ނަފްސީ (އަށްޑިހަ ނުވަވަނަ ބައި)

އޭގެ އަނެއްދުވަހު ދާނިޝް އޮފީހަށް ނިކުތެވެ. އަދި ހިލްޔާ ޝަންގްހައިގެ މެޑިކަލް ރިސާޗް ސެންޓަރ ހިމެނޭ ހޮސްޕިޓަލަށް ވަޒީފާއަށް ދިޔުމަށް އެޕްލައި ކުރިއެވެ. ވަޒީފާ ލިބެންދެން ހިލްޔާ ލިބުނު ވަގުތުގެ ބޭނުން ހެޔޮ ގޮތުގައި ހިފިއެވެ. ޤުރުއާން ދަސް ކުރުމަށާއި އިތުރު ޢިލްމު އުނގެނުމަށް ވަގުތު ލިބުނީތީ އުފާ ކުރެވުނެވެ. ގޭގެ ތެރޭގެ މަސައްކަތް ކުރަމުން ދިޔައީ ކުރާ ހިތުންނެވެ. ދާނިޝް އަންނަންވާއިރަށް މީރުކޮށް ކައްކާފައި ހުރުމަކީ ދާނިޝް ދެކެ ލޯބިވާ ކަން ދައްކުވައިދޭން ލިބުނު އިތުރު ފުރުސަތެކެވެ. އަދި އަމުދުން ދާނިޝް ވެސް ގެއަށް އައިސް ވަރުބަލިވެފައި ހުރެވެސް ގޭގެ ބައެއް މަސައްކަތްތައް ކުރާތީ ހިލްޔާ ވެސް ދާނިޝްއަށް އިތުރަށް ލޯބި ދޭން ބޭނުންވިއެވެ. ބެއިޖިންގްގައިވާ ދާނިޝްގެ ކާރު ޝަންގްހައިއަށް ގެނެވިފައިވުމުން ދާނިޝް  ޗުއްޓީ ދުވަސް ދުވަހު އޭނަ ގޮވައިގެން ކެއުމަށާއި އެކި ތަންތަނަށް ދެއެވެ. އޭގެ ސަބަބުން އެ ދެމެދުގައި ލޯބި އިތުރަށް އާލާވަމުން ދިޔައެވެ.

ޙަޔާތަކީ އަބަދު އުފާވެރިކަމާއި ފަސޭހަ އެކުލެވިގެންވާ އެއްޗެއް ނޫނެވެ. އުފާވެރިކަމާއިއެކު ގިލަންވެރިކަން ވެސް ޙަޔާތުގައި އެކުލެވިގެންވެއެވެ. އެ އަޑި ގުޑަންތައް ހިމެނިފައިވަނީ މަތިވެރިވެގެންވާ ޙިކުމަތްތަކަށްޓަކައެވެ. މި ދުނިޔެއަކީ އިމްތިޙާނަކަށް ފޮނުއްވާފައިވާ ތަނަކަށް ވާތީވެއެވެ. ދާއިމީ ހިތްހަމަޖެހުން އޮތީ ކޮންމެ ޙާލަތެއްގައި ވެސް ﷲ އަށް ބަރޯސާވެ، ﷲ އަށް ތަޤްވާވެރިވާ ބަޔަކަށެވެ.

ޝަންގްހައި ގައި ދާނިޝް މަސައްކަތް ކުރަން ފެށިތާ މާ ގިނަ ދުވަހެއް ނުވެ ދާނިޝް ކުންފުނީގެ ދަނޑުތަކަށް ޒިޔާރަތް ކުރަން ޖެހުނެވެ. އެ ދަނޑުތައް ވަނީ ދާނިޝްއާއި ހިލްޔާ އުޅެމުންދާ ޢިމާރާތާއި ފުދޭވަރަކަށް ދުރުގައެވެ. ދަނޑުތަކާއި ހަމައަށް ދާންވެސް 2 ގަޑިއިރުގެ ދަތުރެއް ކުރަން ޖެހެއެވެ.

“ވަރަށް ވިސްނާފަ ހިލޫ ގާތު މި ވާހަކަ މި ބުނީ. ނުދާން ވަރަށް ގިނަ ދުވަހު ޚިޔާލު ކުރިން. އެކަމަކު އަދިވެސް ރަނގަޅު ނޫން މޭވާ ވިކެމުންދާހެން ހީވާތީ އަހަރެން އަމިއްލައަށް ގޮސް އޮބްޒާވް ކުރުން މުހިއްމުހެން ހީވަނީ. ކޮންމެ ކޮންމެ ދުވަހަކު ނުއެއް ދާނަން. ހުރިހާ ކަމެއް ރަނގަޅުކަން ޔަޤީންވީމަ ދެން ނުވެސް ދާނަން.”

އެއްރެއަކު ސިޓިންގް ރޫމުގެ ސޯފާގައި އިނދެ، ދާނިޝް ހިލްޔާއާއި ވާހަކަ ދެއްކިއެވެ. ދެފައި ސޯފާއަށް ލައިގެން އޭނައާއި ދިމާލަށް އެނބުރިލައިގެން އިން ހިލްޔާ ތިރީ ތުންފަތް އޮޅާލަމުން ދެރަ މޫނެއް ދެއްކިއެވެ.

“އޮފީހުގަ ވޯކް ކޮށްފަ އަދި ދަނޑަށް ވެސް ދަނީ؟ އެހެންވީމަ އަހަންނަށް ދާން ފެންނާނީ ހާދަ މަދުންނޭ.” ހިލްޔާ ބުންޏެވެ. އެހިނދު އެ ލޮލުން ހިތާމަވެރިކަމާއި ޝަކުވާ އެކުލެވިގެންވާ ނަޒަރެއް ދާނިޝްއަށް ފެނުނެވެ.

“ދޯ؟ އަހަރެން ވެސް އަސްލު ބޭނުމެއް ނޫން ދާކަށް. މަދު ދުވަސްކޮޅަކަށް އިނގޭ ލޯބި؟ ރަނގަޅަށް ވޯކް ކުރެވުނިއްޔާ އިތުރަށް ދާކަށް ނުޖެހޭނެ އިން ޝާ ﷲ…” ދާނިޝް ބުންޏެވެ. ހިލްޔާގެ މޫނުމަތިން ފެނުނު އަސަރުން ދާނިޝްގެ ހިތަށް އުދަގޫވިއެވެ.

އެއަށްފަހު އެ ދެމެދުގައި ހިމޭންކަމުގެ ވަގުތުކޮޅެއް ވޭތުވިއެވެ. ހިލްޔާ އެއްވެސް އެއްޗެކޭ ނުބުނެ އިސްޖަހާލުމުން ދާނިޝް އިތުރަށް ދެރަވާ ގޮތްވިއެވެ. ދަތި ކަމަކަށް ވިޔަސް ޚިޔާލު ބަދަލުކޮށްލަންވީއޭ ހިތައި ދާނިޝްއަށް އެއްޗެކޭ ބުނަން އުޅުނު ހިނދު، ހިލްޔާ އިސްއުފުލާލަމުން ހިނިތުންވެލިއެވެ.

“އޯކޭ ދާން. އެނގޭ ހުރިހާ ގޮތަކަށް ބަލާފަ ކޮންމެހެން ކުރަންޖެހޭތީކަން ދާން ތިގޮތަށް ކަންތައް ކުރާނީ. ވަރަށް ހަނދާންވާނެ ދާން މަތިން. އަވަހަށް އާދެވެންޏާ އައިސްދެއްޗޭ.” ހިލްޔާ އެދުނެވެ. ހިލްޔާ އެ ބަސްތައް ބުނެލީ އެހެން އެއްވެސް ކަމަކަށްވުރެ ބޮޑަށް ﷲ ގެ ރުހިވޮޑިގަތުން އެދިގެންނެވެ. ދާނިޝް މިފަދައިން އޭނަ ގާތު އެހުމުގެ ފަހަތުގައި ވެސް ވަނީ އެކަލާނގެ އިރާދަފުޅުކަން ހަނދާން ކުރަމުންނެވެ. އޭނަ މިވަގުތު ޝަކުވާކޮށް އަމިއްލަ ބަސް ގަދަ ކުރަން އުޅުމަކީ އެންމެ ރަނގަޅު ގޮތް ނޫންކަން ވިސްނުނެވެ. އެއިން ދާނިޝްގެ މަސައްކަތަށް ވެސް ބުރޫއަރާނެއެވެ. ޒަވާޖީ ޙަޔާތެއްގެ ބޭނުމަކީ އެކަކު އަނެކެއްގެ ޙަޔާތް ފަސޭހަ ކޮށްދިނުމެވެ. ދަތި ކުރުވުމެއް ނޫނެވެ.

ހިލްޔާގެ ޖަވާބު އިވިފައި ދާނިޝްގެ ހިތް ލޯބިން ފުރިގެން އައެވެ. ހިލްޔާ ދެންމެ ނުރުހުންވިއްޔާ ނުރުހުންވީ ވެސް އޭނަ ދެކެ ވާ ލޯބީގެ ސަބަބުންކަން އެހިނދު އެނގުންވިއެވެ. އެއާއިއެކު ދާނިޝްއަށް ހިލްޔާއާއި ގާތްވެލަމުން ހިލްޔާގެ ގައިގައި ބައްދާލެވުނެވެ.

“އޮފްކޯސް ލޯބި….ތިއީ ބުނަންޖެހޭ ވާހަކައެއް ވެސް ނޫނެއްނު؟ ހިލޫއަށް ވުރެ ބޮޑަށް އަހަރެން ބޭނުންވޭ އަވަހަށް ގެއަށް އަންނަން.” ދާނިޝް ހިލްޔާގެ ބޮލުގައި ފިރުމަމުން ބުނެލި ވާހަކައިން ދެމީހުންނަށް އެކުއެކީގައި ހެވުނެވެ. އެ ހީލުމަށްފަހު ދާނިޝްއަށް ހަމަ އެއްވެސް އިޚްތިޔާރަކާއި ނުލާ ހިލްޔާ ގާތު ލޯބިވާ ވާހަކަ ބުނެ، ހިލްޔާގެ ބޮލުގައި ބޮސްދެވުނެވެ. ބަދަލުގައި ހިލްޔާ ވެސް ދާނިޝް ދެކެ ލޯބިވާ ވާހަކަ ބުންޏެވެ.

އޭގެ އަނެއްދުވަހު ހެނދުނު ދާނިޝް ހިލްޔާއާއި ވަކިވެގެން ދިޔައީ ވެސް އެފަދަ ލޯބީގެ ބަސްތައް ބަދަލު ކުރުމަށްފަހުއެވެ. ދާނިޝް ދިޔުމުން އެދުވަހު ހިލްޔާއަށް އިހުނަށްވުރެ ބޮޑު އެކަނިވެރިކަމެއް އިޙްސާސް ކުރެވުނެވެ. ދާނިޝް ދެން އޭނައަށް މުޅި ދުވަހުހެން ނުފެންނާނެކަން އެނގުންވީތީވެއެވެ. އެހެނަސް އެ އިޙްސާސުން އަރައިގަތުމަށް ހިލްޔާ ދުޢާއިން ވާގި ހޯދިއެވެ. ދާނިޝްއަށްޓަކައި ދުޢާކޮށް ދާނިޝްގެ މަސައްކަތުގައި ބަރަކާތް ލެއްވުމަށް އެދި ދުޢާ ކުރުމުން ދާނިޝްއާއި މެދު ނުރުހުންވުމަށް އެ ހިތް ޤަބޫލެއް ނުވިއެވެ.

ދާނިޝްއަށް އެރޭ ގެއަށް އާދެވޭ ގޮތްވީ ދަންވަރު 2 ޖެހި ވަގުތެވެ. އެޕާޓްމެންޓަށް ގޮސް ވަންއިރު ހިލްޔާ ސޯފާގައި ނިދިފައި އޮތް މަންޒަރު ފެނިފައި ދާނިޝްގެ ހިތް ގެނބުނެވެ. ހިލްޔާ އެތާ އޮންނާނީ އޭނަގެ އިންތިޒާރުގައިކަން އެނގުންވިއެވެ. ދެރަވެފައިވާ ހިތަކާއެކީ ލަސް ފިޔަވަޅުތަކެއްގައި ދާނިޝް ހިލްޔާގެ ގާތަށް ދިޔައެވެ. އަދި ހިލްޔާ އަތްދަނޑިމައްޗަށް އުފުއްލައިގެން ކޮޓަރިއަށް ގެންދިޔައެވެ.

ދެ ތިން ދުވަސް މިފަދަ ގޮތަކަށް ފާއިތުވީއިރު ދެމީހުން ވެސް އެ ދިރިއުޅުމަށް އާދަ ވާ ގޮތްވިއެވެ. ދެމީހުން ދިމާވަނީ ދުވަހުގެ ފަތިސް ނަމާދާއި ހެނދުނުގެ ނާސްތާއިންނެވެ. ދެމީހުން ވެސް އެ ލިބޭ ކުޑަ ވަގުތުކޮޅުގެ ބޭނުން ހިފައެވެ. ދެމީހުންގެ ވެސް ވަނީ ޝުކުރުވެރި ހިތްތަކެއް ކަމަށްވުމުން އެވަގުތުކޮޅުން ފުއްދާލައިގެން އުޅެވުނެވެ.

މާ ގިނަ ދުވަހެއް ނުވެ އެއްކަލަ ހޮސްޕިޓަލުން ހިލްޔާއަށް ގުޅިއެވެ. ފުރަތަމަ އިންޓަވިއުއަށް އައުމަށް ބުނުމުން ހިލްޔާއަށް ޤަބޫލު ކުރަން ވެސް ދަތިވިއެވެ. އެހެނަސް އެކަން އުފަލާއި އެކީ ބަލައިގަތެވެ. އަދި ދާނިޝްއާއި މިވާހަކަ ޙިއްސާ ކުރީ ހުއްޓުމެއްނެތި ޙަމްދު ކުރެވޭ ޙާލުގައެވެ.

ހިލްޔާ އިންޓަވިއުއަށް ދާންޖެހުނީ ދާނިޝް އޮފީހުގައި ބުރަކޮށް އުޅުނު ވަގުތެއްގައެވެ. އެހެންކަމުން ދެމީހުން މަޝްވަރާ ކުރުމަށްފަހު ހިލްޔާ ޓެކްސީއެއްގައި ހޮސްޕިޓަލަށް ދިޔައެވެ.

އިންޓަވިއުއަށް ހިލްޔާ ދިޔައީ ނުތަނަވަސްވެފައިވާ ހިތަކާއެކީގައެވެ. މާޒީގައި މިފަދަ އިންޓަވިއުތަކުގައި އޭނަގެ ކިބައިގައި ހުރި އަމިއްލަ ނަފްސަށް ކުރާ އިތުބާރެއް ނެތެވެ. އެތައް ފަހަރެއްގެ މަތިން އެތައް ތަނަކުން ވަޒީފާ ލިބި، ވަޒީފާގައި ކުރު މުއްދަތަކަށް އުޅެފައި ވަޒީފާއިން ވަކިވެފައިވާތީވެއެވެ. މިއީ އޭނައާއި ކުރިމަތިވާނެ ސުވާލެއްކަން ހިލްޔާއަށް ޔަޤީންވިއެވެ.

ހިލްޔާ ހީކުރި ފަދައިން އިންޓަވިއު ކުރި މީހުން ކުރި އެ ސުވާލަށް އޭނަ ދިން ޖަވާބާއި މެދު އެމީހުން އެހާ ހިތްހަމައެއް ނުޖެހުނެވެ. އިންޓަވިއުގެ އެހެން ހުރިހާ ބަޔަކާއިމެދު އެމީހުން އޭނައަށް ތަޢުރީފު ކުރި ކަމުގައި ވިޔަސްމެއެވެ. ކިޔެވުމުގެ ތެރެއިން ހިލްޔާ މެޑިކަލް ރިސާޗް ކޮންފަރެންސާއި ޕްރޮގްރާމްތަކުގައި ބައިވެރި ވެފައިވުން އެމީހުންނަށް ކަމުދިޔައެވެ. އަދި ކިޔެވުން ނިމުނުއިރު ހިލްޔާ އަމިއްލައަށް އިސްނަގައިގެން ދިރާސީ ކަރުދާހެއް ލިޔެފައިވާތީވެސް އެމީހުން އެކަމާއިމެދު އިތުރަށް ސުވާލު ކުރިއެވެ. އެހެނަސް އެއްތަނެއްގައި ވަޒީފާގައި މަޑު ނުކުރެވޭ މީހަކަށް ބަޔަކު ކުރާނީ ކޮން އިތުބާރެއް ހެއްޔެވެ؟

ހިލްޔާ އެދުވަހު ގެއަށް ދިޔައީ ހިތުގައި އުފެދިފައިވާ މި ސުވާލާއި އެކީގައެވެ. އެދުވަހު ދާނިޝް ދަނޑަށް ނުދާތީ އެދުވަހު ހަވީރު ދާނިޝްއާއި ވެސް އެ ވާހަކަ ޙިއްސާ ކުރެވުނެވެ.

“ކަމޯން ހިލޫ. ހިލޫއެއް ނޫންތަ ބުނަނީ ވަކި މީހަކު ނޫނޭ ޖޮބެއް ދެނީ؟ އެއީ ވަކި ފަރާތަކުން ދެއްވާ ރިޒުޤެކޭ؟ ހަނދާން ނެތުނީތަ؟” އެތައް ރޭ ފަހުން އެރޭ ދެމީހުން އެކީގައި ނިދަން އޮށޯވެ ތިބި ވަގުތު ދާނިޝް އެހިއެވެ.

އެހިނދު ހިލްޔާއަށް ދާނިޝްއާއި ދިމާލަށް ބަލާލެވުނެވެ. ދާނިޝްއާއި ހަތަރުކަޅި ހަމަވީ ވަގުތު ޖަވާބަކަށް އުއްމީދު ކޮށްގެން ދާނިޝް ދެބުމަ އަރުވާލިއެވެ. އެހިނދު ހިލްޔާއަށް ހިނިތުންވެލެވުނެވެ. ހަނދާނަށް އައީ ކައިވެންޏެއް ކުރުމަށް އެތައް އަހަރެއް ކުރިން އޭނަ ކުރި ދުޢާއެކެވެ. އޭނަގެ ފިރިމީހާއަކީ އޭނަ ﷲ މަތިން ހަނދާން ނެތޭ ވަގުތު ހަނދާންކޮށްދޭ މީހެއް ކަމުގައި ލެއްވުމަށް އެދި ކުރި ދުޢާއެވެ. އެ ދުޢާ މަތިން އޭނަ ހަނދާންވެސް ނެތުނު ފަހުން ޙަޤީޤަތަށް ވެފައެވެ. އެހިނދު ﷲ އަށްޓަކައި ހިތުގައި އޮތް ލޯބި އިތުރުވެގެން ދިޔަހެން ދާނިޝް ދެކެ ވެސް އިތުރަށް ލޯބިވެވުނެވެ. ދާނިޝްއަށް ބަލަން އޮވެފައި ވަކި ޖަވާބެއް ވެސް ނުދީ ހިލްޔާއަށް ދާނިޝްގެ ކޯތާފަތުގައި ބޮސްދެވުނީ އެހެންވެއެވެ. އެ ވަގުތުކޮޅާއިއެކު އެ ދެމެދުގައި ލޮބުވެތި ހިނިތުންވުންތައް ބަދަލުވިއެވެ.

ދާނިޝްގެ އެ ހަނދުމަކޮށްދިނުމާއި އެކު ވަޒީފާ ދެއްވުމަށް އެދި ހިލްޔާ އިތުރަށް ދުޢާ ކުރިއެވެ. އޭނަ އެ ވަޒީފާ ބޭނުން ވަނީ ދާނިޝް ބުނިހެން މިވަގުތު ޗައިނާގައި ގިނަވަމުން ދާ ބަލި މަޑުކަމަށް ދާއިމީ ފަރުވާއެއް ހޯދަން ކަން އިތުރަށް ހަނދާން ކުރަމުން ދިޔައެވެ. އެ ޚިޔާލު ސިކުނޑީގައި ބިންވަޅު ނެގިގެން ދިޔަދިޔަހެން، ވަޒީފާ ނުލިބުނަސް، އެ ފަރުވާ ހޯދޭނެ މަގެއް ކޮށަން ހިލްޔާ ބޭނުންވިއެވެ. އެހެންކަމުން ދެވަނަ އިންޓަވިއު ޖެހެންދެން، ނޫނީ ވަޒީފާ ނުލިބޭނެ ވާހަކަ އަންގަންދެން ހިލްޔާ ދިރާސީ ޕްރޮޕޯޒަލެއް ލިޔަން ފެށިއެވެ. އޭނަ އެވަގުތު ބޮމުންދާ ސަޔާއި ގުޅިގެންނެވެ. އެ ސައިފަތަކީ މިވަގުތު ފެތުރެމުންދާ މި ބަލީގެ ފަރުވާއެއް ކަމަށް ބެލެވޭ ސަބަބު ކިޔައިދީ، އިތުރަށް ހޯދަންޖެހޭ ކަންތައް ވެސް ތަފްޞީލު ކުރިއެވެ. ހިލްޔާ ރޭވީ ވަޒީފާ ނުލިބުނަސް އެ ރިސާޗް ސެންޓަރާއި މި ޕްރޮޕޯޒަލް ޙަވާލު ކުރުމަށެވެ. އޭރުން އެ ފަރުވާއާއި މެދު އެމީހުން އިތުރަށް ދިރާސާކޮށް އެ ބައްޔަށް ބޭހެއް އުފެއްދޭނެ ގޮތެއް މެދުވެރިވާނެތީވެއެވެ.

ކަން ދިމާކުރި ގޮތުން ހިލްޔާއަށް ގުޅާފައި ދެވަނަ އިންޓަވިއުއަށް ވެސް އައުމަށް އެމީހުން އެންގިއެވެ. ހިލްޔާ އެ އިންޓަވިއުއަށް ދިޔައީ ލިޔުނު ޕްރޮޕޯޒަލް ހިފައިގެންނެވެ. އާދައިގެ މަތިން އިންޓަވިއު ގެ ކުރީކޮޅު ދިޔައީ ރަނގަޅަށެވެ. އެމީހުން އެދުވަހު ބޮޑަށް ކުރީ ވެސް ދިރާސީ ސުވާލުތަކެވެ. ދިރާސާއަށް ހިލްޔާ ޝައުޤުވެރިކަން ހުރީ ކިހާ ވަރަކަށްތޯ ނަގައިގަނެވޭނެ ސުވާލުތަކެވެ. ދެން އެމީހުން ސުވާލު ކުރީ ވަޒީފާއެއް ލިބިއްޖެނަމަ ދެން ހުރެވޭނީ ކިތައް ދުވަސް ވަންދެންތޯއެވެ. ވީހާވެސް ގިނަ ދުވަހު ހުރެވޭނެތޯ ބަލާނެ ކަމަށް ހިލްޔާ ބުންޏެވެ.

އިންޓަވިއު ނިމެން ގާތްވިއިރު ކުރީ ދުވަހެކޭ ވެސް އެއްފަދައިން އިންޓަވިއު ކުރަން ތިބި ތިން މީހުންގެ ތެރެއިން، މެދު ޢުމުރުގެ ޗައިނާ އަންހެން މީހާގެ މޫނުމަތިން ފެނުނީ ހިލްޔާގެ އެ ފަހު ޖަވާބާއިމެދު ހިތްހަމަނުޖެހުނު އަސަރެކެވެ. އެހެންކަމުން އޭނައަށް މި ވަޒީފާ ނުލިބުން ގާތްކަމަށް ހިލްޔާގެ ހިތް ބުންޏެވެ. ދިޔަޔަސް އެންމެ ރަނގަޅު ކަމަށް ބުނުމުން ހިލްޔާ އަތުގައި އޮތް ފައިލާއިއެކީ ގޮނޑިން ތެދުވުނެވެ.

“ދިޔުމުގެ ކުރިން، އެއްޗެއް ޙަވާލު ކޮށްލިޔަސް އެންމެ ރަނގަޅުތޯ؟” ހިލްޔާ އިނގިރޭސި ބަހުން އެހިއެވެ.

“ކޯޗެއްތޯ؟” މެދުގައި ހުރި އެ އަންހެން މީހާ އެހިއެވެ.

“ޕްރޮޕޯޒަލެއް. ޗައިނާގައި މިވަގުތު ފެތުރެމުންދާ ބައްޔަށް ދެވިދާނެ ފަރުވާއަކާމެދު.” ހިލްޔާ ހުރިތާހުރެ ބުންޏެވެ. އެހިނދު ކުޑަކޮށް ނުތަނަވަސް ވިޔަސް ހިތަށް ސާބިތުކަމެއް ލިބިފައިވިއެވެ. އޭނަ މި ކުރާ ކަމެއް ކުރަން އުޅެނީ ހެޔޮ ނިޔަތެއްގައި ކަން ޔަޤީންވީތީވެއެވެ.

“ދެއްވާ…” އެއްކަލަ އަންހެން މީހާ އެއްފަހަރު ބޯޖަހާލަމުން ބުންޏެވެ.

އެއާއިއެކު ހިލްޔާ އެ ފައިލު ހިފައިގެން ގޮސް އަންހެން މީހާގެ ކުރިމަތީގައި ބޭއްވިއެވެ. އެ އަންހެން މީހާ ފައިލް ހުޅުވާލި ވަގުތު ހިލްޔާ ވާހަކަ ދެއްކިއެވެ.

“އަޅުގަނޑަށް ވަރަށް މިފަހުން ކޮންޓެމިނޭޓް ވެފައިވާ އާފަލެއް ކެވިފައިވަނީ. ހޮސްޕިޓަލުން ބަނޑުގައި އުފެދޭ ފާރު ހިއްކާ ބޭސް ދިނީ. އެ ބޭހުން އަޅުގަނޑުގެ ތަދު ރަނގަޅުވީ މަދު ދުވަސްކޮޅަކަށް. ޗައިނާގެ މުސްކުޅި މީހެއްގެ ފަރާތުން އެނގުނީ ވަކި ވައްތަރެއްގެ ސައިފަތަކީ ޗައިނާގެ ބޭސްވެރިކަމުގަ ބަނޑުގެ ފާރު ރަނގަޅު ކުރަން އެންމެ ރަނގަޅު ސައިފަތް ކަން. އެ ސައިފަތުން ސައިބުއިމުން އަޅުގަނޑުގެ ތަދު ރަނގަޅުވޭ. އަދި ވެސް ދޭތެރެ ދޭތެރެއިން ތަދުވޭ. އެކަމަކު ހީވަނީ އެ ސައިފަތް ބޭނުން ކުރަންވީ މިންވަރު އެނގިއްޖެނަމަ އެއީ މި ބައްޔަށް ފަރުވާއަކަށް ވާނެހެން. ބަނޑުގެ ފާރު ސައިފަތުގަ ހުރި ކޮން މާއްދާއަކުން ކަން ހޯދައި ބެލުމަކީ ފަރުވާ ހޯދުމަށް މުހިއްމު ކަމެއް ކަމަށް އަޅުގަނޑު ދެކެން.”

ހިލްޔާ ތަފްޞީލުކޮށް ކިޔައިދިނެވެ. އެ އަންހެން މީހާ އެއްފަހަރު އެ ފައިލްތަކުގައިވާ ގަނޑުތަކަށް އަނެއްފަހަރު ހިލްޔާއަށް ބެލިއެވެ. އަދި ލުއި ހިނިތުންވުމަކާއެކީ ވާހަކަ ދެއްކިއެވެ.

“އެންމެ ރަނގަޅު ޑޮކްޓަރ ހިލްޔާ ނަހީދު. އަޅުގަނޑުމެން ގުޅާލާނަން.” އަންހެން މީހާ ބުންޏެވެ. ޖަވާބުގައި ހިލްޔާ ތުން ފިއްތާލަމުން ހިނިތުންވުމެއް ދައްކާލިއެވެ. އަދި ޝުކުރު އަދާ ކުރުމަށްފަހު ދާން ހިނގައިގަތީ، އެ ފަހު ބަސްތަކުގެ މާނައަކީ އޭނައަށް ވަޒީފާ ނުލިބޭ ކަމުގެ މެއިލް އަންނާނެ ކަމަށް ނިންމަމުންނެވެ.

އެހެނަސް ކަންތައް ވެގެން ދިޔައީ ހިލްޔާ ހީކުރި ގޮތަކަށް ނޫނެވެ. އޭގެ 3 ދުވަސްފަހުން ހިލްޔާއަށް އެމީހުން ގުޅާލީ، ވަޒީފާ ލިބުނު ވާހަކަ ބުނުމަށެވެ. ހެނދުނު ވަގުތު ލިބުނު ފޯނު ކޯލުން ލިބުނު އެ ޚަބަރު ޤަބޫލު ކުރަން ވެސް ހިލްޔާއަށް ދަތިވިއެވެ. އެމީހުން ބުނި ގޮތުގައި ހިލްޔާއަށް ރެޒިޑެންޓެއްގެ އިތުރުން ދިރާސާވެރިންގެ ޓީމެއްގައި ވެސް ހިލްޔާ ހިމަނަން އެމީހުން ބޭނުންވެއެވެ. ހިލްޔާ އެކަމަށް އެއްބަސްވިއެވެ. އެ ފޯނު ކޯލު ނިމުމުން ދާނިޝްއަށް ގުޅައި އެ ޚަބަރު ދިންއިރު ވެސް ހިލްޔާއަށް ހުރެވުނީ ޤަބޫލު ނުކުރެވިފައެވެ. އެހެނަސް މާ ގިނައިރެއް ނުވެ، މިވެސް އޭނަ ކުރި ދުޢާއެއްކަން ހިލްޔާއަށް އެނގުންވިއެވެ. ﷲ އަކީ ހަމަ ޔަޤީނުން ވެސް ދުޢާ އިޖާބަ ކުރައްވާ ރަސްކަލާނގެކަން އަނެއްކާވެސް އެނގުންވުމުން ހިލްޔާއަށް ސިޓިންގް ރޫމުގައި ހުރެވެސް ސަޖިދައަށް ދެވުނެވެ.

**

ހިލްޔާއަށް ވަޒީފާ ލިބުނީތީ ދާނިޝް ހިލްޔާގެ އުފަލުގައި ބައިވެރި ވިޔަސް، ދާނިޝް އަނެއްކާވެސް އަމިއްލަ ފިކުރުތަކުގެ ތެރޭގައި ބަނދެވިފައިވިއެވެ. ހިލްޔާއަށް ވަޒީފާ ލިބުނު ދުވަހަކީ، ދާނިޝް އެ ވާހަކަތައް ހިލްޔާއާއި ޙިއްސާ ކުރަން ބޭނުންވި ދުވަހެވެ. އެހެނަސް ހިލްޔާގެ އުފާވެރި އަޑު އިވިފައި އޭނަގެ ސަބަބުން ހިލްޔާގެ މޫޑު ޚަރާބުވާކަށް ދާނިޝްގެ ހިތް ނޭދުނެވެ.

ޙަޤީޤަތުގައި އަދި އަދަށް ދާންދެން ވެސް ކުންފުންޏަށް ވަރަށް ގިނަ ގެއްލުންތަކެއް ވަމުން ދިޔައެވެ. ވަކިން ޚާއްސަކޮށް ކުންފުނި އިތުރަށް ކުރި އެރުވުމަށް ކުންފުނިން ނެރުނު އާ އުފެއްދުމަކާއިމެދު ވެސް މީޑިއާގައި ނޭދެވޭ ޚަބަރު ފެތުރުނު ފަހުންނެވެ. ދާނިޝް ވަނީ އެ ޚަބަރު ފެތުރި ޗެނަލާއި ދެކޮޅަށް ކޯޓަށް މައްސަލަ ހުށަހަޅާފައެވެ. ރަނގަޅު ސަބަބެއް ނެތި ކުންފުނީގެ ނަން ހުތުރުވާނެ އަރާނެ ފަދަ ގޮތްގޮތަށް ޚަބަރު ފަތުރާތީވެއެވެ. އެ މައްސަލައިގައި ކުންފުންޏަށް ކުރިއެރުން ލިބޭނެކަމަށް ކުންފުނީގެ ލީގަލް ޓީމުން ޔަޤީންކަން ދިނެވެ. އެ ޙާލަތުގެ ގޮތުންނެވެ. އެ އުފެއްދުމުގައި ޢާއްމު މީހުންނަށް ގެއްލުންވާ ފަދަ އެއްވެސް ކަމެއް ނެތެވެ. އަދި އެހާ މަޝްހޫރު ނުވިޔަސް އެ އުފެއްދުން ދިޔައީ މީހުންގެ ތެރޭގައި މަޑުމަޑުން މަޤްބޫލުވަމުން ދިޔައެވެ. އެ ޚަބަރު ފެތުރުމުގެ ކުރިންނެވެ.

ކުންފުންޏަށް ބޮޑު ތަނުން ގެއްލުންވަމުން ދަނިކޮށް އަނެއްކާ އެފަދަ ކަމެއް ދިމާވުމުން ދާނިޝްއަށް އަނެއްކާވެސް ހުއްޓުމެއް ނެތި ކުންފުނީގެ ތަފާސް ހިސާބުތަކަށް ބެލެން ފެށިއެވެ. ކުންފުނީގެ ފައިދާ ޖެހޭ މިންވަރު ދުވަހަކުވެސް ދަށް ނުވާވަރަށް ދަށްވަމުން ދާތީ ދާނިޝް ވަރުބަލިވެފައިވިއެވެ. ކުންފުނީގެ ޙާލަތު ރަނގަޅު ކުރަން ކުރި އެއްވެސް ކަމަކުން ކުރި އެރުމެއް ނުލިބުނީތީ ނުތަނަވަސް ވަމުން ދިޔައެވެ. މިއަށްވުރެ ބޮޑަށް ގެއްލުންވެއްޖެނަމަ އޭނަ ހިލްޔާއާއިއެކީ ދާން ޖެހޭނީ އަދި މާ ދަށް ޙާލަތަކަށްތޯ ހިތަށް އަރަމުން ދިޔައެވެ.

އެ ޚިޔާލު ހިތަށް ވެރިވުމުން ދާނިޝް ނަމާދާއި ދުޢާއިން ވާގި ހޯދިއެވެ. އޭނައާއި ހިލްޔާއަށް އިތުރު ގެއްލުމެއް ނުވުމަށް އެދި ދުޢާ ދެންނެވިއެވެ. ދެމަފިރިންނަކީ ވެސް ﷲ އަށް ކިޔަމަންތެރި އަޅުން ކަމަށްވުމުން އެ ކިޔަމަންތެރިކަމުގައި ޢާފިޔަތުގައި އުޅުމުގެ ތައުފީޤު ދެއްވުމަށް އެދި ދުޢާ ކުރިއެވެ.

**

އެރޭގެ ވަގުތެއްގައި ރާފިލް އަމިއްލަ ގޭގެ ސިޓިންގް ރޫމުގައި އިނީ އަތުގައި އޮތް ފޯނުން ފޮޓޯތަކަށް ބަލާށެވެ. އެއް ފޮޓޯއިން ފެންނަނީ ދާނިޝް ނުހަނު އާދައިގެ ހެދުމެއްގައި ދަނޑުގައި ދާހިއްލާފައި ހުރި މަންޒަރެވެ. އެކަހަލަ ދެތިން ފޮޓޯއަކަށް ފަހު ދެން ފެނުނީ ހިލްޔާ ޓެކްސީއަކަށް އަރާ މަންޒަރެވެ. އަދި ހިލްޔާ ނުހަނު އާދައިގެ ފިހާރައަކަށް ވަދެ ގެއަށް ބޭނުންވާ އެއްޗެހި ގަންނަ މަންޒަރެވެ.

ޓްރޯލީ ކޮއްޕަމުން ފިހާރައިގެ ހަރުގަނޑެއްގެ ކައިރީގައި ހުރި ހިލްޔާގެ ފޮޓޯގައި ހިލްޔާގެ މޫނު ކައިރިވާނެހެން ރާފިލް ޒޫމް ކުރިއެވެ. އެ ލޮލުގައި ހުރި ވަރުބަލިކަން ފާހަގަވުމުން ރާފިލްގެ މޫނުމައްޗަށް ވެރިވީ އެއްމިޔަކަނުގެ ހިނިތުންވުމެކެވެ.

“އޮހް ހިލްޔާ. ހިލްޔާ ހިލްޔާ ހިލްޔާ…..” ރާފިލް މަލާމާތުގެ ރާގަކަށް އެ ނަން ކިޔަމުން ނުލަފާ ޒާތަކަށް ހޭން ފެށިއެވެ.

ހަމަ އެހިނދު ރާފިލްގެ ފޯނަށް ހައުރަން ގުޅަން ފެށިއެވެ. ހިލްޔާގެ މޫނު އެ ކޯލުގެ ސަބަބުން ފޮރުވިގެން ދިޔުމުން ރާފިލް ފޫހިވިއެވެ. ފޯނު ނެގީ އެ ފޫއްސާއި އެކީގައެވެ.

“ހެލޯ؟” ރާފިލް ފޯނަށް ޖަވާބުދާރީވިއެވެ.

“ހެލޯ…ކޮބާ މިކޮޅުން ކުރަންޖެހޭ ހުރިހާ ކަމެއް ކުރަމުން މި ދަނީ. ހަމަ ޔަޤީން 6 މަސް ވާއިރު ވެސް ދާނިޝްއަށް ކުންފުނި ނަގަހައްޓައި ނުގަނެވޭނެ.” ހައުރަން ޔަޤީން ކަމާއިއެކީ ބުނެލި ވާހަކައިން ރާފިލްގެ ހިތަށް އިތުރު ހިތްހަމަޖެހުމެއް ލިބުނެވެ.

“ހާދަ މޮޅޭ ހައުރަން! ތިއީ މީހަކީ!” ރާފިލް ކަންފަތުގައި ފޯނު ޖައްސައިގެން ސޯފާއަށް ލެނގިލަމުން ބުންޏެވެ.

“ހޫނ ދެން ލަސްނުކޮށް އެ އަންހެން މީހާ އަތުލާ. އޭރުން ތި ދާނިޝް ޑިޕްރެޝަނަށް ދިޔައިމަ އޮފީހުން ނެރެލެވޭނެ.” ހައުރަން ބުންޏެވެ.

“ތި ދެން ވެ ނިމިފަ އޮތް ކަމެއް ކަމަށް ބަލާ. މިހާރުއްސުރެ ބުއިމަކަށް ދާން އަހަންނަށް ފެންނަނީ. ހަހަހަ…” ރާފިލް އާއި އެކީ ފޯނުގެ އަނެއްކޮޅުގައި ހުރި ހައުރަން ވެސް ހޭންފެށިއެވެ.

ނުނިމޭ