ނަފްސީ (ފަންސާސްހަތްވަނަ ބައި)

ނަފްސީ (ފަންސާސް ހަތްވަނަ ބައި)

އޭގެ އަނެއް ދުވަހަކީ ހުކުރު ދުވަހަށް ވިޔަސް ހިލްޔާއަށް އާދައިގެ މަތިން ދުވަސް ފެށިގެން ދިޔައީ ފަތިހު 4 ކުންނެވެ. އާދައިގެ މަތިން ހޭލައި ދަތް އުނގުޅައި ވުޟޫ ކުރަމުން ދިޔައިރު ވެސް އެ ދުވަހު ހިތަށް އުދަގޫވަމުން ދިޔައެވެ. އެ ހިތަށް ތަކުރާރުކޮށް ވެރިވަމުން ދިޔަ ޚިޔާލުންނެވެ. ދާނިޝް އޭނައާއި ދުރަށް ދާން އުޅޭ ކަމުގެ ޚިޔާލެވެ.

ނަމާދު ތެރެއިން ވެސް ދާނިޝް ގެ ސޫރަ ލޮލަށް ސިފަވެ، ދާނިޝް އޭނަ ގާތު ދައްކާފައިވާ ވާހަކަތައް ހަނދާންވަމުން ދިޔަ ގޮތުން އަމިއްލަ ނަފްސަށް ނުރުހުންވިއެވެ. އެ ނަފްސު ހެއްދެވި ވެރި ރައްބު މަތިން ހަނދާން ނައްތާނުލުމަށް ނަފްސަށް ހަނދާން ކޮށްދިނެވެ. އަދި އެ ހިތަށް އިޙްސާސް ކުރުމުގެ ޤާބިލުކަން ދެއްވި ﷲ އަށް ޙައްޤުވާ ޤަދަރު ދިނުމަށް ހިތަށް ހަނދާން ކޮށްދެވުނެވެ.

ކޮންމެ ގޮތެއްވިޔަސް ނަމާދު ތެރެއިން ދާނިޝްއާއި މެދު ހަނދާންވަމުން ދިޔައީތީ ދާނިޝްއަށްޓަކައި ދުޢާ ކުރެވުނެވެ. މާ ބޮޑު ވިސްނުމެއްނެތި ހިލްޔާއަށް ދާނިޝްއަށްޓަކައި ކުރެވުނުހާ ވެސް ދުޢާއަކީ ދާނިޝް ކޮންމެ ތަނެއްގައި ވިޔަސް އުފަލުގައި ލެއްވުމަށެވެ. އަދި ﷲ ރުހިވޮޑިގެންވާ ފަދަ އުޅުމެއް ދާނިޝްއަށް މިންވަރު ކުރެއްވުމަށް އެދިއެވެ. ދާނިޝްއަށް މިހާ ހެޔޮ އެދެވޭތީ ޚުދު ހިލްޔާ ވެސް ޙައިރާންވިއެވެ. މީގެ ކުރިން ދުވަހަކުވެސް މިހާ އިޚްލާޞްތެރިކަމާއެކީ އަމިއްލަ އެދުމެއްނެތި، ޞައްޙަ ސަލާމަތުން ހުރި ހިލޭ ފިރިހެނަކަށްޓަކައި ދުޢާއެއް ނުކުރެވެއެވެ.

ފަތިސް ނަމާދަށް 2 މިނެޓަށް ވީ ހިނދު ދަމުނަމާދުގެ 5 ވަނައަށް ކުރި ދެ ރަކުޢަތް ނިމުމުން، ހިލްޔާ އިތުރު ރަކުޢަތެއް ނުކޮށް މުސައްލަ މަތީގައި އިނެވެ. އެހިނދު ވެސް މެދުކެނޑުމެއްނެތި ވިސްނުނީ ދާނިޝް އާއި މެދުގައެވެ. ލާނާގެ ފިރިމީހާ ދާނިޝް ގާތު އޭނަގެ ވާހަކަ ދައްކާފައިވާކަން މީގެ ދުވަސްކޮޅެއް ކުރިން އޭނައަށް އެނގިފައިވެއެވެ. ދާނިޝް އޭނައާއި ކައިވެނި ކުރުމާއިމެދު އެއްބަސްވީ ވާހަކައާއި، އެކަމާއި ‘އުޅެލާނެ’ ކަމަށް ބުނި ވާހަކަ ހިލްޔާއަށް އިވިފައިވެއެވެ.

ހިލްޔާ އެ ވާހަކަ އިވުނު ދުވަހު ލަދުރަކިވިއެވެ. ދާނިޝް މާ ގިނަ ދުވަހެއް ނުވެ އޭނަ ކުރެން ކައިވެންޏަށް އެދޭނެ ކަމަށް ހިލްޔާ ހީކުރިއެވެ. ދާނިޝް އެދުނަސް އޭނައަށް އެކަމާއިމެދު ވިސްނަން ވަގުތު ބޭނުންވާނެކަން އެނގުނަސް، ދާނިޝް އޭނަގެ ގާތަށް އައުމުގެ ޚިޔާލުން ހިތަށް އުފަލެއް ލިބިފައިވިއެވެ.

އެހެނަސް ވޭތުވެ ދިޔަ ދުވަސްތަކުގައި ދާނިޝް ގެ ފަރާތުން އެފަދަ އެއްވެސް ޢިޝާރާތެއް ނުފެނުމުން، ދާނިޝް ބުނި ބަސްތަކާއިމެދު ހިލްޔާގެ ނަޒަރިއްޔާތު ބަދަލުވިއެވެ. ދާނިޝް ނަޖާހު ގާތު އެހެން ބުނީ ސަމާސާއެއް ކޮށްލާށޭ ހިތަށްއެރިއެވެ. ދާނިޝް ކޮންމެހެން އޭނަގެ ގާތަށް އަންނާކަށް ނުއުޅެއެވެ. އޭނައަށްވުރެ މާ ރަނގަޅު އަންހެން ކުއްޖަކު ވެސް ދާނިޝްއަށް ލިބިދާނެ ނޫން ހެއްޔެވެ؟ ދާނިޝްއަށް ޙައްޤުވަނީ ހުރިހާ ގޮތަކުން ވެސް ޤަދަރުވެރި އަންހެން ކުއްޖެކެވެ. ހުތުރު މާޒީއެއްގެ ކިލަނބުކަން ތަޙައްމަލުކުރަން ޖެހިފައިވާ ކުއްޖެއް ނޫނެވެ. ދާނިޝްއަށް އޭނަ ކަމުދާނެ ކަމަށް އޭނަ ހީކުރީ ވެސް ކިހިނެއް ހެއްޔެވެ؟ ބޭރުގައި އުޅެ ބޮޑުވެފައިވާ ދާނިޝްއަށް ބޭރުން ވެސް ކުއްޖެއް ލިބިދާނެ ނޫން ހެއްޔެވެ؟ އޭނަ ބަހައްޓާފައި ބޭރަށް ދާން އުޅެނީ ނަޖާހަށް ވެސް ނޭނގި، ދާނިޝްއަށް ކަމުދާ ކުއްޖެއް ބޭރުގައި ހުރީތީ ކަމަށްވެސް ވެދާނެ ނޫން ހެއްޔެވެ؟

ފަތިސް ނަމާދަށް ބަންގި ގޮވީ، ހިލްޔާ އެ ޚިޔާލުތަކުގައި ވަނިކޮށެވެ. ފުރަތަމަ އިވިގެން ދިޔަ ތަކުބީރާއިއެކު ހިލްޔާ ތަކުބީރުގެ ފަހަތުން ކިޔައި ހުރިހާ ސަމާލުކަމެއް ބަންގިއަށް ދިނެވެ.

ފަތިސް ނަމާދަށްފަހު މިފަހުގެ އާދައިގެ މަތިން ހިލްޔާ އެ ގަޑީގައި ޤުރުއާން ހިތުދަސް ކުރަން ފެށިއެވެ. ހިލްޔާ ކުރިން ދަސްކޮށްފައިވާ ސޫރަތްތައް ހީކުރި ވަރަށްވުރެ ވެސް އަވަހަށް އަނބުރާ ހަނދާނަށް ގެނެވުނެވެ. އެހެންކަމުން ހިލްޔާ ދެން ދަސްކުރަން ފެށީ، މިފަހުން އޭނަގެ ހިތަށް އަސަރު ކުރި އާޔަތްތައް ހިމެނޭ ސޫރަތްތަކެވެ. މުޅި ޤުރުއާން ހިތުދަސް ކުރުމުގެ ޚިޔާލެއް އޭރުވެސް ނެތެވެ.

އިރުއެރުމުން އިރުކޮޅެއް ވަންދެން ޤުރުއާން މުރާޖަޢާ ކުރަން އިނދެފައި ހިލްޔާ ތެދުވެލަމުން ޟުޙާ ނަމާދު ކުރިއެވެ. އެއަށްފަހު އަނެއްކާވެސް މުސައްލަ މަތިން ތެދުވުމުން ދާނިޝް މަތިން ހަނދާންވާން ފެށިއެވެ. މުސައްލަ ފަށްޖަހައި ކަބަޑަށް ވެސް ނުލެވެނީސް ބެލްކަންޏަށް ނިކުމެވޭ ފަރުދާ ކުރެވިފައިވާ ދޮރާއި ދިމާލަށް ބަލާލެވުނެވެ.

އޭގެ އިރުކޮޅެއް ފަހުން ހިލްޔާ ކަނޑު ނޫކުލައިގެ އަބާޔާއެއް ކުރުތާގެ މަތިން ލައި، ބޮޑު ގޮތަކަށް ހަމަ އެ ކުލައިގެ ޝޯލްއެއް އެޅިއެވެ. އެއަށްފަހު ބެލްކަނީގެ ދޮރު ކަހާލަމުން ބެލްކަންޏަށް ނިކުތެވެ. ލަސް ހިނގުމެއްގައި ގޮސް ރެއިލިންގް ގައި އަތް އަޅުވާލަމުން ހިލްޔާ ދާނިޝްގެ ބެލްކަންޏަށް ނަޒަރު ހުއްޓައިގެން ހުއްޓެވެ. އޭނަ އެހެން ހުރީ ކޮންމެހެން ދާނިޝްގެ ބެލްކަންޏަށް ބަލަން ނޫންކަމަށާއި، ދުވަހުގެ އެވަގުތުގެ ތާޒާ ވައި ހޯދަން ކަމަށް އަމިއްލަ ނަފްސު ގާތު ބުނެވުނެވެ. އެހެނަސް ހިލްޔާގެ ނަޒަރު އެންމެ ފަހަރަކުވެސް ދާނިޝްގެ ބެލްކަނިން ދުރަށް ނުދެއެވެ.

ދާނިޝްގެ ބެލްކަނީގައި ހުރި ގަސްތަކަށް ބަލަހައްޓައިގެން ހުރިހުރިހެން އެއްގަހުގައި ރަތް ކުލައިގެ މޭވާއެއް އަޅާފައި ހުރިތަން ފެނުނެވެ. އެއާއިއެކު އެއީ ކޯޗެއްތޯ ހިލްޔާގެ ހިތަށްއެރިއެވެ. ޗެރީ ޓޮމާޓޯ ހެއްޔެވެ؟ ނޫނީ ހުތް ކުންނާރު ހެއްޔެވެ؟ ދުރުން ބަލާފައި ޔަޤީނެއް ނުކުރެވުނެވެ.

ދެލޯ ހަނިކޮށްގެން ބަލަން ހުރެފައި ޚިޔާލެއް ލިބުމުން ހިލްޔާ އަތުގައި އޮތް ފޯނު ހިއްލާލަމުން ކެމެރާ ހުޅުވާލިއެވެ. އެއަށްފަހު އެ ގަސްތަކާއި ދިމާލަށް ކެމެރާ ދިއްކޮށްލަމުން ޒޫމް ކޮށްލައިފިއެވެ. އަދި ނުހަނު ފަރުވާތެރިކަމާއިއެކީ އެ ރަތް ކުލައިގެ މޭވާއަށް ބަލަން ފެށިއެވެ. އެއީ ޗެރީ ޓޮމާޓޯ ކަން ޔަޤީން ކުރެވުނު ވަގުތު އެހެން ގަސްތަކަށް ވެސް ބެލުމަށް ފޯނު އެހެން ދިމާލަކަށް ދިއްކުރަން ހިލްޔާ އުޅުނެވެ. އެހިނދު ސްކްރީނުން ނުހަނު ގާތުން ފެނިގެން ދިޔައީ ފިރިހެނެއްގެ ގަޔަށް ހިފިފައިވާ ކަޅުކުލައިގެ ޓީޝާޓެކެވެ. އޭގެ ދެވަނަ ސިކުންތުގައި ފޯނު ދުރުކުރަން އުޅުނު ވަގުތު ހަމަ އެހާ ގާތުން ސްކްރީނުން ދާނިޝް ގެ ސޫރަ ފެނިގެން ދިޔުމުން ހިލްޔާ ސިއްސައިގެން ދިޔައެވެ. އެހިނދު އަތުގައި އޮތް ފޯނު މައްޗަށް އުކިގެން ދިޔުމުން ހާސްކަމާއެކީ ދެ އަތުން ފޯނު ހިފަހައްޓާލަމުން މޭގައި ޖައްސާލެވުނެވެ.

ކުރިމަތިން ފެންނަމުން ދިޔަ ބެލްކަންޏަށް ނިކުމެފައި ހުރި ދާނިޝްއަށް ބަލާލެވުނީ ދެނެވެ. ރެއިލިންގް ގައި އަތް އަޅުވައިގެން ހުރި ދާނިޝްއަށް ހެވެމުން ދިޔަ މަންޒަރު ފެނި ހިލްޔާ ލަދުން ހަލާކުވާ ވަރު ވިއެވެ. ދެންމެ އޭނައަށް ވީހާ ގޮތެއް ދާނިޝްއަށް ފެނިއްޖެކަން ޔަޤީން ކުރެވުނެވެ. ދާނިޝް ހީކުރާނީ އޭނަ ދެންމެ ކެމެރާ ދިއްކޮށްގެން ހުރީ ދާނިޝްގެ ފޮޓޯ ނަގަން ކަމަށް ހެއްޔެވެ؟

އެ ޚިޔާލުން ދެލޯ މަރައި ތަގުޅި ކޮށްލަމުން ހިލްޔާއަށް ވަގުތުން ދާނިޝްއަށް ފަސްދެވުނެވެ. އަދި ދިގު ފިޔަވަޅުތަކެއްގައި ކޮޓަރިއަށް ވަން ގޮތަށް ގޮސް ބެލްކަންޏަށް ނިކުމެވޭ ދޮރު ލައްޕާލަމުން ފަރުދާ ވެސް ދަމާލިއެވެ.

ހިލްޔާއަށް ވަމުން ދިޔަ ގޮތް ބަލަން އަމިއްލަ ބެލްކަނީގައި ހުރި ދާނިޝް، ހިލްޔާ ލޯމައްޗަށް ގެއްލުނު ހިނދު މާޔޫސްވާ ގޮތްވިއެވެ. ހުނުން މަޑުކޮށްލެވުނީ ވެސް އެހިނދެވެ. އެހެނަސް ދެންވެސް ހިނިތުންވުމެއްގައި ހުރެވުނެވެ.

ހިލްޔާއަށް ހީވީ ރަނގަޅަކަށް ނޫނެވެ. ދާނިޝް ދެންމެ ބެލްކަންޏަށް ނިކުތް ވަގުތު، ހިލްޔާގެ ފޯނު ކެމެރާ އެ ދިމާލަށް އަމާޒުވެފައިވި ގޮތުން އޭނައަށް ފުރަތަމަ ލިބުނީ ޙައިރާންކަމެކެވެ. ރެއިލިންގް ގެ ކައިރިއަށް ދެވުނީ ހިލްޔާ އެ ކުރަނީ ކީއްކަން ޔަޤީން ކޮށްލުމަށެވެ. ހިލްޔާގެ ނަޒަރު އަމާޒުވެފައިވި ދިމާލުން އެ ބަލަނީ ގަސްތަކަށް ކަން ދާނިޝްއަށް ޔަޤީނާއި ގާތް ކުރެވުނެވެ. ރެއިލިންގް ގައި ގޮސް އަތް އަޅުވާލީ ހިލްޔާ އެ ނަގާ ފޮޓޯއެއް ނަގައި ނިމުމުން ހިލްޔާއަށް ހަނާ އަޅާލުމަށެވެ.

އެހެނަސް ކަން ވެގެން ދިޔައީ ދާނިޝް ހީކުރި ވަރަށްވުރެ މަޖާ ގޮތަކަށެވެ. ހިލްޔާ ސިއްސައިގެން ދިޔުމުން ދާނިޝް ފުރަތަމަ ވީ ޙައިރާނެވެ. އެހެނަސް އޭނަ ހުރި ދިމާލުން ހިލްޔާގެ ކެމެރާއަށް އަރާނެކަން ޔަޤީން ކުރެވުނެވެ. ހެވެން ފެށީ ކަން ވީ ގޮތް އެނގުމުންނެވެ. ހިލްޔާ އެތާ ނުހުރެ ދާން ފެށީ ލަދުން ކަން ވެސް އެނގުންވިއެވެ.

ހިލްޔާ ދިޔުމުން ވެސް އިރުކޮޅެއް ވަންދެން އެ ބެލްކަންޏަށް ބަލަން ހުރެފައި ދާނިޝް އެ ރެއިލިންގްގައި ހުރި ޓޮމާޓޯ ގަހަށް ބެލިއެވެ. އެއަށްފަހު އޭގެ ތެރެއިން އެންމެ ދޮންވެފައި ހުރި ޓޮމާޓޯތައް ބިންނަން ފެށިއެވެ. ޓޮމާޓޯތަކަށް ފަހު ލުނބޯ ގަހުން ބައެއް ލުނބޯ ވެސް ބިނދެލިއެވެ. އަދި ބެލްކަނީގެ ތެރޭގައި ހުރި ގަސްތަކުން ވެސް ބައެއް އެއްޗެހި ބިނދެލުމަށްފަހު ދޮވެލަމުން، ކޮތަޅަކަށް އެޅިއެވެ.

**

ހިލްޔާ އެދުވަހުގެ ނާސްތާ ތައްޔާރު ކުރަމުން ދިޔަ ވަގުތު ވެސް މިއަދު ހެނދުނު ހެނދުނާ ކަންވީ ގޮތުން ދެލޯ މަރައި ތަގުޅިކޮށް ބޯ ހޫރުވެމުން ދިޔައެވެ. ދާނިޝް މިހާރު އޭނައާއިމެދު ދެކޭނީ ކިހިނެއްތޯ ހިތަށްއަރަމުން ދިޔައެވެ. އޭގެ ދެވަނަ ސިކުންތުގައި ދާނިޝް އުޅެނީ ދާންކަމަށް ހިތް ބުނެއެވެ. އެހެންވީއިރު ދާނިޝްގެ ނަޒަރިއްޔާތާއިމެދު އޭނަ ވިސްނަން ނުޖެހޭ ކަމަށް ސިކުނޑި ބުނެއެވެ. އެހެނަސް ދާނިޝް ދާން އުޅޭ ކަމުގެ ޚިޔާލުން ހިތް ދެރަވެސް ވަމުން ދިޔައެވެ.

އެ ޚިޔާލުތަކުން ހިލްޔާއަށް ދުރުވެވުނީ ނާސްތާގެ ތެރެއިން ބައްޕަ ނުހަނު މުހިއްމު ވާހަކައެއް އެންމެން ގާތު ބުނުމުންނެވެ.

“މަމްނޫން އަންނާނެ. މިއަދު ހަވީރު.” ބައްޕަ ކުރު ގޮތަކަށް އެހެން ބުނުމާއިއެކު ހަމްރާގެ އިތުރުން ހިލްޔާއާއި އެލީ ވެސް ހުއްޓުން އަރާ ގޮތްވިއެވެ. އޭގެ ދެވަނަ ސިކުންތުގައި ހިލްޔާއާއި އެލީގެ ނަޒަރު ހަމްރާއަށް އަމާޒުވިއެވެ.

“މަމްނޫން….ތި ބުނީ ހަމްރާ އާއި އިންނަން ބޭނުންވެގެން އުޅޭ ސޮރު ދޯ؟” ހާފިޒާ އެހިއެވެ.

“ހުމް….ބައްޕަ އެކުއްޖާއާއި ބެހޭގޮތުން ވަރަށް ހޯދައިފިން ހަމްރާ ކަނބުލޮ. ވަރަށް ރަނގަޅު ޢާއިލާއެއްގެ ރަނގަޅު ކުއްޖެއް އެއީ. ދަރިފުޅު އޭނައާއި މެދު ހިތްހަމަޖެހެންޏާ ބައްޕަގެ އެއްވެސް އިއުތިރާޒެއް ނެތް މަމްނޫން އާއި ދަރިފުޅު އިނުމަށް.” ނަހީދު ލުއި ހިނިތުންވުމަކާއިއެކީ ބުންޏެވެ.

އެހިނދު ނުތަނަވަސްކަމާއިއެކީ ހިތް ތެޅެމުން ދިޔަ ހަމްރާގެ މޫނުމައްޗަށް ވެސް ހިނިތުންވުމެއް ވެރިވީ ހިނދު ހިލްޔާއަށް ވެސް ހިނިތުންވެލެވުނެވެ.

“އައި ނޯ ރައިޓް ބައްޕާ! އަހަރެން ވެސް ކުޑަކޮށް ސްޓޯކް ކޮށްލިއިރު އެނގުނު ހީ އިޒް ގުޑް ވައިބްސް ކަން. ދޮންތައާއި ވަރަށް ގުޅޭނެހެން ހީވަނީ. އެކަމަކު ދެން ދިމާވީމަ އައި ވިލް ގިވް މައި ޖަޖްމެންޓް.” އެލީ ދެއްކި ވާހަކައާއިއެކު އެތާ ތިބި އެންމެންނަށް ހެވޭ ގޮތްވިއެވެ.

ނާސްތާ ނިމެންދެން ވެސް ދެން ދެކެވުނީ ހަމްރާގެ ކައިވެނީގެ ވާހަކައެވެ. މަމްނޫން އައުމުން ކުރާނެ މުހިއްމު ސުވާލުތަކުގެ ޚިޔާލުތައް އެންމެން ވެސް ހަމްރާއަށް ދިނެވެ. އަދި އުފާވެރި ކައިވެންޏެއްގެ އުއްމީދު ވެސް އެންމެން ޙިއްސާ ކުރިއެވެ.

ކައިވެނީގެ ވާހަކަ ދެއްކި ދެއްކިހެން ހިލްޔާ މުޅިން ވެސް ހަނދާންވީ ދާނިޝް މަތިންނެވެ. ނޭނގޭ ސަބަބަކާހުރެ ދާނިޝް އޭނައާއި އެފަދައިން ބައްދަލު ކުރަން އަންނާނެ ނަމައޭ ހިތަށް އަރަމުން ދިޔައެވެ. އެހެނަސް އެއީ ޙަޤީޤަތަކަށް ނުވާނެ ހުވަފެނެއް ކަމަށް ހިތުގެ ކަނަކުން ގޮވިއެވެ. ދާނިޝް އެ އުޅެނީ ބޭރަށް ފުރާށެވެ. އޭނަ ގާތު ބުނުމެއް ވެސް ނެތިއެވެ. އޭނަ ދާނިޝް މުހިއްމު ވި ނަމަ ދާނިޝް އޭނަ ގާތު ކުޑަ މިނުން އެ ވާހަކަ ބުނާނެ ނޫން ހެއްޔެވެ؟

ދާނިޝްއާއި އޭނަގެ ގުޅުމެއް އޮންނާނެކަން ޔަޤީން ނުކުރެވުނަސް އެ ޝަކުވާ ހިލްޔާގެ ހިތު ތެރޭގައި ހަރުލިއެވެ. ނަތީޖާއެއްގެ ގޮތުން އެންމެން ސައިބޮއި ނިމުނުއިރު ވެސް ހިލްޔާއަށް އެކަމާއިމެދު ވިސްނަން އިނދެވުނެވެ. އެންމެ ފަހުން އިން ބައްޕަ ވެސް ކޮފީ ތަށި ހުސްކޮށްލުމަށްފަހު ދާން އުޅުނު ވަގުތު ހިލްޔާއަށް ބައްޕަގެ ނަމުން ގޮވާލެވުނެވެ.

“ކީކޭ ދަރިފުޅު؟” މޭޒުގެ ކޮޅުގައި ހުރި ނަހީދު ގޮނޑިން ތެދުވަން އުޅެފައި ވެސް ހުރިހާ ސަމާލުކަމެއް ހިލްޔާއަށް ދިނެވެ.

“ދާނިޝް…އުޅެނީ ފުރަންތަ؟” ހިލްޔާއަށް އެއްދިމާލަކަށް ނަޒަރު ހުއްޓައިގެން އިނދެ އަހާލެވުނެވެ.

“އެބަ ބުނޭ އަނެއްކާވެސް 2 ވީކްސް ފަހުން އެބަ ފުރަމޭ. އެ 2 ވީކްސް އަކަށް ނިމުމެއް ނާދޭ.” ނަހީދު ހިސާބެއްގެ ހިނިތުންވުމެއްގައި އިނދެ ޖަވާބު ދިނެވެ. ހިލްޔާ ދާނިޝްއާއިމެދު ޝައުޤުވެރިވާހެން ހީވުމުން އުފަލެއް ލިބުނެވެ.

“ނޫން ކޮންމެވެސް ސްޓާފެއް ބުނީ މިހާރު ކޮންފާމްއޭ. 15 ފެބްރުއަރީ ގަ ފުރަން އުޅޭކަން. އަސްލު…..ހުރިހާ ސްޓާފުންނަށް އެއްވަރަކަށް އަންގާފަ އޮންނަންވާނީ ދޯ އެކަހަލަ ވާހަކައެއް؟ އަދި ހައި ޕޯސްޓެއްގަ ހުންނަ މީހަކު؟” ހިލްޔާއަށް ހަމަ އެއްވެސް އިޚްތިޔާރަކާއި ނުލާ ޝަކުވާ ކުރެވުނު ގޮތުން ޚުދު އޭނަ ވެސް ޙައިރާންވިއެވެ.

“ހުރިހާ އެންމެން ގާތު ނުބުނޭތަ؟” ނަހީދަށް އަހާލެވުނެވެ.

“ނުބުނޭ. އަހަރެން ގާތު ނުބުނޭ. އެހެން މީހެއްގެ ފަރާތުން އަހަންނަށް އެނގުނީ. ސޯ އަންފެއާރ!” ހިލްޔާއަށް ބުނެވުނެވެ.

އެހިނދު ނަހީދުގެ ހިނިތުންވުން ފުންވިއެވެ. އޭނައަށް މި ހީވަނީ ރަނގަޅު ހީވުމެއް ކަމުގައި ލެއްވުމަށް އެދި ހިތާހިތުން ދުޢާ ކުރެވުނެވެ. ހިލްޔާ ގާތު ދާނިޝް އެ ވާހަކަ ބުނުން މުހިއްމީތޯ އަހަން ހިތަށް އެރިއެއްކަމަކު އޭގެ ޖަވާބު ޔަޤީން ކުރެވުނެވެ.

ނަހީދާއި ހިލްޔާއަށް ވެސް ވަކި އިތުރު އެއްޗެކޭ ނުބުނެވެނީސް ގޭގެ ބެލް އަޅުވާލެވުނު އަޑު އިވުނެވެ.

“ހާދަ ނުގަޑިއެއްގަ؟ ކާކު ބާ؟ ދާނިޝް ކަންނޭނގެ…” ނަހީދު އެ ފަހު ބަސްތައް ބުނެލީ ހިލްޔާއަށް ވާގޮތެއް ބެލުމަށެވެ. ހިލްޔާ އިސާހިތަކު ގޮނޑިން ތެދުވެލިއެވެ.

“ބައްޕަ ދޮރު ނުހުޅުވާތި އަހަރެން ކޮޓަރިއަށް ވަންނަން ދެން.” ހިލްޔާ އެހެން ބުނެ ދެވަނަ ޚިޔާލެއް ނެތި އޭނަގެ ތަށިތަކާއި ބައްޕަގެ ތަށިތައް ހިފައިގެން ގޮސް ސިންކަށް ލިއެވެ. އަދި ބަދިގެއިން ނިކުމެގެން މިޞްރާބު ޖެހީ ސިޓިންގް ރޫމުގައި ހުރި ސިޑިއާއި ދިމާލަށެވެ. އޭނަގެ ކޮޓަރިއަށް ދިޔުމަށެވެ. އެވަގުތު އޭނަ ހުރީ ބުރުގާ ވެސް ނާޅައި ހަރުވާޅު ހެދުމެއް ލައިގެން ކަމަށްވުމުން އެއްވެސް ހިލޭ ފިރިހެނެއްގެ ކުރިމައްޗަށް ދެވޭ ގޮތެއް ނެތެވެ. އެހެންނޫނަސް މިއަދު ހެނދުނު ކަންވެފައިވާ ގޮތުން އޭނަ ދާނިޝްގެ ކުރިމައްޗަށް ދާކަށް އެއްގޮތަކަށް ވެސް ބޭނުމެއް ނުވެއެވެ.

ހިލްޔާ ސިޑީގެ ފަހު ހަރުފަތް ގިރާ ކުރި ވަގުތަކީ ބައްޕަ ދޮރު ހުޅުވާލި ވަގުތެވެ. ހިލްޔާ އަވަސްއަވަހަށް ގޮސް ކޮޓަރިއަށް ވަދެ ދޮރު ލައްޕާލަން އުޅުނު ވަގުތު ބައްޕަ ‘ދާނިޝް’ އޭ ކިޔާލި އަޑު އިވުނެވެ. އެހިނދު އަވަހަށް ދޮރު ލައްޕާލަން އުޅުމުގެ ތެރޭގައި ދޮރު ލައްޕާލެވުނީ ވެސް ބާރު އަޑަކާއި އެކީގައެވެ.

ގޭގެ މައިދޮރު މަތީގައި ތިބި ދާނިޝްއާއި ނަހީދަށް އެދިމާލަށް ބަލާލެވުނީ އެހެންވެއެވެ. ލައްޕާލެވިފައިވި ދޮރަށް ބަލަން ހުރެފައި ދާނިޝްއަށް ސުވާލުގެ ނަޒަރަކުން ނަހީދުބެއަށް ބެލުނެވެ.

“ދާނިޝް ވަރަށް ބޮޑަށް ކުށްވެރިވެފަ ތިހިރީ އެބަ އިނގޭތަ؟” ނަހީދުބެ ލާނެތް ހިނިތުންވުމަކާއެކީ ބުނެލި ވާހަކައިން ހިނިތުންވާން އުޅެފައިވެސް ވާހަކަ ދެކެވުނެވެ.

“ކޮން ކަމަކާ؟” ކަންބޮޑުވުމަކާއެކީ ދާނިޝްއަށް އަހާލެވުނެވެ. އެހިނދު ނަހީދުބެ އެތެރެއަށް ހިނގައިގަތުމުން އަތުގައި އޮތް ކޮތަޅާއިއެކީ ދާނިޝްއަށް އެތެރެއަށް ވަދެވުނެވެ. އެހިނދު މައިދޮރު އަމިއްލައަށް ލެއްޕިގެން ދިޔައެވެ.

“ދާނިޝް ފުރަން އުޅޭ ވާހަކަ ބައެއް ސްޓާފުންނަށް އަންގާފަ އަނެއްބައި ސްޓާފުންނަށް ނޭންގީމަ.” ނަހީދުބެ ގޮސް އެތާހުރި ދިގު ސޯފާގައި އިށީނުމުން ދާނިޝް ވަކިން ހުރި ސޯފާގައި އިށީނދެ، އަތުގައި އޮތް ކޮތަޅު އެތާ މެދުގައި ހުރި މޭޒުމަތީގައި ބެހެއްޓިގައެވެ.

“މާ ގިނަ ބަޔަކަށް ނާންގަމޭ. އެސިސްޓެންޓް މެނޭޖާރ އިޙްސާން ގާތު ބުނީ. އިޙްސާން އެހެން މީހެއް ކައިރީގަ ބުނިއްޔާ ބުނީ.” ދާނިޝް ދެން ވެސް ނުހަނު ސީރިއަސްކަމާއިއެކީ ވާހަކަ ދެއްކިއެވެ.

“ކުއްޖަކު ތިކަމާ ގުޅިގެން ވަރަށް މައްސަލަ ޖައްސައިފި.” ނަހީދުބެ ލާނެތް ހިނިތުންވުމަކާއެކީ އެހެން ބުނުމުން ދާނިޝްގެ ސިކުނޑީގައި މީހަކު ކޮއްޓާލިހެން ހީވިއެވެ.

“ހިލްޔާ….ތަ؟” ދާނިޝްއަށް ފުންވެގެން ދިޔަ ހިނިތުންވުމަކާއެކީ އަހާލެވުނެވެ. އެއާއިއެކު ނަހީދުބެ ފުރިހަމަ ހިނިތުންވުމަކާއެކީ ބޯޖަހާލިއެވެ.

“ހައި ޕޯސްޓް ގަ އުޅޭ މީހުން އެހެން ހަދާކަށް ނުވާނެ ދޯ؟ ސޯ އަންފެއާރ!” ނަހީދުބެ އެހެން ބުނެލި ރާގުން އެއީ ހިލްޔާ ބުނެފައިވާނެ ގޮތްކަން އެނގުމުން ދާނިޝްއަށް ހެވުނެވެ.

“ހެހެ….އަސްލުވެސް އަންފެއާރ. ތި މައްސަލަ ޙައްލު ކުރަން އެބަޖެހޭ. ހިލްޔާއަށް…..ގޮވާލަދެވިދާނެތަ ބޭބޭ؟” ދާނިޝް ހިސާބެއްގެ ޖެހިލުންވުމަކާއެކީ އެހިއެވެ. ނަހީދުބެ ވަކި ދެކޮޅު ހެދުމެއް ނެތި އެބަ އަހާލަމޭ ބުނެ ފޯނު ނެގިއެވެ.

ކޮޓަރިއަށް ވަން ހިލްޔާ ކަޅުކުލައިގެ އަބަޔާއެއް ކުރުތާގެ މަތިން ލައި، ހަމަ ކަޅުކުލައިގެ ޝޯލްއެއް އެޅީ ބޭރަށް ދާން ޚިޔާލު ކުރަމުންނެވެ. އޭނަ މިއަދުގެ ހެނދުނުގެ ‘ޙާދިސާ’ ގެ ސަބަބުން ވަކި ދާނިޝްއަށް ފިލައިގެން އުޅެން ނުޖެހޭކަން އެހެން މީހަކަށް ވުރެ ބޮޑަށް އަމިއްލަ ނަފްސަށް ވިސްނައި ދިނުމަށެވެ. ދާނިޝް ހުއްޓަސް އޭނައަށް ސިޓިންގް ރޫމުން ލާފައި ގޮސް އަދި ބަދިގެއަށް ދެވިދާނެއެވެ. ބަދިގޭގައި އަދި ނުނިމި ހުރި މަސައްކަތް އެބަ ހުއްޓެވެ. އެދެމީހުންގެ ދެމެދުގައި އޮތް ބީރައްޓެހި ކަމުގެ ގުޅުމަކަށް ވަކި ބަދަލެއް ނާދެއެއް ނޫން ހެއްޔެވެ؟

އެހެނަސް ތައްޔާރުވުމަށްފަހު ކޮޓަރިން ބޭރަށް ދިޔުމުގެ ޚިޔާލާއި މެދު ވެސް ގަތް ލަދުން ގޮސް އެނދުމަތީގައި އިށީނދެވުނެވެ. އެ އިށީން ގޮތަށް އިންގޮތަށް އިނދެވުނީ ދާނިޝް ދަން ދެން ބޭރަށް ދިޔުމުގެ ޚިޔާލު ބަދަލުވަމުން ދާ ޙާލުގައެވެ. އެހެން އިންދާ ރީތިވާ މޭޒުމަތީގައި އޮތް ފޯނު ރިންގުވާން ފެށުމުން ހިލްޔާ ކުޑަކޮށް ސިހިގެން ދިޔައެވެ. އޭގެ ދެވަނަ ސިކުންތުގައި އެނދުން ތެދުވެގެން ގޮސް ފޯނު ނެގިއެވެ. ސްކްރީނުން ބައްޕަގެ ނަން ފެނިފައި ހިލްޔާ ކޯލު ރިސީވް ކުރިއެވެ.

“އައްސަލާމްޢަލައިކުމް ބައްޕާ.” ފޯނު ކަންފަތުގައި ޖައްސާލަމުން ހިލްޔާ ބުންޏެވެ.

“ވަޢަލައިކުމުއްސަލާމް. ހިލްޔާއަށް އިރުކޮޅަކަށް ސިޓިންގް ރޫމަށް އާދެވިދާނެތަ؟ ދާނިޝް ހިލްޔާ ގާތު އެއްޗެކޭ ބުނަން ބޭނުންވެގެން…” ބައްޕަ އެކޮޅުން ބުނެލި ވާހަކައިން ހިލްޔާގެ މެއަށް ފިނިވެގެން ދިޔަދިޔަހެން ހިތުގެ ތެޅުން އަވަސްވިއެވެ. ނޭވާ ވެސް ކުރުވެގެން ދިޔުމުގެ ސަބަބުން އެއްޗެކޭ ނުބުނެ އިރުކޮޅެއް ވަންދެން ހުރެވުނެވެ.

“މް…މި އަންނަނީ.” ހިސާބެއްގެ އުދަގުލާއިއެކީ ހިލްޔާއަށް ބުނެވުނެވެ.

ބައްޕަ އެކޮޅުން އޯކޭ ދީފައި ފޯނު ކަނޑާލުމުން ހިލްޔާއަށް ވެސް ފޯނު ކަނޑާލެވުނެވެ. އެހިނދު ޚިޔާލަކަށް ގެއްލިފައި ހިލްޔާއަށް ހުރެވުނެވެ. ދާނިޝް އޭނަ ގާތު ބުނަން އުޅެނީ ކޮން ވާހަކައެއްތޯ ހިތަށްއެރިއެވެ. ނަޖާހު ގާތު ބުނި ކަމާއި ‘އުޅެލަނީ’ ތޯ ހިތަށްއެރިއެވެ. އެފަދަ ސުވާލެއް ދާނިޝް އޭނައާއި ކޮށްފިނަމަ އޭނައަށް ވާނެ ގޮތެއް ހިލްޔާއަށް ނޭނގެއެވެ. އަދި އެއަށް ދޭނެ ޖަވާބެއް ވެސް ނޭނގެއެވެ.

ކޮންމެ ގޮތެއްވިޔަސް އެ ނުތަނަވަސްކަމުގެ ތެރެއިން ހިލްޔާއަށް ﷲ ގެ ޙަޟްރަތުން އެހީއަށް އެދެވުނެވެ. ތިރިއަށް ގޮސް ކޮންމެ ވާހަކައެއް ދެކެވުނަސް ﷲ އެންމެ ރުހިވޮޑިގެންވާ ޖަވާބުތައް އޭނައަށް ދެވޭނެ ގޮތެއްވުމަށް އެދި ދުޢާ ކުރެވުނެވެ.

**

މަތީ ބައިގައި ހުރި ކޮޓަރީގެ ދޮރު ހުޅުވާލެވުނު އަޑަށް ދާނިޝްއަށް އެދިމާލަށް ބަލާލެވުނީ ހަމަ އެއްވެސް އިޚްތިޔާރަކާއި ނުލައެވެ. ހުޅުވުނު ދޮރުން ނިކުތް ހިލްޔާ ފެނިފައި ދާނިޝް އެސްފިޔަ ޖަހާލަން ހަނދާން ނެތުނެވެ. ކަޅުކުލައިގެ ބޮޑު އަބާޔާއަކާއި ބޮޑު ގޮތަކަށް ޝޯލް އަޅައިގެން ހުރި ހިލްޔާ ލަސް ހިނގުމެއްގައި އައިސް މަތީ ބައިގައި ހުރި ރެއިލިންގް ގައި އަތް އަޅުވައި ތިރިއަށް ނަޒަރެއް ދިނެވެ. ނަހީދުބެ މައްޗަށް ނަޒަރެއް ދީފައި އައިސްބަލާށޭ ބުނުމުން ހިލްޔާގެ ނަޒަރު އޭނައަށް އަމާޒުވިއެވެ. ހަމަ އިސާހިތަކު ހިލްޔާ އިސްޖަހާލި ގޮތް ދާނިޝްއަށް ލޯބިވިއެވެ. އަދި އާދައިގެ ހިނގުމެއްގައި ސިޑިއާއި ދިމާލަށް ހިނގައިގަތް ހިނދު އަބާޔާ ވިހުރިގެން ދިޔަ ގޮތުން ދާނިޝްއަށް ހިލްޔާ ސިފަވީ ޝާހީ އަންހެން ކުއްޖެއްގެ ގޮތުގައެވެ.

“ޕްރިންސެސް…” ދާނިޝްއަށް ހިތާހިތުން އެހެން ބުނެލެވުނު ހިނދު ހިނިތުންވުން ފުންވިއެވެ. ހަނދާނަށް އައީ މީގެ މަސްތަކެއް ކުރިން ހިލްޔާ އޭނައާއި ކޮށްލި ސުވާލެވެ. ފަސްބައި ބޮޑު ހެދުމަކާއި ތާޖެއް އަޅައިގެން ހުރެ ކުރި ސުވާލެވެ.

އެދުވަހަށްވުރެ މިއަދު ހިލްޔާ އޭނައަށް ހާސްބައި ރީތިވިއެވެ. މިއަދު ހިލްޔާގެ އަޚްލާޤް ވެސް ފުރިހަމަވެފައިވާ މިންވަރު ހިތަށް އެނގުންވެފައިވާތީވެއެވެ. މިއަދު ހިލްޔާއަކީ ޙަޤީޤީ ‘ޕްރިންސެސް’ އެކޭ ހިތަށްއެރިއެވެ. ހިލްޔާއާއި އެކީ ދިރިއުޅުމެއް ފަށަން އޭނައަށް ކެތްވަނީއެއް ނޫނެވެ.

ހިލްޔާ ސިޓިންގް ރޫމަށް ގޮސް ނުހަނު ވިސްނުންތެރިކަމާއެކީ ގޮސް އިށީނީ ބައްޕަ އިން ސޯފާގައެވެ. އެއްގޮތަކަށް ވެސް ދާނިޝްއަށް ކުރިމަތިލައިގެން އިންނާކަށް ބޭނުމެއް ނުވިއެވެ. ދާނިޝްގެ ކުރިމައްޗަށް ވާ ގޮތަށް ހުރި ސޯފާގައި އިށީނދެއްޖެނަމަ އޭނައަށް ހަމަހޭގައި ހުރެވޭނެ ކަން ޔަޤީނެއް ނުކުރެވުނީތީވެއެވެ.

“ސޯ…..އަހަރެން ފުރަން އުޅޭ ވާހަކަ ހިލްޔާ ގާތު ކުރިން ނުބުނެވި ހުރީމަ، އެކަމަށް މަޢާފަށް އެދެން މި ގެނައީ.” ދާނިޝް ބުންޏެވެ.

ދާނިޝް ބުނެލި ވާހަކައިން އިސާހިތަކު ހިލްޔާގެ ހިތުގެ ތެޅުން ހަމައަކަށް އެޅުނެވެ. ދެކެވެން މިއުޅެނީ އޭނަ ހީކުރި ވާހަކައެއް ނޫންކަން އެނގުންވުމުން ހިތް އުފާވިއެއްކަމަކު ދެރަވެސް ވިއެވެ. އެއީ ކީއްވެކަމެއް ނޭނގުނެވެ.

“އިޓްސް އޯކޭ…” ހިލްޔާ ދާނިޝްއަށް ބަލާލަމުން ކުރު ޖަވާބެއް ދިނެވެ. އެހާ ހިސާބުން އޭނައާއި ދާނިޝްގެ ދެމެދުގައި ދެކެވޭނެ ވާހަކަ ނިމިދާނެތީ ދެރަވެސް ވިއެވެ. އެހެނަސް ދާނިޝް އިތުރަށް ވާހަކަ ދެއްކުމުން އުފާވިއެވެ.

“އަސްލު މިހެން ކަންތައް ވީމަ ދެން….އެހެން މީހުންނަށް ނުދޭ ޑީޓެއިލްއެއް ހިލްޔާއަށް ދޭން ބޭނުން. އަސްލު 15 ފެބްރުއަރީ އަކީ އަހަރެންގެ ލާސްޓް ވޯކިންގް ޑޭ. ފުރަނީ 18 ފެބްރުއަރީގަ. އެ ތާރީޚުގަ އަސްލު ފުރަން މިއުޅެނީ ޢުމްރާއަށް.” ދާނިޝް އެ ބުނި ބުނުމާއިއެކު ހިލްޔާއާއި އެކީ ނަހީދަށް ވެސް ދާނިޝްއަށް ބަލާލެވުނީ ޝޮކަކާއި އެކީގައެވެ.

“ޢުމްރާއަށް؟” ހިލްޔާއަށް އަހާލެވުނެވެ.

“އައްދެ….ބޭބެއަށް ވެސް ކުރިން ނުދޭ ޑީޓެއިލްއެއް ތި ދިނީ.” ނަހީދަށް ބުނެވުނެވެ. އެއާއިއެކު ދާނިޝް ހީލިއެވެ.

“ހެހެ….ވަރަށް ލާސްޓް މިނިޓް ގަ ރޭވި ކަމެއް. އަހަރެންގެ ދެ ފްރެންޑުން ވަރަށް ގިނަ ދުވަސްވެއްޖެ ބުނާތާ ތިމަންނަމެން ދާއިރު އެކީގައި ހިނގާށޭ. ދެން މީގެ 3 ދުވަސް ކުރިން އަހަރެން އެއްބަސްވީމަ އެމީހުން ވަރަށް މަސައްކަތުން އަހަރެން ރަޖިސްޓާރ ކޮށްދިނީ. އަލްޙަމްދުލި ﷲ.” ދާނިޝް ހިނިތުންވުމަކާއެކީ ކިޔައިދިނެވެ.

ދާނިޝް ކިޔައިދިން ވާހަކައިން ހިލްޔާ ވިސްނުމެއްގެ ތެރެއަށް ގެއްލުނެވެ. ޢުމްރާއަށް ދާން އޭނަ މިހާ ދުވަސް ވީއިރު ޚިޔާލު ނުކުރީ ކީއްވެތޯ ހިތަށްއެރިއެވެ.

“ޢުމްރާއަކީ ވެސް ވަރަށް ޘަވާބު ހުރި އަޅުކަމެއް ދޯ؟ ޢުމްރާއަށް ދާ ގޮތަށް ދެން ދާނިޝް ޗައިނާއަށް ފުރަނީތަ؟” ބައްޕަ ކޮށްލި ސުވާލުން ހިލްޔާއަށް ކަންފަތް ހުޅުވާލެވުނެވެ. ދާނިޝް އުޅެނީ ޗައިނާގަ ތޯ ހިތަށްއެރިއެވެ.

“ޑިޕެންޑްސް ބޭބޭ. ކަންތައް ވާ ގޮތަކުން އެނގޭނީ.” ދާނިޝް އެހެން ބުނެލީ ހިލްޔާއަށް މާނަވީ ނަޒަރެއް ދެމުންނެވެ. އެ ނަޒަރުގެ މާނަ ދަނެގަންނަން ހިލްޔާއަށް ނުކުޅެދުނެވެ.

“ކިތައް ދުވަހުގެ ދަތުރެއްތަ ޢުމްރާއަކީ؟” ހިލްޔާއަށް އަހާލެވުނެވެ.

“ބޭނުން ވަރަކަށް ކުރު ކުރެވިދާނެ ނޫނީ ދިގު ކުރެވިދާނެ. ރާއްޖޭގެ ގްރޫޕްތަކުން ޢާއްމު ގޮތެއްގަ ދަނީ ޓޫ ވީކްސް އަށް. ތިން ހަތަރު ޢުމްރާ ކުރެވޭ ގޮތެއް.” ދާނިޝް ކިޔައިދިނެވެ.

“އޮހް…މަސްޓް ބީ ނައިސް.” ހިލްޔާއަށް ބުނެވުނެވެ.

“ކިހިނެއްވީ؟ ހިލްޔާ ދާން ބޭނުންތަ ޢުމްރާއަށް؟ …..އަހަންނާއެކީ؟” ދާނިޝް އެ ފަހު ބަސް އިތުރު ކޮށްލީ ނުހަނު ފަރުވާތެރިކަމާއެކީ ހިލްޔާއަށް ބަލަން އިނދެއެވެ.

ދާނިޝްގެ އެ ސުވާލުން ހިލްޔާއަށް ހުއްޓުން އަރާފައި ދާނިޝްއަށް ނަޒަރު ހުއްޓާލެވުނެވެ. ހިނދުކޮޅަކަށް ނަމަވެސް އެ ސުވާލަށް އާނއެކޭ ބުނަން ބޭނުންވިއެވެ. ދާނިޝްއާއި ކައިވެނިކޮށްގެން ނަމަ އާނއެކޭ ބުނަން ބޭނުންވިއެވެ. އެހެނަސް އިސާހިތަކު ލޮލަށް ސިފަވާން ފެށީ އޭނަ އެންމެ ފަހުން ހިލޭ ފިރިހެނަކާއިއެކީ ކުރި ދިގު ދަތުރެވެ. އެ ދަތުރު މަތީގައި އޭނަ އަމިއްލައަށް އުފުލަން ޖެހުނު ބުރައެވެ. ކިތަންމެ ފައިސާއެއް އޭނައަށް ދީފައި ހުއްޓަސް އޭނައަށް އިޙްސާސް ކުރެވުނު އެކަނިވެރިކަމެވެ. އެ ދަތުރު މަތިން އޭނަ ބޭނުންނުވެފައިވާ ޙާލު އޭނަ ކައިވެނި ކުރަން އެއްބަސްވާން ޖެހުނު ގޮތެވެ. އޭގެ އާޚިރު ނަތީޖާއެއްގެ ގޮތުން އޭނަ ނަފްސާނީ ގޮތުން ދިޔަ އަނދިރި ޙާލަތެވެ.

އެ ހުރިހާ ކަމެއް ފަޅި ސިކުންތެއްގެ ތެރޭގައި ލޮލަށް ސިފަވެ އެ އަނދިރިކަން އަނެއްކާވެސް ހިތަށް ވެރިވިހެން ހީވި ހީވުމާއިއެކު ހިލްޔާއަށް ވާހަކަ ދެކެވުނެވެ.

“ދާނިޝްއާއި އެކީ ދާކަށް ބޭނުމެއް ނޫން. ބައްޕައާއި އެކީ ދާނީ.” ހިލްޔާއަށް ހިސާބެއްގެ ނުތަނަވަސްކަމާއިއެކީ ބުނެވުނެވެ.

ހިލްޔާ ދިން ޖަވާބުން ނަހީދު ހީލި ހިނދު ދާނިޝްއަށް ވެސް ލުއިގޮތަކަށް ހީލެވުނެވެ. އެހެނަސް އެހިނދު ދާނިޝްގެ ހިތް ދެރަވެފައިވިއެވެ. އެވަގުތު ހިލްޔާ ބުނެލި ބަސްތަކާއި އެ މޫނުމައްޗަށް ވެރިވަމުން ދިޔަ ކުލަވަރުން ހިލްޔާ އޭނައަށް އިތުބާރު ނުކުރާހެން ހީވުމުންނެވެ.

“ސާބަހޭ ދަރިފުޅާ! ބައްޕަ ގޮވައިގެން ތިކަހަލަ ތަންތަނަށް ދާންވާނީ! އަޅެ ދާނިޝް އެހެން ގްރޫޕަކުން ވިޔަސް ބަލައި ދީބަލަ ދާނިޝް ތިހެން ދާއިރު އަހަރުމެންނަށް ވެސް ދެވޭ ގޮތެއް ވޭތޯ ބަލަން.” ނަހީދު ބުންޏެވެ.

“އަހާލާނަން ފްރެންޑުން ކައިރިން. ފެމިލީއަކަށް ވަކިން ދެވިދާނެހެން ހީވާނީ. ބޭބެއަށް އަންގާލާނަން އެމީހުން ބުނާ އެއްޗެއް އިން ޝާ ﷲ.” ދާނިޝް އެ ވާހަކަ ދައްކަމުން ތެދުވެލިއެވެ.

“ދަނީތަ ދާނިޝް؟” ނަހީދު ވެސް އެހެން އަހަމުން ތެދުވެލިއެވެ. އޭގެ ދެވަނަ ސިކުންތުގައި ހިލްޔާ ވެސް ތެދުވެލިއެވެ.

“އާނ ބޭބޭ. މިއީ ހިލްޔާއަށް ދޭން ގެނައި ހަދިޔާއެއް.” ދާނިޝް އެހެން ބުނެލީ މޭޒުމަތީގައި ހުރި އޮމާން ކަރުދާސް ކޮތަޅު ނަގައި، އެވަގުތު އޭނަ ފަހަނަޅައި ދާން އުޅުނު ހިލްޔާއަށް ދިއްކޮށްލަމުންނެވެ. އެހިނދު ހިލްޔާ ފިޔަވަޅުތައް މަޑުޖައްސާލަމުން އެ ކޮތަޅު ހޯދިއެވެ.

“ތޭންކްސް.” ހިލްޔާއަށް އަނެއްކާވެސް ކުރު ޖަވާބެއް ދެވުނެވެ. އެވަގުތު ޖަޒުބާތީ ޙާލަތު ހުރި ގޮތުން ދާނިޝްއަށް ބަލާލުމެއް ވެސް ނެތި އެ ކޮތަޅު ހޯދަމުން ބަދިގެއާއި ދިމާލަށް ހިނގައިގަނެވުނެވެ.

ހިލްޔާއަށް އެ އައި ބަދަލުތަކުގެ ސަބަބުން ޚުދު ދާނިޝް ވެސް ޙައިރާންވާ ގޮތްވިއެވެ. އޭނައަކީ ހިލްޔާއަށް ހިލޭ ފިރިހެނަކަށް ވާއިރު އޭނައާއިއެކީ އައުމަށް އެދުނީތީ ހިލްޔާ ނުރުހުންވީތޯ ހިތަށްއެރިއެވެ. އެ ޚިޔާލާއިއެކީ ދާނިޝް އަމިއްލަ ނަފްސަށް ނުރުހުންވާ ގޮތްވިއެވެ. އޭނަ ހިތުން އޭނަ ހުރީ މިއަދު ދެކެވޭ ވާހަކަތަކުގެ ތެރެއިން ހިލްޔާ ކުރެން ކައިވެންޏަށް އެދޭށެވެ. އެހެނަސް މިއަދު ހިލްޔާގެ ތަބީޢަތު ބަދަލުވެގެން ދިޔަ ގޮތުން ކައިރި މުސްތަޤްބަލެއްގައި އެ ސުވާލު ކޮށްފިނަމަ ހިލްޔާ އެއަށް އިންކާރު ކުރުން ގާތްކަން ދާނިޝްއަށް ޔަޤީން ކުރެވުނެވެ.

**

ބަދިގެއަށް ވަން ހިލްޔާގެ ހިތުގެ ތެޅުން އަވަސްވެފައިވިއެވެ. އެހިނދު ނޭނގޭ ސަބަބަކާހުރެ އެ މޭގައި ރިހުމެއް ވެސް އުފެދިފައިވިއެވެ. ލޮލަށް ސިފަވަމުން ދިޔައީ އޭނަ އެންމެ ފަހުން ބުނެލި ވާހަކަތަކުގެ ސަބަބުން ދާނިޝްގެ މޫނުމައްޗަށް ވެރިވެފައިވި ހިތާމަވެރި ކަމެވެ. އޭނައަށް ދާނިޝް ދެރަކޮށްލެވިއްޖެކަން އެނގުމުން އަމިއްލަ ނަފްސު ކުށްވެރި ކުރެވުނެވެ.

އަތުގައި އޮތް ކޮތަޅު ހިލްޔާ ހުޅުވައި ބަލާލީ އެ ޚިޔާލުތަކުގައި ހުރެއެވެ. އެއާއިއެކު ކޮތަޅު ތެރެއިން ހިލްޔާއަށް ފެނިގެން ދިޔައީ މިއަދު ހެނދުނު ކެމެރާއިން އޭނައަށް ފެނުނު ޗެރީ ޓޮމާޓޯއެވެ. ހަމަ އެއާއިއެކު ދޮން ލުނބޯއާއި ލެޓިއުސްއާއި މިންޓް ލީވްސް ވެސް ފެނިފައި ހިލްޔާގެ އަނގައިން ލުއި އާހެއްގެ އަޑު ނިކުތެވެ. ދާނިޝް މި އެއްޗެހި ގެނައި މިއަދު ހެނދުނު އޭނަ ބަލަހައްޓައިގެން ހުރީ އެ ގަސްތަކަށް ކަން އެނގުނީތީވެ ހެއްޔެވެ؟

ހިތަށް ވެރިވި އެ ޚިޔާލާއިއެކު ހިލްޔާއަށް އަވަސްއަވަހަށް ބަދިގޭގެ ދޮރާއި ދިމާލަށް ދެވުނެވެ. ހަމަ އެހިނދު ދާނިޝް މައިދޮރުން ނިކުމެގެން ދިޔަ މަންޒަރު ފެނުމުން ހިލްޔާގެ ހިތް ދެރަވިއެވެ. ވިސްނުންތެރިކަމާއި އިޙްސާންތެރިކަމާއެކީ ދެވިފައިވާ މި ހަދިޔާއަށްޓަކައި ދާނިޝްއަށް ޙައްޤުވާ ގޮތަށް ޝުކުރު އަދާ ނުކުރެވުނުކަން އެނގުންވުމުންނެވެ.

އެކަމަށްޓަކައި މުޅި ދުވަހުހެން ހިލްޔާގެ ހިތުގެ ކަނެއްގައި ހިތާމަވެރިކަން ވިއެވެ. ހަވީރު ދޮންތައާއި ބައްދަލުކުރަން މަމްނޫން އައުމުން ހިނދުކޮޅަކަށް އެ ޚިޔާލުތަކާއި ދުރުވެވުނެވެ. އެހެނަސް މަމްނޫން ދޮންތައަށް ބަލަމުން ދިޔަ ނަޒަރުތަކުންނާއި، މަމްނޫން މާޒިންއަށް ދޭން ހަދިޔާ ގެނައި ގޮތުންނާއި، ބައްޕަ ކުރަމުން ދިޔަ ސުވާލުތަކަށް މަމްނޫން ދެމުން ދިޔަ ޒިންމާދާރު ޖަވާބު ތަކުން ހިލްޔާ ދާނިޝް މަތިން ވަރަށް ބޮޑަށް ހަނދާންވިއެވެ. އޭނައާއި އިނުމަށް ދާނިޝް ވެސް މިގޮތަށް މިގެއަށް އަންނާނެ ނަމައޭ ފަޅި ސިކުންތަކަށް ވިޔަސް ހިތަށް އެރިއެވެ. އެހެނަސް އޭގެ ދެވަނަ ސިކުންތުގައި އެޚިޔާލު ސިކުނޑިން ފޮޅުވާލެވުނެވެ. އޭނަ ކައިވެންޏެއް ކުރަން ދެން ބޭނުންވާ ކަމެއް ހިލްޔާއަށް ޔަޤީނެއް ނޫނެވެ. ރާފިލް އާއި ވެސް އިންނަން އޭނަ ނިންމީ ރާފިލްއަށް އިތުބާރު ކުރެވުނީތީވެއެވެ. އެހެން ރާފިލް ވެގެން ދިޔައީ އޭނަ ހީކުރި ފަދަ މީހަކަށް ނޫނެވެ. ދާނިޝް ވެސް ހަމަ އެފަދައިން ‘ބަދަލު’ ވެދާނެ ނޫން ހެއްޔެވެ؟

ހިތަށް ވެރިވެފައިވި ބިރުވެރިކަމެއްގެ ބޮޑުކަމުން ޚުދު ހިލްޔާ އަމިއްލައަށް ދޮންތައަށް ދިން ނަސޭޙަތް ހަނދާން ނެތިފައިވިއެވެ. އިތުބާރު ކުރަންވީ އަމިއްލަ ނަފްސަށް ނޫންކަމާއި ވަކީލު ކުރަންވީ ﷲ އަށް ކަމެވެ. އެ ބިރުވެރިކަމުގެ ސަބަބުން ރަނގަޅު ނިޔަތެއްގައި ކުރެވޭ ކައިވެންޏަކީ ވެސް އަޅުކަމެއް ކަން ހިލްޔާ ހަނދާން ނެތިފައިވީއެވެ.

މާޒީގެ ނުތަނަވަސް އިޙްސާސްތަކުގެ ސަބަބުން ދާނިޝް މަތިން އެއްކޮށް ހަނދާން ނައްތާލުމަށް ހިލްޔާގެ ސިކުނޑި އެންގިއެވެ. އަމިއްލަ ހިތުގެ ހަމަޖެހުމާއި އަމިއްލަ ނަފްސުގެ ރައްކާތެރިކަމަށް އެންމެ ރަނގަޅު ގޮތަކީ އެއީ ކަމަށް ނިންމުނީތީވެއެވެ. އެހެނަސް ދެން ކަންތައް ވާން ފެށީ ހިލްޔާ ހީވެސް ނުކުރާ ފަދަ ގޮތަކަށެވެ.

ހިލްޔާ ދެން ދާނިޝްއާއި ދިމާވީ ހޮނިހިރު ދުވަހު ޑިއުޓީއަށް ދިޔަ ގަޑީގައެވެ. މެންދުރު 2 ޖެހި ވަގުތު ހިލްޔާ ގޮސް ޕާކިންގް އޭރިއާގައި ކާރު ޕާކްކޮށްލި ވަގުތު ދާނިޝް ވެސް އެ ކާރުގެ ކައިރީގައި ގޮސް ސައިކަލު ޕާކް ކުރިއެވެ. ހިލްޔާ ވަކި ދާނިޝްއަށް ސަމާލުކަމެއް ދިނުމެއްނެތި ކާރުން ފައިބައިގެން ދާން ހިނގައިގަތެވެ. އެހެނަސް ފަހަތުން ދާނިޝްގެ އަޑު އިވުނެވެ.

“ހިލްޔާ!” ދާނިޝް ގޮވާލުމުން ހިލްޔާއަށް ފިޔަވަޅުތައް މަޑުޖައްސާލެވުނެވެ. ހިލްޔާ ފަސްއެނބުރި ބަލާލި ވަގުތު ދާނިޝް އައިސް އޭނައާއި ހަމަކޮށްލަމުން އޭނަގެ ކުރިމަތީގައި މަޑުކޮށްލިއެވެ. އަދި އަތުގައި ހުރި ފަށްޖަހާފައި ހުރި ބައެއް ގަނޑުތަކެއް ހިލްޔާއަށް ދިއްކޮށްލިއެވެ.

“މިއީ….ބައެއް ޢުމްރާ ގްރޫޕްތަކުން ކުރާ އޮފާރތައް. ފެމިލީއެއް ދަންޏާ. ރެޖިސްޓްރޭޝަން ކްލޯޒްވެފަ ހުއްޓަސް އަހަރެން މި ދާން އުޅޭ ގްރޫޕް އިން ވެސް ފަހަރެއްގަ ބަލައިގަންނާނެއޯ ފްރެންޑް ބުނީ. މިއީ ވަކިން ޕެކޭޖެއް ވީމަ. އެހެން ދެ ގްރޫޕަކަށް ވެސް ގުޅާފަ އަހާލިން. ސިމިލާރ އެއްޗެއް ބުނީ. ނަހީދުބެއަށް ދައްކާލައްޗޭ. ހިލްޔާ….ބޭނުމިއްޔާ ހަމަ ބައްޕައާއިއެކު ދެވޭނެ އޭރުން.”

ދާނިޝް ދައްކަމުން ދިޔަ ވާހަކަ އަޑުއަހަން ހިލްޔާ ހުރީ، ދާނިޝް އޭނަގެ އަތަށް ލައިދިން ބައެއް ޢުމްރާ ގްރޫޕްތަކުގެ އިޝްތިހާރު ގަނޑުތަކަށް ބަލަމުންނެވެ. ދާނިޝް އެ ބުނެލި ފަހު ވާހަކައާއިއެކީ ހިލްޔާއަށް އިސްއުފުލައި ދާނިޝްއަށް ބަލާލެވުނީ ހަމަ އެއްވެސް އިޚްތިޔާރަކާއި ނުލައެވެ. އެހިނދު ދާނިޝް ހިނިތުންވުމަކާއިއެކީ ބޯޖަހާލުމަށްފަހު އިތުރު އެއްޗެކޭ ނުބުނެ އޭނައަށް ފަސްދީފައި ދާން ހިނގައިގަތެވެ.

އަނެއްކާވެސް އޭނައަށް ޝުކުރު އަދާ ނުކުރެވެނީސް ދާނިޝް ހިނގައިގަތްކަން އެނގުމުން ހިލްޔާއަށް ހުއްޓުން އަރާފައި ދާނިޝްއަށް ބަލަން ހުރެވުނެވެ. އެވަގުތު ދޫ ޙަރަކާތް ނުކުރީ ހިތަށް ކަމެއް އެނގުންވެގެން ދިޔުމުންނެވެ. އެވަގުތުކޮޅުގައި ދާނިޝްއާއި ރާފިލް އަޅުވައި ކިޔާލެވުނީ ހަމަ އެއްވެސް އިޚްތިޔާރަކާއި ނުލައެވެ. މިއަދު ދާނިޝްގެ މަޤާމުގައި ރާފިލް ހުރިނަމަ އޭނަ ކަމެއް ބޭނުމެއް ނުވާކަން އެނގުމުން ގަދަ އަޅައި އޭނަ ލައްވައި އެކަމެއް ކުރުވަން މަސައްކަތް ކުރީހެވެ. ގަދަކަމުން އޭނަގެ ޚިޔާލު ބަދަލު ކުރުމަކީ ރާފިލްގެ އާދައެވެ. މިހާ ތަނަށް އައިއިރު ހިލްޔާގެ ހިތް އާދަވެފައިވީ އެކަމަށެވެ.

މިއަދު ދާނިޝް އޭނަ ބޭނުންވާ ގޮތަށް ރިޢާޔަތް ކުރުމުން އެ ހިތް ހިސާބަކަށް ވިރިގެން ދާން ފެށިއެވެ. އެ ހުރިހާ ދުވަސް ވަންދެން ރާފިލްގެ ފަރާތުން އޭނަ އުއްމީދު ކޮށްފައި ނުލިބުނު ރައްކާތެރިކަން ދާނިޝްގެ ފަރާތުން ލިބިދާނެހެން ހީވިއެވެ. ދާނިޝް ހަމަ ތަފާތު ތާއޭ ހިތަށްއެރި ހިނދު އެ ހިތް ތަފާތު ގޮތަކަށް ތެޅިލިއެވެ.

**

އެދުވަހަކީ ދާނިޝްއަށް ރަސްމީ ދުވަހަކަށް ނުވާތީ ދާނިޝް މާ ގިނައިރު ވަންދެން ކްލިނިކްގައި ހޭދައެއް ނުކުރެއެވެ. މެންދުރު ގޮސް ގަޑިއިރެއްހާއިރު ވަންދެން ކްލިނިކްގައި ހުރެފައި ދާނިޝް ދިޔައީ އިޚްވާން ފައުންޑޭޝަންގެ މަސައްކަތް ކުރުމަށެވެ. 3 ވަނަ ފްލޯގައި ހުޅުވަން އުޅޭ ކުޑަކުދިންގެ ޤުރުއާނާއި ޢަރަބި ކުލާހެއްގެ މަސައްކަތެވެ.

އެ ގަޑީގައި ދާނިޝްއާއިއެކު މަސައްކަތް ކުރަމުން ދިޔައީ ފަޔާޒް އެކަންޏެވެ. އެހެންކަމުން ފަޔާޒް ވަކި ސިއްރުކުރުމެއްނެތި ހިލްޔާއާއި ދާނިޝްގެ ގުޅުމުގެ ޚަބަރު އެހިއެވެ.

“އައި ޑޯންޓް ތިންކް ޝީ އިޒް ރެޑީ. އެހެންވީމަ އަދި ޕްރޮޕޯޒްއެއް ނުކުރަން.” ކުލަ ރޯލަކުން ފާރުގައި ހުދުކުލަ ލަމުން ދާނިޝް ބުންޏެވެ.

“ސާބަސް! ދެން ކޮން ދުވަހަކުން ރެޑީ ވަނީ؟ ތިއީ ދާނިޝް ގެ ހިތް. ޕްރޮޕޯޒް ކުރީމަ ހަމަ އެ ކުއްޖާ އެއްބަސްވާނެ.” ފަޔާޒް ކުޑަ ދޮރު ކައިރީގައި ހުރި ސޮކެޓެއް ހައްޔަރު ކުރަމުން ބުންޏެވެ.

“ތިހެން ވެސް ހިތަށް އެބައަރާ. ޢުމްރާއަށް ފަހު ޕްރޮޕޯޒް ކުރަން ވެސް ހިތަށް އެބައަރާ. ދެން ނޭނގޭ. އޯލް އައި ނޯ އިޒް ނައު އިޒް ނޮޓް ރައިޓް. ހަރުގަނޑެއް ހުންނާނެތަ މިތާ؟” ދާނިޝް ވާހަކަ ދައްކަމުން ގޮސް ސުވާލު ކުރިއެވެ. ހިލްޔާއާއި އޭނައާއި ދެމެދު ހިނގާ ޒާތީ އެއްވެސް ވާހަކައެއް ފަޔާޒާއި ވެސް ޙިއްސާ ކުރަން ދާނިޝް ބޭނުމެއް ނުވިއެވެ.

“އާނ ހުންނާނެ އަނެއް ރޫމުގަ. އެކަމަކު ބައެއް އިސްކުރުތައް ދޫވެފަ އޭގަ ހުރީ. ރަނގަޅު ނުވާނެ އެއަށް އަރަން.” ދާނިޝްގެ އެ ޢިޝާރާތް ދަނެގެން ފަޔާޒް އިތުރަށް ހިލްޔާގެ ވާހަކަ ދައްކަން ނުއުޅުނެވެ.

“އޯކޭވާނެ. މިހިރީ ސްކްރޫ ޑްރައިވާރސް. ބާރުކޮށްލާނީ.” ދާނިޝް އަތުގައި ހުރި ރޯލު ފާރަށް ލައްޕާލަމުން ފަޔާޒް ބުނި ރޫމަށް ދިޔައެވެ. އަދި އެތާހުރި ދިގު ހަރުގަނޑު ހިފައިގެން އަނެއްކާވެސް އޭނަ މަސައްކަތް ކުރަމުން ދިޔަ ރޫމަށް ދިޔައެވެ.

ދާނިޝް އޭނަ ދެންމެ ކުލަ ލަމުން ދިޔަ ފާރު ކައިރީގައި އެ މެދުމިނުގެ ހަރުގަނޑު ހުޅުވާލިއެވެ. އޭގެ އެންމެ މައްޗަށް އަރައިފިނަމަ ސީލިންގް ކައިރިން ކުލަ ނުލެވި ހުރި ތަންކޮޅަށް އަތް ފޯރާނެކަން އަންދާޒާ ކުރެވުނެވެ. އެހެންކަމުން ކުލަ ލާ ކުޑަ ބުރުހެއް ނަގައި ކުލަ ލުމަށްފަހު އެއާއިއެކީ ހަރުގަނޑަށް އަރަން ފެށިއެވެ. ފަޔާޒް ބުނި ވާހަކަ ހަނދާންވީ ހަރުގަނޑު މާ ބޮޑަށް ތަޅުވާހެން ހީވުމުންނެވެ. އެހެނަސް އެއީ މާ ބޮޑު ކަމަކަށް ނުވާނެއޭ ހިތައި ދާނިޝް މައްޗަށް އަރަން ފެށިއެވެ. އޭގެ މާ ގިނައިރެއް ނުވެ ދާނިޝްއަށް ވީ ނުވީއެއް ނޭނގި ތިންވަނައަށް އެޅި ހަރުފަތާއިއެކު ހަރުގަނޑާއިއެކީ އޭނަ އެއްފަރާތަކަށް ވެއްޓެން ދިޔައެވެ. ފަޔާޒް އޭނައަށް ގޮވާލި ވަގުތަކީ ދާނިޝްގެ ކަނާތު އުޅަނބޮށި މައްޗަށް އޭނަ ވެއްޓުނު ވަގުތެވެ. އަތަށް ވެގެން ދިޔަ ތަދާއިއެކު ދާނިޝްގެ އަނގައިން އާހެއްގެ އަޑު ނިކުތް ވަގުތު ލޮލުން ފެން ވެސް އައެވެ. ފަޔާޒް ކޮންމެވެސް އެއްޗެކޭ ކިޔަމުން އޭނަގެ ގާތަށް އައެއްކަމަކު ވަމުން ދިޔަ ތަދުގެ ބޮޑުކަމުން ފަޔާޒް ބުނި އެއްޗެއް ވެސް ސާފެއް ނުވިއެވެ.

**

ކޮންސަލްޓޭޝަން ރޫމުގެ މޭޒުދޮށުގައި ހިލްޔާ ބަލި މީހަކު ފޮނުވާލާ ކޮންމެ ފަހަރަކު މޭޒުމަތީގައި ތިބި ދާނިޝް ދިން ގަނޑުތަކަށް ބަލަމުން ދިޔައެވެ. އެއީ ހަމައެކަނި ޢުމްރާއަށް ދިޔުމަށް ހިތްވަރެއް ނޫނެވެ. އެއީ ދާނިޝްގެ ފަރާތުން އިޙްސާސް ކުރެވުނު ރައްކާތެރިކަމުގެ ވެސް ނިޝާނެކެވެ. އަދި އޭނައަށް އަނެއްކާވެސް ހިލޭ ފިރިހެނަކަށް އިތުބާރު ކުރެވިދާނެ ކަމުގެ ހެއްކެކެވެ.

އެކަން އެނގުންވަމުން ދިޔަދިޔަހެން ހިލްޔާއަށް ހިނިތުންވެވެމުން ދިޔައެވެ. ދާނިޝްއަށް އޭނަ ފުރުސަތެއް ދޭންވީތޯ އަމިއްލަ ހިތާއި ސުވާލު ކުރެވެމުން ދިޔައެވެ. ބަލިމީހަކު ބަލާފައި އެމީހަކު ފޮނުވާލާއިރަށް ވިސްނެމުން ދިޔައީ އެކަމާއިމެދުގައެވެ.

ކޮންސަލްޓޭޝަން ރޫމުގެ ދޮރު ނުހަނު ކުއްލިއަކަށް ހުޅުވިގެން ދިޔައީ ހިލްޔާ މިފަދަ ޚިޔާލުތަކެއްގައި ވަނިކޮށެވެ. ރޫމަށް ވަން ނަރުސް ކުއްޖާ ހާސްކަމާއިއެކީ ވާހަކަ ދެއްކިއެވެ.

“ޑޮކްޓަރ….އެމަޖެންސީ!” ނަރުސް ކުއްޖާ އެހެން ބުނުމާއިއެކު ހިލްޔާއަށް އެހެން ހުރިހާ ކަމެއްގެ މަތިން ހަނދާން ނައްތާލަމުން ތެދުވެލެވުނެވެ.

“ވަޓްސް ދަ ކޭސް؟” ހިލްޔާ ޑޮކްޓަރު ކަށިގަނޑު ކޮނޑުގައި އަޅުވަމުން ދިގު ފިޔަވަޅުތަކުގައި ނިކުންނަން އަންނަމުން އެހިއެވެ.

“ހަރުގަނޑަކުން ވެއްޓިގެން. ޕޮސިބަލް ފްރެކްޗާރ…އިޓްސް ދާނިޝް ސާރ.” ހިލްޔާ ކޮންސަލްޓޭޝަން ރޫމުން ނިކުތުމުން ނަރުސް ކުއްޖާ ހިލްޔާއާއި ދާދި އެއްވަރަކަށް ހިނގަމުން ކިޔައިދިނެވެ. ނަރުސް ކުއްޖާ އެންމެ ފަހުން ބުނެލި ބަސްތަކާއެކީ ހިލްޔާއަށް ދެލޯ ބޮޑުކޮށްލަމުން ނަރުސް ކުއްޖާއަށް ބަލާލެވުނެވެ. އޭގެ ދެވަނަ ސިކުންތުގައި ހިލްޔާގެ އެ އަވަސް ހިނގުން ދުވުމަކަށް ބަދަލުވިއެވެ.

ނުނިމޭ