ނަފްސީ (ފަންސާސްހަވަނަ ބައި)
ނަފްސީ (ފަންސާސްހަވަނަ ބައި)
ހިލްޔާ ކާރު ދުއްވަމުން ގޮސް ޒިބްރާ ކްރޮސްއެއްގެ ކައިރީގައި ހުރި ޓްރެފިކް ލައިޓަކާއި ޖެހުނެވެ. ހިލްޔާގެ ކާރާއިއެކު އެހެނިހެން ކާރުތަކާއި ސައިކަލުތައް ވެސް އެތާނގައި މަޑުކުރިއެވެ. ވަގުތުގެ ގޮތުން މަގުމަތީގައި ބައިވަރު މީހުން އުޅެއެވެ. ހިލްޔާ އިނީ ކުރިމަތި ހުރަސް ކުރަމުން ދިޔަ މީހުންނަށް ނަޒަރު ހުއްޓައިގެން ޒިކުރު މަތީގައެވެ.
ހިލްޔާ އެހެން ބަލަބަލާ އިންދާ ޒިބްރާ ކްރޮސްއިން އެންމެ ފަހުން ހުރަސް ކުރަމުން ދިޔަ ޒުވާން އަންހެން ކުއްޖަކު ކުއްލި ގޮތަކަށް ފިޔަވަޅުތައް މަޑުޖައްސާލައިފިއެވެ. އަތްކުރު ޓޮޕަކާއި ޖިންސެއްގައި ހުރި އެ އަންހެން ކުއްޖާ މޭމަތީގައި އަތް އެޅިއެވެ. އޭގެ ދެވަނަ ސިކުންތުގައި އެކުއްޖާ ލަސްލަހުން ލޯ މެރި، ބިމަށް ތިރިވި މަންޒަރު ފެނުމުން ހިލްޔާގެ ޑޮކްޓަރީ ސިކުނޑި ވަގުތުން ސަމާލުވިއެވެ.
އިސާހިތަކު ހިލްޔާއަށް ކާރުގެ ދޮރު ހުޅުވާލަމުން ކާރުން ފޭބުނެވެ. ދެވަނަ ސިކުންތުގައި ދޮރު ލައްޕާލަމުން މަގުމަތީގައި އޮތް ކުއްޖާއާއި ދިމާލަށް ދުއްވައިގަނެވުނެވެ. އެހިނދު އެތާ ސައިކަލުގައި އިން ދާނިޝް ވެސް ހާސްކަމެއްގައި ހިލްޔާގެ ޙަރަކާތްތަކަށް ބަލަމުން ދިޔައެވެ. އެމްބިއުލާންސަކަށް ގުޅަން ޚިޔާލު ކޮށްފައި ވެސް ހިލްޔާގެ ބަހަކަށް މަޑުކޮށްލަން ހިތަށްއެރިއެވެ. ކޮންމެ ގޮތެއް ވިޔަސް ފޯނު ނަގައި އެމްބިއުލާންސް ގެ ނަންބަރު ޑައިލް ކޮށްލެވުނެވެ.
ހިލްޔާ ގޮސް ބިމަށް ތިރިވެލަމުން އެކުއްޖާގެ ކަނދުރާގައި ދެ އިނގިލި ޖެއްސިއެވެ. އިންތިހާއަށް ދަށްވެފައިވި ވިންދުގެ ސަބަބުން ނޭފަތާއި ދިމާލަށް އިނގިލި ދިއްކޮށްލަމުން ނޭވާލާތޯ ބަލާލެވުނެވެ. އެއްވެސް ވަރަކަށް ނޭވާ ނުލާކަން ޔަޤީންވުމާއިއެކު ހިލްޔާއަށް ވާހަކަ ދެކެވުނެވެ.
“އެމްބިއުލާންސަކަށް ގުޅާ! ވަރަށް އަވަސް!!!”
އެވަގުތު މަގުގައި ތިބި އެންމެންނަށް ވާހެން ހިލްޔާއަށް ބުނެވުނެވެ. އެއަށްފަހު ދެވަނަ ޚިޔާލެއް ނެތި އެކުއްޖާގެ ކައިރީގައި ކަކޫމައްޗަށް އިށީންނަމުން އެ ކުއްޖާގެ މޭމަތީގައި ދެ އަތް އެކީ އަޅައި ސީޕީއާރު ދޭން ފެށިއެވެ. ހިލްޔާގެ އެ ބަސްތަކާއެކީ ދާނިޝް ޑައިލްކޮށްފައިވާ ނަންބަރަށް ގުޅައި އެމްބިއުލާންސް އަންނަންވީ ތަން ކިޔައިދިނެވެ. ދާނިޝް ފޯނު ކަނޑާލުމަށްފަހު ވަށައި ނަޒަރެއް ދިންއިރު އެތަނަށް މަޑުކޮށްފައިވި ވެހިކަލްތައް ގިނަވިއެވެ. އެ ތަނަށް އެއްވެފައިވި މީހުންގެ ތެރެއިން ގިނަ މީހުން ފޯނުތައް ނަގައި މަންޒަރު ވީޑިއޯ ކުރަމުން ދިޔައީއެވެ. އޭގެ ތެރެއިން ބައެއް މީހުން ސިއްރު ވާހަކަތައް ދައްކަމުން ދިޔައީ ހިލްޔާއާއި ބެހޭގޮތުން ކަން ޔަޤީންވި ވަގުތު ދާނިޝް ގެ ކަތުރުކަށިގަނޑަށް ބާރުވިއެވެ. ބައެއް މީހުންނަށް އެހެން މީހުންނާއި ނުބެހި ހަމަ ނުއުޅެވެނީބާއޭ ހިތާހިތުން ކިޔާލެވުނެވެ. ޚިޔާލުތަކުގެ ތެރެއިން އެ އެންމެންނާއި ދިމާލަށް ހަޅޭއްލަވައި އެ ފޯނުތައް ހޯދައި ފިސްފިސްކޮށްލެވުނެވެ. އެހެނަސް އާދައިގެ މަތިން ރުޅިވެރިކަމުގެ މައްޗަށް ކެތްތެރިކަން ދާނިޝް އިސްކުރިއެވެ. މުއުމިނުން ޙަޤީޤީ ގޮތުގައި ދިފާޢު ކުރައްވާ ފަރާތަކީ ﷲ ކަން ހަނދާން ކުރަމުންނެވެ.
ހިލްޔާ ވަށައިގެންވި އެއްވެސް މީހަކަށް ފަރުވާލެއްނެތި އެމްބިއުލާންސް އަންނަންދެން ސީޕީއާރު ދެމުން ދިޔައެވެ. އެމްބިއުލާންސް އައުމާއިއެކު އެއިން ފޭބި ނަރުސް ކުއްޖާއަށް ބަލިމީހާއާއި ގުޅޭ ގޮތުން ހިލްޔާއަށް އެއްކުރެވުނު މަދު މަޢުލޫމާތު ކޮޅު ދިނެވެ. އަދި އެމަޖެންސީގައި ދޭނެ ފަރުވާއެއްގެ ޚިޔާލެއް ވެސް ދިނެވެ.
ބަލިމީހާ އެމްބިއުލާންސަށް އަރުވައި، އެމްބިއުލާންސް ދުއްވާލި މަންޒަރު ބަލަން ހުރެ، ހިލްޔާއަށް ފުން ނޭވައެއް ދޫކޮށްލެވުނެވެ. ވަށައިގެންވި މާޙައުލަށް އޭނައަށް ސަމާލުކަން ދެވުނީ ދެނެވެ. އިސާހިތަކު އޭނައަށް އަމާޒުވެފައިވާ ފޯނުގެ ކެމެރާތައް ފެނުމުން މެއަށް ފިނިވިއެވެ. އެހިނދު ލޮލަށް ސިފަވެގެން ދިޔައީ ރާފިލްގެ ވީޑިއޯއެވެ. އިވިގެން ދިޔައީ އެ ވީޑިއޯގައި ރާފިލް އޭނައާއިމެދު ދެއްކި ވާހަކަތަކެވެ. އެ ވާހަކަތަކާއި ގުޅިގެން މީހުން އޭނައާއި މެދު ދައްކާފައިވާ ވާހަކަތަކެވެ.
ހިނދުކޮޅަކަށް ހިލްޔާ ހުރި ތަނުގައި ގަނޑުވާ ގޮތްވިއެވެ. އަނެއްކާވެސް އޭނަގެ ވީޑިއޯއެއް ސޯޝަލް މީޑިއާގައި ފެތުރެން މިއުޅެނީ އޭނައަށް އިތުރު މަލާމާތްތަކެއް ރައްދުވާންތޯ ހިތަށްއެރިއެވެ. ބިރުވެރިކަމުން ހިތް ވަށާލެވިގެން ދިޔުމާއިއެކު އެ ހިތަށް ވެރިވީ ﷲ ގެ ނަންފުޅެވެ. ﷲ ގެ ރަޙްމަތް އަބަދުވެސް އޭނަ ވަށާލައިގެން ވާކަން ހަނދާން ކުރެވުނެވެ. އޭނައަށް ގޯސް ހެން ހީވާ ކަމެއްގައި ވެސް ވަރަށް ބޮޑު ހެވެއް ވެދާނެ ކަން ހަނދާން ކުރެވުނެވެ.
އެ ޚިޔާލުތަކާއިއެކީ ހިލްޔާގެ ހިތަށް ހަމަޖެހުމެއް ލިބުނެވެ. އެހިނދު ހަމަ އެ ހުރި ދިމާލުން އިސްއުފުލާލެވުނު ހިނދު، އޭނަގެ ކާރުގެ އަނެއްފަރާތުން ސައިކަލު މަތީގައި އިން ދާނިޝް ފެނުނެވެ. އޭނައާއި ހަތަރުކަޅި ހަމަވުމާއިއެކު ދާނިޝް ފުރިހަމަ ހިނިތުންވުމެއް ހަދިޔާ ކުރިއެވެ. އެއާއިއެކު ހިލްޔާގެ ތުންފަތްމައްޗަށް ވެސް ލަސްލަހުން ހިނިތުންވުމެއް ވެރިވީ ހަމަ އެއްވެސް އިޚްތިޔާރަކާއި ނުލައެވެ. އެހިނދު ހިލްޔާ ދާދި ދެންމެ އޭނައާއި ދިމާލަށް އަމާޒުވެފައިވި ހުރިހާ ކެމެރާއެއްގެ މަތިން ހަނދާން ނެތުނެވެ. އޭނައާއިމެދު ދެކެވޭ ވާހަކަތަކާއިމެދު ވެސްމެއެވެ. ދާނިޝް ގެ އެ ހިނިތުންވުމުން އޭނަ ދެކެ ލޯބިވާ މީހުން ވެސް އުޅޭކަން ސިކުނޑި ހަނދާންކޮށްދިނެވެ. ދާނިޝް ފެނިފައި އޭނައަށް އެކަން ހަނދާންވާންވީ ސަބަބެއް ނުވިސްނުނެވެ.
ހިލްޔާ ދާނިޝްއަށް ބަލަން ހުރެފައި ކާރަށް އަރަން ދިޔައެވެ. ހިލްޔާ ކާރުގެ ޑްރައިވާސް ސީޓުގެ ދޮރާއި ހަމަވި ވަގުތު ދާނިޝް ސައިކަލު ސްޓާޓް ކުރިއެވެ. އެވަގުތު މަގަށް އެއްވެފައިވި މީހުންނާއި ވެހިކަލްތައް އެކި ދިމަދިމާލަށް ގޮއްސިއެވެ.
ކާރަށް އެރުމުގެ ކުރިން ހިލްޔާއަށް ކުޑަކޮށް މަޑުކޮށްލެވުނީ ދާނިޝް އެއްޗެކޭ ބުނާނެ ކަމުގެ އުއްމީދުގައެވެ. މިފަހުން އައިސް ދާނިޝްއާއި ވާހަކަ ދައްކަން ބޭނުންވެފައިވަނީ މާ ބޮޑަށެވެ. އަދި އަމުދުން އެހެން ދުވަސްތަކާއި ޚިލާފަށް ދާނިޝް އަޅިކުލައިގެ އަތްކުރު ޓީޝާޓަކާއި ކަޅުކުލައިގެ ޓްރެކް ޝޫޓެއް ލައިގެން ހުރިގޮތުން ފެންނަމުން ދިޔައީ ތަފާތު ގޮތަކަށެވެ. އެހެންކަމުން ރަނގަޅަށް ބަލަން ވެސް ބޭނުންވެފައިވިއެވެ. އެހެނަސް ދާނިޝް ވަކި އެއްޗެކޭ ނުބުނެ ދުއްވާލުމުން ހިލްޔާ ހިސާބަކަށް ދެރަވިއެވެ. އެ ދެރަވި ދެރަވުމާއިމެދު ބޯހޫރުވާލަމުން އަމިއްލަ ނަފްސާއި ހީލެވުނެވެ. އޭނައަށް މި ވަނީ ކިހިނެއްތޯ ހިތަށްއެރިއެވެ. މީގެ ކުރިން ދުވަހަކުވެސް ފިރިހެނަކާއި މިހާ ގާތްވާން އޭނަ ބޭނުންވެފައެއް ނުވެއެވެ.
ހިލްޔާއާއި ދާނިޝްއަށް ވެސް ހީކުރެވުނު ފަދައިން އެ ދުވަހު ހިލްޔާ މަގުމަތީގައި އޮތް ކުއްޖާއަށް ސީޕީއާރު ދޭ މަންޒަރު ސޯޝަލް މީޑިއާގައި ފެތުރުނެވެ. ހިލްޔާ ހުރީ އެއްވެސް ސޯޝަލް މީޑިއާއަކަށް ނުވަންނާށެވެ. ދޮންތަމެންނާއި އެކުވެރިން އެ ވާހަކަ ދެއްކުމުން ވެސް ވީޑިއޯ ހުޅުވަން ވެސް ހިލްޔާ ބޭނުމެއް ނުވިއެވެ. މީހުން އޭނައާއިމެދު ދައްކާނީ ގޯސް ވާހަކަތަކެއް ކަން ޔަޤީން ކޮށްގެންނެވެ.
އެހެނަސް މިފަހަރު ވެގެން ދިޔަ ގޮތުން ހިލްޔާއަށް ލިބުނީ ޙައިރާންކަމެކެވެ. އެދުވަހު ހިލްޔާގެ އެ ވީޑިއޯ ފެތުރިގެން ދިޔަދިޔަހެން ހިލްޔާއާއިމެދު މީހުން ގެންގުޅެމުން އައި ނަޒަރިއްޔާތުތައް ބަދަލުވާން ފެށިއެވެ.
“އެއީ ގޯސް ކުއްޖެއް ނޫން. އެންމެ ކުރީއްސުރެ ވެސް އަހަންނަށް ހީވި އެހެން.”
“ދީންވެރި، ޞާލިޙު ކުއްޖެއް ނޫނީ އެގޮތަށް ހެދުމެއް ނާޅާނެ.”
“ތި މީހުން އެ ހިލްޔާއަށް މަލާމާތް ތިކުރަނީ، ތި މީހުން މަންޒަރު ބަލަން ތިބިއިރު އެ ކުއްޖާ ސަލާމަތް ކުރީ ހިލްޔާއޭ.”
“ހުނަރުވެރި ކެއަރިންގް ޑޮކްޓަރެއްހެން ހީވޭ.”
ސޯޝަލް މީޑިއާގައި އެންމެ ގިނައިން ފެތުރެން ފެށީ މިފަދަ ކޮމެންޓްތަކެވެ. ދޮންތައާއި އެކުވެރިންގެ ފަރާތުން މި ބަސްތައް އިވޭ ވަރުން ހިލްޔާއަށް އެންމެފަހުން ސޯޝަލް މީޑިއާއަށް ވަދެވުނެވެ. އެއާއިއެކު އެމީހުން ބުނަމުން ދިޔައީ ތެދެއްކަން ހިލްޔާއަށް އެނގުނެވެ. އިހަކަށް ދުވަހު އޭނަ ޒާތީ ގޮތުން ނުވެސް ދަންނަ އެތައް ބީރައްޓެހިން އޭނަގެ އަބުރު ކަތިލައި މަލާމާތް ކުރަމުން ދިޔައެއްކަމަކު، ހެޔޮ ޢަމަލެއް ކުރިތާ 24 ގަޑިއިރު ތެރޭ މިވަނީ މަންޒަރު ބަދަލުވެފައެވެ. ހަމަ އެފަދަ ބީރައްޓެހިން މިއަދު މި ދަނީ އޭނައަށް ތަޢުރީފު ކުރަމުންނެވެ.
ކޮޓަރީގެ އެނދުމަތީގައި އިނދެ އެ ކޮމެންޓްތައް ކިޔަމުން ދިޔަދިޔަހެން ހިލްޔާގެ ލޯ ކަރުނުން ފުސްވިއެވެ. ކޮންމެހެން އޭނައާއިމެދު ޢާއްމުންގެ ނަޒަރިއްޔާތު ބަދަލުވީހެން ހީވީތީވެއެއް ނޫނެވެ. އެހެނެއްކަމަކު ކޮންމެ ކަމެއްގައި ވެސް ﷲ ގެ އިރާދަފުޅުގެ ބާރު އެނގުންވެގެން ދިޔުމުންނެވެ. އޭނައަށް ކުރެވޭ އެއްވެސް ތަޖުރިބާއެއްގެ އަސްލަކީ ވަށައިގެންވި މީހުން ނޫންކަން އެދުވަހު ޔަޤީންވެގެން ދިޔައެވެ. އޭގެއިން ކޮންމެ ތަޖުރިބާއަކީ ވެސް އޭނައަށް އިމްތިޙާނަކަށްޓަކައި ﷲ އިރާދަ ކުރައްވާ ކަންތަކެވެ. އެއް އިމްތިޙާން ނިމުމުން އަނެއް އިމްތިޙާން ފެށިގެން ދަނީއެވެ. ޙަޔާތުގެ އަސްލަކީ އެއީއެވެ.
މިއަދު ހިލްޔާއަށް ކުރިމަތިވެފައި މިވަނީ ފަސޭހައިގެ އިމްތިޙާނެވެ. ތަޢުރީފުތަކުގެ އިމްތިޙާނެވެ. ފުރަތަމަ ކަމަކަށް ﷲ އޭނަ ދިފާޢު ކުރެއްވި ކަމަކަށްޓަކައި ޝުކުރުގެ ސަޖިދައެއް ކުރެވުނެވެ. އަދި ހަމަ އެ ސަޖިދައިގައި މި ފަސޭހައިގެ އިމްތިޙާނުން އޭނައަށް ކާމިޔާބީ ދެއްވުމަށް ދުޢާ ކުރެވުނެވެ. މި އިމްތިޙާނުން ވެސް ﷲ އެންމެ ރުހިވޮޑިގެންވާ ފަދައިން ‘ފާސްވުމަށް’ ދުޢާ ކުރެވުނެވެ. އަދި މީހުންގެ ތަޢުރީފު ލިބުނަސް އޭނަ ކުރާ ހެޔޮ ޢަމަލުތަކުގެ އިޚްލާޞްތެރިކަން ލެއްވުމަށް އެދި ދުޢާ ކުރެވުނެވެ.
ހިލްޔާއާއިމެދު ރަނގަޅު ވާހަކަތައް ސޯޝަލް މީޑިއާގައި ފެތުރެން ފެށުމުން ދާނިޝްއަށް ވެސް ޙަމްދުކުރެވުނެވެ. މިއީ ވޭތުވެ ދިޔަ ދުވަސްތަކުގައި އޭނަ ކުރި ދުޢާތަކުގެ ތެރެއިން ދުޢާއެކެވެ. ނަތީޖާއެއްގެ ގޮތުން އަބަދުވެސް އޭނަގެ ދުޢާ އަޑު އައްސަވާ ރަސްކަލާނގެ ދެކެ އިތުރަށް ލޯބިވެވުނެވެ. އަދި އޭނަގެ އުފާވެރި މުސްތަޤްބަލަށްޓަކައި އުއްމީދުތައް ކުރެވެން ފެށިއެވެ. ވަކިން ޚާއްސަކޮށް ނަޖާހުގެ އަންހެނުން ބުނިކަމަށް ބުނެ ނަޖާހު ދެއްކި ވާހަކައިންނެވެ.
“ވައިފް ބުނީ ތިމަންނަ ބުނީމޯ ދާނިޝްގެ ވާހަކަ ހިލްޔާ ގާތު. ހިލްޔާ ބުންޏޯ ދާނިޝް އާއި ކައިވެނި ކުރުމާއިމެދު ވިސްނާނަމޯ.”
އެ ބަސްތައް އިވުނީއްސުރެ ދާނިޝްއަށް ދޭތެރެ ދޭތެރެއިން ހިނިތުންވެވެމުން ދިޔައެވެ. ބައެއްފަހަރު ހުރިގޮތަށް ހިލްޔާ ގާތަށް ގޮސް ކައިވެންޏަށް އެދެން ދާނިޝްގެ ހިތް ބުނެއެވެ. އެހެނަސް ހިލްޔާއަށް ވިސްނަން ވަގުތު ދޭން ދާނިޝް ބޭނުންވިއެވެ. ކައިވެންޏެއްގެ ޚިޔާލަކީ ވެސް ކުޑަ ޚިޔާލަކަށް ނުވާތީވެއެވެ. އަދި ވަކިން ޚާއްސަކޮށް ނުހަނު ކައިރި މާޒީއެއްގައި ކައިވެންޏަކާއި ގުޅިގެން ހިލްޔާއަށް ނޭދެވޭ ތަޖުރިބާއެއް ކުރެވިފައިވާތީވެއެވެ.
މަގުމަތީގައި ހިނގި ޙާދިސާގެ 3 ދުވަސްފަހުން ހިލްޔާ ކޮންސަލްޓޭޝަން ރޫމުގެ ކްލިނިކްގައިވާ ކޮރިޑޯގެ ކޮޅާއި ހަމައަށް ދިޔަ ވަގުތު ރިސެޕްޝަންގައި އިން އަންހެން ކުއްޖަކު ރޯ އަޑު އިވުނެވެ.
“ކޮއްކޮ….އެމީހުން ބުނަނީ ލަންގް ކެންސާރ ގެ ސްޓޭޖް 3 އަށް ވެދާނެއޭ. ޓެސްޓް ރިޒަލްޓްއަށް ބަލާފަ ޑޮކްޓަރުން ބުނަނީ އެހެން. ވީހާވެސް އަވަހަކަށް ބޭރަށް ގެންދަން ޖެހެނީ.” އެ އަޑު އިވިފައި ހިލްޔާއަށް ފިޔަވަޅުތައް މަޑު ޖައްސާލެވުނެވެ. އެ އަޑުން އެއީ ރިސެޕްޝަންގައި އުޅޭ ޔާނާ ކަން އެނގުނެވެ.
“އަނެއްކާ….ޑޮކްޓަރ ހިލްޔާއަށް ދައްކާލުން ކިހިނެއް ވާނީ؟ ޑޮކްޓަރ ހިލްޔާއެއްނު އެދުވަހު މަގުމަތިން ވެސް ޔުއާރ ސިސްޓާރ ސޭވް ކުރީ؟” ރިސެޕްޝަނުގައި ދެން އިން އަންހެން ކުއްޖާ އެހެން ބުނުމުން ހިލްޔާގެ ލޯ ބޮޑުވިއެވެ. އެދުވަހު މަގުމަތީގައި ލޯ މެރިފައި އޮތް ކުއްޖާ ހަނދާންވެފައި ހިތް މޭތެރޭގައި އޮވެ ގެނބުނެވެ. އެކުއްޖާއަށް މިހާ ބޮޑު ބައްޔެއް ޖެހިފައި ވެދާނެކަމަށް އޭނަ އެދުވަހު ހިއެއް ނުކުރެއެވެ.
“ޑޮކްޓަރ ހިލްޔާއަށް ދެއްކިޔަސް، މިކޮޅުން ދެވޭނެ ފަރުވާއެއް ނޯންނާއެއޭ ޑޮކްޓަރުން ބުނަނީ. ވަރަށް އަގުބޮޑު ފަރުވާއެއް ކުރަންޖެހެނީ ބޭރަށް ގޮސް. އާސަންދަ ލިބޭތޯ އެބަ ބަލަން. ލިބުނަސް ފުރޭނެހެން ހިއެއްނުވޭ. ބައްޕަ ނަގާފަ އޮތް ލޯނުގެ ސަބަބުން ވަރަށް ދަތިކޮށް އެންމެން އުޅެނީ. އައި ޑޯންޓް ނޯ ވަޓް ޓު ޑޫ.” ޔާނާ ދެންވެސް ރޮވިފައިވާ އަޑަކުން ކިޔައިދިނެވެ.
ޔާނާ ރޯން ފެށި އަޑު އިވިފައި ހިލްޔާގެ ހިތް ދެރަވިއެވެ. އެހެނަސް ހިތްވަރު ކޮށްފައި ކުރިއަށް ހިނގައިގަނެވުނީ ވޯޑުގައި ތިބި ބަލިމީހުން މަތިން ހަނދާން ކުރަމުންނެވެ.
ފާއިތުވަމުން ދިޔަ ވަގުތާއިއެކީ ޔާނާގެ ޙާލަތާއިމެދު ހިލްޔާގެ ހިތަށް އެއްވެފައިވާ ޖަޒުބާތުތައް ވެރިވާން ފެށިއެވެ. ޔާނާއަކީ ކްލިނިކް ތެރެއިން އޭނައާއި ބެހޭގޮތުން ގޯސް ވާހަކަ އެންމެ ގިނައިން ދެއްކި މީހުންގެ ތެރެއިން އެކެކެވެ. އެތައް ދުވަހެއްގެ މަތިން ޔާނާގެ ބަސްތައް އިވިފައި ފަހުން ގޮސް ހިލްޔާއަށް ރޮވިފައިވެއެވެ. މިއަދު ޔާނާއަށް އެ ދިމާވި ޙާލަތަކީ އޭނަ އެފަދައިން ދެރަކޮށްލުމުގެ ނަތީޖާ ކަމަށް ހިތުގެ ކަނަކުން ގޮވަން ފެށިއެވެ. އޭގެ ސަބަބުން ހިތުގެ ކަނަކުން އެކަމަށްޓަކައި އުފާވެސް ކުރެވެން ފެށިއެވެ.
އެހެނަސް ހެނދުނު ޑިއުޓީ ނިންމާލާފައި ކާރަށް އެރި ވަގުތު އެ އިޙްސާސްތަކުގެ ސަބަބުން ހިލްޔާގެ ހިތަށް އުދަގޫވެފައިވިއެވެ. އެ އިޙްސާސްތަކަކީ ހަމަ ޔަޤީނުން ވެސް ﷲ އެންމެ ރުހިވޮޑިގެންވާނެ އިޙްސާސްތަކެއް ނޫންކަން ޔަޤީން ކުރެވުނެވެ. މިއަދު ހިލްޔާ ޔާނާގެ މަޤާމުގައި ނެތީ އޭނަގެ ޞާލިޙު ކަމުން ނޫނީ މޮޅުކަމުގެ ސަބަބުންނެއް ވެސް ނޫނެވެ. އެހެނެއްކަމަކު ﷲ ގެ ރަޙްމަތުން ﷲ ވަނީ އޭނައަށް ރިޒުޤު ތަނަވަސްކޮށް ދެއްވާފައެވެ. އޭނައަށް އިމްތިޙާނެއްގެ ގޮތުންނެވެ. މި ޙާލަތުގައި އޭނަ އިޙްސާންތެރިކަން އިސްކޮށް ޔާނާއަށް އެހީވެދޭނީތޯ ނުވަތަ ނުވާނީތޯ ބެއްލެވުމަށެވެ. އެކަން ހިލްޔާއަށް ހިތުގެ އަޑިން ޤަބޫލު ކުރެވުނެވެ.
އެހެންކަމުން ހިލްޔާ އެދުވަހު ހެނދުނު ޑިއުޓީ ނިންމުމަށްފަހު ގެއަށް ދިޔުމުގެ ކުރިން އޭޓީއެމަށް ވަނީ، ޔާނާއަށް ފައިސާ ދޭނެ ގޮތެއް ސިކުނޑީގައި ރާވަމުންނެވެ. އޭޓީއެމަށް ވަދެފައި ފައިސާ ނަގަން ޖެހޭނެ ޢަދަދެއް ހިލްޔާ ޓައިޕްކުރިއެވެ. އެ ޢަދަދަށް ބަލަހައްޓައިގެން އޭނައަށް އިރުކޮޅެއް ވަންދެން ހުރެވުނެވެ. އެއީ އޭނައަށް ލިބޭ ވަރާ ބަލައި ވަރަށް ވެސް ކުޑަ ޢަދަދެކެވެ. ޔާނާއަށް ދިމާވެފައިވާ ދަތިކަމަށް އޭނައަށް ވެވިދާނެ އެހީއާއި ބަލައި ކުޑަ ޢަދަދެކެވެ. ޢަދަދު ބޮޑު ކުރަން ހިތަށް އެރިއެއްކަމަކު ޔާނާ ގެ ސަބަބުން އޭނައަށް ލިބުނު ހިތާމަތައް ހަނދާންވެފައި އިތުރު ނުކުރަން ހިލްޔާ ނިންމިއެވެ. އަދި އޭޓީއެމް މެޝިނުން ނިކުތް ލާރިކޮޅު ނަގައި އަތް ދަބަހަށް ލަމުން އެތަނުން ނިކުތެވެ.
ހިލްޔާ ގޮސް ކާރަށް އެރިއިރު ޕްލޭ ކުރެވިފައިވީ ޒުމަރު ސޫރަތެވެ. ކާރަށް އަރައި ހަމަޖެހިލީ ވަގުތު އިވެން ފެށި އާޔަތާއި އެކީ ހިލްޔާގެ ޙަރަކާތްތައް ލަސްވިއެވެ.
وَلَوْ أَنَّ لِلَّذِينَ ظَلَمُوا۟ مَا فِى ٱلْأَرْضِ جَمِيعًا وَمِثْلَهُۥ مَعَهُۥ لَٱفْتَدَوْا۟ بِهِۦ مِن سُوٓءِ ٱلْعَذَابِ يَوْمَ ٱلْقِيَٰمَةِ ۚ وَبَدَا لَهُم مِّنَ ٱللَّهِ مَا لَمْ يَكُونُوا۟ يَحْتَسِبُونَ
އަނިޔާވެރިވި މީހުންނަށް، ބިމުގައިވާހާ ތަކެއްޗާއި، އެއާއިއެކު އެއާއި އެއްފަދަ ތަކެތި ލިބުނުކަމުގައިވީނަމަ ވެސް ޤިޔާމަތް ދުވަހުގެ ގަދަފަދަ ޢަޒާބުން ސަލާމަތް ވުމަށްޓަކައި، އެއިން ފިދުޔަ ދިނީހެވެ. އަދި އެބައިމީހުން ހީވެސްނުކުރާ ކަންތައް އެދުވަހުން اللَّه ގެ ޙަޟްރަތުން އެބައިމީހުންނަށް ފާޅުވާނެއެވެ
އާޔަތް އިވިގެން ދިޔަދިޔަހެން އާޔަތުގެ މާނަ ވެސް ހިލްޔާގެ ހިތަށް ގެނެވިގެން ދިޔަ ހިނދު އެ ހިތް ރޫރޫއެޅިއެވެ. އެ އާޔަތް އިވިގެން ދިޔައީ އޭނައަށް އިންޒާރެއްގެ ގޮތުގައި ހެން ހީވިއެވެ. ދާދި ދެންމެއަކު އޭނަ އިތުރަށް ނުދޭން ނިންމީ އޭނަގެ ފާފަތައް މަދުވެގެން ހެއްޔެވެ؟ ނޫނެކެވެ. އޭނައަކީ ވެސް ފާފަވެރިއެކެވެ. ޤިޔާމަތް ދުވަހުން އޭނަ ވެސް އަމިއްލަ ނަފްސު ސަލާމަތް ކުރުމަށްޓަކައި ދުނިޔޭގެ ދެ ގުނަ ލިބިފައިވިޔަސް އެ ހުރިހާ އެއްޗެއް ފިދުޔައިގެ ގޮތުގައި ދޭން ތައްޔާރު ވާނެއެވެ. އެހެނަސް އެދުވަހަކީ ހެޔޮ ޢަމަލުތައް ފިޔަވައި އަތުގައި އެއްވެސް މުދަލެއް ނުހުންނާނެ ދުވަހެވެ. ޙަޤީޤީ ފަޤީރު ކަމުގެ ދުވަހެވެ. ހޭދަ ކުރަންޖެހެނީ މިއަދެވެ. ދުނިޔޭގެ މުދަލުން ބައެއް ﷲ އޭނައަށް ދެއްވާފައިވާ ޙާލުގައެވެ.
ހިތަށް ވެރިވި އެ ޚިޔާލުތަކާއިއެކީ ހިލްޔާ އަނެއްކާވެސް ކާރުން ފޭބިއެވެ. އަދި އަނެއްކާވެސް އޭޓީއެމް ދޮށަށް ދިޔައެވެ. މިފަހަރު ހިލްޔާ ސްކްރީނުގައި ޓައިޕްކޮށްލީ އޭނަ ކުރިން ޖެހި ޢަދަދުގެ ދެގުނައެވެ. އަދި އެ ހުރިހާ ފައިސާ ނޫޓެއް މެޝިނުން ނަގައި ދަބަހަށް އެޅީ، އެ ހުރިހާ ފައިސާއެއް ޔާނާއަށް ދޭން ނިންމަމުންނެވެ. އެ ޚިޔާލުން ހިލްޔާއަށް ހިތްހަމަޖެހުމެއް ލިބުނެވެ.
ހިލްޔާ ނިންމައިގެން ހުރީ އެދުވަހު ހަވީރު ޑިއުޓީއަށް ގޮސް އެ ފައިސާ ސިޓީ އުރައަކަށް ލައި، ޔާނާގެ ފުރިހަމަ ނަން ލިޔެފައި ރިސެޕްޝަންގައި ބާއްވާށެވެ. އެއްވެސް މީހަކަށް އެންގުމެއް ނެތިއެވެ. އެހާ ބޮޑު ޢަދަދެއް ޔާނާއަށް ދިނީ އޭނަ ކަމަށް ބުނެ މީހުން ވާހަކަ ދައްކައި ހަދާކަށް ހިލްޔާ ބޭނުމެއް ނުވިއެވެ. ޢަމަލުގެ އިޚްލާޞްތެރިކަން ދެމެހެއްޓުމަށެވެ.
އެހެނަސް ހަވީރު ޑިއުޓީއަށް ގޮސް ހިލްޔާ ކޮންސަލްޓޭޝަން ރޫމުގެ ވަތްގަނޑުތައް ބަލާ ބަލާ ވެސް ސިޓީ އުރައެއް ފެނޭ ގޮތެއް ނުވިއެވެ. ދާނިޝް އޭނައަށް ދިންހާ ސިޓީ އުރަތައް ވަނީ ގޭގައެވެ. އޭގައި އެހެން ނޫނަސް ވަނީ އޭނަގެ ނަން ލިޔެވިފައެވެ. ޑިއުޓީ ފެށެން ބާކީ މަދު ވަގުތުކޮޅެއް އޮތުމުން ބޭރަށް ގޮސް ގަންނާނެ ވަގުތެއް ނެތެވެ. އެހެންކަމުން ޚިޔާލެއް ކުރުމަށްފަހު ހިލްޔާ މޭޒުމަތީގައި ހުރި ފޯނުން 3 ކަށް ޑައިލް ކުރިއެވެ.
އަމިއްލަ އޮފީސް މޭޒުދޮށުގައި އިން ދާނިޝް ކޮމްޕިއުޓަރަށް ބަލަހައްޓައިގެން އިންދާ ފޯނު ރިންގުވުމުން ދާނިޝް ފޯނު ނެގީ ކޮމްޕިއުޓަރު ސްކްރީނުން ނަޒަރު ވަކި ކުރުމެއްނެތިއެވެ.
“އައްސަލާމްޢަލައިކުމް.” ދާނިޝް ފޯނަށް ޖަވާބު ދާރީވީ އެކޮޅުން އޭނައަށް ޢާއްމު ގޮތެއްގައި ގުޅާ މުވައްޒަފެއްގެ އަޑު އިވޭނެ ކަމުގެ އުއްމީދުގައެވެ.
“ވަޢަލައިކުމުއްސަލާމް. ދާނިޝް….ދޯ؟” އެކޮޅުން އިވުނު އަޑާއިއެކީ އިސާހިތަކު ދާނިޝްގެ ހުރިހާ ސަމާލުކަމެއް ފޯނަށް ދިޔައެވެ. ހިލްޔާ ގެ ނަން ހިތަށް ވެރިވުމާއިއެކު އެ މޫނުމައްޗަށް ޙައިރާންކަން އެކުލެވިފައިވި ހިނިތުންވުމެއް ވެރިވިއެވެ.
“ޔެސް. ދާނިޝް މިއީ. ހައު ކޭން އައި ހެލްޕް ޔޫ ޑޮކްޓަރ ހިލްޔާ؟” ދާނިޝްއަށް ފުރިހަމަ ހިނިތުންވުމަކާއެކީ ބުނެވުނެވެ. ހިލްޔާ ލައްވާ ‘ދާނިޝް ސާރ’ ކިޔުއްވަން އޭނަގެ ސިކުނޑި އެންގިއެއްކަމަކު ހިތް އެއާއި ދެކޮޅު ހަދަމުން ދިޔައެވެ.
“އަމް….ސިޓީ އުރައެއް އޮންނާނެތަ ދާނިޝް އަތުގަ؟” ހިލްޔާ އެހެން އެހުމުން ދާނިޝްއަށް ވަގުތުން ސީދާވެލަމުން މޭޒުގެ ފުރަތަމަ ވަތްގަނޑު ހުޅުވާލެވުނެވެ.
“އެބައޮތް. އެކަމަކު ކުޑަކޮށް ކުރަހާލެވިފަ ހުރީ. ރަނގަޅުވާނެތަ؟” ދާނިޝް ސިޓީއުރަ ނަގައި އެއަށް ބަލަން އިނދެ ބުންޏެވެ. އެ ސިޓީ އުރައިގެ އެއްކަނެއްގައި އޭނަ ހުރީ ނޫކުލައިގެ ގަލަމަކުން ލިޔެވޭތޯ ބަލަން މަސައްކަތް ކޮށްފައެވެ.
“އެހާ ބޮޑަށް ނޫނިއްޔާ އޯކޭވާނެ. އެބަ އަންނަން ތީތި ހޯދަން.” ހިލްޔާ ބުންޏެވެ.
“ހިލްޔާ ނަޔަސް އޯކޭ. ހައުސްކީޕިންގް ސްޓާފެއްގެ އަތަށް ދީފަ ފޮނުވަދީފާނަން.” ދާނިޝްއަށް ބުނެވުނެވެ.
“ނޯ ނޯ…މާ ގިނަ މީހުންނަށް އަންގަން ބޭނުމެއް ނޫން. އެބަ އަންނަން.” ހިލްޔާ އެހެން ބުނުމުން ދާނިޝްގެ ދެބުމަ ކައިރިވިއެވެ. ދާނިޝްއަށް އިތުރު އެއްޗެކޭ ބުނެވުމުން ކުރިން ހިލްޔާ ފޯނު ކަނޑާލައިފިއެވެ. ދާނިޝް އެއްފަހަރު ސިޓީ އުރައަށް އަނެއްފަހަރު ފޯނުގެ އަތްގަނޑަށް ބަލާފައި އެ އަތްގަނޑު ބޭއްވީ ޙައިރާންކަމެއްގައި ހުރެއެވެ. އެއަށްފަހު ގޮނޑިން ތެދުވެލީ ހިލްޔާއަށް އެ ސިޓީ އުރަ ފޯރު ކޮށްދިނުމަށެވެ.
ދާނިޝް އެޑްމިން އޮފީހުން ނިކުމެ ލޮބީއަށް ނިކުންނަން އުޅުނު ވަގުތަކީ އަވަސް ފިޔަވަޅުތަކެއްގައި އައި ހިލްޔާ އެހާ ހިސާބަށް އައި ވަގުތެވެ. ހިލްޔާ އޭނަ ފެނުމާއިއެކު އޭނަގެ ގާތަށް އައެވެ.
“މިއީ ކީއްކުރަން؟” ދާނިޝް ސިޓީ އުރަ ދިއްކޮށްލަމުން އެހިއެވެ.
“ކުޑަ ކަމަކު. ތޭންކްސް!” ހިލްޔާ ހިނިތުންވުމަކާއެކީ އޭތި ހޯދަމުން ބުންޏެވެ. އެއަށްފަހު އަނެއްކާވެސް ދާނިޝްއަށް އެއްޗެކޭ ބުނެވުމުގެ ކުރިން ދާނިޝްއަށް ފަސްދީފައި ދާން ހިނގައިގަތެވެ. އެހިނދު ޙައިރާންކަމެއްގައި ހުރެވެސް ދާނިޝްއަށް ލުއި ގޮތަކަށް ހީލަމުން ބޯހޫރުވާލެވުނެވެ.
އެދުވަހު ހަވީރު ދާނިޝް ގެއަށް ދިޔައެވެ. ޑިއުޓީ ނިމުނަސް އާދައިގެ މަތިން ކްލިނިކްގެ ކަންތައް މަތިމަތިން ބަލާލުމަށް އެރޭ ވެސް ދާނިޝް އަނބުރާ ކްލިނިކަށް ދިޔައެވެ. 8:30 ވަމުން ދިޔަ ވަގުތު ކްލިނިކަށް ވަދެގެން ދިޔައިރު ރިސެޕްޝަންގައި އުޅޭ އަންހެން ކުދިން ވަރަށް ޖަޒުބާތުގައި ޖެހިގެން ކޮންމެވެސް ކަމަކާއި މެދު ވާހަކަ ދައްކާ އަޑު އިވެއެވެ. ބޮޑު ކަމެއް ދިމާވެގެން އުޅޭކަން އެނގިގެން ނޫނީ ދާނިޝް މުވައްޒަފުންގެ ޒާތީ ކަންކަމާ ނުބެހޭތީ ދާނިޝް އެ ވާހަކަތަކަށް ސަމާލުކަމެއް ނުދެއެވެ. އަދި އަމުދުން އަންހެން މުވައްޒަފުން ދައްކާ ވާހަކަތަކަށް ކަންފަތް ދިނުމަކީ އޭނަ ކުރާ ހިތްވާ ކަމެއް ނޫނެވެ.
ކޮންމެ ގޮތެއްވިޔަސް ރިސެޕްޝަނާއި ގާތްވަމުން ދިޔަހެން ޔާނާއާއި މިންނު ކޮންމެވެސް ފައިސާއެއްގެ ވާހަކަ ދައްކަމުން ދިޔަ އަޑު އިވުނެވެ.
“ދެން ކާކު މިތާ މީތި ބާއްވާނީ؟ ރިސެޕްޝަން ކުދިން އަހަންނަށް ދިން ހަދިޔާއެއް ކަމަށް އަހަރެން ހީކުރީ.” ޔާނާ ބުނި އަޑު އިވުނެވެ.
“ނޫން. އަހަރުމެން އެންމެން ވެގެން ވެސް ތިހާވަރު އެމައުންޓެއް ދެވޭ ވަރަށް ރިޗްއެއް ނޫން ދޯ؟ މިހާ ކުޑަ ވަގުތުކޮޅެއްގެ ތެރޭ…” މިންނު ބުންޏެވެ.
“ސޯ…ދާނިޝް ސާރ…” ޔާނާ އެހެން ބުނެލަމުން އިސްއުފުލާލި ވަގުތަކީ ރިސެޕްޝަން ހުރަސް ކުރަމުން ދިޔަ ދާނިޝް ޔާނާއަށް ފެނުނު ވަގުތެވެ. އިސާހިތަކު ޔާނާ ކުއްލި ގޮތަކަށް ގޮނޑިން ތެދުވެލިއެވެ.
“ދާނިޝް ސާރ!” ޔާނާ ގޮވާލި އަޑަށް ދާނިޝް ފިޔަވަޅުތައް މަޑުޖައްސާލަމުން އެދިމާލަށް ބަލާލިއެވެ.
“ޔެސް؟” ދާނިޝް އެދިމާލަށް އެއްކޮށް އެނބުރިލަމުން އެހިއެވެ. އެހިނދު ޔާނާ ރޮވިފައި ހުރިކަން ފާހަގަވިއެވެ. އެހިނދު ކަންބޮޑުވިއެވެ. އޮފީހުގައި މައްސަލައެއް ދިމާވެގެން އުޅޭކަމަށް ހީކުރެވުނެވެ.
“މިއީ…..ސާރ އަޅުގަނޑަށް ދިން އެއްޗެއް ދެއްތޯ؟ ތެންކިއު ސޯ މަޗް ސާރ!” ޔާނާ ކަރުނުން ފުރިފައިވި ލޮލާއިއެކީ އަތުގައި އޮތް ހުދުކުލައިގެ ސިޓީ އުރަ ދައްކަމުން އެހިއެވެ. ސިޓީ އުރައިގެ ބޭރުގައި ލިޔެވިފައިވީ ‘ފޯ ޔާނާ. މަސްޓް ބީ އޮޕެންޑް ބާއި ޔާނާ އޮންލީ’ އެވެ. އެ ލިޔުމަށްފަހު ސިޓީ އުރައިގެ ކަނުގައި ކުރަހާލެވިފައި ހުރި ތަންކޮޅު ދާނިޝްއަށް ފާހަގަ ކުރެވުނެވެ. އެއާއިއެކު އެއީ މިއަދު ހަވީރު ހިލްޔާ އޭނަ އަތުން ހޯދި ސިޓީ އުރަކަން ޔަޤީން ކުރެވުނެވެ.
“ސާރ ދިން އެއްޗެއް ނޫން ތިއީ. ތިއީ ކޯޗެއް؟” ދާނިޝް ނުހަނު އެނގެން ބޭނުންވެފައި ސުވާލު ކުރިއެވެ.
“މިއީ ފައިސާ. އަޅުގަނޑުގެ ކޮއްކޮގެ ޓްރީޓްމެންޓަށް. ޓްރީޓްމެންޓް ނަގަން ރެކޮމެންޑް ކުރާ ހޮސްޕިޓަލް ވެސް ލިޔެފަ އެބައޮތް.” ޔާނާ ކިޔައިދިނެވެ.
“އެހެންތަ؟ ޔާނާ ގެ ކޮއްކޮ ބަލިވެތަ އުޅެނީ؟ ނުދެނަހުރިން.” ދާނިޝްއަށް ތެދުތެދަށް ބުނެވުނެވެ.
“ލައްބަ ބަލި. ކުރީ ދުވަހު ޑޮކްޓަރ ހިލްޔާ މަގުމަތިން ސަލާމަތް ކުރީ އަޅުގަނޑުގެ ކޮއްކޮ. ކް…ކެންސާރ ޕޭޝަންޓެއް އެއީ. ބޭރަށް ގެންދަން ޖެހެނީ. އަޅުގަނޑު ހީކުރީ ސާރ އަޅުގަނޑަށް ހެލްޕެއް ވެދިނީ ކަމަށް.” ޔާނާ ދެންވެސް ތަކުރާރުކޮށް ބުންޏެވެ.
އެހިނދު ދާނިޝްއަށް ތުންފިއްތާލެވުނެއްކަމަކު އެ ތުންފަތްމައްޗަށް ލުއި ހިނިތުންވުމެއް ވެރިވިއެވެ. ހިލްޔާގެ ދީލަތިކަން އެނގުންވުމުންނެވެ. އަދި އެ ދީލަތިކަން ފޯރުކޮށްދިން ގޮތުގެ ރީތިކަން ވެސް އިޙްސާސް ކުރެވުމުންނެވެ. ޔާނާއަކީ އޭނަގެ ހާޒިރީގައި ވެސް ހިލްޔާއަށް ބަދުބަސް ބުނެފައިވާ ކުއްޖެކެވެ. އެހެނަސް ހިލްޔާ މިވަނީ މި ކުއްޖާއަށް އެހީވެފައެވެ. ހިލްޔާ ކިތަންމެ ބޭނުމެއް ނުވިޔަސް ދާނިޝް ޔާނާއަށް މި ވާހަކަ އަންގަން ބޭނުންވިއެވެ. ޔާނާއަށް ފިލާވަޅަކަށްޓަކައެވެ.
“ތިއީ ސާރ ވެ ދިން ހެލްޕެއް ނޫން. ތިއީ އަނެއްކާވެސް ޑޮކްޓަރ ހިލްޔާ ޔާނާގެ ކޮއްކޮއަށް ތި އެހީވެދިނީ.” ދާނިޝް ބުނެލިއެވެ. އެއާއިއެކު ޔާނާއާއި މިންނުގެ ވެސް ލޯ ބޮޑުވިއެވެ.
“ޑޮކްޓަރ ހިލްޔާ؟!” އެ ދެ މީހުން އެކުއެކީ ކަހަލަ ގޮތަކަށް ބުންޏެވެ. އެއާއިއެކު ދާނިޝް ބޯޖަހާލިއެވެ.
“ޔެސް…ޑޮކްޓަރ ހިލްޔާ. އަޅުގަނޑަށް ވެސް ސިއްރުން ޑޮކްޓަރ ހިލްޔާ ކުރި ކަމެއް ތިއީ. އަޅުގަނޑަށް އެނގުނީ ހުސް ސިޓީ އުރައެއް ޑޮކްޓަރ ހިލްޔާ އަޅުގަނޑު އަތުން މިއަދު ހޯދާފައި ވާތީ. އަޅުގަނޑު މި ވާހަކަ ޔާނާ ގާތު ދެއްކިކަން ނޭންގުން އެދެން. ޑޮކްޓަރ ހިލްޔާ އެކަމާއިމެދު ނުރުހުންވާނެހެން ހީވަނީ. އެކަމަކު މިއަދަށްފަހު ޔާނާމެން ޑޮކްޓަރ ހިލްޔާއާއި މެދު ރަނގަޅަށް ހިތާނެ ކަމަށް އުއްމީދު ކުރަން.”
ދާނިޝް ވާހަކަ ދެއްކި ދެއްކިހެން ޔާނާ ކަރުނުން ފުރިފައިވި ލޮލާއިއެކީ ހުއްޓުން އަރާފައި ހުއްޓެވެ. ދާނިޝް އިތުރު އެއްޗެކޭ ނުބުނެ އެތަނުން ދާން ހިނގައިގަތުމުން ޔާނާއަށް ކުރު ނޭވައެއް ދޫކޮށްލެވުނެވެ. އަދި އޭގެ ދެވަނަ ސިކުންތުގައި ގޮނޑީގައި އިށީނދެވުނެވެ.
“ޑޮކްޓަރ…ހިލްޔާ. އެކަމަކު ކީއްވެ؟ އަހަރެން….ހާދަ ގޯސް ކޮށޭ ޑޮކްޓަރ ހިލްޔާއާއިމެދު ވާހަކަ ދެއްކީ. އެންޑް ޝީ ހާޑް އިޓް. ޝީ ހާޑް އިޓް! ވަރަށް ގިނަ ދުވަސް މަތިން.” ޔާނާ އަތުގައި އޮތް ސިޓީ އުރައަށް ބަލަން އިނދެ އެހެން ބުނި ހިނދު ލޮލުން ފައިބައިގެން އައި ކަރުނައެއް އެ ސިޓީ އުރައިގައި ގޮސް ޖެހުނެވެ.
“ޝީ އިޒް ވެރީ ކައިންޑް ދޯ؟ އަހަންނަށް ހީކުރެވުނު ވަރަށް ވުރެ ވެސް ކައިންޑް. ހަމަ ބޮސް ގޮތަށް.” މިންނު ވެސް ގޮނޑީގައި އިށީންނަމުން ބުންޏެވެ.
އިރުކޮޅެއްގެ ހިމޭންކަމަށްފަހު ޔާނާ ކޯތާފަތުން ކަރުނަތައް ފޮހެލަމުން ވާހަކަ ދެއްކިއެވެ.
“އަހަރުމެން އެންމެ ފަހުން ހެދި ގްރޫޕަށް ޑޮކްޓަރ ހިލްޔާ އެޑް ކޮށްލަބަލަ. މިއަށްފަހު އެއްވެސް ސެލެބްރޭޝަން އަކުން އަހަރުމެން ޑޮކްޓަރ ހިލްޔާ ބާކީ ކޮށްގެން ނުވާނެ.” ޔާނާ ބުންޏެވެ. އެއާއިއެކު މިންނު ވެސް ބޯޖަހާލިއެވެ. އަދި ޔާނާ އެ ބުނި ގޮތަށް ކަން ކުރުމަށް ފޯނު ނެގިއެވެ.
ކޮންސަލްޓޭޝަން ރޫމުގައި އިން ހިލްޔާ މުސްކުޅި ބޭބެއަކު ބަލައި ފޮނުވާލި ވަގުތު މޭޒުމަތީގައި އޮތް ފޯނަށް ވައިބާރ ނޮޓިފިކޭޝަނެއް އައެވެ. ގްރޫޕަކަށް އޭނަ އެޑް ކުރެވުނު ވާހަކަ ފެނިފައި ހިލްޔާއަށް ވައިބާރ ހުޅުވާލެވުނެވެ. އެއާއިއެކު އެންމެ މަތިން އޭނަ ވައްދާލެވުނު ގްރޫޕް އޭނައަށް ފެނުނެވެ.
“ދާނިޝް ސާރ ފެއާރވެލް”
ގްރޫޕްގެ ނަން ހިލްޔާއަށް ހިތުން ކިޔާލެވުނެވެ. އޭގެ ދެވަނަ ސިކުންތުގައި ގްރޫޕް ހުޅުވާލަމުން މައްޗަށް ސްކްރޯލް ކުރުމަށްފަހު ގްރޫޕަށް އެންމެ ފުރަތަމަ އައިސްފައިވާ މެސެޖަށް ދިޔައެވެ.
“ޑިއާރ އޯލް. ދާނިޝް ސާރ 15 ފެބްރުއަރީގަ ފުރަން އުޅޭކަން ކޮންފާމްވެއްޖެ. ދެ ހަފްތާ ތެރޭ ފުރަން އުޅޭތީ ދާނިޝް ސާރއަށް ފެއާރވެލް ޕާޓީއެއް ރޭވުން ކިހިނެއް ވާނީ؟ ޕްލީޒް ޝެއާރ ޔުއާރ އައިޑިއާސް ފޯ ދިސް.”
ޔާނާ ލިޔެފައިވި އެ މެސެޖަށް އެތައް ބައެއްގެ ރިޕްލައިތައް އައިސްފައިވިއެވެ. ދާނިޝްއަށްޓަކައި ކަމެއް ރާވަން އުޅޭތީ ހިލްޔާ އުފާވިއެއްކަމަކު، ދާނިޝް ދާން އުޅޭތީ ހިތުގެ ކަނެއްގައި ހިތާމަވެރިކަން ވިއެވެ. ދާނިޝް ދެން ދުވަހަކުވެސް އޭނައަށް ނުފެންނާނެ ހިސާބަކަށް ދަނީތޯ ހިތަށްއެރިއެވެ.
ނުނިމޭ
