް ހިތުގައިވިއެވެ.

“ދާނިޝް ބޭބެމެން ގެއަށް ލައިދޭނަން ދޯ؟” ހިލްޔާ ހަމްރާމެންނާއިއެކީ އެތަނުން ދާން ފެށި މަންޒަރު ބަލަން ހުރި ދާނިޝް ހަމަހޭވެރިކަމެއްވީ ނަހީދުބެ ވާހަކަ ދެއްކުމުންނެވެ. ނަހީދުބެ ފެނުމުން ކުޑަކޮށް ސިހުންވެސް ވާ ގޮތްވިއެވެ. އޭނަ ދެންމެ ހުރީ ހިލްޔާއަށް ބަލަހައްޓައިގެން ކަން ނަހީދުބެއަށް އެނގޭނެކަން ޔަޤީނާއި ގާތްވީތީވެއެވެ.

ދާނިޝްއަށް ވީ ގޮތް ފެނިފައި ނަހީދަށް ހުރި ހާސްކަމާއި ނުރުހުންތެރިކަމުގެ ތެރެއިން ވެސް ހިނިތުންވެލެވުނެވެ. ހިލްޔާއާއިމެދު ފިކުރު ބޮޑުވެފައި ނެތްނަމަ އެވަގުތު ހީލެވުނީހެވެ. އަދި އަމުދުން ހިލްޔާއާއި މެދު މި ފެތުރުނު ވާހަކައާއި ގުޅިގެން ދާނިޝްގެ ޚިޔާލު ބަދަލުވެދާނެތޯ ވެސް އެވަގުތު ހިތަށްއެރިއެވެ.

ނަހީދު ޚިޔާލެއްގައި ވަނިކޮށް ދާނިޝް އޭނަގެ ސުވާލަށް ޖަވާބު ދިނެވެ.

“ޔެސް އޮފްކޯސް ބޭބޭ. އިން ޝާ ﷲ. އެހާ ދިގު ދަތުރެއް ކޮށްފަ އައިސް ބޭބެ ކާރު ދުއްވާކަށް ނުވާނެ. އަޅުގަނޑު މީތި ގެންގޮސްދެންތަ؟” ދާނިޝް ވާހަކަ ދައްކަމުން ގޮސް ޓްރޯލީއަށް ޢިޝާރާތް ކުރަމުން އެހިއެވެ. ނަހީދު ވަކި އެއްޗެކޭ ނުބުނެ ހިނިތުންވުމަކާއިއެކީ ޓްރޯލީއިން ދޫކޮށްލަމުން ބޯޖަހާލިއެވެ. އެއާއިއެކު ދާނިޝް ޓްރޯލީ ދަމައިގަންނަމުން ދުއްވަން ފެށިއެވެ.

ކާރާއި ހަމައަށް ދެވެންދެން ދާނިޝް އާއި ނަހީދާއި ދެމެދު ދެކެވުނީ ވިޔަފާރީގެ ވާހަކައެވެ. އެ ވާހަކަތަކުގެ ތެރެއިން ދެމީހުންގެ ސިކުނޑިއަށް ވެސް ވެރިވަމުން ދިޔައީ ހިލްޔާއާއިމެދު ދެކެވިފައިވާ ވާހަކަތަކެވެ. އެ ވާހަކަތަކާއިމެދު ދާނިޝް ދެކޭ ގޮތް ބަލަން ނަހީދު ބޭނުންވެފައިވީއިރު، އެ ވާހަކަތައް ފެތުރި މީހަކާއިމެދު އަޅާނެ ފިޔަވަޅަކާއިމެދު ދާނިޝް ނަހީދުބެ އާއި މަޝްވަރާ ކުރަން ބޭނުންވެފައިވިއެވެ.

އެހެނަސް ދެމީހުންނަށް ވެސް އެ ވާހަކަ ދުލާއި ހަމައަށް ނުގެނެވުނީ ވާހަކައިގެ ޒާތުންނެވެ. ހިލްޔާއާއިމެދު އެފަދަ ވާހަކައެއް ދެކެވުނޭ ވެސް ދެމީހުންކުރެ މީހަކު ދުލާއި ހަމައަށް ގެންނަން ބޭނުމެއް ނުވިއެވެ. އެއަށްވުރެ ބޮޑަށް ހިލްޔާއަށް ޤަދަރު ކުރެވޭތީވެއެވެ. އަދި އެ ވާހަކައިން ދެމީހުން ވެސް އެއްވަރަކަށް ލޭ ކެކޭތީވެއެވެ.

ދާނިޝްމެންނަށް ވުރެ ކުރިން ކާރާއި ހަމައަށް ދެވުނު ހަމްރާއާއި އެލީ އާއި ހާފިޒާގެ ހިތްތަކުގައި ވެސް ހިނގަމުން ދިޔައީ އެފަދަ ޖަޒުބާތުތަކެވެ. ކާރާއި ހަމައަށް ދިޔަ މަގުމަތީގައި ވެސް ހިލްޔާއަށް މީހުންގެ ނަޒަރުތައް އަމާޒުވެ، އެ ނަޒަރުތަކުން ހިލްޔާއަށް އުދަގޫވިކަން އެމީހުންނަށް އެނގެއެވެ. ހިލްޔާ އެފަދައިން ދެރަވާހެން ހީވާ ކޮންމެ ފަހަރަކު ހަމްރާ ހިލްޔާގެ ސަމާލުކަން ހޯދައި ވާހަކައެއް ދައްކާލައެވެ. މިއީ އެމީހުން ރާވައިގެން އައި ގޮތެވެ. އެއްގޮތަކަށް ވެސް ހިލްޔާ ހިތްދަތި ކުރުވާ ވާހަކައެއް ފެންމަތި ނުކުރުމަށެވެ.

އެމީހުން އެކަން އެގޮތަށް ކުރަމުން ދިޔަކަން ހިލްޔާއަށް މާ ރަނގަޅަށް ވެސް އެނގެމުން ދިޔައެވެ. އެހެންކަމުން އޭނައަށް ލިބެމުން ދިޔަ ބީރައްޓެހި ނަޒަރުތަކާއިމެދު ދެރަވިޔަސް، އެ ހިތާމައަށްވުރެ އަމިއްލަ ޢާއިލާއަށްޓަކައި ހިތުގައި އުފެދުނު ލޯބި ބޮޑުވިއެވެ. އެކަމާއިމެދު އަޖާއިބުވާހާވިއެވެ. މިއީ ރާފިލްއަށްޓަކައި އޭނަ ރުޅިވެ، ފަސް ދިން ޢާއިލާކަން ހަނދާންވުމުންނެވެ. ޚުދު އެ ރާފިލް އޭނަ ދޫކޮށްލުމުން އޭނައަށް އަނެއްކާވެސް ލޯބި ލިބޭނެ މަގެއް ކަމުގައި ﷲ ލެއްވީ މި ޢާއިލާއެވެ. ﷲ ކަނޑާނުލުމަށް އެންގެވި ގުޅުންތައް ދެމެހެއްޓުން ހާދަހާ ވެސް މުހިއްމެވެ.

ކާރުން އެމީހުންނާއިއެކީ އިތުރު މީހަކު އަންނަކަން ހިލްޔާއަށް އެނގުނީ ބައްޕައާއިއެކު އައި ޒުވާނާގެ އަތުން ގޭގެ ކާރުގެ ތަޅުދަނޑި ފެނުމުންނެވެ. ޒުވާނާއަށް ރަނގަޅަށް ބަލާލުމުން އެއީ ދާދި ދެންމެއަކު އޭނައަށް ފެނުނު ‘ބީރައްޓެހި’ ޒުވާނާކަން ހިލްޔާއަށް އެނގުނެވެ. ޒުވާނާ ލައިގެން ހުރި ގަދަ ނޫކުލައިގެ ގަމީހާއި ކަޅުކުލައިގެ ފަޓުލޫނަކީ ވެސް ކުރިން އޭނައަށް ފެނިފައިވާ ހެދުމެއް ހެން ހިލްޔާއަށް ހީވިއެވެ. ކީއްވެ ހެއްޔެވެ؟ އެއްގޮތަކަށް ވެސް ނޭނގުނެވެ. ޒުވާނާ އެމީހުންނާއި އެކީ އަންނަން އުޅޭކަން އެނގުމުން ހިލްޔާގެ ހިތަށް އުފަލެއް ލިބުނީ އެ ޒުވާނާ ރީތިވުމުންތޯ ހިތަށްއެރިއެވެ. އެ ޚިޔާލުން ހިލްޔާއަށް ބޯހޫރުވާލެވުނެވެ. އެއީ މީހެއްގެ ފިރިއަކަށް ވެސް ވެދާނެ ކަމަށް ހިތާހިތުން ބުނެވުނެވެ. އެހެންނޫނަސް ފިރިހެނަކާއި އެއްވެސް ގުޅުމެއް ބާއްވައިގެން އޭނައާއި ބެހޭގޮތުން އެއްވެސް ވާހަކައެއް ފެތުރޭކަށް ހިލްޔާ ބޭނުމެއް ނުވެއެވެ.

ޒުވާނާ ކާރު އަންލޮކް ކޮށްދިނުމުން ހިލްޔާމެން ކާރަށްއެރިއެވެ. އެލީ އެރީ ފަހަތު ސީޓު ވައްޓާލުމުން އެރެން ހުންނަ ސީޓަށެވެ. ހަމްރާއާއި ހިލްޔާއާއި ހާފިޒާ އެރީ ފަހަތު ސީޓަށެވެ. އެ ވަގުތު ހިލްޔާއަށް ބީރައްޓެހި ޒުވާނާ ބައްޕައާއެކީ ކާރުގެ ޑިކީއަށް ލަގެޖް އަރުވަމުން ދިޔަކަން ހިލްޔާއަށް އެނގުނެވެ. ހަމަ އެއާއިއެކު އެ ޒުވާނާ ވާނީ ބައްޕަ ޑްރައިވަރަކަށް ގެނެސްފައި ހުރި އޯސިސްގެ މުވައްޒަފަކަށް ކަމަށް ނިންމުނެވެ. ބައްޕަ ބޭރަށް ދާ ދުވަސްކޮޅު ބައެއްފަހަރު އެފަދައިން ކަން ކުރާތީވެއެވެ. އެ ޒުވާނާއާއިމެދު ދޮންތަމެންނާއި ސުވާލެއް ނުކުރަން ހިލްޔާއަށް ނިންމުނީ އެހެންވެއެވެ. އޯސިސް ފިހާރައަށް ހިލްޔާ ގިނަ ފަހަރު މަތިން ގޮސްފައިވުމުން ސޫރަ ނޭނގި، މުވައްޒަފަކު ފެނިފައި ހުރިހެން ހީވެދާނެތާއޭ ހިތް ބުންޏެވެ. އެހެނަސް އޭގެއިން މުވައްޒަފަކު އޭނަގެ ސަމާލުކަން ދަމައިގަންނާނެހާ ވަރަށް ރީތިވި ހަނދާނެއް ނުވެއެވެ.

ފަހަތު ސީޓުގައި އިންއިރު، ހިލްޔާއަށް އެ ޒުވާނާގެ ކަނދުރާއާއި އިސްތަށިގަނޑާއި މޫނުގެ ބައެއް ފެންނަމުން ދިޔައެވެ. އެކަން އެނގުންވުމާއިއެކު ހިތަށް ޖޯޝެއް ވެރިވިއެއްކަމަކު ހިލްޔާ ބެލުން ތިރިކޮށްލިއެވެ. މި ޒުވާނާއަށް އޭނަ މި ބަލަނީ ރަނގަޅު ނިޔަތެއްގައި ނޫންހެން ހީވުމުން ޒުވާނާއަށް ނުބަލަން ހިލްޔާ ނިންމިއެވެ. އެސްފިޔަތަކުގެ ޙަރަކާތަކުން ވެސް އޭނައާއި ﷲ އާއި ދެމެދު އޮތް ގުޅުމަށް އަސަރުކޮށްފާނެކަން މިއަދު ހިލްޔާއަށް ޔަޤީންވެފައިވާތީވެއެވެ.

ކާރުގެ ދުވެލި ފެށުނީ ހިމޭންކަމާއި އެކީގައެވެ. ހަމްރާގެ އަތު ތެރޭގައި އޮތް މާޒިން ނިދިފައިވުމާއި އެކުވެސްމެއެވެ. 5 މިނެޓްގެ ދުއްވުމަށްފަހު އެ ހިމޭންކަން ނަގާލީ އެލީއެވެ.

“އައި ސްވެއާރ އައި ހޭޓް ދި އިންޓަނެޓް! މިހާރު އަނެއްކާ ކޮންމެވެސް އަނެކެއްޗެކޭ ކިޔާފަ އެބަ ފަތުރައޭ. ކޮން ޑޮކްޓަރ މެތިއުއެކޭ ކިޔާކަށް!!!” އެލީ ދަތްކުނޑި ވިކަމުން ދެއްކި ވާހަކަ މުޅި ކާރަށް އިވުނެވެ. އެހިނދު ހަމްރާ ހިސާބެއްގެ ނުރުހުމާއިއެކު ‘އެލީ’ އޭ ކިޔައި ފަހަތަށް ނަޒަރެއް ދިނުމަށްފަހު ހިލްޔާއަށް ބަލާލިއެވެ. އެހިނދު ހިލްޔާ ގަނޑުވެ، އިސްޖެހިފައި އިނެވެ.

“އަނެއްކާ އާ އެއްޗެކޭތަ؟ ކީކޭ ކިޔަނީ؟” ނަހީދަށް އެހެން އަހާލެވުނީ ހަމަ އެއްވެސް އިޚްތިޔާރަކާއި ނުލައެވެ. އެހިނދު ދާނިޝް ވެސް ކަތުރުކަށިގަނޑަށް ބާރުވެ، ހުންގާނުގައި ބާރަށް ހިފެހެއްޓިފައިވިއެވެ.

“ޑޮކްޓަރ މެތިއު ސްޓޭޓަސްއެއް އަޕްޑޭޓް ކުރީއޯ ތުއްތައޭ ކިޔާފަ. އެ ސްޓޭޓަސްގެ ސްކްރީންޝޮޓް އެބަ ވައިރަލް ވޭ. ބުނެފަ އޮތީ އައި ލަވް ހާރ އެންޑް މިސް ހާރ އޭ. އައި ސްވެއާރ ތުއްތާ ޔޫ ޝުޑް ރެސްޕޮންޑް ޓު ދިސް! ތުއްތަ މި ހުރިހާ އެއްޗަކަށްވުރެ ވަރުގަދަ ސްޓޭޓަސްއެއް ލިޔެފަ އަޕް ކުރޭ. ތުއްތަ ނުލިޔަންޏާ މަ ލިޔާނަން!!” އެލީ ރުޅިވެރިކަމާއިއެކީ ދެއްކި ވާހަކައިން ކާރު ތެރޭގައި ތިބި އެންމެން އެއްވަރަކަށް ރުޅިއައެވެ. ހިލްޔާ ފިޔަވައެވެ. ހިލްޔާ ދެންވެސް ގަނޑުވެފައި އިންއިރު، ލޯ ކަރުނުން ފުސްވިއެވެ.

“ރިޕޯޓް ކުރޭ، ތި ހުރިހާ ޕޭޖެއް ރިޕޯޓް ކުރޭ. ހަމަ ހުވާ ރާފިލް ސަލާމަތެއް ނުކުރާނަން މަ ނޭވާ ހުރިހާ ހިނދަކު!!” ނަހީދަށް ވެސް އެންމެފަހުން ނުހުރެވިގެން ރުޅި އިސްކުރެވުނެވެ.

“މިކޮޅު ފުލުހުންނަށް ވެސް ރިޕޯޓް ކުރަން އަހަންނަށް ފެނޭ. ކޯޓަށް ގެންދަންވީ މި މައްސަލަ.” ދާނިޝްއަށް ވެސް ބުނެލެވުނެވެ. ނަހީދުބެ އޭނައާއި އެއްބަސްވީ ވަގުތު ކާރުގެ ފަހަތް ބަލާ ލޯގަނޑަށް ދާނިޝްއަށް ނަޒަރެއް ދެވުނެވެ. އެހިނދު ހިލްޔާ ފަހަތު ސީޓުގައި އިން ގޮތް ފެނިފައި ދާނިޝްގެ ގައިން ވާގި ދޫވިހެން ދާނިޝްއަށް ހީވިއެވެ. ދާނިޝް ބަލަން އިންދާ ހިލްޔާގެ ލޮލުން ކަރުނަތައް ފޭބުމުން މެއިން ހޫނު ދިލައެއް ނެގިއެވެ.

“ދެން ތިމީހުން އިހަށް ތި ވާހަކަ ހުއްޓާލަބަލަ…” ހާފިޒާ ހިލްޔާގެ ކަރުނަތައް ފޮހެދެމުން އެދުނެވެ. އެއާއިއެކު އަނެއްކާވެސް އެންމެން ހިމޭންވާ ގޮތްވިއެވެ. ހިލްޔާގެ ޙާލު އެނގުމާއި އެކު ވެސްމެއެވެ.

ހިލްޔާގެ ޙާލަތު އެންމެންނަށް އެނގުންވުމުން ދަތުރުގެ ބާކީ ބައި ފާއިތުވީ ހިމޭންކަމުގައެވެ.

ނަހީދުގެ ގެ ކުރިމަތީގައި ދާނިޝް ކާރު ޕާކް ކޮށްލުމުން އެންމެން ކާރުން ފައިބަން ފެށިއެވެ. ޚުދު ދާނިޝް ވެސް ފޮށިތައް ނަގަން އެހީވުމަށްޓަކައި ކާރުން ފޭބިއެވެ. އެހިނދު ހަމްރާގެ ފަހަތުން ކާރުން ފޭބި ހިލްޔާގެ މޫނު ފެނިފައި ދާނިޝް އަނެއްކާވެސް ހުއްޓުން އަރާ ގޮތްވިއެވެ. މިފަހަރު އެ ތެމިފައިވާ އެސްފިޔަތަކާއި، އިހުނަށްވުރެ ބޮޑަށް ދުޅަވެފައިވާ ލޯ ފާހަގަވުމުން ދާނިޝްގެ ހިތަށް ތަދުވިއެވެ. އެހިނދު ދާނިޝްގެ މޫނުމައްޗަށް ހިތާމަވެރިކަން ވެރިވީ ޚުދު ދާނިޝްއަށް ވެސް ނޭނގިއެވެ.

ހިލްޔާ އޭނައަށް ބަލާލުމެއްނެތި ހަމްރާއާއި އެކީ ދާނިޝްގެ ކުރިމަތިން ފަހަނަޅައި ގޮސް ގެއަށް ވަންނަން ދިޔައެވެ. ޑިކީއިން ލަގެޖް ނަގަން ހުރި ނަހީދުބެ ފާހަގަވެ، ދާނިޝްއަށް އެ ދިމާލަށް ދެވުނީ އެވަގުތެވެ. އެހިނދު އެލީއާއި ހާފިޒާ ވެސް ހިލްޔާމެންގެ ފަހަތުން ގެއަށް ވަންނަން ގޮސްފިއެވެ.

“ދާނިޝް ދެން ދިޔަޔަސް ހެޔޮ، ބޭބެ މީތި ގެންގޮސްފާނަން. އެލީ އާއި މާމަ ބައެއް ފޮށިތައް ހިފައިގެން ގޮއްސި. ތެންކިއު ސޯ މަޗް ފޯ އެވްރީތިންގް.” ނަހީދު އޭނަގެ ފޮށި ނަގައި ބިންމަތީގައި ބެހެއްޓުމަށްފަހު ޑިކީ ލައްޕަމުން ގަދަކަމުން ހިނިތުންވެލިއެވެ. ކާރު ތެރެއިން ދާނިޝް ވެސް ހިލްޔާއާއިމެދު ފެތުރޭ ވާހަކަތަކާއިމެދު ނުރުހުންވިކަން އެނގުމުން ހިސާބެއްގެ ހަމަޖެހުމެއް ލިބިފައިވިއެވެ. ދާނިޝް ކަހަލަ ކުއްޖަކު ހިލްޔާއަށް ގެއްލެން ނަހީދު އެއްގޮތަކަށް ވެސް ބޭނުމެއް ނުވެއެވެ.

“އެއީ ދެން އެއްވެސް ކަމެއް ނޫނެއްނު؟ އަވަށްޓެރިއެއް ވިއްޔާ އެހާވަރު ކުރެވެން ވާނެ.” ދާނިޝް ރާގަކަށް ބުނެލީ، މީގެ މަސްތަކެއް ކުރިން ޚުދު ނަހީދު އޭނަ ގާތު ބުނި ބަސްތަކެވެ. އެކަން އެނގުންވުމުން ނަހީދު ލުއި ގޮތަކަށް ހީލުމުން ދާނިޝް ވެސް ހީލިއެވެ. އެއަށްފަހު ވޭތުވި ހިމޭންކަމުގެ ވަގުތުކޮޅަށްފަހު ނަހީދު ވާހަކަ ދެއްކިއެވެ.

“ބޭބެ އަނބުރާ އަޔަސް ދާނިޝް ދޭތެރެއަކުން ޖައްސާލައްޗޭ މިގެއަށް. ޔޫ އާރ އޯލްވޭސް ވެލްކަމް.” ނަހީދު ބުންޏެވެ.

“އިން ޝާ ﷲ…..ބޭބޭ، ހިލްޔާ ރަނގަޅަށް ބަލަހައްޓައިދެއްޗޭ. ބޭބެ ކުރީ ދުވަހު ބުނީ ހިލްޔާ ޑިޕްރެޝަނަށް ދަނީއޭ. ފަހުން ރަނގަޅުވެފަ ހުއްޓާ އަނެއްކާ….މި ކަމެއް ދިމާވީމަ ވަރަށް ކަންބޮޑުވޭ. އުއްމީދަކީ ހިލްޔާއަށް މިކަމުން އަރައިގަނެވުން އިން ޝާ ﷲ. އަހަރުމެން ޖެހޭނެ ކޮންމެހެން ވެސް ހިލްޔާގެ މައުސޫމްކަން ސާބިތުކޮށްދޭން ބޭބޭ. ރާފިލްއަށް އަދަބު ލިބެންޖެހޭ. އެކަން ކުރުމަށް ކުރެވެން އޮތްހާ ކަމެއް ކުރަން އަޅުގަނޑަށް ފެނޭ. މިކަމުގަ ބޭބެ އެއްވެސް އެހީއެއް ބޭނުމިއްޔާ އަޅުގަނޑަށް އަންގާލަދެއްޗޭ.” ދާނިޝް ވާހަކަ ދެއްކިއެވެ.

އާދައިގެ މަތިން ރާފިލްގެ ވާހަކަ ދައްކަން ވުމުން ދާނިޝްގެ ބުމަގޮށްޖެހުނެވެ. ރާފިލް އޭނަގެ މަންމައާއިމެދު ކަން ކުރި ގޮތާއިމެދު ބަދަލު ނުހިފިގެން އުޅެނިކޮށް އެ ވަނީ އޭނަ ލޯބިވާ އަންހެން ކުއްޖާއަށް އެހާ ބޮޑު ދެރައެއް ދީފައެވެ. ރާފިލްއަކީ އޭނައަށް ވާ ދަތި އިމްތިޙާނެއްކަން މިހާ ހިސާބަށް އައިއިރު ދާނިޝްއަށް ފަހުމްވެފައިވެއެވެ.

“އޯކޭ ދާނިޝް. ބުނާނަން.” ނަހީދު އެހެން ބުނެލަމުން ދާނިޝްގެ ވާތު ކޮނޑުގައި ދެފަހަރު މަތިން ލުއި ގޮތަކަށް ޖަހާލިއެވެ. އެއަށްފަހު ދާނިޝްއަށް އަލްވަދާޢު ކިޔުމަށްފަހު ގެއަށް ވަންނަން ދިޔައެވެ.

ނަހީދުބެ އޭނައަށް ފަސްދީފައި ދާ މަންޒަރު ބަލަން ދާނިޝްއަށް ހުރެވުނެވެ. އެވަގުތު އަލްވަދާޢު ކިޔާލެވުނަސް އެގެއަށް ވަދެގެން ދާން ބޭނުންވިއެވެ. ހިލްޔާ ދެކެން ބޭނުންވިއެވެ. ނަހީދުބެ ވާހަކަ ދައްކާ ގޮތުން އޭނަ މިވަގުތު ވެސް އެކަމަށް އެދިއްޖެނަމަ ނަހީދުބެ އެކަމަށް އިންކާރެއް ނުކުރާނެކަން ޔަޤީނާއި ގާތްވިއެވެ.

އެހެނަސް ދާނިޝް އެ ޚިޔާލު ބަދަލުކޮށްލީ، އެވަގުތު ހިލްޔާ ދެކެން އޭނަ ބޭނުންވާ ނިޔަތުގެ މަތިން އެނގުންވުމުންނެވެ. ހަމައެކަނި ހިލްޔާގެ ސޫރައަށް ބަލަހައްޓައިގެން ހުރުމުގެ އެދުމުގައި އެގެއަށް ވަނުމުގެ ބޭނުމެއް ނެތެވެ. ވަނަސް މިވަގުތު ހިލްޔާ ހިތްހަމަޖައްސައިދޭން ބުނެވޭނެ ވާހަކައެއް ޚުދު އޭނައަށް ވެސް ނޭނގެއެވެ. ވީއިރު ބައްދަލު ކުރަންވީ އެއްވެސް ހެޔޮ ނިޔަތެއް ނެތެވެ. ކައިވެނީގެ ކުރިން ހެޔޮ ނިޔަތެއް ނެތި އެހާ ގިނައިން ބައްދަލު ކުރުމަކީ ގޯސް ކަންތަކަށް މަގުފަހިވާނެ ކަމެކެވެ. ދާނިޝް މިހާ ހިސާބުން ހިލްޔާއާއި ބައްދަލުކޮށް، ވާހަކަ ދައްކަން ބޭނުންވީ ސާފު މަޤްޞަދުތަކާއި އެކީގައެވެ. ވަރުގަދަ ކައިވެންޏެއްގެ ބިންގަލަކީ އެއީއެވެ. ކައިވެނީގެ ފަހަތުގައިވާ މަޤްޞަދު ދެމީހުންނަށް ވެސް ސާފުވުމެވެ. ކައިވެނީގެ ކުރިން ދެމީހުން ވެސް ޖަޒުބާތުގައި ޖެހުމަކީ އެ މަޤްޞަދު ނުސާފުވެގެންދާނެ ސަބަބެކެވެ. އޭނައާއި ހިލްޔާގެ ގުޅުމަށް އެހެން ވާކަށް ދާނިޝްގެ ހިތް ނޭދުނެވެ. ހިތާއި ދެކޮޅަށް ވެސް އެވަގުތު ހިލްޔާގެ ގެއަށް ފަސްދީފައި ހިނގަން ފެށީ އެހެންވެއެވެ.

**

ހިލްޔާ ދެރަވެފައި ހުރި ވަރުން ހަމްރާ އާއި އެލީ ރޭވި ބައެއް ރޭވުންތައް ބަދަލު ކުރަން ޖެހުނެވެ. ކުރިން އެމީހުން ރާވާފައިވީ ހިލްޔާ ވަންނައިރަށް ފަޅައިގެންދާ ފުއްޕާހަމަކުން ކުދި ކަރުދާސްތައް ފެތުރިގެންދާ ގޮތަށެވެ. އެ ނޫން ވެސް އެފަދަ އެހެން ކަންތައް އެމީހުން ރޭވިއެވެ. އެހެނަސް ހިލްޔާ އެފަދަ އެއްވެސް ކަމަކަށް ތައްޔާރު ނޫންހެން ހީވުމުން އެންމެން ސިޓިންގް ރޫމުގައި ތިބެ ހިލްޔާ ލައްވާ ކޭކެއް ފަޅާލިއެވެ. ހިލްޔާ އުފާ ކޮށްލުމުގެ ގޮތުން މަރުޙަބާ ކިޔުމަށް ހަމްރާ އާއި އެލީ މަޖާ ރާގަކަށް ހުރި ލަވައެއް ވެސް ކިޔުނެވެ. އޭގެ ސަބަބުން ހިލްޔާގެ ތުންފަތްމަތިން ހިނިތުންވުމެއް ކިރިޔަ ކިރިޔާ ކުޅެލި ކަމެވެ.

ކާރު ތެރެއިން އެލީ ދެއްކި ވާހަކައިން މޭ މަތީގައި ބަރު އެއްޗެއް ބޭއްވިގެން ދިޔަ ފަދަ އިޙްސާސެއް ހިލްޔާއަށް ކުރެވުނެވެ. ހިތުގެ ކަނަކުން ގޮވަމުން ދިޔައީ އެވަގުތުން ވަގުތަށް ފޭސްބުކަށް ވަދެ އޭނައާއިމެދު ދެކެވެމުން ދާ ވާހަކަތައް ބެލުމަށެވެ. އަދި ރުޅިވެރިކަމާއިއެކީ އެ ހުރިހާ ވާހަކައަކަށް ރައްދު ދިނުމަށެވެ. އެހެނަސް އެ ވާހަކަތައް ބެލުމަށް އޭނައަށް ކެތް ކުރެވޭނެހެން ހިއެއް ނުވީތީ އެކަން ކުރަން ޖެހިލުންވިއެވެ. ބޭނުންވީ ފޭސްބުކުން ރިމޫވް ވާށެވެ. ވާނެ ނަމަ މި ދުނިޔެއިން ވެސް އޭނަގެ ނަން ފޮހެލާށެވެ.

އެ ފަހު ޖުމްލަ ހިތަށް ވެރިވާ ކޮންމެ ފަހަރަކު ހިލްޔާއަށް ބޯ ހޫރުވެމުން ދިޔައެވެ. އެއީ ކިހާ ނުރައްކާތެރި ޚިޔާލެއްކަން އޭނައަށް އެނގޭތީވެއެވެ. ވަގުތުން އާޚިރަތް މަތިން ހަނދާންކޮށް އެ ޚިޔާލު ސިކުނޑިން ފޮޅުވާލެވެއެވެ. އާޚިރަތް މަތިން ހަނދާންވުމާއިއެކު ހިލްޔާއަށް ޚިޔާލުތަކުން ނިކުމެ، ދުނިޔޭގައި އެ ހުރެވުނު ވަގުތުކޮޅަށް ސަމާލުކަން ދެވެއެވެ. އަދި އެވަގުތުކޮޅުގައި ޘަވާބު ހޯދުމަށް ކުރެވިދާނެ ކަމަކާއި މެދު ވިސްނެއެވެ. ހިނިތުންވާނެހާ ހިތްވަރެއް ގައިގައި ނެތަސް، އެލީ އާއި ދޮންތައަށް ގަދަކަމުން ހިނިތުންވުންތައް ހަދިޔާ ކުރެވެމުން ދިޔައީ އެހެންވެއެވެ.

ކޭކު ފެޅުމަށްފަހު މާ ގިނައިރެއްނުވެ ދޮންތަމެން އޭނަ ގާތު ކޮޓަރިއަށް ގޮސް ތާޒާވެލުމަށް ބުންޏެވެ. އޭނަ ވަރުބަލިވެފައި ހުރި މިންވަރު ދޮންތަމެންނަށް ވެސް ފާހަގަވީ ކަން ހިލްޔާއަށް އެނގުނެވެ.

“ރޫމް ޑީޕް ކްލީންއެއް ނުވާނެ އިނގޭ. މެއިޑް ހުރީ ޗުއްޓީގަ. މި ޕާސްޓް ޓޫ ވީކްސް ގަ ދޮންތަ ސްކޫލްގަ ވަރަށް ބިޒީ. އެހެންވީމަ އެލީ ކައިރި ބުނީ ސާފުކޮށްދޭށޭ. އެހާ ވަރަށް ބުނީމަ ދެން ކްލީންވެފަ ހުންނާނެ ވަރު ހިލްޔާއަށް އެނގޭނެ. އެހާވަރު ނުވިޔަސް ދެން އޯކޭ!” ހިލްޔާ ކޮޓަރިއަށް ދާން ތެދުވުމުން ހަމްރާ ބުންޏެވެ. އެވަގުތު އެ ވާހަކަ އަޑު އަހަން އިން އެލީ ފުންމައިގެން ތެދުވެ އަމިއްލަ ދިފާޢުގައި ވާހަކަ ދައްކަން ފެށިއެވެ. އެލީއަށް ވީ ގޮތް ފެނިފައި ހިލްޔާއަށް ހީލެވުނެވެ. އެހިނދު ދުޅަވެފައިވާ ލޮލަށްވީ ތަދާއިއެކީ ބޮލުގައި ވެސް ރިހުމެއް އުފެދުނެވެ. އެހެންކަމުން ހިލްޔާ އިތުރަށް މަޑު ނުކޮށް ސިޑިއާއި ދިމާލަށް ދިޔައެވެ.

އިރުކޮޅެއްގެ ތެރޭގައި ހިލްޔާ ކޮޓަރިއަށް ވަން ހިނދު ބައްޕަ ފަހަތުން އައިސް އޭނަގެ ހެދުން ފޮށި ވެސް ގެނެސްދިނެވެ. ބައްޕަ ވެސް އޭނަ ގާތު ތާޒާ ވެލައިގެން އަރާމުކޮށްލުމަށް ބުނެފައި ދިޔައީއެވެ. ހިލްޔާ ފޮށި ދަމައިގެން ކޮޓަރިއަށް ވައްދާލުމަށްފަހު ކޮޓަރީގެ ދޮރު ލައްޕާލިއެވެ.

ހިލްޔާއަށް އޭނަގެ ތަނަވަސް ކޮޓަރިއަށް ނަޒަރެއް ދެވުނީ ދެނެވެ. ދޮންތަ އެހެން ބުންޏަސް މައިގަނޑު ހުދުކުލައަށް ދާ ހިލްޔާގެ އެ ކޮޓަރިން ފެންނަމުން ދިޔައީ ސާފުކަމެވެ. ދުވަނީ މީރު ވަހެވެ. ކިޔަވާ މޭޒުމައްޗާއި ރީތިވާ މޭޒުމަތިން ފެންނަމުން ދިޔައީ ތަރުތީބުކަމެވެ.

ވަށައި ނަޒަރެއް ދެމުން ދަނިކޮށް ހިލްޔާގެ ސަމާލުކަން ހުއްޓުނީ، ދޮރުގެ ކައިރީގައި ހުރި ފޮތް ހަރުގަނޑަށެވެ. އެ ފޮތް ހަރުގަނޑު މަތީގައި ބެހެއްޓިފައިވި ފޮތްގޮނޑީގައި ބޭއްވިފައިވާ މުޞްޙަފް ފެނިފައި ހިލްޔާގެ މެއަށް ގޮތެއްވިއެވެ.

އިސާހިތަކު ހިލްޔާއަށް އޭނަ ހިފަހައްޓައިގެން ހުރި ފޮށި ދޫކޮށްލަމުން އެ ކަބަޑު ކައިރިއަށް ދެވުނެވެ. އަދި މީގެ މަސްތަކެއް ކުރިން އޭނަ ދޫކޮށްލި މުޞްޙަފަށް ނަޒަރެއް ދެވުނެވެ. ފުރާވަރުއްސުރެ ހިލްޔާ ގެންގުޅުނު މެދުމިނުގެ، އެ ނޫކުލައިގެ މުޞްޙަފްގެ ބޭރުގައިވާ ރަންކުލައިގެ ޑިޒައިނުގެ ބޮޑު ބައެއް ފޭދިގެން ގޮސްފައިވެއެވެ. އެއިން އެނގެނީ ހިލްޔާ އެ މުޞްޙަފް ބޭނުންކޮށްފައިވާ މިންވަރެވެ. އެހެނަސް މިއަދު ހަމަ އެ މުޞްޙަފްގެ މަތިން މުޅިން ފެންނަމުން ދިޔައީ ހިރަފުހެވެ.

އެ މަންޒަރު ފެނުމުން ހިލްޔާގެ ލޮލަށް ކަރުނަތައް ޖަމާވެގެން ދިޔައެވެ. އެ މުޞްޙަފުގެ ޙާލަތުން ބަޔާންކޮށްދެނީ އޭނަގެ ހިތުގެ ޙާލަތް ކަން ޔަޤީންވީތީވެއެވެ. ދުނިޔޭގެ ޙަޤީޤަތް އޭނަގެ ހިތާއި ސިކުނޑިއަށް އެއްދުވަސް ވަރެއްގައި ސާފުވެފައިވިއެވެ. އެހެނަސް މި ޤުރުއާނާއި ދުރުވުމުގެ ސަބަބުން އެ ޙަޤީޤަތްތައް އޭނައަށް ނުސާފުވެގެން ދިޔައީއެވެ. އެ ޢިލްމުގެ ބޭނުން ނުހިފާތީ އެ ޢިލްމުގެ މައްޗަށް ޝައްކުތަކުގެ ‘ހިރަފުސް’ އެރީއެވެ.

ނުނިމޭ