Hijra (Part 39)

“ޖަވާބެއްދީ!” އަމީން ހަރު އަޑުން ގޮވާލިއެވެ. މިސްބާޙް ދެންވެސް އިސްޖެހިފައި ހުރީއެވެ. އޭނަ ހުރިގޮތުން ދުރުގައި ހުރި އޭނަގެ މަންމަގެ ލޮލުން ކަރުނަ ފައިބަން ފެށިއެވެ. ޖަވާބެއް ނުލިބި ގިނައިރު ވުމުން އަމީން އައި ރުޅީގައި ހިނގާފައި ގޮސް މިސްބާޙްގެ ގަމީހުގެ ގިރުވޯނުގައި ހިފައި ދަމަމުން ގޮސް ފާރަށް މިސްބާޙް ތަތްކޮށްލިއެވެ. ދުރުގައި ހުރި ޒާހިޔާއަށް މިސްބާޙޭ ކިޔައި ގޮވާލެވުނެވެ.

 

“ކަލޭ ހުރިތަނެއް މަށަށް ނޭނގޭނެ ކަމަށްތަ ހީކުރީ؟ މުޅި ރަށަށް އެނގޭ އެކަން. ކޮންމެވެސް މީހަކު އަހަރެންގެ ވާހަކައިގެ މެދުން ހަޅޭއްލަވައިގަނެގެން ބުނީ ކަލޭ ހުރީ ކޮންމެވެސް އަންހެން ކުއްޖަކާއެކީ ކޮޓަރިއެއްގައޭ. މިއީ ދޮގެއްތަ؟” އަމީން ބުނެލި ވާހަކައިން ދެލޯ ބޮޑުވެގެން ދިޔަ މިސްބާޙަށް އޭނަގެ ބައްޕައާއި ދިމާލަށް ބަލާލެވުނެވެ. އެ ވާހަކަ އެގޮތަށް ދައްކާނީ ކާކުބާއޭ މިސްބާޙްގެ ހިތަށްއެރިއެވެ. އޭނަ ހިނދުކޮޅަކަށް ޝޮކެއްގައި ހުއްޓާ ހަމަހޭވެރިކަމެއް ލިބުނީ ބުމަގޮށްޖެހިފައި ހުރި އަމީން އޭނަގެ ގިރުވޯނުގައި އިހުނަށްވުރެ ބާރަށް ހިފަހައްޓާލުމުންނެވެ.

 

“ޑް….ޑް..ޑޭޑް އައި ޕްރޯމިސް އަހަރެން އެއްވެސް ކަމެއް ނުކުރަން.” މިސްބާޙް ވާހަކަ ފެށީ ޖެހިލުންވުމަކާއެކީ ކަމަށްވިޔަސް އޭނަ ނިންމާލީ އަވަސްއަވަހަށެވެ.

 

“ތިބުނީ ތިމަންނަ ހުރީ އަންހެން ކުއްޖަކާއެކީ ނޫނޭތަ؟” އަމީން ޝައްކުގެ ނަޒަރަކުން ބަލަންހުރެ ސުވާލުކުރިއެވެ. މިސްބާޙް ދޭންޖެހޭނެ ޖަވާބާއިމެދު ހިސާބަކަށް ލަދުގެންފައި އިސްޖަހާލިއެވެ.

 

“ޑޭޑް……އަހަރެން ހުރީ އަންހެން ކުއްޖަކާއެކީ. އޮޅުމަކުން އެއްކޮޓަރިއެއްގަ ތަޅުލެވުނީ. އެކަމަކު އަހަރެން އެއްވެސް ކަމެއް ނުކުރަން.” މިސްބާޙް އަމީނަށް ބަލާލަމުން ވާހަކަ ނިންމާލިއެވެ. އަމީން މިސްބާޙްގެ ގިރުވޯނުން ކުއްލިއަކަށް ދޫކޮށްލިއެވެ.

 

“ތިވާހަކަ ޤަބޫލުކުރަންތަ އަހަރެންވީ؟ ތިއީ މަލާއިކަތެއްތަ އެއްވެސް ކަމެއް ނުކޮށް ހުންނަން؟” އަމީން ރުޅިވެރިކަމާއެކީ ސުވާލުކުރިއެވެ. އޭނަގެ ބައްޕަ ވާހަކަ ދެއްކި ގޮތުން މިސްބާޙްގެ ލޮލުން ކަރުނައެއް ފައިބައިގެން އައެވެ.

 

“ނޫން ޑޭޑް. އަހަރެން ބިރުގަތީ ﷲ ރުހިވޮޑިގެންނުވާނެ ކަމެއް ކުރެވިދާނެތީ.” މިސްބާޙް ކުރެހިފައިވާ އަޑަކުން ބުނެލިއެވެ.

 

“ކޯޗެކޭތަ ކަލޭ ތިކިޔަނީ؟! ބޯ ހަލާކުވާ ކަހަލަ ވާހަކަ. އަޑުއަހާ! މަށަށް ވަރިހަމަ ކަލޭ ކޮންމެ ގޮތަކަށް އުޅުނަސް. އެކަމަކު ހަނދާން ކުރާތި ކަލޭ ކުރާ ކަންތައް އެހެން މީހުންނަށް ސިއްރުކުރަން. އެހެންނޫނީ ކަލެއާހެދި އަހަރުމެންނަށް އެތައް ވޯޓެއް ގެއްލިދާނެ.” އަމީން ވެހެމުން ދިޔަ ވާރޭގެ އަޑުގެ މައްޗަށް ބާރު ހޯދަމުން ވާހަކަ ދެއްކިއެވެ. ބައްޕަ ދެއްކި ވާހަކައިން މިސްބާޙަށް ހުރެވުނީ ބުނާނެ އެއްޗެއްވެސް ނޭނގިފައެވެ. ﷲ ގެ ރުހިވޮޑިގަތުމަށްވުރެ ބޮޑަށް ބައްޕައަށް މުހިއްމީ މީހުންގެ ރުހުމެވެ. އެންމެން ރުއްސުމަކީ ކުރެވޭނެ ކަމެއްނޫންކަން ބައްޕައަށް އެނގޭނެ ނަމައެވެ. މިސްބާޙް އަމީނަށް ބަލަބަލާ ހުއްޓާ އަމީން ފުން ނޭވައެއް ދޫކޮށްލަމުން ދެ ކަރުނަވަޅުގައި ދެ އިނގިލި ޖައްސާލިއެވެ. ދުރުގައި ހުރި ޒާހިޔާ އިސްޖެހިފައިހުރެ އޭނަގެ ކޯތާފަތުން ކަރުނަ ފޮހެލިއެވެ. ހިމޭންކަމުގެ ވަގުތުކޮޅަކަށްފަހު އަމީން ވާހަކަ ދެއްކިއެވެ.

 

“ދެން އެންމެ ރަނގަޅު. ވާން އޮތް ކަމެއް ވެ ނިމިއްޖެ. މާދަމާ ޕްރެސް ކޮންފަރެންސެއް ބާއްވާނީ. އޭގަ ބުނާތި ތިމަންނަ ރޭގަ ހުރީ ސްކޫލްގެ މަސައްކަތެއް ނިންމަން އެކުވެރިއެއްގެ ގެއަކަށް ގޮސްފައޭ. އޭރުން މި މައްސަލަ ހައްލުވެދާނެ.” އަމީން މަޑުމައިތިރި އަޑަކުން އެހެން ބުނެލުމުން މިސްބާޙް ވަކި އެއްޗެކޭ ނުބުނެ އިސްޖަހާލިއެވެ. އަމީން ދާން ހިނގައިގަތް ވަގުތު މިސްބާޙްގެ އަޑު އިވުނެވެ.

 

“ނޫން ޑޭޑް. އަހަރެން ދޮގެއް ނަހަދާނަން. އަހަރެން ބުނެދޭނީ ކަން ހިނގި ގޮތް.” މިސްބާޙް އެހެން ބުނެލި

ވަގުތު އަމީންގެ އަތް މުއްކެވިގެން ދިޔައެވެ. އޭނަ ކުއްލިއަކަށް މިސްބާޙާއި ދިމާލަށް އެނބުރިލިއެވެ. އެއަށްފަހު ދިގު ދެ ފިޔަވަޅު އަޅާލަމުން މިސްބާޙްގެ ކައިރިއަށް ގޮސް އެއްއަތުން އޭނަގެ ކަރުގައި ހިފާލިއެވެ.

 

“ކީކޭތަ؟” އަމީން ރަތްވެފައިވާ ދެލޮލާއެކީ މިސްބާޙް ގާތު އެ ސުވާލުކޮށްލީ އޭނަ ޖަވާބު ބަދަލުކުރާނެ ކަމުގެ އުއްމީދުގައެވެ. ކަރަށް ބާރުވަމުން ދިޔަކަން އިޙްޞާސް ކުރެވުނު މިސްބާޙް ތެމިފައި ހުއްޓާ ވެސް ދާހިއްލަން ފެށިއެވެ. ދުރުގައި ހުރި ޒާހިޔާއަށް މަންޒަރު ފެނުނު ވަގުތު އޭނަ އަމީނަށް ބާރަށް ގޮވާލިއެވެ.

 

“ބުނާށޭ!” އަމީން ޒާހިޔާއަށް ވުރެ ވެސް ބާރަށް އެހެން ބުނެލުމުން މިސްބާޙް ސިހިގެން ދިޔައެވެ. މުޅި މީހާ ކުއްލިއަކަށް ފިނިވެގެން ދިޔައެވެ. ބައްޕަ ބޭނުންވާ ވާހަކައެއް ބައްޕައަށް އިއްވާލަންވީ ކަމަށް މިސްބާޙްގެ ސިކުނޑި ބުންޏެވެ. އެހެނަސް އޭނަ ދޮގު ހަދަންވީ ކީއްކުރަންތޯ ހިތް ސުވާލުކުރިއެވެ. ކުރިމަތީގައި ދެލޯ ބޮޑުކޮށްގެން ހުރި ބައްޕަ އޭނައަށް ކަމެއްކޮށްފާނެތީވެ ހެއްޔެވެ؟ ލިބިދާނެ އަނިޔާއެއްގެ ބިރަށް އޭނަ އަބަދުވެސް ރައްކާތެރި ކުރަމުން އައި ކަލާނގެއަށް އޭނަ އުރެދޭނީ ހެއްޔެވެ؟ މިސްބާޙްގެ ހިތް ނޫނެކޭ ބުނެލި ވަގުތު އޭނައަށް ވާހަކަ ދެއްކުނެވެ.

 

“އަހަރެން ބުނާނީ ތެދު، ޑޭޑް.” މިސްބާޙް ބުނެލިއެވެ. ހަމަ އެއާއެކު އަމީން މިސްބާޙަކީ ދިރުމެއްވެސް ނެތް ބުދެއްހެން ހީވާ ފަދަ ގޮތަކަށް އޭނަގެ ކަރަށް ދަމަމުން ބިންމައްޗަށް ވައްޓާލިއެވެ. ޒާހިޔާ މިސްބާޙަށް ގޮވާލަމުން އޭނަގެ ގާތަށް އަންނަން ފެށިއެވެ. ތަށިމުށީގެ މަތީގައި ބަންޑުން ޖެހުނު މިސްބާޙަށް އޭނަގެ ކަރުގައި އަތްވެސް ނުލެވެނީސް އަމީން އޭނަގެ އިސްތަށިގަނޑުގައި ހިފައި ތެދުކުރުވިއެވެ. ވީ ތަދާއެކީ މިސްބާޙްގެ އަނގައިން ހަޅޭކެއްގެ އަޑު ނިކުތެވެ. ހަޅޭއްލެވުމުން އޭނަގެ ކަރަށް އިތުރަށް ތަދުވިއެވެ. އަމީން އެއްވެސް ރަޙުމެއްނެތި މިސްބާޙްގެ ކޯތާފަތްމައްޗަށް ހޫނު އެތިފަހަރެއް ވީއްލިއެވެ. އެއަށްފަހު މިސްބާޙަށް ދެލޯ ވެސް ހުޅުވާނުލެވެނީސް އަތްމުއްކަވާފައި މިސްބާހްގެ ކޮނޑަށް އެތިފަހަރެއް ވީއްލިއެވެ. މިފަހަރުވެސް މިސްބާޙް ވެއްޓެން އުޅުނެއްކަމަކު ބިންމަތީގައި އޭނަގެ ފައި ހަރުލިއެވެ.

 

“އަމީން ކީއްތަ ތިކުރަނީ؟ މީ އަހަރުމެންގެ ދަރިފުޅޭ!” ޒާހިޔާ ރޮވިފައިހުރެ އަމީނާއި މިސްބާޙްގެ މެދުގައި މަޑުކޮށްލަމުން އަމީނަށް ހަނދާންކޮށްދިނެވެ.

 

“އެނގޭ. އެކަމަކު މީނަ މިހާރު މިއުޅެނީ މާ ގިނަ ވާހަކަ ދައްކަން ދަސްވެގެން. މި ގޮތަށް ކަންތައް ކުރީމަ ފަހުން ހަނދާން ހުންނާނީ އަހަރެން ބުނާ ވާހަކައަކާ ދެކޮޅު ނަހަދަން. ދުރުވޭ!” އަމީން ޒާހިޔާ ކުޑަކޮށް ކޮއްޕާލަމުން ދެންވެސް މިސްބާޙްގެ ގަމީހުގައި ހިފިއެވެ. އޭގެ ފަހުން މުޅި ގޭގެ ތެރޭގައި އިވެމުން ދިޔައީ މިސްބާޙްގެ ހަޅޭކުގެ އަޑާއި ޒާހިޔާ ރޮމުން ދިޔަ އަޑެވެ. ނަމަވެސް އެއަކުން އަމީންގެ ހަރު ހިތަށް އަސަރު ކުރިކަމަކަށް ނުވެއެވެ. އޭނަ ދެވަނަ ފަހަރަށް ވިސްނުމެއްވެސް ނެތި މިސްބާޙަށް އެކިއެކި އަނިޔާތައް ދެމުން ދިޔައެވެ. އެއްކަމަކަށް މިސްބާޙްގެ އިސްތަށިގަނޑުގައި ހިފައި އޭނަގެ ބޯ ފާރުގައި ތެޅިއްޔާ އަނެއްކަމަކަށް މިސްބާޙާއި ދިމާލަށް ކުޑަ ބިއްލޫރި ގުޅިއެއް އުކައި މުގުރާލައެވެ. ސިޓިންގް ރޫމުގެ މޭޒުމަތީގައި މޭވާތަކާއެކީ އޮތް ވަޅިއެއް އަމީންގެ އަތުގައި ޖެހުނު ފަހުން ގޭގެ ޓައިލްސް މަތިން ލޭވެސް ފެންނަން ފެށިއެވެ. ރޮމުން ދިޔަ ޒާހިޔާއަށް އެއްވެސް ކަމެއް ނުކުރެވުނު ޙާލުގައި ކަމެއް ކުރަން ބޭނުންވި މިސްބާޙްގެ ގައިގައި އެ ހިތްވަރެއް ނެތެވެ. ބައްޕަ ބޭރުފުށުން އޭނައަށް ދެމުން ދިޔަ އަނިޔާއަށްވުރެ އޭނަގެ އަމިއްލަ ބައްޕަ އޭނައަށް އަނިޔާ ކުރާތީ ހިތުގައި އަޅަމުން ދިޔަ ވޭން މާބޮޑެވެ. ކުރީކޮޅު އޭނައަށް ގިސްލެވެމުން ދިޔައެއްކަމަކު މިނެޓްތަކެއް ހިނގިފަހުން މިސްބާޙަށް އޭނަގެ ލޯވެސް ރަނގަޅަކަށް ނުހުޅުވެއެވެ. އޭނައަށް ރަނގަޅަކަށް ނުވެސް ހިނގެއެވެ. އެވަރުން ވެސް އަމީން އޭނަގެ ގަމީހުގައި ހިފަމުން ގޮސް ގޭގެ ދޮރުން ނިކުންނަން ދިޔައެވެ. އޭރު މިސްބާޙްގެ މޫނުގެ އެކި ތަންތަން ނޫފަންގަނެފައިވީއިރު އޭނަގެ ނިތުންނާއި ނޭފަތުން ލޭ އަންނަމުން ދިޔައެވެ. ލައިގެން ހުރި ގަމީހުގެ އެކި ދިމަދިމާލުން ވީދިފައިވީރު އެ ތަންތަން ވެސް ވަނީ ލެއިން ފޯވެފައެވެ. އަމީން މިސްބާޙް ގޮވައިގެން ވާރޭ ތެރެއަށް ނިކުތް ވަގުތު ޒާހިޔާވެސް އަމީނަށް އާދޭސްކުރަމުން ނިކުތެވެ. އަމީން އަދިވެސް ހިތް ނުފުރިގެން އެތާ ފެންޑާގެ އެއްފަރާތެއްގައި ފެނުން ފުރިފައި ހުރި ޓައްޕެއްގެ ތެރެއަށް މިސްބާޙްގެ ބޯ ކޮއްޕާލިއެވެ.

 

“އަމީން މޮޔަވީތަ؟!” ޒާހިޔާ ހަޅޭއްލަވަމުން ގޮސް މިސްބާޙްގެ ކަނދުރާގައި ހިފާފައިވި އަމީންގެ އަތުގައި ހިފައި ދެމޭތޯ ބެލިއެވެ. އެހެނަސް އަމީން ހުރީ ގޮތްދޫނުކޮށް މިސްބާޙްގެ ކަނދުރައިގައި ބާރަށް ހިފަހައްޓައިގެންނެވެ.

 

“އަމީން…..އަހަރެން ފުލުހުންނަށް ގުޅައިފިއްޔާ މާ ރަނގަޅެއް ނުވާނެ!” ޒާހިޔާ ބިރު ދައްކާ ފަދައަކުން ބުނެލިއެވެ. އެއާއެކު އަމީން ޒާހިޔާއަށް ބަލާލިއެވެ. އަދި އޭގެ ދެވަނަ ސިކުންތުގައި ކުއްލިއަކަށް މިސްބާޙް ފެނުން މައްޗަށް ނަގައި ބިންމައްޗަށް ވައްޓާލިއެވެ. މިފަހަރު ސިމެންތި ތަޅުންމައްޗެއްގައި ބަންޑުން އޮށޯވެވުނު މިސްބާޙް އޮތީ ދެލޯ މެރިފައެވެ. ޒާހިޔާ އަޑުގެ ކޮޅަށް މިސްބާޙަށް ގޮވާލަމުން މިސްބާޙްގެ ގާތަށް ގޮސް އޭނައާއި ދިމާލަށް ތިރިވިއެވެ. ހަމަ އެވަގުތު އަމީން ގޮސް ފެންޑާ ތެރޭގައި އޮތް ކާރަށް އަރައި ސްޓާޓްކޮށްލަމުން ކާރު ފަހަތަށް ޖައްސަން ފެށިއެވެ. ޒާހިޔާ އެ ކާރާއި ދިމާލަށް ބަލާލީ ނަފްރަތުން ފުރިގެންވި ދެލޮލުންނެވެ.

 

އެ ދަން ގަޑީގައި އެއްވެސް މީހަކު ނެތް އަނދިރި މަގުން ޔޫނުސް ވާރޭތެރެއިން ސައިކަލު ދުއްވަމުން ދިޔައީ ނުހަނު ބާރަށެވެ. އެހެނަސް މަގުގެ ވަކި ހިސާބަކަށް ދިޔަ ތަނާ ފުދޭވަރަކަށް ކައިރިން ފެނުނު ގެއެއްގެ ތެރެއިން ނިކުންނަމުން ދިޔަ ކަޅު ކުލައިގެ ކާރެއް ފެނުމާއެކު ޔޫނުސްއަށް ސްޕީޑް ދަށްކޮށްލެވުނެވެ. އޭނައަށް އެގެއާއި ހަމައަށް އާދެވުނު ވަގުތު އެ ކާރު މަގުގެ ސީދަލަށް ބާރު ސްޕީޑެއްގައި ދުއްވާލައިފިއެވެ. އެއީ އަމީންގެ ކާރުކަން ޔޫނުސްއަށް އެނގުންވީ ވަގުތު އެ ކާރު ނިކުތް ގޭގެ ތެރެއިން އަންހެނެއްގެ އަޑު ޔޫނުސްއަށް އިވުނެވެ.

 

“މިސްބާޙް ހޭލަބަލަ! މިސްބާ…….މީހަކު އެހީވެދީބަލަ. މަގޭ ދަރިފުޅު.” އެގޭގެ ފެންޑާ ތެރޭ ބިންމަތީގައި މިސްބާޙްގެ ގައިގައި ދެއަތުން ހިފަހައްޓައިގެން އިން ޒާހިޔާ ޔޫނުސްއަށް ފެނުނެވެ. އެއާއެކު އޭނައަށް ސައިކަލު މަޑުޖައްސާލެވުނެވެ. އެ ފަޅު ސަރަޙައްދުގައި އޭނަ ފިޔަވައި ޒާހިޔާގެ ރުއިން އަޑުއިވޭނެ މީހެއްނެތެވެ. އެގޭގެ ކުރިމަތިގައި ހުރި ފިހާރަވެސް ވަނީ ބަންދުކުރެވިފައެވެ. ޔޫނުސް ސައިކަލުން ފޭބީ ވެގެން އުޅޭ ގޮތެއް ބެލުމަށްޓަކައެވެ. ހޭނެތިފައި އޮތް މިސްބާޙަށް ލިބިފައިވި ޒަޚަމްތައް ފެނިފައި އެތައްހާސް ސުވާލެއް ޔޫނުސްގެ ސިކުނޑިއަށް ވެރިވިއެވެ. ނަމަވެސް އޭނަ އޭގެއިން އެއްވެސް ސުވާލެއް ނުކުރީ މިއީ އެއަށްޓަކައި ރަނގަޅު ވަގުތަކަށް ނުވާނެކަން ދަނެގެންނެވެ.

 

މުޅި ރަށުތެރޭގައި ގުގުމާލި އެމްބިއުލާންސްގެ އަޑާއެކީ ހުރިހާ ނޫސްވެރިން ހޮސްޕިޓަލާއި ދިމާލަށް މިސްރާބު ޖެހިއެވެ. އެމްބިއުލާންސްއަށް ވެސް ހޮސްޕިޓަލަށް އާދެވުމުގެ ކުރިން ބައެއް ނޫސްވެރިން ތުނިވެފައިވާ ވާރޭތެރޭގައި ހޮސްޕިޓަލަށް ހާޒިރުވެފައި ތިއްބެވެ. އެމްބިއުލާންސް އިން މިސްބާޙް ނެރުނު ވަގުތު ޔޫނުސްއާއި ޒާހިޔާ ވެސް އެއިން ފޭބިއެވެ. “ޙާދިސާއެއް” ދިމާވެގެން އުޅެނީ އަމީންގެ ދަރިފުޅައްކަން އެނގުމުން ނޫސްވެރިން ފޮޓޯ ނަގަން ފެށީ ވަރަށް ފޯރިއާއެކީގައެވެ. ޒާހިޔާ މިސްބާޙް އޮތް އެނދާއި އެއްވަރަށް ހިނގާފައި ދިޔައިރު އޭނަ ފަހަތުން އައި ނޫސްވެރިޔަކު އޭނައާއި ސުވާލުކުރަމުން ދިޔަ ކަމެއްވެސް އޭނައަށް ނޭނގުނު ފަދައެވެ. ޒާހިޔާ ހޮސްޕިޓަލް ތެރެއަށް ވަނުމުން ހުރިހާ ނޫސްވެރިން ވެސް ވަންނަން އުޅުނެވެ. ނަމަވެސް އެމީހުން މަޑުކުރެވުނެވެ. ޔޫނުސް ވަނަދިނީ އޭނަގެ އަތުގައި އެއްވެސް ކެމެރާއެއް ކަހަލަ އެއްޗެއް ނެތީތީވެއެވެ. އަދި އޭނަ އެމްބިއުލާންސްގައި އައީވެސް ޒާހިޔާގެ އެހީތެރިއެއްގެ ގޮތުގައި ކަމަށްވާތީވެއެވެ. ޔޫނުސް ހޮސްޕިޓަލަށް ވަދެގެން ދިޔައިރު ހުރިހާ ނޫސްވެރިންހެން ތިބީ ޙަސަދަވެރިވެފައެވެ.

 

މިސްބާޙް އެމަޖެންސީ ރޫމަށް ވައްދައި ދޮރު ލައްޕާލެވުނު ވަގުތު ޒާހިޔާ އިހުނަށްވުރެ ބާރަށް ރޯން ފެށިއެވެ. އޭނަ ރޮމުންރޮމުން ގޮސް އެތާ ހުރި ގޮނޑި ބަރިން ގޮނޑިއެއްގައި އިށީންތަން ބަލަން ޔޫނުސްއަށް ހުރެވުނީ ދެރަ މޫނަކާއެކީގައެވެ. އަނެއްކާވެސް އެތައް ސަތޭކަ ސުވާލެއް އޭނަގެ ސިކުނޑިއަށް ވެރިވާން ފެށި ވަގުތު ޖިންސްގެ ޖީބުގައި އޮތް އޭނަގެ ފޯނު ވައިބްރޭޓްވާން ފެށިއެވެ. ފޯނު ނަގައި ބަލާލިއިރު ސްކްރީނުން ނަސްރާގެ ނަން ފެނިފައި ޔޫނުސް ފޯނު ހިފައިގެން ތަންކޮޅެއް ދުރަށް ޖެހިލިއެވެ.

 

“ސަލާމް.” ފޯނު ކަންފަތުގައި ޖައްސައި ތަންކޮޅެއް މަޑު އަޑަކުން ޔޫނުސް ބުނެލިއެވެ.

 

“ވަޢަލައިކުމުއްސަލާމް. ޔޫނުސް ކިހިނެއްތަވީ ޖަލްސާގަ؟ ކޮންމެވެސް މީހަކު ހަޅޭއްލެވި އަޑު އިވުނުތަނާ އެޗް.އެން ޓީވީ ކެނޑިއްޖެ. އެހެން ޗެނަލަކުން އެ ޖަލްސާ ނުދައްކާ. ހަމަނުޖެހުމެއް ހިނގީތަ؟ ކީއްވެތަ މާ ބޮޑަށް ލަސްވަނީ؟” ކޮޓަރި ތެރޭގައި ކޮޅަށް ހުރި ނަސްރާ ހިސާބަކަށް ކަންބޮޑުވެފައިވުމުން އޭނައަށް އެތައް ސުވާލެއް އެއްފަހަރާ ކުރެވުނެވެ.

 

“ނަސްރާ…..ޖަލްސާގަ ހިނގި ކަންތައް ކިޔައިދޭނަން ފަހުން އިރާދަކުރެއްވިއްޔާ. އަހަރެން މިހިރީ ސަލާމަތުން. ކޮންމެވެސް ކުއްޖަކަށް އަނިޔާއެއްވެގެން އެކުއްޖާ ގޮވައިގެން ހޮސްޕިޓަލަށް އައިއްސަ މިހިރީ. ހުރިހާ ވާހަކައެއް ކިޔައިދޭނަން ގެއަށް ގޮއްސަ. މިހާރު ބާއްވަނީ. ބާއި.” ޔޫނުސް އެހެން ބުނެލަމުން ފޯނު ކަނޑާލީ އެމަޖެންސީ ރޫމުގެ ދޮރު ހުޅުވުނު ހެން ހީވުމުންނެވެ. އޭނަ ހީކުރި ގޮތަށް ފަސްއެނބުރި ބަލާލިއިރު އެ ރޫމުން ނަރުހެއް ނިކުމެފިއެވެ. ޔޫނުސްއަށް ޒާހިޔާ ހުރި ހިސާބަށް އާދެވުނު އިރު ނަރުސް މީހާ ދައްކަމުން ދިޔައީ މިސްބާޙަށް ލޭ ބޭނުންވާ ވާހަކައެވެ. ޒާހިޔާ ކަންބޮޑުވާން ފެށި ވަގުތު ޔޫނުސް ނަރުސް މީހާ ގާތު ކޮން ގްރޫޕެއްގެ ލެއެއްތޯ ސުވާލުކުރިއެވެ. ނަރުސް ޖަވާބު ދިނުމާއެކު ޔޫނުސް އޭނައަށް ލޭ ދެވިދާނެ ވާހަކަ ބުނެލިއެވެ. ޒާހިޔާ ރޮވިފައިހުރެ ޔޫނުސްއަށް ޝުކުރު އަދާކުރިއެވެ.

 

ޔޫނުސް ލޭ ހަދިޔާ ކުރުމަށްފަހު އަނެއްކާވެސް އެމަޖެންސީ ރޫމުގެ ކުރިމައްޗަށް ގޮސް ހުއްޓި އޭނަގެ ފޯނު ބަލާލި ވަގުތު އޭނައަށް އެތައް މެސެޖެއް ލިބިފައި ހުއްޓެވެ. އެ ހުރިހާ މެސެޖަކީ ރާއްޖެ ޕްރެސްގެ ނޫސްވެރިން ކޮށްފައި ހުރި މެސެޖުތަކެވެ. އަމީންގެ ދަރިފުޅު އެމްބިއުލާންސްގައި ހޮސްޕިޓަލަށް ގެންދެވުނު ވާހަކަ އޭނަ ނޫހުގައި ނުޖަހާތީ އެންމެންވަނީ އެކަމުގެ ޝަކުވާކޮށްފައެވެ. އެމީހުންނަށް އެ ޚަބަރު ލިބުނީ ކިހިނެއްބާވައޭ ޔޫނުސްގެ ހިތަށްއެރިއެވެ. އިރުކޮޅަކު ވިސްނުމަށްފަހު ޔޫނުސްއަށް ކަން ވީގޮތް އެނގުމުން އޭނަ ފޯނުން ކޮންމެވެސް އެހެން އޮންލައިން ނޫހަކަށް ވަދެލައިފިއެވެ. ނޫހުގެ އެންމެ ފަހުގެ ޚަބަރުގައި ވެސް ޖަހާފައި ހުރީ ޒަޚަމްވެފައި އޮތް މިސްބާޙް އެނދެއްގައި އޮތް ފޮޓޯއެވެ. ޚަބަރު ހުޅުވައި ބަލާލިއިރު އެ ޚަބަރުގައި އޮތީ ޒާހިޔާ ހޭނެތިފައި އޮތް މިސްބާޙް ގޮވައިގެން އެމްބިއުލާންސްގައި ހޮސްޕިޓަލަށް ދިޔަ ވާހަކައެވެ. އަދި މިސްބާޙަށް އެ ޒަޚަމްތައް ލިބުނީ ކިހިނެއްކަން ނޭނގޭ ކަމަށާއި އަމީން ހޮސްޕިޓަލަށް ހާޒިރު ނުވާ ވާހަކަ ވެސް އޮތެވެ. އެ ކުއްލި ޚަބަރު ނިންމާފައި ވަނީ މިރޭގެ ޖަލްސާގައި ކޮންމެވެސް މީހަކު މިސްބާޙާއި ބެހޭގޮތުން ދެއްކި ވާހަކައިންނެވެ. ޔޫނުސް އެހެނިހެން އޮންލައިން ނޫސްތަކަށް ދިޔައިރު ވެސް އެ ޚަބަރު ޖަހާފައިވަނީ ހަމަ އެކަހަލަ ގޮތަކަށެވެ. އެޗް.އެން ނިއުސް ފިޔަވައެވެ. އެޗް.އެން ނިއުސްގައި ޖަލްސާގައި ހިނގި ކަންތަކުގެ ވާހަކަ ޖަހާފައެއްނުވެއެވެ. ޚުދު އޭނަ ވެސް މި ޚަބަރު ލިޔުނު ނަމަ ލިޔާނީ އެހެން ކަމުގައި ޔޫނުސްއަށް ހިތާހިތުން ކިޔާލެވުނެވެ. އޭނައަށް ޙަޤީޤަތް ނޭނގޭ ވާހަކައެއް ލިޔެ އޭނަ މީހެއްގެ ނަން ބަދުނާމު ކުރާކަށް ބޭނުމެއް ނުވެއެވެ. މިސްބާޙަކީ ގޯސްވެދާނެ ކުއްޖަކަށް ވިޔަސް ތުންތުންމަތިން އެހެން ދެކެވޭ ވާހަކައަކަށް އިތުބާރު ކުރުމަކީ އޭނަ ގެންގުޅޭ އުޞޫލެއް ނޫނެވެ. އަދި އަމުދުން މިސްބާޙް ގޯސް ނުވެވެސް ހިނގައިދާނެކަމަށް ޔޫނުސްގެ ހިތް ބުންޏެވެ. އޭނަ ކުރިމަތީގައި އިން ގޮނޑި ބަރިން ގޮނޑިއެއްގައި މާޔޫސްވެފައި އިން ޒާހިޔާއަށް ބަލާލިއެވެ. މިސްބާޙް ހަމައަކަށް އެޅުނު އިރަކުން މިސްބާޙާއި ޒާހިޔާ ކައިރިން ޙަޤީޤަތް އަހާފައި މެނުވީ މިރޭ ހިނގި ކަންތައްތަކުގެ ވާހަކަ ނުޖަހަން ޔޫނުސް ނިންމިއެވެ. އެންމެ އަވަހަށް ޚަބަރު ނުޖެހުނަސް ޔޫނުސްއަށް މިފަހަރު އެއީ މާ ބޮޑު މައްސަލައަކަށް ނުވިއެވެ.

 

ނުނިމޭ