Asr (Part 26)
އެވަގުތު ތަށިގަނޑު ތެރެއިން ލޭ ފެނިފައި އޭނަގެ ދެލޯ ބޮޑުވިއެވެ. އޭގެ ދެވަނަ ސިކުންތުގައި އޭނަ މޫނުބަލާ ލޯގަނޑަށް ބަލާލި ވަގުތު އޭނަގެ ތުންފަތުން ފެށިގެން ދަތްދޮޅިއާއި ހަމައަށްވެސްވީ ލެއެވެ. އިރުކޮޅެއް ވަންދެން އަމިއްލަ ސޫރައަށް ބަލަން ހުރުމަށްފަހު ވިސާމް ކުއްލިއަކަށް ފެން އިސްކުރު ދޫކޮށްލަމުން އަވަސްއަވަހަށް އަނގަ ދޮންނަން ފެށީ ތުރުތުރު އަޅަމުން ދިޔަ ދެ އަތުންނެވެ. އެވަގުތު އޭނަގެ ހިތް ބިރުވެރިކަމުން ރޫރޫއަޅަމުން ދިޔައެވެ. އޭނައަށް ކިހިނެއްވީބާއޭ އޭނަގެ ހިތަށްއަރަން ފެށިއެވެ. ކަންތައްވެގެން ދާނެ އެންމެ ގޯސް ޚިޔާލު ހިތަށްވެރިވެގެން ދިޔުމުން ވިސާމް އިސްކުރު ބާރުކޮށްލުމަށްފަހު ފާޚާނާއިން ނިކުމެ ކޮޓަރިން ނިކުންނަން ދިޔައެވެ.
“ނާޒް!” ކޮޓަރީގެ ދޮރާއި ހަމަވަމުން ދިޔަ ވަގުތު ވިސާމަށް އެ ނަމުން ގޮވާލެވުނީ ދެންމެ ވީ ކަންތައް ޙިއްސާ ކުރެވޭނެ މީހަކަށް އެންމެ ގާތުގައި ހުރީ އެ ފަރާތްކަމަށްވާތީވެއެވެ. އޭނަ ކޮޓަރީގެ ހުޅުވާފައިވާ ދޮރުމައްޗަށް އަރައި އަނެއްކާވެސް އެ ނަމުން ގޮވާލަން އުޅުނު ވަގުތު ހުރަސްއެޅުނީ މެހެނާޒް ވާހަކަ ދެއްކި އަޑަށެވެ.
“ދީފީމޭ…..ނޫން އޭނައަކަށް ޝައްކެއްނުވާނެ. ހެހެ…..އަދި ޚަލާސްވާވަރު ވާނީ 5 ވަރަކަށް ތަށި ދެވުނީމަ. މި ހަފްތާ ތެރޭގަ އެކަން ކޮށް ނިމޭނެ. އަހަރެންގެ ފައިސާ ތައްޔާރަށް ބަހައްޓާތި!” އޭނައަށް ފުރަގަސްދީގެން ހުރި މެހެނާޒް ފޯނު ކަންފަތުގައި ޖައްސައިގެން ހުރެ ދެއްކި ވާހަކަތަކުން ވިސާމަށް ކަޅި ދެފަރާތަށް ހިންގަމުން ވިސްނާލެވުނެވެ. ހަމަ އެއާއެކު މި ވީގޮތް ނަގައިގަނެވުމުން އޭނަގެ ހިތް އާދަޔާ ޚިލާފަށް މާޔޫސްވެގެން ދިޔައެވެ. ދާދި ދެންމެއަކު އެ ހިތް ހަމަޖެހުމަށްޓަކައި ބަރޯސާވާން އުޅުނު ފަރާތް އެ ހިތުގެ ދުޝްމިނަކަށްވެއްޖެކަން އެނގުންވުމުންނެވެ. ކީއްވެ ހެއްޔެވެ؟ އޭނައާއިމެދު މިގޮތަށް ކަންތައްވާން އޭނަ ކުރީ ކޮން ކުށެއްހެއްޔެވެ؟ ދުނިޔޭގެ ކޮންމެ މީހަކުހެން އޭނަވެސް ބޭނުންވީ އޭނަގެ ކުޑަކުޑަ ޢާއިލާއަކާއެކީ އުފަލުގައި އުޅޭށެވެ. ނަމަވެސް އުފާވެރިކަން ހޯދުމަށްޓަކައި މި ދުނިޔޭގައި އެއްވެސް މީހަކަށް ބަރޯސާވެވެން ނެތީތާއެވެ. ހިތަށް ވެރިވި އެ ޚިޔާލާއެކީ އެ ހިތް ވިސާމްގެ މޭތެރޭގައި އޮވެ ގެނބުނެވެ. އިސްޖެހިފައިހުރެ ވިސާމަށް އަނެއްކާވެސް މެހެނާޒަށް ބަލާލެވުނީ އޭނަ ހީގަތް އަޑަށެވެ. އޭނަ އަދިވެސް ހުރީ ފޯނު ކަންފަތުގައި ޖައްސައިގެންނެވެ. މަންޒަރު ބަލަން ހުރެފައި ވިސާމް ބުމަގޮށްޖަހާލަމުން ފުން ނޭވައެއް ދޫކޮށްލީ ވަރުބަލިވެގެން ކަހަލަ ގޮތަކަށެވެ. އޭނަ ޙަޤީޤަތުގައި ވެސް ވަރުބަލިވީއެވެ. ގުޅުމެއް ދަމަހައްޓަން މީހަކަށް މަސައްކަތް ކުރެވޭނީ މިހާވަރަށެވެ. މި ގުޅުން ދެމިއެއް ނޯންނާނެކަން މިއަދު މެހެނަޒް ސާބިތުކޮށްދީފިއެވެ. ނަމަވެސް ވިސާމް އަމިއްލަ ރައްކާތެރިކަމަށްޓަކައި ފިޔަވަޅު އަޅައި ދެންވެސް މެހެނާޒާއި އެކީ އުޅެވޭތޯ ބެލިއެވެ. ބައްޕަގެ މިސާލުގައި ހިފައި ކޮންމެ ކަމެއްގައި ވެސް އެންމެ ރީތި ގޮތް ޚިޔާރު ކުރުމަށެވެ. ކޮންމެވެސް އެއްދުވަހަކުން ފަޚުރުވެރިކަމާއެކީ އޭނައާއިބެހޭ ގޮތުން އެފަދަ ވާހަކައެއް މިޝްކާއަށް ކިޔައިދިނުމުގެ ނިޔަތުގައެވެ. މިއަދު އޭނަ މެހެނާޒް ވަރިކުރަން އުޅެފިނަމަ އޭނައަށް ރުޅި އިސްކުރެވޭނެކަން ޔަޤީނެވެ. އެއީ ރީތި ގޮތަކަށް ނުވާނެއެވެ. އެހެންކަމުން މެހެނާޒް އަމިއްލައަށް މި ގުޅުން ކަނޑާލަން އެދޭ ދުވަހަކަށް ވިސާމް އިންތިޒާރު ކުރަން ފެށިއެވެ.
ވިސާމްގެ އެ އިންތިޒާރު މާ ދިގެއް ނުވިއެވެ. އެ ދުވަސްފަހުން މާ ގިނަ ދުވަހެއްނުވެ ފިލްމްގެ ޝޫޓިންގް ނިމުމުން މެހެނާޒް ގިނަ ވަގުތުތައް ގޭގައި ހޭދަކުރަން ފެށިއެވެ. ގޭގައި ވިސާމަށް މީރު އެއްޗެހި ކައްކައި ހިނިތުންވުންތަކާއެކީ އޭނައަށް ޚިދުމަތްތެރިވާން މަސައްކަތް ކުރިއެވެ. ވިސާމް ކިތަންމެ ބޭނުމެއްނުވިޔަސް އެ ހިނިތުންވުންތައް ފެނިފައި އޭނަ ހިސާބަކަށް ބަލިކަށިވެއެވެ. އެއީ އެންމެ ފުރަތަމަ އޭނަގެ ހިތުގެ އެންމެ ފުންމިނާއި ކުޅެލި ސޫރައަކީ އެއީ ކަމަށްވާތީވެ ކަންނޭނގެއެވެ. އޭނައަށް ބައެއްފަހަރު ހުރިހާ ޙަޤީޤަތްތަކެއްގެ މަތިން ހަނދާން ނައްތައި މެހެނާޒްގެ ސަމާސާތަކުގައި ބައިވެރިވެވެއެވެ. މެހެނާޒް ޙަޤީޤަތުގައި ވެސް ބަދަލުވީކަން ޤަބޫލުކުރަން އޭނަގެ ހިތުގެ ކަނަކުން ގޮވައެވެ. އޭނަ ބައެއްފަހަރު މިޝްކާ ކައިރިއަށް ވެސް ދާ ގޮތުން އެއީ އެކަމުގެ ހެއްކެއް ކަމަށް ވިސާމްގެ ހިތް ބުނެއެވެ. އެހެނަސް މެހެނާޒް އޭނައަށް އެއްޗެއް ކާންދޭން އުޅޭ ކޮންމެ ފަހަރަކު އޭނައަށް އިންކާރު ކުރެވެމުން ދިޔައީ އެންމެ ފަހަކަށް މެހެނާޒް ދިން ޖޫސްތަށި ބުއިމުން ވީގޮތް ހަނދާންވެފައެވެ. އެހެންކަމުން ވިސާމް މުޅިން ވެސް ބޭރުން ކާންފެށިއެވެ. އެހެންދާ ކޮންމެ ފަހަރަކު އޭނައަށް މެހެނާޒަށް އިތުބާރު ކުރެވޭނެނަމައޭ ވިސާމްގެ އެކަނިވެރިކަމުން ފުރެމުން ދިޔަ ހިތް ބުނަމުން ދިޔައެވެ. އެއްމީހެއްދެކެ އެއްވަގުތެއްގައި ލޯބިވެ ނަފްރަތުވެސް ކުރެވޭނެކަން ވިސާމަށް އެނގުންވީ އެދުވަސްވަރެވެ. އޭނައަށް ނޭނގުނު ކަމަކީ އޭނަގެ ހިތުން ޖާގައެއް ދެވިފައިވި މީހަކު ހުރީ އޭނަ ކައިރީގައި ހުރިހާ ވެސް ސަބަބަކީ އޭނައާއި ދެކޮޅަށް ރޭވި ރޭވުމެއް ކަމެވެ. އަދި އެ ރޭވުން ކާމިޔާބު ނުވާހެން ހީވުމުން އޭނަ އިތުރަށް ވިސާމާއިއެކީ ހުންނަން ބޭނުން ނުވާނެކަމެވެ.
“އަހަރެން ބޭނުން ވަރިވާން.” މެހެނާޒް އެހެން ބުނެލީ އެއްރެއަކު ހެދުން އަލަމާރިން 5 ވަރަކަށް ހެދުން އެކީގައި ނަގައިގެން ގޮސް އެނދުމަތީގައި ބާއްވަމުންނެވެ. މެހެނާޒްގެ ބަސްތައް ކިޔަވާ މޭޒުދޮށުގައި ހުރި ވިސާމްގެ ކަންފަތާއި ހަމައަށް ފޯރީ ހޮނު ގުގުރީގެ ސިފައިގައެވެ. އޭނައަށް ހިރިލަން ވެސް ނޭނގިފައި އިންގޮތަށް އިނދެވުނެވެ. މި ދުވަސް އަންނާނެކަމުގެ ނިޝާންތައް މި ހުރިހާ ދުވަހުވެސް އޭނައަށް ފެންނަމުން ދިޔައެއްކަމަކު އެ އަޑު އިވިގެން ދިޔުމުން ވިސާމަށް ހީވީ މިއީ އެއްވެސް އިންޒާރެއްވެސް ނެތި އައި ޠޫފާނެއް ހެންނެވެ. އޭނަ ފަސްއެނބުރި ބަލާލި ވަގުތު މެހެނާޒް ކުރަމުން ދިޔަ ކަންތައް ފެނިފައި އޭނައަށް ގޮނޑިން ތެދުވެވުނެވެ.
“ނާޒް! އަހަރުމެންގެ ދަރިފުޅާމެދު އެއްފަހަރުވެސް ވިސްނާލިންތަ؟ މިޝްކާ ކިހިނެއް މަންމައަކާނުލާ ބޮޑުވާނީ؟” ދެވަނަ ފަހަރަށް އެނދުމަތީގައި ހެދުންތައް ބޭއްވުމަށްފަހު ދާން އުޅުނު މެހެނާޒްގެ އަތުގައި ހިފައި ވިސާމް ވިސްނައިދޭން އުޅޭ ފަދައަކުން ވާހަކަ ދެއްކިއެވެ. އޭނަ އަމިއްލަ އިޙްޞާޞްތަކުގެ ވާހަކަ ނުދައްކައި މިޝްކާގެ ނަން އިސްކުރީ މެހެނާޒްގެ ހިތުގައި މިހާރު މިޝްކާއަށްޓަކައި ލޯތްބެއް އުފެދިފައި އޮވެދާނެއޭ ހިތާއެވެ. އެހެނަސް…..
“ބޮޑު ނުވިއްޔާ އޭނަ ޖަންގައްޔަކަށް ގެންގޮސް ވަޅުލާ. މަށަށް ކޮންކަމެއް؟ މަ ނޫޅެން ދަރިފުޅެކޭ ކިޔާފަ މަ ލޯބިނުވާ މީހަކާއެކީ އުޅޭކަށް.” މެހެނާޒް އޭނަގެ އަތް ފޮޅުވާލަމުން ވިސާމްގެ އަތުން ދޫކުރުވިއެވެ. އޭނަ ވިސާމަށް ފަސްދީފައި ދާން އުޅުނު ވަގުތު ވިސާމް ހުރީ ރުޅިން ރަތްވެފައެވެ. އޭނަގެ ރުޅިވެރިކަން އެހާ ހިސާބަށް ދިޔައީ މެހެނާޒް އޭނަގެ ދަރިފުޅާއިމެދު ބުނެލި ވާހަކައިންނެވެ. ވޭތުވެ ދިޔަ ދުވަސްތަކުގައި މިޝްކާ ވެސް އަތްމައްޗަށް ނަގައިގެން މި އަންހެނާ ދެއްކީ ދަޅައެއްކަން އެނގުންވުމުންނެވެ. އަމިއްލަ ދަރިއަށްޓަކައި ލޯތްބެއް ނުވާ މީހެއްގެ ހިތުގައި އޮންނާނީ ކޮން ރަޙުމެއް ހެއްޔެވެ؟ އެފަދަ މީހެއްގެ ފަރާތުން އޭނައަށް އަމިއްލަ ނަފްސަށްޓަކައި ވެސް ލޯތްބެއް އުއްމީދު ކުރެވޭނީ ކިހިނެއް ހެއްޔެވެ؟ މިފަދަ ޚިޔާލުތަކާއެކީ އައި ގަދަ ރުޅިއާއެކު ވިސާމް އަނެއްކާވެސް މެހެނާޒްގެ އަތުގައި ހިފައި ލުއްކެއްޖަހައި އޭނަ ކައިރިއަށް ގެނައެވެ.
“ހީނުކުރާތި މަށަށް ނޭނގޭ ކަމަށް ކަލޭ ކުރާ ކަންތައް. މަ ކަލެއަށް ކުރި ހުރިހާ ޤަދަރެއް ވެއްޔާ މޮޑެވިއްޖެ. ކަލެއަށް ކުރިހާ އިޙްތިރާމެއް މިހާތަނަށް ކުރީ ތިއީ އަހަރެންގެ ދަރިފުޅުގެ މަންމައަށްވީތީ. ބައިވަރު ދުވަސްވަންދެން ކެތްކުރެވިއްޖެ. އެކަމަކު ދެނެއްނޫން……މެހެނާޒް ތިހިރީ ވަރިކޮށްފަ!” ވިސާމް އޭނަގެ ފަހު ބަސްތައް ބުނެލީ އަޑުގެ ކޮޅަށެވެ. އެ ބަސްތަކުން މެހެނާޒަށް މާ ބޮޑު އަސަރެއް ކުރިހެނެއް ހިއެއްނުވެއެވެ.
“ވަރަށް ބޮޑަށް ޝުކުރިއްޔާ!!” މެހެނާޒް އަނެއްކާވެސް ވިސާމްގެ އަތް ފޮޅުވާލަމުން ވިސާމަށްވުރެ އަޑު ހަރުކޮށް ބުނެލިއެވެ. އެއަށްފަހު އިތުރު އެއްޗެކޭ ނުބުނެ އޭނަގެ ހުރިހާ ހެދުންތައް ފޮށްޓައް އަޅައި ބަންދުކޮށްލިއެވެ. އޭނަ ކޮޓަރިން ނިކުންނަން ދިޔަ ވަގުތު ވިސާމަށް އޭނައަށް ފަސްދީފައި އެނދުގައި އިށީނދެވުނެވެ. މެހެނާޒް އެޕާޓްމެންޓްގެ ދޮރު ހުޅުވައި ބާރު އަޑަކާއެކީ ލައްޕާލި އަޑަށް އޭނައަށް ދެލޯ މަރާލެވުނެވެ. ނޭނގޭ ސަބަބަކާހުރެ އެ މަރާލެވުނެ އެސްފިޔައިގެ ދޭތެރެއިން އޭނައަށް ފެންނަން ފެށީ އޭނައާއި މެހެނާޒްގެ ގުޅުން ފެށިގެން އައިއިރު ދެމީހުން އެކީގައި ހޭދަކުރި އުފާވެރި ދުވަސްތަކެވެ. މެހެނާޒްގެ ލަދުރަކި ހިނިތުންވުންތަކާއި އޭނަގެ ބީހުންތަކާއި އެ އަތު ތެރޭގައި ވޭތުވި ރޭތަކެވެ. ހަމަ އެއާއެކު ވިސާމްގެ މޭގައި ރިހުމެއް އުފެދުނެވެ. އޭނަ ބޭނުންވީ އެ މާޒީއަށް އަނބުރާ ދާށެވެ. މެހެނާޒް ބަދަލުނުވިނަމައޭ އޭނަގެ ހިތަށް ހާސްވަނަ ފަހަރު އެރިއެވެ. އެހެނަސް ދެން މެހެނާޒް ދުވަހަކުވެސް އޭނަ ގާތަށް ނާންނާނެކަން އެނގުންވުމުން ވިސާމަށް މާޔޫސީ ގޮތަކަށް އޭނަގެ މޫނުގައި ދެއަތް އަޅާލަމުން ފުން ނޭވައެއް ދޫކޮށްލެވުނެވެ.
ވަރިވި ފަހުން ކުޑަ ދުވަސްކޮޅަކަށް ވިސާމްގެ ދުވަސްތައް ހޭދަވަމުން ދިޔައީ އެކަހަލަ ގޮތަކަށެވެ. އެއް ސިކުންތުގައި އޭނަ މަރާލަން އުޅުނު މީހަކާއި ވަކިވެގެން ދިޔައީތީ ސިކުނޑިއަށް ލުއެއް ލިބޭއިރު އަނެއް ސިކުންތުގައި އޭނަގެ ހިތް އުފާވެރިކަމުން ފުރާލަދިން އަންހެން ކުއްޖާ އޭނަ ގާތުގައި ނެތީތީ އޭނައަށް ހިތާމަ ކުރެވެމުން ދިޔައެވެ. ހަމަޖެހުމެއް ނެތް ހިތަކާއެކީ ދުވަސްތައް ގުނަމުން ދިޔަ ވިސާމަށް ނޭނގުނު ކަމަކީ މެހެނާޒާއި އޭނަގެ ގުޅުމަށް ނިމުމެއް އަޔަސް އޭނަގެ ދުޝްމިނުންގެ ރޭވުންތަކަށް ނިމުމެއް ނާންނަކަމެވެ.
އެއްދުވަހަކު ވިސާމް އޭނަގެ އެޕާޓްމެންޓްގެ ކާމޭޒު ދޮށުގައި އިންދާ އޭނައަށް ފޯން ކޯލެއްއައެވެ.
“ހެލޯ.” ވިސާމް އޭނަގެ އާ އަލްބަމްގެ ޕްރޮޑިއުސަރު ޔާސިރަށް ޖަވާބުދާރީ ވަމުން ފޯނު ކަންފަތުގައި ޖައްސާލިއެވެ.
“އާނ ވިސާމް. މިގުޅާލީ އަހަރުމެންނަށް ވިސާމްގެ އާ އަލްބަމް ނުނެރެވޭނެ ވާހަކަ ބުނެލަން.” ޔާސިރު އާދައިގެ އަޑަކުން ބުނެލި ވާހަކައިން ވިސާމަށް ޝޮކެއް ލިބުނެވެ.
“ވަޓް؟!” ވިސާމަށް ހަރުއަޑުން އަހާލެވުނެވެ. އެވަގުތު ރެސްޓޯރެންޓްގައި ތިބި ބައެއް މީހުންގެ ނަޒަރުތައް ވެސް އޭނައަށް އަމާޒުވިއެވެ.
“ތި އަޑުއިވުނީ ރަނގަޅަށް. ވިސާމް އެންމެ ފަހަކަށް ފޮނުވި ޅެންތަކުގަ އެހާވަރުގެ ކޮލިޓީއެއް ނެތް. އަހަރުމެން ކުންފުނި ރީބްރޭންޑް ކޮށްގެން އެންމެ ފުރަތަމަ ނެރޭ އަލްބަމް ހިޓްވާނެކަމުގެ ޔަޤީންކަން އަހަރުމެންނަށް އޮންނަން އެބަޖެހޭ. އެހެންވީމަ……..” ޔާސިރުގެ ވާހަކަ މެދުކެނޑުނެވެ.
“ވަޓް ދަ ހެލް؟! ޔާސިރު އަމިއްލައަށް އެ ލަވަތައް އެޕްރޫވްކުރީ. ތިހެންނެއް ނެހެދޭނެ ޔާސިރަކަށް. އަހަރުމެން އޮތީ އެއްބަސްވުމެއްގަ ސޮއިކޮށްފަ.” ވިސާމް ހާސްކަމެއްގެ ތެރޭގައި އިނދެ ހަނދާންކޮށްދިނެވެ.
“އެއްބަސްވުމެކޭ؟ ކޮން އެއްބަސްވުމެއްގެ ވާހަކަތަ ތި ދައްކަނީ؟ އަހަރުމެންގެ މެދުގަ އޮތް އިތުބާރެއްގެ ސަބަބުން މިފަހަރު އެއްބަސްވުމެއް ނެތަސް އޯކޭ ވާނެއޭ ބުނީ ވިސާމް އަމިއްލައަކަށްނޫންތަ؟” ވިސާމް ދެއްކި ވާހަކައެއް ޔާސިރަކަށް ނޭނގުނު ފަދައެވެ. ހަމަ އެވަގުތު ވިސާމް ވެސް ހިނދުކޮޅަކަށް އޮޅުން އެރިއެވެ. ޔާސިރަކީ ޙަޤީޤަތުގައި ވެސް އޭނަ އިތުބާރު ކުރާ ފަރާތަކަށްވާތީވެއެވެ. އެހެނަސް އެ އެއްބަސްވުމުގައި ސޮއި ކުރެވުނު ހަނދާން އިއްޔެ ވީ ކަމެއްހެން ހަނދާންވުމުން ވިސާމް އިތުރަށް ވާހަކަ ދެއްކިއެވެ.
“ނޯ…….ވީ ޑިޑް ސައިން އަ ކޮންޓްރެކްޓް! އަހަރެން އަތުގަ މިހާރުވެސް އޭތި އޮންނާނެ.” ވިސާމް ސާބިތުކަމާއެކީ ބުނެލިއެވެ. އެއާއެކު ޔާސިރު ފުން ނޭވައެއް ދޫކޮށްލި އަޑު އިވުނެވެ. ވިސާމަށް ޙަމްދަރުދީވާ ފަދައަކުންނެވެ.
“ވިސާމަށް ތިހެން ހީވަންޏާ އެންމެ ރަނގަޅު. މި މައްސަލަ ޙައްލުވަންދެން ދުވަސްކޮޅަކަށް މަޑުކޮށްފާނަން ޝިއާފްގެ އަލްބަމް ނުނެރެ. ހީ އިޒް ރިޕްލޭސިންގް ޔޫ.” ޔާސިރު އެންމެ ފަހަކަށް ބުނެލި ވާހަކައިން ވިސާމްގެ މެއަށް ނުބައި ގޮތެއް ވީ ހިނދު އޭނަގެ ނިތަށް ރޫ ގިނަވިއެވެ. ޝިއާފްގެ ނަން އިވިފައި ވިސާމްގެ ހަނދާނަށް ވަގުތުން އައީ މެހެނާޒާއި ޝިއާފާއި ދެމެދު ބަދަލު ކުރެވިފައި ހުރި މެސެޖުތަކެވެ. ހަމަ އެއާއެކު މި ވީ ގޮތް ނަގައިގަނެވުމުން އޭނަ ވަގުތުން ފޯނު ކަނޑައި ގެއާއި ދިމާލަށް މިޞްރާބު ޖެހިއެވެ.
ވިސާމް އެޕާޓްމެންޓްގެ ދޮރުން ވަދެ ވަގުތުން އޭނަ ޔާސިރާއިއެކީ ވި އެއްބަސްވުމުގެ ލިޔުންތައް ފެނޭތޯ އުޅުނެވެ. ކޮޓަރިއަށް ގޮސް އޭނަގެ ކިޔަވާ މޭޒު ކައިރީގައި ހުންނަ ކަބަޑަކުން ނެގި ފައިލް ހުޅުވާލިއިރު އެންމެ ފުރަތަމަ ވެސް ފެނިގެން ދިޔައީ ވޭތުވެ ދިޔަ އަހަރުގެ އެއްބަސްވުމެކެވެ. ވިސާމް ރަނގަޅަށް ބަލާލިއިރު އެ ފައިލްގައި މި އަހަރުގެ އެއްވެސް ލިޔެކިޔުމެއް ނެތެވެ. ހަމަ އެއާއެކު އޭނައަށް ދެދަތްޕިލަ ޖައްސައި މެހެނާޒްގެ ނަން ކިޔާލެވުނެވެ. އޭނަ މެހެނާޒްގެ ނަންބަރަށް ވަގުތުން ގުޅާލިއެވެ. ފޯނު ކަންފަތުގައި ޖައްސާލިތަނާހެން އެ ފޯނު ނިވާލެވިފައިވާ ވާހަކަ އިވެން ފެށުމުން ވިސާމްގެ ދަތްކުނޑި ވިކުނެވެ. އޭނަ 10 ވަރަކަށް ފަހަރު އެ ފޯނަށް ގުޅުމުން ވެސް އެއްޖަވާބެއް ލިބުމުން އޭނައަށް ފޯނު އަތުގެ ކޮޅަށް ހޫރާލެވުނެވެ. މެހެނާޒްގެ ގާތަށް ގޮސްގެން ވެސް ދެން އެ އެ ލިޔެކިޔުންތައް ނުލިބޭނެކަން ޔަޤީންވުމުން ވިސާމް ކޯޓާއި ހަމައަށް އެ މައްސަލަ ގެންދިޔައީ އޭނައަށް އިންސާފު ލިބޭނެކަމަށް ހީކޮށެވެ.
އެހެނަސް ބޮޑު އަގު ދީފައި ވަކީލަކު ގެނެސްގެން ވިސާމަށް ގެއްލުމެއް ނޫނީ ނުލިބުނެވެ. އޭނައާއި އެއްކޮޅަށް ހުރި ހެކިތައް މަދުވުމުން އެންމެނަށް ވެސް ޤަބޫލުކުރެވެމުން ދިޔައީ ޔާސިރު ދައްކަމުން ދިޔަ ވާހަކަތަކެވެ. މެހެނާޒް ވެސް އެއްދުވަހު ކޯޓަށް ގެނައުމުން އޭނައަށް މި މައްސަލައާއި ބެހޭގޮތުން އެއްވެސް ކަމެއް އެނގޭކަމަކަށް ނުވިއެވެ. ވިސާމްގެ ކޮޅު ދެރަވަމުން ދިޔަދިޔަހެން ޔާސިރު އަދި އިތުރަށް ވެސް އޭނައަށް ފައިސާ ލިބޭނެ ގޮތަށް އޭނަ ވިސާމަށް އެޑްވާންސެއް ދިން ވާހަކަ މައްސަލައިގެ ތެރެއަށް ގެނައެވެ. އެ މައްސަލަ ނިމުނުއިރު ވިސާމްގެ އަތުން ލައްކައިން ލާރި ގެއްލިގެން ދިޔައެވެ.
މައްސަލައިގެ އެންމެ ފަހު އަޑުއެހުން އޮތްދުވަހު ވިސާމް ގެއަށް އައީ ނާކާމިޔާބީގެ އިޙްޞާޞްތަކުން ފުރިގެންވި ހިތަކާއެކީގައެވެ. އޭނަ ހަމަ އެދުވަހު މިޝްކާ ބެލުމަށްޓަކައި އޭނަ ގެނެސްފައިހުރި ބިދޭސީ އަންހެން މީހާވެސް ވަޒީފާއިން ވަކިކުރަން ޖެހުނީ، އޭނަ އަތުން ދުވަހަކުވެސް ފައިސާ މަދު ނުވާވަރަށް ފައިސާ މަދުވުމުންނެވެ. އަދި އެ ފައިސާ އިތުރުވެގެންދާނެ އަލިމަގެއް އޭނައަށް ކައިރިން ފެންނަން ނެތީތީވެއެވެ.
މިޝްކާ ބަލާނެ އިތުރު މީހަކު ނެތުމުން ވިސާމް ގިނަ ވަގުތު ގޭގައި ހޭދަކުރަން ޖެހުނެވެ. އޭނަ އެކަމާމެދު ޝަކުވާއެއްނުކޮށް އާ ޅެންތައް ލިޔެވޭތޯ ބެލިއެވެ. އެހެނަސް ޙާލަތް ބަދަލުވެފައި އޮތް ގޮތުންނާއި އެދުވަހު އޮޅުވާލުމަށްޓަކައި ވިޔަސް ޔާސިރު އޭނަގެ ޅެންތައް ދަށްކޮށްލި ގޮތުން ވިސާމް އަމިއްލަ ނަފްސަށް ކުރާ އިތުބާރަށް އަސަރުކޮށްފައިވެއެވެ. އެހެންކަމުން އޭނައަށް އާ ޚިޔާލުތައް ގެންނަން އުނދަގޫވުމުން ވެސް އޭނަގެ ހިތާއި ސިކުނޑި އިތުރަށް ހާސްވަމުން ދިޔައެވެ. އޭނަ ފައިސާއަށްޓަކައި ޚާލިދުބެމެންގެ އެހީއަށް އެދެން ބޭނުމެއްނުވީ އޭނަ އަމިއްލަ ފައިމައްޗަށް ކޮޅަށް ތެދުވަން ބޭނުންވީތީވެއެވެ. އަދި އަމުދުން އޭނަ ޚާލިދުބެމެންނާއި ނުގުޅާތާ އެތައް ދުވަހެއްވެފައިވުމުން އޭނައާއި އެމީހުންނާއި ދެމެދު މިހާރު ގުޅުމެއް އޮންނާނެހެނެއް ވެސް ހިއެއްނުވެއެވެ. އެހެންކަމުން ވިސާމް ވަޒީފާއެއް ލިބޭތޯ އެކިތަންތަނަށް ސިޓީލާން ފެށިއެވެ. އާ ޙަޔާތެއް ފެށުމަށްޓަކައި އޭނަ ޢަޒުމް ކަނޑައެޅި ހިނދު އަދި އޭނަގެ ދުޝްމިނުންގެ އެންމެ ބޮޑު ރޭވުން ފުރިހަމަ ނުވެ އޮތްކަމެއް އޭނަ ނުދެނެ ހުއްޓެވެ.
އެއްދުވަހަކު ގެއިން ހުސްވި ބައެއް އެއްޗެހި ގަނެލުމަށްޓަކައި ވިސާމް މިޝްކާ އުރާލައިގެން ގެއިން ނިކުތެވެ. ފައިސާ މަދުވުމުގެ ސަބަބުން އޭނަ ކާރުވެސް ވިއްކާލާފައިވީތީ އޭނަ ދަތުރުކުރަން ޖެހެނީ ފައިމަގުގައެވެ. އެހެނަސް އެގޮތަށް ކަންތައް ކުރާތާ ހަފްތާތަކެއް ފަހުން ވިސާމް މުޅިންވެސް އެކަމަށް ހޭނުނެވެ. ދުއްވުމުގެ ބަދަލުގައި އޭނަގެ 7 މަހުގެ ދަރިފުޅަށް ހުރިހާ ސަމާލުކަމެއް ދެވޭތީ އޭނައަށް އުފާކުރެވުނެވެ. މިޝްކާ އުރާލައިގެން ދާއިރު އަދިވެސް އެ އަނގައިގައި ކުޅު ނުހިފެހެއްޓޭތީ އިރުއިރުކޮޅާ ވިސާމް ކުޑަ ރުމާކޮޅަކުން ކުޅު ފޮހެދޭން ޖެހެއެވެ. އޭނަ ކޯތާފަތް ދިއްކޮށްލުމުން މިޝްކާ ކުޅާއި އެކީގައި އޭނައަށް ބޮސްދޭ ގޮތުން ފަކުރު ގަތުމުގެ ބަދަލުގައި އޭނައަށް ހުނުން ނޫންކަމެއް ނުކުރެވެއެވެ. އާދައިގެ މަތިން އެދުވަހުވެސް ވިސާމް މާލޭގެ މަގެއްގެ ޕޭވްމެންޓްމެންޓް މަތިން ހިނގާފައި ދިޔައީ މިޝްކާއަށް ލޯބިކުރަމުން ހެމުންނެވެ. އާދައިގެ މަތިން އެވަގުތު އޭނަގެ ސިކުނޑީގައި އެއްވެސް އެހެން ފިކުރެއް ނެތެވެ. އޭނަގެ ވަށައިގެންވި އެއްވެސް މީހަކަށް ވެސް އޭނަގެ ސަމާލުކަން ދެވިފައެއް ނެތެވެ. އުފާވެރިކަމުން ފުރިފައިވި ހިތަކާއެކީ ވިސާމް ފިހާރައަކަށް ވަންނަން އުޅުނުތަނާހެން މީހަކު ހަޅޭއްލަވައިގަތް އަޑާއެކީ ނުހަނު ބާރުމިނެއްގައި ކޮންމެވެސް އެއްޗެއް އޭނަގެ ބޮލުގެ ފުއްކިބައިގައި އައިސްޖެހުނެވެ. ހަމަ އިސާހިތަކު އޭނަގެ ބޯ އަނބުރައި ގަތް ހިނދު މިޝްކާ ރޮއިގަތް އަޑު އިވުނެވެ. އޭނައަށް މިޝްކާގެ ގައިގައި ބާރަށް ހިފަހައްޓާލެވެން އުޅުނީ އެ އަތުން ވާގިދޫވާން އުޅުނުހެން ހީވުމުންނެވެ. އެހެނަސް އެހެން ނެހެދެނީސް އޭނައަށް ވީނުވީއެއްނޭނގި އޭނަ ބިންމައްޗަށް ވެއްޓުނެވެ.
ވިސާމަށް ދެން ހޭލެވުނުއިރު އޭނައަށް އޮވެވުނީ ހޮސްޕިޓަލެއްގެ އެނދެއްގައެވެ. ހޭލެވުނުތަނާހެން އޭނަ ތެދުވަން އުޅުނެއްކަމަކު މުޅި ގައިގައި ރިއްސަން ފެށީތީ އެކަމެއް ނުކުރެވުނެވެ. ހަމަ އެއާއެކު އޭނަގެ ބޮލުގައި ބެންޑޭޖެއް އެޅި އަތުގައި ދަގަނޑު ބޭސްގަނޑެއް އެޅިފައިވިކަން އޭނައަށް އެނގުންވިއެވެ. އޭނަ ދެފަރާތަށް ނަޒަރު ހިންގާލިއިރު އެ ވޯޑުގައި އެހެނިހެން މީހުންވެސް ތިބިތަން ފެނިފައި އޭނައަށް ވީ ކިހިނެއްތޯ އޭނައަށް އަމިއްލަ ނަފްސާއި ސުވާލުކޮށްލެވުނެވެ. މާ ގިނައިރެއްނުވެ އޭނަގެ ބޮލަށް އެރި ތަދާއެކީ މިޝްކާ ރޮއިގަތް އަޑު ކަންފަތުގައި ގުގުމާލިހެން ހީވި ވަގުތު ހިތަށް ވެރިވި ބިރުވެރިކަމާއެކީ މިޝްކާގެ ނަމުން ގޮވައި އޭނައަށް ލުއްކެއްޖަހައި ތެދުވެވުނެވެ. އެވަގުތު އެ ވޯޑުގައި ތިބި އެންމެންގެ ނަޒަރު އޭނައަށް އަމާޒުވިއެވެ. އޭނަގެ އެނދާއި ޖެހިގެން ހުރި ބަލި އެނދުގެ ކައިރީގައި ހުރި ނަރުސް ކުއްޖަކު އޭނައާއި ވާހަކަ ދެއްކިއެވެ.
“އެކުއްޖާއަށް މާ ބޮޑު ގެއްލުމެއް ނުލިބޭ. މަންޒަރު ދުށް މީހަކު ބުނީ ވިސާމަށް މިޝްކާގެ ގައިން ދޫކޮށްލެވުނީ ބިމަށް ތިރިވީ ފަހުންނޭ. އެހެންވީމަ މަޑުމަޑުން ގޮސް ބިންމަތީގައި ޖެހުނީ. ވިސާމަށް ޙަމަލާ ދިން މީހުން މިޝްކާއަށް އެއްވެސް ގެއްލުމެއްނުދޭ.” ނަރުސް ކުއްޖާ ކިޔައިދިނެވެ.
“މި…މި……މިޝީ ކޮބައިތަ؟” ވިސާމް ތުރުތުރު އަޅަމުން ދިޔަ އަޑަކުން ފެންކަޅިވެފައިވާ ދެލޮލާއެކީ އަހާލިއެވެ.
“ކުޑަކުދިންގެ ވޯޑް…ގަ.” ނަރުސް ކުއްޖާގެ ޖުމްލަ ފުރިހަމަ ވެސް ނުވަނީސް ވިސާމް އޭނަގެ ދަގަނޑު ބޭސްގަނޑު ތެރެއިން ނިކުމެފައި ހުރި އިނގިލިތަކުން އަނެއް އަތުގައި ހުރި އައިވީ ނައްޓަން ފެށިތަން ފެނިފައި އެކުއްޖާ ވެސް ހުއްޓުން އަރާ ގޮތްވިއެވެ. އެހެން ނެހެދުމަށް ބުނެލި ވަގުތުން ވިސާމް އުނދަގުލާއެކީ ވެސް އައިވީ ނައްޓާލިއެވެ. އެވަގުތު އެ ދިމާލުން އޭނަގެ އަތުން ލޭ އަންނަން ފެށިއެއްކަމަކު ވިސާމް އެއަކަށް ފަރުވާލެއްނެތި އެނދުން ފައިބައިގެން ގޮސް އެ ވޯޑުން ނިކުތެވެ. ފައިގައި ރިއްސަމުން ދިޔައެއްކަމަކު އެ ތަދަށް ވުރެ މިޝްކާއަށްޓަކައި އޭނަގެ މޭގައި އުފެދުނު ރިހުން ބޮޑެވެ. އަދި އޭނަ ދަންނަ އެ ހޮސްޕިޓަލް ގެ ކުޑަކުދިންގެ ވޯޑަށް ދިޔައެވެ. އެންމެ ފުރަތަމަ ފެނުނު އެނދުގައި މިޝްކާ އޮތްތަން ފެނިފައި ވިސާމް ވަގުތުން އެ ދިމާލަށް ދިޔައެވެ.
އަދި އެ އެނދާއި ހަމަ ކޮށްލަމުން ދެކަކޫ މައްޗަށް ތިރިވެ މިޝްކާއަށް ނަޒަރު ހުއްޓާލިއެވެ. އޭނަގެ ފުރާނަފަދަ ދަރިފުޅު ނިދިފައި އޮތް އިރު އެ ކުޑަ ކަނާތް އަތުގެ ފަލަ މަސްގަނޑުގައި ރަތްކޮށް ރޮނގެއް ހުރިތަން ފެނިފައި ވިސާމަށް ހީވީ އެފަދަ ގޮތަކަށް އޭނަގެ ހިތް ޒަޚަމްވީ ހެންނެވެ. އޭނަގެ ލޮލުން ކަރުނަތައް ފައިބައިގަތް ވަގުތު އޭނައަށް ގިސްލެވެން ފެށިއެވެ. އޭނަގެ ޙަޔާތް މިފަދަ ފައްތަރަކަށް އަންނަންޖެހުނީ ކީއްވެ ހެއްޔެވެ؟ ދާދި އިހަކަށް ދުވަހު އޭނަ އުޅުނީ ދުނިޔޭގައި އެއްވެސް ހިތާމައެއް ތަޙައްމަލުކުރަން ނުޖެހޭ މީހެއްގެ ގޮތުގައެވެ. ނަމަވެސް އެދުވަހާއި މި ދުވަސް ހާދަ ތަފާތެވެ. އޭނައަށް އޭނަގެ މަޝްހޫރުކަމާއި މުއްސަނދިކަން ނުހިއްފެހެއްޓުނު ތާނގައި އޭނައަށް އޭނަގެ ދަރިފުޅުވެސް ދުޝްމިނުންގެ ވަކިތަކުން ސަލާމަތެއް ނުކުރެވުނެވެ. އޭނަ އެހީއަކަށް ވެސް އެދޭނީ ފަހެ ކާކު ކައިރިން ހެއްޔެވެ؟ ޚާލިދުބެމެންނާއި ގުޅުން ހީނަރުވެގެން ދިޔަ ހިނދު އޭނަގެ މަންމަވެސް މިއަދު އޭނައަށް ނަފްރަތު ކުރާނެކަމަށް ވިސާމްގެ ހިތް ބުންޏެވެ. އެވަގުތު އޭނަގެ މޭގައިވި ރިހުން ތޫނުވެ އޭނައަށް އިތުރަށް ރޮވެން ފެށިއެވެ. އެ ހިނދު ބޭރުން ބަންގި ގޮވާއަޑު އިވެން ފެށުމުން ނޭނގޭ ސަބަބަކާހުރެ ވިސާމްގެ ރުއިން ހުއްޓުނެވެ. ތަކުރާރުކޮށް ﷲ ގެ އިސްމުފުޅު އިވެން ފެށުމުން އޭނަގެ މެއަށް ގޮތެއްވިއެވެ. ފުރަތަމަ ފަހަރަށް ބަންގީގެ އަޑު އިވިފައި މަންސޫރުގެ ބަދަލުގައި ވިސާމްގެ ހަނދާނަށް އައީ އޭނަގެ ބައްޕައެވެ. ބައްޕަ ކުރީގައި ވިޔަފާރިއެއް ހުޅުވައިގެން އުޅެނިކޮށް ވަރަށް ބޮޑު ވައްކަމެއްގެ ސަބަބުން މުޅި ވިޔަފާރި ބަނގުރޫޓުވެގެން ދިޔަ ދުވަސްވަރެވެ. ފިހާރަ ބަންދު ކުރި ދުވަހުވެސް ބައްޕަ ނުހަނު އުޖާލާވި ހިނިތުންވުންތަކާއެކީ ހުރިހާ ނަމާދަކަށް ވަގުތުން ގޮސްފައިވެއެވެ. އެކަމާމެދު ވިސާމް ޙައިރާންވެގެން ބައްޕައަށް ހެވެނީ ކީއްވެތޯ ސުވާލުކުރިއެވެ.
“ހެހެ…….ދަރިފުޅާ ވިސާމް! މި ދުނިޔޭގަ އުޅޭއިރު ދިމާވާ އެކަހަލަ ކަންތައްތަކާމެދު ދެރަވާންވެއްޖެއްޔާ މުޅި ޢުމުރު ހޭދަކުރަން ޖެހޭނީ ހިތާމައިގަ. އެއީ މި ދުނިޔޭގައި އަހަރުމެން ކިތަންމެ ބޭނުމެއްނުވިޔަސް ހިތާމަތަކާ ކުރިމަތިލާންޖެހޭނެތީ. އެއީ ﷲ ސުބުޙާނަހޫ ވަތަޢާލާ އެކަން ލައްވަވާފައިވާ ގޮތް. އަހަރުމެން ޖެހޭނީ ހިތާމަވެރިކަމުގައިވެސް އަދި އުފާވެރިކަމުގައި ވެސް އެކަލާނގެއަށް ވަކީލުކުރަން. އަދި އެކަލާނގެ އެންގެވި ގޮތަށް އުޅެވޭތޯ ބަލަން. އެހެން އުޅެވިއްޖެއްޔާ އަހަރުމެންނަށް ﷲ ގެ ރުހިވޮޑިގަތުން ލިބޭނެ. އަދި ދުޢާކޮށްފިނަމަ އެކަލާނގެ އެހީވެސް އަހަރުމެންނަށް ލިބޭނެ އިރާދަކުރެއްވިއްޔާ. އެހެންވީމަ ދަރިފުޅު އަބަދުވެސް ދުޢާ ކުރައްޗޭ. ވަކިން ޚާއްސަކޮށް ދެރަކަމެއް ދިމާވިއްޔާ. އޭރުން ބައްޕައަށް ހަމަ ޔަޤީން ދަރިފުޅަށް ވެސް ހިތާމައެއް ދިމާވާ ދުވަހަކުން މިގޮތަށް ހެވިލާފަ ހުރެވިދާނެކަން.” ބައްޕަގެ ބަސްތައް ވިސާމްގެ ސިކުނޑީގައި ގުގުމާލި ވަގުތު ބޭރުން އިވެމުން ދިޔަ ބަންގި ނިމެމުން ދިޔައެވެ. ބައްޕަގެ ވާހަކަތައް ހަނދާނަށް އައުމުން ވިސާމަށް މައްޗަށް ނަޒަރު ހިންގާލެވުނީ ދުޢާއެއްކުރަން ހިތަށް އެރުމުންނެވެ. ނަމަވެސް ހަމަ އެވަގުތު މަންސޫރުގެ ހަރުކަށި އަޑު އޭނަގެ ކަންފަތުގައި ގުގުމާލިއެވެ.
“ކަލޭ ދާނީ ހަމަ ނަރަކައަށް! ކަލޭ ތި ކުރާ ހުރިހާ ކަމެއްގެ ޢަޒާބު މި ދުނިޔޭގަ ވެސް ކަލެއަށް ލިބޭނެ!!” މަންސޫރު އެހެން ބުނެލީ ވިސާމް ހަރުއަޑުން ނަމާދަށް ދާން އިންކާރު ކުރުމުން އޭނަގެ ކަންފަތުގައި ހިފައި އަނބުރާލަމުންނެވެ. އެ ހަނދާން އާވެފައި ވިސާމަށް އިސްޖަހާލަމުން ފުން ނޭވައެއް ދޫކޮށްލެވުނެވެ. މަންސޫރު އެ ބުނީ ތެދެކޭ އޭނަގެ ހިތަށްއެރިއެވެ. އޭނައަށް މި ލިބެނީ އޭނަ ކުރާ ނުބައި ކަންތައްތަކުގެ ޢަޒާބެވެ. އޭނައަށް ކަނޑައެޅިފައިވަނީ ނަރަކައެވެ. އޭނައަށް ﷲ ގެ ރުހިވޮޑިގަތުން ލިބުމަށް ވަނީ ވަގުތު ފާއިތުވެފައެވެ. ދީންވެރި އެހެން މީހުން ވެސް އޭނައާއިބެހޭ ގޮތުން ނޫސްތަކުގައި ލިޔެވިފައި ހުންނަ ލިޔުންތަކަށް ކޮމެންޓްކޮށްފައި ހުންނައިރު އޭނަ ދާނީ ނަރަކައަށޭ ބުނެފައި ހުންނަ ގޮތުން އެކަން ސާބިތުވެއެވެ. އެ އެންމެން އެކީގައި ރުޅިވެރިކަމާއެކީ އެހެން ބުނާނީ އެއީ ޙަޤީޤަތަކަށްވީމަ ނޫންހެއްޔެވެ؟ ހިތަށްވެރިވި އެ ސުވާލާއެކީ ވިސާމަށް އިސްޖަހާލަމުން ފުން ނޭވައެއް ދޫކޮށްލެވުނެވެ. އެއަށްފަހު ދުޢާކުރުމުގެ ޚިޔާލުމަތިން ހަނދާން ނައްތާލަމުން އޭނައާއި އޭނަގެ ދަރިފުޅުގެ ސަލާމަތަށްޓަކައި އޭނައަށް އެޅިދާނެ ފިޔަވަޅުތަކާމެދު ވިސްނަން ފެށިއެވެ. އެންމެ ފުރަތަމަ ވެސް އައްޑޫއަށް އަނބުރާ ދާންވީ ކަމަށް އޭނަގެ ހިތް ބުންޏެވެ. އެހެނަސް މަންސޫރުމަތިން ހަނދާންވެފައި ވީ ފޫހިން އޭނައަށް ފުސްމޫނު ހެދުނެވެ. ވަގުތުން އެ ޚިޔާލު ބަދަލުކޮށް އޭނަގެ އެޕާޓްމެންޓްގެ ސެކިއުރިޓީ ސިސްޓަމް ވަރުގަދަ ކުރަން ވިސާމް ނިންމިއެވެ. ނަމަވެސް އެކަމަށްޓަކައި ވެސް ފައިސާ ބޭނުންވާނެކަން އެނގުންވުމުން ވިސާމްގެ މޫޑު ޚަރާބުވިއެވެ. ކޮންމެއަކަސް އޭނައަށް ދެން އެންމެ އަވަހަށް ލިބޭ ވަޒީފާއިން ލިބޭ ފުރަތަމަ މުސާރައިން އެކަން ކުރަން ވިސާމް ނިންމިއެވެ.
.
މިޝްކާ ހޮސްޕިޓަލުން ދޫކުރެވުނު ދުވަހު ވިސާމްގެ އެދުމުގެ މަތިން އޭނަ ވެސް ދޫކުރެވުނެވެ. ގެއަށް ގޮސް ވިސާމް ވަގުތުން އިންތިޒާރު ކުރަން ފެށީ އިންޓަވިއުއަކަށްޓަކައި އޭނައަށް ގުޅާލާނެ އިރަކަށެވެ. މާ ގިނަ ދުވަހެއްނުވެ 3 ތަނަކުން އޭނައަށް ގުޅިއެވެ. އޭނަ އިންޓަވިއުތަކަށް ދާން ފެށީވެސް މިޝްކާ ގޮވައިގެންނެވެ. މިޝްކާ އެކަނި ބަހައްޓާފައި ދާން އޭނައަށް ލާހިކެއްނޫނެވެ. ފުރަތަމަ ފަހަރު ޙަމަލާ ނުދިނަސް އޭނައަށްޓަކައި އޮތް ނަފްރަތެއްގެ ސަބަބުން އެ މީހުން މިޝްކާއަށް ވެސް ކަމެއްކޮށްފާނެ ކަމަށް އޭނަގެ ހިތް ބުނަނީއެވެ. މިޝްކާ ބެލުމަށްޓަކައި އަވަށްޓެރިއަކާ ޙަވާލުކުރަން ވެސް ޖެހިލުންވީ އެ މީހަކީ ވެސް އޭނަގެ ދުޝްމިނުންގެ ޖާސޫސަކަށް ވެދާނެކަމަށް ހީކުރެވުނީތީވެއެވެ. އޭނަ މިހާވަރުން ވަޒީފާއެއް ލިބުނަސް ދާނީ ކިހިނެއްތޯ ހިތް ސުވާލުކުރަމުން ދިޔައެއްކަމަކު އެކަމާމެދު ފަހުން ވިސްނުމަށް ނިންމަމުން ވިސާމް އެ އިންޓަވިއުތަކަށް މިޝްކާއާއެކީ ވަނެވެ. އޭނަގެ ޙާލަތް ކިޔައިދިނުމުން ހުރިހާ އޮފީހެއްގެ ވެރިން ވެސް މިޝްކާ އިންޓަވިއު ކުރެވޭ ރޫމުގައި ބަހައްޓަން އެއްބަސްވިއެވެ. ވިސާމް އިންޓަވިއުތަކުގައި ޖަވާބުތައް ދެމުން ދިޔައީ ސާބިތުކަމާއެކީގައެވެ. އެހެނަސް އިހަކަށް ދުވަހު ކަންތައް ވީގޮތުން އެންމެންގެ ފަރާތުން އަމާޒުވި އެއްޒާތެއްގެ ސުވާލަކުން ވިސާމްގެ އަނގަ ބަންދުވާ ގޮތްވިއެވެ.
“ވިސާމްއާ ކޮންމެވެސް ޕްރޮޑިއުސަރަކާމެދު އެއްބަސްވުމެއްގެ މައްސަލައެއް ޖެހުނު ވާހަކަ އަޑުއިވުނު. އެ ކޭސް ވިސާމް ހުށަހެޅީވެސް އިތުރަށް ފައިސާ ހޯދަން ކަމަށް އަޑު އެބައިވޭ. މިއީ ކިހާވަރެއްގެ ޙަޤީޤަތެއްތޯ؟” ފުރަތަމަ އިންޓަވިއުގެ މެދުތެރެއިން ޕްރައިވޭޓް ކުންފުނީގެ ވެރިޔަކު ވިސާމާއި ސުވާލުކުރިއެވެ. އެއާއެކު އޭނަ ހިސާބަކަށް ހުއްޓުން އެރިއެވެ. ނަމަވެސް މާ ގިނަ އިރެއްނުވެ އޭނަ ހުރިހާ ވާހަކައެއް ސީދަލަށް ކިޔައިދިނެވެ. އެހެނެއްކަމަކު އެ މައްސަލަ ނިމުނީ ޔާސިރުގެ ކޮޅު މޮޅުވަމުން ކަމަށް އެ ވެރިން ބުނަމުން ދިޔަ ގޮތުން އެމީހުންނަށް އޭނައަށް އިތުބާރު ނުކުރެވެނީކަން ވިސާމަށް އެނގުންވިއެވެ. އެކަމާމެދު ހިތްވަރު އެލުނު ގޮތުން އިންޓަވިއުގައި ދެން ކުރެވިގެން ދިޔަ ސުވާލުތަކަށް ވިސާމަށް މާ ރަނގަޅު ޖަވާބުތަކެއް ނުދެވެއެވެ. ނަތީޖާއެއްގެ ގޮތުން އެތައް ދުވަހެއްވީއިރު ވެސް އޭނައަށް ވަޒީފާއެއް ލިބޭ ގޮތެއްނުވިއެވެ.
އެ އަހަރުގެ ރަމަޟާން މަސް ފެށުނުއިރު ވިސާމްގެ ބޭންކް އެކައުންޓްގައި ވީ އެންމެ ދިހަ ވަރަކަށް ހާސް ރުފިޔާއެވެ. އެހެންކަމުން ވިސާމްގެ މުޅި ރަމަޟާން މަސް ހޭދަވެގެން ދިޔައީ ހާސްކަން މަތީގައެވެ. އާދައިގެ މަތިން އޭނަ ހުރީ ރަމަޟާން މަހު ދުވާލު ނުކައި އެއްވެސް އަޅުކަމެއް ނުކޮށެވެ. ފައިސާގެ ދަތިކަމުން އޭނައަށް ރަނގަޅީވެސް އެއްޗެއް ކެއުމަށްވުރެ ނުކެއުމެވެ. މިފަދަ ގޮތަކަށް ވިސާމް އެ ބަރަކާތްތެރި މައްސަރު ވޭތުކޮށްލީ ﷲ ގެ އެހީއަށް އެދެން ހިތަށްވެސް އެރުވުމެއްނެތިއެވެ. އޭނަ އިޚްލާޞްތެރިކަމާއެކީ ތައުބާވެއްޖެނަމަ ﷲ އޭނަގެ ރިޒްޤު ތަނަވަސްކޮށްދެއްވާނެކަން ނޭނގިއެވެ. އެހެންކަމުން ރަމަޟާން މަހުގެ ފަހު ދިހައިގެ ތެރޭގައި އޭނަގެ ހުރިހާ ލާރިއެއް ހުސްނުވަނީސް އައްޑޫއަށް ފުރަން ވިސާމް ނިންމިއެވެ. ދިރި ހުރުމަށްޓަކައި ސަލާންޖެހުމެއްނެތި އުޅެވިދާނެ އެހެން ގޮތެއް އޭނައަށް ނުފެނުމުންނެވެ.
އައްޑޫއަށް ފުރުމަށްޓަކައި ވިސާމް ތައްޔާރީތައް ވާންފެށީ ޢީދު ދުވަހުއެވެ. އެދުވަހު އޭނައަށް ވިސްނެމުން ދިޔައީ ރަށަށް އަނބުރާ ދިޔުމުން ކަންތައް ވާނެ ގޮތަކާމެދުގައެވެ. މަންސޫރު އޭނައަށް ނަފްރަތު ކުރާނެކަމީ ޔަޤީންކަމެކެވެ. މަންސޫރު އޭނަ އެގެއަށް ވަނަދޭނެ ކަމެއްވެސް ނޭނގެއެވެ. އެގޮތަށް މަންސޫރު ކަންތައް ކޮށްފިނަމަ މަންމަ ފަރާތު ބޮޑުބޭބެމެން ގެއިން ވެސް އޭނައަށް ޖާގައެއް ލިބޭނެހެނެއް ހިއެއްނުވެއެވެ. މަންމައާނުލާ އެ ގެ އެކި މީހުންނަށް ބަހައި ނިންމާލީ ވިސާމްވެސް އައްޑޫގައި ހުއްޓައެވެ. ވީއިރު މަންސޫރު ބުނާ ގޮތަށް ކަންތައް ކުރުން ނޫންގޮތެއް އޭނައަށް ނެތެވެ. މަންސޫރު ނުބުންޏަސް އޭނަ ދެން ނަމާދު ކުރަން ފަށާނީއެވެ. ނޭނގޭ ސަބަބަކާހުރެ ނަމާދުކުރުމަށް އޭނަގެ ހިތް ތަކުރާރުކޮށް ބުނަމުން ދިޔައެވެ. އެއީ ބައްޕަ ބުނިހެން ނަމާދުކޮށް ދުޢާކުރުމުން އެފަދަ އުފާވެރިކަމެއް ލިބޭތޯ ބެލުމަށްޓަކައި ކަންނޭނގެއެވެ.
އެކިއެކި ވިސްނުންތަކެއްގައި ހުރެ ވިސާމް އޭނަގެ ގަމީސްތައް ފަށްޖަހައި ކޮޓަރީގެ އެނދުމަތީގައި ހުރި ފޮށްޓައް އަޅަމުން ދިޔައެވެ. އެވަގުތު އެ އެނދުގެ ބޮލާކޮޅުގައި ހުރި ބާލީހެއްގެ މައްޗަށް ބޮލާއި ކޮނޑު އަރުވައިގެން ކުޑަކުޑަ މިޝްކާ ނިދިފައި އޮތެވެ. މުޅި ކޮޓަރިއަށް ވެރިވެފައިވި ހިމޭންކަމުގެ ތެރެއިން ވިސާމް ކުއްލިއަކަށް ސިއްސައިގެން ދިޔައީ އެޕާޓްމެންޓްގެ މައިދޮރުގައި ބަޔަކު ބާރަށް ތަޅައިގަތް އަޑަށެވެ. ހަމަ އެއާއެކު ވިސާމޭ ކިޔައި އެއްޗެހި ގޮވައިގަތް އަޑުވެސް އިވުނެވެ. ހިތަށްވެރިވި ބިރުވެރިކަމާއެކީ ވިސާމަށް ވަގުތުން ބަލާލެވުނީ މިޝްކާއަށެވެ. އެވަގުތު މިޝްކާ ކުޑަކޮށް ލޯ ހުޅުވިފައި އޮތެވެ. ބޭރުން އިވެމުން ދިޔަ އަޑު މެދުނުކެނޑުމުން ވިސާމް ދެ ޚިޔާލެއްގެ މަތީގައި ހުރެ މިޝްކާއަށް ބަލަމުން ބަލަމުން ގޮސް ކޮޓަރިން ނިކުމެ ދޮރު ލައްޕައި އެ ދޮރު ތަޅުލިއެވެ. އެއަށްފަހު ދިގު ފިޔަވަޅުތަކެއްގައި ގޮސް އެޕާޓްމެންޓްގެ ދޮރު ބޮޑުކޮށް ހުޅުވާލިއެވެ.
“އަހަރުމެންގެ ދަރިފުޅު މަރާލީ ކަލޭ!!!!” ކުއްލިއަކަށް އެޕާޓްމެންޓްގެ ތެރެއަށް ވަތް އަންހެނަކު ހަޅޭއްލަވައިގަތް ގޮތުން ވިސާމްގެ ހިތް ދުވަހަކުވެސް ބިރުނުގަންނަ ވަރަށް ބިރުގަތެވެ. އޭނައަށް އެ މީހާގެ ސޫރަވެސް ނަގައިގަންނަން ހިނދުކޮޅެއް ނެގިއެވެ. އެއީ އޭނަ ނުދަންނަ މެދުޢުމުރުގެ އަންހެނެކެވެ. އެ އަންހެން މީހާގެ ފުރަގަހުގައި ހުރީ ކޮން ފިރިހެނެއްކަން ވެސް ވިސާމަކަށް ނޭނގެއެވެ. އެހެނަސް އެ ފިރިހެން މީހާގެ މޫނުމަތީގައި ވެސް ވީ ހިތާމަވެރިކަމާއި ރުޅިވެރިކަމެވެ.
“އަހަރެން ކަލެއާ އިންނަން ނާޒްއަށް ހުއްދަދިނީ ކަލެއަށް ވަރަށް އިތުބާރުކޮށްފަ. މިހާރު އެކަމުގެ މޮޔަހީވޭ! ދޫކޮށްލާފަ ވެސް ހިތް ނުފުރުނީމަތަ ކަލޭ ނާޒް މަރާލީ؟!!!” އެ ފިރިހެން މީހާ ހަރުވަމުން ދިޔަ އަޑަކާއެކީ ކުރި ސުވާލުން ވިސާމްގެ ދެލޯ ބޮޑުވެ މުޅި މީހާ ގަނޑުވިއެވެ. އެ މީހާގެ ފަހު ބަސްތައް އޭނަގެ ކަންފަތުގައި ގުގުމަން ފެށި ވަގުތު މިއީ ހުވަފެނެއްހެން އޭނައަށް ހީވިއެވެ. އެހެނަސް އޭނަގެ ފަރާތުން ޖަވާބެއް ނުލިބުމުން އެ ފިރިހެން މީހާ އައިސް އޭނަގެ ގިރުވޯނުގައި ހިފަހައްޓާލަމުން ޖަވާބެއް ދޭށޭ ކިޔައި ހަޅޭއްލަވައިގަތުމުން މިއީ ޙަޤީޤަތެއްކަން އޭނައަށް ޔަޤީން ކުރެވުނެވެ. މެހެނާޒް ހަމަ އަސްލުވެސް ދުނިޔެ ދޫކޮށް ދިޔައީ ހެއްޔެވެ؟ އޭނައަށް ދެން ދުވަހަކުވެސް މެހެނާޒް ނުފެންނާނީ ހެއްޔެވެ؟ ހިތަށްވެރިވި އެ ސުވާލާއެކީ އޭނަގެ ކުރިމަތީގައި ހުރި މަންމަގެ ކަރުނަތައް ފެނިފައި ވިސާމްގެ ލޮލަށް ވެސް ކަރުނަތައް ޖަމާވިއެވެ. މެހެނާޒަކީ އޭނަގެ ޙަޔާތުގައި ވެސް ބޮޑުބައެއް އަދާ ކުރި ފަރާތެކެވެ. މި ޚަބަރުން އޭނަގެ ހިތަށް އަސަރުނުކޮށް ނުދިޔައީ އެހެންވެއެވެ. އެހެނަސް މެހެނާޒް މަރުވީ ކިހިނެއްތޯ ހިތް ސުވާލު ކުރި ވަގުތު މިޝްކާ ރޮއިގަތް އަޑު އިވުނެވެ. ހަމަ އެއާއެކު ފިރިހެން މީހާ ވިސާމްގެ ގިރުވޯނުން ދޫކޮށްލި ހިނދު އަންހެން މީހާގެ ވެސް ރުއިން ހުއްޓުނެވެ.
“އެއީ……އަހަރުމެންގެ ނާޒްގެ ދަރިފުޅު، ދޯ؟” ފިރިހެން މީހާ އެހެން ބުނެލަމުން ބަލާލީ އަންހެން މީހާއަށެވެ. އަންހެން މީހާ ހިނދުކޮޅަކަށް ހުރެފައި ކުއްލިއަކަށް ބޯޖަހަން ފެށިއެވެ. އެއަށްފަހު އެދެމީހުން އަވަސް ފިޔަވަޅުތަކެއްގައި ކޮޓަރިއާއި ދިމާލަށް ދާން ހިނގައިގަތެވެ. އެމީހުންގެ ޙަރަކާތްތަކަށް ގެއްލިފައި ހުރި ވިސާމަށް ހިނގައިގަނެވުނީ އޭގެ ސިކުންތުކޮޅެއް ފަހުންނެވެ. އެހެންކަމުން އޭނައަށް ވުރެ ކުރިން އެމީހުން އެކޮޓަރީގެ ދޮރު ހުޅުވައި ކޮޓަރިއަށް ވަދެފިއެވެ. ވިސާމް ބަލަބަލާ ހުއްޓާ އެ އަންހެން މީހާ މިޝްކާ އުރާލައިފިއެވެ. އެއިން މިޝްކާގެ ރުއިމުގެ އަޑު ހަރުވުން ނޫންކަމެއް ނުވިއެވެ.
“މި ދަރިފުޅު ދެން އުޅޭނީ އަހަރުމެންނާއެކީ!” މިފަހަރު އަންހެން މީހާ ބުނެލި ވާހަކައިން ވިސާމް ހުއްޓުން އެރި ވަގުތު އޭނަގެ ހިތުގައި ނުރުހުންތެރިކަމެއްވެސް އުފެދުނެވެ. އެ ނުރުހުންތެރިކަމުގައި އޭނައަށް ވާހަކަ ދެކެވުނެވެ.
“ނޫން!” ވިސާމް ސާބިތުކަމާއެކީ ބުނެލީ ހަމައެކަނި އެހާވަރަށެވެ.
“ނޫނެކޭ ކިޔާނެކަމެއް ނެތް! ނާޒް ގޮތަށް މި ކުއްޖާވެސް މަރާލަ……” ފިރިހެން މީހާ ދައްކަން ފެށި ވާހަކަ މެދުކެނޑުނީ ވިސާމް ހަޅޭއްލަވައިގަތުމުންނެވެ.
“އެ ނާޒަކު ބޭނުންވީ މި ކުއްޖާ މަރާލަން. މަށެއްނޫން! ތި ކުއްޖާ ތިހާވަރު ކޮށްފަ ތިހިރީ ހަމައެކަނި މަގޭ ހިތްވަރުން.” ވިސާމް އެންމެ ފަހު ބަސްތައް ބުނެލިއިރު އޭނަގެ ދެލޯ ފެންކަޅިވެ ރަތްވެފައިވިއެވެ.
“ދޮގު ހަދާނެކަމެއްނެތް. މި ދަރިފުޅު ބަލާނީ އަހަރުމެން. މިއީ ކަލެއަށް މި ކުއްޖާ ފެންނާނެ އެންމެ ފަހު ދުވަސް!” އަންހެން މީހާ އެހެން ބުނެލަމުން މިޝްކާއާއެކީ ކޮޓަރިން ނިކުންނަން ދިޔައެވެ. ވިސާމް ގަދަކަމުން މިޝްކާ ފޭރިގަންނަން އުޅުނު ވަގުތު އަނެއްކާވެސް ބޭރުން ބަޔަކު މީހުން ހަޅޭއްލެވި އަޑު އިވުނެވެ. މިފަހަރު ނާޒްގެ ޤާތިލަކީ ކޮބައިތޯ އަހާފައެވެ. އެޕާޓްމެންޓްގައި އަޑުގަދަ ވެގެން ދިޔަ ގޮތުން ބައިވަރު މީހުން އައިއްސިކަން ކޮޓަރީގައި ތިބި އެންމެނަށް އެނގުނެވެ. ތިން މީހުން އެކީގައި ހެން ކޮޓަރީގެ ދޮރު މައްޗަށް ދިޔަތަނާހެން ޙަމަލަދޭ އެކި ސާމާންތަކާއެކީ ބޮޑު ގޭންގެއް ފެނިގެން ދިޔައެވެ. އެމީހުންނަށް ވިސާމް ފެނުމާއެކު އޭގެ ތެރެއިން މީހަކު އެހެރީ އޭ ބުނެލި އަޑު އިވުނެވެ. ހަމަ އެއާއެކު އެމީހުން ވިސާމާއި ދިމާލަށް އަންނަން ފެށިއެވެ. ވިސާމްގެ ހިތަށް ބިރުވެރިކަމެއް ވެރިވިއެއްކަމަކު އޭނައަށް ހިރިލާކަށް ނޭނގުނެވެ. ހާސްވާންވީ އަމިއްލަ ނަފްސާއިމެދު ކަމެއް ނޫނީ ރޮމުން ދިޔަ މިޝްކާއާމެދު ކަމެއް އޭނައަކަށް ނުވިސްނުނެވެ. އޭނަ ހުރިގޮތަށް ހުއްޓާ އަންހެން މީހާ ވާހަކަ ދެއްކިއެވެ.
“މިހިރީ އޭނަ! މީނަ ތަޅާ މަރާލާ. އަހަރުމެން މިދަނީ!” އަންހެން މީހާ ވިސާމަށް އެހެން ބުނެ މިޝްކާއާއެކީ ދާން ހިނގައިގަތެވެ. އެ މީހާގެ ފަހަތުން ފިރިހެން މީހާވެސް ދިޔައެވެ. އެވަގުތު ރޮމުން ދިޔަ މިޝްކާ އަންހެން މީހާގެ ކޮނޑުމަތިން އޭނައާއި ދިމާލަށް އެ ކުޑަ އަތްދިއްކޮށް “ބައްބާ” އޭ ކިޔައި ގޮވާލި ހިނދު ވިސާމްގެ ލޮލުން ކަރުނަތައް ފައިބައިގެންއައެވެ. އޭނަ ކުރިއަށް ފިޔަވަޅެއް އަޅަން އުޅުނުތަނާހެން މީހަކު އައިސް އޭނަގެ މޫނުމައްޗަށް އެތިފަހަރެއް ވިއްލައި އޭނަ ބިންމައްޗަށް ވައްޓާލިއެވެ. އެއަށްފަހު ވިސާމަށް ހަމަޖެހިލާނެ ފުރުޞަތެއް ނުލިބި ފުލުފުލުން އޭނައަށް އަނިޔާތަކެއް ލިބެން ފެށިއެވެ. އެދުވަހުވެސް އޭނައަށް އެންމެ ފަހުން ވީނުވީއެއް ނޭނގި ހޭނެތުނެވެ.
މިފަހަރު ހޭލެވުނުއިރު ވިސާމަށް އޮވެވުނީ ހޮސްޕިޓަލުގެ އެނދެއްގައެއް ނޫނެވެ. އޭނައަށް އޮވެވުނީ އެފުށްމިފުށަށް ޖެހިފައި ހުރި އޭނަގެ އެޕާޓްމެންޓްގެ ސިޓިންގް ރޫމުގެ ބިންމަތީގައެވެ. ހޭ އެރުމުން ވިސާމް އުނދަގުލާއެކީ ތެދުވެ ބިންމަތީގައި އަތް ވިއްދާލިއެވެ. ވަށައި ނަޒަރު ހިންގާލުމުން މާ ގިނައިރެއްނުވެ ކަންވީ ގޮތް އޭނަގެ ހަނދާނަށް އަންނަން ފެށިއެވެ. އެ ހުރިހާ މަންޒަރެއް ލޮލަށް ސިފަވަމުން ގޮސް މިޝްކާ އޭނައަށް ގޮވާލި އަޑު ކަންފަތުގައި ގުގުމާލުމުން އޭނައަށް ވައި އަޑުން މިޝްކާގެ ނަން ކިޔާލެވުނެވެ. ހަމަ އެއާއެކު ނުވެސް ދަންނަ ދެމީހެއްގެ އަތަށް އޭނަގެ ދަރިފުޅު ގެއްލިއްޖެކަން އެނގުންވީ ހިނދު ވިސާމްގެ މޭގައި ރިހުމެއް އުފެދި އޭނަގެ ދެލޯ ކަރުނުން ފުސްވިއެވެ. މާ ގިނައިރެއްނުވެ އޭނަގެ ނޭވާ ކުރުވެ އޭނައަށް ގިސްލެވެން ފެށިއެވެ.
ނުނިމޭ
